TBP Balochi

بلوچ یکجھتی کمیٹی ءِ رھشون بیبرگ بلوچ ءِ جان ترندیں لٹ شاپی ءَ پد جاور ناگیگ انت-

بیبرگ بلوچ تھانہ ءَ برگ بیتگ کہ اود ءَ آئی ءَ جاندراھی ءِ آسراتی دیگ ءَ نہ اَنت – ءُ آئی ءِ پاد گوات گپتگ انت ءُ اسپیشل پرسن ءِ درگت ءَ ھم آئی ءَ آسراتی دیگ ءَ نہ اَنت-

زانگ بہ بیت 20 مارچ ءِ سھب ءَ کساس 5:30 ءَ پاکستانی پورسز ءَ شال ءَ بیبرگ ءِ لوگ ءِ سر ءَ بیڑ برتگ ءُ اود ءَ آ گوں برات ءِ ھمراھی ءَ برتگ-

بیبرگ بلوچ ءُ آئی ءِ برات ءِ یل کنگ ءِ ھاتر ءَ بلوچ یکجھتی کمیٹی ءَ زھرشانی ءِ راہ گچین کتگ چریشی ءَ چہ پورسز ءَ زھرشانی کنوکانی سر ءَ تیرگواری کتگ ءُ سَے مردم کشتگ ءُ ھمے وڑ ڈاکٹر ماہ رنگ، بیبو ءَ ھوار بازیں باسک دزگیر کتگ انت-

بلوچستان نیشنل پاٹی ءِ رد ءَ پولیس ءَ پترگ ءِ راھانی سر ءَ باسکانی سر ءَ آنسو گیس شیلنگ کتگ ءُ دزگیر کتگ انت-

بلوچستان نیشنل پاٹی ءِ سروک ءُ اے روانک ءِ رھشونی کنوکیں سردار اخترمینگل ءَ وتی چاگردی ترامجاہ ءَ پوسٹ کنان ءَ گوشتگ کہ ما ترندیں زھر ءُ گم ءِ گون ءَ اے گپ ءِ راستی ءَ پدر کن ایں کہ لکپاس ٹنل ءَ بلوچستان نیشنل پاٹی ءِ سروک ءُ باسکانی سر ءَ ریاستی پورسز ءِ نیمگ ءَ شیلنگ کنگ بیتگ ءُ 250 ءَ گیش ابید جواز ءَ دزگیر کتگ انت-

اختر مینگل ءَ گوشتگ اے ریاستی جبر ءُ پر ایمنیں ءُ آئینی زھرشانی ءِ ھلاس کنگ ءِ یک جھدے –

اختر مینگل ءَ گوشتگ ما اے گپ ءَ تچک کن ایں مئے زرمبشت سرجم ءَ پُر ایمن انت ءُ مئے لوٹ جائز ءُ انسانی ھکانی بنیاد ءَ انت ءُ مئے بنکی لوٹ ایش انت کہ مئے مات ءُ گوھار کہ تو گیرکانونی دزگیر کتگ انت آیاں زوت یل بہ کن ءُ آیانی یل کنگ ءَ ابید ھچ رنگ ءَ گپ ءُ تران نہ بیت ناکہ سدکی ءُ ناکہ دگہ کول ءُ کرار کبول کنگ بیت اِنت-

آئی ءَ گوشتگ باسکانی دزگیری ءُ ریاستی تاکت ءِ کارمرد مئے توار ءَ ایرموش کت نہ کنت ما دنیا ءَ اے کلوہ ءَ دیگ لوٹ ایں کہ بلوچ راج زُلم ءِ دیم ءَ جُک ات نہ کنت ءُ مئے اتھاد ، مئے ستک ءُ مئے کربانی الم اے جد ءُ جھد ءَ منزل ءَ سر کن اَنت-

بی این پی ءِ سروک ءَ گوشتگ ما لوٹ کن ایں کہ دراھیں دزگیر بیتگیں مردم تچک ءَ یل دیگ بہ بنت ءُ مئے جائزیں لوٹ منگ بہ بنت اگاں ناں گڑا جاورانی دراھیں زمہ واری ریاسری ادارھانی سر ءَ بیت اِنت-

