TBP Balochi

بلوچستان ءَ زھرشانیانی درچ برجاہ انت، دومی نیمگ ءَ سرکار ھم درنگاز کنوکاں یکشل ءَ دزگیر کنگ ءَ انت، وھدیکہ انٹرنیٹ بند کنگ بوتگ –

بلوچ یکجھتی کمیٹی ءِ جار ءِ پد ءَ ڈاکٹر ماھرنگ ءُ ایندگہ باسکانی دزگیری ءِ بگیری ءَ مروچی بیست ءُ ھپت مارچ ءَ اُتل ءُ بلوچستان ءِ دگہ ھند ءُ دمگاں زھرشانی کنگ بوتگ، کہ لس مھلوک ءَ ریاستی زوراکیانی بگیری ءَ توار چست کتگ –

اُتل ءَ مروچی بوتگیں زھرشانی ءَ مردماں بینر ءُ پلے کارڈ دست ءَ بوتگ انت کہ آیانی سرا زورانسری آوار جنی ءُ ریاستی زوراکیانی بگیری ءَ نارہ نبشتہ بوتگ انت – ترانکاراں تران کنان ءَ ڈاکٹر ماھرنک بلوچ ءُ ایندگہ باسکانی یل کنگ ءِ لوٹ کتگ ءُ بلوچستان ءَ انسانی ھکانی لگتمالی ترندی ءَ گوں ایر جتگ –

ھمے زھرشانی درچ ءِ برجاہ داران ءَ باندا بیست ءُ ھشت مارچ ءَ ماں کراچی کاٹھور ءُ ملیرءَ ھم زھرشانی کنگ بیت انت – بلوچ یکجھتی کمیٹی ءَ ھر تک ءُ پھناتاں سیادی داروکیں مردماں گوں لٹ کتگ کہ بھر بہ زور انت –

تربت ءَ بلوچ یکجھتی کمیٹی ءِ نیمگ ءَ ماں شال ءَ نمیران بوتگیں سنگتانی یات ءَ کینڈل واک کنگ بوتگ ءُ شھید پدا چار راہ ءَ موم بتی روک کنگ بوتگ –

بی وائی سی کیچءِ رھشوناں ماں شال ءَ پولیس ءِ تیر گواری ءَ نمیران بوتگیں ورنا دروت ندر کتگ انت ءُ ایانی اکسانی دیم ءَ موم بتی روک کتگ –

ھمے وھد ءَ رھشوناں نمیران یات کتگ ءُ گوشتگ کہ نمیرانیں سراں ھما منگھیں مولانی ھاتر ءَ وتی جانانی دیمونی داتگ بی وائی سی ھر یک باسکے ھما مولانی ھاتر ءَ جھد کنان کنت – آیاں گوشتگ کہ ڈاکٹر ماھرنگ ءِ دزگیری، سمی دین ءِ لٹ شاپ کنگ ءُ آئی ءِ دزگیر کنگ ءَ بی وائی سی ءِ پرایمنیں جھد نزور نہ بیت بلکنہ وتی رھشونانی دزگیری ءَ وتی سیاست ءِ تاکت جوڈ کنت ءُ جھد ءَ گیش کنت –

آیاں گوشتگ کہ میان استمانی انسانی ھکانی ادارہ ڈاکٹر ماھرنگ، سمی دین، بیبو بلوچ ءُ بی وائی سی ءِ رھشونانی یل کنائینگ ءَتوار چست بہ کنت پرچاکہ آیاں راجی ھکانی ھاتر ےَ توار چست کتگ ھمے ھاتر ءَ دزگیر کنگ بوتگ ءُ لٹ شاپ کنگ بوتگ انت –

بلوچ یکجھتی کمیٹی شال ھنکین ءَ وتی درشان ءِ تہ ءَ گوشتگ کہ ڈاکٹر ماھرنگ، سمی دین، بیبگر بلوچ ایندگہ دزگیریں باسک ءُ بیگواھیں مردمانی یل کنگ ءِ لوٹ ءَ کنت ءُ آئی ءَ سھب ءِ ادار یازدہ ءَ زھرشانی ءِ جار جتگ بوتگ بلے پدا ھم ریاست ءَ یکبرے پدا وت ءَ پدر کتگ کہ آ بلوچ راج ءِ پرایمنیں زھرشانیاں اوپار کت نہ کنت –

