TBP Balochi

کوہ سلیمان ءَ جنگل ءَ آس کپتگ، آس کپگ ءِ سوب ءَ زیتون ءُ چلگوزہ ھوار سداں سالی درچک ءُدار ستکگ ءُ پُر بوتگ انت –

دی بلوچستان پوسٹ

ریسکیو 1122 ءِ رِد ءَ چاردہ جنوری بزاں مروچی سھب ءَ کوہ سلیمان ءَ دامن ءِ ھستیں زیتون ءُ چلگوزھانی باگ ءَ انگتی آس کپتگ آس ءَ کساس یک کلومیٹرے ءَ باگ سرجمی ءَ گپتگ ءُ سُوتکگ –

جنگلات ءِ واکدارانی رِد ءَ آس ءِ کپگ ءِ سوب ءَ کروڑانی تاوان بوتگ – ریسکیو ءِ رِد ءَ کوہ سلیمان ءِ باگ ءَ راہ ءُدر پِر نہ بوگے سوب ءَ آس کشوکاں پیادگ ءَ شُتگ ءُ وت ءَ ھمود ءَ سر کُتگ ءُ آس کُشتگ –

اے وھد ءَ ڈسٹرکٹ ایمرجنسی آفیسر فضل منان وت ھم گون بوتگ –
جنگلات ءِ واکدارانی گوشگ انت کہ آس کپگ ءِ سوب ءَ سداں سال پیشی زیتون ءُ چلگوزہ درچک ستکگ انت –
ٹانک ءَ ساڈائیں محکمہ جنگلات ءِ افیسر سلیم ءِ گوشگ انت کہ دنیگت ءَ تاوان ءِ بارہ ءَ سرجمی ءَ گوشگ نہ بیت بلے اشی ءِ سر ءَ مئے کار برجاہ انت ءُ اے باگ کے پی سرکار ءِ ھساب ءَ نہ انت اے کمیونٹی ءِ جنگلات انت –

جنگلات ءِ بنشون ءِ گوشگ انت کہ آس ءِ کپگ ءِ سوب ءَ پنجاہ دو ایکڑ زمین ءَ کپتگ ءُ درچک ستکگ اَنت – ءُ اے درسیں درچک ورّرود انت – اے دمگ سئیں پوائنٹسانی تہ ءَ یک جاہ انت کہ وزیر آعظم ءَ نیشنل پارک ءِ درجہ داتگ – اے پوائنٹساں نیشنل پارک نام ءِ دیگ ءَ پد ادے ھاتر ءَ بجٹ ھم ایرکنگ بوتگ –

آس ءِ کپگ ءِ درگت ءَ دمگی پھازدارانی گوشگ انت کہ سارتی سوب ءَ دمگی مردماں وتی تاپینگ ءِ ھاتر ءَ آس روک کتگ کہ آس پد ءَ تالان بوتگ ءُ سرجمیں جنگلے گپتگ کہ چریشی ءَ کروڑانی تاوان بوتگ – وئیل ءِ چار ءُ ٹپاس ءُ زمہ دارانی درگت ءَ دنیگت ءَ ھچ وڑیں جار جنگ نہ بوتگ –

دی بلوچستان پوسٹ

سر بیتگیں ھالانی رد ءَ پنجگور ءَ سی پیک دگ ءَ ترند رؤکیں گاڑی ءِ دگ ءِ وئیل ءِ آماچ بیتگ ءُ گاڑی سرجم ءَ سُتکگ ءُ پُر بیتگ –

گیشیں ھالانی رد ءَ پنجگور ءِ دمگ چتکان جھلگ ءَ سی پیک دگ ءِ سر ءَ ترند رؤکیں گاڑی ءِ ٹائر تَرک اِتگ ءُ چریشی ءَ گاڑی چپ بیتگ –

گاڑی ءَ ایرانی تیل مان بیتگ ءُ پنجگور ءَ روگ ءَ بیتگ کہ چپ بیگ ءِ سوب ءَ گاڑی ءَ اس کپتگ ءُ گاڑی سوتکگ –

