TBP Balochi

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی مروچی چار ھزار ءُ سَے سد ءُ سِی ءُ شش روچ سرجم بیتگ – چہ بالگتر ءَ نودربر اتکگ ءُ کھولانی گون ءَ پدردی ءِ درشان اِتگ –

ھمے وھد ءَ وائس فار بلوچ مسنگ پرسنز ءِ وائس چیئرمین ماما قدیر بلوچ ءَ اتکگیں مردمانی میان ءَ گپ کنان ءَ گوشتگ کہ پاکستانی پوج ءِ نیمگ ءَ بلوچستان ءَ انسانی ھکانی لگتمالی ءِ سر ءَ دمگی ءُ میانی اُستمانی ھالرساناں ھوار دراھیں انسانی ھکانی گلانی سروکیں ادارھانی بے تواری بلوچستان ءَ ٹوھیں کچے ءَ انسانی زوالی ءِ سبب بیت کن اَنت -اگاں ھمے بلوچستان ءَ ڈالچاری یکشل ءَ دارگ بیت ءُ پاکستانی پوج بلوچ نسل کشی ءَ گیش ترند کنت ءُ بلوچستان ءَ سرجم ءَ نیست ءُ نابودی ءَ ابید دگہ ھچ نہ کنت –

آئی ءَ گوشتگ کہ ما دراھیں انسانیت دوست ءُ انسانی ھکانی زمہ وارایں ادارھانی دلگوش ءَ بلوچستان ءَ ردوم زرتگیں اے ناوشیں انسانی زوال ءِ سر ءَ دلگوش ترینگ لوٹ ایں کہ -ءُ گیشتر میان اُستمان، ایمنسٹء انٹرنیشنل ءَ گوں دزبندی کن ایں آ بلوچستان ءَ بیوکیں ناوشیانی گامگیج ءَ بہ زور اَنت –

ماما قدیر ءَ گوشت کہ ریاست ء پاکستان ءَ بلوچستان ءِ یک شھرے ءِ بھری ءَ ھواری ءِ رویش داشتگ اَنت، شال ءَ چاونی برٹش ءِ وھد ءَ بدین زمانگ ءِ لَٹ ءُ کُٹی زندانی بنجل ءَ بلوچ نیشنلسٹ رھشون ءُ باسک گار ءُ بیگواہ ءُ بندیگ کنگ ءِ درچ برجاہ داشتگ اَنت -قلی بنجل ءَ لَٹ ءُ کُٹانی وھد ءَ بیران بیتگیں باسکانی لاش ھم کھولانی گور ءَ رسینگ نہ بیتگ اَنت ءُ ناشناسیں جاھاِ چگل دیگ بیتگ اَنت –

آئی ءَ گوشت کہ بلوچستان ءَ رسانکدری ھالرسانی ھم نیست اِنت کہ چریشی ءِ سبب ءَ پاکستان ءِ دگہ جاہ ءُ اُستاناں نندوکیں مھلوک بلوچستان ءِ سر ءَ بیوکیں زوراکیاں سرپد نہ اَنت سیاسی باسک ءُ نودربرانی بیگواھی ڈکٹیٹر جنرل ایوب ھان ءِ دور ءَ بندات نیتگ ءُ مروچی اے کارنامہ دراج کش کنگ بیتگ – مروچی بلوچستان ءَ ھوار سرجمیں ڈیھ ءَ آئین ءُ کانود ءَ ھم بیگواھیں مردمانی دیم ءَ آرگ ءَ بے سوب بیتگ اَنت -وائس فار مسنگ پرسنز ھمے سرپد بیت کہ بیگواھیں مردمانی جیڑہ اے وھد ءَ سرجمیں مھلوک ءِ واستا ناجوڑی ءِ جوڑ بیتگ چُشکہ اے گپ ءِ سر ءَ سرجمیں بیگواھیں مردمانی کھولانی یکجاہ کنگ ءُ یک کنوینشنے ءَ لوٹائینگ بنت، چریشی ءِ بنگپ ءَ سیاسی رھشون، کواس، اھوالکار، بیگواھیں مردمانی واستا کار کنوکیں گل ءُ سول سوسائیٹی ءِ گل ءُ گپ ءُ ترانی بیت ءُ لانگ ٹرم پالیسی ءِ واستا مسنگ پرسنز ءِ گلانی ھواری ءَ یک کمکی کمیٹی ءِ جوڑ کنگ بیت اِنت –

