TBP Balochi

اے وھد ءَ مئے زرمبشت ءَ گیشتر مھکم کنگ ءِ زلورت انت -ماما قدیر بلوچ

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی ءَ چار ھزار ءُ چار سد ءُ پانزدہ روچ سرجم بوتگ – نیشنل پاٹی ءِ رھشون میر عبدالغفار قمبرانی، کلثوم نیاز، ایکٹوسٹ خالدہ قازی ایڈوکیٹ ءُ دگہ پگرانی منوگراں بنجل ءِ تر ءُ تاب کتگ ءُ بیگواھیں مردمانی کھولانی گوم ءَ دلپدردی درشان اتگ –

وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشت کہ گوستگیں روچانی تہ ءَ زورگیریں پاکستان وتی چیریں ادارھانی گون ءَ بلوچستان ءِ تہ ءَ بلوچ ورنایاں آوار جنگ ءُ بیگواہ کنگ ءَ اِنت ءُ سوئی، ڈیرہ بگٹی، مکران، آواران، مشکے ءُ مستونگ ءَ مزنیں کچ ءَ پوجی لشکر کشی ءُ بمب گواری کنگ ءَ انت دمگاں وتی انگیر کنت ءُ مھلوک ءِ گِس آں رؤت پُرشت ءُ پروش کنت ءُ گِسانی تہ ءَ ساڑی ئیں زالبولاں کم شرپ کنت ءُ کیمتی مال ءُ مڈیاں پُلیت ءُ گون وت بارت –

ماما قدیر بلوچ ءِ گوشگ ات کہ مروچی ھزارانی کچ ءَ بلوچانی گِس ویران کُتگ ھزارانی کچ بلوچ پرزند روچ ء مروچی زنداناں بندیگ انت ءُ وڑ وڑیں ٹارچر ءُ ازیت سگگ انت چریشی ءِ سر ءَ اے وھد ءَ مئے زرمبشت گیشتر مھکم کنگ ءِ زلورت انت –

سر بیتگیں ھالانی رد ءَ بلوچستان ءِ دمگ منگچر ءَ سلاہ بندیں مردمانی تیرگواری ءَ یک مردمے بیران بیتگ –

گیشیں ھالانی رد ءُ منگچر تلاری ءَ ناشناسیں مردماں تیرگواری کرتگ ءُ چریشی ءَ براھوئی زبان ءِ گشندہ استاد ایوب شھزاد مھمد ھسنی بیران بیتگ –

تیرگواری ءَ پد آئی ءِ جون چِست جنگ بیتگ ءُ ھسپتال ءَ برگ بیتگ، کوش ءِ سبب زانگ نہ بیتگ –

دگہ یک جونے بلوچستان ءَ دزکپتگ –

ھالانی تہ ءَ گُشگ بیتگ کہ بلوچستان ءِ دمگ چاگی ءِ ھند نوکنڈی ءَ یک جونے دزکپتگ –

دمگی مردمانی رد ءَ جون کوھن اِنت چریشی ءَ آئی ءِ پجار ابید ءِ ٹسٹ ءَ ناسرجم اِنت –

زانگ بہ بیت گوست ءَ ھم بازیں جون دزکپتگ اَنت ءُ آیانی پجار نہ بیگ ءَ ھنچش کل ءُ کسارات کنگ بیتگ اَنت –

نبشتانک: زِرپھازیں پِدائی اُمرجان

نبشتہ کار : مھم جان گُل

دی بلوچستان پوسٹ

اُمر جان ترا گپّے بِہ گْوش آں! وھدے کہ تئی ھال من ءَ سر بوت چہ تئی اکس ءِ شِنگ بیگ ءَ ساری گُڑا من ھِچّ اَجکّا نہ بوت آں ۔ پرچا کہ پہ ھمائی ءَ مردُم اَجکّا بیت کہ چہ آئی ءَ ھِچ وڑیں اُوستے مہ دار اِیت کہ چوشیں مزن جگریں داستانے وتی راجدپتر ءِ تاکانی تہ ءَ نکش کنت ءُ وتی مھلبیں ھاکاں بوسیت ءُ وت ءَ گیدی ءِ تہ ءَ پہ ابد نمیران کنت ۔

