TBP Balochi

سر بیتگیں ھالانی رد ءَ مروچی آدم حقانی اکیڈمی آواران کولواہ ءِ چیردستی ءَ ائید ءِ وشیانی درچ ءَ ساز ءُ زیملی دیوان بیتگ –

دیوان ماڈل ھائی اسکول آواران ءَ برجم دارگ بیتگ، دیوان ءَ بازیں کچے ءَ مھلوک ءَ بھر زرتگ –

دیوان ءَ ساز ءُ زیملی مھلوک ءَ ھوار شائر ءُ کواساں ھم بھر زرتگ ءُ دیوان ءِ گوں ساز ءُ زیملی، شائری نیاد ءَ بیتگ –

زانگ بہ بیت بلوچستان ءِ تیادپی دمگاں ھم ائید ءِ وشیانی روچاں گوست ءَ دیوان برجم دارگ بیتگ اَنت دیواناں بھر زیروکیں مردمانی گوشگ اِنت کہ بلوچستان ءَ دگہ زند ءِ آسراتی نیست اَنت بلے ائیدانی نیاد ءُ دیوان کاینت گڑا گُمانے ءَ دل ءَ تاھیر بکش اَنت –

آیانی گوشگ اِنت کہ بلوچستان ءِ جاور پیش ءَ گیش ناوش اَنت کہ ھمک در ءَ مھلوک ءِ ناوشیانی آماچ اَنت تر ءُ تاب ءُ دگہ زند ءِ آسراتیانی درایگ ءَ مھلوک باز کم در کیت اِنت –

سر بیتگیں ھالانی رد ءَ بولان پیر گیب ءَ دو ورناہ جانشودگ ءِ میان ءَ آپ بُک اتگ ءُ بیران بوتگ انت –

گیشیں ھالانی رِد ءَ بلوچستان ءِ دمگ بولان ءَ سیل سواد ءِ دمگ پیرگیب ءَ دو ورناہ جان شودگ ءِ میان ءَ آپ ءَ بک اتگ ءُ بیران بوتگ انت –

بیران بوتگیں ورنایانی پجار اسامہ جاوید ء محمد جاوید ءُ اسداللہ ءِ ناماں زانگ بیتگ انت –

ھردو ورنایانی جون چہ آپ کشگ ءُ ایدھی ایمبولینس ءِ کمک ءَ دمگی نادراھجاہ ءَ سرکنگ بوتگ انت –

ھمے وڑ ءَ شال ءَ یک جونے دزکپتگ، جون چِست کنگ بیتگ ءُ نادراہ جاہ ءَ سر کنگ بیتگ –

گیشیں ھالانی رد ءَ شال ءِ دمگ سیٹلائٹ ٹاؤن ءَ مانشجاہ ءَ یک جونے دزکپتگ، جون چِست کنگ ءُ گیشیں چار ءُ ٹپاس ءِ واستا سول نادراہ جاہ ءَ سر کنگ بیتگ –

زانگ بہ بیت بلوچستان ءِ جتا جتائیں جاھاں اے وڑیں جون یکشل ءَ دزکپگ ءَ اَنت آیانی پجار نہ بیگ ءَ اَنت چریشی ءِ پژدر ءَ جوناں ابید ڈی این اے ٹیسٹ ءَ جوناں بے وارس کنگ انتزامیہ ءِ نیمگ ءَ کَل ءُ کسارت کنگ بیگ ءَ اَنت –

انسانی ھکانی ادارھاں ھوار سیاسی پھناتانانی گمان ءِ رد ءَ جون بیگواھیں مردمانی بیت کن اَنت کہ آیاں زانگول کن اَنت ءُ چگل اش دے اَنت کہ آیانی پجار کنگ باز مُشکل اِنت –

لونی دگ ءَ گوستگیں ڈی آئی جی حیدر بگٹی ءِ گِس ءِ سر ءَ اُرش کرتگ، اُرش ءَ آئی ءِ جند بچ اِتگ یک کارمندے ٹپی بوتگ – دوستین بلوچ

