TBP Balochi

یک ماھے زمین ءَ اَتک کہ آ شھید بالاچ مری ءِ رنگ ءَ اَت

نبشتہ کار: واحد بخش بلوچ

رجانکار: موسٰی بلوچ

دی بلوچستان پوسٹ

پنچیں دریا تئی ھون بہ بنت
انگت بیر نہ بنت منی بالاچ ءِ

20 نومبر 2007 بلوچ ءِ واستا یک سیاھیں روچے بیت، ھمے شپ ءِ 11 بج ءَ سنگتے ءِ گوانکو توار کنت ءُ دردناکیں ھالے سر بیت وھدے کہ پون ءَ گیپ تا زانگ نہ بیت کہ کجام دلیری ءَ گوں سنگت ھمے ھبر ءَ گْوش اِیت کہ بالاچ مری شھید کنگ بوتگ۔سردار زادہ میر بالاچ مری ءِ ھال سرجمیں ھلک ءَ سر بیت بلوچ نوجوان اے ھبر ءَ اِشکن اَنت گڑا دگانی سر ءَ درکپ اَنت ٹیلی وژن ریڈیو ءُ مزن مزنیں اینکر پرسن بلوچ نہ بنت بلے شھید ءِ کسانی ءَ بگر داں شھادت ءَ تک زندگی ءِ سر ءَ چار اِتگ شھید انکلاب میر بالاچ مری 17 جنوری 1996 ءَ کوھَلو کاھان ءَ ودی بیت آئی ءَ وتی بنداتی وانگ کوئٹہ گرائمر اسکول ءَ ونتگ ءُ دیمتر ءِ وانگ ءِ ھاتر ءَ روس ءِ دارالحکومت ماسکو ءَ روت کہ اود ءَ بالاچ ماسٹرز انجینئرنگ ءُ صحافت ءِ ڈگری ءَ گیپت۔

1978 ءَ سردار خیربخش مری ءُ مری قبیلہ ءِ بازیں مردم افغانستان ءَ رو اَنت ءُ مری بالاچ مری ھم نواب خیر بخش مری ءِ ھمراہ بیت باز وھد ءَ پد مری قبیلہ ءُ سردار مری ءِ ھمراہ بلوچستان ءَ کاینت ءُ پد ءَ 1999 آ لندن ءَ روت ھمے وھد ءَ بلوچستان ءَ جسٹس نواز مری وھدے کہ کُشگ بیت گڑا آئی ءِ کُشگ ءِ الزام سرادار مری ءُ آئی ءِ زھگ بالاچ مری ءُ قبیلہ مری ءِ سزا جنگ بیت۔ بلے آ کیس انگت کسی سر ءَ ثابت نہ بیت ھمے وھد ءَ بالاچ مری ءَ برتانیہ ءَ جلاوطنی ءِ وھد ءَ سندھی بلوچ فورم، بلوچستان ایکشن کمیٹی یوکے، بلوچ رائٹس کمیشن ءِ رھشونی ءَ گوں هوار بیت۔ ھمے وھد ءَ 2002 ءِ الیکشن بنت بالاچ مری اود ءَ ساڑی نہ بیت بلے وتی پارمزاں جم کنت ءُ آ وتی مخالف امید وار محبت خان مری ءِ ھلاپ ءَ بلاھیں مُچی ءَ گوں بلوچستان اسمبلی ءِ باسک گچین کنگ بیت. 2002 ءَ بلوچستان ءَ کیت ءُ مریانی مزنیں کساسے ءَ گوں جلوس ءِ رنگ ءَ بلوچستان اسمبلی ءَ کیت اسمبلی ءَ حلف چست کنگ ءِ وھد ءَ بالاچ مری ءَ بلوچستان ءَ گوں وپاداری ءِ نئرہ ءَ برز کنت چریشی ءَ ءُ پد، سردار زادہ میر بالاچ مری اسمبلی ءِ نیمگ ءَ دو اجلاس ءَ روت وزارت ءُ اسمبلیءَ ٹشو پیپر ءَ گوں تشبیہ دنت وتی جند ءِ دمگ کوھلو کاھان ءَ روت کہ اود ءَ آ گوں دُرسیں مری بگٹی قبائل باز وھد ءَ پد هون ریزی ءَ جاہ کن اَنت۔ میر بالاچ مری بلوچ جنگجوهانی رھشونی ءَ کنت ءُ کوھلو ءِ کوھاں روت ءُ جد ءُ جھد کنت ءُ آزادی ءِ جنگ ءَ بندات کنت۔

