TBP Balochi

وھدیکہ گس ءِ درا چم کپ اَنت آئی ءِ دروازگاں ھم گوشگ ئیگ ءَ وتی توارانی تہ ءَ کمی آورتگ ھمک آیوکیں در ءَ ھمے ودار اِنت بہ گندے منی زھگ بیگواھیں زھگ اِنت اے ائید ءُ وشی پِر گوز اَنت بلے ما چوشیں وشیاں زبھریں اے گپ بیگواھیں کھولانیگ اِت اَنت کہ ھمک ائیداں بلوچستان ءِ بنجاھی شھر شال ءِ پریس کلب ءِ دیم ءَ زھرشانی کن اَنت –

زھرشانی کنوکانی گوشگ اِنت کہ اگاں مارا مسلمان ءُ انسان لیکہ ءِ گڑا مارا ھم وتی وشی ءُ ھکانی بروبری ءَ بھر ھست اِنت –

مروچی ائید ءِ روچ ءَ بلوچستان ءِ بنجاھی شھر شال ءَ بیگواھیں مردمانی کھولانی نیمگ ءَ زھرشانی کنگ بیتگ،زھرشانی ءَ وائس فار بلوچ مسنگ پرسنز ءِ کسان کمک سرکماش ماما قدیر بلوچ، بلوچ نودربر رھشون ڈاکٹر مھرنگ بلوچ، ڈاکٹر دین مھمد ءِ براتزتک ءُ جھانزیب بلوچ ءِ مات ءَ ھوار بازین مردمانی کھول ھوار بیتگ اَنت –

زھرشانی ءَ بلوچ نودربر گل بی ایس او ءِ رھشوناں ھم بھر زرتگ ءُ تران کرتگ اسرار بلوچ ءِ گوشگ اَت کہ بلوچستان ءَ اے بازیں زھرشاں بلوچانی سر ءَ زُلم ءُ زورکیانی کوہ دور دیگ بیتگ اَنت بلوچانی سر ءَ بیوکیں زُلمانی سر ءَ پرچا بے تواری؟-

آئی ءَ گوشت کہ فلسطین، کشمیر ءُ ایندگہ ڈیھانی سر ءَ بیوکیں زلمانی ھلاپ ءَ توار چِست کنگ بیت اِنت بلے بلوچستان ءَ اے ھپتاد سالاں گیش برجاھیں زُلمانی ھلاپ ءَ پرچا مردم بے توار اَنت –

آئی ءَ گوشت کہ فلسطین مردماں کُشگ اِنت ءُ آیانی لاشاں کھولانی گور ءَ رسینگ اِنت بلے پاکستان وت ءَ اسلامی ڈیھ ءِ گوش ایت مئے مردماں بیگواہ کنت گار کنت، نانکہ مارا ھال دنت نانکہ مئے لاشاں مارا دنت –

آئی ءَ گوشت پاکستان ءَ وت جوڑ کرتگیں آمیدگس ھست اگاں آ اے آمیدگسانی سر ءَ بیسہ کت نہ کنت گڑا باید اشانی دپ ءَ کُبل نہ جنت ءُ بند اش بہ کنت،آئی ءَ گوشت مارا بہ کُش ایت بلے مئے لاشاں بہ دنت ءُ ما ھچبر دگانی سر ءَ زھرشانی نہ کن ایں –

بلوچستان ءَ گار ءُ بیگواھیں مردمانی زھرشانی ھمک سالانی ائیداں برجاہ اَنت زھرشانی کنوکانی لوٹ اِنت کہ اے اسلامی ائید ءُ مسلمانانی وشی ءِ روچ اِنت بلے مئے اے روچ دگانی سر ءَ پریس کلبانی دیم ءَ گوزگ ءَ اَنت –

ھمے رنگ ءَ سندھ ءِ بنجاھی شھر کراچی ءَ ھم سندھی بیگواھیں مردمانی نیمگ ءَ وائس فار آف سندھ ءِ نیمگ ءَ زھرشانی برجاہ اِنت –

نبشتانک: من درستیں وداریگیں مات ءُ گوھارانی دیم ءَ شرمندگاں

نبشتہ کار : جابر مُراد

دی بلوچستان پوسٹ

مرچی تاریک 13 مئی 2021 اِنت مرچی کسانیں ائیدے روچ اِنت، من سُھب سر ءَ واب ءَ کہ پادتکاں ڈارک گوانکو چِست کُت کہ مات ءَ گوانکے کن آں ءُ ائید مُبارکی ءِ کن آں گوں، بلے چوش نہ بیت کہ نمبر ءَ ڈائل بہ کن آں منی ھمکار ءَ توار دات بیا روئیں کارجاہ ءِ سر ءَ من ءُ تو 20 منٹ ءَ لیٹ اِنت مرچی ائید اِنت بلکیں ( پورمین ٹنڈیل ) جاک مہ کنت من گوانکو جلدی جلدی کیسگ ءَ کُت راہ ءُ رواجُکی چمّے شوشت دیم پہ کارے نیمگ ءَ کار جاہ ءَ کہ شُت ایں چاریں پورمین مارا دگہ نگاہ ءَ چارگ ءَ اِنت، چار ایت گھڑی ءَ ءُ مارا چار ایت بلے دگہ گپّی نہ کُت کہ مرچی ائید اَت ، ما جلدی جلدی کار بندات کُت داں سَے گھنٹہ ءِ اشتاپ کار ءِ سبب ءَ وتی اے سئیں گھنٹایانی کار ھلاس کُت اَنت ءُ اتکیں ناشتہ ءِ کنگ ءَ چوش کہ ناشتہ وت بنائینگی اَت ءُ مرچی منی ھمکارے نمبر اَت بلے من چار اِت مرچی ائید اِنت بیت کنت آ وتی لوگ ءَ پون کَنت چُکانی گوم ءَ گپ کنت گڑا من گوشت تو بہ نیند ناشتہ من وت جوڑ کن آں آئی پہ وشّی گوشت شریں مھربانی بیت تئی-

