بلوچستان ءِ دمگ جعفر آباد ءَ پولیس ءِ پوسٹ دزبمب اُرشے ءِ نشانگ کنگ بیتگ-
گوستگیں شپ ءَ جعفر آباد قیدی شاخ ءَ شفیع آباد پولیس پوسٹ ءِ سر ءَ ناشناسیں مردماں دزبمبے چگل داتگ-
بنشون ءِ رد ءَ پولیس ءِ پسو ءِ تیرگواری ءَ پد سلاہ بندیں موٹر سائیکل سواراں پشتمانداتگ ءُ شتگ انت ءُ پولیس ءُ سیکورٹی پورسز ءَ دمگ ءَ ناکہ بندی کتگ-
بلوچستان ءِ دمگ بولان ءَ سلاہ بندیں مردماں شھدگ بستگ ءُ بازیں اداراں داں پٹ ءُ پول کتگ-
گوستگیں شپ ءَ شاک ءُ زرغون گیس فیلڈ ءِ میان ءَ مارگٹ ءِ دمگ ءَ شھدگ سلاھبنداں بستگ ءُ گاڑیانی پٹ ءُ پول کتگ۔ یک مردمے ءِ دزگیر کنگ ءِ ھم ھال ھست۔
دمگی اھوالانی رد ءَ دو کلاک ءَ گیش سلاہ بندیں مردم شھدگ ءِ سر ءَ بوتگ اَنت کہ اے وھد ءَ پاکستانی لشکر ءِ جاسوسی ڈرون (کواڈ کاپٹر) ھم نشانگ جوڑ کنگ بوتگ ءُ تیرگواری کنگ بوتگ۔ بلے لشکری کیمپ ءِ نزیک بوھگ ءَ ابید ھم لشکر دیم ءَ نہ شتگ ۔
بلوچستان ءِ تہ ءَ بلوچ سلاہبندیں آجوئی لوٹوکیں مردمانی مزنیں دگانی سر ءَ کنٹرول کنگ ءِ بازیں وئیل بوتگ اَنت کہ آجوئی لوٹوکیں گل جتاجتائیں شھر یا شھدگانی سر ءَ کلاکانی کلاکاں کنٹرول کن اَنت۔
دو روچ پیسر نوشکی ءِ دمگ شیر جان آغا ءَ بلوچ لبریشن آرمی ءِ سرمچاراں شال ءُ تپتان ءِ مزنیں شھدگ کنٹرول کتگ ات کہ اودا گاڑیانی پٹ ءُ پول ھم کتگ ات۔
اے وھد ءَ پاکستانی لشکر ءَ کاروان ءِ دروشم ءَ دیم ءَ جنزگ ءِ جھد کتگ گڑا ھمے وھد ءَ سنگر گپتگیں سرمچاراں اُرش کتگ ات-
اے سال ءَ بلوچ لبریشن آرمی ءَ زهری، منگچر، ءُ سوراب ءِ ھاسیں شھر دستیگ کتگ ات انت۔ اے کارروائیانی وھد ءَ پولیس اسٹیشن، سرکاری کارگس ءُ دگہ ماڑی دستیگ کنگ بیتگ انت۔
بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ رسانکدر ءَ وتی شنگ کرتگیں درشان ءِ تہ ءَ گوشتگ کہ دژمن ءِ گوم ءَ میڑ ءَ گل ءِ نھ سرمچار نمیران بوتگ انت وھدیکہ دژمن ءِ بازیں کارمند ءِ مُرتگ انت ۔
