TBP Balochi

کابل ءِ بالی پٹ ءَ بالیگانی بال برجاہ ءُ پوجی ٹرانسپورٹانی بالیگ اوگانستان ءَ سپارت کار ءُ لس شھریاں برگ ءَ اَنت –

خبر رساِ ایجنسی روئٹرز ءِ رد ءَ یک روکپتی سیکورٹی باسکے ءَ گُشتگ کہ سَے شمبے ءِ سھب ءَ کابل ائیرپورٹ ءِ رن وے جھازانی واستا پچ کنگ ءُ جھاز بال کنگ ءَ اَنت –

کابل ایئرپورٹ رن وے ءُ ٹارمک ءَ ھزارانی مھلوک مُچ بیگ ءَ دو شمبے ءَ مھلوک یکدم مُچ بیتگ اَنت –

ھزاراں اوگان شھری کابل ءَ درایگ ءَ گوستگیں روچ ءَ بالی پَٹ ءَ مانرتکگ اَنت ءُ رن وے ءَ جھازانی گون ءَ روگ ءَ گندگ ءَ اتکگ اَنت –

ھمے میان ءَ دو کس بالیگ ءَ لِچ اِتگ ءُ پد ءَ ھردوک کپتگ اَنت ءُ بیران بیتگ اَنت ءُ چریشی ءَ پیسر امریکی پوج ءِ تیرگواری ءَ سے کس بیران بیتگ اِت اَنت –

تچ ءُ تاکانی سبب ءَ بالی پَٹ ءَ سیکیورٹی ءِ واستا جاڑیگیں امریکی پوج ءَ فلائٹس اپریشن بند کرتگ اَت –

گوستگیں روچ ءَ امریکی مھکمی دفاع پینٹاگون ءَ ایئرپورٹ ءِ رن وے ءَ لس شھریانی مچ بیگ ءَ بالی پٹ ءَ پوجی ءُ کمرشل بالیگ بند کتگ اَنت –

پینٹاگون ءِ جارکش جان کربی ءَ گشتگ کہ ملٹری یا سویلین ھچ جھاز روگ ءَ نہ اَنت ءُ آیگ ءَ اَنت –

گوستگیں روچ ءَ بلوچ متھدہ مھاز ءِ نیمگ ءَ چہ کراچی ملیر صدیق گوٹ کالا بورڈ ءَ سیاسی ءُ دیمروئی لوٹوکیں رھشون لال بکش رند ءِ بیرانی ءِ یازدھمی سالروچ ءِ درگت ءَ یک مراگش ءِ اڈ دیگ بوتگ مراگش ءَ بلوچ متھدہ مھاز ءِ باسک ءُ دگہ سیاسی ءُ چاگردی باسکاں بھر زرتگ – بی ایم ایم ءِ جنرل سیکٹریٹری اکبر ولی ءَ اتکگیں مردم وش اتک کرتگ انت مراگش بندات کرتگ –

مراگش ءَ گچینی مھمان یوسف مستی خان، عیسی بلوچ، اختر حسین ایڈووکیٹ، مجید ساندی، نور محمد شیخ، عظیم دھکان، لالا فقیر محمد، عبدالخالق زدران، الھی بخش بلوچ ءُ لالا لعل بخش رند ءِ نزیکیں سنگتاں آئی ءِ زند ءُ جھد ءِ سر ءَ تران کرت –

مراگش ءَ تران کنان ءَ آھاں گُشت کہ مروچی بلوچ ءُ دگہ ایردستیں راج ھما جاہ ءَ کہ سر بوتگ انت آھاں وتی پجار ءُ راجی ھکانی ھاتر ءَ یکجاھی ءَ جھد کنگی انت- لال بکش رند ءَ ھم راجی ھک ءُ ایردستیں مھلوک ءِ ھاتر ءَ جھد کُتگ آ ایردستانی توار ءِ بوتگ آئی ءَ رنگ ءُ نسل نچارتگ بلکیں مھلوک وتی ھک پچگرگ ءِ راہ سکین داتگ – آئی کمے کساس ءِ راج زرتگ ءُ دیم ءَ جنز اِتگ آھانی تہ ءَ تُرس در کُتگ وت ھم نترس ءُ بے دروریں مرد ءِ بوتگ –