آئی ءَ گوشتگ کہ شال ءِ ڈی سی ءِ موکل دیگ ءَ ابید ھم پریس کلب دیم انگر ءَ بوتگ، مزنیں کچے ءَ پولیس ءَ ھمے جاہ انگر ءَ کتگ درنگاز کنوک مچ بوگ ءَ نہ اشتگ انت ءُ دزگیر کتگ انت –

آئی ءَ گوشتگ کہ اے جتائیں کار ءِ نہ ایں گوستگیں لھتے روچ بیت ریاست ءَ سرجمیں بلوچستان ءَ ناشری کنگ ءَ انت – مزنیں کچے ءَ مردمانی دزگیری، کوش، لٹ شاپی ءُ زالبولانی سرا زوراکی کنگ بوگ ءَ انت –

بلے کریک ڈاؤن ھمنچو زوراک بہ بیت مئے گھگیری ءَ ایرموش کت نہ کنت، ھک ءِ جھد برجاہ انت ءُ ما ھر یک بلوچے ءَ گوں لوٹ کن ایں کہ پاد بہ ایت – ھنو نہ بیت گڈا کدی؟ ڈن ءَ در بیا ات، توار چست بہ کن ایت، گھگیری کن ایت –

دومی نیمگ ءَ کوہ سلیمان تونسہ شریف ءَ پولیس ءَ پرایمنیں زھرشانی روانک ءِ سرا بیڑ برتگ – درنگاز کنوک لٹ شاپ کتگ ءُ دزگیر کتگ انت کہ آیانی تہ ءَ زالبول ھم ھوار بوتگ انت –

بی وائی سی ءَ گوشتگ کہ تونسہ پولیس دزگیر کتگیں درنگاز کنوکاں یل بہ کنت اگاں ناں سرجمیں ڈیرہ غازی خان ترندیں زھرشانی ءِ جار ءَ پرین ایں –

بلوچ رھشون ڈاکٹر ماھرنگ بلوچ ءِ گھار ءَ چاگردی ترامجاہ ءَ نبشتگ کہ من ءَ تُرس انت کہ آ بندیگ جاہ ءَ مازگی زور ءِ آماچ انت- آ ناجوڑ انت، گوستگیں سَے روچ انت کہ ڈاکٹراں آئی ءِ کرا رؤگ ءَ نیلگ ءَ انت –

نادیہ بلوچ ءِ رِد ءَ گوستگیں شپ ءَ آ سک باز نادراہ بوتگ ءُ دلے ریتکگ – پد ءَ مرچی سھب ءَ یک ڈاکٹرے لوٹارینتگ بلے درمان دیگ نہ بوتگ – من ءَ تُرس انت کہ پہ زور ھمے وڑ کنگ بوگ ءَ انت چریشی ءَ آ ناجوڑ بوگ ءَ انت ءُ من ءَ تُرس انت کہ آئی ءِ ورگ ھم ھرابین انت –

آئی ءَ گوشتگ کہ مروچی سھب ءَ کہ من آئی ءِ دچار کپگ ءَ شُتگاں گڑا منی گھار اقراء نشتگ ات ءُ من بس کمے ملٹ ءَ آئی ءَ دچار کپاں – آ سک باز نزور، نادراہ گندگ ءَ اتکگ –

ایشی ءَ ابید مھرنگ ھر رند ءَ کیمرہ، بستر، ورگ ءِ کمی، سیاسی بندیگی ءِ ھساب ءَ وتی ھکانی لگتمالی شکایت کتگ –

آئی ءَ گوشتگ کہ اے جیڑھاں ابید ھم آ مھکم انت – بلے آ نادراہ انت، مارا جان ءِ تُرس انت – شال ءَ مروچی انٹر نیٹ بند کنگ بوتگ تاکہ ما آئی ءِ توار بُرز کت مہ کن ایں –

من چہ شما درساں لوٹ کناں کہ آئی ءِ ءُ درسیں بلوچ بندیگانی ھاتر ءَ وتی توار ءَ چست بہ کن ات-

پاکستانی پوج ءِ نیمگ ءَ بلوچ یکجھتی کمیٹی ءِ رھشونانی ھلاپ ءَ کریک ڈاؤن برجاہ انت – دگہ دو زالبولیں باسک پاکستانی پوج ءَ دزگیر کتگ انت-

بلوچ یکجھتی کمیٹی ءِ رد ءَ مئے دگہ دو زالبولیں باسک ماہ زیب بلوچ ءُ پوزیہ بلوچ اوتھل ءِ زھرشانی ءَ واتر آیگ ءَ گڈانی کراس ءَ پورسز ءَ دزگیر کتگ انت-

