TBP Balochi

بلوچستان ءِ دمگ چہ کیچ ءَ پاکستانی پوج ءَ سَے براتاں ھوار شش کس آوار جتگ ءُ ناشناسیں زنداناں برتگ اَنت –

سر بیتگیں ھالانی رد ءَ کیچ ءِ دمگ پُل آباد ءَ گوستگیں شپ ءَ یک لوگے ءَ پوج ءَ بیڑ برتگ ءُ اود ءَ چار کس دزگیر کنگ ءَ پد ناشناسیں جاھاں برتگ اَنت، کہ اشانی تہ ءَ سَے برات ءُ آیانی زامات ھوار اِنت کہ آیانی پجار شعیب، جنید، شے حق ء تاج مھمد ءُ گپور ءِ ناماں زانگ بیتگ اَنت –

دمگی مردمانی رد ءَ پوج ءَ گوستگیں شپ ءِ کساس ساھت سَے ءَ بیڑ برتگ ءُ لوگ ءَ جاڑیگیں زالبول ءُ چک لَٹ ءُ کُٹ کتگ اَنت ءُ اے مردم دزگیر کرتگ اَنت –

دمگی مردماں ٹی بی پی ءَ گوں گوشتگ کہ دو روچ ءَ پیسر تمپ ءِ دمگ کوھاڑ ءَ پاکستانی پوج ءَ دو کس بابا ء عباس ءُ اصغر ء عبدالرھمان دزگیر کنگ ءَ پد آوار جتگ اَنت کہ تنی وھدی آیانی ھچ ھال نیست اِنت –

زانگ بہ بیت بلوچستان ءَ بیگواھیانی جیڑہ روچ پہ روچ گیش ودان اَنت ءُ گوستگیں بیست ءُ چار ادارانی تہ ءَ یک درزنے ءَ گیش مردم بلوچستان ءِ جتا جتائیں جاھاں پاکستانی پوج ءَ دزگیر کرتگ ءُ گار کتگ اَنت –

دومی نیمگ ءَ شال ءَ گار ءُ بیگواھیں مردمانی واستا توار چِست کنوکیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چاھزار ءُ سَے سد ءُ نوزدہ روچ سرجم بیتگ –

بنجل ءَ چہ مستونگ ءَ بی ایس او پجار ءِ گوستگیں دمگی سروک ناصر بلوچ، جمیعت طلبا اسلام ءِ گوستگیں جنرک سیکرٹری خالد مسعود ءَ تر ءُ تاب کرتگ ءُ بیگواھیں مردمانی کھولانی گون ءَ پدردی درشان اِتگ –

ھمے وھد ءَ سال دوھزار ءُ سیزدہ ءَ شال کلی جیو ءَ زورانسری آوار جنگ بیتگیں ظفر اللہ ءِ مات بنجل ءَ اتکگ ءُ وتی زھرشانی نبشتگ کنائینتگ ئِے –

آئی ءَ گوشتگ کہ منی زھگ ءَ بازیں سالے بیت کہ گار کنگ بیتگ ءُ من نزاناں آ کجا اِنت ءُ چتور اِنت آئی ءِ بارہ ءَ مارا ھچ ھال دیگ بیگ ءَ نہ اِنت -ھاکمی زمہ واری بیت اِنت آ منی زھگ ءِ بارہ ءَ بہ گوش اَنت ءُ آ کجام جرم ءِ بنیاد ءَ گرگ بیتگ –

ھمے وھد ءَ وائس فار بلوچ مسنگ پرسنز ءِ وائس چیئرمین ماما قدیر بلوچ ءَ گوشت کہ ما یک رند ءِ پد ءَ وتی کوھنیں زمانگ ءَ گوں دُچار کپان اِنت ھمود ءَ ما بندات کرتگ یکے دومی ءَ نہ منّگ، کینگ ءِ رودینگ، زاتی پسند ءُ ناپسندی، زانتی زانش ءِ جاہ ءَ وتی گپانی درانگازگ –

