TBP Balochi

بلوچستان ءَ بیگواھیں مردمانی جیڑہ روچ پہ روچ ناوشی ءِ نیمگ ءَ روان اِنت – کھول

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ چار سد ءُ سِی ءُ پنچ روچ سرجم بوتگ ، مروچی شال ءَ ھوار بلوچستان ءِ دگہ بیگواھیں مردمانی کھول بنجل ءَ اتکگ ءُ وتی زھرشانی نبشتہ کنائینتگ اِت –

ھمے وھد ءَ بیگواھیں مردمانی پانکجنیں گل وائس فار بلوچ مسنگ پرسنز ءِ رھشون ماما قدیر بلوچ ءَ بیگواھیں مردمانی کھولانی گوشگ ات کہ بلوچستان ءَزورانسری آوار جنی ءِ بگیری ءَ ھر تک ءُ پھناتاں سیادی داروکیں مردماں توار چست کنگ لوٹ ایت تانکہ اے زوراکی دارگ بہ بیت –

ماما قدیر بلوچ ءِ گوشگ ات کہ بلوچستان ءِ تہ ءَ ھمک روچ زورانسری آواجنی یکشل ءَ برجاہ انت بلوچستان ءِ مات ءُ گوھار وتی زھگ ءُ براتانی ھاتر ءَ پگر کنگ ءَ انت کہ کجا ناں کجا آھانی زھگ آوار جنگ ءُ بیگواہ کنگ مہ بنت –

آئی ءِ گوشگ ات کہ اگاں بیگواھیں مردم کتکار بہ بوتین انت گڑا آمیدگس ءَ آ سزا داتگ ات انت بلے گیرکانودی آھاں آوار جنگ ءُ سالانی سال بیگواہ کنگ ءُ اے سرکار ءَ جست کنوک ءِ نیست کہ آھانی زھگ کجا انت-

بیگواھیں مردمانی کھولانی گوشگ ات کہ ما وتی دوستیگیں مردمانی جتائی درد زرتگ ءُ ھمے ھاتر ءَ اے شھر ءَ زھرشانی کنگ ءَ انت کہ کسے مئے توار ءَ اش بہ کنت ءُ مار ءَ مئے ھک دیگ ءَ مئے کمک ءَ بہ کن اَنت –

آھانی گوشگ ات کہ سک باز پدردیں گپ ئِے کہ بلوچستان ءَ بیگواھیں مردمانی یل کنگے ھاترءَ سرکار المی نہ انت ءُ نام گپتیں کمیشن ءَ چہ مردماں رد دیگ ءَ انت –

دومی نیمگ ءَ وائس فار بلوچ مسنگ پرسنز ءَ کراچی ءَ اسما بلوچ ءِ پت ءُ برات ءِ ھاتر ءَ بوؤکیں زھرشانی ءِ پلامرزی کتگ ءُ گوشتگ گوستگیں ھشت سالاں بیگواھیں جمیل احمد ءُ گوستگیں ماہ ءَ ڈنی ملک ءَ آوؤکیں زورانسری آوار جنگ بوتگیں نجیب جمیل کھول ءِ شدکشیں ھرتال ءِ پلامرزی ءَ کنیں –

وی بی ایم پی ءِ جارکش ءَ انسانی ھکانی گل، وکیل، ایکٹوسٹ، سیاسی باسک دگہ تک ءُ پھناتاں سیادی داروکیں مردمانی گون ءَ لوٹ کتگ بانداتگیں زھرشانی ءَ بھر بہ زور انت زلم ءُ زوراکی ءِ بگیری ءَ توار چست بہ کن انت وتی انسان دوستی ءَ پیش بدار انت –

بلوچستان ءِ بنجاھی شھر شال ءَ آدینگ ءِ روچ ءَ بازیں کچے ءَ زالبول، زھگ ءُ ورنایانی بیگواھی ءِ بگیری ءَ شھر ءَ یک روانک ءُ پریس کلب ءِ دیم ءَ زھرشانی کنگ بیتگ –

دستان اِش بینرز، پلے کارڈ ءُ بیگواھیں مردمانی اکس اش چست کرتگ ءُ زھرشانی کنوکاں بلوچستان ءَ بیگواہ بیتگیں مردمانی بیگواھی ءِ ھلاپ ءَ اوگام اش جتگ –

