TBP Balochi

بلوچستان ءِ ھَند کیچ ءِ دمگ بالگتر ءَ پزور گاریں مردمانی بیگواھیانی بگیری ءَ گاریں مردمانی کھولانی نیمگ ءَ زھرشانیں نندانک برجاہ اِنت، چریشی ءِ سوب ءَ سی پیک ءِ مزن دگ ایم 8 پہ ھرچ وڑیں رَو آ ءَ بند کنگ بوتگ۔

نندانک ءَ مزنیں کچّے ءَ زالبول ءُ زھگ ھم گون اَنت کہ وتی دوستیں مردمانی آجوئی ءِ لوٹ ءَ کنگ ءَ اَنت۔

زھرشانی کنوکیں مردماں گْوشتگ: دانکہ گاریں مردم زاھر ءُ دیم ءَ آرگ نہ بنت، زھرشانی برجاہ اِنت ءُ دگ پچ کنگ نہ بیت۔

زھرشانی ءِ سوب ءَ تربت، گوادر، پنجگور ءُ شال ءِ میانجی ءِ زمینی رھوتکاری سرجم ءَ بند اِنت، مزن دگ ءِ دوئیں نیمگاں سدانی کچّ ءَ موٹل اوشت ءِ آماچ اَنت کہ ماں آیاں زالبول، کماش، زھگ ءُ ائید ءِ موکلاں رند گِساں واترّوکیں نودربر ھور اَنت۔۔

سرکار ءِ ھَندی مردمانی گْوشگ ایش اِنت بند ءُ بستی مردم (انتظامیہ) گوں زھرشانی کنوکاں نند ءُ نیاد ءِ جھد ءَ کنگ ءَ اِنت تاکہ جیڑہ توجیل کنگ بہ بیت۔

بلوچی زبان ءِ نامداریں جُھدکار ءُ نبشتہ کار ابدلستار بگٹی ءِ کتاب “بلوچی زبان ءِ گالوار، لبزانک ءُ بُنرھبند” جریدگ بوتگ ءُ انی بلوچ راج ءِ نودربر ءُ لس وانِندھاں اے کتاب رودراتکی ءُ تو ایرشُتی بلوچستان ءِ مزنیں شھر ءُ ھنداں دزکپ ایت۔

شنگ بیتگین درشان ءَ گوشگ بیتگ عبدالستار بگٹی چہ بلوچستان یونیورسٹی ءَ ٹیل ءُ گیس ءِ انجینئیرنگ کُرتگ ءُ انی ٹیل ءُ گیس ءِ کارجاہ(انڈسٹری) ءَ سینئیریں پرپیشنل انجینئرے پمیشکا راجکاری ءِ زُبانزانتیں مردم گْوشگ ءَ اَنت کہ آئی ءِ نبشتگیں کتاب ءِ تہ ءَ راجی زبان ءِ جتا جتائیں.جیڑھاں ھلاس کنگ ءِ جھد کتگ ءُ بلوچی زبان ءُ آئی ءِ نبشتہ ءَ بے کساس دیمروی رس ایت پرچا کہ ھمے کتاب ءِ تہ ءَ بلوچی زبان ءِ گالوار، لبزانک ، ءُ نبشتہ بُنرھبند ءِ ھر وڑیں سرپدی درشان کنگ بیتگ اَنت۔

عبدلستار ءَ وتی شنگ کتگیں درشان ءَ گوشتگ اے کتاب کالج ءُ یونیورسٹی ءِ بلوچ نودربر ءُ وانِندھاں نوکیں رسانکدری ھُنر(موڈرن کمیونیکشن سِکل)، نبشتہ ءُ زِند ءِ ھر پِڑ ءَ ھم پائدگ دنت۔

آئی ءَ گوشتگ مھمد شکاری ءُ دِگہ بلوچی زبان ءِ جُھدکار ءُ زانتکارانی رِد ءَ من اے کتاب بلوچی زبان ءِ یک شریں دربری یے کہ ھمے کتاب ءِ تہ ءَ بلوچی گالوار، لبزانک ءُ بُنرھبند ءِ بابت ءَ ھر وڑیں سرپدی دیگ ءِ جھد کتگ۔