وئیل ءَ پد آس کُشیں گاڑی سر بیتگ ءُ آس ءِ توسگ ءَ بلے آس ترند بیتگ ءُ آس ءَ سرجم ءَ گاڑی سُتکگ ءُ پُر کرتگ –

وئیل ءَ گاڑی ءِ ڈرائیور زدگ بیتگ ءُ نادراہ جاہ ءَ برگ بیتگ –

زانگ بہ بیت گوست ءَ ھم پنجگور ءَ ھوار بلوچستان ءِ بازیں جاھاں تیل کشیں گاڑیانی کپگ ءِ سوب ءَ گاڑء سُتکگ ءُ پُر بیتگ اَنت ءُ چاگردی مردمانی گوشگ اِنت کہ شریں روزگار ءِ نہ بوگ ءِ سوب ءَ لس مھلوک تاوان کشیں کاراں ھوار اَنت ءُ آیاں جانی ءُ مالی تاوان ھم چِست کنگ کپگ ءَ اِنت –

دی بلوچستان پوسٹ

روکپتی بلوچستان ءِ تیابدپی شھر چھبار ءَ یک دُکانے ءَ بیڑ برتگ ءُ بندش جتگیں سگریٹانی ھواری ءَ شش مردم دزگیر کرتگ اَنت –

چھبار پولیس ءِ گوشگ اِنت گوستگیں روچ ءَ چھبار ءَ چیریں ھالانی سر بیگ ءَ چیریں بنجلے ءَ انگیر کرتگ ءُ اود ءَ بازیں بندش جتگیں سگریٹ دستیگ کرتگ اَنت –

پولیس ءِ گوشگ اِنت کہ پنچ سد ءُ شست ءُ ھپت کاٹون بندش جتگیں سگریٹ دستیگ کرتگ اَنت-

پولیس ءِ گوشگ اِنت بندش جتگیں باپاری کنوکیں شش مردم ھم دزگیر کرتگ ءُ پولیس ءِ کارگس ءَ برتگ اَنت –

پولیس ءِ گوشگ اِنت ڈیھ ءَ بندش جتگیں چیزانی سر ءَ بندشی اِنت ءُ بندشی باپاری کنوکانی شش گاڑی ھم دستیگ کرتگ اَنت-

پولیس ءِ گوشگ اِنت دستیگ کرتگیں سگریٹانی نھاد یک “میلیار ریال ” اِنت کہ اے ڈیھ ءِ جتا جتائیں جاھاں شنگ بیگ ءُ بھا بیگ ءَ ساجو بیتگ اَنت –

آزمانک: سستگیں مُھرگ

آزمانکار:معراج لعل

دی بلوچستان پوسٹ

شال ءَ دسمبر ءِ ماہ وتی گُڈی روچان اَت سردی اَنچو گیش اَت کہ گسانی پیشگاہ ءِ ایر کُتگیں درپ دُرا چہ تہ ءَ برپ اِت اَنت من دروازگ پچ کُت گِدارُکے ڈن ءَ چم شانک دات اَنت چہ آزمان ءَ میزاں میزان ءَ پرپ رچگ ءَ اَت ءُ کُچکانی چاگنگے آواز اَت ءُ دومی نیمگ ءَ مُلا ھم بانگ ءَ اَت۔