من پہ اشتاپی ناشتہ جوڑ کنگ ءَ اِتاں ءُ دل ءَ جیڑگ ءَ اِتاں کہ مرچی ملک ءَ ائید اِنت مئے دُرستیں سنگتاں نوکیں گُد گور ءَ کُتگ اے وھد ءَ کِسٹُم ءِ مسیت ءَ نمازے کُتگ مردماں گوں ائید مبارکی کنگ ءَ اَنت مرچی دُرستیں سنگت یک دومیگ ءَ بگلہ کنگ ءَ اَنت وتی ھکّاں چہ دُرستاں پھلی لوٹگ ءَ اَنت، ھمے ھیالانی تہ اِتاں کہ ھیال اتک مات ءَ گوانک کنگی اِنت ائید ءُ مُبارکی کنگی اِنت پرچا کہ من زانتگ اَت مات سُھبیگینیں منی گوانک ءِ ودار ءَ کنگ ءَ اِنت آ باریں وتی دل ءَ چی چی جیڑگ ءَ اِنت ءُ چینچو پریشانی ءُ گماں گوں دُچار اِنت کہ مرچی ائید انت منی چُک پرچا پون کنگ ءَ نہ اِنت، چوش بیت ائیدے روچ ءَ ھم کار کنگ ءَ اِنت من زاناں منی چُک ءَ تکلیپی ءِ ھست کہ پون کنگ ءَ نہ اِنت اللہ من ءَ بزیرات منی چُک سک تکلیپ اِنت درملک ءَ آئی ھک ءُ اُگبالانی زیروک ما لوگ ءِ مردم اِنت آ مئے ھمے شُمیں لاپ ءِ وجھ ءَ درملک اِنت مات وتی دل ءَ منی تکلیپی ءِ وجھ ءَ چہ وت ءَ بدوا دیگ ءَ اَت من گوانکو چہ کیسگ ءَ کش اِت کہ مات ءَ گوانک کن آں بلے سنگتانی بازیں کلوہ اتکگ اِت اَنت لیٹ کہ پچ کُت گوانکو ھینگ بیت ، ھِنگ بیگ ءِ سبب ءَ دمان ءَ پد ءَ شر بیت ءُ وتسرا برے یک ایپ ئِے تہ ءَ شُت برے پیس بُک ءُ برے وٹساپ اے سنگتانی مھر اِتاں کہ وٹساپ ءَ ھمینچو کلوہ اَتکگ اَت ءُ دگہ گیشتر کلوہ آیگ ءَ اَت کہ سنگتانی مھر پہ من باز ءُ گوانکو ءِ مھر گوں من کم بیگ ءَ اَت من جلدی جلدی ڈیٹا بند کُت گڑا گُڈسر ءَ پیس بُک پچ بیت، چوش نہ بیت کہ من مات ءَ پون بہ کن آں چاراں بلوچ مات ئِے اکس زاھر اِنت گریوگ ءَ اِنت من اکس پجا آرت کہ زاکر مجید ءِ مات اَت آئی ءِ کُٹ ءَ اکسے ایر اَت آ ھما اکس ءَ چارگ ءَ اَت ءُ گریوگ ءَ اَت اکس زاکر مجید اَت کہ 12 سال اِنت گار ءُ بیگواہ اِنت، زاکر مجیدے مات ءِ اکس گُشے گپ جنگ ءَ اَت کسہ آرگ ءَ اَت آ یک ھنچیں دردے بیان کنگ ءَ اَت کہ آ دردے کسہ گوں لبزانی تہ ءَ بیان کنگ نہ بیت، من جیڑگ ءَ لگ اِتاں کہ من ءَ چار سال اِنت کہ درملک ءَ آں کارایاں وتی کھول ءَ لاپ دیگ ءَ آں ءُ منی کھول اے زانت کہ اے ملک ھنچوش امن اَنت کہ اد ءَ کس ءَ اے مجال نہ اِنت کہ ترا لٹ بہ جنت ترا دگہ نُکسانے بہ دنت بلے انگت من گوانک کن آں منی مکّھیں مات وت ءَ دوا دیگ ءَ لگ ات گڑا زاکر مجید ءُ آدگہ گار ءُ بیگواھیں ماتانی دل ءَ چی گوز ایت آیاں جابر تو اے چیز ءَ مار اِت کن ئے ،؟ آیاں تئی مات ءِ تکلیپی چہ زاکر مجید ءُ آدگہ گار ءُ بیگواھیں ماتانی تکیپاں چہ گیشتِر اَنت ،؟ من کمو وتی مات ءِ تکلیپی ءُ پریشانیاں ھما ماتانی جاگھ ءَ کنگ ءَ اِتاں ءُ آھانی درداں مارگ ءَ اِتاں بلے منی دیم ءَ بس اے گپ اوشتگ اَت کہ دنیائے مستریں دروگ کہ من تئی تکلپی ءُ گماں گوں ھواراں من ءَ پھل کن اِت من شمے دُرستیں ماتانی تکلیپانی دیم ءَ شرمندگاں ءُ پھل کن اما جان کہ من پہ ترا شریں چُکّے سابت بیت کنگ ءَ نہ آں ءُ ترا شریں آرامیں زندے بکشات کنگ ءَ نہ آں من شمے کُلانی دیم ءَ شرمندگاں اگاں بیت کنت گڑا من ءَ کُل پھل کن اِت، منی ھرس من ءَ مرّینگ ءَ نہ اِتاں سنگت گوانک کنگ ءَ اَت تو زاناں کول کُتگ کہ مرچی ائیدے روچ ءَ مارا پورمین کرا بے ازّت کنائینگے جلدی ناشتہ ءَ بیار روئیں پد ءَ کار ءَ –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