نواب محمد اکبر بگٹی ءِ دمگ ڈیرہ بگٹی ءَ فوجی آپریشن بندات بیت گڑا 17 مارچ 2005 ءَ ڈیرہ بگٹی ءِ گولہ ءُ راکٹ باری بیت ھمے وھد ءَ 74 بگٹی، ھندوسکھ شھید بنت ءُ سک باز مردم ٹپّیگ بنت بلے استان دومی کامیاب فوجی آپریشن ءِ تیاری ءَ بندات کنت نواب محمد اکبر بگٹی جاورهالاں پھم اِیت 31 دسمبر 2005 ءَ کوھاں روت ءُ جنرل مشرف وھدیکہ کوھلو ءِ دور ءَ کنت گڑا اے وھد ءَ ایشانی سر ءَ بلوچ جنگجو راکٹ اُرش کن اَنت. اے اُرش ءِ الزام ھم میر بالاچ مری ءَ جنگ بیت نواب اکبر بگٹی وھدیکہ ھرانائی ءِ کوھاں شھید کنگ بیت گڑا اے وھد ءَ میر بالاچ مری ءِ شبید بُوهگ ءِ ھال ھم کیت بلے رند ءَ اے دروگ پدر بیت-

20 نومبر 2007 ءَ بلوچ گوریلا لیڈر بالاچ مری ءِ شھادت ءِ ھال کیت. سرجمیں بلوچستان اَندوہ بیت میر بالاچ مری ءِ شھادت ءِ بارو ءَ میان اُستمانی ادارہ (بی بی سی) ءِ گوما گپ ءُ گال بیت میر بالاچ ءِ برات نوابزادہ میر گزین مری گْوش اِیت بالاچ مری پاکستانی فورسز ءِ اُرش ءَ شھید بیت. سیکیورٹی ءُ پاکستانی فورسز ءِ سوب ءَ انقلاب ءَ چیریں جاہ ءَ کبر کن اَنت. میر بالاچ ءِ شھادت ءَ پد بلوچ ءِ وت واجهی ءِ جد ءُ جھد میان اُستمانی دنیا ءِ باوست بیت. بالاچ مری ءِ شھادت ءَ پد میان اُستمانی ادارھاں ھم بلوچ ءِ جیڑه گیّشینتگ بلوچ نوجوان بلاھیں کساسے ءَ بلوچ راجی آزادی ءِ جھد ءَ ھوار بنت۔شھید میر بالاچ مری ءِ شھادت ءَ پاکستانی فورسز ءِ نیمگ ءَ الزام جنگ بیت کہ بالاچ مری ءَ را براھمدگ بگٹی ءَ شھید کُتگ اے ھالے دومی روچ ءَ براھمدگ ءَ اے ھبر رد کت ءُ گْوشت اِش کہ من ءَ ھچ برات نیست اگاں برات ءِ رنگ ءَ کسے بوتگ، آ بالاچ بوتگ ھمے وڑ ءَ میر بالاچ مری ءِ پت بلوچ کوم دوست بابا خیربخش مری ءَ (بی بی سی)اردو ءَ گوں گپ ءُ گال کُت ءُ اے ھبر ترندی ءَ گوں رد کت ءُ گْوشت کہ براھدگ ءَ چہ ھچ شک نیست براھمدگ چون وتی چم کش اِیت-

