TBP Balochi

سر بیتگیں ھالانی رد ءَ گوادر ءَ کُنٹانی ھور ءِ بندش ءِ سوب ءَ تیل باپاری مھلوک ءَزھرشانی کرتگ ءُ ڈپٹی کمشنر ءِ کارگس ءِ دیم ءَ نندانک جتگ –

دی بلوچستان پوسٹ

زھرشانی بنجل ءَ سیاسی پاٹی ءُ دمگی سروک، اسرمندیں کُنٹانی ھور ءُ دریاورداں ھوار بازیں کچے ءَ مھلوک ءَ بھر زرتگ –

آیاں گوشت کہ کنٹانی ھور ءِ بندش ءِ سوب ءَ ھزارانی مھلوک بے روزگاری ءِ آماچ اَنت ءُ چریشی ءَ مھلوک دپارے نگن ءَ زبھر بیان اَنت –

آیاں گوشت کہ کُنٹانی ھور ءَ کار ءُ بار کنوکیں مردم دمگی اَنت ءُ چرشی ءَ بازیں کچے ءَ مردمانی روزگار ءِ بندش ءَ آیانی گون ءَ اے زوراکی ءِ بیگ ءَ اِنت –

آیاں گوشت کہ زرکاری ءِ بندش مھلوک ءَ شُد کُشی ءِ آماچی اِنت کہ باید سرکار اے کار ءُ باراں پچ بہ کنت ءُ دمگی مردماں روزگار بہ دنت –

بلوچستان ءَ اے وھد ءَ ھمک جاہ ءَ روزگار ءِ ھاتر ءَ زھرشانی یکشل ءَ برجاہ اَنت ءُ مھلوک ءِ گوشگ اِنت سرکاری واکداراں روزگار بند کرتگ ءُ چریشی ءَ ھزارانی کچ ءَ مردم بے روزگاری ءَ نشتگ اَنت –

ابید جار ءُ بازیں لوڈشیڈنگ ءِ ھلاپ ءَ زھرشانی ءَ زمیندار ایکشن کمیٹی ءَ بلوچستان ءِ دراھیں بنجاھی شھدگ بند کرتگ اَنت، ھمے رنگ ءَ پنجگور ءَ ھم تیل باپاری مھلوک ءَ سی پیک دگ ءِ سر ءَ زھرشانی نندانک جتگ –

بلوچستان ءَ سرکاری ملازماں پد زمیندارانی نیمگ ءَ بازیں کچے ءَ زھرشانی کنگ بیگ ءَ اِنت – زمینداراں لکپاس ءِ ھند ءَ شال کراچی ءَ ھواریں بنجاھی شھدگ بند کرتگ ءُ نشتگ اَنت ھمے رنگ ءَ شال داں ژوب ءُ شال چمن ءِ بازیں جاہ وھدیکہ مستونگ پنچپائی ءِ ھند ءَ شال تفتان شھدگ بند کنگ بیتگ –

زمیندارانی ایکشن کمیٹی ءِ بنجاھی رھشون ھاجی عبدالرحمان بازئی ءَ گوشت سرکار زمینداراں دگانی بند کنگ ءَ لاچار کنت اِنت – آئی ءَ گوشت زمینداراں بلوچستان ءِ بازیں جاھاں کساس بیست ءُ دوجاھاں دگ بند کرتگ اَنت –

زمینداراں کولپور ءَ بلوچستان ءَ سندھ ءَ ھواریں شھدگ بند کرتگ، ھمے رنگ ءَ یارو ءِ ھند ءَ چمن ءَ شال ءَ ھواریں دگ بند کنگ بیتگ – زمیندارانی نیمگ ءَ دگانی بند بیگ ءِ سوب ءَ دگانی سر ءَ گاڑیانی لین کتاری ءَ گندگ بنت-

عبدالرحمان بازئی ءَ گوشت کہ بلوچستان ءِ سرکار بس دو اداراں بجلی دیگ ءَ اَنت – بجلی ءِ بندش ءِ سوب ءَ رُستگیں کشار ءُ زمینداراں بازیں کچے ءَ تاوانباری آماچ اَنت –

ھمے رنگ ءَ پنجگور ءَ تیل باپاری مھلوک ءَ سی پیک دگ بند کرتگ ءُ زھرشانی بندات کرتگ –

زھرشانی ءَ سیمسر ءَ تیل باپاری ءَ ھواریں کسان ءُ مزنیں گاڑیانی واھنداں سی پیک دگ ءِ سر ءَ ھاھج یاسین مارکیٹ ءِ نزیک ءَ نندانکی زھرشانی جتگ ءُ نشتگ اَنت –

زھرشانی ءَ بی این پی ءِ بنجاھی جوائنٹ سیکرٹری میر نزیر اھمد ءُ بس اونرز ایسوسی ءِ سروک آغا شاہ ھسین ءُ گوستگیں نازُم پروم عبید اللہ بلوچ ءُ دگہ سیاسی ءُ چاگردی مردم ھوار اَنت –

آیاں گْوشت دمگ ءَ ھزارانی مردمانی والینگ بس ایران ءِ سیمسری ءَ ھوار اِنت ایران ءِ سیمسر ءِ بند بیگ ءَ گاڑیانی واھند ءُ ڈرائیور دُزی ءُ ترندیانی سوب ءَ ھزارانی مردم لاچار ءُ پریشانیانی دیمپان اَنت –

