TBP Balochi

بلوچ اسٹوڈنٹس ایکشن کمیٹی ءِ بنجاھی جارکش ءَ وتی شنگ کرتگیں درشانی ءَ شال ءِ پریس کلب ءِ نوک گچین بیتگیں کابینہ ءَ را مراد باتی گوشتگ ءُ کہ اھوالکاری ءِ رھبنداں شریں رنگے ءَ پیلو کنوکیں بلوچستان ءِ اھوالکاری ءِ کرد ستاکرزی اِنت –

آئی ءَ گوشت کہ انیگیں دور ءَ اھوالکاری یک ھنچیں تَکے کہ اشی ءَ انسانانی زندگی بندوک اِنت – اھوالکاری ءِ درچ ءَ چاگرد ءَ ھمک روچ جنزوکیں جوانیاں چارگ ءُ اھوالکارانی سنچ داریں کرد ءِ نہ کُٹوکی درکاری ءَ روان اِنت – اھوالکاری ھما تک اِنت کہ مھلوک ءِ مازگانی تہ ءَ جُھلانکیں کرد ءِ پِرینوک اِنت ءُ مھلوک ءِ لڑانی تہ ءَ ھر تک ءَ بے تھمبلی ءِ آماچی ءَ کپان اَنت بلے اھوالکاری ءِ ھمک تکاں چریشاں ھوار کپگ ءُ وتی زمہ واریانی تہ ءَ گیشی کنان اَنت –

آئی ءَ گوشت : مروچی اے دور ءَ کہ اود ءَ یک نیمگے ءَ بلوچستان ءَ رسانکدر بند کنگ بیتگ اَنت اھوالکارانی پُرکاریانی راہ ءِ دیم ءَ ڈنگر جنگ ءُ جتائیں ترسینگانی کارمرد کنگ بیگ ءَ اَنت ءُ دومی نیمگ ءَ بلوچستان ءِ اھوالکار چہ وت ءَ وتی پرز ءَ پیلو کنگ ءَ اَنت، بلوچستان ءِ اھوالکارانی اے ناگیگیں دور ءَ آیانی بے کچوئیں کرد ستاکرزی اِنت –

آئی ءَ وتی درشانی ءِ گڈی ءَ گوشتگ کہ ما یک رندے پد ءَ نوک گچین بیتگیں سروک عبدالخالق رند ءُ جنرل سیکرٹری بنارس خان ءَ ھوار کابینہ ءِ آ دگہ باسکاں مراد باتی گوش آں ءُ امیت داراں کہ نوک گچین بیتگیں کابینہ المی ءَ داران کن اَنت ءُ پلگاریں رنگے ءَ جد ءُ جھد ءَ جنزان بنت –

بلوچ لبریشن آرمی ءِ جارکش جیئند بلوچ ءَ ناشناسیں جاھے ءَ رسانکدراں گوں گپ کنان ءَ گوشتگ کہ بی ایل اے ءِ سرمچاراں گوستگیں روچ ءَ شال ءِ دمگ زرغون ءَ اشکرانی کھن ءُ آئی ءِ پھزداری کنوکیں لیویز پوسٹ ءِ سر ءَ اُرش کرتگ – طور شار ءِ ھند گھاٹ ءَ کُرتگیں اُرش ءَ لیویز کارمنداں وتی پوسٹ یلہ کرتگ ءُ تکگ اَنت ءُ سرمچاراں لیویز کارندھانی پوجی ساز ءُ سامان دستیگ کرتگ ءُ اشکرانی کھن ءِ مشینری مانداشتگ اَنت –

آئی ءَ گوشت: چریشی ءَ پیسر بی ایل اے سرمچاراں بیست ءُ شش مارچ ءَ طالب لیز دمگ ءُ کھوسٹ ءِ ھند ءَ اشکرانی کھن نشانگ کرتگ – اُرشانی زمہ واری ءَ بلوچ لبریشن آرمی منّ ایت –

