TBP Balochi

سر بیتگیں ھالانی رد ءَ روکپتی بلوچستان ءِ دمگ جکیگور راسک ءِ جھمنندیں پنچ مردم گوستگیں پنچ روچاں بیگواہ اَنت –

ھالانی تہ ءَ گوشگ بیتگ کہ پنچیں مردم جکیگور ءَ دیم پہ چھبار ءَ روگ ءَ بیتگ اَنت پد آیانی ھچ نہ بیتگ –

دومی نیمگ ءَ گاریں مردمانی کھولانی گوشگ اِنت کہ پنچیں مردم وزارت ءِ “اطلات “گپتگ ءُ بیگواہ کرتگ اَنت –

کھول ءِ گوشگ اِنت پنچ روچ ءَ پیسر اے ورنا راسک ءَ دیم پہ چھبار ءِ روگ ءَ درکپتگ اَنت ءُ پد ءَ آیانی ھال نیست اِنت –

بیگواھیں مردمانی پجار مھم جان برم، یوسف برم، یاسین رئیسی، شھرام برم ءُ اَرش سابوکی جھمنند جکیگور ءِ ناماں زانگ بیتگ اَنت –

کھول ءِ گوشگ اِنت کہ نازیں جست ءُ پرساں پد رند ءَ مارا ھال سر بیتگ کہ مئے مردم گرگ بیتگ ءُ دزاپ ءَ برگ بیتگ اَنت بلے وزارت ءِ اطلاعات ” ءَ اے درگت ءَ مارا ھچ ھال نہ داتگ کہ چی سبب ءَ دزگیر کرتگ ءُ برتگ اَنت –

روکپتی بلوچستان ءَ وھد وھد ءِ سر ءَ مردمانی بیگواھیانی ھال پیداک اَنت نہ اے بیگواھی روچ پہ روچ گیشتر بیگ ءَ گندگ ءَ آیگ ءَ اَنت –

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی مروچی چار ھزار ءُ سَے سد ءُ سِی ءُ شش روچ سرجم بیتگ – ایکٹویسٹ خالدہ بلوچ ءَ بنجل ءَ اتکگ بیگواھیں مردمانی کھولانی گون ءَ پدردی ءِ درشان اِتگ – ھمے وڑ بیگواھیں نودربر رھشون زاکر مجید بلوچ ءِ مات ءَ اتکگ ءُ وتی زھرشانی نبشتہ کنائینتگ –

بیگواھیں مردمانی کھول ءَ چہ ماما قدیر بلوچ ءَ وتی شنگ کرتگیں تامر درشان ءَ گوشتگ کہ بی ایس او آزاد ءِ گوستگیں کمک سرکماش زاکر مجید ءَ اے ماہ ءِ ھشت جون ءَ یانزدہ سال سرجم بوگی اِنت کہ بیگواہ انت یانزدہ سال سرجم بوگ ءَ شال پریس کلب ءِ دیم ءَ زھرشانی کنگ بیت اِنت –

زانگ بہ بیت زاکر مجید ءِ کھول ءُ بی ایس او آزاد ءِ باسکانی رِد ءَ زاکر مجید نُھ جون دوھزار ءُ نُھ ءَ پاکستان ءِ چیریں ادارھاں مستونگ ءِ دمگ پڑینگ آباد ءَ دگہ دو سنگتانی ھمراھی ءَ ھما وھد ءَ آوار جتگ ءُ بیگواہ کتگ وھدیکہ آ دگہ دو مردمانی ھمراھی ءَ مستونگ ءَ روگ ءَ بوتگ پد ءَ رند ءَ آ دگہ دؤئیں یل کنگ بوتگ اَنت ءُ وھدیکہ زاکر مجید انگت بیگواہ انت –

زاکر مجید ءِ یل کنائینگ ءِ ھاتر ءَ آئی ءِ گْوھار فرزانہ مجید ءَ زھرشانی کرتگ آ شدکشیں زھرشانی ءَ ابید شال داں کراچی ءُ کراچی داں اسلام آباد ءَ پند ءَ روانک ءَ گون بوتگ –

زاکر مجید ءِ مات ءَ درسیں سیاسی ءُ چاگردی باسکاں چہ لوٹ کتگ کہ آ ھشت جون ءَ زھرشانی ءَ ھوار بہ بنت ءُ زاکر مجید ءِ یل کنائینگ ءَ وتی کرد ءَ پیلو بہ کن اَنت –

آئی ءَ وتی کسانیں درشان ءَ ھاسکر بی این پی ءِ سرکماش اکتر مینگل ءُ دگہ راجدوستاں لوٹ کتگ کہ آ آئی ءِ چُک ءِ یل کنائینگ ءِ ھاتر ءَ وتی کرد ءَ پیلو بہ کن انت –

