TBP Balochi

پاکستانی لشکر ءَ بلوچستان ءِ دمگ پنجگور پروم ءَ شپ ءَ آپریشن کتگ ءُ بازیں لوگانی سر ءَ اُرش کتگ چریشی ءَ ورنائیں شھزاد ء نزیر آوار جتگ ءُ ناشناسیں جاھے ءَ برتگ-

بیڑ 31 مئی ءِ نیم شپ ءِ 12 ءِ نزیک ءَ پروم ءِ رحیم آباد ءُ نعیم آباد ءِ دمگاں بوتگ کہ اود ءَ پورسز ءَ سرجمیں جائین انگیر ءَ کتگ ءُ بیڑ برتگ-

دمگی مردمانی رد ءَ پاکستانی لشکر ءَ گون ءَ دمگی سلاہ بندیں مردم ھم ھوار بوتگ اَنت کہ لس نام ءَ“ ڈیتھ اسکواڈ” ءِ نام ءَ زانگ بنت ءُ آھاں ھم اے آپریشن ءَ بھر زرتگ۔

سانمندیں کھول ءِ رد ءَ رحیم آباد ءَ ارش ءِ وھد ءَ ورنائیں شھزاد ء نزیر دزگیر کنگ ءَ پد برگ بوتگ کہ چہ ھما وھد ءَ آ بیگواہ اِنت۔

شہزاد ءِ نزیکیں سیاد بشیر احمد ءَ گْوشتگ: منی ناکوزتک شھزاد چہ رحیم آباد ءَ برگ بوتگ، پد ءَ مئے لوگ ءَ ھم چھاپہ جنگ بوتگ۔

آئی ءَ گْوشتگ کہ لھتیں روچ پیش منی کستریں برات جنگیان بلوچ ھم آوار جنگ بیتگ ءُ داں روچ ء مرچی بیگواہ اِنت۔

اے وئیل ءَ پد دمگی مردمانی گْوشگ اِنت کہ ھمک روچ چھاپہ ءُ زورانسری بیگواہ کنگ ءَ شھر ءِ زندگی ناوشی ءِ دیمپان انت-

زانگ بہ بیت کہ بلوچستان ءَ زورانسری ءَ بیگواہ کنگ ءِ سلسلہ دو دھک اِنت کہ برجاہ اِنت ءُ انسانی ھکانی گلاں باز رند ءَ ایشی ءِ ھلاپ ءَ وتی توار چست کتگ بلے املی پڑ ءَ اے گامگیجاں ھچ وڑیں مزنیں کمی یے نہ بوتگ۔

پاکستانی پوج ءَ دو مردم آوار جنگ ءَ پد ناشناسیں جاھے ءَ برتگ اَنت-

بلوچستان ءِ دمگ چہ مستونگ ءَ ھالانی رِد ءَ گوستگیں روچ ءَ بیست نُھ مئی ءَ پاکستانی پوج ” ایف سی ” ءَ دو مردم آوار جتگ ءُ وتی ھمراھی ءَ برتگ اَنت چریشی ءَ پد دوئیں ورنا دیم ءَ آرگ نہ بیتگ اَنت-

پاکستانی پوج ءِ دست ءَ زورانسری آوار جنی ءِ نشانگ کنگ بیتگیں مردمانی پجّار بسم اللہ ء غلام سرور ءُ سمی اللہ ء محمد حنیف نام ءَ چہ بیتگ اَنت ءُ دوئیں مستونگ پڑنگ آباد ءِ جھمنند اَنت-

دمگی اِھوالکار رِد ءَ دوئیں ورنا چہ مستونگ ءَ منگچر ءَ روگ ءَ بیتگ اَنت ایف سی کارندھاں بیگواہ کتگ اَنت-

بلوچستان ءِ جتاجتائیں دمگ تمپ، مند، ھُزدار ءُ ھاران ءَ پاکستانی پوج، ڈیتھ اسکواڈ کارندھانی، ایم آئی سر ءَ اُرش کنگ بیتگ-