آئی ءَ گوشتگ زالبولیں باسکاں ریاست ءِ نیمگ ءَ نشانگ کنگ آئی ءِ بے وسی ءِ منانک ءَ پدر کنت اِنت بلے بلوچستان سابت کدم انت ھمک دزگیری مئے ازم ءَ مھکم کنت ءُ زلم ناں پاکستان ءِ زُلم ھلاس بیت اِنت-

بلوچستان ءِ جتا جتائیں جاھاں مروچی دومی روچ ءَ دگانی بندگ ےُ پورسز ءِ سر ءَ اُرش برجاہ انت-

مروچی کلات ٹول پلازہ ءِ نزیک ءَ ناشناسین مردماں پاکستانی پوج بمب اُرشے ءِ نشانگ کگگ، ھاران ءَ ڈپٹی کمشنر ءِ کارگس ءِ سر ءَ اُرش، ھمے وڑ تربت ءَ نیوی ءِ بنجل ناشناساں نشانگ کتگ-

ھمے وڑ ءَ کیچ ءِ دمگ دشت ءَ پاکستانی پوج نشانگ کنگ بیتگ، کولواہ، پسنی ءُ جیوانی ءَ ھم تراکانی توار اشکنگ بیتگ انت-

ھمے وڑ بارکھان ءَ ناشناسیں مردماں گوزوکیں بازین اداراں رکھنی ءِ ھند ءَ ناکہ بندی کتگ ءُ گشت کنگ ءَ اَنت-

ھمے وڑ ءَ پاکستانی پورسز ءِ سر ءَ اُرش ءُ پولیس ءِ کارگس ماندارگ ءُ سلاھ ءُ سامانی دستیگ کنگ ءِ ھال انت-

ھمے وڑ واپاری شھر ھب ءَ ناشناسیں مردماں سٹی تھانہ ءَ دزبمبے چگل داتگ –

زانگ بہ بیت بلوچستان ءَ اُرشانی درچ برجاہ انت ءُ گوستگیں بیگاہ ءَ بندات بیتگیں اَرش برجاہ انت- اے اُرشانی زمہ واری انگت ءَ کس ءَ پہ وت نہ زرتگ انت ءُ ھمے وڑ پاکستان ءِ سروزیر شھباز ءُ بلوچستان ءِ سروزیر سرفراز بگٹی ءَ اُرش ایر جتگ انت-

بلوچستان ءِ دمگ صحبت پور ءَ تیرگواری ءِ وئیل ءَ یکیں کھول ھپت مردم کُشگ بیتگ اَنت-

پولیس رِد ءَ تھانہ آر ڈی 238 ءِ سیمسر ءَ بیتگ، اود ءَ سلاہ بندیں مردماں یک کُڈک دروشمیں لوگے ءِ سر ءَ اُرش کتگ-

پولیس رِد ءَ کُشگ بیتگینانی تہ ءَ لوگ سروک، آئی ءِ لوگ بانُک چار بچکیں چُک ءُ یک جنوکے یے ھوار اِنت، بیران بیتگیں چکانی اُمر یک سالے ءَ چہ پانزدہ سال ءِ میان ءَ گوشگ بیگ ءَ اِنت-

پولیس رِد ءَ تیرگواری ءَ پد سلاہ بنداں لوگ ھم مانداشتگ، چریشی ءَ سرجمیں کُڈکیں دروشمیں لوگ سُتکگ ءُ پُر بیتگ-

کُشگ بیتگیں کھول دمگی زمیندارانی زمین سر ءَ دھکانکاری کار ءَ بیتگ، ءُ بنداتی ھالانی رِد ءَ کشت ءُ کشاری زمینی جیڑھے زانگ بیت-

اے وئیل شپ ءِ کساس ساھت سے ءَ بیتگ، وھدے کہ اسرمندیں کھول وتی لوگ ءَ ساڑی بیتگ اَنت، پولیس ءَ دمگ انگر ءَ کتگ پٹ ءُ پول بندات کتگ-

شال ءِ دمگ ڈبل روڈ “دگ” پولیس موباھل ءِ نزیک بمب تراکے ءِ آسر ءَ دو مردم بیران ءُ چار پولیس کارمنداں ھوار ھپدہ مردم ٹپی بیتگ اَنت-

ٹپی سول ھسپتال ءِ ٹراما سینٹر ءَ برگ بیتگ اَنت-

ریسکیو واکدار گوشگ اِنت بمب تراک ءَ چہ پولیس ءِ یک گاڑی ءَ تاوان رس اِتگ وھدے کہ یک پرپٹے ءَ آس کپتگ-