آئی ءَ گوشت: بلوچ وتی گران بھائیں سراں دگانی سر، جنگل ءُ دمکاں سھر کنگ ءَ اَنت، مات وتی ورنائیں بچانی لاشانی سر ءَ موتک آرگ ءَ اَنت، پیر ءُ کماشیں پت وتی ورنائیں بچانی جسداں کوپگ دیگ ءَ اَنت –

ماما قدیر ءَ گوشتگ اَت کہ ما پرچا بے ھیال بیتگ اِنت کہ آیاں وتی بھر ءِ پرز پیلو کرتگ مارا نی چیزے کنگی اِنت، شھیداں وتی سھریں ھونانی گون ءَ ھما چراگ روک کتگ -بلے مئے نادانیں دوست وتی دوستانی پاد ءِ کشگ ءَ گر ءُ چِل اَنت –

سر بیتگیں ھالانی رد ءَ روکپتی بلوچستان ءِ دنگ بیرجند ءِ جیل ءَ دو بندیگیں بلوچ پاھو دیگ بیتگ اَنت –

پاھو دیگ بیتگیں مردمانی پجار یونس توتازئی جھمنند چاہ رھمان دزاپ ءُ عبداللہ توتازئی ء سھراب جھمنند دزاب ءِ ناماں زانگ بیتگ اَنت –

ایرانی آمیدگس ءِ گوشگ اِنت کہ ھردوکیں مردم نشہ ءِ بھتام ءَ پاھو دیگ بیتگ اَنت –

اے مردمانی ھمراھی ءَ دزگیری ءِ وھد ءَ ایرانی لشکر ءِ تیرگواری ءَ عبدالغیاث توتازئی بیران بیتگ اَنت ءُ اشی ءِ دو ناکو زتک ھم دزگیر کنگ بیتگ اَنت –

ھالانی تہ ءَ گوشگ بیتگ کہ ھردوکانی کھول گڈی گندگ ءَ پرمان کنگ بیتگ اَنت بلے ایرانی سیکورٹی ءَ پندل ءُ ھنراں مردم واتر کرتگ ءُ آیانی مردم پاھو داتگ اَنت –

بلوچ فعالین کمپئن ءِ گوشگ اِنت کہ ایرانی آمیدگس لس مردماں پاھو دیگ ءُ کُشگ ءَ اِنت کہ آیانی سر ءَ آمیدگس ءِ سرجمیں ھُکم ءُ رھبنداں پاھو نامہ نیست اِنت –

ھمے وڑ ءَ گوستگیں دو شمبے ءَ اسپھان ءَ سِی ءُ چار سالی ئیں مھران ناروی جھمنند نسرت آباد دزاپ پاھو دیگ بیتگ –

مھران ناروی ءِ بارہ ءَ ایرانی انٹرنیشنل ایمسنٹی ءَ ھم گوستگیں روچاں پاھو نہ دیگ ءِ دزبندی کرتگ ءُ ایرانی سرکار ءَ لوٹ کرتگ ءُ گوشتگ کہ مھران ناروی یلہ کنگ بہ بیت اِنت –

سربوتگیں ھالانی رِد ءَ بلوچستان دمگ ڈیرہ اللہ یار، بارکھان ءُ پنجگور ءَ تیرگواری ءِ وئیلاں ھپت مردم بیران زالبولے ءَ ھوار پنچ مردم ٹپی، وھدیکہ پنجگور ءَ آس لگگ ءِ سوب ءَ یک مردمے ٹپی بیتگ-

گیشیں ھالانی رِد ءَ بارکھان ءَ زمینی جیڑہ ئِے سر ءَ دو ٹولیانی میان ءَ جنگ ءُ چوپ ءَ شش مردم بیران سَے ٹپی بوتگ اَنت –

