TBP Balochi

بلوچستان ءَ ھورانی گوارگ ءَ بلوچستان ءَ جانی ءُ مالی تاوانانی دیمپانی –

ٹی بی پی پتر ھال ءَ سر بیتگیں ھالانی رد ءَ پشین ءِ دمگ بوستان کلی ریگی ءَ یک لوگے ءِ چھت ءِ کپگ ءِ سبب ءَ یکیں کھول ءِ پنچ مردم بیران بیتگ اَنت –

لیویز بنشون ءِ رد ءَ لیویز ءَ ھال ءِ سر بیگ ءَ وت ءَ وئیل جاہ ءَ سر کرتگ ءُ اود ءَ لیویز ءِ کارمنداں بیران بیتگیں مردمانی لاش کَش اِتگ ءُ پشین ھسپتال ءَ سر کرتگ اَنت –

ھالانی تہ ءَ گوشگ بیتگ کہ مھمد داود نامیں مردمے ءِ ھِشتی ءِ لوگ اچانگ ءَ گوستگیں شپ ءَ لُمب اِتگ ءُ کپتگ –

بیران بیتگیں مردمانی تہ ءَ مھمد داود ءُ آئی ءِ چار زھگ کہ آیانی اُمر دوازدہ سال ءَ بہ گر داں سَے سال ءَ ھوار اَنت –

گوستگیں شپ ءَ ھمے دمگ ءَ ھور ءَ ھم گورتگ ءُ چریشی ءِ سبب ءَ لوگ ءَ مِس کش اِتگ ءُ لوگ لُمب اِتگ ءُ کپتگ –

گوستگیں روچ ءَ بلوچستان ءِ جتا جتائیں جاھاں بشی ھورانی گوارگ ءَ ھپت مردم بیران بیتگ اِت اَنت –

ھمے وڑ ءَ گوستگیں روچ ءَ تربت ءَ توپانی ھورانی گوارگ ءَ ھار ءَ گاڑی ءِ بڈینتگ ءُ چریشی ءَ چُک ءُ زالبولاں ھوار چار مردم بیران –

وئیل پیدارک ءِ دمگ کلگ جمک ءَ پیش اتکگ کہ اود ءَ گاڑی ءِ آپ ءَ برتگ ءُ چریشی ءَ زالبول ءُ چکاں ھوار چار مردم بیران بیتگ اِت اَنت –

لیویز بنشون ءِ رد ءَ گاڑی ءِ ڈرائیور شکیل گنگزار ءِ لاش گوستگیں شپ ءَ در کنگ بیتگ ءُ دگہ دو زدگ بیتگیں کس ھم درکنگ ءُ ھسپتال ءَ سر کنگ بیتگ اَنت –

دگہ چک ءُ زالبولاں ھوار سَے مردم آپ ءَ برتگ اَنت ءُ اشانی تہ ءَ چِل ءُ پنچ سالی زالبولے ءِ لاش سھب ءَ گندگ بیتگ –

بلوچستان ءَ ھورانی گوارگ ءَ بجلی ءِ نزام ھم گار ءُ بیگواہ اِنت ءُ مروچی دوبر ھم ھوراں گوارگ بندات کرتگ ءُ بلوچستان ءَ مولم شناسان داں مروچیگ ءَ ھورانی گوارگ گُشتگ اَت –

ھمے وڑ ءَ لسبیلہ ءَ ھم ھورانی گوارگ ءَ راہ ءُ در بند بیتگ اَنت –

گیشیں ھالانی رد ءَ لسبیلہ ءَ ھورانی گوارگ ءَ کوراں ھار کرتگ ءُ ھب گڈان وندر، دریجی کنراج، اوتھل، لاکھڑا ءُ بیلار ءَ گورتگیں ھوراں کوراں ھار کرتگ ءُ راہ ءُ در بند بیتگ اَنت ءُ بجلی ءِ نزام بیگواہ –

اوگستان ءِ اُستان کندھار ءَ تیرگواری ءَ انڈین اھوالکار کُشگ بیتگ –

تیرگواری ءِ وئیل اُستان کندھار ءِ ھند اسپین بولدک ءَ پیش اتکگ کہ اود ءَ انڈین اھوالکار دانش صدیقی کُشگ بیتگ –

زانگ بہ بیت اسپین بولدک اوگستان ءُ پاکستانی سیمسراں ھوارے دمگے کہ گوستگیں روچ ءَ ترندیں جنگ ءُ چوپ ءَ تالبان ءَ گپتگ اَت –

اوگان رسانکدر ءِ رد ءَ کُشگ بیتگیں اھوالکار گوستگیں روچاں ھمے دمگ ءَ رپورٹنگ کنگ ءَ بیتگ کہ اوگان اسپیشل فورسز ءُ تالبان ءِ میان ءَ بیتگیں جنگ ءَ کُشگ بیتگ –