جارکش ءَ سرجمیں ھال داتگ ءُ گوشتگ کہ دو جون دوشمبے ءِ روچ ءَ بولان ءِ دمگ مچ ءَ زورگریں پاکستانی پوج ءُ بلوچ لبریشن آرمی ءِ سرمچار ھما وھد ءَ دیم پہ دیم بوتگ انت کہ سرمچار گلی کارے ءِ درگت ءَ سپر ءَ بوتگ انت ۔ گڈا گونی پرا ءِ ھند ءَ بلوچ لبریشن آرمی ءِ سرمچارءُ زورگریں پوج ءِ میان ءَ میڑ بندات بوتگ ، ھمے وھد ءَ زورگریں پوج ءَ بالگردانی سرا چہ کمانڈو دور داتگ ۔ بازیں ادارے ءَ برجاھیں میڑ ءَ دژمن کارمند ءِ کم چہ کم ھشت کارمند مُرتگ انت وھدیکہ بلوچ لبریشن آرمی ءِ پنچ سرمچار سنگت وشدل پنام ءِ مشمار ، سنگت سمیع اللہ پنام ءِ سگار، سنگت شیریار پنامءِ چیئرمین، سنگت سجاول پنامءِ چیدہ، ءُ سنگت نادر پنام ءِ چراغ نمیران بوتگ انت ۔
نمیرانیں سنگت وشدل پنام مشمار ء لال ھان سمالانی بولان ءِ دمگ سنجاول ءِ نندوک بوتگ ۔ بیست سالی وشدل سال دوھزار ءُ بیست ءُ چار ءَ بلوچ لبریشن آرمی ءَ گوں بندوک بوتگ ءُ کسان امری ءَ آئی ءَ دژمن ءِ بگیری ءَ سلاہ چست کتگ وتی راجی زمہ واری پیلو کنگ ءِ کول کتگ ۔ آئی ءَ بولان ءَ بازیں سنگراں وتی کرد پیلو کتگ ءُ گڈسر ءَ دژمن ءَ جنگ دیان ءَ نمیران بوتگ ۔
نمیرانیں سنگت سمیع اللہ پنام ءِ سمیر ءِ مھمد اکرم ، نمیرانیں سنگت شیر یار نام ءِ چیرمین ءِمھراب ھان شاھوانی ، ءُ نمیرانیں سنگت سجاول پنام ءِ چیدہ ءِ بھاول ھان شاھوانی ھر سَے مستونگ ءِ دمگ پڑنگ ءِ نندوک انت ۔ ھر سَے ایں سنگت سالے ءَ ساری بلوچ لبریشن آرمی ءَ اتکگ انت ءُ بازار گوریلہ وڈا بازیں سوبمندیں کار کتگ ، دژمن ءَ پروش دیگ ءُ گل ءِ زمہ واریانی پیلو کنگ ءَ اے سنگت وتی سنگر ءَ ساجو بوتگ انت ۔ راجی آجوئی ھاتر ءَ کربان کتگیں اشانی زند پہ بلوچ ورنایاں روکیں چراگ جوڈ بوتگ انت ۔
نمیرانیں سنگت نادر پنام ءِچراگ ءِ مزار ھان لہڑی بنکی ءَ کلات ءِ دمگ نرمک ءِ نندوک بوتگ بلے ھنو شال ءَ بوتگ ۔ آئی ءَ گوریلہ کُنش ءَ مھکمیں چیرین وڈی ءَ دژمن چماں چم سک داتگ ءُ جھد کتگ ، گل ءِ کاراں مدامی ساجویں اے سنگت گڈی ساہ ءَ تاں وتی کردءَ پیلو کنگ ءَ بوتگ۔
جارکش دیمتر ءَ گوشتگ کہ شش جون ءِ شپ ءَ مستونگ ءِ دمگ اسپلنجی ءَ مرو پھل ھند ءَ زورگریں پوج اتکگ کہ ھمے وھدءَ زورگریں پوج ءُ بلوچ سرمچارانی میان ءَ میڑے بندات بوتگ ۔ تاں سھب ءَ برجاہ بوتگیں اے میڑ ءَ دژمن ءِ کم چہ کم ھپت کارمند مُرتگ ءُ بازینے زدگ بوتگ انت ، وھدیکہ مئےدوسنگت زاپران پنامءِ ھلیل ءُ سنگت سناء پنام ءِ اینگل نمیران بوتگ انت ۔