آئی ءَ گوشتگ باید اِنت بلوچ زبان دوست ءُ راجدوستیں مھلوک واجہ ءِ کتاباں زُور اَنت، وان اَنت ءُ وتی سْیاد ءُ سنگتاں ھم ٹیکی بہ کن اَنت کہ راج ءِ تہ ءَ بلوچی وانگ ءُ راست نبیسگ البار بہ بیت ءُ واجہ ابدلستار بگٹی ءِ وڑیں آدگہ بلوچ راجی زبان ءِ جھدکاراں دلبڈی بہ رس ایت کہ بلوچی زبان ءِ سر ءَ گیشتَر کار پٹ ءُ پول بہ کن اَنت۔

شال ءِ رودرتکی بائی پاس ءَ پسانی منڈی ءِ نزیک ءَ پولیس کارمندانی سر ءَ دستی بمب اُرشے کنگ بیتگ، چریشی ءِ آسر ءَ ایس ایچ او ءَ ھوار سے مردم ٹپی بیتگ اَنت-

پولیس رِد ءَ ناشناسیں پرپٹ سواراں پولیس ءِ گاڑی نشانگ کتگ ءُ دستی بمبے چگل داتگ چریشی ءِ آسر ءَ تُرندیں تراکے بیتگ-

تراک ءِ آسر ءَ ایس ایچ او سک ٹپی بیتگ، وھدے کہ دو دگہ کارمند ھم ٹپی ئیں جاوراں نادُراھجاہ ءَ برتگ اَنت-

پولیس ءُ پوج ءَ دمگ انگیر ءَ کتگ سرچ آپریشن بندات بیتگ-

تنی وھدے اے اُرش زمہ واری ھچ گل ءَ نہ زرتگ-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءَ گوشتگ بی ایل اے ءِ گچینی باسک “ اسپیشل ٹیکٹیکل آپریشنز اسکواڈ ( ایس ٹی او ایس) ءَ گوستگیں شپ ءَ شال ءَ یک کاروائی ءِ وھد ءَ زورگریں پوج ءِ گچینی کارندہ بابل مھمد حسنی کشتگ- اے کاروائی بی ایل اے ءِ انٹیلی جنس ونگ “ زراب” ءِ چیریں ھالانی بنیاد ءَ سوبمندی ءَ کتگ-

آئی ءَ گوشتگ بی ایل اے ءِ سرمچاراں شال ءِ دمگ بروری دگ، اسٹاپ ءِ ھند ءَ زورگریں پوج ءِ کمکار بابل ء زبر مھمد حسنی ءِ گاڑی ءَ لِچوکیں آئی ای ڈی بمبے پِٹ کتگ ءُ نشانگ کتگ- چریشی ءِ آسر ءَ آ ھما جاہ ءَ مرتگ ءُ آئی ءِ ھمراہ نبیل ء مھمد امین جھمنند کلات سکا ٹپی بیتگ – اے اُرش ءَ آئی ءِ گاڑی سرجم ءَ تباہ بیتگ-

جارکش ءَ گوشتگ بابل ء زبر مھمد حسنی جھمنند کلات پاکستانی پوج ءُ آئی ءِ چیریں ادارھانی گچینی کارندھے بیتگ- کہ سلکاریں ڈیتھ اسکواڈ ءِ کارندہ زکریا مھمد حسنی ءَ گوں تچک ءَ ھوار بیتگ – بابل حسنی کلات ءَ یک سلاہ بندیں گلے ءِ سروک بیتگ- کہ کلات ءُ کش ءُ گوری دمگاں پرکار بیتگ-

