TBP Balochi

بلوچستان ءِ دمگ سبی ءَ پاکستانی پوج ءَ دمگی آبادی سر ءَ بیڑبرتگ ماڑی سر ءَ دستیگ کنگ جُھد کتگ چریشی ءَ مردماں سلاہ بندیں گھگیری کنان ءَ پوج پُشتکنز کتگ، میڑ ءَ سے کارندہ ٹپی بیتگ اَنت وھدے کہ آیانی یک گاڑی یے سُتکگ ءُ پُر بیتگ-

دمگی اِھوالکار رِد ءَ ٹی بی پی ءَ گوشتگ کہ گوستگیں روچ ءَ سبی ءِ دمگ لھڑی ءَ گوڑی ھند سر ءَ پاکستانی پوج ءَ دمگ انگیر ءَ کتگ سپاھی ء ھزار خان نامیں مردمے ءِ ماڑی سر ءَ دستیگ کنگ جُھد کتگ آیانی تہ ءَ یک روسی ٹریکٹرے ھم ھوار بیتگ-

آئی ءَ گْوشتگ کہ پوج ءِ کارندھاں وھدے ماڑی سر ءَ دستیگ کنگ جُھد کتگ ھمے مرد ءُ سیاداں گھگیری کتگ چریشی ءَ پد سلاہ بندیں میڑانی درچ برجاہ بیتگ گوستگیں شپ ءَ داں دیراں برجاہ بیتگ ،میڑاں پوج ءِ سے کارندہ ٹپی بیتگ اَنت، آیانی یک گاڑی یے سُتکگ ءُ پُر بیتگ وھدے کہ پوج ءِ کمک واستا چہ سبی ءَ پوج ءِ دگہ گیشیں کارندہ ھم سر بیتگ اَنت بلے آیاں پُشتکنزی کنگ کپتگ-

آیاں گْوشتگ کہ دمگی واجکارانی جُھد ءَ چہ پوج ءِ دمگ ءَ چہ شرت ایر کتگ کہ آ وتی گاڑیاں دمگ ءَ یل داتگ پیادگ شتگ اَنت، اشی ءَ پد پوج ءِ گاڑی دمگ مردماں آیاں سر کتگ اَنت – دمگی واکدار ءَ تنی وھدے اے درگت ءَ ھچ وڑیں ھال دیم ءَ نیتکگ-

زانگ بہ بیت گوستگیں روچاں کلات ءِ دمگ شیخڑی ءُ مورگند ءَ دمگی آبادی ءَ لوگ بلڈوز کتگ اَنت، پوج ءَ ٹیوب ویلز ءُ آئی ءَ پٹّیں سیلر پلیٹس ھم ناکاراہ کتگ دمگی آبادی دمگ یل دیگ ءِ بیھار داتگ – پوج ءَ دمگ ءَ جنگل ھم بلڈوزر کتگ ءُ تباہ کتگ اَنت-

بلوچستان ءِ دمگ ھُزدار ءَ یک ورنایے کہ پیسر ءَ زورانسری بیگواہ کنگ بیتگ اَت، تیرگواری ءِ آسر ءَ بیران بیتگ- دمگی اِھوالکار گوشگ اِنت کہ ورنا سرکاری پلامرزی سلاہ بندیں ٹولی ءَ نشانگ کتگ، کہ انسانی ھکانی ادارہ ءُ راجدوستیں پارٹی ‘ ڈیتھ اسکواڈ ‘ ءِ نام ءَ چہ پجّار بیتگ اَنت-

بیران بیتگیں ورنا ءِ پجّار مسلم ء اختر نام ءَ چہ بیتگ، کہ ھُزدار ءِ دمگ کوڑاسک ءِ جھمنند بیتگ – میتگ مردماں گوستگیں شپ ءَ مسلم لوگ ءَ چہ ڈن لوٹائینتگ ءُ آئی ءِ سر ءَ تیرگواری کتگ ءُ آ جاہ پہ جاھی بیران بیتگ-

مسلم اشی ءَ ساری دہ اکتوبر دوھزار بیست چار پاکستانی پوج ءَ آوار جتگ، چریشی ءَ پد آ کساس دو ماہ ءَ تاں بیگواہ بیتگ – آ سے دسمبر دوھزار بیست چار ءَ یل کنگ بیتگ اَنت-

بلوچستان ءَ انسانی ھکانی کارکن ءُ راجدوستیں گل ءَ ٹاہ داتگ کہ پاکستانی سیکیورٹی ادارھانی پلامرزی ٹولی کہ آیاں ” ڈیتھ اسکواڈ” گوش اَنت مردمانی زورانسری آوار جنی ءُ کوش ءَ تچکی ءَ ھوار اَنت-

