TBP Balochi

سربوتگیں ھالانی رِد ءَ سِند ءِ مزن شھر کراچی ءَ چیریں ادارھانی کارمنداں شپ ءِ نیم ءَ لوگ ءَ بیڑ برتگ ءُ یک مردم ءِ زورانسری آوار جتگ ءُ بیگواہ کتگ –

آئی ءِ کھول ءِ مردماں وتی شنگ کرتگیں تامر ءِ تہ ءَ اے گپ راست کُتگ گوشتگ کہ شپ ءِ وھد ءَ پوج ءَ بیڑ برتگ ءُ چُک ءُ زالبول لٹ شاپ کتگ انت لوگ ءِ تہ ءَ موبائیل ءُ دگہ گران نھادیں سامان گوں وت برتگ انت ءُ یک مردمے آوار جتگ ءُ بیگواہ کتگ –

زورانسری آوار جنگ بوتگیں مردم ءِ پجار یاسر نام ءَ چہ بوتگ کہ کراچی ءَ مواچھ گوٹ ءِ جھمنند انت –

آئی ءِ کھول ءِ رِد ءَ پوج ءِ کارمنداں لس مردمی گُد گور ءَ بیتگ ءُ شپ ءِ نیم ءَ آھاں دیوال ءِ سر ءَ دور کُتگ لوگ ءِ تہ ءَ پُترتگ انت ءُ وپتگیں چُک ءُ زالبول لٹ شاپ کرتگ انت ءُ یاسر زورانسری آوار جتگ ءُ گوں وت برتگ –

زورانسری آوار جنگ بوتگیں یاسر ءِ مات ءِ رِد ءَ اشی ءَ پیش منی دومی چُک ھم پوج ءَ آوار جتگ گوں وت برتگ زندانانی تہ ءَ سک باز لٹ شاپ کتگ ءُ پد ءَ رند ءَ یل داتگ یل بوگ ءَ پد آئی ءَ وتی ٹپانی درد نہ سگتگ ءُ بیران بوتگ –

آئی ءَ سر وزیر سندھ ءُ دگہ اگدی داراں چہ لوٹ کتگ ءُ گوشتگ یاسر یل کنگ بہ بیت اگاں ناں ترندیں زھرشانی ءِ راہ ءَ گچین کنگ بنت –

نبشتانک: راجی دیمروئی ءِ مستریں سَوب تپاکی اِنت

نبشتہ کار : نئیم مؔومن 

دی بلوچستان پوسٹ

یک کسان سالیں بچکے  مُدام گوں وتی رمگ ءَ دزگٹ ات، سُھب ءَ مھَلہ آ پَس ءُ بُزاں زور اِیت دیم پہ جنگل ءَ چارینگ ءَ بارت ءُ دیگر ءَ واتر لوگ ءَ کیت آئی زندمان ھمے پیم ءَ گْوزان اَت چدو گیش آئی ءِ زند ءَ ھچ مول ءُ مراد نیست اَت وتی زند ءَ دائم دگرانی وازمندگ اَت ءُ پہ شپ ءُ روچ ءِ نان ءَ شدویگ اَت آئی  تیوگیں روچ ءِ ورگ یک ھشکیں نگنے اَت کہ سھب ءَ مھلہ وتی چادر ءِ لَمب ءَ بست ءُ شُت وتی رمگ ءِ چارینگ ءَ ، وتی روچ گوں یکیں نگن ءَ گْوازینت ئِے ۔ آئی دل ءَ لوٹ اِت کہ وشیں ورگ بور آں بلے وشیں ورگ  آئی ءِ دَزرس ءَ نہ اَت پرچاکہ دگرانی شِپانک اَت ءُ دگرانی کُوھنیں پوشاک ئِے پوش اِت اَنت  یک گُلامے اَت آ کَسان بوتگ گُڑا پِت ئِے وپات کتگ اَت ءُ مات ءَ مُدام دگرانی لوگ ءِ چلوتگ کُت اَنت پہ وتی سُبارگ ءُ شام ءِ واست ءَ ، یک جنوزامے ات ھمک روچ کہ اے کسان سال وتی رمگ ءِ چارینگ ءَ رپت گُڑا آئی کَسانیں زھگ پہ اسکول ءَ وانگ ءَ روگ ءَ دیست اَنت دل ئِے مان بوت بلے دست ئِے نہ رس اِت پرچاکہ آئی وانگ ءِ اُمر گْوستگ اَت ءُ بزگی ءِ سَوب ءَ آئی دیم وانت نہ کُتگ ۔ ایشی ءَ را ھَلک ءِ زھگاں ھر وھد ءَ شْوانگ ءِ نام ءَ توار جَت پرچاکہ شْوانگی ءَ ابید آئی واست ءَ ھچ راہ نیست اِت کہ وتی زند ءَ بِہ گُوازین اِیت ھر وھد ءَ تھنا نشت گُڑا ھمے جیڑ اِت ئِےکہ “اے منی وانگ ءُ زانگ ءِ  اُمر اِنت من پرچا دگرانی شوانگ آں ءُ ھُداوند ءَ چو زوت چی ءَ منی پِت چَہ منی دست ءَ پَچ گپت ءُ من ءَ دولتمندانی گُلام ئِے  جوڑ کُت ” آئی ءَ را گوں ھُداوند ءَ بازیں گِلگ ھست اَت بلے کس ءَ آئی ءِ درد نہ مار اِت اَنت۔

یک روچے جنگل ءَ ابیتکیں جاھے ءَ  تھنا نشت ءُ جیڑگ ءَ لَگ اِت “ھُدا ھما مردم ءَ را دنت کہ پیسر ءَ امیر اِنت ؟، منی ءُ دولت مندیں مردمانی میان ءَ پرک چے اِنت ؟ ، ھُدا گریب ءَ چی ءَ ڈالچار کنت ؟ ، اگاں ھُدا رھمانے گُڑا ایردست ءِ سر ءَ زُلم چی ءَ کنت؟ دانکہ دیراں ھمد ءَ نشت ءُ وتی دل ءِ درد ارسانی ھساب ءَ تالاں کت اَنت ءُ ھمے زند ءِ جیڑھانی تہ ءَ گار بوت وھدیکہ چہ وتی ھیالاں درآتک دیست ئِے کہ روچ جھل کپتگ گُڑا آئی وتی رمگ زُرت دیم پہ لوگ ءَ واتر بوت بلے لوگ ءَ روت چے کنت اود ءَ مات ءَ گند اِیت گوں گمیگیں چماں گندتر دلپْروش بیت ءُ اگاں نہ روت ھم مات وداریگ اِنت پہ زھگ ءَ گُڑا ایشی وتی زرد ءِ گم گوں بچکنداں بدل کت اَنت ءُ لوگ ءَ شُت دانکہ مات ءِ دل وش بہ بیت-