“بابل حسنی ءَ زورگریں پوج ءِ سروکی ءَ یک لٹ ءُ کٹی بنجلے برجم کتگ آئی ءَ اود ءَ ورنا گپتگ ءُ لٹ ءُ کٹ ءُ بندیگ کتگ انت- اے ٹولی ءَ بازیں جاھاں سنگر ھم برجم کتگ انت – کلات ءِ دمگ “ گراپ” ءَ پوجی چوکیانی برجم کنگ ءَ کرد پیلو کتگ انت ءُ سرھین ءُ کش ءُ گوری دمگاں بابل ھسنی ءِ سروکی ءَ اے ٹولی ءَ لس مھلوک ءِ سر ءَ زُلم ءُ زوراکیاں تچک ءَ ھوار بیتگ – گیش منگچر ءِ دمگ کوھک ءَ ھم اے ٹولی ءَ بازیں ورنایے آوار جتگ ءُ بیگواہ کتگ انت-”

آئی ءَ گوشتگ بابل ھسنی ءَ بندوکیں نیٹورک ءِ دگہ مردمانی پجار ھم بیتگ انت کہ آیانی سر ءَ بی ایل اے ءِ انٹیلی جنس ونگ زراب ءَ یکشل ءَ وتی نگاہ ایر کتگ انت – اے دابیں دراھیں مردم بابل حسنی ءَ زانت یا نازانتی ھوار انت آیاں بی ایل اے گڈی موکل ءَ دنت کہ آ بلوچ راجی لشکر ءِ دیم ءَ سلاھاں چگل بہ دے انت اگاں ناں گڑا آیانی ھال چو بابل حسنی ءَ کنگ بیت انت-

بلوچ استاد کندیل سباء دشتیاری ءِ شھیدی ءِ چاردھمی سالروچ ءِ درگت ءَ سید زھورشاہ ھاشمی ریفرنس کتاب جاہ ءِ چیردستی ءَ ملیر ءَ یک مراگشے اڈ دیگ بیتگ-

مراگش ءَ سبا دشتیاری ءِ زند ءُ ازم ءِ درگت ءَ گپ ءُ آئی ءِ کتگین کارانی سر ءَ چمشانک دیگ بیتگ-

مراگش ءَ جتا جتائیں لبزانکاراں بھر زرتگ نامی ئیں لبزانکار اے آر داد، پروفیسر رمزان بامری، سادک سباء ءُ دگہ دگراں بھر زرتگ –

دیوان ءَ سباء زند ءِ ازم ءُ بلوچی ءَ کتگیں آئی ءِ کاروانی بارو ءَ چمشانک دیگ بیتگ انت-

گشتانکاراں گشتگ سباء ھما ناماں یکے بیتگ کہ آئی ءَ وتی سرجمیں زند بلوچی ءِ زبان ءُ بلوچ ءِ زند ءِ بارو ءَ ندر کتگ-

گشتانکاراں گشتگ سباء دشتیاری پہ بلوچی زبان ءَ بے مٹ ءُ بے دروریں کواسے بیتگ کہ آئی ءَ ھمک کار کہ جنزینتگ گڑا آ آسر کتگ ءُ یل داتگ –

دیوان جتا جتائیں تھرانی توک ءَ بیتگ کہ بنداتی سباء زند ءُ دومی شائری ءُ سیمی کتاب دیمدراھی بیتگ کہ اود ءَ چاپ ءُ شنگ بیتگیں کتاب پیش کنگ بیتگ انت-

زانگ بہ بیت استاد کندیل سباء دشتیاری سال دوھزار ءُ یازدہ ءَ یک جون ءَ ماں بلوچستان ءِ بنجاھی شھر شال ءَ ناشناسیں مردماں تیرانی آماچ کتگ ءُ آ چریشی ءَ پد آ شھید بیتگ-

ھمک سال ءَ سباء یک استادے ءِ دروشمے ءَ ھوار کندیلے ءِ رنگ ءَ یات کنگ بیت انت-

بلوچ لبریشن آرمی ءِ جارکش جیئند بلوچ ءَ رسانکدر ءَ وتی شنگ کتگیں درشان ءَ گوشتگ کہ بی ایل اے ءِ سرمچاراں مستونگ ءَ لیویز ءِ تانہ ءُ چوکیانی دستیگ کنگ ءَ ھوار زورگریں پوج ءِ سر ءَ اُرش کُتگ ، ھمے وڑ پاکستانی پوج ءِ چاریگے ءِ سر ءَ ھم اُرش کُتگ –