بالاچ مری ءِ شھادت ءَ چہ پد بلوچ نوجوان ھزارانی کساس ءَ دگانی سر ءَ در کپ اَنت سرکاری مشینری ءُ گاڈیانی سوچگ پروشت ءُ پروش دیراں داں بناه بیت. دومی روچ ءَ مھتاک ءَ شھید ءِ شھادت ءِ ھبر شھید ءِ اکس ءِ ھمراہ شنگ کت. شھید بالاچ مری ءِ اکس کہ دیست اَنت چم هیران بوت اَنت بلے اناگت دل ءَ ھمے ھیال اَتک کہ چے کن ئے ما مجبور ایں ما گلام ایں ایشی ءَ پد بلوچستان ءَ بلوچانی گار ءُ بیگوائی ءِ درچ بندات بیت اے وھد ءَ باز بلوچ گار ءُ بیگواہ بیت باز انگت گار ءُ بیگواہ اَنت ءُ بازیں لاش دست کپتگ ءُ جسمانی ءُ ذھنی ھوالہ ءَ نزور بنت کہ آیانی تہ ءَ نورا مری ھم ھوار اِنت کہ انگت زند ءُ مرگ ءِ کش ءَ اِنت۔ھمے وڑ ءَ تُربَت ءِ دمگ ءَ سے بلوچ پرزند واجہ گلام محمد بلوچ لالا منیر بلوچ ءُ شیر محمد بلوچ ءَ گار ءُ بیگواہ کنگ ءَ چہ رند آیانی ژانگولیں لاش دست کپ اَنت ھمے وڑ ءَ بلوچستان ءِ تہ ءَ انگت گار ءُ بیگوائی برجاه اِنت. ما اد ءَ شھید انکلاب میر بالاچ مری ءِ شہادت ءَ گپ ءُ گال کنگ آں چناھا مردم گْوش اَنت آزادی مزنیں جد ءُ جھدے ءُ کربانی ءَ چہ پد گرگ بیت۔بلوچ زرمبشت ءِ تہ ءَ شھید انکلاب بالاچ مری ءِ شہادت ءَ چہ پد مزنیں تاوان ءِ اے وھد ءَ شھید انکلاب بالاچ مری ءَ را بلوچ تحریک ءِ تہ ءَ چی گویرا ءِ نام دیگ بیت ءُ انگت آئی ءَ را بلوچ چی گویرا گشنت۔

شھید بالاچ مری یک دلیر ءُ نہ ترسیں بلوچے اَت کہ ایشی ءَ پد بلوچ جنگجووانی کمان ءَ نوابزادہ ءَ براھمدگ بگٹی وتی دست ءَ کنت ءُ انگت منظمی ءَ گوں بلوچ آزادی ءَ پہ دوبر جد ءُ جھد ءَ اَنت. وتی شھیدانی کربانیانی ءُ جنگجوانی سوبمندی اَنت کہ میان اُستمانی میڈیا ءَ ھم بلوچ ءِ نام دیم ءَ اتکگ ءُ میان اُستمانی دنیا ھم بلوچ ءَ را یک نہ ترسیں راجے سرپد بیت. بلوچ نوجوان مزنیں کچے ءَ ھوار اَنت ءُ شھید انکلاب میر بالاچ مری ءِ جتائی ءَ تحریک کمزور بوهگ ءِ جاه ءَ گیش مھکم بُووْوان اِنت.

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

کلات ءِ شھر ءَ ریاست ءِ کھر دابی ،اشفاق ء خدا بخش ءَ ھوار شھر ءَ درزنانی کچ ءَ مردم بیگواہ کنگ بیتگ انت- بلوچ یکجھتی کمیٹی

بلوچ یکجھتی کمیٹی ءَ وتی یک درشانے ءَ گوشتگ کہ کلات ءِ شھر ءُ کش ءُ گوری دمگاں ریاستی کھر بندات بیتگ انت سر بیتگیں اھوالانی رد ءَ کلات ءِ شھر سرجم ءَ انگیر ءَ انت ءُ لوگ لوگ ءَ پٹ ءُ پول ءُ بیڑ برگ ءَ انت اے وھد ءَ داں انگت ءَ سر بیتگیں اھوالانی رد ءَ سِی ءُ پنچ مردم ءَ گیش مردم بیگواہ کنگ بیتگ انت- ایشانی توک ءَ یکے ءِ پجار اشفاق بلوچ ء خدا بخش ءِ نام ءَ زانگ بیتگ کہ آ گوستگیں شپ ءَ کلات ءَ چہ جند ءِ لوگ ءَ آوار جنگ بیتگ-