من دل ءَ جیڑ اِت کہ اد ءِ کُچک زاناں کاپر اَنت کہ مُلا ءِ بانگ ءِ ھم اِزّت ءَ نہ کن اَنت ، پد ءَ دل ءَ گُشت کہ اد ءَ زاناں کے نیکُوکار اِنت کہ تو کُچکانی سر ءَ زھر گپتگ ئے۔ من پد ءَ دروازگ بند کُت ءُ اَتکاں گرم کنوک ءِ دیم ءَ نشت آں ءُ روچ ءِ در آیگ ءِ ودار کُت۔ من ھمے جل ءُ مہ جل ءِ توک ءَ اِتاں کہ بانڈی ءِ کلوھے اَتک ” ھال کن بے سُد واب ئے بلکیں“ منی کار ءُ کِسب اَنچو باز اِت اَنت کہ جاھے جاھے من بے سُدی کُتگ اَت پمیشکا بانڈی ءَ منی نام بے سُد ایر کُتگ اَت۔ من پسو دات ”تئی گم زاناں واب ءَ کِل اَنت ھاھاھاھاھا“ دمانے ءَ پد آئی ءَ پسو دات ” من دگہ ھچ نزاناں مروچی الم برو بلوچی اکیڈمی ءَ منی کتاباں بیار اگاں ناں گُڑا تئی نام ءَ بے سُد ءِ جاگہ ءَ جان بڈ کناں ھاھاھاھا“ من ساھتکے کند اِت پد ءَ پَسو دات ” شر اِنت منی مات رواں بِلے روچ زاھر بیت چو منی جند مِر ایت اے سردی ءَ “ ”اُپ دل نہ بہ ئے تو بلے من مجبوراں“ بانڈی یک پیم ءَ کلوہ ءَ اَت ءُ من پسو دیگ ءَ اِتان ئِے۔ داں بام ءَ ساپی دات من تیار بُوتاں ءُ در کپتاں دیم پہ اکیڈمی ءَ من چہ بلوچ کالونی ءَ ھما دیم بُوتاں ھیر پون جت اَنت گوشاں گانا گوش داراں بُوتاں ءُ روان کُت چندے ساھت ءَ پد من سول اسپتال گوازینتگ اَت ءُ اکیڈمی نزیک کُتگ اَت اناگاہ منی چم یک کماشے ءَ کپت اَنت کہ چار راھے ءِ سر ءَ نشتگ اَت من شُتاں نزدیک ءَ سلام ءُ دُروت ءَ پد من جُست کُت کماش گندگ ءَ تو اد ءِ مردے نہ ئے آئی ءَ پسو دات ” چوناھا من دیریں مردمے نیاں اے ھم منی جاگہ اِنت بلے اسل ءَ من مکران ءَ نشتگاں من درائینت گُڑا کماش اے کَتلیں سردی ءَ اد ءَ چی ءَ نشتگ ئے؟ پسو دات ئِے ” ابا منی یک مُھرگے گار اِنت من ھمائی ءِ شوھاز ءَ اتکگ آں ۔

مھرگے؟ ھو ابا منی سے مُورگ بُوتگ اَنت مُدام یکیں دست ءَ بندوک بُوتگ اَنت ، ھدا بزانت کہ اے بندیک سست ءُ منی سے ئیں مُھرگ یک یک ئِے کُت اَنت من سھتے ءِ واست ءَ یک اجب چُرتے ءَ کپتاں گُڑا کماش ءَ من جست کت ترا وتی مُورگ ءِ چُشیں چیدگے چیزے گون بیت کہ من پہ شُوھازگ ءَ تئی کمک ءَ کُت بہ کناں ۔

کماش ءَ دست کِیسگ ءَ بُرت ءُ من ءَ گُشت ئِے ابا بیا منی کش ءَ بہ نند۔ من شُتاں کماش ءِ کش ءَ نشتاں ءُ چم گوں آئی ءِ کِیسگ ءَ سک دات اَنت کماش میزان میزان ءَ وتی کِیسگ ءِ تہ ءِ ساماناں دز موش کنگ ءَ اَت کسانیں ساھتے ءَ پد آئی ءَ کسانیں آدینکے چہ کِیسگ ءَ کش اِت ءُ وتی دیم ءَ داشت ئِے پد ءَ گُشگ ءَ لگ اِت ابا اود ءَ بہ چار آدینک ءِ توک ءَ تو چی گند ئے؟ من پَسو دات کماش من ترا گنداں کماش ءِ چم ارساں پُر بُوت اَنت ءُ گُشت ئِے منی کیمتی ئیں مُھرگ ھمے ڈول گندگ ءَ کیت بلے من ءَ چہ باز ورنا تِر اِنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

سر بیتگیں ھالانی رد ءَ روکپتی بلوچستان ءَ دگ ءِ وئیلے ءَ پنچ مردم بیران بیتگ اَنت –

وئیل اوگستان ءُ روکپتی بلوچستان ءِ سیمسری دمگ میر جاوہ ءَ پیش اتکگ کہ اود ءَ پنچ مردم بیران بیتگ اَنت –

