TBP Balochi

نبشتانک: مسلمان مُلکانی شتلی(مُناپکت)

نبشتہ کار: ابدلستار بُگٹی

دی بلوچستان پوسٹ

ھر چیزے چہ بُندر ءَ چارگ بیت انچوشکہ اگاں یک مات ءُ پِتے ءِ چُک وان اَنت ءُ ڈاکٹر یا توری انجینئر جوڑ بہ بنت گُڑا چاگِرد ءِ تہ ءَ ایشانی مات ءُ پِت ءِ نام وژنام بیت بہ گِند ئے ھرکسے ایشانی مات ءُ پت ءِ ستا کنان ءَ گْوش ایت کہ اِے سرپد ءُ زانتکاریں مردم اِت اَنت پمیشکا وتی زھگ اش وانینتگ اَنت۔

چوناھیگا پہ دروری ءَ مئے بلوچ راج ءِ تہ ءَ انچیں بازیں بزگیں دِھکان ءُ پوریاگِر ھم ھست ءُ انگت بے کساس گِندگ ءَ ھم کا اَنت کہ آیاں وتی نیزگاری ءُ بزگی سگ اِت ءُ وتی چُک وانینت ءُ ڈاکٹر ءُ ڈاکٹر جوڑ کُتگ اَنت۔ ھمے پیم ءَ اگاں کسے ءِ چُک رھزن، دُزّ ءُ ڈُنگ بنت یا دگہ ناشرکاری ءِ راہ ءَ بہ رو اَنت گُڑا ھرکس ایشانی مات، پِت ءُ ٹکر ءِ سروک ءِ میار دنت کہ ایشی ءِ پِت ھم دُزّے اَت پمیشکا زھگ ئِے ھم دُزّ اِنت مات ءُ پِت ءَ وتی زھگاں شَریں ھیل ءُ بلدی نہ داتگ پمیشکا مرچی وت ءَ ھم بدنام اش کُتگ گُڑا ھمے بدکاری ءِ مُزّ ناں کہ ایوک دُزّ ءُ ڈُنگ ءِ کھول ءَ اندوھے ءِ آماچ کنت بلکیں سرجمیں چاگِرد ءُ راج ءَ بدیں سانے دنت ھمے ڈول ءَ توری یک وانگجاھے بہ بیت یا توری شھدربرجاہ ءُ زانشجاھے بہ بیت اگاں ھمے ترامگیج جْوانین اَنت گُڑا دربُرتگین ھم جْوانین بنت اگاں ترامگیج ھراب بنت گُڑا لازُم آیانی دربُرتگیں مردم نابود ءُ بے سوتین بنت۔ ما تچک بِہ بَہ ایں کہ ھر چیزے ءِ جْوناھی ءُ شَری چہ بُندر ءِ جوڑ بیت ءُ ھر چیزے ءِ راست درشان کنگ ءَ منّانک ءُ شاھدھی دیگ لوٹ ایت البت چہ پوتاری ءَ تھنا لھتیں ناسرپد پہ وھدے ءَ رد دیگ بنت بلے راستی انگت چیر دیگ نہ بیت۔
نی چیز روچ بیتگ کہ پلستین ءِ گازہ شھر ءَ اسرائیل ءِ بالیگراب ٹوھیں جنگی اُرشاں کنگ ءَ انت چیریشی ءَ بازیں پلستینی زالبول، کماش، چُک ءُ زھگ ھم شیھد بوُگ ءَ اَنت گُڑا ماں چاگِردی رسانکدر ءَ ھرکسے ءِ دپ ءَ ھمیں یکے جوریں ٹَوک ءُ زھرشانی انت کہ اسرائیل دنیا ءِ ناشرکاریں مُلکے! بِہ گِند ئے اگاں ما چَہ کسے ءَ منّانک ءُ شاھدھی لوٹ ایں کہ باریں چون مارا سرہدی بہ دے اِت کہ کُجام ھساب ءِ تھنا اسرائیل ناشرکاریں مُلکے؟ زاناں اِے تُرکی، سھودی اَرب، امارات، کتر پاکستان ءُ ایراک چی ءَ ناشرکار نہ اَنت؟ گُڑا یک تُرکی ءِ پیسبُک یوزرے ءَ من ءَ دنیا ءِ نامداریں ھالار الجزیر نیوز ایجنسی ءِ لِنکے روان دات ایشی ءِ تہ ءَ ھمے درشان اَت کہ میان اُستمانی گل ایو این سیکورٹی کاونسل ءِ یک سرھال ءُ شُمارانی رِد ءَ ماں بیست سال ءَ اسرائیل ءَ سے ھزار پلستینی شھید کُتگ بزاں میانجی ئیں شُمار 0.4/ یک روچ پلستینی اسرائیل ءِ دست ءَ کُشتگ بُوگ اَنت۔

