TBP Balochi

بلوچستان ءِ مزن شھر شال ءَ یک مردمے زورانسری آوار جنگ بوتگ-

سربوتگیں ھالانی رِد ءَ شال کلی قمبرانی ءِ نندوک آفتاب قمبرانی چیزے روچ ءَ پیش پاکستانی پوج ءُ چیریں ادارھانی کارندھاں آوار جنگ ءَ پد بیگواہ کتگ –

دمگی مردمانی رِد ءَ آفتاب قمبرانی 14 اگست ءَ روکپتی بائی پاس ءَ پاکستانی پوج ءُ سادھیں پوشاکانی تہ ءِ کارندھان آوار جتگ –

آفتاب قمبرانی دکانداری بوتگ ءُ آ وتی زند ھمے دکان ءِ سر ءَ تلیناک داتگ-

ھمے وڑ 9 ءُ 20 اگست ءَ شال ءُ ھرنائی ءَ سے مردم پاکستانی پوج ءِ کارندھاں آوار جتگ ءُ بیگواہ کتگ اَنت-

سربوتگیں ھالانی رِد رمضان ء محمد چلگری مری ءُ بالاچ توکلی چلگری مری 9 اگست 2021 ءَ روکپتی بائی پاس شال ءَ آئی لوگانی سر ءَ ایف سی ءُ پولیس ءَ بیڑبرتگ ءُ آوار جتگ وھدیکہ خان محمد ء رؤف چلگری مری 21 اگست 2021 ءَ ھرنائی بازار ءَ ایف سی ءَ آوار جتگ ءُ بیگواہ کتگ-

رمضان ءَ کوئلہ چاتاں پوریاگری کتگ ءُ وتی لاپ شوھاز کتگ اشی ءَ چہ پیش ھم ھرنائی ءَ ایف سی آوار جتگ ءُ پنچ ماہ ءَ وتی زنداناں بند کتگ پد ءَ سبی زندان ءَ برتگ اود آ یکے دیمی ءِ چہ یل بوتگ ءُ 13 اگست ءَ سبی ءِ آمیدگس ءَ لوٹائینگ بوتگ-

بنشون ءَ آوار جنگ بوتگیں مردمانی گپ دنیگت ءَ پدر نہ کتگ –

نبشتانک: تو انگت ءَ بہ جَلِتین ئے

نبشتہ کار: جبران بلوچ

دی بلوچستان پوسٹ

من وتی گوانکو ءَ گوں سر ءُ پُٹ اِتاں برے اِے سنگت ءَ گوں مسکراہ ءَ اِتاں برے آ سنگت ءَ من وھد ے کہ وھد چار اِت وھد شُتگ اَت ءُ شپ ءِ یک بج اَت (1:00) من گُڑا سنگت رُکست کُت اَنت من ءَ سک واب ءَ گِپتگ اَت گوانکو بند کُت من وتی چم بند کُت اَنت وتی دل واب ءَ دات-

کوش وش وش ءَ کشگ ءَ اَت من ھمے دمان ءَ واب شُتاں سُھب سر بیت سنگتاں من ءَ پاد کُت!جبران او جبران پادا نی بُرو گاٹ بہ دے من پہ بے تھمبُلی چم کِچینان کُت اَنت ءُ شُت آں گاٹجاہ ءَ سر بیت آں اِے دیم ءُ آ دیم ءَ دیر گِند کُت ءُ چار اِت درستیں سنگت چہ واب ءَ پاد اَتک اَنت ءُ جھل ءَ شُت اَنت ھر یکے گوں وتی کار ءَ دل گوش بیت یکے ءَ چائِے جوڑ کُت ءُ یکے ءَ آرتے ھر کس بِزاں گوں یک کارے ءَ دل گوش بیت-

روچ پہ ھمے وڑ ءَ گوست “شپ کہ بیت سنگت اِے نیمگ ءُ آ نیمگ بیت اَنت من پد ءَ وتی جاہ ءَ شُت آں وتی کمبل پچ کُت ءُ چادر وتی پاداں پِر دات ءُ وت گِند ے چارگ ءَ لگ اتاں دانکہ دیر ءَ تامرے چار اِت وھد چار اِت وھد مھلہ اَت من گوانکو بند کُت وتی چم آسمان ءَ کُت اَنت ءُ اِستالاں چارگ ءَ لگِ اتاں من وتی دل ءَ سک باز جِیڑ اِت بازیں جیڑگاں من ایموشنل بیتاں بازیں جیڑگاں من واب کپتاں ھر نیمگ ءَ چار اِت تھاری ءَ مانشانتگ ھلک ءُ دمگ چاراِت اَنت ھلک ءُ دمگ ءُ کور ءُ کوہ ءُ چاراِت اَنت ھما کور ءُ کوہ ءُ ھلک کہ من تر ءُ تاب کُتگ اَت چار اِت اَنت ھلک پیسریگیں ھلک نہ اَت ھر نمیگ ءَ چار اِت واجہ کارانی بُنجل اِنت کدم کدم ءَ واجکار نِشتگ اَنت ھر یکے تُرس ءِ آماچ اِنت مَگرب کہ بیت چِرِتانی چِری چِری ھم بند بیت اَنت شپ گوست سُھب ءِ سر بیت گوانکو ٹیلینگ ٹیلینگ ءَ لَگ اِت من گوانکوچار اِت زُبیراَت گوانک کنگ ءَ اَت گوانکو من چِست کُت من ھلو کُت دروت ءُ دراھبات کُت زُبیر ءَ من ءَ جُست کُت کُجاہ ئے تو؟ من گُشت ئِے من لوگ ءَ آں وپتگاں چے ءَ زاناں پسوئِے دات تو بیامرچی منی نیمگ ءَ من ءَ کارے ھست من گُشت بس شراِنت جگر جانے شُوداں گُڑا کایاں تئی نیمگ ءَ گُڑا من گوانکو بند کُت ءُ پاد اَتکاں دیم پہ وتی موتُر ءِ نیمگ ءَ شُت آں-

