TBP Balochi

سربوتگیں ھالانی رِد ءَ گوستگیں روچ ءَ ھاران ءِ دمگ ھلمرگ ءَ پاکستانی پوج ءُ بلوچ سرمچارانی میان ءَ ٹوھیں اُرشے بوتگ، اُرش نیم بیل ءَ ادار دو ءَ بندات بوتگ ءُ تاں شپ ءِ ادار دہ ءَ آسر بوتگ – اے میڑ ءَ سلاہ بندیں گل ءِ دو سرمچار نمیران بوتگ ءُ پاکستانی پوج ءِ بازیں کارمندے کُشگ ءُ ٹپی بوتگ اَنت –

اے میڑ ءَ پاکستانی پوج ءَ جنگی بالگرادانی کمک ھم گون بوتگ کہ اھاں جنگ جاہ ءَ تیرگواری کرتگ –

وھدیکہ پاکستانی پوج آئی ایس پی آر ءِ رِد ءَ آھانی یک کارمندے کُشگ بیتگ کہ آئی ءِ پجار فدا الرحمان جھمنند چترال نام ءَ چہ بوتگ –

دومی نیمگ ءَ بلوچ آجوئی لوٹوکیں سلاہ بندیں گل یونائیٹڈ بلوچ آرمی ءِ جارکش مزار بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ ھاران ءَ میڑ ءَ پاکستانی پوج ءِ بازیں کارمندے مُرتگ ءُ مئے دو سرمچار شھید بوتگ اَنت –

جارکش مزار بلوچ ءَ دیمتر ءَ وتی درشان ءِ تہ ءَ گوشتگ کہ گوستگیں روچ ءَ ھاران ءِ دمگ ھلمرگ “کسان” مئے سرمچار گل ءِ مشن ءَ بوتگ انت کہ زورگیریں پوج ءَ سرمچارانی انگیر کنگ ءِ جھد کرتگ کہ ھمے میان ءَ سرمچار ءُ زورگیریں پوج ءِ میان ءَ نیمروچ ءِ ادار دو ءَ میڑ بندات بیتگ تاں شپ ء ادار دہ ءَ برجاہ بوتگ – زورگیریں پوج ءَ دمگ چاریں نیمگاں وتی انگیر ءَ کتگ سرمچاراں تمردی ءُ دلیری ءِ گون ءَ زورگیریں پوج ءِ گون ءَ جنگ برجاہ داشتگ، زورگیریں پوج ءِ مزنیں کساسے ءَ کارمند جنگ جاہ ءَ ساڑی بوتگ انت بلے پد ءَ رند ءَ زوگیریں پوج ءَ دگہ پوجی لوٹارینتگ ءُ آھاں جنگی بالگرادانی کمک ھم گون بوتگ کہ جنگ جاہ ءَ سرمچارانی سر ءَ تیرگواری اش کرتگ –

جارکش ءَ گوشتگ کہ زورگیریں پوج ءِ بازیں کارمندے ھما دمان ءَ مرتگ ٹپی بوتگ انت، زورگیریں پوج ءَ وتی مرتگیں کارمندانی جون ءُ ٹپی بوتگیں کارمند بالگردانی کمک ءَ اول ءَ ھاران ءِ ایف سی بنجل ءَ ءُ پد ءَ نوشکی ایف سی بنجل ءَ برتگ انت وھدیکہ زورگیریں پوج وتی مرتگیں ءُ ٹپی بوتگیں کارمندانی راستیں کچ ءَ چیردئیگ ءِ جھد ءَ انت –

جارکش ءَ گوشتگ کہ اے میڑ ءَ طارق ساسولی پنام فراز بلوچ ءُ عمران ساسولی پنام ء سلمان بلوچ شھید بوتگ انت – شھید طارق ساسولی دوھزار ءُ پانزدہ ءَ چہ زرمبشت ءَ ھوار بوتگ وھدیکک آ دوھزار ءُ نوزدہ ءَ یونائیٹڈ بلوچ آرمی ءِ پتر ءِ سر ءَ دژمن ءِ بگیری ءَ وتی کرد ءَ پیلو کنگ ءَ بوتگ اَنت – شھید عمران ساسولی گوستگیں دو سالاں چہ یونائیٹڈ بلوچ آرمی ءَ گوں بندوک بوتگ –

جارکش ءَ گوشتگ کہ شھید طارق ءُ شھید عمران ءَ نوشکی، ھاران، شورپارود ءُ منگچر ءَ گل سنگرانی تہ ءَ پہ تمردی وتی راجی پرز پیلو کرتگ انت کہ آھانی تمردی وتن دوستی بلوچ ورنایانی ھاتر ءَ یک بے مٹیں درورے – یونائیٹڈ بلوچ آرمی شھید بوتگیں سرمچارانی تمردی وتن دوستی ءُ دیمونیاں سھر چکیں دروت ندر کنت-