اھوالکار ءِ رد ءَ گوستگیں روچ ءَ میر جاوہ ءَ دو گاڑیاں ٹکر وارتگ کہ چریشی ءَ پنچ مردم بیران بیتگ اَنت –

اھوالکار ءِ رد ءَ وئیل ءَ دوئیں گاڑی سُتکگ اَنت ءُ اشاں سواریں مردم ھم آس ءَ سوتکگ اَنت –

بیران بیتگیں مردمانی پجار یاسر رحمت زئی ء ناصر، ابراھیم رھمت زئی ء پرویز، مھمد امین ریگی ء غلام، رضا شمبے زئی ءُ عبداللہ شمبے زئی ءِ ناماں زانگ بیتگ اَنت –

چاگردی مردمانی گوشگ اِنت کہ روزگار ءِ نہ بوگ ءِ سوب ءَ لس مردم ساہ گریں کاراں دزمانجن اَنت ءُ بازیں مردمے ھمے روزگاراں زوال بیگ ءَ اَنت –

دی بلوچستان پوسٹ

بلوچ نیشنل مومنٹ ءِ رھشون ءُ کریمہ بلوچ ءِ لوگ واجہ حمل حیدر بلوچ ءَ گوشتگ کہ کریمہ بلوچ نیزوریں زالے نہ بیتگ آ بھادر ءُ ھمک مُشکلانی دیمپانی کنوکیں مردمے بیتگ – پولیس ءَ را ھما وھد ءَ گُشتگ کہ کریمہ بلوچ ءِ کوش ءِ دراھیں تک ءُ پھناتانی سر ءَ پَٹ ءُ پول بہ کن اے ایوک ءَ کَھول ءِ لوٹ نہ اِنت سرجمیں بلوچ راج ءِ لوٹ اِنت –

آئی ءَ اے گپ ریڈیو زرمبش بلوچی ءَ یک لائیو پریس کانفرنسے ءِ وھد ءَ کرتگ، اے پریس کانفرنس ءَ آئی ءَ آنلائن ءَ چاروکیں مردمانی جستانی پسواں گُشتگ اَنت –

آئی ءَ گُشت کہ پَٹ ءُ پولی ادارہ مئے سرجم ءَ کمک ءَ اَنت آ سچن داں بندیک ءَ پَٹ ءُ پول ءَ بے سوب بیتگ اَنت گڑا مئے گور ءَ آمیدگس ءِ کِشک ھست اِنت –

آئی ءَ گْوشت کہ مئے پشکپتگیں دنیا روکپت اِنت کہ اود ءَ ما اتکگ ءُ وتی سر ءَ بیوکیں زُلمانی داستاناں درشان کن ایں اگاں پاکستان یا کجام دومی ڈیھ شیواریں رنگے ءَ وتی بگیری کنوکاں کُش اِت گڑا دنیا ءِ واستا اے گپ بژنیگی ءِ رنگ ءَ چارگ ءَ کیت اِنت –

آئی ءَ گُشت ھیومین رائٹس واچ، ایمنسٹی انٹرنیشنل ءُ دگہ انسانی ھکانی ادارھاں کینیڈین ءِ سرکار ءَ ھم لوٹ کرتگ کہ وئیل ءُ تچکیں رنگے ءَ پَٹ ءُ پول بہ کنت بلے اشانی ابید کینیڈین سرکار ءَ تچکیں رنگے ءَ پَٹ ءُ پول نہ کرتگ گڑا ما سرپد بہ ایں پاکستان ءُ کینیڈا ءِ ھمبستگی جوانیں رنگے ءَ اَنت –

حمل حیدر ءَ گوشت کہ پاکستان یک گیر زمہ واریں ڈیھے آ ھرچی کُرت کنت، اوگستان ءِ ندارگ ھرکسی دیم ءَ اَنت –

آئی ءَ گْوشت کہ اے گمان رد کنگ نہ بیت کہ کریمہ بلوچ ءِ کوش ءِ سر ءَ بلوچستان ءِ مھلوک ءِ برانز گپتگیں لیکہ ءِ گار کنگ ءَ مچھ ءَ ھزار برادری ءِ وئیل کنگ بیتگ –

