TBP Balochi

گوستگیں وھداں ھم بلوچستان ءَ چوشیں چیز دیم ءَ اتکگ اَنت ءُ بلوچستان ءِ مھلوک ءَ دیوالانی سر ءَ پاکستان ءِ زُلم ءُ زوراکیانی ھلاپ ءَ دیوال نبشتگ “وال چاکنگ ” کرتگ اَنت –

اے مروچی ءِ نبشتگ پاکستان ءِ آجوئی ءِ درگت ءَ بیتگ اَنت دیوالانی سر ءَ “چاردہ اگست ” پاکستان ءِ آجوئی ءِ روچ ءِ رد کنگ ءُ سلاہ بندیں گلانی پلامرزی ءَ نبشتگ گندگ ءَ آیگ ءَ اَنت –

چاگردی رسانکجاھاں شنگ بیتگیں اکسانی تہ ءَ ساپ ساپ ءَ گندگ بیت اِنت کہ اود ءَ ناشناسیں مردماں دیوالانی سر ءَ پاکستان ءِ چاردہ اگست ءِ رد کنگ ءُ سلاہ بندیں گلانی پلامرزی نبشتگ کرتگ اَنت –

سر بیتگیں ھالانی رد ءَ ھزدار ءُ مند ءِ جتاجتائیں جاھاں پاکستان ءِ جشن آزادی ءِ بگیری ءَ دیولانی سر ءَ نبشتگ”چاکینگ” کنگ بیتگ اَنت-

ھالانی تہ ءَ گوشگ بیتگ کہ ھزدار ءِ دمگ وڈھ ءَ دیوالانی سر ءَ ناشناسیں مردماں پاکستان ءِ “وتساچ ءُ وتگڑیں جشن آزادی ءِ ”بگیری ءِ ھاتر ءَ نبشتہ کنگ بوتگ کہ جشن آزادی ءَ چہ وت ءَ دیر بدار اِت –

دومی نیمگ ءَ مند ءَ جشن آزادی ءِ بگیری ءَ جتاجتائیں دمگ سورو ، گیاب ، لبنان ءَ دیوالانی سر ءَ جوڑ کتگیں پاکستانی بیرک زَرب ءِ نشان جنگ بوتگ ءُ پاکستان مردہ باد نبشتہ کنگ بوتگ اَنت-

زانگ بہ بیت بلوچ آجوئی لوٹوکیں سلاہ بنداں ھم وتی جارانی تہ ءَ دزبندی کُتگ ءُ گْوشتگ کہ پاکستان ءِ جشن آزادی ءِ مچّیاں چہ دیر بدار اِت کہ اگاں کسے پاکستان ءِ آزادی ءِ مچّیانی بھر جوڑ بیت سرمچار کجام ھما وھد ءَ کجام ھم جاہ ءَ اُرش کُت کن اَنت پد ءَ آ وتی جانی ءُ مالی تاوانانی زمہ واری وت بنت-

پنچ روچ ءِ تہ ءَ بلوچستان ءِ جتاجتائیں دمگاں بلوچ آجوئی لوٹوکیں سلاہ بندیں گلانی اُرشانی تہ ءَ گیشی اَتکگ چوکی ءُ بُنجلانی سر ءَ اسٹال ءُ بیرک بھاکنوکانی سر ءَ اُرش کنگ بوگ ءَ اِنت ءُ اے اُرشانی زمہ واری بلوچستان ءِ آجوئی ءِ واستا جنگ کنوکیں سلاہ بندیں گلاں من اِتگ اِت اَنت –

آیانی گوشگ اِنت کہ پاکستان ءَ زورانسری بلوچستان گپتگ ءُ چریشی ءِ پژدر ءَ بلوچ اے روچ ءَ سیاھیں روچے ءِ بستار ءَ دار اَنت –

بلوچستان ءَ یک نیمگے ءَ مردم یل کنگ بیگ ءَ اَنت ءُ دومی نیمگ ءَ مردمانی آوار جنگ ءُ بیگواہ کنگ ترندی ءَ گندگ ءَ آیگ ءَ اَنت –

بلوچستان ءِ جتا جتائیں جاھاں گوستگیں بیست ءُ چار ادارانی تہ ءَ چار کس آوار جنی ءَ پد بیگواہ کنگ بیتگ اَنت –

آوار جنگ بیتگیں مردمانی پجار سعد اللہ ء ھاجی ھمید جھمنند پنجگور گرمکان، شھمیر ء بدل جھمنند تربت ھیرونک، ھبدہ سالی ئیں جواد بلوچ جھمنند مستونگ ءَ بابل بلوچ جھمنند مستونگ ءِ ناماں زانگ بیتگ اَنت –