نمیرانیں سنگت زاپران پنام ءِ ھلیل ءِ اسمائیل سمالانی بولان ءِ دمگ پیراسمائیل مار واڑ ءِ نندوک بوتگ ، آ سال دوھزار چاردہ ءَ گوں راجی آجوئی جھد ءَ ھمگرنچ بوتگ ءُ بلوچ لبریشن آرمی ءِ بھر جوڈ بوتگ دژمن بگیری ءَ جنگ داتگ ۔ ناگاھو ءَ آ بازیں میڑاں گون بوتگ دژمن پروش داتگ گڈسر ءَ کمان ءِ اگدہ ءَ رستگ ءُ نمیران بوتگ ۔ نمیرانیں زاپران یکشلیں جھد ، بامردی ، آشوبی راھ ءُ رھبند ءُ ایمانداری ءِ چیدگ بوتگ ۔ کہ آئی ءَ یازدہ سال ءَ تاں ھر وڈین موسم ءُ جاورھالاں دیم ءَ بوتگ ءُ گوں دژمن ءَ جنگ داتگ ۔
نمیرانیں سنگت سنا پنام ءِ اینگل ءِ عنایت اللہ ساتکزئی اسپلنجی ءِ ھند پھل مرو ءِ نندوک بوتگ آئی سال ءِ پیسر بی ایل اے ءَ اتکگ کسانیں وھدے ءَ وتی جھد ءُ جپا ءَ اے پیش داشتگ کہ دیمھونی ءُ ھوسلہ امر ءِ مھتاج نہ ایں ۔ آئی ءَ ناگاھو ءِ سنگر ءَ وتی کرد جوانیں وڈے ءَ پیلو کتگ ءُ نمیران بوتگ ۔
جارکش ءَ گوشتگ کہ ھشت جون ءِ شپ ءَ پنجگور ءِ دمگ بوستان دژمن ءِ راہ ءِ سرا تیراک ناکیں شورانی کل کنگ ءِ وھد ءَ شورواں آس برتگ ءُ چریشی ءَ بپوچ لبریشن آرمی ءِ سرمچار سنگت وسیم کاشانی پنام ءِ چراگ نمیران بوتگ ۔ نمیرانیں سنگت وسیم ءِ ھاجی مھمد اکبر کاشانی پنجگور بوستان ءِ نندوک بوتگ ۔ آئی ءَ سوشل ورکس ءَ ماسٹر کتگ بوتگ ءُ ریاستی پوج لیوز ءَ بوگ ءَ ابید سال دوھزار ءُ بیست ءُ یک ءَ آئی ءَ راجی آجوئی راہ گپتگ ءُ بلوچ لبریشن آرمی ءَ اتکگ ءُ پنچ سال ءَ آئی ءَ بازار ءَ کار کتگ ۔ دژمن بگیری ءَ چیریں کاراں بازیں جاھے ءَ بھر زرتگ ءُ وتی پجار ءُ کار چیر داتگ انت گڈسر ءَ گل ءِ زمہ داری ءِ سرجم کنگ ءِ وھد ءَ نمیران بوتگ ۔
جارکش ءَ گوشتگ کہ سِی ءُ یک مئی ءَ بلوچ لبریشن آرمی ءِ سرمچار سنگت دلاور پنام ءِجاسم زورگریں پوج ءِ دمگی چاریگانی گوم ءَ میڑ ءَ زدگ بوتگ ءُ پدا نمیران بوتگ ۔ نمیرانیں سنگت دلاور ءِ ھمزہ پنجگور ءِ ھند لیگورگ بازار ءِ جھمند بوتگ ۔ آسال دوھزار یازدہ ءَ سلا بندیں جھد ءَ گوں بندوک بوتگ ۔ پانزدہ سالاں تاں آئی ساجی ، پروم ، زامران ءُ پنجگور ءِ سنگراں وتی کرد جوانی ءَ پیلو کتگ بوتگ۔ نمیرانیں دلاور مدامی راجی آجوئی یا مرگ ءِ پلسپہ ءَ بندوک بوتگ ءُ وتی گڈی ساہ ءَ تاں ھمے گپ ءِ سرا بوتگ ۔