آیاں گوشت کہ سیمسر ءِ کار ءُ بار پچ کنگ بہ بیت ءُ مردمانی پھزداری کنگ بہ بیت –

زانگ بہ بیت گوستگیں بازین روچاں بلوچستان ءَ نوکریاں ھوار بازیں پھناتاں مردم زورگار ءِ ھاتر ءَ زھرشانی کنگ ءَ اَنت –

سرکاری واکدار اے درچ ءَ مردمانی سدکی دیگ ءَ گندگ بیگ ءَ نہ اَنت –

جوائنٹ ایکشن کمیٹی جامعہ بلوچستان ءِ لوٹاں سرجم بہ کن اَنت، جامعہ ءَ نودربرانی یونین ءِ سر ءَ بندش ءَ نہ منّاں – جارکش

بلوچ اسٹوڈنٹس آرگنائزیشن ءِ بنجاھی جارکش ءَ وتی یک شنگ کرتگیں درشانی ءَ گُشتگ کہ جوائنٹ ایکشن کمیٹی جامعہ بلوچستان ءِ لوٹانی پلامرزی کرتگ ءُ گْوشتگ کہ جامعہ بلوچستان مالی تنگدستی ءِ آماچگاہ جوڑ کرتگ استاد ءُ ملازمینانی الاؤنسز ءِ نیمسلونگ کنگ بژنیگی یے استاد آفیسران ءُ ملازمیناں ھاؤس ریکوزیشن ءُ دگہ الاؤنسز ءَ ابید پگار دیگ ءَ اَنت –

جارکش ءَ گوشت کہ نوزدہ سد ءُ نود ءُ ھشت ءِ بنگیج ءِ رد ءَ ناجائزیں وڑ ءُ پیمانی جھد کنگ بیگ ءَ اِنت ردیں پالیسانی کرپشن ءُ ٹگی ءُ ھنرانی سوب ءَ جامعہ بلوچستان مالی تنگدستیانی آماچ بیتگ –

جارکش ءَ وتی بیان ءِ تہ ءَ گوشت کہ بلوچستان ءَ وانگی ادارہ گیشتر مزن شھدربرجاہ نزیکیں مردماں مزنجں اگدواں نادینگ ءَ اَنت دراھیں شھدربرجاھاں نودربر سیاسی پرکاریاں سرجم ءَ بندش جنگ بیتگ اَنت بی ایس او ءَ ھروھد ءَ کیمپس پالٹکس ءِ سر ءَ بندشی ءِ ھلاپ ءَ جد ءُ جھد کرتگ ءُ آؤکیں وھداں ھم دومی دیمروئی واھگداریں گلاں گوں ھوار بیت اِنت ءُ نودربرانی یونیز ءِ بندش ءِ ھلاپ ءَ جد ءُ جھد کنت –

جارکش ءَ گوشت کہ بی ایس او جامعہ بلوچستان ءَ استاد آفسر ءُ ملازمینانی جائزیں لوٹانی پلامرزی ءَ کنت کہ آ کیمپس پالٹکس ءِ سر ءَ بندشی ءُ سیاسی پُرکاریانی بندش ءِ ھلاپ ءَ جد ءُ جھد ءَ ھمراھداری کنت –

بلوچستان ءِ دمگ کیچ ءِ ھند چہ تمپ ءَ پاکستانی پوج ءَ یک مردمے درزگیر کنگ ءَ پد بیگواہ کرتگ –

سر بیتگیں ھالانی رد ءَ گوستگیں روچ ءَ پاکستانی پوج ءُ چیریں ادارھاں تمپ ءِ دمگ سرنکن ءَ شاہ دوست نامیں مردمے ءِ لوگ ءَ بیڑ برتگ ءُ زالبول ءُ چُکانی سر ءَ سر ءَ زوراکی کنان ءَ یک مردمے دزگیر کنگ ءَ پد ناشناسیں زنداناں برتگ –

دزگیر کرتگیں مردمے پجار علی ھیدر ء دلجان ءِ نام ءَ زانگ بیتگ –

زانگ بہ بیت گپتگیں ورناہ چریشی ءَ پیسر ھم پاکستانی پوج ءِ دست ءَ دزگیر کرتگ ءُ بیگواہ کرتگ ات ءُ لھتے ماھاں پد یلہ کنگ بیتگ، گوستگیں روچ ءَ یک رندے پد ءَ دزگیر کنگ بیتگ –

بلوچستان ءَ مردمانی بیگواہ کنگ ءِ درچ یکشل ءَ برجاہ اَنت داں انیگ ءَ سدانی کچ ءَ مردم چہ بلوچستان ءَ بیگواہ اَنت کہ اشانی تہ ءَ نودربر، ڈاکٹر، انجینئر، استاد ھوار اَنت –

ھمے وڑ گوادر ءَ سیزدہ اکتوبر دوھزار ءُ ھبدہ ءَ گوادر ءَ پاکستانی پوج ءُ چیریں ادارھانی دست ءَ آوار جنگ بیتگیں دشت شولی ءَ سیادی داروکیں فدا ء رحیم بکش ءُ شھنواز ء جلال خان گوادر ءَ یل کنگ بیتگ اَنت ءُ وتی لوگاں سر بیتگ اَنت –