بلوچ یکجھتی کمیٹی ءِ رھشون ڈاکٹر صبیحہ بلوچ ءَ چہ جھان ءِ مردم دوست ءُ انسانی ھکانی گلاں گوں لوٹ کتگ ءُ گوشتگ کہ آ ریاست ءِ پاکستان ءِ نیمگ ءَ انسانی ھکانی لگتمالی ءِ بگیری ءَ ھمے زوتاں گامگیج بہ زور انت – زورانسری آوار جنی، درکانودی کوش ءُ بلوچ سیاسی بندیگانی گوم ءَ در انسانی رویشت بنکی انسانی ھکانی لگتمالی ئے –

آئی ءَ گوشتگ کہ اے وھدی ڈاکٹر ماھرنگ بلوچ، سمی دین بلوچ، بیبو بلوچ، بیبگر بلوچ ءُ دگہ سدانی کچ ءَ سیاسی باسک بندیگ انت بلے پدا ھم میان استمانی ھکانی رِد ءَ رویشت دارگ ءِ بدل ءَ انٹلی جنس اداریانی گوشگ ءِ پدا آیانی گوم ءَ در انسانی رویشت دارگ بوگ ءَ انت – ناتوامیں بندیگ بیبرگ بلوچ سرا رستری زوراکی کتگ چریشی ءَ آئی ءِ پاداں گیشتر درد کپتگ – وھدیکہ ڈاکٹر ماھرنگ بلوچ نپسیاتی دلسیاھی ءِ آماچ انت ءُ کمے کچ ءَ ورگ دیگ ءِ سوب ءَ ناجوڈ بوگ ءَ انت، سدانی کچ ءَ بندیگ یکیں کوٹی ءَ بند کنگ بوتگ انت –

آئی ءَ گوشتگ جی اے ریاستی زوراکی ءِ دگہ درور ءِ مُلا برکت ءِ زھگ انس وئیل انت – آ اولسر ءَ چاردہ اکتوبر 2022 ءَ بیگواہ کنگ بوتگ ءُ پدا 22 اکتوبر 2022 ءَ یل کنگ بوتگ – پدا دو اکتوبر 2024 ءَ دوبر آوار جنگ بوتگ – مروچی بیست ءُ ھشت مارچ 2025 ءَ آئی ءِ ژانگولیں جون کیچ ءَ دست کپتگ –

آئی ءَ گوشتگ کہ اے بلوچانی آوار جنی ، لٹ شاپی ءُ درکانودی کوش ءِ یک دگہ درور یے –

ما چہ انسانی ھکانی گل، اقوام متھدہ، میان استمانی برادری ءَ گوں لوٹ کن ایں کہ آ انسانیت ءِ بگیری ءَ برجاھیں اے ناشرکاریاں ھاتر ءَ پاکستان ءَ پہ جوابدھی ءَ بلوٹارین انت – آئی ءِ سرا زور دیگ بہ بیت کہ آ انسانی ھکانی پاسداری ءَ بہ کنت، زورانسری آوار جنی ءَ ھلاس بہ کنت ءُ بلوچ راج ءِ سرا زوراکیاں بند بہ کنت –

آئی ءَ گوشتگ کہ اے بس یک ھندی ءَ نہ انت بلکنہ سرجمیں انسانانی سرا کپتگ میان استمان لوٹ کن ایں کہ زوت گامگیج بہ زور ایت –

روکپتی بلوچستان ءِ بنجاھی شھر زاھدان ءِ اھل سنت ءِ سروک مولانا عبدالحمید ءَ ھوار دگہ عالم دیناں ماں رودراتکی بلوچستان ءَ پاکستانی پوج ءِ دست ءَ دزگیر کنگ بیتگیں زالبولانی دزگیر کنگ ایر جتگ ءُ یل کنگ ءِ لوٹ کتگ-