جارکش جیئند بلوچ ءَ گوشتگ کہ اے درسیں سنگت ھاسیں زمہ داریانی وھد ءَ دژمن ءَ گو جنگ دیان ءَ نمیران بوتگ انت ۔ آیانی نمیرانی ایوک ءَ بلوچ راجی زرمبش ءِ یکشلیں گواہ نہ انت بلکیں زورگریں پوج ءَ تچکیں کلوہ انت کہ بی ایل اے ءِ سرمچار وتی جانانی دیمھونی ءَ دات کناں بلے پروش وارت نہ کناں ۔ مئے جھد اے نمیرانیں سرانی رندپداں برجاہ مان ایت ۔
بلوچستان ءِ دمگ کیچ ءِ بُنجاھی شھر چہ تربت ءَ یک ورنایے زورانسری آوار جنی ءِ نشانگ کنگ بیتگ-
دمگی اِھوالکار رِد ءَ پاکستانی پوج ءَ چہ زور بازار، تربت ءَ کراچی یونیورسٹی ءِ نودربر عزیر سلیم ء سلیم عیسیٰ آوار جتگ ءُ بیگواہ کتگ-
عزیز سلیم یونیورسٹی آف کراچی ءَ وانگ اِنت ءُ انّیگیاں موکلانی گوازینگ واستا وتی بُنکی دمگ تُربت ءَ اَتکگ بیتگ-
بلوچستان ءَ زورانسری آوار جنی جیڑہ بازیں دھکاں چہ انسانی ھکانی گلانی گل ءِ بُنجاہ بیتگ-
بلوچستان ءِ پُرکاریں انسانی ھکانی کارکنانانی گوشگ اِنت کہ نودربر ، استاد ، اِھوالکار ءُ سیاسی کارکنان زورانسری آوار جنی ءِ درستاں چہ گیش نشانگ کنگ بیگ ءَ اَنت-
بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں گوستگیں شپ ءِ ھشت نیم ءَ تسپ، پنجگور ءَ برجاھیں پنجی پولیس اسٹیشن سر ءَ اُرش کتگ ءُ سرجمی ءَ دستیگ کتگ- پولیس تھانہ ءَ ھستیں سرکاری سلاہ ءُ سامان دستیگ کتگ ءُ اود ءَ پولیس ءِ دو گاڑی مانداشتگ اَنت- کاروائی سرجم کنگ ءَ پد سرمچاراں پہ سلامتی اود ءَ چہ دراھگ ءَ وتی مُھریں اوتاکاں سر بیتگ اَنت-
جارکش ءَ گْوشتگ پنجگور ءَ برجاھیں پنجی پولیس اسٹیشن سرجمی ءَ ملٹری انٹیلیجنس دست ءَ اِنت ءُ آئی ءِ پرمان رِد ءَ زر گرگ، راج ءَ بے سبب ءَ دلسیاہ کنگ، ٹوکن سسٹم ءَ من مانی کن اَنت ءُ دگہ چاگردی سلکّاریاں سروکی ءَ ھمگرنچ اَنت-
جارکش ءَ گوشتگ کہ ما وتی درشاناں پولیس ءَ کڈن کن ایں کہ آ چاگردی سلّکاریاں سروکی ءُ سرمچارانی رندگیری ءَ چہ پھریز بہ کن اَنت بلے آ وتی کارپداں چہ شر بیگ ءَ نہ اَنت-