گُڑا من ءَ آئی ءِ مجگی نادْراھی ءِ سر ءَ بزگی بوت ءُ آئی ءَ ھمے یو این سیکورٹی کونسل ءِ شُمارے چہ الجزیر ءَ تندجاہ ءَ زُرتگ راہ دات، ماں آئی ءَ درشان اَت کہ ھمُک روچ ترکی وتی زیردستی کُردستان، شام، کوہ کندیل، آجوئیں شامی کُردانی بازیں دمگ ءُ شام ءِ تہ ءَ وتی کاسگ چٹّانی کارمرزی ءَ، سھودی ارب ءِ سرکماشی ءَ چِل ءُ سے مُلکانی گل بزاں اَرب تپاکی لشکر (اَرب کولیش پورس) ءُ امارات ءِ سُنی بھر ءِ ساوتھ ٹرانزیشنال کونسل ءِ سِلاھبندیں گل ءُ الکائدہ اَربئین پنسلہ ماں یمن ءَ، ایران ءِ کاسگ چٹّ ماں اوگانستان، ایراک ءُ شام ءَ، ازب اُلہ گل ماں لیبنان شام ءُ لیبیا ءَ، تُرکی ءِ کاسگ چٹّیں گل ھم لیبیا ءَ، پاکستان ءُ ایران ءِ کاسگ چٹّ ماں اوگانستان ءَ بزاں میانجی ئیں شُمار 197.6/ روچ، مسلمان ھر روچ چے ھمے مُلکانی ناشرکاری ءَ مِر ایت۔ گُارا تو یک پلستینی شھر گازہ ءِ یک کُنڈے ءِ بارہ ءَ ٹوک کن ئے!؟ زاناں ما بے ھال ایں کہ اِے یمن، شام، ایراک، لبییا، اوگانستان ءُ کُردستان ءِ ھمُک دیمروئی کُتگیں شھر ءُ میتگ سرجمی ءَ کَے ءَ تباہ کُتگ اَنت؟ وھدیکہ ھمے مسلمان مُلکانی جنگ ءِ آماچ بوتگیں لس مھلوک ءَ پہ وتی جانانی رکینگ ءَ لڈّ ءُ بوج کُت انت گُڑا ھمے ارب مسلماناں ایشاں پناہ نہ دات ھمے رستریں مُلکانی جنگ ءِ زدگیں دْراھیں مسلمان انگریز ءُ کاپَر مُلکاں سربیتگ اَنت گُڑا اِے زاناں اسلامی مُلک گْوشگ بنت ءُ ایشانی سرکاری رھبند ھم اسلامی اَنت؟ جھان ءِ دومی مستریں جنگ ءَ رند 1988 ءَ مسلمان مُلک ایراک ءَ کُرد دمگ البجاہ ءَ کُرد مسلمانانی سر ءَ جوریں بمب ھور ڈول ءَ گْوارینت ءُ کُردانانی چُکچینی کُت ءُ اوگانستان ءَ چِل سال اِنت مسلم ھمساھِگیں مُلکانی کاسگ چٹّ وتی مسلمانیں چُک ءُ زالبولانی سر ءَ جنگی اُرش ءُ وتکشی بمب تراکاں کن اَنت اِے زاناں چہ اسرائیل ءَ کم ناشرکار اَنت؟
مستریں ٹوک ایش انت کہ دْراھیں مسلمان وتی شتلیں ملکی رھشُوناں نہ چار اَنت انچوشکہ ترکی ءِ تیب اردگان مُدام پوتاری کنت ءُ وت ءَ مسلمانی رھشُون گْوش ایت ترکی ڈرمھانی کشگ ءَ کُمک کنت ءُ وتی راج ءِ مھلوک ئِے مُدام رد داتگ کہ من اسلام ءُ مسلمانانی پھریزوک آں بلے ھمے تیب اردگان وتی سرکاری لشکر ءَ ھچ جنگ ءَ دور نہ دنت بلکیں بلکیں ھمساھِگیں مسلمانیں مُلکانی ھلاپ ءَ اسلامی ناشریں گلاں پہ وتی راجی پائدگ ءَ کارمرز کنت انچوشکہ مسلم مُلک شام ءِ بیگری ءَ تُرکی ءُ کتر ءِ کاسگ چٹّیں گل ایپ ایس اے (پری سیریان آرمی) کہ آئی ءِ جنگی مول ءُ مراد بشارلھسد ءِ سرکار ءَ پْروش دیگی انت تھریر الشام ءُ دومی ھمے تُرکش اسلامک پارٹی(ٹی آئی پی) شام ءِ ناشرکاریں جھادی سِلاھبندیں گلے کہ ایشی ءِ تہ ءَ گیشتر باسک چینی آیوگر مسلمان اَنت۔ بِہ گِند ئے شام ءِ اُلسی جنگ ءَ اِے ناشرکاریں گل ءِ یک مزنیں کِردے ھم ھست کہ ایشی ءِ رھشُون اوگانستان ءُ پاکستان ءَ چیروکائی نِندوک اَنت ءُ ایشی بُندری جھاد ءِ ششت چین اِنت
ایس ٹی بی (سیریان ترکمین برگیڈ) کہ آئی ءَ یونائیٹد ترکمین آرمی ھم گْوش اَنت تُرکی ھمے گل ءَ بے کساس جنگی ءُ زَری کُمک کنت ھاسکن شام ءِ آزات ھیالیں کُردانی ھلاپ ءَ تُرکی دُور جنوکیں میزائیل ءُ دِگہ جنگی آسراتیاں بے کچ ءَ دنت ئِے۔
اگاں النُسر ءَ پرنٹ ءَ بِہ گِند ئے کہ گوں شامی الکائدہ گل ءَ ھمگرنچ اِنت، شامی اُلسی جنگ ءِ یک جھادی سِلاھبندیں گلے کہ ایشی ءَ ھم تُرکی کُمک کنگ ءَ اِنت۔

ھمے داب ءَ لیبیا ءِ تہ ءَ کرنل کداپی ءِ ھلاپ ءَ سِلاھبندیں گل لیبیا شیلڈ پورس وڑیں گل کُتگ انت ئِے کہ آیاں لیبیا الُسی جنگ ءِ بے کساس بیرانی ودی کُتگ ھاس بُنجاھی شھر ٹریپولی ءُ دگہ بازیں شھرے تباہ کُت اَنت بلے نی یھودیانی کسانیں مُلک اسرائیل کہ وتی مسلماناں شھید کنگ ءَ انت گُڑا اِد ءَ ھمے دْراھیں لگور چُپ اَنت بس وتی مسلمانی کُشگ ءَ ھرکس شیر اِنت۔ ارب یک راجے کہ اربی ایشانی زُبان اِنت سرجمیں ارب مھلوک ءِ دود، رواج، ربیدگ ءُ پوشاک یک اَنت بہ گند ئے پلستینی ھم ارب اَنت بلے اِے لگوریں چِل ءُ سے مُلکانی ارب کولیشن پورس یھودی ءِ ھلاپ ءَ جھاد نہ کنت بلکیں وتی مسلمانی کُشک شپ داں روچ تیار انت ءُ بازیں مُلکے ھم اِے گناہ ءَ شریدار انت ایران ءُ ازب اُلہ کہ اسرائیل ءَ وتی مستریں دژمن لیکھ انت مرچی بزگ ءُ چُپ اَنت۔ اوگان تالبان ءَ وت ءَ پھر ءُ ناز ءَ جھادی گلے گْوش ایت آئی ءَ یک سالے سرجم بوت کہ ایسائی کاپریں گل نیٹو ءُ امریکہ ءِ لشکر سر ءَ اُرش نہ کنگ ءِ منّگ نامھے ءِ سر ءَ رازِیگ بوت بلے پہ سرکار ءِ لالچ ءَ وتی اوگان بْرات ءُ گْوھارانی کُشگ ءَ گلائیش انت بلے انگت اسرائیل ءُ ھلاپ ءَ جھاد ءَ نہ رو اَنت لھتیں دِگہ لگوریں مُلکانی نام ھم نبشتہ کنگ شَر نہ انت۔