آئی ءَ دیمترا گوشت: بلوچ لبریشن آرمی اشکرانی کھن ءِ ٹھیکداراں گشین اِیت ءُ گوش ایت کہ آ زورگریں پوج ءِ کمک ءَ بند بہ کن اَنت، گوستگیں روچاں اُرش کرتگیں اشکرانی کھن ءِ ٹرک کارمرد بیتگ ءُ پوجی کارمند لس مردمانی دروشم ءَ بیتگ ءُ ھرنائی ءُ کَش ءُ گوری دمگاں سر بیتگ ءُ پوجی آپریشن ءَ بھر اش زرتگ، بلوچ آبادیانی سر ءَ بیوکیں اے آپریشن ءَ اشکرانی کھن ءِ ٹھیکدارانی کمک تچکی ءُ دشمنیں پوج ءَ گون بیتگ –

جارکش ءَ گوشت کہ ھما اشکرانی کھن ءِ ٹھیکیدار زورگریں پوج ءِ گون ءُ ھمکوپگ اِنت آئی ءَ ھرچ رنگ ءَ بلوچ راجی آمیدگس ءَ سزایانی دیمپانی کنگ کپ ایت – ما دشمن ءِ ھمکاریں دراھیں ٹھیکیداراں سرپد کن ایں کہ آ شکرانی کھن ءِ کار ءَ بند بہ کن اَنت اگاں ناں گڑا جانی تاوانانی زمہ وار وت اَنت –

جارکش ءَ گوشت کہ دومی نیمگ ءَ لیویز کارمنداں ھمک وھد سرپد کنگ ءَ ابید ھم بلوچ سرمچارانی دیم ءَ اوشتانک بیگ ءَ اَنت چریشی ءِ سر ءَ آیانی سر ءَ اُرش کرتگ ءُ اگاں سرپد نہ بوت اَنت گڑا اے اُرش ترند کنگ بنت –

نبشتانک: لالا مُکتار جان ابدمان بوت

نبشتہ کار :مِرزُک بلوچ

دی بلوچستان پوسٹ

منءَ یات اِنت 2014 ءِ سال ءَ وھدے پاکستانی لشکر پروم ءَ کہ ایر کپت ءُ میتگ پہ میتگ گردگ ءَ اَت لوگ پہ لوگ کماش ءُ ورنایاں لٹ ءُ کُٹ کنگ ءَ اَت وتی بیم ءَ مھلوک ءِ دل ءَ سرکنگ ءِ جُھد ءَ اَت مھلوک ءَ را ھمے گُشگ ءَ اَت وتی سرمچاریں زھگاں بیار اِت چینکس سنگت کہ شھران اَت اَنت آ ھم کوہ ءَ شُت اَنت کہ شھر ءَ دگہ جنجالے مہ بیت منی برات ھم شھری سنگتے اَت آ ھم گار بوت گڑاں ابا ءَ ءُ منی گوھار ءَ من ءَ جُست کُرت کہ تئی برات کُج ءَ اِنت من گُشت آ گوں وتی سنگتاں سگار کنڈ ءَ پکنک ءَ شُتگ ابا ءَ گُشت اے ھالتانی تہ ءَ پکنک ءَ شُتگ؟ من پہ دروگ ابا رازی کُرت شپ کہ بوت اباءَ پد ءَ من ءَ جُست کُرت شپ ءَ نئیت ؟ من گُشت نا دومی شپ گوست پد ءَ سیمی شپ کہ بوت گُڑاں پد ءَ من ءَ جُستے کُرت من دروگ بست ءُ اباءَ سک زھر گپت شپ ءِ 3 بج ءَ موٹرسیکلے توار بوت من زانت کہ برات اِنت وتی سیکل چہ دور ءَ بندے کُرت کہ ابا مزانت من شُتاں دیمایے ءُ گُشت ابا تئی سر ءَ سک زھر ءَ اِنت گڑاں تُپنگے چیر دات ءُ لوگ ءَ اتک اباءَ سک زھر گپت ءُ گُشت ھالتاں بچار انگت تو ابید پکنک ءَ نہ بئے ھیر ابا شُت وپت گُڑاں برات ءَ گُھار گُشت من ءَ سنگت گون اَنت آ کوچگ ءَ اَنت سک شُدیگ اَنت گُھار ءَ ورگ شر کُرت برات ءِ شلوار ءِ پادگ پہ ربڑ بستگ اَت اَنت گُھار ءَ دوتک اَنت برات ءَ من ءَ گُشت تو ورگ آں سیکل ءِ سر ءَ ایر کن من داں تُپنگ ءَ کار آں من ورگ سیکل ءِ کر ءَ بُرت آں برات اتک ما ھدا ھافظی کُرت۔