سر بیتگیں ھالانی رد ءَ بلوچستان ءِ تیابدپی دمگ گوادر ءَ شھدربرجاہ “یونیورسٹی ” ءِ واستا زھرشانی روانک نودربرانی نیمگ ءَ کشگ بیتگ –

روانک شھر ءَ ھواریں دگ میرین ڈرائیور دگ ءَ گوازن ءُ جی ڈی اے پارک ءَ مُچے ءِ دروشم ءَ مُچ بوتگ –

زھرشانی کنوکانی دستاں گوادر شھدربرجاہ ءِ واستا نبشتگیں تاک دست ءَ بیتگ اَنت کہ آیانی سر ءَ نبشتگ بیتگ کہ “گوادر ءِ نودربراں شھدربرجاہ ئِے لوٹ ایت ” –

زھرشانی روانک ءَ گوشگ بیتگ کہ گوادر ءِ نودربراں اِلم ءُ زانت ءِ واستا شھدربرجاہ ءِ پکار اِنت ءُ سرکار باید مئے لوٹ آں سرجم بہ کنت –

آیانی گوشگ اِنت کہ داں گوادر ءَ شھدربرجاہ نہ رس ایت گوادر ءِ نودربر ھمے رنگ ءَ وتی جھد ءَ برجم داریت –

زانگ بہ بیت گوستگیں روچ ءَ چاگردی رسانکجاھاں بازیں اکس شنگ بیتگ اَنت کہ آیانی سر ءَ ھیش ٹیگ #GwadarNeedUniversity نبشتگ بیتگ اَنت –

مروچی گوادر ءِ نودربرانی دزبندی ءَ چاگردی رسانکجاہ ٹوئٹر ءَ ھم ھیش کارمرد کنگ ءِ جار پِرینگ بیتگ اَنت ءُ گوشگ بیتگ کہ ساھت شش ءَ داں دوازدہ ءَ #GwadarNeedUniversityھھیش ٹیگ کارمرد کنگ ءِ دزبندی بیتگ اَنت –

بلوچستان ءِ بنجاھی شھر شال ءِ پریس کلب ءِ دیم ءَ بیگواھیں بلوچانی یل کنائینگ ءِ واستا وائس فار بلوچ مسنگ پرسنزے زھرشانی بنجل ءَ مروچی چار ھزار ءُ سَے سد ءُ چِل ءُ یک روچ سرجم بیتگ –

بنجل ءَ کیچ دمگ بلیدہ ءَ چاگردی باسک نبی بکش بلوچ، یار جان بلوچ ءُ دگہ مردین ءُ زالبولاں بنجل ءِ تر ءُ تاب کرتگ ءُ کھولانی گون ءَ پدردی درشان اِتگ –

ھمے وھد ءَ وائس فار بلوچ مسنگ پرسنز ءِ وائس چیئرمین ماما قدیر بلوچ ءَ تران کنان ءَ گوشتگ کہ بلوچستان ءَ برجاھیں ریاستی سنگینی ءُ زُلم ءُ زوراکیانی سرپدی ھست بلے سما ءُ زمہ واری بیت کنت ترس ءِ چیر ءَ اَنت –

آئی ءَ گوشت کہ بلوچ ءِ انسانی ءُ راجی ھکاں زور پچگرگ بیگ ءَ اَنت –

آئی ءَ گوشتگ کہ بلوچستان ءَ زورانسری ءِ آوار جنیانی درچ برجاہ اَنت ھمود ءَ نودربر ءُ سیاسی باسک زورانسری آوار جنگ ءُ بیگواہ بیگ بلوچستان ءَ انسانی ھُنڈالانی ھلاس کنگ ءَ لانک اش بستگ –

آئی ءَ گوشت: انسانی ھکانی میانی اُستمانی گل وتی بے تواری ءَ بہ پروش ایت ءُ بلوچستان ءَ انسانی گار ءُ بیگواھی ءِ ھلاپ ءَ توار چِست بہ کنت –

نبشتانک: دوازده سال ءِ بیگواهی

نبشتہ کار: زهیر بلوچ

دی بلوچستان پوسٹ

بلوچستان ءَ زورآنسری آوارجنی نوکیں گپے نہ اِنت بلے گوستگیں دو دیک ءَ چہ زورگِریں اِستان ءِ نیمگ ءَ اے دِرچ روچ پہ روچ تُرندی ءَ گوں برجاه اِنت همُک روچ بلوچ ورناه ، پیر کماش ءُ زهگ ءُ زالبول هم آوارجنئگ ءُ لشکری بُنجُلانی تہ ءَ بندیگ ءُ لَٹ ءُ کُٹ کنگ بوگ ءَ اَنت-

