TBP Balochi

نبشتانک: کولیبری ءِ پِستول

نبشتہ کار : عابد سُنگھر بلوچ

دی بلوچستان پوسٹ

من مُدام ماراِتگ کہ زِند ارزان اِنت لھتے ساھتانی ھمرائی ءَ ساھت گْوازینگ ءَ زند گْوش اَنت
لھتے کِسہ،لھتے کِسہ،لھتے ساھت ءُ زِند بلے اے وھد ءَ من لوگ ءِ میان ءَ نشتگاں ءُ اے جیڑگ ءَ آں کہ اے ساھتاں من چوں سرجم بہ کن آں کہ من ءَ سک گمیگ کُتگ ئے الّمی اِنت من وت ءَ بہ کُش آں –

من وت ءَ نا سرجمیں ءُ ناکامیں انسانے سرپد بوگ ءَ آں من تھنا پشت کپتگ آں دگنیا ءِ ھمک چیز من ءَ مُردگے ءِ وڑ ءَ چارگ ءَ اِنت
اِد ءَ کس نیست کہ من کُکار بہ کن آں ءُ آئی ءَ بہ گْوش آں کہ من زندگاں ءُ است آں۔

تھنا یک گھڑی یے کہ منی زند ءِ ھساباں دارگ ءَ اِنت ءُ تابُوتے کہ من ءَ گیشتر مرگے نیمگ ءَ برگ ءَ اِنت اے لوگ ءِ تہ ءَ دریگے کہ زنگاں گپتگ ھمُک شپ اے دریگ ءِ ڈنّ ءَ اپسانی پادانی توار کیت من مُدام جھد کن آں کہ بزاناں چے بوگ ءَ اِنت؟ بلے گوں من دریگ پچ نہ بنت، ھُدا ءِ جند پچ اِش بہ کُنت بلے ھمُک شپ کہ ھور بیت اے اپسانی توار گار بیت، بہ گندئے اپساناں گوں آپ ءَ یکجاہ بوگ تُرس اِیت بلے اپس زالمیں جناورے، پرچی ءَ تُرس اِیت ئِے؟-

اِد ءَ سَے اکس درنجوک اَنت کہ آھانی کانچ پُرشتگ ءُ کاگد اِش درتگ اَنت، تھنا فریم سلامت اَنت کس نزانت کہ اے کئی اکس اَنت؟ من ھچ سرپد بوگ ءَ نہ آں۔

دْرست دروگ! من دْروگ، اے ساھت دْروگ، مرگ دْروگ، انسان ءِ جیڑگ دْروگ! پہ من ءَ اے ساھت ادارُکی اَنت من زندگ بوت کن آں اِنّاں! من زندگ بوگ نہ لوٹاں، من وتی زند گھڑی ءُ منی راستیں دست ءِ پستول ءَ داتگ کہ انّو من وتی سر ءَ داشتگ کہ وت ءَ ھلاس بہ کن آں۔

بلے اک عکسے ءِ سر ءَ Pistol Of Kolibri نبشتہ اِنت کہ وھد ءِ مُجاں گپتگ ءُ نوں سکّ کم ءَ پدّر اِنت من کئے آں؟،کولبری کے اِنت کئی پستول؟ کُلیبری مئے میتگ ءِ مردمے بُوتگ آئی ءِ نام چوناھیگا ارشاد اِنت بلے میتگ ءِ مردم آئی ءَ کُلیبری توار کن اَنت انچو گْوش اَنت کہ کولیبری جنگ ءَ جَنَگ بُوتگ۔

آجوئی ءِ جنگ ءَ وھدے کہ آئی ءِ پسٹل ءِ تیر ھلاس بوتگ اَنت گُڑا آئی ءَ وتی کولیبری پسٹل ءَ ابید تیراں گوں جنگ کُتگ ءُ جَنَگ بُوتگ اے جیڑگانی نیام ءَ سیاھگواتے کَش اِیت ءُ دریگ ژپّگ ءَ پچ بیت ءُ من گنداں اپس ءُ آپ ءِ جنگ اِنت!، کُلیبری آپے بُوتگ؟ من آپے آں؟ من، من کولیبری بُوھگ لوٹاں! من ءَ زند ءِ تلب بوگ ءَ اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