ھمے وھد ءَ ایڈوکیٹ خالدہ بلوچ ءَ ھمے زورانسری آوار جنگ بیگواہ بوتگیں مردمانی کیس ءِ درگت ءَ آمیدگس ءَ جیڑھانی دیمپانی انت آمیدگس مارا چہ جست کنت کہ ما کجام کانود ءِ رِد ءَ کیس کنگ انت گڑا ما تچکیں پسودار بہ ایں پرچاکہ اے درگت ءَ ھچ وڑیں کانود سر ءَ چہ ساڑی نہ انت اگاں پارلمان ءِ تہ ءَ اے درگت ءَ ھر وڑیں کانود سازی بیت گڑا وکیل زورانسری بیگواھیں مردمانی کیس ءِ پَٹ ءُ پول ءَ آرزانی بیت –

دومی نیمگ ءَ ھزدار ءِ جھمنند آصف بلوچ ءُ رشید بلوچ ءِ زورانسری آوارجنی ءِ بگیری ءَ چاگردی ترامجاھاں کمپئین برجاہ بوتگ کہ باندا شپ دوازدہ بج ءَ تاں برجاہ بیت – آصف بلوچ ءُ رشید بلوچ سی ءُ یک اگست دوھزار ءُ ھژدہ ءَ چہ نوشکی ءَ ھما وھد ءَ آوار جنگ ءُ بیگواہ کنگ بوتگ اَنت کہ آ زنگی ناوڑ ءَ سیل ءُ سواد ءَ شتگ بوتگ انت –

ھمے جاہ ءَ دہ مردم آوار جنگ بوتگ کہ آھانی آوار جنی ءَ پوٹو ھم در اتکگ بلے پد ءَ ھم اے مردم ناشناسیں مردماں برگ بوتگ اے مردم پد ءَ رند ءَ یل کنگ بوتگ انت بلے آصف ءُ رشید بیگواہ انت

بلوچستان ءَ ھر روچ الم یک بیگواھین مردم ءِ درگت ءَ بیت – محمد آصف ءُ رشید بلوچ دوھزار ءُ ھژدہ نُھ دگہ مردمانی ھمراھی ءَ آوار جنگ ءُ بیگواہ بوتگ انت پد ءَ ایندگے ھمراہ یل کنگ بوتگ انت بلے آصف ءُ رشید انگت بیگواہ انت-

سربوتگیں ھالانی گوستگیں روچاں ناشناسیں مردماں بحریہ آئکون ٹاور ءِ سر ءَ دز بمب اُرش کنگ بیتگ – اُرش ءَ ھچ وڑیں جانی تاوان ءِ ھال نیست – بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ دزبمب اُرش ءِ زمّہ واری منّ اِتگ ءُ گوشتگ کہ مئے سرمچاراں دو جون دوھزار ءُ بیست ءُ یک ءَ چارشمبے ءِ روچ ءَ کراچی ءِ دمگ کلپٹن ءَ بن کاسم پارک ءِ نزیک ءَ بحریہ آئکون ٹاور ءِ سر ءَ دزبمب اُرش کتگ- اے یک بیھاری اُرشے بوتگ ایشی ءِ مول ءُ مراد پاکستان آرمی ءِ نام کپتگیں بھریہ ھاؤسنگ سوسائٹی ءِ مکن کنگ بوتگ کہ آ کراچی ءَ بلوچ ءُ سندھی مھلوک ءِ پت ءُ پیروکی زمیناں زورانسری دستیگ کنگ ءُ لوگ ءُ جاگھاں لُمبینگ ءُ نوآبادی کارستاں یلہ بہ کنت اگاں ناں گڑا بیمناکیں آسرے ءِ واستا ساڑی بہ بنت-

گوھرام بلوچ ءَ گوشتگ کہ بحریہ آئکون ٹاور ءِ سر ءَ اُرش ءِ وھد ءَ سرمچاراں اے ھیال شری ءَ داشتگ ءُ پھریز اِتگ کہ اُرش ءِ آسر ءَ ھچ وڑیں جانی تاوان مہ بیت، بلے اگاں بھریہ ھاؤسنگ سوسائٹی ءَ بلوچ ءُ سندھیاں ھوار کراچی ءِ دگہ ایردستیں مھلوک ءِ لوگانی لُمبینگ ءُ آھانی زمیناں زورانسری دستیگ کنگ ءِ زوراکی یلہ نہ دات گڑا آئی ءَ بازیں کساس ءَ جانی ءُ مالی تاوان ءِ دیمپانی کنگ کپ اِیت-

