TBP Balochi

سربوتگیں ھالانی رِد ءَ بلوچستان ءِ تہ ءَ جھانی وبا کرونا وائرس ءِ نادراھی ءَ یک مردمے بیران بوتگ ءُ بیست ءُ پنچ دگہ نوکیں کیس دیم ءَ اتکگ اَنت ءُ اے وھد ءَ کرونا وائرس ءَ آماچ بوتگیں درستیں مردمانی کچ سِی ھزار ءُ شش سد ءُ پنجاہ ءُ دو ءَ سر بوتگ اَنت –

بلوچستان ءَ جانسلامتی ءِ نیمگ ءَ چہ شنگ بوتگیں رپورٹ ءِ رِد ءَ گوستگیں روچ ءَ بزاں یکشمبے ءَ بلوچستان ءِ تہ ءَ پنچ سد ءُ دوازدہ مردماں کرونا نادراھی ٹیسٹ کنگ بوتگ، کہ بلوچستان ءِ بنجاھی شھر شال ءَ ھپت، گوادر ءَ ھشت، ھزدار ءُ سبی ءَ سَے سَے، تپتان ءَ دو ءُ کلعہ سیف اللہ ءَ یک یک مردمے ءَ کرونا نادراھی پدّر بوتگ، چریشی ءَ پد تنی وھدی بلوچستان ءِ تہ ءَ کرونا نادراھی ءَ آماچ بوتگیں مردمانی کچ نوکیں کیساساں ھوار سرجمی ءَ سِی ھزار ءُ شش سد ءُ پنجاہ ءُدو ءَ سر بوتگ اَنت –

رپورٹ ءِ رِد ءَ گوستگیں بیست ءُ چار ادارانی میان ءَ ھپتاد ءُ نھ مردم وش بیتگ انت وش بوتگیں مردمانی کچ نوکیں کیساساں ھوار سرجمی ءَ بیست ءُ نھ ھزار ءُ شش سد انت، رپورٹ ءِ رِد ءَ جھانی وبا کرونا وائرس ءِ نادراھی ءَ یک مردمے بیران بیتگ ءُچریشی ءَ پد تنی وھدی بلوچستان ءِ تہ ءَ کرونا وائرس ءَ سرجمی ءَ سَے سد ءُ سی ءُ پنچ مردم بیران بوتگ انت-

رپورٹ ءِ رِد ءَ بلوچستان ءِ تہ ءَ اے وھدی کرونا وائرس ءِ ھپت سد ءُ ھبدہ نادراہ ھست انت وھدیکہ بلوچستان ءِ نادراھجاھانی تہ ءَ ھپت کرونا آماچیں نادراہ ہائی فلو آکسیجن ءُ پنچ لاؤ فلو آکسیجن ءَ الاج انت ءُ بلوچستان ءِ تہ ءَ کرونا نادراھی گیش تالان بوگ ءِ چار ٹک ھشتاد ءُ ھشت درسد نبشتہ کنگ بوتگ-

سر بیتگیں ھالانی رد ءَ گوستگیں روچ ءَ کراچی ءِ دمگ مواچھ گوٹھ ءَ بیتگیں بمب تراک ءَ بیران بیتگیں مردمانی کچ سیزدہ ءَ سر بیتگ اَنت ءُ سَے مردمانی جاور نگیگ گوشگ بیتگ اَنت –

تراک گوستگیں روچ ءَ مواچھ گوٹھ ءَ بیتگ کہ اود ءَ بمب تراک یک بسے ءِ سر ءَ کنگ بیتگ –

دمگی پولیس ءِ رد ءَ تراک آروسی ءَ پد واتر روکیں بس ءِ سر ءَ کنگ بیتگ ءُ بس ءَ جنین ءُ چک ھم ھوار بیتگ اَنت –

تراک ءَ بنداتی ءَ دَہ کس بیران بیتگ اَنت نُھ کس زدگ بیتگ اَنت ءُ زدگ ءُ بیران بیتگیں مردم نادراہ جاہ ءَ سر کنگ بیتگ اَنت ءُ اود ءَ مروچی دگہ سَے کس بیران بیتگ اَنت –

ھالانی تہ ءَ گوشگ بیتگ کہ سَے کسانی جاورھال نگیگ اَنت ءُ دو ٹپی ءِ مردم درمان کنگ ءَ پد واتر لوگ ءَ روان دیگ بیتگ اَنت –

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ نیمگ ءَ زھرشانی برجاہ، زھرشانی ءَ مروچی چار ھزار ءُ چار سد ءُ دَہ روچ سرجم بیتگ، بیگواھیں عابد حسین عمرانی کھول بنجل ءَ اتکگ ءُ عابد حسین ءِ زورانسری ءِ بارو ءَ گل ءِ گور ءَ وتی گپ جتگ اَنت –

یکشمبے ءِ روچ ءَ چہ پشین ءَ بالشویک گروپ آف اسٹڈیز ءِ سروک عبدالنجیب خان، کسان سروک نصیب اللہ خان ءُ دگہ رھشوناں بنجل ءَ اتکگ ءُ ماما قدیر ءُ بیگواھیں مردمانی کھولانی گون ءَ پدردی درشان اِتگ –

بنجل ءَ اتکگیں مردمانی گون ءخ ھیال ءُ لیکہ درشان کنان ءَ وائس فار بلوچ مسنگ پرسنز ءِ وائس چیئرمین ماما قدیر بلوچ ءَ گُشتگ کہ آیوکیں وھد گیش ناوش بیت کُت کن اَنت بلوچ پُر اُیمنیں جھدکار چیر بیگ ءَ ابید تچکیں جد ءُ جھد ءَ ھوار بہ بنت اسلام آباد ءِ زالمیں ھاکمانی زُلمانی دیم ءَ بہ اوشت اَنت –