سر بیتگیں ھالانی رد ءَ شال ءُ کوھلو ءَ رؤکیں شھدگ ءِ سر ءَ ترند رؤکیں گاڑی ءِ دگ ءِ وئیل ءِ آماچ بیتگ چریشی ءَ چہ یک مردمے بیران ءُ یکے زدگ بیتگ –

گیشیں ھالانی رد ءَ وئیل کوھلو ءِ میانی ھند ماوند پوڑھ ءَ پیش اتکگ کہ اود ءَ ترند رؤکیں گاڑی ءِ چَپ بیتگ ءُ یک مردمے بیران بیتگ –

بیران بیتگیں مردم ءِ پجار ڈاکٹر نیاز بگٹی ءِ نام ءَ زانگ بیتگ کہ بارکھان ءِ ڈی ایچ او اِنت –

لیویز بنشون ءِ رد ءَ وئیل گاڑی ءِ ترند روگ ءِ سوب ءَ پیش اتکگ کہ گاڑی جُھلیں جُرے ءَ کپتگ ءُ گاڑی ءَ سواریں مردم چیرترینتگ اَنت –

لیویز بنشون ءِ رد ءَ ڈاکٹر نیاز بگٹی ءِ جون ءُ زدگ بیتگیں مردم ڈویژنل ہیڈ کوارٹر سبی ھَ برگ بیتگ اَنت –

گوستگیں روچ ءَ کراچی ءَ سَے جاھاں نندانک ءُ زھرشانی بیتگ اَنت، گوستگیں روچ ءَ کراچی ءَ نندانک ءَ بلوچ چاگردی مردماں بھر زرتگ –

دی بلوچستان پوسٹ

مروچی کراچی ءِ شش جتا جتائیں جاھاں مچھ ءَ ناشریں گل داعش ءِ دست ءَ کُشگ بیتگیں ھزارہ برادری ءِ نیمگ ءَ زھرشانی نندانک برجاہ اَنت –

کراچی ءِ ٹریفک پولیس ءِ رد ءَ شارع فیصل ءَ کالونی گیٹ ءَ، ملیر پندرہ ءِ نزیک ءَ زھرشانی نندانک برجاہ، چریشی ءِ سوب ءَ ڈرگ دگ ءُ ملیر ءِ ھردوکانی رو ءُ آیگ مھتل اَنت –

ماڈل کالونی ءَ داں قائد آباد ءَ رؤکیں مردم کالا بورڈ ءِ نیمگ ءَ روان دیگ بیتگ اَنت، چریشی ءِ سوب ءَ قائد آباد ءَ آیوکیں مردم الفلاح برج ءِ تھ ئِے نیمگ ءَ روان دیگ بیتگ اَنت –

ایم اے جناح دگ ءَ چورنگی ءَ ھم زھرشانی نندانک برجاہ اِنت چریشی ءِ سوب ءَ کیپری سنیما ءَ داں گرومندر ءَ رؤکیں مردم مھتل بیتگ اَنت –

کراچی پولیس ءِ بنشون ءَ جار پِرینتگ ءُ گوشتگ کہ مھلوک کوریڈور تھری ءُ سولجر بازار ءِ نیمگ ءَ بہ رو اَنت –

یونیورسٹی دگ ءَ سفاری پارک، ابولحسن اصفھانی دگ ءُ عباسی ٹاؤن ءِ نزیک ءَ زھرشانی برجاہ اَنت –

مچھ وئیل ءِ ھلاپ ءَ گوستگیں روچ ءَ کراچی پریس کلب ءَ ھزارہ برادری ءِ نیمگ ءَ زھرشانی بیتگ -زھرشانی کنوکاں بیران بیتگیں مردمانی کھولاں گوں پدردی درشان کرتگ ءُ کوشکارانی دزگیر کنگ ءِ لوٹ کرتگ –

