TBP Balochi

بلوچ نیشنل مومنٹ ءِ جارکش ءَ وتی شنگ کرتگیں درشان ءَ گُشتگ کہ چاردہ اگست ءِ روچ نا ایوک ءَ پہ بلوچ راج ءَ سیاھیں روچے بلکیں سرجمیں دنیا ءِ واستا یک ساھیں روچے ءِ بستار اِنت –

آئی ءَ گُشتگ کہ اے روچ ءَ رو جھلی زوراوراں وتی مپادانی واستا ھندوستان بھر ءُ بانگ کرتگ ءُ پاکستان ءِ وجود دیم ءَ آؤرتگ کہ چریشی ءَ ھپت ماہ ءَ پد بلوچستان ءِ سر ءَ زورگری کرتگ ءُ مئے راجی پجار لپاشتگ –

آئی ءَ گُشتگ کہ برطانیہ ءِ دزمانجنی ءَ ابید بلوچستان بیست ءُ ھپت مارچ نوزدہ سد ءُ چِل ءُ ھشت ءَ داں وتی وجود ءُ واکدانی رکینگ ءَ سوبمند بیتگ، بلے چاردہ اگست ءَ ھندوستان ءِ بھر ءُ بانگی ءُ پاکستان ءِ وجود ءِ آیگ ءَ پد پاکستان ءِ پوجی زورانی سبب ءَ زورانسری بلوچستان گپتگ-

جارکش ءَ گُشتگ کہ ھندوستان ءِ دینانی بنیاد ءَ بھر ءُ بانگ کنگ ءَ گیشتر دمگ ءِ تہ ءَ ناگیگی آرگ بیتگ اَنت پاکستان ءَ بلوچستان ءِ سر ءَ زورگری کرتگ ءُ مارا گلامی ءِ تھاریں شپ ءِ میار کرتگ –

آئی ءَ گُشتگ کہ ھما روچ ءَ بہ گر داں انیگ ءَ بلوچانی پدریچ کُشی برجاہ اَنت مروچی دنیا نیکراھی وساچی ءُ ناشریانی دیمپان اِنت اے پندل ءُ ھنراں چاردہ اگست نوزدہ سد ءُ چل ءُ ھپت ءَ رو اَنت ھوار بنت، چریشی ءَ پاکستان ءَ پر زور کنگ بیتگ ءَ نیکراھی جزبگ ءِ سر ءَ ھزارانی انسان کُشگ بیتگ اَنت –

آئی ءَ گُشتگ کہ بنگالیاں ھوار ھما مھلوک کہ پاکستان ءِ آیگ ءَ پیش پیش بیتگ اَنت آیانی گون ءَ ھم پاکستان ءَ راجدپتر ءِ بدتریں زلم ءُ رواکی کرتگ اَنت -بنگالی راج وشبھت بیتگ اَنت زوت اش وتی آجوئی ءِ گرگ ءَ سوبمند بیتگ اَنت بلے دگہ راج انگت ءَ زُلم ءِ آس ءَ سُچگ ءَ اَنت –

جارکش ءَ گُشتگ کہ پاکستانی زورگری ءَ پد ھما روچ ءَ چہ بلوچ راج ءَ گھگیری ءِ راہ گچین کرتگ بازیں جنجال ءُ جیڑھاں گوزان بیتگ ءُ مروچی ءَ داں دیمونیانی کاروان برجاہ اِنت – بلوچ راج ءَ کجام ھد ءَ داں دنیا ءَ را اے سدکی داتگ کہ پاکستان ناشرکارانی گُدو اِنت ءُ پاکستان ءِ وجود ءِ ھمراھی ءَ دمگ ءَ ھوار دنیا ءِ امن ءُ ایمنی ءِ واب ناسرجم اَنت –

آئی ءَ گُشتگ کہ پاکستان نا ایوک ءَ بلوچ ڈیھ ءِ سر ءَ زورگر ءُ بلوچ ءِ دشمن اِنت بلکیں دمگ ءَ ھواریں ڈیھانی ھواری ءَ سرجمیں بنی آدم زاتامی دشمن اِنت – مروچی دمگ ءَ ھواریں ڈیھاں ناشرکاری ءَ برانز دیگ ءَ پاکستان ءِ دست ھوار اَنت اے ڈیھاں بلوچ راج ءِ گون ءَ ھوار بیگ ءُ ھمگرنچی ءَ دشمن ءِ ھلاپ ءَ جد ءُ جھد کنگی اِنت –

بلوچ لبریشن آرمی ءِ جارکش جیئند بلوچ ءَ رسانکدر ءَ وتی شنگ کتگیں درشان ءِ تہ ءَ گوشتگ مئے سرمچاراں گوستگیں شپ ھرنائی، بولان ءُ پنجگور ءَ زورگریں پوج چار اُرشانی نشانگ کتگ ءُ چریشی ءِ آسر ءَ دشمن ءِ ھپت کارندہ مرتگ ءُ بازینے ٹپی بوتگ اَنت-