زانگ بہ بیت گوستگیں شپ ءَ چہ سرجمیں بلوچستان ءَ پاکستانی پوج ءُ پولیس ءُ لیویز سر ءَ اُرشاں ھوار بلوچستان ءِ جتاجتائیں دمگاں راھانی بندگ ءِ ھال دزکپتگ اَنت-

اے اُرش یک انچیں وھدے ءَ دیم ءَ اَتکگ اود ءَ بلوچ راج دوستانی گوشگ اِنت بیست ھپت مارچ ءَ پاکستانی پوج ءَ پہ تاکت بلوچستان دستیگ کتگ-

بلوچستان ءَ اے وڑیں روچاں گیشتر پوج سر ءَ بیتگیں اُرشاں گیشتر گندگ اَتکگ اَنت-

گوستگیں سال بیست شش اگست ءَ بی ایل اے ءِ نیمگ ءَ چہ آپریشن ھیروف بندات کتگ کہ اود ءَ سرجمیں بلوچستان ءَ پوج ءِ سر ءَ اُرش ءُ راہ بندگ بیتگ اَنت-

دومی نیمگ ءَ ھال اِنت کہ ناشناسیں مردماں نوشکی ءَ کشینگی ءِ ھند سر ءَ پاکستانی پوج ءِ چوکی اُرش ءِ نشانگ کتگ-

ھمے وڑ کلات ءَ ٹول پلازہ ءِ نزیک ءَ پاکستانی پوج ءِ گاڑی بمب اُرش ءِ نشانگ کنگ بیتگ ءُ جانی تاوان ءِ گمان-

ھاران ءَ ڈپٹی کمشنر ءِ کارگس ءِ سر ءَ دستی بمب اُرشے بیتگ-

ھمے وڑ تربت ءَ پاکستانی نیوی ءِ سر پھازوکی چوکیانی سر ءَ سلاہ بندیں مردماں اُرش ءِ نشانگ کتگ –

دشت کھڈان ءَ پاکستانی پوج ءِ کاروان سلاہ بندیں مردماں اُرش ءِ نشانگ کتگ زانگ بہ بیت گوستگیں شپ ءَ دشت کھڈان ءِ بُنجل ھم سلاہ بندیں مردماں اُرش ءِ نشانگ کتگ اَت-

تنی وھدے اے اُرشانی زمہ واری انگت ھچ گل ءَ نہ زرتگ اَنت-

سرجمیں بلوچستان ءَ مزنیں شھدگانی سر ءَ سلاہ بندیں مردماں بستگ اَنت ءُ تیرگواری ءَ چہ سی ٹی ڈی ءِ آفیسر ءَ ھوار شش مردم کُشگ بیتگ اَنت-

مستونگ ءِ دمگ چوتو ءِ ھند سر ءَ راہ بندگ میان ءَ تیرگواری ءَ چہ سی ٹی ڈی ءِ کارندہ اے ایس آئی جاوید لھڑی بیران وھدے کہ یک سی ٹی ڈی ءِ کارندہ حبیب ٹپی بیتگ-

وھدے کہ مستونگ ءِ دمگ کاریز امان اللہ ءِ ھند سر ءَ سلاہ بندیں مردماں لیویز چیک پوسٹ سر ءَ اُرش کتگ یک گاڑی یے مانداشتگ-

دومی نیمگ ءَ گوادر ڈپٹی کمشنر ءِ رِد ءَ چہ گوادر ءَ کساس یک سد پنجاہ کلومیٹر ءَ دیر اورماڑہ نزیک ءَ کلمت ھند سر ءَ راہ بندگ ءِ میان ءَ گوادر ءَ چہ کراچی رؤکیں بس ءَ چہ ھپت مردم ایر گپتگ – سلاہ بندیں مردماں پنچ مردم تیر جتگ ءُ کُشتگ اَنت یکے ٹپی کتگ- وھدے کہ سلاہ بنداں یک گاڑی یے ھم مانداشتگ-

زانگ بہ بیت چارشمبے ءَ بولان، مستونگ، کیچ، کلات، ھاران، پنجگور ءُ گوادر ءَ ھوار جتاجتائیں دمگاں مزنیں شھدگانی سر ءَ بندگ ءُ گاڑی پٹ ءُ پول کتگ اَنت-

