TBP Balochi

بلوچستان ءِ نامی ئیں رھشون ءُ بلوچستان ءِ گوستگیں سروزیر سردار عطاء اللہ مینگل ءِ جان وش وش نہ بیتگ ءُ چریشی ءَ آ نادراہ جاہ ءَ برگ بیتگ –

سربیتگیں ھالانی رِد ءَ بلوچستان ءِ راجدار ءُ راجدوستیں رھشون سردار عطاء اللہ مینگل ءِ جاور نگیگ انت اے وھد ءَ سندھ ءِ بنجاھی شھر کراچی ءَ نادراہ جاہ ءَ برگ بیتگ –

سردار عطاء اللہ مینگل بلوچستان نیشنل پاٹی ءِ رھشون ءُ بلوچستان ءِ گوستگیں سروزیر بوتگ – اے وھدی آئی ءِ جاور نگیگ انت کراچی ءَ نادراہ جاہ ءَ برگ بوتگ –

سردار عطاء اللہ ءِ جاندراھی ءِ واستا بلوچ راج ءَ گوں آئی ءِ جان وش بیگ ءِ واستا دعا ءِ دزبندی کنگ بیتگ –

بیگواھیں جمیل ءِ جنک ءُ بیگواھیں نجیب بلوچ ءِ گوھار اسماء بلوچ ءَ مروچی وتی مات ءُ وائس فار بلوچ مسنگ پرسنز ءِ وائس چیئرمین ماما قدیر بلوچ ءِ ھمراھی ءَ شال ءِ پریس کلب ءَ پریس کانفرنس کنان ءَ گُشتگ کہ منی پت جمیل رھمت مئے دمگ چہ آواران ءَ پوج ءَ منی چمانی دیم ءَ ھشت سال ءَ پیسر بیست ءُ نُھ اپریل دوھزار ءُ سیزدہ ءِ سھب ءَ زورانسری آوار جتگ ءُ بیگواہ کرتگ، پت ءِ دراجیں مدت ءِ بیگواھی مئے دل ءُ جاناھاں لرزینگ بیتگ ءُ ھمے وھد ءَ بزاں دو ھپتگ ءَ پیسر یازدہ اگست ءَ ایف سی ءَ منی برات نجیب بلوچ چہ پنجگور ءَ دیم پہ کراچی ءَ روگ ءِ وھد ءَ رکشان کور ءَ سرادک چیک پوسٹ ءَ بس ءَ ایر گپتگ ءُ پجار کاڈ چیک کرتگ ءُ دزگیر کرتگ ءُ گوں برتگ کہ ھما اِنت بیگواہ اِنت –

آئی ءَ دیمتر ءَ گشتگ کہ منی برات نجیب بلوچ گوستگیں بازیں سالاں متھدد ارب امارات ءَ مزوری ءَ بیتگ گوستگیں روچاں آ وتی موکلاں لوگ ءَ اتکگ، موکلانی ھلاس بیگ ءَ پد واتر پنجگور ءَ دیم پہ کراچی ءَ اود ءَ ارب امارات ءَ روگی بیتگ زورانسری آوار جنگ ءُ بیگواہ کنگ بیتگ – اشی ءَ پیسر من وتی پت ءِ یلو کنگ ءِ واستا زھرشانی کنگ ءُ پیداک آں ما پت ءِ یل کنائینگ ءَ گوستگیں ھشت سالاں زھرشانی جمھوری رنگ ءُ دگہ تک پول اِتگ اَنت، آمیدگسی نزام، بلے ھچ نہ بوتگ چریشی ءَ کہ منی پت یلو بہ بیت نی منی برات زورانسری آوار جنگ بیتگ –

