TBP Balochi

سربوتگیں ھالانی رِد ءَ بلوچستان ءِ دمگ گڈانی، ھب ءُ بولان ءَ تیرجنگی ءُ دگہ وئیلاں ھشت مردم بیران ءُ ھشت ٹپی بوتگ انت –

گیشیں ھالانی رِد ءَ گڈانی زِر ءَ ماھی گرگ ءَ شتگیں چار مردم بُکتگ ءُ بیران بوتگ انت آھانی جون درکنگ بوتگ انت –

ریسکیو بنشون ءِ رِد ءَ لسبیلہ ءِ تیاب دپی دمگ گڈانی ءَ ماھیگ ءِ شکار ءَ اتکگیں چار مردم زِر ءَ بُڈیتگ ءُ بیران بوتگ انت – ھر چاریں مردمانی سیادی چہ کراچی ءَ انت-

بنشون ءِ رِد ءَ چاریں مردمانی جون کشگ بوتگ انت آھانی پجار محمد علی ء ممتاز علی، نزام ء ھیدر ءُ دو برات قادر ءُ احمد ء محمد ملتان جھمنند اورنگی کراچی نام ءَ چہ بوتگ انت –

ھمے وڑ بلوچستان ءِ کاروباری شھر ھب ءَ دو جتائیں وئیلاں دو مردم بیران بوتگ انت-

اولی وئیل ھب نورانی کراس ءَ دیم ءَ اتکگ کہ دگ ءِ وئیل ءَ یک مردمے بیران ءُ دو ٹپی بوتگ اَنت – بیران بوتگیں مردم ءِ پجار عبیداللہ ء حلیم الدین ءِ نام ءَ چہ بوتگ –

بیران ءُ ٹپی بوتگیں مردم نادراھجاہ ءَ سرکنگ بوتگ انت اود ءَ اژدری چار ءُ ٹپاس ءَ پد جون کول ءِ ھوالہ دیگ بوتگ ءُ ٹپی بوتگیں مردم کراچی ءَ دیم دیگ بوتگ انت –

دومی وئیل ماربل کمپنی ءَ کرنٹ لگگ ءِ سوب ءَ یک مردمے بیران بوتگ – بیران بوتگیں مردم ءِ پجار اللہ بچایا ء عبدالمجید ءِ نام ءَ چہ بوتگ کہ کمپنی ءِ تہ ءَ کار کنگ ءِ میان ءَ کرنٹ لگتگ ءُ بیران بوتگ –

پولیس ءَ جون دست گپتگ ءُ نادراھجاہ ءَ سرکتگ اود ءَ اژدری چار ءُ ٹپاس ءَ پد کھول ءِ ھوالگ ءَ دیگ بیتگ –

ھمے وڑ دگہ وئیلے بولان کچی ءَ دیم ءَ اتکگ کہ ٹکانی میان ءَ جنگ ءُ چوپ ءَ دو مردم بیران ءُ شش ٹپی بوتگ انت –

لیویز ءِ بنشون ءِ رِد ءَ وئیل کچی ءِ دمگ بالاناڈی گاڑی مھراللہ ءَ یکیں ٹک ءِ دو ٹولیانی میان ءَ وت ماں وتی زاتی جیڑہ ءِ سر ءَ جنگ چوپ ءَ دو برات بیران بوتگ اَنت ءُ شش ٹپی بوتگ انت –

بیران بوتگیں مردمانی پجار عبدالرحیم ء نبی بخش ءُ عبدالکریم ء نبی بخش ءِ ناماں چہ بوتگ انت وھدیکہ ٹکری مہراللہ خان، نبی بکش، نصیب اللہ، محمد افضل، وحید احمد ءُ حفیظ اللہ ٹپی بوتگ انت –

لیویز ءَ ٹپی ءُ بیران بوتگیں مردم نادراھجاہ ءَ سرکتگ انت اود ءَ اژدری چار ءُ ٹپاس ءَ پد جون کھول ءِ ھوالگ ءَ داتگ انت –

