TBP Balochi

سر بیتگیں ھالانی ھالانی رد ءَ روکپتی بلوچستان ءَ گیرت ءِ نام ءَ یک زالبولے وتی برات ءَ کُشتگ ءُ برات دمگداراں دزگیر کرتگ –

وئیل دزاپ ءِ دمگ نسر آباد ءِ ھند حسین آباد ءَ پیش اتکگ کہ اود ءَ یک زالبولے برات ءَ تیر جتگ ءُ کُشتگ –

کُشتگیں زالبول ءِ اُمر سِی سال اِنت کہ گوستگیں روچ ءَ برات ءَ آئی ءِ سر ءَ تیرگواری کُرتگ ءُ کُشتگ ءُ دمگداراں کوشکار دزگیر کرتگ ءُ آئی ءِ توپک ھم دستیگ کنگ بیتگ –

زانگ بہ بیت گوستگیں ماہ ءَ دزاپ ءَ ھم لوگ واجہ ءَ وتی زال لوگ ءِ سر ءَ ھتر داتگ ءُ کُشتگ اَت –

ھمے وڑ ءَ گوستگیں روچاں پھرہ ءَ یک زالبولے ءَ زھر وارتگ ءُ وتکشی کرتگ اَت روکپتی بلوچستان ءَ ھمک روچ ءَ جتا جتائیں وئیلاں لس مردمانی کوش ءُ زدگ بیگ ءِ ھال چاگردی رسانکجاھاں شنگ بیگ ءَ اَنت –

بلوچ کمپعن فعالین ءِ گوشگ اِنت کہ گوستگین سال ءِ گڈسر ءَ بہ گر داں انیگ ءَ یازدہ زالبول ءُ جنکویں چُک جتا جتائیں وئیلانی آماچ بیتگ ءُ بیران بیتگ اَنت، کہ آیانی تہ ءَ گیشتر کسانیں جنکو کہ آپاں کپتگ ءُ بڈ اِتگ اَنت –

سربوتگیں ھالانی رِد ءَ بلوچستان ءِ تہ ءَ جھانی وبا کرونا وائرس ءِ نادراھی ءَ آماچ بوتگیں ھشتاد ءُ یک دگہ نوکیں کیس دیم ءَ اتکگ ءُ اے وھد ءَ کرونا وائرس ءَ آماچ بوتگیں درسیں مردمانی کچ بیست ھزار ءُ یکسد ءُ ھپتاد ءُ ھشت ءَ سر بوتگ اَنت –

جاندراھی بنشون ءِ نیمگ ءَ چہ مروچی آدینگ ءَ شنگ بوتگیں رپورٹ ءِ رد ءَ گوستگیں بیست ءُ چار ادارانی میان ءَ بلوچستان ءَ کرونا وائرس ءِ نادراھی ءَ آماچ بوتگیں دگہ ھشتاد ءُ یک نوکیں کیس رپورٹ بوتگ ءُ بیست ءُ ھپت وش بوتگ اَنت –

رپورٹ ءِ رِد ءَ بلوچستان ءِ تہ ءَ آدینگ ءِ روچ ءَ یک ھزار ءُ سی ءُ پنچ مردم ءَ کرونا نادراھی ءِ ٹیسٹ کنگ بوتگ اَنت کہ آھانی تہ ءَ شست ءُ شش شال، شش ھزدار، تربت ءِ سَے سَے ءُ نصیر آباد سَے ءُ ژوب ، کلات ءُ چعفرآباد ءَ یک یک ٹیسٹے کنگ بوتگ اَنت – بلوچستان ءِ تہ ءَ کرونا نادراھی ءَ آماچ ءَ بوتگیں مردمانی کچ نوکیں کیساساں ھوار سرجمی ءَ بیست ھزار ءُ یک سد ءُ ھپتاد ءُ ھشت ءَ سر بوتگ اَنت –