بلوچستان ءِ دمگ بارکھان ءَ دو ٹکانی میان ءَ زمینی جیڑہ ئِے سر ءَ تیرگواری ءِ وئیل ءَ ھپت مردم بیران، تیرگواری ءَ جنگ ءُ گاجانی ٹَکانی ءِ میان بوتگ – بیران بوتگیں مردمانی تہ ءَ راھگوزی ءِ ھم ھوار اِنت وھدیکہ سئیں ٹپی بوتگیں مردم نادراھجاہ ءَ سر کنگ بوتگ انت –

ھمے گوشگ بوگ ءَ انت کہ بیران بوتگیں مردمانی تہ ءَ چار مردمانی سیادی گاجانی ٹک انت –

ڈیرہ اللہ یار ءَ تیرگواری ءِ وئیل ءَ یک مردمے بیران بوتگ ءُ زالبولے ٹپی بیتگ –

ھالانی رِد ءَ گوستگیں شپ ءَ ناشناسیں مردماں خادم حسین گولہ ءِ گِس ءَ دور کتگ ءُ خادم حسین تیرانی آماچ کتگ ءُ کشتگ ءُ آئی ءِ لوگی ٹپی کتگ –

ھمے گوشگ بوگ ءَ انت وئیل پیشی زاتی جیڑہ ئِے سر ءَ دیما اتکگ – پولیس ءَ وت ءَ وئیل جاہ ءَ سرکتگ ءُ دؤئیں مردم دمگی نادراھجاہ ءَ سر کتگ انت – اژدری چار ءُ ٹپاس ءَ پد لاش کھول ءِ گور ءَ رسینتگ –

ھمے وڑ پنجگور ءَ دُزانی تیرگواری ءَ یک مردمے ٹپی بوتگ –

ھالانی رِد ءَ پنجگور ءِ دمگ تسپ ءَ دُزانی تیرگواری ءَ افضل ء اسحاق جھمنند تسپ ٹپی بوتگ –

ھمے گوشگ بوگ ءَ انت دُزاں گاڑی دست داتگ آ نہ اوشتاتگ گڑا دُزاں گاڑی ءِ سر ءَ تیرگواری کُتگ، تیرگواری ءِ سوب ءَ گاڑی ڈرائیور ٹپی بوتگ ءُ گاڑی چپ بوتگ –

دگہ وئیلے پنجگور ءَ آس لگگ ءِ سوب ءَ یک مردمے ٹپی بوتگ –

ھالانی رِد ءَ پنجگور ءَ ٹی وی اسٹیشن ءِ نزیک ءَ گیٹ ءَ آس لگگ ءِ سوب ءَ لیاقت ء صالح جھممند تسپ ٹپی بوتگ –

ھالانی تہ ءَ گوشگ بیتگ کہ لیاقت سک ستکگ ءُ آ کراچی ءَ برگ بیتگ، آس تیل ءَ لوڑیں گاڑی ءَ لگ اِتگ ءُ چریشی ءَ تیل ءَ لوڑیں گاڑی سرجم ءَ سُتکگ ءُ پُر بیتگ –

نبشتانک: مھر ءُ مھبت

نبشتہ کار: فضل بلوچ

دی بلوچستان پوسٹ

مھِر ءُ مھبت یک انچیں شے ءِ کہ ترا گوں یک کسّے ءَ یا گوں یک چیزے ءَ مھر ءُ مھبت بُوت گُڑا تئی دل ءِ تہ ءَ آئی ءِ واست ءَ ازت ءُ اھترام بیت ءُ تو آئی ءَ را وتی دل ءِ تہ ءَ جاگہ دے ئے۔ مِھر ترا گْوں آئی ءَ بندوک کنت ءُ تو ھمے لوٹ ئے کہ من آئی ءِ بہ باں ءُ آ منی بہ بیت مدام تئی جُھد، تچ ءُ تاگ پہ آئی ءِ وتی کنگ ءَ برجم بیت وھدے کہ تو بازیں جُھد ءُ کوشست کن ئے کہ آ منی بہ بیت گُڑا تئی مِھرانی تاس چکار بوّان بیت ءُ سر ریچ بیت گُڑا تو زندمان ءِ ھر پِڑ ءَ گْوں آئی ءَ بندوک بہ ئے ءُ تو آئی ءِ مھرانی تہ ءَ ھمے پیم ءَ اْیر بُکّے کہ ابید آئی ءَ تئی زندمان ناسرجم بیت بس تو ھمے لوٹ کہ من وتی مِھروان ءِ رنگ ءُ دروشم ءَ بہ باں۔

