TBP Balochi

سندھ ءِ بنجاھی شھر کراچی ءَ بلوچ اسٹوڈنس ایکشن کمیٹی نیمگ ءَ برجم داشتگیں بنجاھی لس مجلس آسر کنگ بوتگ –

دو روچی بنجاھی لس مجلس ءِ گڈی روچ ءَ گل ءِ گچین کاری کنگ بوتگ ءُ بانک صبیحہ بلوچ گل ءِ سرکماش گچین بوتگ –

گیشیں ھالانی رِد ءَ بلوچ اسٹوڈنس ایکشن کمیٹی ءِ دومی بنجاھی لس مجلس بہ نام ءِ پروفیسر رزاق بلوچ، الیاس بلوچ ءُ بنام ءِ فیروز بلوچ سوبمندی گوں آسر بوتگ، لس مجلس ءَ ڈاکٹر صبیحہ بلوچ ابید دیم ءَ اوشتوکی ءَ بلوچ اسٹوڈنس ایکشن کمیٹی بنجاھی سرکماش وھدیکہ آصف بلوچ ابید ءِ دیم ءَ اوشتوکی ءَ بنجاھی جنرل سیکریٹری گچین کنگ بوتگ انت –

گل ءِ بنشون ءِ رِد ءَ نوک گچین بوتگیں کابینہ سوگندی مراگش باندا ملیر ءَ برجم دارگ بیت، کہ اود ءَ گچینی مھمان بلوچ کواس محمد علی تالپور انت –

یات بداریت کہ بلوچ اسٹوڈنس ایکشن کمیٹی ءِ بنجاھی لس مجلس گوستگیں دو روچاں کراچی ءَ برجاہ بیتگ چوشکہ مروچی آسر بوتگ –

بلوچ اسٹوڈنس ایکشن کمیٹی ءِ اولی بنجاھی لس مجلس سال دوھزار ءُ ھژدہ ءَ نومبر ماہ ءَ بوتگ ات کہ بنجاھی سرکماش نواب بلوچ ءُ جنرل سیکریٹری سلمان بلوچ گچین کنگ بوتگ اِت اَنت –

نوک گچین کنگ بوتگیں سرکماش صبیحہ بلوچ گوستگیں دو سال ءَ بنجاھی کمک سرکماشی ءَ وتی پرز ءَ پیلو کنگ ءَ بوتگ – وھدیکہ آصف بلوچ گل ءِ سنٹرل کمیٹی باسک ءِ بوتگ –

نیڈرلینڈ ءَ بلوچ نیشنل مومنٹ نیدرلینڈ ھنکین ءِ نیمگ ءَ بیست ءُ ھپت مارچ ءِ درگت ءَ زھرشانی کنف بیتگ-

زھرشانی ءَ بی این ایم ءِ باسکاں ھوار دگہ مردماں بھر زرتگ ءُ بیست ءُ ھپت مارچ ءِ درگت ءَ پنتاک بھر ءَ بانگ کرتگ –

زھرشانی کنوکاں زورگری ءِ ھلاپ ءَ اوگام جتگ ءُ گوشتگ کہ اے روچ ءَ پاکستان ءَ بلوچستان ءِ سر ءَ زورگری کرتگ ءَ روچ ء مروچی ءَ بلوچ اے روچ ءَ سیاھیں روچے ءِ بستار ءَ زانت ءُ اشی ءِ پروشگ ءَ وتی جھد ءَ ھمک تکاں کنگ ءَ اِنت –

ھمے درگت ءَ بی این ایم نیدرلینڈ ھنکین ءِ سروک کیّا بلوچ ءَ زھرشانی کنوکیں مردمانی میان ءَ تران کنان ءَ گوشتگ کہ ھمے روچ ءَ مئے آجوئی پچگرگ بیتگ ءُ ما گلامی ءِ زنجیراں بند کنگ بیتگ ایں ءُ اے روچ ءَ ما سیاھیں روچے ءِ بستار ءَ سرپد بہ ایں –

آئی ءَ گوشت: بیست ءُ ھپت مارچ ءَ بلوچ سرجمیں دنیا ءَ سیاھیں روچے ءِ رنگ ءَ گیرکار ایت ءُ بلوچ راج ءَ اے روچ ءَ پاکستانی زورگری نہ منّ اِتگ ءُ انگت ءَ نہ منّ ایت –