موتُر چالو کُت جانے شُشت چائی وارت ءُ دیم پہ زُبیر ءِ نیمگ ءَ رھادگ بیت آں اَدار نیم ءَ سر بیت آں زُبیرے ھلک ءَ من گوانک کُت ھاں آڑے کُجاہ ئے تو پسوئِے دات تو بیا ھما کُنرّے چیر ءَ من شُت آں چاراں بازیں سنگتے نِشتگ اَت من دروت ءُ دراھباتیں کُت اَنت ءُ نِشت آں گپ ءُ تَرانے بیت دیوان بَز اَت زُبیر برے یک سنگتی ءَ کُنّت کنگ ءَ اَت ءُ بَرے دگرے ءَ ءُ بَرے من ءَ ھم کُنّت ئِے کُت زُبیر ءَ بِزاں کس نہ اِشت پہ کُنّت کنگ ءَ سنگتاں زُبیر ءِ دیوان سک باز وش بیت ھر وھد ءَ من ءَ سُٹّک ئِے جَتگ گُڑا من زانتگ مرچی زاناں یکے اَزاب کنت بَلے گپ گپے سر ءَ زُبیر ءَ تُمپی گپ کُتگ گُڑا من لاپ لیٹ وارتگ پہ کندگ ءَ بازیں کندگ ءَ منی لاپ ءَ درد کُتگ من پاد اَتکگاں چہ دیوان ءَ گُڑا یک کِر ءَ نِشتگاں –

زُبیر ءَ من ءَ گوانک جَتگ جبران تو بیا اِد ءَ من گُڑا پد ءَ شُتگاں دیوان ءَ نِشتگاں گُڑا دانکہ دیر ءَ گپ ءُ تَران بیتگ گُڑا من گُشت سنگتاں من نی رھادگ باں زُبیر ءَ من ءَ نہ اِشت پہ روگ ءَ گشت ئِے جبران تو یک برے بہ نِند وَرگے بہ وَر پد ءَ رند ءَ برو من گُڑا جاھلی نہ کُتگ زیبر ءَ گپ ءُ تران کُت من کند اِت دانکہ دیر ءَ زبیر ءَ مسکرائی کُت ناھاری ءِ وھد بیت زُبیر ءَ منی موتُر زُرت ءُ شُت ناھاری ئِے ارت سنگتاں دست شُشت ناھاری بِنا کُت ناھاری وارت ءُ ھلاس کُت گُڑا آ دگہ سنگتاں رُکست کُت سنگت شُت اَنت من ءُ زُبیر نِشت ایں گُڑا زُبیر ءَ گُشت بِریں روئیں سامّی چات ءَ، سامّی چات ءَ چے کن اِیں زُبیر ءَ منی پسّو نہ دات سوار بیت موتُر ءَ من ھم سوار بیتاں زُبیر ءَ راہ ءَ گپ ءُ تَران کُت من گوش داشت دانکہ مندیگ کور ءَ رس ات اِیں پوج ءَ تیرے جَنگ بِنا کُت زُبیر ءَ یک تیرے وارت کش ءَ ما موتُرے سر ءَ چہ کپت اِیں!جبران او جبران من جَہ سِراِتاں چہ واب ءَ من نی سک باز پریشان بیتاں من دست بُرز ءَ کُت اَنت یا اللّٰہ اِے چونی وابے دیست من سنگتاں من ءَ جُست کُت ھاں جبران ترا چون بیت تو دست بُرز کُت اَنت من گُشت آڑے جُست ءَ مہ کن من سکیں بے کاریں وابے دیست چونی وابے بیتگ؟ جُست ءَ مہ کن بِریں روئیں جھل ءَ من وتی تُپنگ ءُ جاٹا زُرت اَنت رھادگ بیت ایں جھل ءَ سنگتانی چاہ پِراِت اَنت من دست ءُ دیم شُشت ءُ یک کوپے چاہ وارت ءُ نِشت آں جیڑگ ءَ لگِ اتاں من گوں وتی ھیال ءَ گار اِتاں سنگت ءَ من ءَ گوانک جَت جبران ترا چون اِنت تو پریشان ئے؟ من گوشت من ءَ ھِچ نہ اِنت من بس وتی ھیال ءِ گوم ءَ گپ کنگ ءَ آں سنگتاں گُڑا ھِچ نہ گُشت دو سے اَدار ءَ رند سنگتی ءَ سنگتے دیم دات نیٹورک ءَ سنگت شُت نیٹورک ءَ نیم ادار ءَ رند اَتک جھل ءَ سنگت ءَ سرھال ئِے ئے وانگ بِنا کُت سنگت ءَ گُشت آڑے شمبے شھید کنگ بیت چُتو شھید کنگ بیتگ ؟جڑپ ءَ کپتگ شمبے ءِ براس ءَ ھم دو تیر وارتگ بَلے آ دوئیں سنگتاں وت ءَ کش اِتگ من وتی دل ءَ زانت اِے واب شری وابے نہ اِنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ یکجھتی کمیٹی کراچی ءِ جارکش ءَ گُشتگ کہ بلوچ یکجھتی کمیٹی کراچی ھنکین شمبے ءِ روچ ءَ ساھت چار ءَ کراچی پریس کلب ءِ دیم ءَ زھرشانی کنت –

