یاگی میٹاپیزیکل سرتابی
نبشتہ کار: شَکّل بلوچ
اولی بھر
دی بلوچستان پوسٹ
یاگی، ھما مردم کہ زوراورے ءِ ھُکم ءَ نہ مَنّ اِیت، بزاں آئی ءِ گلام بوگ ءَ انکاری بیت ءُ نہ منّ اِیت یاگی گُش انت۔ یک گلامے وتی زند ءَ زوراور ءِ گلامی ءَ کنگ ءَ بیت ءُ اناگہ زوراور آ گلام ءِ سر ءَ نوکیں ھُکمے ٹھین اِیت گڑا وھدے ھمے گلام آئی ءِ ھُکم ءِ پروشگ ءَ یاگی جوڑ بیت۔ متلب چی اِنت کہ گلام آئی ءِ ھُکم ءَ نہ منّ اِیت؟ بچار بازیں مُدتے ءَ گلام ھاکم ءِ گور ءَ گلامی ءِ دراجیں زندے ءَ گوں زالم ءِ کر ءَ بیت ءُ آئی ءِ دیم ءَ ھر ھُکم ءَ ” ھو“ کنت بلے پُشت ءَ ”انّا“ بزاں نہ منّ اِیت، مجبور اِنت، داں دیراں ھمے ھاکم آئی ءِ زند ءِ سر ءَ سر گوز کنت، گڑا گلام اوپار ءُ برداشت ءِ باراں سگّ اِت نہ کنت گڑا وتی سر ءَ کش اِیت، یاگی جوڑ بیت۔ ھاکم مدام گلامے ءَ را انسانے نہ لیک اِیت، آ گلام ءِ مجبوریانی سر ءَ پائدگ چِست کنت ءُ آئی ءَ را چو کُچک ءِ پَیم ءَ کار گِپت، کلاگ بند اِیت، زاہ ءُ بد کنت، بلے اے درست چہ آئی ءِ بے کسی ءُ بے وسی ءِ پُشدر ءَ کنگ بنت۔ گلام مدام چہ وتی زند ءَ زِبھر اِنت، آ زانت ھما وھد ءَ زانت کہ ھاکم آئی ءِ سر ءَ زُلم ءُ زوراکی کنت، آئی ءِ اِزت ءِ نپس ءِ سر ءَ وار کنت، آئی ءَ را ایر جَنت دگرانی دیم ءَ آئی ءِ زند گُش ئے پورا آئی ءِ وامدار اِنت۔ گلام ءِ زبان کُبل جنگ بیت، زند ءِ ھر ھما وشیاں زِبھر اِنت کہ آ دگہ راجے ءَ گون بنت۔
گلام ھر وھد چہ وتی زند ءَ مُرتگ۔ گلام ءَ را زندگی چمیشکا نیست کہ آ پَھک اَبید چہ ھاکم ءِ چیردستی ءَ سُر اِت نہ کنت، ساہ اوں جوانی ءَ زُرت نہ کنت۔ چہ ھاکم ءِ زُلم ءُ زوراکیانی سبب ءَ یک روچے کَیت آئی ءِ گلام ھمے موہ ءِ ودار ءَ بیت کہ آ آئی ءِ ودار ءَ بوتگ۔ ھمے روچ ءِ ودار ءَ آ وتی سر کشی ءَ کنت۔ چہ وتی زند ءِ آجوئی ءَ یاگی جوڑ بیت۔ یاگی ھاکم ءِ ھما ھُکم ءَ نہ منّ اِیت کہ آئی ءِ زند ءَ گوں زورانسری ءَ گلام ءَ گیش گلامی ءِ مارشت ءَ گیش کنگ ءِ جُھد ءَ کنگ ءَ بیت بلے گلام پھم اِیت، زانت چہ وتی بے وسی ءَ گڑا گلام آئی ءِ ھُکم ءَ پروش اِیت، یاگی جوڑ بیت۔
یاگی ھر ھما انسان بیت کہ آئی ءِ سر ءَ چاگرد زُلم کنت، آئی ءِ سر ءَ ھما زوراکیاں کنت کہ آ گڈی ءَ چہ وتی زند ءِ اوپاری ءَ سرگوز بیت گڑا دیم ءَ زالم ءِ زُلمانی ھلاپ ءَ گھگیری ءَ بنا کنت۔ میزان میزان ءَ داں دیراں زند ءِ ھر پِڑاں وتی سر ءَ بوھوکیں وڑ وڑیں زُلمانی مارگ ءُ زانگ ءَ پَد چہ وتی سرتابی ءَ بنا کَنت۔
چہ البرٹ کامیو ءِ کتاب ”دی ریبل“ ءِ کسانیں چمشانکے ءَ گوں شما درنگاز کنگ لوٹ آں کہ یک گلامیں گلامی ءِ وھد ءَ ھاکم ءِ زُلم ءُ زوراکیانی جاوراں چِہ چے مار اِت کُت کنت، ءُ ھمے زالمیں ھاکم ءِ زُلماں چہ وتی گلامی ءِ زند ءَ سرتابی کنوکیں گلام وتی گھگیری ءَ زھرشانی ءِ شکل ءَ ھاکم ءِ ھلاپ ءَ در کَیت۔ اے کسانیں چمشانک، البرٹ کامیو ءِ کتاب ”دی ریبل“ چوں بلوچ راج ءِ واستا المی اِنت کہ آ پاکستان ءِ زلمانی ھلاپ ءَ وتی سرتابی ءَ کنت۔
میٹاپیزیکل سرتابی ءَ چہ وتی جُنز ءَ ، وتی سر ءَ بوھوکیں جاورانی ءُ درائیں وساچ کُتگیں ساچشتانی ھلاپ ءَ زھرشانی ءَ بنا کنت. اے میٹاپیزیکل اِنت چیاکہ اے جُست یا چیلنج کنت آئی ءِ گڈی وساچ کُتگیں ساچشت ءِ بارو ءَ الم گلام جاور ءِ ھلاپ ءَ زھرشانی کنت چی ءَ کہ آ چہ وتی اندر ءَ مار اِیت ءُ چہ وتی اندری گلامی ءَ پول اِیت; میٹاپیزیکل یاگی زھرشانی کنت جاور ءِ ھلاپ ءَ چی ءَ کہ آ وت ءَ شوھاز اِیت چہ وتی اندریں انسان ءَ۔ یاگی ئیں گلام گھگیری کنت کہ آئی ءِ تہ ءَ چیزے ھست، سکین دنت چہ آئی ءَ اندر ءَ، میٹاپیزیکل یاگی جار ءَ جنت کہ آ چہ ابرم ءَ مار اِیت۔ پہ ھر دو ءَ، اے ناں کہ تھنا پلگار ءُ سادگیں دلتپرکھے۔ ھر دوئیں جیڑہ، اسل ءَ، ما شوھاز کن اِیں کہ یاگی نہ منّگ ءِ جاور ءِ منّارینگ ءَ آ وت ءَ شوھاز اِیت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-