رپورٹ ءِ گوستگیں بیست ءُ چار ادارانی میان ءَ بیست ءُ ھپت مردم وش بوتگ اَنت، وش بوتگیں مردمانی کچ نوکیں کیساساں ھوار سرجمی ءَ نوزدہ ھزار ءُ سَے سد ءُ بیست ءُ دو انت – رپورٹ ءِ رِد ءَ جھانی وبا کرونا وائرس ءِ نادراھی ءَ بیران بوتگیں مردمانی کچ درسی دو سد ءُ سینزدہ انت وھدیکہ ھستیں نادراھانی کچ شش سد ءُ چل ءُ سَے انت –

رپورٹ ءِ رِد ءَ شاھدربر جاھاں یکسد ءُ ھشتاد ءُ یک مردم کرونا ٹیسٹ کنگ بوتگ اَنت کہ آھانی تہ ءَ دہ مردماں کرونا ءِ نادراھی بوتگ اَنت –

رپورٹ ءِ رد ءَ بلوچستان ءِ تہ ءَ چاردہ نادراہ ہائی آکسیجن فلور انت وھدیکہ جھانی وبا کرونا وائرس ءِ نادراھی گیشتر تالان بوگ ءِ برزی ھپت بما ھشتاد ءُ دو درسد انت –

وھدیکے ما اے زلم ءُ زوراکیانی درگت ءَ پگر ءُ ھیال کن ایں گڑا پہ ما بس یک راھے پشت کپ ایت کہ آ پرایمنیں جُھدے راہ انت، بے دلی مرگ ءَ چہ گھتر انت کہ پہ تمردی مرگ ءَ بہ مِر – ماما قدیر بلوچ

بلوچستان ءِ بنجاھی شھر شال ءِ پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ دوسد ءُ ھپتاد ءُ ھشت روچ سرجم بوتگ- این ڈی پی ءِ شاھزیب بلوچ، نعمت شاہ، ٹکری سیف اللہ ءُ دگہ مردماں بنجل ءِ تر ءُ تاب کُتگ ءُ بیگواھیں مردمانی کھولانی گوم ءَ دلپدردی درشان اتگ –

وائس فار بلوچ مسنگ پرسنز ءِ رھشون ماما قدیر بلوچ ءِ گوشگ ات کہ وھدیکہ ما اے زلم ءُ زوراکیانی درگت ءَ پگر ءُ ھیال کنیں گڑا پہ ما بس یک راھے پشت کپ ایت کہ آ پرایمنیں جُھدے راہ انت، بے دلی مرگ ءَ چہ گھتر انت کہ پہ تمردی مرگ ءَ بہ مِر –

آئی ءِ گوشگ اَت کہ نام نھادیں راجداری سوداگر، دُز ءُ ڈنگ، نشہ باپاری کنوک ، آوار جنوکاں ھوار دگہ چاگردی سلکاریاں ھواریں مردم ریاست ءَ دیم ءَ آرتگ انت او آھاں مھار بڈا دیگ ءُ یل کنگ بوتگ اَنت کہ شما دُزی ڈنگی بہ کن ات بلے اشی ءِ بدل ءَ بلوچ ورنایانی چاریگری ءَ بہ کن ات ءُ ایف سی ءُ چیریں ادارھاں ھوار بہ بہ اِت مردماں آوار بہ جن اِت –

ماما قدیر بلوچ ءِ گوشگ ات کہ ھما وڑیں زلم ءُ زوراکی کہ اسلامی جمہوریہ پاکستان ءِ ھاکم بلوچستان ءِ سر ءَ کنگ ءَ انت، پاکستانی ھاکم انسانیت ءُ مسلمانیت ءَ وتی پادانی چیر ءَ لگتمال کنگ ءَ انت ءُ بلوچانی کُشت ءُ کوش ءَ کنگ ءَ انت – اگاں ما انسان انت ءُ انسانیت رکینگے ھاتر ءَ جوڑ بوتگ اِنت کانود ءُ رھبند مئے ھاتر ءَ ھم ھست انت گڑا ما دنیاء ءَ سرپد کن ایں مروچی ھم مئے دوستیگیں مردم پہ تاکت ءِ زور ءَ آوار جنگ ءُ بیگواہ کنگ بوگ ءَ انت-

سربوتگیں ھالانی رِد ءَ خیبرپختونخواہ ءِ ھند کوہاٹ ءَ یک گورے ءَ شانزدہ جون دست کپتگ –