کیّا بلوچ ءَ گوشت کہ ما دنیا ءَ گوشگ لوٹ ایں کہ پاکستان یک زالم ءُ زوراکیں ریاستے ءُ پاکستان ءَ یک آجوئیں ڈیھے گپتگ ءُ وتی پنجگانی تہ ءَ آؤرتگ ءُ بلوچ اے زوراکی ءِ ھلاپ ءَ ھمک تک ءَ وتی وس ءَ دیمپانی کنگ ءَ اِنت –

آئی ءَ گوشت کہ دنیا ءِ آ دگہ راجانی وڑ ءَ بلوچ ھم لوٹ اَنت یک آجوئیں ڈیھے ءِ وت واک بہ بنت ءُ وتی سرڈگار ءِ پھازگی ءَ وت کن اَنت –

ھمے وڑ ءَ بی این ایم ساؤتھ کوریا ھنکین ءِ نیمگ ءَ ھم بیست ءُ ھپت مارچ ءِ درگت ءَ زھرشانی کنگ بیتگ –

زھرشانی بوسان ءِ شھر ءَ بیتگ کہ اود ءَ زھرشانی کنوکاں بیست ءُ ھپت مارچ ءِ درگت ءَ بینرز دستاں بیتگ اَنت ءُ آیانی سر ءَ بلوچستان ءِ سر ءَ پاکستان ءِ زورگری ءِ بارہ ءَ نبشتگ بیتگ اَنت ءُ زھرشانی کنوکاں اوگام جتگ ءَ آجوئی ءِ لوٹ کرتگ –

ھمے وڑ ءَ بلوچ نیشنل مومنٹ ءِ نیمگ ءَ چاگردی رسانکجاھاں یک ویبینارے بندات بیتگ، ویبینار ءَ بلوچ نیشنل مومنٹ ءِ ڈاکٹر نسیم بلوچ، ھکیم واڈیلہ بلوچ، ظفر بلوچ، دلمراد بلوچ ءَ بلوچ کواس ءُ زبانزانت ڈاکٹر ناگمان بلوچ ھوار بیتگ اَنت –

ویبینار ءَ بلوچ راجداپتر ءُ بلوچستان ءِ بارہ ءَ گپ ءُ تران بیتگ اَنت –

سربوتگیں ھالانی رِد ءَ بلوچستان ءِ دمگ ڈیرہ مراد جمالی ءُ ھزدار ءَ تیرگواری وئیلاں یک مردمے بیران یکے ٹپی، ھرنائی ءُ بولان ءَ دگ ءِ وئیلاں یکے بیران ءُ چُک ءُ زالبولاں ھوار ھشت ٹپی بوتگ اَنت –

گیشیں ھالانی رِد ءَ تمبو ڈیرہ مرادجمالی ءِ نزیک ءَ سلاہ بندیں مردمانی تیرگْواری ءَ یک مردمے بیران ءُ یکے ٹپی بوتگ، پولیس ءَ میار بار ٹپی جاوراں دزگیر کُتگ-

پولیس ءِ رد ءَ ڈیرہ مرادجمالی ءِ نزیک ءَ گوٹھ شمس دین ءَ اکتر علی نامیں مردمے ءَ کسانیں گپے ءِ سر ءَ تیرگْواری کُتگ ءُ جاگڑ خان جکرانی ءُ ظفراللہ ٹپی کُتگ ءُ تتکگ انت –

پولیس ٹپی بوتگیں مردماں پہ درمان کنگ ءَ نادراھجاہ ءَ برگ ءَ بیتگ کہ نیمراہ ءَ جاگڑ خان جکرانی ءَ درد نہ سَگ اِتگ اَنت ءُ بیران بوتگ-

پولیس ءَ ڈوھی اکتر علی ھم ٹپی ئیں جاوراں دزگیر کُتگ-

ھمے وڑ بلوچستان ءِ دمگ ھزدار وڈھ بازار ءَ ناشناسیں سلاہ بندیں مردماں حاجی شیر محمد ءِ میڈیکل اسٹور ءَ تیر گواری کُتگ –

