TBP Balochi

لد کور ءَ پوج ءِ سر ءَ اُرش کتگ یک کارمندے کُشتگ دو زدگ کتگ اَنت – بیبگر بلوچ

سربوتگیں ھالانی رِد ءَ گوستگیں روچ ءَ بزان چار شمبے ءَ ناشناسیں سلاہ بندیں مردماں زامران ءِ دمگ نرم ءَ پاکستانی پوج ءِ سر ءَ اُرش کُتگ – اُرش نرم ءَ لدے کور ءَ برجاھیں پاکستانی پوج ءِ پانگس ءِ سر ءَ کنگ بوتگ اُرش ءِ آسر ءَ پاکستانی پوج ءَ جانی ءُ مالی تاوان رس اتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچ ریپبلکن آرمی ءِ جارکش بیبگر بلوچ ءَ اے اُرش ءِ زمّہ واری منّ اِتگ گوشتگ کہ مئے سرمچاراں گوستگیں روچ ءِ سھب ءِ سر ءَ زامران ءَ لدے کور ءَ برجاھیں پاکستانی پوج ءِ پانگس ءِ سر ءَ راکٹ ءُ وتکاریں سلاھانی گوم ءَ اُرش کتگ – اُرش ءَ پانگس ءَ تاوان بوتگ ءُ یک پوجی کارمند ءِ مرتگ ءُ دو زدگ بوتگ اَنت –

جارکش ءَ گوشتگ مئے گل ءِ اے دابیں اُرش بلوچستان ءِ آجوئی ءَ تاں برجاہ مان انت –

پنجگور ءَ ایمنی ءِ جاورھالانی ناوشی، ورنایانی کُشگ ءُ دُزی ءُ ڈنگیانی ھلاپ ءَ زالبول ءُ زھگ دگانی سر ءَ اتکگ اَنت کوشکارانی دزگیری ءُ پنجگور ءَ امن ءُ ایمنی ءِ آرگ ءِ لوٹ کنگ بیتگ اَنت-

پنجگور ءَ امن ءُ ایمنی ءِ ناوشی ءِ جاورھالانی سر ءَ گوستگیں روچاں کُشگ بیتگیں تابش بلوچ، صغیر بلوچ، قدیر خلیل، سفیر، جلیل سنجرانی، جعفر سلیم ءُ دگہ مردمانی کوش ءُ کوشکارانی دزگیر نہ کنگ ءِ ھلاپ ءَ پنجگور ءَ زالبول ءُ زھگانی بازیں کچے دگانی سر ءَ دراتکگ اَنت ءُ ماڈل چوک ءَ اوگام اش جتگ –

زھرشانی کنوکانی دستاں بینرز ءُ پلے کارڈ بیتگ اَنت کہ آیانی کوشکارانی دزگیری، پنجگور ءَ امن ءِ آرگ ءُ مردمانی پھریزگ نبشتگ بیتگ اَنت-

زھرشانی کنوک پنجگور فٹبال چوک ءَ دراتکگ اَنت شھر ءِ جتا جتائیں دگانی سر ءَ تران ءُ ماڈل چوک ءَ سر بیتگ ءُ اود ءَ زھرشانی کنوکاں تران کرتگ –

زھرشانی کنوکاں گوشتگ کہ پنجگور ءَ امن ءُ ایمنی چَٹ ھلاس کنگ بیتگ ھمک روچ مئے ورنائیں برات، کماش کشگ ءُ چگل دیگ بیگ ءَ اَنت-

آیاں گشتگ کہ پنجگور ءَ گوستگیں یک ماھے ءِ کچ ءَ سِی مردم ءَ گیش ورنا، کماش ءُ بے گناھیں مردم کشگ بیتگ اَنت بلے انگت ءَ دزگیریانی ھال ھچ نیست اِنت-

زھرشانی کنوکیں زالبولاں گشتگ کہ ما لاچار بیتگ ءُ وتی براتانی پھریزگ ءَ دگانی سر ءَ دراتکگ اِنت انساپ ءُ ھونی ءِ مردماں کانود ءِ تہ ءَ آرگ ءُ گرگ ءِ لوٹ ءُ امن ءِ واستا بے تواری ءَ نشت نہ بہ ایں –

آیاں گشتگ کہ زمہ دار پنجگور ءِ مھلوک ءَ بہ پھریز اَنت ءُ پنجگور ءَ امن دوبر بیار اَنت ھوانواریں مردماں دزگیر بہ کن اَنت –

بلوچستان ءِ بنجاھی شھر شال ءَ پاکستانی پوج ءَ یک مردمے دزگیر کنگ ءَ پد بیگواہ کرتگ –

دزگیر کنگ ءَ پد بیگواہ بیتگیں مردم ءِ پجار فخرالدین قمبرانی ء نور احمد قمبرانی ءِ نام ءَ زانگ بیتگ –

کھول ءَ اشی ءِ بیگواھی ءِ ھال راست کنان ءَ گوشتگ کہ گوستگیں شپ ءَ پاکستانی چیریں ادارھانی کارمند ءُ سی ٹی ڈی ءِ کارمنداں فخرالدین آوار جنگ ءَ پد بیگواہ کرتگ ءُ چریشی ءَ پد آئی ءِ ھچ ھال نیست اِنت-