بلوچ لبریشن آرمی ءِ جارکش ءَ گْوشتگ کہ مئے سرمچاراں اولی اُرش شاھرگ ءِ دمگ کھوسٹ ءَ زرد آلو ءِ ھند ءَ زورگریں پوج ءِ یک چیک پوسٹے ءِ سر ءَ گوں ٹوھیں سلاھاں نشانگ کتگ ، اُرش مارٹر پِٹ ءَ ساڑی ئیں دو کارندھاں ھوار چار کارندہ مرتگ ءُ بازینے ٹپی بوتگ اَنت وھدیکہ چیک پوسٹ سک باز تاوان رس اتگ-

چیک پوسٹ ءِ سر ءَ اُرش ءَ پد زورگریں پوج ءِ کمانڈنٹ لورالائی سکاؤٹس ءِ گاڑیانی تہ ءَ ھواریں یک کاروانے دمگ ءَ سر بوگ ءِ جُھد ءَ بوتگ بلے پیسر ءَ چہ شور بندی ءَ پیسر سنگر گپتگیں سرمچارانی دومی ٹولی ءَ ٹوھیں ءُ وتکاریں سلاھاں گوں دشمن ءِ کاروان نشانگ کتگ – اُرش ءِ آسر ءَ دشمنیں پوج ءِ سے کارندہ ھما دمان ءَ مرتگ ءُ میجر کاسم ءَ ھوار بازینے ٹپی بوتگ اَنت وھدیکہ لگوریں دشمن ءِ بازیں کارندھاں وتی ھمراہ یل کُتگ ءُ تتکگ اَنت-

جارکش ءِ گْوشگ اِنت کہ اُرش ءِ آسر ءَ دشمن ءِ سے گاڑیاں سک باز تاوان رس اتگ وھدیکہ اُرشاں پد دشمن ءِ بالگرد وتی مرتگیں ءُ ٹپی بوتگیں کارندھانی برگ ءُ دمگ ءَ شیلنگ کنگ ءِ ھاتر ءَ سر بوتگ اَنت بلے دشمن ءِ سر ءَ بوتگیں سوبمندیں اُرش ءَ پد سرمچار سلامتی وتی مھریں جاھاں سر بوگ ءَ سوبین بیتگ اَنت-

بلوچ لبریشن آرمی ءِ سرمچاراں سیمی اُرش گوستگیں شپ پنجگور ءِ دمگ کرکی ءَ دشمنیں پوچ ءِ یک چیک پوسٹے گوں راکٹ ءُ دگہ سلاھاں نشانگ کتگ – اُرش ءَ چہ دشمنیں پوج ءَ جانی ءُ مالی تاوان چست کنگ کپتگ-

جیئند بلوچ ءَ گْوشتگ کہ سرمچاراں چارمی اُرش بولان ءِ دمگ پیر اسماعیل ءَ دشمن ءِ یک پوجی بُنجلے ءِ سر ءَ گوں راکٹاں نشانگ کتگ – اُرش ءَ دشمن ءِ بازیں کارندھے ٹپی بوتگ ءُ بُنجل ءَ ھم تاوان رس اتگ-

بلوچ لبریشن آرمی بلوچ راج ءَ را سرپد کنگ لوٹ اِیت کہ آ زورگریں ڈیھ پاکستان ءِ وتگڑ ءَ وتساچیں جشن آزادی ءِ مراگشاں چہ وت ءَ دیر بدار اَنت – بلوچ سرمچار اے وڑیں مراگش ءُ مراگشانی اَڑ دیوکیں دشمن ءِ ھنسگ چٹانی سر ءَ گوں تُرندیں اُرش کنت-

نبشتانک: بِہ گندے تو شموشتگ ئے

نبشتہ کار: مھروان کمبر

دی بلوچستان پوسٹ

مُدّتے بیت کہ گوں تو جُتاھاں، مُدّتے گْوستگ کہ پہ ترا نِمدی نبشتہ نہ کُتگ اگاں نبشتہ بِہ کُتیں ھم تا چے نبشتہ کُتگ اَت ھردیں من کلم سیائیاں پِر جتگ گُڑا ھوناں گوں مِیس اِتگ، بلے مروچی من دل ءَ سنگے پِر داتگ ءُ اِسپیت چکیں تاکانی سر ءَ ھوناں گون وتی مارِشتاں نبشتہ کنان آں۔

اِشکنگ ءَ تئی شھر ءَ مروچی وشّیانی زیمر بُتکگ اَنت ءُ کْوزہ گیریں مُلک پاکستان ءِ آجوئی ءِ روچ دارگ بُوَگ ءَ اِنت کیپانی تاس سرّیچ بوان اَنت، ھر گْور ءَ رنگ ءُ نور اِنت جلواہ اِنت ءُ ناچ اِنت، بلے تو بے ھیالے کہ ھمُک سال ھمے ماہ ءَ چینچو ورنا شھید کنگ بوتگ اَنت، چینچو ورنا آوار جَنَگ ءُ زِندان ءِ تھاریں کُوٹِیاں بَرگ بوتگ اَنت۔

