TBP Balochi

بلوچستان ءِ بنجاھی شھر شال ءَ ھزارہ برادری ءِ نیمگ ءَ رودراتکی شھدگ ءِ سر ءَ دومی روچ ءَ زھرشانی نندانک برجاہ اِنت – نندانک ءَ بازیں کچے ءَ مردم ھوار اَنت کہ آیانی تہ ءَ جنین ءُ چُک ھم گون اَنت –

دی بلوچستان پوسٹ

زھرشانی نندانک ھزارہ برادری ءِ نیمگ ءَ گوستگیں روچ ءَ مچھ ءَ ھزارہ کاریزکارانی کوش ءِ ھلاپ ءَ کنگ بیتگ – نندانک ءِ سوب ءَ رودراتکی شھدگ ءَ رؤ آ بند اِنت –

شال ءِ سارتیں ھون بادینوکیں سارتی ءَ ابید ھم کھول ءُ ھزارہ برادری جونانی ھمراھی ءَ نندانک ءُ زھرشانی برجاہ اِنت –

مچھ ءَ کُشگ بیتگیں ھزارہ برادری ءِ دَہ کاریزکارانی کوش ءِ ارزی نامہ تنی وھدی نبشتگ کنگ نہ بیتگ – سروک مجلس واحدت مسلمین ءَ جونانی کَل کسارت کنگ ءَ جواب داتگ – ایم ڈبلیو ایم ءِ گوشگ اِنت کہ سروزیر عمران خان ءِ نیمگ ءَ شریں کمیشن ءُ پَٹ ءُ پولی انساپ ءِ سدکی ءَ ابید جوناں کل ءُ کسارات نہ کن ایں –

چریشی ءَ پد ھزارہ برادری ءَ سیادی داروکیں راجمان پتر ےِ باسک قادر نائل ءَ گپ ءُ تران ءَ پد جوناں چہ مچھ ءَ شال ءَ ھزارہ ٹاؤن ءَ ولی العصر امام بارگاہ ءَ برگ بیتگ اَنت – کُشتگیں کَل ءُ کسارت مروچی ساھت یک ءَ ھزارہ ٹاؤن مانشجاہ ءَ بیگی بیتگ – ھزارہ راجی جرگہ ءُ مجلس وحدت مسلمین ءِ گوشگ اِنت سدکی ءُ کُوشکارانی دزگیری ءَ داں رودراتکی شھدگ ءَ نندانک برجاہ بیت اِنت – ھزارہ ڈیموکریٹک پاٹی ءَ وئیل ءِ ھلاپ ءَ راجمان پتر ءَ توار چِست کنگ ءِ جار جتگ –

پدردی ءِ درشانگ ءَ بلوچستان بار کونسل ءَ مروچی سرجمیں بلوچستان ءَ ھرتال ءِ جار جتگ -بلوچستان بار کونسل ءِ وائس چیرمجن قاسم علی گاجزئی ایڈوکیٹ ءِ گوشگ اِنت مچھ ءَ بیتگیں مزدورانی کوش ءُ امن ءُ ایمنی ءِ دیما اڑانکی ءِ جاورھالاں ودینگ ءِ پیش کن اَنت مروچی بلوچستان ءَ آمیدگسی کاراں دزکشی اِنت –

برطانیہ ءِ ھالرسان ادارہ ءِ رد ءَ ناشرکاریں گل دولت اسلامیہ ءَ مچھ ءَ ھزارہ کاریزکارانی سر ءَ بیتگیں اُرش ءِ زمہ واری منّ اِتگ – ھالرسان ءِ رد ءَ ناشرکاریں گل ءَ ھواریں اعماق نیوز ایجنسی ءَ شنگ بیتگیں بیان ءِ تہ ءَ دَہ کاریزکارانی کوش ءِ زمہ واری منّ اِتگ اَنت –

وئیل ءِ سر ءَ بلوچستان ءِ سرکار ءُ لشکری ادارھاں ترندی ءَ نشانگ کنگ ءَ اَنت جتائیں پھناتاں بندوکیں مردم چاگردی رسانکجاھاں لیکھانی درشاناں کنگ ءَ اَنت –

عوامی ورکرزپاٹی ءِ جنرل سیکرٹری ءِ گوشگ اِنت کہ ھزارہ شیعھانی نسل کُشی بہ بیت یا بیگواھی درچ اے درستاں ریاستی ءُ درملکی زرکارانی گون ءَ بندوک اَنت پرچاکہ بلوچستان ءِ زمین ءُ مڈی اود ءِ نندوکیں مردمانی گیش دیما تِر اِنت -وتگڑیں ھاکم ءُ ریاست ءِ نزام ءِ ھلاپ ءَ سیاسی جد ءَ جھد ءَ نہ منوکی اِنت –