اے وھد ءَ بازیں انچیں ھال دیم ءَ اتکگ اَنت آیانی تہ ءَ زورانسری آوار جنگ بیتگیں مردم ناشناسیں مردماں تیرگواری کتگ کُشتگ- اشی ءَ ساری کیچ ءُ گوادر ءَ ھوار بلوچستان ءِ جتاجتائیں دمگاں اے وڑیں وئیل دزکپتگ اَنت-

پاکستان پوج ءَ بلوچستان ءِ دو جتا جتائیں ھَند ءُ دمگاں آپریشن ءِ وھد ءَ ھپت بلوچ سرمچارانی جنگ ءِ ٹاپار جتگ۔

پاکستان پوج ءِ آئی ایس پی آر ادارہ ءِ نیمگ ءَ گْوشگ بوتگ کہ لشکر ءَ بلوچستان ءِ ھَند کچّی ءِ دمگ مَچّ ءَ بلوچ سلاہ بندیں گلّ ءِ پنچ مردم کُشتگ، ھمے وڑ ءَ دگہ یک آپریشنے ءَ کلات ءِ ھَند مورگند ءِ دمگ ءَ بلوچ سلاہ بندیں گل ءِ دو مردم کُشگ بوتگ۔

آئی ایس پی آر ءِ نیمگ ءَ گْوشگ بوتگ آپریشنانی وھد ءَ چہ کُشتگیں مردماں مزنیں کساسے ءَ سلاہ ءُ گولا بارود ھم دست کپتگ۔

دنیگا کُشتگیں مردمانی پجار کنگ نہ بوتگ، بلے گیشتریں تُرس ءُ گمان ھمیش اِنت کہ اے مردمانی تہ ءَ زور بیگواھیں مردم ھم بوت کن اَنت۔
بلوچستان ءَ چوشیں بازیں ویلے دیم ءَ آتکگ کہ اود ءَ پاکستانی لشکر ءَ وتگڑیں (دیم پہ دیمی) جنگاں، چہ پیسر ءَ زور بیگواہ کتگیں مردم کُشتگ اَنت۔

ھمے سال ءَ بلوچ آجوئی لوٹوکیں گلّانی گیشیں کاروائیاں ءُ ھاسکن جاپر ایکسپریس ءَ بلوچ لبریشن آرمی ءِ نیمگ ءَ ھائی جیک کنگ ءَ رند وتگڑیں جنگ ءُ دیم پہ دیمیاں مردماں کُشگ ءِ ویل ءُ واکیہ گیش بوتگ۔

یورپی ڈیھ ناروے ءَ برجم دارگ بوتگیں ورلڈ ایکسپریشن فورم ءِ نیمگ ءَ پاکستان ءِ نامداریں انسانی ھکانی وکیل ایمان مزاری ءَ سال دوھزار بیست ءُ پنچ ءِ “یوتھ انسپرائریشن ہیومن رائٹس ” ءِ داد دیگ بوتگ –

اے داد آئی ءَ ھمے واست ءَ.دیگ بوتگ کہ آئی ءَ پاکستان ءِ تہ ءَ ھیالانی درشان دابی، جمہوریت، انسانی ھکانی دیمروئی ءُ پھازگ ءِ ھاتر ءَ نترستگ ءُ جھد کتگ –

وکیل ءُ انسانی ھکانی باسک ایمان مزاری ءَ اے داد نوبیل کٹوکیں اھوالکار ماریہ ریسا ءَ داتگ –

ھمے وھد ءَ ماریہ ءَ ریسا ءَ گوشتگ کہ اے سال ءَ اے داد کانودے ءِ نودربر ءُ انسانی ھکانی وکیل ءُ بے دروریں زالبول ءُ انسانی ھکانی پھازوکے ءَ دیگ بوگ ءَ انت –

آئی ءَ گوشتگ کہ ایمان مزاری ءَ کانود ءِ بالادستی، مزھبی ءُ نسلی برابری، ھک، انسانی ھکانی ھاتر ءَ وتی توار چست کتگ – آ مدام زورانسری آوار جنی، تاکت ءِ رد کارمرز کنگ ءِ بگیری ءَ جھد ءَ بوتگ – ایمان مزاری ایوک ءَ ترسناکیں کیسانی سرا گپ نہ جنت بلکیں آئی ءَ وت ھم بیھار، ریاستی زوراکیانی دیمپانی کتگ بلے اشی ءَ ابید ھم مدام دیم ءَ بوتگ –

ماریہ ءَ ریسا ءَ امسانی ھکانی باسک ءَ اے داد دیان ءَ گوشتگ کہ ایمان مزاری ءَ پاکستانی ریاستی زوراکی چوش کہ زورانسری آوار جنی، توھین مزھب رد کارمرزی، سیاسی باسک ءُ انسانی ھکانی منوگرانی بگیری ءَ دروگیں ارزیانی بگیری ءَ توار چست کتگ ـ آئی ءَ اے دابیں کیس ھم گون بوتگ کہ آمیدگس، بیوروکریسی ءُ پوجی اپسرانی واک ءِ رد کارمرز چیلنج کتگ انت –

