TBP Balochi

سربوتگیں ھالانی رد ءَ بلوچستان یونیور سٹی ءَ جھانی وبا کرونا وائرس ءِ پھریزگ ءِ ھاتر ءَ ویکسینیشن کنگ المّی کنگ بوتگ بید ء ویکسینیشن ءَ ھچ کس ءَ یونیورسٹی ءَ رؤگ ءُ ھاسٹل ءَ نندگ ءِ موکل دیگ نہ بیت – یونیورسٹی ءِ کلاس یازدہ روچ ءِ ھاتر ءَ بند کنگ بوتگ انت –

رجسٹرار ءِ رِد ءَ بلوچستان یونیورسٹی ءَ رؤگ ءِ ھاتر ءَ کرونا ویکسینیشن المی کنگ بوتگ – درسیں ماسٹر ءُ دگہ کاردار ءُ نودربراں کرونا ویکسینیشن جنگ ءِ ھاتر ءَ گوشگ بوتگ کہ آ تاں سی ءُ یک اگست ءَ ویکسینیشن بجن انت –

یونیورسٹی رجسٹرار ءِ رِد ءَ ھر ھما کس ءَ کہ ویکسینیشن نہ جتگ آئی ءَ یونیورسٹی ھاسٹل ءَ نندگ ءِ موکل دیگ نہ بیت اِنت – بلوچستان یونیورسٹی ءَ رؤگ ءِ ھاتر ءَ نادرا ءِ ویکسینیشن سرٹیپکیٹ المی انت –

بلوچ لبریشن آرمی ءَ بلوچستان ءَ پاکستانی لشکر ءُ دگہ تکاں بیتگیں اُرشانی ششماھی جنگانی ھال “دک ” نام ءَ شنگ کرتگ اَنت –

ھال ءِ تہ ءَ آئی ءَ جنگ ءُ چوپاں نمیران بیتگیں نام ءُ اکس ءَ جنگانی ھال ھوار گپتگ اَنت –

دک ءِ تہ ءَ بلوچ لبریشن آرمی ءَ گُشتگ کہ سال دوھزار ءُ بیست ءُ یک ءِ بنداتی ماہ ءَ بہ گر داں ششمی ماہ ءَ پاکستانی پوج ءِ سر ءَ یکشلیں اُرش برجاہ داشتگ اَنت –

آئی ءَ گُشتگ کہ سال ءِ بنداتی ماہ ءَ داں ششمی ماہ ءِ وھد ءَ بلوچ لبریشن آرمی ءِ سرمچاراں پاکستانی پوج ءِ سر ءَ کوہ ءأ شھراں جنگانی تہ ءَ جوانیں رپکاں دشمن نشانگ کرتگ ءُ پروشی ءِ آماچ کرتگ –

آئی ءَ گُشتگ کہ ھمے سال ءِ بنداتی ماہ ءَ داں جون ءِ ماہ ءَ گل ءِ سرمچاراں پاکستانی پوج ءُ آئی کمکارانی سر ءَ سِی ءُ چار اُرش کرتگ اَنت کہ چریشانی تہ ءَ بیست ءُ دو بمب اُرش ھوار اَنت-

آئی ءَ گُشتگ کہ سرمچاراں پاکستان ءُ آئی ءِ ھواریں چین ءِ استھسالی منسوبہ سی پیک پراجیکٹ ءِ سر ءَ کار کنوکیں کمپنی ءَ ھوار پوج ءِ شش گاڑی آئی ای ڈی ءِ نشانگ کرتگ ءُ تباہ کرتگ اَنت ءُ چریشی ءَ استھسالی کمپنی ءِ کارمند ءُ پوج ءَ بازیں کچے ءَ تاوانانی دیمپانی کنگ کپتگ –

آئی ءَ گُشتگ کہ اے اُرشاں پاکستانی پوج ءِ شست ءُ ھپت کارمند مرتگ اَنت ءُ بیست ءُ نُھ زدگ بیتگ اَنت ءُ دشمن ءِ شش دمگی کمکار مرتگ ءُ دَہ زدگ بیتگ اَنت –