تیرگواری ءَ ھچ وڑیں تاوان نہ بوتگ ءُ وڈھ پولیس ءَ وت ءَ وئیل جاہ ءَ سرکتگ اے درگت ءَ پٹ ءُ پول برجاہ انت –

دومی نیمگ ءَ بلوچستان ءِ دمگ ھرنائی زرگوگر ءَ ٹکٹر ءِ ٹالی ءِ چپی بوگ ءَ یک مردمے بیران بوتگ، وھدیکہ چُک ءُ زالبولاں ھوار شش مردم ٹپی بوتگ اَنت – لاش ءُ ٹپی بوتگیں مردم نادراھجاہ ءَ سرکنگ بوتگ اَنت-

اژدری چار ءُ ٹپاس ءَ پد لاش کھول ءِ دست ءَ دیگ بوتگ – وھدیکہ ٹپی بوتگیں مردم پہ گیشیں درمان کنگ ءَ شال ءَ راہ دیگ بوتگ اَنت-

ھمے وڑ بلوچستان ءِ دمگ بولان مچھ ءَ دگ ءِ وئیل ءَ دو مردم ٹپی –

وئیل موٹر سیکل ءُ گاڑی ءِ ڈیک ورگ ءِ سوب ءَ بوتگ چریشی ءَ نثار احمد ءُ فیاض احمد ٹپی بوتگ انت –

بلوچستان ءَ ھمک روچ دگ ءِ وئیلانی ھال آیگ ءَ اَنت ءُ چریشی ءَ لس مردمانی بیرانی ءُ زدگی ھال یکشل ءَ پیداک اَنت بلوچستان ءَ سیاسی مردمانی گوشگ اِنت کہ سرکار دگانی جوڑ کنگ ءَ بے سوب اِنت ءُ چریشی ءَ ھزارانی کچ ءَ مھلوک چہ وتی زند ءَ زبھر بیگ ءَ اَنت –

بلوچ گار نہ اَنت بلکیں پاکستانی پوج ءُ چیریں ادارھاں بندیگ کُرتگ انت کہ آ ھچ وڑ ءَ ناشرکار نہ انت – ماما قدیر بلوچ

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ دوسد ءُ شست ءُ چار روچ سرجم بوتگ – بلوچستان نیشنل پاٹی ءِ رھشون حاجی لشکری رئیسانی، بی ایس او ءِ سرکماش جھانگیر منظور ءَ وتی کابینہ ءِ ھمراھی ءُ وھدیکہ بلوچ پیپلز کانگریس ءِ صوبائی سرکماش ڈاکٹر عبدالحکیم لہڑی ءَ بنجل ءِ تر ءُ تاب کرتگ بیگواھیں مردمانی کھولانی گوم ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ گوشتگ کہ بلوچستان ءِ تہ ءَ بید سلاہ بستگیں ءُ بزگریں لس مھلوک، نودربر، راجداریں باسکانی ھمراھی ءَ راجداریں گلانی رھشون ھم نشانگ کنگ بوگ ءَ انت –

آئی ءَ گوشتگ کہ پاکستان ءِ درسیں ادارہ رسانکدر بہ بنت، آمیدگس یا پارلمنٹ دُرست اے زورگیر ءُ چیریں ادارھاں گوں ھوار انت کہ آھاں بلوچ راج سرجمی ءَ یک دژمنی ءِ بستار ءَ زاھر کُتگ –

ماما قدیر بلوچ ءَ گوشتگ کہ پاکستانی پارلمنٹ ءُ ادارہ عالمی برادری ءُ گلاں اے مپت ناھکیں زورانسری آوارجنی ءُ بلوچ پُرایمنیں جُھدے بگیری ءَ گمراہ کنگ انت – ھزارانی کچ ءَ بلوچ پاکستانی چیریں ادارھانی زنداناں بندیگ انت ءُ ازیت سگگ انت، پاکستانی پوج دنیا ءِ دیم ءَ وتی کتکاریانی چیر دیگے ھاتر ءَ وڑ وڑیں پندل ءُ ھنر کنگ انت –

آئی ءَ گوشتگ کہ راستی ھمیش انت کہ بلوچ گار نہ انت بلکیں پاکستانی پوج ءُ چیریں ادارھانی بندیگ انت کہ آ ھچ وڑ ءَ ناشرکار نہ انت –