ھستیں وھد ءِ زمینی ھدایاں یک ماتے ءَ چہ آئی ءَ جگر ءِ ٹکر ءِ ہچ گرگ مروچی ھما لوگ ءِ چراگ توسینگ بیتگ کہ ھما لوگ ءَ اے چراگ ءِ رژن ءِ چنکس اژدری بیتگ اے ھبدہ شانزدہ سالی ئیں زھگ مھراب پندرانی اے زمینی ھدایانی گور ءَ وتی دو وھد ءِ نان ءِ والینگ ءَ مزدوری ءَ بیتگ ءُ وتی لوگ ءِ شدکی ءَ ھلاس کنگ ءَ بیتگ بلے اے زمینی ھدایانی گور ءَ ھرچ رنگیں زلم ءُ زوراکیاں سگگ ءَ بیتگ ءُ مروچی ھما لوگ ءِ چراگ زمینی ھدایانی پادانی چیر ءَ مِر مرانکی ءَ لَٹ ءُ کُٹ ءُ ٹپ ءُ ٹوریں بدن ءَ داں اے جھان ءَ آئی ءَ سپر کتگ –

جارکش ءَ گُشتگ کہ نصیر آباد ءِ اے کسان سالیں بچک ءِ دل نہ سگوکیں وئیل ءِ سر ءَ چمشانک دیان ءَ گُشتگ کہ کسان سالیں مھراب پندرانء نامی ئیں ٹرانسپورٹ سدا بھار ءِ واھند ءِ لوگ ءَ نپرے بیتگ آئی ءِ مرگ سدابھار ٹرانسپورٹر ءِ واھند ءِ لوگ ءَ ناگتی لکانی گار بیگ ءَ بیتگ – ھمے شک ءِ سر ءَ آئی ءَ وتی لوگ ءِ نپر بے کساس ءَ چُتگ –

اے ملازمانی تہ ءَ یکے نصیر آباد ءِ ھبدہ سالی ئیں چوروئیں بچک مھراب پندرانی بیتگ کہ آئی ءِ جسم ءُ جان ءَ لَٹ ءُ سیم ءُ آسناں لَٹ شاپ کنگ ءُ زلم ءِ کھر آئی ءِ سر ءَ دور دیگ بیتگ ءُ اے زوراکیانی تہ ءَ آ سَے روچ دو روچ ءِ تہ ءَ آئی ءَ ٹپ نہ سگ اِتگ ءُ بیران بیتگ آئی ءِ کوش وتکشی ءِ نام دیگ بیتگ ءُ آئی ءِ لاش نصیر آباد ءَ آئی ءِ کھول ءِ ھوالگ ءَ کنگ بیتگ –

آئی ءَ گُشتگ کہ آئی ءِ برات ءَ گُسل ءِ وھد ءَ آئی ءِ جسم ءِ سر ءَ بے کچیں نشان دیستگ اَنت ءُ آئی ءِ اکس کش اِتگ ءُ چاگردی رسانکجاھاں شنگ کرتگ اَنت ءُ ھمود ءَ چہ اے جاورھال پدر بیتگ اَنت –

آئی ءَ گُشتگ کہ ھمک روچ زُلم ءُ زوراکیانی کسہ گیش بیان اَنت اگاں مروچی ما اے زُلمانی ھلاپ ءَ اے زرکار ءُ آیانی زرکاری ءِ نزام ءِ سر ءَ یکجاہ ءَ بست نہ کت گڑا وھد دور نہ اِنت اے زُلم مئے شمئے درستانی گون ءَ بنت اِنت چریشی ءِ سر ءَ دراھیں تکاں بندوکیں مردماں گوں دزبندی اِنت زلم ءِ ھلاپ ءَ بیوکیں زھرشانیاں بھر بہ زور اَنت ءُ زیردستیں مردماں داں انساپ بہ رس ایت –

جارکش ءَ وتی درشانی ءِ گڈسر ءَ گُشتگ کہ یک رندے پد ءَ شمارا گُش آں بلوچ یکجھتی کمیٹی (کراچی) بیست ءُ ھشت اگست دوھزار ءُ بیست ءُ یک ءَ شمبے ءِ بیگاہ ءَ ساھت چار ءَ کراچی ءِ پریس کلب ءِ دیم ءَ اے زلم ءِ ھلاپ ءَ زھرشانی کنت ما دراھیں تکاں بندوکیں مردماں اے زھرشانی ءَ بھر زورگ ءِ دزبندی ءَ کن ایں –

ھمے وڑ ءَ تربت ءَ سول سوسائٹی ءَ وتی درشان ءِ تہ ءَ گُشتگ کہ مھراب پندرانی ءِ انساپ دیگ ءِ واستا زھرشانی ءِ جار ءَ جنت –

آئی ءَ گُشتگ کہ پشمبے ءَ تربت پریس کلب ءِ دیم ءَ مھراب پندرانی ءِ ناھکیں کوش ءِ ھلاپ ءَ زھرشانی کنت ءُ دراھیں تکاں بندوکیں مردماں بھر زورگ ءِ دزبندی اِنت –

بلوچستان ءِ بنجاھی شھر شال ءَ سلاہ بندیں مردمانی تیرگواری ءَ چار کاریزکار بیران بیتگ اَنت-