آھانی گوشگ ات کہ لال بکش رند ءَ ایوبی آمریت ءُ بھٹو زوراکیانی بگیری ءَ توار چست کتگ ایوب خان دور ءَ وھدیکہ لیاری والاھاں در کنگ ءِ جھد کنگ بوت گڑا لالا لال بکش ھما مرد ات کہ دیم ءَ در اتک ءُ لیاری رکینگ ءِ زرمبشت بندات کرت ءُ لیاری ءَ یک مزنیں جلسہ ءِ کنگ ءَ سوبمند بوت کہ آ جلسہ ءَ بلوچستان ءِ ناموریں سیاستداناں ھم بھر زرت –

آھانی گوشگ ات کہ لال بکش رند نیشنلزم ءُ سوشلزم ءِ منوگرے بوتگ آئی زند یکشلیں جھدے سرشاھے بوتگ –

گڈسر ءَ بلوچ متھدہ مھاز ءِ جنرل سیکریٹری ءَ آوکیں مھمانانی منّت گپت ءُ مراگش ءِ ھلاسی ءِ جار جت –

بلوچستان ءَ من ھم ھما ازابیں پِتانی پیم ءَ یک پِتے آں کہ وتی ورنائیں بچانی یل کنگ ءَ منی دست دراج اَنت اے گپ دو بیگواھیں ورنائیں بچانی پت مولا بکش مزار ءَ کت اَنت –

بلوچستان ءِ دمگ کیچ تربت کیساک ءِ جھمنندیں مولا بکش مزار ءَ گُشتگ کہ منی ورنائیں بچ مختار ءُ بھاؤالدین ھردوک اے ایس ایف ءِ ملازم اَنت گوستگیں دوماھاں بیگواہ اَنت مارا آیانی سلامتی ءُ جاندراھی ءِ بارو ءَ ھچ سرپدی نیست اِنت ءُ دیگ بیگ ءَ نہ اِنت –

آئی ءَ گُشتگ کہ منی زھگ بھاؤالدین ءَ آئی ءِ برات کسانیں ائید ءَ پیسر چہ تربت ءَ چست کنگ ءُ بیگواہ کنگ بیتگ اَنت پد ءَ منی برات یلو کنگ بیتگ بلے چریشی ءَ پد منی مستریں زھگ مختار اے ایس ایگ ءِ ملازم شال ءَ ڈیوٹی ءِ وھد ءَ بیگواہ کنگ بیتگ انگت ءَ وتی برات بھاؤالدین ءِ ھمراھی ءَ بیگواہ اِنت –

آئی ءَ گُشتگ کہ من یک گریب ءُ بے وسیں مردمے آں، منی زھگ منی کھول ءِ سروکان بیتگ اَنت، نوکری ءَ پیسر پوریاگری اش کرتگ اِت آیانی نوکری ءَ پد ما ھدا ءِ شگر گپتگ مئے لوگ ءِ جاور گھتر بیتگ اَنت –

بلے زھگانی بیگواھی ءَ پد لوگ ءِ جاور پد ءَ جھلگ ءَ کپتگ اَنت ءُ دوبر تھاری ءِ آماچ اَنت –

آئی ءَ گُشتگ کہ زھگانی یل کنگ ءِ واستا ما کمشنر ءُ ڈپٹی کمشنر ءَ چہ باز بر ءَ رھوت کرتگ ھمک بر ءَ سدکی دیگ بیتگ بلے انگت ءَ داں چکانی یل کنگ ءَ دیم ءَ ھچ جنزگی ءَ نہ بیتگ اَنت –

آئی ءَ راجمان پتر ءِ وزیر ءِ پیداوار، استانی وزیر ھزانہ میر ظھور احمد بلیدی، ایم پی ات لالا رشید دشتی، سیکیورتی فورسز ءِ واک، کمشنر مکران ءُ ڈپٹی کمشنر کیچ ءَ گوں دزبندی کرتگ کہ آ منی بیگواھیں زھگانی یلو کنگ ءَ منی کمک ءَ بہ کن اَنت –

نودربرگل بلوچ اسٹوڈنس ایکشن کمیٹی ءِ نیمگ ءَ ھزدار ءَ جھلاوان میڈیکل کالج ءَ گل ءِ بنزہ اڈ دہگ بوتگ –

گوستگیں روچ ءَ بزاں پانزدہ اگست ءَ بلوچ اسٹوڈٹنس ایکشن کمیٹی جھلاوان میڈیکل کالج ءِ یونٹ باڈی دیوان عاقب بلوچ ءِ چیردستی ءَ برجم دارگ بوتگ –

دیوان ءِ گچینی مھمان بنجاھی کمک کارگشاد خالد بلوچ بوتگ ءُ ھواریں مھمان بساک ھزدار ھنکین ءِ کماش خیرجان بلوچ بوتگ دیوان ءَ بازیں باسکاں بھر زرتگ – ‎دیوان ءَ پجاری نشست ءُ آؤکیں کارانی باره ءَ گپ ءُ تران کنگ بوتگ –