سربوتگیں ھالانی رِد ءَ گوستگیں شپ ءَ ناشناسیں مردماں سبی ءَ لونی دگ ءَ گوستگیں ڈی آئی جی حیدر بگٹی ءِ گِس ءِ سر ءَ دز بمبے چگل داتگ – اُرش ءَ یک کارمند ءِ ٹپی بوتگ ءُ ڈی آئی جی ءِ جند بچ اِتگ –

ٹپی بوتگیں کارمند ءِ پجار شوکت ء بارام خان ءِ نام ءَ بوتگ – ارشکار درآیگ ءُ رؤگ ءَ سوبمند بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچ ریپبلکن گارڈ ءِ جارکش دوستین بلوچ ءَ رسانکدراں وتی شنگ کرتگیں درشان ءِ تہ ءَ ڈی آئی جی گِس ءِ سر ءَ بوتگیں اُرش ءِ زمّہ واری منّ اِتگ ءُ گوشتگ کہ مئے سرمچاراں گوستگیں شپ ءَ بلوچستان ءِ شھر سبی ءَ لونی دگ ءَ گوستگیں ڈی آئی جی ءُ چیریں ادارھانی ھستیں ھاسیں کارندہ حیدر بگٹی ھما وھد ءَ دزبمب اُرش ءِ نشانگ کتگ کہ آ وتی گِس ءَ ساڑی بوتگ ءُ اُرش ءَ حیدر بگٹی ءِ جند بچ اِتگ بلے آئی ءِ کارندہ شوکت ء بارام خان سک باز ٹپی بوتگ-

جارکش ءَ گْوشتگ کہ مئے نشانگ جی آئی ڈی بوتگ پرچاکہ اے مرد پولیس ءِ کار ءَ ریٹائرمنٹ ءَ رند ایم آئی ءَ لگتگ ءُ بلوچ راج ءِ بگیری ءَ بازیں سلکاریاں ھوار بوتگ – جارکش ءَ دمگ ءِ درسیں بلوچاں چہ لوٹ کتگ کہ آ حیدر بگٹی ءَ چہ دور بہ بہ اَنت اشی ءِ سر ءَ کجام وھد ھم اُرش بوت کنت – آئی ءَ گوشتگ کہ حیدر بگٹی ءَ ھوار سرجمیں راج ءِ دشمن مئے نشانگ ءِ تہ ءَ اَنت-

گڈسر ءَ جارکش دوستین بلوچ ءَ گوشتگ کہ مئے جھد ڈیھ ءِ آجوئی ءَ تاں برجاہ مان انت –

سر بیتگیں ھالانی رد ءَ کیچ ءِ دمگ بلیدہ زامران ءَ نامی ئیں عالم دین مولانا عبدالمجید بلوچ مروچی سھب ءَ الندور بلیدہ ءَ بیران بیتگ –

مولانا عبدالمجید بلوچ نامی ئیں عالم دیناں بیتگ ءُ زامران ءَ نامی ئیں عالم دین مولانا عبدالغفار زامرانی ءِ نزیکیں وارسے بیتگ –

آئی ءِ بارہ ءَ گوشگ بیتگ کہ آ دمگ ءَ شرعی سلاہ ءُ تراناں دیم ءَ بیتگ ءُ مزنیں عالم دیناں آ مزنیں نگاھاں چار اِتگ –

آئی ءَ بلوچی، عربی، فارسی، اردو ءُ براھوئی ءِ زبان ءِ زنوگریں مردمے بیتگ آئی ءَ سعودی عرب ءِ نامی ئیں شھدربرجاہ جامعہ الحدیث الخیریہ ءَ وتی وانگ سرجم کرتگ –

