TBP Balochi

سر بیتگیں ھالانی رد ءَ گوستگیں شپ ءَ بلوچستان ءِ دمگ کیچ ءِ بنجاھی شھر تربت ءَ ناشناسیں مردماں پاکستانی پوج ءِ چوکی ءِ سر ءَ اُرش کرتگ-

اُرش صلالہ بازار ءَ بیتگ کہ اود ءَ سلاہ بندیں مردماں پوج ءِ چوکی ءِ سر ءَ دزبمبے چگل داتگ چریشی ءَ پوج ءِ جانی تاوانانی ھال بیتگ –

دومی نیمگ ءَ بلوچستان لبریشن فرنٹ ءِ جارکش میجر گوھرام بلوچ ءَ گوستگیں شپ ءَ بیتگیں اُرش ءِ زمہ واری منّ اِتگ ءُ گوشتگ کہ سرمچاراں تربت شھر ءَ صلالہ بازار ءَ شھید یحیٰ چار راہ ءَ پاکستانی پوج ءِ سنگر ءِ سر ءَ دزبمبے چگل داتگ کہ چریشی ءَ سنگر ءَ جاڑیگیں کارندہ مرتگ –

جارکش ءَ گوشتگ کہ چیک پوسٹ ءِ نزیک ءَ رھگوزی ئیں طیب بلوچ زدگ بیتگ کہ چریشی ءَ مارا درد اِنت ءُ ما آئی ءِ کھول ءَ دلی درد ءُ گم ءِ درشان ءَ کن ایں – ما یک رندے پد ءَ شھریاں گوں دزبندی کن ایں آ پاکستانی پوج ءِ گاڑی، کاروان، چوکی، سنگر ءُ بنجلاں دور بہ بنت –

آئی ءَ گوشت کہ یک نیمگے ءَ پاکستانی پوج ءَ میان اُستمانی رھبند پروشتگ ءُ شھراں چوکی جوڑ کرتگ اے ریپک بلوچ راج ءَ زیردست کنگ ءُ گلامی ءِ دراج کشی اِنت – اشی ءِ دیمپان کنگ مئتمے درسانی پرز اِنت – شھراں چوکیانی جوڑ کنگ مردمانی ترسینگ ءُ ترس ءِ تالانی اِنت – ھمے بنجل ءُ چوکیاں آ ایوک ءَ شھریاں تنگ کنت بلکیں آیاِ زھنی نادراھیانی دُچار کنت آیانی سر ءَ تیرگواری ھم کنت کہ گوستگیں سال ءَ آپسر ءِ وئیل مردمانی دیم ءَ اِنت –

آئی ءَ گوشت کہ ما پاکستانی پوج ءِ سر ءَ اے وڑیں اُرشاں برجاہ داریں ءُ اے شھر ءُ سرجمیں بلوچستان آئی ءَ درکنگ ءَ لاچار کن ایں اے درچ ءَ بلوچ راج ءَ گوں دزبندی اِنت آ اشاں دور بہ بنت –

نبشتانک: بساک ءُ منی ممبئی

نبشتہ کار: این آر بلوچ

دی بلوچستان پوسٹ

یک نودربرے ءِ اولی زمہ واری آئی ءِ وانگ اِنت ءُ دومی جیڑگ اِنت بائد اِنت ھرچ ھما نودربر کہ وانگ ءَ ایں ایشانی بابت ءَ اَلم بہ جیڑ اِیت، لھتے چیز پہ زور مردم ءَ را جیڑگ پرما اَنت اَنچوش کہ مئے اِے سنگت بساک جان اِنت-

من وَ نزانتگ اَت کہ بساک چی یے ءُ بساک ءِ تہ ءَ نودربرانی politics ءِ وڑ ءُ پیم چی اَنت ءُ کُجام conditions آنی سبب ءَ بساک جان جلسہ جلوس کنت ، من بس تَھنا social media ءَ دیستگ اَت کہ بساک یک organization ءِ بلوچ نودربرانی ایشی ءِ کار پہ بلوچ نودربرانی وانگ ءُ زانگ ءُ شَریں وڑے ءَ سرپدی دیگ ءُ ھرچ وڑیں اڑ ءُ جنجالانی دیم ءِ اوشتگ ءُ مسلھانی گیش ءُ گیوار کَنَگ ءِ ھاترا جوڑ کنگ بیتگ-