بلوچستان ءَ چُشیں گِس ءِ مروچی پَشت نہ کپتگ کہ آ گِس ءَ یک مَردُمے آوارجنگ ءُ بیگواه کنگ نہ بوتگ اَنت نوں وَ همک روچی ربیت ءِ زورگِر ءَ رواج داتگ کہ بلوچ چُکچینی ءَ کجامی رنگ ءَ برجاه بداریت اے دِرچ ءَ گیشتر نودربر زانتکار ، ڈاکٹر ، اُستاد ءُ نبشتہ کار نشانگ جوڈ کنئگ ءُ آوارجنئگ بوهگ ءَ انت اِشانی تہ ءَ بازینے ٹپ ءُ ٹوریگیں لاش هم دست کپتگ انت ءُ بازین ءِ سالانی سال تهاریں زندانانی تہ ءَ بندیگ انت ءُ لٹ ءُ کُٹانی دیمپان انت اے بیگواهیں مردمانی مات گُهار پہ وتی مهروانانی واستا در پہ در اَنت کِشک ءُ دگانی سر ءَ نشتگ انت پریس کلبانی دیم ءَ زهرشانی ءَ انت بلے زورگریں اِستانی واکدار ءُ آمیدگِس بلوچ مات ءُ گوھارانی پریات ءُ زاراں هچ دلگوش نہ کن انت. بلوچ ماتانی چمانی ارساں نہ گند انت انچو سَما بیت کہ اے کَر ءُ کور انت ءُ زبان اِش گُنگ اِنت-

همے وڑ ءَ بلوچ نودربر زاکِر مجید هشت جُلکان دو هزار نُو ءَ زورگریں استانی لشکر ءَ بلوچستان ءِ دمَگ مستونگ ءَ چہ دو دگہ سنگت ءِ همبراهی ءَ آوار جتگ بیگواه کُتگ لهتے روچ ءَ پد آ دوئیں همبراه یل کنگ بوتگ انت بلے زاکر مجید روچے مروچی بیگواه انت زورگریں لشکر ءِ بندیگ جاھاں لَٹ ءُ کُٹانی دیمپان انت زاکر جان ءِ آوارجنی ءَ پد آئی ءِ کھول یکشل ءَ پہ آئی ءِ آجوئی ءِ هاتر ءَ جهُد کنئگ ءَ اِنت زاکر جان ءِ گوھار پرزانہ مجید ءَ گوں ایندگہ بیگواهیں مردمانی کھول ءَ هزاراں کلومیٹر دراجیں پند بُراتگ شال ءَ بگِر داں اسلام آباد ءَ گوں وتی تراولیں پاداں شُتگ کہ بلکیں منی توار گوشدارگ بہ بیت ءُ زاکر جان چہ زورگرے زندان ءَ آجو کنگ بہ بیت بلے بژن انت کہ انگہ اے زوراکانی گوش ءَ مورے هم نہ وارت زاکر جان ءِ مات پیرانسری گوں نادُراهیں جان ءَ برے شال پریس کلب ءِ دیم ءَ نشتگ ءُ برے اسلام آباد ءِ پریس کلب ءِ دیم ءَ نشتگ زهرشانی کنگ ءَ انت-

سرد ءُ گرم هچ نچاریت بس وتئی چمانی روک زاکر جان ءِ اکس ءِ امبازاں گون انت ءُ لُنٹانی سرا بس زاکر جان ءِ نام ء وِرد انت کہ زاکر جان ءَ واتر بیار اِت چنچو گران انت اے ساهگریں ودار تاسپیں بچانی بیگواهی ماتاں سک باز تورِشت دنت دمان پہ ساهت هیالی تہ ءَ بس وتی مهروان ءِ گمان بیت کہ باریں بدواه ءِ زندان ءَ چون انت باریں ورگ ءِ دیگ بیت اگاں نا — باریں چنچو لَٹ کُٹ کنئگ بوهگ ءَ انت زاکر جان ءِ مات گُشیت منی زندے کُل وشی زاکر جان انت منی زندے همک کتره بس زاکر جان ءِ نام ءَ انت ابیدے زاکر جان ءَ منی زند ءَ هچ وشی نیست پہ من اے امروز چو تهاریں کبر ءَ انت منی زندے رُژنائی زاکر جان ءِ گوناپ ءِ دیدار انت-

بلے گوستگیں دوازده سال انت اے مات ءِ واهگ سرجم نہ بوتگ زوراکانی سِنگیں دل انگہ آپ نہ بوتگ بلے زاکر جان ءِ مات ءِ توکل هم انگتہ مهکم انت پہ وتی چُک ءِ هاترا اے مات انگہ وتئی ارسیگیں چماں گوں زوراکانی دیم ءَ اوشتاتگ ءُ آهاں جُست کنگ ءَ انت کہ منی چُک زاکر مجید کُجا انت منی چُک ءَ واتر بیاریت-