بی وائی سی ءَ وتی درشان ءَ گوشتگ اشفاق اھمد ء خدا بخش کہ سوشل ورک ڈپارٹمنٹ پنجاپ یونیورسٹی ءَ ھمے زوتاں پارگ بیتگ کہ آ چہ جند ءِ لوگ ءَ زورانسری بیگواہ کنگ بیتگ-

آئی ءَ گوشتگ پوج ءَ لوگ ءِ چاردر ءُ چار دیوالی پامال کنان ءَ لوگ ءَ جاڑیگیں شیر مِچیں زھگ جتگ انت ءُ پاک تاک کران ءِ کمشرپی کتھ ءُ کھول ترسینگ ءِ واستا تیرگواری کتگ-

درشان ءَ گوشگ بیتگ کہ بلوچ یکجھتی کمیٹی اشفاق اھمد ءَ ھوار دگہ بیگواھیں مردماں سلامتی ءَ یل دیگ ءِ لوٹ ءَ کنت اِنت-

بلوچستان ءِ تیابدپی شھر گوادر ءَ ناشناسیں مردماں بیڑ بران ءَ 7 گاڑی اش مانداشتگ انت ءُ کوسٹل ھائی وے ءَ پولیس ءِ یک چوکی ءَ را تاوان اش داتگ-

گوادر ءِ انتزامیہ ءِ یک کارندھے ءَ گوں بی بی سی اردو ءَ گپ کنان ءَ گوشتگ اے اُرش کوسٹل ھائی ءَ پسنی ءُ اورماڑہ ءِ میانی دمگ ماکولہ ءَ پیش اتکگ –

کارندہ ءَ گوشتگ سلاہ بندیں مردماں درستاں پیش دمگ ءَ کوسٹل ھائی وے ءَ پولیس ءِ یل چوکی ءِ سر ءَ اُرش کتگ ءُ اود ءَ جاڑیگیں کارندھانی سلاہ پچگپتگ انت-

کارندہ ءَ گوشتگ پد ءَ سلاہ بندین مردماں دمگ ءَ راہ بستگ ءُ اود ءَ 7 گاڑی تاوان داتگ انت کہ ایشانی توک ءَ کوسٹل ھائی وے پولیس ءِ یک گاڑی یے ھم ھوار انت-

کوسٹل ھائی وے ءَ سکیورٹی ءِ زمہ واری پولیس ءِ سر ءَ انت-

کوسٹل ھائی وے پولیس ءِ ایس پی حفیظ امیر ءَ گوشتگ اُرشکاراں کوسٹل ھائی وے ءِ پولیس یک گاڑی ءَ سوچگ ءَ ھوار سَے ایل پی جی ٹینکر ھم مانداشتگ انت-

آئی ءَ گوشتگ دگہ سَے ایل پی جی گاڑیانی ٹینکرانی گوات کش اتگ انت ءُ ھم ناکارہ کتگ انت-

کارندہ ءِ رد ءَ ایل پی جی ٹینکر کراچی ءَ دیم پہ ایران ءِ نیمگ ءَ روگ ءَ بیتگ انت-

زانگ بہ بیت ٹینکرانی سر ءَ چہ ایران ءَ سندھ ءُ پنجاپ ءَ ایل پی جی آرگ ءَ انت-

گوادر ءَ کوسٹل ھائی وے ءَ پیش ھم سکیورٹی پورسز ءِ سر ءَ یکشل ءَ اُرش بیتگ انت-

ھمے سال ءَ بلوچستان ءَ بلوچ سلاہ بندیں گلانی نیمگ ءَ مزنیں شھدگانی بندگ ءُ اود ءُ بیڑ برگ ءِ چارُمی وئیل انت-