بلوچستان ءِ بنجاھی شھر شال ءَ یازدہ اگست ءَ سی ٹی ڈی ءَ ٹاہ داتگ اَت کہ یک دیم پہ دیمی ءَ پنچ مردم کُشگ بیتگ اَنت، سی ٹی ڈی ءَ اے ٹاہ داتگ اَت کہ اے مردمانی سیادی سلاہ بندیں گلے ءَ اِنت کہ دیم پہ دیمی ءَ جنگ بیتگ اَنت –

دی بلوچستان پوسٹ ءَ اے درگت ءَ پَٹ ءُ پول کرتگ ءُ کھول ءُ دمگی مردماں چہ پَٹ ءُ پول کتگ کہ اے دروگیں دیم پہ دیمی ءَ جنگ بیتگیں ورنایانی تہ ءَ دو ءِ سیادی پنجگور ءُ یکے ءِ سیادی گدر ءَ اِنت –

اشانی تہ ءَ یکے ءِ پجار جمیل ء مھمد ھسین ءُ دومی ءِ پجار شعیب ء عطاء مھمد ءِ نام ءَ زانگ بیتگ –

دمگی مردماں دی بلوچستان پوسٹ ءَ گوں گُشتگ کہ جمیل پاکستانی پوج ءَ نوزدہ مارچ دوھزار ءُ بیست ءُ یک ءَ پنجگور ءَ دزگیر کرتگ ءُ بیگواہ کتگ ھمے وڑ شعیب ارب امارات ءَ مزوری ءَ بیتگ کہ موکلانی وھد ءَ وتی ھند ءَ ایگ ءَ بیتگ پوج ءَ کراچی ءِ بالی پَٹ ءَ دزگیر کنگ ءَ پد بیگواہ کتگ –

اشانی تہ ءَ جمیل پنجگور ءِ دمگ گچک ءُ شعیب گرمکان ئیگ اِنت –

زانگ بہ بیت اے دروگیں میڑ ءِ نام ءَ کُشگ بیتگیں یک ورنایے ءِ پجار پیسر ءَ بیتگ اَت، کُشگ بیتگیں ورنا ءِ پجار خان مھمد جھمنند گدر سوراب ءِ نام ءَ زانگ بیتگ اَت، خان مھمد ءِ پجاری ءِ راستی ءِ ھال راست کنان ءَ گوشگ بیتگ کہ آ دو سال ءَ پیسر پاکستانی پوج ءَ پنجگور ءَ آوار جتگ ءُ بیگواہ کتگ –

زانگ بہ بیت اے وڑیں وئیل اولی نہ اِنت اشاں پیسر سی ٹی ڈی ءِ بندیگ جاھاں اے وڑیں وئیل پیش اتکگ اَنت ءُ سی ٹی ڈی ءِ کوش ءِ نام ءَ لڈگ بیتگ اَت –

جون ءِ ماہ ءَ سی ٹی ڈی ءَ ٹاہ داتگ اَت آپریشن ءِ وھد ءَ پوج ءُ سلاہ بندیں مردمانی میان ءَ تیرگواری ءَ چار کس جنگ بیتگ اَنت ءُ کاروائی ءِ وھد ءَ شش کس تتکگ اَنت –

کُشگ بیتگیں مردمانی تہ ءَ ملا مادو مزارانی مری ھوار بیتگ اَت کہ آ دو سال ءَ پیسر شال ءَ جتک اسٹاپ ءِ ھند ءَ لوگ ءَ پاکستانی پوج ءُ چیریں ادارھاں آوار جتگ ءُ بیگواہ کتگ اَت –

ھمے سال ءِ ھژدہ جنوری ءَ بنجاھی شھر شال ءَ رودراتکی شھدگ ءَ پاکستانی پوج ایگل اسکواڈ ءَ پَٹ ءُ پول ءِ وھد ءَ دو ورنا سمیع اللہ پرکانی ءُ جمیل اھمد پرکانی دزگیر کتگ اِت اَنت چریشی ءَ پد آ سی ٹی ڈی ءِ ھوالگ ءَ کنگ بیتگ اکنت ایگل پورس ءَ ٹاہ داتگ اَت گپتگیں مردمانی گور ءَ دزبمب دراتکگ اَنت –