جارکش ءَ گْوشتگ ما بلوچستان ءِ سرجمیں پولیس، ھاسکار پنجگور پنجی پولیس تھانہ، پنجگور ءِ کارندھاں بیھار دے ایں کہ دیمتر ءَ ریاستی ایجنسیانی ھمراھی ءَ بلوچ راج ءِ دلسیاہ کنگ، چاگردی سلّکاریانی سروکی کنگ ءَ یل بہ کن اَنت، ءُ زرمبشت ءِ ھلاپیں پُرکاریاں چہ دزکش بہ بنت اگاں ناں آیانی گوم ءَ دُژمن ءِ وڑیں رویشگ کنگ بیت-
جارکش ءَ گْوشتگ بی ایل ایف پنجگور تسپ ءَ برجاھیں پنجی پولیس اسٹیشن سر ءَ دستیگ کنگ آئی ءَ ماندارگ ءِ زمہ واری ءَ منّ ایں ءُ اے اِھد کن ایں کہ بلوچ راجی زرمشبت ھلاپیں پُرکاریاں ھمگرنچیں مردم ءُ ٹولیاں نہ بکش ایں-
تھری ایم پی او ءِ رِد ءَ یکشل ءَ بندیگیں بلوچ یکجھتی کمیٹی ءِ سروک ڈاکٹر ماھرنگ بلوچ ءِ کیس بلوچستان ہائی کورٹ ءِ پیسلہ ءَ پد سپریم کورٹ آف پاکستان ءَ برگ بوتگ ۔
اے کانودی پٹیشن ڈاکٹر ماھرنگ بلوچ ءِ گھار نادیہ بلوچ ءَ نامداریں انسانی ھکانی وکیل ایڈوکیٹ فیصل صدیقی ءِ نیمگ ءَ کنائینتگ ۔
ڈاکٹر ماھرنگ بلوچ کہ بلوچستان ءِ تہ ءَ زورانسری آوارجنی ، درکانودی کشت ءُ کوش ءُ انسانی ھکانی بگیری کنوکانی بگیری ءَ مھکمیں توارے بوتگ کہ کساس سَے ماھ ساری تھری ایم پی او ءِ رِدءَ دزگیر کنگ بوتگ ۔ انسانی ھکانی گل ، وکیل ءُ چاگردی مردماں آئی ءِ دزگیری درکانودی ءُ بیر گرگ ءِ گوشتگ ۔
پٹیشن ءَ ھمے گپ ایر کنگ بوتگ کہ ڈاکٹر ماھرنگ بلوچ ءِ دزگیری ، پاکستان ءِ رھبندانی بنکی انسانی ھک ، ھاسکر آجوئی درشان ءُ منصفانہ ٹرایل ءِ رھبنداں در ایں ۔ آیاں چہ مزن آمیدگس ءَ لوٹ کتگ کہ آ ایوک ءَ ڈاکٹر ماھرنگ ءِ یل کنگ ءِ جار مہ جنت بلکیں تھری ایم پی او ءِ رِد ءَ سیاسی باسکانی درکانودی دزگیری ءَ گامگیج ھم بہ زور ایت ۔
بلوچ یکجھتی کمیٹی ءُ انسانی ھکانی باسکاں چہ آمیدگس ءَ ھمے اُمیت داشتگ کہ آ کانود ءُ ھک ءِ مزن شانی ءَ برز بہ دار ایت ءُ بے جانبداریں پیسلہ ءِ بہ کنت ۔
زءُنگ بہ بیت گوستگیں ماہ ءَ بلوچستان ہائی کورٹ ءَ بلوچ یکجھتی کمیٹی ءِ رھشون ڈاکٹر ماھرنگ بلوچ ، بیبو بلوچ ، گل زادی بلوچ ، شاہ جی ، بیبرگ بلوچ ءُ گپار بلوچ ءِ تھری ایم پی او ءِ رِد ءَ نزر بندی ءِ بگیری ءَ کانودی درخواست آنی سرا پیسلہ دیان ءَ درسیں اپیل نہ من اِتگ انت ءُ سرکار ءِ نیمگ ءَ ھما رھشوناں بندیگ دارگ ءِ پیسلہ برجاہ داشتگ ۔
