TBP Balochi

نبشتانک: دیدگیں چاکر جوش پنام جاڑ

نِبشتہ کار: کیگد بلوچ

دی بلوچستان پوسٹ

نزاناں اے زند ءِ هما ساهت کُجام اِنت کہ آئی ءَ تئی زگریں ترانگ هوار مہ بنت نزاناں منی اَرواه منی همبلیں شھید جوش جان تئی کُجام کِسہاں نِبشتہ بکن آں کُجام نند ءُ نیاداں ءُ کُجام یاتاں بہ نویساں کجام زپتین زہیراں نبشتہ بکن آں کہ آ گوں ترا بندوک اَنت ترا چہ بندوکیں ہر یات ءُ ترانگ من ءَ چو ماری ءَ دَج اَنت-

جوش گوں ترا منی اولی گند ءُ نند ماں کیچ ءِ دلبند ءَ بوت آ وھد ءَ کیچ گوں وتی پُلگُدیں تئی وڑیں تمردیں کُنگراں گوں سک جلوانک اَت نزاناں کیچ ءَ کئی شُومیں چمّ جَت کہ کیچ ءِ دیم ءِ جلوانکیں ٹیٹُک یک یک ءَ لُڈ اِت اَنت ءُ کیچ ءَ مروچاں پلیتیں دلار ءُ ڈُنگاں جاگہ کُتگ ءُ کیچ ءِ پیشیگیں جلواه بُرتگ اَنر نوں گُش ئے کیچ مئے نہ اِنت پیش ءَ کیچ ءِ راجی بامردانی سنگر بوتگ ءُ مرچاں کیچ سرجمیں بلوچستان ءِ دلارانی یک بُنجل ئے جوڑ بیتگ همے ناشر اَنت –

من تئی اولی رند ءِ گند ءُ نند ءِ گپ ءَ اِتاں بلے بہ بکش کہ من وتی دل ءِ درد کمّیں درشان کُت اَنت کہ کنگی اِت انت جوش بگندئے ترا یات بیت من ءُ تو کیچ ءَ یک جلسھے ءَ پَد نِشتاں باز دیراں دیوان کُت ءُ تئی هما کُتگیں ھر گپ منی دل ءِ تہ ءَ نکش اَنت جوش من چو ہچبر دل ءَ نہ جیڑ اِتگ کہ تو چو زُوت چَہ من گِستہ بہ بہ ئے بلے جوش جان مرچی من اے گپ ءَ پہ پھر بنداں کہ من تئی دست ءِ چیر ءِ رُستگیں درچکے آں ءُ اے ھبر ءَ من پہ شانے گُشاں کہ من تئی دابیں تامردے ءِ دیوان ءَ نِشتگ ءُ پاد اَتکگاں –

جوش ترا یک هالے بہ دے آں تئی شھیدی ءِ ہبر زان ئے من ءَ کَے هال دات ھما تئی دوستگیں مردم ءَ کہ تو ھر وھد ءَگوں من گپ ءُ تران کُتگ گُڑا ھمیشی ءِ جُست الّم گیپتگ کہ “باریں چون اِنت انگت زار اِنت” بلے جوش جان ترا ھبرے بہ گش آں ھمے وہد ءَ تئی شھیدی یے هال من ءَ دات اِت سک باز گریت ءُ هسکاریتے جوش ہمے تئی دوستیگیں مردم تئی یاتاں دائم بُن گران ءُ سُچان اِنت-

گُش اَنت کہ “هون ئے پہ هَک ءَ رِچیت هاک ءِ تہ ءَ بیگواه نہ بیت” من سَدّکاں تئی ءُ بلوچستان ءِ کُلیں شھیدانی هون الّم پُل رودین اَنت من اے گپ ءَ پہ پھر گُشاں شمئے داتگیں دیمونی بلوچ ءِ بُندر ءَ الّم یک روچے آجوئی ءَ کار اَنت بس من ءَ پھل کن منی اَرواه کہ من تئی گُڈی دیدار کُت نہ کُت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سربوتگیں ھالانی رِد ءَ گوستگیں روچ ءَ بلوچستان ءِ تہ ءَ جھانی وبا کرونا ویروس ءِ نادراھی ءَ آماچ بوتگیں بیست ءُ شش دگہ نوکیں کیس دیم ءَ اتکگ اَنت ءُ اے وھد ءَ کرونا ویروس ءَ آماچ بوتگیں درسیں مردمانی کچ سی ھزار ءُ نھ سد ءُ ھشت ءَ سر بوتگ اَنت-

