TBP Balochi

شال: بلوچ اسٹوڈنٹس آرگنائزیشن ءِ بنجاھی نیاد ءَ سوگندی دیوان ءَ نوک گچین بوتگیں سروک جھانگیر منظور بلوچ ءِ سروکی ءَ بولان میڈیکل کالج ءَ برجم دارگ بیتگ –

نیاد ءَ گچینی ءِ مھمان بی ایس او ءِ گوستگیں سیکرٹری جنرل ءُ بلوچستان نیشنل پاٹی ءِ بنجاھی پتر ءِ باسک ثناء بلوچ بیتگ –

نیاد ءَ نوک گچین بیتگیں کابینہ ءُ بنجاھی پتر ءِ باسکاں گوستگیں چیئرمین چہ نزیر بلوچ ءَ سوگند زرتگ – نیاد ءَ بی ایس او ءِ باسک ءُ جتا جتائیں گلاں بندوکیں نودربر ءُ بی این پی ءِ رھشوناں بھر زرتگ –

نیاد ءَ سوگندی مراگش ءَ تران کنان ءَ بی ایس او ءِ چیئرمین جھانگیر منظور، ایم پی اے ثناء بلوچ، بناھی وائس چیئرمین اشرف بلوچ، بنجاھی سیکرٹری جنرل عظیم بلوچ، گوستگیں چیئرمین بی ایس او واحد بلوچ، گوستگیں چیئرمین نزیر بلوچ ءُ دگہ مردماں تران کرتگ –

تران کنوکاں گوشت کہ مئے جد ءُ جھد ورنایانی تہ ءَ زانت ءُ سرپدی ءِ دیگ ءُ آیاں راجداری ءِ نیمگ ءَ مھکم کنگ اِنت –

آیاں گوشت کہ بلوچ ورنایانی دیم ءَ دیوال بندگ ءُ وانگ ءِ درچاں آیاں گستہ کنگ ءَ جتاجتائیں زوردست چِست اَنت- بلے ورنایاں اے جاوراں ابید ھم اے جاور لگت دیگ ءُ راجداری ءِ تک دارگی اَنت –

آیاں گوشت کہ نوکیں دور ءِ راہ ءُ رھبنداں سرپد بیگ ءُ مارا زانت ءُ زانشت ءَ گوں وتی ھکانی پدجنی ءَ جنگ کنگی اِنت، مروچی بلوچستان ءَ ھوار دنیا ءِ راجداری ءِ تک بدل بیتگ اَنت –

آیاں گوشت کہ مارا ھمے بدلی ءِ دامب دارگ ءُ وت ءَ دیم ءَ جنزان بیگی اِنت ءُ وتی اندر ءَ یک مھکمیں پگر ءُ لیکھے جوڑینگی اِنت -زندگیں راج ھروھد ءَ بدلیانی دیمپانیاں کن اَنت ءَ کوھنیں دوداں درکپگ ءُ نوکیں دور ءِ ھمراھی ءَ جنزگ لوٹ ایت –

آیاں گوشت کہ ھما راج ءَ زانشتی، راجداری ءُ زرکاری ءِ نوکیں دور ءِ بدلی نہ منّ اِت اَنت گڑا آ راج سک جھلی آماچ بیت اِنت – بی ایس او بلوچستان ءَ ھوار دمگ ءِ راجداری ءِ تہ ءَ یک مزنیں کردے ءِ واھند اِنت –

آیاں گوشت کہ ورنایاں وتی سر ءَ اھد کنگی اِنت کہ وتی پدریچ ءِ واستا شپ ءُ روچ جد ءُ جھد کن ایں دنیا ءِ سوبندی ءِ تک اوپاری ءُ جوانیں گامگیجانی سر ءَ بیتگ اَنت –

آیاں گوشت کہ بلوچ نودربر راجداری ءَ ھروھد ءَ بے سریں سنچاں تاوان رس اِتگ کہ ایشی ءِ تاوان ءَ نِی بلوچ راج کنگ ءَ اِنت –

آیاں گوشت کہ نی وھد ھمیش اِنت بلوچ نودربر گلاں وتی تہ ءَ تپاکی ءُ ھمسنتی ودی کنگی اِنت ءُ جامعہ راجداری ءِ گامگیج ءِ زور ءَ اے راج ءِ ھلاپ ءَ ھرچ پندلے مہ سازگ بیتگ آ پروش دیگ بہ بنت، پرچاکہ بلوچ راجی جنز نِی گیش اڑ ءُ جنجالانی دیمپان بوت نہ کنت – راجداری ءِ گلانی واستا سسا زانتیں باسک آیانی روہ ءُ چیراگ ءِ کرد ءَ پیلو کن اَنت –