اشانی تہ ءَ سعد اللہ گوستگیں شپ ءِ بامسار ساھت پنچ ءَ گرمکان ءَ پاکستانی پوج ءُ چیریں ادارھانی کارمنداں چہ لوگ ءَ آوار جتگ ءُ برتگ –

شھمیر ء بدل گوستگیں شپ ءِ ساھت یک ءَ تربت ھیرونک ءَ پاکستانی پوج ءُ چیریں ادارھانی کارمنداں چہ لوگ ءَ آوار جتگ ءُ برتگ، کہ شھمیر ءِ ھواری ءَ دگہ دو کس ھم برگ بیتگ اَنت کہ آیانی نام نزیر ءُ آئی ءِ یازدہ سالی ئیں زھگ ھوار اَنت –

ھمے وڑ مستونگ ءَ ھبدہ سالی ئیں جواد بلوچ ھم پاکستانی پوج ءَ آوار جتگ ءُ برتگ کہ چریشی ءَ پیسر جواد ءِ ناکو زھگ بابل بلوچ ھم پاکستانی پوج ءَ آوار جتگ ءُ برتگ –

بیگواھیں راشد ھسین ءِ گوھار فریدہ بلوچ ءَ ٹوئٹر ءَ بابل بلوچ ءِ اکس شنگ ءُ نبشتگ کرتگ کہ بیگواھیں مردمانی لَڑاں یکے گیش بیتگ –

فریدہ بلوچ نبشتگ کنت کہ بلوچستان ءَ ورنا گچین کنگ ءُ برگ بیگ ءَ اَنت کہ اے بلوچانی نسل ءِ گاری ءِ پژدر اِنت –

ھمے وڑ اسرار بلوچ ءَ ٹوئٹر ءَ نبشتگ کرتگ کہ منی ناکو زھگ بابل بلوچ ءُ منی ورنائیں برات جواد بلوچ پاکستانی پوج ءُ چیریں ادارھاں آوار جتگ ءُ برتگ اَنت –

ھمے وڑ بلوچستان ءَ گار ءُ بیگواھیں مردمانی واستا توار چِست کنوکیں گل وائس فار بلوچ مسنگ پرسنز ءَ پیس بک ءَ نبشتگ کرتگ کہ باید سرکار چاردہ اگست ءَ سرجمیں بندیگیں بلوچاں یل بہ کنت ءُ گمزدگیں کھولاں وشھال بہ کنت –

بلوچستان ءَ گار ءُ بیگواھیانی درچ یک نہ کُٹوکیں وھدے ءَ برجاہ اَنت ءُ تنی وھدی ھزارانی کچ ءَ مھلوک گار ءُ بیگواہ اَنت-

گار ءُ بیگواھیں مردمانی کھول یکشل ءَ پریس کلبانی دیم ءَ زھرشانیاں گندگ ءَ آیگ ءَ اَنت –

ھمے وڑ گوستگیں وھداں بیگواھیں مردمانی کھولاں پاکستان ءِ بنجاھی شھر اسلام آباد ءَ بازیں روچاں نندانکی زھرشانی کرتگ اَت –

شَیر: ندر پہ بانکیں گوھار مھلب ءُ سّمی ءِ نام ءَ

شائر: سلیم ناز

دی بلوچستان پوسٹ

راج ءِ مئے گوانک ءُ توار سّمی انت

جھد ءَ دائم گون هوار سّمی انت

ساڑی ئیں جنگ ءَ مدام جورین بداں

مھلب ءِ پگران هوار سّمی انت

شُت پہ آریپ ءِ شوهاز زندان ءَ

سانکلاں بند ءُ تیار سّمی انت

آپرین مھلب ءُ بات مھرنگ ءَ

ماما ءِ کیمپ ءَ شمار سّمی انت

شال ءَ سرگر داں برو باتیل ءَ

دژمناں تبد ءُ لوار سّمی انت

امبوئیں دروت ءُ سلام آشوب ءَ

راج ءِ مئے مات ءُ گوھار سّمی انت

کوپگاں زور تو سلیم درونتاں

بلوچستان ءَ گوستگیں لھتے روچانی تہ ءَ سلاہ بندیں گلانی نیمگ ءَ پاکستانی پوج ءُ چاردہ اگست ءِ درگت ءَ برجم داشتگیں اسٹالزانی سر ءَ اُرش ترندی ءَ گندگ آیگ ءَ اَنت –

سلاہ بندیں گلانی نیمگ ءَ رسانکدراں یکشلیں جارانکانی تہ ءَ گوشگ بیتگ کہ چاردہ اگست ءَ برجم داشتگیں بنجلانی سر ءَ مئے اُرش برجاہ مان اَنت-