بلوچستان ءِ نیشل پاٹی ءِ راجمان پتر ءِ باسک میر سراج لھڑی ءَ سروزیر بلوچستان ءِ بارہ ءَ ٹویٹ کرتگ ءُ گوشتگ کہ یک نیمگے ءَ بلوچستان ءَ بے دردی ءَ مردمانی ھون ریچگ بیگ ءَ اَنت دومی نیمگ ءَ سرویز جام کمال دُبی ءَ ھیش کنگ ءَ اِنت بس یک ٹویٹے ءَ وتی پرز ءَ پیلو کنگ ءَ اِنت –

میر سراج لھڑی ءِ ٹویٹ ءِ لیکھ ءِ سر ءَ بی این پی ءِ سروک اخترمینگل ءَ دیما بران کرتگ گوشتگ کہ “روم جل رہا تھا اور نیرو بانسری بجا رہا تھا ” آ ھم دُبی ءَ –

سید ھاشمی ریفرنس کتاب جاہ ءِ گچینکاری ءِ دیوان رمضان بامری کتاب جاہ ءِ سروک،سلمان بلوچ کارگشاد نامینگ بیتگ اَنت –

دی بلوچسستان پوسٹ

سید ھاشمی ریفرنس کتابجاہ ءِ لس مجلس ءِ دیوان کراچی ءِ دمگ ملیر ءَ سال دو ھزار ءُ بیست ءُ یک ءَ نمیرانیں صباء دشتیاری ءِ عکس سروگانی ءَ بندات بیتگ –

دیوان ءَ کارگشاد بشیر بلوچ ءَ گوستگیں دو سالانی نگدال ونت ءُ باسک سرپدی داتگ اَنت، آئی ءَ گوشت کہ کتابجاہ ءِ کابینہ ءَ گوستگیں دو سالاں کورس کمیٹی، دیوان، کتابانی چاپ، کتابانی زیرگ ءُ کچ ءُ کساس گِشینتگ اَنت –

آئی ءَ گْوشت کہ ماڑی ءِ جوڑ کنگ ءِ ھاتر ءَ سرکاری گلاں وتی لوٹ جم داتگ، بلے کرونا ء وبا ءِ سوب ءَ کار پشکپتگ اَنت ءُ آئی ءَ نوکیں کابینہ ءِ اگدوداراں دزبندی کرتگ ءُ گوشتگ کہ اے کارانی رندگیری ءَ بہ کن اَنت –

دیوان ءَ کارگشاد ءَ پد ھسابدار گوستگیں دو سالانی ھساپ پیش کرتگ ءُ گوشتگ کہ کتابجاہ ءَ دو سالانی تہ ءَ دو لَک ءُ شست ءُ ھپت ھزار ءُ دو سد ءُ سِی پنچ کلدار جم کرتگ، آئی ءَ گوشتگ کہ گوستگیں دو سالانی تہ ءَ کتابجاہ ءِ ھرچ سیزدہ لَک ءُ نَود ءُ نُھ ھزار ءُ ھشت سد ءُ ھپتاد ءُ چار کلدار بیتگ اَنت-

آئی ءَ گوشت کہ جم کرتگیں زراں گیش ھرچ کرتگیں زرانی کچ گیش اَنت ءُ چریشانی تہ ءَ گیشتریں ھرچ باسکانی پگار اَنت-

نوکیں کابینہ ءِ گچین بیتگیں سروکانی تہ ءَ ڈاکٹر رمضان بامری سرکماش، بانُک پروین ناز کمک سرکماش اول، اقبال ھاشمی کمک کماش دوم، سلمان بلوچ کارگشاد، ظریف بلوچ کلیت دار، غلام رسول بلوچ آفیس کاردار، شرف شاد جارکش، واحد کامریڈ رھوت دار، نامینگ بیتگ اَنت –

کمیٹی ءِ سِلاہ کار ھم دیوان ءَ گچین کنگ بیتگ اَنت کہ آیانی تہ ءَ بانک ناز بارکزئی، عزیز کلمتی، عاصم زھیر، شبیر رخشانی، نواز فتع، قدیر مجید نامینگ بیتگ اَنت –

دیوان ءِ سرکماش رمضان بامری ءَ سرجمیں باسکانی منت گپتگ ءُ پَٹ ءُ پولکار غلام رسول کلمتی ءِ کتاب بزانت بلد “بلوچی گال گنج ” ءِ دیمدرائی بیتگ –

کتاب ءِ دیمدرائی ءَ پد گچینکاری ءِ کمیٹی ءِ جوڑ بیتگ کہ آئی ءِ سروک اسحاق خاموش ءُ آئی ءِ باسک ھارون بلوچ ءُ حمل پرویز بیتگ اَنت –

گچینکاری ءِ دیم پہ دیمی ءَ اوشتوکیں مردمانی تہ ءَ جمال ناصر، بشیر بلوچ، سجاد علی، عمران ایڈوکیٹ، خالد بلوچ بیتگ اَنت –