ھمے وھد ءَ چاگرد کار ھوران بلوچ ماہ گنج بلوچ، سمائشہ بلوچ ءَ ھوار دگہ مرردماں بھر زرتگ –

زانگ بہ بیت بلوچستان شال ءَ ھوار کراچی ءَ مچھ وئیل ءَ کُشگ بیتگیں ھزارہ برادری ءِ نیمگ ءَ نندانک برجاہ اَنت –

ھزارہ برادری ءَ مچھ ءَ کُشگ بیتگیں ھزارہ کاریزکارانی جون شال ءِ رودراتکی شھدگ ءَ ایر کرتگ ءَ نندانک جتگ –

ھزارہ برادری ءِ گوشگ اِنت کہ تانکہ مئے کُشتگیں مردمانی کوشکار گرگ نہ بنت ما جوناں کَل ءُ کسارات نہ کن ایں –

آیاں گوستگیں شپ ءَ ھشت شرتانی میان ءَ وتی گپ ایر کرتگ ءُ گوشتگ اَنت کہ عمران خان بئیت ءُ مئے گون ءَ دیوان بہ کنت –

آیاں گوشت کہ عمران خان ءَ ابید دگہ کسے ءَ گوں گپ ءُ تران نہ بیت ءُ گوستگیں بازیں سالاں ھزارہ برادری ءِ بیست ءُ دو سالاں بیوکیں زوراکیانی پژدر ءَ ھمک وھد ءَ ھاکماں دروگیں سدکی داتگ ءُ ھزارہ برادری رد داتگ اَنت –

گوستگیں شپ ءَ عمران خان ءِ نیمگ ءَ پاکستان ءِ وزرا اتکگ ءُ نندانک ءَ نشتگیں مردماناں عمران خان ءِ کلوہ اش سر کرتگ اَنت ئِے چریشی ءَ پیسر تھ ئِے کارانی وزیر شیخ رشید ھم شال ءَ اتکگ ءُ ھزارہ برادری ءِ نشتگیں مردماں دوچار کپتگ بلے گپ ءُ تران ءَ بے سوب بیتگ ءُ واتر بیتگ –

جام کمال خان ءَ ھم وتی ٹوئٹر کلوہ ءَ گوشتگ کہ مروچی آ شال ءَ سر بیگی اِنت ءُ ھزارہ برادری ءِ نندانک ءَ نشتگیں مردماں دوچار کپ آں –

جام کمال خان گوستگیں روچاں دُبی ءِ تر ءُ تاب ءَ بیتگ ءُ مروچی آئی ءَ شال ءِ آیگ ءِ ھال چاگردی رسانکجاھاں شنگ کرتگ –

مچھ وئیل ءَ کھولاں سرکار ءِ دیم ءَ ھشت لوٹ ایر کرتگ کہ آیانی تہ ءَ بیگواھیں مردمانی جیڑہ ھم ھوار اِنت –

دی بلوچستان پوسٹ

بلوچستان ءِ دمگ مچھ ءَ کاریزکارانی کوش ءَ پد شال ءَ ھزارہ برادری ءِ زھرشانی مروچی چارمی روچ ءَ ھم برجاہ کھولانی گوشگ اِنت سروزیر عمران خان وت بئیت –

گوستگیں شپ ءَ پاکستان ءِ وفاقی وزیر علی زیدی ءُ ذلفی بخاری ءُ اسپیکر قاسم سوری ءَ ھزارہ برادری ءِ نندانک ءِ ھلاس کنگ ءَ دزبندی کرتگ بلے زھرشانی ءَ نشتگیں زھرشانی ءِ ھلاس نہ منّ اِتگ –

ھزارہ برادری دَہ جونانی ھمراھی ءَ شال ءِ رودراتکی شھدگ ءَ نندانک ءَ نشتگ اَنت ءُ نندانک ءِ ھلاس کنگ ءَ اُستانی راجمان ءِ وزیرانی رو ءُ آ برجاہ اِنت –