تچکیں ٹوک ایش انت کہ پلستین ءِ آجوئی ءَ ارب مسلمان اسرائیل ءِ ھلاپ ءَ جنگ ءَ تُرس اَنت اِے شتلانی رِد ءَ جھاد شام، لیبیا، یمن ءُ اوگانستان ءَ ھلال ءُ روا اِنت چی ءَ کہ پہ پلستین، چین ءِ ھلاپ آیوگر مسلمانی آجوئی ءُ کشمیر ءِ واست ءَ جنگ ءَ ایشانی دست ءُ پاد لرز انت۔

نی ما یک چیزے ھورت بہ چار ایں کہ ھندوستان، نیپال ءُ سری لنکا اِے دْراہ ھندو مُلک اَنت اِے وت ماں وت چی ءَ جنگ نہ کن اَنت؟ یورپ ءِ ایسائی مُلک چی ءَ وت ماں وت جنگ نہ کن اَنت؟ بے ھُدائیں ملک (کمیونسٹ اسٹیٹ) انچوشکہ چین، کوریا، جاپان، روس، سربیا، بیلھروس ءُ دگہ اِے وڑین چی ءَ وت ماں وت جنگ نہ کن اَنت۔ اپریکہ ءِ ایسائی بہ بنت یا توری زِرباری امریکہ ءِ ایسائی مُلک بہ بنت چی ءَ وت ماں وت جنگ نہ کن اَنت؟ ءُ مسلمان مُلک چی ءَ وت ماں وت شپ داں روچ جنگ ءَ انت وتی جِند ءِ مسلمان کشگ ءَ انت؟ چی ءَ وتی شھر ءُ میتگاں تباہ کنگ ءَ انت؟-

کسے توری منّ ایت یا مہ منّ ایت پمیشکا یورپ ءُ سرجمیں دنیا گْوش ایت کہ بلکیں اسلام رَد انت انچوشکہ من وتی نبشتانک ءِ بُندر ءَ گْوشت کہ چیز چہ بُندر ءَ چارگ بنت بلے من گْوش آں اسلام رَد نہ اِنت اسلام سد در سد راست انت ءُ اسلام یک امن ءُ سلامتی ءِ نیکراھے بلے اِے جنگ ءُ جیڑھانی آسر ھمے شتلیں مسلمان رھشُون اَنت اگاں مسلماناں وتی اسلام دوست انت گُڑا وتی شتلی ءَ بند بہ کن اَنت ءُ پیسر وتی شتلیں سرکارانی ھلاپ ءَ سِلاہ چِست بہ کن اَنت۔انچوشکہ کُران مجید ھم شتلانی بابت ءَ گْوش ایت “شتل (مُناپِک) جھندم آس ءِ بُنی انگراں بنت ءُ پہ آیاں ترا ھچ کُمکّارے نہ رس ایت۔”
(کُران4:145)-

بزاں امریکہ، چین، ھندوستان ءُ اسرائیل ءِ سر ءَ زھر کنگ ءَ پیسر مُسلمان وتی شتلی ءَ بچار اَنت ءُ وتی شتلیں مُلکی رھشُونانی ھلاپ در بیا اَنت ھو ما منّ ایں کہ اسرائیل زالمے بلے تیوگیں وتگڑیں مسلمانانی مُلک بے گیرت اَنت ءُ باید اِنت ھمے مسلمان وتی مُلک ءِ سرکار ءِ سر ءَ زھر ءُ زھرشانی بہ کن اَنت۔ اگاں اِنّا گُڑا ھمے وتگڑیں مسلمان دلجم بہ بنت کہ مسلمان ھر وھد ءَ اسرائیل، چین ءُ امریکہ ءِ دست ءَ لٹ ور انت ءُ دنیا ءِ تہ ءَ ایشانی ھچ شرپ ءُ نامے نہ بیت بُندری ءَ اسلام ءُ مسلمانی مستریں دژمن ھمے وتگڑ ارب بادشاہ ءُ مسلمان مُلکانی لگوریں رھشُون اَنت کہ ھمے دْراہ امریکہ ءُ اسرائیل ءِ کُمکّار اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: نمیرانیں ارواہ

نبشتہ کار: مھر ساچ کولوائی

دی بلوچستان پوسٹ

اِسھاک جان تو چینچو مھروانیں مردمے ءِ اِت ئِے پہ ماتیں گلُزمین ، تو چینچو ڈُبّہ گوں وتی کسانیں بالاد ءَ زُرتگ اَت ءُ چونین بار وتی کوپگاں بستگ اَت ، بلے پہ سپر ، گٹ ءُ گرّیں راھاں پند بُرّگ ءَ نہ جیڑ اِت ءُ دم نہ بُرت شاتمانیں زِندگی ءِ کُلیں وشی تو پہ وتی مِسکیں سرڈگار ءُ کوم ءَ کُربان کُرت اَنت۔