زاکر جان ءِ گناه ءُ میار بس همیش انت کہ وتئی راجی بزگی ، دِرتہ پُچی ءُ گُژنگی ءِ مار اِتگ وتئی راجی اُگبالانی پد جنئگ ءَ درکپتگ زاکر جان ءَ گُشتگ کہ منی راج ءِ تاسپیں بچاں بیگواه مکن اِت منی راج ءِ ورنایاں شهید مکن اِت منی بلوچ مات ءُ گهُارانی اِزت ءَ لگتمال مکن اِت پمیشکا زاکر جان هم بیگواه کنگ ءُ تهاریں زندان ءَ بندیگ کنگ بوتگ-

زاکر جان مرچی پہ وتی بلوچ راج ءِ هاترا گوستگیں دوازده سال انت تهاریں زندان ءَ بندیگ انت. بلوچ راج زاکر جان ءِ واستا توار چِست بکنت زاکر جان ءِ مات ءَ گوں همکوپگ بہ بیت ءُ زورگریں لشکر ءَ اے باور بہ کناهینیت کہ مرچی همک ورناه زاکر مجید اِنت آئی ءِ لیکہ ءُ سَسا مرچی همک بلوچ ورناه ءِ تہ ءَ ھست انت زاکر جان ءِ مات ءَ اے گرانیں ساهتاں بلوچ راج ایوک مہ کنت-

زاکر جان ءِ مکهیں مات ءِ رتکگیں ارسانی مُز ءُ دوازده سال ءِ جُهدے برورد زوت آئی ءَ بِہ رسات انت اے دوازده سال ءِ گرانیں ودارے سپر آسر بات زاکر جان زوت پہ سلامتی واتر بات گوں کُل بیگواهیں بلوچاں-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ تیابدپی شھر گوادر ءَ آپ ءِ نہ بوگ ءِ سر ءَ مھلوک ءَ دگ بند کرتگ ءُ آپ ءِ لوٹ ءَ کنگ ءَ اَنت –

گیشیں ھالانی رد ءَ گوادر بلوچ وارڈ ءِ مھلوک ءَ بے آپی ءِ سر ءَ پدی زر ءَ سید زھورشاہ ھاشمی ءِ چار راہ ءَ جناح یونیو بند کرتگ ءُ ھر دوکیں نیمگاں روگ ءُ آیگی مھتل کرتگ اَنت –

دگ ءَ زھرشانی ءَ زالبول ءُ مردین ھوار اَنت ءُ آیاں دگ بند کرتگ ءُ آپ ءِ لوٹ ءَ کنگ ءَ اَنت –

آیانی گوشگ اِنت کہ بازیں روچ اَنت مئے گور ءَ آپ نیست ءُ ما ترمپے آپ ءَ مئے نُک کلنڈ اَنت –

زانگ بہ بیت گوادر ءَ ھواریں بازیں جاھاں اے وھد ءَ آپ نیست ءُ مھلوک آپ ءِ لوٹ ءَ دگاں بند کنگ ءَ اَنت –

گوادر ءِ مھلوک ءِ گوشگ اِنت کہ سرکار تھنا ھما مردماں آپ دنت کہ آ دراں آرگ بیتگ اَنت بلے ادے جھمنندیں مردم ترمپ ءِ آپ ءَ ھُشک اَنت –

سر بیتگیں ھالانی رد ءَ بلوچستان ءِ دمگ ھزدار ءَ سندھ ءَ رؤکیں بس بھلونک ءِ ھند ءَ وئیل ءِ آماچ بیتگ ءُ اود ءَ بس ءَ سواریں بیست مردم بیران بیتگ اَنت –

ھالانی تہ ءُ گوشگ بیگ ءَ اِنت اے مردم کاکائی ءَ”جلسہ “واتر دادو ءَ روگ ءَ بیتگ اَنت کہ بس ءِ چَت ءَ باز مردم سوار بیتگ اَنت کہ بس یک موڑے ءَ کپتگ ءُ چریشی ءَ تنی وھدی بیست مردم بیران بیتگ اَنت ءُ پنجاہ مردم ءِ کچ ءَ زدگ اَنت –

وئیل ءِ ھال ءِ سر بیگ ءَ اسسٹنٹ کمیشنر ھزدار سر بیتگ ءُ لاش ءُ زدگ بیتگیں مردمانی چِست کنگ برجاہ اِنت –

بلوچستان ءَ ھمک روچ دگ ءِ وئیلانی ھال پیداک اَنت کہ آیانی گیشتریں سبب ڈرائیورانی نا دلگوشی ءُ دگانی سر ءَ کانودارانی نہ بوگ ءِ بروبری گوشگ ءَ اَنت ءُ دومی نیمگ ءَ دگانی پرشت ءُ پروشی ءَ ھم وئیل دیم ءَ آیگ ءَ اَنت –

سربیتگیں ھالانی رد ءَ بلوچستان ءِ دمگ گریشہ ءَ بلوچ اسٹوڈنٹس ایکشن کمیٹی ءِ ھنکین سروک کریم عالم ءِ سروکی ءَ نیادے برجم دارگ بیتگ ءُ اود ءَ نوکیں بنزہ ءِ جوڑ کنگ بیتگ –

