TBP Balochi

جھانی نادراھی کرونا وائرس ءَ جھان وتی ارجان جتگ چریشی ءَ انیگیں وھد ءَ گیشتریں نادراہ ھندوستان ءَ دیم ءَ آیگ ءَ اَنت ھمے رنگ ءَ پاکستان ءَ ھم بازیں کچے ءَ مردم بیران بیگ ءَ اَنت –

پاکستان ءَ گوستگیں بیست ءُ چار ادارانی تہ ءَ یک سد ءُ ھژدہ مردم بیران ءُ سَے ھزار ےُ ھپت سد ءُ ھشتاد ءُ پنچ نوکیں نادراہ دیم ءَ اتکگ اَت –

نوک بیران بیتگیں مردمانی ھواری ءَ بیران بیتگیں مردمانی کچ ھژدہ ھزار ءُ نُھ سد ءُ پانزدہ ءَ سر بیتگ اَنت –

واکدارانی گوشگ اِنت گوستگیں بیست ءُ چار ادارانی تہ ءَ چِل ھزار ءُ ھپت سد ءُ سِی شش مردمانی ٹیست کنگ بیتگ اَنت چریشی ءَ سَے ھزار ءُ ھپت سد ءُ ھشتاد ءُ پنچ مردماں نادراھی پدر بیتگ –

پاکستان ءَ کرونا نادراھی ءَ گپتگیں مردمانی کچ ھشت لک پنجاہ ءُ ھشت ھزار ءُ بیست ءُ شش ءَ سر بیتگ اَنت ءُ چریشانی تہ ءَ چار ھزار ءُ نُھ سد ءُ سَے مردمانی جاور نگیگ اَنت –

نادراھی ءِ ترندی ءِ سبب ءَ سرجمیں پاکستان ءَ کار ءُ باری جاہ داں شانزدہ مئی ءَ بند کنگ بیتگ اَنت –

نبشتانک: گاریں چیزّ

ندر پہ دلیریں سنگت آجز جان ءِ نام ءَ

نبشتہ کار: میرین بلوچ

دی بلوچستان پوسٹ

سپر سک دْراج اَت، بَرے جاہ ءِ لڈ ءُ بار اَت ءُ آئی ءَ مُدام وتی تُپنگ ءِ ھواری ءَ وتی ھارمونیم ھم گون اَت بلے اے رندی وتاک ءَ پشکپتگ اَت کہ آئی ءَ ساہ ءِ وڑ ءَ چو دوست اَت۔ آ سک ءَ دلیریں ءُ بامردیں سنگتے اَت ءُ آ گوں ھر کس ءَ مھروان اَت ءُ دومی آئی ءَ سک دم بُرتگ اَت ءُ آئی ءِ بار ھم سک گراں اَت ءُ آئی ءَ یک بلاھیں ابدالیں تُپنگے گون اَت کہ آئی ءِ جند ءِ بار ءَ چہ گران تر اَت بلے آئی ءَ دم برگ ءِ نام نزانت بس رؤگ ءَ اَت ءُ بلے دومی نیمگا دژمن ءَ سرجمیں جاہ ءُ ھند گِپتگ اَت پمیشکا ھچ راہ ءُ دگّ پَچ نیستگ اَت بس ھدا ءِ اُمیت ءَ رواں اَت سُھب ءِ بام ءَ ٹِک داتگ اَت ءُ روچ ءِ کسان کسانیں شھم کوہ ءِ سر ءَ درآیگ ءَ اَت ءُ کُلیں سنگت دیوان ءَ ھور اَت اَنت ءُ ھر یکے ءَ پیش ءِ دست ءِ دِل ءَ اَت ءُ ھر یکے پہ وت سواس گْوپگ ءَ اَت ءُ آئی ءَ سرجمیں شپ گوں پہ آگاھی گوازینتگ اَت۔ ائید ءِ سُھب اَت ءُ آئی کسانُکیں ساھتے بوت کہ آ وپتگ اَت۔

