TBP Balochi

دی بلوچستان پوسٹ

مچھ ءَ ھزارہ برادری ءَ سیادی داروکیں کاریزکارانی کوش ءِ ھلاپ ءَ بلوچستان ءِ بنجاھی شھر شال ءِ بازیں جاھاں زھرشانی کنگ بیگ ءَ اَنت، مچھ ءَ زھرشانی کنوکاں جون بنجاھی شھدگ ءِ سر ءَ ایر کرتگ ءُ زھرشانی کنگ ءَ اَنت کہ چریشی ءِ سوب ءَ رؤگ ءُ آیگی مھتل اَنت –

وئیل ءَ پد چہ شال ءَ ساں سندھ ءُ پنجاب ءَ رؤکیں بنجاھی شھدگ زھرشانی کنوکاں مچھ ءِ ھند ءَ کُشتگیں مردمانی جون ایر کرتگ ءُ شھدگ بند کرتگ – بنجاھی شھدگ ءِ بند بیگ ءِ سوب ءَ سدانی کچ ءَ گاڑی مھتل اَنت ھمے وڑ گاڑیاں بازیں کچے ءَ جنین ءُ چک ھوار اَنت –

ھمے رنگ ءَ شال ءِ روکپتی شھدگ ءِ سر ءَ ھزارہ ٹاؤن ءِ جھمنند نشتگ ءُ دگ اش بند کرتگ – زھرشانی کنوک مچھ ءِ وئیل ءِ پژدر ءَ سرکار ءِ ھلاپ ءَ اوگام جنگ ءَ گندگ بیتگ اَنت –

زانگ بہ بیت کچھی ءِ ھند مچھ ءَ “کوئلہ فیلڈ ءَ ناشناسیں مردماں اُرش کرتگ ءُ دہ کاریزکار کُشتگ اَنت کہ آیانی سیادی ھزارہ برادری ءَ اِنت –

اسسٹنٹ کمشنر مچھ سمیع آغا ءَ رسانکدراں تران کنان ءَ گوشتگ کہ شمبے ءُ یک شمبے ءِ میانی شپ ءَ شال ءَ ھشتاد میل دور مچھ گشتری ءِ ھند ءَ ناشناسیں جنگولاں اشکرانی کھن ءَ کار کنوکیں مزدورانی سر ءَ ھما وھد ءَ اُرش کرتگ کہ آ واب بیتگ اَنت –

آئی ءَ گْوشت کہ ارشکاراں کوٹیاں جاڑیگیں کاریزکار پجار کرتگ ءُ جتا کرتگ ءُ دست ءُ پاد بستگ ءُ تیزیں کارچانی گون ءَ کُشتگ اَنت –

ھزارہ ڈیموکریٹک پاٹی ءَ وئیل ایرجتگ ءُ گْوشتگ کہ اے زوراکی ءِ ھلاپ ءَ اسمبلی ءُ سرکاری کارجاھاں بے توار نہ بہ ایں -درشان ءَ گْوشگ بیتگ پاٹی ءِ باسک وئیل ءِ بارہ ءَ سروزیر بلوچستان ءُ تھ ئِے کارانی وزیر ءَ گوں رھوت کنگ ءَ اَنت –

اُرش ءِ زمہ واری تنی وھدی ھچ گل ءَ نہ منّ اِتگ ءُ گوست ءَ اے وڑیں وئیلانی تہ ءَ نیکراھی ناشرکار دزمانجن بیتگ اَنت –

ھمے رنگ ءَ کلات ءُ مستونگ ءِ کوھی دمگاں ھواریں ناگائی، اسپلنجی، جوھان ءُ نرموک ءَ ھوار ڈھاڈر ءُ سنی سوران ءِ ھنداں لشکری سر بیتگ اَنت ءُ گیشیِں کمکی دمگ ءَ پیش گامی کنگ ءَ اَنت –

دمگی مردماں جنگ زدگیں دمگ ءَ پوجی لشکر کشی ءِ گمان پدر کرتگ وھدیکہ بمبگواریں بالگرد ءُ چیریں بالیگ ھم برز ءَ بال ءَ گندگ بیتگ اَنت – تنی وھدی واکداراں پوجی لشکر کشی ءِ بارہ ءَ ھچ نہ گوشتگ –

نبشتانک: ملار ءُ من

نبشتہ کار: حیر جان قدیر

دی بلوچستان پوسٹ

من ملار تامُر چار اِت من ءَ سک دوست بوت کسّہ ڈائیلاک ملار ءِ ڈائیلاکانی تہ ءَ بزاں ھمے لبزانی تہ ءِ دگہ باز گپ مان اَت کہ انسان ءَ جیڑگ پرما اَنت جاھے جاھے گپ ءُ ھبر کم گُشگ ءَ تاں کردار بلے ندارگ شوکیں وڑے ءَ کسّہ ءَ گیشتر بیان کنگ ءَ اَت ۔ ملار ءِ تہ ءَ ھمے مئے بلوچ چاگرد پیش دارگ بوگ ءَ اَت کہ اِد ءَ واھگ اد ءَ مِھر بنیادم وتی وڑ ءَ پیلو کُت نہ کنت اَگاں مردُم ءِ وتی وڑ ءَ زند ءَ بہ گْوازین اِیت گون وتی واھگاں وتی مارشتانی رِد ءَ گُڑا ایوکی ءِ آماچ بیت بس گون وت گپ بہ کنت وت بِگریت ءُ وت وت ءَ بہ سھڑین اِیت ءُ بس گون وت بِہ کند اِیت پد ءَ ھمے مردم مئے چاگرد ءَ مُدام گنوک لیکگ بیت ملار من چار اِت من انچو مار اِت کہ مئے بلوچ چاگرد ءَ ھر یکّے  ملار ءِ بھر اِنت ۔

ملار ءِ ندارگ کشی من ءَ دوست بوت اَنت بلے یک ندارگے کہ منی جند ءَ گوں ھمگرنچ اِنت ماہ ءِ  دیم ءَ نندگ ءُ سوت گُوشدارگ ، اے منی وتی ھیل اِنت کہ من مدام ماہ ءِ دیم ءَ ننداں آئی ءِ زیبائی ءَ گوں نہ زاناں چونیں سیادی یے ھست کہ منا مُلما کنت ءُ بیت کنت کمالان چو منی وڑ ءَ گوں ماہ ءَ نزیک انت برھال کم مردم اے چیز ءَ کُت کنت شال ءِ زیبائی ، شال ءِ ندارگ ، شال ءِ ابیتکیں موسم اِد ءِ نا سرجمیں کسّہ ، نادست رسیں لوٹ دْرست مارشت اَنت کہ ملار وتی چاروکانی دل ءَ ایر کپ اِیت –

