TBP Balochi

اے زوراکیاں پاکستان ءِ نام نھادیں آزادیں رسانکدر ، پاکستان ءِ نام نھادیں انسانی ھکانی گل ءُ پاکستان سول سوسائیٹی ءُ نام نھادیں دیمروئی دانشورانی ھمراھی ءَ بلوچ پارلیمنٹ پرستیں گل تچکی ءَ ھوار انت – ماما قدیر

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ دوسد ءُ ھپتاد ءُ چار روچ سرجم بوتگ- چہ ھزدار ءَ بیبرگ بلوچ، ثناء بلوچ، نور احمد بلوچ ءُ دگہ مردماں بنجل ءِ تر ءُ تاب کُتگ ءُ بیگواھیں مردمانی کھولانی گوم ءَ دلپدردی درشان اتگ –

وائس فار بلوچ مسنگ پرسنز ءِ رھشون ماما قدیر بلوچ ءَ گوشتگ کہ بلوچ راجی جُست یک راجدپتری ءُ گیشگیواری جیڑہ ءُ بیگواھیں مردمانی جیڑہ ھم گون ھمے جست ءَ ھمگرنچ انت – بلوچ راج ءِ زند اے ریاست ءَ تباہ کتگ پرچا کہ بلوچ راج ءَ اے زورانسری ایردستی ءِ بگیری ءَ پُرایمنیں جُھد کُتگ –

آئی ءِ گوشگ ات کہ بلوچ پرزندانی زورانسری اوار جنی ھم چہ ھما روچ ءَ بندات انت وھدیکہ پاکستانی ریاست ءَ پوجی لشکر کشی کُتگ ھزارانی کچ ءَ بلوچ شھید ءُ بیگواہ کتگ اَنت – ھستیں جاورھال دوھزار ءَ چہ بندات بوتگ ءُ انگت برجاہ انت –

آئی ءَ دیمتر ءَ گوشتگ کہ ھزارانی کچ ءَ مردم کوھلو، کاھان، ڈیرہ بگٹی، مکران، مشکے، آواران، جاؤ ءِ دمگاں بیمناکیں بمب گواریانی سوب ءَ بلوچ وتی لوگ جاہ، ڈن ڈگارانی یلہ دیگ ءَ لاچار بوتگ انت کہ نوں سندھ ءُ دگہ دمگاں در پہ دری زند گوازینگ ءَ انت –

آئی ءَ گوشتگ کہ بیگواھیں بلوچانی کھولاں پاکستان ءِ مزن آمیدگس ءَ بگر ھر تک ءَ توار چست کُتگ بلے ھچ جاہ ءَ ھک کنگ نہ بوتگ – اے زوراکیاں پاکستان ءِ آزادیں رسانکدر ، پاکستان ءِ نام نھادیں انسانی ھکانی گل ءُ پاکستان سول سوسائیٹی ءُ نام نھادیں دیمروئی دانشورانی ھمراھی ءَ بلوچ پارلیمنٹ پرستیں گل تچکی ءَ ھوار انت –

سریاب فلائی اور ءَ پاکستانی پوج ءِ پانگس ءِ سر ءَ دز بمب اُرشے کُتگ ءُ یک کارمندے ٹپی کُتگ – جئیند بلوچ

سربوتگیں ھالانی رِد ءَ گوستگیں شپ ءَ ناشناسیں مردماں بلوچستان ءِ بنجاھی شھر شال ءَ پاکستانی پوج ءِ پانگس ءِ سر ءَ دز بمب اُرشے کُتگ ءُ در اتکگ انت –

سرکاری بنشون ءِ رِد ءَ اے اُرش ءَ فرنٹیر کور ءِ یک کارمندے زدگ بوتگ – دومی نیمگ ءَ بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں گوستگیں شپ ءَ شال ءَ سریاب فلائی اور ءَ برجاھیں پاکستانی پوج فرنٹیرکور ءِ پانگس ءِ سر ءَ دز بمب اُرشے کُتگ –

جارکش ءَ گوشتگ اُرش ءِ آسر ءَ یک کارمند ءِ زدگ بوتگ وھدیکہ پانگس ءَ تاوان رس اتگ –

زانگ بہ بیت گوستگیں ماہ ءَ بولان ءِ دمگ مارگٹ ءَ پاکستانی پوج ءِ سر ءَ بوتگیں بمب تراک ءَ ھزدار ءَ ریاستی چاریگ ءِ لوگ ءِ دز بمب اُرشانی زمّہ واری ھم بلوچ لبریشن آرمی ءَ منّ اِتگ انت –