ھالانی رد ءَ شال ءِ دمگ کلی قمبرانی ءَ ھمے سال ءِ پنچ ستمبر ءِ میانی شپ ءَ پاکستانی پوج سی ٹی ڈی ءِ دست ءَ منصور قمبرانی، واسع قمبرانی، داؤد قمبرانی، زبیر قمبرانی، عزیز زھری، شکیل شاھوانی عمیر زھری، شبیر سمالانی ءُ فخرالدین ءِ دزگیری ءَ پد زورانسری آوارجنی ءِ ھلاپ ءَ مروچی شال ءَ زھرشانی روانک ءُ پریس کلب ءِ دیم ءَ زھرشانی کنگ بیتگ اَنت –

زھرشانی ءَ چہ کلی قمبرانی ءَ زورانسری آوار جنی ءِ آماچ بیتگیں مردمانی کھولاں ھوار جتا جتائیں پھناتاں بندوکیں مردماں ابید چہ بلوچستان ءَ بیگواہ بیتگیں مردمانی کھولاں بازیں کچے ءَ بھر زرتگ –

زھرشانی ءَ زھرشانی کنوکاں چہ سرکار ءَ لوٹ کتگ چہ کلی قمبرانی ءَ پوج ءِ دست ءَ زورانسری آوار جنی ءَ پد بیگواھی ءِ آماچ بیتگیں ورنایاں بارو ءَ سرپدی بہ دنت – آیاں گُشتگ کہ شپ ءِ تھارُکی ءَ سیکورٹی پورس مئے لوگاں دور اش کرتگ ءُ زالبول ءُ زھگ اش ترسینتگ ءُ مئے ورنا اش گون برتگ اَنت ئِے ءُ سالانی سال زنداناں بندیگ اَنت –

آئی ءَ گُشتگ کہ اے زُلم اِنت ءُ چہ بلوچستان ءَ ھمک تک ءَ بندوکیں مرفم اے زوراکی ءِ سان ءَ کپتگ اَنت –

زھرشانی کنوکاں گوشتگ کہ ریاست مارا کانون ءُ آئین ءِ رھبندانی پاسداری ءَ گُش ایت بلے وت کانون آئین ءَ لپاشگ ءَ اِنت ءُ تنا وھد ءَ بلوچستان ءَ ھمے رنگ ءَ مردم بیگواھی برجاہ بیت اَنت گڑا اشی ءِ ھلاپ ءُ توار ءِ چست کنگ یکشل ءَ برجاہ بنت –

بیگواھیں جمیل ءِ جنک ءُ بیگواھیں نجیب ءِ گوھار اسماء بلوچ ءَ چاگردی رسانکجاھاں شنگ کرتگیں یک جارے ءَ گُشتگ کہ منی برات نجیب ءَ یک ماھے ءِ سرجم بیگ ءَ کراچی ءِ پریس کلب ءِ دیم ءَ نندانکی زھرشانی کنگ بیت اِنت-

اسماء بلوچ ءِ رد ءَ باندا بزاں شمبے ءِ روچ ءَ سھب ءِ ادار دَہ داں بیگاہ ءِ ساھت پنچ ءَ یک نندانکی بنجلے کراچی ءِ پریس کلب ءَ کنگ بیت اِنت-

آئی ءَ گُشتگ کہ منی بیگواھیں برات نجیب ءَ یک ماھے سرجم بیگ ءُ پت ءَ ھشت سال سرجم بیگ ءَ کراچی پریس کلب ءَ نندانکی زھرشانی کنگ بیت اِنت –

اسماء بلوچ ءَ دراھیں اھوالکار ءُ چاگردی ءُ سیاسی باسکاں گوں دزبندی کرتگ ءُ گُشتگ کہ منی توار ءَ دیم ءَ بہ بر اَنت –

زانگ بہ بیت اسماء بلوچ ءِ برات نجیب جمیل یازدہ اگست ءَ دوھزار ءُ بیست ءُ یک ءَ پاکستانی پوج ءَ پنجگور ءَ دیم پہ کراچی ءِ روگ ءِ وھد ءَ رخشان کور ءَ چیک پوسٹ ءَ آوار دزگیر کنگ ءَ پد بیگواہ کتگ –