ھمے وڑ گوستگیں روچاں شال ءِ جتا جتائیں جاھاں سَے اُرش بیتگ اِت اَنت کہ آ اُرشانی نشانگ پاکستان ءِ آجوئی روچ ءِ درگت ءَ بیرک بھا کنوکیں ریڑھی ءُ دکانی سر ءَ بیتگ اِت اَنت –

ھمے وڑ مروچی شال ءَ ھم بیرک بھا کنوکیں درزی دکانے ءِ سر ءَ ناشناسیں مردماں بمبے چگل داتگ اَت –

بمب تراک ءَ دگہ جانی تاوان نہ بیتگ اَت بلے بیرک بھا کنوکیں دکان ءَ اے دزبمبے کپگ ءَ الم وتی تاوان سما کرتگ اَت ءُ آئی ءِ دکان ءِ سر ءَ بمب تراک ءَ پد بمب تراک جاہ سیکیورٹی لشکر ءَ انگیر ءَ کرتگ اَت ءُ بمب تراک کنوکانی شوھاز بنا کتگ اَت –

دومی نیمگ ءَ شال ءَ ھوار بلوچستان ءِ دمگ کیچ ءَ بیتگیں اُرشانی زمہ واری یو بی اے ءَ من اِتگ اَنت –

یونائیٹڈ بلوچ آرمی ءِ جارکش مزار بلوچ ءَ شال ءَ دزبمب اُرش ءِ زمہ واری منّ اِتگ ءُ گْوشتگ کہ چاردہ اگست ءَ دمگ ءَ ھستیں سرجمیں گلامیں راج بلوچ ، سندھی ءُ پشتون ءِ آجوئی ءُ ھکّانی گرگ ءِ یک سیاھیں روچے-

مزار بلوچ ءَ وتی درشان ءِ تہ ءَ گْوشتگ کہ مروچی پشمبے ءِ روچ ءَ شال ءِ دمگ سریاب کیچی بیگ ءَ شھید چار راہ ءِ سر ءَ ھستیں یک درذی دکانے ءِ سر ءَ مئے سرمچاراں ساھت 12 چِلّ دمان ءَ دزبمب اُرشے کتگ درذی ءَ وتی دکان ءَ اسٹال جتگ ءُ پاکستانی بیرک بھا کنگ ءَ بوتگ-

جارکش ءَ دیمتر ءَ گْوشتگ کہ ما بلوچستان زورگر پاکستان ءِ جشن مچّیانی بھر زورگ ءُ پاکستان بیرک ءِ بھا کنگ ءَ ھچ وڑ اجازت نہ دے-

جارکش ءَ گوشتگ یونائیٹڈ بلوچ آرمی ءِ سرمچاراں گوستگیں شپ ءَ کیچ ءِ دمگ گورکوپ کلّگ ءِ ھند جکی ءَ پاکستانی آرمی ءِ چوکی ءِ تہ ءَ ساڑی ئیں کارندہ گوں اسنائپر توپک ءَ نشانگ کتگ –

اُرش ءِ آسر ءَ زورگریں پاکستانی آرمی ءَ جانی ءُ مالی تاوان چست کنگ کپتگ-

جارکش مزار بلوچ ءَ دیمتر ءَ گوشتگ کہ مئے اے وڑیں اُرش داں بلوچستان ءِ واتواجھی ءَ برجاہ بنت-

سربیتگیں ھالانی بلوچستان ءِ جتاھیں دمگاں پاکستانی پوج ءِ سرءَ سلاہ بندیں مردماں اُرش کُتگ، دومی نیمگ ءَ بلوچستان لبریشن فرنٹ ءِ جارکش میجر گْوھرام بلوچ ءَ کیچ، آواران ءُ مند ءَ پاکستانی پوج سر ءَ بوتگیں اُرشانی زمہ واری منّ اِتگ-

بی ایل ایف ءِ جارکش میجر گْوھرام بلوچ ءَ رسانکدر ءَ وتی شنگ کتگیں درشان ءِ تہ ءَ گْوشتگ کہ چارشمبے ءِ روچ ءَ مند ءِ دمگ دوکوپ ءَ پاکستانی پوج ءِ بُنجل ءِ سر ءَ مئے سرمچاراں گوں اسنائپر ءُ راکٹاں اُرش کتگ ءُ اُرش ءِ آسر ءَ زورگریں پوج ءَ جانی ءُ مالی تاوان چست کنگ کپتگ-