آ گس ءَ رس اِت ، مات ءَ جُست کت “بابا تو چی ءَ دیر کتگ؟ مرچی نگن نیست ، من واجہ ءِ لوگ ءَ شُت آں بلے واجہ ءِ مولد ءَ من ءَ آرت نہ دات کہ پہ تو نان بہ کن آں ءُ تو برو پلانی دکان ءَ چیزے وڑ کن ءُ بیار زھگ ءَ پَسو دات “اماں پلانی من ءَ چیز نہ دنت ءُ آئی ءَ پیسر ءَ من ءَ کم شَرپ کُت ءُ گْوشت ئِے جنوزام ءِ چُک تو ھر وھد ءَ چیز زور ئے پد ءَ کلدار نہ دے ئے ، من نہ رو آں مرچی من چہ واجہ ءَ وتی پَگار لوٹ اِت بلے من ءَ کس ءَ نہ دات ، من مرچی ءَ رَند رمگ ءَ نہ چارین آں مات ءَ گْوشت “اگاں نہ چارین ئے گُڑا مارا وتی میتگ ءَ نندگ ءَ نیل اَنت بس ھچ مہ گْوش ءُ بہ نند” چُک ءَ درائینت “اماں داں چنچو وھد ءَ من بےتوار بہ باں منی ھک اِنت اَلم وتی ھک ءَ گِر آں پرچاکہ ھک ءِ واست ءَ بےتوار بُوّگ نہ لوٹ اِیت مات ءَ کڈن کُت “اگاں تو سرکَشی بہ کن ئے ، اے میر ءُ متبر تَر ءَ چَہ زند ءَ بےمراد کن اَنت من پیسر ءَ جنوزام آں اگاں ترا وھیلے بہ گپت گُڑا من کئی اُمیت ءَ زندگ بہ آں” زھگ ءَ گْوشت “اماں تو وت ءَ گمیگ مہ کن ، من ءَ کُول اِنت کہ ترا دوبر اے دیار ءِ واھُند کن آں اے متبرانی زھگ تئی مَڈیانی چمدار بنت ءُ ترا چَہ دگرانی گُلامی ءَ رَکین آں اگاں من مِرآں بلے دگرے منی کَبر ءَ پِٹ ءُ نالت نہ کنت کہ زھگ ءَ پہ وتی مات ءَ ھچ نہ کُت” داں دیر ءَ چُک ءُ مات ءَ وتی بےوسی ءِ سر ءَ گپ ءُ تران کُت، مات ءَ گْوشت “منی چُک ایردست ءِ ھون ءَ را ھچ بستار نیست ءُ وتی وھد ءَ ھمُک کار گیش ءُ گیوار بیت بلے وت ءَ پھریز کن پرچاکہ تئی زندگ بُوّگ اَلمی اِنت، تو سرپد ئے تئی پِت اے ھَلک ءِ مستِر بوتگ ءُ اے دْراھیں مردم تئی پت ءِ وازمندگ بوتگ اَنت بلے مرچی تو آیانی شْوانگے ئے-

ھمے وڑ ءَ چُک ءُ مات ءِ اے شُپ گوں شُد ءَ گْوست ءُ سُھب ءَ بچک ءَ پد ءَ ھلک ءِ رمگ زُرت انت دیم پہ جنگل ءَ شُت وھدے جنگل ءَ سر بوت داں دیست ئِے کہ یک کماشیں مردے جنگل ءَ نشتگ ءُ وتی مالانی دیمپان اِنت، گُڑا اے بچک ءَ جُست گپت واجہ تو اد ءَ چے کن ئے؟ اے جنگل ءَ ھچ چَراگ نیست تئی مال اد ءَ چے ور اَنت ؟ کماش ءَ دْرائینت “ابا سبزیں ڈگار واجھاں وتی دست ءِ چیر ءَ کُتگ اَنت ءُ مارا اے ھشکیں جنگل ءَ موکل بہ دے اَنت ھم باز اِنت، ما ایردست ایں اے متبراں گوں ھمکوپگی چہ مئے وس ءَ ڈن اِنت اگاں ما نام ءَ اِش بہ گِر ایں مئے جند ءَ کُش اَنت گُڑا گھتر اِنت کہ ما بےتوار بِہ بَہ ایں ، دوئمی زانت ءُ سرپدی یے مارا نیست کہ وتی ارزیا دگہ شَرّیں مردمے ءَ بہ دے ایں اگاں ما سَرکشّی بہ کن ایں مارا ھم تئی آرپیں پِت ءِ وڑ ءَ کُش اِیت پد ءَ کَس مئے جُست ءَ ھم نہ گپت اے شْوانگ اَجِکّہ بوت ءُ گْوش اِیت کماش منی پِت زاناں کَے کُشتگ؟ کماش ءَ دْرائینت ” ابا بیا اد ءَ بہ نند ترا دْرستیں ھالاں دے آں ، منی چُک تئی پِت ھمے زالماں کُشتگ پرچاکہ تئی پِت ءَ اے نُکس وتی ھَلک ءَ جاگہ داتگ اَنت ءُ پد ءَ ایشان مَستری بِنا کُتگ گُڑا تئی پِت ءَ ھمے گْوشتگ کہ شما منی ھمساھگ اِت شمارا وتواجھی ءِ موکل نیست بس ھمساھگ ءِ وڑ ءَ بہ نند اِت گُڑا اے یزیداں تئی پَت پہ بےدردی جَتگ ءُ نوں اے ڈگار ءِ واجہ اَنت-