بلوچستان ءَ جانسلامتی ءِ نیمگ ءَ چہ شنگ بوتگیں رپورٹ ءِ رِد ءَ بلوچستان ءَ گوستگیں روچ ءَ بزاں یکشمبے ءَ بیست ءُ شش مردماں کرونا نادراھی پدر بوتگ، کہ آھانی تہ ءَ درساں گیش بلوچستان ءِ بنجاھی شھر شال ءَ نوزدہ ،ھزدار ءَ سَے، سبی ءَ دو، دکی ءُ لسبیلہ ءَ یک یک مردمے کرونا ویروس پدر بوتگ، چریشی ءَ پد تنی وھدی بلوچستان ءِ تہ ءَ کرونا نادراھی ءَ آماچ بوتگیں مردمانی کچ نوکیں کیساساں ھوار سرجمی ءَ سِی ھزار ءُ نھ سد ءُ ھشت ءَ سر بوتگ اَنت-

رپورٹ ءِ رِد ءَ بلوچستان ءِ تہ ءَ گوستگیں روچ ءَ ھپتاد ءُ نہ مردم وش بوتگ انت، وش بوتگیں مردمانی کچ نوکیں کیساساں ھوار سرجمی ءَ سِی ھزار ءُ شست ءُ ھپت انت-

رپورٹ ءِ رِد ءَ بلوچستان ءِ تہ ءَ گوستگیں روچ ءَ کرونا وائرس ءِ شش سد ءُ چِل ءُ چار مردم ءَ کرونا ٹیسٹ کنگ بوتگ، کہ آھانی تہ ءَ بیست ءُ شش مردم ءَ کرونا نادراھی پدر بوتگ وھدیکہ یک سد ءُ بیست ءُ پنچ مردمانی رپورٹ نہ اتکگ انت-

رپورٹ رِد ءَ بلوچستان ءِ تہ ءَ کرونا وائرس ءِ پنچ سد ءُ شش نادراہ ھست انت کہ آھانی تہ ءَ یانزدہ نادراہ ھائی فلو آکسیجن ءُ سَے لو فلو آکسیجن اِلاج ءَ انت – بلوچستان ءَ کرونا وائرس ءِ پوزٹیو کیسانی گیشی چار ٹک زیرو چار درسد بوتگ – تنی وھدی بلوچستان ءِ تہ ءَ کرونا وائرس ءَ سرجمی ءَ سَے سد ءُ سِی ءُ پنچ مردم بیران بوتگ انت-

دی بلوچستان پوسٹ پتر ھال ءَ سربوتگیں ھالانی رِد ءَ بلوچستان ءِ دمگ مستونگ ءَ پاکستانی پوج ءَ یک ورنایے زورانسری آوار جتگ ءُ بیگواہ کتگ –

گیشیں ھالانی رِد ءَ ھژدہ اگست ءَ چہ نوشکی ءَ شال ءَ آؤکیں ورنا شفیع اللہ جھمنند سریاب پاکستانی پوج ءَ مستونگ ءِ ھند کانک ءَ چہ گاڑی ءَ ایر گپتگ ءُ گوں وت برتگ –

پوج ءَ ورنا ءِ دزگیرکنگ ءِ ھچ سوب نگوشتگ اَنت –

بلوچستان ءِ تہ ءَ زورانسری آوار جنی ءَ دیر انت کہ یکشل ءَ برجاہ انت کہ مدامی بلوچستان ءِ بازیں دمگاں زورانسری آوار جنی ءِ ھال کائینت اگست ءِ ماہ ءَ بلوچستان ءِ دمگاں نھ مردمانی زورانسری آوار جنی ءِ ھال اتکگ انت –