بلے تو ھما مزار ءُ مزن جگراں گوں ھوار بیتگ ئے، من زانتگ اے کاروان ءِ سرمچار ءُ بامرد روچے نہ روچے الم بلوچ راجدپتر ءَ وتی بھادُری ءِ داستان ءَ نویس اَنت ءُ وت ءَ بلوچ راج ءُ دُگنیا ءِ ھر ایردستیں راج ءِ دل ءَ زِندگ داراں ءُ یک نمیرانیں داستانے نکش کن اَنت۔

منی ارواہ تئی اے داستان دُگنیا ءِ دلبند ءِ سر ءَ داں کہ پہ ابد زندگ مان اِیت، پمیشکا من اَجکّا نہ بوت آں ۔ بس لھتیں یات ءُ زپتیں ترانگ دیدگاں نکش بیتاں ءُ تئی کندگ ءُ ٹھکاں گُوشاں نوکیں توارے ءِ کلوہ بکشات ، گوں ھمے توار ءَ من وتی چَم بند کُرت آں ءُ تئی یاتانی زِر ءِ جُھلانک ءَ بُکّ وارت۔

مرچی دُگنیا ھم زانت کہ بلوچ راج وتی ڈیھ ءِ سر ءَ بیوکیں زُلم ءُ زُوراکیانی دیمپانی ءَ شر زانت ءُ ھر وڑیں دیمونی ءِ دَیَگ ءَ ساڑی اِنت ۔ بلوچ راج ءِ پیر ءُ ورنا وتئی سینگ ءَ شوراھاں بند اَنت ءُ دُژمن ءِ دیم ءَ چو باتیل ءِ کوہ ءَ مِک بَہ اَنت ءُ اے کاروان ءِ گْرانیں بار ھما ورناھانی کُوپگان اِنت کہ دُژمن ءِ نیست ءُ نابود کنگ ءَ شَر زان اَنت ءُ سرپد اَنت۔

 مرچی کسانسالیں اُمر جان کہ شوراھاں وتی سینگ ءَ بند اِیت ، باندا ھزار اُمر جان ودی بیت ءُ وتی زمین ءُ زِر ءِ پھریزگ ءَ نہ اے کاروان اُوشیت نہ کہ اے ورنا وتی زِر ءُ پاکیں گُلزمین ءِ موکگ ءَ پدکِنز بَہ اَنت، بلکیں اے کاروان گیشتر دیم پہ وتی مِنزل ءِ نیمگ ءَ گام جنان بیت ءُ کسانسالیں ورناھانی کوھیں باتِن ءَ کُربانی دَیَگ ءِ جزبہ چِد ءُ گیش ودّ اِیت ءُ دِگہ  ھزاراں ورنا پیداک کن اَنت۔ ءُ تنیگا   بلوچ ءِ مات سنٹ نہ اَنت ، بلکیں دِگہ ھزاراں زِر پھازیں ورنا  پہ وتی ماتیں زمین ءِ پھریزگ ءَ ودی بیت ءُ دُژمِن ءَ چہ وتی ءِ ڈیھ ءِ سیمسراں پہ مُدامی گلّینیت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتاک: امَّا تئی آفتاب گُلزمین ءَ اَمباز اتگ

نبشتہ کار: اَبرم بلوچ

دی بلوچستان پوسٹ

امَّادُروت ءُ دُرا بات ئے-

اما من وش آں، تو چون ئے؟ اما من سرپد آں کہ منی جتائی ءَ پد اے بے ریائیں جُست تئی ژندیں بالاد ءَ گِیشتر تورشت دَنت تئی چمانی ھُشکیں کانیگ ھر ساھت ءُ دمان پمن آپ ءَ کپ اَنت بلے اما وھدے کہ انسان ءِ زند ءَ مول ءُ مراد مہ بیت گڑا آ زند ءُ مرگ ءِ ھچ پرک ءُ دَرک نیست ءُ آ زندگ بوگ ءِ بِستار ءَ ھم نزانت ۔

اما تو گُشتگ نا کہ بلوچستان گیرت ءُ ننگ ءِ نام انِت ءُ بلوچ آئی ءِ پاسپان اَنت من ھم ھمے پدریچ ءِ بچ آں کہ پہ کندگ کندگ ءَ وتی ساہ ءَ ندر کنگ ءَ ساڑی آں اما منی مرگ ءَ پد کمے ھم مگرے وتی چمانی بستگیں نود ءَ پمن مہ گوار کہ اے ارس منی ارواہ ءِ مُھکمیں ھاٹیگ ءَ ژند کنت –