ھردوکیں ورنا پد ءَ سی ٹی ڈی ءَ مستونگ ءَ دگہ سَے کسانی ھواری ءَ کُشتگ ءُ چگل داتگ اَنت –

بلوچستان ءِ دمگ چاگی چار ماہ ءَ پیسر ناگتی بیگواھی ءُ پد ءَ لاش ءِ دزکپتگیں نودربر نسیم بلوچ ءِ کھول ءَ چاگی ءَ زھرشانی کنگ بیتگ –

نسیم بلوچ ءِ کھول ءَ کوشکارانی دزگیر نہ کنگ ءِ ھلاپ ءَ چاگی ءَ زھرشانی ءُ روانک کشگ بیتگ ءُ لیویز کارگس ءِ دیم ءَ زھرشانی کنگ بیتگ –

کھول ءِ گوشگ اِنت کہ چاگی ءِ انتزامیہ ءَ کسان کسالیں نودربر نسیم ءِ کوشکارانی دزگیر کنگ ءَ بے سوب بیتگ بس ننوکی تسلو دیگ ءَ بیتگ اَنت –

زھرشانی کنوک زھرشانی ءَ گُشت کہ انتزامیہ ءِ کار کردگی تچک ءَ بے سوب بیتگ نسیم ءِ کوشکارانی دزگیر نہ کنگ سرجمیں کھول زھنی نادراھی ءِ آماچ اَنت –

زھرشانی کنوکاں گوشت کہ اگاں کوشکار المی ءَ دزگیر کنگ نہ بیت اَنت گڑا دیمتر ءَ ترندتریں زھرشانی کنگ بنت، زھرشانی ءَ مردیناں ھوار کماش ءُ زالبول ءُ زھگ ھوار بیتگ اَنت –

زانگ بہ بیت ھمے سال ءِ مئی ءِ ماہ ءَ چاگی ءَ یک ورنایے ءِ لاش دزکپتگ اَت کہ آئی ءِ پجار نودربر نسیم اللہ بلوچ ءِ نام ءَ زانگ بیتگ اَت –

نسیم بلوچ ءِ آوار جنگ ءُ کوشکارانی دزگیر نہ کنگ ءِ ھلاپ ءَ نیشنل پاٹی ءُ بی ایس او پجار ءِ نیمگ ءَ دالبندین ءُ چاگی ءَ زھرشانی کنگ بیتگ اَنت-

وائس فار بلوچ مسنگ پرسنز کراچی ءِ تہ ءَ زورانسری آوار جنگ ءُ بیگواہ بوتگیں مردمانی میان استمانی روچ ءَ سِی اگست ءَ ہیومن رائٹس کمیشن آف پاکستان، بلوچ یکجھتی کمیٹی کراچی، وائس آف سندھ مسنگ پرسنز، سندھ سجاگ فورم ءُ پشتون تھپز مومنٹ ءِ گون ءَ ھوار بہ ایں ءُ زھرشانی روانک کشگ بیت اِنت زورانسری آوار جنگ بوتگیں مردمانی میان اُستمانی روچ ءَ کراچی ءِ تہ ءَ بیگواھیں مردمانی یل کنائینگ ءِ ھاتر ءَ زھرشانی روانک سِی اگست ءَ دوشمبے ءِ روچ ءَ بیگاھے ادار چار ءَ گورا کبرستان ءَ بگر تاں کراچی پریس کلب ءَ روانک کشگ بیت اِنت –

وی بی ایم پی ءَ لوٹ کتگ کہ بلوچستان ءِ تہ ءَ زورانسری آوار جنگ بوتگیں مردمانی کھول گیش ءَ چہ گیش اے زھرشانی روانک ءَ بھر بہ زور انت ءُ وتی دوستگیں مردمانی یل کنائینگ ءِ ھاتر ءَ توار چِست بہ کن انت –