کوسٹ گارڈ بنجل ءِ مزنیں گیٹ ءِ دپ ءَ اوشتوکیں کارمندانی سر ءَ دز بمبے چگل داتگ – جئیند بلوچ

سربوتگیں ھالانی رِد ءَ بلوچستان ءِ کاروباری شھر ھب ءَ برجاھیں پاکستانی کوسٹ گارڈ ءِ بنجل ءِ سر ءَ ناشناسیں مردماں دز بمب اُرشے کتگ – اُرش ءَ پاکستانی پوج ءَ جانی تاوان رس اتگ – اُرشکار درآیگ ءُ روگ ءَ سوبمند بوتگ انت –

بلوچ آجوئی لوٹوکیں سلاہ بندیں بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ اے ارش ءِ زمّہ واری منّ اِتگ ءُ گوشتگ کہ مئے سرمچاراں ھب ءِ شھر ءَ برجاھیں زورگیریں پاکستانی کوسٹ گارڈز بنجل ءِ مزنیں گیٹ ءِ پھازداریں کارمند دز بمبے چگل داتگ-

جارکش ءَ گوشتگ کہ اُرش ءِ آسر ءَ زورگیریں پوج ءِ دو کارمند ٹپی بوتگ اَنت کہ آھانی تہ ءَ یکے سک باز زدگ بوتگ –

روکپتی بلوچستان ءَ ھلال کمیٹی دزاپ “زاھدان ” ءِ نیمگ ءَ شنگ بیتگیں جار ءَ باندا بزاں پشمبے ءَ ائید ءِ جار پِرینگ بیتگ –

دارالعلوم زاھدان ءِ گوشگ اِنت روکپتی بلوچستان ءِ بازیں جاھاں نوک گندگ بیتگ چریشی ءَ دراھیں چم دیتگیں مردمانی گندگ ءَ پد روکپتی بلوچستان ءَ پشمبے ءِ روچ ءَ ائید کنگ بیت اِنت –

ھلال کمیٹی ءَ مھلوک ءَ گوں دزبندی کرتگ ءُ گوشتگ کہ ائید ءِ روچ ءَ جھانی وبا ءِ ھلاس ءِ واستا یکتائیں ھدا ءِ در ءَ دوا بہ کن اَنت ءُ ائید ءَ نادراھی ءَ ھم وتی پھریز ءَ بہ کن اَنت –

نیکراھی ڈیھاں مروچی سعودی عرب ءَ ھوار، امارات، عمان ءُ ایندگہ ڈیھاں ھم ائید کنگ ءِ جار جتگ اَنت –

نبشتانک: ماں اوگانستان ءَ دْراھینانی زمہ وار: گوں امریکہ ءِ برجاہ داشتگیں کُمک ءَ

نبشتہ کار: ابدلستار بُگٹی

دی بلوچستان پوسٹ

وھدیکہ 1989 ءَ سوت یونین ءَ وتی جنگی لشکر چہ اوگانستان ءَ کشت اَنت گُڑا ھما وھدیگیں سرکار پْروشت ءُ نی یکرندے پد ءَ مرچی ھم ھمے یکیں ھلوت انت کہ اگاں امریکہ ھم وتی لشکر ءَ چہ اوگانستان ءَ سرجمی ءَ بہ کش ایت گُڑا اوگانستان ءِ انیگیں راجمستری سرکار ھم پْروش ایت۔

اگاں ما 1989 تاں 1990 ءِ میان ءَ بچّار ایں گُڑا ما سرپد بَہ ایں کہ چَہ سوت یونین ءِ لشکر روگ ءَ پد ناں ڈاکٹر نجیب اُلہ ءِ سرکار پْروشت ءُ پْروش ءِ آماچ بیتگ نَیکہ چہ اوگانستان ءَ امریکی جنگی لشکر ءِ روگ ءَ انیگیں سرکار پْروش ایت ما بے ھال مہ بَہ ایں کہ ھما وھداں یک بلاھیں باوستے ھم ھست اَت کہ چَہ سوت یونین ءِ روگ ءَ پد ڈاکٹر نجیب اُلہ ءِ سرکار لھتیں روچانی تہ ءَ پْروش ایت بلے ھمے سرکار ءَ وت ءَ یکشل ءَ تاں سَے سال ءَ برجاہ داشت۔ ایشی ءِ دو مستریں سبب ایش اَت اَنت کہ چریشی ءَ ڈاکٹر نجیب ءِ سرکار نہ پْروشتگ اَت۔

اولی بُندری سوب ھمیش اَت وھدیکہ سوت یونین چہ اوگانستان ءَ درآتک ءُ شُت گُڑا بہ گِر 1989 تا 1991 ءَ ھر ماہ ءَ ڈاکٹر نجیب الہ ءِ سرکار ءَ $300 ملین کُمک دیگ ءَ اَت۔ گُڑا تاں دو سال ءَ پہ مجاھدین گل ءِ بیگری ءَ ھمے ھرماھیں کُمک پہ اوگانستان سرکار ءِ بلاھیں مدتے بیتگ اَنت بلے وھدیکہ کہ سوت یونین وت بھر ءُ بانگ ءِ آماچ بوت گُڑا روس ءَ ھما وھدیگیں اوگان سرکار ءِ کُمک کنگ بند کُت ءُ دومی نیمگ ءَ امریکہ ءَ ھم مُجاھدین ءِ جنگی کِمک ءَ بج اِت۔ بے کُمکی ءِ آسر ءَ ڈاکٹر نجیب اُلہ ءَ دزکشّی کُت ءُ کابل ءَ میان اُستمانی گل ایو این او ءِ کارگس ءَ پناہ ئِے زُرت۔ ڈاکٹر نجیب ءِ دزکشّی ءَ پد مجاھدین ءِ باٰزیں سِلاھبدیں گلاں یکدومی ءِ ھلاپ ءَ اُرشاں کنان ءَ کابل تباہ کُت۔ چریشی ءَ اوگانستان السی جنگے(سِول وار) ءَ دُچار کپت۔