وکیلانی رِد ءَ بلوچستان ہائی کورٹ ءِ اے پیسلہ ءَ پد بندیگانی کانودی نمائندگانی گور ءَ بس سپریم کورٹ ءِ راہ بچ اِتگ ۔
زانگ بہ بیت کہ ڈاکٹر ماھرنگ بلوچ ءُ آئی ءِ سنگت تھری ایم پی او ءِ رِد ءَ ھما وھد ءَ دزگیر کنگ بوتگ انت وھدیکہ آ شال ءَ زورانسری آوارجنی ءُ ریاستی لٹ شاپیانی بگیری ءَ زھرشانی زرمبش ءِ رھشونی ءَ کنگ ءَ بوتگ ۔
بلوچستان ءِ دمگ چہ پنجگور ءُ ھُزدار ءَ سے لاش دزکپتگ اَنت-
گیشیں ھالانی رِد ءَ پنجگور بونستان تسپ ءِ میانی دمگ رخشان کور ءَ ظفر اللہ ء اسماعیل جھمنند تسپ لاش دزکپتگ-
کھول رِد ءَ آ چار جون ءَ چہ لوگ ءَ درتکگ مرچی آئی ءِ لاش دزکپتگ-
اشی ءَ اَبید ھُزدار ءِ دمگ چہ گریشہ ءُ رنگو ءَ دو ناشناسیں مردمانی لاش دزکپتگ اَنت-
دمگی اِھوالکار رِد ءَ دوئیں تیرگواری کتگ ءُ کُشتگ اَنت-
زانگ بہ بیت کہ بلوچستان ایمنی جاور گوں تُرسناکی ءَ گیش بیتگ اَنت، ھکومتی ٹاھاں چہ بلوچستان ءَ ھکومتی رٹ نہ بیگ برابر اِنت-
چہ بلوچ کمیونٹی ندرلینڈ ءِ چیردستی ءَ ماں ایمسٹرڈیم ءَ 9 جون 2025 ءَ مزنیں ائید ءِ روچ ءَ پہ یک بلوچی مراگشے برجم دارگ بوتگ۔
بلوچ کمیونٹی ندرلینڈ مراگش ءِ پاگواجہ کارمستر واجہ عبدلغنی بوتگ ءُ مراگش ءِ مھمان ءِ ھاس بلوچی زبان ءِ اے دیوان ءِ پاگواجہ بلوچ کمیونٹی ندکار پروپیسر ھسن جانان ءُ بلوچی ساز ءُ زیمل ءِ توتی ندرلینڈز ءِ الھانیں گُشندہ کارگشاد واجہ عبدالغنی ات ءُ مھمان ھاس استاد بکشی بلوچ ھم گون بوتگ۔
مراگش سے بھر ءِ تہ ءَ اڈ داتگ، مراگاہ ءِ اولی بھر ءَ گُشتانک، ءُ دومی بھر گوں شَیر ءُ شائری ءُ مراگاہ ءِ سیمی بزاں گڈی بھر گوں
ساز ءُ زیمل ءَ برجاہ دارگ بوتگ۔
گشتانک ءِ بھر ءِ تہ ءَ واجہ کامریڈ مھیم بلوچ، پروپیسر ھسن جانان، واجہ ابولھسن، عبداللہ بلوچ ءُ کماش واجہ عبدالغنی بلوچ ءَ کمیونٹی ءَ را جْوانی، گھتری ءُ دیمروی ءِ بابت ءَ وتی ُدریں ھیال ءُ دانک درشاں کت انت۔
دومی بھر شائری اَت اے بھر ءَ مھیم جان گل، باسط زھیر، بلوچ دوست مندی ، سمیر تائر، ولید تائر ، قدیر ساگر ءُ عصا بجار ءَ وتی شَیر ونت َانت ءُ دیوان ءَ داد گپت۔
سیمی ءُ گڈی بھر ساز ءُ زیمل اَت، استاد بکشی بلوچ ءُ عابد جان قادر ءَ گوں وتی توتی الھانیں توار ءَ دیوان وشنود کت-