ھمے وڑ گوستگیں ماہ ءَ پوج ءِ دست ءَ آوار جنگ ءَ پد بیگواہ بیتگیں آفتاب قمبرانی یلو بیتگ ءُ وتی لوگ ءَ سر بیتگ-

افتاب قمبرانی چاردہ اگست ءَ روداتکی شھدگ ءَ پاکستانی پوج ءُ اسپیت پوشیں کارمنداں آوار جتگ اَت-

زانگ بہ بیت بلوچستان ءَ زورانسری آوارجنیانی درچ یکشل ءَ برجاہ اَنت گوستگیں روچاں شال ءِ دمگ سھراب قمبرانی ءَ آروسی مراگشے ءَ ھشت ورنا آوار جتگ ءُ بیگواہ کتگ اَت – پوج ءِ دست ءَ آوار جنگ بیتگیں ھشتیں مردمانی پجار منصور قمبرانی، واسع قمبرانی، داؤد قمبرانی، زبیر قمبرانی، عزیز زھری، شکیل شاھوانی، عمیر زھری ءُ شبیر سمالانی ءِ ناماں زانگ بیتگ اِت اَنت-

بلوچستان ءِ تیابدپی شھر گوادر ءَ ھواریں ھند پسنی ءِ زیروپوائنٹ ءَ دریاورداں گیرکانودی ٹرالرنگ ءِ ھلاپ ءَ زھرشانی کنان ءَ دگ بند کرتگ –

دگ ءِ بندی ءِ سبب ءَ ھردوکیں نیمگاں بازیں کچے ءَ روانی گاڑی مھتل بیتگ ءُ گاڑیانی بازیں کچے ءَ لین کتار بیتگ اَنت –

دریاوردانی گوشگ اِنت کہ دری مزنیں میل بلوچ زر ءَ آیگ ءُ ماھیگانی نسل ءَ ھلاس کنگ ءَ اَنت چریشی ءَ دمگ ءِ دریاورد وتی زوزگار ءَ چہ زبھر بیگ ءَ اَنت –

آیانی گوشگ اِنت سندھ ءَ ھوار دگہ ڈیھانی مزنین میل مئے زر ءَ آیگ ءُ مئے ماھیگاں گرگ ءَ اَنت بلے سرکاری مزنیں دستانی گوشاں ھم گواتے نہ سُرین ایت-

آیانی گوشگ اِنت کہ مزنیں واک اے مزنیں میلاں لب ءُ ملام گرگ ءَ اَنت چریشی ءَ آیانی لاپ پُر اِنت ءُ دپ اش بند اِنت-

آیانی گوشگ اِنت کہ سرکار ءِ مزنیں واکاں ھوار دمگدارانی گور ءَ ھم باز براں پریات کتگ کہ اے گیرکانونی ٹرالرنگ دارگ بہ بنت کہ مئے روزگار ءُ زر ءِ ماھیگانی نسل ءَ ھلاس کنگ ءَ اَنت-

زھرشانی ءَ جماعت اسلامی ءِ رھشون مولانا ھدایت الرحمان ءَ ھوار دریاورد ءُ دگہ مھلوک ھوار اِنت –

زانگ بہ بیت دری ٹرالرنگ ءِ ھلاپ ءَ گوادر ءَ ھوار تیابدپی جاھاں زھرشانی یکشل ءَ بیگ ءَ اَنت بلے گپ ءُ تران ءُ سدکیاں پد زھرشانی کنوک وتی زھرشانیاں ھلاس کن اَنت ءُ واتر بنت بلے آیانی مسامانی درچ ءَ سرکاری واک گندگ ءَ آیگ ءَ نہ بیگ ءَ اَنت-

بلوچستان ءَ بیگواھیں مردمانی یل کنائینگ ءِ ھاتر ءَ چست ءُ ایرکنوکیں گل وائس فار بلوچ مسنگ پرسنز ءِ وائس چیئرمین ماما قدیر بلوچ ءَ گْوشتگ کہ بلوچستان ءِ دمگ گوادر جیونی ءِ میتگ پانوان ءَ گوستگیں سال ءِ بیست ءُ ھپت فروری ءَ میران ء حمل بلوچ ایف سی ءِ کارندہ عمر نامیں ایف سی کمانڈر ءُ جیونی پولیس تھانہ ءِ آفیسر رفیق ءِ سروکی ءَ پولیس کارندہ ءُ ایف سی ءِ کارندھاں دزگیر کتگ ءُ بیگواہ کتگ-

کھول ءِ گْوشگ ءِ رِد ءَ دزگیری ءِ وھد ءَ میران بلوچ ءِ عمر ھژدہ سال ءَ چہ کم بوتگ پمیشکا راہ راھبندانی ھساب ءَ کم عمری ءَ ھوار کتگ ءُ ٹین ایج زندان ءَ برتگ اش-