جارکش ءَ گوشتگ کہ ھمے وڑءَ گوستگیں شپ ءَ ساھت ھشت ءُ نیم ءَ مئے سرمچاراں ضلع کیچ ءِ دمگ ڈنڈار ءَ پاکستانی پوج ءِ چوکی ءِ سر ءَ گوں راکٹ ءُ مزنیں سلاھاں نشانگ کتگ ءُ اے اُرش ءِ آسر ءَ زورگریں پوج ءَ جانی ءُ مالی تاوانانی دیمپان کنگ کپتگ-

جارکش ءَ دگہ یک اُرش یے ءِ زمہ واری زیراناں گُشتگ کہ مئے سرمچاراں ضلع آواران ءَ کولواہ ءِ دمگ کنیچی ءَ ھستیں پوج چوکی سر ءَ گوں مزنیں توپگاں اُرش کتگ ءُ چریشی ءِ آسر ءَ چوکی ءَ ساڑی ئیں پوج ءِ کارندہ مرتگ ءُ ٹپی بوتگ اَنت-

گُڈی ءَ جارکش میجر گْوھرام بلوچ ءَ گْوشتگ کہ زورگپتگیں بلوچستان ءِ آجوئی ءَ داں زورگریں پوج ءِ سر ءَ مئے اُرش برجاہ بنت-

اوگانستان ءَ برجاھیں جنگ تالبیان ءُ اوگان لشکر ءِ جنگ بازیں جاھاں برجاہ اَنت چرے جنگانی پژدر ءَ مروچی اوگان ءِ لشکر ءِ نوکیں سروک ءُ کماندار گچین کنگ بیتگ اَنت-

اوگان دیمپانی کارگس ءِ رِد ءَ اوگان راجی لشکر ءِ سرکماش ولی مھمد اھمزی ءَ ھوار دگہ بازیں جنگی کماندارانی اُگدہ بدل کنگ بیتگ اَنت۔ راجی لشکر ءِ اُگدھدارانی بدلی ءُ نوکیں جنگی کماندارانی دیم ءَ آرگ میریٹ بیسڈ ءُ تالبان ءِ ھلاپ ءَ جنگی تب ءِ بدلی ءَ ھژدری اَنت۔ اے درگت ءَ اوگان دیمپانی وزیر بسم اِلہ مھمدی ءِ پاگواجھی ءَ راجی لشکر ءِ مستریں بُنجاہ(ھیڈکوارٹر) ءَ یک مراگشے ھم اڈ دیگ بیتگ کہ آئی ءِ مھمان اوگانستان ءِ راجی پھزگ ءِ سوجکار ھمد اُلہ مُھب ءَ اَت۔

ماں اے مراگش ءَ جنرل ھبت اُلہ اَلیزی ءَ دیمروئی دیان ءَ اوگان راجی لشکر ءِ سرکماش ءُ اوگان راجی لشکر ءِ نامداریں جنگی کماندار جنرل سمی سھادت ءَ دیمروئی دیان ءَ اوگان کماندارانی سرکماشی ءِ اُگدہ دیگ بیتگ۔ ما اِے مراگش ءَ اوگان راجی لشکر ءِ نوکیں سرکماش جنرل ھبت اُلہ الیزی ءَ راج ءَ باوری دات ءُ گْوشت کہ اے جنگ ءَ ما الم ءَ باج بر ایں۔ ما ماں یک تْرُندیں رشتے ءَ جنگی ساز ءُ ساماناں پہ اُرشاں روان کنگ ءَ ایں، مئے گور ءَ جنگی بالیگراب، ٹینک، ٹوپ ءُ لشکر ھست ءُ ما گوں ھُدا ءِ ھُکم ءَ اے جنگ ءَ کٹ ایں۔

دیم ءَ گُشتانک ئِے دیان ءَ گْوشت ئِے کہ دژمن وتی اے کسانیں وھدے ءِ باج ءَ گل مہ بیت چی ءَ کہ ما پہ اسلامی راجمستری ، پہ وتی راجی بیرک ءُ کُران ءِ پھزگ ءَ گُڈی ساہ ءَ ھم ندر کن ایں۔

دومی نیمگ ءَ اوگان لشکر ءَ اوگانستان ءَ بیست ءُ چار ادارانی تہ ءَ 217 تالبان جنگول کُشگ ءُ 108 ٹپی کنگ ءِ ھال شنگ کرتگ اَنت –

اوگان راجی پھزگ ءَ وتی ھمروچی ئیں ٹیوٹر جاراں گْوشتگ کہ گْوستگیں بیست ءُ چار ادارانی تہ ءَ اوگان راجی لشکر ءَ وتی تْرُندیں جنگی اُرشاں 217 تالبان جنگول کُشتگ اَنت ءُ دِگہ 108 ٹپی کرتگ اَنت۔