اسماء بلوچ ءِ گوشگ اَت کہ ما وتی پریات زرتگ ءُ اد ءَ اتکگ اِنت ءُ شرپمندیں مردماں شمارا بہ گوش آں چریشی ءَ پیسر مئے کھول ءُ مردم زلمانی دیمپان بیتگ اَنت پت ءِ بیگواھی ءَ پد ما ایمنی ءِ نندگ ءَ نیلگ بیتگ اِنت ماسٹر ھدا بکش کہ منی پت ءِ ناکو زتک اِنت ءُ گورنمنٹ مڈل سکول رضائی بازار گیشکور ءِ استاد بیتگ ملٹری کرنل کاشف ءَ گیشکور ءِ پوجی بنجل ءَ برتگ ءُ سَے مارچ دوھزار ءُ پانزدہ ءَ آئی ءِ زانگول کرتگیں جون ھزدار ءِ ھسپتال ءَ رسینتگ ھمے رنگ ءخ سبزل قومی کہ منی پت ءِ دومی ناکو زتک اِنت آئی ءِ میتگ ءَ پوجی آپریشن ءِ وھد ءَ آئی ءِ لوگ سوچگ بیتگ ءُ آ وتی کھول ءِ ھمراھی ءَ لاچار بیتگ ءُ سھر کولواہ ءَ شتگ کہ پوج ءَ آ پانزدہ ستمبر دوھزار ءُ ھبدہ ءَ مادگ کلات ءَ چِست کتگ ءُ یک ھپتگے ءَ پد آئی ءِ جون یک درچکے ءَ ٹن اِتگیں دروشم ءَ دزکپتگ ناکو سبزل یک مزورے بیتگ –

آئی ءَ گشُتگ کہ منی پت ءُ منی برات ھمے پژدر ءَ آوار جنگ ءُ بیگواہ کنگ بیتگ اَنت مئے مردم ءُ مئے سیاد راجی ھکانی واستا گپ جن اَنت یک آجوئیں شکامی ءِ واستا گپ جن اَنت مارا مئے زمین ءِ سر ءَ پرسکون ءَ نندگ ءِ ھک نیست؟ ھاں ما اے ملک ءِ شھری نہ اِنت؟ وتی پت ءِ واستا توار چست کنگ جرمے؟ نِی مارا اے ھمے جرم ءِ سر ءَ منی برات آوار جنگ ءُ سزا مارا ءُ مئے لوگ والایاں دیگ بیگ ءَ اِنت منی پیر ءُ آجز ءُ نادراھیں مات بیگواھیانی دیمپان اِنت نا ورگ وارت نا وپس ایت ءُ گوش ایت زندانانی تہ ءَ منی زھگ کجام ھال ءِ تہ ءَ اِنت؟ ھدا ءِ واستا ما اے زھنی دوچاری کشگ ءَ بہ بہ ایں ما کجام جرم ءِ سزا ءِ دیمپان اِنت؟ منی پت ءُ برات ءَ اگاں جرمے کرتگ گڑا کانون ءِ راھبند کاربندگ بہ بنت ءُ سزا دیگ بہ بیت، بلے اے وڑ ءَ چست کنگ ءُ سالانی سال گار کنگ وت یک گیر کانونی ءُ گیر انسانی رویشے –

آئی ءَ اھوالکار ءُ دراھیں تکاں بندوکیں مردمانی منت گپتگ ءُ گوشتگ کہ شما اتکگ ءُ مئے درد گوشداشتگ ءُ دیم ءَبرگ ءِ جھد کتگ ءُ اے زلمانی توار جوڑ بئے ءُ مئے توار ءَ داں مزنیں واکاں سر کن اِت –

تالبان ءِ جارکش ذبیح اللہ مجاھد ءَ گوشتگ کہ چہ اوگانستان ءَ ڈالر ءُ نوادراتانی برگ ءِ سر ءَ بندش اِنت –

چاگردی رسانکجاھاں یک ٹویٹے ءِ تہ ءَ آئی ءَ گُشتگ کہ زمینی ءُ برزی راھاں ڈالر ءُ دگہ گران بھائیں مڈیانی برگ بند اِنت ءُ ھرکسے ءَ دُزکائی برگ ءِ جھد کرت آ دزگیر کنگ بیت ءُ کانون ءِ رد ءَ سزا دیگ بیت اِنت ھمے وڑ ڈالر ءُ نوادرات پچگرگ بنت –

چریشی ءَ پیسر سَے شمبے ءِ روچ ءَ آئی ءَ کابل نیوز ءَ کانفرنس کنان ءَ گُشتگ اَت اوگانستان ءِ اُستان پنجشیر ءِ جیڑہ گپ ءُ تران گیش اِت اِنت ءُ جنگ ءِ جاور اتک نہ کن اَنت –

آئی ءَ گُشتگ اَت ما لوٹ ایں اوگانستان ءِ سرکار ءِ سازی زوت سرجم کنگ بہ بیت ءُ دیمتر ءَ گپ کنان ءَ گُشتگ اَت امریکہ ءُ آئی ءِ ھمسنتیں ڈیھ وتی درایگ ءَ سرجمی بہ کن اَنت –

