TBP Balochi

بلوچستان ءِ بنجاھی شھر شال ءَ بیگواھیں مردمانی کھولانی نیمگ ءَ زھرشانی روانک کشگ بیتگ ءُ زھرشانی روانک ءَ بازیں کچے ءَ زالبول، چک، نودربر ءُ دگہ پھناتاں بندوکیں مردماں بھر زرتگ –

زھرشانی روانک گوستگیں دوازدہ سالاں پیسر بیگواھیں بلوچ نودربر رھشون زاکر مجید ءِ مات ءِ دزبندی ءَ کشگ بیتگ، زھرشانی ءِ پلامرزی وائس فار بلوچ مسنگ پرسنز، ایچ آر سی بی ءَ ھم کرتگ –

زھرشانی روانک ءَ زھرشانی کنوکانی دستاں بیگواھیں مردمانی اکس ءُ بینر ءُ آیانی سر ءَ بیگواھیں مردمانی یل کنگ ءِ لوٹ نبشتگ کنگ بیتگ اَنت ءُ اشانی ھواری ءَ زھرشانی ءَ ھواریں مردماں بیگواھیں مردمانی بارہ ءَ اوگام جتگ –

زھرشانی روانک شال ءِ پریس کلب ءَ بندات بیتگ ءُ شھر ءَ تران ءُ دیم پہ گورنر ھاؤس ءِ دیم ءَ اود ءَ زھرشانی کنوکاں نندانک جتگ ءُ نشتگ اَنت –

زھرشانی ءَ ھواریں مردماں بیگواھی ءِ دروشم ءَ چم بستگ ءُ وپتگ اَنت اود ءَ زھرشانی کنوکاں سانکل ءُ چم بستگ اَنت –

زھرشانی روانک ءِ سر ءَ زالبولیں پولیساں بیگواھیں مردمانی کھول ھم نشانگ کرتگ ءُ روانک ءِ ھلاس کنگ ءِ جھد اش کرتگ –

زھرشانی کنوکاں تران کنان ءَ گوشتگ کہ بلوچستان ءَ بازیں سالاں چہ گار ءُ بیگواھیانی درچ برجاہ اَنت ءُ انگت ءَ اے درچ دارگ نہ بیتگ اَنت –

زھرشانی ءَ شبیر بلوچ ءِ گوھار سیما بلوچ، سعید اھمد بلوچ ءِ کھول ءُ دگہ بیگواھیں مردمانی کھولاں تران کرتگ-

روانک ءَ بیگواھیں بلوچ نودربر رھشون شبیر بلوچ ءِ گوھار سیما بلوچ گوشت: من ءُ منی کھول ھنچیں ناوشیں جاوراں گوزگ ءَ ایں کہ لوگ ءَ رواں شبیر ءِ لوگی جست کنت کہ شبیر ءِ ھال نیست پون اش نہ کرتگ –

زھرشانی ءَ سعید اھمد ءِ مات ءَ گوشت کہ اے بازیں سالاں چہ منی زھگ بیگواہ اِنت اشی ءَ من زاناں کجام درد اِنت اشی ءِ تہ ءَ نا من ءَ الکاپیں واب ھست نانکہ کہ الکاپیں وردن ھست –

آئی ءَ گوشت کہ من ءُ سعید اھمد ءِ دیشتار ءِ ودار ءَ شش سالاں گوزگ ءَ پد ھم ودار ءَ نشتگ ءُ آئی ءِ کھول مدام زور دیگ ءَ اَنت کہ سعید کدی یل بیت یا مارا اجازت بہ دے اِت –

زھرشانی ءَ راشد ھسین ءِ مات ءَ گوشت کہ اے پیراں سری اُمر ءَ در پہ دراں بلے سرکار ءَ گوست ءَ اسلام آباد ءِ نندانک ءَ زبان کرتگ کہ من راشد ھسین ءِ بارہ ءَ شمارا گوش آں آئی ءِ گپ ءَ پد راشد ھسین ءِ بارو ءَ مارا ھچ ھال دیگ بیگ ءَ نہ اِنت –

آئی ءَ گوشت کہ راشد ھسین سرکار ءَ درملک ءَ گپتگ ءُ آورتگ ءُ وتی زنداناں کرتگ ءُ آئی ءِ ٹی وی چینلاں ھم منّ اِتگ ءُ آئی ءِ سرکار ءَ ھم اے گپ منّ اِتگ بلے تنی وھدی آئی ءَ آمیدگساں پیش کنگ ءَ نہ اَنت –

زھرشانی ءَ بازیں بیگواھیں مردمانی کھولاں تران کرتگ ءُ سرکار ءَ وتی مردمانی یل کنگ ءِ لوٹ اش کرتگ –

زانگ بہ بیت ھشت جون بیگواھیں بلوچانی کھولاں بیگواھی ءِ روچ داشتگ ءُ ھمے روچ ءَ بلوچ نودربر رھشون زاکر مجید ءَ دوازدہ سال سرجم بیتگ –

آئی ءِ مات ءِ دزبندی ءَ روانک کشگ بیتگ ءُ آیانی روانک ءَ بازیں کھولاں بھر زرتگ –

دومی نیمگ ءَ چاگردی رسانکجاہ ٹوئٹر ءَ کمپئن کارمرد کنگ بیتگ کہ اے وھد ءَ بازیں ھسابے ءَ بلوچستان ءَ بندوکیں چاگردی رسانکجاھاں کارمرد کنوکیں مردم کارمرد ھیش ٹیگ #BalochMissingParsonsDay کامرد کنگ ءَ اَنت –

بلوچستان ءِ بنجاھی شھر شال ءَ سر بیتگیں ھالانی رد ءَ بلوچ ورناہ کوہ پیما (کوہ سوار) منصور قمبرانی بیگواہ کنگ بیتگ –

دمگی مردمانی رد ءَ آ پولیس ءُ چیریں ادارھانی کارمنداں دزگیر کرتگ ءُ برتگ، داں اے ساھت ءَ آئی درگت ءَ ھچ پئیم ءِ اھوال نیست۔

زانگ بہ بیت مروچی گار ءُ بیگوابیں مردمانی روچ دارگ بیگ ءَ ایں بلوچستان ءِ بنجاھی شھر شال ءَ زھرشانی ءُ چاگردی رسانکجاہ ٹوئٹر ءَ بیگواھیں مردمانی یل کنگ ءِ ھاتر ءَ کمپئین کارمرد کنگ بیگ ءَ ایں –

