ریاست ءِ سرپرستی ءَ جوڑ کرتگیں ناروائی
ٹی بی پی شونگال
بلوچستان ءَ سیاسی گھگیری ءُ آجوئی ءِ زرمبشت ءَ ایرموش کنگ ءَ ریاستی ادارھاں زوراکی ءُ ناروائی ءِ بنجاھی گامگیج جنزینتگ – چرے پالیسی ءِ آسر ءَ ریاست ءِ چیردستی ءَ ھنچیں سلاہ بندیں ٹولی دیم ءَ آرگ بیتگ انت کہ آیاں بلوچ چاگرد ءَ ترس، بھر ءُ بانگی ءُ بے ستکی ود اتگ- چریشاں یک نامی ئیں چھرگے شفیق مینگل ءُ آئی ءِ برات عطاالرھمان ءَ انت چُش گمانی رنگ ءَ ھزدار ءُ کش ءُ گوری دمگاں ھستیں ڈیتھ اسکواڈ ءِ سروکی ءَ بندوک انت – ھمے زوتاں عطاالرھمان ءِ کوش ءِ زمہ واری بلوچ لبریشن آرمی ءَ من اتگ، چریشی ءَ پد بنگپ دوبر مھلوک ءِ دلگوشی ءِ بنگپ جوڑ بیتگ-
2008 ءَ پد وھدیکہ بلوچ گھگیری زرمبشت وتی زور ءَ اتکگ گڑا ریاستی ادارھاں ایشی ءِ پروشگ ءَ ڈیتھ اسکواڈ ءِ ڈولیں ٹولی کارمرد کتگ انت – اے ٹولیانی سر ءَ انسانی ھکانی لگتمالی ءِ سنگینیں بھتام ھست انت، چریشاں زورانسری بیگواھی، درکانودی کوش، آوار جنی لب ملامی، نیکراھی ناشرکاری ءِ دیم ءَ جنزینگ، زر ءِ گرگ، ءُ زمیناں زور پچگرگ ءِ وڑیں جرم ھوار انت- ھزدار ءَ ھستیں شفیق مینگل ءِ ٹولی ءِ اے دراھیں پرکاریاں جوڑینگ بیتگ، چریشی ءَ آئی ءِ برات عطاالرھمان ءِ کرد بازیں رنداں رپورٹسانی سرھال بیتگ-
ھمے بھتامانی تَک ءَ 2014 ءَ توتک ءِ ھند ءَ یک مُچانکی گورے دزکپتگ کہ اود ءَ 140 ءَ گیش ژانگول کتگیں لاش دزکپتگ انت- اگاں اے لاشانی پجار سرجمی نہ بیتگ بلے بازیں زانتکار ءُ انسانی ھکانی ادارھاں اے ویل ریاستی سرپرستی ءَ بیوکیں ناروائیانی بھر لیکگ ءَ انت- پارلیمنٹ ءِ توک ءَ اے ٹولی ءِ سر ءَ لنکک چِست بوگ ءَ انت، بلے ایشی ءَ گمانی رنگ ءَ ریاستی پالیسی ءِ بھر بوگ ءَ ایشی ءِ سر ءَ ھچ کانون ءِ دست ءَ نہ کپتگ-
اے گپ ریکارڈ ءَ ھست انت کہ عطاالرھمان ءُ آئی ءِ ھمراھانی ھلاپ ءَ سنگینیں ارزی ءُ آمیدگسی ھکم نامھانی بوگ ءَ ابید ھم ریاستی ادارہ آئی ءِ دزگیر کنگ ءَ بے سوب بیتگ انت- چَپ ءَ ڈیھ ءِ نگران وزرائے اعظم ءُ وزرائے داخلہ ءِ نیمگ ءَ آئی ءِ گون ءَ گند ءُ نند آئی ءِ پلامرزی ءَ داتگیں درشاناں ریاست ءِ ھیلداری ءِ سر ءَ سنجیدگی ءِ لنکک چست کتگ انت-
بلوچستان ءَ ریاستی پشت ءُ پناھی ءَ جوڑ بیتگیں اے ٹولی نا ایوک ءَ سلاہ بندیں جھد ءِ ھلاس کنگ ءَ ناکام بوتگ انت بلکیں چاگردی پتر اش ھم تاوان داتگ- ٹکی دشمنی گیش بوتگ، سیاسی تاکت ءِ بھر بانگی ءَ ترندیں نگاہ، ءُ لس شھری آیوکیں ھمک وھد ءَ بے رکگی ءِ آماچ انت- عطاالرھمان ءِ وڑیں مردماں بلوچ سیاسی ءُ چاگردی پھناتاں “ راجی گدار ” گوش انت پرچاکہ آئی ءِ پرکاریاں نا ایوک ءَ آجوئی ءِ زرمبشت تاوان بلکیں بلوچ چاگرد ءِ ننگ ءُ ناموس ھم لگتمال کتگ-
ریاست اگاں امن ءُ ساکمی ءِ لوٹوک انت گڑا آئی ءَ اے ڈولیں ریاستی ناشرانی سرپرستیاں گستا بیگ لوٹ ایت ءُ انسانی ھکانی چیردستی ءَ وتی پالیسی جوڑینگ لوٹ ایت-