آیاں گوشت مہ گیر سیاسی رویش ءُ پلانٹڈ سیاست ءِ راہ ءِ دارگ ءِ واستا مارا وتی ردی منّگ لوٹ اَنت ءُ سیاسی گیش ءُ گیواری ءِ نیمگ ءَ روگی اِنت –

آیاں گوشت کہ بی ایس او شھیدانی گل اِنت کہ آئی ءِ بنھُنڈال ءِ سبزگ ءَ بلوچ سرڈگار ءِ بچاں وتی جان ببا داتگ اَنت –

آیاں گوشت کہ نِی دنیا ءِ تہ ءَ درستاں زورامندیں راج آ نہ اِنت کہ آئی ءِ گور ءَ ایٹمی زور اِنت بلکیں نِی زورامند ھما اِنت کہ آئی ءِ گور ءَ اِلم ءُ سرپدی ءُ نوکیں دور ءِ ٹیکنالوجی اِنت مارا وتی راجداری ءِ گامگیج جوان ءُ مھکمیں رنگے ءَ وتی جد ءُ جھد دیم ءَ جنزینگی اِنت –

ڈنک ءَ بلوچ زالبول ملکناز ءِ کوش ءُ کسانوکیں برمش ءِ ٹپی کنوکانی سروک ءِ مروچی یل بوگ اے ملک ءِ نزام ءُناھکی ءَ پدر کنت- ماما قدیر

بلوچستان ءِ بنجاھی شھر شال ءَ پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ دوسد ءُ ھپتاد ءُ ھپت روچ سرجم بوتگ- سول سوسائٹی ءَ گوں سیادی داروکیں مردماں بنجل ءِ تر ءُ تاب کُتگ ءُ بیگواھیں مردمانی کھولانی گوم ءَ دلپدردی درشان اتگ –

بیگواھیں راشد حسین ءِ مات ءَ بُنجل ءَ اتکگ ءُ وتی زھر شانی نبشتہ کنائینتگ – آئی ءِ کھول ءِ گوشگ انت کہ راشد حسین متحدہ عرب امارات ءَ ھمودے چیریں ادارھاں زورانسری آوار جتگ ءُ بیگواہ کتگ پد ءَ شش ماہ ءَ پد پاکستان ءِ ھوالگ ءَ کُتگ –

راشد حسین بلوچ ءِ مات مروچی سپریم کورٹ ءَ وتی چُک یل کنائینگے درگت ءَ پیش بوتگ –

وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردماں گوں باوست کنان ءَ گوشتگ کہ بلوچ پرزندانی دیمونیانی بدولت ءَ بلوچ راج ءَ دنیا ءِ تہ ءَ وتی پجار ایردستیں ریاست ءِ منارینگ ءَ سوبین بوتگ اَنت –

آئی ءَ گوشتگ کہ ھمک روچ لس مھلوک ءِ سر ءَ بمبگواری، لوگاں سوچگ، راجے یکجاھی ءَ چکچینی ءَ زورگیریں ریاست وتی زورگیری ءِ گڈی روچ ءَ داں بند کنت –

ماما قدیر بلوچ ءَ گوشگ ات کہ ایردستیں بلوچستان ءِ تہ ءَ مردمانی زورانسری آوار جنگ بیگواہ کنگ ءُ پد ءَ رند ءَ آھانی زانگولیں جونانی دست کپگ یک بلاھیں انسانی دردناکیں وئیلے – دومی نیمگ ءَ ھکومت ءِ چیردستی ءَ ڈیت اسکواڈ بلوچ ورنایاں ھوار زالبول، پیر ءُ کسانیں چکانی کوش ءِ اجازت دیگ بیمناک انت –

ماما قدیر بلوچ ءَ گوشتگ کہ گوستگیں سال ءَ ڈنک ءَ بلوچ زالبول ملک ناز ھمے ڈیتھ اسکواڈ کارندھاں کُشتگ ءُ کسانوکیں برمش ٹپی کُتگ بلے اے وئیل ءِ کتکارانی سروک ءِ مروچی یل بوگ ادے نزام ءُ ناھکیاں پدر کنت-

سربیتگیں ھالانی رد ءَ روکپتی بلوچستان ءِ دمگ پھرہ ءَ یک زالبولے ءَ زھر وارتگ ءُ وتکُشی کرتگ –