ناگت ءَ آئی ءِ گْوانکو ءَ توار کُت ءُ چار اِت داں گچکی زی ءِ لمبر انت۔ گچکی زی سک بے کرار اَت کہ آئی ءِ چاریں زھگ کوھان اَت اَنت پمیشکا آئی ءَ سَبر نہ بوت ءُ پون ئِے کُت ءُ کمیں ساھت ءَ پد ھال ءُ اھوال بوت “باریں چون انت ساچان گوں سنگتاں ءُ چون بوتگ شمئے ائید باریں پسے کُشتگ یا اِنّا” آئی سرجمیں جُست یکپارگی کُت اَنت “جی ساچان سنگت دُرست وش انت پد ءَ گچکی زی ءَ دُراینت “من ترا جُست کُت چون بوتگ شُمئے ائید؟” آئی ءِ دپ گُنگ بوت ءُ واب کپت ءُ آ واب ءِ تھ ءَ روگ ءَ اَت پہ وتی وتاک ءَ من ھم وتاک ءَ روگ ءَ اَتاں بلے آ من ءَ چہ دور گِستا اَت۔ وھدے من چار اِت داں وتاک یک ڈنّے ءُ ڈنّ سر جاھے جاھے گوں پُراں سر ءُ لینڈ اَت ءُ پس کوش ءِ جاہ ءَ پسے جون ھم کپتگ اَت کہ ائید ءَ کُشتگ اَت ئِے بلے آ وتی کُڈُّک ءِ تہ ءِ پُراں دست موش کنگ ءَ اَت من ءَ انچُش گُمان بوھگ ءَ اَت کہ آئی وتی چیزّے گار کُتگ بلے آ پد ءَ گار بوت ءُ من پہ نھمون پُراں دست موش کُت داں من دیست ھمے پُرانی تھ ءَ یک ھارمونیمے سُتکگیں دار ءِ کپے اَت کہ یازدہ سال ءِ کِسّہ ھمے سُتکگیں دار ءِ سر ءَ لبز ءِ نبشتہ اَت ءَ داں آئی ءِ مجلس ، دیوان ءُ وشی ءَ بگر داں نگیگیں ساھت ءَ دُرستیں یاتاں پرینگ ءَ اَت اے کِسّہ یک دلیرین ءُ ناترسیں مردُمے ءِ کسہ ءِ توسیپ بوھگ ءَ اَت ءُ دار ءِ لمب سُتکگ اَت ءُ لبز سک کسان ءُ ھورت نبشتہ اَت اَنت کسہ ناسرجم اَت ءُ آ گوں کس ءَ وانگ نہ بوت من ھمے سُتکگیں دار کُڈُّک ءِ پُرانی تھ ءَ دُور دات ءُ وتاک ءَ چہ درکپت آں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

پاکستانی پوج ءُ دمگی ڈیتھ اسکواڈ بلوچستان ءِ دمگ مشکہ ءَ بلوچ زالبولانی سر ءَ جنسی زوراکیانی وئیلانی پژدر ءَ جھانی مھلوک ءُ انسان ھکانی گل پاکستان ءُ آئی ءِ سلاہ بندیں کوپگانی ھلاپ ءَ ترندیں برانز چِست بہ کن اَنت بلوچ زالبولاں انساپ بہ دے اَنت –

اے گپانی درشانی بلوچ آجوئی لوٹوکیں رھشون ڈاکٹر اللہ نزر بلوچ شمبے ءِ روچ ءَ چاگردی رسانکجاہ ٹوئٹر ءَ یک ٹوئٹے ءَ کرتگ اَنت –

چہ مشکہ ءَ ھال اِنت پاکستانی پوج ءُ دمگی ڈیتھ اسکواڈ ءِ رُمبیں کارندھاں یک لوگے ءِ سر ءَ بیڑ برتگ ءُ لوگ ءَ جاڑیگیں مردم لَٹ شاپ کرتگ ءُ ترسینتگ اَنت –

یک دمگی ھالرسانے ءِ رد ءَ پاکستانی پوج ءَ لوگ ءَ جاڑیگیں سَے زالبول جنسی زوراکی ءِ نشانگ کرتگ ءُ آیانی ننگ ءُ ناموس پُل اِتگ اَنت –

بلوچ آجوئی لوٹوکیں رھشون ڈاکٹر اللہ نزر بلوچ ءَ وئیل ءِ بارہ ءَ گیش گپ کنان ءَ گوشت: جنوری سال دوھزار ءُ بیست ءُ یک ءَ مشکہ ءِ دمگ جاکو ءَ پاکستانی پوج ءُ دمگی ڈیتھ اسکواڈ ءِ کارندھاں کہ آیانی تہ ءَ دو کارندھانی پجار شیرا ء اھمد، ھدا داد ء عبدلکریم ءُ دگہ ھوار بیتگ اَنت کہ آیاں یک بلوچ شوانگ ھکیم بلوچ ءِ لوگ ءِ سر ءَ بیڑ برتگ ءُ اود ءَ جاڑیگیں سَے زالبولانی گون ءَ جنسی زوراکی کرتگ –

