TBP Balochi

بلوچستان ءِ دمگ پنجگور ءَ پاکستانی پوج ءَ یک مردمے دزگیر کنگ ءَ پد بیگواہ کرتگ-

ورناہ پوج ءَ پنجگور ءِ دمگ گرمکان ءَ آوار جنگ ءَ پد بیگواہ کرتگ ءُ بیگواہ کرتگیں ورناہ ءِ پجار بابر ء شاجی رھمت ءِ نام ءَ زانگ بیتگ-

دمگی مردمانی رد ءَ پوج ءَ مروچی ساھت دوازدہ ءَ بابر گپتگ ءُ برتگ –

زانگ بہ بیت بلوچستان ءَ بیگواھیانی درچ یکشل ءَ برجاہ اَنت-

گوستگیں روچ ءَ چتکان پنجگور تار آفس ءِ جھمنند بی بی ستارہ غلام مھمد ءَ وتی ھمراھیں زالبولانی ھمراھی ءَ پریس کانفرنس کنان ءَ گشتگ کہ منی برات رفیق ء غلام مھمد پوریاگرے بیتگ ءُ آ گٹگانی نادراھے بیتگ ءُ آ وتی الاج ءِ واستا یازدہ ستمبر دوھزار ءُ بیست ءُ یک ءَ وتی سیادانی ھمراھی ءَ چہ پنجگور ءَ دیم پہ شال ءَ روگ ءَ بیتگ کہ شپ ءِ ساھت دوازدہ ءَ ناگ ءِ ھند ءَ پوج ءَ منی برات گاڑی ءَ ایر گپتگ ءُ لھتے دماناں پد لس پوشاک گوریں گاڑی گوں کارمنداں اتکگ ءُ منی برات اش گوں وت برتگ کہ چریشی ءَ پد منی برات ءِ ھچ ھال نیست اِنت –

بلوچ راجدوستیں پاٹی بی این ایم ءَ انسانی ھکانی درگت ءَ شنگ کرتگیں رپورٹ ءِ تہ ءَ گشتگ کہ اگست ءِ ماہ ءَ پنجاہ لشکر کشیاں پاکستانی پوج ءُ سی ٹی ڈی ءِ دستاں بیست ءُ چار مردم کشگ، چِل مردم بیگواہ، دوازدہ مردم ناشناسانی دستاں کشگ، سیزدہ لاش دزکپتگ ءُ جنگل بازیں کچے ءَ پوج ءَ ستکگ اَنت-

زرباری کوریا ءِ ریگولیٹری ادارہ ءَ موبائل آپریٹنگ سسٹم ءُ ایپ مارکیٹ ءَ وتی زور ءِ رد کامرد کنگ ءِ سر ءَ گوگل ءَ را کم چہ کم ھژدہ کروڑ ڈالر ملام جنگ بیتگ –

فرانسیسی خبر رسان ادارہ اے ایف پی ءِ رد ءَ سَے شمبے ءَ جتگیں ملام سرجمیں دنیا ءَ ٹیکنالوجی ءِ مزنیں کمپنیانی ھلاپ ریگولیٹری ادارہ ءِ گامگیجانی تہ ءَ نوکی ءِ گندگ کیت اِنت –

اے ملام زرباری کوریا ءِ نیمگ ءَ گوگل ءُ ایپل ءِ وڑیں مزنیں ایپ استور آپریٹرز ءِ سر ءَ سافٹ ویئر ڈویلپرز ءَ وتی نزام ءِ کارمرد کنگ ءَ لاچار کنگ ءَ پابندی جنگ ءَ لھتے ھپتگاں پد دیم ءَ اتکگ –

زانگ بہ بیت گوستگیں ھپتگ ءَ یک امریکی ججے ءَ ایپل ءَ را فورٹنائٹ ءِ جوڑ کرتتیں ایپک گیمز ءِ ھواری ءَ کانونی جنگ ءَ وتی ایپ سٹور ءِ پوڑی ءِ نزام ءِ سر ءَ کنٹرول کنگ ءِ ھکم داتگ اَت-

گوگل ءُ ایپل زرباری کوریا ءَ آج لائن ایپ مارکیٹ ءِ سر ءَ اِنت چُشکہ دنیا ءِ تہ ءَ دوازدھمی مزنیں زرکاری ءِ بنجل اِنت ءُ وتی تکنیکی زانت ءِ نام ءَ زانگ بیت اِنت ٹ