ھالانی رد ءَ بلوچستان ءِ بنجاھی شھر شال ءَ کساس ھپتاد کلو میٹر دور سلاہ بندیں مردماں تیرگواری کرتگ ءُ چار کاریزکار کُشتگ اَنت –

تیرگواری ءِ وئیل مارواڑ ءَ پیش اتکگ کہ اود ءَ تیرگواری وئیلے ءَ چار کاریزکار بیران بیتگ اَنت –

پولیس ءِ رد ءَ بیران بیتگیں کاریزکارانی تہ ءَ یکے ءِ سیادی اوگانستان ءُ یکے ءِ سیادی شال ءُ دو ءِ سیادی شانگلہ ءَ اِنت-

بیران بیتگیں مردمانی تہ ءَ انایت الرحمان ء شفیق جھمنند ڈھیری ءُ گل ھکیم ھوار اَنت –

بیران بیتگیں مردمانی لاش شال ءَ برگ بیتگ اَنت بلے تنی وھدی وئیل ءِ بارو ءَ سرپدی نہ بیتگ –

نبشتانک: مئے چاگِرد ءِ وڑیں چاگِرد ءُ نگد

نبشتہ کار : داد شاشانی

دی بلوچستان پوسٹ

چوناھا مئے چاگِرد ءِ وڑیں چاگِرد وتی سر ءَ نگد کنگ ءَ ھچ بر وش نہ بنت بلے بازیں مردُمانی بازیں نگیگی بنت آ باز وھد ءَ مُچّیانی توک ءَ وتی چیزانی سر ءَ نگد کنگ ءَ ھچ نہ گْوش اَنت ۔

بلے دل ءِ توک ءَ الم کینگ دار اَنت یا وتی دوست دارُکانی دیم ءَ الم آئی ءِ بگیری ءَ گپ کن اَنت نگد کنوک ءَ ڈوبار اَنت ءُ گْوش اَنت اے وت ءَ بلاھیں زانتکارے کنت وتی دل ءَ ، ھچ ءَ سرپد نہ اِنت من پمیشکا آھی نگد ڈالچار کُتگ من-

کَسے ءَ کہ نگد کنگ ءَ وش نہ بوت نگد کنگ ءِ سر ءَ زھر گیپت ئِے بزان آ دُزّے آ زانت اے مردُم ءَ من مہ دار اَنت دیم ءَ روگ ءَ بِل آں اے پٹ ءُ پول بہ کنت من دُزّی ءَ گِرگ بنت پمیشکا نگد کنگ ءَ کَس وش نہ بیت کہ آئی ءَ را وتی جند ءِ سر ءَ شک اِنت آ زانت کہ من انچو دیم پہ شاپ اِتگ گپ کُتگ یا نبشتہ ءُ کار کُتگ-

نگد کنگ سک ءَ شَریں چیزے اے گپ ءَ ھر کَس کنت آ بلکیں منی جند ھم بہ بیت ۔ بلے نگد کنگ مئے چاگِردانی وڑیں چاگِرداں ھچ وش نہ بیت پرچاکہ مئے چاگِردانی توک ءَ زانت نیست سرپدی نیست ما نہ وان اِیں مئے کِرا بس یک گپے گیش ناماں اِنت ( گْوشی گْوشت ءَ چُش نہ اِنت چُش اِنت ) چَہ اے گپ ءَ ھمے پدر بیت من چَہ دگہ کَسے ءِ دپ ءَ اِش کُتگ ھمے گپ ءِ راستی منی جند ءَ را سما نیست پد ءَ ما اے ھم نہ زان اِیں گپ کَے ءَ کُتگ مردُمانی دپ ءَ داتگ مارا پَٹ ءُ پول لوٹ اِیت بلکیں ھمے گپ ناسرپد ءُ نازانتے ءَ کُتگ یا دژمنے ءَ کُتگ یا گنوک ءُ ابدالے ءَ کُتگ یا کوچراھی کُنوکیں مردُمے ءَ وتی دیوان ءِ مُلما کنگ ءَ پہ کُتگ بلکیں چپورت ءُ ملنڈے ءَ کُتگ ، مئے چاگِرد ءِ وڑیں چاگِردانی مستریں جیڑہ ھمیش اِنت تو نگد دگر ءِ چیزے ءِ سر ءَ کُتگ بد دگہ مردُمے بارت ترا زاہ ءُ بد دگرے کنت ھمکہ سبر نہ کنت ھما مردُم وت بئیت بلکیں آئی ءَ وتی نزوری مار اِت بلکیں آئی ءَ وتی چیز ءِ سر ءَ پد ءَ نوکاں چار ءُ تپاس اِت، مئے چاگِرد ءِ وڑیں چاگِرد ءَ مردُم گیش مردُمانی زانت ءُ سرپدی ءَ نہ چار اَنت آئی ءِ گپانی وزن ءَ نہ چار اَنت آئی ءِ جُھد ءُ جپا ءَ نہ چار اَنت نام ءُ زات چار اَنت سیادی ءُ وارسی چار اَنت ھاتر داری کن اَنت ما نہ لوٹ اِیں مئے کار ءُ کارپد شَر ءُ تمرد بہ بِہ اِیں ما گْوش اِیں مئے دوست من ءَ گوں زھر ءُ دلگران مہ بیت دروگیں توسیپ ءَ پرواہ نیست ۔