اشی ءَ پیش سیزدہ اگست ءَ پاکستانی پوج ءَ بلوچستان ءِ دمگ پنجگور ءُ تربت ءَ دو مردم زورانسری آوار جتگ ءُ بیگواہ کتگ اَنت وھدیکہ ھاران ءَ شش مردم آوار جتگ ءُ بیگواہ کتگ انت –

بلوچ نیشنل مومنٹ ءِ رپورٹ ءِ رِد ءَ اشی ءَ پیش جولائی ماہ ءَ بیست ءُ نھ مردم گیرکانودی آوار جنگ ءُ بیگواہ کنگ بوتگ انت –

وھدیکہ دومی نیمگ ءَ وفاقی سرکار ءِ نیمگ ءَ چہ گوشگ بوتگ کہ مروچی شال ءَ بیگواھیں مردمانی کیسانی پیشی بیت انت –

محکمہ داخلہ ءِ رِد ءَ وفاقی سرکار ءِ گوشگ ءِ پد ءَ برجم داشتگیں بیگواھیں مردمانی یل کنائینگ ءِ کمیشن مروچی ءَ چہ شال ءَ بیگواھیں مردمانی کیسانی پیشی ءَ کنت – کمیشن بیست ءُ ھشت اگست ءَ تاں شش روچ ءِ میان ءَ شست بیگواھیں مردمانی کیساں گوشداریت کہ اے بیگواھیں مردمانی سیادی شال ءُ بلوچستان ءِ ایندگہ دمگانی انت کمیشن ءِ سرکماشی ءَ بلوچستان ءِ آمیدگس ءِ گوستگیں سروک فضل الرحمن کنت –

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ چار سد ءُ شانزدہ روچ سرجم بیتگ – ھمدردی ءِ واستا بی ایس او ءِ بنجاھی جنرل سیکریٹری عظیم بلوچ، سینٹرل کمیٹی ءِ باسک کریم شنبے ءُ عدنان شاہ اتکگ ءُ پدردی اش درشان اِش کتگ –

وائس فار بلوچ مسنگ پرسنز ءِ وائس چیئرمین ماما قدیر بلوچ ءَ اتکگیں مردمانی میان ءَ گپ کنان ءَ گُشتگ کہ بی ایس او یک نرسری ریڈیکل سیاسی گل ئِے چُشکہ وتی پیسلگانی وت واجھی ءُ ماس پاٹی ءِ کرد ءَ پیلو کنگ اِنت ھمے واستا اسٹوڈنٹس آرگنائریشن ءِ بیگ ءَ ابید ھما کرداں یک جوانیں رنگے ءَ زانگ بیت اِنت –

ماما قدیر بلوچ ءَ گُشتگ راستی ءَ بلوچ سیاسی راجدپتر ءَ جھد درچ یک نوکیں کڑی ءَ بلوچ اسٹوڈنٹس آرگنائزیشن ءَ سرجمیں زمہ واریانی ھمراھی ءَ داشمندی ءِ منانک داتگ ءُ ھما وڑ ءَ بامردی ءِ گام چِست کرتگ آ مروچی ءَ داں کجام سیاسی گھگیری گل بھر نہ بیتگ، راجدپتر ءَ زورگریں ریاستی ادارھاں دزکشی ءِکریڈٹ ءَ بی ایس او ءَ شتگ آئی ءِ باسکاں ھر رنگ ءَ ریاستی نوکری ءُ لاچ ءُ لباں یکگور کتگ اَنت ءُ راجی زرمبشت ءِ واستا وتی جان ءُ مال کربان کتگ اَنت مزن جگری ءِ دیانتداری ءُ زانتکاری ءِ درچ داران کتگ اَنت –