کوریا فیئر ٹریڈ کمیشن (کے ایف ٹی سی) ءَ سال دو ھزار ءُ شانزدہ ءَ گوگل ءِ سر ءَ ناگتی دمگ ءِ تہ ءَ اسمارت فون ءِ جوڑ کنوکیں سیمسنگ الیکٹرانکس ءَ را وتی اینڈرائیڈ او ایس ءَ وتی مرزی ءِ رد ءَ دارگ ءِ پَٹ ءُ پول کتگ –

اشی ءَ گوشگ بیتگ کہ گوگل ءَ اینٹی فریگمنٹشن ءِ بنپد ءِ سبب ءَ مارکیٹ ءِ دیمپانی ءِ دیمروئی ءِ اڑانگ کتگ کہ ھرکس اسمارٹ فون جوڑ کنوکیں اینڈرائیڈ ءِ کارمرد کرتگیں ورژن انسٹال کنگ ءَ چہ دار ایت اِنت کہ آئی ءَ اینڈرائیڈ فورکس گوشگ بیت اِنت –

کے ایف ٹی سی ءَ درشانی ءَ گُشتگ کہ اشی ءِ سبب ءَ ڈیوائس جوڑ کنوکیں نوکیں سروسز ءِ ھواری ءَ نوکیں کار ءُ رھبند آورت نہ کنت-

اینٹی ٹرسٹ واچ ڈاگ ءَ گوگل ءِ دمگی کرنسی “زر ” ءَ دو سد ءُ ھپت ٹک چار ارب ءُ یک سد ءُ ھپتاد ءُ شش ٹک ھشت ملین ڈالر ملام کنگ بیتگ ءُ ٹیکنالوجی میان اُستمانی کمپنیانی گور ءَ راستی ءِ دیم ءَ آرگ ءِ کڈم کرتگ –

سیئول ءِ وزارت سائنس ءِ کچ ءُ کساساں گوگل پلے اسٹور ءَ ریونیو دوھزار ءُ نوزدہ ءَ کم چہ کم پنچ ارب ڈالر ءَ گیش کہ ڈیھ ءِ سرجمیں ریونیو شست ءُ سَے درسد اِنت –

گوستگیں شپ ءَ ناشناسیں مردماں کیچ ءِ بنجاھی شھر تربت ءَ شاپور ھوٹل ءِ نزیل ءَ گوزگیں ایف سی ءِ پرپٹ سواریں کارمندانی سر ءَ یک دزبمبے چگل داتگ اَت –

چرے بمب تراک ءَ ایف سی ءَ جانی ءُ مالی تاوانانی دیمپانی کنگ کپتگ اَت، دومی نیمگ ءَ یو بی اے ءَ رسانکدراں شنگ کرتگیں درشانی ءَ اے بمب تراک ءِ زمہ واری منّ اِتگ –

یونائیٹڈ بلوچ آرمی ءِ جارکش مرید بلوچ ءَ وتی شنگ کرتگیں درشان ءِ تہ ءَ گُشتگ کہ شاپور ھوٹل ءِ نزیک ءَ یک شراب جاھے ءِ دیم ءَ ایف سی ءِ گشتی دو پرپٹانی سر ءَ دزبمبے چگل داتگ ءُ چریشی ءَ یک کارمندے مرتگ ءُ یکے زدگ بیتگ –

جارکش ءَ گشتگ کہ اے اُرش ءِ زمہ واری ءَ یو بی اے منّ ایت-

آئی ءَ گُشتگ کہ اے وڑیں اُرش بلوچستان ءِ آجوئی ءَ داں برجاہ بنت –

بلوچ نودربر گل بساک ءِ نیمگ ءَ گوستگیں روچ ءَ بلوچستان ءِ دمگ ھب چوکی ءَ ایجوکیشنل فیسٹیول ءُ” بلوچستان کتاب کاروان “ءِ نام ءَ کتاب مراگشے اڈ دیگ بوتگ – کتاب مراگش ءَ نودربر، سیاسی ءُ چاگردی باسکاں ھوار دگہ تک ءُ پھناتاں سیادی داروکیں مردماں بھر زرتگ ءُ مراگش ءَ تران کتگ – مراگش ءِ درگت ءَ بلوچ نودربرگل بلوچ اسٹوڈنس ایکشن کمیٹی ءِ جارکش ءَ رسانکدراں وتی شنگ کرتگیں درشان ءِ تہ ءَ گوشتگ کہ گل ءِ نیمگ ءَ ھب چوکی ءَ ایجوکیشنل فیسٹیول ءُ بلوچستان کتاب کاروان ءِ نام ءَ کتاب میڑہ ءِ اڈ دیگ بوتگ کہ نودربر ءُ دگہ مردماں بھر زرتگ-

