TBP Balochi

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ انٹیلیجنس ونگ ھالانی رِد ءَ بیست پنچ جون شپ ءَ سرمچاراں گوادر ءَ ریاستی انٹیلیجنس نیٹ ورک ملٹری انٹیلیجنس ءِ یک چیریں آپریشنل سیل ءِ تھی دروازگ سر ءَ بمبے پٹ کتگ- شپ دہ ءِ نزیک ءَ وھدے انٹیلیجنس کارندہ وتی اسٹنگ ھاؤس ءَ پُترگ ءَ بیتگ، گُڑا تھی پوائنٹ سر ءَ پٹیں تراکناکیں شورو ترکّ اِتگ اَنت چریشی ءِ آسر ءَ ملٹری انٹیلیجنس ءِ یک کارندھے جاہ پہ جاھی مرتگ وھدے کہ دو سک ٹپی بیتگ اَنت-

جارکش ءَ گْوشتگ اے نیٹورک پیسر ءَ یک ریٹائرڈ انٹیلیجنس اپسر ” عباس” ءِ چیردستی ءَ پُرکار بیتگ، کہ نو آئی ءِ برات یعقوب ءِ چیردستی ءَ گوادر ءَ جتاجتائیں ھندانی سر ءَ کونسملنٹ پوسٹس ءُ کوور آپریشنز ءِ کار ءَ اِنت-

جارکش ءَ گْوشتگ بیست پنچ جون ءِ بیگاہ ءَ چار نزیک ءَ بی ایل ایف ءِ سرمچاراں جھاؤ ءِ دمگ ملائی گزی ءَ برجاھیں پاکستانی پوج ءِ چیک پوسٹ سر ءَ اُرش کتگ – اُرش وھد ءَ پیسر ءَ اسنائپر ٹولی ءَ نشانگ کتگ یک کارندھے کُشتگ – پد ءَ سرمچارانی دومی ٹولی ءَ دُژمن ءِ سر ءَ راکٹ لانچر ءُ دگہ مزنیں سلاھاں چہ اُرش کہ نیم کلاک ءَ تاں برجاہ بیتگ- سرمچاراں کاروائی ءَ پد پہ سلامتی درتکگ ءُ وتی اوتاکاں سر ءَ بیتگ اَنت وھدے کہ دُژمنیں پوج ءَ چو مدامی وڑ ءَ لَس میتگانی سر ءَ مارٹر آس داتگ ءُ تیرگواری کتگ-

جارکش ءَ گْوشتگ بیست پنچ جون ءَ بی ایل ایف ءِ سرمچاراں کیچ ءِ دمگاً شاپک ءُ سامی ءَ دُژمن ءِ سر ءَ یکیں وھد ءَ دو جتاجتائیں ٹیکٹیکل ریڈ (Tactical Raids)کتگ-

جارکش ءَ گْوشتگ شپ ھشت ءَ شاپک ءَ کوہ بارگ ءِ بُرز ءَ برجاھیں پوج چیک پوسٹ سر ءَ راکٹ پروپیلڈ گرینیڈز (RPGs ) ءُ آٹومیٹک سلاھانی سر ءَ جوانیں وڑے ءَ اُرش کتگ-

جارکش ءَ گوشتگ دومی کاروائی سامی ءَ کوہ کلات سر ءَ برجاھیں پوجی چوکی ءِ سر ءَ اُرش کتگ، اود نزیکیں رینج انٹری آپریشن رِد ءَ سرمچاراں دُژمن سر ءَ اناگاہ ءَ اُرش کتگ ءُ آ نشانگ کتگ اَنت-

جارکش ءَ گْوشتگ کہ اے دوئیں کاروائیانی آسر ءَ یکجاھی ھساب ءَ دو سیکیورٹی کارندہ مرتگ ءُ سے ٹپی بیتگ اَنت، وھدے کہ بی ایل ایف ءِ جنگولاں ھچ وڑیں بے تاوان ءَ واتر وتی مُھریں اوتاکاں سر بیگ ءَ سوبمند بیتگ اَنت-

جارکش ءَ گْوشتگ بلوچستان لبریشن فرنٹ اے کاروائیانی زمہ واری ءَ منّ اِیت ءُ اے اِھد کنت کہ بلوچستان ءِ وتواجھی ءَ تاں زورگریں پوج ءَ نشانگ کن ایں-

