TBP Balochi

بلوچستان ءِ تیابدپی شھر گوادر ءَ مروچی دومی روچ ءَ ھم دگ بندیں ھرتال برجاہ اِنت، چریشی ءِ سبب ءَ دگانی سر ءَ گاڑیانی روگ ءُ آیگ نیست ءُ دگانی سر ءَ پرشت ءُ پروش –

گیشیں ھالانی رد ءَ گوادر ءِ شھر ءَ بازیں کچے ءَ کہ چریشانی تہ ءَ زالبول ھوار اَنت کہ آیاں شھر ءِ بازیں جاھاں دگ بند کرتگ اَنت مزنیں دگانی سر ءَ ٹائر اش مانداشتگ ءُ روانی مھتل اش کرتگ –

شھر ءَ زھرشانی گوستگیں روچ ءَ نیشنل پاٹی ءِ زھرشانی ءَ اے سی گوادر ءَ دزمانجنی ءُ سیاسی باسک ءُ رھشونانی لَٹ ءُ کُٹ ءِ ھلاپ ءَ بیگ ءَ اِنت –

زانگ بہ بیت گوستگیں روچ ءَ نیشنل پاٹی ءِ دزبندی ءَ بلوچ زر ءَ چینی ٹرالرنگ، آپ ءُ بجلی ءِ ھلاپ ءَ دگ بندیں ھرتال کنگ ءَ بیتگ اَنت گڑا اسسٹنٹ کمشنر ءُ پوج ءَ زھرشانی کنوک لَٹ شاپ کرتگ اَنت –

مروچی ءِ زھرشانی ءَ ھواریں شھریاں اسسٹنٹ کمشنر ءُ آ دگراں گوادر ءَ گلینگ ءِ لوٹ کرتگ ءُ گُشتگ کہ آپ ءِ واستا لَٹ ءُ کُٹ ھچ رنگ ءَ منگ نہ بیت اِنت –

زانگ بہ بیت گوادر ءَ ھوار بلوچستان ءِ تیاپدبی شھراں آپ ءُ بجلی ءِ نیستی ءِ بروبری ءَ اِنت – گوستگیں بازیں وھداں شھری یکشل ءَ زھرشانی کنگ ءَ اَنت بلے تنی وھدی آیانی لوٹ سرجم کنگ نہ بیتگ اَنت نانکہ کسے ءَ گامگیج زرتگ –

نبشتانک آزمانک: منی واب ءِ لچہ کار ءُ سرمچار

آزمانکار:شاری لال

دی بلوچستان پوسٹ

من جوڑ کتگ مشین ئِے مشین ھنچیں مشین ئِے گوش ئے نیم ھُدا اِنت چو ھُدا ءَ ھرک سی دل ءِ ھال ءَ سرپد اِنت کسے کہ دل ءَ چے بہ جیڑ اِیت آ پھم اِت کنت کسے لوگے ءِ تہ ءَ بہ بیت ءُ آ مشین ڈنّ ءَ بہ بیت انگت آ لوگ ءِ مردم ءِ ھال ءَ سرپد بیت گوستگیں اھد ءِ ندارگ ءَ پیش دار اِیت من نہ زاناں وتی جوڑ کتگیں مشین ءَ کجام نام ءَ بہ دیاں من گوش آں نیم ھدا ءِ نام ءَ بدیان ئِے، بلے وھدے من کٹِک دین دوستیں مردمانی تْرانگ ءَ کپ آں گڑا چہ اے نام ءَ بجّ آں بازیں جیڑگ ءَ پد من وتی مشین ءِ نام ءَ رازپاشک کتگ۔

مروچی سھب ءَ کینٹین ءَ نھاری ءِ ورگ ءَ پد من ھاسٹل ءِ کوٹی ءَ تھنا نندوک اَت آں وتی مشین ءِ رازپاشک ءَ را بال دات رازپاشک ءَ بال کت من لوٹ اِت رازپاشک بہ روت کوچگ ءَ مچکدگ ءُ ڈگارانی ندارگ ءَ را من ءَ پیش بہ دار اِیت رازپاشک ھما سھت ءَ شُت کوچگ ءَ ڈگارے ءِ تہ ءَ چہ گْوزوکیں پیرمردے ءِ ندارگ ءَ من ءَ پیشدارگ ءَ بنا بوت۔