من ءَ ڈاکٹر ءِ کردار سک دوست بوت چوناھیگا اومر کیا یک مزنیں ازمکارے بلے ملار ءُ تہ ءَ من نہ مار اِت کہ اے اومر اِنت گش ئے ڈاکٹرے کہ گُشگ ءَ اِنت مئے چاگِرد ءِ مردُم زگنی مَریزی ءَ اَیب پھم اَنت ھو راست گُش اِیت مئے چاگِرد ءَ ھرکس اَگاں زھنی جیڑھانی آماچ بہ بیت اِے گنوک گُشگ بنت اِیشانی اِلاج کنگ ءَ میار کن اَنت کہ مھلوک پد ءَ گُش اَنت پِلانی گنوکے ھالانکہ مارا دگہ مَریزی بہ بیت ما ڈاکٹر ءِ کر ءِ رویں یا کسے ءَ گُشیں مارا ڈاکٹر ءَ بہ بر بلے اگاں زھنی بیماری یے بہ بیت ما چیر ئِے دے ایں ھالانکہ لوگ ءِ مردم ھم اَیب کن اَنت گُشگ ءَ کہ پلانی سر ءَ شر شر نہ اِنت پما اَیبے –

کردار ھمک ازمکار ءَ بے پسّو کار کتگ ھمک ازمکار ءَ وتی ازمی ھک پیلو کنگ ءِ جُجد کتگ تکنیکلی کاراں من ھچ سرپد نہ آں ءُ نہ زاناں برھال کیمرہ مین ءِ دستاں کرامات باز مان کہ ندارہ کشی پہ جوانی گپتگ اَنت ئِے کسّہ ءِ تہ ءَ اِشق ، بزگی، بیوسی، ھما دَگانی سر ءِ آس کہ مرچی داں لوگانی تہ ءَ روک اِنت دلانی تہ ءَ روک اِنت ھمد ءَ کہ ڈاکٹر ناگمان ءِ چم بند اَنت ءُ لھتیں گْوست ءِ یات اَنت گُشگ ءَ اِنت اِے ھر یکّ لبزے ءِ تہ ءَ مئے کسّہ مان اَت مئے ھلک ءِ جاور مان اَت انت ۔بلوچانی بزّگی مان اَت ، دیوانگانی، بیوسی مان اَت ۔ شال ءِ کوکار ،شال ءِ دل بند ءَ کامریڈانی کُتگیں توار داں روچ ء مروچی جمک گوشانی تہ ءَ ٹلینگ اِیت-

ھر چیز ءِ دو نیمگ بنت یکّے شرین ءُ یکّے ھرابین من ملار وتی کساس ءَ دویں نیمگاں چار اِتگ۔ من ءَ شرّی ءُ شوکی گیشتر گندگ اَتک ۔ بس منی گلک ھمیش اِنت یک چیزے منی مجگ ءَ نہ شُت کہ رپیک ءُ سمّی ءِ مھر گش ئے یک نیمگی مھرے بلے پد ءَ رپیک ءُ سمّی یکجاہ بنت ایشانی بندات چون بوت مھر ءِ ؟ رپیل گُش اِیت من سمّی ءِ کِر ءَ وتی مھر ءِ پدّر نہ کُتھ ءُ سمّی ءَ ھم نہ گُشتگ کہ من ءَ رپیک ءِ گوما مھر اِنت ۔

سمّی آھِری سوگات ءَ کہ رپیک ءَ دنت اکسے کہ اِشانی جُدائی ءَ پیش دارگ ءَ اِنت اِے اَکس وت گپ کنگ ءَ اَت پد ءَ سمّی ءَ گُشت کہ “مئے دود انچوش اَنت کہ مارا دارگی اَنت دل ءَ “بلے اِے چیز زاھر نہ اِنت کہ اِشانی دیم ءَ کُجام دوداں داشتگ؟-

اِیشانی لوٹ ءُ مھر ءِ دیم ءَ کُجام دیوال اَتکگ؟البتہ انچو گُش اَنت کہ لھتیں چیز پہ چاروک ءَ یہ پہ وانوک ءَ یل دیائین اِیت کہ چاروک ءُ وانوک بہ جیڑ اِیت ءُ بہ مار اِیت ، ھمے آرٹ ءِ لزت اِنت ءُ اے کوالٹی کمالان ءِ تہ ءَ مان اِنت کہ وتی چاروک ءَ ھینار کنت ءُ جیڈگ بہ پرما اِیت –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

بلوچستان ءِ دمگ مچھ ءَ “کوئلہ فیلڈ “سلاہ بندیں مردمانی اُرش ءَ یازدہ کاریزکار بیران ءُ دَہ ءَ گیش زدگ بیتگ اَنت- کُشتگیں مردمانی سیادی ھزارہ برادری ءَ اِنت –

پولیس ءِ گوشگ اِنت کہ سلاہ بندیں مردماں مچھ ءَ “کوئلہ فیلڈ ” ءَ کار کنوکیں کاریزکار آوار جنگ ءُ نزیکیں کوھاں برتگ ءُ آ تیرگواری کنگ ءُ کُشگ بیتگ اَنت –

پولیس ءِ گوشگ اِنت کہ تیرگواری ءِ آسر ءَ دَہ زدگ بیتگ اَنت کہ چریشانی تہ ءَ بازیں کاریزکارانی جاور نگیگ اَنت، زدگ بیتگیں مچھ ءِ نادراہ جاہ ءَ برگ بیتگ اَنت –

تیرگواری ءِ وئیل ءَ پد پولیس، دمگدار ءُ ایف سی ءِ بازیں سپاھیگے وئیل جاہ ءَ سر بیتگ اَنت –

وکداراں تنی وھدی وئیل ءِ بارہ ءَ ھچ نہ گوشتگ ءُ دمگی مردمانی گوشگ اِنت کہ کُشتگیں مردمانی سیادی ھزارہ برادری ءَ اِنت کہ ناگتی نیکراھی جنگولاں پجار کنگ ءَ پد کُشتگ اَنت –

زانگ بہ بیت چریشی ءَ پیسر ھم نیکراھی جنگولانی نیمگ ءَ ھزارہ برادری ءَ سیادی داروکیں مردم تیرگواری ءِ نشانگ ءُ تراکانی نشانگ کنگ بیتگ اَنت کہ چریشی ءَ داں انیگ ءَ ھزارانی کچ ءَ بیرانی بیتگ اَنت –

ھزارہ برادری ءِ سر ءَ بیتگیں اُرشانی ھلاپ ءَ بازیں کچے ءَ زھرشانی ھم وھد بیتگ اَنت بلے سدکی دیگ ءَ پد زھرشانی ھلاس کنگ ءُ بلے اُرشانی درچ برجاہ

پاکستان ءَ درسیں جنگی رھبند لگتمال کرتگ ءُ لس مھلوک ءَ جنگی بالیگرابانی سر ءَ نشانگ کنگ انت- ماما قدیر بلوچ

دی بلوچستان پوسٹ

سندھ ءِ مزن شھر کراچی ءَ وائس فار بلوچ مسنگ پرسنز ءِ زھرشانی برجاہ، زھر شانی ءَ مروچی چار ھزار ءُ یک سد ءُ ھپتاد ءُ نُھ روچ سرجم بوتگ –
وائس فار مسنگ پرسنز آف سندھ ءِ کنوینئر سورٹھ لوھار، سسی لوھار ءُ دگہ باسکاں وھدیکہ مختیار سومرو ایڈوکیٹ، شاھد عباسی ایڈوکیٹ، سرویچ ایڈوکیٹ ءَ بنجل ءَ اتکگ ءُ بیگواھیں مردمانی کھولانی گون ءَ دلپدری درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ گوشتگ کہ دوھزار ءُ بیست ءَ وتی سیاھیں تاک نبشتگ کرتگ، زورگپتیں ریاست ءَ بلوچ پرزندانی ھون ریتکگ ءُ اے سیاھیں سال ھم گوستگیں سالانی وڑ ءَ پاکستانی زوراکی برجاہ بوتگ اَنت، دسمبر ءِ ماہ ءَ ریاست ءَ وتی زوراکی چہ کلات ءَ بندات کُرتگ ءُ پنجگور ، بولان ءَ تاں کہ دنیگت ءَ یکشل ءَ برجاہ انت –

