TBP Balochi

سر بیتگیں ھالانی رد ءَ روکپتی بلوچستان ءِ دمگ پھر ءَ ایرانی لشکر ءِ سر ءَ سلاہ بندیں مردماں اُرش کرتگ، اُرش ءَ جانی تاوانانی ھال بیتگ اَنت –

اُرش روکپتی بلوچستان ءِ دمگ پھرہ جکیگور ءَ بیتگ کہ ناشناسیں سلاہ بندیں مردماں ایرانی لشکر ءِ سر ءَ تیرگواری کرتگ ءُ چاگردی رسانکجاھاں شنگ بیتگیں ھالانی رد ءَ یک کارندھے بیران ءُ یکے زدگ بیتگ –

تیرگواری گوستگیں شپ ءِ ساھت یازدہ ءَ درپیش اتکگ کہ ایرانی لشکر وتی گاڑی ءَ گوں گشت ءَ بیتگ ءُ ھمے وھد ءَ سلاہ بنداں آیانی سر ءَ اُرش کرتگ –

اُرش ءِ درگت ءَ ایرانی لشکر ءِ بنشون ءِ نیمگ ءَ ھچ ھال نیتکگ ءُ چاگردی ھالانی رد ءَ یک کارندھے بیران ءُ یکے زدگ بیتگ –
اھوالکار ءِ رد ءَ دَہ اپریل ءِ شپ ءَ جکیگور ءِ شھر ءَ سلاہ بندیں مردماں اُرش کرتگ ءُ لشکر ءَ جانی تاوانانی گمانی بیتگ –

اُرش تنی وھدی ھچ گل ءَ نہ منّ اِتگ ءُ وھد وھد ءِ سر ءَ ایرانی لشکر ءِ سر ءَ بیتگیں اُرش سلاہ بندیں گلاں منّ اِتگ اَنت –

زانگ بہ بیت گوستگیں وھد ءَ سیمسر ءَ ایرانی پھزدارانی تیرگواری ءَ لس بلوچانی بیرانی ءَ پد روکپتی بلوچستان ءَ ایرانی لشکر ءِ سر ءَ اُرش ترندی ءَ گندگ اتکگ اَنت –

سربوتگیں ھالانی رِد ءَ بلوچستان ءِ دمگ نصیر آباد ءَ دو جتائیں جاھاں تیرگواری وئیل ءَ سَے مردم بیران سَے ٹپی بوتگ اَنت ، وھدیکہ بلوچستان ءِ دمگ پنجگور ءُ چتکان ءَ دگ ءِ وئیلاں سَے مردم بیران بوتگ اَنت –

گیشیں ھالانی رِد ءَ نصیر آباد ءَ دو جتائیں تیرگواری ءِ وئیلاں سَے مردم بیران ءُ سَے ٹپی بوتگ اَنت –

پولیس ءِ رِد ءَ اولی وئیل نصیر آباد ءِ دمگ صدر پولیس تانہ ءَ قیدی شاخ گوٹ ءَ محمد عظیم جتک ءَ جتک ٹک ءِ دو ٹولیانی میان ءَ دو مردم بیران ءُ سَے ٹپی بوتگ اَنت –

ھمے گوشگ بوگ ءَ انت کہ دؤئیں ٹولی وت ماں وت سیادی دار انت ءُ وئیل زمینی جیڑہ ئِے سر ءَ ودی بوتگ – پولیس ءَ ٹپی ءُ بیران بوتگیں مردم چست کرتگ ءُ نادراھجاہ ءَ سرکتگ انت – بیران بوتگیں مردمانی پجار عبدالعزیز جتک ءُ محمد اسمائیل جتک ءِ ناماں چہ بوتگ اَنت وھدیکہ وئیل ءَ فیروز، یعقوب ءُ نوروز ٹپی بوتگ انت –

ٹپی بوتگیں مردمانی تہ ءَ دو مردمانی جاور نگیگ انت کہ پہ گیشیں الاج ءِ ھاتر ءَ لاڈکانہ ءَ دیم دیگ بوتگ انت – دومی وئیل نصیر آباد ءَ چھتر دگ ءِ نزیک ءَ دیم ءَ اتکگ کہ ناشناسیں مردمانی تیرگواری ءَ یک مردمے بیران بوتگ – وئیل پیشی زاتی دژمنی ءِ سوب ءَ بوتگ –

وئیل ءَ بقا محمد نامیں مردمے بیران بوتگ ، پولیس ءَ مرد ءِ جون چِست کرتگ ءُ نادراھجاہ ءَ سرکتگ ءُ اژدری چار ءُ ٹپاس ءَ پد لاش کھول ءِ ھوالگ ءَ کتگ – ھردو وئیلانی درگت ءَ پولیس گیشیں پٹ ءُ پول کنگ ءَ انت-

دومی نیمگ ءَ بلوچستان ءَ دگ ءِ وئیلاں سَے مردم بیران بوتگ اَنت –

اولی وئیل بلوچستان ءِ دمگ چتکان ءَ دیم ءَ اتک کہ وئیل ءَ یک مردمے بیران بوتگ –

بیران بوتگیں مردم ءِ پجار رضوان ء نیاز رحمت جھمنند کوہ بن حال چتکان ءِ نام ءَ چہ بوتگ –

وھدیکہ دومی وئیل پنجگور ءِ دمگ کاٹاگری ءِ نزیک ءَ سی پیک دگ ءِ سر ءَ دیم ءَ اتکگ –
وئیل ءَ دو مردم بیران بوتگ اَنت – بیران بوتگیں مردمانی پجار دنیگت ءَ نہ بوتگ اَنت –

بلوچستان ءِ بنجاھی شھر شال ءِ پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ دوسد ءُ ھشتاد روچ سرجم بوتگ – بی ایس او ءِ مزن سرکماش محمد اشرف بلوچ، انفارمیشن سیکرٹری بالاچ بلوچ، ءُ کابینہ ءِ دگہ باسکاں بنجل ءِ تر ءُ تاب کُتگ ءُ بیگواھیں مردمانی کھولانی گوم ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءِ گوشگ ات کہ پُرایمنیں جھدے اسلی برورد ستکی پلامرزی انت کہ پُرایمنیں جُھد ءَ مھکم کنت ءُ آئی ءَ منزل ءَ سر کنت، راجی پلامرزی پُرایمنیں جھد ءِ شہ رگ ءِ تہ ءَ پُتریت ءُ آئی ءَ گران ءَ چہ گرانتریں جیڑہ ءُ جنجال ءِ سگگ ءِ بودشت ءَ دنت –