اما من یک مات ئِے ارزشت ءَ شر زان آں، مات ئِے مھر ءُ دوستی ءَ ھم شر پھم آں، منی جبین ھمے مارشتانی بندوک اِنت اما تو من ءَ سک دوست ئِے من ءَ چہ وتی ساہ ءُ دیدگاں چہ گیش دوست بیتگ ئے ءُ من ترا انگت ھم چو ساہ ءَ دوست داراں بلے اما من دگہ ھم یک مات ئِے مھرانی وامداراں تو منی ماتے ءُ آ منی مکھیں مات انت، منی کبلہ انت، منی مھرانی دیار انت آ منی گلزمین انت-

اما من تئی گِس ءَ الم ودی بیتگ آں بلے من چہ ازل ءَ گلزمین ءِ پاسپانے بیتگ آں ءُ یک زمین زادگے بیتگ آں اما زان ئے چی ءَ ؟ اما تو من ءَ ودی کتگ ءُ زندے داتگ بلے اے زمین ءَ من ءَ وتی دلبند ءِ سر ءَ رودینتگ ءُ منی زند ءَ یک مانایے داتگ مارا وتی استی ءِ مانا داتگ وتی وشبو ءَ گوں مئے جبین تاھیر داتگ ، وتی دلبند ءَ چہ آپ وارینتگ، اما گلزمین ءِ دلبند ءَ مئے ملپد ھم مئے ھستی ءِ گواھی ءَ دے اَنت اما چوناھا من شمئے دوینانی وامداراں سر پِر نہ بیت کہ اشاں کجام رنگ ءُ دروشم ءَ شمئے دیم ءَ ایر بکن آں کہ شما دوئیں گوں من رازی بہ باں؟ اما من سک جیڑ اتگ ھیال ءِ بانزل سک دیر شھارت آں ، اما من زر ءِ چولانی چست ءُ ھیر ءَ گوں وت ءَ ھوار کت ءُ زر ءِ جھلانکی ءَ وتی ھیال ھیر دات آں داں کہ وس شُت من ایش جیڑگانی سانکلاں گوں بندوک کُت کہ یک مھکمیں پکرئے ءِ دروشم ءَ منی دیم ءَ یک ھیالے ءِ بہ اِت اِنت اما من وتی چپ ءُ چاگرد چار اِت من گار ءُ بیگواھی دیست، تیر سپتگیں جون دِست، انچیں جون دیست کہ پجا آرگ ھم نہ بیتگ انت ، راج ءِ لگتمالی دیست، آؤکیں پدریچ ءِ بزگ ءُ واری دیست، تنگویں بچانی ھونانی رگام دیست، مال ءُ مڈیانی پلگ ءُ ورگ دیست ءُ اے مڈیانی پہ راج ءَ زبھری دست، پادانی ترا اول دست، مات ءُ گوارانی ھولمبیں ارس دیست ، اما تو زان ئے وھدے من اے چیز دیستاں من وتی دل زُرت نہ کت دردانی جمبر پمن ساھیل بوت انت ءُ چم ءَ ھرس شلگ بندات کت اما ھمے وھد ءَ من مار اِت کہ من چوں وتی پرز ءُ ھکاں اد ءَ کت بہ کن آں-

اما من آجوئی ءِ واب دستگ ءُ من اے واھگ داشتگ کہ وتی چماں گوں وتی سرڈگار ءِ آجوئی ءَ بگنداں بلے اما من اے ھم شری ءَ زان آں کہ مرگ بر ھک اِنت ءُ مرگ ءَ ھم اِچ ستک نیست کہ نیم راہ ءُ کجام ھم سھت ءَ بہ دروھیت ءُ اے گپ پہ یک یاگی ءَ مانہ نہ دار انت ۔

اماں من وتی ھک اد ءَ کت ءُ من زان آں تو منی سر ءَ پھر ھم بند ئے کہ تو یک شیر مزاریں ورنایے رودینتگ اما تو منی نام ھم آفتاب گیچین کتگ منی نام ءِ بزانت ھم روچ انت، ھمے رژنائیں استال کہ ءَ سبا ءَ در کیت ءُ زمین ءِ ھما بھر ءَ رژنا کنت کہ بْرانز کپ انت اما من روچے آں، ھما روچ کہ آئی ژزن مرچی گُلزمین ءِ دلبند ءَ تالان انت ، ھما روچ کہ منی زمین ءِ ورنایانی دلانی تہ ءَ پہ وشیں باندات ئِے کندیل رژن کتگ،اما من روچے آں ءُ روچ ءَ کَے کشت کنت اما من آفتاب آں، من نمیران آں ،من زندگ آں۔