گیشیں ھالانی رد ءَ وئیل لوگی جیڑھے ءِ سر ءَ پیش اتکگ کہ زالبول ءَ زھر وارتگ ءُ وتکُشی کرتگ –

اھوالکار ءِ رد ءَ زالبول ءَ کسان سالیں زھگ ھم ھست اِنت کہ گوستگیں دو ماہ ءَ پیسر آئی ءِ لوگ واجہ ءَ آئی ءِ سون داتگ اَنت ءُ گشینتگ –

وئیل ءَ دمگ ءِ اتزامیہ ءَ جون چِست کرتگ ءُ نادراہ جاہ ءَ سر کرتگ ءُ اود ءَ اژدری چار ءُ ٹپاس ءَ جون کھول ءِ گور ءَ رسینگ بیتگ –

ھمے وڑ ءَ گوستگیں روچ ءَ روکپتی بلوچستان ءَ گاڑی ءُ پرپٹے ءِ ٹکر وارگ ءَ چریشی ءَ یک ورنایے بیران بیتگ –

وئیل روکپتی بلوچستان ءِ دمگ پُلان دو راھی ءَ پیش اتکگ – بیران بیتگیں ورنا ءِ پجار کسان سالیں میلاد ء ملا ولید جھمنند دشتیاری ءِ نام ءَ زانگ بیتگ –

وئیل گوستگیں بیگاہ ءِ وھد ءَ پیش اتکگ کہ اود ءَ گاڑی ءُ پرپٹے ءَ ٹکر وارتگ –

دمگ ءَ ھواریں چاگردی مردمانی گوشگ اِنت اے دگانی ھمک روچ بازیں کَچے ءَ وئیل پیش آیگ ءَ اَنت کہ سال ءِ تہ ءَ بازیں کچے ءَ مردمانی زندمان زوال بیگ ءَ اَنت –

دمگی مردماں گوشت کہ سرکار بیوکیں وئیلانی گر ءُ دار کنگ ءَ یکدم واب اِنت کہ چریشی ءَ ھزارانی ازمکار ءُ ھمک تکاں بندوکیں مردم دگانی سر ءَ بیوکیں وئیلاں بیران ءُ زدگ بیگ ءَ اَنت –

گوستگیں سال ءَ بازیں کَچے ءَ بندیگیں مردم ایرانی سرکار ءَ پاھو داتگ اَنت بلوچ کمپین فعالین

سر بیتگیں ھالانی رد ءَ روکپتی بلوچستان ءِ ھند سبزوار ءَ ایرانی آمید گس ءِ پرمان ءَ یک بندیگیں بلوچے پاھو دیگ بیتگ –

پاھو دیگ بیتگیں مردم ءِ پجار ہاس دریایے ناروی ء خواستی جھمنند دزاپ ءِ نام ءَ زانگ بیتگ –

اھوالکار ءِ رد ءَ یاسر یک سالے ءَ پیش گرگ بیتگ ءُ سبزوار ءِ زندان ءَ برگ بیتگ، یاسر ءِ سر ءَ بھتام کہ آئی ءَ نشہ باپاری کرتگ چریشی ءَ ایرانی آمیدگس ءَ پاھو داتگ اَنت –

اھوالکار ءِ رد ءَ گوستگیں روچ ءَ یاسر ءِ کھول ھم سبزوار ءَ توار جنگ بیتگ اَنت کہ وتی مردم ءِ گڈی دیدار ءَ بہ کن اَنت بلے آئی ءِ کھول سر نہ بیتگ ءُ پیسر ءَ یاسر پاھو دیگ –

ھمے وڑ بلوچ کمپین فعالین ءِ گوشگ اِنت ایرانی سالدر ءِ رد ءَ گوستگیں سال ءَ شانزدہ مردم پاھو دیگ بیتگ اَنت ءُ دگہ شش کسانی پاھو نامہ ایرانی آمیدگس ءَ جار جتگ اَنت –

بلوچ کمپین فعالین ءِ گوشگ اِنت کہ اے شانزدھیں مردمانی تہ ءَ سَے کسانی ست ءَ ھمے بھتام بیتگ کہ آیاں ایرانی لشکر ءِ کوشاں دزمانجنی بیتگ، دو کسانی سر ءَ ھمے بھتام بیتگ کہ ناشرکاریں گلاں ھوار بیتگ اَنت، اشانی تہ ءَ ھشت کس نشہ باپاری ءِ بھتام ءَ پاھو دیگ بیتگ اَنت ءُ یکے ءِ بارہ ءَ سرپدی نہ بیتگ –