پولیس ءِ بنشون ءِ رِد ءَ شانزدھیں جون کوھاٹ ءِ کوھی دمگ بوبو خیل ءَ یک گورے ءَ دست کپتگ انت – پولیس ءَ جون درکتگ ءُ وئیل درگت ءَ گیشیں پٹ ءُ پول کنگ انت –

زانگ بہ بیت چد ءُ پیش سال دوھزار دوازدہ ءِ مارچ ماہ ءَ ھم خیبر پختونخواہ ءِ ھند کوھاٹ ءِ کوھی دمگ جواکی ءَ یک گورے ءَ پنجاہ ءَ گیش جون دست کپتگ –

ھمے وڑ خیبر پختونخواہ ءَ ھوار بلوچستان ءِ تہ ءَ ھم گوستگیں ھپتگ ءَ ڈیرہ بگٹی ءِ دمگ سوئی ءَ یک گورے ءَ چار جون دست کپتگ – اشی ءَ ابید ڈیرہ بگٹی ءَ دگہ دو دمگ ءَ گور گندگ بیتگ اَنت کہ آھانی تہ ءَ زالبولے ءَ ھوار دگہ بازیں مردمے ھڈ در اتکگ انت – ءُ بلوچستان ءِ دمگ ھزدار توتک ءُ کیچ ءَ ھم گاریں گور دست کپتگ – توتک ءِ دمگ مژی ءَ سال دوھزار ءُ چاردہ ءَ یک گورے ءَ یک سد ءُ شست ءُ نُہ مردمانی جون دراتکگ اَنت – کہ آھانی تہ ءَ بازیں مردم بس ھڈ سر اتکگ انت – آھانی تہ ءَ بس دو مردمانی پجار بوتگ کہ اھانی سیادی بلوچستان ءِ دمگ آواران ءَ بوتگ –

سیاسی ءُ چاگردی مردمانی گوشگ انت کہ پاکستانی ریاست ، چیریں ادارہ ءُ آئی داشتگیں ڈیتھ اسکواڈ ءِ کارمندانی کتکاری انت کہ راجدار، نودربر دگہ پگرانی منوگراں زورانسری آوار جن انت وتی چیریں جاھاں بندیگ کن انت، لٹ ءُ کُٹ کنگ ءَ پد آھاں شھید کن انت بازینے زانگولیں جوناں ویرانگاں چگل دے اَنت ءُ بازینے ھمے وڑ گَڈانی تہ ءَ دست کپ انت کہ آ ھچ وڑ ءَ پجارگ نہ بنت –

نبشتانک: استاد مئے چاگرد ءِ بد بھتیں مردم

نبشتہ کار: رفیق بلوچ

دی بلوچستان پوسٹ

مرچی بیست ءُ یکمی کرن انت، کہ بنی آدم ءَ ہمک پڑا پٹ ءُ پولکاریءِ برورد ءَ دیمروئی کرتگ بلے ما بلوچ انچیں راج ایں کہ نزاناں مئے بندیک ءِ سر کجا گار انت دنیگت ءَ ما وتی بندری ہنکین ءِ گیشینگ ءَ ھم بے سوب بوتگ اِنت –

بلوچ کجا چہ اتکگ دنیگت ءَ ایشی ءِ راستیں پسو بندپتراں بس مبالغهے پش کپتگ بلئے نوں کجام گلہ ءَ بہ کن ایں کہ ھمک روچ ناوشیں روچے پہ بلوچ ءِ سر ءَ میلانک انت اے اھد ءِ مردمانی گپاں بہ کن ات اَنت-

کجا اتکگ ءُ سر بوتگ انت؟ آہانی کار ءُ کرد چے بوتگ انت کہ آیاں وتی ملک، مردم دیمروئی ءِ راہاں گیتکگ انت دومی پلو ءَ اگاں ما وت ءَ را دیم پہ دیمی ءَ گوں ہورتچاری ءَ بہ چار ایں تاں ما ھر وھد ءَ وت ءَ را وت ملامت کن ایں –