اما منی ارواہ تئی تنگوئیں بالاد ءَ یل نہ دنت من ھمک دمک ءُ در ، جنگل ءُ گیابان ، ھاک ءِ وشبو ءِ تہ ءَ وڑ وڑیں دروشماں تئی دیم ءَ پدر باں من زندگ آں من ھر روچ کایاں تئی دیداراں ، تئی زانسراں وتی سر ءَ ایر کن آں ءُ وتی ارواہ ءَ تاھیر بکش آں ، ھر روچ گوں تو دیوان کن آں اما ترا ھوش کنت یک رندے تئی زانسراں وپت آں ءُ واب کپت آں ءُ من ترا گشت کہ من ءَ سک تاھیر رسگ ءَ انت اما مرچی من وتی گلزمین ءِ کُٹ ءَ واب آں اما باور کن چِد ءُ پیش اے رنگیں گوھر کیمتی مارگ من سرجمیں زند ءَ نہ مار اتگ کہ منی ارواہ ءَ تاھیر بہ بکشاھیت اما منی پوشاک انگت گوں ھون ءَ میستگ انت ءُ تیر ءَ منی دلبند سُپتگ اَنت انگت اے گواھی ءَ دیگ ءَ انت کہ تو نمیران ئے اما من بس سر ایر کتگ ءُ واب ءَ بلے وھد ءِ کہ گلزمین ءِ ھر کُنڈ ءَ آزاد بلوچستان ءِ جار جنگ بیت ءُ منی ڈیھ ءِ بیرک ھرجاہ ءَ بُرز کنگ بیت آ روچ ءَ من الم پاد کایاں ءُ پہ گل ءُ شاد آجوئی ءِ الھان ءَ جنان تچان باں کایاں ترا امبازاں زیراں تئی کرا نند آں ءُ گون تو یک نوکیں زند ئِے گوازین آں –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ لبریشن آرمی ءِ جارکش جیئند بلوچ ءَ وتی شنگ کرتگیں درشانی ءَ گُشتگ کہ گوستگیں روچ ءَ بلوچ لبریشن آرمی ءِ مجید بریگیڈ ءَ گوادر ءَ بلوچ وارڈ ءِ ھند ءَ استھسالی منسوبہ سی پیک ءِ سر ءَ کار کنوکیں چینی انجنیئر ءُ کارکنوکانی یک کاروانے ءِ سر ءَ فدائی اُرشے کرتگ – اے فدائی اُرش ءَ کم چہ کم شش چینی انجنیئر ءُ کارکنوک ءُ آیانی پھزداری کنوکیں سَے پوجی ھما دمان ءَ مرتگ اَنت ءُ بازینے زدگ بیتگ اَنت –

اے اُرش بلوچ لبریشن آرمی ءِ “آپریشن زرپھازگ ” بھر اِنت – آپریشن زرپھازگ بلوچستان ءِ زر ءِ پھازگ، زورگریں پاکستان ءِ ھلاپ ءُ بلوچ مڈیانی پُلپھانچی ءَ دزگٹیں پاکستان ءَ ھوارینانی گاکانی دارگ ءُ بلوچستان ءَ المی ءُ سرجمی ءَ درکنگ ءَ بی ایل اے مجید بریگیڈ ءِ نیمگ ءَ ترند ءَ چہ ترنتریں اُرشانی دروشم ءَ بندات کتگ –

آئی ءَ گُشتگ مجید بریگیڈ ءِ اے سوبمندیں فدائی اُرش ءَ پد پروش وارتگیں پوج ءَ تراک ءَ کول ءَ ڈن نزیک ءَ فٹبال گراونڈ ءَ گوازی کنوکیں کسانیں زھگانی سر ءَ گنوکائی تیرگواری کرتگ، چریشی ءَ دو کسان سالیں زھگ شھید بیتگ اَنت ءُ بازیں شھری زدگ بیتگ اَنت –