دمگی ھالرسان ءِ رد ءَ وئیل ءِ روچ ءَ پاکستانی پوج ءَ سرجمیں دمگ انگر کرتگ ءُ اود ءَ پَٹ ءُ پول بندات کرتگ، زالبولانی جنسی زوراکی ءَ ھواریں ڈیتھ اسکواڈ ءِ کارندھانی پجار دمگی مردماں کُرتگ اَنت –

بلوچ رھشون ڈاکٹر اللہ نزر ءِ درشانی ءِ رد ءَ بلوچستان ءَ ھزاراں اے وڑیں گیر انسانی امل پاکستانی پوج ءُ آئی ءِ ڈیتھ اسکواڈ ءِ نیمگ ءَ کنگ بیگ ءَ اَنت – بازیں اے وڑیں ناوشیں وئیلاں دمگی مردم ترس ءِ سبب ءَ درشان کت نہ کن اَنت –

آئی ءَ گوشت ما جھان ءِ مھلوک ءُ انسانی ھکانی ادارھاں گوں دزبندی کنیں کہ پاکستان ءُ آئی ءِ ڈیتھ اسکواڈ ءِ ھلاپ ءَ گامگیج بہ زور اَنت ءَ بلوچ زالبولاں انساپ بہ دے اَنت –

زانگ بہ بیت بلوچستان ءَ پاکستانی پوج ءِ نیمگ ءَ لشکر کشیانی وھد ءَ لوگانی پَٹ ءُ پول ءِ وھد ءَ زالبول ءُ چکانی سر ءَ لَٹ ءُ کُٹانی ھال باز بر ءَ رپورٹ بیتگ اَنت گوستگیں ماہ ءَ تربت ءَ پاکستانی ایف سی ءِ کارندہ ءِ دست ءَ یک زھگے ءِ جنسی زوراکی ءِ پیش اتکگ اَت –

تربت وئیل ءَ پد بلوچستان ءَ زھرشانی کنگ بیتگ اَنت، زھرشانیانی پژدر ءَ پوجی کارندہ ءِ دزگیری گامگیج دیم ءَ اتکگ اَت بلے وئیل بارہ ءَ گیشیں گامگیج دیم ءَ نیاتکگ اَنت –

دومی نیمگ ءَ بلوچستان ءَ ھستیں ڈیتھ اسکواڈ کہ آئی ءَ سرکار ءِ دزکمکی ھوار اِنت دُزی ءُ دگہ وئیلاں دزمانجن اَنت بلوچستان ءَ اے وڑیں بازیں وئیل پاشک بیتگ اَنت چریشانی تہ ءَ ڈیتھ اسکواڈ مردمانی سر ءَ لَٹ ءُ کُٹ ءُ دگہ گیر انسانی املاں ھواری گوش اَنت –

بلوچستان ءَ ھستیں انسانی ھکانی گل ءُ بلوچ راجدوستیں گل ڈیتھ اسکواڈ ءِ سر ءَ ایراد گر اَنت ءُ بلوچستان ءَ ھستیں ڈیتھ اسکواڈ ءَ ریاستی نیمگ ءَ کُشت ءُ کوشی مشینری گوشگ ءَ اَنت –

سر بیتگیں ھالانی رد ءَ بلوچستان ءِ دمگ بولان ءَ دگ ءِ وئیلے ءَ چاردہ مردم زدگ بیتگ اَنت ءُ یک مردمے بیران بیتگ –

گیشیں ھالانی رد ءَ وئیل آماچیں مردم مزدور بیتگ اَنت کہ یک گاڑی ءَ سوار بیتگ اَنت ناگتی ءَ گاڑی وئیل ءِ آماچ بیتگ ءُ چریشی ءَ چاردہ مزدور زدگ بیتگ ءُ یکے بیران بیتگ –

دمگدارانی رد ءَ وئیل آماچیں پیک اپ گاڑی مشکاف ءَ دیم پہ سبی ءَ روگ ءَ بیتگ کہ راہ ءِ میان ءَ گلٹی بیتگ –

وئیل ءَ پد ایدھی کارندہ وئیل جاہ ءَ سر بیتگ ءُ آیاں زدگ بیتگین ءُ بیران بیتگیِ مزدور چِست کرتگ ءُ ڈھاڈر ءَ سول ھسپتال ءَ سر کرتگ اَنت –