نیاد ءِ گچینی ءِ مھمان بنجاھی پتر ءِ وائس چیئرپرسن شبیر بلوچ بیتگ ءُ نیاد ءَ ھنکینی نیاد، گلی رھبند، آؤکیں کارانی بنگپانی سر ءَ تران بیتگ ءُ نوکیں بنزہ ءِ جوڑ کنگ بیتگ –

نوکیں بنزہ ءَ گچین بیتگیں عرفان نواز بلوچ سروک، کسان کمک سروک سراج بلوچ، جنرل سیکرٹری مجیب بلوچ، ڈپٹی جنرل سیکرٹرء نادر بلوچ انفارمیشن سیکرٹری انور بلوچ گچین کنگ بیتگ اَنت –

گچین بیتگیں بنزہ ءِ سروک ءُ باسکاں گل ءِ رھبندانی سر ءَ ستک داشتگ ءُ آیانی گوشتگ کہ دمگ ءَ وانگی ءُ دگہ درچاں گل ءِ رھبندانی ھساب ءَ کار کنگ بیت اِنت –

آیاں گوشتگ کہ بلوچ اسٹوڈنٹس ایکشن کمیٹی ءِ لوٹ ھمیش اِنت کہ ھمود ءَ وانگی تک چیر ترینگ بیتگ اَنت ھمود ءَ بلوچ اسٹوڈنٹس ایکشن کمیٹی ءِ باسک وتی جد ءُ جھد ءِ کنگ ءَ اَنت کہ اود ءَ دوبر وانگی درچ شریں وڑے ءَ گندگ بہ بنت –

زانگ بہ بیت بلوچ اسٹوڈنٹس ایکشن کمیٹی بلوچستان ءَ ھوار بازیں جاھاں وانگی درچاں کار کنگ ءَ اِنت ءُ بلوچ اسٹوڈنٹس ایکشن کمیٹی ءِ نیمگ ءَ تنی وھدی بازیں جاھاں کتاب ءُ دگہ سرپدیانی جاہ ایر کنگ بیتگ اَنت –

دی بلوچستان پوسٹ

بلوچ سیاسی ءُ چاگردی جھدکاران بلوچ آجوئی جھد ءِ مزن نامیں رھشون ءُ مری ٹک ءِ سروک نواب خیر بکش مری ءِ بیرانی ءِ ھپتمی سالروچ برجم دارگ بیتگ، چاگردی رسانکدر کارمرز کنوکیں جھدکاران بلوچ رھشون ءَ پہ مزن نامیں ستاشانی ندر کُتگ۔

ٹی پی بی چاگردی اھوالکار ءِ رد ءَ بلوچ راجی آجوئی جھد ءِ مزن نامیں رھشون، نواب خیر بخش مری ءِ بیرانی ءِ مروچی ھپتمی سالروچ اِنت، نواب خیر بخش مری 10 جون سال 2014 ءَ نادراھی ءِ سوب ءَ کراچی ءِ ھسپتال ءَ بیران بیتگ اَت۔

بلوچ رھشون نواب خیر بکش مری ءِ جون آئی ءِ لوٹوک ءُ دوزواھاں شال شھیدانی مانشجاہ ءَ کَل ءُ کسارات کرتگ۔ بلوچستان سیاست ءُ چاگرد ءِ سرءَ مزنیں اسر ءِ داروک نواب خیر بکش مری بلوچ راجی آجوئی ءِ جھد ءِ مستریں رھشون زانگ بیتگ۔

نواب مری ءِ نزیکیں مردمانی ردءَ نواب مری جنزوکیں جھد ءِ بُن ھشت ایرکنوکیں رھشون ءِ ھساب ءَ گیر آرگ بیت۔ مروچی نواب مری ءِ سرکل حق توار ءَ چہ در کپتگیں ورناہ ءُ کماش بلوچ راجی جھد ءِ جتائیں پِڑاں رھشونی ءُ کمانداری کنگ ءَ اَنت۔

چاگردی رسانکدرءَ ھم بلوچ رھشون ءَ ستاشانی ندر کنگ بیتگ، بلوچ جھدکارانی مزنیں کساسے ءَ بلوچ رھشون ءِ کوھنیں ترانانی تامر بند شنگ کنگ بیتگ اَنت۔

اِشی ءَ ھوار بازیں مردماں وتی مارشت ھم پہ نواب مری ءَ ندر کُتگ اَنت ءُ سھریں دروت ندر کُتگ اِش۔