آئی ءَ گُشتگ کہ شش ماہ ءِ وھد ءَ سرمچاراں زورگریں پوج ءِ سَے پوسٹ ءُ بنجل دستیگ کرتگ اَنت کہ چریشانی تہ ءَ کاھان ءُ مارواڑ ءَ ھوار شال ءِ کُوچگی دمگ ءَ لیویز پوسٹ دستیگ کنگ ھوار اَنت – کاھان ءِ اُرش ءَ زورگریں پوج ءِ ھپت کارمند ءُ ھمے وڑ مارواڑ ءَ بیست ءُ پنچ کارمند مرتگ اَنت –

آئی ءَ گُشتگ کہ مئی ءِ ماہ ءَ بلوچ لبریشن آرمی ءِ پنچ سپاھیگ شھید بیتگ اَنت کہ چریشانی تہ ءَ بی ایل اے ءِ مزج نامیں کماندار میرعبدالنبء بدوزئی بنگلزئی پنام ءِ چنکا میر، وھدیکہ سِی ءُ یک مئی ءَ پنجگور ءِ دمگ کیلکور ءَ زورگریں پوج ءِ گون ءَ جنگ ءَ شھید ھاپز حمید بلوچ شھید بیتگ ءُ ھمے روچ ءَ مارواڑ ءَ بنجل دستیگ کنگ ءَ بی ایل اے “فتح اسکواڈ ” سَے سنگت آفتاف جتک پنام ءِ وشین، شاویز زھری پنام ءِ سارانگ ءُ ھنگل مری پنام ءِ لیلا شھید بیتگ اَنت –

آئی ءَ گُشتگ کہ بی ایل اے ءَ ھما وھد ءَ شھری جنگ ءَ وتی کاروائی برجاہ داشتگ اَنت چریشی ءَ زورگریں پوج ءُ آئی ءِ کمکاراں جانی ءُ مالی تاوانانی دیمپانی اِنت –

آئی ءَ گُشتگ کہ بی ایل اے اشی ءَ ستک داریت کہ گڈی سوبمندی ءِ جد ءُ جھد ءَ برجم دارگ بیت اِنت ءُ بلوچ ڈیھ ءِ سر ءَ زورگریں پاکستان ءُ آئی ءِ ھواریں مردمانی سر ءَ ترندیں اُرش کنگ بنت اِنت –

بلوچستان ءِ دمگ گوادر ءَ سر بیتگیں ھالانی رد ءَ مکران رجیم ءَ بجلی ءُ آپ ءِ نہ بوگ ءِ سبب ءَ زھرشانی، زھرشانی کنوکاں گوادر ءَ ھواریں ھند سربندن ءِ ھند ءَ جماعت اسلامی ءِ جنرل سیکرٹری بلوچستان مولانا ھدایت الرحمان ءِ چیردستی ءَ مزن شھدگ بند کنگ بیتگ –

زھرشانی نندانک ءِ سبب ءَ کراچی ءُ گوادر ءَ رؤکیں شھدگ بند کنگ بیتگ ءُ ھردوکیں نیمگاں مساپراں مھتلی ءِ جنجالانی دیمپانی اِنت –

آیانی گوشگ اِنت کہ سربندن، گوادر، جیونی ءُ پسنی ءَ ھوار دگہ دمگاں بجلی ءُ آپ ءِ جیڑہ گیشنگ بہ بنت ءُ زوت ءَ چہ زوت مھلوک ءَ آپ ءُ بجلی دیگ بہ بیت اِنت –

آیانی گوشگ اِنت گوستگیں روچاں کوسٹ گارڈ ءِ دست ءَ گرگ بیتگیں ھالد ءِ شھزور گاڑی گوں دراھیں سامانان واتر دیگ بہ بیت اِنت، کھدہ اسا وارڈ ءُ سربندن ءِ دگہ جاھاں ھم سرجمی ءَ بجلی ٹرانسانی بدلی بہ بیت اِنت-