یک بنی آدمے گْوں ھُدا ءُ آئی ءِ رسولﷺ ءَ گوں مھِر ءُ مھبت بیت وھدے کہ آ مِھرانی جُھلانکی ایر کپ اِیت گُڑا آ لوٹ اِیت کہ من وتی مھبوب رسولﷺ ءِ وڑ ءَ بہ باں ءُ آ وتی زندمان ءِ نندگ ءُ پاد آیگ ءُ سرجمیں آدتاں آئی ءِ پیم ءَ کنت ءُ وتی زندمانءَ ھمائی ءِ گْوازینتگیں رھبندانی پیم ءَ گْوازین اِیت اگاں یک مِڑوکْیں سپاھیگے ءَ را وتی سرڈگار ءَ گوں مھر ءُ مھبت بیت گُڑا آ آئی ءِ رکینگ ءِ ھاتر ءَ وتی نگرھیں جان ءِ بِبا دیگ ءَ چکّ ءُ پد نہ بیت آئی ءِ اِے کارست رودپتر ءِ تہ ءَ آئی ءَ را ایوکیں پدریچ ءِ واست ءَ یک دروَرے کنت۔

مِھر اگاں ترا وتی زبان ءَ گْوں بہ بیت گُڑا تئی واھگ ھمے بیت کہ من ھر یک چیزے کہ نبشتگ کن آں گڑا من آئی ءَ را وتی شھدیں زبان ءِ لبزاں گْوں بہ کماھاں ءُ وتی ھیالاں درشان بہ کن آں ھمے پیم ءَ کہ ادیب کہ ھست اَنت گُڑا آیاناں وتی زبان ءَ گْوں مِھر بُوتگ۔

وھدے کہ تئی مِھر گْوں جَنکّوے ءَ بہ بیت گُڑا تو پِھک ءَ گْوں آئی ءَ بندوک بہ ئے تئی شپ ءُ روچ ءِ ھیالانی تہ ءَ آئی ءِ اکس گِندَگ بیت تو آئی ءَ را وتی کنگ ءِ ھاتر ءَ بے کساسیں کُربانی دیگ ءَ چک ءُ پد نہ بہ ئے پرچا کہ اچگیشْیں مِھر مردم ءَ بے کساس گنوک ھم کنت-

ترا پُر کْیلیں مِھر انچو جْیڑگ پرماہ اَنت کہ تو ھمے جْیڑ ئے کہ بے آئی ءَ منی زندمان نہ گْوز اِیت، تو ھمے مار ئے کہ بے آئی ءَ من مِر آں گُڑا اِے پیمیں اچگیْشیں مِھر مردم ءَ ریٹہ کنت ءُ مردم گنوک ءِ داب ءَ بیت، وھدے کہ اِے پیمیں مِھر ءِ سانکلاں گْوں مردم بندوک بوت گُڑا آئی ءِ دوری ءَ چہ مردم چہ وتی مِھروان ءَ بے مِھر نہ بیت بلکیں وتی زندمان ءَ چہ نا امیت بوّان بیت ءُ مردم ءِ زندمان یک گْرانیں بارے بیت، یک ادارکے یک سالے بیت۔

