TBP Balochi

سندھ ءِ زھر رائیپور ءَ بیگواھیں مردمانی یل کنگ ءِ واستا زھرشانی بنجل ءَ مروچی بیست ءُ ھشت روچ سرجم، شاگعد رھشون زاکر سھتو ایوب کاندہڑو، ساگر سعید گاڈھی، شبیر بلیدی، اعجاز گاھو، انصاف دایو، طفر چانڈیو، اللہ ودھایو مھر، موھن میگھواڑ، پٹھان خان زھرانی، مرتضی جوٹیجو، سھیل رضا بھٹی، مھمد خان وگھیو، نسیم بلوچ، زاکر مجید ءُ دگہ سندھ ءُ بلوچستان ءَ زورانسری آوار جنگ ءُ بیگواہ کنگ بیتگیں سیاسی باسکانی یل کنگ ءِ واستا زھرشانی برجاہ اِنت، زھرشانی بنجل ءَ جتا جتائیں پھناتاں بندؤکیں مردم بھر زورگ ءَ اَنت-

ھمے وھد ءَ آیاں گشتگ کہ سندھ ءُ بلوچستان ءَ زورانسری آوار جنی ءِ نہ کُٹوکیں درچے بندات کنگ بیتگ کہ چریشی ءِ سبب ءَ ھزارانی کچ ءَ سیاسی باسک دزگیری ءَ پد بیگواہ کنگ بیتگ اَنت –

زھرشانی بنجل ءَ ھواریں رھشوناں گشتگ کہ زورانسری ءِ آوار جنی یو این او ءِ دَہ ستمبر نوزدہ سد ءُ چل ءُ ھشت ءَ یک چارٹرے شنگ کرتگ کہ انسانی ھکانی ھلاپ ورزی، ءُ وت پاکستانی آئین ءِ ارٹیکل 10.9.4ءُ 14 ءِ ھلاپ ورزی اِنت چُشکہ پاکستانی چیریں ادارھانی نیمگ ءَ کنگ بیگ ءَ اِنت –

آیاں میان اُستمانی آمیدگس، انسانی ھکانی گل، سیاسی ءُ چاگردی ءُ رسانکدراں گوں دزبندی کتگ کہ آ پاکستانی اسٹیبلشمنٹ ءِ گیر اکلاکی ءُ گیر کانونی زورانسری آوار جنیانی سر ءَ گامگیج بہ زور اَنت ءُ سندھ ءِ راجدوستیں رھشوناں اکلاکی ءُ کانونی کمک ءَ بہ کن اَنت –

شال ءَ پاکستانی پوج ءَ لوگاں بیڑبرتگ ءُ منیب بڑیچ آوار جتگ ءُ گوں وت برتگ-

سربوتگیں ھالانی رِد ءَ چار ستمبر ءَ پاکستانی پوج ءَ شال سریاب دگ ءَ بلوچستان شھدربرجاہ ءِ نزیکیں دمگ شفیع کالونی ءَ یک لوگے ءِ سر ءَ بیڑبرتگ ءُ منیب علی بڑیچ ء نور علی بڑیچ آوار جتگ ءُ بیگواہ کتگ-

منیب علی شال ڈگری کالج ءَ ایف ایس سی نودربرے-

کھول ءَ منیب علی بڑیچ پاکستانی پوج ءُ چیریں ادارھانی دست ءَ آوار جنگ ءِ گپ راست کُتگ گوشتگ کہ منیب علی ءَ یل بہ کن اِت

زانگ بہ بیت چیزے وھد اِنت کہ بلوچستان ءِ جتاجتائیں دمگاں پاکستانی پوج ءُ چیریں ادراھانی دست ءَ زورانسری آوار جنی یکرندے پد ءَ یکشلہ گیش بوان اِنت-

دومی نیمگ ءَ بلوچستان ءِ جتائیں دمگاں بیگواہ کنگ بوتگیں ورنایاں سی ٹی ڈی ءِ نیمگ ءَ دروگیں میڑ نام ءِ سر ءَ کشُگ برجاہ ءَ اِنت-

بلوچستان ءَ پاکستانی پوج ءُ چیریں ادراھانی دست ءَ زورانسری آوار جنگ بوتگیں مردمانی بگیری ءَ شال ءُ کراچی ءَ گوستگیں یک مدتے بیت کہ پرایمن زھرشانی ماماقدیر ءُ نصراللہ بلوچ ءِ سروکی ءَ برجاہ ءَ اِنت-