آئی ءَ اود ءَ اسلامک لاء ءِ ڈگری ءِ گرگ ءَ پد ادارہ ءِ سروک مفتی اعظم سعودی شیخ ابن ءِ دست ء راست بیتگ –

آ بازیں وھداں شکر ءِ نادراھی ءُ میدہ ءِ نادراھی ءَ ھوار بازیں نادراھیانی آماچ بیتگ ءُ چریشانی سوب ءَ مروچی آئی ءَ اے کوڑیں امروز یل کرتگ –

سر بیتگیں ھالانی رد ءَ شال ءَ ھواریں دمگ چمن ءَ ناشناسیں مردمانی تیرگواری ءَ بیران بیتگیں الیاس ءِ کھول ءِ نیمگ ءَ زھرشانی –

زھرشانی کنوکاں ڈپٹی کمشنر چمن ءِ کارگس ءِ دیم ءَ نندانک جتگ ءُ نشتگ اَنت –

کھول ءِ گوشگ اِنت گوستگیں شپ ءَ ڈُزاں تیرگواری کرتگ ءُ الیاس کُشتگ، آیانی گوشگ اِنت کہ زھرشانی نندانک ھما وھد ءَ برجاہ مان اِیت کہ کشندہ دزگیر کنگ نہ بنت –

زھرشانی کنوکاں مال دگ ءَ ڈی سی کارگس ءِ دیم ءَ نندانک جتگ ءُ زھرشانی کنگ ءَ اَنت –

زانگ بہ بیت بلوچستان ءِ جتا جتائیں جاھاں تیرگواری وئیلاں مردم بیران بیگ ءَ اَنت کہ چریشی ءَ لس سیاسی ءُ چاگردی مردمانی گوشگ اِنت کہ سرکار شھریانی پھریزگ ءَ بے سوب بیتگ –

ھمے وڑ گوستگیں روچاں بلوچستان ءِ دمگ پنجگور ءَ ھم بازیں مردمانی جنگ ءُ زدگ بیگ ءِ ھال رسانکدراں شنگ بیتگ اَنت –

زھرشانی برجاہ اِنت زھرشانی بیران بیتگیں مردم ءِ کھول ءِ ھواری ءَ بازیں مردم ھوار اَنت، کھول ءِ گوشگ اِنت الیاس ءِ کشندہ دزگیر کنگ ءُ سزا دیگ بہ بنت –

آیانی گوشگ اِنت ھمک وھد ءَ چوشیں وئیل دیم ءَ آیگ ءَ اَنت کہ اے انیگیں سرکار بہ بیت یا گوست ءِ سرکار بہ بنت ھرکسی باریگ ءَ چوشیں وئیل دیم ءَ اتکگ ءُ آیگ ءَ اَنت –

آیانی گوشگ اِنت کہ سرکار لس مردمانی سر ءَ نگاھاں ایر کنت بلے دُز ءُ سلاہ بندیں مردم بازارانی تہ ءَ مانریچ اَنت ءُ مردماں کُشگ ءُ جنگ ءَ اَنت سرکار ءِ انتزامیہ ءَ دست چمان اَنت ءُ بس مارا چار ایت –

پیری ہوٹل ءِ ھند ءَ پوجی پانگس ءِ سر ءَ راکٹ ءُ وتکاریں سلاھاں گوں اُرش کتگ، یک پوجی کارمندے کشتگ دو زدگ کرتگ اَنت – بیبگر بلوچ

سربوتگیں ھالانی رد ءَ پنجگور ءَ پیری ہوٹل ءِ ھند ءَ سی پیک پھازگ ءِ ھاتر ءَ برجاھیں پاکستانی پوج ءِ پانگس ءِ سر ءَ ناشناسیں سلاہ بندیں مردماں اُرش کتگ –

اُرش ءَ پاکستانی پوج ءَ جانی ءُ مالی تاوان رس اتگ ءُ سلاہ بندیں مردم در آہگ ءُ روگ ءَ سوبمند بوتگ انت –