پیر مرد ءَ ھسایے دست ءَ اَت زمین ءَ جِکّ جنان ڈگارے ءِ تہ ءَ چہ روان اَت پیرمرد وتی ترکّ اِتگیں پادگ ءُ رُوس اِتگیں سواساں گوں کُنٹ گامی ءَ پلاراناں لگت دیان ءُ روان اَت آ پلارانی لگت دیگ ءَ گوں آ ترانگ ءَ کپتگ اَت کہ کسانی ءَ ھمے ڈگارانی سر ءَ پلاراناں لگت داتگ ءُ ھمیشانی سر ءَ تْردّ اِتگ، لگت دیگ ءَ گوں پلاراں ژِرت ژِرت کتگ ءُ آئی ءَ اے ژرت ژرت ءِ توار ءَ اجبیں تاھیرے داتگ اَت آ روان اَت کہ آئی ءَ سھب ءِ گوریچ ءِ نوک بندات بوکیں گْوات ءَ را مار اِت کہ پلارانی سر ءَ لھم لھم ءَ کشان ءُ پلار ھُنژ ھُنژ کنان اِت اَنت دُرچک ءُ جنگلانی چِری چِری ءِ توار اَت ھمے کوش ءُ مرگانی توار ءَ چے پیرمرد ءَ وتی جوانی ءِ نوبت گیر آتک اَنت کہ آ وھد ءَ پیر مرد ءِ چمّاں روک مان اَت کہ بانگواھانی وھد ءَ ھمے دروچک ءُ شانتلانی شکار ءَ شتگ ات، بلے اے وھد ءَ پیر مرد ءِ چمانی روکاں دروہ اِتگ اَت کہ دروچک ءُ جنگلانی ندارگ ءُ شکار ءَ بہ کنت ھور ءِ ترمپ زمین ءِ سر ءَ نرم نرم ءَ کپان بوت اَنت ھور ءِ نرمی کمو گیش بوت۔ اے نرمیں ھور پیرمرد ءَ بے کساس تاھیر دیگ ءَ ات آئی ءَ وتی ھسا زمین ءِ سر ءَ ایر کت ءُ وتی دوئیں دست ٹال کت اَنت آئی ءَ وت ءَ چو مھتر ایسا ءِ سلیب ءَ کت ءُ ھور ءِ اجام بکشیں ترمپانی مارگ ءَ لگ اِت-

ڈگار ءِ دیمی نیمگ ءَ کمو دُور کسانیں ھلکے ھست اَت من رازپاشک ءَ را ھمانگو بُرت رازپاشک شُت ھلک ءِ یک کاپرے ءِ کش ءَ اوشتات۔ کاپر ءِ چیر ءَ یک جنکے پوستے ءِ رَجگ ءَ اَت جنک ءِ گندگ ءَ گوں من ءَ بلوچ ءِ کوھنیں دود گندگ ءَ آتک اَنت بلے اے ھلک ءَ ھور نہ اَت بلے جمبر ءَ بستگ اَت من لھتے توار اِشکت، “چونیں توارے؟” من رازپاشک ءَ جست کت “لھتے گونڈوانی توار اِنت” من گوشت برو ھمایانی کر ءَ من ءَ گونڈواں پیش بہ دار آ شُت من ءَ لھتے جنک ءُ بچکک گندگ ءَ اَت کہ دراہ چکّرگ ءَ ات اَنت ءُ گوشگ ءَ اِت اَنت-

“ھورو ھورو ایر دئے
بُلک ءِ چُکّاں چیر دئے”

گونڈوانی سوت ءِ اشکنگ ءَ گوں من ءَ وتی کسانی گیر آتک کہ وھدے جمبر ءَ گْرند اِتگ من گرندانی بیم ءَ چہ لوگ ءَ در نہ یتکگ آں۔