بلئے بن ءُ بندری جیڑہ ایش انت کہ مئے زہن، ھیال ءُ پکر گلام انت، پد ءَ ہمک گلامی زہن ءِ سوب ءَ ھمے گپاں وتی دیم ءَ ایر کنت کہ دنیا ماہ ءِ سر ءَ شتگ، سرانت ما انگت ءَ زمین ءَ گوں بندوک وتی جنجالاں مانگیش اتگیں انو بلوچستان ءِ جاور مئے دیم ءَ انت کہ ما وتی چماں گوں گندگ ءَ ایں ما وتی نودربرانی گپاں بہ کن ایں کہ آ کجام شُمیں روچ نہ بوتگ کہ مئے نودربر چہ وتی وانگجاہاں در کنگ ءُ بے ازت کنگ نہ بوتگ انت برے فیسانی سر ءَ، برے وتی رزرب سیٹانی سر ءَ برے وتسریں بھتام ءِ سر ءَ مشگ بوتگ ھمک روچ دگانی سر ءَ کپتگ انت-

روانک کشگ ءَ انت، زھرشانی کنگ ءَ انت، شدلاپی ھڑتال کنگ ءَ انت۔ پہ وتی ھکانی واستا کہ مارا وانگ ءِ ھک ءَ بہ دے انت مارا زندگ بوگ ءِ ھک ءَ بہ دے انت مئے ملک ءِ کانود ءِ تہ ءَ اے چیز وت است ءُ زاہر انت کہ ھر یک مردمے ءَ را ھک است بہ وانیت، لائک بہ بیت۔

من نزاناں مئے بلوچانی کسمت ءَ ھمے کوراسی ءُ بزگی نبشتہ انت یا مارا پہ زور ھمے وڑ کنگ بوگ ءَ انت استاد راجانی راہبر زانگ بنت ءُ استاداناں دگہ انچیں باز جوانیں نامے دیگ بوتگ آ مردم کہ استادے بوت بزان گڑا آ روحانی پت زانگ بیت انچو گش انت دنیا دومی جھانی جنگ ءَ سک باز بد ءُ بیرانی بوتگ ءُ باز مردم کشگ بوتگ اَنت وھدے کہ جنگ کمو تر اتگ گڑا ھٹلر ءَ جرمنی ءِ مردماناں آئی ءَ گشتگ کہ ما نوں تباہ برباد بوتیں، زان ئے ھٹلر جست ءِ چے پسو داتگ ات کہ مئے راج ءِ استاد چون انت، زندگ ءُ سلامت گڑا آیاں گشتگ ات، جی واجہ سلامت انت گڑا ھٹلر ءَ گشتگ ات ھچ پریشان مہ بہ ات مئے استاد ءُ راہ دربر است انت گڑا بزان ات کہ ما برباد نہ ایں بلکیں انگت استادانی باز حیال ءَ بکن ات۔

پرچہ کہ باندات ءِ مئے راج ءِ راہبر ءُ راہشوناں ھمے استاد جوڑ کن انت اگاں ما وتی ملک ءِ تہ ءَ بہ چار ایں گرا مئے استاد ھمک روچ دگانی سر ءَ لٹ ءُ کٹ، بے ازت کنگ بوگ ءَ انت اے چیریں ھبرے نہ انت مئے استاد چنچو روچ انت پہ وتی ھکانی ھاترا زہرشانی ءَ انت بلے اد ءَ گوشداروک نیست، ما بلوچ ءِ راجدپتر ءَ بہ چار ایں گڑا بلوچ ءِ زالبول وتی لوگ ءَ چہ در نہ یتکگ انت اے بلوچ ءِ ازت بوتگ انت مرچی مئے مات ءُ گھار دگانی سر ءَ کپتگ انت سرکار آھانی گپانی گوشدارگ ءَ تیار نہ انت بلے ہمے زال انت کہ سرکار ءِ دلارانی دست ءَ بے ازت کنگ ءُ زاہ ءُ بد کنگ بوگ ءَ انت-