اسماء بلوچ ءِ پت جمیل سال دوھزار ءُ سیزدہ ءَ بیست ءُ نُھ اپریل ءَ آواران ءَ آئی ءِ لوگ ءَ پوج ءَ آوار جتگ ءُ بیگواہ کرتگ اَت –

اسماء بلوچ ءِ گوشگ اِنت کہ یک ودارے ھلاس نہ بیتگ ءُ دومی دردانی ودار سر ءَ کپتگ –

بلوچستان ءَ بیگواھیانی درچ برجاہ اَنت ءُ بیگواھیں مردمانی تہ ءَ نودربر، ڈاکٹر، سیاسی باسک ءُ گار ءُ بیگواھی ءِ دیمپان اَنت –

بلوچ اسٹوڈنٹس آرگنائزیشن ءِ چیردستی ءَ “ایم ڈی سی اے ٹی “ءِ نودربرانی گون ءَ ھمگرنچی ءُ شال ءَ نودربرانی سر ءَ لَٹ ءُ کُٹ “پی ایم سی “ءِ ناروائیں رویش ءِ ھلاپ ءَ تربت پریس کلب ءِ دیم ءَ زھرشانی کنگ بیتگ –

زھرشانی ءَ زھرشانی کنوکاں بی ایس او ءِ بنجاھی باسک خلیفہ برکت، بنجاھی جوائنٹ سیکرٹری ظفر رند، تربت سول سوسائٹی ءِ رھشون گلزار دوست، بی ایس او پجار ءِ ھنکین رھشون باھوٹ بلوچ، بی ایس او ءِ رھشون عقیل جلال ءُ چاگردی باسک میران حیات ءَ تران کرتگ ءُ گوشتگ کہ بلوچستان ءِ سرکار ءِ گوشگ ءَ شال ءَ پُر ایمنیں زھرشانی ءَ نودربرانی سر ءَ لَٹ ءُ کُٹ ءُ آیانی دزگیر کنگ شرمناک ءُ گیرکانونی املے –

آئی ءَ گُشتگ کہ جنک ءُ بچکیں نودربر بی ایم سی ءِ آن لائن انٹری ٹیسٹانی سر ءَ بیوکیں دررھبندی ءِ ھلاپ ءَ پُر امن بیتگ ءُ زھرشانی ءُ بیتگ اَنت بلے وسرا آ لَٹ ءُ کُٹ کنگ ءُ دزگیر کنگ بیتگ اَنت –

جمھوریت ءِ زمہ دار بلوچ نودبراں جمھوری جد ءُ جھد ءَ ترس ایت اِنت، بلوچ مھلوک ءِ سیاسی، زرکاری ءُ چاگردی جیڑھانی ھواری ءَ وانگی ھک ءِ توار ھم لگتمال کنگ بیگ ءَ اِنت دومی نیمگ ءَ سی پیک ءُ زرباری بلوچستان ءِ نام ءِ سر ءَ بلوچ مھلوک ءِ دیمروئی ءِ واستا مزن مزنیں دیدانک پیش کنگ بیگ ءَ اَنت –

اسٹیبلشمنٹ ءُ ھاکماں اے گپ ءَ تچک ءَ گوشگ لوٹ آں کہ بلوچ نودربر شال ءَ بہ بنت یا دگہ جاھاں آ ایوک نہ اَنت بی ایس او آیانی ھمراہ اِنت ءُ آیانی ھک ءِ واستا گل ھر تک ءُ زھرشانی کنت ءُ دنیا ءِ دیم ءَ سرکاری زلم ءُ زوراکیانی ھلاپ ءَ وتی توار ءَ برز کنت-

بلوچستان ءُ دگانی سر ءَ بیتگیں وئیلاں ھمک لس مھلوک چہ زند ءَ زبھر بیگ ءَ اَنت بلے دگانی سر ءَ سرکاری یکشل ءَ بے واکی ءَ گندگ ءَ آیگ ءَ اَنت –

سر بیتگیں ھالانی رد ءَ بلوچستان ءِ دمگ ھزدار ءَ راجی شھدگ ءَ بیتگیں وئیلے ءَ چار مردم بیران بیتگ اَنت –

