اوگانستان ءَ میار بندیں بلوچانی لوگانی سر ءَ تالبان ءِ بیڑ ءُ دستیگ کنگ – دی بلوچستان پوسٹ گچینی

الم بوانیت

آھوگ تو اے وڑ مہ کُتیں۔۔۔ – بالاچ قادر

آھوگ تو اے وڑ مہ کُتیں۔۔۔ بالاچ قادر دی بلوچستان پوسٹ گُل ترا یات بیت ھما وھدی کہ توءُ دگہ سنگتے مئے...

کمےّ وھد کشّ – منھاج مختار

کمےّ وھد کشّ منھاج مختار دی بلوچستان پوسٹ تو ھم زانئے کہ من ترا گشگایاں بلے اگاں ترا موھ رست منی اے...

بلوچستان ءِ آجوئی ءِ ترس ءُ پاکستانءِ نوکیں پالیسی: نبشتہ حکیم واڈیلہ

گوشنت زوراک وھدءِ وتا نزور بیگءَ گندیت اگں ماریت گڑا آوتی سرجمیں زورا جنت ءُ وتی زوراکیءَ برجم دارگءِ...

اوگانستان ءَ میار بندیں بلوچانی لوگانی سر ءَ تالبان ءِ بیڑ ءُ دستیگ کنگ

دی بلوچستان پوسٹ گچینی

میران مزار

تالبان اوگسان ءِ دزگرگ ءَ پد کندھار شھر ءِ نیام ءَ جھمنندیں میار بندیں بلوچ عبدالغنی بنگلزئی ءَ اوگانستان ءَ جاڑیگیں بلوچ میاربندیں جاورھالانی سر ءَ ٹی بی پی ءَ گوں گپ کنان ءَ گُشتگ کہ “لھتے روچ پیش درزنانی کساس ءَ سلاہ بندیں تالبان مئے لوگاں اتکگ اَنت ءُ لوگانی ھالیگ کنگ ءِ پرمان داتگ اِش۔ چہ مئے لوگ ءَ یک اولاکے تالبان ءِ یک زمہ واریں مردماں چہ یکے مولوی نصیب کامران ءَ دستیگ کتگ ءُ گوں وت بُرتگ ءُ داں انگت ھم مارا چہ لوگ ءَ گلینگ ءَ پد ھم مئے لوگ ءَ درزنانی ھساب ءَ تالب نشتگ اَنت ءُ وتی بنجل اِش جوڑ کُتگ۔”

گتر ءَ تالبان ءُ امریکہ ءِ نیام ءَ بیتگیں مسام ءَ پد تالبان تیزی ءَ گوں اوگانستان ءِ درستیں مزنیں شھر دستیگ کنان ءَ مسام ءِ گُڈی روچ ھلاس بیگ ءَ سَے ھپتگ پیسر 15 جولائی ءَ اوگانستان ءِ راجدانی شھر کابل ءَ پُترتگ اَنت۔ چریشی ءِ سبب ءَ سرکار کَپتگ، اوگانستان ءِ سروک پاگواجہ اشرف غنی ءَ ملک یل کنگ کپت ءُ تالبان اسلامی امارات ءِ جوڑ بیگ ءِ جار جت۔ اِشی ءِ پجیگ ءَ امریکہ ءِ اوگانستان ءَ دو دھکاں چہ برجاھیں گرانتریں یکشلیں جنگ وتی آسر ءَ سر بیت۔

گرانیں سلاھاں چکاریں تالبانیں جنگول راجدانی کابل ءَ ھمک نیمگ ءَ گندگ بیگ بندات بیت اَنت۔ آیاں ھالیگیں پاگواجھی ماڑی ءَ بگر داں دگانی سر ءَ گر ءُ دار کنوکیں واکداری ھم وتی دستاں زرت اَنت۔ یک ھپتگی ءَ داں بالی پَٹ ءَ تچ ءُ تاگ برجاہ اَت، بالی گراب ءُ پرگ پد مہ پدی بالیاں گوں پشت کپتگیں امریکی پوجی ءُ امریکہ ءِ پوج ءِ اوگانیں کمک کارانی کَشگ ءَ دزگٹ بیتگ اَنت۔ تیر گواری ءُ جھازانی سر ءَ وت ءَ درنجگ ءُ تچگ ءِ راہ شوھاز کنگ ءِ وئیلانی تہ ءَ بازیں مردم بیران بیتگ اَنت۔