بلے سد اپسوز کہ سرکار ءِ گوشاں مورے ھم نہ وارت اے سرکار ءِ سر ہم کار نہ کنت کہ اے اڑ ءُ جنجال چہ مردماں چون بہ کش ایت مردم چہ گژن ءُ شد ءَ مرگ ءَ انت ھدا زانت کہ اے مردم چہ وتی زند ءَ بے زار انت بلکیں وتی مرگ ءِ دوا ءَ ھدا ءِ نیمگ ءَ لوٹ انت ھر کس زانت مِرگ وش نہ انت بلے تئی زندگ بوگ ءَ را ھچ مکسد کہ نیست انچو ازاب انت کہ چرے زندءَ چہ مرگ ھم ازت ئِے

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: شہید گپار لانگو ءِ نِمدی پہ دُتّکیں جنک مھرنگ ءَ

نبشتہ کار: میرین بلوچ

دی بلوچستان پوسٹ

دْروت

مرچی دراجیں مدتے ءَ پد پہ شُمئے واستا نمدی یے نبشتہ کنگ ءَ آں پرچا کہ بازیں مُدتے بیت من شُمارا نہ دیستگ ءُ نا گوں شُما ھال ءُ اھوال بیتگ پمیشکا منی دل ءَ گُشت کہ پہ شُما نمدی یے نبشتہ بکن آں – دروت منی دُتّکیں جنک مھرنگ جان اُمیت کش آں پاک وند ءِ دربار ءَ تو وش ءُ جوڑے پہ ترا مدام وشی ءُ دراھی بات گم ءُ درد مہ گندات اِت راج ءِ درد واریں بانک ئے بات ئے ءُ من مُدام شُمئے وش ءُ سلامتی ءَ لوٹوک آں برے برے من رنجیگ باں ءُ گمانی درد منی سر ءَ امبار کن اَنت کہ منی ھامر جان ءُ پنچیں جَنّکاں کہ منی زندئِے گُڈی دیدار ھم شُمئے نسیب ءَ نہ بوت-

مھرنگ او مھرنگ منی دلدردیں گپاں دلگوش کن ءُ من ءَ باریں ھالاں بہ دے ھامر جان وش ءُ سلامت اِنت ءُ تئی مات ءِ گمانی کوہ کہ مدام من ءَ گیر کاینت باریں چون اِنت باریں انگت ءَ شمئے گور ءَ شمارا تسلہ دنت کہ شمئے پت کوٹ کچھیریانی پُشت ءَ تچ ءُ تاک ءَ اِنت؟ باریں انگت ءَ شمارا تَسلہ دنت کہ شمئے پت گل ءِ سیشن ءَ دگہ ھَلکے ءَ شتگ؟ من ءَ اُمیت اِنت نِی شمارا اے منی راستی ءِ ھال ءَ دنت کہ شمئے پِت ءَ بزگ ءُ زیردستانی واستا وتی ھوناں مُرتگیں درچکے سیراپ کتگ –