سر بیتگیں ھالانی رد ءَ مروچی پنجگور ءَ سول سوسائٹی ءُ دگہ گلانی نیمگ ءَ پنجگور ءُ امن ءُ ایمنی ءِ تباھی ءِ پژدر ءَ زھرشانی، زھرشانی ءَ بازیں کچے ءَ زھگ ءُ زالبولاں ھوار دگہ پھناتاں بندوکیں مردماں بھر زرتگ –

زھرشانی جاوید چوک ءَ بندات بیتگ ءُ شھر ءِ جتا جتائیں دگانی سر ءَ تران بیتگ ءُ زھرشانی کنوکانی دستاں پنجگور ءَ کُشگ بیتگیں مردمانی اکس ءُ انساپ نبشتگ بیتگ اَنت، زھرشانی پنجگور پریس کلب ءَ مُچی ءِ دروشم ءَ مُچ بیتگ ءُ اود ءَ مھلوک ءَ تران کرتگ –

زھرشانی کنوکاں انتزامیہ ءِ سر ءَ ایراد گپتگ ءُ گوشتگ کہ گوستگیں بازیں روچانی تہ ءَ پنجگور ءَ بازیں کچے ءَ مردم کُشگ بیتگ اَنت ءُ بلے انتزامیہ ءَ ھنچش بے سماہ اِنت کہ آئی ءِ گوشاں مورے ھم نہ وارت اِنت –

آیانی گوشگ اِنت کہ پنجگور ءَ لس بے میاریں مھلوک کُشگ ءُ ریچگ بیگ ءَ اَنت بلے کوشکار ھنچش روچ ء رھمان بازار ءَ ترگ ءَ اَنت اے گپ پہ انتزامیہ ءَ شرمے گپے بیت اِنت –

آیاں گُشتگ کہ پنجگور ءَ یک ماھے ءِ تہ ءَ یک درزنے ءَ گیش مردم کُشگ بیتگ اَنت بلے تنی وھدی انتزامیہ ءُ پولیس ءَ یک مردمے ءِ کُشندہ ءم دزگیر نہ کرتگ اَنت پولیس ھنچش بے سوب بیتگ کہ آئی ءِ دست ءَ کوشکار گرگ بیگ ءَ نہ اَنت –

آیاں گُشتگ کہ پولیس ءَ دُز ءُ ڈنگانی دیم ءَ وتی سلاہ چگل داتگ اَنت پیسر ءَ دُزاں بازار ءِ تہ ءَ مردم کُشتگ اَنت نِی لوگانی تہ ءَ پترگ ءُ مھلوک ءَ چُک ءُ زالبولانی دیم ءَ بے دردی ءَ کُشگ ءَ اَنت –

آیاں گُشتگ کہ پنجگور ءِ جاورھال ھنچش ناگیگ بیتگ اَنت کہ اد ءَ مردم ترس آماچ اَنت ءُ وتی زند ءَ گیر مھپوز اَنت –

آیاں گُشتگ داں انیگ ءَ پنجگور ءَ مولوی عبدالحئی، صغیر، جلیل سنجران، علاولدین، قدیر موسیٰ، سفیر موسیٰ ءُ موسیٰ، افتاب مجید، کسان سالین قدیر خلیل، عابد، خان مھمد بلوچ، نصیر احمد، تابش بلوچ، جعفر بلوچ، سلیم ءَ ھوار بازیں مردمے کُشگ بیتگ اَنت-

آیاں گُشتگ کہ پنجگور ءِ پولیس ءَ نا کوشکار دزگیر کتگ اَنت نانکہ کوشانی سبب دیم ءَ آورتگ اَنت ءُ زھرشانی کنوکاں پنجگور ءِ ناوشیں جاورھالانی شر کنگ ءِ واستا انتزامیہ ءُ دگہ ادارھاں دزبندی کرتگ –

نبشتانک: تئی دیدار انگت سرجم نہ اَت

نبشتہ کار: سنگت چراگ بلوچ

دی بلوچستان پوسٹ

اے منی اولی رند اَت کہ من ترا دیست، تو چہ وتی وانگ جاہ ءِ موکل ءَ پد مئے اوتاگ ءَ اتک ئے وھدے در ءِ دپ ءَ چہ من دیست کہ یک نرمیں توارے ءَ کسے ءَ گُشت اسلام الیکم ما کُل آن سلام ءِ پسو دات ءُ گوں پسو ءِ دیگ ءَ گوں منی چم تئی کسانیں بالاد ءَ کپت اَنت ءُ داں دومی سنگت ءَ گُشت عمر جان بیا اِد ءَ نند گڑا من ھمد ءَ زانت کہ تئی نام عمر جان انت گڑا من ترا باز ھُورتی ءَ چار اِت تئی ھمک گپ تئی ھمک بچکند یک انچیں مھرے بکشاھگ ءَ آت کہ من چے بگُش آں-