اچگْیشیں مِھر ترا بھادر کنت ءُ ترا نِزور ھم کنت بلے بے مِھر زندمان ھم بے تام بیت مِھر کجام چیز ءَ گْوں بہ بیت گُڑا ترا جْیڑگ پرماہ اِیت اگاں تئی مِھر گْوں کتاباں بیت، سرڈگار بیت، جنکّوے ءَ گْوں بیت آ ترا جْیڑگ پرماہ اِیت۔

چُشکہ ڈاکٹر گُش اِیت کہ زندمان ءِ تہ ءَ گَم ءِ بوگ الّمی اِنت، اِے گم اِنت کہ مردم جْیڑگ پرماہ اِیت ھمے پیم ءَ من گْوں وتی مِھرل ءَ مِھر اِنت کہ آ من ءَ مدام جْیڑگ پرماہ اِیت، من ءَ وانگ پرماہ اِیت منی مِھرل ءَ منی زندمان ءَ را یک نوکیں رنگ ءُ دابے ءَ مَٹ کرتگ بس منی گُڈّی واھشت گْوں ھداوند ءَ ھمیش اِنت کہ آ گم ءُ اندوہ مہ گِندات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: سمّو پہ تو اَتک نہ کن آں

نبشتہ کار: مھم جان گُل

دی بلوچستان پوسٹ

سمّو گِلّہ مہ کن! تو وَ زان ئے کہ تئی مھروان ءَ گوں تو چینکدر مھر اِنت تو اے ھم زان ئے کہ بے تو یک ساھتے ءِ گْوازینگ پہ تئی مھروان ءَ کیامت اِنت ، بلے پد ءَ ھم تو اے جیڑے کہ منی یات ءَ نہ کپ اِیت ءُ پہ من ءَ نئیت پرچا؟ تئی یاتاں ساھت ءُ دمان کپ آں ، تئی شیر ءُ شکّلیں ٹھکاں پہ سک زھیر کنت تئی لُنٹانی سر ءِ بچکنداں ھیال کن آں، منی لُنٹاں بچکندے تالان بیت تئی گپ ءُ ھبر ، تئی دستانی سمار دُرست یات کاینت ، بلے ھو پہ تو اَتک نہ کن آں کہ من ءَ اَنگت ءَ باز پند بُرّگی اِنت۔

من ءَ اَنگت ءَ باز کار کنگی اِنت تنیگا من ھِچّ نہ کُتگ ، پہ تو وشیں بانداتے ءِ شوھاز ءَ آں ، داں پہ تئی باندات ءَ من وشّی آؤرت مہ کن آں ، من واتر ھِچّ داب ءَ نہ کن آں پرچا کہ من ترا انوں ھِچّ وڑ ءَ وشّی دات کُت نہ کن آں ، گوں من ءَ تو گیشتِر دور ءُ جنجال بَہ ئے، ءُ من ءَ تو چو دل نہ بَہ ئے۔

وھدے من اِیوک بَہ آں ، گُڑا نِنداں ءُ یاتانی زِر ءِ جُھلانک بُکّ وراں ، اُود ءَ لھتیں اَنچیں یاتاں گوں سر ڈِیکّ  وارت گْوش ئے سرجمیں واھگ بس واب بیتگ اَنت کہ دیستگ اَنت پد ءَ ھمے یاتانی  زِر ءِ چول مان بُراں من ءَ گُڑا پد ءَ نندان ءُ جیڑاں کہ چون بہ کن آں۔۔۔ ھمے ساھت ءَ ھیالانی تُنّ ءِ پُروشگ ءَ گوں وتی بے وسی ءُ جند ءِ کَولاں گوں گُلائیش بَہ آں ھمے دمان ءَ زِرد ءِ کاروان جُنزگ ءَ بِنا بیت ءُ تُنّیگیں چَم ترا شوھاز کن اَنت ، ءُ تو منی دیم ءَ چو بالیں مُرگ ءَ کائے ءُ پہ بال گْوزے اَنچو سما بیت کہ تو اَتکگے ءُ گِلّھے چہ من ءَ ، بلے سمّو تو زان ئے کہ تئی گِلّہ چو سیچن ( سُوچِن ) ءَ لگ اَنت ماں دل ءَ؟-