مرچی بھشتیں دیار ءِ  ھر کشک ءُ راھسر ، گٹّ ءُ گر ، آپ ءُ کَور تئی لِوار سوچیں یاتاں ملور ملور اَنت، ھما سنگراں کہ تو گوں بیل ءُ پُلیں ھمبلاں نشتگ ءُ جنگ کُتگ ھما سنگر ابیتــک اَنت دُژمن ءِ راہ بندی ءِ ودار ءَ شپ ءُ روچ نہ چارتگ تو! من ءَ یات اِنت کہ تو گْوشت کہ ما پہ آجوئی ءِ موکگ ءَ چہ لوگ ءَ درکپتگ اِیں ،گُڑا ما پرچا پہ سِتک ءُ اِیمانداری کار نہ کن اِیں؟ تو مُدام گْوشت کہ جنگ بِہ بیت ، کُجام وھد ءَ کہ جنگ ءِ تیاری اَت تو پہ واھگ ءُ چاڑے جنگ ءِ پیشبندی ءُ رھبند جوڑ کُرت اَنت۔ ھر وھد ءَ اسحاق جان تو پہ جنگ ءَ سنگر ءَ نشتگ ئے ، تئی وش لسانیں توار سنگتانی ھمّت ءُ دُژمِن ءِ تاچینگ ءِ نشانی اَت ۔ ھما سنگراں کہ تو پہ بھادُری جنگ کُتگ ءُ دُژمِن ھکّل داتگ ، ھما جنگجاہ مرچاں بے ترا سک ابیتک  ابیتک اَنت۔ تلارانی ھونکّیں ساھگ ءُ سارتیں آپ ، رولہ ءِ رنگانی بھار ءُ دیگر ءِ سرگْوات کُل ملُور ملُور اَنت۔

پمیشکا من گْوش آں گُلزمین ءِ مھروانیں بچّ!  ترا گُلزمین ءَ چہ سنگتان زُوت جتا کُت ھمے مھر ءِ لِزّت اِنت کہ تو سک یات کائے،  مدام جیڑاں بلے سرجم نہ بَہ آں من ءُ تو گُڈّی دیدار سامو کت ، ءُ گُڈّی دیدار ءَ پد ھواراں سنگت گْوشگ ءُ در کپگ ءَ پد تو دگہ نیمگے ءُ من دگہ جاھے من سک جیڑ اِت، دل ءَ گْوش ئے گُمان بوت کہ مئے رُکست ءَ را جتائی مان اِنت۔ چیزّے وھد ءَ ما نزیک ءُ گْور ءَ اِت اِیں تئی ھالے انگہ رست، بلے دل ءَ جیڑگ یل نہ دات۔ چد ءُ پد من جیڑ اِت نہ کُرت ءُ جیڑ اِت نہ کن آں کہ گوں وت ءَ مان گیشّ اِیت مردُم ، ءُ پد ءَ ھم  وھد ءِ ارجان اِنت مردُم بلے چہ تی مھران زِندگی ءِ پشت کپتگیں روچ سک گْران ءَ کپتگ اَنت انچو بزان کہ تبد ءُ گرم، تھنائی ءُ بے چاڑی ابیتکی ءُ مُلوری درساں مان پتاتگ اگاں وھد کمو موہ دنت، گُڑا تئی شھدیں بچکند ، نند ءُ نیاد ، پُلیں دیوان ءُ تاھِیر بکشیں سپر دُرس یات کا اَنت۔ ترا چے پد من ھم سامو نہ شُتگ آں ، چہ اُود ءَ لڈّ اِتگ ءُ سک دور اِیں ۔ دل ءَ بس تئی زپتیں ترانگ گوں بچکنداں ھوار دِگہ بس بے چاڑی انت ارواہ! وھدے تئی مھرانی سُروز ساز بیت گُڑا من من نہ زان آں کہ اے بے اشکامین دِل ءَ چوں بِہ سھڑیناں ، چی ءَ کہ ابید تئی زپتیں زھیر ءُ ترانگاں اے نادانیں دِل ھِچّ وڑ ءَ ساکم نہ بیت۔

ماھکانیں شپاں من ءُ تو گپ گپ ءِ سر ءَ سک کند اِت ءُ ماہ ءَ چاردہ اَت ءُ سک وش اَت ۔ کوش لھم لھم ءَ کشّگ ءَ اَت ءُ منا ءُ ترا چاھے ءِ تلب بوت ، من ءُ تو ھردو یکیں گپ یکجاہ گْوشت ءُ پد ءَ کند اِت ھاھاھاھاھاھا چوناھا من ءُ تو  یکجاہ اے گپ گْوشت ءُ چاھے جوڑ کرت،  سنگتے اُوں توار دات بلے سنگت ءَ مئے توارے جوب نہ دات۔ تو من ءَ گْوشت کمے آرام کن سپر ءَ بوتگ ئے ، سپر دور بوتگ بلکیں تو ژند ءُ پند ئے من گْوشت اِنّا کُرباناں مرچیگیں شپءِ ژندی کوش ءِ لھم لھمیں کّشگاں ، تئی پُلیں دیوان ءُ سیاہ چاہ ءَ ھلاس کُرتگ بس بد بھتی اَت کہ وھدا گو من ھمرارہ داری نکُرت  تو سپر سرجم کت ءُ من سک دور پشت کپت آں ءُ چینچو جیڑاں ھِچّ آسر نہ بیت ، بلے اے تئی مھر ءُ مھروانی اِنت کہ نِشتگ ءُ ترا جیڑ آں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ روکپتی بلوچستان ءِ دمگ کسرکند ءَ پانزدہ میل دور ھُمیری ءَ سلاہ بند ءُ ایرانی لشکر ءِ میان ءَ جنگ ءُ چوپ بیتگ اَنت –

جنگ ءُ چوپ مروچی سھب ءَ بندات بیتگ داں نیمروچ ءِ ساھت یک ءَ برجاہ بیتگ ھردوکیں نیمگاں جانی تاوانانی گمان کنگ بیتگ اَنت –

ایرانی لشکر ءِ بنشون ءَ رسانکدراں شنگ کرتگیں ھالانی رد ءَ آئی ءَ گوشتگ کہ نیکشھر ءَ چِل میل دور ھُمیری ءَ یک لوگے ءِ سر ءَ بیڑ برتگ ءُ اود ءَ دو کس کُشتگ اَنت ءُ چریشی ءَ مئے یک کارندھے زدگ بیتگ اَنت –