تنی وھدی تالبان ءِ نیمگ ءَ چوشیں گپ دیم ءَ نیتکگ اَنت –

دومی نیمگ ءَ اوگستان ءِ اُستان کندھار ءَ ترندیں جنگ ءُ چوپ برجاہ اَنت چہ کابل ءَ دی بلوچستان پوسٹ ءِ رپورٹر ءَ ھسپتال ءِ رد ءَ گپ کنان ءَ گوشتگ کہ گوستگیں بیست ءُ چار ادارانی تہ ءَ کندھار ءَ میر ویس ھسپتال ءَ سِی ءُ یک لس شھری ءُ دو پولیس کارمند ٹپیگیں جاوراں گوں آرگ بیتگ اَنت – سِی ءُ یکیں زدگ بیتگیں شھریانی تہ ءَ دَہ زالبول ءُ ھشت چُک ھوار اَنت –

ھسپتال ءِ رد ءَ زدگ بیتگیں بولدک، پنجوائی، کرز، میرویس مینہ ارغنداب ءَ آرگ بیتگ اَنت –

ھمے وڑ ءَ اوگان فورسز ءِ نیمگ ءَ اسپین بولدک سیمسر ءِ گوزی ءِ کنٹرول ءَ کتگ ءُ بازیں کچے ءَ پوجی آپریشن برجاہ اَنت – اوگستان فورسز ءُ تالبان ءِ ترندیں جنگ برجاہ اَنت –

بلوچستان ءِ سر ءَ کرونا وائرس ءِ گیش تالان بیگ ءَ آدینگ ءِ روچ ءَ باپاری بنجلانی بند کنگ ءِ سوڑگ کرتگ –

مارکیٹ ءُ بازار ءِ بند کنگ ءِ سوڑگ بیتگ اَنت ءُ وھدیکہ میڈیکل اسٹور، پرچون ءِ دکان ءُ شیر ءِ دکان پچ بنت اِنت ئِے –

جھانی وبا کرونا وائرس ءِ بلوچستان ءَ گیش بیگ ءَ گوستگیں روچاں جانسلامتی ءَ شنگ کرتگیں درشانی ءَ گُشتگ کہ مھلوک وتی پھریز ءَ بہ کنت ءُ اے جان کُشیں نادراھی ءَ وت ءَ بہ رکین ایت –

بلوچستان ءَ گوستگیں بیست ءُ چار ادارانی تہ ءَ شال ءَ نُھ سد ءُ سِی ءُ یک ٹیسٹ کنگ بیتگ اَنت چریشانی تہ ءَ پنجاہ ءُ دو کساں نادراھی پدر بیتگ اَنت ءُ کرونا ءِ تالان بیگ ءِ زور پنچ ٹک پنجاہ ءُ نُھ بیتگ –

جانسلامتی ءَ تاھر برادری ءُ مھلوک ءَ گوں دزبندی کرتگ ءُ گوشتگ سرکار ءِ کرتگیں رھبدانی پاسداری ءَ بہ کن اَنت –

ھاران ءَ بلوچستان نیشنل پاٹی ءِ چیردستی ءَ شھدائے بلوچستان ءِ روچ ءِ درگت ءَ یک یاتگیری دیوان ءِ برجم دارگ بیتگ –

یاتگیری دیوان ھاجی شاہ میر ھاؤس ءَ بندات کنگ بیتگ ءُ دیوان ءِ بندات پاک تاک ءِ وانگ ءَ بنداتگ بیتگ –

یاتگیری دیوان بلوچستان نیشنل پاٹی ءِ تھسیل ءِ سروک اصغر ملنگزئی، چیئرمین غلام دستگیر مینگل، طاھر مھمد حسنی، بی ایس او ءِ سی سی باسک ھاجی زکریا مینگل، شبیر اھمد بادینی، محی الدین بلوچ، شاہ حسین مینگل، ندیم تگاپی ٹکری، شعیب احمد ملازئی، میر نجیب حسن آبادی ءَ ھوار بازیں مردماں بھر زرتگ –

آیاں تران کنان ءَ گوشتگ کہ بلوچستان ءِ مھلوک ءِ سر ءَ زُلم ءُ زوراکیانی گوں ھمراھی ءَ زورانسری ءَ مھلوک ءِ ھکانی ھڑپ کنگ ءَ اَنت –

بلوچ راجدوستیں پاٹیانی رھشونانی شھیدی باز دراج کش اِنت ءُ بلوچستان زور پہ دیمروئی ءِ گستا کنگ ءِ امل برجاہ اَنت –

شھدائے بلوچستان ءَ وتی جان ڈیھ ءِ واستا دیمون کتگ ءُ مروچی ھم بلوچ شھیدانی پکر ءُ زانت زندگ اِنت ھمایانی رندپداں روان کن ایں بلوچستان ءِ سائل وسائل ءِ واستا جد ءُ جھد کن ایں –

آیاں گوشت کہ بدبھتی ءَ بلوچستان ءِ راستیں جیڑھاں بے دلگوش کنگ ءَ اَنت ءُ اے امل ءَ ھنچیں مردمانی دست ءَ دیگ ءَ اَنت کہ آ بلوچستان ءِ اسلیں جیڑھاں ھچ سرپد نہ اَنت –

آیاں گوشت کہ اگاں زوراک ءُ زوردستی ءِ جیڑہ گشیت اَنت گڑا دو ھزار ءُ پنچ ءَ بلوچستان ءِ جیڑہ جنرل مشرف ءِ وھد ءَ گیش اِتگ اَت –

