TBP Balochi

بلوچ وومن فروم ءِ جارکش ءَ وتی بیان ءِ تہ ءَ گْوشتگ کہ رکھنی وئیل ءُ محراب پندانی ءِ کوش ءَ گوں تُرندی ءَ ایر جتگ ءُ گْوشتگ کہ ریاست ءِ پرز اِنت کہ ھرچ وڑ وتی شھریانی جان ءُ مال ءَ بہ پھریز اِیت-

جارکش ءَ گْوشتگ کہ گوستگیں روچاں بارکھان ءَ بوتگیں وئیل یک دلپدردناکی یے – دُژمنی ءِ سبب ءِ سر ءَ کجام یک مردمے لوگانی تہ ءَ پُترگ ءُ دودانی لگتمال کنگ ءِ ھک کس ءَ نیست –

آئی ءَ دیمتر ءَ گْوشتگ کہ رکھنی ءِ دمگ ءَ الھی بخش ءِ لوگ ءَ شپ ءِ ساھت دوازدہ ءَ ناشناسیں مردم لوگ ءَ پُترتگ ءُ تیرگواری ءِ کتگ ءُ سے مردم کُشتگ ءُ اشانی تہ ءَ یک زالبولے ھم ھوار اِنت ءُ شیرمچیں چُک رابیعہ بلوچ ھم ٹپی بوتگ-

جارکش ءَ وتی گپ دیمتر ءَ برتگ ءُ گْوشتگ کہ بلوچستان ءَ اشی ءَ چہ پیش ھم اے وڑیں وئیل بوتگ اَنت – ملک ناز ءُ کلثوم ھم وتی چکانی دیم ءَ کُشگ بوتگ اَنت اے وڑیں وئیل یکشلہ برجاہ ءَ اَنت ءُ اشی ءِ گر ءُ دار ءِ کنگ ءَ ریاست بے سوب اِنت چریشی ءِ آسر ءَ نگیگیں جاور ردوم زورگ اَنت ءُ اے وڑیں وئیل یکشل ءَ گیش بوان اَنت –

جارکش ءَ وتی گپ دراج کش کتگ ءُ گْوشتگ کہ چیزے روچ ءَ پیش ٹرانسپورٹ کمپنی ءِ واھند دولت لھڑی ءِ چُکانی دست ءَ لُٹ ءُ کٹاں چہ مھراب ءِ کوش ءِ اے زالمیں ءُ بے راستیں چاگرد ءِ پدری اِنت کہ اود ءَ راھبندی ءِ ھچ وڑیں ھکمرانی گندگ نَیت-

جارکش ءَ گْوشتگ کہ محراب پندرانی ءِ میڈیکل رپورٹ ھم اَتکگ اَنت زانگ بیت چُک ءِ سر ءَ چون بے رھمے ءَ لَٹ ءُ کُٹ اش کتگ – محراب بلوچ ءِ ھمراھی ءَ آئی ءِ سیاد ھم لَٹ ءُ کُٹانی نشانگ کنگ بیتگ کہ آ وتی ءُ مھراب ءِ سر ءَ بوتگیں زوراکی ءِ گواہ ءَ اِنت-

بلوچ وومن فروم ءَ ھکومت ءَ گوں دزبندی کتگ کہ اے دوئیں وئیلاں ھواریں مردماں زوت ءَ چہ زوت دزگیر بہ کنت ءُ شیرمچیں رابیعہ بلوچ ءُ محراب بلوچ ءَ ھک دیَگ بہ بیت ءُ حکومت بلوچستان ءَ گیش بوؤکیں سیلکاری ئیں وئیلانی گر ءُ دار ءِ جوانیں گامگیجے بزور اِیت-

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی ءَ چار ھزار ءُ چار سد ءُ چاردہ روچ سرجم بوتگ – مروچی بی ایس او پجار ءِ سرکماش زبیر بلوچ، گوستگیں سرکماش گوھرام اسلم، بلوچ یکجھتی کمیٹی ڈپٹی آرگنائزر عبدالوھاب بلوچ ءُ دگہ پگرانی منوگراں بنجل ءِ تر ءُ تاب کتگ ءُ بیگواھیں مردمانی کھول ءِ گوم ءَ دلپدردی درشان اتگ –