سر بیتگیں ھالانی رد ءَ روکپتی بلوچستان ءِ دمگ ایرانشھر ءَ نیکراھی رھشون ءِ ما وتی جنگ ءَ بیران بیتگ –

گیشیں ھالانی رد ءَ ایرانشھر ءِ دمگ چاہ جمال ءَ مولانا عبدالقدوس ملازئی ءِ یک زھگے ءَ دومی برات ءَ را چاقو جتگ ءُ کُشتگ –

بیران بیتگیں مردم ءِ پجار مولانا عبدالعزیز ء مولانا عبدالقدوس ءِ نام ءَ زانگ بیتگ – گوشگ بیگ ءَ اِنت مدرسہ ءِ سر ءَ ھردوکیں براتانی میان ءَ کمے جیڑہ بیتگ ءُ چریشی ءَ برات ءَ وتی برات ءَ چاقو جتگ ءُ کُشتگ –

ھالانی تہ ءَ گوشگ بیتگ کہ عبدالعزیز چیزے وھد ءَ ایرانی سرکار ءَ ھم سیاسی زندانی قید کرتگ ءُ پد ءَ یلہ کرتگ –

دمگی مردمانی گوشگ اِنت کہ ھردوکیں براتانی میان ءَ نیکراھی وانگ جاہ ءِ سر ءَ کمو جیڑہ بیتگ ءُ چریشی ءَ دومی برات ءَ وتی برات کُشت ءُ مولانا عبدالعزیز چاہ جمال ءَ نیکراھی وانگ جاہ ءِ سروک بیتگ –

نبشتانک: بچکند گوں تو ھوار رپت انت

نبشتہ کار : وسیم دلجان

دی بلوچستان پوسٹ

پلیں کرکی ءِ (کولواہ ءِ تہ ءَ کسانیں میتگ ءِ) دلبند ءَ وشی ءُ شادھانی زیملیں کوش پہ تب ءِ لہم لہم ءَ شِیک ورگ ءَ ات ما درست کھول ءِ مُردم ھورتیں بچکند ءُ ٹھکاں سرجمیں کرکی سرا زرتگ ات وشیانی منگیر ءَ شادمان ات ایں ۔

مئے روچ ءُ شپ انچو گوست انت کہ سما اوں نہ کپت ناگہ ءَ وھد ءُ پاس مٹ بوان بوت انت زوراورے زوراکی ودان بوت ما ہرکس پہ دیم ءِ رپتیں زہیرانی سیائیں شپ گوں اندوھاں کوڑاسی ءِ سال ءُ کرناں مٹ بوت انت ۔

اے گیر ءُ اندوھانی دراجیں شپ میچل بوگ ءَ پہ بچکندے ءَ مھتل ات انت تلتلیں لنٹکاں بس گیمرتگیں بچکندے ءَ درائی بہ کتیں ارساں پینژار بستگ ات ءُ ما رکاں شیپ گپتگ انت ۔

سالے ءِ جتائی ءَ پد من ءُ تو جاھے پہ گدارے ڈیک وارت پدا بچکند ءُ ٹھکانی درے بوتک ۔بلے امبری مئے بچکند ءُ ٹھکاں آ تام ءُ لزت نیست ات کہ پلیں کرکی ءِ زیملیں کئوش ءِ باھوٹ کتگ ات انت۔پدا تو پہ دیمے ءُ من پہ دیم ءِ ۔

من واب ات آں رمزان ءِ گڈی روچ ات 23مئی 2020 ات گریوگی زارے ءَ منی گوشاں چو زوم ءَ دَج ات من جاھ سِرتاں ءُ وتی جامگ گور ءَ کت ءُ ڈن ءَ درتک آں داں وا ءُ زار انت ۔