گیشیں ھالانی رد ءَ ھزدار ءَ ٹرکے کلٹی بیتگ ءُ چریشی ءَ چار مردم بیران بیتگ اَنت، ھالانی تہ ءَ گوشگ بیتگ کہ وئیل ھما وھد ءَ پیش اتکگ کہ ٹرک ءَ جیک جنگ ءَ بیتگ اَنت ءُ چریشی ءَ ٹرک کپتگ ءُ چار مردم چیر تر اِتگ ءُ بیران بیتگ اَنت –

بیران بیتگیں مردمانی سیادی چمن ءَ گوشگ بیتگ اَنت –

دگہ وئیلے بلوچستان ءِ دمگ ھب ءَ پیش اتکگ کہ اود ءَ پرپٹ ءُ ٹریکٹرے ءَ ٹکر وارتگ –

ھالانی تہ ءَ گوشگ بیتگ کہ ھب ءِ شھر ءَ سوک سینٹر ءِ نزیک ءَ شال ءُ کراچی ءَ رؤکیں شھدگ ءَ پرپٹ ءُ ٹریکٹرے ءَ ٹکر وارتگ ءُ چریشی ءَ پَرپٹ سوار بیران بیتگ –

بیران بیتگیں مردم ءِ پجار سِی ءُ شش سالی ئیں اپطاف حسین ءِ نام ءَ زانگ بیتگ ءُ لاش چِست کنگ ءُ نادراہ جاہ ءَ سر کنگ بیتگ –

اُرش سلاہ بندیں مردماں گوستگیں روچ ءِ سھب ءِ یازدہ ءُ نیم ءَ پاکستانی پوج ءِ کاروان ءِ سر ءَ کنگ بیتگ، چریشی ءَ پاکستانی پوج ءَ جانی ءُ مالی تاوانانی دیمپانی کنگ کپتگ-

سرکاری پھناتاں اُرش ءِ راستی بیتگ ءُ سرکارانی پھناتاں شنگ بیتگیں ھالانی رد ءَ گوستگیں روچ ءَ سلاہ بندیں مردماں پاکستانی پوج ءِ سر ءَ اُرش کتگ ءُ چریشی ءَ دو کارمند لانس نائیک صبور ءُ عبدالستار مرتگ اَنت ءُ حکیم نامیں کارمندے زدگ بیتگ-

دومی نیمگ ءَ بلوچستان ءِ آجوئی ءِ واستا جنگ کنوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ اے اُرشانی زمہ واری منّ اِتگ اَنت –

بی ایل ایف ءِ جارکش میجر گوھرام بلوچ ءَ رسانکدراں شنگ کرتگیں درشان ءِ تہ ءَ گُشتگ کہ پشمبے ءِ سھب ءِ ساھت یازدہ ءَ بلیدہ ءُ پروم ءِ میانی دمگ سردکیں آپ ءَ پاکستانی پوج ءِ پنچ پرپٹ ءُ یک گاڑی ءِ سر ءَ اُرش ترندے اُرشے کرتگ، چریشی ءَ شش کارمند مرتگ اَنت ءُ آ دگہ زدگ بیتگ اَنت –

جارکش ءَ گُشتگ اَت کہ اُرش ءَ پد کاروان ءِ کمک ءُ لاشانی چِست کنگ ءَ آؤکیں سَے جنگی ھیلی کاپٹر ھمے دمگ ءَ سر بیتگ اَنت –

آئی ءَ گُشتگ اَت کہ ھیلی کاپٹراں باز تیرگواری کرتگ بلے سرمچار اود ءَ سلامتی ءَ درایگ ءَ سوبین بیتگ ءُ مھریں جاھاں شتگ اَنت-

جارکش ءَ گُشتگ اَت کہ ھپت ستمبر ءَ بلیدہ ءِ دمگ باکاڈ ءَ پوجی چوکی ءِ سر ءَ اسنائپر رائفل ءِ گون ءَ اُرش کرتگ ءُ چریشی ءَ یک پوجی کارمندے کُشتگ –

بی ایل ایف ءِ جارکش ءَ گُشتگ اَت کہ پاکستانی پوج ءِ سر ءَ اے اُرش بلوچستان ءِ آجوئی ءَ داں برجاہ بنت-