انسانی اگبالانی میان اُستمانی گل ءُ زالبولانی ھکانی جتائیں گلاں اے تُرس ءِ درشانی کُتگ کہ تالب نود دھک ءِ پئیم ءَ یک ترندیں سرکار ءِ ٹھین اَنت ءُ زالبولانی آجوئی ءَ پچگر اَنت ءُ بیرگیری وئیلانی بندات ءَ کنگ ءَ گوں یک نوکیں نسل کشی ءِ کن اَنت۔ ایشانی پسہ ءَ تالبانی جارکش ذیبح اللہ مجاھد ءَ رسانکاں ترانک کنان ءَ اے تُرساں رد کنان ءَ گُشتگ نی تالب مَٹ بیتگ اَنت۔

یک سنگینے جیڑہ ئِے کہ داں انگت میان اُستمانی رسانکدر ءُ جھانی گلانی نیمگ ءَ چہ ڈالچار کنگ بیگ ءَ اِنت، آ اوگانستان ءَ میار بندیں بلوچانی پناگیرانی جیڑہ اِنت۔ گوستگیں دو دھکاں چہ بلوچ آجوئی لوٹوکیں سلاہ بندیں گل ءُ پاکستانی پوج ءِ نیام ءَ جنگ ءُ چوپ یکشل ءَ برجاھیں ترندیں لشکری بیڑانی سوب ءَ اے وھد ءَ مزنیں کساسے ءَ بلوچاں لَڈاِتگ ءُ اوگانستان ءَ باھوٹی ئیں زند گوازینگ ءَ اَنت۔ ہیومن رائٹس کمیشن آف پاکستان ءِ یک اھوالے ءِ رد ءَ تھنا سال 2006ءِ لشکری بیڑانی وھد ءَ بلوچستان ءِ تھنا ڈیرہ بگٹی ءُ کوھلو ءِ دمگانی پنجاہ ھزار ءَ بُرز مردم لَڈگ ءَ لاچار بیتگ اَنت۔

اوگانستان ءَ بلوچ پناگیرانی رجسٹر کنگ ءِ ھچ پیم ءِ ترتیب نیست بلے یک اندازگ ئِے رد ءَ اے وھد ءَ کم چہ کم بلوچستان ءِ جتا جتائیں دمگاں چہ پوجی آپریشن ءِ سبب ءَ ھپت ھزار ءَ گیشتر کھول اوگانستان ءِ جتا جتائیں پرگنگانی تہ ءَ باھوٹی اَنت۔

ھپتاد ءِ دھک ءَ وھدے بلوچستان ءَ بیڑانی تہ ءَ گیشی ءُ ترندی اتکگ اَت گُڑا کساس ھشتاد ھزار بلوچ اوگانستان ءَ لڈگ ءُ باھوٹی زند گوازینگ ءَ لاچار بیتگ اِت اَنت۔ بلے نود ءِ دھک ءَ اوگانستان ءَ تالبانی مستری ءَ پد اے بلوچ باھوٹیانی سر ءَ ھمک روچی ئیں ھساب ءَ اُرش بندات بیتگ اِت اَنت۔ چریشی ءِ سوب ءَ آیاں وتی زندمان ءِ ترس ءَ ابید ھم پد ءَ واتر آیگ کپتگ اَت۔ راجدپتری گواچن ءُ تالباناں گوں پاکستانی پوج ءَ گوں گمانی نزیکیں سیادی ءَ چارگ ءَ پد اوگانستان ءَ جھمنندیں بلوچ باھوٹی وتی پھازگی ءِ ھاتر ءَ یک رندے پد ءَ تُرس آماچ اَنت۔

اوگانستان ءَ تالبانانی گرگ ءَ پد زرباری پرگنگ کندھار ءَ میار بندیں بلوچانی لوگانی سر ءَ بیڑ برگ یکشلی بندات بیتگ اَنت، داں انگت ءَ سر بیتگیں اھوالانی رد ءَ کم چہ کم دو لوگاں چہ زالبول ءُ زھگ زورانسری کَشگ بیتگ اَنت ءُ تالباناں بلوچ پناگیرانی لوگ گپتگ اَنت۔ اِشی ءَ ابید پنچ دگہ لوگانی سر ءَ بیڑ ءُ پَٹگ ءَ پد چار اولاک وتی پجیگ ءَ بُرتگ اَنت۔