نبشتانک: بلوچ وانندگیں ورنا وت گُلامی ءَ بہ مار اَنت

نبشتہ کار: آئیشہ بلوچ

دی بلوچستان پوسٹ

کُجام راجے کہ گُلامی ءِ سانکلاں گوں بندوک بوت، آ راج ءِ سر ءَ زُلم ءُ زوراکی یے برجاہ دارگ بوت گُڑا اگاں ھما راج ءِ چاگرد ءُ وانندگیں ورناھاں گُلامی ءِ مارشت نہ بوت ءُ آ چہ گلامی ءِ سوچ ءُ پگر ءِ دیوال ءَ گوں مُھکمی ءَ بندوک بوت گُڑا ؟ آ راج ءَ را آجوئی ارزانی ءَ نہ رس ایت۔ مروچی ما بلوچ بیست ءُ یمکی ءَ کرن ءَ انگت گُلامی ءِ سانکلاں گوں بندوک ایں، توری ما ”کیوبا” ءِ داستان ونتگ توری ما ”پلستین” ءِ داستان ونتگ توری ما ایدگہ ھما آزاتی لوٹوکیں راجانی داستان ونتگ اَنت بلے ما انگت وانندگیں مردم وتی راج ءِ بزگ ءَ نہ مار ایں پمیشکا مارا یک گُلامیں مُلکے ءَ وتی گُلام جوڑ کُتگ ءُ مئے سرزمین ئِے وتی دست ءَ کُتک ءُ مئے مال ءُ مڈّیاں لوٹگ ءَ اِنت ءُ مئے سر ءَ وتی زوراکی ئِے برجاہ داشتگ چی ءَ کہ ما زھنی رنگ ءُ دْروشم ءَ گُلام ایں گُڑا گُلامی ءَ پْروش دیگ ءِ ھاتر ءَ بلوچ ورناھاں جُھد دیم ءَ برگی اِنت۔ بلوچ ءِ باندات ھمے انوگیں نودربر اَنت پمیشکا راجی رھشُون واجو ڈاکٹر الہ نزر ءَ گْوشت کہ بیست ءُ چار کلاک ءِ توک ءَ بلوچ وانندگ ءُ ورناہ چار کلاک بلوچ راج ءَ را بدے اَنت۔

بِہ گِند ئے واجو ءِ گپ سک وش اَت، باید ھمیش انت کہ کُجام ورناہ نبشتہ کنگ زانت آ بلوچ راج ءِ جیڑھانی سر ءَ نبشتہ بہ کنت اگاں کجام ورناہ کہ گپ جنگ ءِ بلدی دار ایت گُڑا آ وتی چاگرد ءُ وتی سنگتاں ھیلانکی بہ دنت ءُ آگاہ بہ کنت، بلوچ راجی جُنز ءِ بابت ءَ، بلوچ ءِ بزگی ءِ بابت ءَ، بلوچ ءِ گُلامی ءِ بابت ءَ ءُ دژمن ءِ زوراکی ءِ سر ءَ وتی چاگرد ءَ زانت ءُ سرپد بہ کن اَنت، ایدگہ راجانی ورناہ کہ وان اَنت آ وتی راجی ءُ ماتی زبانانی سر ءَ کار کن اَنت آ ٹیکنالوجی ءِ سر ءَ کار کن انت۔ چہ ھما کاراں آئی راج دیمروی کنت بلے مئے بدبھتی ءَ ما گُلامیں راجے ءَ گوں سْیادی دار ایں مارا گلامی ءِ سانکل پْروشگ ءِ ھاتر ءَ جُھد کنگی اِنت، یکے دومی ءِ گون ءَ تپاک بوھگی اِنت، یکے دومی ءِ اُوپار کنگی اِنت بلے ما توری بلوچ نودربر بہ بہ ایں یا توری لس مھلوک ما چہ یکمُشتی ءَ دور ایں۔ ما یکے دومی ءِ سر ءَ زِدّ ءُ کینگ دار ایں، ھرکس ھمے جُھد کنت کہ من نامدار بہ بہ آں من ءَ چار مردم پجّا بیار ایت ، بلے من گُش آں جُھدکار ھما اِنت کہ پہ راج ءَ کُربانی دنت ءُ راج ءَ چَہ گُلامی ءِ سنکلاں آجو کنگ ءِ ھاتر ءَ وتی زند وتی مال ءُ مڈّی وتی گِرانبھائیں وھد ءِ کُربانی ءَ دنت ءُ نامدار بوھگ نہ لوٹ ایت۔