زھگ ءَ گْوشت گُڑا منی مات ءَ من ءَ اے ھبر ھال نہ داتگ پہ چی ءَ ؟ کماش پسَو دات “بلکیں تئی مات تُرس اِیت کہ اگاں تو ھبرے بہ کن ئے اے ترا ھم پِت ءِ وڑ ءَ جَن اَنت پمیشکا! بلے انگت وھد ھست ءُ کارا ءَ پہ ھوش ءُ دماگ بہ کن ءُ وتی جند ءَ بہ پھریز منی چُک-

پیسر ءَ وتی راج ءَ تَسلہ بہ دے ءُ یکجاہ کن پرچاکہ ” یکیں ءِ پَتر ءَ گُوات بارت ” ایوک ءَ تو ھچ کُت نہ کن ئے ءُ راج ءِ ھمُک بَزگ ءُ بےوس ءَ وتی ھمکوپگ بہ کن دانکہ سکّی ءَ تئی ھمراہ بہ بنت وتی مکھیں مات ءِ پنتاں اَلم بُزور، گوں راج ءَ تپاکی بہ کن ، پرچاکہ تپاکی دیمروئی ءِ مستریں راز اِنت کہ مردم ءَ ھمدل ءُ ھمکوپگ کنت ءُ منی گپ ءَ بزور اے میر متبرانی پُشت ءَ مہ کپ بلکیں وتی ھمے دِرتہ پُچیں لاچاراں ءَ بچن ءُ یکجاہ کن کہ ھمُک گَم ءُ وشیاں تئی ھمراہ اَنت-

گُڑا ورنا بازیں جیڑھانی تہ ءَ داں ساھتے ءَ بےتوار بوت ءُ بیگاہ ءِ وھد ءَ وتی مال ئِے زُرت اَنت واتر لوگ ءَ شُت ھمنچو کہ لوگ ءَ سر بوت گوں دَمبرتگیں پاداں وتی مات ءَ را جُست ئِے گپت کہ “اماں، مرچی پلانی گوں من ءَ اے وڑیں کسّھے کُتگ ءُ گْوشت ئِے کہ تئی پِت دژمناں ناھک ءَ جَتگ ؟ راج ءَ یکجاہ بہ کن ءُ وتی پِت ءِ بیران بِگر ، اے ھبر راست اِنت-

بلے من اے راج ءَ چتور یکجاہ بہ کن آں ؟مات ءَ گوں ارسیگیں چماں درائینت “ابا اگاں تو یکے ءِ گَم ءَ شریدار بہ ئے آ باندا پہ تو ھم میاریگ بنت ھر کُجا کہ گریب ءُ لاچارانی جنگ ءُ جیڑہ بنت تو گوں آیاں سْیادی بہ کن ءُ آیانی جیڑھانی ھلاس کنگ ءِ جْھد ءَ بہ کن دانکہ وت ماں وتی ءِ جَنگ ھلاس بہ بنت ایشی مول ءُ مراد ایش اِنت تو آیانی مستر بہ ئے بلے آیاں پہ وتی پائدگ ءِ واست ءَ کارمرز مہ کن ، بلکیں پہ دْراھیں راج ءِ پائدگ ءَ بہ جیڑ ءُ تئی جْھد ءِ مول ءُ مراد وتی ڈیھ ءِ تہ ءَ وتواجھی ءِ بہ بیت تو آیاں ھمے پَنت ءَ بہ دے کہ مارا نوں میر ءُ متبرانی ایردست بُوّگی نہ اِنت ، اے دیار مئیگ اِنت ءُ ما ایشی ءِ واجھیں گوں وھد ءِ ھواری ءَ اے بچک مزن بوت ءُ پہ وتی راج ءِ بزگی ءُ لاچاری ءَ جیڑگ ئِے بندات کُت ءُ راج ءِ ھمک بزگر ءُ شْوانگاں ءَ وتواجھی ءِ سکین ئِے دات ءُ ھمے وڑ ءَ راج ایشی پَنتانی منّوگر بوت ، اے درگت ءَ جْھد اِش بندات کُت ءُ ھمک ھَلک ءُ میتگاں اے گَپ تالان بوان اَت ، دْراہ مردم گوں وت ءَ تپاک ءُ ھمراز بوان ات اَنت ۔ راج ءِ ھمک زھگ ، زالبول ، ورنا ءُ کماشاں اے گامگیج بِنا کُت پہ وشھالیں زند ءِ گْوازینگ ءِ ھاتر ءَ گُڑا یک روچے یک کماشے ءَ اے ورناہ ءَ را جُست گپت ، ما دْرست گریب ایں ءُ مارا جنگ ءُ جیڑھے گنجائش نیست ءُ سِنگ ءُ سر میڑینگ چتور بیت ؟؟ ورنا ءَ بچکند اِت پسو دات واجہ اے گپ راست اِنت کہ آ زوراک انت ءُ یک ڈڈّیں سِنگے ، بلے اے  بنجائی سِنگے نہ اِنت ، اے سِنگ مئے سر ءَ آرگ بوتگ ءُ اے سِنگ ءِ دُور  گِران نہ اِنت اگاں ما جْھد بہ کن یں اگاں ما سِنگ ءَ پْروشت نہ کن ایں بلے اَچ وتی سر ءَ دُور کُت ئِے کن ایں ءُ دوئمی گپ ایش اِنت کہ اے سِنگ ءِ دور کنگ ءِ ھاتر ءَ مارا بازیں سر کُربان کنگی اَنت ءُ کُربانی دیگ ءِ واست ءَ مارا یکمُشت بُوّگی اِنت گُڑا ما وتی منزل ءَ سر بہ ایں-

یک زانتکاریں مردے دیوان ءَ نشتگ اَت گڑا  دْرائیت ئِے “ورنا جْھد ءِ برجم دارگ ءِ واست ءَ زندگ بُوّگ ھژدری اِنت، ھمنچو جْھد تو وتی زند ءَ کُت کن ئے بلکیں تئی مرگ ءَ پد آدگہ مردم کُت نہ کن اَنت ھمے واست ءَ من گْوش آں کہ اے جُھد ءَ گوں ھوار وتی جند ءَ بہ پھریز  دانکہ تئی مرگ ءَ پد مردم دلپْروش مہ بنت ءُ وتی جُھد ءَ یل مہ کن اَنت  ھمے کار اَلمی اِنت ۔ تو کوھنیں راجدپتراں بہ چار ھما کار کہ راجی سَروکاں کُتگ اَنت بلکیں پُشت ءِ مردم آ پیم کُت نہ کن اَنت”گوں اے گپاں کماش باز گَل بوت گْوشت ئِے “ابا  اگاں ما ھمے وڑ ءَ جْھد ءَ برجم بدار ایں گُڑا ھُدا بہ کنت ما زوت وتواجھیں راجے جوڑ  بہ ایں-