کندھار ءِ دمگ تختہ پل ءَ باھوٹی زند گوازینوکیں عبدالولی مری ءَ ٹی بی پی ءَ گوں گپ کنان ءَ گُشت کہ “گوستگیں بازیں روچاں چہ پرپٹ سواریں تالب جنگول پیداک اَنت ءُ مارا مئے لوگانی ھالیک کنگ ءَ گُشگ ءَ اَنت ءُ وھدے ما ھمے تالب جنگولاں جُست کُتگ اَنت کہ شمارا کَے ءَ دیم داتگ گُڑا آیاں وتی پجار مولوی خلیل ءِ سنگتانی ھساب ءَ کُتگ ءُ مارا یک واٹسیپ شمارہ ئِے پہ اھوال کنگ ءَ داتگ کہ پاکستانی یوفون شرکت ءِ شمارہ اِنت ءُ گُشتگ اِش کہ شما مولوی خلیل ءَ اھوال بہ کن اِت ءُ زیت ءَ زیت کندھار پرگنگ ءَ چہ در بہ کپ اِت۔”

ٹی بی پی ءَ دگہ یک میار بندیں بلوچ حاجی محمد جان ءَ اے جاورھالانی رد ءَ اھوال کُت گُڑا آئی ءَ ھال دات کہ “منی لوگ ءَ آیوکیں تالب ءَ وتی پجار حافظ نثار احمد ءِ نام ءَ کُتگ لوگ ءِ پَٹ ءُ پول ءَ پد یک اولاکے دستیگ کنگ ءَ پد وتی پجیگ ءَ بُرتگ۔”

اے درگت ءَ ما بلوچ نیشنل مومنٹ ءِ سرکماش خلیل بلوچ ءَ اھوال کُتگ ءُ آئی ءِ لیکہ ءِ زانگ ءِ کوششت کُتگ آئی ءَ گُشت “اے وھد ءَ میار بندیں بلوچاں درستاں مستریں کساس اوگانستان ءَ جھمنند اَنت۔ کہ اود ءَ آیاں پیسر ءَ چہ بازیں جنجالانی دیمپانی اِنت، ایشانی تہ ءَ مستریں جیڑہ میان اُستمانی ءُ اوگان ڈیھہ ءِ کُمک، بُنکی آسراتی نہ بیگ ءَ ابید پھازگی ءَ بے دزرسی اِنت۔ نی تالبانانی آیگ ءَ اِشانی جنجال ءُ بے باوریانی تہ ءَ گیشی آورتگ۔”

آئی ءَ گیشتر گُشتگ کہ “اوگانستان ءِ دومی مستریں شھر کندھار ءَ زیکینیں سلاہ بندیں مردماں کہ وتی پجار اوگان تالبانانی ھساب ءَ کَنگ ءَ اَنت، اشاں میار بندیں بلوچامی ھلاپ ءَ شوربندیں اُرشانی بندات کتگ۔ سلاہ بندیں تالب زالبول ءُ زھگاں چہ لوگاں کَشگ ءَ اَنت ءُ لوگانی سر ءَ دستیگ کنگ ءَ اَنت، مردماں تُرس آماچ کنگ ءَ اَنت ءُ مال ءُ مڈیاں پُلگ ءَ اَنت، اے سلاہ بندیں مردماں دگہ شئے آں ابید کم چہ کم چار اولاک دستیگ کنگ ءَ پد گوں وت بُرتگ اَنت۔”

خلیل بلوچ ءَ اے جاورھال ھترناک نامینتگ ءُ گُشتگ کہ “اے بے کساس ترسناکیں ءُ بے گمانیں ھال اَنت پرچہ میار بندیں بلوچ اوگان راجے مھمان اَنت، کہ اِشانی رکینگ اوگانستان ءِ راجی ءُ سرکاری زمہ واری اِنت، جھان ءَ بازیں شئے مَٹ بیت کنت بلے ھمسایگ مَٹ کنگ نہ بنت، بلوچ ءُ اوگان راجے نیام ءَ سداں سالاں چہ دوستیگیں سیادی ءِ ھست اِنت، کہ اِشی ءَ بازیں تاکت ءَ تاوان بار کنگ ءِ جھد کُتگ بلے اے سیادی وھدے ھمک چکاس ءَ سوبمند بیتگ اَنت۔”

بی این ایم ءِ سرکماش ءَ تالبان سروکاں چہ اے جیڑھانی گیش ءُ گیوار کنگ ءَ پہ زور دیان ءَ گُشتگ کہ “من اوگان تالبان سروکاں چہ دزبندی کناں کہ کندھار ءَ دیم ءَ اتکگیں وئیلانی بارو ءَ پَٹ ءُ پول بہ کن اَنت ءُ اوگانستان ءَ نشتگیں میار بندیں بلوچانی مال ءُ جان ءِ پھازگی ءَ باوری بہ کن اَنت۔”