بِہ گِندے تو دُرست شمُوشتگ اَنت، بِہ گِندے ترا رزا جھانگیر، اِمداد،کمبر کازی، آسپ جان، ھیات جان کس یات مہ بیت، بلے تئی ءُ بلوچستان ءِ شیدا ءَ ھما وڑ یات اَنت اے انچیں کارِست اَنت کہ گوں من شموشگ نہ بَہ اَنت ، دل ءِ سر ءَ ایریں انچیں ٹپّ اَنت کہ اِشانی درمان آجوئی اِنت ھما رھنیں آجوئی کہ سامراجی تاکتانی سیت ءُ نپّانی ھاتر ءَ جوڑ بیتگیں مُلک پاکستان ءَ اَچ ما پُل اِتگ مئے کودکی واھِشت ءُ ارمان، وشی ءُ بچکند، زندگی ءِ ھزاری جلواہ ، ازّت، لجّ ءُ ننگ ، بلکیں مئے ھر چیز چہ ما پچ گِپتگ ئِے اگاں مارا چیزّے پہ ٹیکی بکشاتگ ئِے، گُڑا آ گم، سکّی ءُ سوری، لاش، کُشت ءُ کوش، ھون، برگ، گار ءُ بیگواہ کنگ، سوچگ ، در پہ دری دگہ بازیں جیڑہ ءُ جنجال۔

اگاں ترا باور نہ کنت ، گُڑا بلوچستان ءِ تتکگیں چمّگانی آپاں چہ جُست گِر کہ شُمارا چینچو ورنا ءِ ھون ھوار اَنت بلوچستان ءِ زیبائیں جنگلاں چہ جُست گِر کہ چینچو ورنایاں وتی ھوناں چہ شُمارا سیراپ کُتگ بلوچستان ءِ کوہ ءُ کوچگاں چہ جُست گِر کہ آھاں وتی دامُن ءَ چِینچو بلوچ ءِ کپتگیں جون پناہ داتگ اَنت۔

تنک ءُ تھاریں کُوٹِیاں چہ گار بیتگیں چیھالاں پول کہ مات ءُ پِتانی، کھول ء مردُمانی، برات ءُ گْوھارانی دیم ءَ چُنت بے میار ءُ کودکیں ورنا چِست کنگ ءَ پد گار ءُ بیگواہ کنگ بیتگ اَنت، گار ءُ بیگواہ کُتگیں ورنایانی درد ھم جُتا اَنت، ھما کہ شھید کنگ بیتگ اَنت ءُ آھانی لاش دست کپتگ اَنت آھانی کھول ءِ مردُماں سبر ءِ دامُن داشتگ ءُ نشتگ اَنت، بلے ھما کہ آھانی آگھیں چمّانی دیم ءَ شپ ءِ تھارونکی ءَ یا روچ ءِ رُژنائی ءَ آھانی تاسپیں بچّ چِست کنگ بیتگ اَنت آ ماتانی چم ھمُک بیگاہ ءُ رولہ ءِ ساھتاں ھمے اُمیت ءَ دروازگ ءَ سک اَنت بلکیں مئے چمّانی چِراگ کونجانی رماں گوں واتر بَہ اَنت ءُ اے اُمیتانی چِراگ ھما ساھت ءَ مِر اَنت وھدے بچّ واتر نہ بَہ اَنت ءُ شپ وتی شار ءَ پر دنت پرچا کہ ھمُک شپ آھانی اُمیتانی میّتاں تلام کنت۔

تو بِہ گِندے بے ھیالے کہ کْوزہ گیریں ریاست پاکستان مئے لجّ ءُ ننگانی پادمال کنگ ءَ شپ ءِ تھارونکی ءَ میتگ پہ میتگ اِنت بِہ گِندے تو اے ھم شموشتگ کہ کماش نورجان وتی لجّ ءُ ننگ ءِ رکّینگ ءِ ھاتر ءَ پاھُو ءِ ساد ءَ پمیشکا چُکّیت ءُ وتی گُٹّ ءَ کنت کہ باندا گْوستانک من ءَ اے شِگان ءَ مہ جنت کہ اَھد ءِ تمردیں زُوراک ءِ دیم ءَ نورجان ءَ وتی سرجھل کُتگ ءُ آئی ءِ لجّ ءُ ننگ آئی ءِ دیم ءَ لِیلام بوتگ ۔

 کیلکور ءِ کماش پمیشکا دُژمن ءِ تیراں وتی سینگ ءَ وش اَتک کنت کہ آیوکیں پدریچ منی کبر ءَ لٹّ مہ جنت کہ کماش ءَ وتی ساہ چہ ننگ ءُ ناموس ءَ گیش دوستِر بیتگ۔