اے ندارگ ءِ گِندگ ءَ پد من دلجم اِت آں کہ منی جوڑ کتگیں مشین برابر اِنت من رازپاشک ءَ را دگہ چکّاسے ءَ بُرت بزاں گْوست ءِ جاورانی نیمگ ءَ برگ لوٹ اِت، من آئی ءَ را نُھ سال پُشت ءَ بُرت، بزاں 2012 ءِ سال ءَ بُرت کہ اے سال ءَ من باز نوکین ءُ اجبیں مردم ءِ ھال اشکتگ اَت بلے چم ء وت نہ دیستگ ات اَنت کہ من ھمے مردماناں چم ء وت گندگ لوٹ اِت ءُ اے سال ھما سال اَت کہ یک نیمگے روانک، ڈوک شانی، ھڑتال جلسہ ءُ جلوس اَت، ءُ دومی نیمگ ءَ ٹوپ ءُ بمبانی توار اَت من ءَ ھمے سال ءَ باز سانجت کتگ اَت رازپاشک ھما دمان ءَ من ءَ 2012 ءِ سال ءَ مئے میتگ ءَ شُت ءُ ھما ندارگ ءَ را پیشدارگ ءَ بنا بوت۔

رازپاشک پیشدارگ ءَ اَت وھد روزرد اَت چہ میتگ ءِ پُشت ءَ کوچگ ءِ نیمگ ءَ چے اسرار ءُ امجد پیداک اَنت ھردوئیناں وت ءَ را بزیں چادرے مانپوش اتگ اے دوئیناں وت ءَ را چادر ھمے ھاتر ءَ مانپوش اِتگ کہ کسے کہ مارا گِند اِیت آ مئے سر ءَ گمان بہ کنت مئے چادرانی چیر ءَ تُپنگ ھست اِنت، ءُ مارا سرمچار بہ پھم اَنت بلے اسل ءَ آھانی چادر ءِ چیر ءَ ھچ نیست اِنت۔

دومی نیمگ ءَ ندارگے من دیست کہ منی ارواہ جکس اِت جھان ءِ تہ ءَ چشیں مردم ھم ھست کہ وتی سنگتانی مرگ ءِ ودار ءَ کسے بہ نِند اِیت من ءَ رازپاشک ءَ پیشداشت کہ پنامی لچہ کار میراس بندنی وتی لوگ ءِ راستیں نیمگ ءِ کُنج ءَ نشتگ، آئی ءِ دیم ءَ یک ندے ءُ دپترے ایر اِنت، دپتر ءِ لھتیں تاک آئی ءَ وتی کش ءِ چِلدان ءِ تہ ءَ دِرّتگ ءُ دَور داتگ اَنت کہ لھتیں تاکانی سر ءَ دستونک نبشتہ ءُ لھتیں تاکانی سر ءَ لچہ نبشتہ اِنت بلے چہ دستونک ءَ جھل دیم ءَ نبشتہ کتگیناں بِلّ کہ کڑے بڑے اَنت آئی ءِ دیم ءَ کہ دپتر اِنت دپتر ءِ تہ ءَ یک نوکیں دستونکے جریدگ اِنت پہ شِنگ کنگ ءَ، بلے میراس بندنی ءَ سے روچ اِنت کہ گندگُش ءُ رسانکدر ءَ چار ءُ گند کنگ ءَ اِنت کہ باریں سرمچارے شھید بوتگ یانا، اگاں کسے شھید بوتگ گڑا آ وتی پربستگیں دستونک ءَ نوک شھید بوتگیں مردمے ءِ سر ءَ ندر بہ کنت ءُ شنگ ئِے بہ کنت بلے آ انو ودار ءَ اِنت دنیگتا کس شھید نہ بوتگ۔

