دلاور جپا کشّی ءِ چیدگ
نبشتہ کار: سلتان مھمود
دی بلوچستان پوسٹ
آ راج ءَ کس ایرماد کرت نہ کنت کہ آ پہ مِرگ ءَ پد نہ کنز اِیت ۔ راج ھما وھد ءَ نیست ءُ نابود بنت آوانی پجار گار بیت ،آ چہ جنگ ءَ یک کر بنت پہ ساہ ءِ رکینگ ءَ گلامی ءَ امباز کن اَنت۔ اے رنگیں راجانی آکبت تھار دیم بیت دگنیا ءِ پراھیں پَتّر ءَ آوانی ڈس ءُ نشان نہ مان اِیت ءُ دگنیا ءِ شاھگانیں دلبند ءَ اے رنگیں کسّہ سک باز ھست اِنت کہ راجاں جنگ نہ کرتگ ایردستی وتی زندمان ءِ بھر کرتگ مروچی آیانی نام ءُ نشان نہ گواہ اِیت چے ءَ کہ آیاناں راجی سنچ ءُ سما نہ بوتگ ۔
آ راجاں کہ جنگ کرتگ مرگ امباز اِتگ مرچی وتواجھیں سرڈگارے ءِ سر ءَ پہ شان زندگی کنگ ءَ اَنت۔ آوانی پدریچ پہ شانے آسودگ ءُ ایمنیں زندے گوازینگ ءَ اَنت۔راجانی میراس راجی ورنا اَنت۔ ھما ورنا کہ آوانی تہ ءَ پہ راجی آکبت ءَ جیڑگ ءِ سنچ ءُ سما پہ وتی آیوکیں پدریچ ءَ روژنائیں بانداتے ءِ ھاتر ءَ۔ آ ورنا چہ وت ءَ دلجم بنت۔کہ مارا پہ وتی راجی بانداتے ءَ ندر ءُ کولیگ بوگی اِنت۔ وتی زند ءِ ھرچ تماہ ءُ واھشت ایرماد کنگی اِنت ۔چہ ھمے سوھوئیں ورنایانی آگھی ءُ آیانی کربانی ءُ دیمونیانی برکت ءَ چہ راج زندگ بنت۔ راجدپتر گوں شھمیریں گالاں آواناں وتی دامن ءَ نکش اِیت۔
انچوش کہ پیشگیں بلوچاں گُشتگ مرگ ءَ مَڑاھے گون کن مروچی بلوچ ءِ ورنایاں مرگ ءَ مڑاھے کرتگ۔مروچی اے برجاھیں جنگ ءَ ھزارانی کچّ ءَ بلوچ بھادریں ورنا پہ وتی بلوچی ءِ زندگ دارگ ءَ پہ ماتیں سرڈگار ءِ آجوئی ءُ وتی راجی پجار ءُ ھستی ءِ رکینگ ءَ وتی ھیشی سر نَدْر کرتگ اَنت ۔ چہ ھمے ورنایاں یک بلوچ پُسگے شھید دلاور اِنت سال 2009 ءَ ماں پنجگور ماڈل اسکول ءَ من گوں دلجان ءَ آژناہ بوتاں۔ دلجان ھمے اسکول ءَ وانگ اَت من اوں نوک داھلہ زرتگ اَت۔ من نُھمی کلاس ءَ اِتاں دلجان کلاس ء ھپت ءَ وانگ ءَ اَت۔ من گلزار امام چہ کسانی ءَ زانتگ اَت ۔گلزار امام اے وھد ءَ پَنجگُور ھنکین ءَ بی ایس او آزات ءِ کارمستر اَت ءُ من پروم بنزہ ءِ باسکے اِتاں۔ من کہ پنجگور ءَ اتکاں گُڑا من ماڈل اسکول ءِ بنزہ ءِ باسک بوتاں۔دلجان ءَ اوں شش ھپت ماہ ءَ پد بنزہ ءِ باسکی زرت بی ایس او آزات اَت ءُ بلوچ جھد ءِ اُستمانکی(سیاسی) چست ءُ ایر اِت اَنت۔ چاکینگ، پمپلیٹینگ،ریلی،جلسہ ءُ جلوس بلے دلجان الم گون اَت۔سُرگ ءَ اَت۔چہ ھمے کاراں کامریڈ گیش سنگتاں دوست اَت ءُ مئے یکے دومی ءَ گوں نزیکی گیش بوتگ اَت۔گَل ءِ کارانی بارو ءَ گپ ءُ تران اَت یاکہ مئے ھَندی جیڑہ ءُ جنجالانی سر ءَ سْوڑگ ءُ جیڑگ ءَ اَت ما ھور ءُ تور اِتیں ھمپگریں ھمسنّ اِتیں ۔ من کالج ءَ وَ داھلہ زرت بلے جاورانی نگیگی ءِ سوب ءَ کالج ءَ شُت ءُ ونت نہ کرت۔ جاور روچ پہ روچ نگیگ بوان اِت اَنت۔ من شھر ءَ نِشت نہ کرت۔
سال 2011 ءَ من گلزار امام جاگھے ءَ ڈیک دات۔ مئے گِند ءُ گِدار بوت ۔ من ءَ چہ دلجان ءُ دگہ لھتیں کامریڈانی بارو ءَ جُست ءُ پد ئِے کرت درائینت ئِے من ءُ تو رو ایں نیٹورکے ءَ ۔ وتی سنگتاں ھال کنیں گُڑا دلجان ءَ گوں دگہ دو سنگت ءِ بجیگ ءَ لھتیں روچ ءَ پد اتک مئے گور ءَ اتک سر بوت۔اے ھما وھد اِنت کہ مکران ءَ بی آر اے ءَ نوک وتی بُنجلے اَڈّ داتگ اَت دلجان گوں پنجگور ءِ سنگتانی ھوری ءَ کار کنگ ءَ اَت سال 2012 ءَ دلجان ءُ سراج سمین در کپ اَنت پہ کارے ءَ اناگہ ءَ پولیس ایشاں ڈیک دنت پولیس ایشانی سر ءَ تیر گواری کنت سنگت سراج سمین ھما جاہ ءَ شھید بیت ءُ دلجان ٹپّی بیت ، پولیس دزگیر ئِے کنت پولیس گون وت بارت ئِے شھید ءِ کُنٹ ءَ شھید ءِ وارساں دنت ءُ دلجان ءَ زندان ءَ بارت وھدیکہ پیشی ءَ برگ بیت گُڑا چہ جج ءِ دپتر ءِ دیم ءَ چہ مردم زور اَنت لِک (تچ)اَنت۔
دلجان ءَ چہ ھما روچ ءَ پد شھر یل دات دیم پہ کوہ ءَ شُت چہ شھر ءَ وتارا ڈکینت ئِے۔یک ءُ دو سال ءَ پد گلزار پروم ءِ کوھاں بی آر اے برجمیں اوتاکے اَڈّ کنگ ءَ اَت۔ گلزار ءِ ھمراھی ءَ یا بہ گْوش اِت بی آر اے ءِ مکران دمگ ءِ بنداتی سنگتاں چہ یکے دلجان اَت۔ اوتاگ اَڈّ دیگ بوت اوتاک ءِ زمہ داری دلجان ءَ دیگ بوت دلجان گوں وتی زمہ داری ءُ سنگتاں دلپھک اَت۔ سنگتاں دوست اَت۔ بی آر اے پرشت ءُ پروش ءُ پارٹی ءِ توکی جیڑہ…دلجان گوں وھد ءِ تاب ءُ پیچاں مھکمتر بوان اَت۔زامران ءَ بی آر اے ءَ اوتاگ ٹھینت دلجان دیم دیگ بوت زمہ داری دیگ بوت۔ ءُ دلجان کار ءَ اَت گوں سنگتاں تب ئِے وش اَت سنگت چہ دلجان ءَ وش اِت اَنت۔ اے وھد ءَ کہ گلزار دزگیر کنگ بیت۔ لھتیں وھد ءَ پیش دلجان نادراہ بیت چہ زامران ءَ درکپ اِیت پہ اِلاج ءَ کہ نیمراہ گرگ بیت ءُ داں دیر ءَ بےگواہ بیت۔ وھدے در کپ اِیت داں پارٹی پرشت ءُ پروش ءِ آماچ اِنت۔ گلزار گرگ بوتگ۔ اے وھد ءَ بی آر اے بیبگر گوں بی این اے ءَ یک بوتگ کہ پد ءَ پرشت ءُ پروش اَنت ۔ بلے دلجان گوں وتی ھمرایاں یکجاہ بیت گوں سنگتاں ھمشور ءُ ھمپنت بیت ماں بی ایل اے جیھند ءَ ھوار بیت وتی کار ءَ پہ دلپھکی برجاہ دار اِیت دلجان ھما جپاکشیں سنگت اَت کہ مدامی وتی پیسلاھانی سر ءَ مھکمی ءَ اوشتاتگ۔ گوں سنگتاں ھمپنت ءُ ھمتب اَت۔
اینچو پروشت ءُ پروش اینچو جیڑہ بلے انگت ءَ مھکم اَت۔ دلجان ھما سنگت اَت کہ آئی ءِ پگر ءُ لیکہ ھمیش اَت مارا جھد کنگی اِنت۔وتی پارٹی مھکم کنگی اِنت۔ اے بیست ءُ پنچیں سالاں پہ ما ھما جپاکشّ ءُ مھنتی ئیں سنگت ھست اَنت ءُ گْوستگ اَنت کہ آیاں پہ مئے دربرگ ءَ کردی جھد کتگ۔ آیانی کار ءُ کرد مئے واستا روشنائی بوت کن اَنت۔ ما دری راجانی یاکہ گْوستگیں نمیران بوتگیں جھدکار ءُ کامریڈیں سرمچار وَ نہ دیستگ اَنت بلے دلجان ءِ پیمیں بے ھبر ءُ کارکنوکیں سرمچاراں گوں زند گْوستگ ءُ گْوازینتگ دلجان ءِ دلپھکی مدام مئے رھشونی ءَ کنت ءُ جھد کنگ ءِ سکین ءَ دنت دلجان پہ مدام نمیران اِنت.
”ھون ءِ نکشاں کروجے کہ ھڈاں دُرش ئے“
یاکہ پمن چو البرز ءِ کوہ ءَ پُرش ئے
”من کہ مرگ ءَ چہ پد اوں نمیران باں“
”من نہ زاناں من ءَ تو چے پیم ءَ کُش ئے“
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-
بلوچ یکجھتی کمیٹی ءِ بُنجاھی جارکش ءَ گْوشتگ کہ ھدہ بندیگجاہ ءَ شال ءَ ساڑی بندیگجاہ سپرنٹنڈنٹ سید حمیداللہ پیچھی یکشل ءَ بلوچ یکجھتی کمیٹی ءِ رھشوناں تُرسینگ ءُ دلسیاہ کنگ ءَ اِنت- بندیگجاہ سپرنٹنڈنٹ سید حمیداللہ پیچھی ناں تھنا سیاسی بندیگاں کانون ءُ انسانی ھکاں چہ انکار کنگ ءَ اِنت بلکیں یک زوراوری ءُ بدسلوکیں دروشم ءَ بی وائی سی رھشوناں جتاجتائیں وڑ ءَ سسّائی ءُ جسمانی ازیت نشانگ کنگ ءَ اِنت ءُ مئے رھشونانی کھولاں ھم یکشل ءَ ترسینگ ءَ اَنت- آیاں دوستنانک ءَ چہ گند ءُ نند واستا بے زرورت ءَ سے سے کلاکاں بندیگجاہ ءَ چہ ڈن ودار پرمائینگ بنت-