بس تئی دپ ءَ یکیں گپ اَت کہ “گُلزمین” گُلزمین” گڑا اے دیوان ءَ ما باز سنگت ساڑی اِت اَنت شپ ھمے وڑ ءَ گوں تئی شیرکنیں گپ ءُ مسکراں انچو گوست کہ ھچ سما نہ بوت داں روچ بوت ءُ ما کُل سنگت وھد ءِ سر ءَ پاد اتک آں ءُ عمر جان بزاں مئے کسان سالیں پدائیں سنگت سربلند داں سبارگ ءَ مئے ھدّ ءَ بوت ءُ پد ءَ گوں بچکندئے ءَ شُت ءُ گُشت ئِے سنگتاں شمئے دیوان سک وش اَت بلئے نوں من رواں کہ باندا منی وانگ ھست بس دیم ئے ھپتگ ءَ پد ءَ کایاں انشااللہ-

گڑا وھد ھمے وڑ گْوزان بوت ھمک ھپتگ اتک ءُ تو اتک ئے گوں وتی شوکیں بچکنداں، گڑا دیوان ات مسکرا اَت ھمک نیمگ ءَ کسہ اَت اَنت شھیدانی ھمک نیمگ ءَ مھر اَتاں گُلزمین ءِ وھد ھمے وڑ روان اَت سنگتانی دیوان سک وش اَت داں یک روچے مرکز ءِ سنگتاں پہ من کلوہ روان دات کہ چراگ جان بیا مارا کار ھست گڑا من گوں وتی سپر ءِ چست ءُ ایراں دست گٹ بوت آں ءُ منی در کپگ ءِ روچ ءَ تئی موکل ءِ روچ اَت گڑا یک رندئے پد ءَ تئی دیدار نسیب بوت ءُ پد ءَ یک رندئے گُلزمین ءِ مھرانی کسہ بندات بوت اَنت۔

وھد انچوش شُت ھچ سما نہ کپت داں در ءِ دپ ءَ گاڑی ءِ ھارن ءِ توار بوت بزاں منی ھمراہ اتک اَنت گڑا من سنگت رکست کنگ بندات کُت اَنت ءُ وھدے من ترا رکست کُت گڑا تو گوں یک بچکندئے ءَ گُشت رکست اف ھوار ایں سنگت گڑا من اوں کند اِت ءُ گُشت آجوئی اسکاں ھوار ایں سنگت گڑا من وتی سپر ءَ در کپت آں وھد ھمے وڑ رواں اَت ھمک سنگت گوں آشوبی کاراں گُلائیش اَت اے میان ءَ سے ماہ گوست گوں آشوبی کاراں ھنچو دست گٹ اتاں کہ ھچ سما نہ کپت داں ھمے تئی پدائین اُرش ءِ روچ اتک ما ھچ سرپد نہ اتاں داں سنگتے گُش ایت کہ گوادر ءَ چینیانی سر ءَ تراکے بوتگ ءُ تراک پدائینے بوتگ گڑا کُل سنگت دلجم بوت اَنت کہ پھک ءَ پھک مجید برگیڈ بیت پرچا کہ چینیانی سر ءَ اُرش ھمک وھد ءَ مجید برگیڈ ءِ نرمزاراں کُتگ ءَ باقی مذھبی مھلوک وَ پاکستان ءِ وتی پراکسی انت آ وَ ھچ وڑ ءَ چین ءِ سر ءَ اُرش نہ کن اَنت آ ھما جاہ ءَ اُرش کن اَنت کہ اود ءَ پاکستان ءِ وتی نَپ ءُ سیتّ بندوک بنت گڑا ما کُل سنگت ودار ءَ بے تاھیر اَتاں کہ کئے بیت ھمے وش بھت کہ اے مزنیں کُربانی یے داتگ مئے چم گوں رسانکدر ءَ سک اتاں ءُ بی ایل اے ءَ اُرش ءِ زمہ واری من اِت کہ منی یک نرمزارے ءَ اے اُرش کُتگ ءُ آ مزن جگر ءِ نام سنگت سربلند بلوچ انت ءُ ھمے زمہ واری ءَ گوں سربلند ءِ یک اکسے اوں شنگ کُتگ اَت من اکس دیست من چٹ پریشان بوت آن کہ اے وَ وش تبیں عمر جان انت ءُ منی ھیال گوں تئی ھما گپ آں شُت کہ مئے دیوان ءِ تہ ءَ سنگت شھید ریھان جان ءِ گپ بوھگ ءَ ات ءُ تو گُشت کہ جاھے پگر مھکم بنت اود ءَ زندگی ھچ بستار نہ داریت ءُ نئیکہ اُمر ءُ مرچی تئی ھمے گپ تو وت سابت ءُ پدّر کُت ءُ مارا پیش داشت کہ زندگی ھچ بستار نہ داریت تئی ھمے گپ ءُ تئی ھمے مزنیں کُربانی ءَ مئے کُل سنگتانی پگر گیش مُھکم کُت ءُ گُڈ سر ءَ من گُشگ لوٹ آں ” یار عمر جان منی ارواہ” تئی دیدار انگت سرجم نہ اَت ءُ تو راجدپتر ءِ تہ ءَ زندگی کنگ بندات کُت تو نمیران ئے تو زندگ ئے ھمک دلاں-

