TBP Balochi

ریاستی ڈیتھ اسکواڈ ءِ کارمندانی سر ءَ اُرش کُتگ دو کارمند ٹپی کتگ اَنت – دوستین بلوچ

سربوتگیں ھالانی رِد ءَ گوستگیں شپ ءَ ناشناسیں سلاہ بندیں مردماں بولان ءِ دمگ شوران ءَ پاکستانی پوج ءِ چیردستی ءَ برجاھیں ریاستی ڈیتھ اسکواڈ ءِ کارمندانی بنجل ءِ سر ءَ اُرش کُتگ، اُرش ءَ ڈیتھ اسکواڈ ءِ کارمنداں جانی تاوان ءِ دیمپانی بوتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچ ریپبلکن گارڈز ءِ جارکش دوستین بلوچ ءَ رسانکدراں وتی شنگ کُتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں بولان ءِ دمگ شوران ءَ ریاست ءِ چیردستی ءَ کارکنوکیں ڈیتھ اسکواڈ ءِ بُنجل ءِ سر ءَ گوں وتکاریں سلاھاں اُرش کتگ ءُ دو کارمند ٹپی کُتگ اَنت-

جارکش ءَ دیمتر ءَ گْوشتگ کہ ریاست ءِ چیردستی ءَ کارکنوکیں درسیں ڈیتھ اسکواڈ کارندھاں مکن کن ایں کہ آ وتی ردیں کاراں چہ شر بہ بنت اگاں ناں گُڑا اشانی بگیری ءَ تُرند ءَ چہ تُرندتریں اُرش کنگ بنت، ریاستی پوج ءُ ڈیتھ اسکواڈ کارندھانی سر ءَ اُرش دیمتر ءَ گوں تُرندی ءَ برجاہ بنت-

گڈسر ءَ جارکش دوستین بلوچ ءَ وتی درشان ءِ تہ ءَ گوشتگ کہ مئے جھد آزادیں ءُ وشھالیں ڈیھ ئِے جوڑ کنگ ءَ تاں برجاہ مان انت –

سر بیتگیں ھالانی رد ءَ ڈیرہ گازی ھان ءَ دو گاڑیاں ٹکر وارتگ ءُ چریشی ءَ دو کس بیران ءُ بازینے زدگ بیتگ اَنت –

وئیل ڈیرہ گازی خان ءِ دگ ءَ میختر ءِ نزیک ءَ ٹرک ءُ ویگنے ءَ ٹکر وارتگ، چریشی ءَ یک کسانیں چُکے ءَ ھوار زالبولے بیران بیتگ اَنت ءُ بازیں مردمے زدگ بیتگ اَنت –

وئیل ءَ پد ریسکیو ءِ کارمند سر بیتگ ءُ لاش ءُ زدگ بیتگیں مردم سیول ھسپتال لورالائی ءَ برگ بیتگ اَنت –

بلوچستان ءَ دگ ءِ وئیلاں ھمک روچ بازیں کچے ءَ مردم زدگ ءُ بیران بیگ ءَ اَنت ءُ دمگ ءِ مردمانی گوشگ اِنت وئیلانی گیشتریں سبب ڈرائیورانی بے دلگوشی ءُ دگانی پُرشت ءُ پروشی اِنت –

ھمے وڑ ءَ جھل مگسی ءَ چانڈرامہ ءِ نزیک ءَ گوستگیں سلاہ بندیں مردمانی تیرگواری ءَ دو کس بیران بیتگ اَنت –

وئیل گوستگیں شپ ءَ دیم ءَ اتکگ کہ اود ءَ سلاہ بندیں مردماں تیرگواری کرتگ ءُ دین مھمد دھرپالی ء مھمد عارف ءُ آئی ءِ ھمراہ نثار اھمد دھرپالی ء رجب علی کُشتگ اَنت –

وئیل ءَ پد لیویز ءِ کارمند وئیل جاہ ءَ سر بیتگ اَنت ءُ لاش اش چِست کرتگ ءُ ڈی ایچ کیو ھسپتال ءَ برگ بیتگ اَنت –