آئی ءَ دیمتر ءَ گُشتگ اَت کہ امریکہ زانتکاریں اوگانیانی کشگ ءَ بند بہ کنت –

آئی ءَ اوگان ءِ مھلوک ءَ گوں دزبندی کتگ اَت کہ اوگانی مھلوک ڈن ءِ روگ ءَ ابید وتی ڈیھ ءَ بہ نند اَنت ءُ ڈیھ ءِ دیمروئی ءَ مئے کوپگ ءَ گوں ھمکوپگ بہ بنت –

آئی ءَ گُشتگ اَت امریکہ اوگانستان ءِ شھریانی درکنگ ءَ آیاں گنوک مہ کنت ءُ زانتکاریں اوگانیانی درکنگ ءَ بند بہ کنت –

ذبیح اللہ مجاھد ءِ گوشگ اَت کہ امریکہ وتی مرزی ءَ چہ سِی ء یک اگست ءَ ڈیڈلائن داتگ ءُ ما امن ءِ ھاتر ءَ اے گپ زرتگ –

یک جُستے ءِ پسو ءَ آئی ءَ گُشتگ اَت ما سِی ءُ یک اگست ءِ داتگیں ڈیڈ لائن ءَ گیش دیم ءَ بُرت نہ کن ایں – سی آئی اے ءِ سروک ملا برادر ءِ گند ءُ نند ءِ بارو ءَ یک جُستے ءِ پسو ءَ آئی ءَ گُشتگ اَت آئی ءَ گند ءُ نند ءِ بارو ءَ ھچ سرپدی نیست اِنت –

بلے اد ءَ امریکہ ءِ سپارتھانہ جاڑیگ اِنت ءُ سپارتی تکاں گند ءُ نندانی موکل اِنت –

جارکش ءِ تالبان ءَ گُشتگ اَت اوگانستان ءِ سرڈگار ھچ ملک ءِ ھلاپ ءَ کارمد کنگ ءَ دیگ نہ بیت اِنت ءُ دومی ملکاں ھم گوں ھمے دزبندی اِنت آ ھم وتی ملکاں مئے ملک ءِ ھلاپ ءَ کارمرد کنگ ءَ میل اَنت –

جارکش ءِ تالبان ءَ گُشتگ اَت کہ اوگانستان ءَ بیست سالی جنگ ءِ آماچی ءَ پد گوستگیں لھتے روچانی تہ ءَ کُشت ءُ کوش یا لَٹ ءُ کُٹ ھچ دیم ءَ نیتکگ اَنت –

آئی ءَ گُشتگ اَت ڈیھ ءُ راج ےظ سرکاری کار کنوکیں دراھیں ادارہ پچ اَنت نادراہ جاھاں مھلوک ءِ جاندراھی بیگ اِنت، سرکاری ٹی وی ءُ ریڈیواں یکشل ءَ ھال شنگ بیگ ءَ اَنت –

نودربر وانگجاھاں روگ ءَ اَنت ءُ دراھیں بینک وتی آجوئی ءِ رد ءَ کار کنگ ءَ اَنت ءُ زوت اوگانستان ءَ تر ءُ تابی جاہ پچ کنگ بنت اِنت –

آئی ءَ گُشتگ اَت انسانی ھکانی لگتمالی نہ بیت اِنت ءُ زالبولاں سرجمی ءَ آجوئی دیگ بیت اِنت ءُ بلے انی سیکورٹی جاورھالانی سر ءَ آ دارگ بیگ ءَ اَنت –

دومی نیمگ ءَ میان اُستمانی زرکاری ءَ اوگانستان ءِ کمکی پوڑی دیگ بند کرتگ –

کابل ءَ تالبان ءِ گرگ ءَ پد ورلڈ بینک ءَ اوگانسگان ءِ دراھیں منسوبہ پوڑی دیگ داشتگ اَنت –

ادارہ ءِ نیمگ ءَ ھمے گمان کنگ بیتگ کہ چارگ بیت اِنت کجام رنگ ءَ تالبان ءِ گرگ ءَ پد ڈیھ ءَ دیمروئی کرتگیں کارانی سر ءَ اسر کپت کنت –