او منی ماھیں جنک ماھو جان ترا دگہ گپے بہ گوش آں؟ من ءَ گیشتر چی یات آیگ ءَ اِنت اے ساھت ءَ؟ بہ گوش من ءَ انی کجام بے تاھیری ءَ شمئے نیمگ ءَ لاچار کتگ؟ ماھوئیں مھرنگ جان اد ءَ ھچ چیزے کمی نیست اِنت نانکہ دگہ تکلیف ءُ دگہ زوراکی اد ءَ ھروچ سنگتانی دیوان اِنت، ماھو جان ترا بہ گوش آں اد ءَ درستیں سروک ھمد ءَ آں بابا ھیر بکش مری، نواب اکبر بگٹی، گلام مھمد بالاچ، منان جان، جنرل اسلم سنگت سناء، امیر بکش سگار درست ھمک بیگاہ دیوان کن اَنت کَچاری ءُ دیوان اِنت ٹھک ءُ کندگ اِنت ھمک وشی ءُ شاتمانی اِنت ماھوئیں مھرنگ جان اگاں یک چیزے ءِ کمی اِنت گڑا آ بس شُمئے لُنٹانی بچکندگ ءُ کسہ ءِ گوشدارگ ءَ من بے تاھیراں بلے کرنے ءَ پد دوشی تو پد ءَ منی واب ءَ اتکگ اِت ئے کہ دوشی تو چراگ ءِ ھم بلینتگ اَت ءُ آئی ءِ شھم منی چماں کپت بلے مُج مُج ءُ تہار اَت پمشکا من تئی گور ءَ اَتک نکُت منی واھشت اَت کہ بیاں تئی دیدار ءَ بکناں تئی پُر مھریں بچکندگاں بِماراں ءُ تئی مسکیں ملگوراں بے سَماراں ءُ تئی سر ءَ وتی زانسراں ایر بکناں ءُ گیدی ءِ کسھاں بیاران منی لاڑیں جَنّک ماھو ترا یاد بیت کہ تو سک کسان اَت ئِے وتی سر منی زانسراں ایر کُت ءُ مُدام گُشت اَبَّا من واناں ڈاکٹرے باں ءُ وتی راج ءِ ازمت ءَ کناں ءُ بلے زیکیں سنگتے گوں گرنچاں اتکگ اَت گوشگ ئیگ ءَ آئی گرنچانی تہ ءَ تئی کلوھانی وشبو پیداک اَت بلکیں تو گون نہ کتگ اَنت بلے من ءَ سما بیت تئی کلوہ ھمے گرنچانی تہ ءَ مان اَنت ءُ گرنچانی تہ ءَ اے ھم مان اَت کہ بلوچ زالبولانی رھشونی ءَ ڈاکٹر مھرنگ نامیں جنکے کنگ ءَ اِنت من ءَ ھمے ساھت ءَ ھما کسانی ءِ گپ تئی یات اتک کہ بیت کنت اے منی مھرنگ اِنت ءُ من ءَ ھم ھمے اُمیت اَت کہ تو مرچی ڈاکٹر ے ءِ جوڑ بیتگے ءُ وتی راج ءِ زالبولانی رم ءَ ھوارے –

او منی پھک دامنیں ماھو تھاری ءِ دیم ءَ ھچبر مہ رو اِت تھاری زندمان ءِ واھشت ءَ گُٹ گیر کنت ءُ گار ءُ گُم کنت ءُ مُدام روژنائی ءِ پِڑا آشنا بِہ بہ بئیت چیاکہ روژنائی ءِ سر بلندی اَنت ءُ منی جَنّک ماھو ترا ھالے بہ دے آں؟ زیکّیں روچ ءَ من بانک ءِ گِندُک ءَ ھم شُت آں وش ءُ سلامت اَت ءُ من اے ھم گُشت تو پرچا چو اشتاپ ءَ اتکگ ئے اود ءَ منی دُتک ابیتک کتگ؟ بلے من ءَ ھمے پَسّوے دات کہ من یک بانُکے ءَ کہ اِد ءَ اتکگاں بلے منی سرزمین ءَ ھزار ءَچہ گیش بانُک پشکپتگ منی اُوست ءُ اُمیت گوں ھزاراں بندوک اَنت ءُ منی پگر ءُ سوچ ھزاراں مھرنگ، ھزاراں ھسیبہ ءُ مھلب ءُ ھزاراں سمی گوں بندوک اَنت ءُ من ء اُمیت اِنت کہ ھزاراں مھرنگ نوکین آشوبے کار اَنت ءُ ھزاراں مھرنگ ودی بنت ءُ من پاد اَتکاں کہ تئی گورا کائین بلے تئی دست ءِ چراگ ءِ شھم مُج مُج ءُ تھار اَت ءُ منی چم نزور نزور اِت اَنت کہ من بیا آں بلے من ءَ ستک انت ءُ من دل ءَ جزماں کہ منی جَنّک ماھو چو بے ھاٹیگ نہ اِت کہ دژمن ءِ دیم ءَ وتی سریگ ءَ دور بہ دے ئِے ءُ پہ دو اَشتانہ ءَ وتی سر ءِ سریگ ءَ بہا بکن ئے منی جَنّک ماھو من ءَ ھمے اُمیت انت کہ تو چراگ ءِ روژنائی ءَ الم گیشتر دیمترا رژنا ءُ کاروان ءَ وتی منزل ءَ سر کن ئے ءُ آؤکیں باندات ءَ یک نوکین سُھب ئے ءِ بندات بیت اِنت ءُ آ سُھب ءِ سارتُکیں سمین ءَ من نہ بلکیں درائیں ھور ءُ ھمبل کُلّ یکجاہ ننداں ءُ دیوان کن اَنت ءُ پد ءَ داوت کن اَنت ءُ گپ ءُ کچاری ٹھک ءُ دیوان بیت اِنت –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ٹی بی پی پتر ھال ءَ سر بیتگیں ھالانی رد ءَ بلوچستان ءِ دمگ نوشکی ءَ دو سال ءُ نیم ءَ بیگواہ ءَ بیتگیں دو کس یل کنگ بیتگ ءُ وتی لوگاں سر بیتگ اَنت –