بلوچ اسٹوڈنٹس ایکشن کمیٹی ءِ جار سر ءَ پشمبے ءِ روچ ءَ بلوچستان ءِ مزن شھر شال، لسبیلہ ھیڈکوارٹر اوتھل ءُ سندھ ءِ بُنجاھی شھر کراچی ءَ گوستگیں روچ ءَ شال ءَ میڈیکل ءِ نودربرانی سر ءَ پولیس ءِ لَٹ ءُ کٹانی بگیری ءَ زھرشانی ءُ روانک کشگ بیتگ اَنت-

بلوچستان ءِ جتاجتائیں نودربریں گلانی باسک ءُ دگہ نودربراں مزنیں کچے ءَ بھر زرتگ نودربرانی سر ءَ پولیس ءِ لَٹ ءُ کُٹ ایرجتگ ءُ میڈیکل نودربرانی لوٹ ءَ منّگ ءِ لوٹ کتگ اَنت-

شال ، کراچی ءُ اوتھل ءَ زھرشانی کنوکاں گوستگیں روچ ءَ پرایمن نودربرانی روانک سر ءَ ریاستی تاکت ءِ کارمرز کنگ ءِ ایر جتگ ءُ گْوشتگ کہ وتی بُنکی لوٹانی منّگ وتی جاہ ءَ اھاں لَٹ ءُ کُٹانی چہ نودربر وتی ھکّاں چہ دست کش کت نہ کن اَنت-

بلوچستان ءِ نودربراں پی ایم سی آئن لائن چکاس مھتل کتگ ءُ گْوشتگ کہ بلوچستان اے بوت نہ کنت-

شال ءِ پریس کلب ءَ بلوچ اسٹوڈنٹس ایکش کمیٹی ءِ رھشوناں گپ ءُ تران کنان ءَ گْوشتگ کہ بلوچستان ءَ نودربر وانگی ادارھاں لاچار اَنت ءُ اود ءَ یکجاھیں کچے ءَ برجاھیں وانگجاہ سرجمیں آسراتیاں چہ زبھر اَنت وانگی ادارھاں آسراتیاں نہ بوگ ءَ ابید بلوچستان ءِ نودربر وتی کمک ءَ چہ وت انچیں جاھے ءَ سر بنت کہ اود ءَ آؤکیں زندمان ءِ یک راھے گِش اِیت-

جاھے بزگی ءُ سکّیاں اوپار کنگ ءَ ابید اود ءَ نودربر جوانیں الم ءِ زورگ ءَ تچ ءُ تاگ کن اَنت ھمے آیانی راھانی دیم ءَ مدام اوشتوک بنت -برے آن لائن کلاسزانی نام ءِ سر ءَ نودربرانی زندمان سر ءَ لیب کنگ ءُ برے شھدربرجاہ بلوچستان ءَ کیمرہ پٹ کنگ ءِ سلّیں وئیل دیم ءَ اَتکگ اَنت-

آھاں گْوشتگ کہ اود ءَ یک نیمگے نودربر سیاست ءِ سر ءَ پابندی جنگ بوتگ نودربراں پر ایمنیں زھرشانی سر ءَ لَٹ ءُ کُٹ کنگ- بلوچستان ءَ نودربرانی سر ءَ زوراکی یکشل ءَ برجاہ ءَ اَنت وھدیکہ ھکومت سرجم ءَ بے تواری ءِ چادر چست کتگ-

بلوچستان ءِ نودربر یک اسرکپتگیں دمگاں چہ سیادی دار اَنت اود ءَ جوانیں الم ءِ ھاتر ءَ آھاں وڑ وڑیں سکّیانی دیمپان کنگ کپ اِیت ءُ ھرچ سال ءَ ھزارانی کچ ءَ نودربر تب ءِ پڑ ءَ ھوار بوگ ءَ ھمے ھاتر ءَ میڈیکل چکاس ءِ تیاری کن اَنت کہ آیانی تہ ءَ تھنا درزنے نودربر داکلہ زورگ ءَ سوبین بنت –