ھمے وڑ ءَ بلوچستان ءَ لبریشن فرنٹ ءَ دگہ یک اُرشے ءِ زمہ واری ھم منّ اِتگ –

بلوچستان لبریشن فرنٹ ءِ جارکش میجر گوھرام بلوچ ءَ رسانکدراں شنگ کرتگیں درشان ءِ تہ ءَ گوشتگ کہ گوستگیں بیگاہ ءَ مند ءِ دمگ دوکوپ ءَ پوجی پانگس ءِ سر ءَ اُرش کرتگ ءُ چریشی ءَ یک کارمندے کُشتگ ءُ یکے زدگ کرتگ –

زانگ بہ بیت بلوچستان ءَ پاکستانی پوج ءُ سرکاری پوجی ادارھانی سر ءَ اُرش ترندی ءَ گندگ بیگ ءَ اَنت گوستگیں روچاں بولان ءَ پاکستانی پوج ءِ یک بنجلے ءِ سر ءَ اُرش کنگ بیتگ اَت کہ چریشی ءَ بازیں کارمند کُشگ بیتگ اِت اَنت-

اُرش ءَ پد بلوچستان ءِ آجوئی ءِ واستا جنگ کنوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ اُرش ءِ زمہ واری من اِتگ اَت ءُ گوشتگ اَت پاکستانی پوج ءِ بیست ءُ پنچ کارمند کُشتگ ءُ بنجل دستیگ کرتگ –

نبشتانک:   وھد کسی مھتاج نہ انت

نبشتہ کار: زیردان بلوچ

دی بلوچستان پوسٹ

بلوچ سیاست ءُ سیاسی گَلانی سر ءَ مروچی ھما مردم لَنکُک چِست کنگ ءَ اَنت کہ آ اَچ وتی بالاد ءَ چہ پُرشتگ ءُ چو شیشگ ءَ ٹُکر ٹُکر اَنت یا زاتی واھش ءُ وشیانی گُلام جوڑ بیتگ اَنت اگاں کسّے مروچی کیت بلوچ سیاست ءَ چہ بلوچ مھلوک ءُ بلوچ ءِ سرڈگار ءَ جتا ءُ دور سرپد بیت، من ھمے گوشگ ءَ جاڑی بہ آں کہ اے وت چہ سیاست ءَ دور ءُ پہ دِگر ٹِکّارگ ءَ راہ رند اَنت وتی نِزوریانی اندیم کنگ ءِ ناکامیں جھد ءُ دومی ءَ ایرجنگ پہ اِیشاں لاپ والینگ ءِ سْوب جوڑ بوتگ۔

مرچی ءَ بِگر داں دہ ءُ دوازدہ سال پیسر بلوچ ءِ سریں راھشون کبزہ گیریں ریاست ءَ شھید کُرتگ اَنت، یا گار بیگواھی ءِ آماچ انت منی گوشگ ءِ مول مراد ھمیش انت کہ چیزے مردم ءِ اکتلاپ ھمیش انت بلوچ نیشنل موومنٹ بِہ بیت یا بی ایس او آزاد ءِ راھشون چہ گراؤنڈ ءَ دیر انت ءُ چہ وتی مھلوک ءَ سِستگ انت ، بلے
گراؤنڈ ءَ سیاسی ورکرز ھما وھد ءَ نشت کن انت کہ پہ آیاں  پچیں ھند ءُ دمگے پشت بِہ کپ ایت ۔ دژمن نزور ءُ ناوس کنگ بہ بیت، پوج بازیں جاھاں پہ نندگ ءَ جاڑی مہ بیت ، گڑا پہ تئی سیاسی ورکرز ءُ رھشوناں سیاست کنگ ءِ راھے در کیت۔
اے بابت ءَ جاھے بلوچ نیشنل موومنٹ ءِ چئیرمین خلیل بلوچ گوش ایت ما واجہ گُلام مھمد ءَ گوں بازیں سنگتانی ھمراھی ءَ گوشتگ کہ وت ءَ چہ اسکرین ءَ دور بہ کن ءُ اندیم تریں جاھے ءَ بِہ نند کہ دژمن ءَ ما ءُ شما کُل گندگ ءَ اِیں سنگتانی گار ءُ بیگواہ کنگ ءُ شھید کنگ ءِ ھاتر ءَ روچے پندلے ساز اِیت۔ مرچی واجہ گُلام مھمد ءَ زندگ بوھگی اَت ، بلے دژمن ءَ شھید کُرت ، گڑا من یک نزوریں ورکرے ءِ بسات ءَ اے گپ ءِ جنگ ءَ راست باں کہ اے مئے راھشونانی مزنیں ردی یے بوتگ ۔