ھمے وھد ءَ وی بی ایم پی ءِ رھشون ماما قدیر بلوچ ءَ اتکگیں مردمانی میان ءَ باوست کنان ءَ گوشتگ کہ پاکستان بلوچستان ءِ بازیں دمگ ءَ پوجی لشکرکشی ءُ بمبگواری کنگ انت – اقوام متھدہ ءَ ھوار میان اُستمانی انسانی ھکانی ادارہ پاکستان ءِ تہ ءِ زورانسری آوار جنی ءَ منّ انت ءُ اے گپ ءِ پدّرائی کن انت کہ پاکستانی ایجنسیانی دست ءَ ھزارانی کچ بلوچ آوار جنگ ءُ وتی چیریں زنداناں بندیگ کنگ بوتگ ءُ سک باز لٹ ءُ کٹ کنگ انت –

ماما قدیر بلوچ ءِ گوشگ ات کہ پاکستان ءِ وڑیں انسانی ھکدار، ایمنی، ھک ءُ میان استمانی کانوداں چہ زبھریں ملک ءِ تہ ءَ انسانی ھکانی لگتمالی سر ءَ آھانی ھچ نگوشگ ءُ اھانی کِرداں چیردئیگ دلپدردی تکانسری ات – اقوام متھدہ وڑیں میان استمانی ادارھے ءُ دنیا ءِ تہ ءَ انسانی ھکانی منوگریں ڈیھانی گامگیج نہ زورگ ءِ سوب ءَ پاکستان ءِ تہ ءِ وتگڑیں جمھوری ھاکم ءُ آئی ءِ ایجنسی بلوچستان ءِ تہ ءَ انسانی ھکانی لگتمالی ءَ روچ پہ روچ گیشی آرگ انت – اگاں آھاں دزمانجنی نہ کرت ءُ بلوچ راج ءِ سر ءَ بؤکیں زوراکی نہ داشت انت گڑا بلوچستان ءِ تہ ءَ بلاھیں انسانی دردناکیں وئیلے ودی بیت اِنت –

ماما قدیر بلوچ ءَ گوشتگ کہ ما انسانی ھکانی گل ءُ میان اُستمان ءَ چہ لوٹ کنیں کہ آ بلوچستان ءِ تہ ءَ بووکیں انسانی ھکانی لگتمالی ءُ بلوچستان ءِ تہ پوجی لشکر کشی ءُ بمبگواری دارگ ءِ ھاتر ءَ توار چست بہ کن انت –

سربوتگیں ھالانی رِد ءَ بلوچستان ءِ تیاب دپی دمگ گوادر ءَ ناشناسیں مردماں یوفون ٹاور مانداشتگ –

ناشناسیں مردوماں دوشی شپ ادار دو ءَ زیارت مچی ءِ ٹاور ءِ سر ءَ اُرش کتگ ءُ ٹاور ءُ آئی ءِ سرجمیں مشینری مانداشتگ ءُ شتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ ٹاور ماندارگ ءِ زمہ واری منّ اِتگ ءُ گوشتگ کہ مئے سرمچاراں گوستگیں شپ ءَ ادار دو ءَ زیارت مچی ءَ یوفون ٹاور ءِ سر ءَ اُرش کتگ ءُ دراھیں مشین ءُ سامان مانداشتگ اَنت-

جارکش ءَ گوشتگ کہ یک نیمگے زورگریں پوج سی پیک دگ ءِ کش ءُ گور ءَ دمگی میتگاں پہ زور لڈ ءُ بار کنگ ءَ لاچار کنگ ءَ اِنت ءُ دومی نیمگ ءَ وتی پوج ءِ پھریزگ ءَ چین ءِ کمک یک موبائیل پون ٹاور ءِ جتگ ئِے کہ اے کمپنی پاکستانی پوج ءَ پائدگ دیگ ءَ اِنت –

گڈسر ءَ میجر گوھرام بلوچ ءَ شوربندیاں نہ منّ ایں مئے اُرش زورگیریں پوج ءِ سر ءَ بلوچستان ءِ آجوئی ءَ تاں برجاہ مان انت –

نیٹو ءِ یک اگدودارئے ءَ گپ کنان ءَ گُشتگ کہ اوگانستان ءَ تالبان ءِ گرگ ءَ پد کساس ھزدہ ھزار مردم چہ کابل ءِ بالی پَٹ ءَ درکنگ بیتگ اَنت –