آئی ءَ گوشتگ کہ اے وھد ءَ ریاست ءِ نیمگ ءَ چہ پُرایمنیں جد ءُ جھد ءَ وڑ وڑیں پندلانی دیمپان انت، ھستیں تاکت وتی جوڑ کرتگیں ڈیتھ اسکواڈزانج ھمراھی ءَ پرایمنیں جد ءُ جھد ءَ درگان درگان کنگ لوٹ انت –

آئی ءَ گوشتگ کہ پاکستان ءَ درسیں جنگی رھبند لگتمال کرتگ ءُ لس مھلوک ءَ جنگی بالیگرابانی سر ءَ نشانگ کنگ ءَ اِنت چریشی ءِ آسر ءَ چک ءُ زالبولاں ھوار مھلوک ءَ مالی ءُ جانی تاوان رس اِتگ –

ماما قدیر بلوچ ءِ گوشگ اَت کہ بلوچ راج ھما زوراکیانی دیمپان انت کہ الجزائر ءَ سامراج فرانس ءُ بنگلہ دیش ءَ پاکستان ءِ زورکیانی دیمپانی بوتگ – ھاکم مارا ایمنیں جاورانی ءِ پیداوار گوشگ ءُ مئے سر ءَ زوراکی کنگ انت ءُ وتی ایردستی برجاہ دارگے جھد ءَ اَنت –

نبشتانک: راج بانک ءِ وامدار انت

نبشتہ کار: حاجی حیدر
رجانک: نبیل ارمان

دی بلوچستان پوسٹ

لھتیں مردمانی بالاد انچو مزن انت کہ وھدے من بانک ءِ مرگ ءِ ھال اشکُت گڑا ھمے پیسلہ کت اے بابت ءَ من وتی ھیالاں درشان بہ کناں چی ءَ کہ اے نام پمن ءَ مدام آژنائیں نامے بوتگ ءُ بلے چی ءَ مہ بیت؟ چی ءَ کہ آئی ءَ ورنا گوں کتاباں آژنا کت انت ، لبزانکار ءُ نبشتہ کاراں وانگ ءِ راہ پیش ئِے داشت ، گوں چاگرد ءُ راجدپتر ءَ آژنا ئِے کنائینت اَنت ، گوں جھد ءَ ھمگرنچ ئِے کت اَنت ءُ کتابانی شوک ئِے پیداک کت۔

بلوچ ءُ بلوچستان آئی ءَ جنگ ءِ چیدگ ءِ نام ءَ یات کنت ، بلے سنگتاں من وتی کم زانتی ءِ منّگ ءَ تیاراں ءُ چہ لجّ ءَ برز گپ وھدے بانک ءُ آئی ءِ جھد ءِ بئیت گڑا من کے ءُ منی بالاد چی؟بانک تئی شھادت ءِ ھال ءَ اگاں بزوراں ءُ گپ بہ جناں گڑا ھاوند ءِ سوگند کہ روایتی رنگ ءَ تئی بالاد ءِ سنگ ءُ پارسنگ ءَ نہ کناں چی ءَ کہ اے تئی ءُ گوں تئی جھد ءَ ناانساپی بیت اگاں جَھل ءُ برزی ءِ بُوت گڑا تئی نازرکیں تب ءَ چہ پھلی ءِ امیت ءَ لوٹ آں ۔

بانک تو مارا اے واست ءَ دوست نہ بہ ئے کہ تو بلوچ ءِ آواز تمپ ءَ بہ گر داں میان استمان ءَ مُھکمیں دابے ءَ سر کتگ اے واست ءَ ھم نا کہ تو ورنایاں وانگ ءُ نبشتہ ءِ دلبڈّی داتگ اے واست ءَ ھم نا کہ تئی ھاٹیگ ، اوپار چو کوہ ءَ برز بوتگ اے واست ءَ ھم نا کہ تئی وشی، گم ءُ سیالی درست گوں راجی نپ ءَ بندوک بوتگ اَنت ۔ بانک تو راج ءَ را اے واست ءَ دوست بہ ئے کہ تو سبر ءُ اوپار کنوکیں انسانے بوتگ ئے تو راھشونے بوتگ ئے ءُ تو بلوچستان بوتگ ئے ءُ تمپ ، رکشان ءُ جالاوان ات ئے بانک تو گوں وتی کرد ءَ سرجمیں آشوبے ات ئے۔

بانک ھما انسان ات کہ آئی ءَ وتی راج ءَ را وامدار کت اگاں انّوگیں بلوچ راجکاری ءَ بہ چار ئے ءُ بانک ءِ پگر ءَ بہ چار ئے گڑا بلوچ ورنا بانک ءِ وامدار بنت چی ءَ کہ تئی دلیری ، مارشتی زمہ واری ءُ راستی راج ءَ تئی وامدار کنت چی ءَ کہ تو زد کینگ ءُ ترس ءَ چہ برز یک برزشانیں رھشونے ات ئے۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

مڈیانی گر ءُ دار کنوکیں واکدارانی بنشون ءِ نیمگ ءَ شنگ کرتگیں درشان ءِ تہ ءَ گوشگ بوتگ کہ گوستگیں سال ءَ ھپتاد ءُ یک وئیلاں چہ نود ءُ دو کاریزکار بیران بوتگ اَنت ءُ وھدیکہ دو سد ءَ گیش ٹپی بوتگ اَنت، بیران بوتگیں مردمانی ھمگرنچی گیشتر اوگستان ءُ دگہ اُستاناں بوتگ انت –

بلوچستان ءِ تہ ءَ اشکرانی کاریز ءَ کاریزکارانی بیرانی برجاہ انت – مچھ، ھرنائی، شاھرگ، دکی ءُ چمالنگ ھوار ایندگہ دمگاں اشکرانی کھناں دیم ءَ اتکگیں وئیلاں بازیں کاریز کار ءِ زدگ ءُ بیران بوتگ اَنت –

کاریزکارانی رِد ءَ اشکرانی کھن ءَ آسراتی ءِ نہ بوگے سوب ءَ بازیں کاریز کارے مرگ ءِ دیمپان انت – اشی ءَ پیش دوھزار ءُ ھژدہ ءِ سال ءَ یک سد ءُ بیست ءُ یک کاریز کار بیران بوتگ اَنت وھدیکہ رپورٹ ءِ رِد ءَ دوھزار ءُ نوزدہ ءَ سَے سد ءَ گیش بیران بوتگ اَنت – بلے انگت ءَ ھچ وڑیں گامگیج زورگ بوگ ءَ نہ انت –