تو اَنگت سھی نہ ئے کہ من چاریں آتراپاں انگیراں ءُ اے انگیر ءَ تئی گم ، تئی زھیر ءُ ترانگ ھم گون اَنت من ءَ ، ءُ ترا چہ ابید من ءَ زمین ءِ گماں گیشترّ وتی انگیراں کُتگ کہ ترا چہ گیش من ءَ دوست اَنت؟
اے گپ ءَ تو وت ھم زان ئے کہ ترا چہ گیش من ءَ وتی زمین دوست بیت ، ترا من پیسرا ھم گْوشتگ تو منی بالاد ءُ زمین منی ارواہ اِنت زمین بیت، گُڑا  من ءُ تو بَہ اِیں چوناھا سَمّو اے ھبر ءَ تئی دِل زانت کہ تو من ءَ سَک دوست ئے، اگاں مھر ءُ وپا ءِ کِسّھے منی دیم ءَ گْوز اِیت گُڑا تو سک باز من ءَ گیر کائے من دل ءَ جیڑاں کہ من وت ءَ ءُ ترا وانگ ءَ آں، بلے ھِچّ سما نہ بیت کہ اے دِگرانی مھر ءُ وپاھانی کِسّہ ءُ داستان اَنت کہ مئے چھرگ ءَ جن اَنت۔

تئی لُنٹانی سر ءِ نیم توامیں بچکند ءَ ھم من دیست کن آں ، تئی ودارِیگیں چَمّانی اَبیتکی ءَ ھم دیست کن آں، بلے اے درد کہ منی باتِن ءَ روچ پہ روچ گیش بُوان اَنت ءُ یزیدانی داتگیں ٹپّ کہ زیم ءُ آزگ اَنت، اَنگت ءَ ھرروچ من ءَ ٹُوھین اَنت بِہ گْوش سمّو! اِیشاں من چون شموشت کن آں۔۔۔؟ من چون پہ تو اَتک کن آں؟-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ روکپتی بلوچستان ءِ دو جتا جتائیں جاھاں دگ ءِ وئیلاں نوزدہ مردم زدگ بیتگ اَنت ءُ پنچ مردم بیران بیتگ اَنت –

وئیل ھاش ءُ نھبندان ءَ دیم ءَ اَتکگ اَنت کہ اود ءَ پژو گاڑی ٹوئیٹا گاڑی دو دگ ءِ وئیلانی آماچ بیتگ اَنت کہ گاڑیاں سواریں مردم بیران ءُ زدگ بیتگ اَنت –

وئیل سفید آباد ءَ دیم پہ نیمروز ءَ رؤکیں گاڑی نھبندان دگ ءِ وئیل ءِ آماچ بیتگ کہ چریشی ءَ پنچ کس بیران بیتگ اَنت –

بیران بیتگیں مردم ایمبولنس ءِ آیگ ءَ پد چِست کنگ ءُ نھبندان ءِ نادراہ جاہ ءَ سر کنگ بیتگ اَنت-

دومی وئیل ھاش ءَ سِی میل دور پشتکوہ ءَ دیم ءَ اتکگ کہ اود ءَ نوزدہ کس زدگ بیتگ اَنت –

وئیل ءَ پد ایمبولنس سر بیتگ ءُ زدگ بیتگیں مردم چِست کنگ ءُ دیم پہ ھمینی نادراھجاہ ھاش ءَ برگ بیتگ اَنت –

گوشگ بیگ ءَ اِنت کہ سیستان ءُ بلوچستان ءَ ڈرائیورانی ترند روگ ءِ سوب ءَ بے پرواھی ءَ گیشتریں وئیل دیم ءَ آیگ ءَ اَنت کہ چریشی ءَ سالانی تہ ءَ سدانی کچ ءَ مھلوک بیران ءُ زدگ بیگ ءَ اَنت –