رُخصت اف ھواریں سنگت زینؔ جان

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ندر پہ شهید سنگت رضا بهار ءِ نام ءَ

شائر: سلیم ناز

دی بلوچستان پوسٹ

وتن دیوانگاں سھریں سلامیں
سران بشک انت کہ پرچی راج گلامیں

بھار جانشود بوت هوناں بھاریں
نہ کت سوب دژمناں جونان تلامیں

گُش انت آشوب وتی بچان ءَ وارتیں
بلے راست ءُ همے هکیں کلامیں

لگور ءُ کاسک چٹان پٹ ءُ لانت
دان هپت پشت ءَ تئی نام زّر ملامیں

منا آجوئی ءِ بیرک مان بڈ ءَ
من زانان منزلون نزدیک دو گامیں

چہ ھشت سالاں بیگواھیں جمیل بلوچ ءُ گوستگیں ماہ ءَ پنجگور ءَ آوار جنگ بوتگیں نجیب بلوچ ءِ یل کنائینگ ءِ ھاتر ءَ مروچی کراچی پریس کلب ءِ دیم ءَ یک روچی شدکشیں زھرشانی بنجلے ءَ پد جمیل بلوچ ءِ زھگ ءُ نجیب بلوچ ءِ گوھار اسما بلوچ ءَ کراچی پریس کلب ءِ دیم ءَ تران کنان ءَ گوشتگ کہ منی پت جمیل رحمت ھشت سال ءَ پیسر بیست ءُ نھ اپریل دوھزار سیزدہ ءِ سھب ءَ مئے میتگ ءَ آواران ءَ مئے چمانی دیم ءَ پاکستانی پوج ءَ زورانسری آوار جتگ ءُ بیگواہ کتگ -پت ءِ آوار جنی ءَ چہ مئے زند ازاب ءِ تہ ءَ گوزگ ءَ بوتگ کہ مروچی ءَ چہ یک ماھے پیسر بزاں یازدہ اگست ءَ ایپ سی ءَ منی برات نجیب بلوچ کہ چہ پنجگور ءَ کراچی ءِ رؤگ ءِ وھد ءَ رخشان کور سرادک ءَ پوجی پانگس ءَ کوچ ءَ چہ ایرگیجگ بوتگ پجار کارڈ چارگ ءَ پد زورانسری آوار جتگ ءُ بیگواہ کتگ اش –