آئی ءِ گوشگ ات کہ منی وڑ ءَ ھزاراں بلوچ مات ءُ گوھار وتی دوستگیں مردمانی ودار ءَ وھد ءَ گوازینگ ءَ انت ءُ اے ھزاراں بلوچانی کھولانی گون ءَ وتی دوستگیں مردمانی یل کنائینگے ھاتر ءَ سرگردان انت کہ آ زورانسری آوار جنگ ءُ بیگواہ کنگ بوتگ انت ءُ مارا اے ھم سرپدی نیست کہ آھانی گوم ءَ چی کنگ بوگ ءَ انت مروچی آ کجام ھال ءِ تہ ءَ انت بلے منی برازتکانی وڑ ءَ زورانسری آوار جنگ بیگواہ بوتگیں ھزاراں بلوچانی دور دیگ بوتگیں زانگولیں جون ءُ لھتے یل بوتگیں مردمانی جاور ھال ءِ گندگ ءَ ما اشی ءَ شری ءَ سرپد بہ ایں کہ مئے دوستیگیں مردمانی گوم ءَ ھم ھمے وڑ بیت اِنت –

آئی ءِ گوشگ ات کہ اگاں ما انسانیں ءُ انسانیت ءِ رکینگے ھاتر ءَ جوڑ بوتگ اِنت کانود ءُ ھک مئے واستا ھست انت گڑا ما دنیا ءَ سرپد کن ایں کہ مروچی ھم مئے دوستیگیں مردم تاکت ءِ زور ءَ آوار جنگ بوگ ءَ انت ءُ آھانی پہ وشی وتی لوگ نندگے ھک پچگرگ بوتگ اَنت –

نبشتانک: کُوکُو گلزمین ءِ کارِستے ات

نبشتہ کار: زندمان بلوچ

دی بلوچستان پوسٹ

1 مئی 2020 ءَ من گوں وتی همبل مرید ءَ ( کہ آئی ءَ من گُرو نام ءِ سر ءَ توار جتگ اَت ) بیگاہ ءِ 5:30 ءَ چہ وتی میتگ ءَ در کپتان ءُ دیم پہ کیچ کور ءِ نیمگ ءَ سر گپت آں من ءَ یات اِنت کہ اے ماه رمزان ءِ ماه اَت ءُ بیگاہ ءِ وهد ءَ جمبراں تربت ءِ دلبند ءَ وت ءَ را سر کتگ اَت ءُ موسم وش کتگ اَت مرید پرپٹ ءَ تاچگ ءَ اَت ءُ من آئی ءِ پشت ءَ سوار اِت اَنت ءُ جمبر ءِ کشوکیں گوات ءِ لزّت ءَ مارگ ءَ ات اَنت- همے دمان ءَ مرید ءَ پرپٹ ٹن دات ءُ تربت ءِ سبزی بازار ءِ راه گپت داں دام ءَ دیست کہ پنچ دری مُشکاں کہ پرپٹاں سوار ءُ تربت ءِ بازار ءَ گشت کنگ ءَ آں ساهت ءِ نہ گوست کہ مُرید ءَ پرپٹاں سوار مُشک کراس کتگ ات اَنت ءُ شیتان چوک ءَ رس اتگ اَت ءُ من ءَ جست ئِے کُت-

یار گَیبو! (هما اِنت کہ مرید ءَ بلوچی پلم کارست چار اِتگ اَنت گڑا من ءَ گیبو نام ءِ سر ءَ توار ئِے دات) مرچاں زاناں پِشّی نیست کہ مُشک پرپٹاں سوار ءُ بازار ءَ گشت کنگ ءَ اَنت من بچکند اِت ءُ گشت گُرو! هر چیز وهد ءِ همراھی ءَ بدل بیت ءُ اے راستیں کہ چیز همے رنگ ءَ بدل بوگ ءَ اَنت چارلس ڈارون بی همے گپ ءَ کنت ءُ اربرٹ اسپنسر بی همے گوش اِیت ڈارون ءِ گوشگ همیش اِنت کہ همک دلّوت وت ءَ ماھول ءِ گون خ ٹھینت داں آ وتی وجودیتے ءَ زندگ داشت کنت ءُ هر هما دلّوت کہ وت ءَ ماھول ءِ تہ ءَ ٹھینت نہ کنت داں آئی ءِ وجودیت ھتم بیت پد ءَ اسپنسر ءَ همے چیز انسانی چاگرد ءِ سر ءَ کارمرز کتگ ءُ گشتگ کہ همک چاگرد وت ءَ وهدے همراھی ءَ بدل کنت داں آئی ءِ نام ءُ نشان ھست ءُ ھیات بیت ءُ هما چاگرد کہ وت ءَ وهد ءِ گوما هوار مٹ مکنت گڑا آئی ءِ نام ءُ نشان انسانی راجدپتر ءِ تہ ءَ گار بیت بوت کنت پِشّیاں وتی جنگی دروشم وهد ءِ همراھی ءَ مٹ کتگ اَنت ءُ من گوش آں مٹ کنگ الّمی اِنت- تو زان ئے سَنزُو وتی کتاب Art Of War ءِ تہ ءَ چے نبشتہ کنت انّاں! آ گوش ایت کہ: همک جنگ ءِ تہ ءَ گوں دژمن ءَ لچی ءُ ٹھگ الّمی اِنت اگاں تو زان ئے کہ تو دشمن ءِ سر ءَ اُرش کنگ ءِ کابل اِت داں وت ءَ را دشمن ءِ دیم ءَ انچش پیش بدار کہ تو کابل نہ ئے، وهدے تو وتی تاکت ءَ دشمن ءِ سر ءَ کارمرز کنگ ءَ ئے داں تو دشمن ءِ چمّاں نزور گِندگ ءَ بیا یے، اگاں تو دشمن ءِ کِر ءُ کَش ءَ ئے داں دشمن ءَ جیڑگ پرما کہ تو آئی ءَ چہ سک دور ءُ اگاں تو دشمن ءَ چہ دورے داں دشمن ءَ جیڑگ پرما کہ تو آئی ءِ نزّیک ءَ ئے ھمنچوکہ مرید ءَ موٹر پرپٹ ءِ بریک جت اَنت داں من چم چست کت اَنت ءُ چار اِت مرید سنگانی سر جوش مُھلہ ءَ پکوڑا والا ءِ دکان ءِ دپ ءَ اٗوشتاتگ اَت-