سوشل میڈیا ءَ مزنیں کساس ءَ بلوچ جھد کار بیگواھیں مردمانی کہول #BalochMissingPersonsDay ءِ ھیشٹیگ ءَ کارمرز کنگ ءُ کمپین جنزینگ ءَ اَنت ءُ لوٹ کنگ ءَ اَنت کہ آیانی بیگواھیں مردم یل کنگ بہ بنت۔
بلوچستان ءِ سیاسی ءُ انسانی ھکانی گل بلوچستان ءَ بیگواھیں مردمانی جیڑہ ءَ پاکستان ءِ سر ءَ لڈگ ءَ اَنت آیانی رد ءَ بلوچستان ءَ یک مردمے یل کنگ بیت ءُ دگہ چار بیگواہ کنگ بنت –

نبشتانک: دوزادہ سال گوں کولنجیں گماں گوازینتگ

نبشتہ کار : شیردل بلوچ

دی بلوچستان پوسٹ

من یک انچیں ازیمیں انسان ءُ راج دوستے ءِ بابت ءَ باز دیر ءَ پد تُستگیں بالاد ءَ گوں تُنگیں ارواہ ءَ ند چست کرتگ ءُ نبیسگ ءِ اِرادگ کُتگ کہ چار گالرد بہ نبیساں، من سرپد آں منی کر ءَ چُشیں گال نیست گوں ھما کس ءَ ھمسنگ بہ بنت کدی ھم اے وڑ بوت نہ کنت، آئی ءِ گوں زانت ءُ سرپدی ءَ ھچ دروشم اے وڑیں پْرشتگیں گال ھمسری کُت نہ کن اَنت، من وت ھبکہ آں اے شاھگانیں بلوچی زبان ءِ امباریں گالاں چون یکجاہ بہ کناں اینچکیں اِلمے منی ھم نہ اِنت، گوں لال ءُ گوھریں لبزاں وتی راجی رھشونے بہ سَھڑایاں آئی ءِ کجام کارست ءِ توسیپ ءَ بہ کناں ءُ چون وتی نبشتہ ءَ دیم ءَ بہ براں؟ ٹوھیں راجدوست ءُ وانندگے بوتگ، راجکارے بوتگ، گشتانکان ئِے کوھیں دل موم کرتگ انت ءُ ھر کس ءَ را پہ گوشدارگ ءَ لاچار ئِے کرتگ ، آ سکیں مھروانیں ءُ ازیمیں رھشونے اَت، توسیپ ءِ ھچ چمدار نہ انت آ واجہ” زاکر مجید بلوچ” اِنت، بے دروریں رھشونے اَت اگاں کجام دَمگ ءَ آئی ءِ آیگ ءِ ھال کسے ءَ اُشکتگ گڑا وت ءَ ھما جاہ ءُ مراگش ءَ الم ءَ رسینتگ ئِے پنڈال ءِ سیاھگ بوتگ یا روچ ءِ گرمیں برانزے بوتگ ، ھِید پہ چادر پھک ئِے کرتگ اَنت روچ ءِ سوچگ ءِ ھچ ھیال ئِے نہ بوتگ ھرچ تلو ءَ ھرچ مولم ءَ ساڑی بوتگ۔

دلگوش ۔!
واجہ زاکر جان ءَسمبھینتگیں گال چو رد ءِ سر ءَ گشتانک داتگ اَنت وھدیکہ زاکر جان ءِ دیوان ءَ کسے نشتگ گڑا آئی ءِ دل ءَ ھچ نہ گوشتگ کہ تکریر ئِے آسر بہ بیت، دل بے کرار بوتگ پہ گُشتانک ءِ اُشکنگ ءَ ءُ جند ئِے گندگ ءُ چارگ ءَ، ھرچ چَمّ ءُ دل ءِ واھگ ھمیش بوتگ زاکر جان ءَ گوش بہ دار آں ءُ دیدار ئِے بہ کن آں، ھمک مراگش ءِ مردم زاکر جان ءِ اُشکنگ ءِ ھُدوناک ءُ شیدائی بوتگ اَنت-

ھشت جلکان ءَ دو ھزار نُھ ءَ آئی ءِ بیگوائی ءِ ھال اُشکنگ ءَ ھرچ دل زدگ بیت، تیوگیں بلوچ راج سرین پُروش ءُ زندمان ءِ بازیں واھگ گیمرت اَنت چہ لائکیں رھشونے بلوچ راج ءَ پچگرگ بیت، دل پہ ھمے بے دروریں رھشون ءَ تلوسگ ءَ اَنت ءُ چَمّ ودارانی راھسراں سک اَنت، کدی کیت گندگ بیت راج ءِ گمواریں پُسگ” زاکر جان شالا تو آجو بات ئے شاھیں کادر ترا چہ زندان ءِ تھاریں کوٹیاں واتر پد ءَ بیارات پہ تئی گندگ ءَ دل بے تاھیر ءُ چَمّ راھان اَنت ۔

اے چونیں جھانے ما بلوچ کر ءُ کورانی دنیا ءَ کریابیں زندے گوازینگ ءَ ایں نیکہ مئے جنجال گندگ بوگ ءَ اَنت نیکہ مئے ٹپ ءُ ٹوریں کُنٹ گندگ ءَ کاینت، نیکہ مئے راج ءِ بیگوائیں پرزندانی مات ءُ گُھار چیھانٹ ءُ زار اُشکنگ بوگ ءَ اَنت نیکہ تِپلیں چُک ءُ لوگبانکانی سیاھیں پوشاک ءَ گند اَنت،براتانی کوپگ پْرشتگ اَنت ءُ پیریں پتانی دست ءِ لٹّ پچگرگ بوتگ اَنت، سانگ ءُ آروسی پترانی، شاتکامی نازینک دراہ بے برمشی ءِ آماچ کرتگ اَنت اِش،داں گلامی ءِ سیاہ ءُ تھاریں شپ آسر مہ بیت بلوچ راج مُجّتی گمیگ اِنت ۔

زاکرجان ءِ پہ آجوئی ءِ واست ءَ آئی گُھار بانک ” پرزانہ بلوچ” ءَ دراجیں پندے بُر اتگ، بندات چہ شال ءَ کرتگ ءُ کراچی تاں بے نپیں اسلام آباد ءَ ماما کدیر بلوچ ءِ سروکی ءَ سَمی دین ءُ کسان سالیں الی ھیدر ءَ ھم ھمے کاروان ءَ گوں اوست بستگ اَت، بلکیں پنجاب ءِ نامرادیں سروک سما کن اَنت بلوچ مات ءُ گھارانی دردیگیں دل ءِ زیماں درمان پِر کن اَنت، راستے کہ پنجاب ءِ لالچی ئیں سروکاں پہ بلوچاں درد دل ءَ مان نیست پہ بلوچستان ءِ بے دروریں مڈیاں زرگ ءَ اَنت ۔