اھوالکار ءِ رد ءَ مروچی جنگ ءِ ھلاسی ءَ پد دمگ ءَ ایرانی لشکر ءِ بالگرد ھم اتکگ ءُ سر بیتگ اَنت –

اھوالکار ءِ رد ءَ گمان ھمے کنگ بیگ ءَ اِنت کہ ھردوکیں نیمگاں جانی تاوانانی گمان اِنت –

دمگی مردمانی رد ءَ ایرانی لشکر ءِ میان ءَ جنگ ءُ چوپ ءَ بیران بیتگیں مردمانی تہ ءَ یکے ءِ پجار مھراب صلازئی ءِ نام ءَ زانگ بیتگ –

سرکار ءِ نیمگ ءَ جنگ ءِ جار شنگ بیتگ بلے اے گوشگ نہ بیتگ کہ اے مردم چونیں مردم اَنت ءُ ایرانی لشکر ءَ اے درگت ءَ تنء وھدی اے درگت ءَ دگہ گیشیں ھال دیم ءَ نیاؤرتگ اَنت –

زانگ بہ بیت روکپتی بلوچستان ءَ سیمسراں ایرانی پھزداران ءِ انقلاب ءِ تیرگواری ءَ بیران بیتگیں مردمانی پژدر ءَ پد بلوچستان ءِ جاور ناگیگی ءَ گندگ ءَ اَنت –

سیاسی مردمانی گوشگ اِنت کہ ایران ءِ زوراکیاں پد بلوچستان ءَ بندوکیں مردمانی زرمبشت گیشتر زورامند بیتگ ءُ اے زرمبشت ءِ ڈاہ ءُ شور گیشتر اَنت –

گل خان نصیر ءِ 110 می بوتن ءِ روچ

ٹی بی پی ستاشانی

بلوچستان ءِ نامی ئیں ندکار، راجدپتر نویس، شائر ءُ کواس گل خان نصیر ءِ یک سد ءُ دَھمی بوتن ءِ روچ اِنت –

گل خان نصیر سال نوزدہ سد ءُ چاردہ ءَ چاردہ مئی ءَ ماں بلوچستان ءِ دمگ نوشکی ءَ ودی بیتگ، گل خان نصیر بلوچستان ءِ نامی ئیں مردمے ءِ نام ءَ زانگ بیت اِنت۔

گل خان نصیر ءَ بلوچی، براھوئی، اردو، انگلش ءُ فارسی زبان ءَ ھم شَیر ءُ ندکاری کرتگ، گل خان نصیر ءَ بنکی وانگ شال ءَ بندات کرتگ ءُ آئی ءَ گیشیں وانگ لاھور اسلامک کالج ءَ سرجم کرتگ ۔

گل خان نصیر ءِ بوتن ءِ روچ ءَ ھمک سال بلوچستان ءَ لبزانک ءَ بندوکیں مردماں ھوار راجکاری ءُ ھمک تکاں بندوکیں مردم گیر کار اَنت ۔

ٹی بی پی بلوچ گل خان نصیر ءِ سد ءُ دھمی سالروچ ءِ درگت ءَ شاتمانی درشان کنت ءُ گُل خان نصیر ءِ اے شَیر ءَ گوں آئی ءَ گیر کار ایت ۔

تاں دو ساعت جنگ مَچّہت، تپت زمین چو محشر ءَ
بے حساب ءَ ریھتگنت ملیشا، نئے شمار ئت عسکر ءَ

ویڑ تنت کیل ءِ ھلنگ ءَ، سکّ و محکم شیبر ءَ
واک و وسّ ءَ چہ سوائت، پھجگی حد ءَ در ءَ

تاں کہ وس ئت، جنگی داننت، پُرشتنت ورنا آھِر ءَ
میر بٹے خان و ولی محمد، گوں بُرے کنگر ءَ

درشتنت یک نیمگے ءَ، شم کنان چہ تیھِر ءَ
بھاول و لعل محمد گوں میریں بُلند خان گُڈ تِر ءَ

گوں نواب بیتنت آوار، ماں زھری ءِ گٹ ءِ سر ءَ
مستی و میر پسند خان، خیر بخش گوں ھومر ءَ

سبزل و محمد خان کہنی، بیتنت بندی یَبّر ءَ
میر مراد خان، دلمراد، گوں غلام رسول گِستا تِر ءَ

درشتنت ویڑ ءِ نیام ءَ برز چہ بے راھیں گر ءَ
مرتگینانی حساب نیست، ٹپی ئنت سَے دَہ بَر ءَ

پئوج و عسکری زُرتہ بازیں، پُورتنت ماں ڈینبر ءَ
زھریانی میل ء مچُی، گڈ چہ کیل ءِ ھِلگر ءَ
پُرشت و شُت چہ کم سوادی، شنگ و شانگ مُنتا شِر ءَ

نبشتانک: ٹوھیں کردانی ھُدابند

نبشتہ کار: مھروان کمبر

دی بلوچستان پوسٹ

ھما مردم ٹوھیں کردانی ھُدابند بَہ اَنت کہ آ ٹوھیں مکسدانی ھاتر ءَ وتی ساہ ءَ دست ءِ دل ءَ کن اَنت آپ ءُ آس، سارت ءُ گرم ھچ نہ چار اَنت بلکیں گْران ءُ مُشکلیں جاورانی دیمپانی ءَ گوں جوانمردی ءَ کن اَنت وتی ھونانی ترمپاں چہ زندگی ءِ گُڈّی ساھتاں راجدپتر ءِ تاکانی سر ءَ نکش کن اَنت ساھکندن ءِ ساھتاں ھم آجوئی ءِ سوتاں جنان بَہ اَنت ءُ پہ ماتیں گُلزمین ءَ کُربان بَہ اَنت۔