وھد گوازان اَت من اوں وھدے تیزیں گاماں راواجانی ھمرائی ءَ جُھد کُت کہ پشت مہ کپاں
بازیں سر ءُ پادے ئے جَنَگ ءَ پد منی سر اَتگ ءُ اوتھل شریپ ءَ سر بیت-

اِے ھمے وھد اَت کہ بساک تَھنا یکے ءَ اَت ،ھچ دِگہ دُور دُور ءَ گیشیں بساک ءِ ھمنام نیست اَت، من پد ءَ ھَما مرد کہ سَکّ جلدی بے کسی ءِ convince کَنَگ ءِ ابید دومی مردم ءَ چہ سَکّ جلدی convinced بیتگ اِت اَنت، من مُدام جیڑ اتگ اَت کہ اِے چون اَنچو زَبْر اَنت اِے چون بالا بالائیں Article نبشتہ کن اَنت-

من گُش ئے زاناں Bollywood ءِ تامری ءِ بَھری اِت اَنت ءَ کہ آ اولی رند اَت ممبئی ءَ اتکگ اَت ءُ ممبئی ءِ سر ءَ راج کنگ ءِ واب ءَ گِنداگ ءَ اَت، بساک ءِ تہ ءَ منی انٹری چو تامری ءِ دروشم ءَ بیت،سنگت شریں وڑے ءَ کار کنگ ءَ اَت اَنت، بَلے دیر نہ گوست کہ ممبئی ءَ چم بیت مردمانی کُکار اَت ،جاک اَت الزام تراشی اَت ءُ ایشانی میان ءَ ممبئی پروشگ بیگ ءَ اَت بھر بیگ ءَ اَت بَلے من ءَ سما نیست اَت مرچی ممبئی دو بھر ءِ تہ ءَ اِنت اِیشی ءِ کپ کنگ ءَ پد ھچ نہ بوگ ءَ اِنت تَھنا بس ممبئی ءِ نام پَشت کپتگ آ اوں دلوارگ اِنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

پنجگور بونستان پبلک لائبریری ءِ چِل ءُ نُھمی(سنڈے سرکل) دیوان برجم دارگ بیتگ دیوان ءِ گچینی ءِ مھمان ڈائریکٹر اسکولز بلوچستان عبدالواحد شاکر بیتگ، آسری گپ ءُ تران، ھیال ءُ لیکہ، زانت ءُ زانشتی سپر ءِ بارہ ءَ اتکگیں مردمانی میان ءَ تران کرتگ اَنت، بی پی ایل ءَ بازیں وانگی سوگات کرتگ انت ئِے –

بونستان پبلک لائبریری پنجگور ءِ (سنڈ سرکل) ءِ چِل ءُ نُھمی نیاد ءَ ایجوکینشسٹ ءُ ڈائریکٹر اسکولز بلوچستان عبدالواحد شاکر بلوچ ءِ نام ءَ دیوان برجم دارگ بیتگ، آئی ءَ بلوچستان ءِ وانگی جاورانی سر ءَ وتی ھیال ءُ لیکہ درشان کرتگ اَنت ءُ ھمے درچ ءَ آئی ءَ پنجگور ءِ وانگ ءِ انیگیں جاورھالانی بارہ ءَ ھم وتی ھیال درشان کرتگ اَنت ءُ جست کنوکانی پَسو داتگ اَنت –

ھمے وڑ ءَ آئی ءَ بی پی ایل ءِ موزیکل کلب ءِ ماڑی ءَ ھم نیاد کرتگ ءُ اود ءَ آئی ءَ کلب ءِ گر ءُ دار کنوک نبیل کاشانی ءَ بی پی ایل میوزیکل ءِ بارہ ءَ گوست ءِ گپ جتگ اَنت –