بلیدہ ءُ دشت ءَ پاکستانی پوج ءِ سر ءَ بیتگیں اُرشانی زمہ واری بلوچستان لبریشن فرنٹ ءَ منّ اِتگ اَنت –

بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کرتگیں درشان ءِ تہ ءَ گُشتگ کہ یکشمبے ءِ روچ ءَ بیست ءُ دو اگست ءَ کیچ ءِ دمگ بلیدہ بٹ ءِ ھند ءَ چٹوک ڈن ءَ پاکستانی پوج ءِ چوکی اسنائپر ءِ گون ءَ اُرش کرتگ ءُ یک پوجی کارمندے کُشتگ –

ھمے وڑ ءَ کیچ ءِ دمگ دشت ءَ دگہ اُرشے ءِ زمہ واری ھم بلوچستان لبریشن فرنٹ ءَ منّ اِتگ –

جارکش ءِ گوشگ اِنت کی دو شمبے ءِ روچ ءَ سرمچاراں کیچ ءِ دمگ دشت ءَ نوکیں راہ ءَ پوجی چوکی اسنائپر ءِگون ءَ نشانگ کرتگ ءُ یک کارمندے کُشتگ –

جارکش ءَ گُشتگ کہ پاکستانی پوج ءِ سر ءَ اُرش بلوچستان ءِ آجوئی ءَ داں برجاہ بنت –

بلوچستان ءِ دمگ لسبیلہ ءِ ھیڈکوارٹر اوتھل ءَ سر بیتگیں ھالانی رد ءَ اوتھل ءِ کوچگی دمگاں نودربراں وتی ھکانی واستا زھرشانی کنان ءَ مزن دگ بند کرتگ –

گیشیں ھالانی رد ءَ چارشمبے ءِ روچ ءَ جتا جتائیں وانگجاھاں مُچ بیتگیں نودربراں بلوچستان ءُ سندھ ءَ ھوار کنوکیں شھدگ بند کرتگ ءُ روانی مھتل کرتگ –

زھرشانی کنوکیں نودربرانی گوشگ اِنت کہ مارا لوکل مساپر گاڑی اسکول ءِ واستا چِست نہ کن اَنت ءُ ما اسکول ءَ لیٹ سر بہ ایں آیاں گُشتگ کہ سرکار سرجمی ءَ مئے لوٹ آں سرجم بہ کنت –

دی بلوچستان پوسٹ پترھال ءَ سر بیتگیں ھالانی رد ءَ زیروپوائنٹ، پیر سوائی اسٹاپ، شیخ اسٹاپ، گدور اسٹاپ، کلمتہ اسٹاپ ءُ انگاریہ اسٹاپ ءَ ھواریں نودربراں زھرشانی کنان ءَ اُستانی سرکار ءَ چہ بس ءِ لوٹ کرتگ ءُ گُشتگ کہ لوکل ٹرانسپورٹ نودربراں پریشان کنگ ءَ اَنت ءُ ما بازیں مِلاں پند ءَ اسکول ءَ رو اِنت کاینت –

نودربرانی زھرشانی سبب ءَ مزن شھدگ ھردوکیں نیمگاں مساپر بس ءُ دگہ گاڑیانی دراجیں کتار لگ اِتگ اَنت ءُ بازیں ادارھاں چہ روانی مھتل اَنت –

زانگ بہ بیت بلوچستان ءِ دمگ لسبیلہ ءَ گیشتریں وانگجاھاں ٹرانسپورٹ ءِ آسراتی ءِ نہ بوگ ءَ نودربراں مزنیں جنجالانی دیمپانی اِنت –

لسبیلہ بلوچستان ءِ سیمسری ءُ سندھ ءِ بنجاھی شھر کراچی ءَ ھواریں دمگ بلوچستان اِنت ءُ اد ءَ سر وزیر بلوچستان ءُ جام کمال ءُ گوستگیں وزیر آئی ءِ پت ءُ پیروک ءِ پشکپتگیں ھنکین اِنت –

شَیر: ندر پہ شہید پدائی سربُلندجان ءَ

شائر: اصغر سکی

دی بلوچستان پوسٹ

سربُلنداں تئی پھر ءُ شاناں وتن
کوہ ءِ چلتن تئی مکُراناں وتن

وہدے پریات کن ہاک مئے سرمگیں
اسلم ءَ یات کن ہاک مئے سرمگیں
اوشتیت کولاں بلوچی زباناں وتن