اے ندارگ ءِ گندگ ءَ گوں من ءَ ایشی ءِ چارگ ءِ برداشت نہ بوت من آئی ءَ دگہ نیمگے بُرت اود ءَ کہ رازپاشک شُت اود ءَ ھم ھمے جاور اَت، کہ میتگ ءِ رودراتکی نیمگ ءِ پَٹّ ءِ سر ءَ بچک پٹبالی لیب ءَ اِت اَنت پَٹّ ءِ کش ءَ بشام نشتگ اَت، گوں وتی کوھنیں سنگتاں بشام ءَ سالے ءَ گیش بوتگ گار بوتگ ات آئی ءِ جند ءِ گوشگ ءَ آ جیونی ءَ ماھی ءِ کار ءَ بوتگ، بلے من رند ءَ سرپد بوت آں کہ آ اسل ءَ کوہ ءَ بوتگ اے گپ آئی ءَ وت گوں وتی جن ءَ پاشک کتگ اَت بشام پَٹّ ءِ سر ءَ وھدے گوں سنگتاں نندوک ات، آئی ءِ سنگتاں ھم باور اَت کہ بشام جیونی ءَ کار ءَ بوتگ، کس ءَ گمان نیست اَت کہ بشام کوہ ءَ بوتگ بلے بشام ءَ لوٹ اِت کہ منی سنگت بہ زان اَنت من اسل ءَ کوہ ءَ بوتگ آں جنگ ءَ، بلے آ کوہ ءِ رھبندانی گرپتار اَت کہ پہ دپ ء وت اے ھبر ءَ گْوشت ئِے نہ کت بشّام ءَ وھدے کہ اد ءَ پٹّ ءِ سر ءَ آیگی اَت، آئی ءَ آیگ ءَ پیسر چہ لوگ ءَ وتی کوہ ءِ پوجی بوٹ ءُ وتی وتاس لانک ءَ کتگ ءُ آتکگ اَت آئی ءَ بوٹ پاد ءَ کتگ اَنت کہ من ءَ کسے گِند اِیت آ منی سر ءَ گمان کت بہ کنت کہ من ءَ پرچا چشیں بوٹ پاد ءَ؟ چے ءَ کہ چشیں بوٹ تھنا کوہ ءِ مردم پاد ءَ کن اَنت، کسے کہ منی بُٹاں گند اِیت آ وت پھم اِیت کہ من کوہ ءَ بوتگ آں، منی گُشگ ءِ ھچ زلورت نہ اِنت وھدے کہ بشام دیوان ءَ نِندوک اَت، آئی ءَ دم پہ ساھت وتی دست وتاس ءِ نیمگ ءَ برت پہ ھمے نیّت ءَ کسے بہ پھم اِیت من ءَ وتاسے ھم گون رازپاشک بشام ءِ دل ءِ ھالاں شرّی ءِ سر ءَ زانگ ءَ اَت کہ بشام پگری مردمے نہ ئِے آ اسل ءَ پہ وتی ناماوری ءَ کوہ ءَ شتگ-

من رازپاشک ءِ پیشداشتگیں ندارگاں چارگ ءَ اِت آں کہ منی گوانکو ءَ ٹیلینگگے جت من گوانکو چار اِت کہ یک شرگداری نبشتانکے آتکگ اَت نبشتہ کار سپر مری ئیگ اَت کہ ھمک وھد ءَ آئی ءِ نبشتانک کاینت کسے ءِ سر ءَ الّم آ شرگداری کنت اے شرگداری نبشتانک دو روچ پیسر ءِ جنگ ءِ بابت ءَ اَت کہ نبشتہ کار ءَ نویس اِتگ اَت کہ اے جنگ باید اے وڑ ءَ مہ بوتین ءُ آ وڑ ءَ بہ بوتیں بلے من ھچ زانت نہ کت کہ جنگ چے وڑ ءَ بہ بوتیں، من ءَ وَ چونائی ءَ گوں جنگ ءُ جدلاں دست ءُ دوایے نیست من ھچ زانت نہ کت کے راست گشگ ءَ اِنت من نبشتانک زرت رازپاشک ءَ را دات کہ جیڑہ ءَ تو گیش گیوار بہ کن آئی ءَ وھدے نبشتانک دیست ھما دمان ءَ گْوشت ئِے جیڑہ چہ نبشتانک ءَ نہ اِنت جیڑہ چہ نبشتہ کار ءَ اِنت کہ نبشتہ کار دمبرتگیں جنگولے نی چہ جنگ ءَ گِستا نشتگ ءُ دگرانی سر ءَ شرگداری کنت ایشی ءَ سوچ لگورے۔

من رازپاشک لوگ ءَ آرگ لوٹ اِت تنا وھدی مئے میتگ ءِ مردم سرپد بوتگ ات انت کہ من ءَ چشیں مشین ئِے ھست مردم ءِ دل ءِ ھال ءَ سرپد بیت دراھیں میتگ ءِ مردم منی دمب ءَ کپتگ اِت اَنت، منی تچگ لوٹ اِت بلے من تتک نہ کت گش ئے کسے ءَ منی پاد داشتگ ات اَنت، دیر نہ گوست کہ مردماں من ءَ رسینت ءُ چہ من ءَ منی رازپاشک اِش زِنگ لوٹ اِت کہ من چہ واب ءَ جھ سر اِت آں، چہ واب ءَ پاد آیگ ءَ پد من نئیکہ مشین دیست نیکہ مردم –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