آئی ءَ گُشتگ کہ چریشاں پد دشمن وتی بے سوبی ءُ جنگی جرمانی چیردیگ ءِ ھاتر ءَ جنگجاہ آئی ءَ انگیر کرتگ ءُ مرتگیں چینی شھریانی لاشانی برگ ءَ پد رسانکدراں اشی ءِ پیش دارگ ءِ جھد ءَ بیتگ زورگریں پوج ءِ دست ءَ شھید بیتگیِ زھگ تراک ءَ شھید بیتگ اَنت –

جارکش ءَ گُشتگ کہ چینی انجنیئرانی کاروان ءِ سر ءَ اُرش بی ایل اے مجید بریگیڈ ءِ نہ ترسیں ھمراہ شھید فدائی سربلند بلوچ ء کاکا انور ءَ کرتگ -فدائی سربلند ءِ سیادی پنجگور پروم ءَ اِنت ءُ یک وانندھیں ورنایے بیتگ ءُ کربانی جزبگ ءَ سرشار بیتگ –

آئی ءَ گُشتگ کہ سنگت گوستگیں چار سالاں چہ بلوچ لبریشن آرمی ءَ گوں بندوک بیتگ ءُ سَے سال پیسر آئی ءَ کمکاری ءَ مجید بریگیڈ ءَ ھوار بیتگ – سنگت فدائی سربلند ھما وھد ءَ مجید بریگیڈ ءَ ھوار بیتگ کہ آئی ءِ اُمر کسان بیتگ ءُ چریشی ءِ سر ءَ گل ءَ سَے سال ءِ ودار کرتگ ءُ آئی ءَ را موہ دیگ بیتگ اشاں ابید آئی ءَ فدائی سربلند بلوچ ءَ وتی کرتگیں مسام ءَ پشت کنزی نہ کتگ ءُ آدینگ بیست اگست دوھزار ءُ بیست ءُ یک ءَ پرکندگ ءُ یک جزبگے ءَ دشمن ءِ نزیک ءَ داں سر بیتگ ءُ وت ءَ شورواں گوں تراکینتگ، زورگریں دشمن ءُ استھسالی چین ءِ سر ءَ گوادر ءِ وڑیں نامی ئیں شھراں نشانگ کنگ ءِ مول ءُ مراد دشمن ءَ را اے کلوہ سرکنگ اِنت کہ بلوچ وتی آجوئی ءُ پرگنجیں مڈیانی پھریزگ ءَ دشمن ءِ سر ءَ کجا ءُ کجام جاہ ءَ اُرشکاری ءِ زور ءَ دارایں – بلوچ لبریشن آرمی سنگت فدائی سربلند بلوچ ءَ آئی ءِ مزن شانیں کربانی ءَ را سھر چکیں دروت ندر کنت –

جارکش ءَ گُشتگ کہ بلوچ لبریشن آرمی ءَ اشی ءَ پیسر چین ءَ ھوار دگہ سرامراجی تاکت ءُ زرکاراناں اے کلوہ تچکی ءَ داتگ کہ آ بلوچستان ءِ سرجمیں آجوئی ءُ بلوچ ڈیھ ءِ سر ءَ بلوچانی سرجمیں سرکار ءِ برجم بیگ ءَ داں زورگریں پاکستان ءِ گوشگ ءَ بلوچستان ءَ زرکاری کاراں پھریز بہ کن اَنت- بلوچ راج ءَ اے وڑیں کجام زرکاری شوربندی کہ بلوچ ءِ مڈیانی پُلپھانچی ءِ سرپد بیت اِنت ءُ آیانی دارگ ءِ واستا وتی تاکت ءَ کاربند ایت –

آئی ءَ گُشتگ کہ بی ایل اے ءِ زور ءُ بیھار ءَ ابید چین نا ایوک ءَ پاکستان ءَ زرکاری ءَ کنگ اِنت بلکیں بلوچ زرمبشت ءِ ھلاس کنگ ءَ چین ءَ زورگریں پاکستان ءَ را پوجی کمک ءُ زرکاری کمکاں کنگ اِنت – ھمے پُشت ءُ پیرانی چارگ ءَ بی ایل اے ءَ اشی ءَ پیسر بازیں براں چینی شھری ءُ آئی ءِ زرکاری بنجل نشانگ کتگ اَنت –