نبشتانک: زھنی گلامی ءُ مئے چاگرد

نبشتہ کار: ھاتر اسلم

دی بلوچستان پوسٹ

مئے چاگرد یک انچیں چاگردے کہ اِد ءَ ھر یکے دومی ءِ رَندگیری ءَ کنت ءُ آئی زھن ءِ سر ءَ کار کنت.گلامی ءِ مستریں نشانی ھمیش اِنت کہ آ “زھنی گلامی” ءِ نام ءَ زانگ بیت آ راج کہ زھنی گلامی ءِ آماچ بوت گڑا آ سَتَر جَنگ ءُ چوپ بہ کنت پہ آجوئی ءَ آ وتی منزل ءَ سر بیت کُت نہ کنت ءُ پد ءَ ھمے زھنی گلامی مئے چاگرد ءَ سَک باز ودّان اِنت-

اِشی ءِ سَبب دو بوت کن اَنت:
یَکے، چاگرد ءَ زَانت ءُ زَانگ ءِ کَمی بہ بیت.دومی، چاگرد ءِ واننداہ ءُ زانتکارانی ھاموشی ءَ گوں نِندگ ءُ ھچ نہ گْوشگ بوت کنت. منی ھیال ءَ اَنّیگیں دَور ءَ مئے چاگرد ءَ وانندَگیں مردمانی ھم انچو کمی نہ اِنت کہ آ شَریں راھے سُوج دات کُرت مہ کن اَنت.یک ھستی ءِ گْوش اِیت، “چاگرد پہ نَزانَتکارانی بَدکاری ءَ برباد نہ بیت چاگرد برباد بیت پہ زانتکارانی ھچ نہ کنگ ءُ ھوشکیں نِندگ ءَ” اگاں مارا زانتکاریں راھبر ھست، گڑا پرچا مئے چاگرد پدَمنتگ ءُ زھنی گلامی ءِ آماچ اِنت؟ اِشی ءِ پَسّہ اے بوت کنت،انفرادی سوچ ءِ دارگ ءُ زانتکارانی ھوشکیں نندگ اِنت-

اِدے زانتکار ءُ زانوک ھم زان اَنت کہ مھلوک بَدیں راھاں سَپر کنگ ءَ اِنت بلے انگت ھچ نہ گْوش اَنت. پرچا کہ اے راہ ءِ سَپر ءَ سک باز کُربانی دیگ لوٹ اِیت بزان مھلوک ءَ شَریں دَرس دیگ ءُ نیکیں راہ ءِ آرگ ءَ شپ ءُ روچ بے واب بوگ لوٹ اِیت، چہ وتی کھول ءَ گِستَا ءُ چہ وتی جِند ءِ ھنکین ءَ دُور رَوَگ ھم لوٹ اِیت دانکہ راج آسرات بہ بیت. بلے مئے مرچیگیں زانتکار ءُ ادیب اے کار ءِ کنگ ءَ تُرس اَنت آ لوٹ اَنت وتی دو روچی زندگی ءَ گوں وتی کھول ءِ مردُماں ھوار بہ گوازین اَنت-

دومی گپ، اے نیکیں راہ ءِ مُساپِری مَرگ ءِ ھمسَپَری اِنت تو کُجَام بی وھد ءَ کُشگ ءُ دُور دیگ بہ ئے یا گار ءُ بیگواہ کنگ بہ ئے. پرچا کہ راج ءِ چَمانی پَچ کنگ ءُ راستی ءِ دیم ءَ آرَگ ءَ زورگریں دُژمن ھچبر وش نہ بیت آ زوت تئی نام ءُ نِشان ءَ بیگواہ کنت پَمیشکا مئے مروچیگیں واننداہ اے راہ ءِ مُساپِری ءَ تُرس اَنت-

مئے راجدپتَر ءَ لھتیں انچیں بامَرد ءِ نام نمیران اِنت کہ آیاں وتی جِند ءِ جان ءُ وتی کھول ءِ پَرواہ نہ کُرتگ بس وتی راج ءِ لاچاری ءُ بیوسی چار اِتگ.آیاں ھمے لوٹ اِتگ کہ راج چَہ اے پَدمَنتگی ءُ زھنی گلامی ءَ دَر بئیت ءُ یکے شَریں زندے ءِ واھند بہ بیت چو یدگہ راجانی وڑا-

چَہ آیاں یکے میر گُل ھان نسیر بوتگ وتی جند ءِ جان ئِے نہ چار اِتگ ءُ راج ءَ پہ شپ ءُ روچ کُربَانی داتگ ئے واجہ ھمے جُھد ءِ سَبب ءَ ھپت ماہ ءُ چیزے روچ زِندانی بوتگ بلے اے جھد ءِ اوشت ءِ آماچ نہ کُرتگ داں وتی گُڈی ساہ ءَ. دگہ یکے، پُروپیسَر شھید سباہ دشتیاری بوتگ کہ ھرچ لوگ لوگ ءَ شُتگ ءُ ورناھاں دَرس داتگ کہ آ چَہ زھنی گلامی ءَ دَر بیا اَنت. ھمے جھد آسر نہ بیت لھتیں وھد ءَ پد بے رھمی واجہ جَنک ءُ دَور دیگ بیت-