سال دو ھزار ءُ بیست ءُ یک ءَ کتابجاہ ءِ گچینکاری ءَ رمضان بامری دومی بر ءَ ریفرنس کتابجاہ ءِ سروک گچین کنگ بیتگ –

سید ھاشمی ریفرنس کتاب جاہ ءَ تنی وھدی چاردہ ھزار ءِ کچ ءَ کتاب جم کنگ ءُ ایر کنگ بیتگ اَنت –

اے کتاب جاہ سید ھاشمی ءِ نام ءَ جوڑ کنگ بیتگ کہ ایشی ءِ بنھشت ایر کنوک نمیرانیں صباء دشتیاری بیتگ-

کتاب جاہ ءِ لوٹ ھمیش اِنت کہ بلوچی زبان ءِ کوھنیں لبزانکی مواد ءُ ھر ھما چیریتگیں موادانی درگیج کہ آ بلوچی زبان ءَ پائدگمند اَنت –

دی بلوچستان پوسٹ

بلوچستان لبریشن فرنٹ ءِ جارکش میجر گوھرام بلوچ ءَ سرمچار گنج بخش پنّام ءِ بھار بلوچ ءِ ستاشانی کرتگ ءُ گْوشتگ کہ سرمچار گنج بخش پنّام ءِ بھار بلوچ گوستگیں روچ ءَ دشمنیں پوج دیم ءَ یک بیڑے ءِ میان ءَ پنجگور ءِ دمگ کیلکور ءَ شھید بیتگ –

جارکش ءَ گْوشت کہ دشمنیں پوج ءَ سرمچارانی یک گشتی ٹولی ءِ انگیر کنگ ءِ جھد کرتگ – شھید بھار بلوچ ءَ بامردی ءَ جنگ دیان ءَ دشمنیں پوج ءِ انگیر ءَ وتی آدگہ ھمراھانی رکینگ ءَ سوبمند بیتگ وت نمیران بیتگ – اے جنگ ءَ زورگریں ہاکستانی پوج ءِ دو کارندہ مرتگ ءُ بازینے زدگ بیتگ اَنت –

آئی ءَ گوشت کہ شھید گنج بخش بھار ء علی جھمنند تیرتیج آواران کہ یک مھنت کش ءُ جنگولیں سرمچارے بیتگ – شھید ءَ دشمن ءِ ھلاپ ءَ بازیں جاھاں جنگ داتگ –

آئی ءَ گوشت کہ آئی ءِ شھیدی ءِ سر ءَ ستاشانی کنگ آں ءُ آئی ءَ سھر چکیں دروت ندر کن آں –

آزمانک: مِھری منی وابانی ھمسپر

آزمانکار: لطیف سخی

دی بلوچستان پوسٹ

چہ میتگ ءَ دور گستہ یک پراہ دامنیں ھلکے ات مدام من شُت آں ءُ نہ سگّوکیں گماناں ھما ھلک ءَ سارت کت۔ من مدام لوٹ ات کہ میتگ ءِ کش ءِ چاپڑا ءِ چیر ءَ بہ نند آں ءُ مہلبیں گُل ءِ ودار ءَ بہ کن آں بلے وھد ءِ اڑ ءُ جنجال انچو گیش اَت کہ چہ آئی ءِ ملوریں چمّاں مدام یک بے تواری بے ودی بوان اَت۔

آ کسہ ءَ سرپد ات بلے گوں من تران نہ کرت ئِے ءُ مدام منی لُنٹانی سر ءَ ھمائی ءِ نام ورد بوت ءُ آئی ءَ منی دل رنجی چار اِت کہ بلکیں اِے چمّاں دل گران بہ بیت ھمے گمان ھستگ ات کہ آئی ءَ منی دیم ءَ گپ چیر کرت انت ءُ مدام وتی دانک ئِے ساڑات اَنت ئِے چہ من چو دُزّیں دزگھارے ئے پیم ءَ وتی ھیالانی اندر ءَ جیڑگ ءَ ات۔

بلے من چہ آئی ءِ اِے ھُشاریاں دل ایکیم بوت آں بلے منی اندر ءَ ھمے گپ مدام ھست اَت کہ مِھری چی ءَ چہ من وتی دانک ءُ گپّاں چیر دیگ لوٹ اِیت
کہ آئی ءِ سرجمیں زند منی امانت اَت ءُ آئی ءِ لوٹ ھم من بوتگ اِتاں ءُ من مدام گوات ءَ گوں کلوہ دیم داتگ ءُ کجام نیمگ ءَ من شھار داتگ اَت آ ھما نیمگ ءَ زاھر بوتگ بلے اِے رَندی دُراھیں کسّہ مٹ اِتاں ءُ من چار اِت باریں کجام نیمگ ءَ آئی ءِ شھارے گوات ءِ شیکگاں گْوں در ءَ بیت بلے نوں چو سیاہ شپ ءِ مُجانی تہ ءَ آ چہ من ءَ باز اندیم ات وھدے کہ من پد ءَ گوں آسیگیں دلے چہ میتگ ءَ واتر بوت آں بلے انگت منی ھیال گوں میتگ ءِ ھام کُڈک ءَ اَت ءُ برے ھما کوہ دامنیں چاپڑا ءِ ندارگ ءَ اَت۔

