بندیگجاہ ءَ مئے رھشوناں دلسیاہ کنگ درچ ءَ زوت بند بہ کن اِت- بی وائی سی

بلوچ یکجھتی کمیٹی ءِ بُنجاھی جارکش ءَ گْوشتگ کہ ھدہ بندیگجاہ ءَ شال ءَ ساڑی بندیگجاہ سپرنٹنڈنٹ سید حمیداللہ پیچھی یکشل ءَ بلوچ یکجھتی کمیٹی ءِ رھشوناں تُرسینگ ءُ دلسیاہ کنگ ءَ اِنت- بندیگجاہ سپرنٹنڈنٹ سید حمیداللہ پیچھی ناں تھنا سیاسی بندیگاں کانون ءُ انسانی ھکاں چہ انکار کنگ ءَ اِنت بلکیں یک زوراوری ءُ بدسلوکیں دروشم ءَ بی وائی سی رھشوناں جتاجتائیں وڑ ءَ سسّائی ءُ جسمانی ازیت نشانگ کنگ ءَ اِنت ءُ مئے رھشونانی کھولاں ھم یکشل ءَ ترسینگ ءَ اَنت- آیاں دوستنانک ءَ چہ گند ءُ نند واستا بے زرورت ءَ سے سے کلاکاں بندیگجاہ ءَ چہ ڈن ودار پرمائینگ بنت-

آئی ءَ گْوشتگ کہ بی وائی سی رھشون بیبگر بلوچ ءُ شاہ جی بلوچ یک جتائیں سیل ءَ بند کتگ اَنت کہ اود ءَ آ الاج، کھول ءَ چہ گند ءُ نند، ءُ دگہ بنُکی ھکاں چہ زبھر کتگ اَنت- وھدے اے زوراکیانی ھلاپ ءَ توار چست کنگ بیتگ گُڑا سپرنٹنڈنٹ سید حمیداللہ پیچھی آیانی گوم ءَ بے ادبی کتگ ءُ جسمانی لَٹ ءُ کُٹ ءِ جُھد ھم کتگ- بیبگر بلوچ جسمانی چہ پاداں نزور اِنت ءُ آ یکشل ءَ الاج آسراتی ءُ چیک اپ ءِ زرورت اِنت، بلے بندیگجاہ انتزامیہ ءُ آسراتی دیگ ءَ تچکی ءَ انکار کنگ اِنت-

دیمتر ءَ گْوشتگ کہ ھمے وڑ ، بی وائی سی ءِ بُنجاھی آرگنائزر ڈاکٹر ماہ رنگ بلوچ، ءُ آئی ءِ ھمراھی ءَ بندیگ بیبو بلوچ ءُ گلزادی بلوچ ھم یکشل ءَ تُرسینگ بیگ ءَ اِنت- سپرنٹنڈنٹ ءَ اے زالبولیں رھشونانی سر ءَ تُرندی گیش کتگ اَنت، ءُ وھدے آیاں وتی بُنکی ھکانی ھاتر ءَ توار چست کتگ گُڑا آ وتی بُنکی ھکانی واستا توار چست کتگ گُڑا آ جتاجتائیں دروشم ءَ بیھار ءُ دلسیاہ کنگ ءَ اَنت-

آیاں گْوشتگ کہ ما بندیگجاہ انتزامیہ ءُ سپرنٹنڈنٹ ءَ کڈن کن ایں کہ آ زوت بی وائی رھشوناں تُرسینگ ءِ درچ ءَ بند بہ کنت ءُ آیانی کانونی، انسانی، ءُ الاج ءُ دوا درمان ءِ ھکاں بدے اِت ءُ ما اے زوراکی ءِ ھلاپ ءَ ھچ وڑ بے توار نہ بہ ایں-