خبررساِ ایجنسی روئٹرز ءِ رد ءَ نیٹو ءِ یک اگدو دارئے ءَ نام پدر نہ کنگ ءِ شرت ءَ گوشتگ کہ اوگانستان ءَ بازیں مردمے درایگ ءَ بے تاھیر اَنت –

دگہ یک ھالے ءِ رد ءَ مسیت ءِ مُلایے ءَ تالبان ءَ دزبندی کتگ ءُ گُشتگ کہ اوگانستان ءِ گرگ ءَ پد اولی آدینگ ءِ نماز ءَ مھلوک ءَ ھمسنتی ءِ کڈن کتگ اَنت –

برتانوی خبر رساں ادارے روئٹرز ءِ رد ءَ اوگانستان ءَ تالبان ءِ گرگ ءَ پد پشمبے ءِ روچ ءَ بنجاھی شھر کابل ءَ ھوار بازیں شھراں زھرشانیانی برجاہ بیگ ءَ پد تالبان ءَ وتی ھکم نامہ شنگ کرتگ –

یک چم دیتگیں مردمے ءِ رد ءَ رودراتکی شھر اسد آباد ءَ تالبان ءِ جنگولاں یک مُچے ءِ سر ءَ تیرگواری کرتگ ءَ چریشی ءَ بازیں مردمانی بیرانی ھال بیتگ اَنت –

یک دگہ چم دیتگیں مردمے ءِ رد ءَ کابل ءَ یک روانکے ءِ سر ءَ تیرگواری ءِ وئیل بیتگ کہ تالبان ءَ برزی تکاں تیرگواری کرتگ –

گوشگ بیت اِنت کہ ھما روچ بزانکہ نوزدہ سد ءُ نوزدہ ءَ وھدیکہ برطانوی کنٹرول ءَ پد وتی آجوئی ءِ شاتمانی ءَ دارگ ءَ اَنت – چاگردی رسانکجاھاں دگہ یک تامر بندئے ءَ کابل ءَ مردین ءُ جنیناں یک سیاہ، سھر ءُ سبز رنگیں راجی بیرک چست کرتگ اَت – تامر ءِ تہ ءَ گندگ بیت کہ “مئے بیرک مئے پجار” ءِ اوگام ءَ جنگ ءَ اَنت –

رسانکدرانی رد ءَ بازیں جاھاں زھرشانی کنوکاں تالبان ءِ اسپیتیں بیرک ءِ درگ ءَ گندگ ءَ کاینت اِنت –

روئٹرز ءِ رد ءَ تالبان ءِ جارکش ءِ نیمگ ءَ اے جاورھانی ھچ وڑیں ھال نیست اِنت –

اے ھم چارگ بیت اِنت کہ اوگانستان ءِ بازیں جاھاں زھرشانی کم بیتگ اَنت بلے اود ءَ نندوکیں مردم اے وھد ءَ درایگ ءُ روگ ءِ واستا جیڑگ ءَ اَنت –

دمگی نیوز ایجنسی پژواک اوگان ءِ رد ءَ اوگانستان ءِ راجی بیرک چست کنگ ءَ جلال آباد ءِ دمکاں زھرشانی کنوکانی سر ءَ تالبان ءَ تیرگواری کرتگ ءُ بازیں کچے ءَ مردم زدگ بیتگ اَنت –

یک نوکیں دنیا ءِ تہ ءَ آیگ ءُ آئی ءِ لزتانی گرگ ءُ وتی وشی ءِ درشانی زھگانی تہ ءَ گندگ ءَ کیت اِنت آ نوک دنیا ءِ تہ ءَ وتی ساہ ءِ زورگ ءَ بندات کنت ءُ الم وتی نا پوھیں مجگ ءَ تیلانک کنگ ءِ جھد ءَ کنت –

ھمے نوک گام جنوکیں زھگانی تہ ءَ نوک گام جنان ءَ کوہ ء سلیمان بلوچستان ءُ پنجاپ ءِ سیمسری دمگاں یکے –