دیر اِنت کہ من ءُ تو گِسر کپتگیں ، پرچا کہ وھد ءَ منی ءُ تئی مْیان ءَ یک سُھریں لکیرے کشّ اِتگ تئی دمبرتگیں پاد ءُ کدم اُوشت آماچ اَنت ، بلے من انگت دم نہ بُرتگ، تو دیر اِنت کہ وتی کِبلہ مٹّ کُتگ ءُ واجہ ءِ در ءَ پہ سُجدگ ءَ کپتگے بلے منی پاد ءُ کدم وتی مِنزل ءِ شوھاز ءَ انگت پیچ ءُ تاب ، کُنٹگ چکاریں راھاں راھی اَنت، انگت منی سگ ءُ ھاٹیگ چو کوہ ءِ البُرز ءَ مُھکم اَنت اے منی ایمان اِنت کہ مئے ھمبلانی رِتکگیں ھون ءُ زمین زادگانی بُر اِتگیں پند تاوان نہ بَہ اَنت، الم یکروچے منی ڈیھ ءَ زوراکی ءِ تھاریں شپ ھلاس بیت آجوئی ءِ سُھر دپیں بامے ٹِکّ دنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ٹی بی پی پترھال ءَ سر بیتگیں ھالانی رد ءَ گوستگیں شپ ءَ پنجگور ءُ تربت ءَ پاکستانی پوج ءَ دو مردم دزگیری ءَ پد ناشناسیں جاھاں برتگ اَنت ھمے وڑ ءَ ھاران ءَ پوج ءَ شش کس دزگیر کنگ ءَ پد بیگواہ کرتگ اَنت –

پنجگور ءَ دزگیری ءَ پد بیگواہ بیتگیں مردم ءِ پجار مطیع اللہ ء عبدالرزاق جھمنند وشبود پنجگور ءِ نام ءَ زانگ بیتگ –

دمگی مردمانی رد ءَ بیگواہ کرتگیں ورناہ گوستگیں شپ ءَ آوار جنگ ءُ بیگواہ کنگ بیتگ –

زانگ بہ بیت پنجگور ءَ اے بیست ءُ چار ادارانی تہ ءَ اے دومی بیگواھی ءِ دومی وئیل اِنت کہ اشی ءَ پیسر پوج ءَ پنجگور ءِ دمگ گرمکان ءَ سعد اللہ ء ھاجی ھمید آوار جتگ ءُ بیگواہ کتگ اَت –

ھمے وڑ ءَ گوستگیں روچاں پاکستانی پوج ءَ دشتی بازار تربت ءَ یک لوگے ءِ سر ءَ پاکستانی پوج ءَ بیڑ برتگ ءُ اود ءَ اخلاق ء پیر بکش نامیں ورنایے آوار جتگ ءُ برتگ – بیگواہ بیتگیں ورنا ءِ سیاداں آئی ءِ بیگواھی ءِ ھال راست کرتگ –

بلوچستان ءَ زورانسری آوار جنیانی درچ بازیں وھداں برجاہ اَنت گوستگیں روچاں اے وڑیں وئیلانی تہ ءَ گیشی اتکگ اشی ءَ پیسر دہ اگست ءَ پوج ءَ مستونگ ءَ بابل بنگلزئی نامیں ورنایے آوار جتگ ءُ برتگ –

ھاران ءَ ھال سر بیتگ اَنت کہ شش کس آوار جنی ءَ پد بیگواہ کنگ بیتگ اَنت –

دمگی مردمانی رد ءَ ھاران ءِ دمگ لجے ءَ پوج ءُ دمگی ڈیتھ اسکواڈ ءَ شش کس آوار جتگ ءُ ناشناسیں جاھاں برتگ اَنت – کہ چریشانی تہ ءَ یکے ءِ پجار رسول بکش ء مھمد کریم ءِ نام ءَ زانگ بیتگ ءُ آ دگہ پنچ کسانی پجار نہ بیتگ اَنت –

پاکستان ءِ آجوئی ءِ روچ ءِ درگت ءَ بلوچستان ءں جتا جتائیں جاھاں پاکستانی پوج ءَ سلاہ بندیں گلانی نیمگ ءَ اُرشانی دیمپانی اِنت –

سر بیتگیں ھالانی رد ءَ پنجگور ءَ سلاہ بندیں مردماں پوج ءِ چوکی ءِ سر ءَ اُرش کرتگ ءُ پوج ءَ تاوانانی دیمپانی بیتگ –

اُرش پجگور ءِ دمگ کرکی ءَ بیتگ کہ اود ءَ سلاہ بندیں مردماں پوج ءِ سر ءَ اُرش کرتگ، ھال اِنت پوج ءَ تاوانانی دیمپانی کنگ کپتگ – بلے سرکاری تکاں اُرش ءِ راستی نہ بیتگ –