دیریگیں شُد لاپ ءَ نشتگ اَنت پہ بیگوائیں بلوچ پُسگانی آجوئی ءَ گیدی ءِ ھرچ نیمگ ءَ ھمے توار چست کنگ بوت ” کماش” ماما کدیر بلوچ ءُ نسراللہ بلوچ ءِ سروکی ءَ اے زھرشانی برجم داشتگ اِش کدی سارتیں چلّگ ءَ ماں کراچی ءَ کاینت ءُ نند اَنت ، چوناھا ھمے نندانک ماں شال ءَ دہ سال گیش اِنت نشتگ، ھمے پتر ءَ سداں دردمندیں کھول اتکگ ءُ وتی درد ءُ اندوھانی کسہ جھان ءَ را گوشدارینتگ” گُھار سیما ءُ ” زرینہ ءَ گوں شبیرجان ءِ درداں۔! انچش راشد ھسین بلوچ ءِ شیرزالیں مات” کساں سالیں گُھار ماہ زیب ءُ دگہ مات ءُ گُھارانی ھمرائی ءَ مدام زھرشانی ءَ اَنت، اد ءَ ماتانی ارسانی رگاماں گورتگ ۔

یکرندے پد ءَ زاکر جان ءِ مکھیں مات گوں ایدگہ بیگوائیں پُسگانی مات ءُ گُھاراں ھور اسلام آباد نیشنل پریس کلب ءِ دیم ءَ زھرشانی کتگ “سیما بلوچ ، “سمی دین ” ھسیبہ کمبرانی ءَ مسنگ پرسن ء سروک” نسراللہ بلوچ ءَ ڈی چوک ءَ نندانک گوں ھمے لوٹ ءَ پاکستان ءِ مزن وزیر” امران ھان ءَ ڈیک ورگ ءَ بندیگانی آجوئی ءِ دروگیں دلبڈی ءُ تسلا دیگ ءَ پد واتر پہ شال ءِ شُدلاپیں زھرشانی برجم داشت اِش، راشد ھسین ءِ مکھیں مات ” شبیرجان ءِ گُھار، ڈاکٹر دین جان ءِ دُتک ءُ زاکرجان ءِ مکھیں مات ءَ ئِے پُریں دوازدہ سال گوں بچ ءِ بیگوائی ءُ کولنجیں گماں گوازینتگ بچ ئِےانگت کھریں زندان ءَ بندیگ اِنت-

بیگوائیں بلوچ پُسگ : زاکرمجید ، ڈاکٹردین مھمد ، چیرمین “زاھد کرد، راشدھسین ، شبیرجان ءُ رمزان بلوچ ھور درائیں زندانی آجو بات اَنت ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: من پد ءَ واتر کن آں

نبشتہ کار: مھروان کمبر

دی بلوچستان پوسٹ

من ، تھنائی ، تھاریں کُوٹی ءُ چم بستگ اَنت دیم گوں دیوال ءَ اِنت۔ کُوٹی ءِ چاریں آتراپاں ابید چہ گاٹ دیوکانی بوٹانی توار ءَ کُوٹی ءِ آ دگہ دُرستیں ھستی ویرانگی ءَ وتی پنجگانی میار کُتگ اَنت۔ نہ زان آں چے وھد اِنت، روچ اِنت یا شپ ، سُھب اِنت یا بیگاہ، بلے مُدّتے بیت کہ چمّانی واب بیگواہ اَنت اگاں کمے اُبینگ بہ آں برے لَٹ، برے مُشت، برے لگت، برے تُرندیں توارے جھ سرّینیت ، بلے گیشتر تئی ترانگ اَنت تئی نپس گیریں یاتانی پادبرمش اَنت کہ ھچ واب ءَ نیل اَنت۔چمّاں نز کن آں توئے، تئی کندگ ءُ ٹھکانی توار اِنت۔ تئی کْرام اَنت، تئی ٹھل ءُ ادا ءُ ناز انت۔تئی پُر نوریں بچکند اَنت، ھما بچکند کہ زندگی بکشا اَنت ھما بچکند کہ گم چکاریں زند ءَ وشّی ءِ سما ءَ دے اَنت۔ ھما بچکند کہ دمبُرتگیں ڈیل ءَ جُنزگ ءِ سکین ءَ دے اَنت اے ھم نہ زان آں چینچو روچ اِنت ترا چہ دیر، مردُماں چہ دیر، میتگ ءَ چہ دیر ، وتی جند ءِ سرزمین ءِ سر ءَ ناشُناسیں مردُمانی دست ءَ آوار جنَگ بیتگان ءُ اے تنک ءُ تُرپشیں کُوٹیانی میار کنگ بیتگ آں۔ بِہ گِندئے تو اے گپّاں اجکّا بہ بَہ ئے کہ من گْوشگ ءَ آں نا شُناسیں مردمانی دست ءَ آوار جنَگ بیتگ آں۔ ھو نا شُناسیں مردُمانی دست ءَ ! پرچا کہ پجّار ءُ شُناس ھما مردُماں بیت کہ وتی زمین ءُ پجّارے بیت۔اے پاکستانی پوجی، سرکار ءِ چیریں ادارھانی کارندہ منی سرزمین ءِ سر ءِ منی پجّار ءَ لوٹ اِیت ءُ من ءِ آوار جنت۔ منی برات ءُ گْوھاراں آوار جنت ، کسانیں چُکّ ءُ زالبولاں آوار جنت۔

من گْوشگ ءَ اِت آں کہ نہ زان آں چُنت سال اِنت، چُنت ماہ ءُ روچ اِنت ۔چُنت ساھت ءُ دمان اِنت اے تھار ءُ کبر دْروشمیں کُوٹی ءِ تہ ءَ ، بس ھمینچو یات اِنت یک دسمبر ءُ یکشمبے ءِ روچ اَت۔ تُربت ءِ چاڑ بکشیں بیگاھے اَت کہ چیزے روچ ساری ھَور ءَ گْورتگ اَت نوں ھمیش اَت گوریچ ءِ شیکّگاں گوں تربت ءِ دمکانی کاگد بال اِت اَنت ءُ من وتی دُرستیں کار گیگ کُت ءُ دراتک آں کیچکور ءَ ڈی بلوچ ءِ پُل ءِ اول سر ءَ گوں پرپٹ ءَ دیم پہ وتی بازار ءِ نیمگ ءَ جُنزان اِت آں۔ وھدے نگاہ پہ کَور ءِ میزریں بالاد ءَ شانک دات آں ، گنداں کور ءَ یک سبزاپے آؤرتگ ءُ چو کانچ ءَ تِرپگ ءَ اَت کَور ءِ ھما دست ءَ دو گاڑی اُوشتوک اَت ، بلے مردم ھِچّ زاھر نہ اَت نزّیک ءَ سر بیت آں، چاراں دو نا شُناسیں سِلاہ بندیں مردم ءَ منی دیم ءَ دَور کُت ءُ گْوشت: ‘روکو اور ہاتھ اوپر کرو ” من اُوشتگ ءِ ھواری ءَ دست بُرز کُت آں ، ھِچ جُست ھم نہ کُت کہ شُما کَے اِت ءُ منی گناہ ءُ میار چی اِنت؟ بلے من زانت کہ منی گناہ منی بے گناھی اِنت ، منی گناہ منی بلوچیت اِنت، منی گناہ زالم ءِ دیم ءَ سر ء جھل نہ کنگ اِنت، منی گناہ منی جند ءِ پجّار اِنت یکّے ءَ منی دست پُشت ءَ بست اَنت ءُ ساھیں پٹّی یے منی چماں بندگ بوت ءُ گاڑی ءِ تہ ءَ چو بے زُبانیں دَلوت ءَ دور دَیَگ بوت۔