زانگ بہ بیت اوگانستان ءَ تالبانی زورگرگ ءَ پیش ھم اود ءَ جھمنندیں میار بندیں بلوچانی سر ءَ بازیں براں اُرش بیتگ اَنت، کہ اِشی ءِ سبب ءَ درزنانی کساس ءَ میار بندیں بلوچ نمیران بیتگ اَنت۔ بلوچ سیاسی گل ءُ باھوٹی اے اُرشانی بھتام ءَ پاکستانی ریاست ءُ آئی ءِ گمانی پراکسی ٹولھانی سر ءَ جن اَنت۔ دمگی جاورانی سر ءَ چم ایر کنوک اے تُرس ءِ درشانی ءَ کنگ ءَ اَنت کہ انیگیں جاورھالاں چہ مُز چِست کنان ءَ بلوچ باھوٹیانی سر ءَ ترندیں اُرشانی یکشلی ءَ گیشی اَتک کنت۔

بلوچستان ءَ چہ سیادی داروکیں اھوالکار باھوٹ بلوچ ءَ اوگانستان ءِ انیگیں جاورانی بارو ءَ ٹی بی پی ءَ گوں گپ کنان ءَ گُشتگ کہ “اوگانستان ءَ بلوچ باھوٹیاں تالبانانی نیمگ ءَ ترسینگ، لوگاں چہ کَشگ ءُ آیانی لوگ ءُ اولاکانی سر ءَ زورگری کنگ یک ناوش ءُ گیر اسلامی ءُ گیر انسانی گام اَنت، تالبانانی سروکانی ھاتر ءَ المی اِنت کہ آ چُشیں مردماں بہ دار اَنت کہ آ دو براتیں راج ءُ ھمسایگانی نیام ءَ بد گمانی ءُ دیری ودی کنگ ءِ جھد کنگ ءَ اَنت۔”

آئی ءَ گیشتر گُشت کہ “اوگانستان ءَ میار بندیں بلوچانی ھاتر ءَ جیڑہ ودی کنگ، بلوچستان ءُ سند ءَ اوگان باھوٹیانی ھاتر ءَ جنجالانی سبب بیت کنت۔”

تالبان دو دھکانی مزنیں جنگ ءَ راستی ءَ مٹ بیتگ اَنت اگاں میار بندیں بلوچانی گون ءَ آیانی تَب ھما بیت کہ نود ءِ دھک ءَ بیتگ؟ اے جُستانی پسہ بیت کنت آیوکیں وھد ءَ دیم ءَ کیت بلے اوگانستان ءِ انیگیں ناگمانیں جاورانی تہ ءَ میار بندیں بلوچ سنگینے جیڑہ ھم ڈالچار کنگ مہ بیت ءُ اے گپ گیشینگ بہ بیت کہ میار بندیں بلوچانی رکینگ ءِ راستیں زمہ وار یو این ایچ سی آر اِنت۔

نوکتریں

پاکستانی پوج ءِ گون ءَ جنگی بندیگانی مٹ ءُ بدل ءَ ساڑی ایں – بی ایل اے

بلوچ سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ...

کیچ: بلوچستان ءِ درستاں مستریں دومی ادبی گل ءِ زمینانی سر ءَ زورگری

بلوچستان اکیڈمی تربت ءِ جارکش ءِ نیمگ ءَ شنگ بیتگیں درشان ءَ گوشگ بیتگ تعلیمی چوک ءَ بلوچستان اکیڈمی تربت ءِ...

نصیر آباد: سی ٹی ڈی ءِ دروگیں میڑ ءَ چاریں مردمانی پجار بوتگ انت

گوستگیں روچانی تہ ءَ نصیر آباد ءِ دمگ نوتال ءَ کاؤنٹر ٹیررزم ڈیپارٹمنٹ (سی ٹی ڈی) ءِ دورگیں میڑ ءَ کُشگ...

زورانسری آوار جنگ بوتگیں مردمانی کھول بیا انت ءُ توار چست بہ کن انت – وی بی ایم پی

بلوچستان ءِ بنجاھی شھر شال ءَ پریس کلب ءِ دیم ءَ بلوچ راجداریں باسکانی زورانسری آوار جنی ءِ بگیری ءَ وائس...