ماریہ ریسا ءَ ایمان مزاری ءِ درگت گپ جنان ءَ گوشتگ کہ اشانی تہ ءَ بلوچ سیاسی باسک ڈاکٹر ماھرنگ بلوچ ھم ھوار انت کہ مارچ 2025 ءِ بندیگ انت ءُ آئی ءِ سرا سپر ءِ بندش آئی سرا ناشری ءِ کیس جنگ بوتگ –

آئی ءَ گوشتگ کہ ایمان مزاری ءَ 2023 ءَ پشتون تحفظ مومنٹ ءِ زھرشانی ءَ ھم بھر زرتگ کہ آئی ءَ پد بازیں بھتام ءِ جنگ بوتگ –

زانگ بہ بیت ایمان مزاری اسلام اباد ءَ نشتگ ءُ انسانی ھکانی وکیل یے کہ ھاسکر بلوچ نودربرانء گوم ءَ بوتگیں زوراکیانی بگیری ءَ کار ءَ بوتگ –

ایمان مزاری اسلام آباد ہائی کورٹ ءَ بیگواھیں بلوچانی کھولانی ھم وکیل ایں ءُ بلوچ سیاسی باسکانی کیس گون انت –

ایمان مزاری ءَ رستگیں اے داد ءِ سرا بلوچ یکجھتی کمیٹی ءِ رھشون سمی دین بلوچ ءَ گوشتگ کہ مناں باز وشی بیت کہ ایمان مزاری ناروے ورلڈ ایکسپریشن فورم ءِ نیمگ ےَ انسانی ھکانی داد دیگ بوتگ اے ایوک ءَ آئی ءِ دلیریں جھد ءَ پیش نہ دار ایت بلکیں پاکستان ءِ تہ ءَ آجوئی ءَ گوں وتی ھیالانی درشانی ءُ جمہوریت ءِ پلامرزانی ھاتر ءَ دلبڈی ءِ کلوھ یے –

بلوچستان ءَ سِی ءُ پنچ اُرش بوتگ انت، پنجاہ ءُ یک مُرتگ ءُ سد ءَ گیش زدگ بوتگ انت، سوراب بلوچ سلاہ بنداں وتی کنٹرول ءَ کتگ –

اسلام آباد ءَ “پاکستان انسٹیٹیوٹ فا پیس سٹڈیز ” (PIPS) ءُ پاکستان سینٹر فار کانفلکٹ اینڈ سیکورٹی اسٹڈیز (PICSS) ءِ رپورٹ ءِ رد ءَ ھمے سال ءِ مئی ماہ ءَ پاکستان ءِ تہ ءَ سلاہ بندیں اررشانی تہ ءَ گیشی گندگ ءَ اتکگ، کہ درسیں گیش سانمندتریں دمگ بلوچستان بوتگ –

بلوچستان ءِ جاور ھال:

پاکستان انسٹیٹیوٹ فا پیس سٹڈیز ” (PIPS) ءُ پاکستان سینٹر فار کانفلکٹ اینڈ سیکورٹی اسٹڈیز ءِ نیمگ ءَ شنگ بوتگیں رپورٹ ءِ رد ءَ بلوچستان ءَ مئی ماہ ءَ سِی ءُ پنچ اُرش کنگ بوتگ کہ اے اُرشاں کم چہ کم پنجاہ ءُ یک مردم مُرتگ انت ءُ سد ءَ گیش زدگ بوتگ انت –

اے رپورٹ ءِ تہ ءَ ٹاہ دیگ بوتگ کہ مئی ماہ ءَ بلوچستان ءَ بوتگیں اُرشاں بیران بوتگیں مردمانی تہ ءَ سِی مردم لس مردم بوتگ انت ءُ ھژدہ پھازگی کارمند ءُ سَے اُرش کار ھوار انت –

اے رپورٹ ءِ تہ ءَ گوشگ بوتگ کہ ھمے میان ءَ چہ سلاہ بندیں گلانی نیمگ ءَ بلوچستان ءِ جتا جتائیں ھند ءُ دمگاں کم چہ کم نُھ مردم آوار جنگ بوتگ وھدیکہ مئی ماہ ءَ ھزدار ءَ آرمی پبلک اسکول ءِ بس ءِ سرا بوتگیں اُرش ءَ ھشت جنکو دو پوجی کارمند مرتگ انت وھدیکہ سِی ءُ پنچ زدگ بوتگ انت –

دومی نیمگ ءَ بلوچ آجوئی لوٹوکیں گلانی رپورٹاں یکجاہ کنوکیں سگار میڈیا ءِ رِد ءَ مئی ماہ ءَ ایوک ءَ بلوچ لبریشن آرمی ءَ یک سد ءُ یازدہ ءَ گیش کار اُرش کُتگ کہ اے اُرشاں پاکستانی پوج ءِ یکسد ءُ بیست کارمند مُرتگ ءُ پنجاہ ءُ سَے گیش زدگ بوتگ انت –