آئی ءِ گوشگ ات کہ منی برات نجیب بلوچ گوستگیں بازیں سالاں متحدہ عرب امارات ءَ کار ءَ بوتگ، ھمے وھد ءَ چٹیاں وتی گِس ءَ اتکگ بوتگ آئی ءِ چٹیانی ھلاس بوگ ءَ آ پنجگور ءَ چہ دیم پہ کراچی ءَ رؤگ ءَ بوتگ کہ اود ءَ پد ءَ امارات ءَ رؤگی بیتگ کہ زورانسری آوار جنگ ءُ بیگواہ کنگ بوتگ، اشی ءَ پیش من وتی پت ءِ ھاتر ءَ زھرشانی کنان ءُ پیداکاں، من وتی پت ءِ ھاتر ءَ ھشت سال انت کہ زھرشانی کنگ ءَ انت درسیں جمھوری ءُ کانودی راہ گچین کتگ، آمیدگس ءِ نزام ھم چکاستگ اَنت بلے بید چہ پت ءِ یل کنگ ءَ نوں منی برات آوار جنگ ءُ بیگواہ کنگ بوتگ، وتی برات ءِ یل کنائینگ ءِ ھاتر ءَ من وتی مات ءِ ھمراھی ءَ شال ءَ شتگ آں دو ھپتگ ءَ ما ھمود ءَ بلوچ مسنگ پرسنز ءِ بنجل ءَ نشتگ اِنت، زھرشانیاں بھر زرتگ چاگردی ترامجاہ ءُ دگہ تک ءُ پھناتاں توار چست کتگ، بلے روچ ء مروچی منی برات ءُ پت ءِ ھچ وڑیں ھال مار ءَ سر نبوتگ ءُ یک ماھے ءِ گوزگ ءَ پد سرکاری برزی تبک ءِ مردماں ھچ کس ءَ مئے گوم ءَ ھال ءُ اھوال نہ کتگ –

آئی ءِ گوشگ ات ما وتی پریاد زرتگ ءُ اول ءَ شال ءَ شتگیں پد ءَ مروچی اد ءَ کراچی ءَ اتکگیں – شمارا ھال دیگ لوٹیں کہ اشی ءَ پیش ھم مئے کھول ءِ سر ءَ زوراکی کنگ بوتگ، مئے کھول ءِ سر ءَ زلم کنگ بوگ ءَ انت منی پت ءُ برات بس ھمے ھاتر ءَ آوار جنگ ءُ بیگواہ کنگ بوتگ انت کہ ما آزاتیں گوات ءِ تہ ءَ زندگ بوگ ءِ گپ ءَ جنیں – زاناں مار ءَ وتی سرڈگار ءِ سر ءَ سکون سر ءَ زند گوازینگ ءِ ھک نیست؟ زاناں ما اے ملک ءِ جھمنند نہ انت ؟ زاناں وتی پت ءِ ھاتر ءَ توار چست کنگ جُرمے کہ اشی سزا ھمے داب ءَ دیگ بیتگ کہ منی برات آوار جنگ بوتگ؟ ما ءُ مئے کھول ازابیں زندئے گوازینگ انت، منی کماش ءُ نادراھیں مات وتی چک ءِ بیگواھی ءَ چہ سُرگی نہ انت، ناں ورگ وارت ناکہ وپسیت ءُ بس ھمے گوش ایت کہ زندانانی تہ ءَ باریں منی چک ءِ چی ھال بیت، پہ ھدائیگی مار ءَ چہ اے ماژگی نادراھی ءَ رکینگ بہ بنت مار ءَ کجام جرم ءِ سزا دیگ بوگ انت؟ اگاں منی پت ءُ برات ءَ جرمے کتگ گڑا کانودی راہ ءَ وتیگی کنگ بہ بیت ءُ سزا دیگ بہ بنت بلے اے وڑ زورانسری آوار جنگ سالاں سال بیگواہ کنگ وت یک گیرکانودی ءُ گیر انسانی املے-

اسما بلوچ ءَ گوں اھوالکاراں گُشت کہ ما شمے منت واریں کہ شما مئے پریات گوشداشت ءُ ما امیت داریں کہ شما مئے اے پریات ءَ وتی رسانکدرانی تہ ءَ جاہ دے اِت ءُ اے زوراکی ءِ بگیری ءَ مئے توار جوڈ بہ اِت ءُ مئے توار ءَ برزی تبک ءِ ھاکماں سر کن اِت- آئی ءَ گشت کہ من ادے ساڑی ئیان انسانی ھکانی گلانی رھشونانی ھم منت ءَ گراں کہ آھاں اے جاورھالاں مئے ھمراہ داری کت مئے توار جوڑ بوت اَنت –

دوزادہ جون دوھزار نوزدہءَ پنجگور ءِ دمگ گرمکان ءَ پاکستانی پوج ءِ دست ءَ زورانسری آوار جنگ ءُ بیگواہ بوتگیں تنویر بلوچ ھنگت یل کنگ نبوتگ –