ساھتے ءَ رند گاڑی اُوشتات ءُ دو کس ءَ من ءِ کشّان کُت ءُ یک کُوٹی یے ءَ چگل دات کس منی نزّیک ءَ نیاتک، چم بند ءُ دست بستگ اِت اَنت شُد ءُ گُژن گار اَت ، بلے سک تُنّی اِت آں دومی روچ ءَ من ءَ دِگہ کُوٹی یے ءَ بُرت ءُ چم اِش پچ کُت اَنت ، بلے زردیں بلب ءِ شھم ءَ وس کناں چم پچ نہ بنت کمے دیر ءَ رند چاراں دْراج ریشیں مردے کُرشی ءِ سر ءِ نشتگ پاد ماں ٹیبل ءِ سر ءَ کُتگ اَنت سگریٹے روک کُتگ ءُ کشّگ ءَ اِنت سگریٹ ھلاسی ءَ رس ات ، گُڑا منی دست ءِ سر ءَ کُشتے، گوں سِگریٹ ءِ کُشّگ ءَ ھور بے زُبانیں آھے چہ منی جبین ءَ دراتک ءُ من ماں گْوست ءِ لد ءَ وئیل بوت آں۔
کسانیں ساھتے ءَ پد جُستانی دْراجیں لڑے بندات بوت ، ھر جُست ءِ سرا لٹّ ، شھمات، لگت، ءُ پد ءَ بے ننگیں زاہ ءُ بد چہ بازیں لٹّ ءُ کُٹّاں پد چم تھار بوھان بیتاں ءُ پد ءَ نہ زان آں من کُجا رپت آں بسُت کُت چاراں تھاریں کُوٹی ءِ لاپ ءَ کپتگ آں ءُ چہ بازیں ٹپّ ءُ ٹوراں گْوش ئے سرجمیں بدن ءَ آسے جمبور اِنت نہ زان آں چنت روچ، چنت ماہ، اِیشاں من ءَ وتی دل ءِ تب ءَ جت۔ ھرروچ سر ءَ جھلاد ءُ پاداں بُرز ءَ ٹنگ اِتگ انَت ، ھرروچ برپ ءِ سر ءَ منی بْرھنگیں بدن اَت، ھرروچ تُستان ءُ ھرروچ چہ بازیں دردانی تورشت ءَ دل اشکران اَت ھرروچ جست یکین اِتنت کہ ”شُمے سلاہ بندیں گل ءِ مستر کَے اِنت؟”شُمے ”زر چہ کُجا کاینت؟”دو کوپ ءِ جنگ ءَ تو ءُ کَے ھوار بیتگ ئے ؟”پاچن کَور ءَ بمب تْراک ءَ چے رند کَے تئی دیم ءَ اتکگ ؟”پوج ءِ جنَگ ءِ شوربندی کُجا چِہ بیت؟” ءُ دگہ بازیں جُست منی پسّو ھم یکین اَت کہ من ھچ سرپد نہ آں، اے ھُشکیں بُھتام اَنت منی دامُن ءَ جنَگ بیتگ اَنت۔

یکروچے جُستانی لڑ ءَ دگہ دو جُست ھم ھوار بوت یکے منی ءُ تئی مھر ءِ جُست ، دومی لاڑُک ءِ ششمی چُک نُورک ءِ جُست۔ گپّے زان ئے ملنگوئیں نُورک ءَ اے شپاں الکاپ ءَ من ءَ لٹّ وارینت من ءَ پُرست ئِے کہ تئی بازار ءِ لاڑُک ءِ چُکّ چنچوک اَنت ؟ من گْشت پنچ جت ءُ گْوشت ئے دروگ چی ءَ بندے، شش چُک اَنت ششمی چُکّ ءِ نام نُورک اِنت ، اُمر ءَ نوکی چار سال اِنت ءُ ملنگویے من ھیران بیت آں کہ من وتی بازار ءِ مردُم ءَ نہ زان آں ، اے چتور زان اَنت من گْوشت کہ نُورک نوکی چار سالی زھگے، سرمچارے نہ انت کہ من چیر دیانے انچو وھد گْوزان اَت زھیر ءُ ترانگ روچ پہ روچ گیش بوھان اِتاں ، درد ءُ دوراں آدّت بوھان اِت آں کہ منی کشّ ءِ کُوٹی ءَ یکروچے گریوگ ءِ توار اَت۔ من پُرس اِت تو کَے؟ گْوشت ئے من بیبگر پسنی ءِ جھ مِنند ءُ ماھے بیت زندان ءَ بندیگ آں منی اُمر نوکی دہ سال اِنت ءُ اے پوجیاں من ءَ بْرھنگ کُتگ منی گوم ءَ ھرابیں کار کُتگ۔

اے روچ ءَ گْوش ئے آسے منی پشک ءَ کپت ءُ من ءَ گُمان بوت کہ من زندگیں لاشے ءُ چہ زِند ءِ ھر چیز ءَ زبھر آں۔ چہ وشّیاں، چہ ننگ ءُ ناموس ءَ ھم پد ءَ سھتے ءَ رند گاٹ دیوک اتک منی دستے بُتک اَنت پہ نان ورگ ءِ واستا ، من گپت گُٹ ءَ بُن ءَ دور دات ءُ جنَگ بندات کُت اِیشی ءِ کوکاراں دِگہ سَے پوجی تچان ءَ اتک من ءَ مان بست گوں لگت ءُ لٹّاں ،کرنٹ ھم جت اے روچ ءَ آ کُجام سزا نہ ات کہ من ءَ نہ دات اِش ، پد ءَ باریں چینچو شپ ءُ چنچو روچ بود ءَ نیتک آں وھدے بود ءَ کُت ، چاراں من چہ مردمی ءِ کٹّ ءَ شُتگ آں پد ءَ ھما اِنت من ، تھنائی ، تھاریں کُوٹی اِنت چم کہ گِندگ ءِ اُومان ءَ چِست بَہ اَنت ، پمّن ءَ سیاہ ءُ تہاریں شپ ، تئی ابیریں ترانگ۔

