اُستان خیبر پختونخوا ءِ ھلک سوات یکشلیں ھوراں پد دریا پُر بوتگ۔ سوات دریا تْرند روانی ءِ سبب ءَ 18 سیل ءُ سواد کنوک آپ ءَ برتگ انت-
ریسکیو ءِ کارندھانی رد ءَ سیلابی آپ ءَ بُڈ اتگیں چہ 18 مردمانی تہ ھپت ءِ جون درکنگ بوتگ اَنت، 3 رکّینگ بوتگ اَنت ءُ وھدے کہ دگہ مردمانی شوھاز برجاہ اِنت۔
ڈپٹی کمشنر سوات شھزاد محبوب ءَ اے گپ ءِ پدرائی کتگ کہ سیلابی اُرش ءَ بُڈ اِتگیں 18 مردمانی ھال راست کتگ ءُ گوشتگ ھور ءِ سبب ءَ دریائے سوات ءِ آپ ءِ کچ گیش بوگ ءَ اِنت۔ ریسکیو 1122 ءِ رد ءَ دریائے سوات ءِ تہ ءَ بوتگیں تْرندیں سیلابی اُرش ءِ سبب ءَ بازیں دمگ آپ ءَ گپتگ انت۔
سوات ءِ شش جتا جتائیں جاھاں پٹ ءُ پولی کارروائی برجاہ اِنت کہ ایشی ءِ تہ ءَ 80 کارندہ بھر زورگ ءَ اَنت۔ ھکومتی رد ءَ بڈ اِتگیں مردمانی تہ ءَ جنین ، چُک ءُ پیریں مردم ھم ھوار اَنت۔
دمگی مردماں گْوشتگ کہ دریا ءَ شُتگیں مردمانی پجّار یکیں ھاندان ءِ مردم اَنت کہ پہ سیل ءُ سواد ءُ وشیاں سوات ءَ اتکگ اَنت۔
ریسکیو ءِ کارندھانی گشگ انت کہ بائی پاس ریلیکس ھوٹل ءِ نزیک ءَ 10 ءَ چہ گیش مردم بُڈ اتگ انت ءُ انگرو ڈھیرئی ءِ جاہ ءَ چہ سئے لاش کشّگ بوتگ انت۔
بیست ءُ دو ءَ گیش مردم چہ امام ڈھیرئی ءَ سلامت کشگ بوتگ اَنت۔ چہ غالیگے ءَ یک لاشے کشّگ بوتگ وھدیکہ 7 مردم ءِ رکّینگ ءِ ھاتر ءَ ریسکیو آپریشن برجاہ اِنت۔
برا باما خیلا مٹہ ءِ دمگ ءَ چہ 20 ءَ بگر داں 30 مردم سوبمندیں رنگے ءَ رکّینگ بوتگ اَنت وھدے کہ مانیار ءَ 7 مردم ءُ پنجیگرام ءَ یک مردمے ءِ ایمنی ءَ چہ در کنگ ءِ کارروائی برجاہ اِنت۔
محکمہ موسمیات ءِ رد ءَ خیبر پختونخوا ءِ گیشتریں دمگانی تہ ءَ داں یک جولائی ءَ گیشتر ھور ءِ گمان اِنت کہ ایشی ءِ سبب ءَ صوبہ ءِ شمالی دمگانی تہ ءَ گلیشیر ءِ تْرکگ ءِ ھم گمان اِنت۔
پی ڈی ایم اے ءَ چترال اپر ءُ لوئر، دیر اپر، سوات ءُ کوھستان ءِ نازرکیں دمگانی انتظامیہ ءِ پھرریزگی گامگیج ءِ واستا الرٹ شنگ کتگ۔
پی ڈی ایم اے ءِ جارکش ءِ رد ءَ خوازہ خیلا ءَ دریائے سوات ءَ آپ ءِ کچ ءُ کساس باز اِنت بلے دگہ دریاھانی تہ ءَ آپ ءِ کچ ءُ کساس نارمل اِنت۔