آئی ءِ کھول ءِ مردماں ملکی ءُ میاں استمانی ادارھاں چہ لوٹ کتگ کہ تنویر یل کنگ بہ بیت اگاں آ کتکار انت گڑا آمیدگس ءَ آرگ بہ بیت ءُ ملکی کانودانی رِد ءَ شزا دئیگ بہ بیت –
کھول ءِ رِد ءَ تنویر دوازدہ جنوری سال دوھزار نوزدہ ءَ پاکستان پوج ءُ چیریں ادارھانی ھما وھد ءَ آوار جتگ ءُ بیگواہ کتگ کہ آ وتی دکان ءَ نشتگ بوتگ ءُ روچ مروچی بیگواہ انت –
کھول ءَ ملکی ءُ میاں استمانی ادارھاں چہ لوٹ کتگ کہ آ تنویر ءِ یل کنگ ءَ وتی کرد ءَ پیلو بہ کن انت ءُ آئی ءَ چہ اے ازاب ءَ بہ رکین انت –

زانگ بہ بیت گوستگیں دو دھکاں بلوچستان ءِ تہ ءَ زورانسری آوار جنی ءِ درچ یکشل ءَ برجاہ انت ھزارانی کچ بلوچ مھلوک آوار جنگ بیگواہ کنگ بوتگ کہ آھانی تہ ءَ گیشتریں بھر بلوچ ورناہ ءُ نودربرانی انت – انسانی ھکانی ادارھاں ھوار دگہ راج دوستیں مردمانی رِد ءَ اے زورانسری آوار جنی ءَ پاکستانی پوج ءُ چیریں ادارہ ءَ تچکی ءَ ھوار انت –

دومی نیمگ ءَ مروچی کراچی پریس کلب ءِ دیم ءَ ھشت سالاں چہ بیگواھیں جمیل بلوچ ءُ ھمے سال ءِ اگست ءِ ماہ ءَ آوار جنگ بوتگیں نجیب بلوچ ءِ کھول ءِ نیمگ ءَ یک روچی شدکشیں زھرشانی برجاہ انت –

سر بیتگیں ھالانی رد ءَ بلوچ اسٹوڈنٹس ایکشن کمیٹی ھب ھنکین ءِ نیمگ ءَ پی ایم سی ءِ نے دلگوشی ءُ زورانسری رھبند ءِ ھلاپ ءَ بلوچ نودربرانی نیمگ ءَ پُر ایمنیں زھرشانی کنگ بیتگ اَنت چریشی ءَ پولیس ءَ بیڑ برتگ ءُ نودربر لَٹ شاپ ءُ بازیں نودربرے دزگیر کرتگ اَت ءُ چریشی ءَ اے امل یک روزاکی ءِ پولیس ءَ کرتگ –

ایکشن کمیٹی ءِ رد ءَ بلوچستان ءِ جتا جتائیں جاھاں یک اُمیتے ءَ جنکیں نودربر ءُ بچکیں نودربر بازیں سالاں چہ سال انٹری ٹیسٹ ءِ ساجوئی ءَ درزبند اَنت بلے دومی نیمگ ءَ پی ایم سی ءِ نیمگ ءَ ٹیسٹ آؤٹ آف کورس جوڑ کنگ بیتگ ءُ آن لائن ٹیسٹ ءِ بے بنیں انٹر نیٹ سسٹم ءِ سبب ءَ بازیں جست ءُ پسھیابی سبب دیگ بیگ ءَ نہ اِنت ءُ چریشی ءِ سبب ءَ اسٹوڈنٹسانی اسکور کم آیگ ءَ اِنت-

پی ایم سی ءِ ناانساپی ءِ ھلاپ ءَ نودربرانی جیڑھانی سر ءَ گامگیج زورگ ءَ ابید آیاں لَٹ شاپ کنگ ءُ دانکہ آیاں ھمے رنگ ءَ بے تواری نادینت کُت بہ کن ایں، بلے کس چوشی ءَ وتی ھکانی واستا ھکانی گرگ ءَ دزکش بیت نہ کنت –

بلوچ اسٹوڈنٹس ایکشن کمیٹی ءَ نودربرانی سر ءَ بیتگیں ناانساپیانی ھلاپ ءَ ھر تک ءَ توار چِست کرتگ ءُ بلوچ جنک ءُ بچکیں نودربرانی ھمراھداری کرتگ –