پیچ ءُ تابیں دَگ، کُنٹگ چکاریں سپر، زِمستانی آپ بندیں شپ، گرماگ ءِ لِوار سوچوکیں نیمروچاں پند جنوکیں زمین زھگانی کُربانی بیان ءُ گُمان ءَ چہ ھما دیم اَنت۔ ھردیں دُژمن ءِ پاد ءُ کدم گُلزمین ءِ دلبند ءَ کپ اَنت ، گُڑا سنگر گپتگ ءُ تیر سوھانیں بچّانی تیر آھانی دلبند ءَ پیوست بَہ اَنت اِیشانی دلیری ءُ سرمتابی ءَ ھما مارت کن اَنت کہ آھانی ھمسپر اَنت مئے وتن بلوچستان ھما سرزمین اَت کہ آئی ءِ سر ءَ مُدام پُل ءُ گواڑگاں وتی وشبو شنگ ءُ تالان کُتگ اَت اُود ءَ مُرگانی توار اَت، گوات سوت گْوشگ ءَ اَت، زیبائیں موسمانی شپاں وت ءَ چو بانور ءَ سمبھینتگ اَت برپانی سر ءَ مھر ءُ وپا بچکندگ ءَ اِت اَنت بُرزتریں کوہ ءِ ٹُلّ ءَ شِپانکے وتی رمگ ءَ سردیان اَت ءُ زھیرونک الھان ءَ اَت۔

پد ءَ موسم مٹ اِت اَنت سیاہ ءُ تھاریں شپے اتک، ھر نیمگ ءَ زُلم ءُ زوراکی ءِ آس جمبول بوت، ھما جاہ ءَ پُل رُستگ اِت اَنت، ھمود ءَ کُوکُوانی زیمر شنگ اِتگ اِت اَنت ، نوں اُود ءَ ھر گْور ءَ بلوچ بچّانی ھون تالان اِت اَنت ءُ لاشانی امبارے اَت وھدے یک مُلکے، یا راجے ءِ سر ءَ زُلم ءُ زُوراکی وتی ھدّ ءُ سیمسراں چہ ھما دیم بیت، گُڑا ھما اِستان یا راج ءِ لھتیں سرمتابیں ورنا زُلم ءُ زُوراکیانی دیم ءِ دارگ ءِ ھاتر ءَ جنگ ءُ جُھد ء آجوئی ءِ پِڑ ءُ میدان ءَ درکپ اَنت ءُ پہ گل ءُ شات مرگ ءَ امباز کن اَنت منی ڈیھ بلوچستان ءِ بازیں ورنا وتی ھیشی سراں پہ وتن کُربان کنان اَنت اے ھما ورنا اَنت کہ پہ زمین شیدا اَنت ، پہ زمین کوہ ءَ اَنت ، پہ زمین جنگ ءَ اَنت ءُ پہ زمین جُھد ءَ اَنت۔

گْوستگیں ماہ اپریل ءَ نوشکی ءُ شور ءِ دلبند ءَ بگر داں زامران ءِ آپبنداں در ءَ روکپتی بلوچستان ءِ ھند سراوان ءَ بگر تا جاؤ آواران ءُ اورماڑہ ءَ بِیا ھر کُجا زمین زادگاں وتی ھونانی ھار ملینت ءُ گُلزمین ءِ زیبائی دگہ کیپ ءُ چاڑے بکشات۔ لھتیں اَنچیں نتُرس ءُ سرمتابیں ورنایاں وتی ھیشی سر پہ گُلزمین بکش اِت اَنت کہ آھانی ستاہ منی اے چاریں لبزانی مُھتاج نہ اَنت، بلے اے بیبگر ءِ تراولیں پادانی بُراِتگیں پند ءُ آئی ءِ داتگیں کُربانی اَنت، ماجد ءِ دِرّتہ پُچّی ءُ جپاکشی اَنت، جلال جان ءِ کندگ ءُ ٹھک اَنت، ھالکداد ءِ کُودکی ءُ اَلی شیر بُگٹی ءِ دلیری، یاگی جان ءِ ابیتکیں بچکند ءُ بالاچ ءِ رِتکگیں ھون اَنت کہ دل گْوش اِیت چار لبز پہ ستاہ ءَ نویس۔

بیبگر، ماجد، جلال، یاگی، بالاچ، الی داد ءُ الی شیر ھما ورنایانی لڑ ءَ ھوار اَنت کہ آھاں وتی ورنائی پہ ماتیں زمین ءِ موکگ ءَ کوہ ءُ اگاراں گْوازینت اَنت آھاں وتی ورنائی ءِ ھمُک واھِشت، لوٹ ءُ ارمان پاداں لپاشت اَنت ءُ کپن سر ءَ بست ءُ دُژمن ءِ پُروش دَیگ ءَ جنگ ءِ میدان ءَ درکپت اَنت وھدے انسان ءِ زندگی ءُ آئی ءِ مرگ آئی ءِ راج ءِ ھاتر ءَ بہ بہ اَنت گُڑا آئی ءِ ھر پیسلہ سمائی بزاں (شعوری) بَہ اَنت ءُ ھما پیسلہ کہ سمائی بزاں شھوری ( شعوری ) بُنیاد ءَ زُورگ بَہ اَنت آ راجدپتر ءِ تاکانی سر ءَ جوانیں لبزاں گوں نبشتہ کنگ بَہ اَنت۔

اے بلوچ راج ءِ ھما سسّا ءُ سما ءَ چہ سرچکاریں ورنا اِت اَنت کہ آیاں وتی زندگی وتی راج ءِ ھاتر ءَ کُربان کُت اَنت ءُ راجدپتر ءِ تاکاں وت ءَ را نمیران کُت اے ورنایاں بلوچ ءِ آیوکیں پدریچ ءَ پہ گُلزمین ءِ ھاتر ءَ کُربان بُوَگ ءِ یک انچیں مادنیں راھے پیشداشت، کہ آ راہ چو چراگ ءَ رُژن ءَ اِنت، چو استالاں دْرپشگ ءَ اِنت ءُ اے راہ آجوئی ءِ راہ اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ کیچ ءِ دمگ تمپ گومازی ءَ پاکستانی پوج ءَ بیڑ برتگ ءُ اود ءَ مردم لَٹ ءُ کُٹ کتگ اَنت –