تنی وھدی زھرشانی نندانک ءَ نشتگیں مردمانی ءُ سرکار ءِ میان ءَ گپ ءُ تران بے سوب بیتگ اَنت ءُ نندانک ءَ نشتگیں مردماں ھشت شرت ایر کرتگ –

اولی کوشکار گِرگ بہ بنت ءُ آیانی ھنڈال بلوچستان ءَ کشگ بہ بنت –

دومی لوٹ مچھ، زیارت، تفتان ءُ کراچی ءِ دراھیں راہ ءُ دگاں پھریزکاری ءُ پھزداری سر ءُ مانسرانی سر ءَ –

سیمی لوٹ: شھیدانی کھول سرجم ءَ کمک کنگ بہ بنت –

چاروم لوٹ: اُستان ءِ پتر ءِ وزرا دزکش بہ بنت –
پنچمی لوٹ: آمیدگسی پَٹ ءُ پولی کمیٹی ءِ جوڑ کنگ بہ بیت ءُ پوج ءُ ادارہ آئی ءِ چاروکی ءَ بہ کن اَنت ءُ سستیانی سر ءَ گامگیج بہ زور اَنت –

ششمی لوٹ: مچھ ءَ ھواریں پھزدار کشگ بہ بنت ءُ آیانی پَٹ ءُ پولی ءَ بہ کنت –

ھپتمی لوٹ: وانگ جاہ، بازار، باپاری بنجلاں ھوار شیعہ ٹک ءَ پھریزی ءُ ایمنی دیگ بہ بیت –

ھشتمی لوٹ: بیگواھیں مردمانی یلہ کنگ ءُ اگاں آ جرمکار آمید گس ءَ پیش کنگ بہ بنت –

بلوچ رھشون ءُ بلوچ نودربر گل آزاد ءِ گوستگیں چیئرپرسن کریمہ بلوچ ءِ “کوش” ءِ ھلاپ ءَ جرمنی ءِ شھر گوٹگن ءَ روانک ءُ زھرشانی –

دی بلوچستان پوسٹ

ٹی بی پی پتر ھال ءَ سر بیتگیں ھالانی رد ءَ جرمنی ءِ اُستان ندرسگسن ءِ شھر گوٹگن ءِ مُچی ءِ جاہ ءَ زالبول، چُکاں ھوار بلوچ سیاسی باسکاں بازیں کَچے ءَ نبشتگیں تاک ءُ اکس چِست کہ آیانی سر ءَ کریمہ بلوچ ءِ “ کوش ” ءِ ھلاپ ءَ اوگام جنان ءَ شھر ءِ جتا جتائیں دگاں تران بیتگ ءُ بلوچ سیاسی باسکانی گون ءَ پدردی ءِ واستا جرمن “لیفٹ ” ءَ سیاسی باسکاں ھوار سندھی باسکاں بھر زرتگ –

روانک ءُ زھرشانی ءَ ھواریں بلوچ سیاسی باسکاں ھوار زالبول ءُ دگراں کریمہ بلوچ ءَ ستاشانی پیش کنگ ءِ واستا ڈیوا روک کرتگ ءُ ھمے وھد ءَ زھرشانی کنوکاں گپ کنان ءَ گْوشت کہ کریمہ بلوچ بلوچستان ءِ چُک ءُ راجی جد ءُ جھد ءِ مزن نامیں ھمراھے بیتگ آ کُشگ بیتگ –

آیاں گوشت کہ بلوچستان ءَ ھوار سرجمیں دنیا ءَ نشتگءں بلوچ ءُ آیانی ھمدرد کینیڈا پولیس ءِ بنداتی پَٹ ءُ پول ءَ رد کرتگ ءُ تچکیں رنگے ءَ پَٹ ءُ پول ءِ لوٹ کرتگ –

آیاں گوشت کہ اے ناگتی وئیلے نہ بیتگ بلکیں ریاستی کوشکاری اِنت، ساجد ھسین ءَ پد کریمہ ءِ مرگ ءُ کینیڈا ءِ سرکار ءِ گیر زمہ واری ءَ یک دگہ ناوشیں وئیلے ودی بیت اِنت، چُشکہ پولیس وتی سرجمیں زوراں بہ جنت ءُ کوشکاراں پاشک بہ کنت –