بِہ گند ئے سوت یونین گوں ھما وھدی ئیں اوگانستان سرکار ءَ بے منّگ نامھے ءِ آسر ءَ اوگانستان ءَ آتکگ اَت بلے امریکہ گوں راجمانی گل یو این او ءَ منّگ نامہ کُت ءُ میان اُستمانی ناشرکاری ءِ ھلاپ ءَ جنگ ئِے بُنگیج کُتگ پمیشکا باید انت امریکہ یک زمہ واریں مُلکے ءِ وڑے ءَ چہ اوگانستان ءَ وتی جنگی لشکر ءَ بہ کش ایت باید انت امریکہ ھما رَدیِاں دوبر مہ کنت کہ گْوست ءِ سوت یونین ءَ وتی جنگی لشکر چہ اوگانستان ءَ کشت ءُ کُتگ اِت اَنت بزاں وھدیکہ نجیب ءِ سرکار بے کُمک بوت گُڑا سرجمیں اوگانستان دنیا ءِ ھر وڑیں ناشرکاریں گالانی یک ترامگیجی ھنکینے جوڑ بوت، ھاس الکائدہ ءُ دِگہ بازیں گلے انچوشکہ ما مرچی گِندگ ءَ ایں۔ نی اگاں امریکہ ھم اوگانستان ءَ ھما وڑ ءَ یلہ کنگ ءَ انت انچوشکہ 1990 ءَ روس ءَ یلہ کُتگ اَت گُڑا دلجم بِہ بَہ اِت اِے رندی ھم الکائدہ، دائیش، اسلامک موّمنٹ آپ اُزبکستان(آئی ایم یو)، ٹی ٹی ہی ءُ دِگہ بازیں شُمار ءُ کچے ءَ ناشرکاریں گل ماں اوگانستان ءَ وتی جنگی ھنکیناں اڈ کن اَنت ءُ وتی وتگڑیں سسّائی جُنزاں دیم ءَ بر اَنت گُڑا اِے تھنا پہ اوگانستان ءُ اوگان لس مھلوک ءَ اِنّا بلکیں پہ سرجمیں کِرّ ءُ کش ءِ استان، بزاں اوگانستان ءِ ھمساھِگیں مُلک ءُ سرجمیں جھان ءِ مُلکاں یک ٹوھیں تُرس ءُ اندوھے جوڑ بیت پمیشکا من گْوش آں اِے تھنا امریکہ ءِ اِنّا بلکیں سرجمیں دنیا ءِ مُلکانی زمہ واری یے کہ اوگانستان ءِ دِیرین ءُ انیگیں جنگ ءَ توجیلّے ءَ آسر بہ کن اَنت انچوشکہ اوگانستان ءِ ایمنی پہ سرجمی جھان ءِ مُلکاں ایمنی بیت ءُ دنیا ءِ سرجمی ایمنی گوں اوگانستان ءَ ھمگرنچ ءُ وازمندگ اِنت وھدیکہ سَے سال ءَ پیش واجہ زلمے ھلیلزاد ءِ سرکماشی ءَ امریکہ ءَ گوں تالبان ءَ سُھل ءُ تْران بُنگیج کُت گُڑا تالبان ءِ گل ءَ ھر جیڑہ ءِ ھلاسی ءَ تپاک کُت کہ چریشی ءَ امریکہ ءِ سرکار ءَ پائدگ زُرت چی ءَ کہ بُنکی ٹَوک ءُ توار ھمیش اِت انت کہ اوگانستان ءِ سرڈگار امریکہ ءِ ھلاپ ءَ کارمرز نہ بیت گُڑا ما یک سوالے جُست کن آں کہ اگاں تالبان ءُ امریکہ وت ماں وت تپاک اَنت گُڑا یک بُندری منّگ نامھے چی ءَ آسر نہ کن انت؟ گُڑا ناشریں گل تالبان اوگانستان ءِ مُھکمیں سرکار، راجی لشکر ءُ جنگانی کُشت ءُ کوش ءِ دُچارکپگتیں اوگان لس مھلوک ءِ ھون ریچی ءَ چی ءِ کنگ ءَ انت؟ پہ تالبان ءَ امریکہ ءُ نیٹو ءِ بیگری ءَ جھاد زاناں ھرام بیتگ ءُ وتی لس مھلوک ءِ سر ءَ وتکشیں بمب ءُ تراک کنگ جھاد اِنت؟ منی ھیال ءُ لیکہ ءِ رِد ءِ نی تالبان ءَ جھاد ءِ گپ زیب ءُ راستی نہ دنت۔ تالبان اوگانستان ءَ یک رندے پد ءَ اُلسی جنگ ءِ نیمگ ءِ برگ ءِ جُھد ءَ انت بلے ھمے اُلسی جنگ سرجمیں اوگانستان ءَ ھر وڑیں نیکراھی ناشرکاریں گالانی ترامگیجی ھنکینے جوڑ کنت کہ ائی ءِ تاوان ءَ بازیں مُلکے آماچ بیت-