آیانی گوشگ اِنت کہ بلوچ زر ءَ گیرکانونی ٹرالرنگ بند کنگ بہ بیت ءُ بلوچ زر ءَ ماھیگانی نسل کُشی دارگ بہ بیت اِنت –

زھرشانی کنوکاں گوشتگ کہ گوادر سی پیک ءِ ناپگ گوشگ بیت اِنت بلے اد ءِ مھلوک وتی بنکی آسراتیاں زبھر اَنت ناکہ آپ ھست ناکہ بجلی ءُ ناکہ زند ءِ دگہ آسراتی –

آیاں گُشتگ کہ سرکار ءَ گوادر ءَ ھچی نداتگ ءُ نا کہ گوادر ءَ ھواریں دمگاں چیزے دیگ بیت بیتگ ءُ اد ءَ مھلوک بے روزگاری ءِ سبب ءَ بازیں جیڑھانی آماچ اَنت –

آیانی گوشگ اِنت گوست ءَ اے کوسٹل ھائی جوڑ بیتگ بلے اشی ءَ ابید مارا میت ءُ نادراہ دگہ ھچ پائدگ نہ بیت –

آیانی گوشگ اِنت کہ گوادر ءَ ھمے گوشگ بیت اِنت سی پیک جوڑ بیت اد ءِ مھلوک ءَ پائدگ بیت اِنت اے پائدگ وتی جاہ ءَ مئے مڈی ءُ دگہ چیزاں روپگ ءُ برگ ءَ اَنت ما ترمپے آپ ءَ تلوسگ ءَ اِنت –

آیانی گوشگ اِنت گوستگیں روچ ءَ نیشنل پاٹی ءَ گوادر ءَ زھرشانی کرتگ ءُ اود ءَ نیشنل پاٹی ءِ باسک لَٹ شاپ کنگ ءُ زدگ کنگ بیتگ اَنت اد ءَ ھک ءِ واستا توار چِست کنگ ھم لَٹانی دیمپانی اِنت –

زھرشانی ءَ بازیں کچے ءَ مھلوک ھوار اِنت ءُ اے وھد ءَ آیاں مزن شھدگ سربندن ءِ ھند ءَ بند کرتگ ءُ نشتگ اَنت –

زھرشانی ءَ کیچ ءِ آل پارٹیز ھم زھرشانی بنجل ءَ مردمانی گون ءَ ھواری ءَ شتگ ءُ سر بیتگ –

زانگ بہ بیت گوادر ءَ ھوار بازیں جاھان گوستگیں بازین وھداں آپ ءُ بجلی ءُ دگہ آسراتیانی واستا یکشل ءَ زھرشانی بیگ ءَ اِنت –

سرکاری ءُ انتزامیہ ءِ نیمگ ءَ تنی وھدی اے زھرشانی لوٹانی سرجم ءَ کنگ ءَ بے سوبی ءَ ابید دگہ ھچ گندگ ءَ آیگ ءَ نہ اِنت –

بلوچستان ءِ دمگ ھرنائی ءَ گوستگیں شپ ءَ سلاہ بندیں مردماں پاکستانی پوج ءِ بنجل ءِ سر ءَ اُرش کرتگ –

بلوچستان ءِ بازیں جاھاں ھمک روچ پوج ءَ سلاہ بندیں مردمانی اُرشانی دیمپانی بیت اِنت کہ اے اُرشانی زمہ واریاں بلوچستان ءِ آجوئی ءِ واستا جنگ کنوکیں گل منّگ ءَ اَنت –

ھالانی تہ ءَ گوشگ بیتگ کہ زردآلو ءِ ھند ءَ سلاہ بندیں مردماں پوجی بنجل راکٹ ءُ دگہ سلاھانی گون ءَ نشانگ کتگ ءُ تتکگ اَنت – واکداراں اے اُرش ءِ بارو ءَ دگہ تاوانانی ھچ ھال نہ کتگ اَنت –