آئی ءَ گُشتگ کہ دراھیں اکیڈمک نان اکیڈمک دزگٹی لوگی زمہ واری ءُ وھد ءِ کمی ءَ ابید بی ایس او ءِ وتی رھبندانی پرکار کنگ ءِ واھندیں ورناہ پُر ایمنیں جھدکار وتی سسائیں گل ءِ مھکمی، گل ءِ رھبند ءُ گل ءِ پرمان ءِ سرجم کنگ ءَ ھر وھد ءَ جاڑیگی بیتگ اَنت –

ماما قدیر بلوچ ءَ دیمتر ءَ گُشتگ بلوچ اسٹوڈنٹس آرگنائزیشن اوگامی ءَ دراتکگ ءُ ھر وھد ءَ جوانیں گامگیجی جد ءُ جھد ءِ برورد بازیں لیڈر ءُ باسکانی شھیدی ءُ گچینی ءِ جاھاں بازیں کسے دشمن ءِ زنداں تھاریں کوٹیاں لَٹ ءُ کُٹیانی دیمپان اَنت بی ایس او ءِ نودربرانی جوانیں ءُ سیاسی زانت ءِ سرشاری کرتگ ءُ گلامی ءِ سما کنگ ءُ جزبات ءِ زنزورینگ ءَ چُشکہ بی ایس او بنداتی روچ ءَ بلوچ مھلوک ءِ گیشتر راجی سما ورنایانی زانتی پکر ءُ زانتی سنچ کرتگ ءُ بلوچ راج ءِ پُر ایمنیں جد ءُ جھد ءَ را راہ پیش داشتگ –

بلوچستان ءِ دمگ نصیر آباد ءَ لوگی کارگُشاد لَٹ ءُ کُت ءُ کشگ ءِ بگیری ءَ راج ءُ سول سوسائٹی ءِ نیمگ ءَ زھرشانی کنگ بوتگ-

لوگی کارگُشاد محراب پندرانی ءِ کوش ءِ وئیل چیزے روچ ءَ پیش مزن شھر شال ءَ بوتگ – کھول ءِ رِد ءَ محراب پندرانی بلوچستان ءِ نامی ءِ ٹرانسپورٹر سدابھار ٹرانسپورٹ ءِ واھنند ءِ لوگ ءَ پرویارگری کتگ ئِے-

زھرشانی کنوکانی رِد ءَ سدابھار ٹرانسپورٹ ءِ واھنند محراب پندرانی تُرندیں لَٹ ءُ کٹاں پد کُشتگ- سوشل میڈیا ءَ شنگ بوتگیں محراب پندرانی ءِ اکساں آئی ءِ سر ءَ بوتگیں لَٹ ءُ کُٹانی نشان گندگ بنت-

محراب پندرانی ءِ کوش ءُ کھول ءَ انساپ دیگ ءِ ھاتر ءَ گوستگیں روچ ءَ نصیرآباد ءَ زھرشانی کنگ بوگ ءَ اِنت ءُ سوشل میڈیا ءَ اے کوش ءِ گوں تُرندی ءَ ایر جنگ بوگ ءَ اِنت-

نودربر ماہ رنگ بلوچ ءَ محراب پندرانی ءِ ھاتر ءَ انساپ ءِ لوٹ کتگ ءُ ھمے درگت ءَ ٹوئٹ تہ ءَ گْوشتگ کہ کُشکاراں قانون نہ بوگ ءِ سوب ءَ آ سلامتیں راہ دیگ بنت-

محراب پندرانی ءِ کھول ءَ حکومت بلوچستان ءَ چہ کوش ھواریں مردمانی دزگیری ءُ انساپ دیگ ءِ لوٹ کتگ وھدیکہ پولیس رِد ءَ وئیل ءِ درگت ءَ پُٹ ءُ پول برجاہ ءَ اِنت-

سر بیتگیں ھالانی رد ءَ بیلہ ءَ دگ ءِ وئیلے ءَ ھپت مردم زدگ بیتگ اَنت ءُ زدگ بیتگیں مردمانی تہ ءَ زالبول ءُ چک ھم ھوار اَنت –

گیشیں ھالانی رد ءَ مزن شھدگ ءَ کراڑو ءِ ھند ءَ چہ شال ءَ دیم پہ کراچی ءَ روکیں بس ءَ ٹرکے ءَ ٹکر وارتگ –