دومی نیمگ ءَ اے سرجمیں اُرشانی زمہ واری بلوچ آجوئی لوٹوکیں سلاہ بندیں گل بی ایل ایف ءَ منّ اِتگ اَنت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان تہ ءَ گْوشتگ کہ سی مئی ءَ بی ایل ایف ءِ سرمچاراں بیگاہ شش ءَ کیچ ءِ دمگ تمپ ءِ ھند سر ءَ ملانٹ ءَ زورگریں پاکستانی پوج ءِ بُنجل ءِ سے جتاجتائیں نیمگاں چہ راکٹ لانچرز، گرنیڈ لانچرز ءُ مزنیں سلاھاں چہ نشانگ کتگ، اُرش داں دیراں برجاہ بیتگ، اے میان ءَ سرمچاراں بُنجل ءِ پھازوکی سنگرانی سر ءَ ساڑی دُژمنیں پوج ءِ سے کارندہ کشتگ اَنت- کاروائی ءِ میان ءَ بُنجل ءِ چاروکیں ( سرویلنس ) نزام ھم تباہ کتگ – اُرش ءَ پد سرمچاراں دمگ ءَ گشت کتگ دمگی آبادی ءَ چہ گند ءُ دیوان ءُ تران ھم کتگ-

جارکش ءَ گوشتگ ھمے روچ ءَ بیگاہ ھپت ءِ نزیک ءَ یک جتائیں کاروائی یے، مند ءِ دمگ سورو بازار ءَ برجاھیں ملٹری انٹیلی جنس کارگس ءِ چھت ءَ ساڑی دو کارندہ بی ایل ایف ءِ اسنائپر ٹیکٹیکل ٹولی ( ایس ٹی ٹی ) ءَ نشانگ کتگ اَنت، چریشی ءِ آسر ءَ دوئیں کارندہ جاہ پہ جاھی مرتگ اَنت-

بی ایل ایف ءَ دگہ شنگ کتگیں یک درشانے ءِ تہ ءَ گْوشتگ کہ سی یک مئی ءَ شمبے ءِ روچ ءِ ساھت یازدہ نزیک ءَ سرمچاراں ھُزدار نال ءَ پڑیچ ھوٹل ءِ نزیک ءَ ریاستی سروکی ءَ ھستیں وتگڑیں امن فورس ءِ دو کارندہ سنگر گپتگ ءُ نشانگ کتگ اَنت چریشی ءِ آسر ءَ دوئیں کارندہ مرتگ اَنت ءُ سرمچاراں آیانی سلاہ دستیگ کتگ اَنت-

جارکش ءَ گْوشتگ نال شھر ءَ ریاست ءَ نیشنل پارٹی ءِ بُنجاھی رھشون اسلم بزنجو ءِ چُک شاہ میر بزنجو ءِ سروکی ءَ ڈیتھ اسکواڈ ءِ یک ٹولی یے بلوچ راجی زرمبشت ءِ ھلاپ ءَ پُرکار کتگ اَنت کہ آ وتگڑیں امن فورس نام داتگ –

جارکش ءَ گْوشتگ بی ایل ایف امن فورس ءُ بلوچستان ءَ سرجمیں ڈیتھ اسکواڈ ءِ سروک ءُ کارندھاں کڈن کنت کہ آ ریاست ءِ واستا کارمرزی ءَ پھریز بہ کن اَنت اگاں ناں آ نشانگ کنگ بنت-

جارکش ءَ گْوشتگ دگہ یک کاروائی یے سرمچاراں مروچی نیم روچ ساھت یک ءَ ھاران شھر ءَ کتگ – سرمچاراں ھاران شھر ءَ شاھوانی چوک نزیک ءَ ناکہ جتگیں پولیس کارندہ دزگیر کتگ اَنت آیانی سرکاری سلاہ دستیگ کتگ ءُ بلوچ بیگ ھاتر ءَ کڈن کتگ ءُ پہ شرپ یل داتگ اَنت-

جارکش ءَ گْوشتگ بی ایل ایف اے سرجمیں اُرشانی زمہ واری ءَ منّ اِیت ءُ اے سرجمیں مردماں کڈن کنت کہ زورگریں ریاست ءِ دست ءَ کارمرز بیگ ءَ پھریز بہ کن اَنت اگاں آ دُژمن ءِ وڑ ءَ نشانگ کنگ بنت-