مرید ءِ کِر ءَ دراھیں روچ ءُ ماهانی مانا یک ات ءُ آئی ءَ کدی هم نہ جیڑ اِت کہ آ کجام کار ءَ کجام روچ ءَ یا کجام ماه ءَ کنگ ءَ اِنت آ مدامی بس وت ءَ دومی ءَ چہ آزات کنگ ءِ جھد ءَ اَت کسّے ءَ اگاں مرید بہ گُشت ایں کہ رمزان ءِ ماه ءَ تو دپ پچ ئے ءُ سر ء آم پکوڑا ورگ ءَ ئے یا ھوت کنگ ءَ ئے داں آئی ءَ یا واه اچ نہ گشتگ ات یا واه اے پسّو داتگ ات کہ مردم مارا چہ مستریں گناه کنگ ءَ اَنت اود ءَ شما گشگ ءَ کُور اِت مرید ءِ ھساب ءَ ھوت ءَ چہ روچگ نہ پْرش ایت کہ اے گپ من آئی ءَ را همے رمزان ءِ ماه ءَ ڈی بلوچ ءِ پُل ءِ سر ءَ گشتگ ات ءُ آئی ءَ پد ءَ سک کند اِتگ اَت انچش کہ مرید پرپٹ ءِ سر ءَ ایر اتکیں ءُ پد ءَ پکوڑا والا ءِ دکان ءَ بہ شُتین ءُ پکُوڑا بزرتیں داں من آئی ءَ را گُشت مرید من بلے روچگاں! آئی ءَ سک کند اِت ءُ گُشت گیبو! اے بری ما دوئیناں سک کند اِت ءُ چپس ءُ پکوڑا زرت اَنت دیم پہ کیچ کور ءِ نیمگ ءَ در کپت ایں-

من هما روچ ءَ پُوه بوتگ اِت اَنت کہ مرید ءَ سبز ءُ اسپیتیں بیرک بہ دوست نہ بیت وهدیں مرید شال ءَ بلوچستان شاھدربرجاه ءَ ایم پل ءِ ٹیسٹ ءِ دیگ ءَ اتکگ اَت ءُ منی کر ءَ داشتگ اَت ئِے مرید ءَ شال ءِ هما پِٹ چاه والا ءَ بگر داں گٹراں بیا دراہ دوست بوت اَنت بلے هما بیرک! هما بیرک! کہ کوه ءِ سر ءَ جوڑ بوتگ اَت بِھ دوست نہ بوت آئی ءَ همے سبزیں ءُ اسپتیں بیرک ءَ چہ گوش ئے کُنّت ءَ ءُ پد ءَ ما همے بیرک شاهدربرجاهانی تہ ءَ سلوٹ جتگ هاهاها پد ءَ سوچگ ءِ گپ اش اِنت کہ اے بیرک مرچیگیں جاورانی تہ ءَ بازیں مردُماں وتی گاڑیانی سوچبورڑ ءِ دیم ءُ لوگانی سر ءَ جتگ ساهت ءِ نہ گوستگ اَت کہ مرید سنگانی سر ءِ جمپاں در اتکگ ات ءُ کیچ کور والا کشک ءِ گپتگ اَت ءُ دیم ءَ لیویز ءُ ایپ سی چیک پوسٹ اَت ءُ پد ءَ همے لیویز ءُ ایپ سی چیک ءِ دیم ءَ پرچون ءُ پٹرول ءِ دکان ات اَنت -انچش کہ مرید همے دکاناں بہ گوست ایں داں من آئی ءَ را گوشت مرید بلے جِل آپ ءِ همد ءَ زورگی اِنت آئی ءَ پد ءَ کند اِت ءُ گشت گیبو جِل آپ چو هما شال ءِ پِٹ چاه والا ءِ وڑ ءَ پِٹ آپ اِنت-