ھما سارتیں گوات کشیں چاپڑہ کہ آ ھود ءَ من مدام گوں آئی ءَ وتی دانک گوشت درشان کرت اَنت بلے باز رند ءَ آئی ءَ من ءَ منی گپّانی ھچ پسو ھم نہ دات
اے گپ من باز جیڑ اِت کہ من آئی ءَ را چے گپ ردیں گوشتگ یا کہ من آئی ءَ را دوست نہ داشتگ۔
بلے وھدے من آئی ءِ گران مُھری من دیست گُڑا من جیڑ اِت کہ گران رواج ءُ گْران تبیں جنکے بلے من اِے گپ ءَ سرپد نہ اِت اَنت کہ آ منی دیم ءَ وت ءَ چو پارسائیں زالے ءِ پیم ءَ پیش کنت ءُ مدام آئی ءِ جیڑگ ءُ بے تواری ءَ من ءَ جیڑگ پرمات۔

پد ءَ من مِھری ءَ را مدام جست کُرت کہ مردم پرچے ءَ انچو وھد ءِ زینتاں گوں ھوار بازیں دلانی بیپار کن انت ءُ بنی آدم ءِ زندمان ءِ سیمسراں سر کن انت؟
آئی ءَ زانت کہ من چے گوشگ لوٹ آں بلے کمو ھاموش بوت ساھتے ءَ پد من ءَ گوں برزیں توارے ءَ من گْوشتے کہ مدام تئی گپ ھمے داب ءَ انت تئی گْور ءَ مدام من نند آں تو سنچ نہ دار ے ءُ تو مدام گوں من ھوار بہ ئے تئی سر ھال ھمے چیزانی سر ءَ اِنت من آئی ءِ تب زانت من کمو وتی مورک مج اِت اَنت اے ساھت ءَ آئی ءِ گپ یکبرے پد ءَ زبان ءِ سر ءَ اتک بلے پد ءَ دوبر آئی ءَ گْوشت نہ کرت پرچی ءَ کہ من آئی ءِ گون ءَ انچو پدر نہ بوتگ ات انت۔

کمو ساھتے ءَ پد ھمے درگت ءَ من آئی ءَ گوں ترندیں گالاں ھمے پسو دات کہ تو منی زند ءِ ھمسپر نہ بہ ئے اے گپ ءَ من شر زان آں منی مِھری منی اے گپ آئی ءِ دل ءَ چو کارچ ءِ پیم ءَ لگ اِت ءُ آئی ءِ چمّانی ارس مینچل بوت اَنت ءُ من ھم وتی انان ءَ ڈن بوت اَنت-

ساھتے ءَ پد وھدے من سما کرت باز جیڑ ات ءُ پد ءَ واتر ھما کاپر ءِ رو برکت ءِ نیمگ ءَ چم شانک دات اَنت ءُ روچ ءَ را وتی جُستانی پسو لوٹگ ءِ ودار ءَ ات اَنت من ءَ سما بوت کہ منی پشتی نیمگ ءَ مِھری منی راستیں کوپگ ءَ دست ایر کنگ ءِ موہ لوٹگ ءَ اِنت بلے آئی ءَ منی تب باز رنگ ءَ دیم ءَ آیگ ءَ ات ءُ مِھری ءَ وتی ارس ءِ شلینگ انگت یل نہ کرت انت ھمے دمان ءَ من ھم وتی دل ءِ اوپار زرت نہ کرت انت ءُ من یک ھیسکارگے دلءَ چہ در کرت ءُ من مِھری ءَ چہ بے سما بوت آں داں دیر من وتی ھیالانی توک ءَ تُسگ ءُ بود کنگ ءَ پد چار اِت منی سر ماں مِھری ءِ زانسران ایر اِنت ءُ آئی پرپکیں لُنٹانی ھشکی گوں چمانی کیپیں ارساں گوں تر بوگ ءَ اَت۔

بلے من انگت آئی ءِ دلپھکی ءُ راستی نہ زانت داں واتر پد ءَ من گسر بوت آں ءُ مرچی مئے نیام ءَ راستی انگت چیر ءُ سر اِنت ۔

