گوستگیں روچاں بلوچ لبریشن آرمی ءِ اُرش ءَ ھکومتی پلامرزی سلاہ بندیں ٹولی ( ڈیتھ اسکواڈ ) ءِ سروک عطاءالرحمان مینگل ءُ آئی ءِ ھمراھانی کوش ءِ ایف آئی آر محمد جان جھمنند وڈھ نیمگ ءَ چہ سردار اختر مینگل، اسد مینگل ءُ گورگین مینگل ءِ ھلاپ ءَ نکش کنگ بیتگ-
ارزی دیوک ءَ ٹاہ داتگ کہ عطاءاالرحمان مینگل کاروان ءِ سر ءَ اسد مینگل ءُ گورگین ءُ آئی ءِ ھمراھاں اُرش کتگ – ایف آئی آر ءَ 149- 148- 107 – 324 – 302- وڑیں تک ھوار کنگ بیتگ اَنت-
زانگ بہ بیت کہ بلوچ لبریشن آرمی ءَ ھُزدار ءَ ڈیتھ اسکواڈ ءِ پُرکاریں باسک ءُ سروک عطالرحمان مینگل ءِ کوش ءِ زمہ واری منّ اِتگ-
22 جون2025 ءَ بی ایل اے انٹیلیجنس ونگ زراب ءُ آپریشنل یونٹ فتح اسکواڈ ءَ ھزدار ءِ دمگ وڈھ ءِ ھند آڑنجی ءَ یک ھوار ءُ مھکمیں لشکری کاروائی ءِ وھد ءَ عطاالرھمان نشانگ کتگ ءُ گوں ھمراھاں ھوار کشتگ-
بی ایل اے ءِ رِد ءَ اے کاروائی زراب ءِ دراج کشیں انٹیلیجنس ءِ ھال، یکشلیں چاروکی ءُ نشانگ ءِ پرکاری ءُ پٹ ءُ پول ءَ پد دیم ءَ آورتگ-
ھمے وڑ عطاءالرحمان مینگل کوش ءَ پد آئی ءِ بُنکی میتگ وڈھ ءَ ھکومتی ءُ پوجی سروکانی روگ آیگ برجاہ ءَ اِنت- مروچی سر وزیر بلوچستان ءِ آیگ ءَ ھُزدار شھر سرجمی ءَ کرفیو جتگ-