جارکش ءَ سرجمیں ھال داتگ ءُ گوشتگ کہ بی ایل اے ءِ سرمچاراں گوستگیں شپ ءَ مستونگ ءَ ولی ھان پولیس تانہ دستیگ کُتگ ، ھمے وڑ سرمچارانی دگہ یک ٹولی یے ءَ شال – کراچی ءِ مزنیں شھدگ ءَ لیویز ءِ چوکی گپتگ ءُ شھدگ داں یک ادارے ءَ بستگ –

جارکش ءَ گوشتگ کہ اے کار ءَ سرمچاراں تانہ ءُ پورس گاڑی مانداشتگ ءُ تباه کُتگ اَنت ، ءُ کارندھانی شش توپک پچ گپتگ انت ، سرمچاراں دزگیر کُتگیں ششیں لیویز کارندہ ھمے واست ءَ یل داتگ انت کہ آ بلوچ بوتگ انت –

آئی ءَ گوشتگ کی بی ایل اے ءِ سرمچاراں یک شمبے ءِ شپ ءَ مستونگ ءِ ھند کھڈکوچہ ءَ زورگریں پاکستانی پوج ءِ چوکی ءِ سر ءَ ھم اُرش کتگ ءُ اے اُرش بیست دمان ءَ گیش برجاه بیتگ ، سرمچاراں گوں وتکار ءُ ٹوھیں سلاھاں اُرش کُتگ ، چریشی ءَ دژمنیں پوج ءِ دو کارندہ ھما جاہ ءَ مرتگ ءُ دژمن ءَ بازیں جانی ءُ مالی تاوان بیتگ –

جارکش ءَ گوشتگ کہ بی ایل اے ءِ سرمچاراں 27 مئی ءَ شال ءِ جی ڈی اے گراونڈ ءَ زورگریں پاکستانی پوج ءِ چاریگ محمد نبی کلجی ءِ سر ءَ اُرش کُتگ اُرش ءِ آسر ءَ سک باز ٹپی بیتگ ، نشانگ کنگ بیتگیں چاریگ وتگڑیں تھریک جوانان پاکستان ءِ مارکور ونگ شال ءِ سروک اِنت کہ زورگریں پاکستانی پوج ءِ چیردستی ءَ وتگڑیں مراگش ءُ روانک برجاه دار اَنت ، چاریگ محمد نبی مردماں لب ءُ بیھار دنت ءُ آیاں پہ پاکستانی پوج ءِ ھاتر ءَ کار گپتگ –

درشان ءِ گڈسر ءَ گوشگ بیتگ ما اے گپ ءَ تچک کن ایں کہ پاکستانی پوج ءِ چیردستی ءَ وتگڑیں مراگش ءُ روانکانی برجاه داروکیں چاریگ تچک ءَ مئے نشانگ ءَ اَنت ، ءُ چہ لس مھلوک ءَ لوٹ اِیں کن ایں کہ آ وت ءَ چہ اِے چاریگاں دور بہ دار اَنت دانکہ آ ھر وڑیں جانی ءُ مالی تاوان ءَ بہ رکّ اَنت –

بلوچستان ءِ بُنجاھی شھر شال ءَ روکپتی بائی پاس ءِ سر ءَ برجاہ بروری دگ ءِ گُڈی اسٹاپ نزیک ءَ یک گاڑی یے گمانی یک چنوکیں آئی ای ڈی تراک ءِ نشانگ کتگ، چریشی ءِ آسر ءَ یک مردمے جاہ پہ جاھی مرتگ وھدے کہ چار مردم ٹپی بیتگ اَنت-