آئی ءَ گُشتگ کہ بیگواھیں مردمانی جیڑہ دراھیں بلوچانی جیڑہ اِنت پر ایمنیں جد ءُ جھد کنگ ءِ واستا کسے داوت دیگ نہ لوٹ ایت بلکیں ھرکسی وتی زمہ واری بیت اِنت جد ءُ جھد ءَ ھوار بہ بیت اِنت –

ماما قدیر بلوچ ءَ دیمتر ءَ گُشتگ کہ وھد سک نازرک اِنت بیگواھیں مردمانی پُر ایمنیں جد ءُ جھد ءَ گیش ترند بیگ لوٹ ایت اِنت وھد ءُ جاورانی سرپد بیگ ءَ درستاں اے جد ءُ جھد ءَ ھوار بیگی اِنت ءُ زُلمانی ھلاہ ءَ توار برزی کنگی اِنت –

آئی ءَ گُشتگ کہ ھما کس اے وابی ءِ آماچ اِنت جاوراں بے جد ءُ جھد ءَ گھگیری ءَ شر بنت آ گلامی ءِ تہ ءَ اڑیتگ ءُ اے اڑانکی ءَ درایگ ءُ درستاں وتی کرد پیلو کنگی اِنت –

ھمے وڑ زھری ءَ زورانسری آوار جنگ بیتگیں عابد حسین ء غلام حسین عمرانی ءِ کھول اتکگ ءُ بیگواھیں عابد ءِ زورانسری آوار جنی ءِ بارو ءَ گل ءِ گور ءَ سرجمیں گپ کرتگ اَنت –

کھول ءِ رد ءَ عابد حسین بیست ءُ ھشت اکتوبر دوھزار ءُ ھبدہ ءَ ھزدار ءِ دمگ انجیرہ کراس ءَ نامی ئیں مرد نائب ملا مرید ءَ آوار جتگ ءُ ریاستی کارمندانی ھوالگ ءَ کرتگ –

کھول ءِ رد ءَ عابد حسین ءِ زورانسری ءِ ھلاپ ءَ بازیں در ٹک اِتگ اَنت بلے کسے ءِ گور ءَ چوشیں شون نہ دیستگ اَنت –

بلوچ لبریشن آرمی ءِ جارکش جیئند بلوچ ءَ رسانکدران شنگ کررگیں درشان ءِ تہ ءَ گوشتگ کہ بلوچ لبریشن آرمی ءِ سرمچاراں مروچی شمبے ءِ روچ ءَ ھرنائی ءِ دمگ زردآلو ءَ زورگریں پاکستانی پوج ءِ واستا مڈی سر کنوکیں گاڑی بمب ءِ نشانگ کرتگ –

بی ایل اے ءِ جارکش ءِ رد ءَ دشمن ءَ راشن سر کنوکیں گاڑی ھما وھد ءَ نشانگ کرتگ کہ آ یک پوسٹے ءَ راشن سرکنگ ءَ پد شومی پوسٹ ءِ نیمگ ءَ روگ ءَ بیتگ تراک ءِ زد ءَ اتکگ ءُ گاڑی سرجم ءَ تباہ بیتگ ءُ پوج ءِ یک کارمندے مرتگ ءُ دگہ یکے کارمندے ءَ ھوار دمگی کاردارے ترند زدگ بیتگ –

جیئند بلوچ ءَ گوشتگ کہ اُرش ءَ پد پوجی ھیلی کاپٹر دمگ ءَ سر بیتگ ءُ وتی زدگ ءُ مرتگیں کارمند اش برتگ –

جارکش ءِ گوشگ اِنت کہ بی ایل اے ءَ بیست ءُ یک جولائی ءَ یک درشانے شنگ کرتگ کہ ھرنائی ءَ دمگی ٹیکیدار ءُ دگہ مردم زورگریں پوج ءِ راشن سر کنگ ءَ پھریز بہ کن اَنت ما اے پدر کرتگ کہ کجام ھم وڑیں جانی ءُ مالی تاوانانی زمہ وار وت بہ بنت ھما کس کہ دشمن ءَ کمک سر کنت –

اوگانستان ءَ اوگان تالبیان ءِ پیش گامی تیزی ءِ گون ءَ برجاہ اَنت ءُ آیاں اے وھد ءَ ڈیھ ءِ سِی ءُ چار اُستانانی تہ ءَ بیست ءُ ھست اُستاناں ھوار ڈیھ ءِ بنجاھی شھر ھم دستیگ کرتگ –

اوگان وزارت داکلہ ءَ گوشتگ کہ تالبان ءَ بنجاھی شھر کابل ءِ چاریں نیمگ انگیر ءَ کرتگ اَنت ءُ تہ ءَ پُترانان اَنت ھمے وڑ تالبیان ءِ گوشگ اِنت کہ آ جنگ یا تاکت ءِ زور ءَ شھر ءِ تہ ءَ نہ پُتر اَنت –

تالبیان ءِ جارکش ءَ گُشتف کہ تالیبان جنگجو بنجاھی شھر کابل ءَ نہ پُتر اَنت ءُ شھر ءِ کش ءُ کراں ودار کنگ ءَ کڈن کنگ بیتگ اَنت –