بلوچستان ءِ بنجاھی شھر شال ءَ پریس کلب ءِ دیم ءَ کبیر بلوچ، مشتاق بلوچ ءُ عطاء اللہ بلوچ ءِ بیگواھی ءِ ھلاپ ءَ شمبے ءِ روچ ءَ یک زھرشانی ءِ بیتگ –

زھرشانی کنوکانی دستاں پلے کارڈز ءُ بینرز بیتگ اَنت کہ بیگواھیں مردمانی یل کنگ ءِ لوٹ اش کرتگ –

زھرشانی ءَ زالبول ءُ چکاں ھوار دگہ پھناتانی مردمان ھوار بیگواھیں مردمانی کھولاں ھوار ڈاکٹر عبدالحکیم لھڑی، طاھر خان ھزار، وائس فار بلوچ مسنگ پرسنز ءِ سرکماش نسر اللہ بلوچ، ماما قدیر بلوچ، بی ایس او ءِ سروک منظور جھانگیر، جمعیت ءِ باسک بلوچستان اسمبلی ایم پی اے زاھد ریکی، ایم پی اے سناء بلوچ، اھمد نواز بلوچ، شکیلہ نوید دھوار، میڈم شمائلہ اسمائیلءُ دگہ مردماں بھر زرتگ –

ھمے وھد ءَ بھرزیروکاں تران کنان ءَ گوشتگ کہ بلوچستان ءَ بیگواھیں مردمانی جیڑہ سنگین بیان اِنت ءُ درچ یکشل ءَ برجاہ اَنت-

آیاں گوشت کہ سرکار پوج ءِ دیم ءَ بے وس ءُ لاچار اَنت بلوچستان ءَ تاکت ءِ کارمرد کنگ ریاست ءِ واستا پائدگ مند نہ اِنت -آیاں گوشت سالانی سال بیگواھیں بلوچ سیاسی باسکانی کھولاں انساپ دیگ بہ بیت –

کبیر بلوچ، مشتاق ءُ عطاء اللہ ءِ کھولاں گوشت: مروچی دوازدہ سال ءِ دراجیں وھدے ءِ گوستگ بلے تنی وھدی آ بیگواہ اَنت، اے ھرسئیں بیست ءُ ھپت مارچ دوھزار ءُ نُھ ءَ سیشن کورٹ ھزدار ءِ دیم ءَ آوار جنگ بیتگ اَنت –

کبیر، مشتاق ءُ عطاء اللہ ءِ زورانسری آوار جنی ءِ ھلاپ ءَ آمیدگس، سرکاری کمیشن ءُ دگہ کانونانی وڑ ءُ پیم کاربندگ ءَ ابید زھرشانیانی دراھیں وڑ کارمرد کرتگ اَنت بلے چریشاں ابید ھم اے یلہ نہ بیتگ اَنت ءُ نانکہ کسے ءَ اشانی بارہ ءَ کھولاں سرپدی دیگ بیتگ –

زورانسری مردماں آوار جنگ ءُ سالانی سال بیگواہ کنگ انسانیت ءِ ھلاپ ءَ سنگینیں جرمے ءَ ھوار اِنت – انسانی ھکانی گل ءُ زمہ داریں مردم ات ناانساپی ءُ انسانی ھکانی سنگینیں ھلاپ ورزی ءَ گامگیج بہ زور اَنت –

کھولاں گوشت کہ میان اُستانی انسانی ھکانی ادارھاں گوں کبیر بلوچ، مشتاق بلوچ ءُ عطاء اللہ بلوچ ءِ یلہ کنائینگ ءَ کرد ءِ پیلو کنگ ءِ دزبندی ءَ کن ایں ءُ کھولاں سالانی سال اے دردناکیں وئیل ءَ سگگ ءَ اَنت –

بلوچستان لبریشن فرنٹ ءِ جارکش میجر گوھرام بلوچ ءَ رسانکدراں شنگ کرتگیں بیان ءِ تہ ءَ گوشتگ کہ کیچ ءِ دمگ دشت بلنگور ءَ زونگ کمپنی ءِ موبائل ٹاور ءِ مشینری سرمچاراں مانداشتگ اَنت –