آیاں گْوشتگ کہ تب ءِ پڑ ءَ ھوار بوتگیں ھما نودربراں مدام بزگی دیمپان کن اَنت ءُ آیانی راھانی سر ءَ ھرچ وڑ اوشتوک بنت – شھدربرجاہ “یونیورسٹی “ایکٹ بہ بیت یا دگہ نودربرانی وانگی برجاھی ءَ مدام دیم ءَ اوشتوک بوگ ءَ اَنت – بدبھتی ءَ بلوچستان ءَ آ ھما جاہ اِنت کہ اود ءَ نودربر الم وڑیں بُنکی آسراتی ءِ ھاتر ءَ دگانی سر ءَ درایگ ءُ آ دگانی سر ءَ انتزامیہ ءِ نیمگ ءَ آ زلیل کنگ بنت-

بلوچستان ءِ نودربر اود ءَ بُنکی آسراتیانی ھاتر ءَ زھرشانی چو جمھوری وڑ ءُ رنگ ءَ کن اَنت گُڑا انتزامیہ ءُ ھکومتی مردمانی نیمگ ءَ چہ نودربرانی مسلہ ءِ گوشدارگ ءِ وتی جاہ ءَ آیانی سر ءَ تاکت ءُ لَٹ کارمرز کنگ بیت –

آن لائن کلاسز ءِ مسلہ بہ بیت یا دگہ نودربراں مدام جھموری وڑ ءُ پیم ءِ سر ءَ انتزامیہ نیمگ ءَ تُرسینگ ءُ چست کنگ ءُ لَٹ ءُ کٹانی نشانگ کنگ بنت-

آھاں گْوشتگ کہ پاکستان میڈیکل کمیشن ءِ ھاتر ءَ شورانی بگیری ءَ اود ءَ سرجمیں ڈیھ ءَ نودربر زھرشانی کنگ ءَ اَنت ءُ بلوچستان ءِ نودربر گوستگیں روچ ءَ کمیشن ءِ شَورانی ءُ انتزامیہ ءِ نزوری ءِ بگیری ءَ شال ءَ پر ایمنیں زھرشانی برجم داشتگ- ڈیھ ءَ وانگی نظام اود ءَ بے جانی ءِ رنگ ءَ زورگ ءَ اِنت نودربرانی وانگی برجاھی ءِ دیم ءَ اوشتگ ءِ ھاتر ءَ ھر روچ یک نوکیں راہ ءُ راھبندے دیم ءَ کار اَنت-

پاکستان میڈیکل کمیشن ءِ نیمگ ءَ چہ اود ءَ نیشنل لائسنسنگ چکاس ءِ برجم دارگ ءِ جار جتگ ءُ گُڑا گل ءِ نیمگ ءَ چہ اے راھبند ءِ بگیری ءَ دلپدر درشان کتگ ءُ پاکستان میڈیکل کمیشن ءَ چہ اے شور ءَ دوبر دزبندی کنگ بوتگ – نودربرانی پھازگ ءَ ابید پاکستان میڈیکل کمیشن ءِ نیمگ ءَ چہ اے رھبندانی پیلو کنگ ءِ سر ءَ شور کنگ بوتگ ءُ جتائیں شھدربرجاھانی چکاس بندات کتگ اَنت- اے چکاس یکشلہ برجاہ داشتگ ءُ گوستگیں روچ ءَ بولان میڈیکل کالج ءَ ھم چکاس برجم دارگ بوتگ-

پریس کانفرنس ءِ تہ ءَ گپ ءُ تران کنان ءَ گْوشتگ کہ بولان میڈیکل کالج ءَ برجم بوتگیں چکاس ءَ گیشتر پسّھانی سیادی ناں تب ءَ گوں بوتگ نانکہ تب ءَ ھوار کجام ھم پڑ ءَ چہ بوتگ وھدیکہ چکاس ءِ رستگیں نمبر ھم پُشت ءُ دیم کنگ بوتگ اَنت – ھمے مسلہ ءِ سر ءَ نودربراں شال ءَ پرایمنیں زھرشانی برجم داشتگ ءُ چریشی ءِ آسر ءَ پولیس ءِ نیمگ ءَ لَٹ ءُ کُٹ کنگ بوتگ ءُ نودربر لَٹانی نشانگ کتگ ءُ بندیگ جاھاں بند کتگ اَنت- پرایمنیں نودربرانی سر ءَ گوستگیں روچ ءَ بوتگیں زوراکی گوستگیں کرن ءَ چہ برجاھی ءِ ھمراھی ءَ نودربرانی سر ءَ بوتگیں زوراکی چہ ھور بیت اے کردار ءَ یکشلہ تیز کنگ بوگ ءَ اِنت-