اے میان ءَ جتاجتائیں دمگاں چہ پاکستانی پوج سر ءَ اُرشانی ھال ھم سر بیتگ-

بلوچستان ءِ بازیں ھند ءُ دمگے ءَ سلاہ بندانی نیمگ ءَ پاکستانی پوج ءِ سرا اُرش بندات کنگ بوتگ انت، وھدیکہ بازیں شھدگ بند کنگ بوتگ انت اُرشانی ھال انت –

سرجمیں ھال جھلا نبشتہ انت:

کوسٹل ہائی وے N10:

گوادر ءُ اورماڑہ ءَ سلاہ بندیں مردماں شاھدگ بند کتگ، چریشی ءَ بازیں گاڑی ءِ اوشتوک بوتگ ءُ سلاہ بندیں مردماں بلوچستان ءِ بیرک بڈا بوتگ ءُ ھمودا ساڑی بوتگ انت –

بازیں اداراں شاھدگ بند بوتگ ءُ ھمے میان ءَ شش مردم پجار کارڈ ءِ چارگ ءَ پد کُشگ بوتگ انت وھدیکہ آیانی سَے ھمراہ یل کنگ بوتگ –

ریجنل کارپوریشن ڈویلپمنٹ RCD ہائی وے N25:

مستونگ ءِ دمگ ژلی ءَ سلاہ بندیں مردماں اے دگ بند کتگ، کہ اودا سلاہ بنداں اسٹریٹجک ھند گپتگ ءُ نشتگ انت –

سند بلوچستان ہائی وے N65:

بولان ءِ دمگ کولپور ءَ سلاہ بنداں دگ بند کتگ – دمگی مردمانی رِد ءَ آیاں ٹیکٹر ءِ گون ءُ دگ ءَ پروشگ انت ءُ گیشتر تاوان دیگ ءَ انت –

ھمے وڈ چہ پنجگور ءَ ھمے ھال آیگ ءَ انت کہ سلاہ بندیں مردماں سرادوک ءَ سی پیک دگ بستگ – وھدیکہ سلاہ بندیں مردماں سبدان کراس ءَ دگ بستگ ءُ پٹ ءُ پول کنگ ءَ انت –

مستونگ ءَ ترندیں اُرش:

مستونگ ءِ دمگ شال تاں کراچی شھدگ ءِ سرا پاکستانی پوج ءُ سلاہ بندیں مردمانی میان ءَ ترندیں میڑ، وھدیکہ بازار ءِ نادراھجاہ ءَ ایمرجنسی کنگ بوتگ –

سلاہ بندیں مردماں اے شھدگ ءِ سرا سَے جاہ ءَ ژلی ، کھڈکوچہ ءُ کلی کلی چوتو سنگر گپتگ ءُ نشتگ ءُ ادا گاڑیانی ھم پٹ پول کنگ بوگ ءَ انت –

چہ مستونگ ءَ اے ھال ھم آیگ ءَ انت کہ سی ٹی ڈی ءِ اے ایس آئی مُرتگ ءُ یک پولیس کارمندے زدگ بوتگ –

‏مستونگ ءَ کاریز امان اللہ لیویز پانگس ءِ سرا ھم سلاہ بنداں اُرش کتگ ءُ لیویز گاڑی مانداشتگ –

پوجی بنجلانی سر ءَ اُرش:

سلاہ بندیں مردماں کیچ ءِ دمگ سامی ءَ پاکستانی پوج ءِ بنجاھی بنجل ءِ سرا اُرش کتگ، کہ اودا بازیں تیر ءُ تراکانی توار اشکنگ بوتگ، ھمے وڈ ڈیرہ مراد جمالی، سبی ءُ مند ءُ دگہ دمگاں ھم اُرشانی ھال انت –
چہ مند ءَ ھمے ھال آیگ ءَ انت کہ سلاہ بندیں مردماں پاکستانی پوج ءِ بنجاھی بنجل ءِ سرا اُرش کتگ، اُرش ءَ ادارے ءَ پد تراک ءِ ھم توار اشکنگ بوتگ –

چہ گوادر ءَ ھمے ھال آیگ ءَ انت کہ سلاہ بندیں مردماں بالی پٹ دگ ءَ گریڈ ءِ سرا برجاھیں پوجی پانگس ءِ سرا ھم اُرش کتگ –

تربت ءَ پوجی کارگس ءِ سرا اُرش:

مزنیں کچے ءَ سلاہ بندیں مردماں تربت بازار ءَ پاکستانی پوج ءںبنجاھی کارگس ءُ ملٹری انٹیلی جنس کارگس ءِ سرا اُرش کتگ –