سگار میڈیا بلوچ آجوئی لوٹوکیں ءُ ھندی رسانکاں چہ اے رپورٹاں زور ایت ءُ شنگ کنت –

سگار میڈیا ءِ نیمگ ءَ شنگ بوتگیں رپورٹ ءِ رِد ءَ بلوچستان ءِ دمگ کلات، پنجگور، کیچ ءُ شال ھما دمگ انت کہ ادا بلوچ آجوئی لوٹوکاں گیشتر اُرش کتگ –

بلوچ لبریشن آرمی ءَ مزنیں گامگیج ءِ زرتگ ءُ شال تاں کراچی ءَ رؤکیں شھدگ بستگ ءُ سوراب سرجمیں سَے ادار ءَ تاں وتی انگر ءَ کُتگ وھدیکہ اودے پولیس کارمنداں چہ سلاہ پچ گپتگ انت سرکاری کارگس مانداشتگ انت، اودا ایڈیشنل ڈپٹی کمشنر ھم مُرتگ –

ھمے وڈ مئی ماہ ءِ بندات ءَ بلوچ لبریشن آرمی ءِ سرمچار کلات ءِ نزیک ءَ منگچر ءَ پُترتگ انت ءُ بازیں ادارے ءَ تاں ھمودا ساڑی بوتگ انت – ھمے میان ءَ آیاں منگچر ءِ نادراہ کارگس، جوڈیشنل کمپلکس، بینگ ءُ دگہ سرکاری جاہ وتی کنٹرول ءَ کتگ انت ءُ سرکاری سلاہ ءُ ریکارڈ دستیگ کتگ انت ءُ پدا رندا ھمے بلڈنگ مانداشتگ انت –

بی ایل اے ءِ سرمچاراں منگچر ءَ شال تاں کراچی ءَ رؤکیں شھدگ ءِ سرا پٹ ءُ پول ءِ وھد ءَ لسبیلہ پولیس ءِ پنچ کارمند دزگیر کتگ انت ءُ پدا ھپتگے ءَ پد یل داتگ انت وھدیکہ منگچر ءُ کش ءُ گور ءِ ھند ءُ دمگاں پاکستانی پوج ءِ بنجلانی سرا ھم اُرش کتگ –

مئی ءِ گڈسر ءَ سوراب ءِ انگر کنگ ءِ دومی روچ ءَ بی ایل اے ءِ باسکاں شال ءِ نزیک ءَ مستونگ ءَ یک ادارے ءَ تاں شال ءُ کراچی ءِ شھدگ بستگ ءُ پٹ ءُ پول کتگ – ھمے وھد ءَ ولی خان پولیس ءِ تانہ ءُ یک لیویز پانگس ءِ وتی کنٹرول ءَ کتگ- –

مئی ءَ دگ بندی ءُ کبزہ ءُ کنٹرول کنگ ءِ ھر سئیں کاراں ھمے ٹولی ءِ دست مان بوتگ ا-

پاکستان سینٹر فار کانفلکٹ اینڈ سیکورٹی اسٹڈیز ءِ ھمک ماھی رپورٹ ءِ رِد ءَ مئی ماہ ءَ سرجمیں پاکستان ءَ ھشتاد ءُ پنچ اُرش بوتگ انت کہ اے چہ اپریل ءَ بوتگین اُرشاں پنچ درسد گیش انت –

اے اُرشاں یکسد ءُ سیزدہ مردم جنگ بوتگ انت کہ آیانی تہ ءَ پنجاہ ءُ دو پھازگی کارمند، چِل ءُ شش لس مردم، یازدہ اُرشکار، ءُ چار ایمنی کمیٹی باسک ھورر انت – زدگ بوتگیں مردمانی کچ یکسد ءُ ھشتاد ءُ دو بوتگ کہ آیانی تہ ءَ یکسد ءُ سِی لس مردم، چِل ءُ ھپت پھازگی کارمند، چار اُرشکار ءُ ایمنی کمیٹی ءِ یک باسک ءِ بوتگ –

رپورٹ ءِ رِد ءَ مئی ءَ پھازگی لشکر ءِ اُرشاں پنجاہ ءُ نُھ ناشرکار جنگ بوتگ انت، پنچ پھازگی کارمند ھم مرتگ انت وھدیکہ پھازگی واکدار ءَ پنجاہ ءُ دو شکی ایں ناشرکار ءِ جنگ ءِ ھم ٹاہ داتگ –