کاریزکارانی گوشگ انت کہ کاریزانی مستر ءُ سرکار ءَ کاریزکارانی جانانی پرواہ نیست وھدیکہ چیف انسپکٹر مائنز ءِ گوشگ انت کاریز کار وت پھریز نہ کن انت –
مڈیانی گر ءُ دار کنوکاں گوستگیں سال ءِ درشان ءَ گوشگ بوتگ کہ اے سال ءَ اشکرانی کھن ءَ کمے کاریز کار بیران بوتگ بلے کاریزکارانی گوشگ اِنت کہ بلے دنیگت ءَ ھچ وڑیں آسراتی دیگ نہ بوتگ اَنت –

مڈیانی شوھاز کنوکیں واکدارانی درشان ءِ تہ ءَ گوشگ بوتگ کہ بلوچستان ءَ شش اشکرانی کھناں دوھزار ءُ بیست ءَ کاریزکاری ءِ میان ءَ کرود ءِ لمبگے سوب ءَ بازیں وئیلے دیم ءَ اتکگ وھدیکہ گیشتریں وئیل دکی ءِ کھناں دیم ءَ اتکگ انت –

زانگ بہ بیت بلوچستان ءِ تہ ءَ زمین ءِ چیر ءَ گیشتر “پلر اینڈ روم “چہ کاریز کاری بوگ ءَ انت چُشکہ اے کاریزکاری ءَ بیمناک تریں کار انت ـ سرجمیں دنیا ءَ اے وڑ ءُ پیم ءِ کارمرز کنگ بند بوتگ –

بلوچستان ءِ تہ ءَ گوستگیں دہ سالاں یک سد ءُ پنجاہ ءَ گیس تراک بوتگ، چریشی ءَ سدانی کچ ءَ بزگ بیران بوتگ انت –

اے درسیں وئیلاں چہ بدترین وئیل سال دوھزار ءُ یازدہ ءَ کہ مچھ ءِ دمگ ءَ دیم ءَ اتکگ کہ اود ءَ کھنے ءِ تہ ءَ گیس پر بوگ ءَ تراک بوتگ ـ تراک ءِ سوب ءَ پنجاہ ءُ دو بزگ بیران بوتگ اَنت پمے ھاتر ءَ کہ مزدورانی رکینگے ھاتر ءَ مشین نہ بوتگ کش ءُ کری لس مھلوک ءَ وتی کمک ء وت زمین کونڑتگ ءُ مزدور کش اتگ انت –

بلوچ یکجھتی کمیٹی ءِ نیمگ ءَ کریمہ بلوچ ءِ ”کوش “ءِ ھلاپ ءَ بلوچستان ءَ بیوکیں زھرشانیانی سر ءَ ریاست نیمگ ءَ لس مردماں بیھار دیگ ءِ ھلاپ ءَ شال ءَ یک زھرشانی روانک ءِ کشگ بیتگ – دمگداراں روانک دیم ءِ داشتگ ءُ زھرشانی کنوکانی دارگ ءِ جھد اِش کرتگ –

دی بلوچستان پوسٹ

بلوچ زالبول رھشون ءُ بی ایس او آزاد ءِ گوستگیں چیئرپرسن کریمہ بلوچ ءِ “کوش ” ءِ ھلاپ ءَ بلوچستان ءَ ھوار درملکاں زھرشانی درچ برجاہ اَنت

بلوچ یکجھتی کمیٹی ءِ دزبندی ءَ مروچی شمبے ءِ روچ ءَ بلوچستان ءِ بنجاھی شھر شال ءَ بلوچستان ءِ بازیں جاہ آواران، مند، دشت، نوشکی ءَ پاکستانی پوج ءُ چیریں ادارھانی نیمگ ءَ زھرشانی دارگ ءِ ھلاپ ءَ یک روانکے کش اِتگ-

شال ءِ پھزداراں پریس کلب ءِ بزیک ءَ زھرشانی ءِ دارگ ءِ جھد کرتگ، بلے زھرشانی کنوکاں پولیس نہ مرینتگ ءُ مزن آمیدگس ءِ دیم ءَ نندانک جتگ-

روانک ءَ ھواریں ڈاکٹر مھرنگ بلوچ ءِ رد ءَ روانک ءِ دیم چہ شال ءِ پریس کلب داں مزن آمیدگس ءَ وتی زھرشانی سرجم کنگی بیتگ بلے پھزداراں ریڈزون ءِ بھانگ کرتگ ءُ روانک ءِ دارگ ءِ جھد کرتگ –

مزن آمید گس شال ءِ دیم ءَ زالبول، چُک ءُ نودربرانی بازیں کچے ءَ دستاں زنجیر ءَ چماں سیاھیں پُچ بستگ ءُ زھرشانی کرتگ –

ھمے وھد ءَ ڈاکٹر مھرنگ بلوچ ءَ گوشت کہ بلوچستان ءَ ریاستی زوراکی ءِ جاور ھال درسانی دیم ءَ اَنت توار چِست کنوکاں نشانگ بہ کن، زالبولاں آوار جنگ ءِ بیھاری دیگ بیگ ءَ اَنت –

آئی ءَ گوشت کہ مروچی شال ءَ پھزداراں مئے پُرایمنیں جد ءَ جھد ءِ دارگ ءِ جھد کرتگ اگاں شال ءِ جاور ایش اَنت گڑا اشی ءَ بہ زان اِت کہ بلوچستان ءِ دوریں ھندانی جاور چی بیت کن اَنت –

آئی ءَ گوشت کہ گوادر ءَ ھوار بازیں جاھاں زھرشانی کنوک بیھار دیگ ءَ بیگ ءَ اَنت مئے رھشوناں کشگ ءَ اَنت آ سرپد بنت بلوچ بے توار بہ بنت –

آئی ءَ گوشت کہ شال ءِ شھر ءَ رسانکدر بند کنگ بیتگ اَنت ھمے سوب ءَ مئے زباناں کُبل لگ اِتگ ءَ ھمے رنگ ءَ مزن آمید گس ءَ ھم کُبل جنگ بہ بیت اے اسمبلی بت اَنت –

شال ءَ بلوچ یکجھتی کمیٹی ءِ نیمگ ءَ کش اِتگیں روانک ءَ پشتون تھپز مومنٹ ءِ بنجاھی رھشون آغا زبیر، نیشنل ڈیموکریٹک پاٹی ءِ سروک ڈاکٹر حئی، چاگردی باسک حمیدہ نور، وکیل ھالدہ ضیاء ءَ ھوار جتا جتائیں تکاں بندوکیں مردماں بازیں کچے ءَ بھر زرتگ –

چہ یک ھپتگے ءَ بولان ءَ پاکستانی پوج ءِ نیمگ ءَ لشکر کشی برجاہ اَنت، لشکر کشی ءِ وھد ءَ بیگواھی، لوگ ءُ جنگلانی سوچگ ءِ ھال سر بیتگ اَنت ءُ ھمے رنگ ءَ پنجگور ءَ پوج ءَ یک لوگے ءَ بیڑ برتگ ءُ چُک جنین لَٹ ءُ کُٹ کرتگ اَنت –

دی بلوچستان پوسٹ

بلوچستان ءِ دمگ بولان ءَ لشکر کشی مروچی ھم برجاہ اِنت چریشی ءَ پوج ءَ بازیں جاھاں چپ ءُ چاگرداں پیش گامی کنگ ءَ اِنت وھدےکہ بمبگواریں بالگرد ءُ چیریں بالیگانی برز ءَ بال برجاہ اِنت –