نبشتانک: ماہ شان ءُ گلزمین دوریانی موسم ءَ

نبشتہ کار: مھروان کمبر

دی بلوچستان پوسٹ

ماھو!
ٹپ نبشتہ نہ بنت سگگ بنت درد وانگ نہ بنت مارگ بنت من ءَ یک مُدت ئِے بیت کہ ھاموشاں منی سینگ ءَ ھاموشی اَنچو گیش کپتگ چو کہ کبرستانے ءِ کبرانی وپتگیں مردمانی وڑ ءَ منی دل اَنچو ویران اِنت کہ اود ءَ مُدت ئِے بیت واھشت ءُ وشی نہ رس اتگ بس ابیتکیں بچکنداں لُنٹانی نیام ءَ پُژمُردگ ءَ کپتگ اَنت منی کندگ ارساں چہ میچل اَنت ءُ منی لبز مُرتگ اَنت من اَنچو تھنایاں کہ ساھگ ھم ھمراہ نہ اِنت بلاھیں سیاھیں ڈن ئے ءَ گار بیتگاں کہ وت ءَ درگیتک کُت نہ کنگ ءَ آں۔

او منی گُلزمین!
من باز جُھد کُتگ کہ ترا نبشتہ بہ کناں وتی کسھانی ءُ آزمانکانی تہ ءَ بلے سک باز جُھد ءَ رند انگت نبشتہ کُت نہ کتگ پرچا کہ تو ھما مارشت ءِ کہ ترا لبزاں گوں درشان کُت نہ کناں نہ اے اسپیت چکیں کاگدانی سر ءَ تو نبشتہ کنگ بہ بَے اے مارشت بس منی دل ءِ سرزمین ءَ رُست کن انت دور ریگزارے ءَ گاریں تُنیگیں مساپرے ءَ آپ ءِ ترمپ ءِ رس ایت تو آئی ءَ جُست کن کہ تو اے ساھتاں درشان کُت کن ئے؟ یا کہ مَرگ ءِ کنڈگ ءَ اُوشتاتگیں مردم ءَ جُست بکن کہ گڈی دَم یا ساہ ءِ کشگ ءَ چنچو تاھیر دنت؟ آ درشان کُت نہ کنت ھمے وڑ ءَ من وتی سرجمیں زُوراں بہ جناں بلے انگت اے مارشتاں نا درشان کُت کناں نا کہ نبشتہ کُت کناں آ دگہ گپ ءِ کہ ھر وھد نبشتہ کُتگ گڑا بس ترا نبشتہ کتگ بلے پد ءَ ھم ترا نبشتہ کُت نہ کُتگ-

او منی ماھو!
تو منی زندگی ءِ اولی ءُ گڈی کتاب ءِ کہ ترا منی ارواہ ءَ ونتگ تو سرپدئے کہ من کتابانی شیدائی آں مرچاں کتاب زیراں بلے نہ واناں پرچا کہ لبز درمان نہ بنت نی من نبشتہ ھم نہ کناں پرچا کہ نبشتہ کنگ ءِ واستا منی گور ءَ ھچ نیست، یا من ھما مارشتاں کہ نبشتہ کنگ لوٹاں آ وڑیں لبز منی کر ءَ نیست شش سال سرجم اِنت کہ ترا چہ سستگاں وھد ءَ منی ٹپ درمان نہ کُتگ اَنت بلکیں گیشتر کُدینتگ ءُ آزگ کتگ اَنت باز مردم گش ایت وھد درستیں ٹپانی درمان کنگ ءَ زانت بلے من باور نہ کناں پرچا کہ لَھتیں ٹپانی درمان کنگ انگت وھد ءَ در نہ برتگ۔

او منی گُلزمین!
مھر، واب، وشبو، رنگ، بچکند، مارشت، پُل، بھیسہ، جمبر، ھور، سنج، چول، ساھگ، دگ، بازار چنچو مانا اَنت کہ تئی نام ءَ چہ درکاینت چنچو جلواہ اَنت منی چمانی تہ ءَ ناچ ءَ اَنت بے تو نا من ءَ رنگ ھست، نا نور، نا جلواہ منی زند یک ھورک ءُ ھالی ئیں جاگھے کہ تو من ءَ پُر کُتگ۔