آھاں دیمتر ءَ گْوشتگ کہ بلوچ اسٹوڈنٹس ایکشن کمیٹی بلوچ نودربر گل نودربرانی مسلہ ءَ شریں وڑے ءِ ھاتر شر کنگ ءُ آیگ ءَ اِنت- گل ءِ نیمگ ءَ چہ نودربرانی نیمگی ءَ ءُ نودربرانی سر ءَ لَٹ ءُ کٹانی بگیری ءَ شال ءَ ھوار اوتھل ءُ کراچی ءَ زھرشانی کنگ بوتگ ءُ ھکومت ءَ چہ زوت ءَ چہ زوت نودربرانی مسلہ ءِ ھلاس کنگ ءِ لوٹ کتگ-

ما اُستانی ءُ وفاقی ھکومت ءَ ھوار سرجمیں ادارھانی کارکُشاداں گوں دزبندی کن ایں کہ آ نودربرانی مسلہ ءَ زوت ءَ چہ زوت جوانیں گامگیج بزور اَنت- اے درشان ءِ میان ءَ ما نودربراں باور کنائین ایں کہ گل ءِ کجام وڑیں اڑ ءُ جنجال بہ بنت آ ھمکوپگ بہ بنت ءُ داں لوٹ نہ منّگ ءِ سر ءَ دگہ نودبریں گلاں چہ شور کنگ ءَ پد آ پیلو کنگ بیت اِنت-

سربوتگیں ھالانی رِد ءَ گوستگیں روچ ءَ بلوچستان ءِ تہ ءَ جھانی وبا کرونا ویروس ءِ نادراھی ءَ آماچ بوتگیں سِی ءُ ھپت دگہ نوکیں کیس دیم ءَ اتکگ اَنت ءُ اے وھد ءَ کرونا ویروس ءَ آماچ بوتگیں درسیں مردمانی کچ سی ءُ یک ھزار ءُ پنچ سد ءُ شست ءُ پنچ ءَ سر بوتگ اَنت-

بلوچستان جانسلامتی ءِ نیمگ ءَ چہ شنگ بوتگیں رپورٹ ءِ رِد ءَ گوستگیں روچ ءَ بزاں چار شمبے ءَ بلوچستان ءِ چار دمگاں سِی ءُ ھپت مردماں کرونا نادراھی پدر بوتگ، کہ آھانی تہ ءَ درساں گیش بلوچستان ءِ بنجاھی شھر شال ءَ ھژدہ، تپتان، گوادر ءُ تربت، ڈیرہ بگٹی ءَ چار چار، وھدیکہ نوشکی ءَ سَے مردماں کرونا ویروس پدر بوتگ، چریشی ءَ پد تنی وھدی بلوچستان ءِ تہ ءَ کرونا نادراھی ءَ آماچ بوتگیں مردمانی کچ نوکیں کیساساں ھوار سرجمی ءَ سی ءُ یک ھزار پنچ سد ءُ شست ءُ پنچ ءَ سر بوتگ اَنت-

رپورٹ ءِ رِد ءَ بلوچستان ءِ تہ ءَ گوستگیں روچ ءَ پنجاہ ءُ دو مردم وش بوتگ انت، وش بوتگیں مردمانی کچ نوکیں کیساساں ھوار سرجمی ءَ سِی ھزار ءُ ھشت سد ءُ ھشتاد انت –
رپورٹ ءِ رِد ءَ بلوچستان ءِ تہ ءَ اے وھدی کرونا ویروس ءِ سَے سد ءُ چِل ءُ سَے نادراہ ھست انت کہ ھشت نادراہ بلوچستان ءِ نادراھجاہ الاج کنگ ءَ انت ءُ آھانی تہ ءَ سَے نادراہ ھائی فلو آکسیجن ءُ یکے لاؤ فلو آکسیجن ءَ اِلاج ءَ انت-

بلوچستان ءَ کرونا ویروس ءِ پوزٹیو کیسانی گیشی چار ٹک ھشتاد ءُ دو درسد بوتگ تنی وھدی بلوچستان ءِ تہ ءَ کرونا ویروس ءَ سرجمی ءَ سَے سد ءُ چِل ءُ دو مردم بیران بوتگ انت-