گیشیں ھالانی رد ءَ مروچی ھپتمی روچ ءَ بولان ءِ کش ءُ گوری دمگ بزگر، گڑانگ، یخو ءُ اُچ کمان، چیسن، پوڑ ءُ میاں کور ءَ پوج ٹوھیں لشکر کشی ءِ کنگ ءَ اِنت – لشکر کشی ءِ وھد ءَ پوج سھت ءُ دمان مارٹر گولہ ھم آس دیگ ءَ اِنت –

دومی نیمگ ءَ ھرنائی ءَ ھواریں دمگ جھالاوان، پنکی، لونج، میژداری ءُ کش ءُ گوری دمگاں پوج پیش گامی کنگ ءَ اِنت – چہ شاھرگ ءَ گوستگیں روچاں پانزدہ مردم دزگیر کنگ ءَ پد پوج ءَ ناشناسیں جاھاں برتگ اَنت کہ داں انیگ ءَ آیانی ھال نیست –

دمگی مردمانی رد ءَ گوستگیں روچ ءَ کمان ءَ پوج ءَ قادربکش سمالانی ءِ لوگانی مڈیانی برگ ءَ پد لوگ مانداشتگ اَنت- چریشی ءَ پیسر غربوک، سجاول ءِ سبزاوگیں جنگل ءِ سوچگ ءِ ھال ھم سر بیتگ اَنت –

جنگ زدگیں دمگ ءِ انگیر بیگ ءِ سوب ءَ جانی ءُ مالی تاوانی سرجمیں ھالانی رسگ مشکل اِنت، بلے دمگی مردماں گوشتگ کہ رؤ آیگ ءِ راہ ءُ درانی بند بیگ ءَ گیشتر ھما مردماں کہ نادراہ اَنت آیانی واستا مزنیں جیڑھے مِک اِنت –

واکداراں ھپتمی روچ ءَ برجاھیں پوجی لشکر کشی ءِ بارہ ءَ تنی وھدی ھچ ھال دیم ءَ نیاؤرتگ –

ھمے وڑ ءَ بلوچستان ءِ دمگ پنجگور ءَ پاکستانی پوج ءَ یک لوگے ءَ بیڑ برتگ ءُ اود ءَ چُک ءُ جنینانی سر ءَ زوراکی کرتگ –

چہ پنجگور ءَ گیشیں ھالانی رد ءَ گوستگیں شپ ءِ ساھت ھشت ءَ پاکستانی پوج ءَ بابر یوسف ء ھاجی عبدالحمید ءِ لوگانی سر ءَ بیڑ برتگ ءُ اود ءَ لوگ پَٹ ءُ ھند کرتگ ءُ جنین ءُ چکانی سر ءَ زوراکی کرتگ –

نبشتانک: آپریشن سرچ لائیٹ ءُ بلوچ راج

نبشتہ کار: شُگپتا بلوچ

دی بلوچستان پوسٹ

اِے گپ ءَ ما دْراہ زان ایں کہ پاکستان ناں سندیاں ٹھینتگ، ناں کہ پاکستان ءِ ٹھینگ ءِ لوٹے بلوچ راج ءَ ھست اَت ءُ نَیکہ پشتواں پاکستان ءِ ساچ کنگ ءَ واھشتے ھست اَت۔ گُڑا چہ اد ءَ یک سوالے چِست بیت کہ اِے پاکستان زاناں کَے ءَ ٹھینتگ؟-

البت ما پسّو ءَ گْونڈ کنان ءَ شُمارا سرپدی دے ایں کہ پاکستان انگریز ءُ بنگالیاں ٹھینت! باید اِنت ما بے ھال مہ بہ ایں کہ ھندوستانی راجی آجوئی جُنز ءِ میان ءَ زورگیریں انگریز سرکار ءَ ھندوستانی راج ءِ تہ ءَ ھندوّ ءُ مسلمانانی نیکراھی جیڑہ ودی کُتگ انت کہ ھندوستان ءِ راج ناتپاک ءُ چُنڈچُنڈ بہ بیت ءُ چریشی ءَ جُنز اش وت نزور تر ایت، پرے ھاتر ءَ “ڈوائیڈ اینڈ روُل” ءِ پارمولا ءِ بُنیات ءَ انگریز ءَ ھندوستان راج ءِ تہ ءَ نیکراھی نپرت ءُ کینگ ودی کنائینتگ انت کہ ھندوستان ءِ ھندوّ ءُ مسلمان ناتپاک بہ بنت۔ ماں اِے کاریچ ءَ مّلا (سر) سید اھمد ھان، مھمد اَلی جناہ ءُ لیاکت اَلی وڑیں کوڑائیں مسلمانانی رھشُون انگریز سرکار ءِ کاسگ چٹّ بیتگ انت۔ پد ءَ انگریزاں ھم ھمے وتگڑیں ھندوستان ءِ اسلامی نیکراھی رھشُونانی پلہّ مُرزی ءِ شوندات دیم ءَ بُرتگ ءُ آیاں بے بُنیات، وتگڑ ءُ کوڑائیں دو راجی سسّا ءِ لکیھ ءِ سر ءَ ھندوستان ءِ دو بھر کنگ ءُ یک نوکیں مُلک پاکستان ءِ اڈ کنگ ءِ شَور ءُ مراسا ءِ پلہّ مُرزی کُت۔ چریشی ءَ رَند ھندوستانی مسلمانانی رَدیں مُلکاری گل مسلم لیگ ءِ اولی نِند ءُ نیاد بنگلہ دیش ءِ بُنجاھی شھر ڈھاکہ ءَ بیتگ کہ اود ءَ ھمے کوڑائیں مُلکاری گل مسلم لیگ اڈ کنگ بیتگ اَت۔ پد ءَ گیشتر ھمے بنگالی ءُ ھندوستانی مسلمان (انچوشکہ مرچیگیں مُھاجراں) پاکستان ٹھینگ ءِ رَدیں جُنز دیم ءَ بُرتگ۔
وھدیکہ 1947 ءَ پاکستان انگریزاں وتی جِند ءِ پائدگ، کست ءُ کینگ ءِ آسر ءَ اڈ کُت گُڑا پاکستان ءَ بنگالی زبان ءَ سرکاری درجگ نہ دات بلکیں ھندی(اردو) ءَ پاکستانی سرکاری زبان ءِ درجگ بیتگ۔ گُڑا اِے سوڑگ ءِ ھلاپ ءَ بنگالیاں وتی راجی زبان ءِ پھازگ ءُ زبان ءِ دیمروی ءِ واست ءَ بلاھیں جُنزے دیم ءَ بران ءَ ھرجاھاں زھرشانی کُت کہ ما پاکستان ءِ مستریں راج ایں ءُ ماں پاکستان ءَ گیشتر بنگالی زبان ءِ گپ کنوک اَنت گُڑا ھندی چو پاکستان ءِ سرکاری زبان بیت؟ ءُ ما بنگالی ماں وانگجاھاں وتی جِند ءِ راجی زبان وان ایں ءُ بنگالی زُبان پاکستان ءِ سرکاری زبان ءِ اول درجگیں زبان بہ بیت۔
بلے پاکستان ءَ ایشانی جُنز ءِ ھلاسی ءَ فروری 1952 ءَ زھرشانی کنوکیں مھلوک ءِ سر ءَ گوں تُپنگ ءُ تِیراں یک ٹوھیں اُرشے کتگ ءُ بے کساس بے گُناھیں مردم ئِے کُشتگ انت۔ بزاں ھمے پاکستان ءَ اولی زُلم ءُ کھر ھمے بنگالی راج ءِ سر ءَ کُت کہ آیاں پاکستان ءِ ٹھینگ ءَ سک جُھد کُتگ اَت۔ البت ھون ریچی ءُ کُربانی ءِ آسر ءَ بنگالی راج وتی اِے جُنز ءَ سوبین بیتگ انت ءُ پد ءَ بنگالی زبان پاکستان ءِ اول درجگیں سرکاری زبان بیتگ البت اِے ناھکّیں کُشت ءُ کوش ءِ ھون ریچی ءَ بنگالی راج ءَ اے سرپدی دات کہ بنگالیاں گوں پاکستان ءِ اڈ کنگ ءَ یک بلاھیں ردی یے کُت ءُ نی بنگالی گوں پاکستان ءِ پنجابی ءُ سندیاں ھوار نہ جُنز اَنت۔ چہ ھمے پیشامَد ءَ بنگلہ دیش ءِ آجوئی ءِ سسّا ماں بنگالی راج ءِ تہ ءَ رُدان بوت۔ یک نیمگے ءَ پاکستانی لشکر ءَ رودرآتکی پاکستان(بنگلہ دیش) کاسگ چٹّ ءُ راجدْروھیں جمائت اسلامی وڑیں نیکراھیں مُلکاری گل پہ راجدوستیں بنگالیانی ھلاپ ءَ دیم ءَ آؤرت انت ءُ دومی نیمگے ءَ پاکستان ھمے بنگالیانی ماھیگ، کرپاس ءُ برنج وڑیں کِشت ءُ کِشارانی پُلگ ءُ برگ ءُ روایرشُتی پاکستان ءِ پنجابی پَرگِنگ ءَ دیمروی دیگ ءَ کارمرز کنگ بندات کت۔ پد ءَ کم کم ءَ بنگالی راج ءَ گلامی ءِ مارشت ودان بوت انت کہ ما زیر دستیں راجے ایں ءُ ماں اِے اِستان ءَ بنگالی راج ءَ ھچ بستارے نیست۔