سربوتگیں ھالانی رد ءَ بلوچستان ءِ دمگ چاگی ءُ مستونگ ءَ دگ ءِ وئیلاں دو مردم بیران، توبہ اچکزئی ءَ ٹریکٹر ءِ چپی بوگ ءَ دو مردم بیران، پشین ءُ وڈھ ءَ تیرگواری دو مردم بیران وھدیکہ کیچ تربت ءَ ورناھے ءَ وتکشی کُتگ –

گیشیں ھالانی رِد ءَ بلوچستان ءِ دمگ چاگی ءَ دگ ءِ وئیل ءَ یک مردمے بیران بوتگ –

وئیل چاگی ءِ دمگ پوستی دگ ءِ سر ءَ دیم ءَ اتکگ کہ پیک اپ گاڑی ءِ تیز رؤگ ءِ سوب ءَ گاڑی چپی بوتگ، چپی بوگ ءِ سوب ءَ طاہر نامیں مردمے بیران بوتگ –

بیران بوتگیں مردم ءِ جون دست گرگ بوتگ دمگی نادراھجاہ ءَ سر کنگ بوتگ اود ءَ اژدری چار ءُ ٹپاس ءَ پد لاش کھول ءِ ھوالگ ءَ کنگ بوتگ –

ھمے وڑ بلوچستان ءِ دمگ مستونگ ءَ وین گاڑی ءِ ڈیکر کنگ ءَ یک مردمے بیران بوتگ –

ایدھی بنشون ءِ رِد ءَ مستونگ ءَ وین گاڑی ءِ ڈیکر کنگ ءَ شیر احمد ء آزاد خان بیران بوتگ – اژدری چار ءُ ٹپاس ءَ پد لاش کھول ءِ ھوالگ ءَ کنگ بوتگ –
توبہ اچکزئی ٹریکٹر ءِ چپی بوگ ءَ دومردم بیران بوتگ اَنت –

بیران بوتگیں مردمانی پجار محمد داؤد خچوزی ءُ محمد اسلم طورزی ءِ ناماں بوتگ اَنت –

دومی نیمگ ءَ بلوچستان ءِ دمگ پشین ءَ پٹرول پمپ ءَ دُزانی تیرگواری ءَ ورنایے بیران بوتگ –

ھالانی رِد ءَ پشین ءَ یارو شھدگ ءِ سر ءَ برجاھیں پٹرول پمپ ءَ دزانی تیرگواری ءَ ورنایے بیران بوتگ –

بیران بوتگیں ورنا ءِ پجار بلال احمد جھمنند فیض آباد ءِ نام ءَ چہ بوتگ – ورنا بلوچستان شھدربر جاھے گوستگیں کنٹرولر محمد شریف کاکڑ ءِ برات زتک انت –

وڈھ ءَ تیرگواری ءِ وئیل ءَ ٹپی بوتگیں ڈرائیور بیران بوتگ –

ھالانی رِد ءَ وڈھ ءِ دمگ ساروانہ ٹوکن ءَ ناشناسیں مردماں ٹرکے ءِ سر ءَ تیرگواری کُتگ، تیرگواری ءِ سوب ءَ ٹرک ڈرائیور پی بوتگ، ٹرک چپی بوتگ –

ٹرک ڈرئیور ءِ پجار محمد طاھر لہڑی ءِ نام ءَ بوتگ، ٹپی بوگ ءَ پد آئی ءَ ٹپانی درد نہ سگتگ ءُ بیران بوتگ – دگہ وئیلے کیچ ءِ دمگ تربت ءَ دیم ءَ اتکگ کہ ورناھے ءَ وتکشی کُتگ –

اھوالکار ءِ رِد ءَ تربت ءِ دمگ آپسر کنر وارڈ ءِ جھمنند معراج ء نصیر احمد ءَ زھر وارتگ ءُ وتکشی کُتگ –

دگہ وئیلے کیچ ءِ دمگ بلیدہ ءَ دیم ءَ اتکگ کہ آس لگگ ءِ سوب ءَ دو دکان ستکگ ھچ وڑیں جانی تاوان نہ بوتگ –

ھالانی رِد ءَ گوستگیں روچ ءَ کیچ ءِ دمگ بلیدہ ءَ سلو میتگ ءَ آس لگگ ءِ سوب ءَ عیسی ء عطا محمد ءِ آٹوز ءُ پٹرول دکان ستکگ انت –

آس لگگ ءِ سوب ءَ دکان ءِ پٹرولاں ھوار سَے پرپٹ ءُ آٹوز ءِ سامان ءُ ستکگ ءُ پُر بوتگ اَنت ھچ وڑیں جانی تاوان نہ بوتگ –

سر بیتگیں ھالانی رد ءَ بلوچستان ءِ دمگ کوھلو ءَ پاکستانی پوج ءَ بازیں کچے ءَ لشکر کشی بندات کرتگ ءُ دو کس دزگیر کنگ ءَ پد بیگواہ کرتگ اَنت -.