مئے بنکی ھک چہ مارا پُلگ بنت مئے زند ءِ آسراتی مارا دیگ نہ بنت اشانی ھواری ءَ مئے وانگ ءُ زانگی تک ھم مارا چہ پُلگ بیتگ اَنت اے گپ زھرشانی ءَ ھواریں نودربرے ءَ کرت اَنت –

بلوچستان ءَ ھمود ءَ دیمروئی ءُ دگہ چیزانی سر ءَ ٹاہ دیوکیں مردم گندگ ءَ کاینت ھمود ءَ ھک ءُ انساپ ءِ ھاتر ءَ زھرشانی کنوکیں مردم ھم گندگ ءَ کاینت –

بلوچستان ءِ دمگ کیچ ءِ ھند ھوشاپ ءَ چار شمبے ءِ روچ ءَ جنکیں نودربراں ھکانی لوٹ ءِ واستا زھرشانی کنان ءَ سی پیک دگ بند کتگ ءُ روانی مھتل بیتگ اَنت –

ھمے وھد ءَ آیاں گُشتگ کہ گوستگیں بازیں سالاں گورنمنٹ گرلز ھائی اسکول ھوشاپ بس کاگزی کاروائی ءَ بند بیگ ءَ اِنت بلے انگت ءَ بندگ ءِ واستا ھچ گامگیج زورگ نہ بیتگ اَنت –

آیاں گُشتگ کہ اسکول ءِ یک ھنچیں کوٹی ءُ استادانی کمی ءِ وجھ ءَ ھچ رنگیں وانگی پرکاری نیست اَنت –

نودربراں گوشگ اَت اگاں کسے مئے سدکی ءَ نیتک گڑا آؤکیں وھداں ھم ھمے رنگ ءَ کنگ بیت اِنت –

آیاں گُشتگ کہ وانگ ءِ نام ءِ سر ءَ پُڑی گر اَنت ءُ وتی کلانج ءَ پُر کن اَنت بلے وانگ ءِ سر ءَ تُشے ھم گامگیج نہ زور اَنت بس سرکاری تاک پُر اَنت –

آیاں گُشتگ کہ اُستانی سرکار ءَ گوں دزبندی اِنت زوت ءَ چہ زوت وانگی ادارہ ءِ واستا کوٹی ءَ دگہ بنکی آسراتیانی واستا المی بہ کنت –

بلوچستان ءِ بنجاھی شھر شال ءَ تیرگواری وئیلے ءَ دو کس بیران، کرنٹ ءِ لگگ ءَ دَہ سالی زھگے بیران، مستونگ ءَ تیرگواری ءَ یک مردمے بیران –

سر بیتگیں ھالانی رد ءَ بلوچستان ءِ بنجاھی شھر شال ءَ ناشناسیں مردمانی تیرگواری ءَ دو کس بیران بیتگ اَنت –

گیشیں ھالانی رد ءَ تیرگواری وئیل سَے شمبے ءِ روچ ءَ بالی پَٹ دگ ءَ شان ھوٹل پیش اَتکگ –

تیرگواری وئیل ءَ بیران بیتگیں مردمانی پجار وڈیرہ سلطان الدین ء امیر جان ءُ رضا مھمد ء اصغر شاہ ءِ ناماں زانگ بیتگ اَنت –

پولیس ءَ جون چِست کتگ ءُ اژدری چار ءُ ٹپاس ءَ پد کھولانی گور ءَ رسینتگ اَنت ءُ وئیل ءِ بارو ءَ گیشیں سرپدی نہ بیتگ –

ھمے وڑ ءَ شال ءِ دمگ سریاب ءَ کرنٹ ءِ لگ ءَ دَہ سالی ئیں زھگے بیران بیتگ-

گیشیں ھالانی رد ءَ گوستگیں روچ ءَ سریاب ءِ ھند موسیٰ کالونی ءَ بجلی ءِ کرنٹ ءِ لگگ ءَ دہ سالی ئیں یاسر ء اختر مھمد کاکڑ بیران بیتگ –