ھالانی تہ ءَ گوشگ بیتگ کہ فدا ءُ شھنواز گوستگیں چار سالاں پیسر پوج ءُ چیریں ادارھانی دست ءَ آوار جنگ بیتگ اَنت ءُ مروچی اے دوئیں یلہ بیتگ اَنت –

دمگی مردمانی رد ءَ اے ھردوکانی ھمراھی ءَ مسلم نامیں ورنایے ھم آوار جنگ بیتگ کہ آ تنی وھدی گار ءُ بیگواہ اِنت-

دومی نیمگ ءَ بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی بنجل ءَ چار ھزار ءُ دو سد ءُ شست ءُ ھپت روچ سرجم بیتگ –

وائس فار بلوچ مسنگ پرسنز ءِ گوشگ اِنت بلوچستان ءَ گار ءُ بیگواھیں مردم دیم ءَ آرگ بہ بنت اگاں کسے ءَ جرمے کرتگ گڑا آئی ءَ سرکار وتی کانودانی رد ءَ آمیدگس ءِ پرمان ءَ سزا بہ دنت

دومی نیمگ ءَ گوستگیں روچ ءَ شال کراچی ءَ رؤکیں نودربر سید حاسل ءِ دزگیری ءَ ھلاپ ءَ چاگردی رسانکجاہ ٹوئٹر ءَ آئی ءِ یل کنگ ءِ واستا چاگردی رسانکجاہ کامرد کنوکانی نیمگ ءَ سیوی سید ھاسل ھیشٹیگ کامرد کنگ بیگ ءَ اِنت –

بلوچستان ءَ بندوکیں سیاسی ءُ چاگردی رسانک کارمرد کنوکانی گوشگ اِنت پاکستان بلوچانی گچین ءُ وانوکیں ورنایاں گرگ ءُ گار کنگ ءَ اِنت –

آیانی زھر ءِ درشان اِنت کہ اے تچک ءَ بلوچانی پدریچ کُشی ءِ برابری ءَ یک شوربندی ءِ چِن ءَ لانچ کنگ بیتگ ءُ ھمک نوک رُستگیں ورناہ وتی وانگی پرکاریاں ھم الکاپ ءَ دیم ءَ شُت کنگ ءَ نہ اِنت –

بلوچ اسٹوڈنٹس آرگنائزیشن ایکشن کمیٹی ءِ بنجاھی پتر ءِ نیاد ءِ درگت ءَ رسانکدراں بنداتی گپ ءُ تران پریس کانفرنس ءَ تران کنان ءَ گل ءِ رھشوناں گوشت کہ بلوچ اسٹوڈنٹس ایکشن کمیٹی ءِ دومی بنجاھی نیاد پتر بہ نام ءِ شھید پروفیسر رزاق زھری، سنگت الیاس بلوچ ءُ بنام ءِ گوستگیں کسان کمک سرکماش فیروز بلوچ 26تاں 28 مارچ 2021 ءَ کراچی ءَ برجم دارگ بیتگ- بنجاھی پتر نیاد بنداتی دو روچاں بندیں کوٹی ءَ تران ءُ سیمی روچ ءَ سوگندی برجم دارگ بیتگ –

آئی ءَ گوشت کہ بندیں کوٹی ءَ تران ءَ اولی روچ ءِ بندات گوستگیں سرکماش ڈاکٹر نواب بلوچ ءَ بنداتی ءَ تران کرتگ کہ چریشی ءَ پد گل ءِ کار ءُ کارگردی، ھال ءُ ایراد ءُ سرجمی، رھبند داری، گل ءِ لوٹ، دمگی ءُ میانی اُستمانی راجداری جاورھال ءُ آؤکیں کارانی بنگپ ءِ سر ءَ دمگانی سر ءَ باوست بیتگ –

پریس کانفرنس تران کنان ءَ دومی بنجاھی پتر نیاد ءِ سر ءَ گپ کنان ءَ بساک ءِ بنجاھی رھشوناں گْوشت: دو روچی بندیں کوٹی ءَ بنجاھی نیاد ءِ پتر ءَ دمگ سروکاراں گل ءِ گوستگیں دو سالانی کارانی زانتکاری ءَ ایراد، باوست ءُ جست ءُ پرس، رھبندی سازی ءِ بنگپ ءِ سر ءَ گل ءِ رھبند جھلانکی ءِ ھورتی ءِ ٹپاسگ ءَ پد رھبندی ءِ اژدری ءِ دیم ءَ آرگ ءُ وھدیکہ گل ءِ مُھر(لوگو) مٹ کنگ بیتگ –

آیاں گوشت کہ گل ءِ لوٹانی بنگپ ءَ انیگیں گَلی ءُ نودربر راجداری ءِ سر ءَ مزنیں جیڑوانی سر ءَ سرجمی باوست ءُ تران ءَ پد آؤکیں دو سالاں گل ءِ نیاد ءُ شَوربندی کرتگ اَنت ءُ آؤکیں بنگپ ءِ سر ءَ بنجاھی نیاد پتر ءَ آیانی منّ اِتگیں لوٹ المی کرتگ اَنت -بنجاھی نیاد پتر ءِ دراھیں بنگپانی المی باوستاں پد بنجاھی بنزہ ءُ بنجاھی کارکنوکیں پُرکارانی تچک دیم آؤرتگ –