بلوچستان ءَ ھمک روچ دگانی بیتگیں وئیلاں بازیں کَچے ءَ مردمانی زدگ بیگ ءُ بیرانیانی ھال یکشل ءَ رسانکدراں پیداک اَنت، اے درگت ءَ دگانی سر ءَ پرکاریں سرکاری کارندہ تنی وھدی اے وئیلانی گر ءُ دار کنگ ءَ بے سوبی ءَ گندگ ءَ آیگ ءَ اَنت –

دراج کور ءَ پوجی کارمند ءِ دورجنگیں توپک ءِ گون ءَ نشانگ کُتگ ءُ کُشتگ – میجر گوھرام بلوچ

سربوتگیں ھالانی رِد ءَ گوستگیں روچ ءَ ناشناسیں سلاہ بندیں مردماں آواران ءِ دمگ دراج کور ءَ برجاھیں پاکستانی پوج ءِ پانگس ءِ سر ءَ اُرش کُتگ –
اُرش ءَ پاکستانی پوج ءَ جانی تاوان رس اتگ ءُ سلاہ بندیں مردم درآیگ ءُ رؤگ ءَ سوبمند بوتگ انت –

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں زیکیں روچ ءَ آدینگ ءِ بیگاہ ءِ ادار پنچ ءَ آواران ءِ دمگ دراج کور ءَ برجاھیں پوجی پانگس ءِ یک پوجی کارمندے دورجنگیں توپک ءِ گون ءَ نشانگ کتگ ءُ کُشتگ-

جارکش ءَ گوشتگ کہ ایردستیں بلوچستان ءِ آجوئی ءَ تاں زورگیریں پوج سر ءَ مئے اُرش برجاہ مان انت –

سر بیتگیں ھالانی رد ءَ بلوچستان ءِ جتا جتائیں ھنداں بیست ءُ چار ادارانی تہ ءَ چار بندیگیں مردم یل کنگ ءُ وتی لوگاں سر بیتگ اَنت –

یل بیتگیں مردمانی تہ ءَ یک سال ئِے ءُ شش ماہ ءَ پیسر شال ءِ دمگ سریاب ءَ بیگواہ بیتگیں میر اھمد بنگلزئی جھمنند اسپلینجی مستونگ یل کنگ بیتگ –

کیچ ءِ دمگ گورکوپ ءَ چار ستمبر دوھزار ءُ نوزدہ ءَ آوار جنگ بیتگیں عثمان مقبول ھم یل کنگ بیتگ ءُ وتی لوگ ءَ سر بیتگ –

دومی نیمگ ءَ بیگواھیں اعظو لانگانی مری مھمد پنام ءِ پٹو چھلگری مری گوستگیں روچ ءَ ھرنائی ءَ یل کنگ بیتگ ءُ وتی لوگاں سر بیتگ اَنت –

یل بیتگیں مردمانی یل بیگ بلوچستان ءَ گار ءُ بیگواھیں مردمانی واستا جھد کنوکیں گل وائس فار بلوچ مسنگ پرسنز ءَ راست کرتگ اَنت –

وائس فار بلوچ مسنگ پرسنز ءِ گوشگ اِنت بیگواھیں مردمانی یل وشی یے ءُ ما سرکار ءَ ھمے اُمیت ءَ دارایں کہ آؤکیں ائید ءِ وشی ءَ درستیں بیگواھیں مردماں یل دنت –

زانگ بہ بیت گوستگیں ھپتگ ءَ لھتے مردم یل بیتگ اَنت کہ آیانی تہ ءَ کمبرانی برادری ھم ھوار اَنت، بیگواھیں مردمانی کھول یل بیتگیں مردمانی یل بیگ ءَ وشی درشانگ ءَ اَنت ءُ وتی مردمانی ودار ءَ چم اش راھیگ اَنت –

نبشتانک: ڈاچی پوک نہ بیت

نبشتہ کار: ابدلستار بُگٹی

دی بلوچستان پوسٹ

”سڑدار، اگاں کلموّ مئیت گُڑا ڈاچی پُوک اِنت؟”سڑدار: سلیمانی گالوار ءِ بدلتوارے کہ بُنتوار ئِے (سردار) اِنت، کلموّ بلوچی زُبان ءِ زگریں گالے کہ اَربی ءَ (قلمہ) گْوش اَنت ئِے کہ ھمے کُران ءِ گالرِد ءِ وانگ ءَ بنی آدم مسلمان منّگ بیت پوک: چوناھا “پوک” ءِ بازیں مانا بنت بلے اد ءَ اِے گال ءِ بزانت (بے مُز) اِنت بزاں یک چیزے بے بھا زیان بیت یا ماں یک آمیدگِسے ءِ سوڑگ ءَ یک تبکے کَٹّ ایت ءُ دومی برّائین ایت ئِے بزاں سوڑگ ءِ برّائینگ ءِ تبک ءَ پوک گْوش اَنت۔