ھمے داب ءَ ھما کسّہ، ھما کرگین ءُ کاپر، بس مدام مئے گپ ءُ رپ ءِ نندگ جاہ اَت بلے مئے نیام ءَ منی ءُ مِھری دیستگیں واب ناسرجم اَت۔
دوھمی روچ ءَ وھدے من مِھری ءَ را پد ءَ ھمے جُست کرت کہ مِھری تو منی زیکیں جست ءِ پسّو نہ دات ؟آ گپ انگت منی دل ءِ سر ءَ ایر اِنت۔
مِھری پد ءَ ھما زیکیں دروشم ءَ من ءَ ھکَل دات بلے آئی مرچی ھچ دل ءَ نہ جیڑ اِت پرچے کہ آ مرچی من ءَ شر سرپد ات کہ جست کنت۔
بلے من ھم زور دات داں دیراں گْوشت کہ تئی مول ءُ مراد چے انت ؟ من ھاموش بوت آں ءُ منی اندر ءَ چہ یک ترسناکیں بیمے چست بوت بلے مِھری روک روک ءَ منی نیمگ ءَچارگ ءَ ات من ھم ھبکّہ بوت آں گُڑا مِھری ءَ پد ءَ من ءَ گْوشت تو پیسر ءَ چے لوٹ کتگ ؟ انوں چو وانْگ بوتگ ئے من ترا چے جست کنگ ءَ آں ءُ تئی پسو کجام نیمگ ءَ اِنت وھدے تو چہ من وتی زندمان ءِ دیستگیں واب چیر داتگ اَنت؟
بلے اِے گپ من نہ زانت آئی ءِ دل ءَ چنچو باندات ءِ واب است انت مدام من ءَ گوں امبازان ئِے زُرت بلے مئے زند یکے دومی ءِ پسّوانی ودار ءَ پہ گْوزان اَت۔ مئے منزل ھم یکے ات مدام مئے یک راہ ھم یکین اَت بلے چے کن ئے کہ مدام ما نشت انت ایوکی ءَ وت مہ وت گپ ءُ تران کرت ءُ مئے یکے دُھمی ءِ گپ زبان ءَ چہ اتک بلے دپ ءَ در نہ اتک ھمے پیم ءَ من آئی ءَ را وابانی تہ ءَ شوھاز کنگ ءِ جھد کرت یک شپے من شپ ءِ نیم ءَ واب ءَ چہ بست کرت کہ من واب گِندگ ءَ اِتاں کہ آ منی وابانی بانور اَت ءُ ھما کسّھاں من واب ءِ دروشم ءَ گِندگ ءَ اِتاں بلے آئی ءِ سرجمیں کسّہ ھمے داب ءَ ھیالانی تہ ءَ اَت ءُ ھچ راہ ءُ سیمسراں آسر نہ بوتاں ھمے ھیال ءُ جیڑگانی تہ ءَ من چم شانگ دات انت روچ ءَ ٹک داتگ اَت ءُ مرگانی تواراں منی گوش کر کرت منی دل دریکگ ءَ اَت ءُ من مِھری ءِ یاتاناں ھمباز کرتگ اَت ھمے دمان ءَ من جْیڑ اِت کہ من گوں مھری ءَ ایوک ءَ وابانی ھمسپر اوں ءُ من وت ءَ مِھری ءِ یاتانی تہ ءَ وابانی دروشم ءَ ھمگرنچ کرتگ۔

من ءَ اِے پیریں کماشانی اِے گپ یات اھت کہ “راستیں واب چپّیں بزانت ءَ گْوش اَنت”۔ اِے گپ منی دل ءَ چو کارچ ءَ بُرّان اَت کہ مِھری پکا منی زندمان ءِ ھمسپر نہ بیت۔ بلے پد ءَ من اِے جیڑ اِت کہ لھتیں انچیں واب ھست اَنت کہ آ بے مانا نہ بنت ءُ روچے نہ روچے راستی ءِ مِستاگے دینت ءُ مِھری یک روچے منی زندمان ءِ ھمسپر بیت ءُ من ءُ آ ھر دوئیں مِھر ءِ دیار ءَ ابدمانیں زندے گْوازین اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

گوستگیں سال ءِ گڈی ماہ ءَ بہ گر داں انیگ ءَ روکپتی بلوچستان ءَ ایرانی آمید گس ءَ دَہ بلوچ پاھو داتگ اَنت –

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ بنجاھی شھر دزاپ “زاھدان ” ءَ ایرانی آمید گس ءِ پرمان ءَ روکپتی بلوچستان ءِ جھمنندیں سَے بلوچ پاھو داتگ اَنت –

پاھو داتگیں مردمانی پجار حسن دھواری، الیاس قلندرانی ءُ امیت مھمودزئی ءِ ناماں زانگ بیتگ اَنت –

روکپتی بلوچستان ءَ انسانی ھکانی واستا کارکنوکیں باسکے ءِ رد ءَ ھرسئیں مردمانی پاھو نامہ گوستگیں روچ ءَ ایرانی آمیدگس ءَ کرتگ اَنت مروچی آ دزاپ ءَ پاھو دیگ بیتگ اَنت –