سرکل ءَ ہیڈ ماسٹر گورنمنٹ ھائی اسکول کاٹاگری ءِ فدا فھد ءَ ھم بھر زرتگ ءُ آئی ءَ بی پی ایل ءِ بارہ ءَ وتی گپ درشان کرتگ ءُ آئی ءِ دیمروئی ءِ واستا سکین داتگ اَنت –

سرکل ءَ بی پی ایل ءَ بندوکیں عبدالغفار، میرین شبیر، سمیر رائس، اظھر اعظم، عاطف وارث، فرھاد، علی، اھمد، معراج، اظھر، منور ءَ بی پی ایل ءِ دیوان ءِ کار وتی کوپگاں زرتگ ءُ وتی وتی کارانی زمہ واری پیلو کرتگ اَنت –

دیوان ءِ گُڈسر ءَ بوائز ھائی اسکول بونستان ءِ داد رھمان بلوچ ءُ ایس ایس ٹی ناصر علی ءَ دیوان ءِ ھلاسی ءِ جار جتگ ءُ وتی ھیال درشان کرتگ ءُ اتکگیں مھمانانی مِنت گپتگ ءُ دیوان ھلاس کرتگ –

چھبار ءَ دُزاں یک مردمے ءِ سر ءَ تیرگواری کرتگ ءُ کُشتگ –

سر بیتگیں ھالانی رد ءَ روکپتی بلوچستان ءِ تیابدپی شھر چھبار ءَ دُزاں تیرگواری کرتگ ءُ یک مردمے کُشتگ –

تیرگواری چھبار ءِ ھند کُمب ءَ پیش اتکگ کہ اود ءَ وتی لوگ ءَ ڈن نندوکیں انور ھدمتی ءِ سر ءَ دُزاں اُرش کرتگ ءُ آئی ءِ سر ءَ تیرگواری کُرتگ ءُ کُشتگ –

اھوالکار ءِ رد ءَ انور لوگ ءَ ڈن نندوک بیتگ کہ دو پرپٹ سواریں مردماں انور ءِ مباھل ءِ برگ ءِ جھد کرتگ ھمے میان ءَ انور دزاں گوں گلائش بیتگ ءُ دومی دُز ءَ آئی ءِ سر ءَ تیرگواری کرتگ ءُ انور زدگ کرتگ-

تیر انور ءِ دست ءَ لگ اِتگ ءُ چریشی ءَ تیر ءَ آئی ءِ دست سُمب اِتگ ءُ تیر آئی ءِ ھجل جاہ ءَ شُتگ کہ آ زدگیں جاوراں امان علی بیمارستان ءَ برگ بیتگ کہ اود ءَ آئی ءَ ٹپ نہ سگ اِتگ ءُ بیران بیتگ –

دمگی مردمانی گوشگ اِنت کہ ھمک گام ءِ سر ءَ پھزدار اوشتاتگ اَنت ءُ انگت ءَ سلاہ بند ءُ دُز کاینت ءُ لس شھریاں سُبکی ءَ نشانگ کن اَنت ءُ پُشت ءَ ماندے اَنت –

آیاں گوشت کہ چوشیں وئیلانی ءَ جتائیں جیڑگ ودی بنت کہ اے بازیں سیکورٹیانی اُشتگ ءَ ابید ھم سلاہ بند مردماں کُش اَنت ءُ رو اَنت گرگ ءُ جُست کنوک نیست لس مردم وتی زند ءِ روچاں ھسابی ءَ ترسگ ءَ اَنت –

سربوتگیں ھالانی رِد ءَ بلوچستان ءِ بنجاھی شھر شال ءُ ژوب ءَ دو جتائیں وئیلاں زالبول ءَ ھوار دو مردم بیران بوتگ اَنت ، وھدیکہ شال ءَ یک مردمگ ءِ جون دست کپتگ –

دی بلوچستان پوسٹ

گیشیں ھالانی رِد ءَ شال ءَ گیس ءِ لیک بوگ ءِ سوب ءَ زالبولے دمتوس بوتگ ءُ بیران بوتگ –
ریسکو بنشون ءِ رِد ءَ اسپینی دگ کلی مبارک ءَ لوگ ءَ گیس لیک بوگے سوب ءَ زالبولے دمتوس بوتگ ءُ بیران بوتگ، بیران بوتگیں مردم ھسپتال ءَ برگ بوتگ اژدری چار ءُ ٹپاس ءَ پد جون کھول ءِ ھوالگ ءَ کنگ بوتگ –