آیاں گوشت کہ ھنچیں ڈیھے ما لوٹ اِنت کہ اود ءَ مارا وتی پجار ءُ وجود ءِ ھلاس بیگ ءِ ترس مہ بیت اِنت ءُ راجانی وجود ھست بہ بیت انساپ ءُ مزگیری کانود ءُ جمھوریت ءِ دیمروئی ءِ برز بہ بیت اِنت –

آیاں گوشت کہ انیگیں ھاکم ءُ گیر جمھوری ءُ گیر اخلاقی ءُ گیر انسانی رویشانی بے سنچ داروکیں پالیسیانی سبب ءَ مروچی اے زانشتی دور ءَ بلوچستان بیست ءُ یکمی کرن ءَ نا بلکیں دھمی کرن ءِ یاتاں تاجگ کنت ئِے پرچاکک بلوچستان ءَ اے وھد ءَ شدکی،پشکپگی، نیزگاری ءُ ناوانندگی مھلوک ءِ تہ ءَ کمتری ءِ پیشدارگ ءِ بنکی سبب اِنت –

آیاں گوشت کہ ھاکمانی ردیں پالیسیابی سبب ءَ بلوچستان ءِ وسائل بے سر ءُ رھماں بھر ءُ بانگ کنگ ءَ بے روزگاری ءُ نیزگاری ءَ مھلوک دگانی سر ءَ آیگ ءَ لاچار بیتگ اَنت –

بی این پی ءِ سروک سردار اختر جان مینگل ءَ شش”نقات ” پیش کرتگ اَنت بلے اشانی سر ءَ ھچ گپ منگ نہ بیتگ اَنت ءُ اشاں ابید بی این پی وتی زانت ءِ ھمراھی ءَ اوشتوک اِنت واکدار ءُ وزاراتانی پشت گیری ءَ ایر کرتگ ءُ بلوچستان ءَ تھاریں شپ ءِ نیمگ ءَ دارگ ءِ گامان بیتگ –

سربوتگیں ھالانی رِد ءَ بلوچستان ءِ جتاجتائیں دمگاں بشّی ھور یکشل ءَ برجاہ انت کورانی گیشیں آپ ءِ آرگ ءِ سبب ءَ بازیں دمگاں ھار اتکگ، دگ ءُ کشار ھار ءَ بُرتگ انت بازیں دمگاں ھور ءِ سبب ءَ ایپ سی کارمنداں ھوار ھپت مردم بیران بوتگ انت وھدیکہ بازیں دمگاں لین بند کنگ بوتگ –

ھالانی رِد ءَ پسنی ءَ تیزیں گوات ءُ ھوراں لین بند کنگ بوتگ ءُ جتا جتائیں دمگاں گوستگیں شپ ءَ ھور ءُ گوات ءَ چہ بازیں لین ءِ کمبہ ءُ درچک ءُ دیوال کپتگ انت – دمگی پھازدارانی رِد ءَ ھور ءُ گوات ءِ سبب ءَ بازیں جاھاں کمبہ ءُ تارانی کپگ ءِ ھال انت چریشی ءِ سبب ءَ دوشگین انت کہ لین بند انت –

جھل مگسی ءِ دمگ گنداواہ ءَ ھوار دگہ دمگاں گوستگیں شپ ءَ توپانی ھوراں تباھی آرتگ، بازیں جاھاں دیوال ءُ لوگانی گپگ ءِ ھال انت بلے دنیگت ءَ ھچ وڑیں جانی تاوان ءِ ھال نیست –

گنداواہ ءِ بازیں دمگ ءِ ھال ءُ اھوال نیست انت دامگ بند انت کہ اے دمگانی قاضی اسمائیل گھیلا کوٹڑہ کھاری پیر چھتل شاہ نورانی کمبی گھاترہ گاجان پتری ھوار انت – گندواہ ءَ ورگی آپ ءِ جیڑہ ھم ھست انت کہ سرجمیں شھر ءَ ساپیں ورگی آپ ھم دست کپگ ءَ نہ انت – دمگی مردمانی رِد ءَ آپ نبوگے سبب ءَ دمگی مردم ناجوڑیں جاور ھالاں گوں دچار انت –

ھمے وڑ چہ کیچ ءَ ھال آجگ انت کہ تربت مرگاپ کور ءَ گاڑی ءِ آپ ءَ بُرتگ ءُ دو مردم بیران بوتگ اَنت، چہ تربت ءَ جمک ءَ رؤکیں مساپر کشیں گاڑی ھور ءَ پد اتکگیں ھار ءَ بُرتگ – گاڑی ءَ چُک ءُ زالبول ھم سوار بوتگ اَنت بلے دنیگت ءَ دو مردم ءِ جون در کنگ بوتگ – پھازدارانی رِد ءَ ریسکیو ٹیم دیم دیگ بوتگ اَنت –

دومی نیمگ ءَ ھب ءَ ھور ءُ ھار ءِ برگ ءَ یک مردمے بیران بوتگ –
کراچی ءَ چہ شاہ نورانی درگاہ ءَ رؤکیں چل سالی ئیں طارق جمیل ء جمیل احمد نورانی کراس ءِ ویرآب کور ءَ ھار ءَ بُرتگ – وئیل ھال سربوگ ءَ ریسکیو ءَ وت ءَ وئیل جاہ سر کتگ –