او منی ماھو!
او منی ھم نپس! منی وامداریں چماناں تئی سدپ رنگیں واب اَنت کہ پیوست اَنت ترا چہ پیسر من زندگی ءِ رُنگراھاں تھنا سرجنان اتاں اے توئِے اتے کہ من ءَ دست ءَ گپت ءُ تھاریں زندگی ءِ رُنگراھاں در کت ءُ رنگ ءُ نورانی، شادہ ءُ بچکندانی دنیا ءَ سر کُت منی درستیں واب ءُ وشی گون تر ءَ بندوک اَنت تئی یک بچکندے ءَ منی زرد ءِ باگ ءَ ھزاراں پُل وتی وشبواں تالان کن انت تئی یاکُوتیں لُنٹانی سر ءَ منی نام اتکگ گڑا منی ھستی ءَ مانایے رُستگ منی چمانی روک، زرد ءِ کرار، ساہ ءُ نپس تو من ءَ تھاریں راھاں تھنا یل کن ئے ءُ کجا روے مرو کہ اے رندی منی چمانی واب پُرشتاں گڑا منی درستیں وشی ھلاس بنت ءُ زندگی ھم من ءَ دروھیت اے تو ات ئے کہ گشت من ءُ تو یکجاہ بہ ایں یک نوکیں دنیا ءِ جوڑ کنیں اود ءَ نور شنزانت ءُ ماہ، استال ءُ بالو بنت بلے بچار کسمت ءَ پد ءَ منی وابانی پیژگاہ ءَ آس کپتگ۔

اوہ منی گُلزمین!
ھردیں سُھب ءِ نوداں گوں سمین لیب کنت من ءَ تئی تبدیں موسمانی گیر انگراں کن انت دل ءِ بندیں دریگاں چہ یات ءُ گیرانی کُونج سر کش انت ءُ منی گوشاں ھلوت کن انت پد ءَ انچو گُمان بیت درد زمستان ءِ سارتیں شپاں برھنگ ءَ ناچ ءَ انت نا زانتگ یات ءُ گیرانی چُشیں امبارے من ءَ گون بیت ءُ گوست ءِ ھما درستیں ندارگ چو تیاب ءَ منی ھیالانی تہ ءَ چول جن انت۔ نہ زانتگ گیر کاینت ھما گرماگی روچانی تراولیں پندانی سپر، ریکانی دلبند ءَ گوازینتگیں شپ، رولھی بیگاھانی دیگریں برمش نہ زانتگ تئی مھر ءِ گستائی دل ءَ مئے آس جمبور کنت ءُ درستیں وشیاں سوچیت نہ زانتگ ترا چہ دور ءُ گستا باں درانڈیھ ءِ ابیتکیں کوٹیانی مُنجار باں بلے تو بژنیگ مہ بو ءُ مہ کن ارمان پرچا کہ تنیگا پاداں ھاٹیگ ءُ اُوستانی کشکاں ساہ انگت ءَ مان اِنت ءُ روان اَنت ھمے کشکانی وازمندگیں تئی مزاریں بچ ءُ تلاریں بچ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

روکپتی بلوچستان ءَ گوستگیں یک ھپتگے ءَ بیتگیں ھور ءُ ھرگاں بجلی ءَ بازیں کساسے ءَ تاوان بیتگ اَنت ءُ چریشی ءَ بازیں جاھاں لین ھم نیستی ءِ بروبری ءَ بیتگ اَنت –

گوستگیں لھتے روچانی تہ ءَ بجلی ءِ گر ءُ ھِلانی تہ ءَ گیشی گندگ ءَ اتکگ اَنت –

لین ءِ سروک اللہ بکش بلوچی ءَ رسانکدراں گوں گپ کنان ءَ گوشتگ کہ سیستان ءُ بلوچستان ءِ لین ءِ مستریں بنجل نیکشھر ءَ بجلی ءِ بنجل ءَ ھشت سد ملین تومن تاوان تاوان بیتگ اَنت –

اللہ بکش بلوچی ءِ گوشگ اِنت نیکشھر ءِ ھند بنت، مھمدان، چاھان، شریکی، تابکی ء تل ءُ ھنزم ءَ ھم بازیں کچے ءَ بجلی ءِ کمبھاں تاوان بیتگ اَنت ءُ کمبہ کپتگ اَنت –

آئی ءِ گوشگ اِنت ترندیں ھورانی گورگ ءَ سیستان ءُ بلوچستان ءِ یک مزنیں ٹانسپارُمے ھم کپتگ ءُ چریشی ءَ بازیں دمگاں بجلی مھتل بیتگ اَنت –