مئی 2025 ءَ پھازگی لشکر ءِ مرتگینانی تہءَ ھپتاد ءُ سَے درسد ءُ لس مردمانی زدگ بوگ ءِ کچ 145 درسد گیشی بوتگ – وھدیکہ اپریل ءِ کچ ءَ پھازگی لشکر اُرشاں ناشرکارانی مرگ ءَ شست ءُ ھشت درسد کمی بوتگ وھدیکہ اپریل ماہ ءَ پھازگی لشکر ءِ اُرشاں دوسد ءُ سَے ناشر کار جنگ بوتگ انت ءُ مئی ءَ آیانی کچ شست ءُ پنچ ایں –

پاکستان انسٹیٹیوٹ فار پیس سٹڈیز ” (PIPS) ءُ پاکستان سینٹر فار کانفلکٹ اینڈ سیکورٹی اسٹڈیز ءِ شنگ کتگیں رپورٹ ءِ رد ءَ سرجمی ءَ یکسد ءُ ھپتاد ءُ دو مرتگیں مردم ءُ یکسد ءُ نود ءُ چار زدگ بوتگیں مردم رپورٹ ءَ ھوار کنگ بوتگ انت –

بلوچستان ءَ پد دومی نمبر ءَ خیبر پختونخوا درساں گیشتر سانمند بوتگ کہ اودا مرج بوتگیں ٹکی دمگاں بیست ءُدو اُرش بوتگ ءُ ، چِل ءُ پنچ مرتگ، بیست ءُ سَے پھازگی کارمند، دوازدہ لس مردم، شش ناشر کار ءُ ایمنی کمیٹی ءِ چار باسک ھوار انت وھدیکہ سرجمیءَ پنجاہ ءُ ھشت مردم زدگ بوتگ انت –

اشی ءِ ھمراھی ءَ خیبر ءِ ایندگہ دمگاں بیست ءُ پنچ اُرشانی تہ ءَ چاردہ مُرتگ کہ آیانی تہ ءَ دھ پھازگی کارمند، دو لس مردم، دو ناشر کار ھوار ءُ سرجمی ءَ بیست ءُ چار مردم زدگ بوتگ انت –

مئی ءَ سندھ ءَ بوتگیں سَے اُرشانی تہ ءَ سَے مردم مُرتگ کہ آیانی تہ ءَ دو لس مردم یک پھازگی کارمندے ھوار انت – وھدیکہ پنجاپ، گلگت، ، آزاد کشمیر ءَ اے ماہ ءَ ھچ اُرش ھال نہ بوتگ –

رپورٹ ءِ رِد ءَ پنجاپ ءَ پھازگی کارمنداں سِی ءُ نھ شکی ایں ناشرکار دزگیر کتگ –

اشاں ابید شمالی وزیرستان ءَ کوآڈ کاپٹر ءِ اُرش ءَ چار زھگ بیران بوتگ ءُ مھلوک ءِ زھرشانی بندات بوتگ –

ریاستی ادارھاں ٹاہ داتگ کہ اے اُرش ناشرکارانی نیمگ ءَ چہ ڈرون سرا کنگ بوتگ بلے ھندی مردمانی گوشگ انت کہ اے اُرش ءَ پاکستانی پوج ھوار بوتگ ءُ آیاں انساپ لوٹ اِتگ –

بلے مئی 2025 ءِ رپورٹ ءَ اے گپ پدر بیت کہ بلوچستان یکشل ءَ ریاستی ءُ بے ریاستی اُرش بوگ ءَ انت، بلوچ آجوئی لوٹوکیں سلاہ بندیں گلانی سر ءُ پُر ھاسکر بی ایل اے ءِ گیش بوتگیں کار ءُ سوراب ءِ وڈیں دمگے ءَ وتی انگر ءَ کنگ نوکیں مرھلے ءِ نشانی ءَ.دیگ انت –

پاکستان ءِ ریاستی ادارھانی نیمگ ءَ مدامی ھمے ٹاہ دیگ بیت ایں کہ بلوچ سلاہ بندیں ٹولیاں ھوار پاکستان ءَ اُرش کنوکیں گل داشتگ انت بلے کچ ءُ کساس ءُ زمینی راستی ءَ ھمے زاھر انت اے دراہ بٹاک انت –

بلوچ یکجھتی کمیٹی ءِ بُنجاھی راھشون ڈاکٹر صبیحہ بلوچ ءَ گْوشتگ کہ ریاست گوں مزن دلیری ءَ بلوچ چُکچینی برجاہ داشتگ – آ روچ رُژنایے ءُ شپ تھاری ءَ مئے ورنایاں زورانسری بیگواہ کنگ ءَ اَنت- نو آ کسانیں چُک ءُ زالبولاں ھم زورانسری آوار جنی ءِ نشانگ کنگ ءَ اِنت-

آئی ءَ گوشتگ کہ اے زُلم ءِ بُنکی سبب ءَ مئے بے تواری اِنت – وھدے دُژمن گند اِیت کہ ما تُرس ءِ آماچیں، گُڑ آ گیش بے تُرس بیت ءُ زوراکی ءَ۔گیش کنت-