بلوچ آجوئی لوٹوکیں سلاہ بندیں گل بلوچ ریپبلکن آرمی ءِ جارکش بیبگر بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں دوازدہ مئی ءَ پنجگور ءَ پیری ھوٹل ءِ ھند ءَ سی پیک پھازگ ءِ ھاتر ءَ برجاھیں پوجی پانگس ءِ سر ءَ راکٹ ءُ وتکاریں سلاھاں گوں اُرش کتگ ءُ یک کارمندے کشتگ ءُ دو زدگ کرتگ اَنت –
جارکش ءَ گوشتگ اے اُرش ءَ پانگس ءَ ھم تاوان رس اتگ مئے اے دابیں اُرش بلوچستان ءِ آجوئی ءَ تاں برجاہ مان انت –

سربوتگیں ھالانی رِد ءَ بلوچستان ءِ دمگ تربت، قلعہ سیف اللہ، لسبیلہ ءَ دگ ءِ وئیلاں چار مردم بیران چاردہ ٹپی بوتگ اَنت ءُ خضدار ءَ تیرگواری ءِ وئیل ءَ دو برات بیران وھدیکہ پیدارک ءَ جونے دست کپتگ –

گیشیں ھالانی رِد ءَ تربت ءَ دگ ءِ وئیل ءَ چار مردم بیران ءُ یازدہ ٹپی بوتگ اَنت –

ھالانی رِد ءَ گوادر تاں تربت رؤکیں شھدگ ءِ سر ءَ پریمیو گاڑی ءُ ہائی روف بولان ءِ ڈیکر ورگ ءَ چار مردم بیران بوتگ اَنت یازدہ ٹپی بوتگ اَنت، بیران بوتگیں مردمانی تہ ءَ یک زالبول ءُ دو کسانیں زھگ ھوار اَنت – وئیل ءَ بیران ءُ زدگ بوتگیں مردم دشت پنودی ءُ تربت آبسر نندوک انت –

وئیل سنگئی کراس ءَ دیم ءَ اتکگ ـ وئیل ءَ بیران ءُ زدگ بوتگیں مردم نادراھجاہ ءَ سرکنگ بوتگ انت –

دگہ وئیل ءِ وندر آدم کھنڈ دیم ءَ اتکگ کہ گاڑی ءَ پرپٹ ءَ را ڈیکر جتگ چریشی ءِ سوب ءَ دو مردم ٹپی بوتگ اَنت- 1122 ٹیم ءَ وت ءَ ھما دمان ءَ وئیل جاہ ءَ سر کتگ ءُ مردمانی ٹپ درمان کتگ پہ گیشیں جاندراھی ءِ ھاتر ءَ ٹراما سنٹت کراچی ءَ سرکنگ بیتگ انت –

ھمے وڑ قلعہ سیف اللہ ءَ قائد چوکی ءِ نزیک ءَ پرپٹ ءُ گاڑی ءِ ڈیک ورگ ءِ سوب ءَ یک مردمے ٹپی بوتگ – ٹپی بوتگیں مردم پہ جاندراھی ھاتر ءَ ٹراما سنٹر شال ءَ برگ بوتگ –

دومی نیمگ ءَ بلوچستان ءِ دمگ ھزدار ءَ باغبانہ بٹ ءَ ناشناسیں مردمانی تیرگواری ءَ دو برات بیران بوتگ اَنت –

بیران بوتگیں مردمانی پجار محمد نتھوانی ءُ نور محمد نتھوانی ء دوست محمد نتھوانی ءِ نام ءَ بوتگ انت –
دمگی لیویز ءَ ھردکانی جون دست گپتگ ءُ نادراھجاہ ءَ سر کتگ انت، اے درگت ءَ گیشیں پٹ پول برجاہ انت –