ھمے وڑ مستونگ ءَ سادات ءَ پسانی پِڑی ءَ تیرگواری ءَ یک مردمے بیران بیتگ –

سادات ءَ پسانی پِڑی ءَ ناکو زتکانی زمین ءِ جیڑہ ءِ سر ءَ تیرگواری بیتگ ءُ چریشی ءَ مھمد اسلم شیخ بیران بیتگ –

پولیس ءَ جون چِست کرتگ ءُ نادراہ جاہ ءَ سر کرتگ ءُ اود ءَ اژدری چار ءُ ٹپاس ءَ پد جون کھول ءِ ھوالگ ءَ کنگ بیتگ –

چہ بلوچستان ءَ سیادی داروکیں اسماء بلوچ ءِ رد ءَ ء یازدہ اگست ءَ چہ پنجگور ءَ دیم پہ کراچی ءَ رؤکیں آئی ءِ برات ریاستی ادارھاں دزگیر کرتگ ءُ برتگ –

اسماء بلوچ ءِ رد ءَ پوج ءَ دزگیر کرتگ ءُ ناشناسیں جاھے ءَ برگ ءَ پد برات ءِ بارو ءَ ھچ ھال نیست اِنت –

آئی ءَ گُشتگ کہ منی پت جمیل اھمد گوستگیں ھشت سالاں چہ بیگواھی ءِ آماچ اِنت کہ انگت ءَ بیگواہ اِنت –

اسماء بلوچ ءِ رد ءَ پت ءُ برات گیرکانونی دزگیری ءُ بیگواھی ءَ چہ مئے کھول ناوشیں جاورانی آماچ اِنت –

آئی ءَ گُشتگ کہ بلوچستان ءِ سرکار ءَ ھوار انسانی ھکانی گلاں گوں دزبندی اِنت منی پت ءُ برات ءَ سلامتی ءَ یلو بہ کنائین اَنت –

جنین آدماں وانگ ءُ کار کنگ ءِ ھو دیگ ءِ جار، رسانکدر تالبانی سر ءَ ایراد گِپت کن اَنت بلے امارات اسلامیہ ءِ ھلاپ ءَ کار مہ کن اَنت ذبیح اللہ مجاھد

اوگانستان ءِ مزن شھر کابل ءَ مروچی تالبان ءَ وتی اولی پریس کانفرنس کُتگ، اے پریس کانفرنس ءِ جار تالبان جارکش ذبیح اللہ مجاھد ءَ وتی چاگردی رسانکدر ءَ ٹوئیٹر اکاونٹ ءَ چہ کُتگ ءُ گُشتگ اَت کہ مروچی من زبیح اللہ مجاھد بزان اسلامی امارات افغانستان ءِ بنجاھی جارکش گوں رسانکدر ءَ تران کن اَنت۔

کابل ءَ برجم دارگ بیتگیں اے پریس کانفرنس ءَ چاگردی رسانکدر ءَ اِشی ءِ درگت ءَ جتا جتائیں مردماں وتی ھیال درشان کُتگ اَنت بلے مستریں گپ ذبیح اللہ مجاھد ءِ پجار ءِ زانگ بیتگ کہ چد ءُ پیشتر تالبان جارکش کس ءَ نہ دستگ بیتگ۔

پریس کانفرنس کنان ءَ ذبیح اللہ مجاھد ءَ گُشتگ کہ مئے گوں اوگانستان ءِ مھلوک ءَ جنگ نیست ھما مردماں کہ دری سرکار ءُ کابل سرکار بزاں اشرف غنی ءِ چیر دستی ءَ کار کُتگ پہ آیاں مئے مستریں رھشون ءِ پرمان ءِ پد ءَ لس پھلی ءِ جار ءَ جنگ ءَ اِنت۔

آئی ءَ دیمتر ءَ گُشتگ کہ مئے ملک جنین آدمانی اگبال آیاں اسلام ءُ شریعت ءِ رد ءَ دیگ بنت آیاں وانگ ءُ کار کنگ ءِ ھم دیگ بیت۔

رسانکدرانی بارو ءَ گپ جنان ءَ ذبیح اللہ مجاھد ءَ گُشتگ کہ رسانکدر مئے سر ءَ ایراد گِپت کن اَنت مارا شون دات کن اَنت ءُ آجوئیں دروشم ءَ کار کُت کن اَنت بلے اماراتِ اسلامی اوگانستان ءِ سیتانی ھلاپ ءَ کار مہ کن اَنت۔