8 ماہ گوست پد ءَ ما وتی برات ءِ چارگ ءَ شُت اِیں برات ءِ پاد تراول اَت اَنت گُھار ءَ دیست گُڑاں گُشت من مِرات آں لالو تئی پاداں چے بوت ءَ برات ءَ گُشت مئے سر ءَ بالی گُراباں اُرش کُرت ءَ من ءَ وار نہ بوت ءَ کہ وتی بوٹاں پاد ءَ بہ کن آں بس شپاد ءَ در کپتگ آں ما کُلیں سنگت یک پہ یک بوتگ اِیں من 3 روچ ایوک ءَ بوتگ آں تھنا من ءَ وتی تُپنگ گون بوتگ داں 3 روچ ابید پیشّانی کونش آں دگہ ورگ نہ بوتگ پد ءَ سنگتاں من ءَ پد جتگ ءُ دست گپتگ پمیشکہ انگت منی پاد تراول اَنت ما دو روچ نشت اِیں رند ءَ برات ھدا ھافظ کُرت ءُ در کپت اِیں۔

3 ماه ءَ رند منی ناکو ءَ من ءَ گشت ھرچ وھد ءَ مُکتار فون کنت من ءَ ھال بہ دئے من ءَ کارے ھست 4 ماه ءَ پد برات ءَ فون کُرت ما برات گهاراں گپ کُرت من پد ءَ ناکو ءِ ھیال ءَ کپت آں ءُ برات ءَ را گُشت فون ءَ کٹ مہ کن ئے ناکو ءَ روچے گُشتگ آرا گوں تو کارے ھست برات ءَ گُشت شریں جلدی توارے کن من ناکو توار کُرت بلئے فون اسپیکر ءِ سر ءَ اَت گُڑا ناکو ءَ سلام ءُ دعا کُرت پد ءَ گشت ئِے بیا وتارا لشکر ءِ دیم ءَ پیش کن اگاں پیش نہ کن ئے گُڑاں منی ءُ تئی ھچ سیادی نیست برات ءَ گشت ناکو تئی برات زهگ ءَ را گوں وتن ءَ اشک انت من ءَ ھچ سیادی چہ زمین ءِ سیادی ءَ جتا کُرت نہ کنت منی سیاد ،منی سنگت منی گلزمین اِنت ھمد ءَ ناکو ءَ فون کٹ کُرت۔

پد ءَ دیر دیر ءِ سرءَ گوں لالا ءَ گپ بوتگ2017 ءَ رمزان ءِ 15ءِ شپ ءَ من ءَ سنگتے ءَ فون کُرت کہ پاکستانی لشکر ءِ ءُ سنگتانی میان ءَ جنگ بوتگ ءُ مُکتار جان شھید بوتگ بس ھمے گپ ءَ ھوار منی چمانی اَرس یلہ بوت اَنت من ھرچ وڑ جُھد کُرت من ءَ پاداں گس ءِ نیمگ ءَ نہ بُرت منی چم سیاہ بوتاں ءُ دل تُست من کمیں کور ءِ تھ ءَ نشت آں ھمد ءَ منی تروزتک اتک من ءَ دست ءَ گپت ئِے ما لوگ ءَ سر بیتاں چار آں کُل پیسر ءَ گریوگ ءَ اَنت اے تیوگیں شپ ما پہ گریوگ گوازینت رند ءَ زمین ءِ دوستیں سالونک ءَ را آؤرت اِش آئی جان ءَ را شُشت اِش ءُ منی گُھار ءَ وتی لاڈکیں برات رُکست کُرت رند ءَ من، منی کستریں برات،ابا جان ءُ میتگ ءِ مُردماں مُکتار جان ءِ نماز جنازہ ءَ پد مُکتار جان پہ مُجتی زمین ءِ باھوٹ کُرت بلئے من ءَ انگت اے گپ باور بوگ ءَ نہ اَت کہ منی لالا چہ ما پہ مُدامی سستگ ءُ شُتگ جنازہ ءَ رند کُلیں مُردم شُت اَنت بس تھنا مئے کھول ءِ مرُدم پشت کپت اَنت اباءَ کستریں برات ءِ دست گپت ءُ شُت من زانت کہ من وتی لالا پہ مجُتی گلزمین ءِ باھوٹ کُرتگ من باز پریات کُرت منی چم تھار بوت اَنت منی تروزتک ءَ گُشت بہ رویں من گُشت لالا ھمد ءَ اِنت ما کُجا رو اِیں؟ آئی ءَ گُشت لالا نوں گلزمین ئیگ اِنت پاد ءَ بہ رویں ما چہ ھمد ءَ لالا رُکست کُرت ءُ در کپت اِیں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ گوستگیں روچ ءَ کیچ ءِ سامی ءَ ناشناسیں سلاہ بندیں مردماں پاکستانی پوج ءِ بنجل ءِ سر ءَ اُرش کرتگ-