یل بیتگیں مردمانی پجار 13 مارچ 2019 ءَ نوشکی ءَ بیگواہ بیتگیں عبدالغنی ء رسول بکش ءُ دو سال ءُ نیم ءَ نوشکی اھمد وال ءَ بیگواہ بیتگیں اھمد نواز ء مھمد اعظم ءِ ناماں زانگ بیتگ اَنت –

یل بیتگیں مردمانی یلہ بیگ ءِ ھال بلوچستان ءَ گار ءُ بیگواھیں مردماں پد جنوکیں گل وائس فار بلوچ مسنگ پرسنز ءَ راست کرتگ ءُ گوشتگ کہ مردمانی یل بیگ وشیں گَپے –

بلوچستان ءَ سیاسی ءُ چاگردی رسانکجاھاں کارمرد کنوکیں مردمانی گوشگ اِنت کہ سرکار یک نیمگے ءَ چَندے مردم یل کنگ ءُ دومی نیمگ ءَ دو کساس ءَ گیش مردماں گرگ ءُ بیگواہ اِنت –

زانگ بہ بیت گوستگیں لھتے روچاں بلوچستان ءِ جتا جتائیں جاھاں مردمانی آوار جنیانی تہ ءَ گیشی گندگ ءَ اَتکگ –

گوستگیں روچاں کراچی ءَ بلوچ شائر ءُ گوادر ءَ بلوچ نودربر ءُ کاھان ءُ سبی ءَ چار مردمانی آوار جنگ ءُ چار مردمانی کوشانی ھال چاگردی رسانکجاھاں سر بیتگ اَنت –

دومی نیمگ ءَ شال ءَ گار ءُ بیگواھیں مردمانی یل کنگ ءِ ھاتر ءَ وائس فار بلوچ مسنگ پرسنز ءِ زھرشانی شال ءِ پریس کلب ءِ دیم ءَ گوستگیں یک دھکے ءَ گیش برجاہ اِنت کہ آئی ءِ سروکی ءَ وائس فار بلوچ مسنگ پرسنز ءِ وائس چیئرمین ماما قدیر بلوچ کنگ ءَ اِنت –

سربوتگیں ھالانی رِد ءَ بلوچستان ءِ تہ ءَ جھانی وبا کرونا وائرس ءِ نادراھی ءَ آماچ بوتگیں پنجاہ ءُ ھپت دگہ نوکیں کیس دیم ءَ اتکگ ءُ اے وھد ءَ کرونا وائرس ءَ آماچ بوتگیں درسیں مردمانی کچ نوزدہ ھزار ءُ نُھ سد ءُ نود ءُ نُھ ءَ سر بوتگ اَنت –

جاندراھی بنشون ءِ نیمگ ءَ چہ شنگ بوتگیں رپورٹ ءِ رد ءَ گوستگیں بیست ءُ چار ادارانی میان ءَ بلوچستان ءَ کرونا وائرس ءِ نادراھی ءَ آماچ بوتگیں دگہ پنجاہ ءُ ھپت نوکیں کیس رپورٹ بوتگ ءُ بیست ءُ ھپت وش بوتگ اَنت –