سربوتگیں ھالانی رِد ءَ بلوچستان ءِ تہ ءَ جھانی وبا کرونا وائرس ءِ نادراھی ءَ آماچ بوتگیں یک سد ءُ سی ءُ سَے دگہ نوکیں کیس دیم ءَ اتکگ ءُ اے وھد ءَ کرونا وائرس ءَ آماچ بوتگیں درسیں مردمانی کچ بیست ءُ چار ھزار ءُ شست ءُ چار ءَ سر بوتگ اَنت-

جاندراھی ءِ بنشون ءِ نیمگ ءَ چہ شنگ بوتگیں رپورٹ ءِ رِد ءَ گوستگیں روچ ءَ بزاں سَے شمبے ءَ یک ھزار ءُ پنچ سد ءُ بیست ءُ یک مردم ءَ کرونا وائرس ءِ ٹیسٹ کنگ بوتگ اَنت کہ آھانی تہ ءَ شال ءِ نود ءُسَے ، پنجگور ءِ شانزدہ، کیچ ءِ ھپت، شش چاگی ، گوادر، نوشکی ءُ ھاران ءَ سَے سَے ، لورلائی ءُ ھزدار ءَ یک یک مردمے کرونا وائرس آماچ بوتگ انت – چریشی ءَ پد تنی وھدی بلوچستان ءِ تہ ءَ کرونا نادراھی ءَ آماچ بوتگیں مردمانی کچ نوکیں کیساساں ھوار سرجمی ءَ بیست ءُ چار ھزار ءُ شست ءُ چار ءَ سر بوتگ اَنت-

رپورٹ ءِ رِد ءَ گوستگیں بیست ءُ چار ادارانی میان ءَ یک سد ءُ سی مردم وش بوتگ اَنت، وش بوتگیں مردمانی کچ نوکیں کیساساں ھوار سرجمی ءَ بیست ءُ دو ھزار ءُ ھپت سد ءُ چل ءُ ھپت انت –

رپورٹ ءِ رِد ءَ بلوچستان ءِ تہ ءَ کرونا وائرس ءِ نادراھی ءَ چہ دگہ سَے مردم بیران بوتگ اَنت چریشاں پد کرونا وائرس ءِ نادراھی ءَ بیران بوتگیں درسی مردمانی کچ دوسد ءُ ھپتاد ءَ سر بوتگ اَنت –

رپورٹ ءِ رِد ءَ بلوچستان ءِ تہ ءَ اے وھدی کرونا وائرس ءِ یک ھزار ءُ چل ءُ ھپت نادراہ ھست انت کہ آھانی تہ ءَ بیست ءُ شش نادراہ آکسیجن فلور انت – جھانی وبا کرونا وائرس ءِ نادراھی گیشتر تالان بوگ ءِ ھشت بما ھپتاد ءُ چار درسد انت-

سربوتگیں ھالانی رِد ءَ بلوچستان ءِ دمگ لسبیلہ دگ ءِ وئیل ءَ ھژدہ مردم ٹپی بوتگ اَنت ءُ تربت ءَ یک ورنایے بیران ءُ دو ٹپی بوتگ وھدیکہ ھُزدار ءَ ناشناسیں مردمے ءِ جون دست کپتگ –

گیشیں ھالانی رِد ءَ کراچی تاں ھزدار ءَ رؤکیں مساپر کشیں کوچ ءِ ٹیر ءِ ترکگ ءِ سوب ءَ چپی بوتگ –

چپی بوگ ءَ چک ءُ زالبولاں ھوار ھژدہ مردم ٹپی بوتگ ٹپی اَنت، بوتگیں مردم ھما دمان ءَ سول ھسپتال بیلہ ءَ برگ بوتگ انت –