دومی ھبر ھمیش اِنت کہ دانکہ سلاھ بندیں گَل گراؤنڈ ءَ مھکم مہ بہ اَنت، ھِچ چوشیں راجدپترے نیست کہ بہ گْوش ایت کہ دژمن ءِ انگیر ءِ چپ ءُ چاگرد ءَ  سیاسی ورکرز ءِ سر ءَ ھاکمی ھُکم انت کہ چاھے یا رائے دَور بہ کنت وھدے کہ سرمچار ءُ سلاھ بندیں گَل مھکمیں کلاتے جوڑ مہ بہ اَنت تئی گراؤنڈ تئی دست ءَ نہ بیت ، سیاسی ورکرزانی درور ءَ بزیرے یا مھکمیں سلاھ بندیں باسک بباں پہ ھردوکاں مُشکل انت۔

بلوچ ءِ آجوئی ءِ جنز ءِ تھا سیاسی گَل بباں یا سلاھ بندیں گَل ، ھردو ناخن ءُ گوشت ءِ درور انت ۔ یکے چہ دومی ءَ ناسرجم بہ اَنت ، بَلے ھر یکے ءِ وتی ءُ جتائیں پالیسیز بَہ انت مرچی واجہاں گِر بستگ دانکہ سیاست ءِ مہار مئے دست ءَ نہ اِنت شُما ھر ھساب ءَ میاربار ءُ بے سوب اِت۔ گڑا من اے گپ ءِ گوشگ ءَ راست نباں کہ واجھانی واھگ ءِ آس چینچو لمبوک ءُ نام کٹگ ءِ ارمان زوراک انت، بلے وھد ھما آدینک انت کہ ھرکس ءَ ھرکسی کردار وڑ ءَ یاد کنت ءُ پیشدار ایت۔

گڑا پرچا انگت ما وتی نزوریاں دگرے کوپگ ءَ لڈیں ءُ وت پاک سرپد بہ ایں ، زان ءَ دنیا کور اِنت کہ ما کجام آس ءَ ستکگیں دار ءُ پُریں ؟ پمیشکا مارا لوٹ ایت کہ ما وھد ءِ ھمراھی ءَ وت ءَ بہ پلگاریں رند ءَ پہ دگر ءَ دست چیست بہ کن ایں ، اگاں نہ اے دست باندا پما ھم ٹال بیت ءُ ما ھم بے جواب بہ ایں۔ گھتر ھمیش انت کہ مارا وتی مرچیگیں واجہی پہ باندات ءَ زوال کنگی نہ انت ، ناکہ باندات مئے واستا ودار کنت ءُ مارا نازینیت چے ءَ کہ وھد مئے لب دوستیں ھمراھے نہ انت کہ مئے گوشگ ءِ پد ءَ سر ءَ چنڈینیت ھو ھو کنت ، بلکیں آ وتی داد ءُ ھساب ءَ وتی وڑ ءَ کنت انگت وھد ھست کہ ما وت ءَ راست بہ کن ایں ءُ راستی ءِ منگ ءَ جاڑی بہ بہ ایں ، اگاں نہ گپ پد ءَ ھما کیت کہ وھد کسی مھتاج نہ انت نیکہ بیت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ کیچ ءِ ھنکین تمپ ءَ گوستگیں شپ ءَ پاکستانی پوج ءَ دو گپتگ ءُ بیگواہ کرتگ اَنت –

گیشیں ھالانی رد ءَ تمپ ءِ کُنشکلات ءَ پاکستانی پوج ءَ گوستگیں شپ ءِ ساھت دو ءَ نور بکش نامیں مردمے ءِ لوگ ءَ بیڑ برتگ ءُ اود ءَ لوگ ءَ جاڑیگیں زالبول ءُ چک کمشرپ کرتگ ءُ آئی ءِ زھگ اعصم دزگیر کنگ ءَ پد ناشناسیں زنداناں برتگ –

دمگی مردمانی رد ءَ چریشی ءَ پد پاکستانی پوج ءَ تمپ ءَ ھواریں ھند ملک آباد ءَ بیڑ برتگ ءُ اود ءَ ماسٹر عبداللہ ءِ لوگ انگیر ءَ کرتگ ءُ اود ءَ زالبول ءُ چک پوج ءَ کمشرپ کرتگ ءُ ماسٹر عبداللہ دزگیر کنگ ءَ پد بیگواہ کرتگ –

زانگ بہ بیت ھمے سال ءِ مئی ءِ ماہ ءَ پوج ءَ تمپ ءِ گومازی ءَ ھم بازیں شپاں بیڑ برتگ ءُ اود ءَ باز مردم دزگیر کنگ ءَ پد بیگواہ کنگ بیتگ ءُ پد ءَ لھتے یلہ کنگ بیتگ ءُ لھتے انگت ءَ بیگواہ اَنت –