کیچ ءَ یک مردمے ءِ جون ءِ دست کپتگ –

ھالانی رِد ءَ کیچ ءِ دمگ پیدارک ءَ یک مردمے ءِ جون دست کپتگ – آئی ءِ پجار الطاف ء مولابکش ءِ نام ءَ چہ بوتگ –

آئی ءِ کوش ءِ درگت ءَ ھچ وڑیں سرپدی نہ رس اتگ کہ کجام سوب ءَ کُشگ بوتگ –

نبشتانک: کلمانٹ

نبشتہ کار : شاری بلوچ

دی بلوچستان پوسٹ

من وتی لوگ ءِ کارانی کنگ ءَ رند دریگ ءِ دپ ءَ نشتگ اِت آں ءُ آ ھم ھمُک روچیگیں پیم ءَ چہ وتی لوگ ءِ دریگ ءَ گِندگ بوگ ءَ اَت، آئی ءِ دریگ ءَ را ھورت چمّیں دامے جتگ ءُ دام ءِ پُشت ءَ شرّی ءِ سر ءَ زانگ نہ بیت کہ دام ءِ پُشتی مردم چے کنگ ءَ اِنت بلے من ءَ گیشتر گُمان اِنت آ من ءَ چارگ ءَ اِنت من دریگ ءِ دپ ءَ داریں کرسی یے ءِ سر ءَ نشتگ آں ءُ آدینک منی دیم ءَ ایر اِنت کہ من وتی ڈکّیں میداں چارگ ءَ آں، من گِندگ ءَ آں مروچی چہ منی سر ءِ میداں شش ٹال اسپیت ترّ اِتگ، بلے بُندر ءَ چہ کسانی ءَ تھنا یک ٹالے اسپیت بوتگ دگہ دْراہ سیاہ چکیں مید بیتگ اَنت۔

یک برے دل ءَ جیڑ اِت کہ ھمے میداں سیاھیں رنگ بجن کہ سیاہ بہ بنت بلے پد ءَ ھیال کت کہ منی میداں زاناں کَے گِند اِیت ءُ کَے بہ زانت کہ سبا ءِ مید اسپیت ترّ اِتگ اَنت، چے ءَ کہ گُشان ءِ چیر ءَ ھچ زانگ نہ بیت کہ چے اسپیت ءُ چے سیاہ، یکے مارا ھمے گُشان اِنت بیست ءُ چار کلاک ءَ مئے سر ءَ ڈُول ءُ بَد اِنت ھر کجا ءُ ھر جاہ ءَ بہ باں یاکہ آگاہ باں یا واب اِے گُشان مارا سر ءَ کنگی اِنت۔ بلے پد ءَ دل ءَ جیڑ اِت گُشان ءَ مارا ھمنچو تاوان داتگ ھمنچو نپ، گُشان ءِ نپ ھمیش اِنت کہ اسپیتیں میدانی ٹالاں وَ چیر دنت ءُ مردم ءِ مزن اُمری ءَ چیر دنت، بلے چو نہ اِنت کہ من مزن اُمرے ءَ آں ءُ آ دگہ ھبرے مئے ھمساھگ من ءَ کلمانٹ گُش اَنت، منی ھیال ءَ من وَ کلمانٹے نہ آں بلے ھمساھگانی دپ ءَ آپے بہ دار اِیت۔

