بلوچ آجوئی ءِ جنگ
نبشتہ کار: شکّل بلوچ
دی بلوچستان پوسٹ
بلوچ ءِ اے جنگ آجوئی ءِ جنگ اِنت ھجبر بلوچ کسی گلام نہ بیت۔ بیا کہ وتگڑیں استانِ پاکستان ءَ بلوچستان ءَ لھتے وتگڑیں چانوگر داشتگ کہ بلوچ ڈیھ ءَ چہ بُن اَزل ءَ برگ لوٹ اِیت۔ چُش ھجبر بلوچ راج وتی آجوئی ءَ بھا نہ کنت، پاکستانی اسٹبلیشمنٹ اے گپ ءَ وتی مجگ ءَ ایر بکنت کہ بلوچ راج ناں تئی ءُ نَیکہ تئی وتگڑیں، داشتگیں ٹولی، بلوچ ءِ ڈیھ ءِ راستیاں گار کنگ ءَ نَئیل اِیت۔ ۱۹۴۸ ءَ بلوچستان ءَ گوں پاکستان ءَ ھُجّ کنگ ءَ رَند بلوچ ءَ روچ ءِ مروچی ۷۷ سال سرجم بوتگ، گوں زوراوریں اِستان جَنگ ءَ اِنت۔ پاکستان ءِ ھر ھکومتے آتکگ ءُ ھمے شور کُتگ کہ ما اے ناشرکار کُشتگ ءُ چہ بُن ءِ ول ءَ گْوتکگ اَنت۔
بلوچ جنگ ءِ تھنا ءَ اِستانِ پاکستان ءَ چہ وتی زوراں بلوچ راج ءِ ھلاپ جتا جتائیں پندل سازگ ءَ پد اوں بلوچستان ھر وڑیں دروشم ءَ وتی ناشرکاری برجاہ داشتگ، بلوچ لس مھلوکانی لوگ بیڑ برگ نیاڑی ئیں بلوچ پُسّگاں آوار جَنت ءُ بیگواہ کنگ ءَ پد آیانی جون ماں کدی دگ، سیرکگیں ڈاکاں یا کہ جنگل ءُ گیابان ءَ دور داتگ اَنت۔ پاکستانی اسٹبلیشمنٹ ءَ وتی ھر وڑیں زور چکّاس اِتگ اَنت بلے بلوچ ءِ جُنز ئِے ھلاس کُت نہ کُتگ ایشی ءِ مستریں سبب ایش کہ بلوچ وتی سرڈگار ءِ آجوئی ءِ ءُ وتی راجی پَجّار ءِ جنگ ءَ انت اگاں کَسے اے گپ ءَ جیڑ اِیت کہ بلوچ راجی جُنز ھلاس اِنت یا کہ ھلاس بیت گڑا اے آیانی کمبودی اِنت پرچاکہ اگاں کسے گْوست ءَ راجانی ڈیھ ءِ آجوئی ءِ جنگاں بوان اِیت بِلّے کہ زوراوریں سامراج یا کہ تاگتوریں ریاست بوتگ بلے انگت ءَ پرچا آیاں وتی راج ءُ زمین چہ دری رستراں آجو کُتگ اَنت۔ دنیا ءِ مستریں زر ھرچ کنوکیں ملک امریکہ ءَ اوگانستان ھرچ کُتگ بلے انگت ءَ اوگانیاں امریکہ چہ وتی ڈیھ ءَ تاچینت اَنت۔
بلوچ ءِ جنگ ءَ مکسدے ھست بلوچ وتی ڈیھ ءُ پجّار ءِ آجوئی ءِ جنگ ءَ کنگ انت، چی ءَ کہ بلوچ راج زندگ بوگ ءِ ھاتر ءَ جنگ ءَ انت۔ بلوچ ءِ راجی لشکر ھجبر پروش ءِ آماچ نہ بیت، بلوچ راج ءِ راجی مڈی اَنت اے سرمچار کہ کوھاں پہ مادرِ وتن ءِ آزاتی ءِ ھاتر ءَ ناں شپ ءُ روچ چار اَنت ءُ نَیکہ وتی گژنگی ءَ بلے پہ ناز ءُ شان ءَ سر اِش جھل نہ کُتگ اَنت، آزات راج ءِ مستریں مانزمان ھمیش اِنت کہ پھر بہ گرد انت، باندات ءَ وتی زمین ءِ سر ءَ پہ شان مَل اَنت۔
اے گپ تچک اِنت بلوچ وتی سراں کُربان کنت بلے وتی ڈیھ ءَ دری زوراکاں پہ لگتمالی ءَ ھجبر نئیل ایت، اگاں کسے پہ دو چُنڈیں نان ءَ وت ءَ بھا کنت، یا کہ بلوچ ءِ چُکچینی ءَ تچک ءَ گوں دژمن ءَ ھمگام بنت، بہ بنت بلے راجدپتر ءِ تاکاں اے نبشتگ بنت کہ زندگیں راجاں پہ وتی سر اِش ندر کُتگ اَنت ءُ شھید بوتگ اَنت بلے چانوگری ءُ دو تل ءُ دو پوستی ھجبر نہ کُتگ، بلوچ کوہ گرد ءُ بامردیں سرمچار پہ وتی ڈیھ ءُ مھلوکاں ھر وڑیں سکی ءُ سوری اوپار کن اَنت، داں پہ آیوکیں باندات ءِ رُژن ءَ الم تالان کن اَنت، راج ءِ راجی درد ءُ تورشتاں وتی کنگ ءَ یک ھکّیگیں سرمچارے ءِ زامن انت۔
بلوچ ءِ اے جنگ ءَ بلوچ لس مھلوک جْوانی پوہ ءُ سرپد بہ بنت کہ راجے اَبید آجوئی ءَ ھجبر دیمروی نہ کن اَنت، پہ انوگیں وش وراک ءُ پہ لب ءُ لالچ ءَ گھتر راجی جبزگاں گوں وت ءَ ھوار بکن اَنت، تاکہ راج ءِ راجی زمین، زبان ءُ دود ءُ ربیدگ بہ پھریز انت۔ بلوچ راج ءِ باندات ڈیھ ءِ آجوئی اِنت۔ شالا بلوچ راج یکمُشت ءُ تپاک بات اَنت بلوچستان ءِ ابدمانی ءِ زمانت ڈیھ ءِ آجوئی اِنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-