راجی دیمپانی ءِ کارگس ءَ گیشتریں سرپدی دیان ءَ گْوشتگ کہ اوگان راجی لشکر ءَ اِے ٹوھیں جنگی اُرش ولایت نگرھار، گزنی، پراہ، ھِرات، پریاب، بلگ ھِلمند کندوز ءُ کاپیسا ءِ ھند ءُ دمگاں کرتگ اَنت۔

راجی دیمپانی ءَ وتی یکشلیں ٹیوٹر پیگاماں گیشتریں سرپدی یے دیان ءَ گْوشت کہ گوریچی ولایت بلگ ءِ چمتال ءُ ڈھدادی دمگاں اوگان راجی لشکر ءِ بالیگُراباں ارش کنان ءَ ناشرکاریں تالبان ءِ بلاھیں جنگی کماندار مُلا نبی پنام اکا تُرکی گوں دِگہ 18 جنگول ءَ کُشگ بیتگ ءُ دِگہ 4 زدگ کُتگ اَنت۔ اے اُرش ءَ ایشانی دست ءِ دْراہ سِلاہ ءُ اسراتی ھم تباہ بوتگ اَنت۔ ھمے پیم ءَ ولایت کندھار ءِ زَھرائی، دھمان ءُ ڈند ءِ دمگاں اوگان راجی لشکر ءِ جنگی بالیگُرابانی بمب گْواری ءُ راجی لشکر ءِ جنگی اُرشاں 121 ناشرکاریں تالبان جنگول کُشگ ءُ دِگہ 15 ٹپی بوتگ اَنت۔ اے اُرشانی آسر ءَ تالبان ءِ 2 موٹل،1 پرپٹ ءَ ھوار بازیں جنگی سلاہ ءِ کوت ھم تباہ کنگ بوت اَنت۔

ولایت ھِرات ءِ دمگاں ھم اوگان راجی لشکر ءُ راجی آشوبی سِلاھبندیں گلانی اُرشاں ناشرکاریں تالبان ءِ 21 جنگول کُشتگ ءُ دِگہ 13 زدگ کُتگ اَنت، اے اُرشاں تالبان جنگی ساز ءُ سامان ھم تباہ کنگ بوتگ اَنت۔

زانگ بہ بیت کہ چہ ایشی ءَ پیشی روچ ءَ اوگان ءِ راجی لشکر ءِ تْرُندیں جنگی اُرشاں 439 تالبان جنگول کُشگ ءُ 77 ٹپی بیتگ اِت اَنت۔ اوگان راجی لشکر ءَ ھمے جنگی اُرش ولایت نگرگار، لوگمان، لوگر، پکتیا، اُرزگان، زابُل، گوھر پراہ، بلگ ھِلمند، کاپیسا ءُ بلگان ءِ ھند ءُ دمگاں کرتگ اَت اَنت۔

سر بیتگیں ھالانی رد ءَ سندھ ءِ مزن شھر کراچی ءَ نامی ئیں ازمکار دردانہ بٹ کرونا ویروس ءِ نادراھی ءَ مروچی بیران بیتگ –

دردانہ بٹ ءِ بارو ءَ گوشگ بیت اِنت کہ نُھ مئی نوزدہ سد ءُ سِی ءُ ھشت ءَ لاھور ءَ ودی بیتگ ءَ آئی ءَ کینیئرڈ کالج ءَ وتی وانگ سرجم کرتگ –

چریشی ءَ پد آ گیشیں وانگ ءِ ھاتر ءَ یونیورسٹی آف ٹولیڈو ءَ شتگ ءُ اود ءَ آئی ءَ کی ایچ ڈی کرتگ ءُ چرے وانگ ءِ سرجمی ءَ آئی ءَ ازمکاری بندات کرتگ –

آئی ءَ کمرشل ءُ ماڈلنگ ءِ کرد ھم پیلو کرتگ ءُ آئی ءخ تھیٹرانی سر ءَ ھم کار کرتگ –

آئی ءَ بازیں ٹی وی چینلاں وشکندی ڈرامھانی تہ ءَ کرد پیلو کرتگ ءُ نوزدہ سد ءُ ھپتاد ءُ ھشت ءَ آئی ءَ معین اکتر ءِ گون ءَ”ففٹی ففٹی ” وشکند ءِ تہ ءَ ھم یک کردے پیلو کرتگ –

چریشی ءَ ابید آئی ءَ بازیں وشکندانی تہ ءَ کار کرتگ ءُ اشانی ھواری ءَ آئی ءَ پرائیویٹ ٹی وی چینلانی تہ ءَ ھم ڈرامہ کرتگ اَنت –