آئی ءَ گوشتگ کہ سی پیک ءِ کش ءُ گوراں موبائل ٹاور ءِ دامگ چیر کرتگ ءُ زورگریں پاکستانی پوج وتی دمگی چریکانی زور ءَ سرمچارانی سر ءُ پراں ھوار اے دگ ءِ مھکم کنگ ءَ چین ءَ کمک گرگ ءُ موبائل فون ٹاور جنگ اِنت –

آئی ءَ گوشت کہ اے وڑیں سامراجی شَوربندیاں سرجم بیگ ءَ نیل اِنت ھما کہ بلوچ راجی آجوئی ءِ بگیری ءَ اِنت –

دستونک

شائر: سلیم ناز

دی بلوچستان پوسٹ

توکَلاں زیر ءُ سَلاهاں سر بگر
پہ وتی ڈیھ ءِ تَلاهاں سر بگر

تو بلوچے ئے پہ تو شپ سنگر اِنت
گوں همے جن ءُ بلاهاں سر بگر

چُش مہ بیت دنیا پد ءَ تژنے بہ جنت
آجویی ءُ جُنز ءِ راهاں سر بگر

گوْنڈلیں تیراں کہ پیوند سینگ ءَ
دژمنانی بِل گلاهاں سر بگر

ماتکوهاں پهر ءُ شان اِنت همبلاں
سوچ چُشیں ماڑی ءُ جاهاں سربگر

بیا کنیں جنگ ءِ پڑ ءَ من تو کساس
جون تلام اَنت بِل کُلاهاں سربگر

مارا مات ءَ گوانزگ ءَ گُشتگ سلیم
یل بدے اِستال ءُ ماهاں سربگر

پنجگور ءِ دمگ وشبود ءِ جھمنندیں مردماں مروچی پریس کانفرنس کنان ءَ گوشت کہ مئے زمینانی سر ءَ زورانسری پچگرگ ءُ برگ ءَ اَنت –

پنجگور وشبود ءِ جھمنندیں ھاجی عبدالرازق، عرض مھمد، مھمد عظیم، ھاجی لال بکش، ھاجی رھمت اللہ ءُ دگہ مردماں پریس کانفرنس کنان ءَ وشبود مئے بن پیروکی ھنکین اِنت ءُ اد ءَ بُن پیروک کاریزکاری کنگ ءَ بیتگ اَنت بلے نِی نوکیں زوراکاں جَھ جتگ ءُ مئے زمینانی سر ءَ زورگری کنگ ءَ اَنت –

آیاں گوشت کہ اے زمین نوزدہ سد ءُ ھشتاد ءُ پنچ ءَ مارا گون اَنت ءُ ھما روچ ءَ بہ گر داں انیگ ءَ کس ءَ چوشیں زمینانی وارسی ءِ گپ نہ جتگ ءُ ناکہ کسے ءَ زمینانی زورگری ءِ گپ جتگ –

آیاں گوشت کہ لھتے سال اِنت ناسر نامیں مردمے مئے زمینانی سر ءَ زوردستی کنگ ءَ اِنت ءُ ھمے مرد ءَ دوزھزار ءُ ھژدہ ءَ مئے کھنانی سر ءَ زوردستی کنگ ءِ جھد کرتگ کہ ھما وھد ءَ پنجگور ءِ جاور ناوش بیتگ اَنت –

آیاں گوشت کہ اے زمینانی دراھیں کاگذ ایر اَنت ءُ دراھیں منّانک ھست کہ ھما زمینانی کبز ءُ دگہ چیز مئے گور ءَ ھست اَنت دگہ کسے ءِ گور ءَ نیست اَنت بلے اے مرد زمینانی سر ءَ زوردستی کنگ لوٹ ایت –

آیاں گوشت: ناسر ءَ اے زمیناں گوں ھچ ھک نیست بلے زوردستے آیاں گوشت کہ ھما زمین ما کبرستان ءِ واستا آئی ءَ مارا ھچ دست جنی نیست اِنت آیاں گوشت کہ اے جیڑہ ءَ میر اسد اللہ ءُ پنجگور ءِ مزنیں عالم دین گشین اَنت –