زھرشانی کنوکاں یورپ ءَ ھوار کینیڈا ءَ بلوچ سیاسی باسکانی پھریزگ ءِ دزبندی کرتگ، آیاں گوشت کہ بلوچستان ءَ سیاست کنگ ءِ بندش جنگ بیتگ سیاسی باسکانی زورانسری بیگواہ بیگ ءِ آماچ بیگ ءَ پد گاریں گورانی تہ ءَ گار کنگ بیتگ، نِی یورپ ءُ کینیڈا ءِ وڑیں مھکمیں ڈیھاں پاکستان وتی ناشریاں دراج کش کنگ ءَ اِنت –

زھرشانی کنوکاں کینیڈا ءِ سرکار ءَ لوٹ کرتگ ءُ گوشتگ کہ کریمہ بلوچ ءِ کوش ءِ کوش ءَ ھمک پھناتاں پَٹ ءُ پول بہ کنت آئی ءَ بیھار دیگ بیتگ، آیاں گوشت کہ بلوچستان ءَ ھوار سرجمیں دنیا ءَ بلوچ زھرشانی کنگ ءَ اَنت ءُ مئے یکیں لوٹ اِنت کہ بلوچستان ءَ انساپ دیگ بہ بیت –

زانگ بہ بیت بلوچ نودربر گل آزاد ءِ گوستگیں چیئرپرسن کریمہ بلوچ ءِ گوستگیں سال ءِ بیست دسمبر ءَ کینیڈا ءِ شھر ٹورنٹو ءَ بیگواہ بیتگ ءُ دومی روچ ءَ آئی ءَ جون یک کورے ءِ تہ ءَ دزکپتگ، بلوچستان ءَ ھوار بازیں ڈیھاں گوستگیں دو ھپتگاں زھرشانیانی تہ ءَ اِنت –

پند ءِ دارگے بگیری ءَ سندھ سبا ءَ مَرگ ءِ شُدکشیں ھرتال ءِ جار پرینتگ –

دی بلوچستان پوسٹ

سندھ ءَ داں راولپنڈی ءِ نیمگ ءَ سندھ ءَ بیگواہ بیتگیں مردمانی کھولانی پند ءِ روانک پنجاپ ءَ رؤگ ءَ دارگ ءُ زھرشانی کنوکانی دزگیر کنگ ءِ بگیری ءَ سندھ سبا ءَ کراچی پریس کلب ءِ دیم ءَ داں مرگ ءَ شدکشیں ھرتال ءِ جار جتگ –

شدکشیں زھرشانی جار سندھ سباء نیمگ ءَ چہ رھشونانی دزگیری ءُ زھرشانی ءَ درگان کنگ ءِ بگیری ءَ کنگ بوگ ءَ اِنت –

سندھ سباء نیمگ ءَ کراچی ءَ چہ بندات بوتگیں زھرشانی پنجاپ ءَ رؤگ ءَ دارگ بوتگ ءُ پند جنوکیں زھرشانی کنوک سندھ پولیس ءِ نیمگ ءَ چہ دزگیر کنگ بوتگ انت –

زھرشانی کنوکانی دزگیری ءُ زھرشانی ءَ درگان کنوکانی بگیری ءَ سندھ سباء ءُ وائس آف سندھ مسنگ پرسنز ءِ نیمگ ءَ سرجمیں سندھ ءَ زھرشانی کنگے جار جنگ بوتگ – چریشی ءَ پد سرجمیں دمگاں پند جنوکیں مردمانی ھک ءَ زھرشانی کنگ بوتگ –

دزگیر بوتگیں مردمانی تہ ءَ سندھ سبا رھشون انام عباسی ءُ زالبولاں ھوار دگہ مردم ھم ھوار بوتگ اَنت – بلے پد ءَ رند ءَ چہ سندھ پولیس ءِ نیمگ ءَ زالبول یل کنگ بوتگ انت بلے انام عباسی ءَ ھوار دگہ لھتے مردم پولیس ءَ بندیگ کرتگ انت –