یک رندے پد ءَ گْوش آں باید انت امریکہ ءَ تچکیں جُھد بہ کنت ءُ اوگانستان ءِ جیڑھاں یک دائمی توجیلّے بہ دنت اگاں اِنّا گُڑا اوگانستان یک رندے پد ءِ میان اُستمانی ناشرکاریں گالانی یک آسودگیں پناھگاھے جوڑ بیت۔ انچوشکہ اوگانستان مُدام پہ دگریں راجانی پائدگ ءَ جنگی میدانے اڈ دیگ بیتگ گُڑا ھمے ناشرکاریں گلانی جنگی اندوھانی آماچ تھنا اوگانستان ءِ لس مھلوک بیتگ۔ اوگانستان ءِ بامردیں راجی لشکر ءَ ھمے ناشرکاریں گلانی بیگری ءَ مُدام جنگ کُتگ آیاں پْروش داتگ ءُ اگاں وھدیکہ امریکہ چَہ اوگانستان ءَ بِہ روت گُڑا پد ءَ ھم وتی راجی آجوئی ءُ سرڈگار ءِ پھازگ ءَ بامردیں اوگان راجی لشکر جنگ کنت ءُ یک میان اُستمانی ناشرکاری ءِ ھلاپ ءَ اوگانستان راجی لشکر ءِ کِمک کنگ پہ تیوگیں میان اُستمانی چاگِرد ءَ پائدگے پمیشکا امریکہ ءَ لازُم اوگان راجی لشکر ءِ جنگی کُمک کنگی انت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: تُپنگ ءَ دَور نہ دیاں

نبشتہ کار : شیردل بلوچ

دی بلوچستان پوسٹ

تئی ھیال جیڑگ ءَ پرما اَنت مُدام گیر کائے تئی ترانگاں چہ ساھتے دَر نہ باں ساہ ءِ کپ، تو پہ راج ءِ وتواجھی ءُ گلزمین ءِ واستا ندر بوتگ ئے، وھدے کہ تو ھما روچ ءَ گوں راجی کاروان ءَ ھور بوتگ ئے، ھمے اَھد کرت، پہ زمین ءِ موکگ ءَ وتی ھوناں ریچاں داں ساہ ءِ گُڈی کَشگ ءَ تُپنگ ءَ دور نہ دے آں، تئی اے ھبر دراہ راست بوت اَنت، گوں زور گیریں ڈیھ ءِ دُز ءُ لگوریں لشکر ءَ جنگ ءِ پڑ ءَ مِڑ داتگ ءُ ندر بوت ئے، تئی پُشت پد تئی جُتائی ءَ بژنیگ نہ اَنت، پھر ءُ شان کن اَنت ۔

تو انچیں مکسدے ءِ دیم ءَ کربان بوتگ ئے، آ ٹوھیں لوٹے، راج ءِ آجوئی اِنت، پمشکا درد نہ بیت، واھگ وَ ھمے بوتگ تو داں آجوئی ءِ روچاں جُنز ءِ ھمراہ بوتیں ئے، اے راہ ندر بوگ ءِ راہ اِنت، انچو گوش اَنت، زند مرگ ءِ وامدار اِنت، چوناھا یک روچے گوں نپس گریں ملکموت ءَ دُچار کپگی انت، بَلے!! سرمچنڈ ءِ زند چہ آئی ءِ مرگ ءَ رند بندات بیت، ھرکس ھمے راستی ءِ منوگر اِنت، بلوچ راجدپتر گوں ھوناں نبیسوک اِنت، ندر بوؤکیں بچّانی نامانی لڑ سک مزن اِنت، چہ ھمے ندر بوتگیں بچّاں یکے شھید اسدھسن اُرپ کامریڈ بالاچ آئی آریپیں پِت ءِ نام مھمد ھسن بلوچ، آ تیرتیج آواران ءَ ودی بوتگ ءُ درائیں گُھار ءُ براتانی کستر اَت، گوں وانگ ءَ گیشیں دلگوش ئِے نیست اَت، کمو وانتگ اَت ئِے، گوشگ ءَ دل نہ بوتگ، پرچہ کہ کسترین اَت، درائیں برات ءُ گھارانی دست سر ءَ ئِے ساھگ بیت، گیشتر مھر دیگ بیت، دو ھزار یازدہ ءَ سور ئِے دے اَنت، چار چُک ئِے ھم ھست، سمُل جان ، ھانل جان، دوستین جان ، اَمل جان اَنت، اَمُل جان ءِ چہ ودی بوگ ءَ ساری آئی پِت شھید بیت۔

