بلوچستان ءَ زورانسری بیگواھیانی درچ برجاہ، دگہ 5 مردم بیگواہ

بلوچستان ءَ یکشلیں بیگواھیانی درچ یکشل ءَ برجاہ انت کہ چریشی ءَ گوستگیں روچ ءَ جتا جتائیں جاھاں دگہ پنچ مردم پاکستانی پوج ءَ آوار جتگ ءُ برتگ انت-

گیشیں ھالانی رِد ءَ گوستگیں شپ ءَ چہ اورماڑہ ءَ پاکستانی پوج ءَ صغیر بلوچ ءِ ھمراھی ءَ آئی ءِ سنگت اکرار ء جنگیان ھم آوار جتگ اَنت،آیانی درگت ءَ ھچ وڑیں سرپدی دز نہ کپتگ، گوشگ بیگ ءَ اِنت کہ دوئیں یکیں کھول ءَ چی سیادی دار اَنت-

چار روچ ءَ ساری پاکستانی پوج ءَ ٹھیکیدار بشیر احمد ء حسن ھما وھد ءَ آوار جتگ وھدے آ چہ لسبیلہ جھاؤ نیمگ ءَ روگ ءَ بیتگ- بشیر احمد ءِ سیادی جھاؤ ءِ دمگ گزی حسن گوٹھ ءَ اِنت-

ھمے وڑ گوستگیں شپ ءِ ساھت سے ءَ پاکستانی پوج ءُ چیریں ادارھانی کارندھاں ناگ ءَ یک لوگے ءِ سر ءَ بیڑبرتگ ءُ رازق نامیں ورنایے آوار جنگ ءَ پد بیگواہ کتگ اَنت-

ھمے وڑ کراچی شھدربرجاہ ءَ وانوکیں نودربر دومی رند ءَ پد پاکستانی پوج ءِ دست ءَ زورانسری آوار جنی ءِ نشانگ کنگ بیتگ-

کھول رِد ءَ صغیر احمد ء غلام قادر کہ یکرندے پیسر ءَ بیست نومبر 2017 ءَ چہ کراچی شھدربرجاہ ءَ بیگواہ کتگ – آ یک سالے ءَ تاں زورانسری بیگواہ بیتگ ءُ پد ءَ یل کنگ بیتگ-

بلے پد ءَ آ دومی رند ءَ گوستگیں شپ ءَ وھدے آ چہ تربت ءَ کراچی ءَ سپر کنگ ءَ بیتگ گُڑا پاکستانی پوج ءَ آ دومی رند ءَ آوار جتگ ءُ بیگواہ کتگ-

کھول ءَ آئی ءِ پہ سلامتی یل کنائینگ لوٹ کتگ-

زانگ بہ بیت بلوچستان ءَ آوار جنی ءِ نہ اوشتوکیں دْرچ یکشل ءَ برجاہ ءَ اِنت دومی نیمگ ءَ پیسر ءَ چہ بیگواہ کنگ بیتگیں مردماں دروگیں میڑاں کُشگ ءُ دور دیگ ءَ اِنت-

چریشی ءَ بیگواہ کنگ بیتگیں مردمانی کھولانی تہ ءَ تُرس ودی بیتگ کہ چو مہ بیت مئے دوستناکاں دروگیں میڑ ءِ نام بہ کُش اِیت ءُ دور بدنت-