ایرانی آمیدگس ءِ پرمان ءِ رد ءَ حسن دھواری ءُ الیاس قلندرانی ءِ سر ءَ ایران ءِ ھلاپ ءَ چِست بیوکیں زرمبشت ءَ گوں سیادی بیگ ءُ چریشی ءِ سر ءَ اشانی سر ءَ پاھو دیگ ءِ پرمان کنگ بیتگ اَنت –

اُمیت مھمودزئی ءِ سر ءَ بھتام بیتگ کہ آئی ءَ ھاش ءَ سلاہ بندیں مردمانی کُمک کرتگ اَنت –

انسانی ھکانی باسک ءِ گوشگ اِنت کہ ھرسئیں مردمانی وکیل ءَ مزدانکے ءَ گوشتگ کہ اے مردم لس مردم بیتگ اَنت ءُ وکیل ءِ گپ ایرانی آمیدگس ءَ رد کرتگ ءُ بندیگ مردم پاھو داتگ اَنت –

زانگ بہ بیت گوستگیں دو ھپتگاں بہ گر داں انیگ ءَ ایرانی آمیدگس ءَ روکپتی بلوچستان ءَ بندوکیں دَہ مردم پاھو داتگ اَنت –

آیانی سر ءَ ایرانی آمیدگس ءَ ھمے بھتام جتگ کہ اے مردم ایران ءَ ناشری ءُ دگہ وئیلاں دزمانجن بیتگ اَنت –

بلے اے گپانی راستی دگہ نیمگاں دز نہ کپتگ اَنت ءُ لس مردمانی گوشگ ھمیش اِنت کہ روکپتی بلوچستان ءَ ھنچیں مردماں پاھو دیگ بیگ ءَ اَنت آیاں گوں ھچ چیز ءَ سیادی نیست ءُ مپتیں بھتامانی سر ءَ پاھو نامہ ایر کنگ ءُ مردم پاھو دیگ بیگ ءَ اَنت –

دی بلوچستان پوسٹ

ٹی بی پی پتر ھال ءَ سر بیتگیں ھالانی رد ءَ بلوچستان ءِ بنجاھی شھر شال ءَ اناگتی ءَ بالی پَٹ دگ ءَ نامی ئیں ھوٹل تکتو ءَ آس چِست بیتگ –

آس ءِ کپگ ءَ ھوٹل ءَ تاوان بوگ ءِ گمان اِنت ءُ آس ناگتی ءَ چِست بیتگ ءُ آس ءِ برانز برز ءَ چِست بیتگ اَنت –

آس کپگ ءِ سوب تنی وھدی زانگ نہ بیتگ –

ھمے وڑ بلوچستان ءِ دمگ کیچ ءِ ھند تمپ میر آباد ءَ بشیر نامیں مردمے ءِ لوگ ءَ آس کپتگ ءُ آس ءِ برانزاں بازیں لوگ گپتگ ءُ سُتکگ اَنت –

دمگی مردمانی رد ءَ بشیر ءِ لوگ ءَ ھما وھد ءَ آس کپتگ کہ آئی ءِ لوگ ءَ وردنی ورگ جوڑ کنگ ءَ بیتگ اَنت ءُ چریشی ءَ آس چِست بیتگ ءُ آس ءَ کش ءُ گوری لوگ ھم سوتکگ اَنت –

آس ءِ کپگ ءَ لوگ ءَ ھواریں ساز ءُ سامان ھم بُنگپتگ اَنت ءُ دمگ ءَ جاڑیگیں مردماں وتی کمک ءَ وت آس توسینتگ –

ھزارہ بزگانی کُشندہ ھما انت کہ بلوچانی زورانسری آوار جنی ءُ چکچینی ءَ ھوار انت – ماما قدیر بلوچ

دی بلوچستان پوسٹ

سندھ ءِ مزن شھر کراچی ءَ بیگواھیں بلوچانی ھاتر ءَ زھرشانی برجاہ ، وائس فار بلوچ مسنگ پرسنز ءِ زھرشانی ءَ مروچی چار ھزار ءُ یک سد ءُ ھشتاد روچ سرجم بوتگ –

کمیونسٹ پاٹی آف پاکستان ءِ بنجاھی جنرل سیکٹری امداد قاضی، صوبائی سرکماش ءَ ابید وھاب بلوچ ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ باوست کنان ءَ گوشتگ کہ بلوچستان ءِ تہ ءَ انسانی ھکانی لگتمالی زور ءَ سر گوستگ اَنت ، بلوچستان ءِ گیشتر دمگ پوجی بنجل جوڑ کنگ بوتگ انت، ھمک روچ پوجی زورکیانی سوب ءَ بازیں مھلوکے درپہ دری زند گوازینگ ءَ لاچار کنگ بوگ ءَ انت –