اے ھمے دَور ءُ باریگ اَت راجی آجوئی ءِ زرمبشت بلوچستان ءِ کُنڈ پہ کُنڈ ءَ چست بوتگ اَت، بزاں، اے دَور دو ھزار ھپت ءُ ھشت اَت، ھرچ بلوچ گوں جُنز ءَ ھمراہ بوگ ءَ واھگدار اَت، اے وھد ءَ راجکاری گوں شَرّیں دروشمے ءَ بوگ اَت، ھرکسی دپ ءَ راجی سروکانی نام اِت اَنت، شھید چیرمین گلام مھمد ،واجہ سبا دشتیاری ءُ دگہ بازیں رھشونانی گُشتانکاں روچ ءُ شپ ھرچ جاہ ءَ شپانک، دھکان ، پوریاگر ،نودربر ءُ زندمان ءِ ھَمُک پڑ ءِ مردم ءَ را گوانکوے گون اَت، مُچی نشتگ اَت گوشدارگ ءَ اِت اَنت، ورنائیں رھشون سنگت شھید رزا جھانگیر ھم آواران ءِ دَمگ ءَ گوں راجکاری ءِ کاراں مُدام گلائیش اَت لوگ پہ لوگ آجوئی ءِ کلوہ ءَ سر کنگ ءَ اَت، گیدی ءِ کجام ھم کُنڈے ءَ لشکر ءَ زوراکی یے بُکتیں سھب ءَ ماں آواران ءِ ھار بازار ءَ روانکے الم دراتکگ ءُ زھرشانی بوتگ، من ءَ یات بیت آواران ءَ ھار بازار ءَ روانکے دَراتکگ اَت، پوج ءَ ھمے روانک ءِ سر ءَ اُرش کرت ءُ سنگت ئِے گپت ءُ لٹ دات اَنت، رند ءَ دْرائیں یل دیگ بوت اَنت، گون ھمے سنگتانی رِد ءَ ھم شھید کامریڈ اسد ھسن ھمراہ اَت، بہ گند ئے آ چد ءُ ساری ھم دوزواہ ءُ باسکے بوتگ ھر وھد ءَ دیستگ گوں آجوئی ءِ جُنز ءِ کاراں دست گلائیش اَت وھدے ءَ رند من دیست ،راجی آجوئی ءِ گل BNM ءِ باسکے اَت، چد ءُ رند بزان دوھزار یازدہ ءِ وھد ءَ من وت BNM آواران ءِ دمگ ءِ کُمک کارمستر اِتاں، انگت چد ءُ ساری شھید اُستاد الی جان ھم ایشانی بُنزہ دیوانے کرتگ اَت، ھمے دیوان ءَ اے پیسلہ ئِے کُت جَنک ءُ بَچک بُنزہ ءَ ھور بہ بنت، مارا اے پرک ھلاس کنگ لوٹ ایت، رند ءَ بُنزھانی گچینکاریاں کامریڈیں گُھار، براتانی ھم رِد ءَ تنزیم کاری ءَ ھور بھر زُرتگ ۔

دوھزار دوزدہ ءَ ماھتاک سنگر ءَ بنشتھے وانتاں، ھمے نبشتہ اَت چُک ءِ مھر پِت ءُ ماتاں لاچار کنت، جُھد ءِ منوگر بہ بنت، چہ پرزند ءَ پہ وس گستا بوت نہ بیت، بَلے! مرچی زورگیریں ڈیھ ءَ بلوچ پرزنداں چہ پت ءُ ماتاں کجام دروشم بیت، زندان بہ بیت، دَر پہ دَری یا شھیدی ءِ دروشم ءَ جتا کُرتگ اَنت، بلوچ ءِ مکھیں مات پہ وتی زندانیگیں بچانی گندگ ءَ تلوسگ ءَ اَنت، ھو مئے گلزمین ءِ سر ءَ ناشریں ڈیھ وَ ھُدائی کنگ ءَ اِنت، بلوچ راج ءِ زند ءِ بکشایگ ءُ زند ءِ پچگرک ءِ بے جُستیں ھاکم وت ءَ لیکگ ءَ اِنت ۔

“کامریڈ اسد ھسن ءِ کھول ءِ مردمانی ھچبر چُشیں گپّے منی گوشاں ھم نہ اُشکتگ، وتی چُک ءِ راجی جُنز ءَ گوں بوگ ءَ نا وش بوتگ اَنت، اَلم یک چیزے من دیستگ کھول ءِ مردمانی تہ ءَ پِت ءُ براتاں ھر روچ ماں استان ءِ پوج ءِ بُنجل ءَ لوٹائینگ بوتگ اَنت، پوج ءِ سروکاں گوشتگ وتی زھگ ءَ را بُگش اِت، بیا تُپنگ ءَ دَور بِہ دے، مدام براتان ئِے ھمے گوشتگ،” آ مئے ھبر ءَ نَئیت اِنت، گڑا براتاں بے ھال نہ بوتگ، ھر روچ ماں استان ءِ پوج ءِ بنجل ءَ آواران ءَ لوٹائینگ ءُ بیھار دیگ بوتگ اَنت، یک براتے دوبر ءَ چست کنگ زنداں کنگ ءُ ازیت دیگ بوت ایدگہ لاچار بوتگ اَنت، چہ وتی ھنکین ءَ لڈ اتگ ءُ کدی جاھے ءَ وتی زند ءِ روچ اِش تیلانک داتگ اَنت-

شھیداسد ھسن ھر وھد ءَ نشت ءَ ھمے تران ئِے کُرتگ، اِستان ءِ پوجیگ پھک ءَ گنوک اَنت، گوشگ ءَ اَنت بیا تُپنگ ءَ دَور دے ءُ لگور بو، من ھچبر نہ رواں ءُ وتی دست ءِ تُپنگ ءَ دَور نہ دیاں ءُ لگور نہ باں، وت ھم جاھے ءَ گوش اِیت کسانیں تامرے شنگ اَت، گُشگ ءَ اَت، ھرکس بزانت ھر کسی کار بزان اَنت من داں ساہ ءِ گڈی کشگ ءَ جُھد ءِ ھمراہ آں، ءُ تُپنگ ءَ دَور نہ دیاں، ھمے تران آئی ءِ باتن ءِ تہ ءَ بوتگ ءُ جھان ءِ دیم ءَ پدر ئِِے کرتگ، تُپنگ زند ءِ گڈی ھمراہ اَت، داں ساہ ءِ گڈی کَشگ ءَ ئِے گون اَت ۔