ما نہ چار اِیں پہ ھاتر داری ءَ ما وتی باریں چنچو پدریچانی بدی ءَ کنگ ءَ اِیں مئے چاگِرد ءَ بے نام ءُ دِرتہ پُچے اگاں ھر وڑیں کارے شَریں بہ کنت ما آھی ءِ کار ءَ ھچ بر شَر نہ گْوش اِیں آئی ءِ دلبڈی نہ دے اِیں بلکیں آئی ءِ سر ءَ گیش کند اِیں آئی ءَ گیش ڈوباریں دانکہ ھما وتی کار ءَ بدار اِیت دیم ءَ مہ روت ، مئے چاگِرد ءَ توسیپ ءُ ستا گیش ھما مردُم بنت زَرّ اِش ھست یا نام ءُ توار اَنت یا مزین سیٹانی سر ءَ اَنت اُھدودار اَنت مئے چاگِرد ءِ وڑیں چاگِرد ءَ ھزھب ءِ سر ءَ اگاں کَسے نگد کُت آ وَ ھما وھد ءَ کُشگی اِنت سرجمیں چاگِرد وت ءَ چَہ آ مردُم دُور ءُ گِستا کنت کہ اے مردُم ءَ مزھب ءِ سر ءَ نگد کُتگ ما نہ چار اِیں نگد مزھب ءَ پہ المی اِنت آ وھداں مزھب ءِ بُن ھشت ایر بوتگ آ وھداں اے وڑیں کار ءُ کِسب نہ بوتگ اے وڑیں جاور ءُ ھیال ءُ پکر نہ بوتگ مرچی تئی دْرست کار بدل بوتگ اَنت تئی نند ءُ نیاد تئی وَپس ءُ وابجاہ تئی ورد ءُ وراک تئی پُچّ ءُ پوشاک تئی سور ءُ سانگ تئی ھرچی بدل بوتگ دود ءُ ربیدگانی توک ءَ سک باز بدلی اَتکگ تو انگت نشتگ ئے ھما مزھب ءِ رھبند ءَ دارگ لوٹ ئے الم تئی بے اِلمی اِنت تئی نازانتی ءُ ناسرپدی اِنت ۔

مئے چاگِرد ءِ وڑیں چاگِرد ءَ ترا ھچ چیز ءِ سر ءَ نگد کنگ ءِ موکل نیست ما ھچ بر نوکیت ءِ منّوگِر نہ اِیں ۔ ترا وانگجاھانی سر ءَ نگد کنگ موکل نیست ، ڈاکٹرانی ، اُستاد ءُ رھدربرانی ، وکیل ءُ ججانی ، راجکاری ءُ چاگِردکاری ، نبشتہ کار ءُ گُشتانکار انی ، ملا ءُ میا ، پیش امام ءُ دانشور ، مِیر ءُ سردار ، کَس وتی سر ءَ نگد کنگ ءَ وش نہ بیت وتی نزوری ءَ کَس نہ منّ اِیت ۔

اگاں تو ڈاکٹر ئے ءِ سر ءَ نگد کُت ترا دومی روچ ءَ کُلگ ءُ تپے ءَ گیپت گُڑاں ترا مردُم پہ شگان کُش اَنت آھیں ترا پہ ھمے ڈاکٹر ءَ کار کپت ھمے ڈاکٹر ءَ سُچِن ءُ درمان کُت تو شَر بوت ئے انگت نشتگ ئے ھمے ڈاکٹر ءِ سر ءَ نگد کن ئے ملا ءِ سر ءَ نگد کن ئے ترا ھمے شگان جنگ بیت تئی نماز جنازہ ءَ ھمے ملا وان اِیت یا تئی نکاہ ءَ ۔

دلگوش “” من ھما نگد کنگ ءِ گپ ءَ آں کہ آ نگد راست بہ بیت آئی ءِ توک ءَ زِدّ ءُ کینگ ماں مہ بیت وھدیکہ ھما چیز ءِ سر ءَ کَسے نگد کنگ ءَ اِنت آھی ءِ توک ءَ نزوری گندگ بہ بنت ھما نگد کَنوک ءِ جند ءِ تھ ءَ زانت المی اِنت آ ھما چیز ءِ سر ءَ کہ نگد کنگ ءَ اِنت آھی ءَ شَر سرپد بیت آئی ءِ تکّ ءُ پھناتاں بہ زانت آھی ءِ وڑ ءُ پیماں بزانت ھما نگد ءِ توک ءَ منّانک بہ بیت ھما نگد ءِ توک ءَ سیت ءُ نپ بہ بیت آ پہ راجانی دیمروئی ءَ شَریں ءُ جْوان مستانگے بہ بیت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ یکجھتی کمیٹی ءِ نیمگ ءَ شنگ بیتگیں درشانی ءَ گُشگ بیتگ کہ ٹرانسپورٹر ءِ دست ءَ نصیر آباد ءِ جھمنندیں زورانسری لَٹ ءُ کُٹ ءُ کوش ءُ بوٹہ فورٹ منرو ءَ دست ءُ گوشیں کھول ءِ سر ءَ ھونوارانی اُرش ءَ ایر جنت –

درشانی ءَ گُشگ بیتگ کہ ڈیھ ءِ کجام ھم ھند ءَ بلوچ پھریز بیگ ءَ نہ اَنت ھمک آیوکیں روچاں بلوچ لوگانی تہ ءَ پروش ءُ بے ساہ کنگ بیگ ءَ اَنت کہ اے درچ انگت ءَ برجاہ اَنت –