زھرشانی کنوکانی گوشگ انت کہ پولیس ءِ نیمگ ءَ چہ مئے پُرایمنیں زھرشانی ءِ سر ءَ لٹ ءُ کٹ ءُ دزگیر کابل ایرجنگ انت – پولیس ءِ نیمگ ءَ چہ زھرشانی کنوکیں مردمانی یل بوھگ ءُ پُرایمنیں زھرشانی ءَ درگان کنگ ءِ بگیری ءَ تاں مرگ ءِ شدکشیں ھرتال کراچی پریس کلب ءِ دیم ءَ برجاہ بیت –

دی بلوچستان پوسٹ

بلوچستان ءِ بنجاھی شھر شال ءَ دو جتا جتائیں تیرگواری ءِ وئیلاں زالبولے بیران ءُ یک مردمے ٹپی –

سربیتگیں ھالانی رِد ءَ شال سٹلائٹ ٹاؤن ءَ دُزانی تیرگواری ءَ یک مردمے ٹپی بوتگ –
پولیس رِد ءَ شال سٹلائٹ ٹاؤن ءَ چاندنی چار راہ ءِ نزیک ءَ دُزی ءِ میان ءَ ڈھنگانی تیر گواری ءَ عبدالوھاب نامیں مردمے ٹپی بوتگ –
ٹپی بوتگیں مردم دمگی نادراھجاہ ءَ سر کنگ بوتگ –

ھمے وڑ شال ءَ لوگی جیڑھے ءَ تیرگواری ءِ سوب ءَ زالبولے بیران بوتگ –
پولیس ءِ رِد ءَ شال ءِ دمگ سریاب دگ ءَ گاھی خان چاراہ ءِ نزیک ءَ لوگی جیڑھے ءِ سر ءَ لوگواجہ ءَ وتی لوگبانک تیرانی آماچ کُتگ ءُ کُشتگ – چہ وئیل جاہ ءَ تتکگ –

پولیس ءَ زالبول ءِ جون دست گپتگ ءُ دمگی نادراھجاہ ءَ سرکتگ – اژدری چار ءُ ٹپاس ءَ پد جون کھول ءِ ھوالگ ءَ کنگ بوتگ –

پولیس بنشون: رد ءَ دوئیں بارہ ءَ پَٹ ءُ پول برجاہ اَنت –

دی بلوچستان پوسٹ

سربیتگیں ھالانی رِد ءَ ڈیرہ بگٹی ءِ دمگ اوچ مزوئی ءَ پاکستانی پوج ءَ بیڑ برتگ ءُ شش مردم آوار جتگ ءُ بیگواہ کرتگ اَنت –

آوار جنگ بیتگیں مردمانی پجار بھارو ء پائند بگٹی، کھنڈو ء باری بگٹی، علی مراد ء میندو بگٹی، لیاقت ء یارا بگٹی، حیدر ء یارا بگٹی ءُ انگلی ء پھوگو بگٹی ءِ ناماں چہ بوتگ انت –

زانگ بہ بیت دو روچ پیسر ھم پاکستانی پوج ءَ اوچ ءَ بیڑ برتگ دو مردم آوار جتگ، ناسرجمیں ھالانی رِد ءَ دو سد ءَ گیش آھانی مال ءُ دلوت ھم گوں وت برتگ انت –

دومی نیمگ ءَ بلوچ ریپبلکن پاٹی ءَ چاگردی رسانکجاہ ٹوئٹر ءَ گوشتگ کہ ڈیرہ بگٹی ءِ دمگ اوچ ءَ پاکستانی پوج ءَ زوراکی کنان ءَ چُک ءُ جنین لَٹ ءُ کُٹ کرتگ اَنت –

بی آر پی ءِ رد ءَ پوج ءَ لوگ لوگ ءَ پَٹ ءُ ھنڈ کرتگ ءُ شش مردم آوات جتگ ءُ برتگ اَنت –