بلوچستان ءَ بازیں دمگاں ھورانی سبب ءَ گرمی کم تریتگ بلے ھورانی سبب ءَ مھلوک ءِ لوگ جاہ، دگ ءُ کشار ھم سک باز متاثر بوتگ انت ھورانی سبب ءَ ھپت مردم بیران بوتگ ، کوھلو ءَ ھار ءِ برگ ءِ سوب ءَ دو فرینٹر کور ءِ کارمند بیران بوتگ اَنت –

وھدیکہ چاگی ءُ دالبندین ءَ ھم ھوراں تباھی آرتگ بازیں دمگاں لین ءِ کمبہ کپتگ انت وھدیکہ چاگی ءَ پاک ءُ ایران ءِ سیمسر ریل ءِ پٹی ھم ھار ءَ برتگ ءُ چریشی ءَ ریلانی آیگ ھم بندنت –

بلوچ یکجھتی کمیٹی ءِ نیمگ ءَ شال ءِ پریس کلب ءَ اوگستان ءِ بدل بیوکیں جاورھال ءُ بلوچستان ءَ آئی ءِ اسراتانی سر ءَ یک سیمینارے برجم دارگ بیتگ کہ چریشی ءَ بازیں کَچے ءَ سیاسی باسک ءُ زانت ءُ زانشتی کواسیں مردماں بھر زرتگ –

دیوان ءِ بندات ءَ جنگانی دیمپانیں اوگان ءِ مھلوک ءِ یات ءَ دو دمان ءِ بے تواری ءَ پد جنگ ءَ بد ھالیں اوگستان ءِ مھلوک ءِ گون ءَ پدردی درشان اِتگ –

بھر زیروکیں مردماں تران کنان ءَ گُشتگ کہ اوگستان ءِ بدل بیوکیں جاور ھاک یک رندے پد ءَ میان اُستمانی زوراکانی دست ھوار اَنت – اوگستان ءِ جاور ھال یک رندے پد ءَ انسانی ناوشیانی دیمپان بیان اَنت اوگستان ءِ مھلوک ءَ جنگ ءَ دمبرتگ –

آیاں گوشت کہ گوستگیں چِل سالاں آ جنگ ءِ تہ ءَ اَنت بلکیں اے میان اُستمانی ایر کرتگیں جنگے کہ چریشی ءِ نپ میان اُستمانی زوراکاں رسگ ءَ اِنت – ھمے داب ءَ اوگستان ءِ مھلوک ایوک ءَ جنگ ءَ بس تاوانانی دیمپانی ءَ کنگ ءَ اَنت –

دیوان ءَ بھر زیروکیں مردماں گوشت کہ مروچی پشتون ءُ بلوچاں یکجھتی ءِ درشانی کنگی اِنت وھدیکہ اوگستان ءِ جاور ناوش بیتگ اَنت گڑا ھروھد ءَ اشی ءِ سان بلوچانی سر ءَ کپتگ –

بھر زیروکاں گُشت کہ وھد بدل بیتگ ءُ جاور ھم بدل بیتگ اَنت، بازیں جھلی ءُ برزی بیگ ءَ اَنت بلے اے رندی نا بید اِنت اوگستان ءِ سرکار ھلاس بیت ءُ تالبان ءِ دست ءَ کنگ بیت اِنت گمان اِنت کہ آ تالبان ءِ گون ءَ ترندیں جنگ بہ کنت ءُ آیاں داں کابل ءِ زوگری ءَ بہ داریت پیسر ءَ تالبان ءَ چیرجنگی کرتگ نِی اے بیت کنت تالبان ءِ ھلاپ ءَ اوگستان ءِ سرکار زور ءِ راھاں کاربند بہ کنت ءُ آیاں کابل ءِ گرگ ءَ بہ داریت ءُ چریشی ءَ پد یک سنگینے جنگے بندات بیت کُت کنت –

بی این پی ءِ رھشون ھاجی لشکری رئیسانی ءَ گوشتگ کہ اے گچینی ءِ نیاد ءِ برجم کنگ ءَ مارا بی وائی سی ءِ کار کنوکاں داد بکشی کن آں – آئی ءَ گُشت کہ اے گچینی ءِ دیوان ءِ جوڑ کنگ ءُ زانت ءُ زانشکاریں مردمانی یکجاہ کنگ پُر ارزشت اِنت –

آئی ءَ گُشت کہ اد ءَ یک باوستے بندات کنگ بہ بیت کہ آئی ءِ درچ برجاہ اِنت پرچاکہ اوگستان ءِ بدل بیوکیں جاورھالاں بلوچستان ءَ ھوار سرجمیں دمگ ءِ جاورھال بدل بیت کُت کن اَنت ءُ چریشی ءَ گمان ھمے بیت اِنت یک نوکیں جنگے بندات بیت کُت کنت ئِے –