اِے بتل ءِ پژدر ءِ زانگ ءَ پیش ءَ مارا لھتیں چیز دلگوش کنگ لوٹ ایت کہ بلوچیت وت یک سرجمیں نیکراہ ءُ رھبندے، بلوچ راج ءِ دود ءُ ربیدگ، بلوچ راج ءِ ٹَکری رِد ءُ رھبند (ٹرائیبل روُلز) وت پیلوئیں کانود اَنت کہ آیانی تہ ءَ ھر وڑیں جیڑھانی توجِیل ھست اَنت۔

توری راج ءِ ٹَکرانی میان ءَ کِشت ءُ کِشارانی جیڑہ بہ بنت، بلوچ چاگِرد ءِ تہ ءِ ھمساھِگ ءُ سْیادانی سِیر ءُ سانگانی جیڑہ بہ بنت یا توری دُزّی، ڈُنگی، ویل ءُ جنگانی جیڑہ بہ بنت بزاں اے ڈولیں ھزاریں جیڑھانی توجیلّ بلوچی دود ءُ ربیدگ یا گْوش ئے بلوچیت ءِ تہ ءَ ھست انت کہ یک راجمستریں مُلک ءُ اُلسی سرکاری کانود ءِ توک ءَ بنت دلگوش بَہ اِت کہ من “بلوچیت” ءِ گال ءَ پمیشکا نبیسّ آں کہ منی نز ءَ “بلوچیت” وت یک نیکراھے ءُ من بلوچیت ءَ چہ دین ءُ نیکراہ گیشتر دوست دار آں چی ءَ کہ ما شش ھزار سال ءَ پیش بلوچ اِت ایں چریشی ءَ من اول وت ءَ بلوچ لیکھان ءُ منّ آں، دومی لمبر ءَ ھم من گوں پھر ءُ ناز ءَ وت ءَ بلوچ گْوش آں۔ گُڑا سیمی رند ءَ من مسلمانے آں چی ءَ کہ بلوچیت چہ اسلام نیکراہ ءَ پیش ءَ اَت ءُ تچکیں ٹوک اِنت کہ مرچاں اسلامی وتگڑیں ملکانی کانود اسلامی نیکراہ ءِ رِد ءَ نہ اَنت۔

بہ گِند ئے سرکاری آمیدگِساں سرکاری کانودانی رِد ءَ جج ءُ وکیل بنت کہ پیسر ءَ پِیس ءَ زَر لوٹ اَنت ءُ پد ءَ ھر جج ءُ وکیل سِلکار اَنت بلکیں آمیدگِس ءِ ھر کارندہ سِلکار اِنت آمیدگِس ءَ ھچ کس ءَ مُزّ نہ رس ایت ءُ سوڑگ سک باز دیر درشان بیت پمیشکا انگریزی ءَ گْوش اَنت “جسٹس ڈیلیڈ، جسٹس از ڈینائیڈ” البت بلوچیت ءِ تہ ءَ اِے وڑ ءَ نہ اِنت بلکیں اگاں بلوچ چاگِرد ءَ چیزے جیڑھے ودی بیت گُڑا بلوچ راج ءِ ٹکری سروک زیت وت کا اَنت ءُ مُچ بنت، دوئیں تبکانی زھر ءِ توسگ ءِ تچ تاگ ءَ رند بلوچی رھبندانی رِد ءَ جیڑہ گیش ءُ گیوار کن اَنت انچوشکہ آس ءُ آپ ءِ جِرگہ مئے دیم اَنت آس ءُ آپ ءِ وتی یک رِدے کہ سْیاھکاری، کُشت ءُ کوش ءِ وڑیں جیڑھانی توجیلّ ءَ کارمرز بیت