آئی ءَ گوشتگ کہ کوھلو ءُ کاھان ءِ گیشتریں دمگاں چہ پیسر ءَ مھلوک در پہ دری زند گوازینگ انت نوں مکران ءُ آواران ءِ بازیں دمگاں مھلوک زوراکیانی نشانگ کنگ بوگ ءَ انت، مھلوک ءَ در پہ دری زندے گوازینگ ءَ لاچار کنگ انت –

ماما قدیر بلوچ ءَ مچھ وئیل ءِ سر ءَ دلپدردی درشان اتگ ءُ گوشتگ کہ ھزارہ بزگانی کُشندہ ھما انت کہ بلوچ راج ءِ زورانسری آوار جنی ءُ چکچینی ءَ ھوار انت – بولان ءُ دگہ دمگاں ھوار مچھ ءَ پاکستانی پوج گوستگیں ھشت روچاں وتی بمب گواریں بالگرد ءُ جاسوسیں جھازانی گوم ءَ ھمود ءَ ساڑی انت گڑا کُشندہ چون کائنت ءُ ارزانی ءَ پوریاگراں ھلار کن انت ءُ رو انت –
آئی ءَ گوشتگ کہ اے وڑیں دلپدردیں وئیلاں درساں ھوار بوگ ءُ زھرشانی کنگی انت –

گڈسر ءَ ماما قدیر بلوچ ءَ میان اُستمانی برادری ءَ ھوار درسیں انسانی ھکانی ادارھاں چہ لوٹ کرتگ کہ مزھبی ناشرکار ءُ آھانی پشت پناھی کنوکانی بگیری ءَ کاروائی بہ کن انت –

دی بلوچستان پوسٹ

مچھ ءَ ھزارہ برادری ءَ سیادی داروکیں پوریاگرانی کوش ءِ پژدر ءَ سیاسی ءُ چاگردی مردماں زھر ءِ درشان کرتگ ءُ جتائیں سیاسی گلانی رھشون ءَ دگہ پھناتاں سیادی داروکیں مردماں وئیل ایر جتگ –

بی این پی مینگل ءِ سروک ءُ راجمان پتر ءِ باسک سردار اختر مینگل ءَ مچھ ءَ ھزارہ برادری ءِ سر ءَ بیتگیں اُرش ایر جتگ ءُ گْوشتگ کہ اے وڑیں وئیلانی بیگ ھاکم ءُ کانونسازیں ادارھانی دیم ءَ شھماتے –

آئی ءَ گْوشتگ کہ اربانی کلدار پہ امن ایمنی ءِ نام ءَ ھرچ کنگ ءَ اَنت بلے اشی ءَ ابید ھم مھلوک ءِ جان ءُ مال پھزیرگ بیگ ءَ نہ اَنت –

آئی ءَ گْوشت کہ کھولانی گون ءَ پدردی درشان کن آں ءُ اے وڑیں وئیل انسانیت ءِ سوزمان ھچ رنگ ءَ اوپار کنگ نہ بیت –

سیاسی رھشون ءُ راجمان پتر ءِ بلوچستان ءِ باسک نواب اسلم رئیسانی ءَ گوشت کہ بے گناھیں مزدورانی کوش ءَ ھمینکس ایر بہ جن ئے کم اِنت، اے وتی کھولانی لاپ والینکویں بے میاریں مردم بیتگ اَنت – اے بژنیگیں وئیل ءِ پَٹ ءُ پول بہ بیت ءُ مھلوک ءَ گوں دزبندی اِنت جرمکارانی پاشک کنگ ءَ کمک بہ کن اَنت –

بلوچ نیشنل مومنٹ ءِ چیئرمین ھلیل بلوچ ءَ وتی ٹویٹے ءَ وئیل ایر جتگ ءُ گوشتگ کہ مچھ ءَ ھزارہ برادری ءِ سر ءَ بیتگیں اُرش ءَ آئی ایس آئی ءِ یک دگہ شیتانی گامے –

سروزیر پاکستان عمران خان ءَ مچھ ءَ یازدہ مزدورانی کوش ایر جتگ ءُ گوشتگ کہ اُستانی سرکار ءُ ایف سی ءَ کوشکارانی دزگیری ءِ پرمان کرتگ –

عمران خان ءَ گوشتگ کہ مچھ ءِ اُرش بزدلی ءُ گیر انسانی ءِ سرکار کھولاں تھنا نہ کنت –

پاکستان ءِ پیپلز پاٹی ءِ چیئرمین بلاول بھٹو زرداری ءَ مچھ وئیل ایرجتگ ءُ گوشتگ کہ سرکار اشکرانی کھن ءَ کاریزکارانی پھریزگ ءَ سرجمی بہ کنت –

پاکستان ءَ جاڑیگیں آسٹریلوی ھائی کمشنر ڈاکٹر جیفری شاہ ءَ چاگردی رسانکجاہ ٹویٹر ءَ گوشتگ کہ بلوچستان ءِ دمگ بولان مچھ ءَ اشکرانی کھن ءَ یازدہ کاریزکارانی کوش دردیگ ءُ کھولانی گماں بروبری ءَ شریکاں –