دیمترا گل ءِ رھبندانی بنگپ ءِ سر ءَ باسکاں جھلاوان میڈیکل کالج ءِ توک ءَ گل ءِ بُنزہ ءِ جوڑ کنگ ءَ پہ وشّی زاهر کُتگ ءُ گوشتگ کہ مرچی بلوچ نودربر ءُ ورناہ بازیں وانگی جیڑھاں گوں دوچار اَنت همیشانی سوب ءَ وانگی جاورھال گوں اڑ ءُ جنجالاں دوچار اَنت همے جیڑھانی واستا یک مھکمیں جھد ئے پکار اِنت- ‎

کمک کار گشاد ءَ تران کناناں گُشت کہ نودربرانی جیڑھانی گیش ءُ گیوار نودربرانی یکجاھی ءُ پُھتوئیں پکر ءُ جوانیں راهبندئے ءِ ھستی اِنت – مھکمیں راھبند ءِ مول ءُ مراد گل ءِ زانگ ، مول مرادانی درگت ءَ سرپدی دیگ باسکانی ساڑی بوگ ءَ گوں ممکن اِنت-

د‎یوان ءِ گڈسری بنگپ آؤکیں کارانی دیم ءَ برگ ءِ واستا یونٹ کابینہ ءَ ‎بُنزہ ءِ سرکماش ڈاکٹر باقر بلوچ، ‎کُمک سر کماش ڈاکٹر نصیب بلوچ، ‎کارگُشاد ڈاکٹر احمد بلوچ، ‎کُمک کارگُشاد ڈاکٹر احسان بلوچ، شنگ کار ہارون بلوچ گچین کنگ بوتگ انت –
دیوان ءِ گڈسر ءَ ھنکینی پاگواجہ خیرجان بلوچ ءَ نوکیں کابینہ سوگند داتگ-

بلوچی زبان ءِ ورنائیں شائر منظور مراد ءِ شَیرانی اولی دپتر “گوات بیگانگ اَنت “چاپ بیتگ –

چاپ بیتگیں کتاب رژن لبزانکی کاروان ڈنڈار کولواہ ءِ نیمگ ءَ چاپ کنگ بیتگ –

منظور مراد ءَ وتی پیس بک تاک ءَ نبشتگ کرتگ ءُ گوشتگ کہ منی شَیرانی اولی دپتر گوات بیگانگ اَنت رژن لبزانکی کاروان ڈنڈار ءِ نیمگ ءَ چاپ بیتگ –

آئی ءَ گُشتگ کہ اے کتاب زوت وانوکانی دست ءَ بیت اِنت ءُ الم شما وتی شوناں کتاب ءِ سر ءَ ایر کن اِت –

بلوچی زبان ءَ ھمود ءَ وانوک کم گندگ ءَ کاینت ھمود ءَ لبزانکی تکاں بازیں چیزانی سر ءَ لبزانکار ایراد گرگ ءَ گندگ بنت –

وئیل ھب ءُ ژوب ءَ دیم ءَ اتکگ اَنت کہ اود ءَ چُک ءُ زالبولاں ھوار پنچ مردم بیران بیتگ اَنت ءُ ھشت کس زدگ بیتگ اَنت –

سر بیتگیں ھالانی رد ءَ بلوچستان ءِ باپاری شھر ھب ءَ دگ ءِ وئیل ءَ چُک ءُ زالبولاں ھوار پنچ مردم بیران بیتگ اَنت ءُ ھپت کس زدگ بیتگ اَنت –

وئیل ھب ءَ نورانی کراس ءِ نزیک ءَ ھائی رؤف ءُ کوسٹر ءَ دیم ءَ اتکگ کہ اود ءَ چُک ءُ زالبولاں ھوار پنچ مردم بیران بیتگ اَنت ءُ ھپت کس زدگ بیتگ اَنت –

دگہ وئیلے بلوچستان ءِ دمگ ژوب ءِ دمگ کلیول شھید چوک ءَ دیم ءَ اتکگ کہ اود ءَ تیز روکیں گاڑی ءَ بجلی ءِ کمبھے ءَ ٹکر جتگ ءُ چریشی ءَ یک مردمے زدگ بیتگ –

بلوچستان ءَ ھمک روچ بیتگیں وئیلاں لس مردم بیران ءُ زدگ بیگ ءَ اَنت کہ چریشانی گیشتریں سبب دگانی سر ءَ ترند روکیں گاڑیانی سبب گوشگ بیگ ءَ اِنت –