کم کم ءَ راج ءِ ھمک ورنا ءُ کماشانی دل ءِ توک ءَ وتواجھی ءِ لوٹ وَدّان بوت ءُ آیاں وَتواھی ءِ جیڑہ چَہ دل ءَ در کُت ءُ دائم وتی ایردستی ءِ بابت ءَ جیڑگ ءَ ات اَنت۔ ھرچ مردم ءِ لوٹ ھمیش اَت کہ ما چَہ ایردستیں زندمان ءَ زوت جُتا بہ بہ ایں ءُ وتی ڈیھ ءِ تہ ءَ یک مھکمیں راجے جوڑ بہ بہ ایں-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ پنجگور ءَ پاکستانی پوج ءَ یک مردمے دزگیر کنگ ءَ پد پھمیانیں جاھے ءَ برتگ –

گیشیں ھالانی رد ءَ گوستگیں شپ ءَ پاکستانی پوج ءَ پنجگور ءِ دمگ گرمکان ءَ یک دگہ مردمے دزگیر کنگ ءَ پد بیگواہ کرتگ کہ آئی ءِ پجار فھیم ء شاجی حلیم ءِ نام ءَ زانگ بیتگ –

گار کنگ بیتگیں ورناہ گوستگیں روچ ءَ پنجگور ءِ شھر ءَ گاڑی ءَ سواریں سلاہ بندیں مردماں آوار جنگ ءَ پد بیگواہ کرتگ –

دمگی مردمانی رد ءَ آوار جنوکانی سیادی ریاستی چیریں ادارہ ءُ ڈیتھ اسکواڈ ءَ اِنت –

بلوچ سیاسی ءُ چاگردی مردمانی گوشگ اِنت بلوچستان ءَ ریاستی لشکر ءِ چیردستی ءَ سلاہ بند جوڑینگ بیتگ کہ آئی ءَ لس پجاری نان ڈیتھ اسکواڈ گوشگ بیت اِنت –

راجدوستیں تکانی گوشگ اِنت کہ پوج ءَ اے ٹولی آجوئی ءِ زرمبشت ءِ ھلاس کنگ ءَ جوڑ کرتگ ءُ سرجمی ءَ آئی ءَ واک دیگ بیتگ ءُ آ دُزی، آوار جنی ءُ مھلوک ءِ کُشت ءُ کوشاں تچک ءَ ھوار اِنت-

گوستگیں وھداں پنجگور ءَ سِی ءَ گیش مردم کُشگ بیتگ اَنت ءُ دمگ ءِ چاگردی مردمانی گوشگ اِنت کہ مھلوک ءِ کُشت ءُ کوشاں تچک ءَ اے ٹولی ھوار اِنت-

ھمے وڑ چار ءُ پنچ ستمبر ءِ میانی شپ ءَ قمبرانی شال ءَ پوج ءِ دست ءَ بیگواہ بیتگیں منصور قمبرانی، وسیع قمبرانی، داؤد قمبرانء، زبیر قمبرانی؟ عزیز زھری، شکیل سمالانی ءُ شبیر سمالانی یل بیتگ ءُ وتی لوگاں سر بیتگ اَنت –

اے ورناہ آروسی مراگشے ءَ ھوار بیتگ اَنت کہ اود ءَ پوج بازیں کچے ءَ اتکگ ءُ اے ورناہ دزگیر کرتگ ءُ برتگ اَنت ئِے –

بلوچستان لبریشن فرنٹ ءِ جارکش میجر گوھرام بلوچ ءَ کیچ ءِ دمگ گومازی ءَ پاکستانی لشکر ءِ سر ءَ بیتگیں اُرش ءِ زمہ واری منّ اِتگ-

جارکش ءَ رسانکدراں شنگ کرتگیں درشان ءِ تہ ءَ گُشتگ کہ سَے شمبے ءِ بیگاہ ءَ سرمچاراں گومازی ماروار ءَ پوجی چوکی ءِ سر ءَ راکٹ ءُ وتکاریں سلاھانی گون ءَ اُرش کتگ، چریشی ءَ پوج ءَ جانی ءُ مالی تاوانانی دیمپانی کنگ کپتگ –

آئی ءَ گُشتگ کہ اے وڑیں اُرش بلوچستان ءِ آجوئی ءَ داں برجاہ مان اَنت –

بیگواھیں بلوچانی واستا توار چِست کنوکیں ماما قدیر بلوچ ءِ جان ناجوڑ، جتا جتائیں پھناتاں آئی ءِ دراھی ءِ واستا دوا لوٹگ ءَ اَنت-

وی بی ایم پی ءِ چیئرمین نصراللہ بلوچ ءَ ٹی بی پی ءَ گوں گپ کنان ءَ گُشتگ کہ ماما قدیر بلوچ ءِ جان گوستگیں چار روچاں چہ ناجوڑ اِنت، اے وھد ءَ آ ڈاکٹر ءِ گور ءَ برگ بیتگ بلے تنء وھدی آ ھچ نادراہ جاہ ءَ داکل کنگ نہ بیتگ –

نصر اللہ بلوچ ءِ گوشگ اِنت سینگ ءُ گُٹ ءِ درد ءِ سسب ءَ جان درد اِنت ءُ چریشی ءِ سبب ءَ آئی ءَ ورگ ھم باز کم کتگ ھمے وڑ ماما قدیر گوست ءَ بازیں وھدے ءَ شدکشیں ھرتال ءِ سبب ءَ آئی ءِ میدہ گون بیتگ چریشی ءِ سبب ءَ آ وھد وھد ءِ سر ءَ نادراہ جاہ ءَ داکل ھم بیتگ –