ایس ایچ او بروری تھانہ محمود خروٹی ءِ رِد ءَ تراک ءَ بیران بیتگیں مردم ءِ پجّار بابُل محمد حسنی ء محمد حسنی جھمنند کلات نام ءَ چہ بیتگ وھدے کہ آئی ءِ ھمراہ نبیل احمد ء محمد امین سک ٹپی بیتگ اَنت-

تراک ءِ آسر ءَ سے راھگوز ھم ٹپی بیتگ اَنت کہ آیانی تہ ءَ بلاول ء فتح، محمد انور ء کریم، عبدالظاھر بنگلزئی ھوار اَنت-

واکدار ءَ راست کتگ کہ ٹپی زوت بولان میڈیکل کمپلیکس ءَ برتگ اَنت اود ءَ الاج کنگ بیگ ءَ اَنت-

پولیس گوشگ اِنت کہ ٹپیانی تہ ءَ یکے گاڑی ءِ تہ ءَ بیتگ وھدے کہ آ سئیں راھگوز بیتگ اَنت کہ تراک نشانگ تہ ءَ اتکگ اَنت، ایس ایچ او ءِ رِد ءَ اے ھم پدر نہ بیتگ کہ تراکناکیں شورو گاڑی تہ ءَ بیتگ اَنت یا کہ ڈن ءَ چہ لچینگ بیتگ بلے پٹ ءُ پول برجاہ ءَ اِنت-

اِھوالکار رِد ءَ بابُل محمد حسنی پاکستان آرمی ءِ پلامرزی ءِ بدنامیں ” ڈیتھ اسکواڈ ” ءِ ھاسیں باسک بیتگ اَنت، وھدے کہ اشی ءِ پِت گوستگیں سال ءَ بلوچ لبریشن آرمی ءِ ” آپریشن ھیروپ ” ءِ میان ءَ کُشگ بیتگ اَت-

پولیس ءُ سیکیورٹی ادارہ وئیلجاہ ءَ سر بیتگ اَنت منانک یکجاہ کنگ ءَ اَنت وھدے کہ سیکیورٹی گیش ترند کنگ بیتگ-

بلوچستان ءِ جتاجتائیں دمگاں گیس پائپ لائن، ایم آئی ءُ ٹاور سر ءَ بیتگیں اُرشانی زمہ واری بی ایل ایف ءُ بی آر جی ءَ منّ اِتگ اَنت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں سی یک مئی دوھزار بیست پنچ ءِ شپ ساھت نُھ ءَ ھاران شھر ریڈزون ءَ برجاھیں ملٹری انٹیلیجنس ءِ کارگس ءِ ڈن ءَ ساڑی کارندھانی سر ءَ ھما وھد ءَ اُرش کتگ وھدے آ ماڑی ءَ چہ ڈن گشت کنگ ءَ بیتگ اَنت- اُرش ءِ آسر ءَ دو انٹیلیجنس کارندہ سک ٹپی بیتگ اَنت-

جارکش ءَ گْوشتگ کہ دگہ یک کاروائی یے بیست نُھ مئی دوھزار ءُ بیست ءُ پنچ ءَ بی ایل ایف ءِ سرمچاراں کولواہ ءِ دمگ شاھو باتل ءَ برجاھیں یک ھال اھوال نزامے ءِ سر ءَ اُرش کتگ- اے آپریشن ءَ سرمچاراں ناں تھنا ھال اھوالی ٹاور ءُ آئی ءَ ھمگرنچ تکنیکی مشینری مانداشتگ اَنت بلکیں ٹاور ءَ جتگیں چاروکی ءُ سرویلنس کیمرہ ھم سرجمی ءَ تباہ کتگ اَنت-

جارکش ءَ گوشتگ کہ اے دوئیں کاروائی سوبمندی ءِ گوم ءَ کنگ ءَ پد سرمچاراں پہ سلامتی وتی مُھریں اوتاکاں سر بیتگ اَنت-