آئی ءِ گوشگ اِنت ھورانی گورگ ءَ پد دمگانی بندیں بجلی دوبر روک کنگ بیتگ اَنت ءُ بازیں جاھاں انگت ءَ بجلی ءِ کار بیگ ءَ اَنت –

آئی ءَ گوشتگ کہ بازیں جاھاں کچ ءُ کساس چِل ءُ ھشت کمبہ ھور ءُ ترندیں گواتانی سبب ءَ کپتگ اَنت کہ اشانی تہ ءَ تیربرگ ھم ھوار اَنت –

آئی ءِ گوشگ اِنت سیستان ءُ بلوچستان ءِ ھند گنداوگ ءَ ھم ترندیں گوارانی دگ ءُ راہ بند بیتگ اَنت ءُ چریشانی ھمراھی ءَ بجلی ءِ کاردامگاں ھم تاوانباریانی دیمپانی بیتگ اَنت –

مکران لائبریری شال ءَ شنگ کرتگیں وتی جار ءَ گوشتگ کہ نوکیں ایڈمیشن عید ءَ پد بندات کنگ بنت اِنت –

آئی ءَ گوشتگ کہ ھما نودربرانی سیادی نیزگاریں کھولانی اِنت کہ آیانی گور ءَ زر نیست اِنت آ انٹری ءِ چِن ءُ لانچ ءَ کنگ ءَ اَنت آ جنکیں نودربرانی ایڈمیشن ءُ رجسٹریشن سرجمی ءَ مُپت ءَ کنگ بیت اِنت –

مکران لائبریری ءِ سال دوھزار ءُ بیست ءِ اکتوبر ماہ ءَ بندات بیتگ ءُ آئی ءِ سرجمی سال دوھزار ءُ بیست ءُ یک ءِ جنوری ءَ سرجم بیتگ –

مکران لائبریری ءِ شنگ بیتگیں جار ءِ پد ءَ جھانی نادراھی ءِ نیزور ترگ ءُ بندآر ءِ کمی ءَ ھما نیزگاریں نودربر کہ وانگ ءَ ھب دار اَنت آیانی داخل ءَ مُپت ءَ کنگ بیت اِنت –

آئی ءِ گوشگ اِنت کہ زانت ءُ زانش ءَ گامے ءَ جنزگ ءَ دراھیں تکاں بندوکیں مردماں نپمندی اِنت چریشی ءَ باید مردم زانت ءِ نیمگ ءَ دلگوش بہ کن اَنت –

لائبریری شال ءِ دمگ بروری دگ ءَ اِنت کہ اود ءَ لائبریری شَے مرید رشید نامیں ورنایے ءَ وتی کمک ءَ وت جوڑ کرتگ –

شَے مرید رشید ءِ گوشگ اِنت کہ لائبریری ءِ مول ءُ مراد ھما مردمانی واستا اِنت کہ لائبریری ءَ کاینت وتی کورساں گیش کُت کن اَنت ءُ ھما مردم کہ لائبریری ءِ فیساں سرجم کت نہ کن اَنت آ مُپت ءَ وتی وانگیانی چِن ءُ لانچ ءَ کُت کن اَنت –

آئی ءِ گوشگ اِنت: بلوچستان ءَ وانگ ءِ پُشت کپگ ءَ آئی ءِ دیمروئی ءِ جنزگ ءَ گام جنگ ھمک تکاں بندوکیں مردمانی ھاٹیگ ءَ پرکار کُت کنت آ اِلم ءُ زانت ءِ نیمگ ءَ جنزان کنت آ بلوچستان ءِ باندات گیشتر کُت کنت اِنت –

بلوچستان ءِ بنجاھی شھر شال ءِ پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ سَے سد ءُ شش روچ سرجم بوتگ – گوستگیں سینیٹر مھیم خان بلوچ ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

بیگواھیں راشد حسین بلوچ ءِ مات ءَ بنجل ءَ اتکگ ءُ زھرشانی نبشتہ کنائینتگ – آئی ءِ گوشگ ات کہ اسلام آباد ءِ زھرشانی ءَ پد پاکستان ءِ سروزیر عمران خان ءَ بیگواھیں مردمانی کھولانی گون ءَ دچار کپتگ ءُ باور کنائینتگ کہ بیگواھیں مردمانی جیڑہ گیش ءُ گیوار کنگ بیت، بلے انگت ھچ وڑیں گامگیج زورگ نہ بوتگ –