آئی ءِ گوشگ ات کہ بلوچ اسٹوڈنس ایکشن کمیٹی ءَ زانت ءُ زانشت ءِ مراگشاں برجاہ داران ءَ گوستگیں روچ ءَ ھب چوکی ءَ ایجوکیشنل فیسٹیول ءُ کتاب میڑہ اڈ داتگ کہ آئی ءِ تہ ءَ جتائیں مراگش بوتگ انت – ایجوکیشنل فیسٹیول ءُ کتاب میڑہ ءَ کیرئر کونسلنگ، وانگ ءُ نبشتہ کنگ، نوکتریں زانت ءُ بلوچستان ءِ وانگ ءِ نزام ءُ یوتھ لیڈر شپ ءِ سر ءَ مراگش کنگ بوتگ اَنت کہ جتائیں تک ءُ پھناتاں سیادی داروکیں مردماں پینلسٹی بھر زرتگ ءُ اتکگیں مردمانی میان ءَ تران کتگ –

آئی ءِ گوشتگ کہ گل ءِ نیمگ ءَ برجاہ داشتگیں میڑہ ءَ بھر زورکیں مردماں بلوچ اسٹوڈنس ایکشن کمیٹی ءِ مراگش ءِ ستاشانی کتگ – بستار ءِ پینلسٹ آھاں نودربر کیرئر کونسلنگ مراگش ءَ چاگرد ءَ روایتی وڑ ءُ ڈول ءُ دگہ کارانی سر ءَ باوست کتگ گوشتگ کہ اے وانگی نزام ءِ تہ ءَ کیرئر ھنچیں وھد ءَ گچین کنگ بیت وھدیکہ نودربر یک جاہ ءَ سر بنت ءُ وتی زانت ءِ زانشت ءِ پجارگ ءَ نزان انت وھدیکہ وانگ ءُ نبشتھی مراگش ءَ پینلسٹ آں کتابی دروشم ءُ آئی ءِ ھُرت زان ءَ ھوار نبشتہ کنگ ءِ سر ءَ باوست کت –

نوکتریں زانت ءُ زانشت ءُ بلوچستان ءَ وانگی نزام ءِ سر ءَ تران کنان ءَ پینلسٹانی گوشگ ات کہ انوگیں ءُ بلوچستان ءِ وانگی نزام دگرگوں وڑ ءَ انت کہ یک نیمگے بنجاھی سرکار ءِ نیمگ ءَ چہ سنگل نیشنل کرکولم درسیں اُستانانی یک وڑیں نصاب دیگ بوگ ءَ انت ءُ بلوچستان ءَ ناکہ شریں وانگ جاہ ھست ناکہ تالیمی نزام ءِ تہ ءَ گھتری آرگ بوتگ کہ نوکتریں وانگ ءَ جوانتر بہ کنت – سرجمیں دنیا ءِ تہ ءَ زانت دربرگ بنکی وڑ ءُ ڈول ماتی زبان انت بلے اد ءَ ماتی زبان ءِ جاہ ءَ اردو ءُ انگریزی آرگ بوتگ چریشی ءَ نودربر بنکی زانشت ءَ چہ زبھر انت –

گل ءِ نیمگ ءَ برجاہ داشتگیں فیسٹیول یوتھ لیڈر شپ ءِ تران ءَ پد ھلاس بوتگ کہ گل ءِ بنجاھی کمک سرکماش شبیر بلوچ ، بنجاھی سکرٹری جنرل آصف بلوچ ءَ یک پینلسٹ ءِ وڑ ءَ بھر زرتگ ءُ نودربرانی دیم ءَ وتی ھیال درشان اتگ انت –