گیشیں ھالانی رد ءَ کوھستان مری ءِ بازیں جاھاں پوجی لشکر کشی بندات کنگ بیتگ اَنت ھمے میان ءَ دو کسانی دزگیری ءُ بیگواہ بیگ ءِ ھال اِنت –

دزگیری ءَ پد بیگواہ بیتگیں مردمانی پجار جلالو ء نزر خان ءَ علی بیگ ءِ ناماں بیتگ اَنت –

پوج ءَ لشکر کشی ءِ وھد ءَ بازیں لوگے ھم مانداشتگ ءُ پُر کرتگ اَنت –

دمگی مردمانی رد ءَ چریشی ءَ پیسر ھم اے کھول پوج ءِ نشانگ ءَ بیتگ اَنت چریشی ءَ پیسر جلالو ءِ دو برات ھم پوج ءَ گپتگ ءُ آیانی پَس ءُ گوک ھم برگ بیتگ اَنت –

زانگ بہ بیت اے دمگ ءَ مھلوک ءِ والینگ شونگی ءَ اِنت، گوستگیں روچاں بلوچستان ءِ دمگ سبی ءِ ھند لھڑی ءَ ھم پاکستانی پوج ءَ لشکر کشی کرتگ ءُ دو مردم کُشتگ ءُ دو لَٹ ءُ کُٹ کنگ ءَ پد بیگواہ کرتگ اَنت، کُشتگیں مردمانی پجار عبدالحمید ءُ عبدالحلیم ءِ ناماں زانگ بیتگ اَنت ھمے رنگ ءَ عطاء ءُ ھزارو نامیں دو ورناہ لَٹ ءُ کُٹ کنگ ءَ پد پوج ءَ برتگ اَنت –

ھمے رنگ ءَ گوستگیں شپ ءَ بلوچستان ءِ تیابدپی شھر گوادر ءِ ھند نیا آباد ءَ یک لوگے ءَ بیڑ برتگ ءُ اود ءَ یک مردمے آوار جتگ ءُ برتگ –

دزگیری ءَ پد بیگواہ کرتگیں ورنا ءِ پجار عامر ء مھمد رھیم جھمنند دشت ھسادی ءِ نام ءَ زانگ بیتگ –

دزگیر کرتگیں ورنا ءِ بارہ ءَ گوشگ بیگ ءَ اِنت کہ آ کسان سالے آئی ءِ اُمر پانزدہ سال اِنت –

ھمے رنگ ءَ گوشگ بیتگ کہ یک سالے ءَ پیسر عامر ءِ پِت ءُ آئی ءِ مستریں برات پوج ءَ دزگیر کرتگ ءُ یک بازیں وھداں پد یلہ کرتگ اَنت –

بلوچستان ءِ بازیں جاھاں گوستگیں بازیں روچاں لشکر ءِ لشکر کشی برجاہ اَنت ھمے رنگ ءَ ھالانی تہ ءَ گوشگ بیتگ کہ گوادر ءَ ھواریں کوھی دمگ ڈرامب ءَ گوستگیں پنچ روچاں پوج ءِ لشکر کشی برجاہ اَنت –

گوادر ءِ کوھی دمگ ڈرامب ءَ پوج ءَ بازیں جاہ انگیر کرتگ ءُ اود ءَ برزی ءُ جھلی لشکر کشی کنگ ءَ اِنت، ھمے میان ءَ جنگلانی درچک ءُ دارانی سوچگ ءِ اکس ھم چاگردی رسانکجاھاں گندگ بیتگ اَنت –

سر بیتگیں ھالانی رد ءَ قاسم لبزانکی مجلس مند ءِ نیمگ ءَ بلوچی زبان ءِ ورنائیں شائر منصور آزاد ءِ یل کنگ ءِ لوٹ چہ سرکار ءَ کنگ بیتگ –