بلوچستان ءِ دمگ کلات ءَ پاکستانی پوج ءِ بُنجاھی بُنجل سر ءَ پشمبے ءِ شپ ءَ ناشناسیں سلاہ بندیں مردماں اُرش کتگ- چریشی ءِ آسر ءَ دمگ ءَ تُرندیں تیرگواری ءُ تراکانی توار اش کنگ بیتگ-

دمگی اِھوالکار رِد ءَ بازیں تراکاں پد تُرندیں تیرگواری ءُ تراکانی توار اش کنگ بیتگ-

بلے اُرش درگت ءَ واکدار نیمگ ءَ چہ ھچ وڑیں درشان دیم ءَ نیتکگ- نانکہ جانی تاوان پدر ءُ رد کنگ بیتگ-

اے اُرش زمہ واری انگت ھچ گل ءَ نہ زرتگ بلے بلوچستان ءَ گوستانک ءَ اے وڑیں اُرشانی زمہ واری بلوچ آجوئی لوٹوکیں گلاں زرتگ اَنت-

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں درشان ءَ گوشتگ شال، کلات ءُ سیاھیجی ءِ جنگ ءَ زورگریں پاکستانی پوج ءِ گون ءَ جنگ ءَ سَے سرمچار شھید بیتگ انت، شھیدیں ھمراھاں سنگت جمشید، سنگت نوروز ءُ سنگت منور بیگ ھوار انت-

جارکش ءَ گوشتگ بیست ءُ دو جون ءَ شال ءِ دمگ ڈگاری ءَ بلوچ لبریشن آرمی ءِ گشتی ٹولی گوں زورگریں پاکستانی پوج ءَ ھما وھد ءَ دیم پہ دیمی بیتگ کہ آ دمگ ءَ پیشگانی کنگ ءَ بیتگ – زورگریں پوج ءُ سرمچارانی میان ءَ ترندیں دیم پہ دیمی جنگ داں دیر ءَ برجاہ بیتگ- جنگ ءَ زورگریں پوج ءِ بازیں کارندھے مرتگ ءُ زدگ بیتگ انت ءُ بلوچ لبریشن آرمی ءِ سرمچار جمشید پنام ءِ رضوان شھید بیتگ-

جارکش ءَ گوشتگ ھمے وڑ ھمے روچ ءَ کلات ءِ دمگ کوھک ءَ بلوچ لبریشن آرمی ءَ زورگریں پاکستانی پوج ھما وھد ءَ ترندیں اُرشانی نشانگ کتگ کہ آ پوجی زوراکی ءِ گرز ءَ پیشگامی کنگ ءَ بیتگ – سرمچاراں زورگریں پوج ءِ پرپٹ ءُ گاڑیانی کاروان آئی ای ڈی ءِ نشانگ کتگ ءُ تاوانانی دیمپان کتگ-

جارکش ءَ گوشتگ بیگاہ ءِ وھد ءَ بی ایل اے ءِ سرمچارانی دو ٹولیاں زورگریں پوج ءِ پندی کارندہ یک جوئی ءِ توک ءَ انگیر کتگ انت ءُ نشانگ کتگ انت کہ چریشی ءَ زورگریں پوج ءِ شش کارندہ جاہ پہ جاہ ءَ مرتگ انت ءُ بازینے زدگ بیتگ انت – زورگریں پوج ءِ گون ءَ یک ساھتے ءَ داں جنگ برجاہ بیتگ ءُ بلوچ لبریشن آرمی ءِ سرمچار نوروز پنام ءِ کنگ نجیب شھید بیتگ-

جارکش ءَ گوشتگ بیست جون ءَ دشت ءِ دمگ لنگاسی ءَ بلوچ لبریشن آرمی ءِ سرمچارانی ءُ زورگریں پاکستانی پوج ءِ دیم پہ دینی ھما وھد ءَ آ گل ءِ کارانی درچ ءَ سپر ءَ بیتگ انت ءُ زورگریں پوج ءُ سرمچارانی میان ءَ جنگ بازیں وھدے ءَ برجاہ بیتگ ءُ پوج ءَ را تاوانانی دیمپانی کنگ کپتگ- ءُ ٹپی ءِ جاوراں سنگت منور بیگ شھید بیتگ-