ماما قدیر بلوچ یک دھکے ءَ گیش بلوچستان ءَ زورانسری آوار جنگ بیتگیں مردمانی بیگواھی ءِ ھلاپ ءَ توار چِست کنگ ءَ اِنت – آئی ءَ وی بی ایم پی ءِ شال داں کراچی ءُ اسلام آباد ءَ پند ءِ روانک ءِ سروکی کتگ اشاں ابید آئی ءَ دری ڈیھاں ھم انسانی ھکانی واستا برجم کرتگیں نیاداں بھر زرتگ –

شال ءُ کراچی ءِ پریس کلبانی دیم ءَ ھر وھد ءَ بیگواھیں مردمانی یل کنائینگ ءِ واستا شدھرتال ءِ بنجل ءِ رھشونی ءَ کنان ءُ پیداک اِنت – ماما قدیر ءِ دراہ بیگ ءِ واستا جتا جتائیں پگراں بندوکیں مردم زوت وش بیگ ءِ واستا دوا کنگ ءَ اَنت –

پنجگور ءَ گرلز ڈگری کالج ھدابادان ءَ بتکاری، دودمانی ءُ دزکاری چیز نمادار کنگ بیتگ اَنت –
پنجگور ءَ گورنمنٹ گرلز ڈگری کالج ھدابادان ءِ چیردستی ءَ بتکاری ءُ دودمانی ءِ دزکاری ءِ نمادار کنگ ءِ واستا یک مراگشے جوڑینگ بیتگ –

مراگش ءِ بندات پاک تاک ءِ وانگ ءَ بندات بیتگ ءُ چریشی ءَ پد نودربرانی ھمک روچی ئیں جوڑ کرتگیں اکس ءُ بتکاری ءِ بارو ءَ نمادار ءِ درگت ءَ گپ ءُ تران بیتگ اَنت –

دیوان ءِ مراگش ءَ نودربراں بلوچی “دو چاپی، بلوچی سوت ءُ اشی ءَ گیشتر آیاں بلوچ دودمانی کسمانک پیش بیتگ کرتگ اَنت ءُ چریشی ءَ دیوان ءِ اتکگیں مھماناں گچین کتگ اَنت –

مراگش ءِ بنکی بندات سیشن پینٹگز ءُ بلوچی دزکاری ءِ نمادار بیتگ کہ چریشی ءَ نودربراں جوانیں رنگے ءَ وتی وتی ازم پیش کتگ اَنت ءُ نودربراں لوگی کار ءُ دگہ چیزانی سر ءَ ھم وتی وتی ازم پیش کتگ اَنت –

اے وھد ءَ پرنسپل گورنمنٹ گرلز کالج ھدابادان ءِ فرزانہ ھاشم ءَ تران کنان ءَ گُشتگ کہ گرلز کالج ھدابادان اشی ءِ سر ءَ ستک کنگ وانگی تکانی جوان کنگ ءَ نوک نوکیں چیزانی دیم ءَ آرگ ءِ ھواری ءَ جنزان بہ ایں –

آئی ءَ گُشتگ کہ ھنچش آرٹس ءأ سائنس وھد ءِ ھمراھی ءَ نودربرانی گھتری ءِ ھواری ءَ یک نیمگے ءَ سائنس مارا نوکیں دور ءِ نیمگ ءَ کشگ ءِ راہ ءُ رھبندانی واستا سرجم کنت ءُ آرٹس مئے بنکی لیکھاں مھکم ءُ جیڑگ ءَ پرمائیت اِت اِنت –

آئی ءَ گُشتگ کہ مارا مئے چاگرد ءَ گُشگ بیتگ کہ اگاں یک نودربرے ءَ دیم ءَ جنزگی اِنت گڑا آ سائنس ءِ سر ءَ پَٹ ءُ پول بہ کنت بلے تچکیں راستی اے نہ اِنت ایوک ءَ سائنس نہ اِنت انسان ءَ یک سرجمیں مردمے جوڑ کنت بلکیں آرٹ انسان ءَ یک سرجمیں مردمے ءِ نیمگ ءَ برت کنت –

آئی ءَ گُشتگ کہ آرٹ ءِ کش ءُ پھنات دراج اَنت چریشی ءِ سبب ءَ آرٹ ھمک بنکی ابرم ءَ یک نیمگے ءَ جیڑگ پرمائیت اِت اِنت –

آئی ءَ گُشتگ کہ مروچی اے آرٹ ءُ نودربرانی دزکاری یک جوانیں ستاھی ءِ ھواری ءَ استادانی جھد ءِ برورد اَنت ءُ آیاں یک کمیں وھدے ءَ اے کار سرجمی ءِ نیمگ ءَ جنزینتگ اَنت –

گوستگیں روچ ءَ میان اُستمان ءِ کمیٹی آن انفورسڈ ڈساپیئیرنسسز (سی ای ڈی) ءِ بیست ءُ یکّمی نند ءُ نیاد جنیوا ءَ بوتگ،چریشی ءَ کمیٹی ءِ باسک ھوار بوتگ اَنت اشی ءَ چہ اَبید زورانسری آوار جنگ بوتگینانی اسر کپتگیناں ھم آن لائن بھر زرتگ-

ڈیفنس آف ہیومن رائٹس ءِ چیئرپرسن آمنہ مسعود جنجوعہ ءَ نند ءُ نیادی دیوان ءَ بھر زرتگ ءُ پاکستان ءَ زورانسری آوار جنگ بوتگینانی اسر کپتگینانی سروکی کتگ ءُ وتی دومی اسر کپتگینانی کسّہ ءَ گوشدارینتگ اَنت چریشی ءَ کمیٹی ءِ باسک باربرہ ءَ گْوشتگ کہ ما تئی ھمت ءُ جزبگ ءَ داد بکش ءَ ایں ءُ تئی جد ءُ جھد ء سلام پیش کن ایں ءُ تئی ھمت ءُ تاکت ءَ چی بازیں اَسرکپتگیں کھولاں اُمیت ءُ ھمت رس اِیت-

آمنہ مسعود جنجوعہ ءَ کمیٹی ءَ پاکستان ءَ زورانسری آوار جنی ءِ جاور ءُ وئیلاں چہ سرپدی داتگ ءُ سپارشات ھم پیش کتگ اَنت ءُ چریشی ءَ کمیٹی ءِ چیرپرسن ءَ گْوشتگ کہ ما تئی داتگیں سپارشات ءَ شریں نگاھے ءَ چار ایں ءُ ما پاکستان ءَ زورانسری آوار جنی ءَ گر ءُ دار ءَ وتی کرد ءَ پیلو کن ایں-