بنجاھی رھشوناں ھستیں وھدے نودربر راجکاری ءِ سر ءَ تران کنان ءَ گوشتگ بلوچ نودربر سیاست ءَ زانتے ءِ وڑی ءَ سرگوز کنگ ءَ انت ھمود ءَ راجکاری ءِ تہ ءَ گیرجمھوری ءُ گیرسیاسی رویش ھم دیم ءَ برگ انت ھستیں وھد ءَ نودربراں لوٹ ایت کہ کتاب بوان انت وتی زانت ءُ پگر ءَ مھکم بہ کن انت المی ءِ گوم ءَ گل ءَ کار ءَ بہ کن انت –

اے میڑہ کتاب مراگش ھم اڈ دیگ بوتگ کہ جتائیں شنگ کارانی سدانی کچ ءَ کتاب ایر کنگ بوتگ اَنت وھدیکہ نودربرانی بنکی زانت ءِ ھاتر ءَ جتائیں آرٹسٹانی آرٹ مرگش ءَ پیش دارگ بوتگ انت نودربرانی نیمگ ءَ آرٹسانی ستاشانی کنگ بوتگ –

فیسٹیول ءِ گڈ سر ءَ بلوچ اسٹوڈنس ایکش کمیٹی ءِ ھب ھنکین ءِ نیمگ ءَ درسیں گچینی ءِ مھماناں کتاب ءُ گل ءِ آرگن نوشت داتگ –

بلوچستان ءِ دمگ چاگی ءِ ھند نوکنڈی ءِ سیمسری دمگاں پاکستانی آرمی ءَ بلوچانی چِل گاڑیانی کچ ءَ گیش مال برداریں گاڑی مانداشتگ اَنت ءُ دو سد ءِ کچ ءَ گاڑی گپتگ ءُ گوں وت برتگ اَنت –

اے دمگ اوگانستان ءَ ھواریں دمگے کہ اود ءَ مردمانی زرکاری تھنا سیمسر ءَ گوں بندوک اِنت-

چاگردی رسانکجاھاں شنگ بیتگیں تامر بند ءُ اکسانی تہ ءَ ستکگیں گاڑی گندگ بنت، بلے سرکار ءَ تنی وھدی اے درگت ءَ ھچ نہ گوشتگ –

زانگ بہ بیت بلوچستان ءَ دگہ روزگار ءِ نہ بوگ ءِ سر ءَ گیشتریِں مردمانی زرکاری ایران ءُ اوگانستان ءِ سیمسراں گوں بندوک اَنت بلے مروچی باندا ھردوکیں سیمسراں ترندی ءِ سبب ءَ مھلوک چُنڈے نگن ءَ زبھر بیگ ءَ اَنت-

نوکنڈی ءَ ھواریں دمگ ءَ پاکستانی پوج ءَ ھما مال برداریں گاڑی گپتگ ءُ آس داتگ اَنت آیانی تہ ءَ زھگانی شیر، کولڈ ڈرنگ ءُ دگہ وردنی سامان مان بیتگ اَنت –

سر بیتگیں ھالانی رد ءَ روکپتی بلوچستان ءِ دمگ شمس آباد بمپور ءِ جھمنندیں ھاپِز ادھم مکسانی ء ھاجی شوکت مکسانی ایرانشھر ءِ زندان ءَ پاھو دیگ بیتگ –

ھالانی تہ ءَ گوشگ بیتگ ھاپِز ادھم مکسانی دَہ سال ءَ بندیگ بیگ ءَ پد مروچی آ پاھو ءِ ساد ءَ درنجگ بیتگ –

ھالانی تہ ءَ گوشگ بیتگ کہ ھاپز اھمد لوگی جیڑھے ءِ سر ءَ گرگ بیتگ ءُ چریشی ءَ آئی ءِ سر ءَ کوش ءِ بھتام بیتگ ءُ چرے بھتام ءَ آ بَری نہ بیتگ ءُ آئی ءِ سر ءَ پاھو اتکگ –

ایران ءِ پولیس ءَ اھوالکاراں گوں گپ کنان ءَ گُشتگ کہ آئی ءِ سر ءَ پاھو اتکگ ءُ آ وتی کیس ءَ بری بیت کُت نہ بیتگ کہ آئی ءِ سر ءَ وتی زال ءِ کوش ءِ بھتام بیتگ –