دمگی مردمانی رد ءَ اُرش ءَ دمگ ءَ بازیں وھداں تراک ءُ تیرانی توار بیتگ- دومی نیمگ ءَ بلوچ سلاہ بندیں گل بلوچستان لبریشن فرنٹ ءَ بیتگیں اُرش ءِ زمہ واری منّ اِتگ –

بلوچستان لبریشن فرنٹ ءِ جارکش میجر گْوھرام بلوچ ءَ گوشتگ کہ گوستگیں روچ ءَ سھب ءِ ساھت شَش ءَ پوجی بنجل مارٹرگولھاں گوں مانبستگ – اے یک نوکیں بنجلے کہ چین پاکستاب اکنامک کوریڈور(سی پیک) ءِ سر ءَ چہ دو ماھاں برجم کنگ بیتگ –

میجر گوھرام بلوچ ءَ گوشت: سرمچاراں پوجی بنجل ءَ ھشت مارٹر آس داتگ کہ اے مارٹر بنجل ءِ تہ ءَ کپتگ اَنت ءُ چریشی ءَ زورگریں پوج ءَ جانی ءُ مالی تاوانانی دیمپانی کنگ کپتگ –

جارکش ءَ گوشت کہ اے اُرش بلوچستان ءِ آجوئی ءَ برجاہ مان اَنت –

نبشتانک: لوامز اولڈ ھاسٹل یا برٹش فوجی رجمنٹ

نبشتہ کار: این آر بلوچ

دی بلوچستان پوسٹ

لوامز ءِ آشری وت اَت چہ من اولڈ ھاسٹل ءَ اتک ءُ شپٹ بیت آں ، اد ءَ آیگ ءَ پد گُشے زاناں منی پُنر جنم بیتگ اَت من ھما برٹش ایمپائر ءِ اَھد ءَ وتی چم پچ کُتگ اِت اَنت دراجیں کوھنیں فوجی کوٹی اَت اَنت ، لھتے کوٹی پرشتگ اَت ءُ لھتے وتی گُڈی سیمسراں اِت اَنت درائیں کوٹی یک واڑے ءِ تہ ءَ بند اِت اَنت چَپ ءُ چاگرد ءَ لھتے لیٹ لگ اتگ اَت ءُ ھمے لیٹانی تہ ءَ لھتے تَھنا بس اَنچو اَست اَت بَلے روک بیگ ءَ مرگ کُتگ اِت ئِے۔

من اتک آں کوٹی پچ کُت ءُ کوٹی ءِ پچ کنگ ءَ گوں یک برے من ءَ گُماں بیت کہ اگاں اَسَل ءَ وھدے اِے برٹش فوجی رجمنٹ ءِ بوتیں گڑا اِے کوٹی اَلم ءَ ٹاچر سیل بیتگ اَت اِد ءَ مردم پہ لٹ ءُ کُٹ کنگ ءَ آرتگ اَت ئِے-