آئی ءَ گوشت کہ منصور آزاد ءِ گیر کانودی آوات جنگ ءَ ایر جن ایں ءُ سندھ ءِ سرکار ءَ المی ءَ دزبندی کن آں کہ آ منصور آزاد ءَ یلہ بہ کنت –

آئی ءَ گوشت کہ کراچی ءِ شھر ءَ دو کتابی نبشتہ کار منصور آزاد ءِ آوار جنگ ءُ اے وڑ ءَ بیگواہ کنگ اجگھی گپے کہ لبزانک ءَ گوں بندوکیں مردمانی آوار جنگ ءُ آیاں زندانی کنگ اے لبزانک ءِ بندیگ کنگ اِنت –

آئی ءَ گوشت کہ ما ھائی کورٹ سندھ ءُ سپریم کورٹ آف پاکستان ءَ گوں دزبندی کن ایں کہ ورنائیں شائر منصور آزاد ءِ یل کنگ ءَ گامگیج بہ زور اَنت –

آئی ءَ گوشت کہ ما بلوچستان ءُ سندھ ءِ سرجمیں گل ءُ اکیڈمیاں گوِ دزبندی کن ایں کہ پدردی ءِ درشان ءَ گھتر اِنت بیگواھیں شائر ءُ ادیبانی یلا کنگ ءَ ھمتواریں توارے چِست بہ کن اَنت –

آئی ءَ گوشت کہ یک ھپتگے ءِ تہ ءَ اگاں منصور آزاد یلا کنگ نہ بیت گڑا ما بلوچستان ءُ سندھ ءِ لبزانکی گلاں گوں سوڑگ ءَ پد ڈیھ ءِ تہ ءَ زھرشانیانی درچاں بندات کن ایں –

زانگ بہ بیت منصور آزاد یک اپریل دوھزار ءُ بیست ءُ یک ءَ شپ ءِ ساھت دَہ ءَ بسم اللہ ھوٹل کراچی ءَ چیریں ادارھانی کارمنداں آوار جتگ ءُ برتگ –

ھمے رنگ ءَ مروچی بیگاہ ءِ ساھت پنچ ءَ داں شپ ءِ ساھت دوزادہ ءَ چاگردی رسانکجاہ ٹوئٹر ءَ یک کمپئنے ءِ کارمرد کنگ ءِ جار ھم جنگ بیتگ –

بلوچستان ءَ گار ءُ بیگواھیں مردمانی ھاتر ءَ جھد کنوکیں گل وائس فار بلوچ مسنگ پرسنز ءِ گوشگ اِنت کہ اے وھد ءَ بلوچستان ءَ بازیں کچے ءَ مردم بیگواہ اَنت کہ آیانی تہ ءَ نودربر، ادیب، شائراں ھوار ھمک تک ءَ بندوکیں مردم ھوار اَنت –

زانگ بہ بیت گوستگیں وھد ءَ بلوچستان ءَ بیگواھیں مردمانی کھولانی نیمگ ءَ اسلام آباد ءَ نندانک جنگ بیتگ ءُ سرکار ءَ ھمے سدکی داتگ اَنت بلوچستان ءِ گاریں مردمانی جیڑہ ھلاس کنگ بیت اِنت ءُ کس بیگواہ کنگ نہ بیت اِنت –

نبشتانک: نِمدی یے پہ دو ھُردُلیں دوستاں

نبشتہ کار: میر بلوچ  

دی بلوچستان پوسٹ

دروت ءُ دراھبات اِت ھمبلاں شپ ءِ سارتُکیں کوش گوں استالانی شپ ءَ من ءَ بے تاھیریں تھتالاں زرتگ دومی نیمگ ءَ منی ابیتکیں کوٹی ءِ دیوال اَنت ءُ منی دل ءَ ھُل کُت پر شما زھیر نالیں گوت ءَ ترانگے گون بہ کن آں ھمے ساھت ءَ منی دل ءَ گُشت وتی ءُ شُمئے یاتاں یک نمدی ءِ تاکے ئِے سر ءَ نبشتگ بہ کن ءُ پرشما دیم بہ دے آں –