بلے مئے چاگرد چَہ اے رنگیں کُربانیاں زبھر اِنت ، اگاں یک نودربرے سیاسی گلّاں گوں سْیادی دار ایت من چار اِتگ آ ھمے جُھد کنت کہ من اُگدہ دار بہ بہ آں ءُ من نامدار بہ بہ آں، من ءَ دو مردم بِزانت کہ پِلاں مردم پِلاں گلّ ءِ اُگدھدارے ، گُڑا نام ءِ رند ءَ کپتگیں مردم پہ راج ءُ چاگرد ءَ ھچبر نہ جیڑ ایت چی ءَ کہ آئی اوّل ءُ گُڈی نشانگ آئی نام کشّگ ئیگ اِنت آئی ءَ را نامدار بوھگی اِنت ، بلے بژن کہ ما انگت وتی دل ءِ توک ءَ چہ یکدومی ءَ مستر بوھگ ءُ اُگدہ ءِ لب ءُ لالچ ءَ گوں دست گٹ ایں دُژمن ءِ مئے ھمے ناتپاکی ءُ نابزانتی ءِ پُشت ءَ پائدگ چِست کنگ ءَ اِنت چہ مئے سوب ءَ راج ءَ تاوان بار کنگ ءَ اِنت ایماندار ءُ سِتکیں ورناھاں شھید کنگ ءَ اِنت ءُ آیاں بیگواہ کنگ ءُ ماں آزارجاھاں درد ناکیں سزا دیگ ءَ اِنت ،گُڑا مئے وانندہ بوھگ ءَ ھچ پائدگ نیست گُڑا مئے ھم اِلم ءُ زانت دربرگ ءَ ھچ مکسد نیست اِنت کہ آ مارا ھمدردی ءِ درس نہ دنت آ زانت کہ مارا یکجاہ ءُ تپاک بوھگ ءِ درس نہ دنت، پہ لبزانی سیاھیانی وانگ ءُ دو لبز نبشتہ کنگ ءَ ھچ پائدگ نیست انت۔ مروچی بیست ءُ یکمی کرن اِنت کہ ما انگت چارمی کرن ءِ مردمانی وڑ ءَ زندگی گْوازینگ ءَ لاچار ایں۔ بِہ گِند ئے سبب ھمیش انت کہ مئے اِلم ءَ مارا راجدوستی ءِ درس نہ داتگ، مئے اِلم ءَ مارا تپاکی ءِ درس نہ داتگ، مئے اِلم ءَ مارا دیمروئی کنگ ءِ درس نہ داتگ بلکیں مئے اِلم دربرگ ءِ مول ءُ مُراد نوکری ءِ گرِگ ءِ سر ءَ بوتگ مئے اِلم ءَ مارا نوکری گِرگ ءِ درس داتگ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ گوستگیں روچ ءَ پنجگور ءِ دمگ چتکان، تار آفس، غریب آباد ءُ دگہ ھنداں بندوکیں مردماں پنجگور ءَ دگ ءِ دیم ءَ آوکیں دکانی پروشگ ءِ ھلاپ ءَ پریس کانفرنس کرتگ ءُ گشتگ سرکار ابید ءِ نھاد ءَ مئے دکاناں پروشگ اِنت –

پریس کانفرنس کنوکانی تہ ءَ میجر سید مھمد، ھاجی عبدالحمید، مھمد اشرف زھری، ملا شعیب چاکر، شریف، عبدالباسط، مھمد طاھر، زاکر،عثمان، کریم بکش، مھمد صدیق ءُ بازیں کَسے ھوار بیتگ آیاں گوشت کہ پنجگور ءَ جوڑ بیوکیں دگانی جوڑ کنگ ءَ مار جست کنگ ءَ ابید مئے دک ءُ لوگانی دیوالاں پروشگ ءُ دور دیگ اوپاری نہ اِنت ءُ ما اشی ءَ نہ منّیں –

آیاں گوشت کہ اے وڑیں پروجیکٹساں دراھیں تاوان چارگ بنت ءُ رند ءَ آیانی بارہ ءَ جیڑگ ءُ پُرکنگ ءَ بنت نِی کار بندات کنگ بنت آیاں گوشت تاوانانی پُرکنگ وتی جاہ ءَ مارا پُرسگ ءَ ابید مئے دکاناں پروشگ ءُ وتی دگ ءَ کَشگ ءَ اَنت –

آیاں گوشت کہ مارا اے وڑیں دگ نہ لوٹ ایت کہ چراھی ءَ مئے چُلے آس بہ مر ایت ءُ آیاں گوشت کہ مئے روزگار ھمے دُکان اَنت ءُ اگاں سرکار اشاں پروش ایت ءُ دور دنت گڑا ما کجا بہ روایں –