اے جھد ءَ دگہ سَک باز بامرد ھوار بوتگ. لھتیں کُشگ ءُ دَور دیگ بوتگ ءُ لھتیں داں انگت گار ءُ بیگواہ اِنت-

اے کاروان ءِ ھواریں بَاسک: ڈاکٹر دین جان بلوچ، چیئرمین زاھد بلوچ، زاکر مجید بلوچ ءُ دگہ بازیں جھدکار داں روچ ء مروچی زندانی اَنت اے ھما بامرد ءُ شیریں بلوچ بوتگ اَنت کہ لوگ پہ لوگ گَشّتَگ ءُ زھنی گلامی ءِ دَرس داتگ-

من ءَ زاھد بلوچ ءِ یک گپے انگت یات اِنت. سنگت جاگھے ءَ گْوش اِیت” من وتی راج ءَ گوں دستبندی کن آں کہ آ گیش ءَ چہ گیش کتاب بہ وان ایت پرچا کہ کتاب آیانی چماں پچ کن اَنت ءُ یک نُوکیں زندے ءِ دَرس ءَ دے اَنت” –

من اِد ءَ زاھد بلوچ ءَ گوں 100٪ تپاک آں.آ راج چہ وانگ ءُ زانگ ءَ دُور بوت، گوں ک‍ِتاب ءَ بے مھر بوت گڑا بِزان پہ آئی ءَ ھچ پَشت نہ کَپتّگ ءُ آ زھنی گلامی ءِ راہ ءَ سَپر کنّان اِنت-

اے دَرس ءَ کتاب دے اَنت کہ تو وتی جند ءِ زھن ءَ کارمرز بہ کن. پرچا کہ انچیں مردم ماں چاگرداں ھست کہ آ وت ھچ جھد نہ کن اَنت پد ءَ دومی ءِ زھن ءَ ودگڑیں گَپّاں پُر کن اَنت کہ جھد گران اِنت ءَ گوں تو اے کار کنگ نہ بیت-

اگاں داں مَروچی ءَ زاھد جان ءِ وڑیں سنگت گوما ھمسَپر بوتیں، گڑا مئے راج ءَ کَسی ھجَت نہ بوتگ اَت بزان داں اے وھد ءَ مئے چاگرد ءَ سَک باز دیمروئی کُرتگ اَت ءُ وت ءَ ماں دنیا ءَ نامینتگ اَت.پرچا کہ زاھد جان گوں وتی ھمراھاں شپ ءُ روچ ھمے جھد ءِ تہ ءَ اَت کہ وتی راج ءَ چہ زھنی گلامی ءَ چون بہ رَکیں آں؟-

اے وَ راستی یے کہ دژمن ءَ ھک ءِ گَپ بیھ دوست نہ بیت زاھد جان ءَ وتی دپ بند نہ کُرت ءُ مدام ھکیں گپ جَت چو یدگہ بلوچانی وڑا زورگریں دژمن ءَ جھدکاریں زاھد ھم آوار جَت داں کہ بلوچ راج گیشتر زھنی گلامی ءِ آس ءَ بہ سوچ اِیت-

دُژمن ءَ ھم باج بورت! ھمایں کہ زاھد جان ءِ وڑیں راج دوست بیگواہ کنگ بوتگ اَنت ، مئے چاگرد زھنی گلامی ءِ آس ءَ سوچان اِنت-

گُڈ سر ءَ ، گوں راج ءِ زانتکار ءُ وانندَگیں مردماں دستبندی کن آں کہ کوم ءَ کتاب ءِ مھر ءُ نَد ءِ ارزشت ءِ دَرس ءَ بہ دے اِت داں کہ مئے چاگرد چہ زھنی گلامی ءَ دُور بہ بیت-

اُمیت اِنت کہ ھر زانتکار ءِ نَد پہ لاچاریں راج ءِ دیمراوئی ءِ واستا کارمرز بیت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: اے جنگ ورنایاں وتی کوپگاں زرتگ

نبشتہ کار: رئیس توکلی

دی بلوچستان پوسٹ

ماتی مروچی من تئی میان ءَ ساڑی نہ اَنت بلے ھما مات ءِ پھریزگ ءَ اوشتوکاں کہ آ منی تئی ءُ بلکیں تئی مات ءِ ھم مات اِنت ما درست گلزمین ءِ وامداریں بس دُوا کن کہ دژمن ءِ دیم ءَ سر ءَ جھل مکن ات اے ھما نمدی اِنت کہ دلجان ءَ پہ وتی مکھیں مات ءَ نبشتہ کرتگ ات پد ءَ آئی ءَ کسہ ءُ یاتانی لڑے گون ات کسہ آرگ ءَ ات وتی ھما سنگتانی بامردی ءِ کسھاں آرگ ءَ ات کہ گوں آیاں بازیں یات ءُ ترانگ بندوک ات انت ”ھک نواز” ھئی”امیرجان”گزین”مکبول”ارپان” مکتیار” وھید مھترم”شیرا”اے کل ھما بامرد اِتاں کہ آئی ءِ یاتانی تہ ءَ پیوست ات انت آئی کسھانی براہ اِت انت –