آمنی مسعود جنجوعہ ءِ گوشتگ سدر پرویز مشرف ءِ وھد ءَ منی لوگ واجہ زورانسری بیگواہ کنگ بوتگ کہ آ پوج ءِ سروک ھم بوتگ – اے زمانگ ءَ زورانسری آوار جنی ءِ بگیر ءَ توار چست کنگ ءَ ھم سکّیانی دیمپان بوتگ اَنت-

آئی ءِ گْوشگ اَت کہ ھما وھد ءَ جد ءُ جھد بندات بوتگ، من پارلیمنٹ گس ءَ ، سپریم کورٹ ءُ سرجمیں ھاسیں جاھاں وتی چک ءُ بیگواھیں مردمانی کھول ءِ ھمراھی ءَ زھرشانی کتگ – ما وتی گل ” ڈیفنس آف ہیومین رائٹس ءِ نام داتگ – بنداتی ءَ زورانسری آوار جنی ناشرکاری ءِ بگیر ءَ جنگ ءِ میان ءَ بوتگ- نائن الیون ءِ پد سرجمیں پاکستان ءَ شھریانی لوگ ءَ بیڑبرتگ ءُ دروگیں میڑ یا ڈرون ءِ سر ءَ مھلوک نشتگ ءُ دور داتگ اَنت ، بیگواہ کنگ بوتگ اَنت ءُ ھمے وڑ امریکہ گور ءَ بھا کتگ اَنت-

آمنہ مسعود جنجوعہ ءَ دیمتر ءَ گْوشتگ کہ من وکیلے نہ بوتگ آں – بلے من مسعود ، فیصل ءُ دانکہ بازیں دگہ بیگواھیں مردمانی کیس سپریم کورٹ ءَ دیم ءَ اوشتوک بوتگ اَنت – اے سالاں ، زورانسری آوار جنگ بوتگینانی 2818 کیس مئے گور ءَ نکش کنگ بوتگ اَنت – مزنی گپ اِش کہ اشانی تہ ءَ 1358 دیم ءَ اَتکگ اَنت وھدیکہ 77 بندیگجاھاں بیران بوتگ اَنت – 2008 ءَ من ءَ ایمنسٹی انٹرنیشنل یورپ ءُ امریکہ ءَ توار “اسپیکنگ ٹور ” سر ءَ لوٹائینتگ-

آئی ءَ گْوشتگ کہ 2014 ءَ ما زورانسری آوار جنی ءِ بگیری ءَ ایشین فیڈریشن اگینسٹ انوالنٹری انفورسڈ ڈساپیئپرنسسز ( AFAD) ھوار کتگ- چریشی ءِ مئے جھد ءُ میان اُستمانی ءَ چہ مئے کار ءُ کرد کُمک کتگ ئِے – 2017 ءَ من جینوا ءَ بیست ءُ ھشتمی پری یو پی آر سیشن ءَ بھر زرتگ ، بیست ڈیھ ءِ اھوالکاراں گوں گند ءُ نند کتگ – اے درگت ءَ 13 ریاستاں پاکستان کنونش ءِ پدر کنگ ءِ سپارش کتگ-

آمنہ مسعود جنجوعہ نند ءُ نیاد ءِ دیوان ءَ گُڈی وتی تران ءِ تہ ءَ گْوشتگ کی ھکومت ءُ کمیٹی آن انفورسڈ ڈساپیئیرنسسز ( سی ای ڈی) ءَ گوں لوٹ کتگ کہ پاکستان ءَ کنونشن ءِ پدر کنگ بہ بیت – اے وڑیں تھاریں سپر ءُ انساپ ھاتر ءَ ساڑی بؤکیں، WGEID ءُ CED وڑیں میان اُستمانی پورمز اسرکپتگ ءُ انسانی ھکّانی پھازگ ءِ ھاتر ءَ یک ھاسیں کردے ءَ زانگ بنت-

بلوچ یکجھتی کمیٹی ءَ رسانکدراں وتی شنگ کرتگیں درشان ءِ تہ ءَ گوشتگ کہ بارکھان ءَ دروگیں ءُ بوگس ڈومیسائلاً چہ دمگی مردمانی ھک جنی ءِ درچ برجاہ انت – بلوچستان ءِ دگہ دمگانی وڑ ءَ بارکھان ءَ ھم بوگس ءُ دروگیں ڈومیسائلاں چہ دمگی مردمانی ھک جنگ بوگ ءُ پنجاپ ءَ چہ اتکگیں مردماں دیگ بوگ ءَ انت چریشی ءَ دمگی مردمانی ھک جنی بوگ ءَ انت – بارکھان ءِ وڑیں پَشکپگیں دمگ ءَ کہ اود ءَ سرکار ءَ مھلوک ءِ روزگار دیگ ءَ گیشتر گامگیج زورگ لوٹ ایت ھمود ءَ پنجاپ ءَ چہ اتکگیں مردماں دروگیں ڈومیسائل دیگ بیت ءُ بزگریں راج نگن ءِ چنڈئے ءَ چمدار کنگ بوگ ءَ انت وھدیکہ بلوچستان ءَ دگہ اُستاناں چہ اتکگیں مردماں دروگیں ڈومیسائل دیگ بیت ءُ آبادکاری ءَ ھم گیش کنگ بوگ ءَ انت کہ پدردی گپ ئے – سرکار ءَ اے وڑینانی بگیری ءَ گامگیج زورگ لوٹ ایت اگاں بلوچستان ءِ تہ ءَ دگہ اُستاناں چہ اتکگیں مردم ھمے وڑ ڈومیسائل دیگ بوت گڑا اشی ءِ بگیری ءَ راجی زرمبشت ءِ بندات ءَ کنیں –