کوہ ء سلیمان ءِ بارو ءَ گوشگ بیت اِنت کہ آ بلوچستان ءِ وشتریں دمگانی تہ ءَ یکے کہ اود ءَ مردم مولمانی وھد ءَ تر ءُ تاب ءَ رو اَنت دری مھلوک ھم اود ءَ کاینت ءُ وتی لزتاں سرجم کن اَنت بلے کوہ ء سلیمان ءَ ھواریں دمگ کہ اود ءَ گیشتر نندوکیں مردم بلوچ اَنت ءُ آ اے وھد ءَ گیشتری بھر کساس پنجاپ ءِ تہ ءَ زورانسری مانگیجگ بیتگ –

کوہ ء سلیمان ءِ سبز ءُ شادابیں کوھانی تہ ءَ ودی بیتگیں رابیعہ نامیں ھُردُکیں زھگے وتی دنیا ءِ ناباوریں وابانی تہ ءَ واب بیتگ ءُ ناشناسیں مردماں آئی ءِ گس ءَ دور کتگ اَت ءُ آئی ءِ سھڑیتگیں دل ءِ تہ ءَ یک دردے مان گپتگ اَت –

گوشگ بیت اِنت آئی ءِ ناباوریں وابیں چمانی دیم ءَ آئی ءِ کھول ءِ سَے مردم مرگ ءِ ھجلکشیں آماچ کتگ ءُ ھون آئی ءِ لوگ ءِ دیم ءَ تلینتگ اَنت –

ھالانی تہ ءَ گوشگ بیتگ کہ رابیعہ ءِ لوگ ءَ ناشناسیں مردماں کوہ ء سلیمان ءِ دمگ بوٹہ ءَ ھبدہ اگست ءِ تھاریں شپ ءَ لغاری ٹک ءَ بندوکیں الھی بکش لغاری کہ اے جھان ءِ ایمنی ناگمانی ءَ واب ءَ واب بیتگ اَت کہ آئی ءَ اے سما نہ کتگ اَت سھب ءِ دیم ءَ منی کھول ءِ ھواری ءَ منی بے ساھیں کُنٹ منی ھردُلیں جنک ءِ دیم ءَ ایر بیت اِنت –

اے ھما سیاہ ءُ تھاریں شپ پہ رابیعہ ءِ کسانیں بالاد ءِ سر ءَ جُک اِت کہ آئی ءَ وتی ھُردلیں چمانی دیم ءَ دیست کہ ناشناسیں پَرّگپانچیں مردم منی پیروک ءِ کُشگ ءَ پد منی پِت ءُ مات ءِ کُشگ ءَ پیداک اَنت –

اے مردماں رابیعہ ءِ کھول ءِ ھر سئیں مردم بزانکہ آئی ءِ پت، مات ءُ پیروک کُشت اَنت ءُ ھمے میان ءَ رابیعہ گوں کسانیں بالاد ءَ ٹپی ئیں جاوراں لوگ ءِ تہ ءَ ھونانی ژلمبوکیں بوانی تہ ءَ یلو کت –

رابیعہ ءِ پت ءُ مات ءُ پیروک ءِ کوش ءَ بلوچستان ءَ بیتگیں پیسری کوشانی پژدر ءَ گوشگ ءَ اَنت کہ ھنچش بلوچستان ءِ دگہ جاھاں اے وڑیں وئیلاں ردوم زرتگ –

گوشگ بیت اِنت کہ رابیعہ ءِ پت ءُ مات ءِ لوگ ایف سی ءِ چوکی ءَ چہ یک کیلومیٹرئے ءِ دوری ءَ بیت اِنت اگاں سبکیں ھلوتے بہ بیت گڑا آئی ءِ توار داں ایف سی ءِ گوشاں کپت کنت –

گوشگ بیت اِنت کہ اے وئیل ءَ اگاں ایف سی دزمانجن نہ اِنت بلے آئی ءَ سیکورٹی ءِ نام ءَ لوگاں چہ یک کیلومیٹرئے ءَ دُز ءُ ڈنگانی گرگ ءَ وتی ارد کتگ بلے سَے مردمانی گُٹ برگ بیت ءُ آیانی زھگ زدگ کنگ بیت اِنت تاں تنا وھدی ایف سی ءِ گوش ءُ چمانی دیم ءَ اے بلاھیں مردمانی توار ءُ ھون ھچ رنگ ءَ گندگ ءَ نہ بنت –