اگاں یک چیزے دُزّی بیتگ ءُ ھما چیزے ءِ مرچیگیں وھد ءَ نھاد یک لکھ ءُ نیم لکھ ءَ گیشتر اِنت گُڑا بلوچ ٹکری سروک یا دمگی میر ءُ نواب آس ءُ آپ ءِ سوڑگ ءَ زیر اَنت آس ءُ آپ ءِ سوڑگ ءَ پیش دُزی بیتگیں چیز ءِ نیم کلداریں زَرے سردار ءِ ھزانگ ءَ ایر کنائین ایت کہ اگاں دُزّ آس ءَ ما سوچ ایت گُڑا ھما زَراں بارات کہ آئی ءَ ناھکّیں دُزی ءِ تھمت جنگ بیتگ اگاں دُزی بیتگیں چیز ءِ بھا یک لکھ ءُ نیم لکھ ءَ کم اِنت گُڑا شَکی ئیں دُز ءَ میر ءُ نواب ءِ مُچّی ءِ تہ ءَ اسلامی کلمو وانگ بیت یا میست ءِ تہ ءِ برگ بیت ءُ اود ءَ کُران مجید ءِ سر ءَ دست ایر کنت ءُ گْوش ایت کہ منّ اے دُزّی ءِ گُناھیں کار نہ کُتگ یا گل ءَ ھوار نہ ات آں-

نی ما بتل ءِ پژدر ءَ کا ایں کہ اِے بتل ءَ کوہ سلیمان ءِ گالواریں بلوچ، ھاس مری ءُ بُگٹی گیشتر گْوش اَنت کِسہ چو اِے وڑ ءِ انت کہ چَہ یک سادگیں بَاگّیایے(شْوانگ) ءِ بَگّ ءَ یک ڈاچی یے دُزّی بوتگ، آئی ءَ سک باز پٹ ءُ پول کُت کہ وتی ڈاچی ءِ دُزّ ءَ بہ زانان ءُ ڈاچی ءَ درگیج آں بلے بے سوب بوت۔ گُڑا یک نامداریں دُزّے ءِ سر ءَ شَکی اَت کہ گُمان ءَ منی بَگ ھمے مرد ءَ جتگ ءُ ڈاچی دُز اتگ۔مرد ءَ وتی ٹکری سروکاں ھال دات ءُ آ گوں سروکاں ھمراھی ءِ سردار ءِ مُچّی ءَ ساڑی بوت انت۔ آیاں سردار ءَ وتی جیڑہ بیان کُت کہ مارا گُمان ءُ شک اِنت مئے ڈاچی یے پلان ٹکر ءِ مرد ءَ دُزّ اِت ما بلوچی رواج ءِ رِد ءَ وتی پلّو ءِ گرگ ءَ لوٹ کن ایں سردار ءَ دُزّ ءِ ٹکری سروکاں لوٹ دات کہ باندا دُزّ ءُ دُزّ ءِ ٹکری سروک ساڑی بہ بنت کہ اِے جیڑہ گیش ءُ گیوار کنگی انت۔ دومی روچ آتک ءُ دوئیں تبک ءِ مردم ساڑی بوتگ اَنت۔ دوئیں نیمگی سروک سُھل ءُ تْران ءِ آسر ءَ تپاک بوت اَنت کہ ڈاچی ءِ بھا آس ءُ آپ ءِ زَراں برابر نہ کنگ ءَ انت گُڑا سردار ءَ شَک بیتگیں دُزّ ءِ نیمگ ءَ تْرُندیں چمشانکے دات ءُ گْوشت “ تو اڑے کلمو ءَ وان کہ تو اے بزگ ءِ بَگّ نہ جتگ ءُ ڈاچی نہ دُزّ اِت” دُزّ وَ تانسریں جاھیلے ءَ اَت گُڑا سردار ءَ پسّو ئِے دات ءُ گْوشت “سردار من ءَ کلمو وانگ نئیت”-

یک نیمگ ءَ بَاگیا بزگ زھر ءَ بْرانز اَت کہ منی ڈاچی ءِ بھا کم ایرکنگ بیتگ اَنت چیریشی ءَ سوڑگ آس ءُ آپ ءِ نیمگ ءِ نہ شُت، دومی اِے ھیال ءُ وسواساں گار اَت کہ دُزّ وَ بے نیکراہ بنت پمیشکا آیانی دیم ءَ کران مجید ءُ کلمو ھچ بستارے نہ دار اَنت چمیشکا دُزّ کلمو ءَ وان ایت ءُ من پوک بہ آں۔ بلے ھمے دمان ءَ چار اِت ئِے کہ دُزّ چَٹیں جاھیلے کہ کلموّ ءِ وانگ ءَ نہ زانت گُڑا یکپارگی بَاگیا ءِ اوپار سِست ءُ سردار ءِ نیمگ ءِ کوکار ئِے کُت “سڑدار، اگاں کلموّ مئیت گُڑا ڈاچی پُوک اِنت؟” گُڑا گوں اِے گِلّوتگیں کُوکار ءَ دْراھیں مُچّی ءَ کَند اِت ءُ گْوشت کہ اِنّا ناں تئی ڈاچی پوک بیت ءُ نَیکہ تو پوک بَہ ئے پمیشکا اِے بتل ءَ ھما بزگ گیشتر گْوش اَنت کہ وھدے آئی ءَ مُزّ دیگ مہ بیت یا وام وھد ءِ سر ءَ دیگ مہ بنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ سرکار ءِ نیمگ ءَ جھانی وابا کرونا وائرس ءِ سبب ءَ سرجمیں بلوچستان ءَ ھشت مئی ءَ بہ گر داں شانزدہ مئی ءَ بند ارگ ءِ پرمان شنگ کنگ بیتگ-