وھدے کہ من ءَ سیزدہ سال اَت پہ من دو مردم ءِ گْواجار آتک آ وھداں من آروس نہ لوٹ اِت وانگ لوٹ اِت، منی مستریں بْرات ءَ کمو ونتگ اَت دنیا ءِ رسم ءُ دوداں سرپد اَت منی مکن کنگ ءَ من ءَ آروس ئِے نہ دات من ءَ داں تبک دَہ ءَ وانگ ءَ اِشت ئِے بلے پد ءَ منی وانگ بند بوت، وھدے کہ من ءَ ھژدہ سال اَت پہ من ءَ یک مردمے ءِ گْواجار آتک کہ آ گْواجار دیوک کساس پنجاہ سالی یے اَت ءُ آئی ءَ دو جنین پیسر ءَ ھست اَت، کہ منی بْرات ءَ نہ زرتگ اَت، من دل ءَ وش اِتاں کہ منی بْرات ءَ شرّیں کارے کتگ اَت، ھو منی اُمر ءَ تھنا بیست ءُ پنچ سال اِنت کہ من کلمانٹ گُشگ بہ آں ءُ ھپت سال اِنت پہ من ءَ گْواجارے نئیت، چو نہ اِنت کہ رنگ ءُ دانگ ءَ من ھرابینے آں البت رنگ ءُ دانگ ءَ کمو جوڑ آں بلے بلوچ ءِ دَود اَنت کہ کسانیں جنککُاں سُوریگ کنت، ءُ نوک سُوریگاں کلمانٹ کن اَنت۔

من دریگ ءِ دپ ءَ نِشتگ اِت آں آ ھم ھما پیم ءَ وتی لوگ ءِ دریگ ءِ دپ ءَ نشتگ اَت ءُ من ءَ گڑ ءُ منجے ءِ تہ ءَ دَور ئِے داتگ کہ من نہ زانت آ من ءَ چارگ ءَ اِنت یا دگہ کارے ءَ اِنت۔ من آئی ءَ چارگ ءَ اِت آں کہ دشت ءِ لواریں گْوات ءَ کشّگ بنا کُت ءُ من ءَ وتی بُنکی مرزبومیں ھاک گْوادر ءِ نمبیں گْوات ءِ چاڑاں زُرت بلے پد ءَ من کُھتیگ بوت آں کہ مشکل پد ءَ گْوادر ءَ بہ گند آں-

لھتے سال بیت کہ گْوادر ءِ لوگانی بھا کنگ ءَ رند ما گوں وتی کھول ءَ اِد ءَ دشت ءَ آتک ایں۔ یک کپّانے ءِ تہ ءَ کشّ پہ کشیں دو گِس اِت اَنت کہ یک گِسے ما باڑا ءَ زرت ءُ دومی گِس ءِ تہ ءَ کپان واجہ نشتگ، من شُت لوگ ءِ گْواتو (پنکاہ) چالو کنگ لوٹ اِت کہ تبدیں لوار سارت بہ بیت بلے لائین بے گواہ اَت من پد ءَ آتک آں دریگ ءِ دپ ءَ کرسی ءِ سر ءَ نشت آں گُڑا آئی ءَ چار اِت ءُ من دیست آ انگت دریگ ءِ دپ ءَ نشتگ اَت بلے آئی ءِ دریگ بُن اَت ءُ آ کندان ءُ گْوشان اَت کلمانٹ کلمانٹ کلمانٹ دانکہ بے توار بوت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ گوستگیں شپ ءَ پاکستانی پوج ءَ کیچ ءَ ھواریں دمگ تمپ گومازی ءَ مردمانی لوگاں بیڑ برتگ ءُ جنین ءُ چک لَٹ ءُ کُٹانی نشانگ کرتگ ءُ لوگانی گرانبھائیں مڈی رُپتگ ءُ برتگ اَنت –

دمگی مردمانی رد ءَ پوج ءِ بیڑی ءِ وھد ءَ پوج ءَ ھشت کس آوار جتگ ءُ برتگ –

آوار جنگ بیتگیں مردمانی پجار قیوم ء ملا بلال، ثابت ء ملا بلال، واجو شھبیک ء داد کریم، ماجد ء رشید، اسمائیل ء ھسین، عالم ء سلام، بلوچ ء واھد، ھمل ء واھد ءِ ناماں زانگ بیتگ اَنت –

دمگی مردمانی رد ءَ ماجد دو رند ءَ پیسر ءَ آوار جنگ ءُ بیگواہ کنگ بیتگ، بلوچستان ءَ لشکری بیڑانی وھداں مردمانی گار ءُ بیگواہ کنگ ءِ ھال یکشل ءَ رسانکدراں شنگ بیگ ءَ اَنت –