جارکش ءُ گُشتگ کہ ھبدہ اگست ءَ بواٹہ فورٹ منرو ءَ ایف سی پوسٹ ءِ نزیک ءَ ناشناسیں مردماں لوگے ءِ دود لگتمال کرتگ ءُ الھی بکش لغاری ءِ لوگ ءَ دور کرتگ ءُ اود ءَ گنوکائی تیرگواری کرتگ ءُ کھول ءِ سَے مردم کُشتگ اَنت ءُ سَے کس زدگ کتگ اَنت یک کساب سالے رابعہ بلوچ ھم زدگ کنگ بیتگ، لوگ ءِ نزیک ءَ ایف سی ءِ چیک پوسٹ نزیک اِنت اشی ءُ ابید ھم اے وڑیں وئیل درپیش بیگ ءُ اَنت ءُ اے وھد ءُ مردم ءِ مجگ ءَ بازیں گپ چِست بنت اِنت داں انگت ءَ جرمکارانی گرگ ءَ ھچ وڑیں جھد نہ کنگ ءُ کھول ءَ انساپ نہ دیگ ءُ اے کھول ءِ گون ءَ ٹوھیں زلم اَنت چریشی ءِ ھلاپ ءَ بے توار نہ بہ ایں –

جارکش ءَ گُشتگ یک دگہ وئیلے شال ءُ لھتے دھشد ءُ ٹرانسپورٹر ءِ دست ءَ یک بے گناھیں زھگے لَٹ ءُ کُٹ کنگ ءَ پد کُشگ بیتگ اے گُڈی زلم اَنت ءُ زلم تری کسے ءِ دست ءَ بہ بیت آ زلم اِنت اشانی ھلاپ ءَ مئے درستانی زمہ واری اِنت ءُ دُزی ءِ یک کسانیں بھتامے ءَ دو زھگ مھراب پندرانی ءُ آئی ءِ ھمراھ ھما رنگ ءَ لَٹ ءُ کُٹ کنگ بیتگ اَنت اے رنگ ءَ ھلاپ داروکیں مردم یکے دومی ءَ نہ کنت، بلوچ چاگرد ءَ اے وڑیں مردمانی جاڑیگ چاگرد ءِ واستا ترسناک اِنت بژنی گپ ایش اِنت کھول ءَ جرمکار ءِ ھلاپ ءَ ارزی نبشتگ کرتگ بلے پولیس ءَ انگت ءَ کس دزگیر نہ کرتگ ھاکم یکدم جھد کنگ ءَ اَنت مھراب پندرانی ءِ کشندہ رکینگ بہ بیت اِنت اے زلم ءَ دزمانجن اِنت –

جارکش ءَ وتی درشان ءِ گڈسر ءَ گُشتگ کہ بلوچ یکجھتی کمیٹی بلوچ مھلوک ءِ توار اِنت اے جاورھالاں ناوشی ءِ دیمپانی ءَ کنگ ءَ اِنت کسان سالیں ربعہ بلوچ ءُ زوراکی ءُ مھراب پندرانی ءِ انساپ دیگ ءِ واستا بلوچ یکجھتی کمیٹی ءِ نیمگ ءَ بیست ءُ پنچ اگست ءَ شال ءں پریس کلب ءِ دیم ءَ زھرشانی کنگ بیت اِنت دراھیں تکاں بندوکیں مردماں گوں دزبندی اِنت بھر بہ زور اَنت –

سربوتگیں ھالانی رِد ءَ شال ءَ وفاقی سرکار ءِ نیمگ ءَ اڈ داتگیں بیگواھیں مردمانی یل کنائینگ ءِ کمیشن ءَ بیگواھیں مردمانی کیسانی پیشی بندات کرتگ انت – مروچی اولی روچ ءَ پانزدہ بیگواھیں مردمانی کیس گوشدارگ بوتگ اَنت –

داخلہ بلوچستان ءِ بنشون ءِ رِد ءَ بلوچستان ءِ مزن آمیدگس گوستگیں سروک فضل الرحمن ءِ سرکماشی ءَ بیگواھیں مردمانی کمیشن ءَ شال ءِ سول سیکرٹریٹ جمالی ھال ءَ بیگواھیں مردمانی کیسانی پیشی ءَ اولی روچ ءَ پانزدہ مردمانی کیس گوشدارگ بوتگ اَنت کہ آھانی تہ ءَ دوازدہ مردمانی سیادی چہ شال ءَ انت وھدیکہ یک یک مردمے ءِ سیادی چہ پشین، ژوب ءُ ھاران ءَ انت-

کجام بیگواھیں مردمانی پیشی بوتگ دنیگت ءَ ھچ کس ءِ نام دیم ءَ نہ اتکگ انت – اے ھم ھال آیگ ءَ انت کہ پیشی ءِ میان ءَ شش بیگواھیں مردم یل کنگ بوتگ اَنت ءُ وتی گِساں سر بوتگ انت بلے یلا بوتگیں مردمانی نام ھم تنی وھدی دیم ءَ نہ اتکگ ھمے گوشگ بوگ ءَ انت کہ آ شال ءِ نندوک انت –

کمیشن شال ءِ تہ ءَ بیست ءُ ھشت اگست ءَ تاں بیگواھیں مردمانی کیساں گوشداریت شش روچ ءِ میان ءَ شست ءُ چار بیگواھیں مردمانی گوشدارگ بنت کہ اے بیگواھیں مردمانی سیادی بلوچستان ءِ بنجاھی شھر شال ءُ دگہ ھند ءُ دمگانی انت –

