گریشہ ءَ شھید بیتگیں سنگتیں سرمچاراں سُھرچکیں دروت ندر کن ایں- بی ایل ایف

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ بیست دو جون ءَ بی ایل ایف ءِ سرمچاراں گریشہ ءِ دمگ ءَ گل ءِ گشت ءَ بیتگ اَنت کہ بدرنگ ءِ ھند سر ءَ ریاستی سروکی ءَ برجاھیں ڈیتھ اسکواڈ ءِ کارندھاں گوں دیم پہ دیم بیتگ اَنت- اے درگت ءَ یک تُرندیں میڑے بندات بیتگ چریشی ءَ گل ءِ سے سرمچاراں شھید بیتگ اَنت، وھدے کہ دُژمن ءِ یک کارندھے مرتگ ءُ بازین ئِے ٹپی بیتگ اَنت-

جارکش ءَ گْوشتگ کہ میڑ ءَ شھید بیتگیں سرمچارانی تہ ءَ سیکنڈ لیفٹیننٹ مقبول بلوچ پنّام ءِ قندیل بلوچ، سراج بلوچ پنّام ءِ زبیر بلوچ ءُ خالد بلوچ پنّام ءِ سفر بلوچ ھوار بیتگ اَنت –

جارکش ءَ گْوشتگ کہ شھید سیکنڈ لیفٹیننٹ مقبول بلوچ پنّام ءِ قندیل ء نوشیروان، گریشہ ءِ جاورجی ءِ دمگ ءَ چہ سیادی بیتگ- تو یک وانندھے ورنایے بیتگ ءُ نیشنل یونیورسٹی آف ماڈرن لینگویجز ( نمل) اسلام آباد ءَ زانت دربرتگ- ریاستی ادارھاں آ دوھزار بیست یک ءَ زورانسری بیگواہ کنگ بیتگ ءُ ھپت ماہ ءَ تاں ریاستی آزارجاھاں بندیگ ءُ آزار ءِ اوپار کنگ ءَ پد یل کنگ بیتگ – یل بیگ ءَ پد تو دوھزار بیست دو ءَ بلوچ ڈیھ ءِ آجوئی ءِ ھاتر ءَ بلوچستان لبریشن فرنٹ ءَ ھمگرنچ بیتگ ءُ کسانیں مدتے ءَ چہ وتی لیکھی بودناکی، گل ءَ ھمگرنچی ءُ جنگی بودناکیانی رِد ءَ یک جوانیں سرمچارے ءِ دروشم ءَ دیم ءَ اتکگ-

جارکش ءَ گْوشتگ تو کیلکور. گچک، مشکے، جھاؤ، وڈھ، اورناچ، نال ءُ گریشہ ءَ ھوار بازیں دمگاں آپریشنز ءَ بھر زرتگ – تئی زانت ءُ دیمونیانی جزبگ ءِ سوب ءَ گل ءَ ترا “قربان یونٹ” ءَ ھوار کتگ کہ گل ءِ یک ھاسیں ستکیں داروکیں ٹولی یے-

جارکش ءَ گْوشتگ سراج بلوچ پنّام ءِ زبیر ء دولت بلوچ، باھڑی گریشہ ءِ جھمنند اِنت- دوھزار بیست ءَ تو ھم زورانسری بیگواہ کنگ بیتگ، بلے یل بیگ ءَ پد نزریاتی ھمگرنچی ءِ تہ ءَ ھچ وڑیں کمی نیتکگ- تو یک سالے ءَ ساری بلوچستان لبریشن فرنٹ ءَ ھمگرنچ بیتگ ئے ءُ کسانیں مدتے ءَ بازیں ھاسیں مشناں جوانیں کرد پیلو کتگ-

جارکش ءَ گْوشتگ شھید خالد بلوچ پنّام ءِ سفر بلوچ ء محمد بخش، چہ گیشتری گریشہ ءَ سیادی بیتگ- یل بیگ ءَ پد تو ھم راجی زرمبشت ءَ جوانیں کرد ءِ پیلو کنگ ءِ اِھد کتگ ءُ یک سالے ءَ ساری بلوچستان لبریشن فرنٹ ءِ بھر بیتگ-

جارکش ءَ دوئیں سنگتاں جھاؤ اورناچ، نال ءُ گریشہ وڑیں ھاسیں جنگانی سر ءَ پارٹی لشکری آپریشناں گوں توکل ءُ ایمانداری ءَ جوانیں وڑے ءَ کرد پیلو کتگ-

جارکش ءَ گْوشتگ بلوچستان لبریشن فرنٹ اے بے بھائیں پُسگاں سُھرچکیں دروت ندر کن ایں، کہ آیاں بلوچ سرڈگار ءِ آجوئی ءِ بے بھائیں مول ءُ مراد ھاتر ءَ وتی جان اش کربان ءِ کتگ اَنت- اے دیمونی مئے راجی منزل ءَ رُژن ءِ چراگ اَنت، ءُ ما اِھد کن ایں کہ اشانی مشن ءَ برجاہ دار ایں-