منی لنٹ لرزگ ءَ ات انت من جست ءُ پُستی نہ ءِ ات انت یکے ءَ پہ گرتگیں چم ءُ لرزتگیں لنٹاں درائینت اچ ما زالماں کامریڈ سست ءُ جتا کت ۔

من تسلہ ءُ دلاسائی نہ بوت آں گوں وت ءَ گر ءُ دار بوت آں بس وت ءَ دروگیں تسلہ آں ریپینگ ءَ ات انت داں من گوشی ءَ وتی دست برت چار آں دو اکس منی چماں چول جنان بوت ۔

یکے شھید اسد ھسن ات پنام ءِ شھید کامریڈ بالاچ ءُ دومی شھید راشد رمزان ات پنام ءِ شھید سوبین ات کہ ما کولواہ ءِ دلبند جت ءَ گوں دشمن ءَ جنگ دیان ءَ نمیران بوتگ انت، وشیانی منگیر ءُ شادھانی روچ بچکند ءُ ٹھک زیملیں کوش ءِ باھوٹ بوت انت گوں شھید کامریڈ ءَ ھوار شھید بوت انت ۔

تاں روچ ءِ مروچی اے کھول بچکند ءُ ٹھکاں زبھر بوت انت اگاں بچکندے ءَ دل ھدوک ءُ آمُرزی بہ بیت ارس اوھنگ بنت ءُ چماں ارسانی چمگے بُج ایت ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ بلوچستان ءِ دمگ ھزدار وڈھ ءَ ہندو تاجر اشوک کمار ءِ کشندھانی دزگیر نہ کنگ ءِ سر ءَ انجمن تاجر ءُ بلوچستان نیشنل پاٹی ءِ نیمگ ءَ مزن شھدگ بند کنگ بیتگ ءُ وڈھ ءِ بازار بند کنگ بیتگ اَنت –

آیانی گوشگ اِنت ہندو تاجر اشوک کمار ءِ کشندہ بازیں روچانی گوزگ ءَ پد گم دزگیر کنگ نہ بیتگ اَنت –

زانگ بہ بیت گوستگیں روچاں وڈھ ءَ ہندو برادری ءَ سیادی داروکیں ہندو تاجر اشوک کمار ناشناسیں سلاہ بندیں مردماں ملام نہ دیگ ءِ سر ءَ آ تیر باران کرتگ ءُ کُشتگ –

چریشی ءَ ابید بلوچ نیشنل پاٹی ءِ سروک سردار اختر مینگل ءَ ھم وتی یک درشانے ءَ گوشتگ کہ ہندو تاجر بلوچستان ءَ ھستیں سلاہ بندیں گل کہ سرکار ءِ چیردستی ءَ جوڑ کنگ بیتگ کہ “ڈیتھ اسکواڈ ” ءِ نام ءَ زانگ بیت اِنت – ھمے مردماں کُشتگ –

چد ءُ ساری انجمن تاجراں زھرشانی ھم کرتگ ءُ نندانکی بنجل ھم جتگ بلے اشانی گوزگ ءَ ابید ھم ہندو برادری ءَ سیادی داروکیں اشوک کمار ءِ کشندہ دزگیر نہ بیتگ اَنت –

بلوچستان ءِ دمگ کیچ ءَ پاکستانی پوج ءَ لشکر کشی ءِ وھد ءَ نُھ کس آوار جتگ ءُ بیگواہ کرتگ اَنت پد ءَ درست یلہ کرتگ اَنت ءُ دو کس انگت بیگواہ اَنت- دزگیری ءَ پد بیگواہ بیتگینانی تہ ءَ طلال ء چیئرمین دوست مھمد ءَ ھوار دو کس ھوار اَنت –

دمگی مردماں گوشتگ کہ بیست ءُ سَے مئی ءَ پوج ءَ کیچ ءِ دمگ گومازی ءَ طلال دزگیر کرتگ ءُ برتگ کہ ھما اِنت روچ ء مروچی بیگواہ اِنت-