زانگ بہ بیت زردآلو ءَ گوستگیں یک ھپتگے ءِ تہ ءَ پاکستانی پوج ءِ سر ءَ بیوکیں اے سیمی اُرش اِنت – گوستگیں روچاں زردآلو ءِ ھند ءَ پرپٹ ءَ سواریں پوجی کارمند بمب ءِ نشانگ بیتگ اِت اَنت –

ھمے ھند ءَ پوج ءِ واستا راشن پُجارینوکیں گاڑی ھم بمبے ءِ نشانگ ءَ اتکگ ءُ سرجم ءَ پروشتگ اَت –

آ بیتگیں اُرشانی زمہ واری بلوچ لبریشن آرمی ءِ جارکش جیئند بلوچ ءَ منّ اِتگ اَنت، بلے مروچی بیتگیں اے اُرش ءِ زمہ واری تنی وھدی ھچ گل ءَ نہ منّ اِتگ –

ھمے وڑ ءَ بولان ءِ دمگ گون گٹ ءَ سلاہ بند ءُ بلوچ آجوئی دوستیں سلاہ بندانی میان ءَ جنگ ءُ چوپ بیتگ –

دمگی مردماں ٹی بی پی ءَ گوں گپ کنان ءَ گُشتگ کہ اُرش ھون گٹ ءِ ھند ءَ بیتگ کہ ھردوکیں نیمگاں دگہ جانی تاوانانی ھال نہ بیتگ –

پنجگور ءَ پولیس ءِ دست ءَ کُشگ بیتگیں سابر سلیمان ءِ زھگ سلیمان سابر ءَ وتی شنگ کرتگیں درشانی ءَ گُشتگ کہ منی پت ءِ کوش ءَ مروچی ھشت ماہ گوستگ بلے انگت ءَ من ءَ ھچ انساپ نہ رس اِتگ –

آئی ءَ گُشتگ کہ یک پتے ءِ جتائی چنکس گران ھما کس زانت کہ آئی ءَ اے گرانیں درد دیستگ ءُ مروچی منی پِت ءَ ھشت ماہ بیت کُشگ بیتگ ھرکجا من انساپ ءِ واستا در ٹُک اِتگ اَنت ھچ جاہ ءَ من ءَ انساپ نہ رس اِتگ –

آئی ءَ گُشتگ پولیس وتی زُلمانی چیر دیگ ءَ منی سر ءَ مپتیں میار لڈگ ءَ اِنت کہ تو وتی پت ءِ لاش ءِ زورانسری پچ گپتگءُ اشی ءِ پژدر ءَ پولیس ءَ منی نام ءَ ارزی نبشتگ کرتگ –

آئی ءَ گُشتگ کہ ھما وھد ءَ کہ منی پت شھید کنگ بیتگ من کراچی ءَ جاڑیگ بیتگ اَنت ءُ من سیکنڈ ایئر ءِ نودربرے بیتگ اَنت بکے گوستگیں ھشت ماھانی میان ءَ وتی انساپ ءِ واستا منی وانگ ھم پش کپتگ –

آئی ءَ گُشتگ من ھمک ماہ ءَ چار رند ءَ آمیدگساں زیارت کن آں چریشی ءَ من ءَ انگت ءَ ھما دیوال ءُ دروازگاں ابید ھچ نیست نانکہ من ءَ انساپ رس اِتگ ءُ نانکہ منی پت ءِ کوشکار دزگیر کنگ بیتگ اَنت –

زانگ بہ بیت سابر سلیمان سِی نومبر سال دوھزار ءُ بیست ءَ پنجگور ءِ دمگ رخشان کور تسپ تھانہ ءِ ھد ءَ پولیس ءِ دست ءَ کُشگ بیتگ اَت –

آئی ءِ کوش ءِ ھلاپ ءَ آئی ءِ کھول ءَ بازیں وھداں زھرشانی ھم کرتگ ءُ وتی انساپ ءِ واستا بلے تنی وھدی آئی ءَ انساپ نہ رس اِتگ –