بنجاھی نیاد پتر ءُ نوکیں نیاد بنزہ ءِ گچین کنگ ءَ گوستگیں سرکماش ڈاکٹر نواب بلوچ گچینکاری ءِ سروک نامینگ بیتگ ھمے رنگ ءَ بنجاھی گوستگیں کارگشاد سلمان بلوچ ءُ شال ھنکیں گوستگیں سروک ذکیہ بلوچ گچینکاری ءِ باسک نامینگ بیتگ اَنت – گچینکاری ءِ بنجاھی بنزہ ءُ بنجاھی پرکارانی باسکانی واستا گچینکاری کرتگ گڑا چریشی ءَ ڈاکٹر صبیحہ بلوچ گل ءِ سروک، شبیر بلوچ کسان کمک سرکماش، آصف بلوچ کارگشاد، ھالد بلوچ کسان کمک کارگشاد ءُ عارف بلوچ دودمان ھالرسان ابید دیم ءَ اوشتوکی ءَ دارگ بیتگ اَنت ھمے رنگ ءَ بنجاھی کمیٹی ءِ واستا ڈاکٹر سمیہ بلوچ، رفیق بلوچ، یاسر بلوچ، وحید عباس، اعجاز بابا ءُ اظھر بلوچ ابید دیم ءَ اوشتگی ءَ دارگ بیتگ اَنت –

آئی ءَ گوشت کہ بنجاھی کونسل سیشن ءِ سیمی روچ ءَ سوگندی دیوان بیتگ کہ چریشی ءَ گچینی ءِ مھمان بلوچ کواس مھمد الی تالپور بیتگ، سوگندی تران ءَ گوستگیں سروک نواب بلوچ ءَ اتکگیں مردمانی دیم ءَ تران کرتگ چرشی ءَ پد نوک گچین بیتگیں کابینہ ءَ گوستگیں سروک ڈاکٹر نواب بلوچ ءِ دستاں سوگند زرتگ –

دیوان ءَ سوگندی ءَ اتکگیں مردمانی دیم ءَ دیوان ء گچینی ءِ مھمان استاد مھمد علی تالپور، پروفیسر ڈاکٹر منظور بلوچ، خرم علی نیئر ءُ نوک گچین بیتگیں ڈاکٹر صبیحہ بلوچ ءَ تران کرتگ –

ھمے وھد ءَ سوگندی ءِ وھد ءَ بساک ءِ سَے ماھی تاک “ نوشت ” ءِ دیمدراھی بیتگ ءُ سُرسنگار ازمی مجلس ءِ نیمگ ءَ مرتگیں چاگرد ءِ بہ نام یک تلوی ڈرامہ پیش کنگ بیتگ ھمے رنگ ءَ سوگندی ءَ گڈی ءَ “ ساز ءُ زیملی دیوان ” برجم کنگ بیتگ کہ چریشی ءَ بلوچ گشندہ استاد خالق فرھاد، استاد سلیم بلوچ ءُ ثناء ساحل ءَ وتی جوانیں ازمی ءَ وشنودی کرتگ –

پریس کانفرنس ءَ گپ کنان ءَ نوک گچین بیتگیں سروک ڈاکٹر صبیحہ بلوچ ءَ گوشت کہ من پہ یک نوک گچین بیتگیں گل ءِ سرکماشی ءِ سوبمندی ءَ کونسل سیشن ءِ دراھیں باسک، گل ءِ گوستگیں بنزہ، بلوچ نودربر، وتی شرپمندیں استاد ءُ بلوچ راج ءَ مراد باتی گوش آں ءُ من سرپد باں بلوچ اسٹوڈنٹس ایکشن کمیٹی ءِ سوبمندی ءِ کونسل سیشن گل ءِ سسا پگر ءُ پھتوئیں باسکانی جد ءُ جھدانی برورد اَنت ءُ ھمے سسا پگریں باسکانی جد ءُ جھد ءِ برورد ءَ مروچی گل ءِ بنزہ مھکمیں رنگے ءَ اوشتاتگ –

آئی ءَ گوشت کہ ما سرپد بہ ایں بلوچ اسٹوڈنٹس ایکشن کمیٹی ءِ سوبمندیں کونسل سیشن بلوچ نودربر راجداری ءَ یک جوانیں گامگیجے ما ھمے اھد ءِ ھمراھی ءَ در اتکگ اِنت بلوچ نودربر راجداری ءِ ھستیں جیڑھاں سسائیں پگر ءِ ھمراھی ءَ دیمپانی ءَ کن ایں ءُ مروچی بلوچ نودربرانی راجداری سسائیں پگر ءِ بنھشتاں برجاھیں راجداریں جد ءُ جھد ءِ ھلاس کنگ ءَ مپتیں رویشاں زور کُٹینگ ءَ اَنت نودربراں مھکمیں راجداری ءِ جد ءُ جھد ءِ مٹ ءَ بھر ءُ بانگی ءِ راہ ءَ پیشدارگ ءَ اَنت –