وی بی ایم پی ءَ وتی جار ءِ تہ ءَ کراچی ءَ چہ سیادی داروکیں درسیں انسان دوست، سیول سوسائیٹی ءِ گل، سیاسی ءُ چاگردی، نودربر گل، وکیل ءُ جمہوریت ءِ منوگراں چہ لوٹ کتگ کہ آ اے روچ ءَ زھرشانی روانک ءَ بھر بہ زور انت ھزارانی کچ ءَ بیگواہ بوتگیں مردمانی یل کنائینگ ءِ ھاتر ءَ آھانی کھولانی توار بہ بنت –

وی بی ایم پی ءَ دیمتر ءَ وتی جار ءِ تہ ءَ گوشتگ کہ اے وھد ءَ بلوچستان ءِ تہ ءَ ھزارانی کچ ءَ مردم بیگواہ انت ءُ ھمک روچ مردم زورانسری آوار جنگ ءُ بیگواہ کنگ بوگ ءَ انت، زورانسری آوار جنی یک گیر کانودی ءُ گیر انسانی املے کہ آئی ءِ گر ءُ دار المّی انت –

وائس فار بلوچ مسنگ پرسنز ءَ زورانسری آوار جنگ بوتگیں مردمانی کھولاں یکبر پد ءَ گوشتگ کہ آ وتی دوستگیں مردمانی یل کنائینگ ءَ توار چست بکن انت ءُ آھانی کیساں وی بی ایم پی ءُ انسانی ھکانی ادارھانی گور ءَ بیار انت اگاں ناں مار ءَ تُرس انت کہ دومی لھتے بیگواھیں مردمانی وڑ ءَ کاؤنٹر ڈیپارٹمنٹ آف ٹیررازم (سی ٹی ڈی) دروگیں میڑ ءِ نام ءَ کُش ایت ءُ آھانی زانگولیں جوناں ھمے وڑ ءَ چگل دنت ھما وڑ کہ گوستگیں روچاں لھتے بیگواھیں مردمانی جون نیوکاھان شال ءَ ھپت زورانسری آوار جنگ بوتگیں مردمانی جون لورلائی ءَ چگل دیگ بوتگ انت کہ آھانی تہ ءَ لھتینانی جونانی پجار پد ءَ رند ءَ اھانی کھولاں کُتگ انت ءُ گل ءِ کر ءَ گوشتگ ئے کہ آھاں بازیں سال ءُ ماہ ءِ بیت کہ زورانسری آوار جنگ ءُ بیگواہ کنگ بوتگ انت –

وی بی ایم پی ءِ رِد ءَ زھرشانی روانک کراچی پریس کلب ءِ دیم ءَ دارگ بیت اِنت کہ اود ءَ انسانی ھکانی گلانی نمائندگ ءُ بیگواھیں مردمانی کھول تران کن انت –

بلوچستان ءِ دمگ زیارت ءِ ھند ءَ نندوکیں مردمانی زھرشانی برجاہ، زھرشانی کنوکاں بازیں کچے ءَ شال داں زیارت ءِ دگ بند کرتگ ءُ نندانک ءَ نشتگ اَنت ءُ روگ ءُ آیگی راہ ءُ در بند کنگ بیتگ اَنت –

زھرشانی گوستگیں روچ ءَ مانگی ءَ لیویز کارمندانی سر ءَ بیتگیں تراک ءِ پژدر ءَ بیگ ءَ اِنت کہ چریشی ءَ پورسز ءِ شش کارمند ءُ زدگ ءُ بیران بیتگ اِت اَنت-

بیتگیں تراک ءَ بیران بیتگیں کارمندانی کھول ءُ دمگ ءِ مھلوک ءَ پاکستانی لشکری ادارھانی سر ءَ زمہ واری ءَ لڈگ ءَ اَنت ءُ زھرشانی کنگ ءَ اَنت – زھرشانی کنوکانی لوٹ اِنت فرنٹیئر کور اے دمگ ءَ کشگ بہ بیت کہ چریشی ءِ سبب ءَ اے وڑیں وئیل پیش آیگ ءَ اَنت –