وھدیکہ 1970 ءِ راجی گچینکاری ءَ بنگالیاں باج بُرتگ گُڑا زُلپکار بھٹو ءُ جنرل یایا وڑیں بے اگلیں روایرشُتی پاکستانی سیاسی مُلکاراں بنگالیانی رھشُون شیک مُجیب اُلرھمان ءَ پاکستان ءِ ھاکمی دیگ ءَ بج اِت انت۔

وھدیکہ بھٹو ءُ جنرل یایا وڑیں روایرشُتی پاکستانی مُکار ءُ لشکری سروگاناں بنگالیاں استان ءِ ھاکمی دیگ ءَ نا کُت گُڑا پہ “آوامی لیگ” ءِ ھک ءَ رودرآتکی پاکستان بزاں “بنگلہ دیش” ءِ ھر شھر ءُ دمگاں تْرُندیں زھرشانی ءُ روانک درآتک انت ءُ زیت بنگالیاں مار اِت کہ نی زاناں ما پاکستانی نہ ایں کہ مئے گچینکاری ءِ باج ءَ روایرشُتی پاکستان ءِ مُلکار ءُ لشکر نہ منّگ ءَ انت؟ ھمے زھرشانی ءُ روانک پد ءَ سوبمندیں آشوبے ءَ بدل بوت انت ءُ اود ءَ بنگلہ دیش ءِ راجی آجوئی ءِ ھلوت ءَ ماں ھر گِدان ءَ بْرمش کت۔ دومی نیمگ ءَ پاکستانی لشکر ءَ زھرشانی ءُ رونکانی ھلاسی ءَ زُلم ءُ جبر بندات کُت کہ بنگال راج ءِ زھرشانی اِے وڑ ءَ زُلم ءُ بیھار کنگ ءَ ھلاس بہ بیت بلے چریشی ءَ ناں کہ جاور روچ پہ روچ ھراب بوُان بوت انت بلکیں گیشتریں زُلم ءُ جبر ءِ برکت ءَ راجی آجوئی ءِ آشوب ءَ ھم دیمرئی کت۔ ھر نیمگے ءَ نی جنگ ءُ چوپ اَت، بنگالی راج ءِ ورناہ ءُ کماشانی کُشگ ءُ جونانی چگل دیگ الباریں گپے اَت ءُ بنگالی راج ءِ تہ ءَ گلامی ءِ مارشت ءُ راجی آجوئی ءِ آگاھی کندیل روکی شَھمگ ءَ اَت کہ باید انت نی ما یک وتواجھین ءُ آجوئیں ڈیھ بنگلہ دیش ءِ ٹھینگ ءَ پاد بیا ایں۔

آپریشن سرچ لائیٹ:

آپریشن سرچ لائیٹ پاکستانی لشکر ءِ یک زُلم ءُ زوراکیں جنگی لشکرکشی یے ءِ چیرنامے اَت کہ پاکستانی لشکر ءَ 25 مارچ 1971 ءَ پہ بنگالی راجی آجوئی جُنز ءِ ھلاسی ءَ آجوئی لوٹوکیں بنگالی راج ءِ سر ءَ بُنگیج کتگ اَت۔ چوناھا آپریشن سرلائیٹ ءِ بُنکی مول ءُ مراد ایش اَت کہ بنگلہ دیش ءِ ڈھاکہ ءُ چِٹاگانُگ ءِ دابیں مستریں شھر سرجمی ءَ پاکستانی لشکر ءِ چنگُل ءَ بیا اَنت ءُ رَند ءَ ” بنگابندو”شیک مُجیب الرھمان ءِ رھشُونی ءَ راجی آجوئی لوٹوکیں بنگالی لس مھلوک بے دردی ءَ کُشگ بہ بیت، بزاں یک نیمگے ءَ بنگالی نودربر، شھدربرجاہ ءُ زانشجاھانی رھدربر، ندکار ءُ مُلکاری گل “آوامی لیگ” ءِ سیاسی جُھدکار ءُ راجی رھشُونانی کُشگ ءُ دزگیر کنگ بہ بنت ءُ دومی نیمگے ءَ بنگالی پولیس ءِ سِلاہ پچگِرگ، وتگُشی ءُ ٹیلی پون ءِ بُنجاہ زورگیر بہ بنت کہ ھچ کس مہ زانت کہ چے بوتگ۔ ھمے بدیں لشکرکشی چیرنام “آپریشن سرچلائیٹ” ءِ نام ءَ پرگنگ ءِ ھر مسترین ءُ کستریں دمگ ءُ شھراں شپ ءِ نیم ءَ تا سُھب ءِ بام ءَ یکشل ءَ برجاہ دارگ بیتگ چریشی ءَ بے کساس ناھکّیں بنگالی نودربر ءُ رھشُون کُشگ بیتگ اَنت۔