اے درگت ءَ بلوچ اسٹوڈنٹس ایکشن کمیٹی ھب ھنکین ءِ نیمگ ءَ جتا جتائیں وانگجاھاں پنتاک بھر ءُ بانگ ءُ میڈیکل اسٹوڈنٹسانی سر ءَ بیتگیں ناانساپی ءِ بارو ءَ سرپدی ءُ یکجاہ بیگ ءِ سرپدی داتگ اَنت –

روکپتی بلوچستان ءَ ایرانی پولیس ءَ یک مردمے ءِ دزگیر کنگ ءِ جھد کتگ بلے چریشی ءَ مھلوک برانزگپتگ ءُ مھلوک ءَ زھرشانی ءُ پولیس ءَ سر برزکائی تیرگواری کرتگ –

ھالانی تہ ءَ گوشگ بیتگ کہ دمگ ءِ انتزامیہ ءَ نیکشھر ءَ یک گاڑی والایے ءِ دزگیر کنگ ءِ جھد کتگ چریشی ءَ مھلوک برانز گپتگ ءُ پولیس ءَ را سِنگ جتگ ءُ زھرشانی کرتگ ءُ پولیس ءَ مھلوک ءِ تاچینگ ءِ پژدر ءَ سربرزکائی تیرگواری ھم کرتگ-

شنگ بیتگیں تامر بندانی تہ ءَ گندگ بیت اِنت کہ مھلوک پولیس ءِ نیمگ ءَ سنگ ءُ زھرشانی کنگ ءَ اِنت ءُ چریشی ءِ پژدر ءَ پولیس ءِ تیرگواری ھم گندگ ءَ آیگ ءَ اَنت-

روکپتی بلوچستان ءَ گیشتریں ھنداں مردمانی دزگیر کنگ ءُ زنداناں کنگ ءِ ھال رسانکدراں آیگ ءَ اَنت –

بلے گوستگیں روچ ءَ پولیس ءِ نیمگ ءُ تنی وھدی چوشیں راستی ءُ دزگیریانی ھال دیم ءَ نیتکگ اَنت کہ گیشتریں سبب ءَ گُشت بہ کنت-

نبشتانک: بلوچ ءُ بیست ءُ یکّمی کرن

نبشتہ کار: رضوان ھوت

دی بلوچستان پوسٹ

من نزاناں انو کہ من بلوچاں گِندگ ءَ اوں اے بلوچانی بابت ءَ ءُ جیڑھانی سرا گپ بہ کناں یا کہ پیسر ءَ ھما وھد ءَ کہ بلوچ بوتگ انت ھما بلوچانی سر ءَ گپ بہ کن آں۔

من یک نودربرے آں من وتی اندر ءَ ھرچی مار اِتگ گڑا ھما گپاں درشان کنگ لوٹ آں جنگ ءُ جیڑہ سک باز انت انچو بےکساس انت کہ ھساب نہ بنت بلے انو کہ من چاراں مئے بلوچ راج انچوش انت کہ وتی ھمے open mind ءَ گوں ھچی نہ انت من ھمے سرپد باں اے open mind ءِھم مردماں گار ءُ بیگواہ کنت ھمشی سبب ءَ مئے بلوچ ءِHeroism شکار بنت-

اے ھما بیماری اِنت کہ ایشی ءِ سبب ءَ Heroisim مردم وتی اندر ءَ چہ دراتک نہ کنت، وت ءَ چہ درستاں مستر لیک ایت ءُ ھرکجا بس ھمے گپ ءَ کنت “من ءُ بس من “اے وڑ کنگ ءَ آ وت ءَ چیزئے دات نہ کنگ گڑا راج ءَ لجا ٹیکی دات کنت؟ –

دومی گپ بینکنگ نظام مئے اے وھد ءِ مردماں چہ گیشیں مردم ھمے بینکینگ نظام ءِ تہ ءَ گار انت۔ بینکینگ نظام ھما انت کہ انسان زانت کہ اے 8 انت بلے اے چوں ءُ پرچہ 8 انت اے گپ ءِ بابت ءَ نہ جیڑ اِیت اے نظام ءِ تہ ءَ بنی آدم Robot جوڑ بیت وتی زند ءِ ھمروچیگیں جیڑہ ھمش بَنت ئِے –