منی ھُردُلیں دوست ءُ مھرواناں بہ گندے من نمِدی ءَ پرشما شوک شوکیں گپ مان کُت مہ کن آں پرچاکہ من ھم زاناں کہ من نمدی نبشتہ کنگ ءِ راه ءُ رهبنداں نہ زان آں، من کدی نمدی نبشتہ نه کتگ  بلے مرچی من ءَ شمئے یات ترانگاں بے وار کتگ بلکیں مرچی ناں ھما سھب ءَ که مھلہ گونڈوے تچان اَت ءُ اتکگ اَت ءُ من ءَ ھال اِش دات که دوشی شپ  نیم ءَ فوجیاں میران ءُ ایاز برتگ اَنت ھما روچ ءَ بگر داں مرچی منی ژندیں دل ءَ لوٹ اِتگ کہ پہ شما چیزے نبشتہ بہ کن آں بلے پد ءَ من ءَ یک بلاھیں ترسی ءَ گورجتگ کہ بہ گندئے منی نبشتہ په شما دگہ ازابے بہ بیت ءُ بئیت پمشکا من وتی ھیال گٹگیر کتگ اَنت  تہنا گوں وت نشتگ ءُ رپٹ اِتگ بلے مرچی دل ءَ من ءَ مجبور کتگ کہ پہ شما چیزے نبشتہ بکن آں

میران ، ایاز شما زان اِت کہ شمئے روگ ءَ پد من چنچو ابیتک ءُ تہنا آں من سک تہنا آں یار من وَ ھچ نه زاناں که کجا بہ رواں چی بہ کن آں من ءَ دگہ سنگت شما زان اِت کہ نیست بازار ءِ تچگ اگول بوگ گوں من نه بیت  مرچاں وَ چوناھیگا مات من ءَ لوگ ءِ درایگ ءَ نَیل ایت که مرو ڈنّ ءَ ھالات شر نہ اَنت پاکستان لشکر  بے گناه ءَ مردماں گرگ ءُ برگ اِنت کدی کدی من مات ءِ چم ءَ رد دے آں دکانانی دپ ءَ رواں داں ھیال ءِ بدل به بیت گڑا من شمئے بارو ءَ سک باز گپ اِشکن آں مردم شمئے بارو ءَ وڑ وڑیں گپ جنگ ءَ اَنت ھر کس وتی دپا پرکنت ءُ گش ایت شما گپ ءِ زان اِت انی شما بلاہ اِت دگر ءَ وَ بل شمئے پوٹوانی ایرکنگ ترس ایت مردماں-

دراھیں سنگتاں شمئے پوٹو وتی گوانکواں چہ کش اِتگ اَنت بس چیزکے ھست که آھاں شمئے پوٹو په کَشگ ءَ دل نه بوتگ اَنت چو منی وڑا وتی گوانکوانی تہ ءَ چیر اِش داتگ اَنت –

مرچی من ءَ وتی ھما شمُیں گپ یاد آیگیں کہ من گوں شما مدام گشتگ ات  که “ چہ اِد ءَ ھرچی شُت بزاں وتی کیسگ ءَ شُت ” دگہ کس اد ءَ کَسی جست ءُ پرس ءَ نه کنت  کس په کس ءَ در نئیت روڑانی سر ءَ نہ اوشتیت ، ٹائر بُن نہ دنت  کس کسی عکس ءَ دست ءَ نه کنت ءُ نه گشیت پلانی زالماں برتگ ءُ بیگواہ کتگ –

ھئیر گپ و باز انت بلے شمارا دگہ وشیں ھالے ھم دئیگ لوٹاں کہ شمئے بیگواہ کنگ ءَ چه چیزے روچ ءَ پد بیگواھیں صادق جان آرتگے  بلے زالماں آ سک اذیت کتگ انو نادراہ اِنت ماں کراچی اسپتال ءَ انت  من  صادق گندگءَ پد سک جیڑاں من زاناں که اے زالم شمارا ھم سک اذیت کن اَنت  بلے منی دست نه رس ایت من وَ چو شمئے وڑا بے وساں  گڈسرا منی دعا اِنت گوں ھاوند ءَ اللہ شمارا سلامت به کنت زوت چه دژمنانی دستاں آجو بات اِت
انچوش بات شالا
 

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ روکپتی بلوچستان ءِ دمگ نرماشیر ءَ دگ ءِ وئیلے ءَ یک مردمے بیران بیتگ –

وئیل نرماشیر ءُ ریگان ءِ میانی دمگ ءَ پیش اتکگ کہ اود ءَ دگ ءِ وئیل ءَ مھمد ھسین رحیمی ء رضاء بیران بیتگ –

چاگردی مردمانی گوشگ اِنت کہ سرکار ءِ بے دلگوشی ءَ گاڑیانی رانندگ ترند رو اَنت ءُ چریشی ءَ سالانی تہ ءَ ھزارانی کَچ ءَ مردم زوال بیگ ءَ اَنت –