دَہ سال ءَ پیسر آئی ءِ سر ءَ وتی زال ءِ کوش لَڈگ بیتگ ءُ چریشی ءَ پولیس ءَ آ دزگیر کرتگ ءُ برتگ بازیں سالانی بندیگ بیگ ءَ پد آ مروچی پاھو ءِ ساد ءَ درنجگ بیتگ –

ایران ءَ گوست ءَ ھم پاھو دیگانی ھال یکشل ءَ پیداک اَنت بلے آ گوست ءِ پاھو گیشتر نشہ باپاری ءُ ڈیھ ءَ ناشاری ءِ بھتام ءَ کنگ بیتگ اَنت –

ایران ءِ پاھو ءِ ھکمانی سر ءَ انسانی ھکانی گل یکشل ءَ زھر ءِ درشان ءُ ایران ءِ سر ءَ ایراد گرگ ءَ اَنت –

بلے سرکاری تکاں اے وڑیں وئیل تنی وھدی یکشل ءَ برجاہ اَنت ءُ اے درچانی لڑاں تنی وھدی سیستان ءُ بلوچستان ءَ ھوار ایران ءِ دگہ اُستاناں ھم پاھو دیگ ءِ ھال رسانکدراں شنگ بیتگ اَنت –

پھازگی ادارگاں منی برات چہ اولاک ءَ ایر گیتکگ ءُ کمو دیر ءَ پد یک اولاکے اتکگ کہ آئی ءِ لس پوشاک گوریں مردماں منی برات گوں وت بُرتگ کہ آئی ءِ داں اَنگت ھچ پیمیں اھوال نیست اِنت۔ بیگواھیں مھمد رفیق ءِ گوھار ستارہ ءِ رسانک تران-

تار آفس چتکان ءِ جھمنند بی بی ستارہ غلام مھمد ءَ وتی دگہ جنین آدمیں سیادانی ھمراھی ءَ رسانک تران کنان ءَ گُشتگ کہ منی برات مھمد رفیق ءِ غلام مھمد کہ پوریا گِرے ءُ آ گٹگانی بیماری ءِ آماچ اِنت آ وتی الاج ءِ ھاتر ءَ 11 ستمبر 2021 ءَ گوں وتی دگہ سیادانی ھمراھی ءَ چہ پنجگور ءَ دیم پہ شال ءَ روگ ءَ بیتگ کہ شپ ءِ دوازدہ ءِ وھد ءَ ناگ ءِ ھند ءَ پھازگی لشکریاں منی برات چہ اولاک ءَ ایر گیتکگ ءُ پد ءَ کمو دمان ءَ پد یک اولاکے اتکگ کہ آئی ءِ تہ ءَ سواریں لس پوشاک گوریں مردماں منی برات وتی پجیگ ءَ بُرتگ کہ آئی ءِ داں انگت ھچ اھوال نیست اِنت۔

آئی ءَ گُشتگ کہ ما پُر ایمنیں شھری اِنت ءُ من وت لیویز ءَ کارمنداں منی برات کجام ھم ردیں کارانی تہ ءَ ھوار نہ اِنت آئی ءَ گُٹگانی نادراھی اِنت اگاں آئی ءَ جرمکاری ءِ کُتگ آ باید اِنت آمید گِس ءَ پیش کنگ بہ بیت۔

آئی ءَ گُشتگ کہ ھمائیں کہ منی برات چِست کنگ بیتگ منی مات ءِ جان ءِ جاور سک نگیگ اَنت ءُ ما کلیں لوگے مردم وتی برات ءِ ھاتر ءَ گمیگ اِنت پمیشکا چہ ھواریں ادارگاں چہ دزبندی کنیں کہ آ منی برات ءَ یل کنائینگ ءَ کمک ءَ بہ کن اَنت ءُ مئے سر ءَ اھسان بہ کن اَنت۔

آئی ءَ گُشتگ کہ ما سکیں بزگیں ءُ واریں مردم اِنت برات ءِ نادراھی ءِ سبب ءَ ما پیشہ گمانی آماچ بیتگیں نی برات ءِ دزگیری ءَ گیشتر جنجالانی آماچ بیتگ اِنت۔