شمبے ءِ روچ ءَ ڈیرہ مراد جمالی ءُ سوئی ءَ دو جتا جتائیں تراکاں گیس ءِ پائپ لائن تراکینگ بوتگ اَنت۔

ڈیرہ مراد جمالی ءَ ناشناسیں مردماں تراکناکیں شورواں گوں گیس ءِ پائپ لائن ءِ تراکے کتگ ۔ اھوالانی رد ءَ تراک ءَ پد گیس ءِ پائپ لائن ءَ گیس ءِ سپلائی بند بوتگ۔

دومی نیمگ ءَ سوئی ءِ کشمور روڈ ءَ تراک ءِ سبب ءَ گیس ءِ پائپ لائن ھم تباہ بوتگ۔ پولیس ءِ گشگ انت کہ گیس ءِ پائپ ءِ تراک مزاری کوٹ ءَ بوتگ۔

وئیل ءَ پد پولیس ءُ سیکورٹی ءِ کارندہ وئیل جاہ ءَ سر بوتگ اَنت ۔ ایس ایس پی ءَ گشتگ کہ پائپ لائن ءِ تہ ءَ شوروانی سبب ءَ تراک بیتگ، ءُ اے درگت ءَ گیشیں پٹ ءُ پول برجاہ انت۔

زانگ بہ بیت کہ اے دمگاں گیس ءِ لینانی سر ءَ پیسر ءَ ھم اُرش نشانگ بیتگ اَنت کہ ایشانی زمہ واری جتاجتائیں گلاں من اتگ انت بلے مرچیگیں اُرش ءِ زمہ واری انگت ءَ کس ءَ نہ زرتگ۔

بلوچستان ءِ بنجاھی شھر شال ءِ کوچگی دمگ کلی منگلا ءَ بیتگین بمب تراکے ءَ ٹکی رھشون عبدالسلام بازئی ءُ آئی ءِ برات عبدالنافع بیران بیتگ انت-

پولیس ءِ رد ءَ تراک ءَ عبدالسلام بازئی نشانگ کنگ بیتگ-

بنداتی اھوالانی رد ءَ تراک ءَ شش مردم زدگ بیتگ انت ءُ نادراہ جاہ ءَ برگ بیتگ انتٹ

وئیل ءِ سبب زانگ نہ بیتگ ءُ نانکہ اُرش ءِ زمہ واری کسے ءَ پہ وت زرتگ-

جنگ ءِ گرم ءُ سارتیں وشبو

 نبشتہ کار: شَکّل بلوچ

دی بلوچستان پوسٹ

بگند ئے پہ لھتین ءَ جنگ مہ ساچ اِیت، پہ آیاں جنگ جھنمے، آیاں وتی زند ءِ دراھیں بھر گوں وشیاں گوازینتگ، چو ھم بہ بیت چہ تُرس ءَ بے بْراہ ءُ نہ وشیں ساھے ءِ گوں نیم وشی ءَ زندگ بہ مان اِیت یا پہ زور جُھد بکنت۔ جنگ تباھی یے، آئی ءَ من ءَ درّائینت ءُ گُشت: ھشکیں سر ءُ چوٹوانی گاڑینگ ءَ بگند ئے مرد وت ءَ رد بہ دنت ءُ دومیگ ءَ تسّلہ دیگ ءِ جُھد ءُ کوشست ءَ بکنت۔ بلے منی نِزّ ءَ جنگ زند ءِ مستریں بھر اِنت، آئی ءِ نِزّ ءَ تُرسناک اِنت ءُ آئی ءِ رِد ءَ گلت اِنت۔