باریں دِگہ چُنت موسم ءَ زندگ بہ آں ھچ گْوشگ نہ بیت، بلے ھَو! پرے گپ ءَ دلجماں تئی گوم ءَ گْوازینتگیں مھر ءِ ابدمانیں موسم من ءَ داھم زند بکش اِیت من پد ءَ واتر کن آں گِلّہ مہ کن ، اگاں مُرت آں ھم گم مہ کن پد ءَ واتر کن آں۔ پرچا کہ شھید نہ مِر اَنت، شھید داھم زندگ مان اَنت ءُ منی پکر ءِ دیم ءَ بروک سلامت بات ئے وشیانی منگیراں بات ئے۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: زاناں بلوچ راجی آجوئی ءِ جُھد ءَ اسٹرٹجک ڈیپت ھست؟

نبشتہ کار: آئیشہ بلوچ

دی بلوچستان پوسٹ

اگاں ما دنیا ءِ گْوست ءِ راجانی سوبمندیں سِلاھبندیں جُھداں چمشانکے بہ دے ایں گُڑا ما سرپد بَہ ایں کہ تھنا ھما راجانی راجی آجوئی ءِ سِلاھبندیں جُھد ءُ گھگیری ٹوھیں زورگِرانی ھلاپ ءَ سوبمند بیتگ ءُ وتی راج اش آجو کُتگ اَنت وھدے کہ آیاں ماں وتی ڈیھ ءِ کِر ءُ کش ءِ ھمساھِگیں ملکان ءُ سیمسراں اسٹرٹجک ڈیپت رستگ اَنت۔ انچوشکہ 1955-75 امریکہ ءِ ھلاپ ءَ ویتنام راجدوستیں سِلاھبندیں گلانی اسٹرٹجک ڈیپت چین بوتگ اَت، 1971 ءَپاکستان ءِ ھلاپ ءَ بنگالی آجوئی لوٹوکیں سِلاھبندیں گل مُکتی بانی ءِ سٹرٹجک ڈیپت ھندوستان ءِ سرڈگار بوتگ اَت، 1980 ءِ دھک ءَ سوت یونین ءِ ھلاپ ءَ اوگان مجاھدین ءِ سٹرٹجک ڈیپت پاکستان بیتگ اَت ءُ دِگہ بازیں اِے وڑین رھدربری درور ھست انت۔ نی ما اول سر شُمارا سرپدی دے ایں کہ اسٹرٹجک ڈیپت چے بلاھے ءُ راجی آجوئی ءِ جُنزانی تہ ءَ اِے چونیں بِستارے دار ایت۔

اسٹرٹجک ڈیپت یک جنگی گالے، وھدیکہ یک زورآوریں زورگِرے یک نزوریں راجے ءِ سر ءَ اُرش بہ کنت ءُ نزور ءِ سرجمیں راج ءَ گُلام ءُ سرڈگار ءَ دستیگ بہ کنت گُڑا نزوریں راج ءِ بامردیں مھلوک ءُ آئی ءِ راجی سِلاھبندیں گل یک چیرجنگے کنان ءَ پدکَنز اَنت ءُ یک انچیں جاھے ءَ پد ءَ ھوار ءُ یکجاہ بنت کہ اود ءَ دژمن ءِ دست مہ رس ایت۔ بزاں ھما ھمساھِگیں جاہ ءِ واھُند تئی دژمن ءِ بلاھیں دژمنے بیت۔ وھدے کہ آ جاہ ءَ راج ءِ جنگی رھُشون یکجاہ بنت ءُ وتی راجی چیرجنگ ءَ نوکیں شوندات ءُ سٹریکچرے دے انت، راجی گل ءِ سلاھبند ءُ کُمک درگیج ءِ گلاں جُتائیں زمہ واریاں دے اَنت ھما جاھاں گھگیری باسکاں چیرجنگی سِلاھانی جُنزینگ ءِ ٹرینگ دیگ بنت ءُ چہ اود ءَ ھر وڑیں جنگی اُرش ءُ مراسا تیار کنگ بنت ھما جاہ ءَ را سٹرٹجک ڈیپت گْوش اَنت کہ اود ءَ تئی ھمساھِگ ترا جنگی ءُ زَر ءِ کِمک بہ کنت۔ چوناھیگا ماں بلوچی لبزانک ءَ من “اسٹرٹجک ڈیپت” ءِ بلوچی گال نہ دیستگ بلے ما ایشی ءَ “جنگی ھنکین” ءِ نام دات کن ایں۔

دنیا ءِ ھما راجانی سِلاھبندیں گلاں جنگی ھنکین یا اسٹرٹجک ڈیپت دیگ نہ بیتگ یا آیاں جنگی ھنکین نہ رس اتگ اَنت آ مُدام بے سوب بیتگ اَنت انچوشکہ پلستین ءِ پی ایل او ءُ ھماس کہ ایشانی کِر ءُ کش ءِ ھمساھِگیں اَرب مُلک اُردون، مسر، سوریا ءُ لیبان ءَ اسرائیل ءِ تُرس ءَ آیانی چیرجنگی باسکاں جاہ ءُ کُمک نہ داتگ ءُ نہ دے اَنت۔ ھمے وڑ ءَ ھندوستان ءِ ھلاپ ءَ کشمیری سِلاھبندیں گلاں ھم نہ پاکستان نی جاہ نہ دنت چی ءَ کہ ھندوستان ءَ وتی شوندات ءَ بے کساس تْرُندیں جنگی بدلی آؤرتگ اَنت کہ اگاں ھندوستان ءِ پوج ءِ سر ءَ اُرش بیت گُڑا ما پاکستان ءِ تہ ءَ اود ءَ اُرش کن ایں ھمد ءَ ناشرکار ھنکینی انت بزاں پاکستان ءَ مار اِت کہ چریشی ءَ جنگ روک بیت کنت ءُ جنگ ءَ پاکستان ءَ تباہ ءُ پْروش ءِ آماچ بیت۔ نی ما بچار ایں کہ زاناں مئے بلوچ راجی سِلاھبندیں جُنز ءَ اِے وڑیں ھاسیں داد ھست انت یا اِنّاں؟