دمگی ھالانی رِد ءَ مزنیں کچے ءَ تیر ءُ تراکانی توار اشکنگ بوتگ – ءُ اے ھم ھال آیگ ءَ انت کہ پوجی بنجل ءِ تہ ءَ دُت ءُ آس ھم روک بوتگ –

چہ ھاران ءَ ھمے ھال آیگ ءَ انت کہ سلاہ بندیں مردماں دگ بستگ ءُ چہ دمگ ءَ تراکانی توار ھم اشکنگ بوتگ –

دگ بندی ءُ پٹ پول ءِ درچ برجاہ:

بازیں ھند ءُ دمگاں سلاہ بندیں مردماں دگ بندی کتگ ءُ پٹ پولی ءِ درچ برجاہ انت – ژلی، کولپور ءُ شیخ واصل ءَ سلاہ بندیں مردماں گاڑیانی پٹ ءُ پول کتگ – اشی ءَ ابید ڈیرہ مراد جمالی ءَ مادن بروکیں گاڑی ھم نشانگ کتگ انت –

سلاہ بندیں مردماں کلات ءِ دمگ منگچر ءُ مھلبی ءَ ھم دگ بستگ ءُ پٹ ءُ پول کنگ ءَ انت –

نوکتریں ھالانی رِد ءَ سبی کرمو وڈ ءَ سلاہ بندیں مردماں پاکستانی پوج ءِ سرا اُرش کتگ، وھدیکہ تربت ءَ بازیں جاھاں تراک ءُ سلاہ بندانی ترءُ تاب برجاہ انت –

دومی نیمگ ءَ راجن پور ءِ دمگ روجھان ءَ چہ سوئی پنجاپ ءَ روکیں گیس پائپ سرا آئی ای ڈی اُرش کنگ بوتگ ءُ چریشی ءَ پیپ تباہ بوتگ –

بلوچستان ءِ بنجاھی شھر شال ءَ سر بیتگیں اھوالانی رد ءَ دمگی اھوالکار مھمد عثمان دزگیر کنگ ءَ پد بیگواہ-

آئی ءِ پت ءَ وئیل ءِ ھال راست کنان ءَ گوشتگ منی چک سرکاری پوشاکاں ناشناسیں سلاہ بنداں چِست کتگ-

زانگ بہ بیت ایشی ءَ پیش ھمے اھوالکار ءِ لوگ ءِ سر ءَ پاکستانی پوج ءِ نیمگ ءَ بیڑ ءُ آ ترسینگ ءِ وئیل دیم ءَ اتکگ انت-

بلوچستان ءِ دمگ ڈیرہ مراد جمالی ءُ سبی ءُ مستونگ راہ بندگ، مڈی بروک ٹرکانی سر ءَ اُرش-

گیشیں ھالانی رِد ءَ ڈیرہ مراد جمالی ءَ سلاہ بندیں مردماں بازیں کلاکاں چہ راہ بستگ- ھمے ھند سر ءَ مڈی بروکیں گاڑی ھم اُرش ءِ نشانگ کتگ اَنت-

اِھوالکار رِد ءَ اے میان ءَ پاکستانی پوج ھم نشانگ کنگ بیتگ بلے تاوانانی درگت ءَ واکدار درشان شنگ نہ بیتگ-

دومی نیمگ ءَ چہ سبی ءَ ھال اِنت کہ کرمو وڈ ھند سر ءَ سلاہ بندیں مردماں پاکستانی پوج اُرش ءِ نشانگ کتگ-

ھمے وڑ مستونگ ژلی ءُ بلوچستان ھوٹل ھند سر ءَ سلاہ بندیں مردمانی مزنیں کچے ءَ راہ بستگ پٹ ءُ پول کنگ ءَ اَنت-

بولان ءِ جتاجتائیں ھندانی سر ءَ شال سبی شھدگ سر ءَ سلاہ بندیں مردماں بستگ ءُ گاڑیاں پٹ ءُ پول کنگ ءَ اَنت-

ھمے وڑ کیچ ءِ دمگ سامی ءَ پاکستانی پوج ءِ بُنجاھی بُنجل سلاہ بنداں اُرش ءِ نشانگ کتگ، بازیں تراکانی ھمراھی ءَ تُرندیں تیرگواری توار اش کنگ بیتگ-

زانگ بہ بیت کیچ ءِ بازیں دمگاں سلاہ بندیں مردمانی دستیگ اِنت-