گوادریں گُلزمین ھون ندراں پتو
سرمتابیں جگر جون ندراں پتو
تنگھیں بچ تئی جی ءُ جاناں وتن

جنتیں گُلزمین پتو شیداھاں من
تئی پروماں وتن تئی بلیداھاں من
شال ءُ بولاناں تئی زامُراناں وتن

اے اسد کُنگراں کایاں پروشاں ترا
بشّی ئیں جمبراں کایاں پروشاں ترا
تئی کہ اصغر سکی پاسپاناں وتن

سر بیتگیں ھالانی رد ءَ روکپتی بلوچستان ءِ دمگ ھاش ءَ مات ءُ چکانی جون دزکپتگ اَنت –

ھالانی رد ءَ گوستگیں روچاں اے مات ءُ زھگ بیگواہ بیتگ اَنت ءُ چریشی ءِ پژدر ءَ اشانی رپورٹ ھم پولیس ءِ گور ءَ نبشتگ کنگ بیتگ اَنت –

روکپتی بلوچستان ءَ سر بیتگیں ھالانی رد ءَ سدنا جمالزئی گوں ھعراہ ءِ چار سالی ئیں زھگ ءَ بے ساھی ءُ دزکپتگ اَنت –

اشانی بیگواھی ءُ بیرانی ءِ بارو ءَ دگہ گیشیں سرپدی نیست اِنت –

روکپتی بلوچستان ءَ لھتے وھد ءَ پیسر شورش بیتگیں چوشیں وئیل گیش بیتگ اَنت ءُ وئیلانی گر ءُ دار کنگ ءَ پھزداری لشکر ءِ سستی گندگ ءَ آیگ ءَ اَنت –

سر بیتگیں ھالانی رد ءَ بلوچستان ءِ بنجاھی شھر شال ءَ بلوچ اسٹوڈنٹس ایکشن کمیٹی ءِ نیمگ ءَ بلوچستان یونیورسٹی ءِ انتزامیہ ءِ رویشانی ھلاپ ءَ زھرشانی کنگ بیتگ-

آیانی گوشگ اِنت کہ بلوچستان یونیورسٹی یونٹ ءِ انتزامیہ ءِ رویش شر نہ اَنت ءُ اشانی ھواری ءَ دگہ جنجال ھم دیم ءَ آیگ ءَ اَنت –

بلوچ اسٹوڈنٹس ایکشن کمیٹی یو او بی یونٹ اسٹوڈنٹساں اسکالرشپ ءِ جیڑہ یکشل ءَ بیگ ءَ اَنت چریشی ءِ پژدر ءَ اسٹوڈنٹس ھاسٹل ءُ اکیڈمک سلاہ بندانی پیرھداری ءَ کرتگ اَنت ءُ چریشی ءَ نودربراں بازیں جیڑہ ءُ جنجالانی دیمپانی اِنت –

آیانی گوشتگ کہ چریشی ءَ نودربرانی اسکالرز ءِ بند کنگ ءُ اد ءَ نودربر اسکالرشپ ءِ بارو ءَ سرپد کنگ ھم نہ بنت –

آیاں گُشتگ کہ انتزامیہ اسٹوڈنٹسانی گون ءَ بے ھودی، ھاسٹل ءِ جیڑھانی سر ءَ شری ءَ دلگوش نہ دیگ ءُ دوریں ھنداں اتکگیں نودربرانی ھاسٹل ءَ جیڑہ ءُ آیانی کلاساں بھر نہ زورگ ءِ سبب ءَ چریشی ءَ بازیں جیڑہ ءُ جنجالانی دیمپانی اِنت –

زانگ بہ بیت گوست ءَ ھم نودربرانی جیڑہ یکشل ءَ پیش اتکگ ءُ نودربر زھرشانی کنگ ءَ گندگ بیتگ اَنت ءُ بلے واکدار تنی وھدی نودربرانی جیڑھانی گیش ءُ گیوار کنگ ءَ بے سوبی ءَ گندگ ءَ اتکگ اَنت –

روکپتی بلوچستان ءِ بنجاھی شھر دزاپ ءَ سر بیتگیں ھالانی رد ءَ نامی ئیں عالم دین ءُ راجدوستیں رھشون مولانا کوھی کرونا ویروس ءِ آماچ بیتگ –