جار تاک ءِ رد ءَ ٹرانسپورٹ ءُ مزنیں باپاری بنجل سرجمی ءَ بند کنگ بنت اِنت ءُ رو ءُ آیگ ءُ دگہ مُچیانی سر ءَ پابندی جنگ بیتگ –

سرکار ءِ جار تاک ءِ رد ءَ اگاں کسے ءَ سرکار ءِ مسام لگتمال کرت اَنت گڑا آئی ءِ ھلاپ ءَ ترندیں گامگیج زورگ بیت اِنت –

جار تاک ءَ پبلک ٹرانسپورٹ، لوکل ءُ ایندگہ رو ءُ آیانی سر ءَ ھم پابندی جنگ بیتگ اَنت –

بلوچستان ءِ بنجاھی شھر شال ءَ دگانی رو ءُ آ سرکار ءِ نیمگ ءَ بندات کنگ بیتگ اَنت ءُ سرکار ءِ گوشگ اِنت گیشیں رو ءُ آیانی سر ءَ سرجمی ءَ بند آرگ بیتگ ءُ مھلوک سرکار ءِ ایر کرتگیں مسام ءَ بہ منّ اِیت –

گوستگیں روچ ءَ بلوچستان ءَ کرونا نادراھی ءَ دگہ سَے مردم بیران بیتگ اَنت ءُ داں انیگ ءَ کرونا نادراھی ءَ بیران بیتگیں مردمانی کچ دو سد ءُ چِل ءُ شش ءَ سر بیتگ اَنت-

کرونا نادراھی ءَ دگہ یک سد ءُ ھپتاد مردمانی نادراھی پدر بیتگ ءُ اُستان ءَ نادراھی ءَ آماچ بیتگیں مردمانی کچ بیست ءُ سَے ھزار ءُ یک سد ءُ ھشتاد ءُ شش ءَ سر بیتگ اَنت ءُ بیست ءُ یک ھزار ءُ پنچ سد ءُ نُھ مردم نادراھی ءَ دراہ بیتگ اَنت –

جھانی وبا کرونا نادراھی ءَ سرجمیں جھان وتی ارجان جتگ ءُ اے وھد ءَ درسیں ڈیھاں اسرمندتریں ڈیھ ھندوستان اِنت کہ اود ءَ ھمک روچ لَکانی ھساب ءَ مھلوک واٰئرس ءِ آماچ بیان اَنت ءُ بازیں کچے ءَ مھلوک تنی وھدی اے نادراھی ءَ بیران بیتگ اَنت –

پاکستان ءِ مستریں شھر کراچی ملیر ءَ بحریہ ٹاؤن کارندھانی نیمگ ءَ جھنندیں مردمانی زمینانی سر ءَ زورانسری گرگ یک رندے دوبر گوستگیں روچ ءَ بندات بیتگ، بحریہ ٹاؤن ءِ کارمند ءُ سندھ پولیس ءَ لس شھریانی سر ءَ تیرگواری کرتگ ءُ چریشی ءَ یک شھری ءِ بیران ءُ یکے زدگ بیتگ –

دمگی مردمانی رد ءَ بحریہ ٹاؤن ءِ کارمند مزنیں مشینریانی گون ءَ دمگ ءِ آبادیانی سر ءَ بیڑ اش برتگ ءُ جاگھاں کروجگ ءَ بیتگ اَنت چریشی ءَ جھمنندیں مردم برانزگپتت اَنت ءُ پولیس آیانی سر ءَ تیرگواری کرتگ –

چاگردی رسانکجاھاں گندگ بیت اِنت کہ پولیس ءِ کارندھاں شھریانی سر ءَ تیرگواری کنگ ءَ اِنت ءُ یک مردمے زدگ بیگ ءَ گندگ بیت اِنت کہ آئی ءِ سر ءَ ٹپ پر اِنت ءُ لاپ ءَ تیرانی ٹپ پر اَنت –