زاھدان ءِ عالم دین مولانا عبدالحمید اسماعیلزئی ءَ گوشتگ اسلام ءَ نا چوش انت ناکہ بلوچ دود ءَ چوش انت بلوچ دودانی توک ءَ بلوچ زالبول ءِ مزنیں شرپے ھست انت ءُ مروچی مپت ءِ ناھک ءَ بلوچ زالبول گرگ ءُ بندیگ کنگ بیتگ انت کہ اے بلوچانی سر ءَ یک مزنیں زُلمے –

آئی ءَ گوشتگ اے مردم وتی ھک ءَ لوٹ انت ایشاں ھکانی دیگ ءَ ابید آیاں بندیگ اے مزنیں زلمے پاکستان ءِ سرکار زوت بلوچ زالبولاں یل بہ کنت ءُ آیاناں انساپ بہ دنت-

ھمے وڑ دگہ عالم دین ماں نصیر آباد سیستان ءُ بلوچستان ءِ امام جمعہ سرباز نصیر آباد مولوی دوست مھمد رائیسی ءَ ھم بلوچ زالبولانی دزگیری ایر جتگ ءُ آیانی یل کنگ ءِ لوٹ بیتگ انت-

گوستگیں شپ ءَ روکپتی بلوچستان ءِ دگہ میستاں تاھت ءُ دودا پہ ڈاکٹر ماہ رنگ ءَ ھوار بلوچ زالبولانی واستا کنگ بیتگ انت-

دگہ ایشی ءَ ھوار ھوار روکپتی بلوچستان ءِ دگہ جاھاں ڈاکٹر ماہ رنگ ءِ یل دیگ ءِ ھاتر ءَ دیوالانی سر ءَ نویسگ ھم گندگ اتکگ انت-

بلوچستان ءِ تیابدپی شھر گوادر ءَ ترندین تراکے بیتگ کہ چریشی ءَ زمین جکس اتگ-

تراک گوادر ءَ پدی زر ءَ بیتگ-

دمگی مردمانی رد ءَ ناشناسیں مردماں پاکستانی پوج ءِ گاڑی بمبے ءِ نشانگ کتگ-

اھوالانی تراک ءِ زد ءَ اتکگیں گاڑی ءَ سواریں کارندہ مرتگ ءُ زدگ بیتگ انت-

بلے داں انگت ءَ واکداراں اے درگت ءَ دگہ گپ پیش نہ کتگ انت ناکہ دگہ گلاں اے اُرش ءِ زمہ واری ہہ وت زرتگ-

پنجگور ءُ کراچی ءَ بلوچ یکجھتی کمیٹی ءِ نیمگ ءَ چہ روانک کشگ بیتگ، ھزرانی کچ ءَ راج ءَ بھر زرتگ-

بلوچ یکجھتی کمیٹی ءِ نیمگ برجم بیتگیں خدابادان ءَ ڈاکٹر ماہ رنگ بلوچ، بیبو بلوچ، سمی دین بلوچ ءُ دگرانی یل کنائینگ ھاتر ءَ زھرشانی ئیں روانک کشگ بیتگ-

روانک مواچھ بازار ءَ بندات بیتگ بُنجاھی شھدگ ءَ سر بیتگ، اود ءَ زھرشانی کنوکاں بیگواھیں مردمانی یل کنائینگ لوٹ کتگ-

اے زھرشانی ءَ زالبول ءُ زھگاں ھم بھر زرتگ-

آیاں گْوشتگ کہ ریاست زالبول نشانگ کتگ ءُ آ دزگیر کتگ اَنت، کہ اشی ءِ پروش وارگ تچکیں منانکے- اگاں مروچی ما اے زوراکی ءِ ھلاپ ءَ گھگیری نہ کن ایں، گُڑا باندا گیش ایردستیں بلوچاں آزارجاھاں بند کنت- آیاں گْوشتگ کہ ھمے وڑ ریاست شال ءَ یکشل زوراکی ءُ لَٹ ءُ کُٹ کنگ ءَ اِنت، آ کابل ایرجنگ اِنت- ما تچک کنگ لوٹ ایں دانکہ مئے سروک یل کنگ نہ بنت آیانی سر ءَ دروگیں ایف آئی آر ھلاس کنگ نہ بنت، ما وتی جُھد ءَ برجاہ دار ایں-