آیاں گوشت کہ ما دیمروئی ءِ بگیر داروک نہ ایں بلے ھما دیمروئی مارا مئے ھکاں زبھر کنت گڑا ما ھچبر آ دیمروئی ءِ منّوک نہ ایں – آیاں گوشت کہ اگاں ھما جاہ کہ دگ ءِ دپ ءَ کیت گڑا آ چارگ بیت ءُ آئی ءِ نھاد بندگ بیت نِی آ دکان کروجگ بیت بلے اشاں ابید کس مارا جست کنگ ءَ ھم نہ اِنت ءُ مئے دکاناں دور دیگ ءَ اَنت –

آیاں گوشت کی اگاں سرکار مئے تاوناں پُر کت نہ کنت گڑا ھمے دمگاں سرکار وتی زمینانی سر ءَ مارا دکان بہ بندیت ءُ بہ دنت ما ھچ رنگ ءَ اتراز کرت نہ کن ایں –

آیاں گوشت کہ ھما لوگ ءُ دکاناں ابید نھاد دیگ ءَ وت ءَ سرجم کنگ ءِ جھد ءَ اَنت ما وتی سرجمیں زند ءَ جھد کرتگ ءُ لوگ بستگ اَنت ءُ دکانانی وتی والینگی ءَ ایں ءُ اشانی پروشگ ءُ دگ ءِ نکش کشگ پہ ما تاوان اِنت –

آیاں گوشت کہ دمگ ءِ انتزامیہ وھد وھد ءَ دزبندی کنگ ءَ ابید مئے گپاں دلگوش کنگ ءَ نہ اِنت ءُ زورانسری وتی کار ءَ سرجم کنگ ءَ اَنت اگاں چوش بیت ما گڑا دیم ءَ آمیدگس ءَ ترینت کُت کن ایں –

زانگ بہ بیت بلوچستان ءَ زھرشانی درچ یکشل ءَ برجاہ اَنت ءُ گوستگیں بازیں روچاں ملازمیناں بلوچستان ءِ بازیں جاھاں شھدگ بند کرتگ ءُ وتی پگارانی گیش کنگ ءِ لوٹ ءَ کنگ ءَ اَنت –

سربوتگیں ھالانی رِد ءَ بلوچستان ءِ بنجاھی شھر شال ، لورلائی، دگ ءِ وئیل ءَ یک مردمے بیران وھدیکہ اُتھل ءُ مستونگ ءَ تیرگواری ءَ سَے مردم بیران –

گیشیں ھالانی رِد ءَ بلوچستان ءِ دمگ لورلائی ءَ دگ ءِ وئیل ءَ یک مردمے بیران ءُ بازینے زدگ بوتگ –

ھالانی رِد ءَ لورلائی ءَ ڈائیو کوچ ءَ پنجاپ رؤگے وھد ءَ ٹرک ءَ گوں ڈیک وارتگ چریشی ءَ ایکسائیز انسپکٹر انور جان کاکڑ بیران بوتگ وھدیکہ بازیں مردمے ٹپی بوتگ –

لاش ءُ ٹپی بوتگیں مردم ھما دمان ءَ نادراھجاہ ءَ سر کنگ بوتگ انت اژدری چار ءُ ٹپاس ءَ پد لاش کھول ءِ ھوالہ کنگ بوتگ –

شال ءَ رودراتکی شھدگ ءِ سر ءَ تیل ٹینکر ءِ بُن گپتگ ءُ سَے ٹینکر سُتکگ اَنت –

فائر برگیڈ بنشون ءِ رِد ءَ بلوچستان ءِ بنجاھی شھر شال ءَ رودراتکی شھدگ ءِ سر ءَ پٹرول پمپ ءَ اُوشتوکیں ٹینکر ءِ بُن گپتگ، چریشی ءَ آئی ءِ کش ءَ دگہ دو اوشتوکیں ٹینکر ءَ ھم آس لگتگ ءُ ھر سئیں ٹینکر ستکگ انت –

وئیل ءِ ھال سربوگ ءَ شش فائر برگیڈ گاڑیاں وت ءَ وئیل جاہ ءَ سر کتگ دو ادار ءَ آس توسینتگ- وئیل ءَ ھزاراں لیٹر ٹیل سُتکگ انت ءُ ھچ وڑیں جانی تاوان نہ بوتگ –

اتھل ءَ تیرگواری وئیلاں دو مردم بیران بوتگ اَنت –

ایدھی بنشون ءِ رِد ءَ ھب ءَ دارو ہوٹل ءِ نزیک ءَ دُزی ءِ میان ءَ تیرگواری ءَ چہ یک مردمے زدگ بوتگ ، زدگ بوتگیں مردم ھما دمان ءَ گلام قادر نادراھجاہ ءَ برگ بوتگ پد ءَ رند ءَ مُرشد نادراھجاہ ءَ سرکنگ بوتگ – ھمودا الاج ءِ میان ءَ ٹپانی درد نہ سگتگ ءُ بیران بوتگ –