ھمے وڑ ءَ ھرنائی ءَ سلاہ بندیں مردماں پوج ءِ چیک پوسٹ ءُ آیانی کمک ءَ آیوکیں کاروان ءِ سر ءَ سر ءَ اُرش کرتگ –

سرکاری تکاں ھرنائی ءِ اُرش ءِ راست بیتگ ءُ گوشگ بیتگ کہ شاھرگ ءَ کمانڈنٹ ایف سی لورالائی سکاؤٹس ءِ کاروان ءِ سلاہ بندیں مردماں اُرش کرتگ ءُ تیرگواری ءَ یک کارمندے لانس نائیل شریف مرتگ ءُ دو کارمند زدگ بیتگ اَنت –

ھمے وڑ ءَ بولان ءَ سلاہ بندیں مردماں پوجی بنجل راکٹاں گوں مانبستگ –

بلوچستان ءِ دمگ بولان ءِ ھند پیر اسماعیل ءَ شمبے ءِ شپ ءَ پاکستانی پوج ءِ بنجاھی بنجل ءِ سر ءَ راکٹانی گون ءَ اُرش کرتگ –

دمگی مردمانی رد ءَ ناشناسیں سلاہ بندیں مردمانی نیمگ ءَ راکٹ گواری ءِ وئیل پیر اسماعیل ءَ پیش اتکگ اَنت کہ اود ءَ ایف سی ءِ بنجل ءِ تہ ءَ کپتگ اَنت –

زانگ بہ بیت بلوچستان ءِ جتا جتائیں جاھاں سلاہ بندیں گلانی نیمگ ءَ آدینگ ءِ روچ ءَ بہ گر دان انیگ ءَ پوجی بنجل ءُ چوکی ءُ کاروانانی سر ءَ یکشل ءَ اُرش برجاہ اَنت ءُ بازیں اُرشانی زمی واری سلاہ بندیں گلاں منّ اِتگ اَنت ءُ بلے اے اُرشانی زمہ واری تنی وھدی ھچ گل ءَ نہ من اِتگ اَنت –

پاکستان ءِ اجوئی ءِ روچ ءِ درگت ءَ بازیں جاھاں پاکستانی پوج ءَ سلاہ بندیں گلانی نیمگ ءَ اُرشانی دیمپانی اِنت –

نبشتانک: ماتی

نبشتہ کار: میرین زھری

دی بلوچستان پوسٹ

مات ءِ نام ءَ کہ آئی ءِ پُر مِھریں سکیناں من ءَ گوں زمین ،جھان ، انسانیت ءُ دنیا ءِ درائیں چیزاں گوں مھر کنگ سوج داتگ، آئی ءَ منی لنکُک گپتگ ءُ من ءَ گام جنگ ءِ سکین ءِ داتگ۔

آ منی زند ءِ آدینک اِنت چی ءَ کہ آدینک ھجبر دروگ نہ بند ایت مات ھما ھمراہ اِنت کہ بے متلب ءَ گوں تو زندگی ءِ درائیں تکاں ھمراہ داری کتگ۔

من ءَ یات اِنت برے برے ما شپ ءَ بے وھد ءَ گِس ءَ واتر بوتگیں تاں بے تواری ءَ پُترتگ اِنت کہ مئے چمپل توار مہ کن اَنت کہ بلکیں مات مئے مات چرے کارپد ءَ نہ وش بہ بیت بلے پُترگ ءَ گوں دیستگ کہ آ تاں انگت ھاگاہ اِنت، نہ وپتگ، منی ودار ءَ نِشتگ۔

آ ھما ھستی اِنت کہ من ءَ اولی رند ءَ جنگ کنگ ئِے سکینے داتگ پہ وتی ھک ءَ جنگ کنگ ، پہ کوریں چاگرد ءَ جنگ کنگ ءُ وتی کَش ءُ کِرے ھرابیانی ھلاپ ءَ جنگ کنگ آئی ءَ من ءَ مدام گُشتگ ناں تو دگرے ھک ءَ بہ وَر ءُ ناں وتی ھک ءَ دگر ءَ بہ دے- اگاں کسے تئی ھک ءِ ورگ ءِ جھد ءَ کنت آئی ءَ بہ کُش ءُ اگاں زرورت کپت وت ءَ ھم بہ کُشارین بلے وتی ھک ءَ ھجبر یلہ مہ دے-

منی باجنیں مات ھروچ جنگ ءَ اِنت گوں کوریں چاگرد ءَ کرّیں پدریچ ءَ گوں گُنگیں اھد ءِ زوراکاں تاں انگت دم نہ برتگ۔

مدام جھد ءُ جھد ءَ اِنت گھگیری کنگ ءَ اِنت برے شال ءِ سارت ءُ برپ بادیں پھنات ءَ، برے کراچی ءِ روکیں دگانی سر ءَ سپر جنگ ءَ اِنت کُکار ءَ اِنت توار پِر جنگ ءَ اِنت کہ مدتے بیت منی برات زندان ءَ بندیگ اِنت۔