بلوچ ورناہ نشانگ ءِ تہ ءَ اَنت

ٹی بی پی: شونگال

4 ستمبر ءَ بلوچستان ءِ بنجاھی شھر شال ءَ یک آروسی مراگشے برجم بیتگ، بلے اے وشیانی شادھاں مردمانی چھرگاں گیمرتگیں پریشانی ءِ چھرگ گندگ ءَ اتکگ اَت – اے پریشانی ءَ ھاسیں سببءِ نہ بیتگ، بلکیں اشی ءِ سیادی بلوچستان ءُ شال ءِ ناوشیں جاورھالانی سر ءَ بیتگ، انیگیں جاورھالاں مھلوک یک مدامی بے اوستی ءِ جاورھالانی دیمپان کتگ اَنت- مھلوک ءِ گمانی اے وھد ءَ راستی ءِ دروشم ءَ پدر بیتگ وھدیکہ پاکستانی پوج ءُ کانٹر ٹریرزم ڈیپارٹمنٹ (سی ٹی ڈی) ءِ کارمند ناگتی ءَ آروسی دیوان ءِ سر ءَ بیڑ بر اَنت – بلے اے بیڑ ءِ راستیں دروشم انگت ءَ پدر کنگ نہ بیتگ اَنت –

اے وئیل ءِ سرجمیں اھوالاں انگت ءَ ڈبگ بیتگ، آئی ءِ مستریں سبب ایش اِنت کہ وت بیگواہ بیگ ءِ ترس ءَ کس چم دیتگی ءِ پدراھی ءِ کنگ ءِ واستا ساجو نہ اِنت – بلے اے گپ راست اِنت اے بیڑ ءِ وھد ءَ ھشت ورناہ گرگ ءُ پھمیانیں جاگاھاں برگ بیتگ اَنت – انگت ءَ بیگواہ اَنت نا چریشی ءَ پد کھول پولیس تھانہ ءَ رو اَنت ءُ کاینت کہ آیانی دوستگیں مردمانی یل کنگ ءِ واستا وتی کرد ءَ پیلو کنت – بلے اے دراھیں جد ءُ جھد بے سوبی ءَ گندگ ءَ آیگ ءَ اَنت –

ھما ورناہ کہ اے مراگش ءَ دزگیر کنگ ءَ پد بیگواہ کنگ بیتگ اَنت آیانی پجار منصور قمبرانی، واسع قمبرانی، داود قمبرانی، زبیر قمبرانی، عزیر زھری، شکیل شاھوانی، عمیر زھری ءُ شبیر سمالانی ءِ ناماں بیتگ اَنت – اے دراھیں ورناہ وت ماں وت سیاد اَنت –

چار روچ ءَ پد چیدگیں 8ستمبر ءَ ھمے ٹک ءِ یک دگہ مردے فخرالدین قمبرانی ھم قانود جوڑ کنوکیں ادارھاں بیڑے ءَ گپتگ ءُ وتی گون ءَ برتگ-

اے دراھیں بیگواھیں مردمانی بارو ءَ داں انگت ءَ ھچ سرپدی نیست اِنت، نانکہ آ پولیس ءِ بندیگ جاہ ءَ برگ بیتگ اَنت ءُ نانکہ بیست ءُ چار ادارانی گوزگ ءَ پد آمیدگس ءَ پیش کنگ بیتگ اَنت –

بلوچ ورنایانی بگیری ءَ ریاستی ادارھانی اے زوراکی ایوک ءَ زورانسریں بیگواھیاں داں بندوک نہ اِنت، گمان ءَ پدر بیت انت کہ اے زوراکیں رویش ھما بلوچ ورنایانی بگیری ءَ ھم کارمرز بیگ ءَ اَنت کہ تچک ءُ تھنا وتی وانگی جیڑھانی گشینگ ءَ زھرشانیانی تہ ءَ اَنت – 8ستمبر ءَ ھم شال ءَ میڈیکل ءِ نودربر یک زھرشانی ءَ رسانکدرانی کیمراھانی چمانی دیم ءَ پولیس ءَ لَٹ ءُ کُٹ بندات کتگ اَت، چریشی ءِ سبب ءَ بازیں نودربرے زدگ بیتگ اِت اَنت-

اے ایوک ءَ یکیں وئیل نہ اِنت بلکیں ھمک ماہ ءَ بلوچستان ءَ سیاسی پاٹی ءُ انسانی ھکانی گل لشکر ءِ نیمگ ءَ اے وڑیں زوراکیانی پژدر ءَ رپورٹ کنان اَنت ءُ پیداک اَنت – نِی اے ھمروچی جیڑہ جوڑ بیتگ اَنت-