دومی نیمگ ءَ کراچی ءَ وائس فار بلوچ مسنگ پرسنز ءِ زھرشانی بنجل گل ءِ کسان کمک سرکماش ماما قدیر بلوچ ءِ سروکی ءَ برجاہ اِنت –

گل ءِ ٹاہ اِنت کہ بلوچستان ءَ پاکستانی پوج ءُ چیریں ادارھاں بازیں کچے ءَ مردم آوار جتگ ءُ برتگ اَنت کہ آیانی تہ ءَ ڈاکٹر، وکیل، نودربر، زالبول ءُ کماش ھوار اَنت –

ھمے رنگ ءَ بلوچستان ءَ سیاسی ءُ چاگردی مردم پاکستانی پوج ءِ آپریشنانی میان ءَ چاگردی رسانکجاھاں وتی لیکھانی تہ ءَ یکشل ءَ بلوچستان ءَ بیگواہ بیتگیں مردمانی بھتاماں پاکستانی پوج ءِ سر ءَ لڈگ ءَ اَنت –

لشکری بنشونانی نیمگ ءَ ڈیرہ بگٹی ءِ آپریشن ءُ مردمانی آوار جنگ ءِ ھال تنی وھدی دیم ءَ نیاتکگ اَنت –

دی بلوچستان پوسٹ

سندھ ءِ مزن شھر کراچی ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ یک سد ءُ ھشتاد ءُ دو روچ سرجم بوتگ –
چہ ملیر ءَ راجدار ءُ چاگردی باسک محمد اسحاق بلوچ، اصغر بلوچ، داد محمد بلوچ ءُ دگہ مردماں بنجل ءَ اتکگ ءُ بیگواھیں مردمانی کھولانی گوم ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ گوشتگ کہ بلوچستان ءِ تہ ءَ ھزارانی کچ ءَ نامداریں بلوچ راجدوست مردین ءُ جنین اوار جنگ ءُ بیگواہ کنگ بوتگ اَنت ءُ چیریں ادارہ ءُ ھاکماں مدامی راجدوستانی بدنام کنگے ھاتر ءَ بلوچستان ءِ تہ ءَ نیکراھی ناشرکار ءُ آھانی گلانی تہ ءَ کشندہ ھوار کرتگ ءُ ٹکی ناشرکار ھنچو پہ دیم یلا داتگ انت کہ آھاں بلوچستان ءِ تہ ءَ ھزارہ ءُ شیعایانی کُشت ءُ کوش کتگ –

آئی ءَ گوشتگ کہ بلوچستان ءِ تہ ءَ اے کار چہ ضیاء دور ءَ بندات کنگ بوتگ، ھمے پالیسی ءِ رِد ءَ نیکراھی ناشرکاریں گل مھکم کنگ بوتگ انت اھاں تاکت دیگے ھاتر ءَ مدرسہ پچ کنگ ءُ دیگ بوتگ انت ءُ سلاہ بند کرتگ ءُ ایردستیں راجانی چکچینی ءَ پہ یل داتگ انت –

ماما قدیر بلوچ ءَ گوشتگ کہ ھمے پالیسیانی رِد ءَ لس بلوچ مھلوک ءِ سر ءَ بمبگواری، زورانسری آوار جنی، راجداریں باسک ءُ رھشون نشانگ جوڑ کرتگ ءُ کُشتگ انت – سال دوھزار ءَ پد اسٹبلشمنٹ ءَ آوار جن بکوش چگل دے پالیسی وتیگی کرتگ اَنت –

ماما قدیر بلوچ ءَ گوشتگ کہ نیکراھی ناشرکارانی دلبڈی دیگے درگت ءَ بلوچستان ءَ ناشرکار یلا دیگ بوتگ انت کہ آ شعیہ، ہندو، سکھ، زکری ءُ دگے بلوچستان نندوکیں مردمانی کشت ءُ کوش ءَ بہ کن انت –

