بلوچستان ءِ بنجاھی شھر شال ءَ پاکستانی پورسز ءَ کماشیں رھشون عیدالفطر ءِ روچ ءَ زھرشانی ءِ پژدر ءَ دزگیر کتگ-
گیشیں اھوالانی رد ءَ گوستگیں شپ ءِ ساھت یازدہ ءَ ظھیر بلوچ چہ لوگ ءَ دزگیر کنگ ءُ 3MPO ءِ کیس ءَ ھدہ جیل ءَ برگ بیتگ-
کھول ءِ رد ءَ آئی ءِ جان ناجوڑ انت ءُ ما لوٹ کن ایں کہ آ یل دیگ بہ بیت اِنت-
نیشنل پاٹی ءَ ظھیر بلوچ ءِ دزگیری ایر جتگ ءُ گوشتگ شال ءَ کماشیں سیاسی باسک ظھیر بلوچ یل کنگ بہ بیت اِنت-
شال ءَ بلوچ یکجھتی کمیٹی ءِ رھشون ڈاکٹر ماہ رنگ بلوچ اے وھد ءَ 3 ایم پی او ءِ درچ ءَ ھدہ جیل شال ءَ بندیگ انت چہ زندان ءَ وتی گوھارانی ءُ برات ءِ نام ءَ نِمدی یے نبشتگ کتگ ئے-
آئی ءِ گوھار نادیہ بلوچ ءَ اے نِمدی سوشل میڈیا ءَ شنگ کتگ ءُ چریشی ءَ ماہ رنگ ءَ وتی کھول ءُ بلوچ مھلوج ءِ واستا یک مھکمیں کلوھے داتگ-
نمدی ءَ ماہ رنگ ءَ نبشتگ کتگ-
منی دوستیگیں گُھاراں ءُ یکیں برات ناسر جان! من زاناں کہ من شمارا چونیں سکیانی دیمپان کُتگ ءُ چتور شمارا کُلّاں کسان سالی ءَ یک برے پدا جنجالاں پرینتگ۔ ما چہ دوھزار ءُ یازدہ ءَ اے گرانیں جاورانی دیمپانی ءَ کنگ ءَ ایں بلے مروچی ھمے کل بلوچ ءِ کسہ جوڑ انت۔ ھردیں نزورتر ات اِت گُڑا وتی چپ ءُ چاگرد ءَ سیل کن ات۔
من سرپداں کہ شمئے کُلانی ڈُبو مدام من وت زُرتگ، پہ ھمے اوست ءَ کہ اے گرانیں بار شمئے سرا مہ لیٹ ایت۔ بلے بلوچستان ءَ نشتگ ئے اے وڑ بیت کنت، بلکیں چد ءُ گنتر ھم بیت کنت پہ اشیا وت ءَ دلجم کن ات۔
ماہ رنگ ءَ نبشتگ کتگ ماں زندان ءَ مئے اولی گندوکی ءِ ساھت ءَ اولی بر ءَ من وت ءَ شمئے کلانی تھ ءَ دیست ۔ ھما بے کراری ءُ پگر مندی ، پدا چیزانی ھما داب ءَ آرگ ءِ بے سبری ، ھمیشیا گوش انت ھون ءِ سیادی، بلے مئے دست ءَ چیا رس ایت ؟ اے ھم مئے بھت ءَ کپتگ ءُ ھمک بلوچ ءِ بھت انچش انت۔
اے کاگد ءَ من چہ وتی زندان ءِ کوٹیوک ءَ نبشگ کنگ ءَ آں پرچا کہ من گندوکی ءِ ساھت ءَ ھما دُرستیں گپ کُت نہ کُت انت کہ من ءَ کنگی ات انت ۔ اے زند پہ من یک نوکیں تجربگے، من انگت گوں وتی برات ءُ گُوھاراں ماں زندانے ءَ گپ کنگ در نہ بُرتگ ۔ من لوٹاں شمارا دلبڈی بدیاں بلے من ءَ لبز نہ مرّینگ ءَ انت۔ نی من ڈڈتر بیان انت ءُ وھد ءِ ھمراھی ءَ شما ھم ڈڈ بئت۔
یات بدار ات کہ وھدے مئے پت شھید کنگ بیت، آ وھدی ما چتور ھور بیت ءُ وت ءَ ڈڈ کُت؟ من لوٹ اتگ ات کہ چوروی ءَ ابید ھم شمئے زند وشھال بہ بیت ۔ منی اوست ھمش ات کہ شما بھ پولیسی بیڑ ءُ انگر ءُ زندانی در مہ گند ات ۔ بلے مئے دست ءَ چی بیت؟ اے چکاس ، جنگی زند ے ءِ تھلیں راستی انت۔ ماں بلوچستاں ءَ ما وتی منشا ءِ زند گوازئنت نہ کنیں دیمترا چد ءُ گنتری بیت کنت ، بلے شری بیت نہ کنت۔