شھید سنگت جمشید پنام ءِ رضوان ء نور خان ساتکزئی ءِ سیادی شال ءِ دمگ ڈگاری ءَ بیتگ- بیست ءُ نُھ سالی ئیں جمشید دوھزار ءُ نوزدہ ءَ بلوچ لبریشن ءِ بھر بیتگ ءُ شھری گوریلاہ ءِ پرز ءَ پیلو کنگ ءَ بیتگ ءُ بازیں وھداں زورگریں پوج ءَ را ٹوھیں اُرشے کتگ – پد ءَ 2024 ءَ تو کوھی میدان ءَ شتگ ات – تو بولان ءُ شال ءِ تکاں پرز پیلو کتگ – تو رھبندانی ھواری ءَ بے تواری ءَ گشادی ءِ چیدگ بیتگ ئے – ھمراھاں تئی جاڑیگ بوگ ءَ مانزمانی ءِ ھمراہ بوتگ ئے ھمک مشن ءَ دلیری ءُ زھنکاری ءَ زورگریں پوج ءِ سر ھاکاں سک داتگ-

شھید سنگت نوروز پنام ءِ کنگ نجیب ء میر مھمد شاھوانی مستونگ ءِ دمگ سُنگر ءِ جھمنند بیتگ، تو دوھزار ءُ بیست ءُ سَے ءَ بلوچ لبریشن آرمی ءِ بھر بیتگ ئے – ءُ مستونگ ، ناگاھو ءُ کلات ءِ پڑاں وتی کار کتگ انت – تئی دھشت پھتوی ءُ زانشتکاری ءَ گوں بندوک بیتگ- تو ھروھد ءَ دیم ءَ بوتگ ءُ گھگیری ءِ سروکی کتگ- گل ءِ کاراں تو منینتگ کہ ورنا راجی جد ءُ جھد ءِ مڈی انت-

شھید سنگت منور بیگ پنام ءِ میرک ء بیگ مھمد ءِ سیادی کیچ ءِ دمگ دشت بلنگور بازار کلیرو ءَ بیتگ- تو یک سالے ءَ پیش بلوچ لبریشن آرمی ءِ بھر بوتگ ئے ءُ تو ساھیجی ءُ دشت ءِ پڑاں وتی بھر ھوارینتگ – باز کمے وھداں تو منیتگ کہ کربانی اُمر نہ چار ایت ءُ منور بیگ یک جھدکارے نہ بیتگ بلکیں زانتشکاری ءِ پرکاریں مردمے بیتگ-

جارکش ءَ گوشتگ شھیدانی ھون ڈیھ ءِ آجوئی ءِ بنھشت انت – ھمک آیوکیں نسل ءِ رھشونی ءِ چراگ بنت انت- ما اے گچینی شھیدیں سرمچاراں ھچبر بے ھیال نہ کن ایں ءُ آیانی راہ مئے جد ءُ جھد ءِ راہ انت-

بلوچ ریپبلکن گارڈز ءِ جارکش دوستین بلوچ نیمگ ءَ چہ رسانکدر ءَ شنگ کتگیں درشان ءِ تہ ءَ گْوشتگ کہ سرمچاراں کچھی ءِ دمگ ڈھاڈر ءَ زورگریں پاکستانی پوج ءِ یک گاڑی یے ریموٹ کنٹرول بمب ءَ چہ نشانگ کتگ-

جارکش ءِ رِد ءَ تراک آسر ءَ زورگریں پوج ءِ دو کارندہ مرتگ ءُ سے کارندہ سک ٹپی بیتگ اَنت وھدے کہ آیانی گاڑی ءَ سک تاوان رس اِتگ-

جارکش ءَ دیمتر ءَ گْوشتگ بلوچ ریپبلکن گارڈز ءِ سرمچاراں نصیر آباد ءِ دمگ پٹ فیڈر پل نزیک ءَ بیدار دگ سر ءَ پاکستانی زورگریں پوج ءِ یک گاڑی یے ریموٹ کنٹرول بمب تراک ءَ نشانگ کتگ- اے تراک ءِ آسر ءَ زورگریں پوج سے کارندہ مرتگ ءُ بازین ئِے ٹپی بیتگ اَنت-

جارکش دودستین بلوچ ءَ گوشتگ کہ اے اُرشانی زمہ واری مئے گل بلوچ ریپبلکن گارڈز ءَ منّ اِتگ ءُ اے وڑیں اُرش بلوچستان ءِ وتواجھی ءَ تاں برجاہ بنت-

بلوچستان ءَ مستونگ ءِ دمگ ءَ ناشناسیں سلاھبندیں مردماں مادن ءِ بروکیں ھشت ٹرک نشانگ کتگ، آئی ءَ چہ رند دمگ ءِ مدن کے بعد علاقے میں معدنیات کی ترسیل عارضی ءِ وڑءَ رسینگ بوتگ اَنت۔