دیوال ءِ لگوشتگیں رنگ ءُ موکوانی بستگیں تند ءُ پد ءَ نزاناں گُٹکا یا ماوائی ریتگیں تُک دیوال ءَ انچوش پدر کنگ ءَ اِت اَنت کہ اِد ءَ کسے آرگ ءُ ٹاچر کنگ بیتگ، بازیں لٹانی ھوناں تْرینزّ بستگ اَت ءُ اتکگ ءُ دیوال ءَ لگی اتگ اَنت –

من وت ءَ یک ٹاچر سیلے ءِ تہ ءَ گندگ ءَ اِت آں مُدتے بیت کہ بندی جاہ ءَ بنداں ،نُک ھُشک بوان اَت ، اَنچش سما بیگ ءَ اَت چماں روچ ءِ رنگ شموشتگ اَت ،زمین ءِ سر ءَ کپتگ اَت آں جَند ءُ جُور اَت آں ساہ ءِ زیرگ سَکّ گران بوان اَت ، مردمانی یات چو تامری ءِ دروشم ءَ دماگ ءِ مجگانی تہ ءَ تیز تیز ءَ بدل بوان آت اَنت گُشے زاناں انی نہ انی مجگ ترک اَنت ءُ ھما ماوا ئے تُک ءِ وڑا دیوال ءِ سر ءَ تْرِینزّ بند اَنت-

اچانگ ءَ داں کوٹی ءِ پنکہ سُرگ ءَ لگ اِت من چَک جَت ءُ چار ات داں دومی بچک اَت کوٹی ءِ آئی ءَ پنکہ ءِ بٹن جتگ آت ءُ من ءَ گُشت ئِے ھمش اِنت اولڈھاسٹل اِے گُشگ ءَ پد منی چمانی توک ءِ چارت اِت ءُ گُشے زاناں آئی ءَ زانت کہ من چیزے گُشگ لوٹاں بَلے من ھچ نہ گُشت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سربوتگیں ھالانی رِد ءَ بلوچستان ءِ دمگ تفتان، ھزدار ءُ خاران ءَ دگ ءِ وئیلاں ھبدہ مردم ٹپی ءُ دو مردم بیران، شال ءَ تیرگواری وئیلے ءَ سَے مردم ٹپی وھدیکہ نصیرآباد ءَ گیرت ءِ نام ءَ پت ءَ جنکیں چُک کُشتگ ءُ یکے زدگ کُتگ –

گیشیں ھالانی رِد ءَ بلوچستان ءِ دمگ تفتان ءَ دو گاڑیانی ڈیک ورگ ءِ سوب ءَ یک مردمے بیران ءُ پانزدہ ٹپی بوتگ اَنت –

وئیل تفتان ءِ نزیک ءَ کوہ ءِ دلیل ءَ دیم ءَ اتکگ کہ دو ویگو گاڑیانی ڈیک ورگے سوب ءَ پانزدہ مردم سک باز ٹپی بوتگ اَنت وھدیکہ امین اللہ ء حاجی شمس الدین ھما جاہ بیران بوتگ –

ٹپی بوتگیں مردم ھما دمان ءَ ایف سی نادراھجاہ نوکنڈی ءَ برگ بوتگ انت، ٹپی بوتگیں مردمانی تہ ءَ شش چُک دو زالبول ءُ ھپت مردین ھوار اَنت-

دگہ وئیلے بلوچستان ءِ دمگ ھزدار ءَ پیش اتکگ کہ اود ءَ یک مردمے بیران بیتگ –

ھزدار ءِ دمگ وھیر ءَ دگ ءِ وئیل ءَ یک مردمے بیران بوتگ، بیران بوتگیں مردم ءِ پجار یوسف ء حاجی نبی وارس جھمنند وھیر وڈھ ءِ نام ءَ چہ بوتگ –

ھمے وڑ بلوچستان ءِ دمگ ھاران بسیمہ ءَ گاڑی ءَ گوں موٹر سیکلے ءَ ڈیک وارتگ، ڈیک ورگ ءِ سوب ءَ موٹر سیکل ءَ سواریں دو مردم ٹپی بوتگ اَنت –