زھرشانی ءَ ھواریں نعیم احمد ءَ گُشتگ اَت اے جاہ ٹکی جاہ ئِت کہ گوست ءَ پر ایمن بیتگ بلے گوستگیں سالاں چہ فرنٹیئر کور ءِ آیگ ءَ پد چوشیں وئیلانی تہ ءَ گیشی اتکگ اَنت آیاں بھتام جتگ کہ فرنٹیئر کور ءِ کارمند جتا جتائیں رنگاں ٹیکیداراں چہ سیکورٹی ءِ نام ءِ سر ءَ ٹیکس گرگ ءَ اَنت بلے اشانی بارو ءَ ھچ کار ءُ کرد گندگ ءَ آیگ ءَ نہ اَنت –

وزیر داکلہ میر ضیاء اللہ لانگو ءَ بیتگیں وئیل ءِ بارو ءَ درشان دیان ءَ گوشتگ کہ کانونداریں ادارہ ءُ اشی ءَ ھواریں ادارہ کم کساس ءَ گیش پرکار اَنت – وزیر داکلہ ءَ ٹاہ داتگ کہ ما ھچ وڑ ءَ وتی زمہ داریاں بے دلگوش نہ اِنت –

زانگ بہ بیت لیویز پورس ءِ گاڑی ءِ سر ءَ بمب تراک ءِ زمہ واری بلوچ لبریشن آرمی ءَ منّ اِتگ اَت – بی ایل اے جارکش جیئند بلوچ ءَ گُشتگ اَت کہ ما اشی ءَ پیسر باز براں تچک کتگ ءُ مھلوک سرپد کتگ اَنت کہ پولیس ءُ لیویز وڑیں بلوچ کہ آ پورسز زورگریں پاکستان ءُ آئی ءِ پوج ءِ گوشگ ءَ بلوچ زرمبشت ءِ بگیری ءَ دور بہ بنت اگاں ناں گڑا ترندتریں اُرش کنگ بنت بلے ات پورسز تچک ءَ زورگریں پوج ءِ کمک ءُ بلوچ زرمبشت ءِ ھلاپ ءَ کار کنگ ءَ اَنت –

بلوچستان ءِ دمگ پنجگور ءَ پاکستانی پوج ءَ دو کس آوار جنگ ءَ پد بیگواہ کرتگ اَنت –

گیشیں ھالانی رد ءَ گوستگیں شپ ءَ پاکستانی پوج ءُ چیریں ادارھانی کارمنداں پنجگور ءِ دمگ پروم نوکبند ءَ یک لوگے ءِ سر ءَ بیڑ برتگ ءُ اود ءَ دو ورنا آوار جنگ ءَ پد بیگواہ کرتگ اَنت –

دزگیری ءَ پد بیگواہ کنگ بیتگیں مردمانی پجار فیصل ء دوس مھمد ءُ باسد ء ھالد ءِ ناماں زانگ بیتگ اَنت –

دمگی مردمانی رد ءَ بیگواہ بیتگیں ھردوکیں ورنا ایرانی سیمسراں تیل ءِ باپار ءَ بیتگ اَنت ءُ تیل ءِ باپاری ءَ گوں ھمگرنچ بیتگ اَنت کہ گوستگیں شپ ءَ بیگواہ بیتگ اَنت –

دومی نیمگ ءَ جولائی ءِ ماہ ءَ سال دوھزار ءُ بیست ءُ یک ءَ کیچ ءِ دمگ ھیرونک سنگ آباد ءَ گرگ بیتگیں اللہ داد گوستگیں شپ ءَ یلو بیتگ –