ایف سی ءِ جاڑیگ بیگ ءُ لوگ ءَ یک کیلومیڑئے ءِ دوری ءَ اے مزنیں جُست ایر کن اَنت ءُ چریشی ءَ زانگی ھمے گمان ءَ کن اَنت کہ کجا نا کجا اے وڑیں جاھاں سیکورٹی ادارھانی ناکنے الم اڑ اِیت گوں –

کاھان ءَ ھواریں گھبودی گل “ویلفئیر سوسائٹی ءَ اے وئیل ترندی ءَ ایر جتگ ءُ سرجم ءَ اے وئیل ءِ بارو ءَ پَٹ ءُ پول ءُ جرم ءَ ھواریں مردمانی گرگ ءُ سزا دیگ ءِ لوٹ کرتگ –

بلوچستان ءِ تیابدپی شھر گوادر ءِ ھند سربندن ءَ شھدگ ءِ سر ءَ گوستگیں روچ ءَ بندات بیتگیں نندانکی زھرشانی برجاہ، زھرشانی سجوئیں شپ ءَ برجاہ بیتگ –

زھرشانی کنوکاں سربندن ءَ مزن شھدگ بند کتگ ءُ نشتگ اَنت، زھرشانی کنوکاں گون ءَ گپ ءُ تران ءَ گوستگیں شپ ءَ سرکاری واک ھم سر بیتگ اَنت بلے بے سوب بیتگ اَنت –

زھرشانی ءَ آل پاٹی ءِ نیمگ ءَ کنگ بیتگ زاھرشانی ءَ نازیں کچے ءَ مردم ھوار اَنت ءُ مردمانی گوشگ اِنت سربندن ءَ ھوار گوادر ءِ کش ءُ گوراں بجلی، آپ ءُ دگہ آسراتی سرجم کنگ بہ بنت –

زھرشانی ءَ گوستگیں شپ ءَ ڈپٹی کمشنر گوادر سر بیتگ بیتگ بلے آئی ءَ زھرشانی کنوکیں مردمانی گون ءَ گپ ءُ تران ءَ پد واتر بے سوب بیتگ اَت-

چریشی ءَ پد گوستگیں شپ ءَ تھسلدار ھم شپ ءَ زھرشانی کنوکیں مردمانی گون ءَ گپ ءُ تران ءَ سر بیتگ اَت بلے زھرشانی کنوکاں سدکی نہ منّ اِتگ ءُ بے سوب بیتگ اَت –

زھرشانی کنوکانی گوشگ اِنت داں مئے لوٹ سرجم نہ بنت ما زھرشانی ءَ یکشل ءَ نشتگ اِنت سرکاری واک یکشل ءَ دروگیں گپ کن اَنت بلے پد ءَ ھچ نہ کن اَنت –

آیانی گوشگ اِنت سربندن ءَ بجلی ٹرانس مٹ نہ بنت ءُ گپتگیں شھزور گاڑی ءُ دگہ لوٹ داں سرجم نہ بنت گڑا مئے زھرشانی نندانک برجاہ اِنت –

زھرشانی ءَ کراچی ءُ گوادر ءِ مزن شھدگ بند کرتگ ءُ ھردوکیں نیمگاں مساپر مھتل اَنت ءُ بازیں جنجالانی دیمپان اَنت –

بلوچستان ءَ مھرم الھرام ءَ سیمی روچ ءَ ھم جتاجتائیں دمگاں موبائل نیٹورک بند کنگ بوتگ اَنت مردم تکانسری یے دیمپان-

سربوتگیں ھالانی رِد ءَ شال ءَ ھوار بلوچستان جتاجتائیں شھراں مروچی سیمی روچ ءَ ھم موبائل ءِ نیٹورک بند اَنت – مھرم الھرام ءَ پھریزی ءِ ھاتر ءَ ھپت محرم ءُ گوستگیں روچ ءَ نُھ مھرم ءِ میان ءَ موبائل ءِ نیٹورک سُھب ءِ ھپت ءَ بگر داں شپ ءِ بے وھد ءَ بند کنگ بوتگ اَنت وھدیکہ مروچی دھمی مھرم ءَ ھم موبائل ءِ نیٹورک بند کنگ بوتگ اَنت-