جارجنوک ءِ رد ءَ اولی واکیات نور ءِ نزیک ءَ بیتگ باریں اود ءَ دو ٹرک نشانگ کنگ بیتگ ، وھدیکہ دومی واکیات نواب ءِ ھوٹل ءِ جاگہ ءَ باریں اود ءَ شش ءَ گیش ٹرک نشانگ کنگ بیتگ اَنت ۔

پیسر چہ ایشی ءَ مرچگیں سھب ءَ مستونگ ءَ ژلی ءِ جاگہ ءَ یک مادن ءِ بروکیں گاڑی ءِ سر ءَ ناشناسیں سلاھبندیں مردماں نشانگ کتگ ءُ تاوان داتگ۔

اے واکیات ءَ ھچ وڑیں جانی تاوان ءِ ھال نیتکگ۔

اے اُرشانی زمہ واری دنیگا کس ءَ نہ مَنّ اِتگ۔ بلوچستان ءَ جتا جتائیں جاھاں مدن ءِ بروکیں گاڑیانی سر ءَ ایشی ءَ چہ پیسر اوں اُرش بیگ ءَ اِنت ، آیاں گیشتر بلوچ آزادی لوٹوکیں تنیماں مَنّگ ءُ پیداک اَنت اَنت۔

عبدوی کراسنگ پوائنٹ ءِ بندش ءِ ھلاپ یَ زمباد گاڑیانی واھنداں سی پیک ایم 8 شھدگ زھرشانی کنان ءَ بند کتگ ءُ ٹریپک روانی مھتل کتگ-

پنچ شمبے ءِ روچ ءَ زھرشانی کنوکاں جدگل ڈن (ڈی بلوچ) ءِ نزیک ءَ گھنہ ءَ مزنیں شھدگ بند کتگ ءُ ایشی ءِ تہ ءَ مزنیں کساسے ءَ گاڑیانی واھند ھوار انت- زھرشانی کنوکیں مردمانی گْوشگ اِنت کہ عبدوی ءِ سیمسر بند اِنت، اگاں چہ ایران ءُ اسرائیل ءِ نیام ءَ انوگیں جیڑھانی پد ءَ جنگ بندی ءِ جار جنگ بوتگ ءُ ایران ءِ تہ ءَ زند ءِ نارمل وتی جاہ ءَ واتر بوتگ انت۔

زھرشانی کنوکیں گاڑیانی واھند گشگ ءَ انت کہ سیمسر ءِ بند کنگ ءَ آھانی واستا روزگار ءِ مزنیں جیڑھے ودی کتگ۔

زھرشانی کنوکاں لوٹ کتگ کہ عبدوی ءِ سیمسر زوت پچ کنگ بہ بیت ءُ اودا ایریں ‘وتگڑیں باڈ’ ءِ ھلاس کنگ بہ بیت کہ گاڑیاں تیل ءِ دوبر بار کنگ ءِ موہ بہ دنت۔

گاڑیانی واھنداں اے گپ پدر کتگ کہ آ وتی دھرنا ءَ ھلاس نہ کن اَنت ءُ سی پیک ءِ شھدگ ءِ سر ءَ ٹریفک بندی داں ھما وھد ءَ برجاہ مان اِیت داں آھانی لوٹ پیلو نہ بنت ۔

انوگ ءَ تاں زھرشانی کنوکاں گوں گپ ءُ تران یا سیمسر ءِ پچ کنگ ءِ بابت ءَ دمگی انتزامیہ یا سیادی داروکیں سرکاری واکدارانی نیمگ ءَ ھچ وڑیں پسو رسگ ءَ نہ اِنت۔

بلوچستان ءِ دمگ ڈھاڈر ءَ پاکستانی پوج ءِ گاڑی بمب تراک ءِ نشانگ کنگ بیتگ- تراک ءَ واکدار ءَ دو کارندھانی ٹپی بیگ راست کنگ بیتگ-

کچھی ءِ دمگ ڈھاڈر ءَ یوسف پٹرول پمپ نزیک ءَ پاکستانی پوج ءِ کاروان ءَ ھواریں یک گاڑی یے آئی ای ڈی بمب تراک ءَ نشانگ کنگ بیتگ-

پولیس واکدار ءَ تراک ءَ دو کارندھانی ٹپی بیگ راست کتگ- ٹپی سبی سی ایم ایچ ءَ برگ بیتگ اَنت-

پولیس ءِ گْوشگ اِنت کہ تراک ءَ پد پوج ءَ دمگ انگیر ءَ کتگ منانک یکجاہ کنگ ءَ اِنت-