بلوچستان ژوب ءَ لین ءِ کرنٹ گرگے سوب ءَ ورنایے بیران –

ھالکارانی رِد ءَ بلوچستان ءِ دمگ ژوب ءَ کلی پتاغوریزئی ءَ جمک نامیں مردمے ءِ ورنائیں زھگ کرنٹ ءَ گپتگ ءُ بیران بوتگ –

شال کلی کمبرانی ءَ جون ءِ دست کپتگ – ریسکیو بنشون ءِ رِد ءَ شال ءَ کلی کمبرانی دگ ءَ یک مردمے ءِ جون ءِ دست کپتگ – اژدری چار ٹپاس ھاتر ءَ سول ھسپتال ءَ برگ بوتگ –

ھمے وڑ قلعہ سیف اللہ ءِ دمگ شین گللونہ ءِ ھند ءَ دگ ءِ وئیلے ءَ یک زالبولے بیران ءُ دو زدگ بیتگ اَنت –

ترند رؤکیں گاڑی ءِ کلٹی بیتگ ءُ چریشی ءَ شبنم ء مھمد سلیم بیران بیتگ ءُ مھمد سلیم ءِ لوگ بانک نسیمہ بی بی ءُ صورت خان ء یار مھمد زدگ بیتگ اَنت کہ بارکھان ءِ نندوک اَنت ءُ ٹپانی درمانی ءَ شال ءَ برگ بیتگ اَنت –

پنجگور ءُ نوشکی ءَ دگ ءِ وئیلانی پژدر ءَ مردماں زھرشانی کرتگ ءُ پنجگور ءَ دگ بند کنگ بیتگ –

سربیتگیں ھالانی رد ءَ بلوچستان ءِ دمگ پنجگور ءَ گوستگیں روچ ءَ دگ ءِ وئیل ءَ بیران عابد علی ءِ بیرانی ءِ پژدر ءَ مروچی تسپ ءَ سول سوسائٹی ءِ نیمگ ءَ اسٹار چوک ءَ زھرشانی ءُ دگ بند کنگ بیتگ –

سول سوسائٹی تسپ ءِ باسکاں گوشت کہ دگ ءِ کَڈ کنگ ءَ پد دگ ءِ نا بادینگ ءَ چریشی ءِ سوب ءَ عابد علی دگ ءِ دنز ءُ مجانی تہ ءَ وئیل پیش اتکگ –

سول سوسائٹی ءِ باسکاں رسانکدراں گوں گوشت کہ عابد علی دگ ءِ وئیل ءَ سک زدگ بیتگ ءُ چریشی ءِ سر ءَ سول ھسپتال ءَ سر کنگ بیتگ ءُ اود ءَ ڈاکٹراں گوشتگ کہ اشی ءَ کراچی ءَ بر اِت بلے ھسپتال ءَ ایمبولینس ءِ نہ بوگ ءِ سوب ءَ آ داں شش اداراں مرگ ءِ ساہ ءَ بیتگ –

آیاں گوشت: ھمے میان ءَ رھگوزی ایمبولینس ءِ گوزگ ءَ بیتگ کہ ناگ ءَ آئی ءَ واتر کرتگ ءُ ھمے گاڑی ءِ سر ءَ عابد علی دیم پہ کراچی ءَ رھادگ کنگ بیتگ کہ بیلہ ءِ نزیک ءَ آئی ءَ درد نہ سگ اِتگ ءُ بیران بیتگ –

ھمے وڑ ءَ نوشکی کردگاپ ءَ گوستگیں روچاں بس ءِ وئیل ءَ یکیں کھول ءِ ھشت مردمانی بیرانی ءِ سر ءَ سرکار ءِ بے تواری ءُ ٹرانسپورٹرانی لاپروائی ءِ پژدر ءَ آل پارٹیز ءَ زھرشانی کرتگ –