آئی ءَ گُشت کہ اے جاورھال ءِ سر ءَ ڈیھ ءِ سیاسی پاٹیاں بلوچستان ءُ ھیبرپکتونواہ ءَ آل پارٹیز کانفرنس ءَ لوٹائینگ لوٹ ایت دانکہ سیاسی پاٹی وتی یک درشانی نیادے برجم کُت بہ کن اَنت بلے بدبھتی ءَ راجی سلامتی ءِ نیاد ءَ لوٹگ بیتگ اَنت چریشی ءَ سیاسی پاٹی اسٹیبلشمنٹ ءِ نیاد ءِ دیگ ءَ ابید ایاں یک دو مردم ءِ نیمگ ءَ رسمی رنگ ءَ گپ کرتگ اَنت چریشی ءَ مئے بے تھمبلی المی ءَ پدر بیتگ –

دیوان ءَ ساجد ترین ایڈوکیٹ ءَ گُشتگ کہ پشتون ءُ بلوچ یکجاہ بہ بنت ءُ اے جاورھالانی دیمپانی ءَ بہ کن اَنت ھما رنگ ءَ بانک کریمہ ءُ عثمان کاکڑ ءِ شھیدی ءَ یکجاھی ءِ پدراھی کرتگ ھمے رنگ ءَ اے جاورھالانی سر ءَ ھم یکجاھی المی اِنت –

دیوان ءَ تران کنوکاں گُشتگ کہ چین ءِ ون بیلٹ ون روڈ ءِ سبب ءَ اے دمگ ءَ دیمروئیانی رژن تالان بیگ ءَ اَنت ءُ چین اے دراھیں کارنامھاں ھوار انت امریکہ چم ءِ نگاھان جنگ ءَ روگ ءَ اِنت بلے اے ھچبر بیت نہ کنت مہ امریکہ وتی واھشتانی پد ءَ اشی ءَ یل بہ کنت ءُ اوگستان ءَ بروت بلکیں آ سرجمیں دمگ ءَ یک گیر زمہ واری ءِ پیداک کنگ اِنت چریشی ءِ گمان ھمے بیت اِنت کہ اے دمگ ءَ یک ھونریچیں جنگے بنا بیت اِنت –

اے جاورھالاں وھدیکہ جنگ بیگ ءَ اِنت گڑا اے دمگاں زرکاری بیت کُت نہ کنت پرچاکہ اگاں تالبان ءِ گوست چارگ بہ بیت گڑا آئی ءِ جوڑ کنگ ءُ آئی ءَ سویت یونین ءِ ھلاپ ءَ جھاد کنگ ءَ درستاں گیش کمک امریکہ ءِ بیتگ اَنت اے چون بیت کُت کنت کہ امریکہ اوگستان ءَ وتی واھشتاں یلو بہ کنت ءُ ھُشکیں دستاں بروت آ یک نوکیں کمربندی ءَ امریکہ کردے کنگ ءَ اِنت –

دیوان ءَ بھر زیروکیں مردماں گوشت کہ پاکستان امریکہ ءِ دمب ءَ یل کنگ ءُ چین ءِ نیمگ ءَ روگ ءَ اِنت اے ھچبر بیت کُت نہ کنت کہ پاکستان امریکہ ءِ واھشتانی ھلاپ ءَ چوشیں کارے کنت بلکیں اوگستان امریکہ ءِ بلاک ءَ ھچبر یلو نہ کنت کہ آئی ءِ زرکاری سیاسی ءُ ھر دروشم ھَ امریکہ ءِ ھمراھداری کنگی اِنت –

آیاں گُشت کہ اوگستان ءِ گوست ءِ جنگ ءَ پد یک رندے پد ءَ لَڈ ءُ بار کرتگیں مردمانی دیم پہ بلوچستان ءَ اِنت ءُ اد ءَ زند ءِ گوازینگ ءَ تنگ بنت پرچاکہ گوستگیں وھداں ھمے وڑ بیتگ اوگان ءِ مھلوک بازیں کچے ءَ جنگی جاورھالاں اتکگ اَنت بیت کُت کنت اے رندی پد ءَ ھم اوگستان ءِ مھلوک ءِ دیم گوں بلوچستان ءَ بہ بیت اِنت –

دیوان ءِ گُڈسر ءَ بی وائی سی ءِ نیمگ ءَ اتکگیں دراھیں زالبول ءأ مردین ءُ مھمانانی منت گرگ بیتگ اَنت –

بلوچستان ءِ بنجاھی شھر شال ءِ پریس کلب ءِ دیم ءَ پشمبے ءِ روچ ءَ بیگواھیں تاج مھمد سرپرہ ءِ زورانسری آوار جنی ءِ بگیری ءَ آئی ءِ کھول ءِ نیمگ ءَ زھرشانی کنگ بیتگ، زھرشانی سیاسی ءَ چاگردی گلاں ھوار بیگواھیں مردمانی کھولاں بھر زرتگ –

زھرشانی کنوکانی دستاں پلے کارڈز ءُ بیگواھیں مردمانی اکس ءُ بلوچستان ءَ زورانسری آوار جنگ بیتگیں مردمانی بیگواھی ءِ ھلاپ ءَ اوگام جتگ –

تاج مھمد سرپرہ یک سالے ءَ پیسر بزانکہ پانزدہ جولائی ءَ ناشناسیں مردماں سندھ ءِ بنجاھی شھر کراچی ءَ زورانسری آوار جتگ ءُ بیگواہ کرتگ آئی ءِ لوگ بانک سالیہ مری ءِ رد ءَ تاج مھمد سرپرہ ءِ بیگواھی ءَ ریاستی ادارہ دزمانجن اَنت –