چریشی ءَ زالبول ءُ چکاں ھوار ھپت مردم زدگ بیتگ اَنت، وئیل ءِ ھال ءِ سر بوگ ءَ ریسکیو ءِ کارمند وئیل جاہ ءَ سر بیتگ اَنت ءُ اود ءَ زدگ بیتگیں مردم چِست کنگ ءُ نادراہ جاہ ءَ برگ بیتگ اَنت –

ریسکیو ءِ رد ءَ زدگ بیتگیں مردم بیلہ نادراہ جاہ ءَ برگ بیتگ اَنت کہ اود ءَ دو زھگانی جاور نگیگ بیتگ اَنت کہ چریشی ءَ کراچی ءَ دیم دیگ بیتگ اَنت –

ھمے وڑ ءَ ھب ءِ دمگ ساکران ءَ دیوالے ءِ کپگ ءَ زھگے بیران،شش مردم زدگ بیتگ اَنت –

ھالانی رد ءَ ساکران ءَ خان مھمد گوٹھ ءَ دیوالے ءِ کپگ ءَ یک زھگے بیران بیتگ ءُ شش کس زدگ بیتگ اَنت ءُ درست یکیں کھول ءِ مردم اَنت –

بلوچستان ءِ تیابدپی شھر گوستگیں بازیں روچاں یکشل ءَ آپ، بجلی، زر ءَ گیرکانونی ٹرالرنگ ءِ ھلاپ ءَ زھرشانی دیمپان اِنت –

ھالانی رد ءَ گوشگ بیتگ کہ گوادر ءَ مروچی دریاورداں زر ءِ روگ ءَ نیلگ ءِ ھلاپ ءَ زھرشانی کرتگ ءُ نندانک ءَ نشتگ اَنت –

گیشیں ھالانی رد ءَ دریاورداں گوادر ءَ جی ٹی ءِ گیٹ ءِ دپ ءَ نندانک جتگ ءُ زھرشانی بندات کرتگ –

دریاوردانی گوشگ اِنت گوستگیں سَے روچاں انتزامیہ ءِ نیمگ ءَ زر ءَ روگ ءَ نیلگ ءَ اِنت چریشی ءَ نیزگاریں دریاوردانی لوگ وردنی ءَ ھالیگ اَنت –

زھرشانی کنوکاں دریاورداں ھوار چُک ھم ھوار اَنت کہ آیاں گوادر ءِ جی ٹی ءِ گیٹ ءِ دپ ءَ نندانک جتگ ءُ نشتگ اَنت –

آیاں گُشتگ کہ مئے لوگاں پہ وردنی ءَ آس روک بیگ ءَ نہ اِنت ءُ چریشی ءَ مئے زھگ شد ءِ دیمپان اَنت –

آیاں لوٹ کرتگ کہ سرجمی ءَ زر ءَ روگ ءَ ما کِلگ بہ بہ ایں ءَ اگاں ناں گڑا مئے ھمے گیٹ ءِ دپ ءَ یکشلیں نندانک ءَ نندیں –

زانگ بہ بیت گوستگیں سَے روچاں ھم گوادر ءَ ھواریں دمگ سربندن ءَ آل پارٹیز ءِ نیمگ ءَ بجلی، آپ ءُ زر ءَ گیرکانونی ٹرالرنگ ءِ ھلاپ ءَ نندانک جنگ بیتگ اَت –

نندانک گوستگیں دو روچ دو شپاں برجاہ بیتگ اَت ءُ گوستگیں روچ ءَ سرکاری نمائندگانی سدکی ءَ پد زھرشانی کنوکاں وتی زھرشانی ھلاس کرتگ اَت –

اوگانستان ءِ بنجاھی شھر کابل ءَ بالی پَٹ ءِ ڈن ءَ تالبان ءَ شھری یکجاہ بیگ ءَ داشتگ اَنت ءُ چریشی ءَ بازیں کچے ءَ مھلوک مُچ بیتگ اَنت –