زھرشانی آل پارٹیز نوشکی ءِ نیمگ ءَ میر گُل خان نصیر ءِ چار راہ ءَ کنگ بیتگ –

اود ءَ تران کنان ءَ جمعیت علما اسلام ءِ دمگی سیکرٹری ھاجی منظور اھمد مینگل، بلوچستان نیشنل پاٹی ءِ بنجاھی سینٹرل کمیٹی ءِ باسک میر خورشید جمالدینی، جماعت اسلامی ءِ دمگ ءِ کمک سرکماش امیر مولانا مھمد قاسم مینگل، نیشنل پاٹی ءِ رھشون رب نواز شاہ، بی این پی عوامی ءِ بنجاھی سینٹرل کمیٹی ءِ باسک میت مھمد ایوب بادینی، بی این پی ءِ گوستگیں دمگی سروک نزیر بلوچ، جے یو آئی ءِ مولابا زکریا عادل ءأ ھاپز حسین اھمد ءَ کردگاپ ءَ بس ءُ سواری گاڑی ءِ میان ءَ بیتگیِ وئیل ءَ یکیں کھول ءِ ھشت مردمانی بیرانی ءِ سر ءَ پدردی درشان اِتگ –

آیاں گوشت کہ دگانی پراہ نہ کنگ ءُ شر نہ کنگ ءَ ھوار تیز رؤکیں گاڑیانی گر ءُ دار نہ کنگ ءَ سرکار ءِ سر ءَ ایراد گپتگ ءُ گوشتگ کہ اے سرکار ءِ نابودی ءُ بے دلگوشی اِنت کہ گاڑی وتی وس ءَ گیش تچ اَنت ءُ چریشی ءَ بازیں وئیل دیم ءَ کاینت –

آیاں گوشت کہ بلوچستان ءَ ناشرکاری ءِ وئیلاں گیشتر مردم دگانی وئیلاں مِرگ ءُ زورال بیگ ءَ اَنت ءُ کہ چریشی ءَ بلوچستان ءِ مھلوک ءِ واستا یک ناگیگیں جاورے ءِ دیمپانی اِنت –

آیاں گوشت شھدگانی سر ءَ روچ ءِ مروچی ءَ داں بنجاھی ءُ استانی سرکار ءَ ھچ وڑیں لچیناکی نہ داتگ کہ چریشی ءَ جتائیں دگاں رؤکیں بس کمپنیانی زمہ وار ھم اے وئیلانی زمہ دار اَنت –

آیاں گوشت کہ بسانی ڈرائیور وھد ءَ پیسر واھندانی نیمگ ءَ ترس ءُ بیھاراں منزل ءِ سر بیگ ءَ گران بھائیں جان زوال بیگ ءَ اَنت –

آیاں گوشت کہ آل پارٹیز نوشکی مھلوک ءِ سر ءَ بیوکیں زُلم ءُ زوراکیاں ھچ بے توار نہ بیت اِنت –

آیاں گوشت کہ چریشی ءَ پیسر منشیات پروشانی دست ءَ کُشگ بیتگیں سمیع مینگل ءِ کوش ءِ ھلاپ ءَ آل پارٹیز نوشکی ءَ داں یک سالے ءَ زھرشانی زرمبشت بندات کرتگ ءُ کشندھانی دزگیر کنگ ءَ پولیس بے سوب بیتگ چریشی ءَ پد نوشکی پولیس ءَ کھول ءِ تنگ کنگ ءُ فورتھ شیڈول ءِ کنگ ءِ بیھار داتگ اَنت کہ ما اشی ءَ ایر جن ایں آیاں گوشت کہ مار سرکار ءَ گوشگ لوٹ ایں کہ داں سمیع مینگل ءِ کشندھانی دزگیر نہ کنگ ءَ آل پارٹیز بے تواری ءَ نہ نند اِیت –

آئی ءَ گوشتگ کہ یک مردمے لھتے گام یک مزنیں راجے ءَ منزل ءَ سر کنگ ءَ راجدپتری بوج ءِ بَڈا جنوک اِنت – ماما قدیر بلوچ