مئے کماش ءَ کہ سوڑگے کُتگ ءُ وت ءَ پہ بلوچ ءِ ھک ءَ ندریگ کتگ ۔ ءُ چہ آئی ءَ پد، ما کُلاں ھمائی ءِ رھبند زرتگ ءُ گوں ھمے جھد ءَ بندوک بیتگیں ۔ نی اے گرانیں ساھتاں شما یکے ءَ دومیگ ءِ دلگوش گور کنگی انت ۔ یکے دومیگ ءِ کوپگ بیگی انت۔
بھ مہ شموش : اسلیں واک ھڈ ءُ بندانی نہ انت بلکیں دل ئیگ انت ءُ لیکہ ءِ ، وت ءَ چہ تھ ءَ مُھر کن ات ، لیکی بنیاد ءَ مُھکم بہ بئیت ۔ یکے دومیگ ءِ کوپگ بہ بئیت ۔ بھ وت ءَ نزور بیئگ ءَ مئیل ات ، ءُ یک گپے ءَ دلجم بئیت کہ شُمئے گُھار نزورینے نہ انت ۔ نزوری مئے بیھ ءَ مان نیست۔
اے وھد انت مھکم بیئگ ءِ، زبان ءِ سر ءَ اوشتگ ءِ ءُ وتی بلوچیں برات ءُ گُوھارنی ھمکوپگی ءِ۔
ھاوند ءِ میار ات ۔ بلوچستان ءَ ھاوند بہ پھرزیت ۔ اے وھد ءَ کہ من اے کاگد ءَ نبشتہ ءَ آں نزاناں ائید کدیگ انت ۔ بلے من شمارا ءُ بلوچ راج ءَ پیشگی ائید ءِ مراد باتی دیاں ۔ گوں نیکیں واھگاں
مھرنگ بلوچ
(چہ وتی زندان ءِ کوٹیوک ءَ نبشتگیں
پشمبے بیست ءُ ھپت مارچ)
عیدالفطر ءِ اولی روچ ءَ سرجمیں بلوچستان ءَ زھرشانی، ھزرانی کچ ءَ زالبول ءُ دگہ دگانی سر ءَ درتکگ اَنت بی وائی سی سروکانی یل کنائینگ لوٹ کتگ-
بلوچ یکجھتی کمیٹی ءِ جار پد ءَ مروچی عیدالفطر اولی روچ ءَ نماز ءَ پد بلوچستان ءِ شھر ءُ میتگاں زالبول، چُک، کماش ءُ ورنا لوگ ءَ چہ درتکگ ءُ بی وائی سی ءِ سروک ڈاکٹر ماہ رنگ بلوچ ءُ دگرانی یل کنائینگ لوٹ کتگ-
پنجگور، ھب، ھُزدار، کلات، نوشکی، ھاران، بلیدہ، زامران، مند، رخشان ، مستونگ، ماشکیل، چاگی، تمپ، سوراب، واشک، ڈھاڈر، کلات، جھاؤ، یک مچھ ءُ دگہ جتاجتائیں شھر ءُ میتگاں مردماں زھرشانی کتگ-
مروچی مزنیں کچے ءَ زھرشانی ءِ مول ءُ مراد بی وائی سی ءِ سروک ڈاکٹر ماہ رنگ بلوچ، سمی دین بلوچ، بیبو بلوچ، صبغت اللہ شاہ جی، بیبگر بلوچ، وھاب بلوچ ءُ آ دگہ راھشون ءُ کارکنانی یل کنائینگ ءَ ھوار شال پولیس ءِ تیرگواری ءَ چہ بی وائی سی ءِ بیران بیتگیں کارکنانی واستا انساپ لوٹ کتگ-
اے زھرشانی ءَ ھوار ھزرانی کچ ءَ زالبول ءُ دگرانی دست ءَ پلے کارڈز، بینرز ءُ دزگیریں سروکانی اکس چست کتگ پاکستانی زوراکی ءِ ھلاپ ءَ تُرندیں ناراہ جتگ-
مزنیں کچے ءَ بیتگیں زھرشانی ءُ نندانکاں ترانکاراں بی وائی سی ءِ ھلاپ ءَ کریک ڈاؤن ءِ فاشزم گْوشتگ اشی ءِ تُرندی ءَ ایر جتگ ءُ ھکومت ءَ چہ زوت ڈاکٹر ماہ رنگ بلوچ ءَ ھوار سمی دین جان، بیبو بلوچ، بیبگر ءِ یل کنائینگ ءُ صبغت اللہ شاہ جی ءِ یل کنائینگ لوٹ کتگ-