سر بیتگیں ھالانی رد ءَ گوستگیں روچ ءَ سلاہ بندیں مردماں کیچ ءِ دمگ ھوشاپ ءَ سی پیک دگ ءِ سر ءَ کار کنوکیں ایف ڈبلیو او ءِ کارمندانی سر ءَ اُرش کرتگ، اُرش ءِ زمہ واری بی ایل ایف ءَ منّ اِتگ –

بلوچستان لبریشن فرنٹ ءِ جارکش میجر گوھرام بلوچ ءَ رسانکدراں شنگ کرتگیں بیان ءِ تہ ءَ ایف ڈبلیو او ءِ سر ءَ بیتگیں اُرش ءِ زمہ واری منّ اِتگ –

جارکش ءَ گوشتگ کہ یکشمبے ءِ بیگاہ ءِ وھد ءَ سرمچاراں کیچ ءِ دمگ ھوشاپ ءَ فیض ھوٹل ءِ نزیک ءَ سی پیک دگ ءَ کار کنوکیں شرکت فرنٹئیر ورکس آرگنائزیشن (ایف ڈبلیو او) ءِ کارمندانی سر ءَ مزنیں سلاھاں گوں اُرش کرتگ ءُ دو کارمند کُشتگ اَنت –

میجر گوھرام بلوچ ءَ گُشتگ کہ زورگریں پوج وتی زوردستی بند ءُ ساچیانی سرجم کنگ ءَ سی پیک دگ ءِ سر ءَ نا ایوک ءَ مھلوک ءَ نشانگ کنگ اِنت بلکیں دمگاں نندوکیں مردماں لڈ ءُ بار ءَ ھم لاچار کنگ اِنت –

آئی ءَ گُشتگ زورگریں پوج ءُ آئی ءِ کمکار زیردستیں بلوچستان ءِ آجوئی ءَ داں برجاہ بنت –

اوگانستان ءِ سرکار ءِ پروشگ ءَ پد بازیں جاھاں بندیگیں طالبان آجو بیتگ اَنت، چاگردی رسانکجاھاں شنگ بیتگیں تامرانی تہ ءَ گندگ بیت اِنت کہ طالبان بندیگجاھاں درایگ ءُ روگ ءَ اَنت –

یک ھسابے ءَ آیانی سر ءِ مِد ءُ ریشاں زانگ بیت کہ اے مردم بازیں سالاں بندیگ بیتگ اَنت –

اوگانستان ءِ بنجاھی شھر چہ کابل ءَ سر بیتگیں ھالانی رد ءَ تحریک طالبان پاکستان ءِ گوستگیں نائب امیر ءُ باجوڑ ایجنسی ءِ امیر مولانا فقیر محمد بگرام ءِ بندیگ جاہ ءَ یلو بیتگ –

گوستگیں وھدیکہ کابل ءَ پلچرخی ءُ بگرام ءِ بندیگجاھاں بندیگانی واستا بندیگ جاہ پچ کنگ بیتگ اشانی ھواری ءَ دگہ بازیں کچے ءَ طالبانانی بندیگاں ھوار مولانا فقیر محمد ھم ھوار بیتگ ءُ اشی ءِ ھواری ءَ تحریک طالبان پاکستان ءَ گوں بندوکیں باشیں کچے ءَ طالبان یل کنگ بیتگ اَنت بلے آیانی کچ ءُ کساس تنی وھدی دیم ءَ سرجمی ءَ نیتکگ اَنت –

یک ھسابے ءِ تہ ءَ گوشگ بیتگ کہ یل بیتگیں طالبانانی کچ کم چہ کم پنچ سد ءِ کچ ءَ بیت اِنت –

تحریک طالبان پاکستان ءَ مولانا فقیر محمد ءِ یل بیگ ءِ ھال راست کرتگ ءُ گُشتگ کہ اُمتِ مسلمہ ءَ مراد باتی داتگ –

مولانا فقیر محمد ءِ بارو ءَ گوشگ بیت اِنت کہ آ بیست ءُ شش فروری سال دوھزار ءُ سیزدہ ءَ اوگان سیمسر ءَ وتی چار ھمراھانی ھمراھی ءَ اوگان لشکر ءِ دست ءَ دزگیر کنگ بیتگ –