شال ءِ زھرشانی ءَ بی ایس او پجار ءُ دگہ سیاسی، چاگردی دھشداں ھوار بیگواھیں بلوچ نودربر رھشون زاکر مجید ءِ مات، بیگواھیں جمیل سرپرہ ءِ کھول، بیگواھیں غلام فاروق ءِ مات، بیگواھیں جھانزیب مھمد حسنی ءُ نوشکی ءَ بیگواہ بیتگیں نصیب اللہ بادینی ءِ کھول ھوار بیتگ اَنت –

بیگواھیں جمیل سرپرہ ءِ لوگی ءِ رد ءَ آئی ءِ لوگ واجہ بازیں وھداں پد انگت ءَ بیگواہ اِنت،ما لاچار بیتگ ءُ اد ءَ اتکگ اِنت واکداں گوں دزبندی کن ایں کہ منی لوگ واجہ ءَ دیم ءَ بیار اَنت ءُ مارا انساپ بہ دے اَنت –

زھرشانی ءَ ھواریں چہ نوشکی ءَ بیگواہ بیتگیں نصیب اللہ بادینی ءِ گوھار ءِ رد ءَ آئی ءِ برات یک نودربرے ءُ آ ھپت سالاں چہ بیگواھی ءِ آماچ اِنت ءُ وتی برات ءِ ودار کنان ءُ انگت ءَ مارا آئی ءِ بارو ءَ ھچ سرپدی نیست اِنت ءُ نانکہ گوشگ بیتگ –

نصیب اللہ بادینی ءِ گوھار ءَ گُشت کہ چیف جسٹس آف پاکستان ءَ لوٹ ایت کہ آ مارا انساپ بہ دنت کجام ھم مردم ءَ اے رنگ ءَ بیگواہ کنگ ءَ ایوک ءَ آئی ءَ ناں بلکیں آئی ءِ کھول سرجم ءَ دردناکیں جاورانی دیمپان اَنت –

بی ایس او رھشون اسرار بلوچ ءَ بیگواھیں مردمانی واستا برجم داشتگیں زھرشانی ءَ گُشت کہ بلوچستان ءَ یک سرجمیں نسلے بیگواھی ءِ آماچ اِنت زورگریں ریاست ءِ اے امل ءَ وتی ھکانی پد جنگ ءَ ھچبر پُشت ءَ نہ کنز ایں –

بی ایس او پجار ءِ بنجاھی رھشون زبیر بلوچ ءَ تران کنان ءَ گُشتگ کہ اے وڑیں جھلانکیں سزا ءِ امل بلوچستان ءَ برجاہ اَنت اشی ءِ آسر الم درکیت اِنت –

آئی ءَ گُشت کہ ریاست زورانسری آوار جنیانی سلسلگ ءَ بند بہ کنت ءُ بیگواھیں مردماں دیم ءَ بیار ایت –

زھرشانی ءَ پشتون تھپز مومنٹ ءِ باسک ھم ھوار بیتگ اَنت –

ھمے وڑ ءَ پشتون تھپز مومنٹ ءِ رھشون ءُ رکن پاکستان اسمبلی محسن داوڑ ءَ چاگردی رسانکجاہ ٹوئٹر ءَ تاج مھمد سرپرہ ءِ زورانسری آوار جنی ایر جتگ ءُ گوشتگ کہ بلوچانی آوار جنی ءِ درچ یکشل ءَ برجاہ اَنت،تاج مھمد سرپرہ ھم ھما دراھیں بیگواھیں بلوچاں چہ یکے کہ بیگواھی ءِ آماچ اِنت –

آئی ءَ گُشتگ کہ ما آئی ءِ سلامتی ءِ یل کنگ ءِ اُمیت ءَ داریں ءُ یل کنگ ءِ دزبندی ءَ کن ایں –

زورانسری آوار جنگ انسانیت ءِ سوزمان اِنت آئی ءِ جرم گشگ المی بیتگ –

گوادر ءَ پوجی گاڑی ءِ بمب تراک ءِ نشانگ کتگ، تراک ءَ پنچ پوجی کارمند مرتگ ءُ سَے ٹپی بوتگ اَنت – میجر گوھرام

سربوتگیں ھالانی رِد ءَ گوستگیں روچ ءَ بلوچستان ءِ تیاب دپی دمگ پسنی سردشت ءَ ناشناسیں مردماں پاکستانی پوج ءِ راہ ءِ سر ءَ تراک ناکیں شورو کل کتگ ءُ پاکستانی پوج ءِ گاڑی ءِ تراک ناکیں شوروانی نشانگ کتگ –

سرکاری بنشون پوج ءِ سر ءَ بوتگیں بمب تراک ءِ ھبر راست کتگ ءُ گوشتگ کہ پاکستانی پوج ءِ سر ءَ بوتگیں تراک ءَ کپٹن عفان مسعود مرتگ ءُ دگہ چار ٹپی بوتگ انت –