ذبیح اللہ مجاھد میان اُستمانی جنگانی بارو ءَ گپ جنان ءَ گُشتگ مئے سرڈگار پہ کسی ھلاپ ءَ کارمرز نہ بیت، ءُ ما ھمے جھد کنیں کہ اوگانستان ءَ چہ منشیات ءَ آجو بہ کنیں۔

دومی نیمگ ءَ کابل ءَ زندمان پدءَ کم کم ءَ دیمروئی کنان اِنت میان اُستمانی اھوالکار ءُ اوگانستان ءِ اھوالکار چاگردی رسانکدراں عکس ءُ تامر بند شنگ کنان ءَ گُشگ ءَ اَنت کابل ءَ انگت ھم تُرس برجاہ اِنت بلے مھلوک کم کم ءَ چہ لوگ ءَ در پیداک اَنت۔

نوکتریں ھالانی رد ءَ اوگانستان وائس پریزیڈنٹ امر اللہ صالح ءَ وتی یک رسانکدری کلوہ ءِ تہ ءَ گُشتگ کہ ملک ءِ مستر ءِ وتی جاہ ءَ یل کنگ، ملک ءَ تچگ یا دگہ کجام ھم گیر مھمولی جاورانی آئی ءِ کمک کارمستر ملک ءِ مستری ءَ کنت، ءُ من امر اللہ صالح اے ساھت ءَ اوگانستان ءِ پریزیڈنٹ اَنت۔

آئی وتی کلوہ ءِ تہ ءَ اے ھم گُشتگ کہ من پہ ملک ءَ انگت اوشتاتگ اَنت ءُ اے جنگ انگت برجاہ اِنت۔

یونائیٹڈ بلوچ آرمی ءِ جارکش مزار بلوچ ءَ ناشناسیں جاھے ءَ رسانکدراں شنگ کرتگیں وتی درشان ءِ تہ ءَ تمپ ءَ پوج ءِ سر ءَ بیتگیں اُرش ءِ زمہ واری منّ اِتگ –

جارکش مزار بلوچ ءَ گُشتگ کہ گوستگیں روچ ءَ ساھت ھشت ءَ مئے سرمچاراں تمپ ءِ دمگ ابدوئی ءَ کورچاردپ ءَ ٹٹ جنوکیں پاکستانی پوج ءِ سر ءَ مزنیں سلاھانی گون ءَ اُرش کتگ –

آئی ءَ گُشتگ کہ اے پاکستانی پوج ءَ جانی ءُ مالی تاوانانی دیمپانی کنگ کپتگ –

مزار بلوچ ءَ گُشتگ کہ مئے اُرش بلوچستان ءِ آجوئی ءَ داں برجاہ بنت –

بلوچستان ءِ دمگ پنجگور ءَ نیشنل پاٹی عوامی ءِ نیمگ ءَ روکپتی ءُ رودراتکی بلوچستان ءِ میان ءَ کش اِتگیں لکیر ءِ بندش،بجلی ءُ منشیات ءِ ھلاپ ءَ موٹرسائینکل روانک کشگ بیتگ –

روانک ءَ بازیں کچے ءَ مھلوک ءَ بھر زرتگ ءُ روانک بی این پی عوامی ءِ کارگش ءَ بندات بیتگ ءُ شھر ءِ جتا جتائیں جاھاں تران ءُ ڈپٹی کمشنر پنجگور ءِ کارگس ءِ دیم ءَ مُچی ءِ دردشم ءَ مُچ بیتگ –

زھرشانی کنوکاں ڈپٹی کمشنر پنجگور عبدالرزاق ساسولی ءَ لوٹ پیش کرتگ اَنت ءُ روانک بلوچستان نیشنل پاٹی عوامی ءِ دمگی سروک نثار اھمد ءُ بنجاھی لیبر سکریٹری نوراھمد، بنجاھی اسپورٹس سکریٹری رھمد، بنجاھی پتر ءِ باسک شکیل بلوچ ءُ ظفر بختیار ءَ تران کرتگ –

تران کنوکاں گُشتگ کہ پنجگور ءِ مھلوک ءِ نود ءُ پنچ درسد زرکاری سیمسر ءَ گوں بندوک اِنت ءُ ھما اِنت کہ سیمسر بند بیتگ بازیں کچے ءَ مردم بے روزگار اَنت ءُ آیانی لوگاں چُل آسی ءِ ھواری ءَ زھگانی وانگ ھم بازیں کچے ءَ اسرمند اَنت –