آئی ءِ کھول تنی وھدی ھم انساپ ءِ واستا اُستانی سرکار ءُ دگہ ادارگاں گوں دزبندی کنگ ءَ اَنت –

سربوتگیں ھالانی رِد ءَ بلوچستان ءِ تہ ءَ جھانی وبا کرونا وائرس ءِ نادراھی ءَ آماچ بوتگیں سی ءُ نھ دگہ نوکیں کیس دیم ءَ اتکگ اَنت ءُ اے وھد ءَ کرونا وائرس ءَ آماچ بوتگیں درسیں مردمانی کچ سی ھزار ءُ ھپت سد ءُ نود دو ءَ سر بوتگ اَنت-

بلوچستان ءَ جانسلامتی ءِ نیمگ ءَ چہ شنگ بوتگیں رپورٹ ءِ رِد ءَ بلوچستان ءَ بیست ءُ چار ادارانی میان ءَ چار سد ءُ ھپتاد نُھ مردماں کرونا نادراھی ٹیسٹ کنگ بوتگ کہ سی ءُ نھ مردمانی تہ ءَ کرونا نادراھی پدر بوتگ، کہ آھانی تہ ءَ درساں گیش بلوچستان ءِ بنجاھی شھر شال ءَ بیست ، مستونگ ءَ ھپت، نوشکی ءُ گوادر ءَ چار چار، لسبیلہ ءَ دو، ھزدار ءُ ھاران ءَ یک یک مردمے ءَ کرونا وائرس پدر بوتگ، وھدیکہ چار سد ءُ پنجاہ ءُ چار مردمانی رپورٹ دنیگتی نہ اتکگ انت ءُ چریشی ءَ پد تنی وھدی بلوچستان ءِ تہ ءَ کرونا نادراھی ءَ آماچ بوتگیں مردمانی کچ نوکیں کیساساں ھوار سرجمی ءَ سی ھزار ءُ ھپت سد ءُ نود دو ءَ سر بوتگ اَنت-

رپورٹ ءِ رِد ءَ بلوچستان ءِ تہ ءَ کرونا وائرس ءِ پوزٹیو کیسانی گیشی ھشت ٹک چاردہ درسد بوتگ ءُ کرونا وائرس ءِ شش سد ءُ چار نادراہ ھست انت کہ آ بلوچستان ءِ بیست ءُ چار نادراھجاھانی تہ ءَ انت ءُ آھانی تہ ءَ دہ ھائی ءُ سَے لو آکسیجن ءَ الاج ءَ انت – وھدیکہ بلوچستان ءِ تہ ءَ گوستگیں بیست ءُ چار ادارانی میان ءَ نود ءُ چار مردم وش بوتگ انت ءُ وش بوتگیں مردمانی کچ نوکیں کیساساں ھوار سرجمی ءَ بیست ءُ نُھ ھزار ھشت سد ءُ پنجاہ ءُ سَے انت – تنی وھدی کرونا نادراھی ءَ سَے سد ءُ سی ءُ پنچ مردم بیران بوتگ –

بلوچستان ءِ دمگ کلات ءَ سر بیتگیں ھالانی رد ءَ پولیس ءَ پَٹ ءُ پول کتگ ءُ آوار جنگ بیتگیں جنک یلکنائینتگ ءُ جرمکار دزگیر کنگ بیتگ –

پولیس ءِ رد ءَ چیریں ھال ءِ سر بیگ ءَ شال ءَ راہ بستگ ءُ چِک ءُ تان ءِ وھد ءَ شاہ فیصل ء رستم جھمنند موسیٰ کالونی شال کہ آئی ءَ (مسمات ء یحیٰ جھمنند قمبرانی دگ شال چاردہ سال ءِ میان ءِ اُمر ءَ بیتگ کہ آوار جتگ ءُ کراچی ءَ برگ ءِ بیتگ –