اگاں ما مرچیگیں میان اُستمانی جاورالاں بہ چار ایں گُڑا بلوچ راجی سِلاھبندیں گلاں ھم وڑے نا وڑے ءَ جنگی کُمک ءُ جنگی ھنکین چہ بلوچ راج ءِ ھمساھِگ رس اَنت۔ اگاں ما یمن جنگ ءَ ھورت بچار ایں کہ اود ءَ لکھانی کچ ءَ ایران ءِ پلہّ مُرز ی ئیں بے گُناھیں یمنی شیئا مسلمان مُرتگ اَنت، یمن ءِ سرجمیں اسکول کالج، نادراھجاہ، شھدگ، بریجیز، کارجاہ ءُ ھر وڑیں آسراتی (انفرسٹریچر) چِل ءُ سے مُلکانی کوڑائیں گل اَرب کولیشن پورس ءَ بیران کُتگ اَنت ءُ مرچی اود ءَ لکھانی کچ ءَ مردم گُژن ءِ آماچ اَنت۔ ما بے ھال مہ بہ ایں کہ پاکستان ءِ کساس چِل ھزار لشکر سھودی ارب ءِ سروگانی ءَ ھمے اَرب کولیشن ءِ بَھر ءُ ھوار اَنت ءُ ایشانی یک سرجمیں جنگی زمہ داری یے پاکستان ءِ نشتگیں جنرل راھیل شریپ سروگانی کنگ ءَ انت۔ گُڑا شُمئے ھیال ءَ ایران بلوچ راج ءَ پاکستان ءِ ھلاپ ءَ کُمک نہ کنت چی ءَ کہ ھر کس سرپد اِنت کہ ارب کولیشن پہ ایران ءِ ھلاپ ءَ اڈ دیگ بیتگ۔

اگاں اوگانستان ءِ 1992-94 ءِ اُلسی جنگ ءَ بہ گند ئے ءُ پد ءَ 1994-2002 ءِ وتگڑیں مُلانی سرکار ءَ بچار ئے کہ سرجمیں اوگانستان پاکستان ءَ پہ وتی جنگی مول ءُ مُراداں تباہ کنائینت کہ پاکستان ءَ ھم مُدام لوٹ اِت کہ ھندوستان ءِ ھلاپ ءَ اوگانستان پہ پاکستانی لگوریں لشکر ءَ یک جنگی ھنکینے بہ بیت ءُ وھدے کہ پاکستان پہ کشمیر ءِ وتگڑیں آجوئی ءَ ھندوستان ءِ ھلاپ ءَ کوڑئیں اسلامی جنگول ءَ روان بہ دنت ءُ پد ءَ جنگے بُنگیج بہ بیت گُڑا ھندوستان ءِ ھیوی ملیٹری کالمز پاکستان ءَ اُرش کنان ءَ پاکستان ءِ لاھور، سیالکوٹ،پیسل آباد ءُ روالپنڈی وڑیں مزنیں شھراں زورگر اَنت گُڑا پنجابی پوج یکبرے تچان ءَ اوگانستان ءَ کیت پد ءَ ری گروپ بیت ءُ ھندوستان ءِ پوج ءِ سر ءَ اُرش کن اَنت۔ بلے بہ گند ئے 1996 تاں 2002 ءَ ماں اوگانستان ءَ پاکستانی کاسگ چٹّیں تالبانانی سرکار اَت بزاں اوگانستان پہ پاکستان ءَ یک وشین ءُ شریں اسٹرٹجک ڈیپتے اَت گُڑا ھمے وھداں چے ءَ پہ کشمیر ءِ آجوئی ءَ ھندوستان ءِ ھلاپ ءَ جنگ ئِے نہ کت؟-

البت پاکستان بہ گِر 1979 داں روچ ء مرچیگ ءَ اوگانستان ءَ یکشل ءَ تباہ ءُ بیران کنائینگ انت وھدے کہ 9/11 ءِ ویل ءَ پد امریکہ ءَ اوگانستان ءِ تہ ءَ جنگ کنان ءَاوگان تالبان ءِ سرکار ءَ پْروش دات گُڑا ھمے ناشرکاریں تالبان ءِ یکجاہ ءُ پد ءَ سلاھبند کنوک پاکستان بوتگ ءُ بِہ گِند ئے اوگانستان ءِ مرچیگیں تالبان ءِ جنگی اُرشانی پُشت ءَ پاکستان ءِ لشکر انت اوگانستان ءِ بازیں رھشُون پاکستان ءِ ھلاپ ءَ تچک ءَ گْوش اَنت کہ پاکستان اوگانستان ءِ بیرانی ءِ زمہ وار انت چریشی ءَ زاھر بیت کہ اوگانستان ھم پاکستان ءِ بلاھیں دژمنے ءُ آزات ھیالیں اوگان راجدوست بلوچ راج ءَ پنجابی پاکستان ءِ ھلاپ ءَ ھر وڑیں جنگی کُمک کنت بس بلوچ راجی سِلاھبندیں گلاں یکمُشت بوگ لوٹ ایت، آیاں راج ءِ وانِندگیں ورناہ راجی آجوئی گلاں ھوار کنان ءَ وتی لوبی مزن ءُ جْوان کنگ لوٹ ایت کہ بلوچ راجی آجوئی ءِ سِلاھبندیں جُھد وتی بُندری راجی لوٹاں پیلو بہ کنت ءُ راج ءَ چہ بدواھیں دُژمن ءَ آجو بہ کن اَنت۔

نزوریں راجانی ڈیھ ءِ زورگِرگ ءُ نزوریں راجانی سرڈگار دزگیر کنگ پہ زوراکیں جھانگیراں آسان انت بلے زورگِری مُھکم کنگ سک گِران انت۔ چیرجنگاں سوت یونین، امریکہ ءُ مِسر وڑیں تاکتوار ژند ءُ پند کنان ءَ پْروش داتگ انت گُڑا مئے پِنڈُوکیں دژمن بلوچ ءُ بلوچ سرڈگار ءَ وتی زوراکیاں برجاہ کُت نہ کنت بلے بَے ایش انت کہ ما بلوچ وت ماں وت تپاک ءُ یکمُشت بَہ ایں، راجی آجوئی ءِ سِلاھبندیں گلاں یک رِد ءُ بندی (آرگنائیزڈ) گلے جوڑ بہ کن ایں۔ مرچاں بلوچ راج ءِ %95 آبادی پہ زورگِریں دُژمن ءَ کست ءُ کینگ دار ایت گُڑا اے کست ءُ کینگ بلوچ راجی آجوئی جُنز ءِ باج انت کہ انوں بلوچ چاگِرد وتی راجی آجوئی ءِ ارزِشت ءُ بِستار ءِ بابت ءَ آگاہ ءُ سرپد انت بلوچ راج شالا زیت وت ماں وت، یکمُشت، ھمدل ءُ ھمکوپگ بہ بات اَنت ءُ بلوچ راج شالا زورگِر ءِ دست ءَ آجو بہ بات اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سربوتگیں ھالانی رِد ءَ بلوچستان ءِ دمگ واشک، دکی، کلات ، اوستہ محمد ءَ جتا جتائیں وئیلاں نُھ مردم بیران بوتگ ءُ سَے ٹپی وھدیکہ شال ءَ جونے دست کپتگ –