دومی تیرگواری وئیل لسبیلہ کوھی دمگ کنراج ءَ بوتگ کہ ناشناسیں مردماں گلام نبی پنام حبی ء ولیداد میراجی مینگل بیران بوتگ –

ھمے رنگ ءَ مستونگ ءَ پجاہ نیاھورتگیں مردمانی تیرگواری ءَ یک مردمے بیران بیتگ –

وئیل مستونگ ءِ دمگ آماچ ءَ پیش اتکگ کہ اود ءَ ناشناسیں سلاہ بندیں مردماں تیرگواری کرتگ ءَ مھمد ھسین ء مھمد ھسن نامیں مردمے کُشتگ –

وئیل ءِ بارہ ءَ گیشیں سرپدی نہ بیتگ –

سر بیتگیں ھالانی رد ءَ کراچی ءَ بلوچی زبان ءِ ورنائیں شائر پوج ءِ دست ءَ دزگیری ءَ پد بیگواہ –

ورنا ءِ پجار منصور آزاد ءِ نام ءَ زانگ بیتگ کہ چیزے روچ ءَ پیسر دزگیری ءَ پد ناشناسیں زنداناں برگ بیتگ –

بیگواھیں ورنا ءِ نزیکیں ھمراھاں منصور آزاد ءِ زورانسری ءِ آوار جنی راست کرتگ –

منصور ء عبدالرحیم جھمنند مند ردیگ ءُ آئی ءِ کتاب (شھیدیں ارسانی کبرستان ءُ دریا چے پیم ءَ مرت کنت) چاپ ءُ شنگ بیتگ اَنت –

دمگی مردمانی رد ءَ منصور گُتگانی نادراہ بیتگ ءُ آ کراچی ءَ وتی جاندراھی ءَ شتگ کہ اود ءَ بسم اللہ ھوٹل ءَ دو گاڑیانی ھمراھی ءَ اتکگیں مردماں آوار جتگ ءُ برتگ –

منصور ءِ ھمراھانی گوشگ اِنت منصور ءَ روگ انکاری کرتگ ءُ گڑا آ منصور لَٹ ءُ کُٹ ءُ کرتگ ءُ اشانی ھمراھی ءَ چیریں ادارھانی کارمنداں ھوٹل ءِ چیریں کیمرہ ءُ ڈیوائس گوں وت برتگ اَنت گوں –

بلوچستان ءَ پاکستانی پوج ءِ نیمگ ءَ ھمک روچ لشکر کشی ءُ مردمانی آوار جنگ ءُ کوشانی ھال یکشل ءَ برجاہ اَنت –

ھمے وڑ ءَ گوستگیں روچ ءَ سبی ءِ دمگ لھڑی پاکستانی پوج ءَ یک لشکر کشی ءِ میان ءَ دو مردم کُشگ ءُ دو لَٹ ءُ کُٹ کنگ ءَ پد بیگواہ کنگ بیتگ اَنت –

یکشمبے ءِ روچ ءَ لھڑی ءَ پوج ءَ بازیں کچے ءَ لشکر کشی بندات کرتگ ءُ ھمے میان ءَ تیرگواری ءِ میان ءَ دو مردم بیران بیتگ اَنت کہ آیانی پجار عبدالحمید ءُ عبدالحلیم ءِ ناماں زانگ بیتگ اَنت –

دمگی مردمانی رد ءَ عطاء ءُ ھزارو نامیں دو ورناہ لَٹ ءُ کُٹ کنگ ءَ پد پوجی کارمنداں آوار جتگ ءُ برتگ اَنت – پوجی کارمنداں پس ءُ گوک ءُ دگہ گران بھائیں مڈی گوں وت برتگ اَنت –

ھمے رنگ ءَ گوستگیں روچاں سوراب بازار ءَ بیگواہ بیتگیں دو ورناہ مھمد عرفان ء مھمد حکیم ریکی ذلقرنین ء ھاجی فرید ریکی یل کنگ بیتگ اَنت –

یل بیتگیں ورنایانی ھمراھی ءَ وائس فار بلوچ مسنگ پرسنز ءِ وائس چیئرمین ماما قدیر بلوچ ءِ براتزتک مھمد آصف ریکی ءُ الہ دین ریکی ء شبیر اھمد ریکی ھم بیگواہ کنگ بیتگ اَنت کہ انگت ءَ بیگواہ اَنت –

ماما قدیر ءِ براتزتک ءِ زورانسری آوار جنی ءِ سر ءَ سرکار ءِ سر ءَ ایراد گرگ بیگ ءَ اِنت -بلوچ نیشنل مومنٹ ءِ بنجاھی جارکش ءَ وتی درشانی ءَ اے یک نہ کُٹوکیں سزا ئِے درچ گوشتگ اَنت –