تالیبان ءِ جارکش ذبیح اللہ مجاھد ءَ وتی ٹویٹ ءَ گشپتگ کہ امارات اسلامی ءَ وتی دراھیں جنگجو کڈن کرتگ اَنت آ کابل ءِ راھانی سر ءَ ودار بہ کن اَنت ءُ شھر ءِ تہ ءَ روگ ءِ جھد ءَ مہ کن اَنت –

تالبیان ءِ جارکش ءَ وتی بیان ءَ گُشتگ کہ مئے جنگجو شھر ءَ نہ پتر اَنت ءُ آ پُر ایمنیں رنگے ءَ واک ءَ وتی دست ءَ کنگ لوٹ اَنت –

پشتو زبان ءَ شنگ بیتگیں شنگ بیتگیں بیان ءَ لس پھلی ءِ جار کہ دراھیناں سدکی دیگ بیتگ اَنت کسے ءِ ھلاپ ءَ ھچ رنگیں کاروائی کنگ نہ بیت اِنت –

اوگانستان ءَ تالبیان ءِ پیشگامی ءُ کابل ءَ سلاہ بندانی پترگ ءِ وھد ءَ بازیں جاھاں تیرگواریانی توار ھم اشکنگ بیتگ اَنت بلے اوگاب سروک ءَ ٹوئٹر ءَ گشتگ کہ جاور ھال کنٹرول ءَ اَنت –

اے کلوہ ءَ گوشگ بیتگ کہ کابل ءَ وھد وھد ءِ سر ءَ تیرگواری بیگ ءَ اِنت، کابل ءِ سر ءَ اُرش نہ بیتگ ڈیھ ءِ پھریزی لشکر میان اُستمانی ھمسنتاں ھوات شھر ءِ پھریزی ءَ سدکی کن اَنت جاورھال گھتر بنت –

نبشتانک: آئی ءِ زانت ءَ آپرین بات

نبشتہ کار : شیردل بلوچ

دی بلوچستان پوسٹ

دیریگیں واھگے بوتگ کہ ند ءَ چست بہ کناں تئی دَرگت چار گالرد بہ نبیس آں، وھدے نبشتہ بندات کرتگ گال گوش ئے نہ گواہ ایت، باز جھد کنگ ءَ رند ھم نبیسگ ءَ بے سوب بوتگاں، اگاں چیزے نبیس اِتگ، گڑا پد ءَ کور کرتگ، ھما گال پہ تئی کارستانی ساڑایگ ءَ من ءَ دوست نہ بوتگ اَنت، دل ءَ لوٹ اِتگ بہ نبیس آن اِش، بلے! تئی راجکاریں بالاد ءِ ساڑایگ منی وڑیں نبشتہ کارے ءِ وس ءَ گیش بوتگ، وھدے کہ ند چست کرتگ ، گڑا دیم ءَ تچوکیں ھارے اَتکگ گالانی جُھلیں زِر ءَ بُک اش وارت نہ کرتگ ، تو ھیال ءِ دریا ءَ ھما دیم گندگ بوتگ ئے سک دوریں رژنے ءِ دروشم ءَ بَل اتگ ئے ءُ جھان ءَ پدّر ئے تو وانگی ءِ (کتاب ) وانگ ءُ دَربرگ لوٹ ئے آجوئی ءِ سکین داتگ ءُ اَمَل کنوک ءُ آجوئی ءِ چیدگے بوتگ ئے، تچکیں راہ ءَ شُون داتگ ءُ روگ ءُ منزل ءَ سر بوگ ءِ سکین مئے پیمیں بے ھاٹیگاں ھاٹیگ داتگ۔

منی بُنگپ چاردہ ساچان ھما سیاھیں روچ ءِ دَرگت ءَ اِنت چہ بلوچ راج ءَ لاڑکیں بچے ءُ زَگریں رھشونے پچگرگ بوتگ، اے روچ چوناھا بلوچ راج ءَ ھوار جھان ءِ واست ءَ سیاھیں روچے زانگ بیت وتگڑیں ڈیھ اِستان ھمے روچ ءَ بزاں چاردہ ساچان نوزدہ سد ءُ چِل ءُ ھپت ءَ بے پند ءُ کربانی ءَ پندلانی پُشت ءَ ٹھینگ بوتگ، ھما روچ ءَ بگر داں روچ ء مرچی گوں وتی ناشریں کارستاں جھان ءِ ایمنی وتی ارجان ئِے کُتگ نوں کایاں وتی بنگپ ءِ نیمگ ءَ ھما کس چہ دَرکسانی ءَ چَمّانی دیم ءَ رُستگ ءُ ورنا بوتگ، ھچ کسے ءِ وھم ءُ گُمان ءَ نہ بوتگ،اے لاگر بدن چو پولاد ءَ مھکم بیت ءُ راج دوستی ءِ باسکے بیت ءُ راجی آجوئی ءِ کلوہ ءَ گس پہ گس ءَ رسین ایت، راجکاری ءِ پڑ ءَ ٹوھیں نامے یے ھُدابُندے بیت، ھرچ مردم ءِ واھگ راج ءِ شان ءُ ازت ءِ نگّھبان بیت وتی شَیرے ءِ تہ ءَ گوش اِیت ۔

“من کہ رزا جھانگیر باں بچ ھمل ءِ رند گیر باں
بنداں کتار پہ سنگراں بالاچ مری بالاچ مری”