نوک گچین بیتگیں سرکماش بلوچ اسٹوڈنٹس ایکشن کمیٹی صبیحہ بلوچ ءَ گوشت کہ ما نودر راجداری ءَ ھستیں وتگڑیں راجداری ءُ وتگڑیں گلی رویشاں چیلنج کنگ ءَ مھکم اِنت پرچاکہ ما سرپد بہ ایں بلوچ چاگرد ءِ جوڑیشتی ءُ دیمروئی ءِ واستا اژدری اِنت بلوچ ورنایاں زانت ءِ دیمروئی ءِ دوست راجداری ءِ سسائی ءِ بنریشگاں گوں بہ بیت اگاں مروچی بلوچ ورناہ وتمانی، پروری ہیروازم ءُ وش کنوکیں اوگامانی آماچ بیت اَنت گڑا اے مئے اجلی زوال بیت اِنت –

آئی ءَ گوشت کہ بلوچ اسٹوڈنٹس ایکشن کمیٹی ءِ نودربر راجداری ءِ انیگیں اے وتگڑیں رویشانی ھلاسی ءِ واستا سسائیں پگر ءُ گلی بنریشگانی سر ءَ زانت ءُ زانشتی راجداری ءِ شاھانی تُرکینگ ءَ وتی دراھیں توان ءَ المی کنگ ءُ بلوچ اسٹوڈنٹس ایکشن کمیٹی ءِ راجداری پند مھکم ءُ مھکمیں راجی ادارھانی بردست اِنت –

آئی ءَ دیمتر ءَ گوشت کہ ما سرپد بہ ایں گسر بیتگیں راجی دیم ءِ واستا مھکمیں ادارھانی گون ءَ بندوکیں اِنت ابید مھکمیں ادارھاں راجی ءُ چاگردی دیمروی المی نہ اِنت ھمے رنگ ءَ بلوچ چاگرد ءَ گیر اداراتی سنچ ءَ تُرکینگ ءَ اَنت اے سوچ ءِ دیم ءَ دیوال ءِ پیم ءَ اوشتگی اِنت وھدیکہ مروچی بلوچستان ءَ نودربر ناگیگیں جاورھالانی آماچ اَنت بلوچستان ءِ جاوراں کہ وھدے کسے ءِ چم اَنت گڑا ما یک تچکی ءَ گُشت کن ایں یک زانوکیں رنگے ءَ شوربندیں وڑے ءَ بلوچ چاگرد تھاریں کڈ ءَ دور دیانی ءِ آماچی ءِ کنگ ءَ وانگی لڑا کرناں پُشت کنان اَنت –

آئی ءَ گوشت کہ بلوچ اسٹوڈنٹس ایکشن کمیٹی ءِ اے وانگی نزام ءَ “سیاہ ءُ تھاریں وانگی نزام ” گوش ایت ءُ اے نزام ءُ وانگی پشتکپی ءِ ھلاپ ءَ جد ءُ جھد ءَ وتی المی سرپد بیت اِنت ما اے سنگینی ءِ سر ءَ بلوچ راجدوست ءُ دگہ نودربر گلاں گوش ایں کہ اے وھد ءَ ما وتی دراھیں تھ ئِے جیڑھاں ھلاس بہ کن ایں “ سیاھیں تھاری ءَ وانگی نزام ءِ ھلاپ ءَ ھمسنتی ءِ جد ءُ جھد ءِ راہ ءَ ھوار کنگ اِنت –

پریس کانفرنس ءَ گڈی ءَ صبیحہ بلوچ ءَ گوشت ما اے پریس کانفرنس ءِ زور ءَ بلوچستان ءِ دراھیں راجدوست ءُ دیمروئی دوستیں نودربر گلاں گوش ایں کہ بلوچ اسٹوڈنٹس ایکشن کمیٹی ءِ بلوچستان ءِ نودربراں درپیشیں سنگینیں جیڑھانی گشینگ سنگل ایجنڈہ ءَ دراھیں گلاں ھمسنتی ءِ جد ءُ جھد ءِ ساجو ایں ءُ ما زوت بلوچستان ءِ نودربرانی سنگینین جیڑہ ءُ آیانی گشینگ ءَ دراھیں نودربر گلاں یک درافٹ نودربر جیڑھانی گیشینگ ءَ ھمسنتی ءِ جد ءُ جھد ءِ امیتی ءَ سر کن ایں –

سیکی بازار ءَ پاکستانی پوج ءِ سر ءَ اُرش کُتگ دو کارمند کُشتگ ءُ دو ٹپی کُتگ اَنت – میجر گْوھرام بلوچ

سربوتگیں ھالانی رِد ءَ گوستگیں شپ ءَ ناشناسیں سلاہ بندیں مردماں پنجگور ءِ دمگ پروم ءَ پاکستانی پوج ءِ سر ءَ اُرش کُتگ –

اُرش پروم ءَ سیکی بازار ءَ پاکستانی پوج ءِ سر ءَ کنگ بوتگ چریشی ءَ پاکستانی پوج تاوان بار بوتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں گوَستگیں شپ ءَ پنجگور ءِ دمگ پروم ءَ سیکی میتگ ءَ پاکستانی پوج ءِ یک گاڑی ءِ سر ءَ مزنیں سلاھانی گون ءَ اُرش کتگ، چریشی ءَ چہ پوج ءِ دو کارمند ھما جاہ ءَ مرتگ ءُ دگہ دو سک زدگ بوتگ اَنت-