دی بلوچستان پوسٹ

سندھ ءِ بنجاھی شھر کراچی ءَ وائس فار بلوچ مسنگ پرسنز ءِ زھرشانی ءَ مروچی چار ھزار ءُ یک سد ءُ نود ءُ یک روچ سرجم بیتگ -سول سوسائٹی ءَ بندوکیں مھلوک اکرم خان درانی، نزیر اھمد ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ پدردی درشان اِتگ –

بیگواھیں انسانی ھکانی باسک راشد ھسین ءِ مات ھم بنجل ءَ اتکگ ءُ زھرشانی ءِ یاداشت کنائینتگ ءُ ھمے واھد ءَ چاگردی باسک ایڈوکیٹ خالدہ بلوچ ھم بنجل ءَ جاڑیگ بیتگ –

انسانی ھکانی باسک راشد ھسین ءِ مات ءَ گوشتگ اَت کہ ما دو سالاں گیش پہ انساپ ءَ مئے چم راھیگ اَنت – راشد ھسین ارب امارات ءَ گیرکانودی ءَ دزگیر کنگ ءُ پاکستان ءَ آرگ ءَ پد ناشناسیں جاھے ءَ برگ بیتگ کہ چریشی ءِ آسر ءَ مارا آئی ءِ زندگی ءِ سر ءَ ترس اِنت –

آئی ءَ گوشت کہ ارب امارات ءُ پاکستان انسانی ھکانی لگتمالی ءَ بروبری ءَ شریک اَنت، راشد ھسین ءِ بارہ ءَ انسانی ھکانی میان اُستمانی گل وتی کرد ءَ پیلو بہ کن اَنت پرچاکہ ڈیھی ادارھانی نیمگ ءَ ھچ گامگیج زورگ بیگ ءَ نہ اِنت –

وی بی ایم پی ءِ رھشون ماما قدیر بلوچ ءَ گوشت کہ بلوچستان ءِ جاور ھال ءُ بلوچستان ءَ انسانی اُگبالانی بارہ ءَ گپ کنگ گردن جنی یے – شپ تھاریں اندیمیں دیماں ھرس گواروکیں مات ءُ گوھارانی ھسوکی لَٹ ءُ کُٹی زندانی دیوالاں ٹکر جن اَنت ءُ کُکار ءُ پریات کن اَنت ءُ انساپ ءِ لوٹ ءَ کن اَنت –

آئی ءَ گُشت کہ لبز ء بلوچستان زبان ءَ کیت اِنت جزبگ، مارشت، جیڑگ ءُ ھیال ءُ لیکہ یک جنگی پڑے ءِندارگاں پیش کن اَنت کہ اود ءَ ھمک نیمگ ءَ آس ءِ برانز ءُ انسان سُچگ ءُ گندگ بنت -ھمود ءَ توپک، بارود ءُ ٹوپانی آس گواریں تواراں ھَسوکیانی توار گوشاں کپ ایت – بلوچانی واستا کپتگیں جون ماتانی پرسیگیں چم ، گوھارانی گیمرتگیں دیم، بلوچ ءِ جزبگ، واھشت ءُ واباں تُش تُشی ءَ گندگ ءَ کاینت اِنت ئِے –

ھمے وڑ ءَ گوستگیں روچ ءَ کیچ ءِ دمگ تمپ ءِ جھمنند کراچی ءَ روگ ءَ بیتگ ءُ ھب ءِ ھند ءَ بیگواہ بیتگیں ورناہ جلال بلوچ یلہ کنگ بیتگ –

دمگی مردمانی رد ءَ جلال بلوچ ء ھیر مھمد گوستگیں روچ ءَ پاکستانی چیریں ادارھاں دزگیر کرتگ ءُ ناشناسیں جاھے ءَ برگ ءَ پد پولیس ءِ گور ءَ رسینگ بیتگ ءُ پد ءَ شپ ءَ یلہ بیتگ –

دی بلوچستان پوسٹ

سربوتگیں ھالانی رِد ءَ بلوچستان ءِ دمگ گریشہ زباد ءَ سینزدہ جون دوھزار ءُ بیست ءَ پاکستانی پوج ءِ دست ءَ زورانسری آوار جنگ بوتگیں بلوچ نودربر محمد اعظم ء داؤد چہ پاکستانی چیریں زندان جاھاں یل کنگ بوتگ ءُ گِس ءَ سر بوتگ –