رپورٹ ءِ رِد ءَ بلوچستان ءِ تہ ءَ چار شمبے روچ ءَ ھشت سد ءَ شانزدہ مردم ءَ کرونا نادراھی ءِ ٹیسٹ کنگ بوتگ اَنت کہ آھانی تہ ءَ پنجاہ ءُ سَے شال، دو سبی ءُ چاگی ءُ ژوب ءَ یک یک ٹیسٹے کنگ بوتگ اَنت – بلوچستان ءِ تہ ءَ کرونا نادراھی ءَ آماچ ءَ بوتگیں مردمانی کچ نوکیں کیساساں ھوار سرجمی ءَ نوزدہ ھزار ءُ نُھ سد ءُ نود ءُ نُھ ءَ سر بوتگ اَنت –

رپورٹ ءِ رِد ءَ جھانی وبا کرونا وائرس ءِ نادراھی ءَ بیران بوتگیں مردمانی کچ درسی دو سد ءُ دوازدہ انت –

رپورٹ ءِ رد ءَ بلوچستان ءِ تہ ءَ جھانی وبا کرونا وائرس ءِ نادراھی گیشتر تالان بوگ ءِ برزی شش بما نُہ در سد انت –

سربوتگیں ھالانی رِد ءَ بلوچستان ءِ دمگ مستونگ ءَ تیرگواری ءِ وئیلے ءَ یک مردمے ٹپی بوتگ، پنجگور ءَ دگ ءِ وئیلے ءَ پنچ مردم ٹپی بوتگ اَنت، وھدیکہ نوشکی ءَ کرنٹ لگگ ءِ سوب ءَ گونڈلے زدگ بوتگ-

گیشیں ھالانی رِد ءَ بلوچستان ءِ دمگ مستونگ ءَ دو ٹکانی میان ءَ جنگ ءُ چوپ بوتگ، تیرگواری ءَ یک مردمے ٹپی بوتگ –

دمگی پولیس ءِ رِد ءَ کلی محمد حسنی نزیک ءَ دو ٹولیانی میان ءَ ٹکی جیڑہ ئِے سر ءَ جنگ ءُ چوپ بوتگ – تیرگواری ءِ سوب ءَ احمد جان نامیں مردمے ٹپی بوتگ – ٹپی بوتگیں مرد شھید غوث بخش رئیسانی نادراھجاہ ءِ کاردارے بوتگ –

ٹپی بوتگیں مردم ھما دمان ءَ نادراھجاہ ءَ سرکنگ بوتگ، وئیل ءِ درگت ءَ پولیس گیشیں پٹ ءُ پول کنگ ءَ انت –

دومی نیمگ ءَ پنجگور ءَ دگ ءِ وئیلے ءَ پنچ مردم ٹپی بوتگ اَنت –

لیویز ءِ رِد ءَ پنجگور ءَ دگ ءِ وئیل ءَ پنچ مردم ٹپی بوتگ اَنت، وئیل پنجگور ءِ دمگ پروم کپ ءَ دیم ءَ اتکگ –

وئیل ءَ ٹپی بوتگیں مردمانی پجار سراج ء محمد عصا جھمنند واشک، ولی ء اللہ داد جھمنند واشک، نور احمد ء فیروز شاہ جھمنند واشک، مجیب الرحمن ء محمد بخش جھمنند مشکے، مراد ء جان محمد جھمنند مشکے ءِ نام ءَ چہ بوتگ انت –

ٹپی بوتگیں مردم لیویز ءِ کارمنداں دست گپتگ ءُ نادراھجاہ ءَ سر کتگ انت –

دگہ وئیلے بلوچستان ءِ دمگ نوشکی ءَ دیم ءَ اتکگ کہ کرنٹ لگگ ءِ سوب ءَ کسانیں گونڈوے ٹپی بوتگ –

وئیل نوشکی ءَ عیدگاہ ءِ نزیکیں الکٹرونک دکان ءَ دیم ءَ اتکگ کہ دکان ءَ کار کنوکیں کسانیں گونڈو عبدالجبار ء خالد زمان مینگل لین ءِ کرنٹ ءِ گرگ ءِ سوب ءَ ٹپی بوتگ –

گونڈو ھما دمان ءَ پہ جاندراھی ءِ ھاتر ءَ ٹیچنگ ھسپتال نوشکی ءَ برگ بوتگ –