جارکش ءَ گْوشتگ بی ایل ایف اے دوئیِں اُرشانی زمہ واریاں منّ اِیت ءُ اے اِھد کنت کہ گل وتی راج ءِ پلامرزی ءَ چہ بلوچستان ءِ وتواجھی ءَ تاں وتی جُھد ءَ جوانیں وڑے ءَ برجاہ دار اِیت ءُ زورگریں دُژمن ءَ ھچ وڑ ایمنی ءَ ساہ زیرگ نیل ایں-

دومی نیمگ ءَ بلوچ ریپبلکن گارڈز ءِ جارکش دوستیں بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں گوستگیں شپ ءَ ڈیرہ مراد جمالی ءِ دمگ نصیر آباد ءَ ھژدہ انچ گیس پائپ لائن تراکناکیں شورو پٹ کتگ ءُ تراکینتگ-

جارکش ءَ گْوشتگ کہ مئے سرمچاراں کشمور دگ سر ءَ مزاری کوٹ ءِ ھند سر ءَ سوئی ءَ چہ کراچی ءَ رؤکیں سی شش انچ گیس پائپ لائن ھم تراکناکیں شورو پٹ کتگ ءُ تباہ کتگ-

جارکش ءَ گْوشتگ اے دوئیں اُرشانی زمہ واریاں بی آر جی منّ اِیت ءُ مئے اے وڑیں کاروائی بلوچستان ءِ وتواجھی ءَ تاں برجاہ بنت-

ریاستی زوراکی ءُ بلوچ زالبولانی دیمپانی

ٹی بی پی شونگال

بلوچستان ءَ زورانسری بیگواھی چہ دو دھکاں برجاہ انت، بلے گوستگیں سالاں بلوچ زالبولانی بیگواھیانی تہ ءَ گیشی گندگ ءَ اتکگ- بیست ءُ نُھ مئی ءَ بلوچستان ءِ بنجاھی شھر شال ءَ سول ھسپتال ءَ نرسنگ ھاسٹل ءَ ماہ جبین بلوچ زورانسری آوار جنگ بیتگ ، ھمے وڑ آئی ءِ برات مھمد یونس چہ واشک ءِ ھند بسیمہ ءَ جند ءِ لوگ ءَ بیست ءُ یک مئی ءَ آوار جنگ بیتگ- ماہ جبین بلوچ ءِ کھول چہ بازیں سالاں ریاستی زوراکیانی دیمپانیاں کنگ ءَ انت- بلوچ راجی جد ءُ جھد ءَ بندوکی ءِ سبب ءَ آئی ءِ کھول ءِ بازیں مردم بیگواہ کنگ بیتگ انت یا درکانودی کُشگ بیتگ انت-

دو ھزار ءُ بیست ءُ پنچ ءِ بنداتی پنچ ماھانی توک ءَ بلوچستان ءَ زورانسری بیگواھیانی توک ءَ یک ترندی ءِ اتکگ، بلے بلوچستان ءِ مانگش اتگیں سرکار اے سنگینیں انسانی ھکانی جیڑہ ءَ سنجیدگی ءَ زیرگ ءَ ابید، واک ءِ تہ ءَ کرسی ءِ زیرگ ءَ مزنیں واکداریں پالیسیانی بنگپ ءَ اوشتاتگ ءُ اے انسانی ناگیگی ءَ ڈالچار کنگ ءَ انت، چوشکہ بلوچ جیڑہ ءَ ریاستی زوراکی ءِ تَک ءَ چیردیگ ءُ سیاسی سروکاں بندیگ کنگ ءَ میان اُستمانی انسانی ھکانی ادارہ یکشل ءَ پدردی درشان کنگ ءَ انت-