دیوان ءِ جارچینی ءِ ڈبہ ولید تائر ءُ قدیر ساگر ءِ کوپگان اَت۔
پاکستانی پوج ءِ بندیگجاہ ءَ ورنایے لَٹ ءُ کُٹ ءَ چہ بیران بیتگ، لاش شپ ءِ نیم ءَ چگل داتگ-
بلوچستان ءِ دمگ کولواہ، رودکان ءَ گوستگیں روچ ءَ پاکستانی پوج ءَ بازیں مردمے آوار جتگ ءُ بُنجل ءَ برتگ اَنت- اود ءَ دگہ مردم پد ءَ یل کتگ اَنت بلے نواب ء نوربخش جھمنند رودکان داشتگ-
دمگی اِھوالکار رِد ءَ پوج ءِ دست ءَ آوار جنگ بیتگیں ورنا ءِ لاش دزکپتگ کہ آئی ءِ سر ءَ لَٹ ءُ لُٹانی نشان بیتگ اَنت- دمگی مردمانی گوشگ اِنت کہ لاش ءِ جاور ھمے وڑ اِنت کہ اے مرد بے کساس کرنٹ دیگ ءَ ستکگ-
واکدار ءَ اے درگت ءَ ھچ وڑیں درشان شنگ نہ کتگ-
بلوچستان لبریشن فرنٹ ءِ سروک ڈاکٹر اللہ نذر بلوچ ءِ گْوشگ اِنت کہ داعش خراسان ءِ بیانیہ چوناھا آئی ایس پی آر ءِ جوڑ کُرتگیں اسکرپٹے، چمیشی ءِ وسیلہ ءَ مذھب ءِ نام ءِ سر ءَ راجی جُنزانی ھلاپ ءَ وتی بیانیہ جوڑ کنگ ءِ یک پندلے۔
آئی ءَ وتی ھیال چہ بی ایل ایف رسانکدر آشوب ءِ نیمگ ءَ چاپ بوتگیں ”اسپر“ ءَ درشان کُتگ ءُ گُشتگ۔
ڈاکٹر اللہ نذر بلوچ ءَ گیش گْوشتگ کہ بلوچ راجی آجوئی ءِ جُھد ءُ کوشست چہ وتی جند راج ءِ کمک ءَ جنگ ءَ انت، کہ آ چہ دری تاکتانی کمک ءِ مُھتاج انا بلکیں پاک ءُ پلگاریں راجی وتواجھی ءِ چیدگ اِنت۔ زورگیریں پاکستان بلوچ راج ءَ چہ ھر وڑ ءَ تباہ ءُ برباد کنگ ءِ کوشست ءَ اِنت، داں کہ راجی پجّار ءَ بُن گوج ءُ بلوچ ڈیھ ءَ را نوآبادیاتی گلامی ءَ یکشل ءَ بُنیاد جوڑ بکنت۔
آئی ءِ گُشگ اِنت کہ زورگیریں پاکستان آجوئی ءِ جُنزاناں بدنام کنگ ءِ ھاتر ءَ مدام پراکسی گُش اِیت کارمرز کنت تاکہ ازلی آجوئی ءِ جنگولانی سر ءَ مھلوکی بیسہ ءَ را بد دل کُت بکنت۔ داعش خراسان ءِ بیانیہ چوناھا آئی ایس پی آر ءِ جوڑ کُتگیں اسکرپٹے، چمیشی ءِ وسیلہ ءَ مزھب ءِ نام سر ءَ راجی جُنزانی ھلاپ ءَ وتی بیانیہ ءَ را مھکم ءُ کوشست کنگ بوگ ءَ اِنت۔
ڈاکٹر اللہ نذر ءِ گُشگ اِنت کہ بلوچستان ءَ سیکیورٹی پالیسی ءِ کنٹرول سویلین ھکومت ءَ اَبید تچک ءَ پوج ءِ دست ءَ اِنت، کہ گوں ناشرکار گروانی سیادی ءِ وسیلہ ءَ سیاسی در مھکم ءَ پیش دارگ بوگ ءَ اِنت۔