دومی نیمگ ءَ بلوچ یکجھتی کمیٹی نیمگ ءَ چہ کراچی ءِ دمگ کاٹھور ءَ بلوچ راھشونانی دزگیری ءُ ریاستی زوراکی ءِ ھلاپ ءَ یک زھرشانی روانکے کشگ بیتگ کہ آئی ءِ تہ ءَ زالبول ءُ زھگاں مزنیں کچے ءَ بھر زرتگ-

بلوچستان ءِ دمگ چہ کیچ ءَ پاکستانی پوج ءِ دست ءَ بیگواھیں مردم ءِ لاش دزکپتگ-

آئی ءِ پجار انس برکت ءِ نام ءَ زانگ بیتگ –

اھوالانی رد ءَ کیچ کور ءَ دمگی مردماں یک لاشے دیستگ ءُ آیاں پولیس ھال داتگ-

ورنا ءِ بنکی سیادی زامران ءَ انت آ 2 اکتوبر 2024 پاکستانی فورسز ءَ تربت سنگانج سر چلو ءَ دزگیر کنگ بیتگ ءُ پد ءَ آئی ءِ لاش دزکپتگ-

زانگ بہ بیت زورانسری بیگواھیں مردمانی اے وھد ءَ سدانی کچ ءَ ورنایانی ژانگولیں لاش دزکپتگ انت-

دومی نیمگ ءَ بیگواھیں مردمانی یل کنگ ءِ ھاتر ءَ بلوچستان ءَ گوستگیں یک دھکے ءَ پُر ایمنیں زھرشانی برجاہ انت-

سردار اختر جان مینگل ءِ سروکی ءَ وڈھ ءَ تاں شال لانگ مارچ برجاہ ءَ اِنت- مارچ ءِ راہ سر ءَ کنٹینرز ءُ دگہ اڑان اوشارینتگ وھدے کہ ھُزدار ءَ ھوار سرجمیں بلوچستان ءَ انٹرنیٹ آسراتی بند اَنت-

لانگ مارچ ءَ ھواریں مردماں اڑاناں گوازینان ءَ ھُزدار شھر ءَ سر بیتگ اَنت اود ءَ سردار اختر مینگل ءُ دگہ مردماں تران کتگ-

سردار اختر مینگل ءَ گْوشتگ کہ مروچی مئے دراھگ مکسد ھچ کس ءَ چہ چیری گپے نہ اِنت، ریاست، ریاستی کارندہ، ادارہ، وزیر ءُ وتگڑیں ھکومتاں یک وھدے مئے ورنایانی چست کنگ بندات کتگ، من توار پر جتگ، بازیں پارٹیانی گور ءَ شتگ آں بیا اِنت یکجاہ بہ ایں اشاں دار ایں کہ چُش مہ بیت یکروچے اشانی دست مئے زالبولانی گشان ءَ سر بہ بنت-

آئی ءَ گْوشتگ کہ مئے ورنا مُھر نہ بیتگ اَنت، کماشانی دستار ھمے دگانی سر ءَ دور اش داتگ اَنت بلے ما چمّ جھل کتگ اَنت- مروچی ماہ رنگ، سمی دین محمد یک زالبولے نہ اَنت بلکیں بلوچستان ءِ شرپ اَنت، اشانی سیادی یک دمگے ءَ نہ اَنت بلکیں بلوچستان ءَ اَنت-

اختر مینگل ءَ گْوشتگ کہ زالبول ءُ چکاں دزگیر کنگ ءَ ھکومت ناشرکاری ءِ ھلاس کنگ ٹاہ ءَ جنت، جنگ کنگی اِنت گڑا کوھاں برو جنگ بکن، مردمانی بچّ بلوچ ورنا اود ءَ نشتگ اَنت اود ءِ روگ ءَ اھمت نیست پرچاکہ اود ءِ روگ ءَ شمئے جنین شمارا روگ ءِ اجازت ندے اَنت، اود ءَ شمئے شلوار ترّ بنت-