آیاں گْوشتگ کہ بلوچستان ءَ انسانی ھکانی تُرندیں ھلاپ ورزی کنگ بیگ ءَ اِنت، انسانی ھکانی پاسداری ءِ واستا توار چست کنوکیں راھشونانی دزگیری ءُ آوار جنی گوں تُرندی ءَ برجاہ ءَ اِنت کہ آئی ءِ ھلاپ ءَ سرجمیں بلوچستان زھرشانی ءَ اِنت اگاں کسے اشی ءِ سر ءَ بے توار اِنت گُڑا تھنا ھکمران یا آیانی مپادی شریکدار کہ بلوچستان ءَ ھچ وڑیں سرپدی نیست-
آیاں گْوشتگ کہ ریاست اے سرپد بیت کہ آ دزگیریاں، لَٹ ءُ کُٹ ءُ شھیدی ءَ چہ بلوچ راجی پھاز ءِ سیاسی گھگیری ءَ ھلاس کنت گُڑا آئی ءِ ردی اِنت، بلوچ راجدپتر ءُ نپسیات ءَ چہ ناسرپد ھکمران لُٹ ءُ کُٹ ءَ چہ مارا بے توار کُت نہ کنت-
آیاں گْوشتگ کہ مروچی ریاست وت گندگ ءَ اِنت کہ ریاستی کریک ڈاؤن ءَ اَبید بلوچستان ءِ تُرس ءُ بیھار ءَ چہ درتکگ ءُ مروچی انساپ واستا دگانی سر ءَ اَنت-
زھرشانی کنوکانی گوشگ اِنت کہ مروچی مزنیں کچے ءَ زھرشانی ریاست واستا نبشتہ دیوال بیگ لوٹ اِیت مروچی ریاست اخلاقی ھساب ءَ پروش وارتگ، ءُ بے کساس زوراکی ءَ ایرکپتگ بلے زوراکی ءُ تاکت ءَ چہ راجی گھگیری ایرموش کنگ نا ممکن اِنت-
زھرشانی کنوکاں گْوشتگ کہ دانکہ بلوچستان ءَ زورانسری آوار جنی ءِ گر ءُ دار، ءُ بیگواھیں مردمانی یل کنائینگ نہ بنت ریاست اے ردی ءَ چہ در بئیت کہ آ پہ تُپنگ زور ءَ کھول ءَ بے توار کُت کنت-
آیاں گْوشتگ کہ بلوچستان گوستگیں سی سالاں چہ ھچ وڑیں وشی گندگ نہ بیتگ، مروچی یکجاہ بیتگ ءُ بلوچ پھاز جنگ برجاہ داشتگ-
بی وائی سی ءِ دمگی سروک ءَ گل ءِ دزبندی ءَ چہ راج ءِ مزنیں کچے ءَ زھرشانی ءَ بھر زیرگ ءَ بلوچ سیاسی گھگیری ءِ سوبمندی گْوشتگ زوراکی ءَ چہ راجی زْرمبشت لگت کنگ ناممکن اِنت- آیاں گْوشتگ کہ بی وائی سی ءِ سروک یل کنگ بہ بنت، ءُ بیران بیتگیں کارکنانی ایف آئی آر نکش بکن اَنت کھول ءَ انساپ بدے اَنت-
مستونگ کوہ چلتن ءِ دامن ءَ نندانک ءَ چہ تران کنان ءَ سردار اختر مینگل ءَ گْوشتگ بیا اِت کول بہ کن اِت دانکہ ما وتی بندیگیں زالبولاں لوگاں تاں سر نہ کن ایں مارا لوگ روگ ھرام بیت- زی سرکار وتی پاتو دروشمیں ڈرون سر ءَ اَتکگ ءُ مئے نندانک ءِ اکس پیش داشتگ اَنت کہ نندانک کس سک کم اِنت مرچی ما اشاں گوشگ لوٹ آں کہ مروچی تو مزنیں پاتو دروشمیں ( ھیلی کاپٹر) ءَ بیار پیش بدار اِیت کہ مردمانی کچ چنت اَنت-
سردار اختر مینگل ءَ گْوشتگ کہ مروچی چلتن ءِ کوہ بچار اِیت کہ اے وتی سرڈگار زالبولانی دزگیری ءَ چینچو گریوگ ءَ اِنت دومی نیمگ ءَ اے چلتن وتی پُسگانی بے وسی سر ءَ ھم گریوگ ءَ اِنت-
سردار اختر مینگل ءَ گْوشتگ کہ وڈھ ءَ یک ھتے ءِ درچکے آئی ءَ ” خان ئنا خط ” گوش اَنت اود ءَ نوری نصیر خان ءَ وتی یک جرگے ءِ برجم داشتگ اَت چریشی ءِ کماش ( سردار عطااللہ مینگل ) را گْوشتگ ئِے کہ من آں اد ءَ کل ءُ کسارت کن، یات بہ کن اِت اد ءَ کہ مروچی نندانک داتگ ءُ نشتگ ایں ءُ مروچی ما اد ءَ نماز ونتگ اے کرد راجدپتر ءَ نکش کنگ بیت ءُ ھما آں کہ بھر زرتگ ءُ نماز ونتگ آیانی نام ھم راجدتپر ءَ نکش کنگ بیت-