جارکش ءَ گوشت کہ بلوچستان ءَ مھلوک پیسر ءَ چہ روزگار ءَ زبھر انت، ڈیرہ غازی ھان ءَ بگر تاں ایران ءُ افغانستان ءِ سیمسری دمگاں ھر ھمود ءَ کہ بلوچ نشتگ انت آھاں روزگار ءِ جیڑھانی دیمپانی انت چریشی ءَ آ چہ چنڈے نان ءِ چمدار انت سرکار ءَ بائد انت ھنچیں گامگیج ءِ بہ زُرت اِنت کہ مردماں دو وھد ءِ نان بہ رس ایت بلے سرکار گیشتر مھلوک ءَ مالی جیڑھانی دیمپان کنگ ءَ انت کہ بلوچستان ءِ کنڈ کنڈ اے جیڑہ ھست انت – بارکھان ءَ پنجاپ ءِ مردماں دروگیں ڈومیسائل دیگ بارکھان ءِ مردمانی زرکاری ءَ بند کنگ ءِ ھمینچو ایرجنگ بہ بیت کم انت – بارکھان ءِ وڑیں دمگاں کہ اود ءَ مھلوک پیسر ءَ بازیں جیڑہ ءُ جنجالانی اماچ انت اے وڑیں گامگیج زورگ ءَ سرکار آھاں گیشتر جنجالانی آماچ کنگ انت وھدیکہ پنجاپ ءَ چہ اتکگیں مردمانی دروگیں ڈومیسائل دیگ ءِ بگیری ءَ پرایمنیں زھرشانی کنوک ھم بیھار دیگ بوگ ءَ انت اگاں اے زھرشانی کنوکاں چیزے بہ بیت اشی ءِ زمہ دار سرکار انت –

جارکش ءَ گڈسر ءَ زھرشانی کنوکیں مردمانی بیھار دیگ ءِ درگت ءَ وتی درشان ءِ تہ ءَ گوشتگ کہ آھاں ھر وڑیں تاوان ءِ بہ بیت مزنیں زھرشانی کنگ ءں جار ءَ پرین اِنت- سرکار ءَ چہ لوٹ کنیں کہ آ بارکھان ءَ دروگیں ڈومیسائل بھر کنگ ءِ جیڑہ گیش ءُ گیوار بہ کنت دمگی مردمانی گوم ءَ سامراجی روئیہ ھلاس بہ کنت دری مردماں دروگیں ڈومیسائل دیگ ءَ بند بہ کنت کہ چریشی ءَ دمگی مردمانی ھک جنی بوگ ءَ انت ءُ زھرشانی کنوکاں بیھار دیوکیں مردمانی بگیری ءَ نوٹس بہ زور ایت ءُ آھاں کانود ءِ سر ءَ بیار ایت –

سر بیتگیں ھالانی رد ءَ بلوچستان ءِ دو جتا جتائیں جاھاں پاکستانی پوج ءِ سر ءَ ناشناسیں مردماں اُرش کرتگ –

گیشیں ھالانی رد ءَ بلوچستان ءِ دمگ کیچ گومازی ماروار ءَ پاکستانی پوج ءِ چوکی ءِ سر ءَ سلاہ بندیں مردماں اُرش کرتگ –

ھالانی تہ ءَ گوشگ بیتگ کہ اُرش ءَ پوج ءَ جانی ءُ مالی تاوانانی دیمپانی کنگ کپتگ –

ھمے وڑ ءَ بولان ءَ پوج ءِ واستا آب بروکیں ٹینکر ءِ سر ءَ بمب اُرشے بیتگ –

بمب اُرش بولان ءِ دمگ جعفری ءَ پوج ءِ پوسٹ ءِ واستا آب بروکیں ٹینکر ءِ سر ءَ کنگ بیتگ ءُ چریشی ءِ آسر ءَ گاڑی ءَ تاوان بیتگ بلے دگہ جانی تاوانانی ھال نہ بیتگ اَنت –

ھردوکیں اُرشانی زمہ واری تنی وھدی ھچ گل ءَ پہ وت ءَ نہ زرتگ اَنت بلے گوست ءَ چوشین اُرشانی زمہ واری بلوچ سلاہ بندیں گلاں منّ اِتگ اَنت –

دی بلوچستان پوسٹ پتر ءَ سربوتگیں ھالانی رِد ءَ بلوچستان ءِ تیاب دپی دمگ گوادر ءَ آپ ءُ لین ءِ ھاتر ءَ دراجیں وھد ئے ءَ زھرشانی کنوکیں مھلوک نوں پھریزگ ءِ نام ءَ چادر ءُ چاردیوالی لگتمالی ءِ بگیری ءَ زھرشانی ءَ انت –

ھمے ھپتگ ءَ دریاورداں مزنیں کساسے ءَ جی ٹی گیٹ ءِ دیم ءَ زھرشانی کتگ، کہ آھانی تہ ءَ زالبول ھم مزنیں کساسے ءَ ھوار بوتگ انت ، آھانی گوشگ ات کہ زر ءِ کش ءُ کِراں کنڈ جنگ بوتگ ءُ آھانی یکدار تاوان دیگ بوتگ اَنت آھاں اے بھتام پاکستانی پوج ءِ سر ءَ جتگ انت –

دمگی مردمے ءَ دی بلوچستان پوسٹ ءَ گوں گوں تران کنان ءَ گُشت دیمروئی ءَ جاک ءُ کوکاراں مئے بھر ءَ بس ھمے اتکگ کہ کجا چہ پیداکے ءُ کجا رؤگ ءَ ئے-
کماشیں مرد ءِ گوشگ ات کہ گوستگیں روچ ءَ من ء وتی نماسگ گون بوتگ ءُ نزیکیں نادراھجاہ ءَ برگ ءِ بوتگ انت کہ آ نادراہ بوتگ زوت زوت ءَ من وتی پجار کاڑ لوگ ءَ بے ھیال کتگ ھمیشی ءِ سبب ءَ من ءَ آرمی ءَ وتی پانگس ءَ چہ واتر لوگ ءَ دیم داتگ –

گوادر بازیں سیکورٹی ءِ سبب ءَ ھمود ءِ جھمنند ھاسکر زالبول سک باز پریشان انت، گام گام ءِ سر ءَ پانگسانی تہ ءَ وتی پجار کنائینگ ھمے ماہ ءَ بازیں لوگانی سر ءَ بیڑ برگ ءَ پد نوں دمگ ءِ تہ ءَ چیریں کمیراہ ترگ ءَ انت –