حکومت ءُ پھازوکانی رِد ءَ مھرم ءَ موبائل نیٹورک ءِ بند کنگ ءُ شھر بند کنگ ءِ شور ءَ فل پروف پھازوکی شور بند کتگ ءُ اشی ءِ سر ءَ کار بوگ ءَ اِنت-

بلے دمگی مردمانی رِد ءَ اے جاوراں چہ نا تھنا شھری تکانسری یے دیمپانی بیت بلکیں اُستان ءَ کرفیو سما کنگ بیت چریشی ءِ آسر ءَ زندگی ءِ آسراتی کار ءُ روزگار ءُ سرجمیں چاگردی کار ءِ اوشت آماچ بنت –

جتاجتائیں دمگاں موبائل نیٹورک ءِ بند بوگ ءَ تکانسری یے دیمپان اَنت مھلوک ءِ گْوشگ اِنت کہ مھلوک ءَ دو نیمگی ھال ایوال ٹرانسپورٹ ءُ کار ءُ روزگار ءِ بند بوگ ءَ مردماں سک باز تکانسری ءِ دیمپانی بیت موبائل نیٹورک بند کنگ دگانی بند کنگ ءُ پھازوکی نام ءِ سر ءَ مھلوک ءَ روگ ءُ آھگ ءِ سر ءَ پابندی جنگ ءَ نادُراہ مساپر ءُ ھاسکار کار ءُ روزگاریں مردم سک تکانسر اَنت-

آیاں گْوشتگ کہ سرکاری بنشون ءِ بے جار ءَ جتگیں کرفیو ءَ وتی پھازوکی ءَ سوبین گوشگ ءَ مزن مزنیں ٹاہ جنت وھدیکہ دومی نیمگ ءَ اُستان ءِ آسراتی زندگی ءِ دارگ ءَ ھوار باپاری جاھانی بند بوگ چہ اربانی ھساب کلدار ءِ تاوان بیت ءُ لاچاریں راج گُژنگی ءَ چہ لاچار بنت-

سیاسی دمگاں، تاجراں ءُ راج ءَ حکومت ءِ اے راجی دشمن ءِ اے چست کتگیں گام گوں تُرندی ءَ ایر جتگ ءُ لوٹ کتگ کہ محرم ءَ پھازوکی ءِ ھاتر ءَ دگہ جوانیں جد ءَ جھدے دیم ءَ بیار اِیت ءُ راج بے ٹاہ ءَ جتگیں کرفیو ءُ موبائل نیٹورک ءِ بند ءِ کنگ ءَ بہ رکین اِیت ءُ مزنیں کچے ءَ کار ءُ روزگار ءِ تاواناں ھوار راج ءِ بُنکی ھکّاں چہ زبھر مہ بیت

سربوتگیں ھالانی رِد ءَ کلات ءِ یونین کونسل نیچارہ ءَ زھریں ورگانی ورگ ءَ یکیں کھول ءِ ھشت مردمانی جاور نگیگ بوتگ کہ آھانی تہ ءَ چُک ءُ زالبول ھم ھوار انت –

نیچارہ ءَ مردم درمان دیگ بوتگ انت ءُ گیشیں الاج ءِ ھاتر ءَ کلات ھسپتال ءَ برگ بوتگ انت –

گیشیں ھالانی رِد ءَ نیچارہ ءَ محمد رحیم نچاری ءِ گِس ءَ کھول ءِ مردم چاھے ورگ ءَ پد بیتاب بوتگ انت کہ آھانی تہ ءَ لھتے مردم بیھوش ھم بوتگ –
بنداتی ھالانی رِد ءَ چاھانی تہ ءَ دلوت کُشیں درمان مان بوتگ –

نادراھانی تہ ءَ محمد رحیم ءُ منیر احمد ءَ ھوار چار زالبول ءُ دو زھگ ھوار انت کہ آ ھما دمان ءَ نیچارہ سول ڈسپنسری ءَ برگ بوتگ انت اودا درمان دئیگ ءَ پد ایمبولینس ءِ سر ءَ کلات ڈی ایچ کیو نادراھجاہ ءَ آرگ بوتگ انت ھمودا آھانی گیشیں الاج بوھگ انت –