سیاسی مردمانی گوشگ اِنت کہ بلوچستان ءِ بازیں جاھاں پوجی لشکر کشی ھمک روچ برجاہ اَنت ءُ اود ءَ مردمانی گرگ ءُ بیگواہ کنگانی درچ یکشل ءَ برجاہ اَنت –

تنی وھدی پوجی واکدارانی نیمگ ءَ چوشیں گپ پیش کنگ نہ بیتگ اَنت –

بلوچستان ءِ باپاری شھر ھب ءَ بساک ھب ھنکین ءِ نیمگ ءَ وانگی مراگش “مھرگڑھ کتاب کارروان” ءِ اولی روچ سرجم بوتگ، پروفیسر، کواس ءُ زانتکار ءُ کتاب دوستیں مھلوک ءَ بھر زرتگ –

بلوچ اسٹوڈنٹس ایکشن کمیٹی ھب ھنکین ءِ نیمگ ءَ چہ دو روچیگیں کتابی مراگش “مھرگڑھ کتاب کارروان” ءِ نام ءَ برجم دارگ ءِ جار پرینگ بوتگ اَت، مروچی اِے سوبمندیں کتابی مراگش ءِ دومی روچ سرجم بیتگ کہ انگت ءَ برجم اِنت۔ کتابی مراگش ءَ اولی روچ ءَ پروفیسر زانتکار ءُ کواس ءُ کتاب دوستیں مھلوک ءَ بَھر زُرتگ ءُ بلوچ اسٹوڈنٹس ایکشن کمیٹی ءِ باسکاناں دلبڈی داتگ اش۔

کتابی مراگش “مھرگڑھ کتاب کارروان” ءِ زیکیں بِزاں اولی روچ ءَ ھب ڈگری شاہ دربرجاہ ءِ مستر (پرنسپل) شمائلہ کتابی مراگش ءَ اتکگ ءُ بساک ءِ سنگتانی جھد ءِ ستاہ کرتگ ءُ اِے اوست بستگ کہ ما دیمتر ءَ ھم امیت کن ایں کہ بساک ءِ پگری سنگت اِے پیمیں مراگش برجم دار اَنت ءُ بلوچستان ءِ تہ ءَ کتابی ربید ءَ دیمروئی دے اَنت تاں کہ بلوچ ورنا چہ چاگردی سلکاریاں بہ رکّ اَنت ءُ کتاب ءُ ند ءِ نیمگ ءَ دوستی بہ دار اَنت۔

گْوستگیں سال 2020 ءِ تاکشان ءِ ماہ ءَ بساک اوتھل لومز ھنکین ءِ سنگتاں ھم ھب چوکی ءَ یک سوبمندیں کتابی مراگشے برجم داشتگ اَت کہ آئی ءِ تہ ءَ ھر پڑ ءَ گْوں بندوکیں مردماں بھر زرتگ اَت ءُ بساک اوتھل لومز ءِ سنگتانی جھد ءِ ستاہ کرتگ اَت۔

کواس ءُ زانتکار، کتاب ءُ ند دوست، پروفیسر ءُ دگہ پڑ ءِ پر مڑاھیں واجھانی دلبڈی ءِ بدولت ءَ اِے سال 2021 ءَ بساک ھب ھنکین ءِ سنگتاں دو روچیگیں کتابی مراگشے برجم داشتگ کہ مرچی آئی ءِ دومی روچ ءَ برجاہ اِنت-

بساک ءِ باسکاں گوشتگ کہ دیمتر ءَ ھم “مھرگڑھ کتاب کارروان” ءِ نام ءَ بلوچستان ھَند ءُ دمگاں کتابی مراگش برجم دار یں ءُ کتابی ربیدگ ءِ دیمروئی ءِ ھاتر ءَ وتی جھدانی رِد ءَ برجم داریں –