جارکش ءَ گْوھرام بلوچ ءَ دیمتر ءَ گوَشتگ کہ زورگیریں پوج ءِ دو گاڑی بوتگ اَنت آھاں چہ یک گاڑی سیکی میتگ ءَ اوشتاتگ کہ ھمے وھد ءَ سرمچاراں آئی ءِ سر ءَ اُرش کتگ- دو پوجی کارمند گاڑی ءَ چہ ڈن اوشتوک بوتگ اَنت کہ اُرش ءِ آسرا ھمے دوئیں کارمند جاہ پہ جاہ ءَ مرتگ اَنت وھدیکہ گاڑی ءَ سواریں دگہ دو کارمند سک زدگ بوتگ اَنت –

گُڈسر ءَ آئی گوَشتگ کہ بلوچستان ءِ آجوئی ءَ تاں زورگیریں پاکستانی پوج ءِ سر ءَ مئے اُرش برجاہ مان اَنت-

سربوتگیں ھالانی رِد ءَ بلوچستان ءِ دمگ ڈیرہ اللہ یار ءَ میر دوران خان کھوسہ میتگ ءَ لین ءِ تارے سِدگ ءُ کپگ ءَ بیست دھکانکارانی گِس سُتکگ ءُ پُر بوتگ انت –

گیشیں ھالانی رِد ءَ مروچی چار شمبے ءَ میر دوران خان کھوسہ میتگ ءَ گوات ءِ تیز بوگے سوب ءَ لین ءِ تار سستگ انت ءُ دھکان کار ءِ گِس ءِ سر ءَ کپتگ اَنت چریشی ءَ دھکان ءِ گِس بُنگپتگ ءُ آس ءِ برانزاں دومی دھکانکارانی گِس ھم گپتگ ءُ چریشی ءَ کساس بیست ءَ چہ گیش گِس ستکگ ءُ پُر بوتگ اَنت –

بزگر ءُ دھکان کاراں وتی کمک ءِ وت زِلّوانی سر ءَ آپ کشیتگ ءُ آس توسینگے جُھد کُتگ- بلے انگت آھانی وس ءَ نبوتگ –

ھال ءِ سربوگ ءَ جعفرآباد ءِ ڈپٹی کمشنر رزاق خان خجک ءَ ڈیرہ اللہ یار ءِ میونسپل فائر برگیڈ چیف افیسر سلیم خان ڈومکی آس کُشگے ھاتر ءَ ھال کُتگ –

ڈیرہ اللہ یار میونسپل کمیٹی فائر برگیڈ ءَ وت ءَ وئیل جاہ ءَ سر کُتگ بازیں ادار ءَ پد آس توسینتگ –

اے درگت ءَ دمگے زمیندار میر دوران خان کھوسہ ءِ گوشگ انت کہ آس لگگ ءِ سوب ءَ مئے دھکان کارانی گِس ءُ آھانی وردنی ءُ دگہ سامان سُتکگ انت ، دھکان کار اے گرمی ءَ بے سر ءُسامانی نشتگ ءُ ھکومتی کمک ءِ ودار ءَ انت، دمگی انتزامیہ ءُ صوبائی حکومت ءَ لوٹ ایت کہ اشانی تاواناں پُر بہ کنت ءُ اشاں کمک بہ کنت –

نبشتانک: جنز ءِ ھمراھاں ھمگام اَت

نبشتہ کار: شیردل بلوچ

دی بلوچستان پوسٹ

لھتیں انچیں کارست ھست کہ ھچبر بے ھیال کنگ نہ بنت، اگاں مردم ند ءَ چست مہ کنت، گڑا لھڑیں پاھار باتن ءَ بے تاھیر کن اَنت، راستی پدر کنگ بیت اگاں کسے وتی زند ءِ سرجمیں واھشتاں پہ وتی راج ءِ وشیں باندات ءِ واستا ندر بہ کنت، گڑا ھما راجدپتر ءِ تہ ءَ ابدمان بیت ءُ آ راج ءِ نام ءُ شان زانگ بیت۔

بلوچ راج دپتر انچیں پرزندانی کسھاں سرکیل اَنت، پہ لج ءُ ننگ ءَ ھیشی سرانی کربان کنگ کوماں زند بکشائیت، مرچی بلوچ مات ءُ گُھار ، ورنا ءُ کماش راجی جھد ءِ پڑ ءَ دراھیں تھراں گوں اَنت، آشوبی تب ءِ دارگ سوبمندی ءِ پدیانک بوت کن اَنت ءُ تپاکی المی اِنت، تپاکی ءَ ابید منزل ءِ سر بوگ وابے ءُ ھیالے زانگ بیت۔