ھمے کس” شھید رزا جھانگیر اِنت واجہ ءِ آریپیں پِت ءِ کماش ” شھید بکتیار بلوچ ءُ مکھیں مات ءِ ارزمَلک اِنت، نوزدہ سد ءُ ھشتاد ءُ ھپت ءَ آواران ءِ دمگ تیرتیج ءَ ودی بوتگ،بنداتی وانگ ءَ وتی میتگ ءِ وانگجاہ تاں ھشت تبک ءَ تیرتیج ءَ دربارت ءُ دیمتر ءَ وانگ ءِ واست ءَ ماڈل ھائی اسکول آواران ءِ وانگجاہ ءَ داھلہ زور اِیت نھمی ءُ دھمی تَبک ءِ چکاس ءَ دربارت، دوھزار چار ءَ ڈگری کالج شال ءَ اولی سالے داھلہ زور اِیت ءُ سالے ءَ وان ایت ءُ پد ءَ پولیٹکنیکل انجیرنگ ءِ الم ءَ دربات، دیمتر ءَ وانگ ءِ واست ءَ شھدربرجاہ بلوچستان یونورسٹی ءَ آئی آر ڈیپارمنٹ ءَ داھلہ زور اِیت-

دو ھزار چار ءَ بی ایس او متحدہ ڈگری کالج شال ءِ بنزہ ءِ باسکے بیت، دو ھزار پنچ ءَ بی ایس او آواران زون ءِ پریس سیکٹری بیت، ھمے میانجی ءَ گوں لھتیں سنگت ءِ ھمراھی ءَ بلوچ راجی رھشون ” ڈاکٹر اللہ نزر بلوچ ءَ مُلاکاتے کنت، راجی ایردستی ءُ بلوچ وتن ءِ آجوئی ءُ زورگیریں اِستان ءِ ھلاپ ءَ ترندی آرگ بیت، رزا جھانگیر وھدے وتی ھند ءَ رس اِیت گڑا نوکیں دابے ءَ کاراں بُنگیج کنت، ھمے میانجی ءَ بی ایس او ءِ لھتیں”گل ھور بیت بزان کہ انزمام (مچ)بنت۔

رزا جھانگیر ءَ بہ دیستیں مدام گل ءِ کاراں گلائیش اَت بلوچستان ءِ جاور روچ پہ روچ نگیگ بوگ ءَ ات اَنت ھر روچ لشکر زوراکی بلوچستان ءِ ھمک کُنڈاں گیش بوھاں اَت، دومی نیمگ ءَ گلانی تہ ءَ مھکمی زھرشانی تہ ءَ گیشی آرگ ءُ آجوئی کلوہ ھمک کنڈ ءَ سر بوتگ اَت، رزا جھانگیر آواران دمگ ءَ ھور بازیں جاھاں تر ءُ تاب ءَ اَت۔

من پہ گندکی آواران ءَ اتکگ اَتاں بیگاھے ءِ وھد اَت گوں سے چار سنگت ءِ ھمراھی ءَ چہ مئے گسانی کَش ءِ کش ءَ گوازگ ءَ اَت اَنت، من ءَ دیست اِش اُوشتات اَنت من پاد اتکاں ءُ نیمگ ءَ اِش شُت آں، دْروت دْراھبات ءَ پد من گوشت” بیا اِت رو ایں گس ءَ چاہ آپے بور اِت” گوشت اِش” اِناں دراسل ءَ من تئی آیگ ءِ ھال سھی بوتگ آں گوں تو ڈیک ورگ ءِ ارادگ بوتگ تئی ھند ءَ بیا آں، شَرّ بوت تو وت اتکگ ئے ڈیک وارت ، بیا بیگاہ ءِ وھد اِنت موسم ءَ ( انجوائے ) بزان سیلے کن ایں ، منی کر ءَ دگہ گپّے نہ بچ اتگ جی ھو ئِے کرت راہ کپت اَنت، وانگی یے ھم دست ءَ اِت ئِے، گپّ بوگ ءَ اَت، لیب گوازی ھور شَیر ءُ شائری ءِ سر ءَ گپّ گپّ ءِ تہ ھما کہ آئی مکسد اَت، گپّ ئِے انچو تُرّ دات ایردستی ءِ سر ءَ ئِے آرت انت، منی مجّگ ھم پِر نہ بوت، اے آئی زانتکاری اَت، وتی گپّ ءِ دیم ءَ ایر کنگ ءَ باز چالاک اَت، اُمر ءَ کسان اَت بلے! وتی راج ءِ بازیں گم ئِے کوپگاں بستگ اَت، اے ھمے بنداتی وھد ءَ اَت، جند ئِے گشتانک کارے (مقرر) اَت گپّ ءَ بلد اَت، گپّ ئِے ھر کس ءَ را دوست اِت اَنت، پرچا آشوب ءِ گوات چوناھا کشگ ءَ اَت ھر کسی مجّگ ءَ مان اَت ۔

چدّ ءُ پد باز رند ءَ من آئی ڈیک وارتگ، ھرچ وھد ءَ آواران ءَ زھرشانی بوتگ گڑا وت ساری بوتگ دُکان پہ دکان گَشت ءُ گوشت، ورناھانی دارجیں لڑّے ھمراہ ئِے بوتگ، یکبرے زھرشانی ءَ من ھمراہ اتان ئِے شھید بالاچ ءِ شھید بوگ ءِ اولی سالروچ اَت زھرشانی کنگ بوت یک دُکان دارے ءَ وتی دُکان بند نہ کُت ورنا جزباتی بوت اَنت گوشت ئِے اِناں ھچ مہ گوش اِت ئِے، دُکان ءِ دیم ءَ ٹائر آس بہ دے اِت بس ، دُوتّاں نگیگ کُت دُکاندار پاد اَتک دَر ئِے بند کت زاہ ءُ بد دیگ ءَ لگ اِت، گوشت ئِے” بِل اِت ئِے” من انگت ھما روچ ءِ ھیال ءَ کپ آں، دگہ کسے ءَ ھمے زھرشانی ءِ سروکی بہ کرتیں اے مردک جنگ بوتگ اَت ءُ دکان ئِے آس دیگ بوتگ اَت، آئی ءِ زانت ءَ آپرین بات، راجی کاروان ءَ کار گوں سبر ءُ مزن جگری ءَ دیم بُرتگ اَت-