بلوچستان ءِ بنجاھی شھر شال ءَ وائس فار بلوچ مسنگ پرسنز نیمگ ءَ زھرشانی برجاہ، زھرشانی مروچی چار ھزار ءُ دوسد ءُ شست ءُ پنچ روچ سرجم بوتگ – جماعت اسلامی ءِ بنجاھی جنرل سیکریٹری لیاقت بلوچ، سندھ صدر اسد بھٹو، بلوچستان ءِ صدر ہدایت اللہ بلوچ، ڈاکٹر عطا الرحمن ءُ دگہ مردماں بنجل ءِ تر ءُ تاب کُتگ بیگواھیں مردمانی کھولانج گوم ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ گپ جنان ءَ گوشتگ کہ مروچیگیں ورنایاں زانت ءُ آگھی وتی کوپگاں زرتگ انکلاب ءِ رد کنوکانی ریتکگیں کُنٹگاں چہ ھون ھونریچ انت بلے زانت ءُ زانشت ءَ وتی ازیمیں مکسد ءِ ھاتر ءَ وتی زند ءِ کربان کُتگ ءُ پُرایمنیں جھد بڈ ءَ بستگ ءُ جنزان انت –

آئی ءَ گوشتگ کہ یک مردمے لھتے گام یک مزنیں راجے ءَ منزل ءَ سر کنگ ءَ راجدپتری بوج ءِ بڈا جنوک اِنت –

آئی ءَ دیمتر ءَ گوشتگ کہ دنیا ءِ رجدپتر ءَ مدامی اے پدر کُتگ کہ بدلی ھما زانت ءُ زانشتی انسان ءِ کار انت – انسانی ھون واریں درندگانی دنتان زھر کتگ انت ءُ سرجمیں دنیا باور کنائینتگ کہ اے درندہ ءِ بوگ ءَ اے دمگ ءِ ایمنی وشھالی آرگ ممکن نہ انت –

آئی ءَ گوشتگ کہ کوھلو ءَ پاکستانی جنگی بالگرد گوستگیں سَے روچاں لشکر کشی کنگ انت کہ اود ءَ مردمانی لوگ جاہ سوچگ بوگ ءَ انت وھدیکہ آھانی مال ءُ دلوت پُلگ بوگ ءَ انت ھمے وڑ کولواہ ءَ زوراکی برجاہ دارگ بوتگ اَنت –

آئی ءَ گوشتگ خاران ءَ لشکر کشی ءِ میان ءَ پنچ ورنا زورانسری اوار جنگ ءُ بیگواہ کنگ بوتگ وھدیکہ پنجگور ءَ چار مردم زورانسری اوار جنگ بوتگ ھمے وڑ نودربر سید حاصل ھم اوتھل زیروپؤنٹ ءَ چہ آوار جنگ بوتگ کہ آئی ءِ درگت ءَ ھچ وڑیں ھال ءِ نیست –

ماما قدیر بلوچ ءَ گوشتگ کہ بلوچستان ءِ مردم یل کنگ ءَ ابید اے لڑ ءَ مدامی گیشی اتکگ ھکومت دنیا ءِ پیشدارگے ھاتر ءَ لھتے مردم یل کنت بلے دومی نیمگ ءَ دو سری مردم آوار جنگ ءُ بیگواہ کنگ بنت –

اُرش ھما وھد ءَ کُرتگ کہ زورگریں پوج لس آبادیانی سر ءَ لشکر کشی ءِ چِن ءُ لانچ ءَ دزبند بیتگ – بیبگر بلوچ

بلوچ ریپبلکن آرمی جارکش بیبگر بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ گوشتگ کہ مئے سرمچاراں مرچی سھب ءَ کولواہ ءِ دَمَگ ناگ ءَ زورگیریں پاکستانی پوج ءِ کاروان ءِ سر ءَ مزنیں ءُ وتکاریں سِلاھانی گوم ءَ اُرش کتگ ءُ پوج ءَ جانی ءُ مالی تاوان داتگ۔