من چہ دوھزار شش ءُ ھپت ءَ راجی جھد ءِ جنز ءَ چارگ ءُ گندگ ءَ آن ءُ اے ھبر باز اُشکتگ چہ لھس مھلوک ءَ بگر داں گلانی باسک ءُ رھشوناں!
ھمے گوشتگ اِش سوبمندی ءِ واستا مارا یکمشت بوگ لوٹ اِیت انچو یک جان بوگی اِنت ، چُش کہ لنکُک ءِ درد تیوگیں بدن ءَ را سما بیت، ھمے پیم ءَ راجی درد، گلامی ءِ مارشت، ھور جنزگ راجی آجوئی ءِ وشیں باندات ءِ مستاگ بوت کنت ۔

راجی شھیدانی کارست بے درور اَنت، چہ ھمے شھیداں یکے شھید” مھمد اپزل اُرپ ء گورگیج بلوچ اِنت واجہ ءِ آریپیں پِت ءِ نام بشیر اھمد اِنت، آ ماں نوزدہ سد ھشتاد ءُ نُھ ءَ ودی بوت ءَ ءُ آواران کلّرو ھاجی شمبے ءِ میتگ ءَ جاہ منند اَت ءُ بُنکی وانگ ءُ زانگ چہ آواران ءَ دَربرتگ ئِے ، وھدیکہ من گوں آئی اولی رند ءَ پائو گُڈوپ ءَ سنگتے گس ءَ ڈیک وارت ، منی نزّ ءَ دوھزار سیزدہ اَت ءُ زمینچنڈ ءَ رند اَت، آئی ءِ نام ءَ را چد ءُ ساری اُشکتگ اَت ، آئی ءِ نہ ترس ءُ دلیری ءِ گپ بوگ ءَ اَت، اے ھمے دَور ءَ آواران ءِ دمگ ءَ روچ پہ روچ جاور ھال نگیگ بوان اِت اَنت، سرجمیں دمگ پوجیانی بُنجل جوڑ اَت ، چہ کوچگاں جھدکاریں سنگت یک کر بوان اِت اَنت، مردمانی در پہ دری بندات بوت، ھر روچ بے گناھیں مردمانی گرگ ءُ لٹ دیگ ءُ گسانی آس دیگ بوگ ءَ اَت اَنت، ھر روچ زوراکی ءِ نوکیں ھال اُشکنگ بوان اَت۔

دومی رند ءَ دوھزار پانزدہ ءُ شانزدہ ما کولواہ ڈیک وارت ءُ منی ءُ آئی ءِ نزدیکی وداں بوت، گڑا ما ھر روچ یکجاہ بوت ایں” گورگیج ھاموش تب اَت، مھروانی ءَ ابید بھادریں سنگتے اَت،اے گپ من باز جاھاں اُشکتگ اَت بھادر سادگ بیت، لُچ ءُ لالچی نہ بیت، آئی توک ءَ سادگی ھست اَت، اگاں جاھے ءَ رد کپتگ بزاں دھوکہ ئِے وارتگ اَت گڑا اے آئی ءِ سادگی بوتگ-

وھدیکہ آئی پِت ءَ را بزاں “بشیر اھمد ءَ پوج چست کنت سالے ءِ نزدیک ءَ زنداں بیت ءُ گورگیج ءِ نیمگ ءَ کلوہ دیم دینت ءُ گوش اَنت ئِے بیا لگور بہ بو تُپنگ ءَ دَور دے ،اگاں نیاتک ئے تئی پِت ءِ کُنٹ دور دیگ بیت، کھول ءِ مردم لاچار ئِے کن اَنت ءُ گوش انت ئِے تو بیا نیا ئے تئی پِت ءِ کُنٹ ءَ دَور دینت، اے دراھیں گپّ آئی گوشاں نہ پتر اَنت ءُ مردم گوں گورگیج زَھر بنت ءُ گورگیج وتیگاں چہ گستا بوت ءُ گوں راجی جنز ءِ ھمراھاں ھمگام بوت ۔

سی ءُ یک بھاران دوھزار ھژدہ ءَ ٹوھیں لشکر کشی ءِ تہ کپ اِیت ءُ آئی ءِ ھمراہ شھید شئیب جان اُرپ لکی بلوچ بیت، لشکر ءَ گوں ڈیک وارت اِش ءُ دیم پہ دیم دُچار کپت اَنت ءُ جنگ بندات بیت، ھمے میانجی ءَ دگہ دو سنگت جنگ ءِ تہ ءَ کپ اِیت ءُ جنگ سک ءَ دراجکَش بیت لشکریانی کُمک ءَ بالگرد کا اَنت ” لکی جان ، ھوار سئے سنگت زدگ بیت، بَلے! لکی جان ءَ گورگیج داں گُڈی ساھتاں سمبال اِیت گڈسر ءَ لکی جان آئی چَمانی دیم ءَ شھید بیت، پوجیگ ھمے ھال ءَ شنگ ءُ تالان کن اَنت کہ گورگیج ھم جَنگ بوتگ، آیاں گورگیج ءِ گوشی بزاں( موبائل ) پوجیگانی دست ءَ کپتگ اَت، کھول ءِ مردم نادراہ جاہ ءَ رو اَنت ءُ پَٹ ءُ پول کن اَنت، گندگ نہ بیت، پوجیگ کُنٹاں ھچ کس ءَ را پیش نہ دار اَنت، شک انچو بیت کہ گورگیج زدگ اِنت، جنگ جاہ دَر کپتگ ءُ بوت کنت، دگہ جاھے ءَ کپتگ ءُ شھید اِنت، سنگت پَٹ ءُ پول ءَ ئِے بنا کن اَنت، سیمی روچ وت کیت راھسرے گندگ بیت تُن گژن ءَ باز تکانسر اَت، لاگر ءُ بے ھاٹیگ اَت، بھادرے اَت، بچکندگ ءَ اَت روہ ئِے پُرنور اَت۔