بلوچستان ءَ یک سیاسی پاٹی بلوچ نیشنل مومنٹ ءَ وتی گوستگیں ماھی رپورٹ ءَ اے گپ جتگ کہ اے ایوک ءَ اگست ءِ ماہ ءَ چہ بلوچستان ءَ 40 ورناہ پوج ءَ زورانسری بیگواھی ءِ آماچ کرتگ اَنت- 24 ورناہ بندیگجاھاں ابید ءِ آمیدگس ءِ پرمان ءَ کشگ ءُ آیانی جون دور دیگ بیتگ اَنت – چریشاں گیشتر زمانگ ءِ نام گپتیں ھونواریں سی ٹی ڈی ءَ ناگتی دروگیں میڑہ ءَ دیم پہ دیمی کُشتگ اَنت-

انسانی ھکانی گل، گیشتر وائس فار بلوچ مسنگ پرسنز ءِ گوشگ اِنت کہ زورانسری آوار جنگ بیتگیں مردمانی کچ رسانکدرانی نیمگ ءَ شنگ بیتگیناں باز گیش اَنت پرچاکہ بازیں مردم پوج ءِ بیھاراں پد رسانکدرانی دیم ءَ آیگ ءَ لرزگ ءَ اَنت پرچاکہ آیانی تہءَ اے ترس ودینگ بیتگ کہ اگاں رسانکدرانی دیم ءَ آ ادارھانی نام ءَ گِر اَنت گڑا آیانی بیگواھیں مردم کُشگ بنت –

دی بلوچستان پوسٹ ءَ لس گچینی ءِ ھالانی تہ ءَ سر بیتگیں ھالانی رد ءَ 20اگست ءَ چینی انجنیئرانی سر ءَ بیتگیں اُرش ءَ پد ایوک ءَ گوادر ءَ بازیں کچے ءَ بلوچ ورناہ گرگ ءُ بیگواہ کنگ بیتگ اَنت بلے اشانی تہ ءَ کسے ءِ کیس رسانکدرانی دیم ءَ ترس ءِ سبب ءَ آرگ نہ بیتگ اَنت-

درشان کرتگیں وئیل بلوچستان ءَ دو دھکانی جاورھالانی ایوک ءَ یک چھرگے – انگت ءَ چہ بلوچستان ءَ ھزارانی کچ ءَ ورناہ سالانی سال بیگواہ اَنت ءُ اشانی تہ ءَ بازینے “کُشگ ءُ چگل دیگ” ءِ پالیسی ءِ درچ ءَ کُشگ بیتگ اَنت-

کجام چاگرد ءِ سرین ءِ ھڈ ورناہ زانگ بنت، آ دیمروئی ءُ باندات ءِ مانزمان اَنت آ موہ دیگ بنت ءُ آیانی پھریزگ سرجم کنگ بیت اِنت بلے بلوچستان ءِ ورناہ درستاں پیسر زورانسری آوارجنی ءِ نشانگ بیگ ءَ اَنت-

بلوچستان ءِ سیاسی پاٹی، انسانی ھکانی ادارہ ءُ بلوچ مھلوک ءِ واستا درستاں اجکھی گپ ایش اِنت کہ بلوچستان ءَ برجاھیں انسانی ھکانی ناوشیں لگتمالیانی سر ءَ کجام ھم میان اُستمانی ادارگ ءِ دلگوش کنگ ءَ داں انگت ءَ وتی نیمگ ءَ چِکگ ءَ بے سوب بیتگ اَنت – راستی ءَ یک بژنیگی ءَ کم نہ اِنت –

بلوچستان ءِ تیابدپی شھر گوادر ءَ فش ھاربر (جیٹی) ءِ تیاب ءِ لمب ءَ جھلیں کلے کونچگ ءَ زر ءِ راہ بند کنگ ءُ یکدارانی تاوان دیگ ءِ بگیری ءَ دریا ورداں زھرشانی کرتگ-

یکشمبے ءِ شپ ءَ دریا ورداں بازیں کچے ءَ فش ھاربر گیٹ ءں دیم ءَ نندانک جتگ کہ چریشاں زالبول ھم بازیں کچے ءَ ھوار بیتگ اَنت-