جارکش ءَ گوشتگ کہ کاروان ءِ سر ءَ ھما وھد ءَ اُرش کتگ وھدیکہ پوج لس آبادیانی بگیری ءَ لشکر کشی ءِ چن ءُ لانچاں بوتگ، پروش وارتگیں پوج ءَ سرمچارانی سوبمندیں اُرش ءَ پد کَش ءُ گْور ءَ مزنیں کساسے ءَ گریب ءُ تنگدستیں بلوچانی گِس مانداشتگ اَنت کہ آئی ءِ زُلم ءُ زوراکیاں پَدّر کنت-

آئی ءَ گوشتگ کہ مئے اے وڑیں اُرش بلوچستان ءِ آجوئی ءَ تاں برجاہ مان انت –

لچہ: دیگر ءِ رکیں مئے وتن ھانل

لچہ کار: آرپ وپا بلوچ

دی بلوچستان پوسٹ

دیگر ءِ رکّیں مئے وتن هانل
دیدگ ءُ یکیں مئے وتن هانل

سدهزار شیدا شئےمرید َانت تئی
هاکاں تئی ُچکیں مئے وتن هانل

کوه ءِ البرز ءَ دانکہ هلمند ءَ
پہ ترا مکیں مئے وتن هانل

سر مڑاهانی پہ ترا کربان
تئی برگ سکیں مئے وتن هانل

کانیگ ءُ کمب انت دلبر ءِ گوناپ
چوٹل ءُ ڈکیں مئے وتن هانل

بُتکگیں کوَش ءَ مسکیں بنگانی
جنّت ءُ لکیں مئے وتن هانل

تئی همک سنگ ءَ ما کنیں سینگار
هوناں گوں لِکیں مئے وتن هانل

کابہ ءُ کبلہ درست منی آرپ
انچو بے شکیں مئے وتن هانل

کوھلو ءُ کولواہ ءَ پوجی لشکر کشی میتگانی ماندارگ ءِ ھال بیتگ اَنت –

بلوچستان ءِ دمگ کوھلو ءِ بازیں جاھاں پاکستانی پوج ءِ نیمگ ءَ لشکر کشی برجاہ اَنت ءُ پوج ءَ بازیں لوگے مانداشتگ اَنت –

دمگی مردماں ٹی بی پی ءَ گوں گوشتگ کہ مروچی سھب ءَ کوھلو ءِ دمگ کوہ بن، سیاہ کوہ، دھریس، مخی ءُ کاٹ ویڑ ءِ دمگاں گن شپ ھیلی کاپٹرانی زور ءَ لشکر کشی برجاہ اَنت –

ھالانی تہ ءَ گوشگ بیتگ کہ پیرا ملیٹری پوج ءَ لشکر کشی ءِ میان ءَ جنتلی ءِ ھند کوہ بن ءَ یک درزنے ءِ کچ ءَ مھمدانی مریانی لوگ سوتکگ اَنت،ھمے رنگ ءَ لشکر کشی ءِ وھد ءَ پوج ءَ پس ءُ گوک ھم برتگ اَنت –

دمگی مردمانی رد ءَ کوھلو ءِ بازیں جاھاں گوستگیں سَے روچاں لشکر کشی برجاہ اَنت ءُ لشکر کشی ءِ سوب ءَ جانی تاوان ءُ دزگیریانی ھال نیاتکگ اَنت –

ھمے وڑ ءَ کولواہ ءَ ھم پوجی لشکر کشی ءِ ھال بیتگ –

گیشیں ھالانی رد ءَ کولواہ ءِ دمگ ناگ ءَ پوج ءُ سلاہ بندیں مردمانی میان ءَ جنگ ءُ چوپ ءَ پد پوج ءَ دمگانی سر ءَ بیڑ برتگ ءُ لشکر کشی بندات کرتگ –

ھالانی تہ ءَ گوشگ بیتگ کہ کیلکور جکی ءَ پوج ءَ بیڑ برتگ ءُ اود ءَ مردمانی لوگ بن داتگ اَنت –

اے درگت ءَ تنی وھدی پوج ءِ نیمگ ءَ دگہ ھال دیم ءَ نیاتکگ اَنت –