لھتے وھد ءَ پیسر آئی ءَ شومک ءِ نادراھی ءِ گورجنگ ءَ آئی ءِ جاندراھی ھم بیگ ءَ بیتگ کہ گوستگیں روچاں آ ساہ کشگ ءِ ناجوڑ بیتگ ءُ نادراہجاہ ءَ برگ بیتگ کہ اود ءَ آئی ءَ کرونا ویروس پدر بیتگ ءُ مروچی آ بیران بیتگ –

بلوچستان ءِ بُنجاھی شھر شال ءَ ناشناسیں مردماں یک درزی دکانے ءِ سر ءَ دزبمب اُرشے کتگ-

گیشیں ھالانی رِد ءَ شال ءِ دمگ سریاب دگ ءَ کیچی بیگ شھید چوک ءِ سر ءَ ھستیں درزی دکان ءِ سر ءَ ناشناسیں مردماں دزبمبے چگل داتگ ءُ تتکگ اَنت-

دمگی مردمانی رِد ءَ اُرش ءِ آسر ءَ دو مردم ٹپی بوتگ اَنت، ٹپی بوتگیں مردم پہ الاج ءِ ھاتر ءَ نادُراھجاہ ءَ برگ بوتگ اَنت-

زانگ بہ بیت سے ءُ چار روچانی تہ ءَ بلوچستان ءِ بُنجاھی شھر شال ءَ چار تراک بوتگ اَنت ءُ آ گوستگیں بوتگیں تراکانی زمہ واری بلوچ لبریشن آرمی ءِ جارکش جیئند بلوچ ءَ زرتگ اِت اَنت ءُ جارکش ءَ وتی درشانانی تہ ءَ اے ھم گوشتگ کہ لَس مھلوک پاکستان ءِ وتگڑیں جشن آزادی ءِ شاتکامی ءَ چہ دور بہ بنت اگاں ناں آ وتی جانی ءُ مالی تاوانانی زمہ وار وت بنت –

بلے اے اُرش ءِ زمہ واری انگت ھچ گل ءَ وتیگ نہ کتگ-

نبشتانک: گُڈّی دیدار

نبشتہ کار: ڈاکٹر شکیل بلوچ

دی بلوچستان پوسٹ

آئی ءَ گْوشت کہ من ترا رُکست نہ کن آں پرچا کہ تو منی ارواہ ءَ گوں بندوک ئے، بہ گند ئے اِے منی ءُ تئی گُڈّی دیدار اِنت، باندات ءِ روچ ءَ بِہ گند ئے من ءُ تو دوچار مہ کپ اَنت، بلے منی ءُ تئی میان ءَ بازیں ھیال، ترانگ، یات، زھیر ءُ مِھر پشکپتگ اَنت-

مِھروان! وھدے کہ من ایوک بہ آں گُڑا تئی ھمے پشکپتگیں ھیال، یات، ترانگ ءُ زھیر من ءَ بے تاھیر کن اَنت ءُ بے کساس من تئی ترانگاں کپ این اَنت، اِے ساھتاں منی ارواہ سرجم ءَ تئی باتِن ءَ ایر کپ اِیت ءُ منی ارواہ نپَس بند بِیت ءُ دل درد کنت بلے منی جان ءِ کُجام درد ءُ اندوہ، منی ژانگولیں ارواہ ءِ اِے نپَس بندی کہ گْوں ترا بندوک اَنت من ءَ ھم چہ وت ءَ دوستر اَنت من ءَ تئی داتگیں درد ھم چہ وت ءَ دوستر اَنت پرچا کہ تو منی زندمان ءِ اولی ءُ گُڈّی مِھر ئے، چہ تئی مِھراں من زندمان ءِ زگریں بِزانت پَھم اِتگ، چہ تئی داتگیں درداں من کازماس ءِ زیبائی ءَ را چْو کوہ مراد ءَ زیارت کرتگ-

بلے تو گپّے زان ئے تئی داتگیں درد من ءَ چو پیر ءُ آجزیں زالے ءِ سریگی ڈکّے ءِ پیم ءَ وتی زِرد ءِ گُشان ءَ ڈکّ داتگ ءُ ھر جاہ، ھر دمان ءُ دل ءِ ھر دِریکگ ءَ گْوں من ءَ گْون اَنت۔

مِھروان من ترا گْوشگ لوٹ آں کہ تو انچش گْوں من ءَ بندوک ئے ءُ انچش منی جان ءِ رگ رگاں ایر کپتگ ئے کہ تو منی ساہ ءِ کشّگ ءَ ھم گْوں من ءَ گْون ئے گْوں۔