راشد حسین بلوچ ءِ مات ءِ گوشگ ات کہ منی چُک متحدہ عرب امارات ءَ چہ زورانسری آوار جنگ ءُ بیگواہ کنگ ءَ پد پاکستان ءَ آرگ بوتگ، گواھانی بوگ ءَ ابید کمیشن ءُ آمیدگساں پیشی ءِ میان ءَ من ءَ گوشگ بوتگ کہ راشد حسین پاکستان ءَ نہ انت بلے راشد حسین ھمے ملک ءِ نندوک انت ھمے ھاتر ءَ پاکستان ءِ ھکومت متحدہ عرب امارات ءَ پسو بہ لوٹ ایت کہ راشد حسین کجا انت –

ھمے وھد ءَ وی بی ایم پی ءِ رھشون ماما قدیر بلوچ ءِ گوشگ ات کہ ائید ءِ وشی ءُ شادمانی ءِ اسلامی مزہبی تہوار ئے – ائید ءِ روچ ءَ سداں ھزاراں میل دوراں نندوکیں مردم وتی مردمانی گندوکی ءَ کایاں مھر بھر کنگ ءِ ھاتر ءَ یک ءِ دومی ءَ گورمباز کن انت –

آئی ءِ گوشگ ات کہ اے تھوار ءَ ھکئیں وشی ھما وھد ءَ رسیت کہ گسر کپتگیناں گوں دچار کپگ ءُ کھول ءِ درسیں مردمانی یکجاہ بوگ ءَ رس ایت بلے گوستگیں دھکاں چہ بلوچ راج ءِ تہ ءَ ائید ء وشی نیست انت نوں اے تہوار وشیاں وتی دوستگیں مردمانی گسر کپگ چہ آھانی زہنی روھانی گم ءُ بے کراری ءَ گیش کنت –

شیشان ءَ زوگیریں پوج ءِ کاروان ءِ سر ءَ اُرش کُتگ جانی ءُ مالی تاوان داتگ – جئیند بلوچ

سربوتگیں ھالانی رد ءَ ھوشاپ ءِ دمگ شیشان ءَ ناشناسیں سلاہ بندیں مردماں پاکستانی پوج ءِ کاروان ءِ سر ءَ اُرش کُتگ – اُرش ءَ پاکستانی پوج ءَ جانی ءُ مالی تاوانانی دیمپانی کنگ کپتگ وھدیکہ سلاہ بندیں مردم چہ جنگجاہ ءَ در آیگ ءُ رؤگ ءَ سوبمند بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچ لبریشن آرمی ءِجارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں کیچ ءِ دمگ ھوشاپ شیشان ءِ میتگ ءَ زورگیریں پاکستانی پوج ءِ کاروان ءِ سر ءَ اُرش کتگ- اے اُرش ءَ بلوچ سرمچاراں مزنیں سلاہ کارمرز کرتگ ءُ دژمنیں پوج ءِ دو کارمند ھما دمان ءَ مرتگ اَنت ءُ دگہ سَے زدگ بوتگ اَنت، وھدیکہ کاروان ءَ ھواریں گاڑیاں سک باز تاوان رس اتگ-

گڈسر ءَ جارکش جئیند بلوچ ءَ گوشتگ کہ بی ایل اے اے گپ ءُ مسام ءَ کنت کہ وتی مکسد ءِ سرجمی ءَ تاں مئے اُرش برجاہ مان انت –

بلوچستان ءَ بازیں جاھاں کتابانی نادسرسی ءَ بلوچ پدریچ ءِ آؤکیں باندات وتی زانت ءَ زبھر بیان اَنت ھمے درچ ءَ باز ھند ءَ دمگاں دمگی نودربر وتی کمک ءَ وت کتابجاہ پچ کنگ ءُ نوکیں پدریچ ءَ زانت ءِ راہ ءَ پرینگ ءَ اَنت –

چاگردی رسانکجاھاں وھد وھد ءِ سر ءَ بلوچستان ءِ بازیں جاھاں کتابی دیوان ءُ اشانی ھواری ءَ جتا جتائیں جاھاں کتاب فیسٹول ھم جنگ ءَ گندگ ءَ کاینت –