مرید ءَ جِل آپ پمشکا دوست اَت کہ هما وهد ءَ مرید شال ءَ کہ ایم پِل ٹیسٹ ءِ دیگ ءَ اتکگ اَت داں چیزے ماه ءَ منی کِر ءَ دارگ ءَ پد ما یک سباھے چہ واب ءَ پاد اتکاں دیست سک برپ باری بوگ ءَ اِنت نزاناں مرید ءَ برپ باری چی ءَ دوست اَت ءُ آئی ءَ مدامی لوٹ اِت کہ برپباری بہ بیت بوت کنت آئی ءَ شال ءِ دلبند هما نرمیں برپانی تہ ءَ گُلائیش بوگ ءَ گندگ لوٹ اِت، بوت کنت کہ آ جیڑگ ءَ اَت کہ برپباری ءَ چہ شال ءِ دراھیں داگ داریں چیز همے برپانی چیر ءَ بنت ءُ پد ءَ کَسّہ موکل نہ رس اِت کہ سیاه ءُ اسپیت، سبز ءُ شیر سبز ءُ شر ءُ هراب ءِ میان ءَ پرک بدار ایت، یا واه بوت کنت آئی ءَ هما کوہ ءِ دیم ءَ جوڑ بوتگیں بیرک ءَ را مدامی برپانی چیر بوگ ءَ تاهیر دات- ءُ پد ءَ برپباری اَت ءُ همک چیز ءِ رنگ اسپیت بوگ ءَ اَت ءُ من ءُ مرید همے برپانی سر ءَ روان روان داں بیکری ءَ پُترتیں ءُ ورگ ءِ واست ءَ سامان زُرت ءُ پد ءَ وتی کوٹی ءَ واتر بوتیں کوٹی ءِ آیگ ءَ گوں مرید ءَ هما چاه دانی ءِ سر اتکگیں چاه ایٹر ءِ سر ءَ کُت اَنت ءُ پد ءَ من ءَ گشت ئِے بیا گیبو مرچی مجیب مجاھد ءِ کتاب ‘ من واتر نباں’ ءِ شہر ءُ دستونکاں وانان ءُ وتی وڑ ءَ مانا دیاں، ما دیراں داں نشت ایں چاه هم وارت ءُ کتاب ءِ شَیر ءُ دستونک هم وتی وڑ ءَ مانا دات اَنت اناگہ ءَ هور ءِ ترمپانی توار بوت ءُ مرید ایٹر ءِ دیم ءَ چہ پاد اتک ءُ وتی کمبل ءِ تہ ءَ شُت اَنت آئی ءَ زاناں زانتگ اَت کہ برپباری هلاس بوتگ ءُ نُوں هور ءِ ترمپاں چہ همک چیز ءِ سر ءَ رِتکگیں برپ آپ بنت ءُ پد ءَ شال ءِ دراھیں داگ ءُ هما کوہ ءِ دیم ءَ جوڑ کتگیں بیرک آئی ءِ دیم ءَ پدر بنت!!! مرید ءَ داں دیر ءَ کمبل ءِ تہ ءَ اچ نہ گشت ءُ نپادانی سر ءَ کٗونڈ یکیں داب ءَ مُچ کتگ ات اَنت ءُ کمبل ءِ پِر اَت ءُ وپتگ اَت- هور ءَ بس کتگ اَت ءُ مگرب تهار کپتگ اَت داں من مرید ءَ را گُشت بریں ڈنّ ءَ پٹ ءِ هوٹل ءَ چاھے وَریں!! مرید ءَ پَسّو دات کہ یار گیبو تو برو من نیا آں گوں کہ منی پاد سک درد ءَ اَنت ءُ پد ءَ من ءَ تپ هم گِرگ ءَ اِنت- گڑا من مرید ءَ را گشت ترا سارتی ءَ جتگ تو ایٹر ءِ دیم ءَ بہ نند وت ءَ کمو گرم دے شر بئے- چش کہ آئی ءَ سارتی ءُ برپباری دوست اِت اَنت داں آئی ءَ من ءَ گشت کہ یار گیبو اے سارتی ءِ سوب ءَ من چش نیاں بلکیں شال ءِ هما ورگی آپ ءِ سوب اِنت- مرید کساس داں ھپت روچ ءَ همے وڑ ءَ کوٹی ءَ کپتگ ءُ بیمار اَت- من هما نادْراھی ءِ روچاں همک ساهت ءُ دَمان ءَ آئی ءَ را گشتگ اَت کہ بہ رویں داکٹرے ءِ کِر ءَ ترا پیش داراں داں آئی ءَ همک ساهت ءُ دَمان ءَ من ءَ همے پَسّو داتگ اَت کہ یار گیبو اے پادانی درد من ءَ پد جنگ ءَ کجا کِل اَنت یک سھبے من چہ واب ءَ پاد اتکگ اتاں داں من ءَ مرید ءَ گُشت کہ مرچی من کمُو شرتراں تو جان بہ شود گڑا روان سلیم کمپلیکس ءَ من وت ءَ را پیش داراں- من اشتاپ اشتاپی جان ششت ءُ تیار بوتان ءُ دیم پہ سلیم کمپلیکس ءِ نیمگ ءَ در کپتیں وهدے ما اود ءَ سر بوتین ءُ مرید ڈاکٹر ءَ چار اِت ءُ پد ءَ ڈاکٹر ءَ وتی ٹیبل ءِ سر ءِ پیڈ ءَ چہ تاکے دِرت ءُ آئی ءِ سر ءَ گولی، سُچن ءُ ڈرپانی نام نبشتہ کُت اَنت ءُ من ءَ دات ئِے کہ بُرو اشاں بُزور وتی نادوراه ءَ همراہ کن ءُ او پی ڈی بُرو همودا نرس تئی نادوراه ءَ سُوچّن ءُ ڈرپ کنت من ڈاکٹرے گوشگ ءِ رد ءَ گولی، سُوچّن ءُ ڈرپ زرتاں ءُ مرید همراہ کُت ءُ او پی ڈی ءَ شُتاں- مرید ءِ سُوچّن ءُ ڈرپ کنگ ءَ پد وهدے ما سر گپتیں کہ نُوں وتی کوٹی ءَ جنزان کنیں داں او پی ڈی ءِ هما نرس گوشگ ءَ بوت او پی ڈی ءِ دو سَد روپی پیساں بہ دے اِت ءُ بُرو اِت- داں من آئی ءَ را گشت کہ هزار روپی ڈاکٹر ءَ کپتگ ءُ ہشت سَد روپی ءِ گولی، سُوچن ءُ ڈرپ ڈاکٹرے میڈیکل اسٹور ءَ چہ زُرتگ ءُ منی جیب ءِ زر همے بوتگ اَنت ءُ اَنّوں من ءَ زر گون نیست ءُ من وتی کوٹی ءَ رواں زر زوراں کایاں تئی زراں ترا دیاں- یک برے آئی ءَ نہ منّ اِت داں من آئی ءَ را گُشت تو بُزور منی موبائل ءَ بدار من تئی زراں کاراں کایاں- آئی ءَ چارت کہ اے مرد وتی موبائل ءَ آئی ءِ کِر ءَ ایر کنگ ءَ تیار اِنت داں آئی ءَ من ءَ گشت موبائل ءَ بِل شما بُرو اِت- من ءُ مرید پد ءَ سلیم کمپلیکس ءَ چہ در کپتیں ءُ وتی کوٹی ءَ اتکین ءُ من مرید ءَ را گُشت تو انُوں وپس آرام کن بلکیں کمّو شرتر بئے- بلے مرید! بلے مرید! داں ھپتگے ءَ ڈاکٹر ءِ دوا ءُ درمانانی ورگ ءَ شر نہ بوت ءُ پد ءَ من مرید زُرت ءُ جان مھمد رٗوڈ ءَ گونڈیں میڈیکل کلینکے ھست اَت همود ءَ بُرت- ڈاکٹر ءَ مرید چک اپ کنگ ءَ پد جست کہ تو چونیں آپ ورگ ءَ ئے؟؟ گڑا مرید ءَ دیم منی نیمگ ءَ کُت ءُ من داکٹر ءَ را پَسّو دات همے ٹینکر ءِ آپاں ڈاکٹر ءَ گُشت اے آپ کچره اَنت اشاں مہ ور همے گپ ءِ گشگ ءَ ڈاکٹر ءَ مرید تَھت ءِ سر ءَ واپینت ءُ سُوچن ءُ ڈرپ کُت وهدے مرید ءِ ڈرپ هلاس بُوت داں ڈاکٹر ءَ کاگدے ءِ سر ءَ لھتیں دوا ءُ درمان نبشتہ کُت گشت اے دوا ءُ درماناں بزور ءُ بور تو شر بئے پد ءَ همے دوا ءُ درمان مارا همے میڈیکل کلینک ءِ اسٹور ءَ رس اِت اَنت ءُ ڈاکٹرے چک اپ ءِ پِیسانی همرائی ءَ هوار سے سَدے بوتاں ڈاکٹر ما هُدا ھاپز کُت ءُ میڈیکل کلینک ءَ چہ در کپتین ءُ دگہ پرچون ءِ دکانے ءَ پُترتیں- اود ءَ ما دو جِل آپ ءُ دگہ ورگی سامان زُرت ءُ دیم پہ وتی کوٹی ءَ اتکیں پد ءَ کوٹی ات، من ءُ مرید اَتاں، سارتی اَت، ایٹر ات، ابیتکی ات، کتاب ات اَنت ءُ دو بوتل جِل آپ اتاں نزاناں مرید ءَ من ءَ اناگہ چیا گُشت کہ گیبو آپ همیش اِنت وهدے آئی ءَ جِل آپ ءِ بوتل ءَ چہ تاس ءِ آپ وارتگ ات من پد ءَ کند اِت ءُ سما کنگ ءَ بوتاں کہ مُرید نُوں وتی نادْراھی ءَ چہ شَر بیت- ءُ پد ءَ من هَردیں کہ ورگ جوڑ کنگ لوٹ اِیت داں مرید ءَ من ءَ گُشت جِل آپ ءِ مان کن ءُ جوڑ ئِے کن ، چاه گِرادگ لوٹ ایت داں آئی ءَ گُشت جِل آپ ءِ سرا جوڑ کن- پد ءَ مرید ءَ هما روچ ءَ پد جِل آپ سک دوست بُوت ءُ آئی ءَ لوٹ اِت کہ همک چیز جِل بِرانڈ ءِ بہ بیت من نزاناں مرید ءَ کد پرپٹ هما ایپ سی ءُ لیویز چک پوسٹ ءِ دیم ءَ کہ پرچون ءِ دکان ات اَنت همود ءَ داشتگ اَت ءُ کَد جِل آپ ئِے زرتگ اَت کد دیم پہ کیچ کور ءِ بند ءِ سر ءَ رپتگ اَت- من ءَ بس همے سما کپتگ اَت کہ اے بَری مرید ءَ کہ پرپٹ ءِ بریک جتگ ات اَنت داں من ءُ مرید کیچ کور ءِ بند ءِ سر ءَ اتین ءُ دیم ءَ میری ءِ کلات اَت-