بی ایس او (آزاد) اڑ داتگیں مراگشے ءَ ماں آواران ءَ اللہ نزر چار راہ ءَ مچی یے دیم ءَ گُشتانک ئِے دات گُشت” بلوچ راجدپتر گواہ اِنت،بلوچ راج جنگ ءَ گپتگ گڑا اے وھد ءَ کسے وت مرتگ یا مارے ءَ وارتگ مُرتگ آئی کُنٹ ءَ را کل کنوک نہ بوتگ آئی کھول پژینگ بوتگ، پرچا گوں راج ءِ دژمناں مِڑہ ءِ تہ نہ مرت؟ ھو مرچی پد ءَ راج ءِ سر ءَ انچیں گرانیں ساھت اَتکگ کمبل ءِ تل ءِ مرگ پہ آئی ءَ بژنی گپّے “-

دگہ جاھے ءَ گُشتانک ءِ تہ ءَ گوشت ئِے” تاکت ور پہ نزورین ءَ ھچ نہ کنت امریکہ ءِ بابت ءَ اے وڑ گوشت ئِے”وتی مڈیاں وتی زانت دومیگ ءِ سر ءَ ایر کنت ، چہ کیسگ ءَ ند ءَ دَر کُنتءُ گوش ایت اے منیگ اِنت من ءُ تو ایشی سر ءَ مڑاِتگ ایں میانجی کیت پہ وت ءَ بھرے گیشین اِیت، انچو جاہ آھو ءَ شھید اُستاد الی جان ءِ چِل ءِ پروگرام ءَ راجی مُچی ءِ دیم ءَ گشتانک ءِ تہ ءَ گوشت ئِے” بیا اِت ھور بہ بَہ اِت، تاگت واریں دژمن بے سوب بیت، اگاں چُرو چہ نکیک ءِ بانزلاں گیش اِیت، گڑا (باز) بزاں شکاری سر ءِ اْرش کنت”. اے وڑ ءَ ھم گوشت ئِے” مئے زمین ءِ ھمک درچک ءُ دارءُ سنگ درست گوں مئے دژمن ءَ جنگ ءَ اَنت، مرچی شھید ءِ اے ھبر ٹوھیں راستی یے ،لشکر ھرجاہ ءَ درچک ءُ داراں آس دیگ ءَ اِنت “رزاجھانگیر بلوچ دربر “گل بی ایس او آزاد ءِ بنجاھی باسکے ءُ بنجاھی کارگشاد ھم بوتگ ۔

چاردہ ساچان دوھزار ءُ سیزدہ ءِ شپ ءَ پہ بلوچ راج ءَ لُنج تھاری گیش آؤرت ءُ شومیں دلاراں وتی دیم سیاہ کُت “رزا جھانگیر ھور بی این ایم ءِ تربت دَمگ ءِ رھشون “امداد بجیر ءِ لوگ انگیر ئِے کُت ، رزا جھانگیر ءُ امداد بُجیر اش شھید کرت ، پہ بلوچ راج ءَ دو مھروانیں بچ ءُ راجی رھشون ابدی جُتا اش کرت اَنت ۔
شھیدرزا جھانگیر ءُ شھید امداد ءُ ساچان ءِ شھیداناں ھور سرڈگار ءِ شھیداناں دْروت گوشاں.

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سی ٹی ڈی ءِ بنشون ءَ رسانکدراں وتی شنگ کرتگیں درشان ءِ تہ ءَ گوشتگ کہ آواران ءِ دمگ چیدگی ءَ کمپان ءِ تہ ءَ سلاہ بندانی ساڑی بوگ ءِ ھال سر بوتگ کہ آ چاردہ اگست ءِ مراگشاں اُرش کنگ ءِ شوربندی انت ھما دمان ءَ سی ٹی ڈی ءَ کمپان ءَ بیڑ برتگ ءُ سلاہ بندیں گل بی ایل ایف ءِ دو باسک سراج احمد ءُ حسن جان دزگیر کرتگ انت –

سی ٹی ڈی ءِ رِد ءَ آھانی گور ءَ سیزدہ گرام تراکناکیں شورو، دو ڈیٹونیٹر، سَے میٹر پرائمہ کورڈ ءُ سَے دستی بمب دست کپتگ، کہ پاکستان ءِ آجوئی روچ ءِ درگت ءَ مزنیں ناشرکاری ءِ شور بندی ءَ بوتگ انت کہ سی ٹی ڈی ھما دمان ءَ بے سوب کرتگ انت دوئیں مردمانی ارزی ھزدار ءِ تانہ ءَ نبشتہ کنائینتگ انت گیشیں پٹ ءُ آھانی نیٹورک ءِ دومی باسکامہ شوھاز برجاہ انت –