ڈاکٹر صبیحہ بلوچ ءَ گْوشتگ کہ ما اے راستی منّگ لوٹ اِیت کہ مئے کمک واستا ھچ کس نئیت – وتی پدریچ ءُ وتی مردمانی پھاز ءِ ھاتر ءَ مارا وت دیم ءَ آیگ لوٹ اِیت ءُ توار چست کنگ لوٹ اِیت-

آئی ءَ سرجمیں بلوچاں چہ دزبندی کتگ کہ وھدے آیانی دوستناک بیگواہ کنگ بنت گڑا بے توار مہ بنت- دیم ءَ بیا اَنت، ءُ زُلم ءِ ھلاپ ءَ بہ اوشت اَنت- ما سرجمیں بلوچ راج ءَ چہ دزبندی کن ایں کہ آ اسرمندیں کھولانی ھمراھداری ءَ بہ کن اَنت آیاں ایوک مکن اَنت-

آئی ءَ گْوشتگ کہ باندا بیسیمہ ءَ ماہ جبین بلوچ ءِ یل کنائینگ ءِ واستا یک زھرشانی روانکے کشگ بیت- ما بیسیمہ ءِ راج ءَ چہ دزبندی کن ایں کہ آ اے روانک ءَ جوانیں وڑے ءَ بھر بزور اَنت ءُ بلوچ راج ءَ چہ دزبندی کن آں کہ بیگواھیں مردمانی کھول ءِ گون ءَ یکجاھی ءِ درشان ءَ بہ کن اَنت-

ڈاکٹر صبیحہ بلوچ ءَ گُڈی ءَ گْوشتگ کہ اے زُلم یک لوگے ءِ توک ءَ نہ انت ، بلکیں اے مئے درستانی سر ءَ اسرمند بیتگ – اگاں ما بے توار بہ بہ ایں، گُڑا اے بے تواری آؤکیں پدریچاں ھم یک ساپ نہ بیؤکیں داگے یل دنت-

آئی ءَ گْوشتگ کہ بلوچ راج ءَ چہ دزبندی کن آں کہ آ دیم ءَ بیا اَنت ءُ اے زُلم ءِ ھلاپ ءَ توار چست بہ کن اَنت-

بلوچستان ءِ جتاجتائیں دمگاں چہ پاکستانی پوج ءِ دست ءَ زورانسری بیگواہ کنگ بیتگیں کم چہ کم شانزدہ مردم کنگ بیتگ اَنت، انسانی ھکانی گل بلوچ یکجھتی کمیٹی ءُ کھول ءَ اے مردمانی یل بیگ ءِ گپ راست کتگ-

ھالانی رِد ءَ بلوچستان ءِ دمگ چہ کیچ ءِ تھسیل تربت ءُ ناصر آباد ءَ شش مردم یل کنگ بیتگ اَنت آیانی تہ ءَ انضمان حسن ء محمد حسن، جھمنند ناصر آباد ، عبدالمجید ء عبدالغنی جھمنند بلیدہ، غلام قادر ء دوست محمد جھمنند بلیدہ، دلسرد ء محمد حسین جھمنند آسکانی بازار آپسر ، ذاکر حیدر ء حیدر جھمنند آسکانی بازار، زید ء ملا عبداللہ جھمنند صلالہ بازار تربت ھوار اَنت-

بلوچ یکجھتی کمیٹی ءِ رِد ءَ بلوچستان ءِ دمگ ھُزدار ءِ تھسیل چہ نال ءَ یکیں روچ ءَ زورانسری بیگواہ کنگ بیتگیں شش مردم ممتاز علی ء محمد اسماعیل شاھوانی، وزیر احمد ء رحمت اللہ، اقبال ء غلام رسول شاھوانی، نظیر احمد ء رحمت اللہ، لیاقت علی ء محمد انور شاھوانی، حکمت اللہ ء عزیز اللہ یل کنگ بیتگ اَنت-

گل ءِ رِد ءَ اشانی تہ ءَ دو مردم نُھ مئی ءَ یل کنگ بیتگ اَنت، وھدے کہ آ دگہ چاریں بیست سئی مئی ءَ بیتگ اَنت-

بی وائی سی رِد ءَ چہ گوادر ءَ زورانسری آوار جنی ءِ نشانگ کنگ بیتگیں شعیب رفیق ء رفیق بلوچ، جھمنند ٹی ٹی سی کالونی گوادر، دوازدہ مئی دوھزار بیست پنچ ءَ زورانسری آوار جنی ءِ نشانگ کنگ بیتگ اَنت آ سی مئی ءَ یل کنگ بیتگ ءُ وتی لوگ ءَ سر بیتگ-