زھرشانی کنوکانی گوشگ اِنت فش ھاربر جیٹی ءِ تہ ءَ زر ءِ لمب ءَ جھلیں کڈے ءِ کونچگ ءَ ایوک ءَ زر ءِ روگ ءِ بند نہ اِنت بلکیں زر ءَ وتی یکدارانی گور ءَ روگ ءَ تکانسری اِنت اشی ءَ ابید کڈ ءِ سبب ءَ یکدار ھم زر ءَ برگ بیگ ءَ نہ اَنت-

دریا ورد ءُ دمگ ءِ مردماں سیکورٹی لشکر ءِ نیمگ ءَ اے امل ترندی ءَ ایر جتگ ءُ گوشتگ کہ سیکورٹی ءِ نام ءَ مھلوک ءَ تنگ کنگ ءَ اَنت ءُ گپ اے جاہ ءَ سر بیتگ کہ ما وھدیکہ جنازہ ءِ واستا رویں گڑا اے جست کنگ بیت کہ کجا روگ ءَ ئے پجار ءُ ڈرائیونگ لائسینس پَٹ ءُ پول کنگ بنت –

آیاں گشتگ کہ ما اد ءَ کدیم ءَ جھمنند اِنت مئے زرکاری بس دریاوردی اِنت بلے پاکستان ءِ لشکر ءِ نیمگ ءَ راہ بند بیگ ءَ اَنت ءُ یکدار تاوان بیگ ءَ اَنت ءُ ما شد ءِ دیمپان بیگ ءَ اِنت –

زھرشانی کنوکاں بنجاھی ءُ استانی سرکار ءَ لوٹ کرتگ ءُ گشتگ کہ مئے لوٹاں سرجم بہ کنت ءُ مارا روزگار ءَ بیل ایت-

سربوتگیں ھالانی رِد ءَ گوستگیں روچ ءَ بلوچستان ءِ تہ ءَ جھانی وبا کرونا ویروس ءِ نادراھی ءَ آماچ بوتگیں بیست دگہ نوکیں کیس دیم ءَ اتکگ اَنت ءُ اے وھد ءَ کرونا ویروس ءَ آماچ بوتگیں درسیں مردمانی کچ سی ءُ یک ھزار ءُ شش سد ءُ سِی ءُ ھپت ءَ سر بوتگ اَنت-

بلوچستان جانسلامتی ءِ نیمگ ءَ چہ شنگ بوتگیں رپورٹ ءِ رِد ءَ بلوچستان ءِ پنچ دمگاں بیست مردماں کرونا نادراھی پدر بوتگ، کہ آھانی تہ ءَ درساں گیش بلوچستان ءِ بنجاھی شھر شال ءَ پانزدہ، ھزدار ءَ دو،گوادر، مستونگ ءُ کلعہ سیف اللہ ءَ یک یک مردم ءَ کرونا ویروس پدر بوتگ، چریشی ءَ پد تنی وھدی بلوچستان ءِ تہ ءَ کرونا نادراھی ءَ آماچ بوتگیں مردمانی کچ نوکیں کیساساں ھوار سرجمی ءَ سی ءُ یک ھزار شش سد ءُ سِی ءُ ھپت ءَ سر بوتگ اَنت-

رپورٹ ءِ رِد ءَ بلوچستان ءِ تہ ءَ سِی ءُ شش مردم وش بوتگ انت، وش بوتگیں مردمانی کچ نوکیں کیساساں ھوار سرجمی ءَ سِی ھزار ءُ نھ سد ءُ شست ءُ پنچ انت-

رپورٹ ءِ رِد ءَ بلوچستان ءِ تہ ءَ اے وھدی کرونا ویروس ءِ سَے سد ءُ سِی نادراہ ھست انت کہ ھپت نادراہ بلوچستان ءِ نادراھجاہ الاج کنگ ءَ انت ءُ آھانی تہ ءَ چار نادراہ ھائی فلو آکسیجن اِلاج ءَ انت-

بلوچستان ءَ کرونا ویروس ءِ پوزٹیو کیسانی گیشی سَے ٹک بیست ءُ پنچ درسد بوتگ تنی وھدی بلوچستان ءِ تہ ءَ کرونا ویروس ءَ سرجمی ءَ سَے سد ءُ چِل ءُ دو مردم بیران بوتگ انت-