یل بیتگیں اللہ داد ءِ یل بیگ ءِ ھال ٹی بی پی ءَ گوں آئی ءِ نزیکیں مردماں کرتگ ءُ گوشتگ کہ اللہ داد یلو بیتگ ءُ وتی گس ءَ سر بیتگ –

زانگ بہ بیت اللہ داد ءِ ھمراھی ءَ آوار جنگ بیتگیں غلام ء شیھی ءِ لَٹ ءُ کُٹ کنگ بیتگیں جون پوج ءَ ھسپتال ءَ رسینتگ اَت –

غلام شیھی ءِ کوش ءِ بارو ءَ گُشگ بیتگ اَت کہ پوج ءَ زندان ءِ تہ ءَ ترندیں لَٹ ءُ کُٹ کرتگ ءُ چریشی ءَ آ ھمے میان ءَ بیران بیتگ اَت –

غلام ءِ بارو ءَ گُشگ بیتگ اَت کہ غلام سرا بروبر نہ بیتگ ءُ نیمساریں مردمے بیتگ ءُ پوج ءَ آوار جتگ ءُ بیگواہ کرتگ اَت –

زانگ بہ بیت بلوچستان ءَ زورانسری آوار جنیانی درچ برجاہ اَنت ءُ بیگواھیں مردمانی تہ ءَ گیشتری ورنائینگ اَنت ھمے وڑ وائس فار بلوچ مسنگ پرسنز گوستگیں یک دھکے ءَ یکشل ءَ زھرشانی کنگ ءَ اِنت –

پشمبے ءَ اوگانستان ءِ بنجاھی شھر کابل ءِ بالی پَٹ ءَ بیتگیں دو وتکش تراکاں بیست ءُ ھشت تالبان بیران بیتگ اَنت –

مھکمہ سھت ءُ تالبان ءِ یک اگدودارے ءَ برطانوی خبر رساں ایجنسی روئٹرز ءَ گوں گپ کنان ءَ گُشتگ ’ کابل بالی پَٹ ءَ بیتگیں بمب تراکاں ھپتاد ءَ دو مردم مرتگ اَنت ءُ چریشانی تہ ءَ بیست ءُ ھشت تالبان ھوار اَنت –

اوگان شھری ءَ روئٹرز ءَ گوں گپ کنان ءَ گُشتگ کہ بمب تراکاں من دیستگ مردم ھما رنگ ءَ برز ءَ چِست بیتگ اَنت کہ گوات کاگداں برز ءَ بال دنت –

امریکی پوج ءِ گوشگ اِنت اے اُرشاں سیزدہ پوجی مرتگ اَنت –

زانگ بہ بیت اوگانستان ءِ بنجاھی شھر کابل ءَ پشمبے ءِ روچ ءَ بالی پَٹ ءِ دو بمب تراکاں دوازدہ امریکی پوجیاں ھوار ھشتاد ءُ پنچ مردم مرتگ اَنت ءُ یک سد ءُ چِل ءَ گیش مردم زدگ بیتگ اَنت – اُرش ءِ زمہ واری ناشریں گل داعش ءَ منّ اِتگ اَت –

امریکی مھکمہ دفاع پینٹاگون ءَ پریس سیکریٹرء جان کربی ءَ گشتگ اَت ما اشی ءَ راست کن ایں کابل بالی پَٹ ءَ بیتگیں اُرشاں بازیں پوجی بیران بیتگ اَنت ءُ بازیں کارمنداں ٹپ درمان بیگ ءَ اَنت-

آئی ءَ گُشتگ اَت کہ اوگان شھری ھم اے اُرش ءِ نشانگ بیتگ اَنت، امریکی سینٹرل کمانڈ ءِ سروک جنرل فرینک میکنزی ءَ اے بارو ءَ گُشتگ اَت کابل بالی پَٹ ءَ بیتگیں اُرشاں سیزدہ پوجی بیران ءُ پانزدہ زدگ بیتگ اَنت –

پینٹاگون ءَ ھالرساناں نوکاز کنگ ءِ وھد ءَ جنرل میکنزی ءَ گُشتگ اَت تراکاں پد تیرگواری ھم کنگ بیتگ اَنت –