ھمے درچ ءَ ڈیرہ بگٹی ءِ دمگ زین کوہ ءَ دمگ ءِ نودربراں وتی کمک ءَ وت زین کوہ “لائبریری ” ءِ بنھشت ایر کرتگ- لائبریری ءَ کمے کساس ءَ کتاب ءِ مان بیگ ءِ ھواری ءَ آیاں وتی لائبریری ءِ بنھِشت ایر کرتگ ءُ نوکیں باندات ءَ یک گامے ءِ جنزگ ءَ جنزینتگ –

لائبریری ءِ واکداراں چاگردی رسانکجاہ فیس بک ءَ وتی کتاب جاہ ءِ نام ءَ پیج ءَ شنگ کرتگیں جار ءَ گوشتگ کہ کتاب جاہ ءَ کتابی اژدری درکار اِنت –

آئی ءَ جار ءَ بلوچ نودربر گل، بلوچ اسٹوڈنٹ کونسلز، ادیب ءُ شائراں ھوار کتاب دوستیں مردماں گوں دزبندی کرتگ ءُ گوشتگ کہ اے کتاب جاہ ءَ کتابی واستا مارا کُمک بہ کن اَنت –

آیانی گوشگ اِنت کتابانی آرگ ءَ مئے لائبریری ءَ اتکگیں مردمانی واستا پہ زانت ءَ گیشتریں کمکی بیت کن اَنت –

زانگ بہ بیت بلوچستان ءَ پرکاریں بلوچ نودربر گل بلوچ اسٹوڈنٹس ایکشن کمیٹی ءَ ھم بلوچستان ءِ بازیں جاھاں کتابی نیاد ایر کرتگ ءُ اود ءَ کتابی جم کنگ ءَ ھم فیسٹول جنگ بیتگ اَنت –

نبشتانک: بیوسانی لنٹانی بچکند

ننشتہ کار: ھدایت بلوچ

دی بلوچستان پوسٹ

رمزان ءِ ماہ ءِ گُڈی روچ اَت بیگاہ ءِ وھد اَت منی پت ءَ من ءَ توار کُت ءُ گُشت ئِے وتی براتُک ءَ بزور دکان ءَ رو اِیں پہ شما چَوٹ گراں ،من چہ گَلا بال بوتاں وتی براتک توار کُت ءُ دست ءَ گپت پت ءِ دُمب ءَ بوت اِیں دکان ءَ شُت اِیں دکان سک رش ءُ کشّ ات، پمشکا کہ باندا ائید اَت ،مردم پہ وت ءَ چیز زورگ ءَ اِت انت، من پہ وت ءَ شوکیں جوڑی یے چَوٹ زُرت پت ءَ منی براستک ءِ واستا چوٹ زُرت گھارُکانی واستا مود بند ءُ ھنّی زُرت دگہ دبوجی سامان زُرت ما لوگ ءَ اھت اِیں۔

دبوج بوت ائیدے شپ اَت من سک گَلہ بال اتاں کہ سُھب ءَ ائید انت مات ءَ مئے دست ھنی لگاشت اَنت من چہ ائید ءِ گلہ واب نہ کپتاں۔ ھمے ھیالانی تہ ءَ نزاناں کُجام وھد ءَ منی چم بند بوتاں مات ءِ توار اَت پادا اِت زھگان جان بہ شود اِت ائیدے نماز ءَ بُہ رو اِت، من چِست بوتاں جان شُشت نوکیں گُد گور ءَ کُرت اَنت چَوٹ پادا کُرت انت، وت ءَ را سینگار اِت، مات ءَ سیوئی یے گراستگ ات، ما سیوئی وارت ءُ پاد اھت اِیں پت ءِ دُمب ءَ بوت ءُ دیم پہ ائیدگاہ ءَ شُت اِیں من ءُ منی لھتیں سنگت مسیت ءِ دپ ءَ نشت اِیں، ملا واز کنگ ءَ اَت ، منی سنگتاں نوکیں گُد گور ءَ اَت ما ھر یکے وتی گُد ءُ چَوٹانی توسیپ ءَ ات اِیں ، ھمد ءَ مئے میتگ ءِ یک کماشے گوست کہ یک گونڈوے دست ءَ گپتگ اِت ئِے ،کماش گوں وتی کْوھیں گُدان ءُ اسپیتُکیں دزمال ءَ پاد ءِ سواساں گِر کنان اَت دیم پہ مسیت ءَ، گونڈو ھمے گوں سِستکیں چمپلاں دِرتگیں گُداں ھمے کماش ءِ دست گپتگ اَت ءُ مسیت ءَ روگ ءَ اَت، گوں اشانی گِندگ ءَ منی چم گُش ئے دراھت اَنت، من ھیران بوتاں کہ مرچی ائید ءِ روچ ءَ ایشان ءَ وتی نوکیں گُد پرچا گورا نہ انت؟
نماز ھلاس بوت من پت ءِ ھمراھی ءَ دیم پہ لوگ ءَ شُتاں ، بلے دُرسیں راہ ءَ بس من ھمے جیڑگ ءَ اتاں ایشان چے ءَ وتی نوکیں گُد گورا نہ کُرتگ اَنت۔ لوگ ءَ کہ سر بوتاں من مات ءَ جُست کُرت کہ امّان مرچی ائید بوتگ دُرسیں میتگ ءِ مردمان ءَ نوک نوکیں گُد گورا بوتگ بلے یک کماشے گوں یک گونڈوے ءَ ھمود ءَ نماز ءَ اھتگ اَت کہ ایشاں وتی نوکیں گُد گورا نہ کُرتگ اِت اَنت؟ –