سربوتگیں ھالانی رِد ءَ بلوچستان ءِ دمگ کیچ ءَ پاکستانی پوج ءَ چار مردم زورانسری آوار جتگ ءُ بیگواہ کتگ اَنت-

گیشیں ھالانی رِد ءَ گوستگیں شپ ءَ پاکستانی پوج ءَ کیچ ءِ دمگ سامی ءَ یک گِسے ءَ بیڑ برتگ سَےمردم زورانسری آوار جتگ اَنت –

آوار جنگ بوتگیں مردمانی پجار خلیل ء رحیم بخش، صمد ء رحیم بخش ءُ غلام جان ء صالح محمد جھمنند عمری کھن سامی ءِ نام چہ بوتگ انت –

دمگی اھوالکار ءِ رِد ءَ پوج ءَ شپ ءِ ادار دو ءَ بیڑ برتگ ءُ اے مردم آوار جتگ ءُ گوں وت برتگ انت –

ھمے وڈ گوستگیں شپ ءَ کیچ آپسر ءَ ناشناسیں مردماں یک مردم ءِ آوار جتگ گوں وت بُرتگ –

اھوالکار ءِ رِد ءَ ناشناسیں سلاہ بندیں مردم سیاھیں سرپ ایں گاڑی ءَ سوار بوتگ اتکگ انت فاروق ء اسحاق آوار جتگ گوں وت برتگ – ھمے گوشگ بوھگ انت کہ سلاہ بندیں مردم پاکستانی پوج ءُ چیریں ادارھانی کارمند بوتگ انت –
زانگ بہ بیت فاروق ءِ برات ءِ پیسر ءَ ھم پاکستانی پوج ءَ آوار جتگ ءُ بیگواہ کتگ –

زانگ بہ بیت کیچ ءَ ھوار بلوچستان ءِ جتاجتائیں دمگاں پاکستانی پوج ءِ زوراکی یکشل ءَ برجاہ انت ھمے ماہ ءَ تنی وھدی پاکستانی پوج ءَ دو درزن ءَ گیش مردم آوار جتگ ءُ بیگواہ کتگ اَنت وھدیکہ دومی نیمگ ءَ گار ءُ بیگواہ بوتگیں مردمانی گل وائس فار بلوچ مسنگ پرسنز ءِ زھرشانی نصراللہ بلوچ ءُ ماما قدیر ءِ سرکماشی ءَ برجاہ انت – وی بی ایم پی ءِ رِد ءَ تنی وھدی پنجاہ ھزار مردم ءَ گیش بیگواہ انت ءُ لھتے ءِ زانگولیں جون دست کپتگ اَنت –

سربوتگیں ھالانی رِد ءَ گوستگیں شپ ءَ ناشناسیں سلاہ بندیں مردماں کاھان ءَ پاکستانی پوج ءِ سر ءَ اُرش کتگ- اُرش کرمو وڈھ ءَ برجاھیں پاکستانی پوج ءِ پانگس ءِ سر ءَ کنگ بوتگ اُرش ءِ آسر ءَ پاکستانی پوج ءَ جانی ءُ مالی تاوان بوتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ اے اُرشانی زمّہ واری منّ اِتگ ءُ گوشتگ کہ مئے سرمچاراں گوستگیں شپ ءَ کاھان ءِ دمگ کرمو وڈھ ءَ برجاھیں پاکستانی پوج ءِ پانگس ءِ سر ءَ راکٹ گولہ آس داتگ چریشی ءَ دژمن ءَ جانی ءُ مالی تاوانانی دیمپانی بوتگ –
جارکش ءَ دیمتر ءَ وتی درشان ءِ تہ ءَ گوشتگ کہ مئے سرمچاراں ھپت ستمبر ءَ سَے شمبے ءِ روچ ءَ زیارت زیرو پوائنٹ ءِ نزیک ءَ کوہ ءِ سر ءَ مِکیں ٹاور گوں تراک ناکیں شوروانی سر ءَ تباہ کتگ –
جارکش ءَ گوشتگ کہ اے ٹاور ءِ کمک ءَ ریاستی چریک بلوچ سرمچارانی دلاری کنگ ءَ انت – مئے گل ھردو اُرشانی زمہ واری ءَ من ایت-