اے گڑا راج ءَ چے بکشات کن اَنت؟ مئے راج پیسر ءَ وتی جِند ءِ اَندر ءَ چہ در بئیت گڑا بوت کنت پہ وت چیزئِے بہ بیت بلے مئے اھد ءِ بلوچ وتی تہ ءَ انچو گار اَنت کہ یک ءُ دومی ءِ درد ءِ ھیچ سما نیست اِنت ئِے مئے پسریگیں راج ءُ راجدپتر کہ بوتگ اَنت گڑا آ ھاں تھنا پہ راج ءِ بابت ءَ جیڑ اِتگ، نہ وتی مال ءِ بابت ءَ ءُ نیکہ جِند ءِ بابت ءَ جیڑ اِتگ اِت آئی ءِچند مسال اگاں ما بِزیراں مئے قوم پرست سیاست ءِ 3 کماش بوتگ اَنت۔ ڈاڈاۓ بلوچستان نواب اکبر خان بگٹی نواب خیر بخش مری،کماش سردار عطاء اللہ مینگل اشاں وتی زِند پہ بلوچ راج ءَ قربان کتگ۔ سردار عطاء اللہ مینگل ءَ وتی بچے ھم قربان کتگ اے مرد پہ مارا رول ماڈل انت ۔

باید اِنت ما وتی کماشانی زِند ءِ بابت ءَ بہ وان اِنت کماش عطاء اللہ جاھے ءَ گوش ایت کہ اے سرزمین ءِ ھاک ءِ ھاتر ءَ وتی ذمہ داریانی سماہ ءَ بکن ئے ھماکہ بستار ءِ قوم شُمئے سر ءَ پرز انت باندا تئی راجدپتر نِبشتہ کنگ بیت اِنت اے راجدپتر نویس ترا جست نہ کنت بلکیں آ تئی کِرد، تئی جهد ءَ چار اِت ءُ نِبشتہ کنت،۔ وت ءَ را انچیں جاھے ءَ سر کن ھما راجدپتر ءَ بہ دے کہ مئے آؤکیں پدریچ مئے سر ءَ پھر بِکنت بلوچ نودربر الم وتی رول ماڈلانی شاھزانتی ءِ سر ءَ مھکم بہ کنت ءُ یکجاہ جهد بِکن اَنت۔

آ پیسرگیں وھد ءَ اگاں یکے ءَ اَنچیں یک رھشونے رس اِتگ گڑا آ وتی دود ءُ ربیدگ ءِ رھبندانی ھم پاسداری کُتگ ئے۔

پیسریگین زمانگ ءَ دراھیں بلوچ یکجاہ بوتگ اَنت ھرچ جیڑھانی سر ءَ گپ ءُ تران اِش کُرتگ ئے۔

انو کہ ما وتی اھَد ءَ گِندگ ءَ ایں ھرکس وت ءَ یک رھشونے لیکیت ءُ گوش اِت کہ بس من آں۔

مئے بلوچانی مستریں جیڑہ ھمش انت کہ ما ھوار نہ اِنت مئے تہ ءَ تپاکی نیست ما بس ناتپاکیں اے جیڑہ ءَ چہ مستریں جیڑہ منی نِز ءَ نیست انت۔

اگاں بِگندے ما یکجاہ بہ بئیں ءُ یک دومی ءَ گوں ھم کوپگ بہ بئیں بوت کنت ما پہ وت یا پہ وتی راج ءَ یک نہ یک شریں کارے کنیں-

مئے نوکیں نودربر کہ ھست اَنت باید اے وت ءَ پچا بیار اَنت ءُ سیاست ءُ وانگ ءِ نیمگ ءَ گامزن بہ بَنت۔ دگہ راہ ءُ در نیست انت اگاں ما ھمے پِڑ ءَ جُنزان بہ ایں بوت کاں یک نا یک روچے ما پہ دلجمی وتی زند ءَ گوازینت کن ایں۔

مارا یکجاہ بوّگی انت، وانگی انت، مئے ساچست ءُ علم ھمنچو گیشتر بہ بیت مئے راج ءَ پہ نپ انت مارا سیاست نیمگ ءَ روگی انت کہ دگہ راہ نیست ابید سیاست ءُ وانگ ءَ من اِد ءَ نودربر سیاست ءِ بابت ءَ گپ ءَ اوں کہ نودربر وتی ھک ءَ لوٹ اِت بہ کن اَنت ءُ وتی ھک ءَ بہ لوٹ اَنت۔

مئے نوک درپشوکیں استال راجدپتر ءَ چہ آشنا بہ بَنت ءُ وتی گوستانک ءَ الم بہ وان اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