گوستگیں روچ ءَ مشھد ءِ زندان ءَ بندیگ جاہ ءَ ناگتی آئی ءِ جان وشی ءِ جاور نگیگ بیتگ اَنت ءُ چریشی ءِ سر ءَ آئی ءِ کھول ءَ آ نادراہ جاہ ءَ سر کرتگ –

بلوچ کمپعن فعالین ءِ رد ءَ مولانا کوھی گوستگیں روچ ءَ مشھد ءِ زندان ءَ آئی ءِ جان ءِ جاور وش نہ بیتگ ءُ چریشی ءَ آئی ءِ پُپاں گیش جاور نگیگ بیتگ اَنت –

بلوچ کپعن فعالین ءِ رد ءَ مولانا کوھی آئی ءِ کھول ءِ مردماں چہ زندان ءَ واتر آورتگ ءُ بنجاھی شھر دزاپ ءَ آئی ءِ جاندراھی بیگ ءَ اِنت –

بلوچ کمپعن فعالین ءِ رد ءَ مولانا کوھی نادراھی ءِ سبب ءَ چیزے روچ ءِ واستا زندان ءَ موکل دیگ بیتگ –

بلوچ کمپعن فعالین ءِ رد ءَ اے سیمی بر اِنت مولانا کوھی چہ زنداں واتر بیگ ءَ اِنت ءُ بلے اے رندی آئی ءِ جان ءِ جاور وش نہ اَنت –

زانگ بہ بیت مولانا کوھی گوست ءَ ایرانی آمیدگس ءَ مشھد ءِ زندان ءَ بھتامی ءَ زاندانی کتگ ءُ آئی ءَ بازیں وھد بیت اِنت زاندانی تہ ءَ اِنت –

مولانا کوھی روکپتی بلوچستان ءِ دمگ پشامگ راسک ءِ نندوک اِنت ءُ آئی ءِ بارو ءَ گشگ بیت اِنت کہ آ راجدوستی ءِ ھواری ءَ پشامک ءَ مزنیں مست ءِ پیشو اِنت –

وائس فار بلوچ مسنگ پرسنز ءِ رھشون نصراللہ بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ ھمے سال ءَ فروری ءَ بیگواھیں مردمانی سربراہ جسٹس (ر) جاوید اقبال ءِ گوم ءَ اسلام اباد ءَ دو رند ءَ دچار کپتگاں ءُ بیگواھیں مردمانی جیڑہ ءِ سر ءَ گپ جتگ – ما کمیشن ءِ سربراہ ءَ گوشتگ کہ تو ھمائیں کہ کمیشن ءِ سربراہ جوڑ بوتگ ئے تئی سربراھی ءَ بلوچستان ءِ تہ ءَ بیگواھیں مردمانی کیس ءِ بس سَے رند ءَ پیشی بوتگ اَنت – ما چہ آئی ءَ لوٹ کتگ کہ ما لوٹیں کہ تئی سربراھی ءَ بیگواھیں مردمانی کیسانی پیشی بہ بیت ءُ آئی ءَ مئے گوم ءَ کول کُتگ کہ بیگواھیں مردمانی کیسانی پیشی ھمائی ءِ سرکماشی ءَ بیت انت – نوں مئے دچار کپگ ءَ پد بلوچستان ءَ چارمی پیشی ھم بید چہ آئی ءِ سرکماشی ءَ بوگ ءَ انت –

آئی ءِ گوشگ ات کہ اشی ءَ ابید ھم ما آئی ءِ دیم ءَ اے گپ ایر کتگ کہ ھما بیگواھیں مردمانی کیسانی تہ ءَ گواہ گیشتر انت آ کیس کمیشن ءَ چہ درکنگ بوگ انت گڑا آئی ءَ مئے مار ءَ باور کنائینتگ درکنگ بوتگیں کیسانی درگت ءَ دوبر گزارش بہ کن ات گڑا آ مان کنگ بنت آھانی بارو ءَ دوبر کار کنگ بیت اِنت گڑا اے درگت ءَ ما علی اصغر بنگلزئی ءُ زاکر مجید ءَ ھوار دگہ بیگواھیں مردمانی کیسانی درگت ءَ گزارش دیم داتگ پنچ ماہ گوستگ بلے انگت آ کیس نبشتہ کنگ نبوتگ انت –