دمگی مردمانی رد ءَ گوستگیں شپ ءِ ساھت یک ءَ داں ساھت سَے ءَ پاکستانی پوج ءَ گومازی ءَ سیٹھ پُلان ءَ لوگ ءَ بیڑ برتگ ءُ اود ءَ چُک ءُ جنین کمشرپ کرتگ اَنت ءُ لوگ ءِ ساز ءُ سامان برتگ اَنت-

دمگی مردمانی رد ءَ عبدالصمد نامیں مردمے ءِ گس ءَ پوج ءَ بیڑ برتگ ءُ اود ءَ آئی ءِ چُک صغیر آوار جتگ ءُ برتگ ءُ دمگی مردمانی رد ءَ صغیر سَے رند ءَ پیسر آوار جنگ بیتگ ءُ اے چارُمی رند اِنت کہ آوار جنگ بیتگ –

ھمے وڑ ءَ لیاقت نامیں مردمے ءِ لوگ ءَ پوج ءَ بیڑ برتگ ءُ اود ءَ جاڑیگیں سامانی ھواری ءَ چار پَرپٹ ھم پوج ءَ برتگ ءُ آئی ءِ زھگ تارک آوار جتگ ءُ برتگ –

دمگی مردمانی رد ءَ چریشاں ابید پوج ءَ بی این ایم ءِ وائس چیئرمین گلام ءِ لوگانی سر ءَ بیڑ برتگ ءُ اود ءَ جنین ءُ چُکانی سر ءَ پوج ءَ لَٹ ءُ کُٹ کرتگ اَنت ءُ لوگ ءِ ساز ءُ سامان برتگ اَنت –

دمگی مردمانی رد ءَ پوج ءِ ھمراھی ءَ دمگ ءَ پُرکاریں “ڈیتھ اسکواڈ ” ءِ نام ءَ زانگ بیت اِنت ھوار بیتگ اَنت –

بلوچستان ءَ سیاسی ءُ انسانی ھکانی گلانی گوشگ اِنت کہ بلوچستان ءَ ھمک وھد پاکستانی پوج ءُ ڈیتھ اسکواڈ ءِ کارمند دمگانی سر ءَ بیڑ بر اَنت ءُ اود ءَ مردماں لَٹ ءُ کُٹ کن اَنت ءُ مردماں آوار جن اَنت –

زانگ بہ بیت گوستگیں روچ ءَ بلوچستان ءِ بنجاھی شھر شال ءَ وائس فار بلوچ مسنگ پرسنز ءِ چیردستی ءَ بیگواھیں مردمانی ھاتر ءَ زھرشانی کنگ بیتگ –

سر بیتگیں ھالانی رد ءَ روکپتی بلوچستان ءَ ناشناسیں مردمانی تیرگواری ءَ یک مردمے بیران بیتگ –

تیرگواری ءِ وئیل سراوان ناگا بالا ءَ دیم ءَ اتکگ کہ اود ءَ سلاہ بندیں مردماں تیرگواری کرتگ ءُ اود ءَ شریف سیاھانی ء سھراب جھمنند ناگان بالا بیران بیتگ –

کوش ءِ سبب زانگ نہ بیتگ ءُ گیشیں پَٹ ءُ پول پولیس کنگ ءَ اِنت –

روکپتی بلوچستان ءَ انسانی ھکانی گلانی گوشگ اِنت کہ روکپتی بلوچستان ءَ بازیں کچے ءَ مردم جنگ ءُ کُشگ بیگ ءَ اَنت کہ آیانی پُشتگیری ءَ مزنیں دست ھوار اَنت –

آیانی گوشگ اِنت کہ روچ ء رھمان پھزدارانی اوشتگ ءَ ابید ھم سلاہ بندیں مردم کاینت ءُ لس مردماں نشانگ کن اَنت ءُ آیاں کُش اَنت –

دستونک

گلؔ بلوچ

دی بلوچستان پوسٹ

جبین ءَ بن دیاں کن آں، دل ءَ را آسے روک کن آں
نیا ئے انشپی اگاں، وت ءَ من چٹ گنوک کن آں۔

زمین ءِ ھک ادا نہ کت، لگوری ءَ گوں رپت ئے تو
بہ گنداں مھشر ءَ ترا ، من لٹ ءُ سنگ ءُ ڈوک کن آں

بہ دے سر ءَ وتیگ ءَ تو، زمین ءِ ھک ادا بہ بیت
اگاں نہ دات بہ چار ترا، شگان ءُ تْرندیں ٹوک کن آں

امیتے داشتگ پہ وتن، پدائیاں گوں سرگراں
اگاں بہ بہ ئے تو اسلمے ، ترا گوں من زروک کن آں

بہ بر بہ بر من ءَ بہ بر، دل ءَ مہ کش وتیگ ءَ تو
ترا گوں ھمسپر بہ آں، ترا گوں وت بندوک کن آں

وتی گھاریں سمی ءَ ، ھانی ماھرنگیں دُتّک ءَ
کریمہ ءِ باں بنپداں ، وتی من نام ءَ نوک کن آں

وتن وتن وتن کتگ، در کپتگاں پہ منزلے
سر ءَ من بستگ شر کپن، بداں پہ آسے روک کن آں۔

بر ئے بہ بر گل ءَ بہ بر، وتن پہ ساہ ئِے ندر کتگ
مپت ءَ مہ بیت زیان سرے، وت ءَ من راج ءِ توک کن آں

بلوچستان ءَ تیرگواری، دزکپتگیں جون دزکپتگیں پنچ جونانی ھال اتکگ اَنت، دو ٹکانی میان ءَ بیست ءُ دو مردم زدگ بیتگ اَنت –

ٹی بی پی پتر ھال ءَ سر بیتگیں ھالانی رد ءَ پنجگور ءِ دمگ تسپ ءَ مانش جاہ ءِ نزیک ءَ گون بندیں جون ءِ دزکپتگ کہ آئی ءِ پجار مجاھد ء زباد جھمنند ھدابادان ءِ نام ءَ زانگ بیتگ –