خبر ایجنسی روئٹرز ءِ رد ءَ یکشمبے ءِ سھب ءَ کابل ءِ بالی پَٹ ءَ ڈن مھلوک یکجاھی ءَ کَتاری ءَ گنگ بیتگ اَنت ءُ تالبان ءَ گیٹ ءِ دیم ءَ مُچ بیگ ءَ مھلوک داشتگ اَنت –

یک چم دیتگیں مردمے ءَ روئٹرز ءَ گُشتگ ئے کہ مروچی سھب ءَ بالی پَٹ ءَ ڈن لَٹ ءُ کُٹ یا گِر ءُ چِلی ءَ مردم گندگ ءَ نیتکگ اَنت بلے مھلوک ءِ دراجیں لین بالی پَٹ ءِ تہ ءَ روگ ءِ واستا وداری ءَ گندگ بیتگ اَنت –

دومی نیمگ ءَ وائٹ ھاؤس ءَ گوشگ بیتگ اَت کہ امریکی سروک یکشمبے ءَ چہ اوگانستان ءَ امریکی شھری ءُ میار بستگیں مردمانی بارو ءَ نوکتریں اھوالاں دنت –

دومی نیمگ ءَ آسٹریلوی سروزیر اسکاٹ موریسن ءَ گُشتگ کہ آیانی ڈیھ ءَ گوستگیں شپ ءَ چار بالیگراب روان دیگ بیتگ اَنت ءُ سَے سد ءَ گیش مھلوک اود ءَ کش اِتگ ءُ آیانی تہ ءَ آسٹریلیا، نیوزی لینڈ، امریکہ ءُ برطانیہ ءَ شھری ھوار اَنت-

دگہ ھالے ءِ رد ءَ گوستگیں یکشمبے ءَ بہ گر داں انیگ ءَ کابل ءِ بالی پَٹ ءَ کم چہ کم دوازدہ مردم بیران بیتگ اَنت -روئٹرز ءِ رد ءَ لھتے ءَ تیر وارتگ ءُ لھتے ھنچش تچگ ءِ وھد ءَ لگت بیتگ اَنت –

تالبان ءِ نیمگ ءَ کابل ءِ گرگ ءَ پد گوستگیں یک ھپتگے ءِ وھد ءَ ھزارانی مردم ترندیں گرم ءَ بالی پَٹ ءَ مُچ بیتگ اِت اَنت تانکہ اوگانستان ءَ در شت بہ کن ایں –

مھلوک ءِ مُچی ءِ سبب ءَ امریکہ ءُ دگہ ڈیھاں ھزارانی مھلوک ءِ ھواری ءَ سپارتی مردمانی کابل ءَ درکنگ ءَ مزنیں جنجال درپیش بیتگ اِت اَنت – سوئٹزرلینڈ ءَ شمبے ءِ روچ ءَ اوگانستان ءَ یج چارٹرڈ فلائٹے ءِ روانکی ءَ داشتگ اَت –

امریکی پوج ءِ میجر جنرل ولیم ٹیلر ءَ پینٹاگون ءَ گپ کنان ءَ گُشتگ کہ اے وھد ءَ پنچ ھزار ءُ ھشت سد فوجی کابل ءِ بالی پَٹ ءَ جاڑیگ اَنت ءُ بالی پَٹ پھریزی ءِ نگھپانی ءَ اِنت –

آئی ءَ گُشتگ اَت کہ گوستگیں روچ ءَ بالی پَٹ ءِ بازیں گیٹ لھتے وھد ءِ واستا بند کنگ بیتگ اَنت کہ تانکہ روکیں مردمانی پھریزی کنگ بہ بیت اِنت –

تالبان ءِ یک اگدودارئے ءَ روئٹرز ءَ گُشتگ ئے کہ سکیورٹی ءِ ترس ءَ گُشت نہ کن ایں بلے روکیں مردمانی روانی ءَ گھتر کُت بہ کن ایں –