بلوچستان ءَ سیاسی مردمانی بھتام اِنت پاکستانی پوج وتی جارانکاں مردمانی یل کنگ ءِ ٹاہ ءَ دیگ ءَ اِنت بلے دومی نیمگ ءَ گیشیں مردماں گرگ ءُ گار کنگ ءَ اِنت –

زانگ بہ بیت گوستگیں روچ ءَ ھم پاکستانی پوج ءَ گومازی ءَ لس مھلوک ءِ لوگاں بیڑ برتگ ءُ سَے کس آوار جتگ ءُ برتگ اِت اَنت –

ھمے رنگ ءَ بلوچستان ءِ دمگ بولان ءَ مروچی دومی روچ ءَ ھم پاکستانی پوج ءِ لشکر کشی برجاہ اَنت –

ھالانی تہ ءَ گوشگ بیتگ کہ بولان ءِ دمگ چلڑی، بزگر، درگ، جالڑی ءَ مروچی دومی روچ ءَ پوج پیشگامی ءُ لشکر کشی ءَ گندگ بیتگ اَنت ءُ لشکر کشی ءَ بالگرد ھم بھر زورگ ءَ اَنت –

دومی نیمگ ءَ بلوچستان ءَ بیگواھیں مردمانی کھول وداراں وتی گڈی آسر کنان اَنت ءُ کوڑھیں امروز ءَ یل کنگ ءَ اَنت –

ھمے وڑ ءَ بلوچستان ءِ دمگ ھزدار توتک ءَ بیگواھیں فدا اھمد ءُ ضیا اللہ ءِ کماش ھاجی ابداللہ قلندرانی گوستگیں شپ ءَ بیران بیتگ –

ورنائیں فدا اھمد سال دوھزار ءُ یازدہ ءَ توتک ءَ پوجی لشکر کشی ءِ وھد ءَ آوار جنگ بیتگ ءُ آئی ءِ برات ضیاء اللہ یک سالے ءَ پد بیگواہ کنگ بیتگ –

بلوچستان ءَ سیاسی مردمانی زھر ءِ درشان اِنت بیگواھیں مردمانی کھول ودارانی درداں مرگ ءَ اَنت بلے ھاکماں شرم ھم نئیت کہ اے بیرانسالیں کماشانی سر ءُ رھم بہ کن اَنت ءُ آیانی دوستگیں مردماں بندیگ جاھاں آجو بہ کن اَنت –

سر بیتگیں ھالانی رد ءَ روکپتی بلوچستان ءَ تیرگواری وئیلے ءَ پت گوِ ھمراہ ءِ زھگ ءَ بیران بیتگ –

اھوالکار ءِ رد ءَ وئیل ایرانشھر ءَ پانزدہ میل دور ھیر آباد ءَ دیم ءَ اتکگ کہ اود ءَ رؤکیں گاڑی ءِ سر ءَ سلاہ بندیں مردناں تیرگواری کرتگ ءُ یک مردم ءِ گوں ھمراہ ءِ زھگ ءَ کُشتگ اَنت –

بیران بیتگیں مردم ءِ پجار اسماعیل نرماشیری ء مراد ھسین ءِ نام ءَ پجار بیتگ ءُ دومی بیران بیتگیں اسماعیل ءِ زھگ اِنت کہ آئی ءِ اُمر ھشت سال گوشگ بیگ ءَ اِنت –

کوش ءِ سبب زانگ نہ بیتگ ءُ تیرگواری ءَ پد تیرگواری کنوک تتکگ ءُ شتگ اَنت، جون چِست کنگ ءُ نادراہ جاہ ءَ سر کنگ بیتگ اَنت ءُ گیشیں پَٹ ءُ پول بندات بیتگ –