بی وائی سی رِد ءَ شش اپریل ءَ چہ موسیٰ خیل ءَ زورانسری آوار جنی ءِ نشانگ کنگ بیتگیں دو مردم ظفر بزدار ء خان محمد، جھمنند شام موسیٰ خیل، آفاق بزدار ء ایوب بلوچ جھمنند رارا، ردا گوستگیں روچ ءَ یل کنگ بیتگ-

ھمے وڑ چہ مشکے ءَ سیادی داروکیں بیاندر بلوچ ء مرید خان، بیست نُھ نومبر دوھزار بیست چار ءَ چہ بیگواہ بیتگ، یک جون دوھزار بیست پنچ ءَ چہ ھب ءَ یل کنگ بیتگ-

ناروے ءِ شھر للے ھامر ءَ برجاھیں گلوبل انسانی ھکانی دیوان ورلڈ ایکسپریشن پورم (WEXFO) ءَ بلوچ یکجھتی کمیٹی ءِ سروک ڈاکٹر ماہ رنگ بلوچ ءِ نہ بوگ ءِ یات ءَ سک شرپداریں رنگے ءَ یات کنگ بوتگ۔ کانپرنس ءِ جارچیناں آئی ءِ نشست چیدگی نمائندگی ءِ دروشم ءَ ھالیگ کتگ ءُ اے شریکیں مردمانی واست ءَ یک باسانیں پیامے ءَ جوڑ بوتگ۔

جارچیناں ھمے موہ ءِ سر ءَ جار جت کہ ڈاکٹر مھرنگ بلوچ پہ انسانی ھکاں وتی توار چِست کنگ ءَ مروچی زندان ءَ بند اِنت ءُ پہ زھرشانی ءِ رد ءَ ما آئی ءِ کرسی ھالیگ یلہ داتگ۔

اے چیدگی گامگیج ءِ رد ءَ گوں ھما جھدکاراں یکجھتی ءِ درشان کنگ بوتگ کہ آ پہ آجوئی ءِ درشان ءُ انسانی ھکانی رکینگ ءَ گپ جنگ ءَ انت۔

اے دیوان ءَ انسانی ھکانی وکیل ایمان مزاری، اھوالکار کیّا بلوچ، ءُ بازیں میان استمانی انسانی ھکانی جھدکار ءُ باسک راھشوناں بھر زرتگ۔

اے موہ ءِ سر ءَ انسانی ھکانی جھدکار ءُ وکیل ایمان مزاری ءَ ھالیگیں نشست ءِ اکس شنگ کتگ ءُ نبشتگ ” ادا للے ھامر ءَ انسانی ھکانی دیوان ءِ وھد ءَ ڈاکٹر مھرنگ بلوچ ءَ یات کنگ بوتگ۔”

اھوالکار کیّا بلوچ ءَ گُشتگ کہ ریپلر ءِ شریک بانی ماریا ریسا ءِ پُریں ھال ءَ گُشتانک ءِ وھد ءَ یک ھالیگیں کرسی یے ءَ ڈاکٹر مھرنگ بلوچ ءَ را بے تواری ءَ شگر ءُ منت گپت، ھما مردمانی یات ءَ کہ پہ راستی ءِ گشگ ءَ بے توار انت۔

ڈاکٹر مھرنگ بلوچ ءِ گْوھار کہ آئی ءِ کیس ءَ گوں نزیکی ءَ، رندگیری کنگ ءَ اِنت آئی ءَ اے موہ ءَ گْوشتگ کہ من WEXFO ءِ بے دروریں منت واراں کہ مرچی ڈاکٹر مھرنگ بلوچ ءَ نہ ایوک ءَ نام ءِ بستار ءَ بلکیں دلیری ءُ زمیر(زرد) ءِ نشان ءِ بستار ءَ یات کنگ ءَ آں ۔

ماہ رنگ بلوچ ءِ گْوھار نادیہ بلوچ ءَ گُشت کہ بس گوستگیں سال ءَ ماہ رنگ ھمے پڑ ءِ سر ءَ اوشتاتگ ءُ بھادری ءَ گوں راستی ءِ گپ جتگ۔ مرچی ھمے راستی ءِ ھاتر ءَ بندیگ اِنت۔ آئی ءِ یکیں ‘جرم’ ایش ات کہ آئی ءَ ناانساپی ءِ سر ءَ بے تواری ءَ چہ انکار کت۔ انچو کہ ما دگہ ائیدے ءَ آئی ءِ ھست نہ بوگ ءَ گوازینگ ءَ ایں آئی ءِ نہ بوگ یک انچیں ٹپے کہ انگت ءَ وش نہ بوتگ۔

نادیہ بلوچ ءَ گْوشتگ کہ ھالیگیں کرسی ایوک ءَ آھانی نہ بوھگ ءِ نشانی نہ بوتگ بلکیں ھما زوراکانی یات بوتگ کہ آ نہ ٹھگ ءِ ھاموش کنگ لوٹ اَنت بلکیں اے ھم یات بوتگ کہ گھگیری ھاموشی ءَ ھم زندگ اِنت۔