ھمے وڑ ءَ بیست ءُ روچ ءَ پیسر ھم نرماشیر ءُ ریگان ءِ ھمے دگ ءَ یک وئیلے ءَ یک مردمے بیران بیتگ اَت –

ھمے وڑ ءَ روکپتی بلوچستان ءِ بنجاھی شھر دزاپ ءَ لوگی جیڑھے ءِ سر ءَ مرد ءَ وتی زالبول کُشتگ –

دمگی مردمانی رد ءَ لوگی جیڑھے ءِ سر ءَ لوگ واجہ ءَ وتی زالبول ماڑی ءَ چہ ھتر داتگ ءُ کُشتگ –

اے درگت ءَ دمگ ءِ انتزامیہ سردار اھمد تاھری ءَ ھم اے گپ راست کرتگ ءُ گُشتگ کہ اے وئیل ءِ ھال ءِ سر بیگ ءَ انتزامیہ وئیل جاہ ءَ سر بیتگ ءُ جون چِست کنگ بیتگ –

سردار اھمد تاھیری ءِ گوشگ اِنت کہ زالبول ءِ کوش ءِ درگت ءَ پَٹ ءُ پول کنگ ءَ پد کوش مرد ءِ سر ءَ سابِت بیتگ ءُ چریشی ءَ لوگ واجہ دزگیر کنگ ءُ زاندانی بیتگ –

اے زوراکیاں پاکستان ءِ نام نھادیں آزادیں رسانکدر ، پاکستان ءِ نام نھادیں انسانی ھکانی گل ءُ پاکستان سول سوسائیٹی ءُ نام نھادیں دیمروئی دانشورانی ھمراھی ءَ بلوچ پارلیمنٹ پرستیں گل تچکی ءَ ھوار انت – ماما قدیر

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ دوسد ءُ ھپتاد ءُ چار روچ سرجم بوتگ- چہ ھزدار ءَ بیبرگ بلوچ، ثناء بلوچ، نور احمد بلوچ ءُ دگہ مردماں بنجل ءِ تر ءُ تاب کُتگ ءُ بیگواھیں مردمانی کھولانی گوم ءَ دلپدردی درشان اتگ –

وائس فار بلوچ مسنگ پرسنز ءِ رھشون ماما قدیر بلوچ ءَ گوشتگ کہ بلوچ راجی جُست یک راجدپتری ءُ گیشگیواری جیڑہ ءُ بیگواھیں مردمانی جیڑہ ھم گون ھمے جست ءَ ھمگرنچ انت – بلوچ راج ءِ زند اے ریاست ءَ تباہ کتگ پرچا کہ بلوچ راج ءَ اے زورانسری ایردستی ءِ بگیری ءَ پُرایمنیں جُھد کُتگ –

آئی ءِ گوشگ ات کہ بلوچ پرزندانی زورانسری اوار جنی ھم چہ ھما روچ ءَ بندات انت وھدیکہ پاکستانی ریاست ءَ پوجی لشکر کشی کُتگ ھزارانی کچ ءَ بلوچ شھید ءُ بیگواہ کتگ اَنت – ھستیں جاورھال دوھزار ءَ چہ بندات بوتگ ءُ انگت برجاہ انت –

آئی ءَ دیمتر ءَ گوشتگ کہ ھزارانی کچ ءَ مردم کوھلو، کاھان، ڈیرہ بگٹی، مکران، مشکے، آواران، جاؤ ءِ دمگاں بیمناکیں بمب گواریانی سوب ءَ بلوچ وتی لوگ جاہ، ڈن ڈگارانی یلہ دیگ ءَ لاچار بوتگ انت کہ نوں سندھ ءُ دگہ دمگاں در پہ دری زند گوازینگ ءَ انت –

آئی ءَ گوشتگ کہ بیگواھیں بلوچانی کھولاں پاکستان ءِ مزن آمیدگس ءَ بگر ھر تک ءَ توار چست کُتگ بلے ھچ جاہ ءَ ھک کنگ نہ بوتگ – اے زوراکیاں پاکستان ءِ آزادیں رسانکدر ، پاکستان ءِ نام نھادیں انسانی ھکانی گل ءُ پاکستان سول سوسائیٹی ءُ نام نھادیں دیمروئی دانشورانی ھمراھی ءَ بلوچ پارلیمنٹ پرستیں گل تچکی ءَ ھوار انت –