من ءُ مرید پرپٹ ءِ سر ءَ ایر اَتکین ءُ من ءَ چِپس، پکُوڑا ءُ جِل آپ گون اتاں ءُ ما کیچ کور ءِ بندے سرا نِشتیں ءُ من دیم گوں مِیری ءِ کلات ءَ کُت- مُرید چِپس ءُ پکوڑا ورگ ءَ اَت ءُ منی چم گوں میری ءِ کلات ءَ اتاں ءُ پدا نزانہ منا پرچہ حیال پیداک اَت کہ هما نیم روچ ءَ گَرمے جَلا کہ من، مرید ءُ بہرام وهدیں میری ءِ کلات ءِ سرا سیل کنگ ءَ شتگ اِتیں داں مارا پرشتگیں دیوار، ڈمپ ڈمپیں آک ءُ هما پرشتگیں کوٹی ءُ دیوارانی سر اتکگیں سِنگاں ابید دگہ ھچ گِندگ ءَ نِہ اتک بلے نزاناں اے بَری کہ من کیچ کور ءِ بند ءِ سر ءَ نشتگ ءَ اِتان ءُ میری ءِ کلات ءَ ندارگ کنگ ءَ اتاں داں من ءَ میری ءِ کلات سک دوست بوگ ءَ اَت- بوت کنت همک چیز دُور نِندگ ءُ ندارگ کنگ ءَ شوک گندگ ءَ کیت، بوت کنت کہ اے روچ ءَ من میری ءِ کلات ءَ ندارگ کنگ اتاں داں جمبراں وتی ساهگ آئی ءِ سر ءَ دَور داتگ اَت ءُ پمشکا من ءَ دوست بوگ ءَ اَت، بوت کنت کہ میری ءِ کلات هم لوٹگ ءَ اَت کہ من ءَ اگاں کَسّے ندارگ کنگ لوٹ اِیت داں دُور ءَ چہ بکنت ءُ چُش مہ بیت کہ کَسّے پہ من هزاراں پند بہ جَنت ءُ منی ندارگ کنگ ءَ نزیک ءَ بئیت ءُ منی پرشتگیں دیوار، ڈمپ ڈمپیں آک ءُ هما پرشتگیں دیوار ءُ کوٹیانی سراَتکگیں سِنگاں بہ گند اِیت ءُ من ءَ چہ مایوس بہ بیت، ءُ بُوت کنت منی چمّاں اے ساھت ءَ دوکہ وارتگ اَت ءُ من ءَ میری ءِ کلات دوست بوگ ءَ اَت-

ھمنچوکہ منی دپ ءَ در اتکیں کہ گِند ئے میری ءِ کلات بلوچستان ءَ داں مرید ءِ دست کیچ کور ءِ پُل ءِ چیر ءَ یک ڈمپرے ءِ نیمگ ءَ ٹال ات ءُ آ گوشگ ءَ اَت کہ ‘گلامیں کوم ءِ داں گڈی هون ءِ پِٹ هم چُوسّگ بوگ ءَ اِنت’ منی چم پہ مُسیبت ءِ میری ءِ کلات ءَ دور اتک اَنت ءُ هما ڈمپر گاڑی ءَ کپت اَنت کہ کیچ کور ءِ پُل ءِ چیر ءَ چہ کسان کسانیں سنگ لوڑ کنگ ءَ اَت ءُ پد ءَ همے سِنگ پلانٹ ءَ برگ ءُ کَرش جوڑ کنگ بوت اَنت… پد ءَ کیچ کور اَت، کیچ کور ءِ مُرتگیں درچک ءُ دور ءَ پَلّے ءِ بس مچّانی پشت کپتگیں بنڈ اتاں، دیم ءَ میری ءِ کلات اَت من ءُ مرید اتین ءُ پد ءَ مگرب هم تهار کپگ ءَ اَت اے بیگاه ءِ وهد ءَ کہ من کیچ کور ءِ بند ءِ سر ءَ گوں مرید ءَ نشتگ ءَ اِتاں داں من ءَ کیچ کور ءِ ندارگاں هور هرچ ندارگ ءِ کہ چماں گندگ ءَ پیداک اَت داں بے کساس دوست بوگ ءَ ات اَنت اے دراھیں ندارگ منی دل ءَ انچش ایر کپتگ اِت اَنت گوش ئے من ءَ لاچار ئِے کتگ اَت کہ من دوبر لوگ ءَ مہ رواں چش کہ مارا مگرب ءِ بانگ ءَ لوگ ءَ سر بوگی ات ءُ دپ بوج هم کنگی اَت ءُ پدا وتی شپ ءِ نند جاه ءَ نندگ ءُ دیوان هم کنگی گڑا ما پمشکا چہ کیچ کور ءَ در کپتین ءُ مگرب ءِ بانگ ءَ لوگ ءَ سر بوت ایں –