تھنا برات بندیگ نہ اِنت بلکیں مئے گِس ءِ دْراھیں وشی زنداناں بندیگ اَنت تھنا مئے چمانی چراگ بیگواہ نہ اِنت بلکیں مات ءِ لُنٹانی سر ءِ شیرکنیں بچکندگ گوھارانی لاڑکیں واھشت زھگانی کودکیں ارمان بیگواہ اَنت۔

ھما مات ءِ لُنٹانی سر ءَ من بچکنداں اَبید دگہ ھچ نہ دیستگ بلے نوں سک دیر اِنت کہ آئی ءِ چمانی ارس چو ھور ءَ شنزان ءُ مسکیں زمین ءِ دلبند ءَ رِچان اَنت۔

بلے من دلجماں اے ارس ءُ اندوہ ءُ درد ءُ کولنج منی مات ءَ نزور نہ کن اَنت آ یک مھکمیں انسانے آ ھزار درد ءُ دوراں اَبید ھم مارا تسلہ دیگ ءَ اِنت کہ اے کھریں ازابانی روچ گوز انت الم ءَ یک پُر ایمنیں سھبے ماں مئے گیدی ءِ دلبند ءِ سر ءَ کشّ ایت۔

ماتی جان من اشی ءَ ھم زاناں کہ تو شھر پہ شھر، دگ پہ دگ گِنداں من وتی ھستی ءَ چہ ھلاس باں ھما مات کہ من ءَ چم ءِ چارگ ءَ دل نہ بیتگ آ سرجمیں شپ مُسلہ ءِ سر ءَ نشتگ ءُ پریات کنت آئی ءِ چیھانٹاں ارشے سر ءَ زُرتگ منی سینگ ءَ دردانی چیھانٹ رُدَنت، نزور تَرّاں، بلے پد ءَ کہ آئی ءِ توکل ءُ توان ءَ گنداں کہ ھَمُک جاور ءِ دیم ءَ پہ تمردی اوشتاتگ تاں من گیش دلجم ءُ مھکم باں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بی ایل ایف ءَ شال ءِ دمگ دشت ءَ پاکستانی پوج گاڑی سر ءَ بمب اُرش ءِ زمہ واری منّ اِتگ-

بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں شنگ کرتگیں درشان ءِ تہ ءَ شال ءَ پاکستانی پوج ءِ گاڑی گوں چیرکتگیں بمبے ءِ نشانگ کنگ ءِ زمہ واری منّ اِتگ ءُ گْوشتگ کہ سرمچاراں شال ءِ دمگ دشت ءَ دشمنیں پوج ءِ یک گاڑی یے گوں چیرکتگیں شورواں نشانگ کتگ ءُ چریشی ءِ آسر ءَ گاڑی سرجم ءَ تباہ بوتگ ءُ گاڑی ءَ سواریں چار کارندہ ھما دمان ءَ مرتگ ءُ وھدیکہ آ دگہ کارندہ ٹپی بوتگ اَنت –

میجر گْوھرام بلوچ ءَ دیمتر ءَ گْوشتگ کہ زورگریں پاکستانی پوج چاردہ اگست ءِ مارگشاں بھر زیرگ ءِ ھاتر ءَ راج ءَ بیھار دیگ ءُ بیرک روانک کشگ ءَ اِنت-

آئی ءَ گُشتگ کہ زورگریں پوج سرجمیں زورگپتگیں بلوچستان ءَ سرمچارانی نشانگ ءِ تہ ءَ اَنت – راج زورگریں پوج ءَ چہ وت ءَ دیر بدار اَنت سرمچار کجام وھد ھما وھد ءَ کجام جاھاں نشانگ کُت کن اَنت –

میجر گْوھرام بلوچ ءَ دیمتر ءَ گْوشتگ کہ زورگریں پوج ءِ سر ءَ داں زورگریں بلوچستان ءِ آجوئی ءَ مئے اُرش برجاہ بنت-

وئیل مستونگ، کلات ءُ شال ءَ دیم ءَ اتکگ اَنت کہ اود ءَ بیتگیں وئیلاں یک زالبولے بیران ءُ زالبول ءُ چکاں ھوار سیزدہ مردم زدگ بیتگ اَنت –

گیشیں ھالانی رد ءَ مستونگ ءِ دمگ کھڈکوچہ ءِ ھند بدرنگ ءَ سوزوکہ پک اپ ءُ پرپٹ ءَ ٹکر وارتگ، چریشی ءَ پد گاڑی چپ بیتگ-

وئیل ءَ سَے زھگ ءُ زالبولاں ھوار ھشت مردم زدگ بیتگ اَنت، وئیل ءَ پد زدگ بیتگیں مردم گوس بکش رئیسانی ھسپتال ءَ برگ بیتگ اَنت –