ھمے وڑ ءَ بساک ءِ نال ھنکین ءَ ھم کتابی مراگش ءِ برجم کنگ ءِ جار پرینتگ اَنت –

نبشتانک: نبشتانک: آوارِیں آفتاب جان

نبشتہ کار: فیضان بلوچ

دی بلوچستان پوسٹ

کُربان ھمائیں کہ تئی شھادت ءُ مارا چہ سِدگ ءِ ھال من ءَ سر بوت آں من ہمے جُہد ءَ بُوتگ آں کہ پرتو چیز ءِ نبشتہ بکن آں بلے آفتاب جان ھردیں کہ من کلم ءُ تاک آں دیم ءَ کن آں گوں تو گوستگیں ھر ھما وھد ءُ پاسانی اکس یک یک ءَ منی چمانی دیم ءَ پدّر بوان بنت برے کوئٹہ ھوٹل ءَ چائے سر ئے نِندگ ءُ سنگتانی کندگ ءُ مزاک برے شاہ دربرجاہ ءِ کیفے ءِ برے پَرپَٹ ئے تاچگ ءِ ءُ وھدے تئی ھما دوئیں ھادت، یکے ہمے کہ پرپٹ ءِ روگ ءِ توک ءَ وتی دوئیں دستاں چہ پرپٹ ءِ گَراں چہ یلہ کنگ اے سک ایں ھراب اِیں ھادت ءِ بوتاں تئی آفتاب جان، شریں کہ تو مارا گاڑی یے چیرا نداتگ ءُ دومی پرپٹ ءِ تاچگ ءِ وھد ءَ کُکارا گوں ‘سگار بلوچ’ ءِ ہمے شئیر ءِ جنگ کہ “اے وطن نہ پُژہ غاتے کیو گیسو بریفو، کیو ولدا چیچلو نہ ٹکھ تو رُخصار نہ” منی نِزّا اے تئی دوستریں شئیر بیتگ۔

اُو تئی ھمے گُشتگیں گپ کے تو مُدام گُشتگ ات کہ اِش مئے درستانی سر ءَ الّم اِنت کے براھوئی ءُ بلوچی دوئیں زُباناں ھیل بکن اَنت ءُ من شرت بست کہ باریں کے ساری ءَ براھوئی ءُ کئے بلوچی ھیل کنت ءُ تو اولی سال ءِ تہ ءَ بلوچی ھیل کُت بلے من براھوئی ھیل نکُت پیسرا۔

کُربان مرچی من ترا ھال دَیگ لوٹ اِیں کہ من ھم براھوئی ھیل کُتگ کُربان تئی ھمے پانزدہ اِیں کتاب اتکگ آں منی کِرّا آں من اِشاں وتی کرّ ءَ ھیر کائیں شرّیں۔

کُربان ترا گپ ءِ بُگش اِیں ھر وھد ءَ کہ تو منی ھیال ءَ کایے گل بُو ءُ پچکند گُڑا من اُوں کندی۔ پرچہ کہ دوشی من تئی وٹس ایپ ءِ وائس آں کہ گوش دارگ ءَ اِتاں منی ارس وت سرا رِتک آں بلے من وت ءَ دلبڈی ءُ تسلّہ دات کہ آفتاب جان پہ وتن شہید بوت ئے پہ وتن ءِ ھاتر ءَ شہید بوکیں بچ نمیران بنت ءُ کُربان تو ھم نمیران ءِ منی سالونک ءُ دوشی تئی سکِّیں دیرِگیں دیم داتگیں براھوئی شئیر ءِ ھم منی دست ءَ کَپتگ کہ تو پہ سَنگتاں نبشتہ کُتگ اَت من آئی ءَ ھم نبشتہ کئیں جھل ءَ۔ آواریں گُڑا کُرباناں۔

ای گیرام کریسوٹ دیتے یکئ نا سنگتاتا
ہراتم سکان اسک اواری نما سنگتاتا

کنے خبر تمیتو تینا خلق خواجہ غا تا
ہراتم سکان اسک کچاری ہنینا سنگتاتا

دے منٹ ہنینو یادگارو گدریفین نن یاراک
واہ مُر ہننگ است اے کپکیک کنا سنگتاتا

سما اف کہ دونو وخت اس ولدا بروئے
یاد اس پوس کُن مروئے دا سنگتاتا

گل و گل بہار زند مروئے نما ورناتا گلزمین نا
کیوہ دعا ای آفتاب رب آن سلامتی کہ نما سنگتاتا

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ ھزدار ءُ کلات ءَ سَے ورنا پاکستانی پوج ءَ دزگیر کنگ ءَ پد ناشناسیں زنداناں برتگ اَنت ءُ چریشی ءَ پد آیانی ھچ ھال نیست –

ھزدار ءِ دمگ زھری ءَ سیادی داروکیں سئیں ورنا گوستگیں روچ ءَ پوج ءَ بیگواہ کرتگ اَنت – دمگی مردماں ٹی بی پی ءَ گوں گوشتگ یاسر ایوب ء مھمد ایوب زھری ءِ دمگ تلاوان ءَ گوستگیں روچ ءَ پاکستانی پوج ءَ یک لوگے ءِ سر ءَ بیڑ برتگ ءُ آوار جتگ –

پوج ءَ لوگ ءَ جاڑیگیں زالبول ءُ دگہ مردم لَٹ ءُ کُٹ کرتگ اَنت ءُ لوگ ءِ سامان پرشت ءُ پروش کرتگ اَنت –