زانگ بہ بیت طلال پوج ءَ چریشی ءَ پیسر پنچ مئی دوھزار ءُ ھژدہ ءَ دزگیر کنگ ءَ داں یک ماھے ءَ پد یل کنگ بیتگ اَت –

طلال ءِ پِت دوست مھمد آوار جنگ ءَ پد آئی ءِ تیرسپتگیں جون دزکپتگ ءُ ھمے وڑ ءَ آئی ءِ برات تاھر چیریں ادارھانی نیمگ ءَ جوڑ کرتگیں سلاہ بندیں گل ڈیتھ اسکواڈ ءَ بیست ءُ دو مئی سال دوزھزار ءُ ھبدہ ءَ گومازی ءَ میڈیکل اسٹور ءَ تیر جتگ ءُ کُشتگ اَت –

بلوچستان ءَ چوشیں وئیل ھمک روچ دیم ءَ آیگ ءَ اَنت اود ءَ کسے ءِ برات بیگواہ کسے ءِ لوگ واجہ ھمک تکاں بلوچانی سر ءَ یک نا نگیگیں جاور ءِ گندگ ءَ کیت اِنت –

بیگواھیں مردمانی یل کنگ ءِ ھاتر ءَ وی بی ایم پی زھرشانی بنجل ءَ مروچی چار ھزار ءُ سَے سد ءُ سِی ءُ پنچ روچ سرجم بیتگ – مروچی چہ پنجگور ءَ نودربر اتکگ ءُ ھمدری ءِ درشان اِتگ ئِے –

وی بی ایم پی ءِ وائس چیئرمین ماما قدیر ءَ اتکگیں مردمانی میان ءَ گپ کنان ءَ گوشتگ کہ بلوچستان ءَ پاکستانی پوج ءَ وانگی ادارہ وتی بنجل ءُ پانگساناں مٹ کرتگ اَنت ءُ وانگی دراھیں راہ ءُ در بند کرتگ اَنت چریشاں ابید بلوچستان ءَ ڈن پنجاب ءِ وانوکیں بلوچ نودربر وھد وھد ءِ سر ءَ لَٹ ءُ کُٹ کنگ بیگ ءَ اَنت، بیگواھیں مردمانی گیشتریں کچ نودربرانیگ اِنت اے وڑیں سر ءُ پرانی یکیں سبب اِنت کہ بلوچ نودربراں ترسینگ ءُ سیاست ءُ وانگ ءَ دور کنگ ءَ اَنت –

آئی ءَ گوشتگ کہ مارا ریاست ءَ گوں ھچ اوست نیست اِنت اگاں کسے ریاست ءِ وانگی ادارھاں چوکی ءُ بنجلاں مٹ کرت کنت ءُ دود مانی نیاداں بمب اُرش ءُ نودربراں دَہ دَہ سالاں تھاریں کوٹیاں لَٹ ءُ کُٹ ءِ نشانگ ءُ آیاں شھید کنت ءُ لاشاں جنگلاں دور دنت گڑا آ درست کُت کن اَنت –

ماما ءَ دیمتر ءَ گوشتگ کہ بلوچستان ءَ پاکستانی پوج ءِ نیمگ ءَ انسانی ھکانی ٹوھیں لگتمالی بیگ ءَ اَنت بلے اشاں ابید ھم ڈیھی ءُ میان اُستمانی رسانکدر بلوچستان ءِ بارہ ءَ بے توار اَنت بلوچستان ءَ انسانی ردوم بیتگیں انسانی ھکانی ٹوھیں لگتمالی ءَ یو این ءَ ایمنسٹی انٹر نیشنل کنگ اِنگ بلوچستان انسانی ھکانی لگتمالی ءِ سر ءَ گامگیج زورگ بہ بیت –

سر بیتگیں ھالانی رد ءَ بلوچ اسٹوڈنٹس ایکشن کمیٹی نال ھنکین ءِ نیمگ ءَ جار پِرینگ بیتگ کہ شش جون ءَ یک مراگشے دارگ بیت اِنت –