آئی ءَ گْوشتگ کہ شمئے زور تھنا زالبول ءُ چکانی سر ءَ بیت، بلوچستان ءِ ورنا اود ءَ نشتگ اَنت آ شمارا پسّہ دات کن اَنت-

سردار اختر مینگل ءَ گْوشتگ کہ مارا ایمنی زھرشانی ءِ اجازت نہ رس اِیت، وتی شھیدانی واستا دو ترمپ ارس ریچگ اجازت نہ رس اِیت، مئے ازت لگتمال کنگ بیگ ءَ اَنت گُڑا شمئے ھکومت مئے کجام درد دوا اِنت-

بلوچستان نیشنل پارٹی ءِ سروک سردار اختر جان مینگل ءَ گْوشتگ کہ کنٹینر مئے راہ ءَ بند کُت نہ کن اَنت۔ مرچی بلوچ راج دگنیا ءَ پیش دار ایت کہ بلوچ زالبول ءُ زھگاں تنگ کنگ ءِ بزانت چی اِنت؟

سردار اختر مینگل ءَ وڈھ تاں شال ءَ لانگ مارچ ءِ بندات ءَ پیسر سوشل نیٹ ورکنگ سائٹ ءِ سر ءَ پوسٹ کنان ءَ گوشت کہ پرامن لانگ مارچ ءِ مئے ھمستکی ءَ ابید مئے توار ءِ ایرموش ءِ کوشست ءَ خضدار ءَ چہ شال ءَ روگ ءِ راہ ءُُ درستیں مزنیں دروازگ گوں کنٹینراں بند کنگ بوتگ انت۔ بلے بزان اِت کہ انشاءاللہ ھچ وڑیں کنٹینر مارا داشت نہ کنت۔

اختر جان مینگل ءَ گوشت کہ مرچی بلوچ راج تپاک بیت ءُ دگنیا ءَ را پیش دار ایت کہ مئے زالبول ءُ زھگ تنگ کنگ بنت گڑا ایشی ءِ بزانت چی اِنت۔ ما دپ ءَ نہ بندیں ءُ نہ نندیں۔

زانگ بہ بیت سرجمیں بلوچستان ءَ انٹرنیٹ سروس بند کنگ بیتگ۔ کوئٹہ، خضدار، نوشکی ءُ اے دگہ شھراں انٹرنیٹ سروس ءِ بند کنگ ءَ ھوار موبائل سگنل ءِ سر ءَ بندش جنئگ بوتگ۔

بلوچ راجی آجوئی سنگر ( براس ) ءِ جارکش بلوچ خان ءَ گْوشتگ کہ مئے سرمچارانی نیمگ ءَ چہ زورگریں پاکستانی پوج، آئی ءِ جھلی پوج، مڈی بروکیں گاڑی ءُ پوجی شوربندیانی سر ءَ مھکم ءُ یکشلیں اُرش برجاہ ءَ اَنت- اے اُرش بیست ھپت مارچ نوزدہ سد چل ھشت ءِ اے سیاھیں روچ درگت ءَ چہ کنگ بیگ ءَ اِنت وھدے پاکستانی پوج ءَ پہ تاکت ءَ بلوچستان دستیگ کتگ-

اُرشانی بندات گوستگیں روچ ءَ کتگ، ءُ تنی وھدے براس سرمچاراں سرجمیں بلوچستان ءَ چل ھشت ءَ چہ گیش کاروائی کتگ- اے کاروائیانی میان ءَ زورگریں پوج ءُ چیریں ادارھانی بازیں کارندھے کشتگ، وھدے کہ پاکستانی چلی پوج ءِ بازیں چوکی یے دستیگ کتگ اَنت-

اُرشانی درچ تنی وھدے برجاہ ءَ اَنت، اے درگت ءَ چہ گیشیں سرپدیاں زوت رسانکدر ءَ شنگ کن ایں-