زانگ بہ بیت کہ بلوچ یکجھتی کمیٹی ءِ سروک ڈاکٹر ماہ رنگ بلوچ گوستگیں بازیں ماھاں چہ 3MPO ءِ چیر دستی ءَ شال ءَ بندیگ اِنت۔ اے وھد ءِ تہ ءَ آئی ءِ تھری ایم پی او ءِ ھلاپ ءَ درخواست ھم آمیدگساں رد کتگ اَنت۔

بلوچستان سرکار ءِ نیمگ ءَ ڈاکٹر مھرنگ بلوچ ءِ ھلاپ ءَ سئے ایم پی او کیس جوڑ کنگ بیتگ اَنت ءُ ڈاکٹر مھرنگ ءِ ھمراہ بی وائی سی بیبو بلوچ، شاھجی سبگت اللہ، بیبرگ زهری ءُ گلزادی بلوچ ھم زندان ءَ بند اَنت۔

بولان ءِ بازیں دمگاں یکبرے پد ءَ مزنیں کساسے ءَ پوجی آپریشن بندات بوتگ۔

بلوچستان ءِ ھَند بولان ءِ بازیں دمگاں گونی پرا، یکو ءُ کِرّ ءُ کشاں مزنیں کساسے ءَ پاکستانی لشکر ءِ نیمگ ءَ آپریشن بندات کنگ بوتگ، ءُ ھمے وھد ءَ لشکر مزنیں کچّے ءَ اے دمگاں پترتگ۔

اتکگیں ھالانی رِد ءَ لشکر ءِ آپریشن ءِ وھد ءَ بازیں جاھے ءَ مزنیں کساسے ءَ گوں ھیلی بالگرداں تیرگواری ھم کنگ بوتگ۔

بولان ءُ کِر ءُ کش ءِ دمگاں گْوستگیں بازیں روچاں وھد وھد ءِ سر ءَ پوجی آپریشن ءِ ھال آیان بوتگ۔ چریشی ءَ پیسر ْگْوستگیں ماہ ءَ بولان ءِ دمگ سانگان، جالڑی ءُ کِرّ ءُ کشاں ھم پوجی آپریشن کنگ بوتگ۔

بلوچ لبریشن آرمی ءَ گْوستگیں ماہ ءَ شورکنڈ ءُ مَچ ءِ دمگ ءَ پہ آپریشن ءِ ھاتر ءَ اد ءَ اتکگیں لشکر ءِ یک موٹلے گوں بمب ءَ نشانگ کرتگ اَت۔

بی ایل اے ءِ گْوشگ ءِ رِد ءَ اے اُرش ءِ وھد ءَ موٹل ءَ سواریں سرجمیں بزاں دوازدھیں لشکر ھما جاہ ءَ مرتگ اَنت، ءُ گلّ ءَ اے اُرش ءِ تامر پوٹیج ھم وتی آپیشل اکاؤنٹ ”ھکّل“ ءَ داتگ اَت۔

بلوچستان ءِ ھَند کیچ ءِ دمگ بالگتر ءَ پزور گاریں مردمانی بیگواھیانی بگیری ءَ گاریں مردمانی کھولانی نیمگ ءَ زھرشانیں نندانک برجاہ اِنت، چریشی ءِ سوب ءَ سی پیک ءِ مزن دگ ایم 8 پہ ھرچ وڑیں رَو آ ءَ بند کنگ بوتگ۔

نندانک ءَ مزنیں کچّے ءَ زالبول ءُ زھگ ھم گون اَنت کہ وتی دوستیں مردمانی آجوئی ءِ لوٹ ءَ کنگ ءَ اَنت۔

زھرشانی کنوکیں مردماں گْوشتگ: دانکہ گاریں مردم زاھر ءُ دیم ءَ آرگ نہ بنت، زھرشانی برجاہ اِنت ءُ دگ پچ کنگ نہ بیت۔

زھرشانی ءِ سوب ءَ تربت، گوادر، پنجگور ءُ شال ءِ میانجی ءِ زمینی رھوتکاری سرجم ءَ بند اِنت، مزن دگ ءِ دوئیں نیمگاں سدانی کچّ ءَ موٹل اوشت ءِ آماچ اَنت کہ ماں آیاں زالبول، کماش، زھگ ءُ ائید ءِ موکلاں رند گِساں واترّوکیں نودربر ھور اَنت۔۔

سرکار ءِ ھَندی مردمانی گْوشگ ایش اِنت بند ءُ بستی مردم (انتظامیہ) گوں زھرشانی کنوکاں نند ءُ نیاد ءِ جھد ءَ کنگ ءَ اِنت تاکہ جیڑہ توجیل کنگ بہ بیت۔