آیاں گوشت کہ ما وتی ھکانی واستا پھریزگی ءِ ھک ءَ داریں ءُ ھرچ ھساب ءَ ما وتی زمیناں کس ءَ دات نہ کن ایں ءُ گڈی ساہ ءَ داں وتی زمینانی زوردستی ءَ کس ءَ نیل ایں –

آیاں گوشت کہ بگیر داروکیں ٹولی ءِ گور ءَ اے زمین ءِ ھچ منّانک نیست اِنت اگاں آیانی گور ءَ منّانک ھست گڑا باید پیش اِش بہ کنت ئِے ءُ ما شریعت ءِ واستا تیار اِنت ءُ ما پر ایمنیں شھری اِنت ءُ کانون ءِ دراھیں رھبندانی پاسداری ما پیسر ءَ کرتگ اَنت ءأ کانون ءِ دراھیں چیزے مئے گور ءَ جاڑیگ اَنت –

آیاں گوشت کہ اگاں کانون ءَ زمین ءَ زبھر کُت گڑا مارا ھچ اتراز نیست اِنت اے کھنانی زمینانی درستیں بھردار چِل ءُ چار اَنت ءُ ابید ءِ شریعت ءَ ما اے زمیناں کسے ءَ دات نہ کن ایں –

آیاں گوشت: اے زمین ما کازی ءِ کورٹ ءَ کَٹ اِتگ اَنت ءُ سال دوھزار ءُ نُھ ءَ مھمد امین نامیں مردمے ءَ کازی ءِ کورٹ ءَ کیس بیتگ ءُ اے زمین ما کَٹ اِتگ اَنت ءُ مھمد امین اے زمینانی بارہ ءَ کازی ءِ کوٹ ءَ پارگ کرتگ اَنت –

آیاں گوشت کہ ما بلوچی دیوان ءُ مجلساں وتی زمینانی وتیگ کنگ ءِ ھک ءَ داریں ما پُر ایمنیں شھری اِنت ءُ دگرانی زمینانی سر ءَ زوردستی کنگ ءِ دلگوش ءَ ھم گور نہ کن ایں ءُ ما وتی بن پیروکی زمینانی زبھر بیت نہ کن ایں ءُ ما کانون ءِ دراھیں راہ ءُ دراں گیش اِتگ ءُ کازی کورٹ ءَ مئے ھک ءَ پیسلہ کرتگ ءُ اے زمین مئے بیتگ اَنت ءَ نِی دگہ نوکیں ٹولی ءِ دراتکگ ءَ مئے زمینانی زورگری ءَ لوٹ اَنت –

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ دو سد ءُ شست ءُ سَے روچ سرجم بوتگ –
بلوچستان نیشنل پاٹی ءُ بی ایس او ءِ رھشون ءُ باسکاں بنجل ءِ تر ءُ تاب کتگ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ گوشتگ کہ بلوچ چاگرد ءِ تہ ءَ زالبولانی سک باز شرپ بکشگ بیت – بلوچ چاگرد ءِ تہ ءَ آھاں شیرزال ءِ پنام دیگ بیت، مارا وتی راجی راجدپترے تہ ءَ چشیں بازیں درورے دست کپیت کہ آھاں وتی راجی کرد پیلو کرتگ –

آئی ءَ گوشتگ کہ وھدیکہ یک راجے دگہ راجے ءِ یا ملک ءِ ایردست بیت گڑا زوراکیں راج ءِ ھمے جھد بیت کہ آ ایردست کتگیں راج ءَ ھمے اھساس ءَ ھلاس کنت کہ آ گلام انت – زورگیر ھمے مول مرادانی ھاتر ءَ بازیں پندلے سازیت آ سرجمیں راج ءِ سر ءَ زلم زوراکی کُشت کوش ءِ ترس ءِ ودی کنت –

ماما قدیر بلوچ ءَ گوشتگ کہ زورگریں پاکستان کجام وڑ ءَ وتی زلم ءُ زوراکی ءُ کتکاریاں چیر دنت کہ آئی ءَ بلوچ ءِ سر ءَ کتگ انت – اے راستی ءِ کہ بلوچ وتی سرڈگارے سر ءَ ایردستی ءِ بگیری ءَ جھد کنگ ءَ انت بلے اے جھد انسانی آجوئی ھاتر ءَ کانود ءُ رھبندانی متابک ءَ کنگ بوگ ءَ اِنت-