جنگ آشوب ءِ بو ءَ سھرا کنت، زند ءِ رنگ ءَ مَٹ کنت، کسے ءَ وتی زند پہ گم گوازین اِیت، نہ وشیں زند ءَ دلسیاہ ءُ دلجم مہ بیت گڑا پہ آئیگی جنگ المی بیت، ءُ دومیگ کہ جنگ ءَ را تباھی یے پَھم اِیت پہ آئی ءَ راست اِنت، چمیشکا آ وتی زند ءَ وش ءُ وشھال اِنت، ایمن اِنت آئی ءَ درد پِر نیست، آئی ءِ تہ ءَ انسانی درد ءُ مارشت ھچ مانا نہ دار اَنت، آ چہ گم ءُ درداں بے سما اِنت، آئی ءَ کسی درد پِر نہ اِنت، آ وتی زند ءِ بازیں بھراں گوں نیم بھر اِنت، دنیا پہ آئیگی بھشت اِنت آ چوں جنگ ءَ تباھی یے نہ گُش اِیت؟

داں کہ من ءَ ھوش کنت من تباہ آں، زندگ بوگ ءَ اَبید ھم چہ زند ءَ بے بھراں، دگہ چونیں تباھی من ءَ تباہ کنت، دگہ چونیں جنگے من ءَ ھلاس کنت بلکیں من چہ پیسر ءَ ھر چیزاں زِبھر آں، من ءَ اِزت ءُ شرپ نیست، من ءَ وشھالیں زندے نیست، من ءَ منی مجگ ءَ را گلامی ءِ سانکلاں بندیگ کُتگ، ھر سھب ءُ شپ ءَ من ءَ منی زند دردانی نارگاں کُشت، دگہ چونیں جنگے من ءَ تباہ کنت، من وَ چہ پیسر ءَ تباہ آں۔

”من ءَ چہ منی زند ءِ دراھیں زیب ءُ زینت پچگرگ بوتگ اَنت، اَبید جنگ ءَ دگہ چونیں نیمونے من ءَ چہ منی زند ءَ آزات کنت؟“

جنگ ءُ گھگیری من ءَ چہ منی درد ءُ گماں آزات کنت، جنگ من ءَ آسودگ کنت، جنگ من ءَ تباہ چوں کنت؟ منی جیڑہ پگر ئیگ اِنت، اگاں منی پگر وشھال نہ اِنت، اگاں من ءَ چہ منی زمینی مھر ءَ گستا کنت، چماں ملور ملور کنت، گوشاں اِشکنگ ءِ ھاٹیگ مان مہ بیت، دپ ءَ لبز نہ گیشّ اَنت گڑا ایشی ءَ چہ مستریں تباھی دگہ چے بوت کنت؟ شگر ءَ بگر اگاں جسم ءِ ھمراھی ءَ پگر اوں بندیگ بوتیں ”تباھی“ بوتگ اَت، جنگ ھچ نہ بوتگ اَت، گار بوتگ اِت ئے، نام ءُ نشان یا کہ تئی ٹپ اوں ایر نہ بوتگ اَت، بلے جنگ نہ بوتگ اَت، تئی دل ءَ ھرچی وش ءَ اَت اناگہ نہ زانتگ اَت پد ءَ مدام سیاھیں گواتے آتکگ اَت، من ءَ گوں وت بُرتگ اَت ئِے۔ ھچ نیست اَت، ناں پگر ءُ سسا بس پش کپتگ اَت ھُشکیں زمینے ھچ در نہ وارت، ھچّے مان نیست اَبید ھاک ءُ پُر تباھی بوتگ اَت۔اے پگر اِنت کہ جنگ ئِے داشتگ، زندگ ئِے داشتگ، راستی ابدمان ئِے کُتگ، تو ءُ تئی پجّار، تو ءُ تئی زبان ءُ تو ءُ تئی زندگ بوگ ءِ اُمیت۔