مات ءَ منی پت ءَ را جُست کت، “اے کماش کے بوتگ؟” پت ءَ پسّو دات، ” اے کماش شھید بلوچ ءِ پت بوتگ” منی مات ءِ چم پُر ارس بوت اَنت، دست منی سر ءَ لگاشت ءُ گُشت ،” منی چک اے گریب ءُ بیوس اَنت ایشان ءَ نوکیں گُد نیست، اے گونڈو ءِ پت گوں گلزمین ءِ جنگولیں سرمچاراں گون بوتگ ، گوں زوراکاں جنگ کنان ءَ شھید بوتگ، اے گونڈو چوروے ایشان ءَ چُشیں زر ءُ مالے نیست کہ پہ وت ءَ نوکیں گُد ءُ چوٹ بِہ گر اَنت” منی چم گُش ئے تھار بوت اَنت کہ یک مردمے وتی زندگی ءَ پہ مادریں وتن ءَ پہ راج ءِ وشیں باندات ندر بہ کنت بلے چہ آئی شھادت ءَ پد ھمے راج ءِ تہ ءَ   ھچ کس ءَ سما مہ بیت کہ ایشانی سر ءَ کجام کیامت گوزگ ءَ اِنت، ھچ کس ءَ ھمے سُد مہ بیت کہ ایشان ءَ لُنکھے نان ھست پہ روگ ءَ یا کہ نیست ھمے رمزان ءَ کہ ما وش تامیں ورگ ور اِیں، ایشانی دست دپ ءَ روت یا ناں ،ھمے ائید ءُ شاتکامی بنت ما نوکیں گداں گورا کن اِیں، وتی زھگاں نوکیں گُد گورا دے اِیں، کسے ءَ اے سما بیت اشان ءَ گُد ءُ چمپل ھست یا نا ؟ بس پہ شھیدانانی اکسانی پیس بُک ءَ ایر کنگ ءَ ھچ من تو راج دوست نہ بہ اِیں، من ءُ تو ھما وھد ءَ راج دوست بہ ایں، کہ یک راج دوستیں زمیں پھازیں شھیدے ءِ زھگانی بے وسی ءُ ھشکیں لنٹانی بچکند جوڑ بہ بَہ اِیں گڑا من تو راج دوست بہ ایں اگاں چُشیں چیزانی سما مارا مہ بیت گڑا سد لانت بات مئیگ ءُ چُشیں راج ءِ بے سنچ ءُ بے سُدیں مالدار ءُ واجہ ءُ میرانی سر ءَ ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

تیرگواری وئیل شال ءُ مستونگ ءَ دیم ءَ اتکگ اَنت شال ءَ پولیس ءِ تیرگواری ءَ یک مردمے بیران، مستونگ ءَ لوگواجہ ءَ وتی زال ءِ ھمراھی ءَ یک مردمے کشتگ ءُ پنجگور ءَ یک جونے دزکپتگ –