سرگنوکیں آشکے ات پہ زمین ءَ زمین دلبند ءَ مکیں کوہ ءُ گٹ تلاراں گوں آئی ءَ اِشک ات زمین ءِ اشک ءَ انچوں آ وتی امبازاں زرتگ اَت کہ ورنائی ءِ تیوگیں واھشت ءُ وشی درست پہ وتن ببا داتگ ات انت ءُ پہ زمین سرجنان ات وھدے آئی ءَ وتی ھلک ءُ میتگانی ورناہ دیست انت کہ چہ وتی زمین ءَ پراموش ءُ ایمن انت وتی ورنائی ءِ واھشت ءُ تچ ءُ تاگ پکنک ءُ گوازی آں گوں وھد ءَ گوازینگ ءَ انت راجی جنگ ءَ گستہ ءَ انت مات ءُ گہارانی چماں چہ درتگیں ارساں ءُ گاریں بیگواہیں بچ کوہ ءُ جنگلانی تہ ءَ دور داتگیں لاشاں چہ بے سما انت-

آ ھمے جیڑان ات کہ اے ھما زہری اِنت کہ یک وھدے بلوچستان ءِ آجوئی ءِ جنگی بنجلے بیتگ ؟ ءُ مرچی ھمے زہری ءِ ورناہ چہ وتی زمین ءُ جنگ ءَ چہ نا آشناہ انت میر ءُ سردارانی وشنودی ءُ اِشک ءُ آشکی آں گوں وھد ءَ گوازینگ ءَ انت آ مدام زہری ءُ بلوچستان ءِ ورنایاں ھمے گُشگ لوٹگ ءَ ات “بش متورے مش مریرے”آ ورنایاں جنزگ سکین ءَ دیگ ءَ ات ھمے باور کنائینگ ات کہ “جھ بجن بے ساری ءُ بے زانتی ءَ شہمات کن” اگاں مروچی شما پاد نہ یتکے پہ گلامی سانکلانی سِندگ ءِ جہد نہ کت گڑا بزان اِت وھد دنزانی تہ ءَ شمئے نشان ھم نہ مان انت وھد لوٹ اِنت کہ بلوچ ورنایاں وتی تہ ءَ جزبہِ مزاھمت ودی کن اِت گوں زانت ءُ سما جنگ بھر بہ بئے اے جنگ ءَ دیم بر ات تاں ھما وھد ءَ ورنایاں جنزگ ءِ سکین ءَ دیگ ءَ ات کہ گوں وتی گڈی تیر ءَ پہ زمین نمیران بوت زہری ءُ بلوچستان ءِ ورنایاں پہ گلامیں زمین ءِ آجوئی جنگ ءِ چیدگ جوڑ بیت آئی پگر ءُ جزبگ گوں زمین ءَ بُرتگیں پند زہری بلوچستان دمکانی تہ ءَ چوں رژن ءَ تالان بواں بوت انت پہ ورنایاں جنگی جزبگ ءُ زمین ءَ گوں مھر بکشان ات انت آئی ءَ چہ پد آئی توپگ جھل ءَ نہ کپت ورنایاں آئی مھکمیں پگر وتی امبازاں زرت ءُ ھما کِشکاں پَند ءَ ساڑی بوت اَنت کہ آئی ءَ پہ ھمے ورنایانی آؤکیں باندات ءُ زمین ءِ آجوئی ءَ پہ در چِتگ ات-

زہری ءِ دمکانی تہ ءَ رستگیں ورناہ چوں شھویز جان ءُ آپتاب جان ءَ بولان ءِ گٹانی تہ ءَ سرجنان ات انت پہ زمین مڑان اِتاں تاں گڈی تیر ءَ پہ جوریں بداں آس ءُ جل بیتاں مروچی من سدکاں کہ دلجان وتی زہری ءِ شھیدیں سرانی وش اتک ءَ گوں پُرمھریں بچکنداں ساڑی بوتگ دروت کرتگاں دلجان پہ مڑایے وتی سر ءَ برز کنت ءُ گش ایت زہری ورنایاں اے جنگ وتی باندات ءِ مانزمان زانتگ ءُ جنگ ءِ بھر بوتگ انت آ زانت کہ نی میر ءُ سردارانی کسہ آسر اِنت نی بلوچ ورنایاں وتی راہ گچین کتگ نو کس اے ورنایاں پہ لب ءُ لالچ ریپینت نہ کنت نی اے جنگ ورنایاں وتی کوپگاں زرتگ پہ ڈیھ ءِ آجوئی ءَ اےجنگ تاں آجوئی ءَ روان کنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