اوگان شھری ءَ روئٹرز ءَ گشتگ اَت کہ نزیکیں جانشودی آپانی تہ ءَ آپ مٹ بیتگ ءُ ھون بیتگ اَنت – بیست ءُ چار سالی ئیں سول انجینئر زبیر ءَ گُشتگ اَت آ یک وتکش اُرشکارے ءِ نزیک ءَ بیتگ کہ آئی ءَ تراک کتگ –

آئی ءَ گُشتگ اَت مردین، جنین ءُ زھگ پریات کنگ ءَ بیتگ اَنت بازیں زدگ بیتگیں گندگ بیتگ اَنت لس گاڑیانی سر ءَ نادراہ جاہ ءَ برگ ءَ بیتگ اَنت –

اے گپ یاتگیری اِنت دوھزار ءُ یازدہ ءَ اوگانستان ءَ یک ھیلی کاپٹرے ءِ اُرش ءُ سِی امریکی پوجی مرتگ اِت اَنت ءُ چریشی ءَ پد پشمبے ءَ کابل ءَ بیتگیں اُرشاں درستاں گیشتر امریکی پوجی مرتگ اَنت –

احسان ارجمندی 2009 ءِ اگست ءَ پاکستانی پھازگی گلاں ھما وھدءَ دزگیر کنگ ءَ پد بیگواہ کُتگ، کہ وھدے آ بلوچستان ءَ وتی سیادانی چارگ ءَ روگءَ بیتگ ۔ آ ناشناسیں جاھے ءَ بندیگ کَنگ بیتگ ءُ اے سرجمیں وھدءَ آ ھچ کجام آمید گِس ءَ پیش کنگ نہ بیتگ۔

2010 ءَ پاکستانی واکداراں اسلام آباد ءَ ناروے ءِ سپارتھانہ ءَ گوں اے گپ من اِتگ کہ ارجمندی مئے گورءَ اِنت بلے یل کنگ ءَ چہ انکاری بیتگ اَنت۔

احسان ارجمندی ءِ کیس اے درگت ءَ گپ کنت کہ چون پاکستان ءِ پئیمیں زوراکیں استان ءَ مردم زورانسری بیگواہ بنت ءُ بازیں جیڑھانی تہءَ مردماں آیانی سیاسی چِست ءُ ایر ءُ لیکہ آنی پُشدرءَ ابید ءِ آمید گِس ءِ پرمان ءَ کُشنت۔

بلوچ انسانی اگبالانی ھاتر ءَ کار کنوکیں گلانی ردءَ ھزارانی کساس ءَ بلوچ چاگردی ءُ سیاسی جھدکار ءُ انسانی اگبالانی پھازوک پاکستان ءَ زورانسری بیگواھی ءِ آماچ کنگ بیتگ اَنت۔

پھازگی ءُ چیریں گلانی نیمگ ءَ بلوچانی زورانسری بیگواھیانی دلجمیں منانک بیگ ءَ ابید ھم میان اُستمان ءَ وتی دپ بستگ وھدیکہ پاکستانی سرکار انسانیت ءِ ھلاپ ءَ اے سلتریں جرمکاری ءَ ھواریں مردمانی پجار کنگ ءُ آیانی ھلاپ ءَ قانودی گام زیرگ ءَ بے سوب بیتگ اَنت۔

بلوچ آجوئی لوٹوکیں سلاہ بندیں گلانی یکجاھیں بلوچ راجی آجوئی سنگر ( براس ) ءِ جارکش بلوچ خان ناشناسیں ھندے ءَ رسانکدر ءَ شنگ کتگیں وتی یک درشانے ءِ تہ ءَ گْوشتگ کہ پنجگور ءِ دمگ کیلکور سی پیک دگ ءِ سر ءَ زورگریں پاکستانی پوج ءِ سر ءَ دو جتائیں اُرشاں نشانگ کتگ ءُ دشمن ءِ ھپت کارندہ کُشگ ءُ بازینے ٹپی کنگ ءِ زمہ واری ءَ منّ ایں-