ھمے رنگ ءَ زھری ءِ جھمنندیں دو ورنا بھادر ھان ء ھیدر ھان ءُ غلام قادر ء حضور بکش چہ کلات ءَ زھری ءِ نیمگ ءَ روگ ءَ بیتگ اَنت کپوتو ءِ ھند ءَ سی ٹی ڈی ءِ کارمنداں تیرگواری کرتگ ءُ ٹپیگیں جاوراں دزگیر کرتگ ءُ ناشناسیں جاھاں برتگ اَنت –

سی ٹی ڈی ءَ ٹاہ داتگ کہ گپتگیں مردم سلاہ بند بیتگ اَنت ءُ تیرگواری ءِ میان ءَ دزگیر کرتگ اَنت ءُ دمگی مردمانی رد ءَ گپتگیں مردم دست ءُ گوش بیتگ اَنت کہ کارمنداں دیستگ اَنت وسر ءَ تیرگوار ءِ نشانگ اش کرتگ اَنت ئِے –

زانگ بہ بیت ھمے سال ءِ مارچ ءِ ماہ ءَ سی ٹی ڈی ءَ ٹاہ داتگ کہ مستونگ ءَ بیتگیں یک جنگ ءُ چوپے ءِ میان ءَ بلوچ سلاہ بندیں گلانی پنچ باسک کُشگ بیتگ اَنت ءُ چریشی ءَ پد کُشگ بیتگیں مردمانی کھولاں سی ٹی ڈی ءِ گپ رد کرتگ ءُ گوشتگ کہ اے مردم پیسر ءَ دزگیر کنگ ءُ بیگواہ کنگ بیتگ اَنت –

سی ٹی ڈی ءِ نیمگ ءَ بلوچستان ءِ بنجاھی شھر شال ءَ ھوار دگہ دمگاں دروگیں دیم پہ دیمی جنگ ءُ چوپانی ھال بیتگ اَنت -انسانی ھکانی گل ءُ بلوچستان ءَ سیاسی گلانی نیمگ ءَ سی ٹی ڈی ءِ دروگیں دیم پہ دیمی جنگ ءَ جنگ بیتگیں کشت ءُ کوشاں آمیدگسی پَٹ ءُ پول ءِ لوٹ کنگ ءِ پرمان کنگ بیتگ اَنت –

سر بیتگیں ھالانی رد ءَ روکپتی بلوچستان ءَ نامی ئیں نیکراھی رھشون مولانا نظر مھمد ھشتاد ءُ ھپت سال ءِ اُمر ءَ بیران بیتگ –

مولانا نظر مھمد دیدگاہ روکپتی بلوچستان ءَ راجدپتر ساز ءُ بلوچانی تہ ءَ نامی ئیں راجدوستے ءِ نام ءَ زان بیتگ –

مولانا نظر مھمد روکپتی بلوچستان ءَ نامی ئیں نیکراھی رھشون ءُ چریشی ءَ پیش ایران ءِ پارلیمان ءَ چِل سال ءَ پیش بلوچانی گچین بیتگیں نمائندگ بیتگ –

ھالانی تہ ءَ گوشگ بیتگ کہ مولانا نظر ھشتاد ءُ ھپت سال ءِ گوزگ ءَ پد آئی ءَ مروچی کماشی ءَ بیران بیتگ –

آئی ءِ بیرانی ءَ روکپتی بلوچستان ءَ راجی تپاکی گل ءَ ھوار بازیں مردم پرسیگ بیتگ اَنت –

سربوتگیں ھالانی رِد ءَ بلوچستان ءِ دمگ ھزدار ءُ چاگی ءَ دگ ءِ وئیلاں دو زالبولاں ھوار سَے مردم بیران ءُ سَے ٹپی بیتگ اَنت ءُ ھب ءَ زِر ءِ تہ ءَ بڈگ ءَ دو زالبول بیران بوتگ اَنت، کوھلو ءَ تیرگواری ءِ وئیل ءَ یک مردمے بیران ءُ چملانگ ءَ اشکرانی کاریز ءَ یک مردمے بیران وھدیکہ ژوب ءَ گروک ءِ شھم ءَ یک مردمے بیران بوتگ –

گیشیں ھالانی رِد ءَ ھزدار ءِ دمگ سارونہ ءَ پیک اپ گاڑی ءِ چپی بوگ ءَ دو زالبول بیران بوتگ اَنت ءُ سَے مردم ٹپی بوتگ اَنت –

وئیل ءَ بیران بوتگیں زالبولانی پجار واھد بکش ءِ لوگی بی بی آمنہ، محمد اسمائیل ء لوگی ناز بی بی ءِ نام ءَ چہ بوتگ انت وھدیکہ عبدالرؤف، محمد سلمان ءُ سراج احمد ٹپی بوتگ انت –

وئیل سارونہ ءِ کوھی دمگ کلغلو ءَ دیم ءَ اتکگ کہ گاڑی چہ سارونہ ءَ ھزادار ءَ آگ ءَ بوتگ چپی بوتگ –