آیوکیں شپ اگاں من بزانتین پہ من ءَ اَزاب اِنت داں من وت ءَ گوں مرید ءَ کیچ کور ءِ بند ءِ سر ءَ یلہ داتگ اَت ءُ کیچ کور ءِ ندارگانی ابادت کتگ اَت ءُ من گوشاں باید اِنت بلوچستان ءِ همک زهگ ءِ کار هدا ءِ ابادت کنگ ءَ پیسر گوں وتی سرزمین ءُ سر زمین ءِ ندارگانی ابادت کنگ بہ بیت چیا کہ بلوچستان ءِ همک ندارگ انوگیں جاورانی تہ ءَ گلامی ءُ گلامی ءَ چہ وت واک بوگ ءِ سما ءَ دینت-

هو پد ءَ هما شپ کہ پہ من ءَ وشّی ءُ اَزاب دوئین اَت وشّی پمے هاتر ءَ کہ کُوکُو (کہ آئی ءِ گوما هجبر سرکار ءِ گلامی نہ بوت) گوں گُل ءَ هوار بوت ءُ اَزاب اے هاتر ءَ کہ کُوکُو ءَ انگت زندگ بوگی اَت ءُ گُل پهازگی اَت ءُ وهد ءَ پیسر روگی نہ اَت هو پد ءَ همے شپ ءَ منی کَش ءُ کِر ءَ نندوکیں سنگت، سیاد ءُ وارس بگند ئے همے جیڑگ ءَ ات اَنت کہ کُوکُو ءَ انچو چیزے ءِ تہ ءَ گوں جنگ ءُ سر زمین ءَ پرچا مھر بوت؟ ءُ باز مردم همے جیڑگ ءَ اَت کہ گوں جنگ ءَ مھر بوت نہ کنت همے کہ گوشاں جنگ ءَ گوں مھر بوت نہ کنت داں من همایاں گشگ لوٹاں کہ سر زمین ءِ اشک ءَ گوں جنگ ءَ مهر بوت کنت ءُ منی نزیک ءَ مھر چیزے ءِ لوٹگ ءِ نام اِنت، چیزے ءَ وتی کنگ ءِ نام اِنت، چیزے ءَ گوں هوار بوگ ءِ نام اِنت ءُ چیزے ءَ وتی تہ ءَ جاگہ دیگ ءُ آئی ءَ دائم ابدمان کنگ ءِ نام اِنت چیزے ءِ لوٹگ ءُ اسانیں دلے ءَ نہ رسگ بگندے کَسّے ءِ دل ءِ دنیا ءَ جنگ ءِ پہ هما چیز ءِ رسگ ءَ بناه بکنت ءُ اے جنگ کَسّے ءِ لوٹ ءِ رسگ ءِ اولی کدم اَنت-

اگاں مهر چیزے ءِ لوٹگ ءِ نام اِنت گڑا جنگ لوٹگ ءُ کنگ بیت، اگاں مھر چیزے ءَ وتی کنگ ءِ نام اِنت گڑا جنگ وتی کنگ بیت، اگاں مھر چیزے ءَ گوں هوار بوگ ءِ نام اِنت گڑا جنگ وتی تہ ءَ جاگہ دیگ ءُ هوار کنگ بیت ءُ اگاں مھر چیزے ءَ وتی تہ ءَ جاگہ دیگ ءُ آئی ءَ دائم ابدمان کنگ ءِ نام اِنت گڑا جنگ وتی تہ ءَ جاگہ دیگ بیت ءُ دائم ابدمان کنگ بیت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: آجو بوتگیں زِندانی ءِ مارِشت

نبشتہ کار: ویکٹور ای۔ فرانکل

رجانکار: التاپ منیر

دی بلوچستان پوسٹ

گوں دَمبُرتگیں پاداں ما زندانیاں وَت ءَ را گِرّان کُت ءُ کیمپ ءِ گیٹ ءَ سَر کُت۔ بے توکلی ءَ ما کَش ءُ گور ءَ چار اِت ءُ یکے دومی ءَ را جُستی رنگ ءَ چار اِت پَد ءَ لھتے قدم کیمپ ءَ چہ ڈن ما جَت اے وھد ءَ کس ءَ مارا گُر نہ دات اے وھدا سپاھیاں مارا سگریٹ دات اول سر ءَ ما پہ مشکل آھاناں پجارات آھاناں لس مہلوک ءِ گُد گورا اَت اَنت ما میزان میزان ءَ چہ کیمپ ءَ روڈ ءِ دِراجی ءَ پیدل شُت اِنت زوت مئے پاد زیم بوت اَنت ءُ دیم ءَ جُنزگ ءَ مئے پاداں مارا کَڈن کُت۔

بلئے ما لنگ جنان بوت ءُ دیم ءَ جُنزان بوت اِنت، اولی رند ءَ ما ھمے کیمپ ءِ چپ ءُ چاگرد یک آجوئیں مردمے چماں چارگ لوٹ اِت۔

“آجوئی” ما گوں وتی جند ءَ گُشت ءُ تنگی ءَ مارا نہ رَس اتگ اَت ھمے لبز ما مدام سرجمیں سالاں گُشتگ اَت ءُ ھمیشی بارو ءَ واب دیستگ اَت، کہ ایشی ءَ وتی بِزانت گار کُتگ اَت ایشی ءَ راستی ءَ مئے ضمیر ءِ تہ ءَ نہ شُتگ اَت ما اے راستی نزانت کہ آجوئی مئے جندیگ اِنت ما کہچر ءَ اتک اِنت کہ چہ پُل ءَ چکار اَت اولی وشی مارا ھمے بوت وھدے ما یک کُروسے دیست کہ آئی ءِ دُمبی ءِ پُٹ بازیں رنگ ءَ اَت اَنت بلئے پہ ما اے یک تِرپوشکے اَت; مئے سیادی تنیگی ءَ اے دُگنیا ءَ گوں نہ اَت۔

بیگاہ ءِ وھدے واتر ما دُرس وتی کُڈک ءِ تہ ءَ دُچار کپت آں، یک زندانی ءَ چیروکائی ءَ دومی ءَ را گُشت ،من ءَ ھمئے بُگش مرچی تو گَل ءُ شات بوتگے؟ ءُ دومی سنگت ءَ پسو دات، ھجالت اَت چُشکہ آئی ءَ نزانت کہ ما دُرس ھجالت آں، راستی ءَ من گَل نہ بوتگ اوں ما راستی ءَ گَل ءُ شات بوگ ءِ مارشت گار کُتگ ءُ واتر میزان میزان ءَ مارا گَل ءُ شات بوگ ھیل کنگی اِنت تب زانتی ءِ رِد ءَ چہ کہ گوں آجو بوتگیں زندانی ءَ بوگ اَت ھمیشی ءَ گُش اَنت depersonalization۔ ہر چیز دُروھاپ ءِ رنگ ءَ اَت چُشکہ واب گندگ ءِ وڑ ءَ ھم ناں۔