ہیومن رائٹس کونسل آف بلوچستان ءَ ورنایانی یل کنگ ےِ لوٹ کرتگ ءُ کہ بلوچستان ءِ مردمانی زندگی ازابی ءَ اِنت – چریشاں پد چاگردی رسانکجاہ ءُ سیاسی گلانی نیمگ ءَ ھم زھر ءِ درشان بیگ ءَ اَنت –

نبشتانک: سنگت گُش اَنت آ

نبشتہ کار： این آر بلوچ

دی بلوچستان پوسٹ

آ چوشیں زَبْریں وانوکیں نودربرے نہ اِنت چُش کہ دْرستیں روچ ءَ لائبریری یے تہ ءَ بہ نند اِیت ءُ بہ وان اِیت آئی ءَ شری یے سر ءَ یات ھَم نہ کنت کہ کدی گُڈّی رند بوتگ کہ آئی ءَ لائبریری یے دیم دیستگ اَت بس ھَمے چَکّاسانی وھد کہ سر ء بان ءَ کائنت گُڑا آ گندگ نہ بیت کس نزانت کہ کُجا روت اِنت۔

سنگت گُش اَنت کہ رَٹ ءَ جَنت ءُ وان اِیت ھمے واستا لائبریرے ءَ نہ رَوت اِنت ایشی ءِ دپے توار ءَ چہ دومی کوٹی ءِ سنگت دل ریش اَنت اِے کہ وانگ ءَ بندات کنت گُشے زاناں “مُلائی وانگ ءَ اتکگ” کتابے وانگ ءَ دپ ءِ ھوری ءَ سَری اوں سُر اِیت-

سنگتاں بازیں نام ءِ بستگ پہ آئی ءَ لھتے گُش اِیت چاھتور اِنت( چاھتور تِھری ایڈی ھٹ تامُر ے کارستے) لھتے گُش ایت مُلا ئے دَم کَش اِیت چوپ جَنت اِنت کلاس ءِ تہ ءَ اَنگت ھچ کس ءَ آ پہ کَندگ ءَ نئیت اِنت چوشیں وانگے ھَم نہ زانت کہ ما بہ جیڑ اِت ایں کہ ھو ھاموشیں مردم زیات تِر زانت ءِ دریا بنت وتی ھیالانی زِر ءَ ھوژناگ کنگ ءَ اَنت بَلے بیا کہ ھاموشیں مردم گُنگ ھَم بنت “بیت کنت گپ زانتیں گُنگ اِنت” سنگت گُش اَنت کہ یک روچے ٹیچر ءَ جُست کُت اَت کہ گیشتر کُجام چیز انسان ءَ را ازاب کنت زندا نہ وش کنت وتی دوستیں کسے اناگت ءِ مرگ یا دِگہ چیزے شما چی گُش اِت؟
گُڑا کس ءَ ھچ نہ گُشت اَت بس آئی ءَ گُشت کہ اِے گپ راستیں وتی دوستیں کسے ءِ مرگ وَ سَک تورین اِیت زندا درد ءُ اَندواہ کنت بَلے ایشی ءَ چہ گیش زندگ بیگ ءُ پد ءَ وتی دوستیں مردمے چماں تو مرتگیں مردمے بستارا زندگ بیگ ایشی ءَ چہ مستریں اَزاب من گُشاں نیست-

آ گیشتریں بیگاھاں وتی وپس اِیت ھَمے روزردے ساھتاں گیشتر بَلے انگت ءَ زردوئیگ ءَ نہ گپتگ بلکیں اوں گپتگ بیت کنت آ نہ زانت اِنت سنگت گُش اَنت آ “گاریں مردمے لوامز ءَ مُپت ءَ اتکگ وھد ءَ بَس تَھنا وتی برباد کنگ ءَ اِنت” ھو سنگت گُش اَنت سیریں مردمے زَرّی ھست ھَمے واستا نہ وان اِیت جَنّگ بازیں اَشیکی کنت’ بَلے آئی ءَ گُشاں مورے ھم نہ وارت کہ کمو وانگ ءِ بابت ءَ بہ جیڑ اِیت ءُ سنگت گُش اَنت “شپ ءَ کوٹی یے آدینک ءَ ٹَپّین ایت کس نہ زانت باریں کُجا بارت ءُ ایر اِش کنت” آ اَنچیں تُرسوکے شپ ءَ لیٹ ءِ بند کنگ ءَ کس ءَ نیل ایت اگاں گندے لیٹ شُتاں گُڑا موبائل ءَ زور اِیت کش ءَ ایر کنت ءُ “بَتّی ءَ روک کنت وپس اِیت”۔