وئیل ءَ بیران ءُ ٹپی بوتگیں مردم سارونہ نادراہ جاہ ءَ سر کنگ بوتگ انت اود ءَ اژدری چار ءُ ٹپاس ءَ پد زالبولانی جون کھول ءِ ھوالگ ءَ کنگ بوتگ انت ٹپی بوتگیں مردم پہ گیشیں الاج ءِ ھاتر ءَ ھزدار ءِ نادراہ جاہ ءَ دیم دیگ بوتگ انت –

ھمے وڑ چاگی ءَ پرپٹ ءِ ڈیکر کنگ ءَ یک مردمے ٹپی بوگ ءَ پد بیران بوتگ –

وئیل دالبندین ءَ دگ ءِ سر ءَ گریڈ ءِ نزیک ءَ دیم ءَ اتکگ کہ پرپٹ ءِ ڈیکر کنگ ءَ صالح محمد ء محمد عثمان اکازئی جھمنند دشت گوران ٹپی بوتگ –
ھمے گوشگ بوگ ءَ انت ٹپی بوتگیں مردم آر ایچ سی نادراھجاہ چاگی ءَ برگ بوتگ ءُ اود ءَ ٹپانی درمان کنگ پد پہ گیشیں الاج ءِ ھاتر ءَ دالبندین ءَ دیم دیگ بوتگ بلے دلبندین نزیک ءَ آئی ءَ ٹپانی درد نہ سگتگ ءُ بیران بوتگ –

دگہ وئیلے بلوچستان ءِ دمگ ھب ءَ دیم ءَ اتکگ کہ سیل ءُ سواد ءَ شتگیں دو زالبول آپ بُڈیتگ ءُ بیران بوتگ انت –

ھالانی رِد ءَ ڈام بندر بھڑہ ءِ زِر ءَ سیل سواد ءَ شتگیں دو زالبول جان شودگ ءِ میان ءَ زِر ءَ بڈیتگ ءُ بیران بوتگ انت – ایدھی ءِ کارمنداں زالبولانی جون زِر ءَ چہ کشیتگ ءُ آر ایچ سی وندر نادراھجاہ ءَ سرکتگ انت، اود ءَ اژدری چار ءُ ٹپاس ءَ پد لاش کھول ءِ ھوالگ ءَ دیگ بیتگ اَنت – ھمے گوشگ بوگ ءَ انت ھردو زالبولانی سیادی میونسپل کمیٹی اتھل ءِ گوستگیں کمک سرکماش سید عبدالحفظ شاہ پنام منوں شاہ کھول ءِ مردم انت –

دومی نیمگ ءَ کوھلو ءَ تیرگواری ءِ وئیل ءَ یک مردمے بیران بوتگ-

لیویز ءِ رِد ءَ کوھلو ءِ دمگ چپی ءَ ناشناسیں مردمانی تیرگواری ءَ عمر ء حیرو نامیں مردمے بیران بوتگ – لیویز ءَ عمر ءِ جون دست گپتگ ڈی ایچ کیو نادرھجاہ ءَ سرکتگ اود ءَ اژدری چار ءُ ٹپاس ءَ پد لاش کھول ءِ ھوالگ ءَ داتگ اَنت –

دگہ وئیل ءِ بلوچستان ءِ دمگ چملانگ ءَ اشکرانی کاریز ءَ دیم ءَ اتکگ کہ ھاک ءِ کپگ ءِ سوب ءَ یک کاریز کارے بیران بوتگ –

پولیس ءِ رِد ءَ چملانگ ءَ اشکرانی کاریز ءِ کار کنگ ءِ میان ءَ ھاک کپگ ءِ سبب ءَ محمد اخلاص ء اختر محمد بارکزئی بیران بوتگ – بیران بوتگیں مردم افغانستان ءِ جھمنند انت – پولیس ءَ آئی ءِ جون دست گپتگ نادراھجاہ ءَ سرکتگ اود ءَ اژدری چار ءُ ٹپاس ءَ پد آئی ءِ بنکی ھنکین ءَ دیم داتگ-

ھمے وڑ بلوچستان ءِ دمگ ژوب ءَ گِروک ءِ شھم ءَ یک مردمے بیران بوتگ – ھالانی رِد ءَ ژوب ءِ دمگ خوستی شیخ آباد ءَ ھور ءِ میان ءَ گروک ءِ شھم ءَ صالح خان نامیں مردمے بیران بوتگ – بیران بوتگیں مردم دمگی نادراھجاہ ءَ برگ بوتگ اود ءَ اژدری چار ءُ ٹپاس ءَ پد لاش کھول ءِ ھوالگ ءَ کنگ بوتگ –