جنرل ولیم ٹیلر ءِ رد ءَ چہ کابل ءَ داں انیگ ءَ دو ھزار ءُ پنچ سد امریکی پوجیاں ھوار ھبدہ ھزار مردم کشگ بیتگ اَنت –

آئی ءَ دیمتر ءَ گُشتگ اَت کہ گوستگیں روچ ءَ امریکی پوجی بالیگ ءخ چارٹرڈ فلائٹسانی سر ءَ سَے ھزار ءُ ھشت سد مردم کش اِتگ اَنت –

سربوتگیں ھالانی رِد ءَ بلوچستان ءِ تہ ءَ جھانی وبا کرونا وائرس ءِ نادراھی ءَ آماچ بوتگیں سی ءُ ھپت دگہ نوکیں نادراہ پدر بوتگ ءُ اے وھد ءَ کرونا وائرس ءَ آماچ بوتگیں درسیں مردمانی کچ سِی ھزار ءُ ھشت سد ءُ ھشتاد ءُ دو ءَ سر بوتگ اَنت-

بلوچستان ءَ جانسلامتی ءِ نیمگ ءَ چہ شنگ بوتگیں رپورٹ ءِ رِد ءَ گوستگیں روچ ءَ شمبے ءَ بلوچستان ءِ تہ ءَ شش سد ءُ پنجاہ ءُ دو مردماں کرونا نادراھی ٹیسٹ کنگ بوتگ کہ آھانی تہ ءَ بلوچستان شش دمگاں کرونا وائرس ءِ سی ءُ ھپت نادراہ پدر بوتگ – کہ آھانی تہ ءَ شال ءَ بیست ءُ سَے، پنجگور ءَ دہ، سھبت پور، لورلائی تربت ءُ گوادر ءَ یک یک مردمے ءِ کرونا وائرس ءِ آماچ بوتگ انت وھدیکہ دو سد ءُ ھشتاد ءُ سَے مردمانی رپورٹ نہ اتکگ انت چریشی ءَ پد تنی وھدی بلوچستان ءِ تہ ءَ کرونا نادراھی آماچ بوتگیں مردمانی کچ نوکیں کساساں ھوار سرجمی ءَ سِی ھزار ءُ ھشت سد ءُ ھشتاد ءُ دو ءَ سربوتگ انت-

رپورٹ ءِ رِد ءَ بلوچستان ءِ تہ ءَ پنچ سد ءُ پنجاہ ءُ نھ نادراہ ھست انت کہ آھانی تہ ءَ یانزدہ نادراہ ہائی فلو آکسیجن وھدیکہ چار لؤ فلو آکسیجن ءَ الاج انت –

رپورٹ ءِ رِد ءَ گوستگیں روچ ءَ کرونا وائرس ھپت نادراہ وش بوتگ انت چریشاں پد سرجمیں وش بوتگیں نادراھانی کچ نوکیں کساسیاں ھوار بیست ءُ نُھ ھزار نُھ سد ءُ ھشتاد ءُ ھشت انت –
رپورٹ ءَ رِد ءَ بلوچستان ءِ تہ ءَ جھانی وبا کرونا وائرس ءِ نادراھی ءَ سرجمی ءَ سَے سد ءُ سی ءُ پنچ مردم تنی وھدی بیران بوتگ اَنت –

جاؤ سولیر ءَ پوج ءِ سر ءَ اُرش ءُ دیم پہ دیمی میڑ ءَ پاکستانی پوج ءِ سیزدہ کارمند کُشتگ اَنت – میجر گوھرام

سربوتگیں ھالانی رِد ءَ مروچی شمبے روچ ءَ بلوچستان ءِ دمگ واشک ءُ جاؤ ءَ ناشناسیں سلاہ بندیں مردماں پاکستانی پوج ءِ سر ءَ اُرش کُتگ –