آئی ءَ گوں راجی جُنز ءِ ھمراھداری ءَ راجی پندے بُر اتگ، دو ھزار بیست ءَ ماں کولواہ جت ءَ سپرے ءَ دَر کیت گوں سنگتانی ھمرائی ءَ لگوریں پوج راہ ءَ اِش بند اِیت ءُ وھدیکہ آ کا اَنت، ڈیک دے اَنت، جنگ مچ اِیت” اسد ھسن ءُ ” راشد رمزان ءِ ھمرائی ءَ رمزان شریپ ءِ ھم گُڈی روچاں گڈی شپ ءِ بَارت ءَ نُھ ءِ بیگاہ ءَ وتی دائمی جاہ ءَ رپتگ اَنت، بیست ءُ سئے سُچکان دو ھزار بیست ءَ آوانی اولی سالروچ بیت راجی کُنگر داں ساہ ءِ گڈی کَشگ ءَ جنگ ءَ دے اَنت ءُ شھید بنت ـ

شھید اسد ھسن اُرپ کامریڈ بالاچ ءُ شھید راشد رمزان اُرپ سوبین بلوچ یکے ماں آواران تیرتیج ءَ ءُ دومی ماں کولواہ چمبر ءِ گڈی وابجاھاں سیر واب اَنت شھید اسد ھسن اُرپ کامریڈبالاچ ءُ شھید راشدجان اُرپ سوبین جان، بلوچ سرڈگار ءِ سُچکان ءِ شھیداں ھور درائیں شھیداں سھریں سلام پیش کناں
آجوئی ءِ جُنز زندگ بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ائیدانی وشی بلوچستان ءَ زھرشانی گندگ بنت ھمک دراں دراتکگیں چَم ء ھرسانی تہ ءَ گار اِنت ھرکس وتی وشیانی شوھاز ءَ درکپ ایت بلے بلوچستان ءَ بندیگیں مردمانی کھول ھرسانی ھاراں دگانی سر ءَ درپہ دری ءَ گندگ ءَ بنت کہ آیانی تہ ءَ اے وھد ءَ گیشتریں مردم زالبول اَنت –

گوستگیں روچ ءَ بلوچستان ءَ گار ءُ بیگوابیں مردمانی پانکجنوکیں گل وائس فار بلوچ سروک نصر اللہ بلوچ ءَ وتی درشانی ءَ گوشتگ یل بیوکیں مردمانی یل بیگ وشی یے ءُ ما اشی ءَ سر ءأ چماں داریں ءُ چریشی ءَ ما سرکار ءِ منّت ءَ گریں بلے سرکار ءَ لوٹ ایت کہ بازیں سالاں بیگواھیں مردماں ھم یلہ بہ کنت –

نصر اللہ بلوچ ءَ گوشت کہ دوھزار ءُ نوزدہ ءَ اُستانی سرکار مئے گون ءَ گند ءُ نند ءَ بیگواھیں مردمانی جیڑہ ءِ گشینگ ءَ بازیں سالاں بندیگیں مردمانی یل کنگ ءِ مسام اش کرتگ بلے داں انیگ ءَ بازیں وھدانی پت گوزگ ءَ ابید بازیں سالاں بندیگیں مردمانی کیسانی سر ءَ چار ءُ گداری نہ بیتگ –

نصر اللہ بلوچ ءَ گوشت کہ ھمے وڑ ءَ سر وزیر ءَ مئے گند ءُ نند بیتگ بیگواھیں مردمانی جیڑہ ءُ بازیں سالاھاں گاریں مردمانی یلہ کنائینگ ءَ گیش کرد ءِ پیلو کنگ ءِ دزبندی کرتگ ءُ سروزیر ءَ مارا سدکی داتگ ءُ گوشتگ کہ بیگواھیں مردمانی جیڑہ زوت ھلاس کنگ بیت اِنت ءُ سرکار گاریں مردماں یل کنت یا آیانی بارہ ءَ جیڑھاں گوش ایت بلے داں انیگ ءَ مارا ھچ گندگ ءَ آیگ ءَ نہ اِنت ءُ نانکہ مارا اشانی بارہ ءَ سرپدی رسگ ءَ اِنت چریشی ءِ سوب ءَ بازیں مردمانی کھول زھنی دردناکیں جیڑھانی آماچ اَنت –

آئی ءَ گوشت کہ سرکار ءِ دست ءَ مئے داتگیں لسٹانی تہ ءَ علی بنگلزئی، ڈاکٹر دین مھمد بلوچ، زاکر مجید، ڈاکٹر اکبر مری، ایڈوکیٹ منیر، زاھد بلوچ، شبیر بلوچ، عبدالمالک سرپرہ، ظفر بنگلزئی، شمس بلوچ، سیداھمد شاھوانی، منظفر شاھوانی، رمضان بلوچ، گڈو بگٹی، سفر خان مری، ماسٹر عبدالرحمان مری ءُ توتک ءَ بازیں سالاھاں بندیگیں قلندرانی ٹک ءِ مردماں ھوار دگہ سدانی کچ ءَ بیگواھیں مردم ھوار اَنت –

نصر اللہ بلوچ ءَ سرکار ءُ ڈیھی ادارھاں گوں دزبندی کرتگ ءُ گوشتگ کہ اے ائید ءَ بازیں سالاں بیگواھیں مردمانی یل کنگ ءَ سرکار المی بہ کنت ءُ بزگیں کھولانی وداراں اسر بہ کنت –

جھانی نادراھی “کرونا وائرس ” ءَ بلوچستان ءَ دو کسانی ساہ گپتگ اَنت، بلوچستان ءَ کرونا نادراھی ءَ بیران بیتگیں مردمانی کچ دو سد ءُ پنجاہ ءُ پنچ ءَ سر بیتگ اَنت –

بلوچستان ءِ جانسلامتی ءِ گر ءُ دار کنوکانی رد ءَ سَے شمبے ءَ بلوچستان ءَ یک سد ءُ بیست مردمانی تہ ءَ نادراھی پدر بیتگ –