زانگ بہ بیت گوست ءَ ھم بیگواھیں مردماں ھمے گلگ پدر کرتگ اَت کہ اے کمیشن ءَ بازیں سال اَنت کہ جوڑ بیتگ بلے اود ءَ کمیشن ءِ پیش بیگ ءَ گوں اے کمیشن ءِ واکدار مارا کمشرپ کنگ ءَ اَنت –

وائس فار بلوچ مسنگ پرسنز ءَ گل ءِ ھالیگیں اگدوانی سر ءَ سمی بلوچ ءُ سیما بلوچ گچین کتگ اَنت –

گل ءِ نیمگ ءَ شنگ بیتگیں جار ءِ پد ءَ وائس فار بلوچ مسنگ پرسنز ءِ جوائنٹ سیکریٹری ءِ جاہ ءِ ھالیگ بیگ بیتگ چریشی ءَ چار ءُ گیچنی ءَ پد سمی بلوچ جوائنٹ سیکریٹری ءُ مکران ءِ واستا سیما بلوچ کوارڈینٹیر گچین کتگ اَنت –

وائس فار بلوچ مسنگ پرسنز گوستگیں یک دھکے ءَ گیش اِنت کہ بلوچستان ءَ زورانسری آوار جنیانی ھلاپ ءَ پرکار اِنت – نصر اللہ بلوچ گل ءِ سروک اِنت ءُ ماما قدیر بلوچ کسان کمک سرکماش اِنت-

وی بی پی ایم ءِ دگہ اگدودارانی بارو ءَ جست کنگ ءَ گل ءِ سروک ءِ گون ءَ ٹی بی پی ءَ جست کتگ ءُ آئی ءَ پسھی ءَ گُشتگ کہ گوست ءَ گل ءِ دراھیں اگدودار لس بیتگ اَنت بلے گل ءِ اگدوداراں زورانسری آوارجنی ءُ دگہ جیڑھانی سر ءَ ھمے شور ءُ سِلاہ کرتگ کہ گوست ءِ اگدودارانی منگ ءِ اشکنگ ءَ ناماں پدر کن کن ایں –

جوائنٹ سیکریٹری ءِ واستا گچین بیتگیں سمی بلوچ گوستگیں بازیں سالاں وتی پت ڈاکٹر دین مھمد بلوچ ءِ یل کنگ ءِ واستا جد ءُ جھد کنگ ءَ اِنت – اے وھداں آئی ءَ وی بی پی ایم ءِ ھمراھی ءَ شال داں کراچی ءُ کراچی داں اسلام ءَ پند ءَ روانک بر اِتگ –

سیما بلوچ بیگواھیں شبیر بلوچ ءِ گوھار اِنت کہ شبیر بلوچ بی ایس او آزاد ءِ رھشونے کہ آ آوار جنگ ءُ بیگواہ کنگ بیتگ –

نیشنل ڈیموکریٹک پاٹی ءِ جارکش ءَ نواب اکبر ھان بگٹی ءِ شھیدی ءِ پانزدھمی سالگشت ءِ درگت ءَ شنگ کرتگیں درشانی ءَ گُشتگ کہ کماشیں بلوچ رھشون نواب اکبر ھان بگٹی ءِ گوں ھمراھاں ھور شھیدی ءِ وئیل بلوچ راجدپتر ءَ لھتے مزنیں وئیلاں چہ یک ھنچیں درناکیں وئیلے نا ایوک ءَ بس لھتے وھداں برجاہ بیت بلکیں اے ٹپ ھچ بر کوھن نہ بیت اِنت –

جارکش ءَ دیمتر ءَ گُشتگ کہ بلوچ راج ءِ اندر ءَ وھدیکہ راجی پجار ءُ سرزمین ءِ سر ءَ اُرش بیتگ گڑا کجام نا کجام مردم ءَ وتی جان ءُ ساہ چَکاس اِتگ اَنت ءُ راجی زرمبشت زندگ کتگ ھمے رنگ ءَ نواب اکبر ھان بگٹی ءَ ھم انیگیں بلوچ راجی زرمبشت وتی ھوناں گوں آپ داتگ ءُ ھروھدی ءَ نمیران بیتگ –

آئی ءَ دیمتر ءَ گُشتگ کہ نواب بگٹی ءِ شھیدی ءَ راجی زرمبشت ھلاس نہ بیتگ بلکیں اے رژنائیں چراگ رژناہ بیان بیتگ ءُ نوکیں پدریچ ءَ سر بیتگ ءُ آئی ءَ شھید ءِ ھوناں گوں وتی ھُنڈال جتگ اَنت نِی یک درچکے ءِ دروشم ءَ سبزگ ءَ اِنت –

جارکش ءَ وتی درشان ءِ گڈسر ءَ گُشتگ کہ نواب اکبر ھان بگٹی ءِ شھیدی ءَ دروت ندر اِنت ءُ بیست ءُ شش اگست ءَ شال ءِ پریس کلب ءَ یک آئی ءِ ستاشانی ءَ یک نیادے برجم دارگ بیت اِنت چریشی ءَ بلوچ سیاسی مھلوک، بکوچ دانشور ءُ نبشتہ کار ءُ دگہ مردم تران کن اَنت –