گوستگیں روچ ءَ بلوچستان ءِ اُستانی پتر ءِ نیاد ءَ اپوزیشن لیڈر ملک سکندر ایڈوکیٹ ءَ پؤنٹ آف آرڈر ءِ سر ءَ تران کنان ءَ آئی ءَ گشت کہ گوادر ءِ تہ ءَ شپ ءِ وھد ءَ چیریں کیمرہ چلائینگ ءَ چہ چادر ءُ چاردیوالی لگتمال بوگ ءَ انت –

آئی ءَ اے امل ایرجتگ ءُ نوٹس زورگے لوٹ کتگ – وھدیکہ گوادر ءَ گچین بوتگیں بلوچستان اسمبلی ءِ باسک حمل کلمتی ءِ گوشگ ات کہ گوادر ءَ پوجی پانگساں دریاورد ءُ دمگی مردمانی وار کنگ ءَ اوپار کت نہ کنیں آئی ءَ گوادر ءِ جاورھالانی چار بچار کنگ ءَ کمیٹی ءِ اڈ دیگ ءِ لوٹ کتگ ءُ گوشتگ کہ زِر ھمودے جھمنندانی مِلک انت ءُ دگہ کسی نہ انت –

دریاورد ءَ دی بلوچستان پوسٹ گوں تران کنان ءَ گُشت کہ اے وھدی گوادر ءِ تہ ءَ دوازدہ ھزار ءَ گیش لانچ ھست انت ءُ گوادر ءِ جھمنندانی سَے ھزار لانچ انت ھر لانچ ءَ چار بگر ھشت مردم کار کنت ءُ وتی چکاں لاپ دنت –
آئی ءِ گوشگ ات کہ پھازگ ءِ نام ءِ سر ءَ شکار کنگ ءِ یک وھد ءِ گچین کنگ اسل ءَ مئے زرکاری ءِ کوش ءِ پندل اِنت –

آئی ءِ گوشگ ات کہ شکار ءِ ھچ وھد ءَ نیست آئی ءِ رِد ءَ وھدیکہ اد ءَ دری مردم ءُ اینچو پوجی کہ نبوتگ مئے مردم سک باز وشھال بوتگ انت نوں ما دو وھد ءِ نان ءَ چمدار اِنت –

گوستگیں روچ ءَ چاگردی ترامجاھاں شنگ بوتگیں تامر ءِ دمگی کماشیں زالبول ءِ گوشگ ات کہ مئے زِر ءَ نوں مار ءَ رؤگ ءَ نیل انت، اشاں توپک کوپگ ءَ انت ءُ مار ءَ گُش انت اد ءَ چہ برو اِت نہ اے زھگانی چار انت ناکہ زالبول –

دی بلوچستان پوسٹ ءِ اھوالکار ءِ رِد ءَ گوادر ءَ مھلوک ءَ آپ، لین ءُ دگہ بنکی لوٹ ءُ پریشانی ءَ پد نوں وتی بنکی کار دریا وردی ھم دست ءَ چہ رؤگ ءِ پریشانی ھست انت –

گوستگیں روچ ءَ راجی جرگہ ءَ دریاورداں پھازگ ءِ نام ءِ سر ءَ شکار ءِ بندش ءُ پوج ءِ نیمگ ءَ شکار ءِ یک وھد ءِ گچین کنگ نہ منّ اِتگ – مزھبی گل ءِ رھشون ھدایت اللہ رحمان ءِ سرکماشی ءَ دریاوردانی بازیں مردمے پاکستان آرمی ءِ نیمگ ءَ پتر ءِ گوم ءَ دچار کپتگ انت دمگی مردمانی جیڑہ ءُ جنجالانی دیمپانی سر ءَ زھرشانی کتگ ءُ گوشتگ کہ ما ھچ وڑیں پوجی ءَ اے ھک ءَ نہ دئیں کہ بلوچ ءِ چادر ءُ چاردیوالی ءَ لگتمال بہ کنت –

پاکستان آرمی ءِ آفسر ءَ ھما جرگہ تہ ءَ گوشتگ کہ چائینیز ءِ سبب ءَ اے بوتگ اَنت آھانی پھازگ ءِ ھاتر ءَ اے بوگ ءَ انت بلے پد ءَ ھم دمگی دریاورداں گوشتگ کہ چائینیز ٹیم ٹیبل ءِ ما پابند نہ ایں بلکیں آ مئے وھد ءِ پابند کنگ بہ بنت زر ءَ روگ ءُ شکار ما ھچ وڑیں وھدے پابند نہ ایں –

ٹی بی پی اھوالکار ءِ رِد ءَ گوستگیں روچ ءِ جرگہ ءَ پد دریاوردانی تہ ءَ امیت ءِ گندگ بیت کہ بوت کنت آھاں نوں شکار رؤگ ءَ دارگ نہ بیت بلے انگت مھلوک ءِ تہ ءَ اے بے چینی ھست ءُ لس مردم گوادر ءِ تہ ءَ سیکورٹی ءُ گام گام ءَ آھاں پریشان کنگ ءَ سیاسی پاٹیانی ھچ نگوشگ ءَ نا امیتی انت –
دمگی مردم ءِ رِد ءَ ھمے وڑ کہ دریاورداں اے گیرکانودی امل ءِ بگیری ءَ جھد بندات کتگ گڑا سیاسی پاٹیاں آھانی ھمراداری بہ کُتیں بلے اے امل ءِ تہ ءَ آ ھوار نبوتگ انت –

دگہ دمگی مردمے ءَ ٹی بی پی ءَ گوں تران کنان ءَ گُشت کہ گوادر ءَ کساس یک لک ءُ سِی ءُ ھشت ھزار چار سد ءُ سِی ھشت مردم جھمنند انت یک مربئہ کلومیٹر ءَ یک سد ءُ پانزدہ مردم نشتگ ءُ ھر کیلومیٹر ءَ سر ءَ بازیں پوجی پانگس آں ابید نوں آ شپ ءِ وھد ءَ ھر گِس ءِ سر ءَ چیریں ءُ ڈرون کیمرھاں گوں جاسوسی کنگ انت –

آئی ءِ گوشگ ات کہ وھدیکہ اد ءَ سی پیک ءِ نام ءَ دیمروئی ءُ چینی آھگ بندات انت دمگی مردمانی زند مشکل جوڑ بوتگ –