جانسلامتی ءِ رد ءَ بلوچستان ءَ بیست ءُ سَے ھزار ءُ شش سد ءُ پنجاہ ءُ مردمانی ٹیسٹ داں انیگ ءَ نادراھی ءَ پدر بیتگ اَنت ءُ بیست ءُ دو ھزار ءُ دوازدہ مردم وش بیتگ اَنت –

ھمے وڑ ءَ ویکسینیشن ءِ کم بیگ ءَ ہیومین رائٹس آف پاکستان ءَ گوشتگ کہ اُستان ءَ ٹیسٹانی کمی اِنت ءُ اُستان ءِ دگہ جاھاں ٹیسٹ نہ بوگ ءِ بروری ءَ اَنت –

آئی ءِ گوشگ اِنت نادراھی ءِ ٹیست بس بنجاھی شھر شال ءَ کم ءُ کساسی بیگ ءَ اَنت آ دگہ جاھاں نا بروبری ءِ کچ ءَ اِنت-

آئی ءِ گوشگ اِنت اُستان ءِ آ دگہ شھر ٹیسٹاں زبھر اَنت ءُ اے جاورھالاں اے نادراھی ءِ رکگ ءَ ویکسینشن ءِ کمی اِنت کہ تنی وھدی اُستان ءَ بس سںی ءُ چار ھزار مردماں ویکسن جنگ بیتگ –

ہیومین رائٹس ءَ واکداں گوں لوٹ کرتگ ءُ گوشتگ کہ اے نادراھی ءِ سر ءَ الکاپ ءَ دلگوشی بہ دے اَنت مھلوک سرکار ءِ گوشتگیں گپانی سر ءَ بہ بنت اگاں گڑا ھندوستان ءِ جاورھال ڈیھ ءَ اتک کن اَنت –

ائید ءِ روچ وشی ءُ بچکنداں گوں وت زور ایت ایر رؤت، ھمود ءَ کہ ھما راج کہ ایردستی ءِ زمزیلاں گوں بندوک انت آھانی ھاتر ءَ ائید ءِ وشی پہ دردیگ انت – ماما قدیر بلوچ

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ سَے سد ءُ یانزدہ روچ سرجم بوتگ – بلوچستان نیشنل پاٹی ءِ بنجاھی پتر ءِ باسک ءُ ایم این اے ہاشم نوتیزئی ءَ بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ – ھمے وھد ءَ آھانی گوشگ ات کہ ماما قدیر ءَ مئے گھار ءُ دگہ مردمانی ھمراھی ءَ بیگواھیں بلوچانی ھاتر ءَ شاھگانیں جھدے کتگ ما آئی ءِ جھدے ستاشانی ءَ کنیں –

ہاشم نوتیزئی ءَ دیمتر ءَ گوشت کہ دنیا ءِ تہ ءَ چشیں ھچ وڑیں کانودے نیست کہ ریاست وتی مردماں آوار بہ جنت ءُ بیگواہ بہ کنت ءُ بازیں سالاں پد آھاں یلا بہ کنت یا آھانی جون در بئیت – اے سک باز گرانتر ءُ گمزدگیں جاورھال انت –

آئی ءِ گوشگ ات کہ بلوچستان نیشنل پاٹی ءَ اولی روچ ءَ چہ بنجاھی اسمبلی ءِ تہ ءَ بیگواھیں مردمانی لڑ دیم ءَ آؤرتگ – ما گوشگ لوٹیں کہ ریاست سر ءَ ھوش بہ گپت اے وڑیں وئیلاں ایرجنی ریاست ءِ بگیری ءَ گیشتر بنت –

وائس فار بلوچ مسنگ پرسنز ءِ رھشون ماما قدیر بلوچ ءَ گُشگ ات کہ اے راستی ءِ کہ راج ءِ یک بھرے انگت واب انت ءُ یک بھرے بے شعوری ءَ پُرایمنیں جھد کنوکانی سر ءَ تنکید کنگ ءَ انت پرچا کہ اے مردم ھر امل ءَ وتی واھشتانی درچ ءَ چارگ لوٹ انت –

ماما قدیر ءِ گوشگ ات کہ ائید ءِ روچ وشی ءُ بچکنداں گوں وت زور ایت ایر رؤت، ھمود ءَ کہ ھما راج کہ ایردستی ءِ زمزیلاں گوں بندوک انت آھانی ھاتر ءَ ائید ءِ وشی پہ دردیگ انت – ائید ءِ بابرکتیں روچ ھم بیگواھیں بلوچانی بنجل پچ بیت ءُ اے روچ ءَ روانک ءُ زھرشانی بیت –

آئی ءِ گوشگ ات کہ بلوچستان راجدپترے گرانتریں جاورھالاں گوں دوچار انت، مردم وت ماں وت گلائیش انت، چیریں ادارہ ءُ پوج بلوچستان ءِ جاورھالانی ھرابی ءِ زمّہ وار انت –

دومی نیمگ ءَ متھدہ ارب امارات ءَ ءُ پاکستان ءَ بیگواھیں انسانی ھکانی باسک راشد حسین بلوچ ءِ کھول ءَ سینزدہ مئی پنچ شمبے روچ ءَ ھلیجی ڈیھاں ائید روچ ءَ آن لائن کمپئین جار پرینتگ –

کھول ءَ وتی جار ءِ تہ ءَ گوشتگ کہ ائید ءِ روچ ءَ متھدہ ارب امارات ءُ پاکستان ءِ نیمگ ءَ راشد حسین یل کنائینگے ھاتر ءَ #SaveRashidHussain ءِ ھیش ٹیگ کمپئین کنگ بیت اِنت –