جارکش ءَ گُشتگ اَت کہ ھمے اُرشانی لڑ بی ایل اے مجید بریگیڈ ءَ چریشی ءَ پیسر یازدہ اگست دوھزار ءُ ھژدہ ءَ دالبندین ءَ چینی انجنیئرانی کاروان ءِ سر ءَ اُرش، بیست ءُ سَے نومبر دوھزار ءُ ھژدہ ءَ کراچی ءَ چینی کونسل ھانہ ءِ سر ءَ اُرش، یازدہ مئی دوھزار ءُ نوزدہ ءَ گوادر ءَ پرل کانٹینینٹل ھوٹل ءَ اتکگیں چینیانی سر ءَ اُرش ءُ بیست ءُ نُھ جون دوھزار ءُ بیست ءَ پاکستان ءُ چین ءِ ھواریں زرکاری بنجل کراچی ءَ اسٹاک ایکسچینج ءِ بازیں کچے ءَ فدائی اُرش کرتگ اَنت –

بی ایل اے مجید بریگیڈ ءِ مروشی فدائی اُرش ھما اُرشانی درچ اِبت – اگاں چین بلوچستان ءَ وتی استھسالی منسوبھاں بند نہ کنت بلوچستان ءَ در نہ کپ ایت ءُ بلوچ نسل کُشی ءَ زورگریں پوج ءِ کمکاری ءَ دزکچ نہ بیت گڑا بلوچ لبریشن آرمی اشی ءِ ھک ءُ ھساب ءَ داران کنت ءُ بلوچستان ءَ گیرکانونی ءَ نندوکیں چینی شھری ءُ گیرکانونی چینی منسوبھانی سر ءَ دیمتر ءَ ترند ءَ ترنتریں اُرش کنت –

بلوچستان ءِ آجوئی ءِ واستا جنگ کنوکیں گل بلوچ لبریشن آرمی ءَ بلوچستان ءِ تیابدپی شھر گوادر ءَ چینی انجنیئرانی کاروان ءِ سر ءَ فدائی اُرش ءِ زمہ واری منّ اِتگ-

بی ایل اے ءَ رسانکدراں شنگ کرتگیں یک درشانے ءِ تہ ءَ گُشتگ کہ اے اُرش ءَ کم چہ کم نُھ چینی انجنیئر ءُ کار کنوک مرتگ اَنت ءُ بازینے زدگ بیتگ اَنت –

جارکش جیئند بلوچ ءَ گُشتگ کہ اے اُرش بی ایل اے مجید بریگیڈ ءِ بھادریں فدائی سربلند پنام ءِ عمر جان ءَ کرتگ شھیدی ءِ مستاگ پہ وت ءَ زرتگ –

زانگ بہ بیت اے اُرش بلوچ وارڈ ءَ برجاھیں کار سی پیک دگ “ایکسپریس وے ” ءَ چینی انجینئرانی گاڑی ءِ سر ءَ کنگ بیتگ –

اے اُرش ءِ زد ءَ اتکگیں چینی شھری جی ڈی اے ھسپتال ءَ برگ بیتگ اَنت – دمگی رسانکدر ریڈیو زرمبش ءِ رد ءَ یک دمگی مردمے ءَ گُشتگ کہ چریشی ءَ سَے ایمبولینس جی ڈی اے ءِ نادراہ جاہ ءِ نیمگ ءَ روگ ءَ گندگ بیتگ اَنت –

دمگی مردمانی رد ءَ اُرش ءَ.ہد ھسپتال بند کنگ بیتگ ءُ ناکہ ھسپتال ءِ تہ ءَ روگ ءَ کِلگ ءَ اَنت ءُ ناکہ اود ءَ جاڑیگیں مردماں درایگ ءَ کِلگ ءَ اَنت –

بلوچستان ءِ شھر گوادر ءَ چینی انجینئیرانی سرءَ تراک کنگ بیتگ ءُ نھ مردمانی مرگ ءِ ھال اِنت۔

سربیتگیں ھالانی ردءَ بلوچستان ءِ زرباری شھر گوادر ءَ چینی انجینئرانی اُرش کنگ بیتگ کہ اِشی سوب ءَ داں انگت نھ چینی انجینئر مرتگ اَنت، ءُ بازینانیٹپی بیگ ءِ ھال اِنت، 

اھوالانی ردءَ اُرش مروچی آدینگ ءِ بیگاہ ءِ وھدءَ یک روڈ ءِ سرءَ کار کنگ اُرش کنگ بیتگ اے کار جاہ سی پیک پراجیکٹءِ بھر اِنت۔ 