من دیستگ اَت آئی ءِ ریشّ ءُ مُودّ مزن اِت اَنت چشموکے چماں اَت ءُ بساک ءِ سئے ماھی نوشت ءِ دست ءَ اَت ، سنگت ءَ مپت ءَ گُشتگ اَت کہ آ نہ وان ایت بَلے من ءَ ھچ چوشیں سما نہ بیت کہ آ شَریں وانوکے نہ اِنت ،بگندے بوت کنت آ بَس تَھنا بلوچی یے نبشتگیں کتاباں وان اِیت ھَمے ساھت ءَ کہ من دیست روزرد اَت بَلے آ انگت ڈَنّ ءَ اَت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ روکپتی بلوچستان ءِ دمگ ایرانشھر ءَ ناشناسیں مردماں یک گاڑی ءِ سر ءَ تیرگواری کرتگ ءُ دو مردم کُشتگ اَنت –

وئیل پھرہ ءِ دمگ ھیابان مولوی ءِ ھند ءَ پیش اتکگ کہ اود ءَ ناشناساں تیرگواری کرتگ ءُ ھاجی ھازر عمرزئی ءُ آئی ءِ ڈرائیور بیران بیتگ اَنت –

دمگی مردمانی رد ءَ رد ءَ وئیل کوھنیں دشمنی ءِ سوب ءَ پیش اتکگ –

ھمے رنگ ءَ ایرانشھر ءَ مزنیں واپڈا ءِ نزیک ءَ دو ٹکانی میان ءَ تیرگواری بیتگ، بلے وئیل ءِ بارہ ءَ گیشیں سرپدی نہ بیتگ –

ھمے وڑ ءَ بلوچستان ءِ دمگ ریگان ءَ دَگ ءِ وئیلے ءَ پیش اتکگ کہ اود ءَ دو مردم بیران ءُ دَہ زدگ بیتگ اَنت –

وئیل ریگان داں بم ءَ دیم پہ پھر ءَ رؤکیں دگ ءِ سر ءَ ایرانشھر ءِ نزیک ءَ سد آباد ءَ دگ ءِ یک وئیلے ءَ دو مردم بیران ءُ دَہ زدگ بیتگ –

وئیل ءَ زدگیں مردمانی تہ ءَ چار کسانی جاور نگیگ اَنت ءُ وئیل آماچ بیتگیں مردمانی سیادی اوگستان گوشگ بیتگ –

وئیل شال، دکی، پنجگور کچلاک ءَ تیرگواری ءِ وئیلاں پنچ مردم ٹپی ءَ دو بیران وھدیکے دالبندین ءَ دگ ءِ وئیلے ءَ یک مردمے ٹپی ءُ سَے بیران بوتگ اَنت –

گیشیں ھالانی رِد ءَ بلوچستان ءِ بنجاھی شھر شال جبل نور شاھدگ ءِ سر ءَ تیرگواری ءِ وئیل ءَ سَے مردم زدگ بوتگ اَنت –

ھالکار ءِ رِد ءَ شال ءَ جبل نور شھدگ ءِ نزیک ءَ ناشناسیں سلاہ بندیں مردمانی تیرگواری ءَ گل جان، اسرار احمد، عثمان شاہ ٹپی بوتگ انت –

ٹپی بوتگیں مردم بولان کمپلکس نادراھجاہ ءَ سرکنگ بوتگ انت-

دکی ءَ ڈوک جنگی ءُ تیرگواری ءِ وئیل ءَ دو مردم ٹپی بوتگ اَنت –

پولیس ءِ رِد ءَ اولی وئیل رودراتکی شاھدگ ءِ سر ءَ ناشناسیں مردمانی ڈوک جنگی ءُ برزی تیرگواری کتگ، ڈوک لگگ ءَ روزی خان ء شیرخان نامیں مردمے ٹپی بوتگ –

وئیل ءَ پد یک ٹولی ءَ ہالجین بند کنگ ءِ جھد کرتگ ، ہالجین بند کنگ ءِ بگیری ءَ دو ٹولیانی میان ءَ تیرگواری بوتگ چریشی ءَ محمد افضل ء سیف اللہ ٹپی بوتگ –

دمگی پولیس ءَ وت ءَ وئیل جاہ ءَ سر کتگ ءُ تیرگواری بند کنائینتگ ءُ ٹپی بوتگیں مردم لورلائی نادراھجاہ ءَ سرکتگ –

دگہ وئیلے پنجگور ءِ دمگ گرمکان ءَ دیم ءَ اتکگ کہ تیرگواری ءَ یک مردمے بیران بوتگ –