سردار اختر مینگل ءَ گُڈی ءَ گْوشتگ نندانک ءَ نشتگیں مردم دست ءَ چست بہ کن اَنت کول بکن اَنت نندانک داں ھما وھد ءَ برجاہ بیت وھدے مئے زالبول یل بنت لوگ ءَ سر بنت- اے میان ءَ ناراہ ھم جنگ بیتگ-
آئی ءَ ھکومت ءَ دو روچ وھد داتگ گْوشتگ زالبولانی یل نہ کنگ ءَ چہ شال نیمگ ءَ لانگ مارچ کنگ بیت-
روکپتی بلوچستان ءِ جتا جتائیں جاھاں عید نماز ءِ وھد ءَ رودراتکی بلوچستان ءَ پاکستانی پوج ءِ دست ءَ گرگ بیتگیں بلوچ زالبول ءُ بیگواھیں مردمانی ھاتر ءَ دوا ءُ زھرشانی کنگ بیتگ-
عید ءِ نماز ءِ وھد ءَ روکپتی بلوچستان ءِ شھر زاھدان، سراوان،مھرستان، چھبار، سرباز ءُ ایرانشھر ءَ مھلوک ءَ زھرشانی ءُ عید خبطہ ءَ دوا کتگ-
اود ءَ مردماں ڈاکٹر ماہ رنگ بلوچ ءِ اکس ءُ نبشتگیں تاک چِست کتگ انت ءُ اود ءُ آئی ءِ یل کنگ ءِ لوٹ کتگ-
زھرشانی کنوکاں پاکستان ءِ سرکار ءِ ھلاپ ءَ ‘ مرگ بر پاکستان’ ءِ اوگام جتگ ءُ لوٹ کتگ کہ مھرنگ بلوچ یل دیگ بہ بیت اِنت-
امام خبطہ ءَ گوشتگ زالبولانی بندیگ کنگ کانون ءِ توک ءَ اے دابی ءَ نیست انت مردمانی ھکانی واستا توار چِست کنوکیں مردمانی بندیگ زُلم ءُ زالمی یے-
امام خبطہ ءَ پاکستان ءِ سرکار ءَ لوٹ کتگ کہ ابید دگہ شرت ءَ بندیگیں زالبولاں یل بہ کن انت ءُ آیانی گپاں انساپ ءِ تَک ءَ گوش بہ دار اَنت-
آیاں گوشتگ اے ائید ءِ وشیانی روچ ءَ بلوچستان ءَ مھلوک ءِ سر ءَ زُلم ءُ زیادھی کنگ نا انساپی یے پاکستان ءِ سرکار وتی زُلم ءُ زوراکیاں بند بہ کنت ءُ گار ءُ بیگواھیں مردماں یل بہ دنت اِنت-
سرجمیں بلوچستان ءَ عیدالفطر ءَ مُچی ءِ ھواری ءَ دوایاں گوں آسر، کوہ چلتن ءِ دامن ءَ بلوچستان ءِ درستاں مستریں عید ءِ مچی برجم دارگ بیتگ، ھزارانی مردم ھوار، عید ءِ مُچی ءَ بیگواھیں مردمانی یل کنگ ءِ واستا گچینی دوا –
بلوچستان ءِ بنجاھی شھر چہ شال ءَ لھتے میٹر ءِ دوری ءَ بلوچستان ءَ مستریں عید ءِ مُچی برجم دارگ بیتگ کہ اود ءَ بی این پی ءِ نیمگ ءَ گوستگیں چار روچاں برجاھیں دھرناگاہ ءَ ھزارانی مردماں عید ءِ مُچی ءَ بھر زرتگ-
چہ کیچ تربت ءِ جتا جتائیں جاھاں مسیتاں علماء کرام ءَ نماز عید ءِ مُچی ءَ تران کنان ءَ گوشتگ مارا رمضان ءِ گڈسر ءَ اللہ تعالی ءِ شکر گرگی انت ءُ اللہ تعالی ءِ داتگیں گنجانی کدر کنگی انت – ھلال ءُ ھرام ءِ پرک دارگ بہ بیت ءُ اللہ تعالی ءِ دیم ءَ آجزی ءُ انکساری ءِ پیش آیگی انت-