اھوالکار ءِ رِد ءَ اعظم ءِ ھمراھی ءَ دگے مردم ھم آوار جنگ ءُ بیگواہ بوتگ انت بلے آ دوھزاد ءُ بیست ءَ مزنیں عید ءَ یک روچ ءِ پیش یل کنگ بوتگ انت – بلے آعظم دارگ بوتگ –

اھوالکار ءِ رِد ءَ اعظم بازیں لَٹ ءُ کُٹاں مازگی نادراھی ءِ دیمپان ءُ آئی یاداشت کُنٹ اِنت-

زانگ بہ بیت بلوچستان ءِ جتا جتائیں دمگاں ھزارانی کچ ءَ مردم پاکستانی پوج ءَ آوار جتگ ءُ بیگواہ کتگ اَنت – آھانی تہ ءَ کمے کساسے ءَ مردم یل کنگ بوتگ اَنت بلے آ ھم بازیں لَٹ ءُ کُٹانی سوب ءَ نادراھی ءِ دیمپان بیتگ اَنت ـ بازینے زنداناں چہ یل بوگ ءَ پد مازگی نادراھیانی سوب ءَ ءُ بازیں لٹ ءُ کٹانی درداں بیران بوتگ انت –

دی بلوچستان پوسٹ

سر بیتگیں ھالانی رد ءَ بلوچستان ءِ بنجاھی شھر شال ءِ ھند برمہ ھوٹل ملک پلازہ ءِ نزیک ءَ مانشجاہ ءَ یک مردمے ءِ کپتگیں جون دزکپتگ۔

جون ءِ پجار مھمد ظریف ء عبدالعلی ءِ نام ءَ زانگ بیتگ کہ آئی ءِ گردن بُرگ ءُ چگل دیگ بیتگ۔

پھزداراں لاش چِست کرتگ ءُ وئیل ءِ پَٹ ءُ پول بندات کرتگ بلے وئیل ءِ بارہ ءَ گیشیں سرپدی دز نہ کپتگ اَنت۔

زانگ بہ بیت بلوچستان ءِ بازیں جاھاں جونانی دزکپگ ھمک وھد ءَ بیگ ءَ اَنت بلے گیشتریں جونانی پجار نہ بوگ ءَ اَنت۔

دی بلوچستان پوسٹ

سر بیتگیں ھالانی رد ءَ نصیر آباد ءِ دمگ منجوشوری ءَ پِت ءَ تیرگواری کرتگ ءُ وتی جنک ءُ دگہ یک مردمے کُشتگ اَنت –

پولیس ءِ رد ءَ مروچی سھب ءَ الطاف حسین نامیں مردمے ءَ تیرگواری کرتگ ءُ وتی جنک ءُ آئی ءِ گون ءَ سلکاری ءِ بھتام ءَ دگہ مردمے کُشتگ اَنت –

پولیس ءِ رد ءَ ھال ءِ سر بیگ ءَ پولیس ءَ وت ءَ سر کرتگ ءُ اود ءَ الطاف حسین ءُ گوں ھمراھے توپک ءُ دزگیر کرتگ ءُ پولیس ءِ کارگس ءَبرتگ ءُ بندیگ کرتگ –

پولیس ءِ رد ءَ وئیل گیرت ءِ نام ءَ بیتگ ءُ گیشیں پَٹ ءُ پول بیگ ءَ اِنت –

پولیس ءِ رد ءَ ھردوکیں مردمانی جون چِست کنگ ءُ بیتگ ءُ نصیر آباد ءِ نادراہ جاہ ءَ سر کنگ بیتگ ءُ اود ءَ اژدری پَٹ ءُ پول ءَ پد جون کھولانی گور ءَ سر کنگ بیتگ اَنت –

زانگ بہ بیت ھمک وھد ءَ گیرت ءِ نام ءَ کوشانی ھال سر بیگ ءَ اَنت ءُ بلوچستان ءِ بازیں جاھاں گیرت ءِ نام ءِ سر ءَ زالبول کُشگ بیتگ اَنت –