گوشگ بیتگ کہ اشانی ھمراھی ءَ گرگ بیتگیں عمر باجوڑ ءِ گورنر نامینگ بیتگ –

طالبان ءِ نیمگ ءَ شنگ بیتگیں ھالانی تہ ءَ گوشگ بیتگ کہ مولابا فقیر محمد ٹی ٹی پی ءِ کلانیں رھشوناں چہ یکے ءُ حکیم اللہ محسود ءِ نائب ھم بیتگ – مولانا فقیر محمد ءَ ھوار بازیں کچے ءَ طالبانی یل بیگ ءِ ھال گندگ ءَ آیگ ءَ اَنت –

طالبان ءِ راجداری کارگس ءِ بنشون مھمد نعیم ءَ خلیجی ھالرسان الجزیرہ ءَ گوں گلگدار ءَ گُشتگ کہ اوگانستان ءِ جنگ ھلاس بیتگ، ڈیھ ءَ نِی نوکیں سرکار زوت یک دروشمے ءَ دیم ءَ کیت اِنت –

آئی ءَ گُشتگ کہ مروچی طالبان ءَ بیست سال ءِ دیمونیانی جد ءُ جھد ءَ گواڑگ رودینتگ اَنت، طالبان کسے ءَ تاوان دیگ نہ لوٹ ایت، دراھیں اوگان رھشوناں گوں گپ ءُ تران ءَ ساجویں ءُ ھمک گام ءَ زمہ واریانی ڈبہ ءَ زوریں، طالبان میان اُستمانی برادری ءِ گشتگیں گپانی رد ءَ گپ ءُ رپ ءَ ساجو اِنت –

طالبان ءِ جارکش ءَ گُشتگ اَت کسے ءَ اوگان ءِ سرزمین ءِ ھلاپ ءَ کارمردی ءَ نیل اِنت، طالبان کسے ءُ کجام ڈیھانی جاورھالانی سر ءَ دزمانجنی نہ کنت ءُ چریشی ءَ لوٹ ایں کہ کجام دومی ڈیھ ءَ ھم مئے جیڑھانی سر ءَ دزمانجنی نہ لوٹ یت، امیت اِنت درملکی زور اوگانستان ءَ بے سوبیں تجربگ ءَ دوبر نہ کن اَنت –

جارکش طالبان ءَ دیمتر ءَ گُشتگ کہ وتی ڈیھ ءُ مھلوک ءِ آجوئی ءِ مول ءُ مراد گپتگ اَنت دراھیں اوگانی رھشوناں گون گپ ءُ تران ءَ ساجو ایں اے پھریزی ءِ مانزمانی ءَ اشرف گنی ءِ تچگ ءِ امیت نہ بیتگ –

بلوچستان ءِ دمگ پنجگور ءُ تیابدپی شھر گوادر ءَ دو کس پاکستانی پوج ءُ چیریں ادارھاں آوار جنگ ءَ پد بیگواہ کرتگ اَنت –

گیشیں ھالانی رد ءَ گوستگیں روچاں پنجگور ءِ دمگ رخشان کور ءَ سرادک پوسٹ ءَ پاکستانی پوج ءُ چیریں ادارھانی کارمنداں یک مردمے آوار جتگ ءُ برتگ –

آوار جنگ بیتگیں مردم ءِ پجار نجیب ء جمیل ءِ نام ءَ زان بیتگ کہ آ پنجگور ءَ دیم پہ کراچی ءَ روگ ءَ بیتگ –

نجیب ءِ گوھار ءَ اسما بلوچ ءَ چاگردی رسانکجاھاں ٹوئٹر ءَ گُشتگ کہ منی پت ءِ بیگواھی ءَ پد نِی منی برات برگ بیتگ –

آسما بلوچ ءِ رد ءَ آئی ءِ پت بیست ءُ نُھ اپریل دوھزار ءُ سیزدہ ءَ آواران ءَ پاکستانی پوج ءَ چِست کرتگ ءُ بیگواہ کرتگ –

آسما بلوچ ءَ گُشتگ کہ اے کجام انساپی اِنت کہ پت ءِ برگ ءَ پد نِی منی برات ھم چما پلگ بیتگ –

بلوچستان ءَ بیگواھیانی درچ یکشل ءَ برجاہ اَنت ءُ ھمے رنگ ءَ گوادر ءَ ھم یک مردمے گوستگیں روچاں آوار جنگ ءُ برگ بیتگ –

ھالانی تہ ءَ گشگ بیتگ کہ گوادر ءَ ھواریں دمگ پسنی باز واجہ کلانچ ءَ چیریں ادارھانی کارمنداں آصف ء حاصل آوار جتگ ءُ برتگ –