جامع مسجد خاتم النبیین چاہ سر تربت ءَ نماز عید ءِ مُچی ءَ مولانا سعید احمد تگرانی، شاھی تمپ عیدگاہ ءَ مولانا غلام اللہ رستم نقشبندی، بنجاھی جامع مسجد تربت ءَ مولانا صالح، تعمیر ملت ءِ عیدگاہ ءَ مولانا عالم بلوچ، مدرسہ اصحاب صفہ میری ءَ مفتی مراد جان بلوچ، دارلعلم آپسر ءَ عیدگاہ ءَ مفتی فضل الرحمان قاسمی ءُ دگراں مُچی ءَ تران بیتگ-
اے وھد ءَ علماء کرام ءَ ڈیھ ءَ امن ءَ ھوار بلوچستان ءَ بیگواھیں مردم گچینی ڈاکٹر ماہ رنگ بلوچ ءُ دگرانی سلامتی ءَ یل دیگ ءِ واستا نیک داوا کنگ بیتگ انت-
علماء کرام ءَ ھستیں سرکار ءَ دزبندی کتگ کہ تاکت ءَ ابید گپ ءُ تران ءِ راہ ءَ گچین بہ کنت ءُ قیام ءِ واستا جھد بہ کنت اِنت-
ماہ رنگ ءِ اکس
نبشتہ کار: مَرز بوم بلوچ
دی بلوچستان پوسٹ
بندیگجاہ ءَ شپ ءِ ادار یک اَت کہ سنتری منی کوٹی دیم ءَ زاھر بوت کوٹی کسانیں کبس ءِ پیم ءَ تنک ءُ تھار اَت مدامی روچانی ڈول ءَ چہ ریاستی بیم ءُ یلگارانی دیم ءَ چم نیم واب ءُ نیم آگاہ اِت اَنت، سنتری ءَ در زورے سر ءَ جَت ءُ منی نام گپت کہ پاد ءَ بوشت درستیں بندیگجاہ ءِ بندیگیانی دل ایر شُت اَنت کہ چے بوھگ ءَ اِنت من دَرھان ءَ پاد آتکاں سنتری در پچ کنگ ءَ پیسر چہ در ءِ سیماں چہ دست شَھار دات ءُ منی دیم ءَ سیاھیں چادرے بستے ءُ منی دست ئِے پشتی نیمگ بست اَنت مدامی ڈول ءَ وھدے کس ءِ چہ بندیگجاہ ءَ کش اِت ئِے گڑا آئی ءَ گوں ھمے رنگ ءَ کُت ئِے۔
رند ءَ دَر ئِے پچ کُت ءُ منی کالر ئِے گپت ءُ داں کسانیں پندے بُرگ ءَ رند دگہ یک کوٹی ءِ در پچ بوت من ءَ سنتری چہ پشت ءَ زَبران ءَ ھمے کوٹی تہ ءَ بُرت اے ھما کوٹی اَت کہ وھدے نوکیں مردمے دزگیر کنگ بوت یا کْوھنیں بندیگے پہ لٹ کُٹ ءَ جُست ءُ پرس ءِ ھاتر ءَ ھمے کوٹی ءَ برگ بوت، اے کوٹی میانجی ءَ یک چِین کوپی درنجوکے اَت دو ٹیبل ءُ لھتیں کُرشی اِت اَنت یک ٹیبل یے سر ءَ ھما کُلیں ازباب ایر اِت اَنت کہ مردم لٹ ءُ کُٹ کنگ ءِ ھاتر ءَ کارمز کنگ بنت، مسالہ، آپ، لٹ، چِتر اے دگہ بازیں ساز ءُ سامان۔
یک برے پد ءَ ناھار ءُ رستریں اپسرے ءَ من ءَ شھماتے ماں بُر اِت ءُ بدیں زاہ بندات کُت، اے دگہ اپسر ءَ سنتری زور سر ءَ ھکّل کُت ءُ درائینت کہ دپتر ءَ بیار، بندیگجاہ ءَ ھمُک بندیگیں مردم ءَ را یک دپترے ءُ آئی ءِ نام ءِ جاگہ ءَ یک کوڈے ھست اَت، اے دپتر ءِ تہ ءَ بیگواھی ءِ وھد ءُ پاس ءَ بگر داں تئی زندمان ءِ ھوری ءَ تئی مکتب، دانشگاہ، کھول ءُ سنگتانی نام نبشتہ اِت اَنت۔ ھرچ رازے ھبرے البت آ راستے یا ناں اے دپتر ءِ توک ءَ نکش اَنت، اے دپتر بنداتی اولی ءُ دومی ماہ ءِ جُست ءُ پرس، اکس ءُ آئی ءِ لنکوکانی نشان گِرگ ءَ رند ریاستی مزن بُنجل جی ایچ کیو ءَ روان دیگ بنت ءُ ھرچ سزایے کہ جی ایچ کیو ءَ دات آئی ءِ سر ءَ اَمل کنگ بیت۔