گیشیں ھالانی رِد ءَ بلوچستان ءِ دمگ واشک ءَ گیس سلینڈر ءِ ترکگ ءَ شش مردم بیران بوتگ ءُ سَے ٹپی بوتگ انت – وئیل واشک ءِ دمگ ماشکیل ءَ ویلڈنگ ءِ دکان ءَ دیم ءَ اتکگ – ھمے گوشگ بوگ ءَ انت وئیل آماچ بوتگیں مردمانی سیادی چہ افغانستان ءُ سیمسری دمگ قلعہ عبداللہ ءَ انت –

دکی ءَ ٹرک ءِ ڈیکر کنگ ءَ پرپٹ سوارے بیران بوتگ –

وئیل کلی پرانا دکی ءِ کور ءِ پُھل ءِ سر ءَ دیم ءَ اتکگ کہ اشکرانی چہ لوڑیں ٹرک ءِ ڈیکر کنگ ءَ پنجاہ ءُ ھپت سالی ئیں خرم خان ء محمد حسن جھمنند واکم رباط دکی بیران بوتگ – جون نادراھجاہ ءَ سر کنگ بوتگ اود ءَ اژدری چار ءُ ٹپاس ءَ پد جون کھول ءِ ھوالگ ءَ کنگ بوتگ –

دگہ وئیلے بلوچستان ءِ دمگ کلات ءَ دیم ءَ اتکگ کہ ناشناسیں مردماں گلہ جوھان ءِ مانداشتگ ءُ ھدابند ءَ بازیں مالی تاوان ءِ داتگ –

وئیل گوستگیں شپ ءَ کلات ءِ دمگ کوھنگ ءَ دیم ءَ اتکگ کہ دھکان کار ءِ گلھانی جوھان کہ پہ دُرشگ ءَ ایر بوتگ انت ناشناسیں مردماں آس داتگ انت، کہ اھانی تہ ءَ کساس ھژدہ بیست گونی دان در اتکگ ات – بلے ماندارگ ءِ سوب ءَ درسیں گلہ ستکگ ءُ پُر بوتگ انت –
زانگ بہ بیت گوستگیں سال ءَ ھم اے سَے چار دھکان کارانی گلہ سوچگ بوتگ انت – چریشی ءَ چہ مھلوک ءَ لکھانی ھساب ءِ مالی تاوان رس اتگ- کلات مھلوک ءَ کتکاریں مردمانی گرگ بندیگ کنگ ءِ لوٹ کتگ –

بلوچستان ءِ بنجاھی شھر شال ءَ انسکمب دگ ءِ سر ءَ مردمے ءِ جون ءِ دست کپتگ –

چیپا بنشون ءِ رِد ءَ جون ءِ پجار نبوتگ، جون نادراھجاہ ءَ سرکنگ بوتگ اے درگت ءَ گیشیں پٹ ءُ پول برجاہ انت –

دومی نیمگ ءَ بلوچستان ءِ دمگ اوستہ ءَ محمد ءَ گیرت ءِ نام ءَ دو مردم کُشتگ بوتگ اَنت –

پولیس ءِ رد ءَ اوستہ محمد ءِ دمگ کیٹل فارم تانہ ءِ نزیک ءَ گوٹ میر فائق علی خان جمالی ءَ الھی بخش کوسہ نامیں مردمے ءَ وتی برازتک ءُ سانول موندرانی گیرت ءِ نام ءِ سر ءَ تیر باران کتگ کشتگ انت جندے تتکگ –

ھال ءِ سربوگ ءَ دمگی ایس ایچ او ءَ وت ءَ وئیل جاہ ءَ سر کتگ ھردوکانی جون دست گپتگ ءُ اژدری چارٹپاس ءَ پد کھول ءِ ھوالہ داتگ انت –

بلوچستان ءِ بنجاھی شھر شال ءَ پریس کلب دیما وائس فار بلوچ زھرشانی برجاہ، زھرشانی ءَ مروچی چار ھزار سَے سد ءُ سی ءُ ھشت روچ سرجم بوتگ – بلوچ ایکٹوسٹاں بنجل ءِ تر ءُ تاب کرتگ ءُ بیگواھیں مردمانی کھولانی گوما دلپدردی درشان اتگ – بی ایس او ءَ بانداتگیں زھرشانی ءِ پلہ مرزی کرتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءِ گوشگ ات کہ پاکستان ءِ تہ ءَ بلوچستان ھما دمگ انت کہ اود ءَ پوج ھاکمی کنگ ءَ انت ءُ پوج ءَ درسیں واک دست ءَ انت ھمے ھاتر ءَ پرچاکہ اے ملک ءِ سنچ ھمیش انت کہ سیاسی واک مدامی پوج ءِ دست ءَ انت –

آئی ءِ گوشگ ات کہ بلوچستان مردمانی بنکی ھک ھمک روچ لگتمال کنگ بوگ ءَ انت کہ آھانی زندگ بوگ ءِ ھک، سیاد وارساں گوں دُچار کپگ ءِ ھک، گپ جنگ ءُ نبشتہ کنگ ءِ ھک، ھالانکہ زکر کنگ ءِ ھک ھم پچگرگ بوتگ اَنت بلے اے درستیں بندشاں ابید مروچی بلوچستان ءِ تہ ءَ پُرایمنیں جھد دیمروئی کنگ ءَ انت –

دومی نیمگ ءَ بلوچ نودربر گل شال ھنکین ءِ جارکش ءِ نیمگ ءَ شنگ کرتگیں پلامرزی درشان ءَ گوشگ بوتگ بی ایس او شال زون باند ءَ وائس فار بلوچ مسنگ پرسنز ءِ نیمگ ءَ نودربر رھشون زاکر مجید بلوچ ءَ ھوار ایندگہ بیگواھیں مردمانی زورانسری آوار جنی ءِ بگیری ءَ آئی ءِ یل کنائینگ ءِ ھاتر ءَ شال ءَ پُرایمنیں زھرشانی ءِ پلامرزی ءَ کنت –

آئی ءَ دیمتر ءَ گوشتگ کہ بلوچستان ءَ درساں مستریں جیڑہ زورانسری آوارجنی انت ریاست اے جیڑہ گیش ءُ گیوار کنگ ءَ ابید بلوچ نودربر، راجداریں باسکاں زورانسری آوار جنگ ءُ بیگواہ کنگ ءَ اے جیڑہ ءَ گیش کنگ انت بی ایس او شال ھنکین ریاستی ادارھاں چہ لوٹ کنت کہ آ نودربر رھشون زاکر مجید بلوچ ءَ ھوار درسیں بیگواھیں نودربر ءُ باسکاں پہ وشی یل بہ کنت –

ڈانڈار ءَ پوجی پانگس ءِ سر ءَ دونیمگ ءَ اُرش کتگ دو کارمند کشتگ ءُ پانگس تاوان داتگ – گوھرام بلوچ