چریشی ءَ پد دمگی مردمانی سر ءَ پولیس ءُ دگہ کارندھاں لَٹ ءُ کُٹانی نشانگ کرتگ اَنت یک تامربندے ءَ گندگ بیت اِنت یک مردمے ءَ گران کنگ ءَ ھم گندگ ءَ کیت ءُ دگہ یک زدگیں مردمے ءَ بحریہ ٹاؤن ءِ کارندہ زدگیں جاوراں ھسپتال ءَ ابید پولیس ءِ اسٹیشن ءَ برگ ءَ اَنت ءُ پد ءَ دمگ ءِ مردماں دزمانجنی کرتگ ءُ پچ گپتگ –

دمگی مردمانی رد ءَ بحریہ ٹاؤن ءِ انتزامیہ ءَ دمگی مردمانی سر ءَ تیرگواری کرتگ کہ بحریہ ٹاؤن کراچی ءِ زمینانی زورگری ءِ بگیری ءَ برانزگپتگ اَنت چریشی ءَ یک مردمے بیران بیتگ اَت کہ آئی ءِ پجار شوکت بلوچ ءِ نام ءَ زانگ بیتگ اَت ءُ بازیں مردمانی زدگ بیگ ءِ ھال ھم بیتگ اَنت –

چریشانی پژدر ءَ چاگردی رسانکجاھاں کمپئن ءُ سیاسی گل ءُ دگہ ھواریں سیاسی مردماں بحریہ ٹاون ءِ زورگری ءِ بگیری ءَ زھر ءِ درشان کرتگ –

چاگردی رسانکجاہ ٹوئٹر ءَ بندات بیتگیں کمپئن ءَ بازیں مردماں بھر زرتگ ءُ پاکستان ءَ پنچ ادارانی تہ ءَ #SayNoToBahriaTown ھیش ٹیگ درستاں سر بُر بیتگ –

ٹوئٹر ءَ لس مردماں زمینانی زوگری ءِ بگیری ءَ زھر ءِ درشان بیتگ ءُ زمیناں بنکی مردمانی ھک ءَ وتی وتی لیکہ ءُ زھر درشان کرتگ اَنت –

ھمے وڑ ءَ پی پی پی سندھ ءِ باسک سید ناسر ھسین شاہ ءَ نبشتگ کرتگ اے درچ ءَ سرجم ءَ گامگیج زورگ بیتگ ءُ سرکار ءِ نیمگ ءَ اسسٹنٹ کمشنر، واکدار ءُ دزمانجنیں پولیس آفیسرانی ھلاپ ءَ گامگیج زورگ بیتگ، زدگ بیتگیں مردمانی چار ءُ گداری بیگ ءَ اِنت ءُ بنجاھی پتر ءِ باسک عبدالکریم ءُ اُستانی پتر ءِ باسک سلیم بلوچ ھم ھوار اَنت ءُ اے مردماں الم انساپ رس اِت اِنت –

ھمے وڑ ءَ دگہ ٹوئٹر کارمد کنوک ءُ انسانی ھکانی واستا گپ جنوکیں ایما خان ءَ ملک ریاض ءِ اکس تالان کرتگ ءُ نبشتگ کرتگ کہ ملک ریاض یک انسانے ءِ نام نہ اِنت ملک ریاض مئے تہ ءَ کپتگیں نشان اِنت وتی دولت ءُ مال ءِ زور ءَ اے ڈیھ ءِ سیاست، آمیدگس ءُ پوج وتی دست ءِ پنجگاں کرتگ اَنت –

ملیر ءَ نندوکیں مردمانی گوشگ اِنت کہ بحریہ ٹاؤن ءِ واھند مئے پِت ءُ پیروکی میراساں کروجگ ءُ اد ءَ مزنیں ماڑی مِک کنگ لوٹ ایت ءُ چُشکہ اے مئے بُنکی ھک اَنت ءُ کرناں ما اے زمینانی سر ءَ آباد اِنت –

آیانی گوشگ اِنت کہ ما وتی زمیناں ھچبر دات نہ کن ایں مارا اگاں زمینانی واستا ھرچی کنگ کپ ایت ما چریشی ءَ چَک ءُ پد بیت نہ کن ایں –

گوستگیں بازیں روچاں ملیر ءِ بازیں جاھاں گبول گوٹھ ءُ دگہ جاھانی سر ءَ زمینانی زورگری ءَ بلڈوزر ءُ دگہ مشینری کاربندگ بیگ ءَ اَنت –