ایشی ءَ پیش گوستگیں ماہ ءَ کچھی ءَ بولان،بارکھان رڑکن ءُ کلات منگچر ءَ ھائی وے ءِ اُرش ءُ راہ بندگ بیتگ انت-

بلوچستان ءِ تیاب دپی شھر گوادر ءِ تھسیل جیوانی ءِ دمگ چہ روبار ءَ یک سُتکگیں لاشے دزکپتگ-

ھالانی رِد ءَ لاش سر سلامت اِنت بلے سرجمیں بدن سُتکگ-

لاش ءِ پجّار شاھد ء عبدالحمید نام ءَ چہ بیتگ- دمگی مردمانی رِد ءَ اے مرد پاکستانی پوج ءَ بیست شش جولائی دوھزار بیست سے ءُ چہ گوادر بیگواہ کتگ – چریشی ءَ پد سیزدہ ستمبر دوھزار بیست سے ءَ گوادر پولیس ءِ دست ءَ داتگ – وھدے کہ مروچی اشی ءِ سُتکگیں لاش دزکپتگ-

زانگ بہ بیت کہ بلوچستان ءَ بیگواھیں مردماں دروگیں میڑاں کُشگ ءُ لاشانی دزکپگ ءِ سبب ءَ زورانسری بیگواھیں مردمانی کھول سک تُرس ءِ آماچ اَنت-

بلوچ یکجھتی کمیٹی ءِ راھشون سمی دین بلوچ ءَ چاگردی رسانکدر ءَ شنگ کتگیں وتی یک درشانے ءِ تہ ءَ گْوشتگ کہ مشکے ءِ دمگ شریکی ءَ بیست ھشت پروری ءَ پاکستانی پوج ءَ یک میتگے ءِ سر ءَ بیڑبرتگ ھشت بلوچ ورنا آیانی کھولانی دیم ءَ آوار جتگ اَنت زورانسری بیگواہ کنگ بیتگیں مردمانی درگت ءَ جتاجتائیں انسانی ھکانی ادارھاں رپورٹ ھم شنگ کتگ-

آئی ءَ گْوشتگ کہ یک مارچ کھول وتی چُکانی یل کنائینگ ءَ مشکے نلی بُنجل ءَ سر بیتگ اَنت، اود ءَ آرمی بُنجل ءَ ساڑی ئیں میجر ءَ منّ اِتگ کہ سرجمیں ھشتیں ورنا پوج ءِ دست ءَ اَنت آیاں پٹ ءُ پول کنگ ءَ پد مروچی یل کن ایں- بلے گوستگیں شپ ءَ کساس ساھت سے ءَ، اشانی تہ ءَ چار ورنا کامران علیم، معراج، مومن اسلم، ءُ حفیظ یک ویرانگیں ھندے ءَ تیر جتگ ءُ کُشتگ اَنت-

سمی دین ءَ گْوشتگ وھدے سُھب ءَ کھول وتی چُکانی یل کنائینگ ءَ آرمی بُنجل ءَ روگ ءَ بیتگ اَنت، گُڑا راہ آیاں وتی دوستناکانی تیرسُپتگیں لاش دزکپتگ اَنت- آ دگہ چاریں ورنا انگت پوج ءِ دست ءَ اَنت، بلے آیانی درگت ءَ ھچ وڑیں سرپدی دیگ ءَ نہ اِنت-

بی وائی سی ءِ راھشون ءَ گْوشتگ کہ درکانودی کوش ناشرکاری ءِ درستاں چہ تُرسناکیں دروشم اِنت اود ءَ پیسر ءَ مردماں زورانسری بیگواہ کن اَنت، آیاں بے کساس جسمانی سسّائی لَٹ ءُ کُٹ ءِ نشانگ کنگ اَنت، ءُ پد دروگیں میڑاں کُش اَنت ئے ناشرکار اش گوش اَنت- اشی ءَ اَبید، اے زوراکی کجام مزنیں رسانکدر پیشدارگ ءَ نہ اِنت ءُ نانکہ کسے ھکمرانی واستا پکر ءِ سبب اِنت-