وئیل کلی غلام رسول کنڈگ ءَ دیم ءَ اتکگ کہ گاڑی ءِ دام کنگ ءَ پت گوں چُک ءَ ٹپی بوتگ-

ٹپی بوتگیں مردمانی پجار عبدالجلیل ءُ کریم بخش ءِ نام ءَ چہ بوتگ انت دوئیں مردم بسیمہ نادراھجاہ ءَ سرکنگ بوتگ انت ، پہ گیشیں الاج ءِ ھاتر ءَ کریم بخش ھزدار ءَ دیم دیگ بوتگ –

شال ءَ تیر گواری ءِ وئیلے ءَ سَے مردم ٹپی بوتگ اَنت –

ھالکارانی رِد ءَ شال ءَ زرغون مارکیٹ ءِ نزیک ءَ ناشناسین مردمانی تیر گواری ءَ سَے مردم ٹپی بوتگ اَنت-

ٹپی بوتگین مردم نادراھجاہ ءَ سرکنگ بوتگ انت – اے درگت ءَ گیشیں پٹ ءُ پول دمگی پولیس کنگ ءَ اَنت –

دومی نیمگ ءَ بلوچستان ءِ دمگ نصیر آباد تمبو ءَ گیرت ءِ نام ءَ پت ءَ وتی جنکیں چُک تپر ءِ سر ءَ کُشتگ ءُ یکے مردمے زدگ کُتگ –

پولیس ءِ رِد ءَ کتکار صابر ءَ گیرت ءِ نام ءَ وتی جنکیں چُک افروز بی بی تپر جتگ کُشتگ ءُ محمد اکبر نامیں مردمے ٹپی کُتگ ءُ تتکگ –

ھال سر بوگ ءَ دمگی پولیس ءَ وت ءَ وئیل جاہ ءَ سر کتگ ءُ لاش ءُ ٹپی بوتگیں مردم دست گپتگ ءُ نادراھجاہ ءَ سر کتگ انت اژدری چار ءُ ٹپاس ءَ پد لاش کھول ءِ ھوالہ ءَ کنگ بوتگ اے درگت ءَ خان کوٹ ءِ پولیس گیشیں پٹ ءُ پول کنگ ءَ انت –

زانگ بہ بیت نصیر آباد ءَ ھوار بازیں جاھاں گیرت ءِ نام ءَ زالبول کُشگ بیگ ءَ اَنت بلے واکدار ءُ دمگ ءَ ھواریں مردمانی نیمگ ءَ بیوکیں وئیلانی بارہ ءَ دگہ گیشیں سرپدی دیم ءَ نیایگ ءَ اَنت –

سر بیتگیں ھالانی رد ءَ روکپتی بلوچستان ءِ دمگ پنوج ءَ ایرانی چیریں ادارھاں یک مردمے آوار جتگ ءُ برتگ –

اھوالکار ءِ رد ءَ گوستگیں شپ ءَ پنوج ءِ ھند رمش ءَ ایرانی چیریں ادارھاں یک لوگے ءَ دور کرتگ ءُ اود ءَ عالم رائسی ءِ دزگیر کرتگ ءُ برتگ اِت –

چاگردی رسانکجاھاں روکپتی بلوچستان ءَ بندوکیں چاگردی رسانکجاہ کارمرد کنوکانی گوشگ اِنت ایرانی چیریں ادارہ ھروھد ءَ ابید ء ارزی نامہ ءَ لس مردمانی لوگاں دور کن اَنت ءُ اود ءَ جاڑیگیں مردماں دزگیر کن اَنت ءُ بیگواہ کن اَنت –

رمیش پنوج ءُ کتیج ءَ ھواریں میتگے کہ پنچ سال پیسر آئی ءِ آبادی ھپت سد ءُ دو بیتگ –