پولیس ءَ جون چِست کرتگ ءُ نادراہ جاہ ءَ سر کرتگ ءُ اود ءَ آئی ءِ گیشیں پَٹ ءُ پول بندات کرتگ –

کوش ءِ سوب زانگ نہ بیتگ، پولیس ءِ گوشگ اِنت کہ اے مرد کارچ جنگ بیتگ ءُ آئی ءِ جون گونی ءِ تہ ءَ کنگ بیتگ ءُ چگل دیگ بیتگ –

ھمے وڑ ءَ پنجگور ءِ دمگ گرمکان ءَ ناشناسیں سلاہ بندیں مردمانی تیرگواری ءَ یک مردمے بیران بیتگ –

وئیل گرمکان ءَ دیم ءَ اتکگ کہ اود ءَ سلاہ بندیں پرپٹ سواریں مردماں تیرگواری کرتگ ءُ عزت اللہ ء نیک مھمد ءَ زانگ بیتگ –

ھمے رنگ ءَ پنجگور تسپ ءَ کارچ ءِ جنگ ءَ مھسن ء عبدالعزیز نامیں مردمے زدگ بیتگ –

ھمے وڑ پنجگور وشبود ءَ مچ ءَ درتکگیں جون ءِ دزکپتگ –

جون پنجگور ءَ وشبود ءَ کسٹم ءِ نزیک ءَ مچانی باگ ءَ یک دراتکگیں جون ءِ دزکپتگ، جون چِست کنگ بیتگ ءُ نادراہ جاہ ءَ رسینگ بیتگ –

ھمے وڑ ءَ بلوچستان ءِ بنجاھی شھر شال ھزار گنجی نیوکاھان ءِ جھمنندیں ھدامرزی بالاچ خان شیرانی ءِ چاردہ سالی ئیں زھگ ءِ جون دزکپتگ –

ھالانی تہ ءَ گوشگ بیگ ءَ ایں بالاچ خان ءِ زھگ گوستگیں روچ ءَ بیگواہ بیتگ ءُ مروچی سھب ءَ آئی ءِ جون ھزار گنجی ءَ شھدگ ءِ نزیک ءَ دزکپتگ –

بلوچستان ءَ دگہ یک وئیلے ءَ بیست ءُ دو مردم زدگ بیتگ اَنت –

وئیل کلات ءَ یوسفزئی چھبر ءَ دیم ءَ اتکگ کہ اود ءَ لانگو ٹک ءِ دو کھولانی میان ءَ جنگ ءُ چوپ بیتگ کہ چریشی ءَ بیست ءُ دو مردم زدگ بیتگ اَنت –

ھمے وڑ ءَ بلوچستان پسنی ءَ پولیس ءِ گاڑی دگ ءِ وئیل ءِ آماچ بیتگ ءُ یک کارندھے بیران بیتگ –

گیشیں ھالانی رد ءَ پسنی ءَ پولیس ءِ گاڑی دگ ءِ وئیل ءِ آماچ بیتگ ءُ چریشی ءَ پسنی ءِ جھمنندیں پولیس منشی عظیم جان بیران بیتگ –

نبشتانک: بیگواھیں زھگ ءِ ودار

نبشتہ کار: زرینہ بلوچ

دی بلوچستان پوسٹ

‏گار ءُ بیگواھیں مردمے ءِ چُکے گوں مات ءَ جُست ءُ پُرس، چُک: امّا باندا ائید انت۔ مات: ھو منی واجُل باندا ائید انت کُرباناں۔

چُک: باندا گُڑا سجئیں نوکیں گُد گور ءَ کناں نوکیں چپل پاداں کناں – مات: ھو منی شررنگ من تئی واست ءَ سرجمیں چیز زُرتگ آں پریشان مہ بو۔

چُک: امّا من گُد چپل اے چیز نہ لوٹ آں مات: منی جگر ءِ بند دگے ترا چے لوٹ ایت بگوش من ءَ منی دست رَس ایت پتو زوراں من۔

چُک: من ءَ وتی ابّا لوٹ ایت من باریں چُنت سال بیت کہ نہ دیستگ باریں چُنت ائید گْوستگ ابّا نیاتکگ ابّا ءَ باریں مئے واست ءَ زھیر نہ کنت ؟(کمو دیر ھاموشی یے) مات: انّا منی پت چو مہ گْوش تئی ابّاءَ ھم مئے واست ءَ زھیر کنت بلے تئی ابّا اے دور ءِ یزید ءَ باریں کُجام تھاریں کوٹیانی توک ءَ بندیگ کُتگ کہ در آتک نہ کنت۔

چُک: امّا اے ائید ھم ابّا نئیت گڑا؟ مات: کیت منی شررنگ تو ءُ من دوا کن ایں کیت انت انشااللہ ھُدا دوایاں گوش دار ایت۔

چُک: امّا! ابّا تو وت گْوشت تھاریں کُوٹیاں بندیگ انت ابّا وَ ھُداوند ءِ کر ءَ نہ انت کہ مئے سر ءَ بزگ بکنت ءُ مئے دُوا اش بہ کنت ابّا و یزید ءِ لشکر ءِ گور ءَ انت۔

مات: منی جگر ءِ بند اے گپ راست اِنت بلے مئے دست آیاں رس اِت نہ کنت بلے ما ھُدا ءَ توار جت کن ایں مئے دُوا ءَ گوشدار ایت بلکّیں تئی ابّا ءُ سرجمیں بندیگ آجو بنت کا اَنت-

چُک: امّا من گڑا دوا کناں کہ واجہ ھُدا سرجمیں بندیگاں آجو بہ کنت ائید ءِ نوک ءَ تیوگیں بلوچستان ءِ واست ءَ وشی بیارات۔ مات: آمین ثم ءَ آمین شالا انچوش بات منی ارواہ۔ ھُدا تئی دوایاں گوش بہ دارات-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