ھنکین ءِ نیمگ ءَ شنگ بیتگیں جار ءِ رد ءَ دیوان ءَ کتاب، وانگ ءُ زانگ ءُ زانشتی ءِ دگہ پھناتاں گپ کنگ بیت اِنت –

جار ءِ رد ءَ دیوان گورنمنٹ بوائز ھائی اسکول ءَ شش جون ءَ یکشمبے ءِ سھب ءِ ساھت یازدہ ءَ بندات کنگ بیت اِنت –

جار ءِ رد ءَ گوشگ بیتگ کہ نیاد ءَ بلوچستان کتاب کاروان ءِ نام ءَ کتاب ایر کنگ بنت اِنت –

زانگ بہ بیت بلوچ اسٹوڈنٹس ایکشن کمیٹی بلوچستان ءَ ھوار کراچی ءَ ھم باز وھد ءَ وانگ ءُ زانگی نیاداں گندگ ءَ کیت اِنت –

بلوچ اسٹوڈنٹس ایکشن کمیٹی بلوچستان ءَ بلوچ نودربرانی رھشونی ءَ یک گلے کہ آئی ءِ سروک ھمے زوتاں ڈاکٹر صبیہ گچین کنگ بیت –

بلوچ اسٹوڈنٹس ایکشن کمیٹی ءَ دمگ ءَ دراھیں مردماں گوں دزبندی کرتگ کہ آ وتی زھگاں اے نیاد ءَ دیم بہ دے اَنت ءُ آیانی دلگوش ءَ گوں وانگ ءِ نیمگ ءَ بہ ترین اَنت –

گوستگیں چار روچاں ٹکری بھادر علی کھیازی ءِ کھول شال ءِ روکپتی دگ بروری دگ ءَ نشتگ اَنت اود ءَ آیانی لوٹ اِنت کہ ٹکری بھادر علی کھیازئی یل کنگ بہ بیت –

مروچی ھمدردی ءِ واستا بلوچ یکجھتی کمیٹی شال ءِ رھشون شتگ اَنت ءُ اود ءَ آیاں ٹکری بھادر علی کھیازی ءِ یل کنگ ءِ لوٹ کرتگ –

زھرشانی نندانک ءَ زالبول ءُ چُکاں ھوار بازیں کچے ءَ مھلوک ھوار اِنت اے زھرشانی ءَ تنی وھدی سرکاری واکدار روگ ءُ سدکی دیگ ءَ گندگ نہ بیتگ اَنت –

ھمے وھد ءَ ٹکری بھادر علی ءِ لوگ بانک ءَ گپ کنان ءَ گوشتگ کہ منی یک زھگے ءَ تھسلیما ءِ نادراھی ءِ اِنت ءُ ھدا ءِ واستا منی چکانی پِت یلہ بہ بیت-

آئی ءِ گوشگ اِنت گوستگیں چار روچاں من اد ءَ گوں چندے زالبولانی ھواری ءَ نشتگ ءُ یکیں پریات ءَ کنگ ءَ آں بلے ھنچش اے مھلوک ھُشک ءِ سِنگ جوڑ بیتگ اَنت –

آئی ءِ گوشگ اَت منی واستا دگہ کس نیست من اے نندانک ءَ ھما وھد ءَ داں نشتگ آں دانکہ منی چُکانی پِت یل کنگ نہ بیت اِنت –

بلوچ نودربر رھشون مھرنگ بلوچ ءَ گوشتگ کہ اے نندانک اگاں پاکستان ءَ دگہ راجے ءِ بہ بیت اِنت گڑا الم آئی ءِ گپانی تالان کنگ ءَ نندانک ءِ اکس ءُ تامرانی گرگ ءَ رسانکدراں کیمراھاں جاگہ نیست اَت بلے بد بھتی ءَ اے نندانک ءَ نشتگیں لھتے بلوچ زالبول اَنت –