بلوچستان ءِ دمگ اورماڑہ ءُ پسنی ءِ میانی دمگ ءَ سلاہ بندین مردماں دگ بستگ ءُ پٹ ءُ پول کنگ ءَ انت-

دمگی مردمانی رد ءَ سلاہ بندیں مردم دمگ ءَ جاڑیگ انت ءُ دگ اش بستگ ءُ روک ءُ آیوکیں گاڑیاں پٹ ءُ پول کنگ ءَ انت-

اے درگت ءَ تنی وھدی واکداراں ھچ نہ گشتگ-

زانگ بہ بیت لھتے وھد انت کہ بلوچ سلاہ بندیں گلانی نیمگ ءَ اے ڈولیں کاروائی پیش آیگ ءَ انت – بلے داں انگت ءَ اے کاروائی ءِ زمہ واری کس ءَ پہ وت ءَ نہ زرتگ-

کلات ءِ نزیک ءَ یک وتکُش تراکے اُرش ءَ پوج ءِ کاروان نشانگ کنگ بیتگ-

گیشیں ھالانی رِد ءَ پاکستانی سرکاری واکدار ءَ بلوچستان ءِ دمگ کلات نزیک ءَ پاکستانی پوج ءِ یک کاروانے ءِ سر ءَ وتکش تراکے اُرش راست کنان ءَ گْوشتگ کہ اُرش ءَ یک کارمندے یے بیران ءُ چار ٹپی بیتگ اَنت-

کلات اُرش ءَ پوج گاڑی سرجمی ءَ تباہ بیتگ، وھدے کہ وئیل ءَ پد پوج ءَ وئیلجاہ انگیر ءَ کتگ-

سرکاری واکدار نیمگ ءَ چہ شنگ کتگیں درشان ءِ واکدار ءَ ٹاہ داتگ کہ پوج کاروان یک وتکش تراک اُرشے ءَ نشانگ کنگ بیتگ وھدے کہ اُرشجاہ ءَ یک زالبولے پاد کپتگ چریشی ءَ بنداتی ھالانی رِد ءَ گمان بیت وتکش تراکار یک زالبولے بیتگ-

تھکاری وزیر محسن نقوی ءَ قلات ءَ ایف سی ءِ کاروان سر ءَ وتکش تراک اُرش ایر جتگ-

کلات ءَ پوج کاروان سر ءَ بیتگیں وتکش تراک اُرش زمہ واری انگت ھچ گل ءَ نہ زرتگ-

شال پریس کلب ءِ سر ءَ پولیس ءِ اُرش

ٹی بی پی شونگال

یک مارچ ءِ سھب ءَ، ڈپٹی کمشنر سعد بن اسد ءِ سروکی ءَ پولیس ءَ شال ءِ پریس کلب ءِ سر ءَ بیڑ برتگ ءُ اھوالکارانی گون ءَ بدتمیزی کتگ ءُ اود ءَ جاڑیگیں سردار بھادر خان وومن یونیورسٹی ءِ استاد دزگیر کتگ انت-زانگ بہ بیت ایشی ءَ پیش مارچ 2024 ءَ بلوچ یکجھتی کمیٹی ءِ سمینار ءِ وھد ءَ شال ءِ پولیس ءَ پریس کلب ءَ را کبل جتگ ءُ بند کتگ ات- ھمے وڑ ریاستی زوراکیانی ھلاپ ءَ ھستیں زھرشانیانی کوریج دیگ ءِ پژدر ءَ ڈپٹی کمشنر یکشل ءَ اھوالکار ءُ پریس کلب ءِ انتزامیہ ءَ ترسینگ ءَ انت-