ما اے راستی ءَ را باور کُت نہ کُت چِنکس رَند ءَ گوستگیں سالاں ما ھمئے رنگیں واب گِندگ ءَ چہ رَد کپتگ اَنت ما واب ءَ دیست کہ آجوئی ءِ روچ ءَ ٹِک داتگ اَت، ما آجو کنگ بوتگ اِت آں، لوگ ءَ واتر سر بوتاں، سنگتاں گوں دُروت دُرھبات کُت، وتی جنیناں بَگل ءَ کُت، ٹیبل ءِ کِر ءَ نِشتاں ءُ سرجمیں کسہ کُت اَنت کہ زندان ءَ مئے سر ءَ گوستگ اِت اَنت، اے ھم ھال دات اَنت کہ مُدام آجوئی روچ ما چون وتی واب آنی تہ ءَ دیستگ اَت۔

ءُ پد ءَ مئے گوشاں یک سیٹی یے توار کپت، ھمئے چیزے نِشانی اَت کہ پادایے ئِے ءُ مئے آجوئی واب گُڈ سرا رَس اتگ ات ءُ نوں ھمئے آجوئی ءِ واب راست بوتگ اَت بلئے آیاں ما اے واب ءِ سر ءَ راستی ءَ باور کُت کُت؟-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

وئیل چھبار ءُ مگس ءَ دیم ءَ اتکگ اَنت کہ اود ءَ تیرگواریاں دو کس بیران ءُ ھوت گٹ ءَ یک جونے دزکپتگ –

سر بیتگیں ھالانی رد ءَ روکپتی بلوچستان ءِ دمگ چھبار ءَ ناشناسیں سلاہ بندیں مردماں تیرگواری کرتگ ءُ یک مردمے کُشتگ –

کُشتگیں مردم ءِ پجار ھسین جمالزئی ءِ نام ءَ پجارگ بیتگ کہ آ ھاش ءِ جھمنند اِنت –

ھمے وڑ ءَ مگس ءَ ناشناسیں سلاہ بندیں مردماں تیرگواری ءُ کُرتگ ءُ یک مردمے کُشتگ –

گیشیں ھالانی رد ءَ مگس ءَ سلاہ بندیں مردمانی تیرگواری ءَ نئیم دھانی ء عبدالرحمان جھمنند مگس ءِ نام ءَ زانگ بیتگ –

دمگی مردمانی رد ءَ نئیم ءُ آئی ءِ کھول آرام بکشیں کھولے بیتگ ءُ آیاں کسے ءَ دوا ءُ جیڑہ نہ بیتگ –

ھمے وڑ ءَ ھوت گٹ ءِ کور ءَ یک جونے دزکپتگ –

گیشیں ھالانی رد ءَ گوستگیں روچ ءَ ھوت گٹ ءَ یک جونے شوانگے ءَ دیستگ ءُ آ جون پد ءَ دمگ ءِ پولیس ءَ ھال سر کنگ بیتگ ءُ درگس ءَ جھمنندے گوشگ بیگ ءَ اِنت –

ھرسئیں وئیلانی درگت ءَ تنی وھدی دگہ گیشیں ھال دیم ءَ نیتکگ اَنت ءُ کوشانی سوب زانگ نہ بیتگ اَنت –

سربوتگیں ھالانی رِد ءَ بلوچستان ءِ دمگ کلات، نوشکی ءُ لورالائی ءُ دکی ءَ تیرگواری وئیلاں دو مردم بیران ءُ کسان سالے ءَ ھوار سَے ٹپی بوتگ-

گیشیں ھالانی رِد ءَ کلات ءِ دمگ اسکلکو ءَ تیرگْواری وئیلے ءَ نصراللہ ء نوربخش نامیں مردمے بیران بوتگ –

وئیلے ھال سربوگ ءَ پولیس ءَ وت ءَ وئیل جاہ ءَ سر کتگ لاش دست گپتگ ءُ نادراھجاہ ءَ رسینتگ، اژدری چار ءُ ٹپاس ءَ پد لاش کھول ءِ دست ءَ داتگ ھمے گوشگ بوگ ءَ انت کوش پیشی دژمنی سوب ءَ بوتگ –

ھمے وڑ ءَ نوشکی ءِ دمگ گزنلی کراس ءَ ناشناسیں پرپٹ سواراں گاڑی ءِ سر ءَ تیرگواری کُتگ، تیرگواری ءِ سوب ءَ یک مردمے ٹپی بوتگ –

ٹپی بوتگیں مردم ءِ پجار جعفر خان ء پیرجان ءِ نام ءَ بوتگ پہ درمان کنگ ءَ نادراھجاہ ءَ برگ بوتگ وھدیکہ تیرگْواری ءِ سْوب زانگ نہ بوتگ-

دگہ وئیلے لورالائی ءَ دیم ءَ اتکگ کہ ناشناسیں مردمانی تیرگواری ءَ یک مردمے بیران ءُ یکے ٹپی بوتگ-

بیران بوتگیں مردم ءِ پجار میر عجب ءُ وھدیکہ ثنا اللہ نامی مردمے ٹپی بوتگ – پولیس ءَ ٹپی ءُ بیران بوتگیں مردم پہ درمان کنگ ءَ نادراھجاہ ءَ سر کتگ انت- اژدری چار ءُ ٹپاس ءَ پد لاش کھول ءِ ھوالگ ءَ کنگ بوتگ، وئیل کوھنیں دژمنی گْوشگ بوگ ءَ اِنت-

دکی ءَ اناگتی تیرلگگ ءِ سوب ءَ کسان سالیں گونڈوے ٹپی بوتگ –

ھالانی رد ءَ دکی ءِ دمگ ناصرآباد ءَ لوگ ءَ اناگتی تیر لگگ ءِ سوب ءَ دہ سالی ئیں عمران ء غفور نامیں گونڈو ٹپی بوتگ – ٹپی بوتگیں گونڈو ھما دمان ءَ نادراھجاہ ءَ سرکنگ بوتگ –

بلوچ اسٹوڈنٹس ایکشن کمیٹی شال ھنکین ءِ نیاد برجم دارگ بیتگ، نیاد ھنکین ءِ سروک نذر مری ءِ سروکی ءَ برجم دارگ بیتگ، چریشی ءَ بنجاھی پتر ءِ باسک رفیق بلوچ گچینی ءِ مھمان ءُ ڈاکٹر سمیعہ بلوچ پہ مھمانی ءَ ھوار بیتگ –