وھدیکہ چاگردی ترامجاھاں اے ھال شنگ بوگ ءِ ھواری ءَ بلوچ سوشل میڈیا ایکٹویسٹاں سی ٹی ڈی درشان دروگ گوشتگ کہ اے ھردو ورنا پیش بزاں یازدہ جون ءَ پاکستانی پوج ءَ زورانسری آوار جتگ ءُ بندیگ کرتگ انت مروچی آھاں دروگیں درشان ءِ دیگ ءَ گیشتر پسارینگ لوٹ اَنت –

زانگ بہ بیت چد ءُ پیش ءَ سی ٹی ڈی دروگیں میڑ ءِ نام ءَ بندیگیں بندیگیں بلوچ کُشتگ اَنت ءُ آ بلوچ سلاہ بندیں گلاں گوں بندوک کرتگ انت – ھمے زوتاں بلوچستان ءِ بنجاھی شھر شال سی ٹی ڈی ءَ پنچ مردم ءِ کُشگ ءِ ٹاہ داتگ ات ءُ آھانی نام ءَ زاھر نہ کرتگ اِت اَنت پد ءَ رند ءَ پنچیں مردمانی تہ ءَ یکے پجار قدرت اللہ ء محمد وارث ملازئی ءِ جھمنند ھاران ءِ نام ءَ چہ بوتگ ات کہ چہ ھاران ءَ آئی ءِ جند ءِ لوگ ءَ آوار جنگ ءُ بیگواہ کنگ بوتگ ات پد ءَ دروگیں میڑ ءِ نام ءَ کُشگ ءُ چگل دیگ بوتگ اَت –

ھمے سال ءِ ھژدہ جنوری ءَ بلوچستان ءِ بنجاھی شھر شال ءِ رودراتکی شھدگ ءِ سر ءَ پاکستانی پوج ایگل اسکواڈ ءَ پٹ ءُ پول ءِ وھد ءَ دو ورناہ سمیع اللہ پرکانی ءُ جمیل اھمد پرکانی دزگیر کنگ ءَ پد سی ٹی ڈی ءِ دست ءَ داتگ اَنت ایگل فورس ءَ ٹاہ داتگ اَت گپتگیں مردمانی گور ءَ دزبمب دز کپتگ –
ھردوکیں ورنا پد ءَ سی ٹی ڈی ءَ مستونگ ءَ دگہ سَے مردمانی ھمراھی ءَ کہ پیسر ءَ دزگیر کنگ بیتگ اَنت ءُ دروگیں جنگ ءِ نام ءَ کُشگ ءُ چگل دیگ بیتگ اَنت –

سر بیتگیں ھالانی رد ءَ کراچی ءِ دمگ بلدیہ مواچھ گوٹھ ءِ نزیک ءَ بمب تراکے بیتگ، تراک ءَ دَہ مردم بیران بازینے زدگ بیتگ اَنت –

ایڈمنسٹریٹر کراچی مرتضیٰ وھاب ءَ اے وئیل ءِ بارو ءَ گُشتگ کہ تراک ءَ ھپت مردم زدگ بیتگ اَنت –

پولیس ءِ رد ءَ تراک ءِ جاہ چارگ بیگ ءَ اِنت بمب ڈسپوزل اسکواڈ ھم پرمان کنگ بیتگ –

پولیس ءِ رد ءَ مواچھ گوٹھ ءَ تراک ءِ نشانگ بیوکیں مردم یک آروسی ءِ نیادے ءَ واتر روگ ءَ بیتگ اَنت –

ایس پی بلدیہ ءِ رد ءَ گوشتگ کہ گاڑی ءَ بیست ءَ داں بیست ءُ پنچ مردم سوار بیتگ اَنت، زالبول ءُ چک ھوار بیتگ اَنت اے کھول لانڈھی شیرپاؤ کالونی ءِ جھمنند اَنت کہ آروسے ءَ پد واتر روگ ءَ بیتگ اَنت بلدیہ مواچھ موڑ ءَ پرپٹ سواریں مردماں کریکرے چگل داتگ، وئیل ءَ پد ٹرک ءِ ڈرائیور دزگیر کرتگ –

ایس ایس پی فدا حسین جانوری ءِ وئیل ءِ بارو ءَ گُشتگ کہ گاڑی ءَ سلنڈر ءِ ترک ءَ تراک بیتگ،تراک ءِ جاہ چار ءُ ٹپاس بیگ ءَ اِنت دمگ سرجم ءَ انگیر کرتگ ءُ پَٹ ءُ پول بندات بیتگ،وئیل ءِ ھال ءِ سر بوگ ءَ پولیس ءُ کمکی کارمند سر بیتگ اَنت ءُ زدگ بیتگیں مردم نادراہ جاہ ءَ سر کنگ بیتگ اَنت –

تراک ءَ پد وئیل ءِ جاہ ءَ سر بیتگیں کارمندانی گوشگ اِنت کہ منی گاڑی ءَ گیس سلنڈر مان نہ بیتگ، بمب ڈسپوزل اسکواڈ وئیل جاہ ءَ جاڑیگ اَنت ءُ جتا جتائیں پھناتاں چارگ ءَ اَنت، بمب ڈسپوزل اسکواڈ تراک ءِ بارو ءَ گڈی پَٹ ءُ پول بیگ ءَ پد ھال دیگ بیت اِنت –

سول ھسپتال ءِ انتزامیہ ءِ رد ءَ تراک ءِ آسر ءَ نُھ کس بیران ءُ دَہ کس زدگ بیتگ اَنت چریشانی تہ ءَ دو کسانی جاور نگیگ اَنت –