سنتری ءَ دپتر آؤرت ءُ اپسر ءَ یکشل ءَ جُستانی اَمبر بنا کُت، چنچو ورنا موبالئیز کُتگ؟ شما کجام کجام ادارھاں کار کنگ ءَ اِت؟ شمارا چہ کجا پنڈ ءُ زر رس اِیت؟ یک اپسرے ءَ چہ پشت ءَ منی مید کَش اِت اَنت ءُ من ءَ بیھار ئِے دات ءُ درائینت ئِے کہ راست جُستانی پسو ءَ بدے، البتہ اے جُستانی پسو من پیسر ءَ بلکیں دہ رند ءَ داتگ اِت اَنت بلے اپسر ءُ آئی ءِ ھمراھانی مول ءُ مراد ھمیش اَت کہ بلکیں نوکیں گپے چیزے در بیت من یک رندے پد ءَ گوں جھل تواری ءَ اے پسو ھما ڈول ءَ دات اَنت کہ پیسر ءَ داتگ اِت اَنت، ادارُک ءِ جُست ءُ پرس ءَ رند یک اپسرے ءَ سنتری توار بست کہ ایشی ءِ چماں پچ کن وھدے منی چم پچ کنگ بیت اَنت گراں یک مزنیں اپسرے دیم ءَ کُرشی سر ءَ نشتگ اَت اے دگہ دو اے کَش ءُ آ کَش نشتگ اِت اَنت ءُ ھمے سنتری منی پشت ءَ اوشتاتگ اَت گراں اپسر ءَ وتی موبائیل کَش اِت ءُ من ءَ یک اکسے شون دات جُست ئِے گپت کہ ایشی ءَ پجا کار ئے؟
اے اکس گودی ماہ رنگ ءِ اکس اَت، من پسو دات ناں اے اکس ءَ من پجاہ نیار آں، اپسر ءَ چم در گُڈینت اَنت یک دو بدیں زاہ من ءُ یک دو گودی ماہ رنگ ءَ دیگ ءِ ھوری ءَ درائینت ئِے کہ ایشی ءَ چون پجاہ نیار ئے اے ماہ رنگ اِنت، من ماہ رنگ ھما وھد ءَ بی ایم سی دیستگ اَت کہ وھدے ماہ رنگ ءِ دیم بند بیتگ ءُ وتی بنداتی کلاسانی گرگ ءَ مکتب جاہ ءَ اتکگ ءُ شُتگ آ وھد ءَ ماہ رنگ گراونڈ ءَ پیش جوڈ نہ اَت ھمے ھاتر ءَ من ماہ رنگ پچاہ نیاؤرت وھدے من بندیگجاہ ءَ بندیگ باں گراں ھمے بلوچستان ءَ مزن دانشگاہ ءَ زالبوالانی اسکینڈل ءِ جیڑھے سر ءَ دیم ءَ در ءَ کنت ءُ شال ءِ زالبولانی توار چست کنگ ءِ ھاتر ءَ دگانی سر ءَ درکپ اِیت ءُ زھرشانی ءَ بندات کنت اے چہ ھما زھرشانی ءَ زُرتگیں یک اکسے اَت۔
مروچی شال ءِ دگانی سر ءَ یک گونڈلے دست ماہ رنگ ءِ اکس ءِ گندگ ءَ رند من ھما ترانگاں کپت آں کہ ھو ماہ رنگ اوں مروچی زندان ءَ بندیگ اِنت بلے آ ماہ رنگ مروچی آ ماہ رنگ نہ اِنت ۔ آ ماہ رنگ پیسر ءَ ایوک ءَ نام ئِے ماہ رنگ بیتگ مروچی آ راج ءِ ماہ رنگ اِنت، راجی نپ ءُ سیتاں سرپد اِنت، آئی ءِ بود مزن ءُ بلند اِنت، آئی ءَ یک ریاستے ڈالچار کتگ ءُ آ ریاست انچو مجبور کتگ کہ چہ ماہ رنگ ءِ ساھگ ءَ بیم کار اِیت، آ بی بی گل بی بی ءُ بانک کریمہ ءِ رنگ ءَ اِنت، آئی ءِ راجی ھُب ءُ واھگ انچش پراہ ءُ شاھگان اِنت کہ بلوچستان ءِ کوہ ءُ کوچگ، بزگر ءُ دیکانانی لوگ روژناہ اَنت چے ءَ کہ آ ھما کوہ ءُ کوچگ، بزگر ءُ دیکانانی سروک ءُ مھکمیں توار اِنت آ درپشوکیں ماہ ءِ رنگ ءَ اِنت کہ تھاریں شپ ءَ وتی شینکیں شھم ءَ آتار کنت ءُ گلزمین ءَ پرچ اِیت ماہ رنگ ءَ شینکیں شھم ماں بلوچستان ءَ وتی بلوچی شال ءِ اندر ءَ جاگہ داتگ اَنت۔