پنچ نامداریں میان اُستمانی انسانی ھکانی ادارہ، ایمنسٹی انٹرنیشنل، ایشین فورم برائے انسانی ھک ءُ دیمروئی، فرنٹ لائن ڈیفنڈرز، میان استمابی فیڈریشن برائے انسانی ھک،ءُ ورلڈ آرگنائزیشن اگینسٹ ٹارچر ءَ بلوچستان ءَ زورانسری بیگواھی ءُ درکانودی ریاستی پالیسیانی ھلاپ ءَ توار چِست کتگ- اے ادارھاں 3MPO ءِ تک ءَ بندوکیں سیاسی سروکانی یل دیگ ءُ ریاستی زوراکیانی ھلاسی ءِ واستا سر وزیر پاکستان ءَ را یک نمدی یے نبشتگ کتگ،اے گپ ءِ تچکیں منانک انت نی بلوچستان ءَ انسانی ھکانی لگتمالی چیردیگ نہ بنت اِنت-

دو دھکانی گوزگ ءَ پد ھم پاکستان ءِ واکداریں تاکتاں اے راستی ءِ منگ ءَ تیار نہ انت بلوچ زالبولانی زورانسری بیگواھی ءُ سیاسی رھشونانی دزگیریاں بلوچ راجی آجوئی ءِ جد ءُ جھد ھلاس کنگ نہ بیت انت – ریاست ءِ انیگیں پالیسی ءُ گیرسنجیدگیں گامگیج نا ایوک ءَ سیاسی گھگیری ءِ ھلاس کنگ ءَ سوبمند بیتگ انت بلکیں اے راجی گھگیری ءَ گیش برانز دے انت-

چَہ بلوچستان ءِ دمف مستونگ ءُ کیچ ءَ کم چہ کم پنچ مردم پاکستانی لشکر ءِ دست ءَ دزگیر کنگ ءَ پد بیگواہ بوتگ اَنت ۔

مستونگ ءِ دمگ کاریزسور ءِ نندوک ءُ گوں تبلیگی مرکز ءَ ھمگرنچیں حاجی غلام فاروق ءِ چُک عاصم فاروق ءِ لوگ ءِ سر ءَ یک بج ءَ پاکستانی لشکر ءَ چھاپہ ءِ وھد ءَ دزگیر کتگ۔

عاصم فاروق ءِ کار ءُ کسب ڈرائیوری انت۔ آئی ءِ لوگ ءِ مردماں گْوشتگ کہ آ گوں دمگی تبلیگی جماعت ءَ ھمگرنچ اِنت۔

ھمے شپ ءَ مستونگ ءِ ھند چہ کھڈکوچہ ءَ محمد وفا ء ھاجی اشرپ شاھوانی ھم چہ وتی گس ءَ بیگواہ بوتگ۔ کھول ءِ گشگ ءِ رد ءَ پاکستانی لشکر ءَ شپ ءِ نیم ءَ آھانی لوگ ءِ سر ءَ اُرش کتگ ءُ محمد وفا گوں وت برتگ ۔

مستونگ ءِ ھند کلی کونگھڑ ءِ نندوکیں خلیل احمد ھاجی مھمد ابراھیم ھم سھب ءِ سئے بج ءَ چہ وتی لوگ ءَ زورانسری بیگواہ کنگ بوتگ۔ خلیل احمد انوگیں وھد ءَ چہ چار ماہ ءِ تبلیگی سپر ءَ واتر بوتگ ءُ آئی ءِ کھول ءِ گشگ ءِ رد ءَ آ ٹی بی ءِ نادراہ انت۔

دومی نیمگ ءَ کیچ ءِ دمگ دشت ءَ مراد خان ء لال مھمد ءُ راشد ء فتح پاکستانی لشکر ءَ آوار جتگ ءُ بیگواہ کتگ انت-

زانگ بہ بیت کہ بلوچستان ءَ زورانسری ءَ بیگواہ کنگ ءِ سلسلہ دو دھکاں برجاہ اِنت ءُ انسانی ھکانی گلاں باز رند ءَ ایشی ءِ سر ءَ وتی توار چست کتگ بلے املی پڑ ءَ اے گامگیجاں ھچ وڑیں مزنیں کمی یے نہ بوتگ۔ وھدے کہ اے سال ءَ بلوچستان ءَ زورانسری بیگواہ کنگ ءُ دروگیں انکاؤنٹر ءِ تہ ءَ یکدم گیشی ءِ اتکگ-