آئی ءِ گوشگ اَت ما ھنچش کنگ بیگ ءَ ایں زاناں ھمے سما بیت ما اد ءَ بس ھرس ءِ ریچگ ءَ اے جھان ءَ اتکگیں –

آئی ءَ گوشت کہ کسے ءِ پِت دَہ دَہ سالاں بیگواہ اِنت ءُ کسے ءِ برات ھمے کساس ءَ بلوچستان ءَ زورانسری آوار جنگ ءُ گار کنگ ھما وھد ءَ ھلاس بنت کہ کجام مردم بیگوھی ءَ جرمے سرپد بہ بیت –

زھرشانی ءَ مھلوک ءَ تران کرتگ ءُ گوشتگ کہ یک مردمے نہ اِنت بلوچستان ءَ بیگواہ اِنت اد ءَ ھزارانی ھساب ءَ مردم گار ءُ بیگواہ کنگ بیتگ اَنت بلے کسے ءِ گوشاں مورے ھم نہ وارت اِنت –

آیاں گوشتگ کہ اگاں سرکار لوٹ ایت وتی مسام ءَ سرجم بہ کن آں گڑا آ بیگواھیں مردماں یل بہ کنت اگاں سرکار وتی سلامتی ءَ لوٹ ایت گڑا آ بلوچستان ءَ آوار جنیاں بند بہ کنت ھرکس ءَ وتی زھگ پہ ازابی رودینتگ اَنت بلے آیاں سرکار گرگ ءُ گار کنگ اِنت –

زانگ بہ بیت ٹکری بھادری علی کھیازی گوستگیں سِی ءُ یک مئی ءَ ناشناسیں مردماں دزگیر کرتگ ءُ برتگ ءُ آئی ءِ کھول ءِ بھتام اِنت کہ بھادر علی کھیازی سیکورٹی ادارھاں آوار جتگ ءُ برتگ-

بلوچستان ءَ بیگواھیں وئیل ھمک جاہ ءَ پیداک اَنت ءُ سیاسی گل ءُ انسانی ھکانی گلانی گوشگ اِنت سرکار لس مھلوک ءَ آوار جنگ ءُ بیگواہ کنگ ءَ اِنت ءُ آیاں آمیدگساں پیش کنگ ءَ نہ اِنت –

نبشتانک: نوک رستگیں گواڈگ آپتاب جتک

نبشتہ کار: گنی ھیات

دی بلوچستان پوسٹ

جنگ سیمی تبک ءَ (مرھلہ ءَ ) سر اِنت بلوچ آجوئی ءِ جنگ نوں سیمی تبک مرھلہ ءَ بزاں سیمی پدریچ ءَ سر کنگ بوتگ اے جنگ ھنچیں وھداں نیزور بوتگ بلے ھلاس ءُ اوشت ءِ آماچ نہ بوتگ ۔

بیا کہ اے جنگ ءِ تُپنگ نوں سیمی ءُ نوکیں پدریچ ءَ وتی کوپگ ءَ زُرتگ نوکیں پدریچ اے جنگ ءَ را نوکیں درُوشمے ءَ مھلوک ءُ وتی راج ءَ را سر کنگ ءَ اِنت ، بہ گندئے ھمُک ورنا ءِ زِند گوں زمین ءَ بندوک اِنت بلے اِے گپ ءَ شما چہ من ءَ گیشتر سرپد اِت , کہ بلوچ ورنایانی ءُ نوکیں پدریچ ءِ زند ءِ وشی ءُ سکی دُرست چہ زمین ءَ ھمگرنچ اَنت, اے نوکیں پدریچ ھردیں کہ جیڑ اِیت گڑا بزاں کہ پہ وتی زمین ءُ وتی ھاک ءَ جیڑ اِیت۔

بلوچ ورنا ءُ سیمی پدریچ ءَ را کتاب ءُ نَد گوں تُپنگ ءِ ھمراھی ءَ چست کُتگ پمیشکا گوش اَنت کہ گیش ءَ چہ گیش بلوچ ورنا بہ وان اِت بلوچ کہ وان اِیت گڑا آ شھداد بلوچ ءُ اھسان بلوچ ءِ دروشم ءَ چو آپتاب جتک ءَ وت ءَ نوکیں رنگ ءُ ڈولدار ءُ ترپوکیں استال ءَ راج ءِ دیم ءَ پدّری دنت۔