سر بیتگیں ھالانی رد ءَ بلوچستان ءِ بنجاھی شھر شال سریاب دگ ءَ پولیس ءَ یک گاڑی ءِ سر ءَ تیرگواری کرتگ ءُ یک مردمے کُشتگ ءُ یکے زدگ کرتگ –

پولیس ءِ رد ءَ گاڑی ءِ دست دیگ ءَ گاڑی نہ اوشتاتگ ءُ چریشی ءَ ایگل اسکواڈ ءِ کارندھاں گاڑی ءِ سر ءَ تیرگواری کرتگ ءُ چریشی ءَ یک مردمے بیران بیتگ ءُ یکے زدگ بیتگ – بیران بیتگیں مردم ءِ پجار فیضان جتک ء میر داد مھمد جتک ءِ نام ءَ زانگ بیتگ –

وئیل ءَ پد مھلوک ءَ دگ بند کرتگ ءُ زھرشانی بندات کرتگ ءُ کوشکارانی دزگیری ءِ لوٹ کرتگ –

چاگردی رسانکجاھاں شنگ بیتگیں تامربندے ءَ وئیل بیران بیتگیں فیضان جتک ءِ برات ءَ گوشتگ کہ منی گاڑی اوشتوک بیتگ ءُ پولیس ءَ آئی ءِ سر ءَ تیرگواری کرتگ ءُ منی برات کُشتگ –

آئی ءِ رد ءَ مپت ءِ ھدا منی برات کُشگ بیتگ ءُ منی برات ءِ کوشکاریں کارندہ گرگ ءُ سزا دیگ بہ بیت –

ھمے درگت ءَ بلوچستان ءِ سرکار ءِ جارکش لیاقت شاھوانی ءَ سریاب دگ ءَ ناگتی پولیس ءِ تیرگواری ءَ ورنا فیضان جتک ءِ بیرانی ءُ آئی ءِ ھمراہ ءِ زدگ بیگ ءِ پدردی درشان کرتگ –

آئی ءَ گوشتگ کہ پولیس ءِ مزنیں واک اے وئیل ءِ بارہ ءَ پَٹ ءُ پول کنگ ءِ پرمان کرتگ –

ھمے وڑ ءَ مستونگ ءَ لوگواجہ ءَ تیرگواری کرتگ ءُ وتی زال ءِ ھمراھی ءَ دگہ مردم ءِ کُشتگ –

گیشیں ھالانی رد ءَ مستونگ کھڈکوچہ ءَ لوگواجہ ءَ تیرگواری کرتگ ءُ وتی زال ءِ ھمراھی ءَ دگہ یک مردمے کُشتگ، وئیل ءَ پد لیویز کارمنداں کوشکار ءِ دزگیری ءِ پرمان کرتگ –

ھمے وڑ ءَ پنجگور ءَ تیرسپتگیں جون ءِ دزکپتگ –

پنجگور ءَ رکشان کور ءَ یک تیرسپتگیں جون ءِ دزکپتگ کہ آئی ءِ پجار گل شیر ء عبدالباقی ءِ نام ءَ زانگ بیتگ –

دمگی مردمانی رد ءَ گل شیر لھتے روچ ءَ پیسر دمگ ءَ پرکاریں چیریں ادارھانی چیردستی ءَ جوڑ کرتگیں “ڈیتھ اسکواڈ ” ءِ مردماں رھوت کرتگ ءُ وتی گور ءَ لوٹائینتگ چریشی ءَ آ بیگواہ بیتگ ءُ گوستگیں روچ ءَ آئی ءِ تیرسپتگیں جون رکشان کور ءَ دزکپتگ –

زانگ بہ بیت گوستگیں بازیں دو روچانی تہ ءَ پنجگور ءَ تیرگواری وئیلاں اے سیمی مردم اِنت کہ بیران بیگ ءَ اِنت کہ چریشی ءَ پیسر سلاہ بندیں مردمانی تیرگواری ءَ بلوچی زبان ءِ شائر فضل شیر ءِ مستریں برات ءِ ھمراھی ءَ یک کسے جنگ بیتگ اِت اَنت –

سیاسی مردمانی گوشگ اِنت بلوچستان ءَ ریاست ءِ نیمگ ءَ ڈیتھ اسکواڈ برجم کنگ بیتگ ءُ چریشی ءَ لس مردمانی کُشت ءُ کوش ءُ آوارجنیاں اے ٹولی دزمانجن اَنت –