پولیس ءِ رد ءَ ایس پی کلات عبدالروف بڑیچ ءِ گوشگ ءِ پد ءَ ایس ایچ او کلات نزیر اھمد ءِ ھمراھی ءَ پولیس ءَ راہ بستگ ءُ آؤکیں گاڑی چِک ءُ تان کتگ اَنت کہ ھمے میان ءَ آؤکیں گاڑی AAQ.987 داشتگ ءُ چریشی ءَ گاڑی ءِ تہ ءَ آوار جنگ بیتگیں جنک دستیگ کتگ ءُ جرمکار شاہ فیصل ء رستم دزگیر کتگ –

پولیس ءِ رد ءَ گپتگیں جرمکار ءِ سر ءَ دوھزار ءُ بیست ءُ یک شست ءُ سَے دفعہ سَے سد ءُ شست ءُ پبچ بی پوکیس کارگس ءَ بجلی دگ ءَ شال ءَ باگی بیتگ –

پولیس ءِ رد ءَ اے جنک گوستگیں روچاں آوار جنگ بیتگ ءُ شال ءَ دیم پہ کراچی ءَ برگ ءِ بیتگ اَنت –

برطانیہ ءِ سر وزیر بورس جانسن ءَ گُشتگ کہ اوگانستان ءَ تالبان ءِ گرگ ءَ پد برطانیہ ءَ دو ھزار ءَ گیش اوگانی شھری کش اِتگ ءُ برتگ اَنت –

فرانسیسی خبررساں ادارہ اے ایف پی ءِ رد ءَ اے گپ آئی ءَ چار شمبے ءِ روچ ءَ کانون سازاں گوں کرتگ اَنت –

اوگانستان ءَ امریکی پوج ءِ روگ ءُ بنجاھی شھر کابل ءَ تالبان ءِ گرگ ءَ پد پیداگ بیتگیں جاورھالانی سر ءَ برطانیہ ءِ پارلمینٹ ءَ ھم نیادانی واستا کڈن کنگ بیتگ اَنت –

بورس جانسن ءَ گشتگ کہ ما وتی آبادکاری ءِ نیاد ءَ داں انگت ءَ سَے سد ءُ شش برطانوی شھری ءَ دو ھزار ءُ پنجاہ ءُ دو اوگانی شھری واتری ءَ مھرین جاھاں برتگ اَنت –

آئی ءَ دیمتر ءَ گشتگ کہ دگہ گیش دو ھزار اوگانی شھریاں برگ ءِ دزبندی ھم بیتگ اَنت ءُ بازیں پَٹ ءُ پولانی تہ ءَ چارگ بیگ ءَ اِنت –

بورس جانسن ءَ گپ کنان ءَ گُشتگ کہ تالبان آیانی گپانی سر ءَ نہ اِنت بلکیں آیانی امل چارگ بیگ ءَ اِنت –

زانگ بہ بیت چد ءُ پیسر امریکہ ءَ ھم سَے ھزار ءُ دو سد اوگانی چہ کابل ءَ کش اِتگ ءُ امریکہ ءَ برتگ اِت اَنت –

دومی نیمگ ءَ گوستگیں روچ ءَ تالبان ءِ جارکش زبیہ اللہ ءَ وتی اولی پریس کانفرنس ءَ گشتگ کہ شھری ایمنی ءَ بہ نند اَنت آیاں کس ھچ نہ کنت ءُ دراھیں ھک دیگ بنت –

اے وھد ءَ چارگردی رسانکجاھاں ھوار دگہ تکاں اوگانستان ءِ گپ باوستی لڑانی تہ ءَ ھوار اِنت ءُ اے گپ بیگ ءَ اِنت کہ اوگانستان ءِ گرگ ءَ پد اود ءَ مھلوک ءِ زندگیانی تہ ءَ ناوشی اتک کنت –

بلے تالبان ءِ نیمگ ءَ اے سدکی یکشل ءَ بیگ ءَ اَنت ما اے گپ ءَ ستک داریں ءُ مھلوک ءَ گوش ایں آ بہ نند اَنت ءُ آیانی پھریزی کنگ بیت اِنت –