اے لُکیں نبشتانک ءِ متلب ھمیش اِنت کہ اے ریاست ھما وھد ءَ چہ ماہ رنگ ءِ بیم ءَ بیتگ کہ آ ایوک ءَ نام بیتگ مروچی ماہ رنگ یک مُھکمیں راجے۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-
گوستگیں روچاں چہ شال ءَ بیگواہ نامی ئیں عالم دین مولانا عبدالحق بلوچ ءِ چُک ءُ مکران میڈیکل کالج ءِ اسسٹنٹ پروفیسر ڈاکٹر ثناء اللہ بلوچ ءَ وتی دو گھارزتکانی آفتاب عالم ءُ شمش عالم ھمراھی ءَ لوگ ءَ سر بیتگ اَنت-
زانگ بہ بیت آ گوستگیں شپ ءَ شال ءَ برجاھیں آئی ءِ لوگ چست کتگ اَنت وھدے سیکورٹی ادارھا لوگ سر ءَ بیڑبرتگ بلوچ یکجھتی کمیٹی بُنجاھی راھشون صبغت اللہ شاہ جی چست کتگ، وھدے کہ صبغت اللہ شاہ جی انگت یل کنگ نہ بیتگ ءُ نانکہ آ آمیدگس ءَ پیش کنگ نہ بیتگ کہ آئی ءِ میار چی اِنت-
بلوچ راجی آجوئی سنگر ( براس ) ءِ جارکش بلوچ خان ءَ ماں رسانکدر ءَ وتی شنگ کرتگیں درشانے ءَ گوشتگ کہ براس ءِ سرمچاراں دگہ 16 اُرش کتگ انت اِے اُرشانی تہ ءَ زورگریں پاکستانی لشکر، نیم لشکری ٹولی، چیریں اداره، ریاست ءِ جوڑ کتگیں ڈیتھ اسکواڈ ، سرکاری پریام، مڈی بروکیں گاڑیاں ھوار آ دگہ ریاستی نپ نشانگ کرتگ اَنت اِے اُرشاں ھوار گوستگیں چار روچانی میان ءَ براس ءِ سرمچاراں سرجم ءَ 88 اُرش کتگ انت۔
آئی ءَ گوشتگ کہ اُرش 27 مارچ 1948 ءِ درگت ءَ کنگ بیتگ اَنت کک زورگریں پاکستان ریاست ءَ لشکرکشی ءِ تَک ءَ بلوچ ءِ سرڈگار زور گپتگ اے زورگری بلوچستان ءِ گوستانکی، زمینی کچ ءُ کساس ءُ راھبندانی بگیری ءَ بیتگ انت ، ایشی ءِ بگیری ءَ بلوچ راج ءِ گھگیری چہ اولی روچ ءَ برجاه اَنت چہ براس ءِ نیمگ ءَ اے سلاه بندیں کار نہ اِیوک ءَ چیدگی ءُ کردی گھگیری اَنت بلکیں ھمے گپ ءَ پدر کنت کہ بلوچستان انگت ھم یک زورگپتیں سرڈگارے۔
جارکش ءَ گوشتگ کہ براس ءِ سرمچاراں واشک ءِ ھند ناگ ءَ لیویز تھانہ گپتگ ءُ پنچ کارمند دزگیر کرتگ انت تھانہ ءِ تہ ءَ سلاه ءُ آدگہ لشکری سامان ، یک گاڑی یے ءُ پرپٹے ھم گپتگ ءُ گوں وت برتگ انت لیویز کارمند کڈن کنگ ءَ پد یل کتگ اَنت۔
آئی ءَ گوشتگ کک براس ءِ سرمچاراں تربت ء ھند ناسرآباد ءُ ھیرآباد ءَ تر ءُ گرد کتگ سرمچاراں پولیس تھانہ دستیگ کرتگ ءُ سرجمیں سلاه ءُ پرپٹ زرتگ اَنت چہ ایشی ءَ پد تھانہ گوں دو گاڑیاں ھوار مانداشتگ ءُ تباه کتگ ھمے میان ءَ دژمن ءِ دیم ءَ آھوکیں کارمند نشانگ کتگ اَنت کک ایشی ءِ آسر ءَ سے کارمند جاہ پہ جاہ ءَ مرتگ انت ءُ دگہ بازینے زدگ کتگ انت سرمچاراں دژمنیں لشکر ءِ سرویلنس ڈرون ھم جتگ –
جارکش ءَ گوشتگ کہ پنچ شمبے ءِ سھب ءَ براس ءِ سرمچاراں کیچ ءِ بنجاھی شھر تربت ءَ زورگریں پاکستان ءِ نیوی بنجل ءِ پھزداریں چوکی گوں وتکار ءُ نوکیں سلاھاں نشانگ کتگ ءُ دژمن ءَ را تاوان داتگ-