ما اِے گپ ھجبر شموشکار مہ بہ ایں کہ بنگالی راج ءِ سر ءَ اِے اندوھیں آپریشن ھما وھد ءَ برجاہ دارگ بیتگ وھدیکہ پاکستانی مُلکاری گل ءُ لشکری ترامگیج ءَ اگل آتک ءُ سرپد بوت انت کہ چہ 1970 ءِ گچینکاری ءَ بنگالی راجدوستیں مُلکاری گل “آوامی لیگ” ءَ باج بُرتگ ءُ یک نیمگے ءَ ما آیاں سرکار ءِ اڈ کنگ ءَ نئیلگ ءَ ایں ءُ دومی نیمگ ءَ ما آیاں کُشگ ءَ ایں بزاں آیاں ماں وتی اگل ءَ پْروش وارتگ ءُ منّ اِت اش ما بَنگالی ءِ راج ءِ سر ءَ ٹوھیں زُلم ءُ جبر کُتگ اَنت کہ نی بنگالی راج پہ پاکستان ءَ ھچ مھر ءُ دوستی نہ دار ایت ءُ بنگالی ھجبر وت ءَ پاکستانی ھم نہ منّ اَنت پمیشکا نی گُڈسری بیا اِت ءُ ایشانی مستریں رھشُون، ندکار، نودربر ءُ رھدربراں بہ کُش این ءُ بنگالی جنین آدماں زورانسری زِنا کن ایں گُڑا گُمان بیت کہ بنگالی بے رھشُون بہ بنت ءُ پد ءَ تُرس ءُ بیھار ءِ تھاروکی ءَ اِے آشوب گار ءُ گسر بہ بیت۔ بلے اِے یک پاکستانی مُلکار ءُ لشکری مِیس کلکولیشنے اَت، پاکستانی لشکر ءِ یک رَدیں ھیال ءُ سوڑگے اَت کہ چہ اے وڑیں لس مھلوک ءِ کُشت ءُ کوش ءَ ندکار، نودربر ، راھبر، رھشُون ءُ لس مھلوک ءِ ناھکّیں کُشت ءُ کوش ءُ جنین آدمانی بدیگ ءُ زورانسریں زِناکاری ءَ راج ءِ تہ ءَ گیشتر گلامی ءِ مارشت ودی بنت ءُ راج وتی جُتائیں راجی پجّار ءُ وتواجھی ءِ ھاتر ءَ پاد کیت ءُ راجی آجوئی ءِ آشوب ءَ بھر زُور انت۔ اِے وڑیں زُلم ءُ ناھکّیں کُشت ءُ کوش ءِ آسر ءَ بنگلہ دیش ءِ ڈولیں راج گیدی ءِ دیم ءَ کا ینت کہ آیاں ھمے پاکستان وت اڈ کُتگ اَت۔ ما بے ھیال مہ بہ ایں کہ ابید روس ءُ انڈیا ءَ سرجمیں گیدی ءِ مُلک ءُ میان اُستمانی چاگِرد بنگلہ دیش ءِ آجوئین ءُ وتواجھیں ڈیھ ءِ ھلاپ ءَ اَت۔ میان اُستمانی راجی تپاکی گل (یو این) ءَ بنگلہ دیش ءِ ھکّ ءَ ھپت ووٹ آتک ءُ پاکستان ءِ ھکّ ءَچاردہ ووٹ کپت بزاں اے سرجمیں جھان بنگالیانی آجوئی ءِ ھلاپ اَت بلے انگت ھمے بنگالی 18 دسمبر 1971 ءَ آجو بیتگ ءُ پاکستان ءِ 930000 لشکر ءَ گیدی ءِ مستریں مھلوک ءِ دیم ءَ سرجھلی کُت کہ ماں انگریزی ءَ اِے جنگی گال ءَ”پبلِک سُرینڈر” گْوش اَنت۔

نی من وتی نبشتانک ءَ گْونڈ کنان ءُ گْوش آں اگاں ما بلوچ دنیا ءِ زیردستیں راجانی سر ءَ اِے وڑیں بازیں لشکرکشی ءُ جنگی اندوھاں چمشانکے بہ دے ایں گُڑا ما سرپد بہ ایں کہ آجوئی لوٹوکیں گلامیں راجانی سر ءَ اِے دابیں کھر ءُ زُلم ھما وھد ءَ بنت وھدیکہ دژمن ءِ لشکر ءَ باور بیت کہ آجوئی لوٹوکیں راج وتی زِرد ءِ تہ ءَ مارا نپرت کنت ءُ وت ءَ زوراکیں ملک ءِ مھلوک نہ لیکھ ایت گُڑا ایکم بیت ءُ اِے دابیں زُلم کنت چی ءَ دژمن زانت کہ زُلم ءُ زورانسری گیشتر ملک ءِ تپاکی ءُ یکمُشتی ءَ پْروش دنت۔ ایشی ءِ آسر زیردستیں راج ءَ پہ وتی راجی آجوئی ءَ گیشتِر دلجم ءُ مھکم کنت ءُ سرپدیں راجانی رھُشون زورگیریں دژمن ءِ ساز کُتگیں ھر وڑیں پندلاں بے سوب کنان ءَ راج ءِ تہ ءَ ٹوھیں تپاک ءُ یکمُشتی ودی کنگ ءِ جُھد کن اَنت چریشی ءَ آشوب دیمرئی کنت۔ اِے دْراھیں چیز لشکری کتاباں ھم نبشتہ اَنت ءُ مئے دژمن ءِ جنرل اِے چیز ءَ شَر سرپد ءُ پوہ اَنت۔ البت وھدیکہ چیزجنگ ءَ پْروش بیت گُڑا گُڈسری دژمن اِے دگ ءَ زُور ایت ءُ زیر دستیں راج ءِ چُکچینی ئیں کُشت ءُ کوش کنت۔ چوناھیگا ما ساری گْوشت کہ بزگیں لس مھلوک ءِ ناھکّیں کُشت ءُ کوش، زورانسری ئیں زِناکاری ءُ رھشُونانی شھید کنگ دژمن ءِ پْروش ورگ ءِ ٹوھیں نشانی اَنت ءُ دژمن ءِ اِے وڑیں زُلم گلامیں راجانی راجی آجوئی ءِ جُنز ءَ نوکیں ھاٹیگے داد کنت ءُ اِے بارہ بلوچی بتلے ھم ھست کہ
“راج پہ مرگ ءَ گار نہ بنت بلکیں کَرَگ ءَ گار بنت”
بزاں پہ لج ءُ ڈیھ ءِ ھاتر ءَ مرگ ءُ سرانی ندر کنگ راجاں گیشتر زِندگ دار ایت بلے بدکِرد بیگ راجانی بے گْواھی اِنت پمیشکا باید اِنت ما بلوچ ھم سرپد بِہ بہ ایں کہ ما بلوچاں وتی دژمن ءَ ھمے باوری دات کہ ما ناں ایرانی ایں ءُ نَیکہ پاکستانی بلکیں ما وَ بلوچ ایں۔ مارا گوں شُما ھچ وڑیں سْیادی یے نیست۔ ما نَیکہ ھُشکنات ھند ءِ بھرے بیتگ ایں ءُ ناکہ پارس ءِ ءُ نَیکہ ما ھُشکنات ھند ءِ بَھر ءُ بانگ ءَ چیزے کار ھست۔ ما بس ھمے زان ایں کہ شُما مارا 27 مارچ 1948 ءَ زورگیری زیردست کت ءُ ما اِے زورگیری ءُ گلامی ءَ پِٹ دے ایں۔ بلوچ راج یک سرجمیں ڈیھ ءُ زبانے ءِ واھند ءَ انت ءُ بلوچ پہ وتی راجی پجّار، رود ءُ ربیدگانی پھریزگ ءُ ڈیھ ءِ آجوئی ءِ جُنز ءَ سوبین بوان ءَ اِنت۔ بزگیں بلوچ راج ءِ سر ءَ اِے ٹوھیں لشکرکشی، رھشونانی شھید کنگ بلوچ راج ءِ تہ ءَ دژمن ءِ ھلاپ ءَ بلاھیں نپرتے ودی کنان ءَ بلوچ چاگِرد ءَ گیشتر آگاھی دنت کہ بلوچ راج پاد کن کہ تو گلامے ئے ءُ وتی راجی آجوئی ءِ جُنز ءَ بھر بہ زُور ءُ آشوب ءِ کندیل ءَ دست کن۔ گُڈسری بلوچ راج ءِ چیرجنگ ءُ مُلکاری رھشوناں دزبندی اِنت کہ وتی زِدّ ءُ کینگاں شموش اِت ءُ راج ءِ یکمُشت کنگ ءَ دیم ءَ بیا اِت۔