زدگ بیتگیں مردمانی تہ ءَ یکے ءِ جاور نگیگ گوشگ بیتگ اَنت –

ھمے وڑ ءَ کلات ءَ دگ ءِ وئیلے ءَ سَے مردم زدگ بیتگ اَنت –

گیشیں ھالانی رد ءَ کلات ءَ مزن شھدگ ءَ نیمرغ ءِ کراس ءَ گاڑی ءِ وئیل آماچ بیتگ کہ چریشی ءَ سَے مردم زدگ بیتگ اَنت –

زدگ بیتگیں مردم نادراہ جاہ ءَ سر کنگ بیتگ اَنت ءُ زدگ بیتگیں مردمانی تہ ءَ یکے ءِ جاور نگیگ گوشگ بیتگ اَنت –

ھمے وڑ ءَ شال ءِ دمگ مسلم باغ نسائی ءَ یک الٹوگاڑی ءِ چپ بیتگ ءُچریشی ءَ یک زالبولے بیران بیتگ ءُ دو کس زدگ بیتگ اَنت –

زدگ بیتگیں مردم بنداتی ءَ مسلم باغ ءَ نادراہ جاہ ءَ برگ بیتگ اَنت ءُ گیشیں جاندراھی ءِ ھاتر ءَ شال ءَ برگ بیتگ اَنت –

دمگی مردمانی رد ءَ مسلم باغ ءَ نادراہ جاہ ءَ ڈاکٹرانی نہ بوگ ءِ سر ءَ داں ٹپ ءُ ٹوریں ھمود ءَ جاڑیگ نہ بیتگ اَنت ءُ چریشی ءَ ٹپ ءُ ٹوریں مردم گیشتر ناگیگ بیتگ اَنت –

سربوتگیں ھالانی رِد ءَ بلوچستان ءِ دمگ کیچ ءُ پنجگور ءَ پاکستانی پوج ءِ سر ءَ اُرش کنگ بوتگ اَنت – اُرشانی آسر ءَ پاکستانی پوج ءَ جانی ءُ مالی تاوان رس اتگ اَنت – اُرشانی زمّہ واری بلوچ آجوئی لوٹوکیں سلاہ بندیں گل بی ایل ایف ءُ بی آر اے ءَ منّ اِتگ انت –

زانگ بہ بیت بلوچستان ءِ بازیں دمگاں پاکستانی پوج ءُ پاکستانی آجوئی ءِ شاتکامی اسٹالزانی سر ءَ بلوچ سلاہ بندیں گلانی اُرش یکشل ءَ برجاہ انت –

بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ کیچ ءُ پنجگور ءَ پاکستانی پوجی پانگسانی سر ءَ بوتگیں اُرشانی زمّہ واری منّ اِتگ ءُ گوشتگ کہ مئے سرمچاراں کیچ ءِ بنجاھی شھر تربت ءِ ھند سنگانی سر ءَ ھسپتال میتگ ءُ پنجگور ءَ رکشان کور ءِ پھل ءِ سر ءَ برجاھیں پوجی پانگسانی سر ءَ دزبمب چگل داتگ اَنت کہ پانگسانی تہ ءَ کپتگ انت -چریشی ءَ زورگیریں پوج ءَ جانی ءُ مالی تاوان ءِ دیمپانی بوتگ اَنت –

جارکش میجر گوھرام بلوچ ءَ دیمتر ءَ وتی درشان ءِ تہ ءَ گوشتگ کہ چاردہ اگست ءِ مراگش بلوچ راج ءِ گلامی ءَ مھکم کنگ ءِ بھانہ ءَ راج چریشی ءَ وت ءَ دور بہ دار انت –
آئی ءَ گوشتگ کہ سرمچار زورگیریں پوج ءَ آھانی کمک کارانی سر ءَ انت بلوچ راجی زرمبشت بگیری ءَ زورگیریں ریاست ءُ آھانی ھمراھداری کنوک ھچ وڑ ءَ پھل کنگ نہ بنت –

دومی نیمگ ءَ بلوچ ریپبلکن آرمی ءِ جارکش بیبگر بلوچ ءَ وتی شنگ کرتگیں درشان ءِ کولواہ ءَ سی پیک دگ ءِ پھازگی پانگس ءِ سر ءَ بوتگیں اُرش ءِ زمّہ واری منّ اِتگ ءُ گوشتگ کہ مئے سرمچاراں گوستگیں بیگاہ ءَ کولواہ ءِ دمگ آشال کاشت کور ءَ سی پیک ءِ پھازگ ءِ ھاتر ءَ برجاھیں زورگیریں پوج ءِ پانگس ءِ سر ءَ دور جنگیں توپک ءَ گوں اُرش کتگ اُرش ءِ آسر ءَ یک پوجی کارمندے مُرتگ –