پولیس ءِ رِد ءَ گرمکان ءَ تیرگواری ءَ زاکر ء بھرام جھمنند پلنتاک ہال بیران بوتگ –

پولیس ءِ رد ءَ ملا حفیظ نامیں مردمے ءِ بیٹک ءَ اے مردم وت ماں وت اڑ اِتگ انت تیرگواری ءَ وئیل دیم ءَ اتکگ – پولیس ءَ لاش دست گپتگ ءُ سول ھسپتال ءَ سرکتگ –

ھمے وڑ بلوچستان ءِ دمگ کچلاک ءَ تیر گواری ءِ وئیل ءَ یک مردمے بیران بیتگ –

پولیس ءِ رِد ءَ وئیل شال ءِ دمگ کچلاک ءَ جنگ ءُ چوپ ءِ میان ءَ تیرگواری ءَ یک مردمے بیران بوتگ – دمگی پولیس ءَ لاش دست گپتگ نادراھجاہ ءَ سرکتگ، اے درگت ءَ پولیس گیشیں پٹ ءُ پول کنگ ءَ انت –

دومی نیمگ ءَ بلوچستان ءِ دمگ دالبندین ءَ گزن لیویز پانگس ءِ نزیک ءَ دگ ءِ وئیل ءَ سَے مردم بیران ءُ یکے ٹپی بوتگ –

اھوالکار ءِ رِد ءَ تیل کشیں پیک اپ گاڑی ءِ ٹیر ءِ ترککگے سوب ءَ گاڑی ءَ گوں ٹریلر ءَ ڈیک وارتگ ، وئیل گاڑی ءَ آس لگتگ ٹریلر ڈرائیور ٹپی بوتگ وھدیکے سَے مردم ستکگ ءُ بیران بوتگ اَنت، بیران بوتگیں مردمانی تہ ءَ یک مردمے ءِ جون درکنگ بوتگ وھدیکے دگہ دؤئیں مردم سک باز ستکگ انت – وئیل ءَ بیران بوتگیں مردمانی پجار امین اللہ ء ملک رفیق ملازئی، سفر خان ء جنگی خان نصروی ءُ عامر ء یونس جھمنند ماشکیل ءِ نام ءَ چہ بوتگ انت –

بلوچستان ءَ بیوکیں وئیلاں ھزارانی مردمانی جان ءُ ساہ زوال بیگ ءَ اَنت بلے سرکاری واکدار تنی وھدی اے وئیلانی گر ءُ دار کنگ ءَ ھچ پیم ءَ گندگ بیگ ءَ نہ اَنت –

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ دوسد ءُ ھپتاد دو روچ سرجم بوتگ- جتا جتائیں پگر ءِ منوگراں بنجل ءِ تر ءُ تاب کُتگ ءُ بیگواھیں مردمانی کھولانی گوم ءَ دلپدردی درشان اتگ –

وائس فار بلوچ مسنگ پرسنز ءِ رھشون ماما قدیر بلوچ ءَ گوشتگ کہ پاکستانی پوج وتی نوکیں ھکمت عملیاں گوں بلوچ راج ءِ سر ءَ بیڑ بارت آ مھلوک ءِ سر ءَ وتی لشکر کشیاں گیش کرت کنت، آ بلوچ چکچینی ءِ گیشی کاریت، آ پارلیمانی گلانی رھشونانی کمک ءَ وتی چیریں ادارھانی دست ءَ بلوچ پرزندانی آوار جنی، کشت کوش ھم کرت کنت، زورگیریں ریاست میان اُستمان ءَ ھم بلوچ جھد ءِ کاؤنٹر کنگے چن ءُ لانچ انت –

آئی ءَ گوشتگ کہ ریاست ءِ نیمگ ءَ چہ بلوچ چکچینی ءَ نہ کمی اتکگ ءُ ناکہ کیت – ریاست ءَ گوں زمین ءِ واستا انت ناکہ بلوچ راج ءَ – مروچی ھزارانی کچ ءَ مات وتی پرزندانی شھیدی ءَ ارسیگ انت ءُ سدانی کچ ءَ ھنچیں زالبول ھست کہ وتی لوگیانی زانگولیں جونانی گندگ ءَ وتی ھرس ءِ داشتگ انت –

آئی ءَ دیمتر ءَ گوشتگ کہ ریاست ءَ کوھلو، کاھان، ہرنائی، کلات ءُ دگہ بازیں دمگاں چہ پیش ءِ تباھی ءَ دگہ دو ھمنچو گیشی ءِ گون ءَ ایردستیں بلوچستان سر ءَ نوکتریں جنگی بالی گراباں گوں بلوچ لس مھلوک سر ءَ زوراکی بندات کرتگ کہ وتی زور ءَ برجاہ انت –