وھدیکہ دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش پنچ پوجی کارمندانی کوش زمّہ واری منّ اِتگ گوشتگ کہ چارشمبے روچ ءَ بیگاہ ءِ ادار ھشت ءَ پسنی ءِ دمگ سردشت کلانچ ءَ مئے سرمچاراں پاکستانی پوج ءِ دو گاڑی دورواگیں تراک ناکیں شوروانی نشانگ جوڑ کتگ –

جارکش ءَ گوشتگ کہ چریشی ءَ یک گاڑی ءِ سرجمی ءَ شوروانی زد ءَ اتکگ تباہ بوتگ کہ آئی سواریں پنچ کارمند مُرتگ ءُ سَے ٹپی بوتگ انت –

گڈسر ءَ جارکش ءَ وتی درشان ءِ تہ ءَ گوشتگ ایردستیں بلوچستان ءِ آجوئی ءَ تاں مئے اُرش برجاہ مان ننت –

نبشتانک: منی گار بوّگ ءَ ساری

نبشتہ کار: براھیم گُؔل

 (پنچُمی بَھر)

دی بلوچستان پوسٹ

زُبان ءِ زندگ کنگ ءُ دیم ءَ آرگ پہ تئی مات ءَ یک شاھگانیں پِگرے بیت کہ منی پرزنداں من ءَ انگت نہ دروہ اِتگ،منی پرزِنداں منی گم کوپگان اِنت۔

مِھروان: من ترا اے ھبر ءَ گوں سدّکیں دل گُش آں کہ تو اگاں وتی کاروان ءَ گوں مُھکمی بِہ دار ئے ءُ روان بِہ کن ئے گُڑا الّم گوں تو بازیں زُبان دوستے ھمراہ بیت ،سر گِپت ءُ ھمراز بیت ءُ گوں تو کیت گوں ، پرچا کہ وھدے آزمان ءَ جمبر بیت گُڑا دُراھیں ترْمپ پہ زمین ءِ کپگ ءَ تُرس اَنت،ھمے ساھت ءَ بِہ چار کہ وھدے اولی ترْمپ بہادُر بیت ءُ وت ءَ ندر کنگ ءَ پہ تیار بیت ءُ دیم پہ زمین ءَ وتءَرا چہ آزمان ءَ یلہ کنت ءُ کیت، پد ءَ ھمے ترْمپ ءِ پُشت ءَ کم کم ءَ دُراھیں ترْمپ ایر کپان بنت ءُ زمین ءَ آپ کن اَنت،اگاں ھمے ترْمپ کہ اول سر ءَ زمین ءَ کپ اَنت ءُ آ دگہ ترْمپ گوں ھمے ترْمپاں ھوار ایر بِہ کپ اَنت گُڑا اے اولی سر ءِ ترْمپانی کپگ مُپت ءَ نہ روت ءُ بیران نہ بنت ، پرچا کہ اولی سر ءِ کہ ترْمپ کپ اَنت زمین ءَ گُڑا اے ترْمپ نپس گیر بنت ءُ مِر اَنت ، پد ءَ ھمے ترْمپانی پُشت ءَ مِیزاں مِیزاں ترْمپ کہ ایر دیان بنت گُڑا گُلزمین آپ بیت ۔

مِھروان ! منی گُشگ ءِ مول ءُ مُراد کہ منی ءُ تئی زُبان ءِ کاروان اوں چو ترْمپانی درور ءَ اِنت،اگاں مرچی من ءُ تو اے زُبان ءِ رکّینگ ءِ راہ ءَ وت ءَ ندر مہ کن ایں گُڑا کس پاد نئیت ءُ ھمے بےتواری ءَ گوں منی ، تئی ءُ سرجمیں راج ءِ زُبان بیگواہ بیت،مرچی کہ تو اے کاروان ءِ مُساپِر بئے گُڑا باند ءَ اے کِشک ترا پجّا کاریت ءُ چو ترْمپانی ڈول ءَ تئی اوں پُشت ءَ سرجمیں ٹولی یے پاد کیت-

مِھروان ! ترا چو بنگال ءِ وڑ ءَ بےکِساس مُھکم بوگی اِنت ترا یات کنت گِندئے وھدے پاکستان ءَ لوٹ اِت کہ بنگالی راج چہ وتی ماتی زُبان ءَ زِبھر بِہ بیت ءُ بنگالی زُبان ءِ بدل ءَ اردو زُبان آوانی ماتی زُبان لیکگ بِہ بیت داں ما دیست کہ بنگالیاں وتی لَکّاں مردُم پہ ھمے زُبان ءِ جُھد ءَ ندر کُت ءُ وتی زُبان پَچ گِپت ءُ چہ پاکستان ءَ جِتا بوت۔۔۔منی گُشگ ءِ مُول ءُ مُراد کہ مِھروان ترا وتی زُبان ءِ لگام چو بنگال ءِ وڑ ءَ تُرْند دارگی اِنت، ترا چو سرمچارے ءِ ڈول ءَ گوں ھاکمیں وھد ءَ گوں مُھکمی ءَ جنگ دارگی اِنت ، ھزاراں ساہ ندر کنگی اِنت بَلے وتی ماتی زُبان ءَ گار بوگ ءِ آماچ نیلگی اِنت،ترا داں ھما وھد ءَ جُنزگی اِنت کہ تئی زُبان چو ھساریں کوہ ءَ بُرز بہ بیت ءُ ھر کسے بِہ زانت کہ بلوچانی یک زُبانے ھست ءُ آئی ءِ نام بلوچی اِنت-