جارکش ءَ دیمتر ءَ گوشتگ کہ ما اے دگ ءِ جوڑ کنوکیں دمگی ٹیکداراں مکن کن ایں کہ آ اے کار ءَ ھوار بوگ ءَ پھریز بہ کن انت اگاں ناں آ ھم جنگ بنت –

ھمے وڑ یونائیٹڈ بلوچ آرمی ءِ جارکش مرید بلوچ ءَ وتی شنگ کرتگیں درشان ءِ تہ ءَ پاکستانی پوج ءِ سر ءَ بوتگیں اُرش ءِ زمہ واری منّ اِتگ ءُ گوشتگ کہ گوستگیں شپ ءَ کیچ ءِ دمگ پیدارک گورکوپ کلگ جکی ءِ ھند ءَ پاکستانی پوج ءِ یک کارمندے اسنائپر ءِ گون ءَ نشانگ کتگ ءُ چریشی ءَ پوج ءَ جانی ءُ مالی تاوانانی دیمپانی کنگ کپتگ –

آئی ءَ گوشتگ کہ اے وڑیں اُرش بلوچستان ءِ اجوئی تاں برجاہ مان انت –

نبشتانک: ھیات آشوب ءِ چیدگ اِنت

نبشتہ کار : نعمان اسلم

دی بلوچستان پوسٹ

گُلامیں کوم دائم وتی سانکلانی سندگ ءِ ھاتر ءَ وڑ وڑیں واب گند اِیت اِے ھما سانکل اَنت کہ ایشاں راج ءَ را وت واجھی ءَ چہ زبھر کتگ اِے ھما سانکل اَنت کہ راج اش پد منتگ کتگ اِے سانکل ھما سانکل اَنت کہ ایشاں بازیں مِھر پَچ گپتگ اَنت، اِے سانکل پروشگ لوٹ اَنت ءُ راج آجو کنگ لوٹ اِیت کہ اِے سانکلانی تہ ءَ بلوچ ءِ زندمان ءُ مکسد پَچ گِرگ بوتگ اَنت۔

منی ڈگار کہ دائم ءَ پُرسیگ ءُ ٹپیگ اِنت پہ وتی تنگویں بچّانی ھاتر ءَ ھمے ڈگار ءَ بارین چُنت وربمناھانی ھْون رتکگ ءُ زمین ءَ پُل رودینتگ، بلے زمین ھونین اِنت ءُ انگت ھْون لوٹ ایت کیچ مھر ءُ آشوب ءِ چیدگ اِنت، مِھراں چہ سرباریں پُنّو ءِ کالت ءُ ھوناں تُنّیگیں آشوب تبیں مرگاپ کہ بلوچانی ھون ریچگ بوتگ اَنت۔ بلے اِے ھوناں پہ بلوچستان پُل رودینتگ اِے ھون گار نہ بنت
ھیات چہ وتی زند ءَ واب کپت ءُ ھیات یک ھیاتے بوت آ ابدمان اِنت بلے ھیات ءِ ھوناں کیچ ءِ سرڈگار ءَ پُل رودینتگ، باریں چُنت سال ءُ کرنیگے بے تواریے مانشانتگ اَت کیچ ءِ درمکاں، بلے ھیات ءِ ھونانی پاھاراں لس مھلوک ءِ بے تواری ءِ را پروشت ءُ یکبرے پد زھگ ءُ زالبول ماں کیچ ءِ درمکاں چیھال جنان ءَ یک نوکیں آشوبی رنگے ءَ دیم اَتک اَنت۔

آکجام مات اِنت کہ اِے درداں بہ سگّیت کہ آئی ءِ بچ آئی ءِ دیم ءَ دلبند ءَ تیر بہ وارت ءُ آئی ءِ بچکند گار کنگ بہ بنت ءُ آ زمین ءِ ایر دیگ بہ بیت (ماتی من چہ ترا پِھلی لوٹ آں) بلے وھد ءِ زوراک ءُ زلماں ءُ زمینی ھدایاں مئے سر ءَ کھرمانی ساز اِتگ ءُ مارا گْوں گلامی ءِ سانکلاں بستگ انچو کہ مئے چمّانی دیم ءِ ھیات جان ءِ دست بندگ بوت اَنت ءُ تیرانی آماچ کنگ بوت۔

من وَ لوٹ آں کہ آجو بے بنت چہ سانکلاں اِے زرد اِنت کہ اچ ما ھمراہ داری ئِے لوٹ اِتگ-

مئے لگوریں زِرد اچ ما ھمراھداری لوٹ اِیت ھیات جان ما چہ تو ھم پَھلی لوٹ آں، ما بژنیگ اَنت بلے تئی ھوناں پہ ھانی ئیں ڈگار ءَ پُل رودینتگ ءُ تو آشوب ءِ یک چیدگے۔

ھیات جان تو مئے دل ءَ زندگ ئے، تو پہ راج ءَ ابدمان بوت ئے، بس ھر کجا ئے کندان بات ئے-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