نیاد ءَ بنجاھی کار، گوست ءِ ھال، ایرادی تران، میان اُستمانی ءُ دمگی راجداری ءِ جاورھالانء سر ءَ گپ ءُ تران بیتگ ءُ نوکیں کابینہ ءِ گچینی بیتگ کہ چریشی ءَ نذر مری ھنکین ءِ سروک ءُ شلی بلوچ ھنکین ءِ جنرل سیکرٹری نامینگ بیتگ –

نیاد ءَ تران کنان ءَ بنجاھی پتر ءِ باسک رفیق بلوچ ءَ گوشت کہ راجداری یک ھنچیں اَملے کہ انسان ءَ آئی ءِ پردی سنچ ءَ درکنت یک ھنچیں جھلانکیں اَملے جوڑ کنت کہ چریشی ءِ ھمراھی ءَ ھستیں ریشگ ءَ زانت ءُ سسائیں پکرے ءَ بنپداں ایر کنت –

دنیا ءِ راجداپتر ءُ چاگرداں اگاں ھُورتی ءَ نگاہ ایر بہ کن ایں گڑا اے راستی پدر بیت کہ پردانی وجود ھم کجام وھد ءَ نہ بچ اِتگ اَنت ءُ نانکہ پرد وتی واھشتانی وجود ءَ داشت کنت –

یک ھنچیں دورے ءَ کہ اود ءَ یکجاھی ءَ ابید پردانی وجود سرجم نہ بیتگ یکجاھی ءِ لوٹانی واستا المی اِنت کہ جد ءُ جھد ءَ یک راستیں رنگے ءَ دیم ءَ روان کنت -یکجاھی ءِ جد ءُ جھد ءِ دراھیں تک ءُ پھناتاں اگاں یکجاہ بہ کن ایں آئی ءَ سسائی ءُ پکری رھبنداں ھوار بہ کن ایں گڑا اے دراھیں سنچ راجداری ءِ درچ ءَ کاینت –

راجداری ءِ امل انسان ءَ مازگی دروشم ءِ برزی ءَ یک جوانیں کردے پیلو کنت زندگی ءِ دراھیں تکاں یک نوکیں سنچے ءِ دارگ ءَ کمک کنت – میان اُستمانی راجداری ءَ بہ گر دمگی راجداری انسان ءِ زندگی ءِ اندر ءَ جھلانکیں اسرے ءِ بھر اِنت البت یک پردے راجداری ءِ لوٹاں ھمینکس یکگور بیگ ءِ جھد ءَ کنت راجداری ءِ امل ءِ بیت ءُ کنت آئی ءِ سان ءَ گستا بیت نہ کنت –

آئی ءَ گوشت کہ بلوچ نودربر راجداریءَ نوکیں دیمروئی ءِ سیاسی املے ءِ جُنزگ ءُ سیاسی باسکانی زانت ءِ ھواری ءَ یک راھے ءِ گرگ ءَ روانی اِنت – ھمود ءَ یک نیمگے ءَ گیرسیاسی رویشے ءِ سوب ءَ ادارھانی دروشم ءَ زانگ ءَ اَنت گڑا ھمود ءَ دومی نیمگ ءَ ھمک روچ بھر ءُ بانگے ءِ وڑیں تُرکینگ ءَ یک برے پد ءَ برانز دیگ ءَ اَنت – آئی ءَ گوشت کہ چاگردی رسانکجاھاں جتا جتائیں کار ءُ رھبنداں انسانی زندگی ءَ ساپ تر ءُ سیاست ءَ آشوبی بدلیانی لازمی جوڑ بیتگ ھمود ءَ ھمے کار ءُ رھبنداں بلوچ نودربر سیاست ءَ یک جتائیں رنگے ءِ دیگ ءَ ھچ راہ پش نہ گپتگ اَنت –

چاگردی رسانکجاھاں گیش بیوکیں ترکانکانی سوب ءَ گل ءُ گلی بنپداں ابید زاتی ریشگانی وڑیں رویشاں ردوم زرتگ کہ چریشی ءِ سوب ءَ ھمک گلانی پروشت ءُ پروش، ٹولہ بندی ءُ گندگی ءِ وڑیں ردوم زورگ ءَ اَنت –

آئی ءَ گوشت کہ پکری، سیاسی ءُ زانشتی بارہ ءَ مھکمیں سیاسی باسکانی واستا مول ءُ مراد درستاں جوانتریں رھبند بیت اِنت ءُ ھمے سوب ءَ دراھیں کارکنوکاں کہ ھمایانی نگاہ مول ءُ مراد ءَ سنچ دار بنت مول ءُ مرادانی ھاتر ءَ جد ءُ جھد کنگ ادارھانی مھکم کنگ اِنت – اے وڑیں دراھیں سنچ وتی کجام ھم دروشم گل یا گلی بنپداں تاوان دیگ ءَ پھریزی بنت –

مروچی اے نیاد ءَ جتا جتائیں بنگپانی سر ءَ تران بیتگ ءُ دلیل دیگ بیتگ اَنت چریشی ءَ پد اے جاہ ءَ سر بیتگ کہ گل ءِ دراھیں باسکانی واستا گل ءُ گلی پُرکارانیانی دراھیں چیزاں جوانتر دار اَنت – گل ءِ دراھیں باسک مھکم اَنت ءُ دراہ زانت ءُ زانشتی بارہ ءَ ھم مھکم اَنت ءُ پکری لیکہ ءِ مھکمیں باسک گل ءِ مھکمی ءِ مانزمان اَنت –

نیاد ءَ جتا جتائیں بنگپانی سر ءَ تران ءُ باوست بیتگ نوکیں کارانی سر ءَ ٹپاسی ءُ نوکیں کابینہ ءِ گچینی دیم ءَ ارگ بیتگ کہ چریشی ءَ نذر مری سروک، فرید بلوچ کسان کمک سرکماش، شلی بلوچ کارگشاد، عرفان کسان کمک کارگشاد ءُ اقرء دودمان کارگشاد دارگ بیتگ اَنت – بنجاھی پتر ءِ باسک رفیق بلوچ ءَچہ نوکیں ھنکین ءِ سوگند زرتگ ءُ نوکیں ھنکین ءَ گل ءِ پرکاریانی زمہ واری پیلو کنگ ءُ گل ءِ مراگشانی سرجم کنگ ءِ بنھشتانی ایرکنگ ءِ اھد کرتگ –