مِھروان ! یکبرے پد ءَ ترا گُش آں کہ منی گار بوگ ءَ ساری وتی ماتی زُبان ءِ ھمُک جیڑہ ءُ جنجال ترا پھمگی انت ، ھمُک تَک ءُ پھنات ترا زانگی انت ،ترا پہ زُبان ءَ یک مُھکمیں ماتے ءِ رنگ ءَ کار کنگی انت۔

چہ ماتوئی چماں اِنّاں — پرچا کہ من ساری ءَ گشگ ءَ ات آں،کہ تئی جِند ءِ زُبان ءِ واھُند دَریں زبانانی دُمب ءَ کپتگ،پرچا کہ آ ھمے پھم کہ بلوچی زُبان ءَ را سِیت ءُ نپ نیست ءُ اگاں آ دَریں زُباناں نبشتہ کناں گُڑا سِیت ءُ نپ اِش مان ،من گُش آں اے سوچیں مردُم دُنیا ءِ مستریں ناواندگ ءُ بےسوادیں مردمانی رِد ءَ ھوار اَنت کہ جِند ءِ زُبان ءِ بِستار ءَ پوہ نہ بنت اے زُبان تھنا تئی زُبان نہ اِنت بلکیں تئی مات اِنت! تو وتی مات ءَ پہ سِیت ءُ نپ چار ئے گُڑا تو چی پیم ءَ یک زندگیں انسانے گُشگ بئے؟ تو کہ وتی مات ءَ پہ سِیت ءُ نپ چار ئے گُڑا تو پرچا زندگ ئے؟-

مِھروان ! من دل ءَ جزماں کہ ھمے مَردُم کہ مرچی دَریں زُبانی پُشت ءَ شوہ ءُ شاھان کنگ ءَ اَنت باندا ھمے مردُم تئی دُمب ءَ کپ اَنت ءُ تئی زُبان ءِ پَٹ ءُ پول ءَ بِندات کن اَنت اگاں تئی جُھد مُھکم بِہ بیت ءُ تو وھد ءَ پہ زُبان ودار بِہ پرما ، وھد ءِ ودار ءَ مبو-

مِھروان ! منی گار بوّگ ءَ رند ترا تئی دل ءِ سرجمیں اِسرار مانِشے ءَ واپینگی اَنت ءُ ایوک ءَ یکیں زُبان ءِ سر ءَ کار کنگی اِنت ،داں ھما وھد ءَ گوں ھاکماں جنگ بِِہ کن کہ تئی ماتی زُبان چہ ھاکماں آجو بِہ بیت ۔
روان اِنت –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ کیچ ءِ بنجاھی شھر تربت ءَ جھانی وبا کرونا وائرس روچ پہ روچ گیش ودان اِنت ءُ بازیں کچے ءَ مھلوک ناوشیں نادراھی ءِ آماچ بیان اَنت –

ڈی ایچ او ڈاکٹر رحیم بلیدھی ءَ رسانکدراں گوں گپ کنان ءَ گوشتگ کہ تربت ءَ کرونا بھارتی ڈولیں ڈیلٹا انیگیں جاوراں ناوش کنان اِنت –

تربت ءَ گوستگیں روچ چار شمبے ءَ کرونا وائرس ءِ یک سد ءُ سَے مردمانی ٹِسٹ کنگ بیتگ اَنت کہ چریشانی تہ ءَ بیست ءُ سَے کس نادراھی ءِ آماچی ءَ زانگ بیتگ اَنت ءُ چریشی ءَ پیسری روچ ءَ کُرتگیں ٹِسٹاں یک سد ءُ سَے مردمانی تہ ءَ بیست ءُ شش کس نادراھی ءِ آماچی ءَ زانگ بیتگ اَنت ءُ کرونا وائرس ءِ ترندی بیست ءُ شش درسد بیتگ –

ڈی ایچ او کیچ ڈاکٹر رحیم بلیدھی ءَ گُشتگ کک ڈبلیو ایچ او ءِ یک ٹیمے تربت ءِ تر ءُ تاب ءَ اتکگ ءُ آیاں نادراھی ءِ آماچ بیتگیں مردمانی نشان زرتگ اَنت ءُ آیاں چار ءُ ٹپاس کرتگ اَنت ءَ اود ءَ بھارتی ڈولیں کرونا ڈیلٹا زانگ بیتگ اَنت –

آئی ءَ گُشتگ کہ کرونا ءِ ڈیلٹا سک بیمناک اِنت ءُ ھمیشی ءَ مھلوک ءَ لوٹ ایت آ وتی پھریز ءَ وت بہ کن اَنت ءُ دپگ بہ بند اَنت ءُ سنیٹائزر کارمرد بہ کن اَنت ءُ وت ءَ زوت ویکسینیشن بہ کنائین اَنت –

کرونا وائرس ءِ دور ءَ بلوچستان باز اسرمند کرتگ ءُ گوادر ءَ ھم بازیں مردمے جھانی وبا ءَ وتی ارجان جتگ اَنت –