دومی نیمگ ءَ چاگردی رسانکجاہ ٹویٹر ءَ وئیل ءِ ھلاپ “ھزارہ نسل کشی ” سربر اِنت ءُ جتائیں پھناتاں سیاسی ءُ نامی ئیں مردم اے وئیل ءَ ایر جنگ ءَ اَنت – بلوچ چاگردی رسانکار فتح بلوچ ءَ نبشتگ کرتگ کہ بازیں روچاں بولان ءَ پوجی لشکر کشی، بمبگواریں بالگردانی تیرگواری، ایس ایس جی کمانڈوزانی پیش گامی ءَ ابید ناشرکاری ءِ اے وئیل جھلانکی ءِ یکیں ھنڈالاں بارت –

شال ءَ سیادی داروکیں نامی ئیں انسانی ھکانی باسک جلیلہ ھیدر ءَ نبشتگ کرتگ کہ شما گوش ایت ریڈ لائن ءَ مہ گوز اِت – شما منی براتانی ھوناں ریڈ لائن جوڑ کن اِت ھاں آ ریڈ لائن ءَ ھم مہ گوازین اِنت –

زانگ بہ بیت بلوچستان ءِ دمگ مچھ ءَ اشکرانی کھن ءَ شمبے ءُ یک شمبے ءِ میانی شپ ءَ سلاہ بندیں مردماں یازدہ کاریزکار کُشتگ ءُ دَہ ءَ گیش زدگ کرتگ اَنت – کشتگیں مردمانی سیادی ھزارہ برادری ءَ اِنت

دی بلوچستان پوسٹ

بلوچ لبریشن آرمی ءِ سروک بشیر زیب بلوچ ءَ گْوشتگ کہ مچھ ءَ ھزارہ برادری ءَ سیادی داروکیں کاریزکارانی کوش ءَ پاکستانی چیریں ادارہ دزمانجن اَنت – اے گپانی درشانی آئی ءَ چاگردی رسانکجاہ ٹوئٹر ءَ کرتگ اَنت –

بشیر زیب بلوچ ءَ گْوشتگ کہ بولان ءِ ھند مچھ ءَ ھزارہ ٹک ءِ بے گناھیں مردمانی سر ءَ نیکراھی جنگولانی اُرش ءَ ایر جن آں -پاکستانی چیریں ادارہ اے بزدلیں اُرش ءَ تچک ءَ ھوار اَنت-

آئی ءَ گْوشت کہ بولان راجدپتری جاھے ءِ رنگ ءَ بلوچ جنگ ءِ کلات اِنت، کہ اشی ءِ ھلاس کنگ ءَ ریاست ھروھد ءَ رپکیں رنگ ءُ پیماں جھد کنگ ءَ اِنت – مروچی ءِ ناوشیں وئیل دشمن ءِ ھما زوراکیانی بھر اِنت –

زانگ بہ بیت گوستگیں شپ ءَ مچھ ءِ دمگ گیشتری ءَ ناشناسیں مردماں کاریزکارانی سر ءَ اُرش کرتگ ءُ چریشی ءَ یازدہ مردم بیران بیتگ اَنت – بیران بیتگیں مردمانی سیادی شیعہ ءَ پرکہ ءَ سیادی داروکیں ھزارہ ٹک ءَ اِنت –

اُرش ءِ زمہ واری تنی وھدی ھچ گل ءَ پہ وت ءَ نہ زرتگ بلے وئیل ءَ نیکراھی جنگولانی دزمانجنی بیگ ءِ گمان کنگ بیگ ءَ اِنت –

وئیل ءَ پد چاگردی رسانکجاھاں جتائیں پھناتاں سیادی داروکیں مردم زھر ءِ درشان ءَ کنگ ءَ اَنت ءُ سرکار ءِ سر ءَ ایراد گرگ ءَ اَنت –

دومی نیمگ ءَ ھزارہ برادری ءِ نیمگ ءَ مچھ ءِ ھند ءَ جونانی ھمراھی ءَ بنجاھی شھدگ اش بند کرتگ ءُ نندانک ءِ جتگ ءُ زھرشانی کنگ ءَ اَنت ھمے رنگ ءَ بنجاھی شھر شال ءِ رودراتکی شھدگ ھم بند کنگ ءُ شھدگ ءِ رو آیگ مھتل اِنت –

بلوچستان ءِ سرکار ءِ جارکش لیاقت شاھوانی ءَ گْوشتگ کہ پوج ءُ پھزداراں دمگ انگیر ءَ کرتگ ءُ پَٹ ءُ پول کنگ ءَ اَنت -ءُ آئی ءَ ٹاہ داتگ کہ ما ناشرکاراں انساپ ءِ سر ءَ کاریں ءُ کُشتگیں مردمانی مُزداری ءَ دے ایں –