اُرش زمہ واری انگت ھچ گل ءَ نہ زرتگ بلے بلوچ سلاہ بندیں آجوئی لوٹوکیں گل پُرکار اَنت-

گوستگیں یک ھپتگے ءِ تہ ءَ بلوچستان ءَ پاکستانی پوج دہ آئی ای ڈی اُرشاں نشانگ کنگ بیتگ اَنت کہ آیانی تہ ءَ نُھ تراکانی زمہ واری بی ایل اے ءَ زرتگ اَنت-

گوستگیں روچ ءَ گوادر ءِ دمگ جیونی ءَ پاکستانی پوج ءِ کارندہ بلوچ لبریشن آرمی ءَ یک آئی وی ڈی اُرش ءَ نشانگ کتگ اَنت چریشی ءِ آسر ءَ یکے جاہ پہ جاھی مرتگ ءُ یکے ٹپی بیتگ-

بلوچستان ءِ دمگ مستونگ ءِ جتاجتائیں دمگاں آپریشن ءِ وھد ءَ پاکستانی لشکر ءَ بازیں مردمے دزگیر کتگ ءُ ناشناسیں جاھاں برتگ انت-

لشکر ءَ گوستگیں روچ ءَ مستونگ ءِ ءِ دمگ کردگاپ ءَ فوجی آپریشن بندات کتگ۔ جتا جتائیں جاھاں بیڑاں بازیں مردمے زورانسری بیگواہ کنگ بوتگ اَنت کہ ایشانی تہ ءَ دو مردم ورنگزیب ء غلام حیدر ءُ سلطان محمد ء موسیٰ خان ءِ ناماں زانگ بوتگ اَنت گرگینہ ءِ جھمنند انت۔ دوئیں مرد دکاندار اَنت۔

دمگی مردمانی رد ءَ دگہ جاھاں ھم بازیں مردمانی زورانسری بیگواہ کنگ ءِ ھال رس اِتگ بلے آھانی بابت ءَ انگت ءَ سرجمیں اھوال نیتکگ انت۔

بلوچستان ءِ دمگ مستونگ ءَ اُرش ءَ مادن باریں گاڑی نشانگ جوڑ کنگ بوتگ انت۔

مستونگ ءِ دمگ ژلی ءَ نامالومیں سلاہ بندیں مردماں مادن بروکیں گاڑی نشانگ جوڑ کتگ ءُ تاوان داتگ انت- اُرشکاراں اُرش ءَ پد پشت مانداتگ ءُ شتگ انت-

انگت ءَ اے اُرش ءِ زمہ واری کس ءَ نہ زرتگ بلے بلوچ سلاہ بندیں آجوئی گلاں پیش ءَ مادن بروکیں گاڑی ھم نشانگ کتگ انت-

گْوستگیں روچاں بلوچ لبریشن آرمی ءَ مستونگ ءِ مزن شھدگ ءِ سر ءَ سیندک پروجیکٹ ءِ دو گاڑی مانداشتگ انت ءُ بلوچستان لبریشن فرنٹ ءَ ھمے رنگ ءَ کردگاپ ءِ دمگ ءَ بازیں بوزر گاڑی نشانگ کتگ انت۔

گوستگیں شپ ءَ بلوچستان ءِ تیابدپی شھر گوادر ءَ بمب تراکے کنگ بیتگ-

گیشیں اھولانی رد ءَ گوادر ءِ دمگ نیا آباد ءَ مزنیں تراکے ءِ توار بوتگ۔ تراک ءَ پد پورسز تراکجاہ ءَ سر بیتگ ءُ پٹ ءُ پولے بندات کتگ-

زانگ بہ بیت گوستگیں روچ ءَ گوادر ءِ تھسیل جیونی ءَ پاکستان کوسٹ گارڈ ءِ سر ءَ اُرش ءَ یک افسرے بیران ءُ دومی ٹپیگ بوتگ کہ ایشی ءِ زمہ واری بلوچ لبریشن آرمی ءَ من اِتگ ات۔

بلے گوادر ءِ نوکیں ارش ءِ زمہ واری انگت ءَ ھچ کس ءَ نہ زرتگ۔

بلوچستان ءَ پاکستانی پوج ءُ دگہ ادارھاں یکشل ءَ اُرشانی دیمپانی انت کہ اود ءَ بلوچستان ءِ آجوئی ءِ واستا جد ءُ جھد کنوکیں گل اے اُرشانی زمہ واریاں منگ ءَ انت-