گلامی ءَ پِٹ بات ءُ بلوچ راجی آجوئی ءِ جُنز سوبین بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

زالبولانی فاؤنڈیشن ءَ بلوچستان ءَ زالبولانی ھلاپ ءَ بیتگیں جاورھالانی بارہ ءَ سالگشتی ھال جنوری داں دسمبر 2020 ءِ شنگ کرتگ اَنت آئی ءِ رد ءَ اے سال ءَ 118 وئیلاں 66 زالبول کُشگ بیتگ اَنت –

زالبولانی فاؤنڈیشن “پَٹ ءُ پول داریں گل ” گوستگیں سال ءَ بلوچستان ءَ بازیں ھنداں زالبولانی سر ءَ بیتگیں وئیلانی پَٹ ءُ پولداری ھالے شنگ کرتگ کہ چریشی ءَ لوگی جیڑہ، وتکشی، آوار جنگ ءُ سلکاری کنگ ءَ پد کُشگ ءُ گیرت ءِ نام ءِ سر ءَ کُشگ ءُ دگہ وئیلانی سرجمیں کَچ ءُ کساس ھوار اَنت –

ھال ءِ رد ءَ جنوری داں دسمبر ءَ پیش اتکگیں وئیلاں کَچ ءُ کساسی ھشتاد ءُ چار کوش بیتگ اَنت چریشانی تہ ءَ شست ءُ شش زالبول ءُ ھژدہ مردین ھوار اَنت، گیرت ءِ نام ءَ کُشگ بیتگیں سِی ءُ سَے زالبول ءُ ھژدہ مردین کُشگ بیتگ اَنت –

زالبولانی لوگی جیڑھانی تہ ءَ دوازدہ وئیل بیتگ اَنت ھمے وڑ لوگی جیڑھاں تنگدست بیتگ ءُ سَے زالبولاں وتکشی کرتگ ءُ دوزادہ زالبول آوار جنگ بیتگ اَنت –

پَٹ ءُ پولداری ھال ءِ رد ءَ یک سد ءُ ھژدر بیتگیں وئیلاں زالبول ءُ چُکانی گون ءَ سلکاریاں ھشت وئیلانی ھال سر بیتگ اَنت – شال ءِ جتا جتائیں دمگاں بیست ءُ دو زالبول،یکے بارکھان، دہ جعفر آباد ءَ، بیست ءُ نُھ نسیر آباد ءَ، پشین ءَ جھل مگسی ءَ ھپت ھژدار، قلعہ عبداللہ، سبی، کچھی، بولان ءُ کلات ءَ شانزدہ وئیلانی ھال سر بیتگ اَنت –

ھمے رنگ ءَ پنجگور، لورالائی، نوشکی ءُ مستونگ ءَ ھبدہ وئیلانی ھال سر بیتگ اَنت وھدےکہ قلعہ سیف اللہ ءَ چار، لسبیلہ ءُ ڈیرہ بگٹی ءَ یک یکے، کیچ ءُ تربت ءَ پنچ، کوھلو ءُ سھبت پور ءَ سَے سَے وئیل دیم ءَ اتکگ اَنت –

سال دوھزار ءُ بیست ءَ زالبولانی کوشی وئیلانی پژدر ءَ بلوچستان ءَ بازیں کَچے ءَ زھرشانی کنگ بیتگ اَنت – بیتگیں وئیلاں ملک ناز، کلثوم، ناز بی بی، شاھینہ شاھین ءِ کوش ءُ کسان سالیں جنکو برمش بلوچ ءِ زدگ بیگ ءِ پژدر ءَ کنگ بیتگ اَنت –

ملک ناز ءِ کوش ءُ برمش بلوچ ءِ زدگ بیگ ءِ وئیل جون ءِ ماہ ءَ کیچ ءِ دمگ ڈھنک ءَ پیش اتکگ اَنت کہ اود ءَ سلاہ بندیں مردماں لوگ ءِ تہ ءَ پُترتگ ءُ نشانگ اش کرتگ اَنت – ھمے ماہ ءَ تمپ دازن ءَ سلاہ بندجں مردماں یک لوگے ءَ دور کرتگ ءُ اود ءَ کلثوم ء سعید ازابیں رنگے ءَ چار چُکانی دیم ءَ کُٹ اش برتگ اِت ءَ لوگ ءَ لکانی ساز ءُ سامان دزگ ءُ برگ بیتگ اَنت –

ھمے وڑ ءَ تاکار ءُ اکسکار شاھینہ شاھین ستمبر ءِ ماہ ءَ تیر جنگ ءُ کُشگ بیتگ – مھلوک ءِ زورانی سر ءَ پولیس ءَ شاھین ءِ کوش آئی ءِ لوگ واجہ نامینتگ داں انگت ءَ دزگیر کنگ نہ بیتگ –

بیتگیں ھر سئیں وئیلاں سیاسی ءُ چاگردی مردماں ھوار سول سوسائٹی ءَ ڈیتھ اسکواڈ ءِ زمہ وار کرتگ – زانگ بہ بیت پاکستانی پوج ءُ چیریں ادارھانی سر ءَ بھتام اِنت بلوچستان ءَ ڈیتھ اسکواڈ جوڑ کرتگ –

چریشاں ابید جولائی ءِ ماہ ءَ ھرنائی ءِ ماہ ءَ نشپا ءِ پاکستانی پوج ءَ یک پوجی آپریشنے ءِ میان ءَ اود ءَ ناز بی بی نامیں رُستگیں جنکے بیران بیتگ – اشی ءِ ھواری ءَ آئی ءِ پت قیصر چھلگری ءُ دو چُک کُشگ بیتگ اَنت –