پندل سازیں ” اِستان ءَ گوں وتی دلاراں پُشت ءَ ئِے کپتگ اَت، بیست ءُ ھشت اُستپان دوھزار بیست ءَ ماں سیستاں بلوچستان ءِ دَمگ سراوان ءَ شھید کنگ ءَ ئِے بے مراد سوبمند بنت، بلوچ راج چہ تمردیں جنگولیں پرزندے دائم ءَ جُتا کنگ بیت، راج گمیگ بیت دژمن شادان بوت اَنت۔

مات شھیدی ءِ ھال ءَ ئِے سھی بیت ، گُڑا ھمے وڑ گوش اِیت من ءَ منی زھگ ءِ مرگ ءَ یکیں ھبرے ءَ تور اینت کہ آ گوں لگوریں دژمناں جنگ ءِ پڑ ءَ جَنگ نہ بوت، بزاں کہ راجی سنگر ءِ تہ ءِ دلار ءُ لگوراں پہ دُز جنگی ءَ جت ،من ءَ بس ھمے یکیں ھبر درد اِنت ھو بوت کنت، زانگ نہ بیت ساھگریں ملکموت کدی کیت ءُ ساہ ءَ ئِے پچ گپت؟- ساہ کئی دست ءَ گرگ بیت ءُ کجا بیت؟ – آجوئی ءِ جھد ءِ پڑ ءَ شھید بوگ مزن نامی یے چیدگ اِنت ۔

شھید مھمداپزل اُرپ گورگیج بلوچ ءَ ھوار راج ءِ شھیداناں سھرچکیں دروت گوشاں آجوئی جنز ءِ شھید نمیران انت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ روکپتی بلوچستان ءُ بندوکیں بوکسور مستپا ریگی جھانی بوکسنگ پولینڈ ءَ دیم دیگ ءَ نامینگ بیتگ –

مھمود نھتانی گوشگ اِنت کہ مستپا ریگے ایران ءِ راجی بوکسنگ ءَ ھوار کنگ بیتگ ءُ آ دَہ روچ ءَ رند جھانی بوکسنگ ءَ دیم دیگ بیت اِنت –

مستپا ریگی کَے اِنت؟ مستپا ریگی ءِ اُمر بیست سال اِنت آ روکپتی بلوچستان ءِ بنجاھی شھر زاھدان ءَ ودی بیتگ –

ھمے وڑ ءَ پنچ سال ءَ پیش آئی ءَ تھران ءَ بوکسنگ ءِ وھد ءَ کسانیں زھگانی بوکسنگ ءِ میان ءَ آئی ءَ تلاہ ءِ داد رس اِتگ –

روکپتی بلوچستان ءَ بندوکیں مردمانی گوشگ اِنت ورنایانی تہ ءَ مستپا ریگی ءِ رنگیں ورنا نیستی ءِ ھساب ءَ اِنت اے اولی ورناہ اِنت آئی ءَ اے کَچ ءَ جھد ءُ جَپا کرتگ ءُ دیم ءَ شتگ –

سر بیتگیں ھالانی رد ءَ بلوچستان ءِ دمگ مستونگ ءَ دگ ءِ وئیل ءَ بلوچی زبان ءِ شائر گل جان ء عبدالباقی بیران بیتگ ءُ دو کس زدگ بیتگ اَنت –

وئیل مستونگ ءَ میجر چوک ءَ دیم ءَ اتکگ کہ اود ءَ پرپٹانی ڈیگ ورگ ءَ بلوچی زبان ءِ شائر گل جان ء عبدالباقی ءَ ھوار سَے زدگ بیتگ اَنت، زدگ بیتگیں مردم نادراہ جاہ ءَ سرکنگ بیتگ اَنت ءُ اود ءَ گل جان ءَ درد نہ سگ اِتگ ءُ ساہ داتگ اَنت –

بلوچستان ءَ ھمک روچ بیتگیں دگ وئیلاں مھلوک پہ سپر کنگ ءَ ترس ءُ بیمی اَنت ھمک روچ پیش اتکگیں وئیلاں بازیں ھسابے ءَ مردمانی بیرانی ءُ زدگ بیگانی ھال یکشل ءَ چاگردی رسانکجاھاں شنگ اَنت –

گوستگیں روچاں نوشکی ءُ پنجگور ءَ دگ ءِ وئیلانی ھلاپ ءَ آل پارٹیز ءَ زھرشانی کرتگ ءُ گوشتگ کہ سرکار ھما کچ ءَ بے وس بیتگ کہ بلوچستان ءَ سپر کنگ یک مرگے ءِ ساہ ءِ گرگ جوڑ بیتگ –

آیاں گوشتگ اَت کہ سرکار اگاں دگانی سر ءَ بیوکیں وئیلانی بارہ ءَ گامیج نہ زور ایت گڑا اے زھرشانی درچ دیم ءَ گیش کنگ بیت اِنت –