دی بلوچستان پوسٹ

بلوچستان ءِ دمگ مچھ ءَ کاریزکارانی کوش ءِ ھلاپ ءَ ھزارہ برادری جونانی ھمراھی ءَ رودراتکی شھدگ ءِ سر ءَ زھرشانی مروچی سیمی روچ ءَ برجاہ بیتگ – زھرشانی ءَ ھواریں زالبولاں “عمران خان شال ءَ بیا ”اوگام جتگ ءُ موتک آؤرتگ-

چار جنوری ءَ دوشمبے ءَ تھ ئِے کارانی وزیر شیخ رشید ھم گپ تران کنگ ءِ واستا شال ءَ سر بیتگ – شیخ رشید ءِ سروکی ءَ زھرشانی ءَ نشتگیں مردماں گوں دوچار کپتگ ءُ گپ ءُ تران کرتگ ءُ بلے آ بے سوب بیتگ –

تھ ئِے کارانی وزیر شیخ رشید ءِ ھمراھی ءَ ڈپٹی اسپیکر راجمان پتر ءِ قاسم سوری ءُ استان ءِ وزیر جاڑیگ بیتگ اَنت -زھرشانی ءَ نشتگیں مردماں گْوشگ ات کہ تھ ئِے کارانی وزیر ءِ سروکی ءَ اتکگیں مردمانی سدکی ءَ دلجم نہ اِنت –

زھرشانی کنوکاں سروزیر عمران خان ءِ آیگ ءَ نندانک ءِ ھلاس کنگ ءِ شور کرتگ ءُ گوشتگ کہ ھما وھد ءَ سروزیر عمران خان زھرشانی نندانک ءَ نئیت جونانی ءَ ھمراھی ءَ زھرشانی نندانک برجاہ بیت اِنت-

ھزارہ برادری ءِ رھشون سید مھمد رضا ءَ گوشت کہ بیست ءُ دو سالاں مئے لوٹ اَنت کہ مارا آرمی ءِ نندگ ءِ ھک دیگ بہ بیت – استانی سرکار اگاں گوستگیں روچ ءَ لاچاریں مردمانی گور ءَ آیگ ءِ زھمت کشگ نہ کپتگ – مئے لوٹ اِنت کک بلوچستان ءِ سرکار ءِ پتر ءَ سرجم ءَ دزکش بہ بیت – بیگواھیں مردماں اگاں جرمے ھست گڑا آیاں آمیدگس ءَ پیش بہ کن اِت ءُ مچھ ءِ وئیل ءِ پٹ ءُ پول کنگ ءَ آمیدگسی پَٹ ءُ پولے جوڑ کنگ بہ بیت –

تھ ئِے کارانی وزیر شیخ رشید شال ءَ جاڑیگ اِنت – شال ءِ آیگ ءَ رسانکدراں گوں آئی ءَ گپ کنان ءَ گوشتگ کہ من شیخ رشید گوش آں سروزیر ءَ وتی بالیگ داتگ ءُ شال ءَ روان داتگ من ءَ – وئیل ءِ آمیدگسی کمیٹی ءِ جوڑ کنگ ءِ جار ءَ جن آں – آئی ءَ ٹاہ داتگ کہ ھزارہ برادری ءَ سرجم ءَ پھزداری دے آں –

زانگ بہ بیت بلوچستان ءِ دمگ مچھ ءَ اشکرانی کھن ءَ دو ءُ سَے جنوری ءِ میانی شپ ءَ ناشرکاراں گیشتری ءَ جاڑیگیں ھزارہ برادری ءِ دَہ کاریزکارانی چم بستگ ءُ گُٹ بر اِتگ اَنت وئیل ھال یکشمبے ءَ سر بیتگ ءُ بنداتی ءَ جون مچھ ڈسٹرکٹ ھسپتال ءُ پد ءَ شال ءَ آرگ بیتگ اَنت –

وئیل ارزی نامہ دو روچ ءَ پد نبشتگ کنگ بیتگ وئیل ایس ایچ او مچھ پیر بکش بگٹی ءَ ناشناسیں ناشرکارانی نام ءَ نبشتگ کرتگ – وئیل ءَ کوش ءُ ناشرکاری ءَ ھوار دگہ پھنات نبشتگ کرتگ اَنت –