آیاں گُشتگ کہ بجلی ءِ جیڑہ ھم باز ناوش اَنت سرجمیں روچ ءَ بجلی بند اَنت ءُ نشہ ءَ سرجمیں ورنا وتی وڑالاں جتگ اَنت –

زھرشانی کنوکاں لوٹ کرتگ کہ سرکار بجلی، بارڈر ءِ جیڑہ ءَ ھلاس بہ کنت ءُ مھلوک ءَ شریں رنگے ءَ روزگار بہ دنت –

ھمے وڑ ھب ءَ ھم بجلیانی بندش ءِ سبب ءَ مھلوک ءَ زھرشانی بندات کرتگ –

چہ ھب ءَ سربیتگیں ھالانی رد ءَ شال کراس ءَ گریڈ اسٹیشن ءِ دیم ءخ زھرشانی کنوکاں بازیں کچے ءَ کراچی ءُ شال ءِ مزن شھدگ بند کرتگ ءُ چریشی ءَ ھردوکیں نیمگاں روانی مھتل بیتگ اَنت ءُ مساپراں بازیں کچے ءَ جیڑھانی دیمپانی اِنت –

زانگ بہ بیت مروچی گوادر ءَ ھم بلوچ زر ءَ چینی ٹرالرنگانی ھلاپ ءَ نیشنل پاٹی ءِ نیمگ ءَ زھرشانی ءُ دگ بندیں ھرتال بیتگ –

چریشی ءَ انتزامیہ ءَ زھرشانی کنوکانی میان ءَ بیڑ برتگ ءَ لَٹ ءُ کُٹ ھم کنگ بیتگ اَنت، گوادر ءَ شنگ بیتگیں تامر بنداں گندگ بیت اِنت کہ انتزامیہ ءُ زھرشانی کنوکانی میان ءَ جنگ ءُ چوپ بیگ ءَ اَنت ءُ تنی وھدی انگت ءَ ھرتال برجاہ اَنت –

بلوچستان ءِ تیابدپی شھر گوادر ءَ بلوچ زر ءَ گیر کانونی ٹرالرنگ ءِ ھلاپ ءَ سَے شمبے ءِ روچ ءِ سھب ءَ سرجم ءَ دگ بند ھرتال برجاہ بیتگ –

ھرتال ءَ گوادر ءِ شھر ءَ ھوار دگہ جاھانی رپت ءُ آمد بند بیتگ اَنت ءُ شھر ءَ باپاری بنجل ءُ دگ ھم بند بیتگ اَنت –

ھرتال ءِ جار نیشنل پاٹی ءَ داتگ، چریشی ءِ سبب ءَ چہ ڈور ءَ بہ گر داں کوہ ء باتیل ءَ دگانی سر ءَ ٹائر ماندارگ بیتگ ءُ گوادر سرجم ءَ بند کنگ بیتگ –

نیشنل پاٹی ءِ رھشوناں گُشتگ کہ ھرتال ءُ دگ بندیں زھرشانی زر ءِ سیمسراں ٹرالرانی گیرکانونی فشنگ ءِ ھلاپ ءَ برجاہ بیت اِنت –

چہ گوادر ءَ سر بیتگیں ھالانی رد ءَ نیشنل پاٹی ءِ باسکاں میرین ڈرائیو ءَ دگ ءِ سر ءَ ٹائر مانداشتگ ءُ روانی مھتل کرتگ اَنت دربندیں ھرتال ءَ ھم دکان ءُ باپاری بنجل مروچی بند بنت اِنت-

ھرتال ءِ سبب ءَ سرکاری ادارھاں کارکنوکیں مردماں ھازری ءِ کم ءُ مھلوک ءَ ٹوھیں مشکلانی دیمپانی اِنت –

زانگ بہ بیت بلوچستان ءِ تیابدپی دمگاں گیر کانونی ٹرالرنگ ءِ ھلاپ ءَ دریاوردانی زھرشانی یکشل ءَ برجاہ اَنت ءُ آیانی بھتام اِنت گوادر ءَ چینی ٹرالرنگ زر ءَ ماھیگانی نسل ءَ ھلاس کنگ ءَ اَنت –