بلوچستان ءِ بنجاھی شھر شال پریس کلب ءِ دیم وائس فار بلوچ مسنگ پرسنز ءِ زھرشانی بنجل برجاہ، زھرشانی مروچی چار ھزار ءُ دو سد ءُ شست ءُ شش روچ سرجم بوتگ -راجدار ءُ چارگردی باسکاں بنجل ءِ تر ءُ تاب کُرتگ ءُ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ وتی ھیال درشان کُتگ ءُ گوشتگ کہ بلوچستان ءِ تہ ءَ انسانی ھکانی نگیگیں جاورھال ءُ لگتمالی ءَ انسانی ھکانی گل ءُ بازیں ڈیھ ءِ وتی ھیالانی درشانی ءَ کنگ ءَ انت بلے پاکستان ءِ آمیدگس ءُ دگہ نام ءُ نھادیں ادارہ وتی سماعت ءُ دگہ مراگشاں چہ انسانی ھکانی نگیگیں جاورھالانی درگت ءَ میاں استمان ءُ دگہ انسانی ھکانی گلاں گمراہ کنگ ءَ انت –

آئی ءَ دیمتر ءَ گوشتگ مروچی ھم بلوچستان ءَ ھزارانی کچ ءَ بلوچ ریاستی چیریں ادارہ ءُ آئی ءِ داشتگیں ڈیتھ اسکواڈ گون انت کہ آھاں چیریں ادارھانی ازیت جاھاں درد ناکیں سزا دیگ ءَ انت –

آئی ءَ گوشتگ بلوچانی گون ءَ رستری ءِ وڑ ءَ سلوک کنگ مہ بیت – بلوچستان ءِ تہ ءَ بازیں لیبی ءِ پُترتگ لھتے ھاکمانی گل ءِ باسک ھم زورانسری آوار جنی ءُ کُوش ءَ ھوار بوگ ءَ ایر جن انت –

ماما قدیر بلوچ ءَ گوشتگ کہ ما میان اُستمان ءُ دنیا ءِ انسانی ھکانی گلاں چہ لوٹ کنیں کہ آ بلوچستان ءِ تہ ءَ پاکستان ءِ ریاستی زوراکی ءُ ناشرکاری ءُ انسانی ھکانی لگتمالی ءِ دارگ ءِ ھاتر ءَ گامگیج بہ زور اَنت –

سر بیتگیں ھالانی رد ءَ گوستگیں شپ ءَ بلوچستان ءِ دمگ کیچ ءِ بنجاھی شھر تربت ءَ ناشناسیں مردماں پاکستانی پوج ءِ چوکی ءِ سر ءَ اُرش کرتگ-

اُرش صلالہ بازار ءَ بیتگ کہ اود ءَ سلاہ بندیں مردماں پوج ءِ چوکی ءِ سر ءَ دزبمبے چگل داتگ چریشی ءَ پوج ءِ جانی تاوانانی ھال بیتگ –

دومی نیمگ ءَ بلوچستان لبریشن فرنٹ ءِ جارکش میجر گوھرام بلوچ ءَ گوستگیں شپ ءَ بیتگیں اُرش ءِ زمہ واری منّ اِتگ ءُ گوشتگ کہ سرمچاراں تربت شھر ءَ صلالہ بازار ءَ شھید یحیٰ چار راہ ءَ پاکستانی پوج ءِ سنگر ءِ سر ءَ دزبمبے چگل داتگ کہ چریشی ءَ سنگر ءَ جاڑیگیں کارندہ مرتگ –

جارکش ءَ گوشتگ کہ چیک پوسٹ ءِ نزیک ءَ رھگوزی ئیں طیب بلوچ زدگ بیتگ کہ چریشی ءَ مارا درد اِنت ءُ ما آئی ءِ کھول ءَ دلی درد ءُ گم ءِ درشان ءَ کن ایں – ما یک رندے پد ءَ شھریاں گوں دزبندی کن ایں آ پاکستانی پوج ءِ گاڑی، کاروان، چوکی، سنگر ءُ بنجلاں دور بہ بنت –

آئی ءَ گوشت کہ یک نیمگے ءَ پاکستانی پوج ءَ میان اُستمانی رھبند پروشتگ ءُ شھراں چوکی جوڑ کرتگ اے ریپک بلوچ راج ءَ زیردست کنگ ءُ گلامی ءِ دراج کشی اِنت – اشی ءِ دیمپان کنگ مئتمے درسانی پرز اِنت – شھراں چوکیانی جوڑ کنگ مردمانی ترسینگ ءُ ترس ءِ تالانی اِنت – ھمے بنجل ءُ چوکیاں آ ایوک ءَ شھریاں تنگ کنت بلکیں آیاِ زھنی نادراھیانی دُچار کنت آیانی سر ءَ تیرگواری ھم کنت کہ گوستگیں سال ءَ آپسر ءِ وئیل مردمانی دیم ءَ اِنت –