نبشتانک: راج ءِ دِل ءَ زِر ءِ زندگیں ورنا

نبشتہ کار: گنی ھیات

دی بلوچستان پوسٹ

سرانی سربلند بگندے ترا ورنائیں زند ءِ وشتریں ساھتانی پُرلِزتیں نود شَنزیں جمبرانی ءُ مسکیں زمین ءُ سرُمگیں ھاک ءِ سر ءِ گَردگ ءُ سواد ءُ شادمانی کنگ ءُ سُھب ءِ سرگوات ءِ لھمیں کوش ءِ شیکگ گوں سنگتانی مجلس ءَ دیوان ءُ کَندگ ءُ ٹھکانی دِیگ ءُ مادر ءِ کُٹ ءِ وپسگ ءُ گوھارانی دِل ءِ ارمانی زندگ بوْگ ءَ چہ ترا وتی نمیرانیں زندگ بوگ ءُ راج ءِ دِل ءَ رُژنائین ءُ بُرزیں ھَسار ءُ کمانداری ءُ راج ءِ شُناس دوستر بوت۔

بہ گندے من اِد ءَ ھم رَد بہ بہ آں کہ منی کرد انچوک نہ اِنت کہ من وتی لیکھاں تئی شکساتگین ءُ بلاھیں کردانی ھُدابندیں کُنگریں ورنایانی بارو ءَ درشان کُتگیں بہ کن آں، بلے من دِل ءَ جزم آں کہ تو گُڈی دیگر ءِ وھد ءَ وتی چمّ شانک داتگ اَنت تیاب ءِ لمب ءَ تو اے بزگیں دریاوردانی بزگی مار اِتگ کہ مئے راج گوں اے زِر ءَ چوں بزگ ءُ وار انت ، ھالانکہ اے زِر ءِ دریاورد گنجانی واجہ اِنت بلے زِر ءِ وتی واجھانی مستری ءَ درامدیں مھلوکے کنگ ءَ اِنت۔

گندے ترا اے ساھت ءَ سک بَد اتکگ کہ زمین وتی زِر وتی بلے زِر ءُ زمین ءِ واجہ گُلامیں زند ءِ ھُدابندیں زِر ءِ گُلامیں دریاورد شکار ءَ مہ کن کنگ بوگ ءَ اِنت تو اے ساھت ءَ چارگ ءَ بوتگ ئے دریاورد چہ شکار ءَ واتر اتکگ آئی ءِ دیم ءَ باروٹی سپاھیگ اوشتوک بوتگ اَنت چہ آئی ءَ پجار کاڈ ءِ لوٹ اِش کُتگ کہ وتی پجار کاڈ ءِ نمبر ءُ نام ءَ نبشتہ کن ءُ نوں ما ترا موکل دئیں گِس ءِ رَوگ ءِ بِلے اے ساھت ءَ ھم تئی زَھرگ گیشتر پاد اتکگ کہ وھد ءِ زوراک ءُ زَالمیں باروٹی ءَ مئے راج ءُ زمین ءِ ءُ زِر ءِ سر ءَ کھرمانی سازگ ءَ اَنت ءُ مئے راج ءِ گْوں گُلامی ءِ سانکلاں بندیگ کُتگ ھنچو مروچی اے دریاورد منی چمّانی دیم ءَ اوشتارینتگ اَنت اِش ءُ آیانی جند ءِ زمین ءِ سر ءَ آیانی شناس کنگ بوْگ ءَ اِنت ۔

مزنیں زِر ءِ نیمگ ءَ الّم تو چم شانک داتگ اَنت کہ درامدیں باروٹیانی مزن مزنیں آپیگراباں کہ ازاب ءُ بزگیں گُلامیں دریاوردانی شکار جاہ اِش گپتگ ءُ بگندے اے وھد ءَ تئی چمّ ارسیگ بوتگ اَنت بلے تو یکین ءُ دلجم بوتگ ئے کہ اے شیپگپتگیں مرواردیں ارسانی پشدر ءَ ڈکال ءِ ایرمُرتگیں امیتانی گواڈگ اّلم ءَ کھچراں پہ وڑیں سبھین اِیت-

ھمے گُڈی ساھت ءَ زِر ءِ نمبیں گوات ءِ کَشگ ءُ تئی نرم ءُ نازُرکیں مودانی سُرگ، دیگر ءِ روچ ءِ زردی ءِ مانشانگ پروشتگیں یکدارانی ندارگ، گُلامیں راج ءِ درتپُچیں گونڈلانی بچکند، کماش ءُ پیر مردانی دست ءِ ھسا، ورنایانی گوازی ءُ ٹھکانی توار ءُ تئی گوشاں کپتگ اَنت ءُ اے روچی سرجمیں ندارگ تئی دیم ءَ وتگند ءِ مزنیں پردگ گوم ءَ میلانک بوتگ اَنت ۔

بلے اشی ءَ من ھم دلجم آں کہ زِر ءِ دپ ءِ نندگ ءَ ساری تو اے ماراتگ کہ مئے زِر مدام پُرسیگ ءُ ٹپیگ اِنت پہ وتی تنگوئیں بچّانی ءُ نوکیں باندات ءِ ھاتر ءَ ھمے زِر کہ کرنی ءَ پیسر اولی ھمّل ءَ وتی ھون رِتکگ اَنت ءُ ھمے زِر کہ دو سال ءَ ساری دومی ھمّل ءَ گوں سنگتاں وتی تالکاریں ھونان زِر ءِ سبز ءُ سنج بستگیں آپ ءَ سُھرچکیں ھوناں گوں تلام کُتگ انت، زندگیں ورنا تو گوں بچکندگاں اشی ءَ دلجم بوتگ ئے کہ مروچی منی تالکاریں ھون ھم زِر ءِ چولانی ھمراھی ءَ تلام بنت ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