اے جھد نوں اوشت ءِ آماچ نہ بیت اے جھد ءَ را ھمُک رنگیں بلوچ ھست ، ڈاکٹر ، ماسٹر ، مھندس ، گوشندہ ، شائر ، نبشتہ کار، شوانگ ، زمین دار ، نودربر ءُ ھرچ ھما پڑ ءَ کہ بلوچ بندوک اِنت آ بلوچ ءَ را زمین ءِ گَم پر اِنت ، مزاھمت بزاں گھگیری کنوک ءُ جنگولانی بے مٹیں کسہ ءُ سرگوست راجدپتراں نبشتہ کنگ بوتگ اَنت ءُ ھمُک روچ جنگول گوں بچکنداں پہ ھاک ءَ نمیران بوان اَنت ءُ نمیران بوتگیں پُسگانی دراجیں لڑے ھَست اِنت، بلے نوں نوکیں پدریچ ءَ وانگ اژدری اِنت آ کہ وان اِیت آ شھداد ءُ اھسان ءُ آپتاب ءِ وڑ ءَ ماں آزمان ءَ درپشناکیں استالے بیت یاں چو نوک رستگیں گواڈگ ءَ گواشانی زیبائی ءَ بے مٹ کنت ءُ زمین ءِ نھاد ءَ ودّین اِیت ۔

بلوچ داں ھما وھد ءَ گوں جنگ ءَ نزّیکی کت کنت کہ آ بہ وان اِیت آئی ءِ تہ ءَ شاھزانتی ءُ شئور ودی بہ بیت شھزانتی ءِ پڑ ءَ وتی ھستیں وھد ءَ ترا وتی راج ءِ مزنین ھزمتے کنگی اِنت
بلوچ ءَ را وانگی اِنت آ پولیٹیکلی کتاب وان اِیت ، یاں پلسپہ ءُ دگہ کواس ءُ زانتکارانی کتاب وان اِیت بس بہ وان اَنت ءُ کتابانی گون ءَ مھر ءُ نزّیکی بہ کن اَنت ءُ ھستیں وھد ءَ ھمے ورنا وتی ھک ءِ ءُ ھاک ءِ پچگرگ ءَ وتی زمین ءَ وتی سرپد بہ بنت ءُ اے چیزاں سرپد ءُ پوہ بہ بیت کہ کتاب وانوکیں ورنا یاں گوں زمین ءَ مھر کنت یا گوں زمین ءِ سر ءِ نندوکیں مھلوکءَ، کتاب وانوکیں ورنا ءِ منزل ھچبر گار نہ بیت ، کتاب ءِ دوست داروکیں ورنا ءِ زند چو شھداد ، اھسان ، کندیل ءُ آپتاب ءِ پیم ءَ تھار ءُ بیمناکیں شپ ءَ چو رژنائیں ماہ ءَ گاریں رھگوزانی کشکاں در گیج ایت ءُ وتی رُژنائی ءَ سرجمیں بلوچستان ءِ سر ءَ تالان کنت ۔

کتاب وانوکیں ورنا ءِ تُپنگ ءَ کس چو ارزانی ءَ پچ گپت نہ کنت آ ارزانی رَد وارت ءُ گِسر بوت نہ کنت ءُ دژمن ءِ دیم ءَ سَر ءَ ھجبر جھل نہ کنت تو اگاں گوں ستک ءُ دِل زمین ءَ مھر کُت ءُ پہ زمین ءَ نمیران بوت ئے گڑا تو راج ءِ چمّان ءُ دِل ءَ ڈولداریں چیدگے ءَ زندگ بہ ئے ۔

زمین ءِ مھروان ھنگل مری ءُ آپتاب جتکءُ شاویز زہری  سُھریں دروت ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: آفتاب! وھدے تو پہ وتن سالونک بوت ئے