سربوتگیں ھالانی رِد ءَ کیچ ءِ دمگ کولواہ ڈندار ءَ ناشناسیں سلاہ بندیں مردماں پاکستانی پوج ءِ پانگس ءِ سر ءَ اُرش کتگ۔

اُرش مروچی ادار سےَ ءُ نیم ءَ ڈانڈار ءِ ھند بند ء ملک ءَ برجاھیں پاکستانی پوجی پانگس ءِ سر ءَ کنگ بوتگ، چریشی ءَ جانی ءُ مالی تاوان رس اتگ، اُرشکار درآیگ ءُ رؤگ ءَ سوبمند بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تھ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں مروچی نیم بیل وھد ءَ کیچ ءِ دمگ ڈانڈار ءِ ھند بند ء ملک ءَ برجاھیں پوجی پانگس ءِ سر ءَ دورجنگ ءُ راکٹ ءُ دگہ مزنیں سلاھانی گوما اُرش کُتگ –

جارکش ءَ گوشتگ کہ سرمچاراں دو نیمگ ءَ چہ اُرش کتگ- دو راکٹ گولہ پانگس ءِ تھا کپتگ انت چریشی ءَ پانگس ءِ سک باز تاوان رستگ، اےاُرش ءَ دو پوجی کارمند ھما دمان ءَ مرتگ ءُ وھدیکے بازینے زدگ بوتگ اَنت –

جارکش میجر گوھرام بلوچ ءَ دیمتر ءَ گوشتگ کہ اُرش ءَ پد ڈنڈار ءِ بنجاھی بنجل ءَ چہ پوجیانی ھاتر ءَ دگہ ٹولی ءِ جنگ جاہ ءَ دیم دیگ بوتگ –

گڈسر ءَ جارکش ءَ گوشتگ کہ زورگیریں پوج ءِ سر ءَ مئے اُرش بلوچستان ءِ آجوئی تاں برجاہ مان انت –

بلوچستان ءِ بنجاھی شھر شال ءَ بیگواھیں بلوچ نودربر رھشون زاکر مجید ءِ بیگواھی ءَ دوزدہ سال سرجم بیگ ءَ باندا زھرشانی ءِ درگت ءَ شھر ءَ پنتاک ءُ دیوال نبیسگ بیتگ اَنت –

شال ءِ جتا جتائیں جاھاں دیوالانی سر ءَ زاکر مجید ءِ گوانک ءُ سر وزیر عمران ھان ءِ کرتگیں مسام ءِ درگت ءَ نودربراں نبشتگ کرتگ اَنت –

آیاں نبشتگ کرتگ کہ“ سر وزیر عمران ھان تئی مسام ءَ سَے ماہ ” گوستگ بلے تنی وھدی تو ھما مردماں گوں زبان کرتگ آیانی مردم بیگواہ اَنت ءُ اشانی ھواری ٹیک ھشت جون کرتگ –

ھمے وڑ شال ءِ جتا جتائیں جاھاں زاکر مجید ءِ مات ءُ ماما قدیر ءِ ھواری ءَ نودربراں پنتاک “پمفلیٹ “بھر کرتگ ءُ مھلوک ءَ گوں دزبندی کرتگ کہ باندا بزاں ھشت جون ءَ شال ءِ پریس کلب ءِ دیم ءَ بلوچ نودربر رھشون زاکر مجید ءِ مات ءِ دزبندی ءَ بیوکیں زھرشانی ءَ بھر بہ زور ایت –

ھمے درگت ءَ زاکر مجید ءِ مات ءُ دگہ انسان دوستیں مردماں بانداتگیں روچ ءِ درگت ءَ چاگردی رسانکجاہ ٹوئٹر ءَ ھم تامر بنداں بانداتگیں روچ ءِ درگت ءَ وتی وتی تامر بندانی تہ ءَ بانداتگیں روچ ءِ درگت ءَ بھر زورگ ءِ دزبندی کرتگ-

زانگ بہ بیت زاکر مجید سال دو ھزار ءُ نُھ ءَ مستونگ ءِ دمگ پڑینگ ءَ آباد ءَ گرگ ءُ گار کنگ بیتگ ءُ آئی ءِ بیگواھی ءَ باندا بزاں ھشت جون ءَ دوازدہ سال سرجم بیت اِنت –

زاکر مجید ءِ مات ءُ آئی ءِ گوھار پرزانہ ءَ پاکستان ءَ ھوار دری انسانی ھکانی گل ءُ بازیں ادارھاں زاکر مجید ءِ واستا یکشل ءَ جد ءُ جھد کرتگ بلے تنی وھدی آیانی جد ءُ جھد سوبین نہ بیتگ ءُ زاکر مجید ءِ مات یکشل ءَ ھمے پریات ءَ کنگ ءَ اِنت کہ منی زھگ ءَ اگاں گناہ ءِ کرتگ گڑا آمیدگس ءَ پیش کنگ بہ بیت –

گوستگیں روچاں سمی دین ءَ ھم یک ٹوئٹے ءَ گوشتگ اَت کہ زاکر مجید ءِ مات ءَ اسلام آباد ءَ بیوکیں نندانکی زھرشانی ءَ گوشتگ کہ من اسلام آباد ءِ پارلیمنٹ ءِ دیم ءَ شد داں مرگ ءِ ھرتال ءَ ننداں بلے آ رند ءَ ھمرھانی گوشگ ءَ نیلگ بیتگ –

سر بیتگیں ھالانی رد ءَ روکپتی بلوچستان ءِ دمگ فنوج ءَ بلوچ ازمکار بانک رحموک نصرتی نود سال ءِ اُمر ءَ گوستگیں روچ ءَ بیران بیتگ –

بانک رحموک نصرتی روکپتی بلوچستان ءَ مزنیں نامے ءِ بستار ءَ زانگ بیتگ ءُ آئی ءَ بازیں مراگشاں بھر زرتگ –

بانک رحموک نصرتی ءَ بلوچی لیلو، زھیروک ءُ بازیں ازمانی سر ءَ کار کرتگ –

آئی ءَ گوستگیں شانزدہ سال پیسر ایران ءِ شھر تھران ءَ بیتگیں یک مراگشے ءَ داد ھم گپتگ –

آئی ءِ درگت ءَ گوشگ بیت کہ آئی ءِ لیلو ءُ زھیروک ءِ تہ ءَ مزنیں ازمے گون بیتگ ءُ آئی ءِ ازم ھما کوھنیں ترانگاں پرینین اِیت –

آئی ءُ گوستگیں روچ ءَ نود سال ءِ اُمر ءَ ماں فنوج ءَ اے دنیا یلہ کرتگ ءُ وتی ابدمانیں جاہ ءَ شتگ –

آئی ءِ بیرانی ءَ روکپتی بلوچستان ءَ بندوکیں چاگردی رسانکجاھاں کارمرد کنوکیں مردم پدردی درشان کنگ ءَ اَنت –