ھسپتال ءِ رد ءَ بیران بیتگیں مردمانی تہ ءَ پنچ زالبول ءُ چار چک زدگ اَنت –

دومی نیمگ ءَ بمب ڈسپوزل اسکواڈ ءَ وئیل جاہ ءَ پَٹ ءُ پول ءَ پد گُشتگ کہ تراک سلنڈر ءِ نہ اِنت بلکیں بمب تراکے بیتگ –

بمب ڈسپوزل اسکواڈ ءِ رد ءَ تراک ءَ ٹرک باڑی ءُ نٹ بولٹانی نشان پِر اَنت اے بمب ءِ کارمرد بیتگ –

پولیس ءِ رد ءَ بیران بیتگیں مردمانی سیادی یکیں کھول ءَ اِنت –

چریشی ءَ ایس ایس پی کیماڑی فدا حسین ءَ بنداتی ٹرک ءِ تراک سلنڈر گُشتگ اَت –

سر وزیر سندھ مراد علی شاہ ءَ مواچھ گوٹھ ءِ وئیل ءِ گامگیج زورگ ءِ کڈن کنان ءَ وزیر ٹرانسپورٹ سندھ ءَ سرجمیں ھالانی لوٹ کرتگ، سر وزیر سندھ ءَ تراک بیران بیتگیں مردمانی کھولانی کمک ءُ زدگ بیتگیں جوانتریں درمان جاھاں برگ ءِ کڈنی کرتگ اَنت –

سربوتگیں ھالانی رِد ءَ بلوچستان ءِ بنجاھی شھر شال، ھب، مشکے، بلیدہ ءُ گچک ءَ ناشناسیں سلاہ بندیں مردماں پاکستانی پوج ءِ پانگس ءُ آجوئی اسٹالزانی سر ءَ اُرش کتگ – اُرشاں پاکستانی پوج ءُ بیرک بھا کنوکیں کارمنداں جانی ءُ مالی تاوانانی دیمپانی بیتگ، اُرشانی زمّہ واری بلوچ آجوئی لوٹوکیں سلاہ بندیں گل بی ایل اے، یو بی اے ءُ بی ایل ایف ءَ منّ اِتگ انت –

بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ مشکے، ھب ءُ بلیدہ ءَ پاکستانی پوج ءِ سر ءَ بوتگیں اُرشانی زمّہ منّ اِتگ ءُ گوشتگ کہ مئے سرمچاراں آدینگ ءِ بیگاہ ءَ آواران ءِ دمگ مشکے ءَ منگلی ھند ءَ برجاھیں پوجی پانگس ءِ سر ءَ راکٹ دگہ مزنیں سلاھانی گون ءَ اُرش کُتگ –

آئی ءَ گوشتگ کہ سَے راکٹ پانگس ءِ تہ ءَ کپتگ اَنت ءُ ھمے وڑ پانگس ءِ پھازگی سنگرانی سر ءَ سرمچاراں مزنیں سلاھانی گون ءَ اُرش کتگ چریشی ءَ یک سنگر ءِ تہ ءَ ساڑی ئیں دو کارمند مُرتگ ءُ پانگس ءِ تہ ءَ کپتگیں راکٹاں چہ ھم پوج ءَ جانی ءُ مالی تاوان رس اتگ –

جارکش ءَ گوشتگ گوستگیں شپ ءَ ادار نُھ ءَ مئے سرمچاراں بلیدہ بٹ ءَ برجاھیں آرمی ءِ بنجاھی پانگس ءِ سر ءَ ھم راکٹ اے ون گولہ آس داتگ چریشی ءَ سَے پوجی کارمند مرتگ اَنت –

جارکش ءَ دیمتر ءَ وتی درشان ءِ تہ ءَ گوشتگ کہ بلوچستان ءِ کار ءُ باری شھر ھب چوکی ءَ ھم مئے سرمچاراں پوجی پانگس ءِ سر ءَ اُرش –

آئی ءَ گوشتگ کہ ھب چوکی پُل کش ءَ مینار ءِ سر ءَ برجاھیں پانگس سر ءَ وتکاریں سلاھاں گوں اُرش کتگ – اُرش ءِ آسر ءَ زورگیریں پوج ءَ جانی ءُ مالی تاوان ءِ دیمپانی بوتگ –

جارکش ءَ وتی درشان ءِ تہ ءَ گوشتگ کہ زورگیریں پوج ءِ سر ءَ مئے اُرش بلوچستان ءِ آجوئی تاں برجاہ مان انت زورگیریں ریاست ءِ نیمگ ءَ آجوئی شاتکامی ءُ مراگش ھچ وڑ ءَ منّگ نہ بنت راج چریشاں چہ دور بہ بنت –

ھمے وڑ بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ گچگ ءَ پوج ءِ سر ءَ بوتگیں اُرش ءِ زمّہ واری منّ اِتگ ءُ گوشتگ کہ مئے سرمچاراں پنجگور ءِ دمگ گچک جوان تاک ءَ پاکستانی پوج ءِ کواری پانگس ءِ سر ءَ راکٹ ءُ دگہ مزیں سلاھانی گون ءَ اُرش کُتگ، اُرش ءِ آسر ءَ پاکستانی پوج ءَ جانی ءُ مالی تاوان رس اتگ –

جارکش ءَ وتی درشان ءِ تہ ءَ گوشتگ کہ اُرش ءَ پد دژمنیں پوج ءِ کارمنداں چہ وتی ترس ءَ لس مھلوک ءِ سر ءَ ھر نیمگ ءَ ماٹر گولہ آس داتگ ءُ دمگ وتی انگیر ءَ کتگ ءُ سرمچارانی گرگ ءِ جھد کتگ بلے بے سوب بوتگ –
جارکش ءَ گوشتگ کہ سرڈگار ءِ آجوئی ءَ تاں مئے اُرش برجاہ مان انت –