مِھروان من وتی زِندمان ءِ گْرانتریں کِسّھے گْوں ترا مرچی درشان کنگ لْوٹ آں، مرچی سُھب ءِ سمین کشّگ ءَ اِنت ءُ من ءَ بے کساس تو یات پیداک ئے، من ترا پْیسر ءَ ھم اِے گپ گْوشتگ اَت کہ تو منی زندمان ءِ ھر پِڑ ءَ گْوں من ءَ بندوک ئے،
مِھروان گْوش بِہ دار، مرچی من ءَ وھدے کہ سُھب ءِ وش دابیں سمین ءَ تئی ترانگ ءَ گْیج اِت، اِے ساھت پہ من ءَ بھِشت ءِ ندارگاں چہ کمتر نہ اَنت، شال ءَ من ءَ وتی گرمیں زانسرانی سر ءَ واپینتگ، بلے من ءَ تو بے کساس یات پیداک اَت ئے، مرچی منی دل ءَ ھمے لْوٹ اِت کہ من چہ ترا بے ھیال بِہ باں ءُ منی ژانگْولیں جبین چہ تئی کُنٹگیں یات ءُ زھیراں ھْورک ءُ ھالیگ بِہ بیت۔

بوت کنت اِے منی کْوریں بھادری اَت کہ من لْوٹ اِت کہ تئی کوھیں زھیراں گْوں وتی نِزوریں کوپگاں بَڈ ءَ بہ کن آں ءُ چہ دل ءِ دیار ءَ در اِش بہ کن آں بلے وھدے من وتی اولی گام ایر کرت منی نپَس بند بُوت ءُ بے سماہ بوت آں، ساھتے ءَ پد وھدے کہ من سماہ کرت من چار آں تئی یات، زھیر ءُ ترانگ نوں پَھک ءَ گْوں منی ارواہ ءَ بندوک اَنت، وھدے کہ من تئی یاتاں چہ دل ءَ در کنگ بِہ لوٹ آں گُڑا منی ارواہ ھم بال کنت ءُ روت، ھشکیں جْوں پَشکپ اِیت۔

مھروان تئی گپ ءُ ھبَر، تئی دُرّیں دانکاں من کدی ھم بے ھیال کرت نہ کن آں، پرچے کہ من وتی ھیالانی دنیا ءِ سرجمیں کوہ ءُ کوچگ، زید، ھلک ءُ میتگ گْولتگ اَنت بلے من ھر چیز ءَ چار آں منی چمّانی دیم ءَ تئی اکس اِنت تو انچش منی باتن ءَ ایر کپتگ ئے کہ من چار آں ترا گِند آں وت ءَ، وھدے کہ من چاراں وت ءَ گِند آں ترا، بس من ءُ تو انچش ھمگرنچ اَنت کہ کدی جِتا بوت کرت نہ کن آں –

مِھروان ھما اِنت کہ تو رپتگ ئے، تئی ھما گپ ءُ تران، تئی کندگ ءُ مسکرا، من ءَ چو سِیپارگ ءَ یات اَنت تئی ھما گُڈّی بچکندگ کہ تو رھادگ بوت ئے چَک تر اَینت ءُ یک بچکندگے سوگات کرت، تئی اِے بچکند انگت منی چمّانی دیم ءَ نکش اِنت۔

مِھروان اِے گپ ءَ من ھم زان آں کہ تو چہ من ءَ دور رپت ءُ شت ءُ بلے منی دل اِے گپ ءِ منّگ ءَ کدی ھم تیار نہ اِنت کہ تو چہ من ءَ دور ئے۔

پمیشکا من ترا گْوشت کہ من ترا الوِداہ نہ کن آں پرچے کہ تو منی ارواہ ءَ گْوں بندوک ئے، بے ترا منی ارواہ یک شانتلے بیت ءُ زَھیر نالان کنت ءُ دردانی جنگل ءَ کُوکُو کنان کنت ءُ روت۔ بس منی گُڈّی ھبَر ایش اَنت کہ تو چہ من ءَ دور نہ ئے ءُ من چہ ترا جِتا نہ اوں۔ تئی یات، زھیر ، ترانگ، درد، بچکندگ گْوں منی ارواہ ءَ بندوک اَنت ءُ زندمان ءِ گُڈّی ساھتاں ھم تو من ءَ گیر کا ئے، تاں زندمان ءِ گُڈّی ساہ ءِ کشّگ ءَ من ءُ تو ھْوار آں۔ پمیشکا من ترا الوداہ نہ کرت پرچے کہ تو منی ارواہ ءَ گْوں بندوک ئے۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: ورنا دلیرا زندہ باد