گڈی کِشک آجوئی یک راجے ءِ سرجم ءَ وتی اَنت آئی ءِ تہ ءَ یک زمینے گوں یک راجے ءَ بندوک بہ بیت ءُ زبانے ءَ گپ بکنت، وت ءَ چہ تئی ھستی ءَ جھان ءَ پَدّر بکنت کہ تو اوں ابرم ءِ یک بھرے ئے ترا زندگ بوگ ءِ ھک ھست، ترا آزات بوگ ءِ ھک بہ رس اِیت(اگاں ایردست ئے) داں کہ اے جھان ءَ یک وش ءُ وشدلیں زندے بہ گوازین ئے۔ جنگ راستیں مردم کنت، آ کہ راست انت جنگ یکشل ءَ وت ءَ دار اِیت، نہ کُٹّّ اِیت داں ردیں انسان ءُ آئی ءِ بدی پہ بزگ ءُ واھنداں چہ آیانی ھستیاں زِبھر کنت۔ آیانی ھستانک ءَ تباہ ءُ برباد کن اَنت۔ (پگر مان اِیت، آشوب مان اِیت، ءُ آشوب کہ مان اِیت گڑا زندمان اِنت)

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچ لبریشن آرمی ءِ جارکش جیئند بلوچ ءَ رسانکدر ءَ وتی شنگ کرتگیں درشان ءِ تہ ءَ گوشتگ کہ مئے سرمچاراں مروچی بیگاہ ءَ سوراب سرجمی ءَ وتی کنٹرول ءَ کُتگ ءُ دژمنیں ریاست پوجی، مالی تاوان داتگ – اے بیڑ سَے ادار ءَ تاں برجاہ بوتگ کہ ھمے میان ءَ سرمچاراں سوراب ءِ درسیں جاہ ءُ دگ بستگ انت – سرمچاراں لیویز تانہ، ڈی سی کارگس، مھمان جاہ، ءُ بینک وتی کنٹرول ءَ کتگ ءُ دژمن ءِ انفراسٹرکچر نزور کتگ –

جارکش ءَ گوشتگ کہ اے کار ءِ میان ءَ سرمچاراں لیویز ءُ پولیس کارمند دزگیر کتگ ءُ تانہ ءُ ڈی سی کارگس ءَ چہ 30 دانگ سِی تیری ءُ دگہ سلاہ ءُ جنگی مڈی دستیگ کتگ انت – اے کارمند بلوچ بوتگ انت ھمے ھاتر ءَ پد ءَ رند ءَ یل داتگ انت – دژمنیں پوج ءِ سے گاڑی، ریاستی گودام، مھمان جاہ ءُ سَے بینک سرمچاراں مانداشتگ وھدیکہ دو گاڑی دستیگ کتگ انت –

آئی ءَ گوشتگ کہ ڈی سی کارگس ءِ دستیگ کنگ ءِ وھد ءَ اسسٹنٹ ڈپٹی کمشنر ھدایت اللہ بلیدی ءَ اُرش کنگ ءِ جھد کتگ بلے سرمچاراں بید ءِ جانی تاوان ءَ آ دزگیر کُتگ ءُ یک کوٹی ءَ بند کتگ بلے بدبھتی ءَ کوٹی ءِ توک ءَ دمتوس بوتگ ءُ مرتگ کہ اے اناگتی وئیلے بوتگ –

آئی ءَ گوشتگ کہ سرمچارانی سوراب ءِ کنٹرول کنگ ءَ ھوار شال تاں کراچی رؤکیں شھدگ ءُ سوراب – گدر ءِ شھدگ بستگ ءُ پٹ پول کتگ –

جارکش ءَ گوشتگ کہ اے کار بی ایل ءِ ھما کولانی درچ انت کہ آیانی مول زورگریں پاکستانی ریاست ءِ ھر یک ادارہ، ھر نشانی ءُ تاکت ءَ نیست ءُ نابود کنگ انت – ما یکبرے پد ءَ اے گپ ءَ تچک کن ایں کہ مئے جنگ بلوچ راجی آجوئی ءِ گرگ ءَ تاں برجاہ مان ایت –

بلوچستان ءِ دمگ پنجگور ءِ بُنجاھی بازار ءَ چتکان ءَ پاکستانی پوج ءَ یک موبائل دکانے سر ءَ بیڑبرتگ کم چہ کم پنچ مردم آوار جنگ ءَ پد بیگواہ کتگ اَنت-

بیگواہ کنگ بیتگیں مردمانی تہ ءَ پنجگور ءِ نامی ئیں ورنا ایں تاجر، واھاب بلوچ ھم ھوار اِنت-