جارکش ءَ گوشتگ کہ دشت ءِ ھند سبدان ءَ زورگریں پاکستانی لشکر ءِ بنجل ءِ سر ءَ ھم گوں مزنیں ءُ وتکاریں سلاھاں اُرش کتگ ایشی ءِ آسر ءَ دشمن ءِ دو کارندہ مرتگ انت ءُ کم چہ کم چار ٹپی بیتگ انت۔
آئی ءَ گوشتگ کہ براس ءِ سرمچاراں دشت ، کڈان ءَ زورگریں پاکستانی لشکر ءِ یک چوکی یے نشانگ کتگ چہ ایشی ءَ دژمن ءَ تاوانانی دیمپانی کنگ کپتگ۔
جارکش ءَ گوشتگ تمپ ءِ ھند میر آباد ءَ ھم براس ءِ سرمچاراں زورگریں پاکستانی لشکر ءِ بنجل ءِ سر ءَ اُرش کتگ ءُ دژمن ءَ را جانی ءُ مالی تاوان داتگ۔
آئی ءَ گوشتگ براس ءِ سرمچاراں مند، سُھررو ءَ زورگریں پاکستانی لشکر ءِ بنجل نشانگ کتگ اِے اُرش ءَ سرمچاراں راکٹ لانچر ءِ بازیں گولا آس داتگ ءُ گوں مزنیں سلاھاں اُرش کتگ کہ ایشی ءِ آسر ءَ دژمنیں لشکر ءِ کم چہ کم چار کارندہ ٹپی بیتگ انت-
جارکش ءَ گوشتگ مشکے ءَ براس ءِ سرمچاراں پولیس چوکی ءِ سر ءَ اُرش کتگ کراچی ءِ شھدگ اورناچ ءَ بستگ ءُ گاڑیانی پٹ ءُ پول ءِ میان ءَ شش پنجاپی دزگیر کرتگ کک آیانی بے میاری زانگ بیتگ ءُ آ یل کنگ بیتگ اَنت-
آئی ءَ گوشتگ براس ءِ سرمچاراں ڈیره مراد جمالی ءِ نزیک ءَ بائی پاس بستگ ءُ گاڑی پٹ ءُ پول کتگ اَنت ءُ مڈی بروکیں گاڑی نشانگ ءُ تباه کتگ اَنت دگہ یک اُرشے سرمچاراں ڈیره مرادجمالی ءَ زورگریں پاکستانی لشکر ءِ سر ءَ اُرش کتگ ءُ تاوان داتگ۔
جارکش ءَ گوشتگ سبی ءِ ھند تلی دگ کڑک ءَ براس ءِ سرمچاراں زورگریں پاکستانی لشکر ءِ چوکی نشانگ کتگ ءُ تاوان داتگ-
آئی ءَ گوشتگ دوشی براس ءِ سرمچاراں جیونی ءَ نارکوٹکس ءِ کارگس ءِ سر ءَ گوں دزبمبے اُرش چگل داتگ ءُ نشانگ کنگ بیتگیں کارگس زورگریں پاکستانی لشکر ءُ چیریں ادارھانی کارمندانی اوتاک ءِ دروشم ءَ کارمرزی بیتگ-
جارکش ءَ گوشتگ مئے کاروائی ھمے گپ ءَ پیش کنت کہ بلوچستان ءَ ریاستی زورگری ءِ بگیری ءَ مئے گھگیری برجاه بیت ءُ مئے مول زورگریں لشکر ءُ آئی ءِ کمکارانی نشانگ کنگ ءُ بلوچ راج ءِ آجوئی ءِ جھد ءِ مھکم کنگ اِنت دانکہ مئے سرڈگار چہ ڈنی زورگر ءَ آجو نہ بیت انت مئے سلاه بندیں کاروائی ءُ گھگیری برجاه بنت انت اے اُرشاں ھمے پدر بیت کہ ما پہ وتی مول ءَ سوبین بوگ ءَ ھمک جاھاں کار کن اِیں ءُ ھچ وڑ ءَ چک وتی آجوئی ءِ جھد ءَ پد کنز نہ بہ ایں-
شال دمگی انتزامیہ ءَ عید الفطر پُر ایمنی ءُ جاور نگیگی ءِ چارگوزاری ءَ چہ پکنک جنگ سر ءَ پابندی جتگ-
ڈپٹی کمشنر شال نیمگ ءَ چہ برجاھیں نوٹیفیکشن ءِ رِد ءَ بلوچستان ءَ 144 جنگ بیتگ چریشی ءِ سبب ءَ شال ھنہ اوڑک، کرخسہ، شعبان ءِ دمگاں عید ءِ روچ ءَ ھرچ وڑیں سیل سواد سر ءَ پابندی جنگ بیتگ-
انتزامیہ شھریاں مکن کنگ بیتگ آ عید وھد ءَ اے ھندانی سر ءَ پکنک روگ ءَ پھریز بکن-