آئی ءَ گوشت کہ ما پاکستانی پوج ءِ سر ءَ اے وڑیں اُرشاں برجاہ داریں ءُ اے شھر ءُ سرجمیں بلوچستان آئی ءَ درکنگ ءَ لاچار کن ایں اے درچ ءَ بلوچ راج ءَ گوں دزبندی اِنت آ اشاں دور بہ بنت –

نبشتانک: بساک ءُ منی ممبئی

نبشتہ کار: این آر بلوچ

دی بلوچستان پوسٹ

یک نودربرے ءِ اولی زمہ واری آئی ءِ وانگ اِنت ءُ دومی جیڑگ اِنت بائد اِنت ھرچ ھما نودربر کہ وانگ ءَ ایں ایشانی بابت ءَ اَلم بہ جیڑ اِیت، لھتے چیز پہ زور مردم ءَ را جیڑگ پرما اَنت اَنچوش کہ مئے اِے سنگت بساک جان اِنت-

من وَ نزانتگ اَت کہ بساک چی یے ءُ بساک ءِ تہ ءَ نودربرانی politics ءِ وڑ ءُ پیم چی اَنت ءُ کُجام conditions آنی سبب ءَ بساک جان جلسہ جلوس کنت ، من بس تَھنا social media ءَ دیستگ اَت کہ بساک یک organization ءِ بلوچ نودربرانی ایشی ءِ کار پہ بلوچ نودربرانی وانگ ءُ زانگ ءُ شَریں وڑے ءَ سرپدی دیگ ءُ ھرچ وڑیں اڑ ءُ جنجالانی دیم ءِ اوشتگ ءُ مسلھانی گیش ءُ گیوار کَنَگ ءِ ھاترا جوڑ کنگ بیتگ-

وھد گوازان اَت من اوں وھدے تیزیں گاماں راواجانی ھمرائی ءَ جُھد کُت کہ پشت مہ کپاں
بازیں سر ءُ پادے ئے جَنَگ ءَ پد منی سر اَتگ ءُ اوتھل شریپ ءَ سر بیت-

اِے ھمے وھد اَت کہ بساک تَھنا یکے ءَ اَت ،ھچ دِگہ دُور دُور ءَ گیشیں بساک ءِ ھمنام نیست اَت، من پد ءَ ھَما مرد کہ سَکّ جلدی بے کسی ءِ convince کَنَگ ءِ ابید دومی مردم ءَ چہ سَکّ جلدی convinced بیتگ اِت اَنت، من مُدام جیڑ اتگ اَت کہ اِے چون اَنچو زَبْر اَنت اِے چون بالا بالائیں Article نبشتہ کن اَنت-

من گُش ئے زاناں Bollywood ءِ تامری ءِ بَھری اِت اَنت ءَ کہ آ اولی رند اَت ممبئی ءَ اتکگ اَت ءُ ممبئی ءِ سر ءَ راج کنگ ءِ واب ءَ گِنداگ ءَ اَت، بساک ءِ تہ ءَ منی انٹری چو تامری ءِ دروشم ءَ بیت،سنگت شریں وڑے ءَ کار کنگ ءَ اَت اَنت، بَلے دیر نہ گوست کہ ممبئی ءَ چم بیت مردمانی کُکار اَت ،جاک اَت الزام تراشی اَت ءُ ایشانی میان ءَ ممبئی پروشگ بیگ ءَ اَت بھر بیگ ءَ اَت بَلے من ءَ سما نیست اَت مرچی ممبئی دو بھر ءِ تہ ءَ اِنت اِیشی ءِ کپ کنگ ءَ پد ھچ نہ بوگ ءَ اِنت تَھنا بس ممبئی ءِ نام پَشت کپتگ آ اوں دلوارگ اِنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