نبشتہ کار: اَبرم بلوچ

دی بلوچستان پوسٹ

من زان آں، 31 سوچکان ءَ وھد ءِ کہ روچ ءَ وتی اولمی شھم ءَ زمین ءِ دلبند ءَ ایر داتگ ءُ سرجمیں جھان ءَ رژنائی ءَ انگیر ءَ کتگ ءُ تھاری ءَ چہ زبھر کتگ ،ھمے سھت ءَ ھزاراں واھگ چو گیمرتگیں پُلاں مُجیتگ انت لھتے انچیں واب چہ دیدوک ءَ سستگ ءُ جتا بیتگ اَنت کہ ھر یک کنکگریں بچیگ ءِ چہ وتی دید ءَ گند ایت ءُ پھر بند ایت وتی سر ءَ کہ اے آجوئی ءِ کاروان ءِ من بھر آں بلے لھتے جاہ ءَ زند وپا نکنت ءُ لھتے واب سرجم نہ بنت بلے آ وابانی برورد ءَ الم آؤکیں پدریچ چَشِ ایت۔

من آں ھمیش گمان بیت وھد ءِ کہ اے روچ اتکگ زمین تُنیگ بیتگ کہ دیریں زمین ءَ وتی دلبند ءَ ھونانی رگام نہ دیستگ ءُ اے واھشت ءِ پیلو کنگ ءَ ھزار سرمست ءُ سرچند ساڑی انت ھمے واھگ ءِ بنھشتہ ءِ توک ءَ سَے نرمزاراں دیم پہ دیمی جنگ ءَ وتی ھون ءَ گوں زمین ءِ تُن پروشت ءُ ابدمان بیتگ اَنت۔

گوش اَنت کہ جنگ کنگ ارزان نہ اِنت مھکمیں ھاٹیگ ءِ لوٹ ایت سُھریں تیرانی دیم ءَ چوں مھکیں کوہ ءَ اوشتگ لوٹ ایت واھشت گٹ گیر کنگ لوٹ انت درد ءُ دور چو زھریں جُور ءَ ھیر برگ لوٹ انت جنگ ھما بِہ بیت کہ تئی پدریچ یاد بہ کنت، جنگ ھما بہ بیت کہ تئی مرگ ءَ پد تو ابدمان بہ بئے ، جنگ ھما بہ بیت کہ دشمن تئی نام ءَ چہ پچ بہ لرزایت ءُ دل ءِ بُستگانی توار ءَ دل گیر بہ بیت ءُ ملکمت ءَ وت گوانک بہ جَنت جنگ ھما بہ بیت کہ دشمن ءِ دست ءِ سلاہ پچگرگ بہ بیت ءُ دشمن دست ءَ ھم سرینت مہ کنت مرچی ھمے جنگ من وتی چماں گوں دِست دیم پہ دیمی جنگ ءُ جنگ ءِ باج برگ۔

ندر پہ ھما نرمزاریں بچاں کہ اے جنگ ءِ بھر بیتگ انت ندر پہ ھما زِرپھازیں کنگراں کہ آیاں وتی تنگوئیں جان پہ راج ءَ ندر کتگ انت ءُ زمین ءِ تُن پروشتگ ۔

شاویز جان من زان آں اگاں تئی ماس تئی نمیران بوگ ءِ تامر ءَ بچار ایت ءُ تئی دیمونی ءِ جاگہ ءَ بچار ایت یک چیلانکے الم جنت ءُ پہ ارس ءِ گوارگ ءَ ھمیش گوش ایت کہ تو ابدمان ئے تو وتی پرز پیلو کُت آپتاب جان تئی نہ ترسی ءِ سر ءَ من پھر بند آں کہ تو وتی دیم ءُ پشت ھچ نہ چار ایت ءُ رسترانی بنجل ءَ تیر گواران کُت ءُ پہ بچکندے مرگ امباز کُت لیلٰہ جان تئی بچکند ابدمان انت کہ تو وتی ٹپی ئیں جاوراں ھم دشمن پروش ءَ چہ دُچار کُت ءُ کندان کندان ءَ زمین ءِ دلبند ءَ وپت ئے ءُ آجو بات بلوچستان ءِ توار گوں آزمان ءِ دلبند یں سر ءَ زرت ۔

شمئے دیمونی ءَ کُل راج پھر بندیت ءُ ھمیش جیڑ ات کہ اے جنگ ھمے وڑ سرجم ءُ برجم بیت، جنگ داں گڈی ساہ ءَ، جنگ داں آجو بلوچستان-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