تربت ءَ دگ ءِ وئیل ءَ ورناہے بیران بوتگ دو ٹپی بوتگ اَنت –

شاھی تمپ ءَ گوستگیں شپ ءَ نادراھجاہ ءِ کراس ءَ دو پرپٹانی ڈیک ورگ ءَ یک ورنایے بیران ءُ دو ٹپی بوتگ اَنت-

بیران بوتگیں ورنا ءِ پجار گنگزار ء رپیک جھممند چاھسر ءِ نام ءَ چہ بوتگ –

زانگ بہ بیت بلوچستان ءِ ھمک روچ دگ ءِ وئیلاں بازیں مردمے ٹپی ءُ بیران بیگ ءَ اَنت – گوستگیں روچ ءَ گوادر ءِ دمگ دشت سنگئی بولان ءُ پریمیو گاڑی ءِ ڈیک ورگ ءَ چار مردم بیران یازدہ ٹپی بوتگ ات اَنت کہ آھانی تہ ءَ گیشتریں کچ زالبول ءُ چکانی ئیگ اَت-

بلوچستان ءَ دگ ءِ وئیلاں دیمپان بوگ ءِ مستریں سوب دگانی کسانی ءُ پُرشت پروشی ءُ ڈریورانی لاپرواھی ھم گوشگ بیت کہ آھانی تہ ءَ گیشتر بید تربیت کتگین انت –

ھزدار ءَ زانگولیں جون ءِ دست کپتگ – اھوالکارانی رِد ءَ بلوچستان ءِ دمگ ھزدار ءِ کوھی دمگ ھلوائی ءَ ناشناسیں مردمے ئے جون دست کپتگ – ھمے گوشگ بوگ ءَ انت کہ جون بازیں ماہ پیسری اِنت آئی ءِ پجار کنگ ءِ درستیں نشانی ھلاس بوتگ انت ـ آئی ءِ پجار کنگ باز مشکل انت بلے پد ءزل ھم ھزدار ءِ پھازداراں جون دست گپتگ اے درگت ءَ گیشیں پٹ ءُ پول کنگ انت –

سر بیتگیں ھالانی رد ءَ بلوچستان ءِ تیابدپی شھر گوادر ءَ جنسی زوراکی ءِ بنیاد ءَ میر پور خاص ءِ جھنند دزگیر کنگ بیتگ –

پولیس ءِ گوشگ اِنت گوادر ءِ ھند پشکان کنرکی وارڑ ءَ شش سال ءُ پنچ سال ءِ میانی جنکوے زورانسری آوار جنگ بیتگ –

پولیس ءِ گوشگ اِنت برتگیں زھگ ءِ گون ءَ جنسی زوراکی ءِ کنوکیں جرمکار گل شیر ء مھمد حسن تتک ءُ چریشی ءَ پولیس ءَ آئی ءِ رندگیری کرتگ ءُ دزگیر کرتگ –

دزگیر کرتگیں مجرم اے دفعہ سَے سد ءُ شست ءُ چار ءُ سَے سد ءُ ھپتاد ءُ شش ءُ پنچ سد ءُ یازدہ ءِ تھت ءَ پَٹ ءُ پول بیگ ءَ اِنت –

زانگ بہ بیت گوستگیں وھداں کیچ ءِ دمگ ھوشاپ ءَ ھمے وڑ ءَ کسان سالیں زھگے ءِ سر ءَ جنسی ءِ زوراکی ءِ ھال رسانکدراں شنگ بیتگ اِت اَنت کہ چریشی ءِ پژدر ءَ کھولاں زھرشانی کرتگ ءُ پد ءَ بلوچستان ءِ بازیں جاھاں لس مھلوک ءِ نیمگ ءَ زھرشانی کنگ بیتگ اَنت –

زھرشانی ءَ پد ایف سی ءِ کارمند نام گپتی دزگیر کنگ ءُ پولیس ءِ دست ءَ دیگ بیتگ اَت ءُ مھلوک ءِ لوٹ اَت کتکگاریں جرمکار سزا دیگ بہ بیت اِنت –