بلوچستان ءَ اھوالکاری ءَ بے جارانکی بندش انت ءُ سدانی کچ ءَ اھوالکار وتی زمہ واریاں پیلو کنگ ءِ پژدر ءَ زورانسری بیگواھی یا کُوشانی دیمپان بیتگ انت- پاکستان ءِ مزنیں واکدارانی درشاندابانی دیگ ءِ انکاری ءُ آجوئی ءِ اھوالکاری ءَ بندوکی ءِ اھوالکاراں ترندی ءَ ریاستی چمترسانی دیمپانی انت- راجی سیاست ءِ راہ بلوچستان ءَ پیش ءَ ڈنگر جنگ بیتگ، ءُ نی پریس کلب ءِ دروازگ وتی ھکانی واستا توار چِست کنگ بند کنگ بوگ ءَ انت-

لگُشتگیں رھبند ءُ اھوالکاری ءِ پادانی زمزیلاں ھواری ءَ راستی ءَ مھلوک ءَ سر کنگ ءَ دارگ ءِ بے سوبی ءَ پد، بلوچستان ءِ مزن واکدارانی نمائندگاں سرکار ءِ اے دابیں چہ زُلماں اھوالکاری ءَ ھکانی واستا جد ءُ جھد کنوکاں ترسینگ ءَ انت- بلوچستان ءَ ریاستی زوراکیانی ھلاپ ءَ یکشلیں ءُ ھمک روچی ئیں ڈول ءَ زھرشانی بوگ ءَ انت – بلے سنگینیں جاورانی گشینگ ءَ ابید ریاستی ادارہ اھوالکارانی سر ءَ وتی زور ءُ چمسُھری ءَ کنگ ءَ انت- کہ چریشی ءَ جیڑھانی گیش ءُ گیوار بوگ ممکن نہ انت-

دنیا ءَ اھوالکارانی پھریزی ءَ ھستیں ادارہ ءَ بلوچستان اھوالکارانی واستا ترسناکیں دمگاں ھوارینتگ، ءُ بلوچستان ءِ لگتمالیں راستیاں دنیا ءَ تالان کنگ ءُ راستی ءِ نویسگ ءِ پژدر ءَ ریاستی ادارھانی دستاں داں انگت ءَ 42 اھوالکار کُشگ بیتگ انت- بیست ءُ یکمی کرن ءَ اھوالکارانی ترسینگ ءُ دیم ءَ ڈنگر جنگ ءَ راستی چیر دیگ نہ بیت اِنت- ریاستی ادارہ،اھوالکارانی ادارھاں زور ءَ چکاسگ ءَ ابید، بلوچستان ءِ سنگینیں جیڑہ ءِ گیشنگ ءَ دلگوش بہ کن اَنت-

بلوچستان ءِ دمگ چہ کلات ءَ پاکستانی پوج ءِ یک کاروانے بمب اُرشے ءِ نشانگ کنگ بیتگ- اُرش ءَ پاکستانی پوج ءِ یک گاڑی یے نشانگ کنگ بیتگ-

کلات انتزامیہ رِد ءَ اُرش ءَ یک کارندھے مرتگ ءُ چار ٹپی بیتگ اَنت-

وئیل ءَ پد پوج مزنیں کچے ءَ وئیل جاہ ءَ سر بیتگ دمگ اش انگیر ءَ کتگ وھدے کہ تراک ءِ کچ درگت ءَ ھالانی آیگ پش کپتگ-

ھمے وڑ بارکھان ءَ پوج ءِ واستا راشن بروکیں گاڑی یے سلاہ بندیں مردماں تیرگواری کنگ ءَ پد مانداشتگ-

پاکستانی پوج ءَ آواران ءِ دمگ مشکے ءَ چار مردم کشتگ انت- دمگی مردمانی رد ءَ چاریں مردم پاکستانی پوج ءِ بندیگجاہ ءَ بند بوتگ انت-

کشگ بیتگیں مردمانی پجار کامران علیم، معراج، مومن اسلم ءُ حفیظ ءِ ناماں زانگ بیتگ انت-

زانگ بہ بیت 28 فروری ءِ شپ ءَ آواران ءِ دمگ مشکے ءَ پوج ءَ دگہ پنچ مردم بیگواہ کتگ انت کہ آیانی بارو ءَ دگہ ھچ اھوال نیست انت-