جارکش ءَ گْوشتگ کہ سے روچ ءَ ساری پاکستانی پوج ءِ یک درزنے ءَ گیش گاڑیانی ءُ پرپٹانی ھواریں کاروانے ءِ سر ءَ دو نیمگ ءَ چہ بلیدہ کراس ءُ سھاکی دگ ءَ کیلکور ءَ لشکر کشی ءِ ھاتر ءَ پُترتگ ، براس ءِ سرمچاراں پیریگیں بیگاہ ءِ ساھت چار ءَ بلیدہ ءِ کراس ءِ دگ ءَ آؤکیں پوج گاڑی ءُ پُرپٹاں ھواریں کاروان ءِ سر ءَ رزو ءِ ھند ءَ نشانگ کتگ، سرمچار اُرش ءَ پد پہ سلامتی درایگ ءَ سوبین بوتگ اَنت وھدیکہ دشمنیں پوج دومی روچ ءَ ھم لشکر کشی ءَ دلگوش بیتگ – لشکر کشی ءِ وھد ءَ یک درزنے ءَ گیش بے میاریں مردم آوار جنگ بیتگ اَنت –

بلوچ خان ءَ دیمتر ءَ گْوشتگ کہ سرمچاراں سھاکی بُنجل ءَ واتر رؤکیں پوج گوستگیں شپ ءَ دگہ یک اُرشے ءَ نشانگ کتگ اَنت، کاروان ءَ ھوار یک گاڑی یے گوں چیرکتگیں بمبے ءَ نشانگ کتگ ءُ چریشی ءِ آسر ءَ گاڑی سرجم ءَ تباہ بوتگ وھدیکہ آ پش کپتگیں ھپت گاڑی ءُ پرپٹانی سر ءَ ٹوھیں ءُ وتکاریں سلاھاں گوں نشانگ کتگ اَنت-

بلوچ خان ءَ دیمتر ءَ گْوشتگ کہ دوئیں اُرشاں چہ دشمنیں پوج ءِ ھپت کارندہ مرتگ اَنت ءُ بازینے ٹپی بوتگ اَنت – زورگریں پوج زوراندستیں پروجیکٹ سی پیک ءِ کش ءُ گور دمگاں ساپ کنگ ءِ ھاتر ءَ میتگانی سر ءَ لشکر کشی کنگ ءَ اِنت ءُ وھدیکہ اے دمگاں بلوچ راج ءَ زورانسری در کنگ ءَ اَنت-

جارکش ءَ گْوشتگ کہ زورگریں پوج ءُ آئی ءِ ھمگرنچانی سر ءَ مئے اُرش برجاہ بنت-

پنسن کور ءَ برجاھیں پوجی پانگس ءَ یک پوجی کارمندے دورجنگیں توپک ءِ نشانگ کتگ – میجر گوھرام

سربوتگیں ھالانی رِد ءَ گوستگیں روچ ءَ سَے شمبے ءَ ناشناسیں سلاہ بندیں مردماں دشت ءَ برجاھیں پاکستانی پوج ءِ پانگس ءِ سر ءَ اُرش کُتگ – اُرش دشت ءِ دمگ پنسن کور ءَ پوجی پانگس ءِ سر ءَ کنگ بوتگ چریشی ءَ پوج ءَ جانی تاوانانی دیمپانی بوتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں سَے شمبے ءِ روچ ءَ دشت ءِ دمگ پنسن کور ءَ دُژمن پوج ءِ پانگس ءِ سر ءَ دور جنگیں توپک ءَ گوں یک پوجی کارمندے نشانگ کتگ – اُرش ءَ یکیں کارمند ھما دمان ءَ مرتگ –

جارکش وتی درشان ءِ گڈسر ءَ گوشتگ زورگیریں پوج ءِ سر ءَ مئے اُرش بلوچستان ءِ آجوئی ءَ تاں برجاہ مان انت –