لس اھوالانی ردءَ نھ مردم اُرش ءِ آسر ءَ مرتگ اَنت وھدیکہ سرکاری اھوال اے درگت ءَ انگت آیگ پشت کپتگ اَنت، دومی نیمگ دو زھگانی ھماُرش ءِ وھد ءَ بیرانی ءِ ھال اِنت، ءُ سئے لس مردم ٹپی ھم بیتگ اَنت۔

سرکاری اھوالانی ردءَ اے اُرش یک وت کُشءِ تراک اِنت، داں انگت ھچ گل ءَ اُرش ءِ زمہ واری نہ زرتگ۔ 

زانگ بہ بیت اے ھال انگت دیمروی ءِ تہءَ اِنت۔ 

سر بیتگیں ھالانی رد ءَ پنجگور ءِ دمگ ھدابادان ءَ سلاہ بندیں مردمانی تیرگواری ءَ یک مردمے بیران ءُ یکے زدگ بیتگ –

وئیل پنجگور ءِ دمگ ھدابادان جلالی ھاک ءَ پیش اتکگ کہ اود ءَ سلاہ بندیں مردمانی تیرگواری ءَ صغیر نامیں مردمے بیران ءُ کریم جان نامیں مردمے زدگ بیتگ –

زدگ ءُ بیران بیتگیں مردم ھردوک نادراہ جاہ ءَ سر کنگ بیتگ اَنت –

ھمے وڑ ءَ تربت ءِ دمگ سامی ءَ تیرگواری وئیلے ءَ یک مردمے بیران بیتگ –

گیشیں ھالانی رد ءَ کیچ ءِ دمگ سامی ءَ سلاہ بندیں مردمانی تیرگواری ءَ شاہ جان نامیں مردمے بیران بیتگ –

ھردوکیں وئیلانی بارو ءَ دگہ سرپدی نہ بیتگ ءُ پولیس ءَ ھردوکیں وئیلانی بارو ءَ پَٹ ءُ پول کنگ ءَ اِنت –

بلوچستان ءِ تیابدپی شھر گوادر بازیں روچاں دریاورد ءُ دگہ تکاں بندوکیں مردمانی زھرشانی برجاہ اَنت –

زھرشانی گوادر ءَ بجلی، آپ ءُ زر ءَ لَٹ ءُ پلوکیں ماھیگانی نسل کشی ءِ ھلاپ ءَ بیگ ءَ اَنت ءُ آیانی گوشگ اِنت گوادر ءَ دری مزنیں ٹرالرنگ بیگ ءَ اَنت ءُ چریشی ءَ بازیں کچے ءَ مھلوک ءِ روزگار الگار بیگ ءَ اَنت –

ھمے وڑ مروچی گوادر ءَ چائینز ٹرالرز ءُ سندھ ٹرالرز ءِ گیر کانونی ءَ بلوچ زر ءَ آیگ ءُ اود ءَ ماھیگانی نسل ءِ کُشی ءِ ھلاپ ءَ پرپٹ روانک کش اِتگ –

روانک گوادر ءِ شھر ءَ بازیں پَرپٹانی ھواری ءَ در اتکگ ءُ دیم پہ سربندن ءَ دو روچاں برجاھیں نندانک ءَ شتگ –

زانگ بہ بیت گوستگیں روچ ءَ گوادر ءَ ھواریں دمگ سربندن ءَ آل پارٹیز ءِ نیمگ ءَ بجلی، آپ ءُ زر ءَ گیرکانونی ٹرالرنگ ءِ ھلاپ ءَ نندانک برجاہ اِنت –

دومی نیمگ ءَ گوستگیں روچ ءَ چہ سرکاری واک یکشل ءَ زھرشانی کنوکانی گور ءَ گپ ءُ تران ءَ روگ ءَ اَنت بلے تنی وھدی آیانی لوٹ سرجم نہ بیتگ اَنت چریشی ءَ زھرشانی کنوکاں نندانک تنی وھدی ھلاس نہ کرتگ-

زھرشانی کنوکانی گوشگ اِنت اے نندانک ھما وھد ءَ برجاہ بیت اِنت تانکہ لوٹ سرجم نہ بنت ءُ اے نندانک ءِ سروکی ءَ جماعت اسلامی سیکرٹری مولانا ھدایت رحمان کنگ ءَ اِنت –

دگ ءِ بندی ءَ ھردوکیں نیمگاں روانی مھتل اَنت ءُ رؤ آیوکیں مساپراں جنجالانی دیمپانی اِنت –