نصراللہ بلوچ ءَ گوشتگ کہ اشی ءَ ابید کمیشن سرکماش ءِ گوشتگ کہ آ بیگواھیں مردمانی درگت ءَ ملکی ادارھانی سربراھاں گوں دچار کپتگ کہ ھما بنیاد ءَ جسٹس (ر) جاوید اقبال ءَ مار ءَ باور کنائینتگ کہ دوھزار ءُ ھژدہ ءَ چہ بیگواھیں مردم مارچ ءِ ماہ ءَ تاں یل دیگ بنت یا آھانی درگت ءَ آھانی کھول سرپد کنگ بیت اِنت ءُ دگہ بیگواھیں مردمانی یل کنائینگ یا آھانی کھول ءَ شش ماھے میان ءَ سرپدی دیگ جھد بیت اِنت –

آئی ءِ گوشگ ات کہ اشی ءَ ابید بیگواھیں مردمانی کمیشن کارمندانی رویہ ءُ کِرد ءِ درگت ءَ مئے شکایت ءِ پسو ءَ مئے گوم ءَ کول کنگ بوتگ کہ آ کمیشن ءِ نمائندگاں سرپد کن انت کہ آ بیگواھیں کھولاں گوں نرمی ءُ اخلاق گوم ءَ پیش بیا انت ءُ مار ءَ اے ھم باور کنائینتگ کہ نوں پیسری وڑ ءَ سال ناں بلکیں ماھانی تہ ءَ بیگواھیں مردمانی کیسانی تہ ءَ دیمروئی گند ایت بلے بژن کہ کمیشن ءِ سرکماش ءَ مئے گوم ءَ ھما کول کہ کُتگ انت مار ءَ باور کنائینتگ آئی ءِ سر ءَ ھچ امل کنگ بوگ ءَ نہ انت چریشی ءَ بیگواھیں مردمانی سک باز ماژگی اماچ انت –

آئی ءِ گوشگ ات کہ ھمے ھاتر ءَ ما چہ بیگواھیں مردمانی کمیشن ءِ سربراہ ءَ چہ لوٹ کنیں کہ آ بیگواھیں مردمانی یل کنگے درگت ءَ ھما کول کہ گوں ما کنگ بوتگ انت آ پورہ کنگ بہ بنت –

وھدیکہ دومی نیمگ ءَ وفاقی سرکار ءِ نیمگ ءَ چہ بیگواھیں مردمانی یل کنائینگ کمیشن مروچی شال ءَ دومی روچ ءَ بیگواھیں مردمانی کیسانی پیشی بوتگ – مروچی دومی روچ ءَ یازدہ بیگواھیں مردمانی کیس گوشدارگ بوتگ انت – تنی وھدی ھچ بیگواھیں مردمانی یل بوگ ءِ ھال نیست انت –

داخلہ بلوچستان ءِ بنشون ءِ رِد ءَ بلوچستان ءِ مزن آمیدگس گوستگیں سروک فضل الرحمن ءِ سرکماشی ءَ بیگواھیں مردمانی کمیشن ءَ شال ءِ سول سیکرٹریٹ جمالی ھال ءَ بیگواھیں مردمانی کیسانی پیشی ءَ مروچی دومی روچ ءَ یازدہ مردمانی کیس گوشدارگ بوتگ اَنت کہ آھانی تہ ءَ شش مردمانی سیادی چہ شال ءَ انت وھدیکہ پنچ مردمانی سیادی چہ پنجگور ءَ چہ بوتگ- کمیشن ءَ دو روچ ءَ بیست ءُ شش بیگواھیں مردمانی کیسانی پیشی کتگ –

مروچی ھچ کسے ءِ یل بوگ ءِ ھال نیست انت وھدیکہ گوستگیں روچ ءَ شش مردمانی یل بوگ ءِ ھال شنگ کنگ بوتگ ات بلے بید چہ سرکاری رپورٹ دگہ ھچ نیمگ ءَ آھانی یل ءَ بوگ ءِ ھچ وڑیں درشان ءُ ھال دیم ءَ نہ اتکگ –

کمیشن شال ءِ تہ ءَ بیست ءُ ھشت اگست ءَ تاں بیگواھیں مردمانی کیساں گوشداریت شش روچ ءِ میان ءَ شست ءُ چار بیگواھیں مردمانی گوشدارگ بنت کہ اے بیگواھیں مردمانی سیادی بلوچستان ءِ بنجاھی شھر شال ءُ دگہ ھند ءُ دمگانی انت –