دومی نیمگ ءَ بلوچستان بنجاھی شھر شال ءَ پاکستان ءِ آجوئی ءِ شاتکامی اسٹالز ءِ سر ءَ بوتگیں اُرش ءِ زمّہ واری یو بی اے ءَ منّ اِتگ –

یو بی اے ءِ جارکش مزار بلوچ ءَ وتی شنگ کرتگیں درشان ءِ تہ ءَ گوشتگ کہ مروچی چاردہ اگست ءَ پاکستان ءِ آجوئی روچ ءَ مئے سرمچاراں ادار یازدہ ءُ بیست ءُ پنچ ءَ پاکستانی بیرک بھاکنوکیں اسٹالز ءِ سر ءَ دستی بمب ءِ چگل داتگ، دستی بمب اُرش ءَ اسٹال جنوکیں کارمند ءَ ھوار سرکاری ایجنسی ءِ دو کارمند ٹپی بوتگ اَنت –

جارکش مزار بلوچ ءَ گوشتگ کہ ایردستیں بلوچستان ءِ نندوکیں راج ءَ گوں یکبرے پد ءَ گوشیں کہ زورگیریں دژمنیں ریاست ءِ وتگڑیں مراگش ءُ پاکستانی بیرک جنوک مئے نشانگ ءِ تہ ءَ انت مئے سرمچار آھاں کجام ھم وھد ءَ نشانگ کن ایں –

بلوچستان ءَ گوستگیں روچ ءَ بہ گر داں مروچی ءَ بازیں جاھاں سلاہ بندیں گلانی اُرشانی دیمپانی اِنت ءُ چریشی ءَ بازیں جاھاں سرکاری تکاں ھم اُرش راست کنگ بیتگ اَنت –

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ نیمگ ءَ زھرشانی برجاہ، زھرشانی بنجل ءَ مروچی چار ھزار ءُ چار سد ءُ نُھ روچ سرجم بیتگ، کمیونسٹ پاٹی ءِ کلانیں رھشون مھمد یحی، مھمد اسلم بنگلزئی، سلطان ءُ دگہ پھناتاں بندوکیں مردم بنجل ءَ اتکگ ءأ کھولانی گون ءَ پدردی اش درشان کتگ –

وی بی ایم پی ءِ رھشون ماما قدیر بلوچ ءَ اتکگیں مردمانی میان ءَ گپ کنان ءَ گُشتگ کہ بلوچستان ھما رھشوناں سیاست ءَ بھر زرتگ ءُ راجدپتر ءِ کرد پیلو کرتگ آیاں راجدپتر ھچبر بے ھیال کت نہ کنت – ھما مردماں سیاست ءَ گام ھما وھد ءَ ایر کرتگ اَنت ھمے وڑ پچیں بنجل ءِ تنک ءُ تھاروکی بیتگ، تیرانی توار، قمر قید، درملکی ءُ بلوچستان ءِ نہ روگ ءَ چنکس درداں گوستگ ءُ مروچی رژناہ بیتگ اَنت –

ماما قدیر بلوچ ءَ گُشتگ کہ بے کساس بلوچ اے راہ ءَ کربان بیتگ اَنت نہ زاناں چنکس سرگردیں بلوچانی ھون ھوار اَنت بلوچستان آس ءُ ھون ءَ گوستگ ءُ مروچی ھم آیانی تپتگیں باپ سما بیگ ءَ اِنت مروچی ھم کجا نا کجا مارا سھری ءِ رنگ گندگ ءَ آیگ ءَ اِنت کوھانی تہ ءَ جنگلانی تہ ءَ ھون ءِ بوہ آیگ ءَ اِنت نہ زاناں چنکس ورنا ھاک ءَ گوں ھوار بیتگ اَنت ءُ بنت ھون ءِ وشبو ءِ رنگ گندگ ءَ آیگ ءَ اَنت ھمے اُمیت ءُ چریشی ءَ پد جنگل ءُ کوھانی دامن ءَ سھر دابیں پُل آیانی کسھاں کار اَنت آیانی گور ءُ کپن جنگل ءُ کوھانی لمب ءَ درتکگ اَنت ءُ گندگ ءَ کاینت بلوچستان ءَ نِی کجا شتگ ءُ سر بیتگ کوھانی دامن ءَ کروتکگیں گدانانی تہ ءَ وشیانی تہ ءَ ایر کپتگ اَنت آیانی مات، گوھار ساپیں آپ ءِ درگیجگ ءَ در پہ دری کوھانی چمگانی بن ءَ شوھاز کن اَنت نا زاناں چنکس دیستگیں واب دنیا ءَ گار کنگ بیتگ اَنت چنکس پشکپتگ اَنت –

آئی ءَ دیمتر ءَ گشتگ کہ بلوچاں وتی ھون یک نوکیں راجدپترے ءِ باندات ءَ نبشتگ کرتگ اَنت نی آیانی ھون جنگل پہ جنگل توار جنان اَنت بنت ءُ کشندھاں ھساب لوٹگ ءَ اَنت آیانی وابیں جون کوھانی تہ ءَ برز بیان اَنت بدبھتی ءَ بلوچستان ءَ ناوشیانی تہ ءَ دور دیگ بیتگ بلوچانی وتی سیاست ءَ دوریں پند ءُ امن ءُ ایمنی ءِ جد ءُ جھد ءَ یک داستانے گوازینتگ –