اُرش واشک ءِ دمگ سولیر ءَ کنگ بوتگ کہ ناشناسیں مردماں پیسر ءَ چہ دگ ءِ سر ءَ سنگر بستگ ءُ پوج ءِ سر ءَ اُرش کُتگ – اُرش ءَ پاکستانی پوج ءَ جانی ءُ مالی تاوان رس اتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ ھردو اُرشانی زمّہ واری منّ اِتگ ءُ گوشتگ کہ مئے سرمچاراں شمبے ءِ روچ ءَ سولیر ءَ ھشت پاکستانی پوج ءِ کارمند کُشتگ اَنت ءُ پنچ شمبے ءِ روچ ءَ جاؤ ءَ مئے سرمچارانی ءُ پاکستانی پوج ءِ میان ءَ دیم پہ دیمی میڑے بیتگ – میڑ ءَ پاکستانی پوج ءِ پنچ کارمند کُشتگ اَنف ءُ بازینے ٹپی کُرتگ اَنت-

جارکش ءَ دیمتر ءَ وتی درشان ءِ تہ ءَ گْوشتگ کہ مرچی مئے سرمچاراں واشُک ءِ دمگ سولیر ءَ پاکستانی پوج ءِ یک کاروانے ءِ سر ءَ پیش ءَ سنگر گیپتگ ءُ گوں مزن ءُ نوکیں سلاھاں اُرش کُرتگ – اُرش ءَ پد دُژمنیں پوج ءِ کمک ءَ آؤکیں گاڑیانی راہ ءِ سر ءَ مئے سرمچاراں تراکناکیں شورہ چیر کُرتگ شوروانی تراک ءَ پاکستانی پوج ءِ یک ویگو گاڑی یے سرجم ءَ تباہ بیتگ ءُ گاڑی ءَ سواریں ھشت کارمند مُرتگ انت – آئی ءَ گوشتگ کہ پوج ءِ کاروان ءِ سر ءَ اُرش ءَ ھم بازیں کارمندے مُرتگ ءُ ٹپی بیتگ اَنت –

جارکش میجر گھرام ءَ گْوشتگ کہ پنچ شمبے ءِ روچ ءَ بیگاہ ءِ ادار شش ءَ آواران ءِ ھند جاؤ چبی ءَ مئے سرمچارانی گوں پاکستانی پوج ءَ دیم پہ دیمی میڑے بوتگ اے میڑ داں نیم ادار ءَ برجاہ بوتگ میڑ ءَ پاکستانی پوج ءِ پنچ کارمند مرتگ ءُ بازینے ٹپی بوتگ-

آئی ءَ گْوشتگ کہ دُژمنیں پوج ءَ سرمچارانی انگر کنگ ءِ جُھد کُرتگ،چہ ایشی ءَ سرمچار ءُ پاکستانی پوج ءِ میان ءَ دیم پہ دیمی میڑ برجاہ بیتگ۔ سرمچار دو ٹولی ءِ تہ ءَ بھر بیتگ اَنت یک ٹولی یے سپر ءَ بیتگ کہ چہ چبی ءَ گْوزگ ءَ بیتگ اَنت – پاکستانی پوج ءُ سرمچارانی یک ٹولی یے دپ کپتگ اَنت – سرمچاراں گوں جوانیں جنگی شونداتاں داں نیم ادار ءَ گوں پاکستانی پوج ءَ جنگ داتگ ءُ پہ سلامتی داں کوہ ءَ سربیتگ اَنت – ھمے میان ءَ سرمچارانی دومی ٹولی ءَ پاکستانی پوج ءِ سر ءَ گوں راکٹ ءُ مزنیں سلاھاں اُرش کُرتگ،چہ ایشی ءَ پاکستانی پوج پدکِنزگ ءَ لاچار بیتگ ءُ سرمچار پہ سلامتی درکپتگ ءُ وتی سنگراں سربیتگ اَنت – آئی ءَ گوشتگ اے میڑاں دُژمنیں پوج ءِ پنچ کارمند ھما جاہ ءَ مُرتگ –

گڈسر ءَ میجر گوھرام بلوچ ءَ وتی درشان ءِ تہ ءَ گوشتگ کہ زورگریں پاکستانی پوج ءِ سر ءَ مئے اُرش داں زورگیپتیں بلوچستان ءِ آجوئی ءَ تاں برجاہ مان انت –