وئیل بیست ھشت مئی ءَ بیتگ وھدے پوج ءَ پنجگور ءِ دمگ چتکان ءِ بُنجاھی بازار ءَ برجاھیں موباھل دکان سر ءَ بیڑبرتگ چمّگدانی رِد ءَ، واھاب بلوچ چار دگہ مردمانی ھمراھی ءَ آوات جتگ ءُ ناشناسیں جاھے ءَ برتگ اَنت – آوار جنگ بیتگیں آ دگہ مردمانی پجّار انگت نہ بیتگ اَنت-

اِھوالکار رِد ءَ بیڑ وھد ءَ پوج ءَ دکان ءَ پروشت ءُ پروش ھم کتگ وھدے کہ بازیں گرانبھائیں موباھل ھم وتی ھمراھی ءَ برتگ اَنت کہ آیانی نھاد لکّانی ھساب ءَ بنت-

ھمے وڑ کیچ ءِ بُنجاھی شھر چہ تربت ءَ ھم یک مردمے زورانسری آوار جنی ءِ ھال دیم ءَ اَتکگ-

اِھوالکار رِد ءَ پاکستانی پوج ءَ سنگانی سر ءِ جھمنندیں ءُ پولیس ءِ کاردار بھرام ء واحد ھما وھد ءَ آوار جتگ وھدے آ ھمکروچی ھساب ءَ سامان زیرگ ءَ بازار ءَ روگ ءَ بیتگ-

چہ پسنیءَ ھم یک مردمے ءِ زورانسری آوار جنی ءِ ھال سر بیتگ- جماعت اسلامی بلوچستان ءِ صوبائی صدر ءُ صوبائی اسمبلی ءِ باسک مولانا ھدایت الرحمان ءَ وتی یک درشانے ءِ تہ ءَ گْوشتگ کہ پسنی ءَ مروچی منی سیادے ءِ چُک محمد ء نبی بخش آوار جتگ، آخر زورواریں مردم چی لوٹ اَنت؟

مروچی بیگاہ ءَ بلوچ لبریشن آرمی ءِ سرمچارانی مزنیں کچے ءَ سوراب شھر سر ءَ اُرش کتگ شھر دستیگ کتگ –

اُرش ءِ میان ءَ ایڈیشنل ڈپٹی کمشنر ( اے ڈی سی) سوراب، ھدایت اللہ بلیدئی بیران بیتگ – آئی ءِ مرگ ھال بلوچستان ھکومت نیمگ ءَ چہ ھم کنگ بیتگ-

چمّگند ءُ دمگی اِھوالکار رِد ءَ سلاہ بندیں مردماں پولیس تھانہ، نادرا کارگس. لیویز کارگس ءَ ھوار بازیں سرکاری ماڑی مانداشتگ اَنت- اشی ءَ اَبید سرکاری کارمرزی ءَ ھستیں بازیں گاڑی ھم ماندارگ بیتگ اَنت-

اِھوالکار رِد ءَ اُرشکاراں پوج ءِ گاڑی مانداشتگ اَنت وھدے کہ پوج سلاہ گاڑی ءُ دگہ سامان وتی دستیگ کتگ اَنت-

بلوچستان ءِ دمگ سوراب سلاہ بندیں مردماں وتی کنٹرول ءَ کتگ ءُ لیویز ءُ پولیس تھانہ بینک ءُ دگہ سرکاری جاہ دستیگ کتگ ءُ سرکاری سلاہ دستیگ کتگ انت-

اھوالانی رد ءَ پورسز ءِ کارندھانی سلاہ دستیگ ءُ گاڑی ماندارگ بیتگ انت-

شھر ءِ دگاں ھوار شال کراچی ءِ شھدگ ءِ سر ءَ ناکہ بندی ءُ چیک پوائنٹس برجم کتگ انت-

دومی نیمگ ءَ بلوچ لبریشن آرمی ءِ جارکش جیئند بلوچ ءَ شھر ءِ دستیگ کنگ من اتگ ءُ گوشتگ شھر سرمچاراں وتی دستیگی ءَ کتگ ءُ سرجمیں درشان رسانکدر ءَ شنگ کنگ بیت انت-