نبشتہ کار: چاکر بلوچ

دی بلوچستان پوسٹ

آفتاب من ءَ یات اِت اِنت تو مُدام گل ءُ کندگ ءَ بُوتگ ئے ءُ ترا چہ سادائیں مردم من دنیا ءَ ندیستگ ترا یات ات اِنت من ترا مُدام گُشتگ کہ تو اِنچو ھم سادہ مہ بو کہ دنیا ترا لگَت بِہ دنت بلے تو مُدام گُشتگ کہ منی نیچر ہمیش اِنت ءُ من ھرچ مردم ءَ وتی نِزر ءَ چاریں ءُ تو گُشتگ ات کہ ریاست ءَ ابید، تو دنیا ءِ گوما ھما وڑ دُچار کَپے دنیا تئی گوما ھما وڑ بیت ءُ گُشت تو کہ من لوٹیں مردم من ءَ چہ زھر مَہ بنت۔

آفتاب جان من مرچی مارگ ءَ اُوں کہ تو واکی راست بوتگ ئے ھو مرچی من ءُ تو گُرور ءِ گوما اے گپ ءَ جناں کہ درْست گوں تو رازی اں ءُ مرچی من تئی بارو ءَ پَکر ءِ گوما سنگتانی کِرا تران کناں۔ آ من مرچی سر ءَ چِست کناں ءُ تئی مِسال ءَ دے آں ۔

بلے آفتاب تو گَپے زان ئے؟ وھدے تئی شھادت ءِ ھال “کمالان” ءَ من ءَ دات، من ھُشک بوت اُوں اَنچو گُشے پادانی چیرا زمین لگوشت ءُ من ھیران بُوت اں کہ چی بُوت۔

اولی سر ءَ من ءَ اِچ سِتک نَبوت کہ تو شھید بوتگ ئےانچو گُمان ءُ سَما بوت کہ من یک تُرسناکیں واب ءِ گِندگ ءَ اُوں ءُ من “کمالان” آرا گُشت کہ من ءَ لَگت ءِ بجن کہ بلکیں من واب گندگ ءَ اُوں بلے چُش نہ اَت واکی تو پہ وتن شھید بوتگ اَت ئے، ءُ تو پہ وتن سالونک اَت ئے کاش کہ اے یک تُرسناکیں واب ءِ بوت اِیں کاش من انگت گیشتر گوں تو گپ ءُ تران کُت ایں۔ کاش تئی سر من وتی کُٹ ءَ ایر کُتیں۔

آفتاب من تئی یات ءَ کہ کپاں گڑا من بچکنداں، بلے منی چمّانی ارس نزاناں پرچہ دارگ نہ بنت۔ من زاناں شھید ئِے واستا اَرس ءِ ریچگ شر نہ اِنت بلے آفتاب تو مئے اَرس کشّ اِت اَنت –

آفتاب ترا یات بیت کہ من ءُ تو اولی سر ءَ نبی بخش ءِ لوگ ءَ دُچار کپت ایں ءُ تو من ءَ جُست کُتگ اَت کہ بلوچ جَنگ کنگ ءَ اَنت تئی دِلا شر کنگ ءَ اَنت یا اِنّاں؟ آ وھدا منی واستا اے جُست ءِ پسّو دیگ سک گِران اَت پرچہ کہ بُزرگیں ریاست ءَ مئے دلا تُرس ءُ بیم پیداک کُتگ اَت بلے مرچی من اے گپ ءَ بے تُرس ءُ بے بیمّ جناں کہ ھو زورگیر ءِ گُوما جنگ کنگ آسری راہ انت کہ پہ بلوچ ءِ واستا پشت کپتگ راجدپتر ءِ تہ ءَ وڑ وڑیں راج اَستاں کہ آیاں بدیں زُوراکانی گوما جنگ کُتگ ءُ وتی مادَریں وتن آزات کُتگ اَنت۔

آفتاب جان تو وڑے نا وڑے ءَ مئے گُوم ءَ اِت ءُ تو تاں زندگی بر نمیران ئے –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