ھمے وھد ءَ اشی ءِ ھمراھی ءَ دگہ لھتے چُک میتگ ءَ جتا جتائیں لوگاں آوار جتگ ءُ گوں برتگ اَنت ئِے کہ چیزے ماہ ءَ زورانسری بیگواہ کنگ ءَ پد یل اش کتگ اَنت بلے میران انگت پاکستانی پوج ءِ زنداناں بند اِنت-

آئی ءِ گوشگ ءِ رد ءَ بازیں منت پریات ءُ لھتے مردماں چہ سپارش کنائینگ ءَ ابید میران بلوچ یل کنگ نہ بوتگ ، پمیشکا پنچ ستمبر ءَ میران ءِ پت حمل بلوچ ءَ جیونی پولیس تھانہ ءَ وتی چُک ءِ زورانسری آوار جنی ءِ ایف آئی آر نکش کنگ ءِ ھاتر ءَ دراخواست داتگ بلے تھانہ ایس ایچ او واحد ءَ ایف آئی آر نکش کنگ ءَ مہ کن کتگ-

پنچ ستمبر ءَ ھمے درگت ءَ آھاں انسان ھکّانی ءِ باسک بلوچ رسانکدر ءُ مئے گل ءِ دمگی اھوالکاراں گوں ھال کتگ ءُ ھمے بابت ءَ سرپدی داتگ-

ماما قدیر بلوچ ءَ گْوشتگ کہ اے ھال دمگی ویب سائٹ ءِ چہ شنگ بوتگین ءِ سر ءَ ایف سی ء دمگی کمکار کہ آیانی ناماں ھم ما زان ایں -اسر کپتگیں کھول ءِ بیھار دیگ ءَ اَنت کہ آ حمل ءَ ایف سی ءِ بگیری ءَ ایف آئی آر نکش ءِ کنگ سر ءَ زاہ ءُ بد داتگ اَنت-

آئی ءَ گْوشتگ کہ ایف سی ءِ دمگی کارندھاں تھنا اے کھول ءِ زھنی ازیت داتگ، آ وتی ھک ءَ چہ پُشت کنزگ ءِ ھاتر ءَ بیھار دیگ ءِ جھد کنگ ءَ اَنت بلکیں اشانی کمک کنوک چاگردی باسک زبیر نور ء حاجی نور محمد گوستگیں روچ ءَ شش ستمبر ءَ ایف سی ءَ لوٹ اِتگ-

دمگی مردماں مارا گْوشتگ کہ آ ایف سی ءِ عمر نامیں آفیسرے ءَ لوٹائنتگ چریشی آسر ءَ آ وتی پیش کنگ ءَ گوادر ءَ شتگ کہ اود ءَ ایف سی ءَ یک روچے وتی بندیگ جاھاں بند کتگ ءُ دومی روچ ءَ یل کتگ –

بلے آئی ءِ موبائل گوانکو پچ گپتگ کہ چریشی ءِ آسر ءَ گوں آئی ءَ ھال ایوال مھتل اِنت-

ما مدام اے گپ پدر کتگ کہ بلوچستان ءَ پنجاہ ھزار ءَ گیش مردم بیگواہ کنگ بوتگ اَنت بلے اے ما ھمینچوک گْوشتگ وھدیکہ راستیں کچ چہ اشی ءَ گیش ھم بوت کن اَنت- انچش کہ اسرکپتگیں کھول بیھار دیگ بیت- گپ ءِ کنگ ءَ دارگ بنت ءُ اشانی کمکاراں زبیر نور ءِ وڑ زھنی ءُ جانی ازیت دے اَنت بیگواھیں مردمانی کھول ءِ کمک ءِ کنگ ءِ سزا دیگ بنت- پمیشکا مردم وتی زورانسری آوار جنگ بوتگیں مردمانی رپورٹ ءَ نکش نہ کن اَنت –

آئی ءَ گْوشتگ کہ زبیر نور ءِ دمگی مردماں مارا گْوشتگ کہ آئی ءِ میتگ ءَ ایف سی ءُ دمگی چاریگاں تُرس ودی کتگ ءُ اے دمگی چاریگ تچکی ءَ مردماں آوار جنگ ءَ ایف سی ءَ کمک کنگ ءَ اَنت –

زبیر ءِ لوگ مردم ھمینچو تُرس ءِ آماچ کتگ اَنت کہ آ سرپد بنت کہ زبیر ءِ نیمگی ءَ آ ھم ھمے تاوان دیگ بنت – کہ بلوچستان ءَ انسانی ھکّانی لگتمالی ءَ پیشدار اِیت ءُ اے شریں وڑے ءَ گندگ بوگ ءَ اِنت کہ بلوچستان ءَ نندوکیں مردم آجو نہ اَنت بلکیں بلوچستان یک بلاھیں ازیت جاھیں بُنجلے کتگ اش – گام گام پوج ءِ کارندہ اوشتوک اَنت – لوگ لوگ ءَ ڈیتھ اسکواڈ ءِ رنگ ءَ زر ءِ ھاتر ءَ کشوک نادینتگ ، مپادی ٹولیاں چہ مردماں چپت کنگ ءَ اَنت – بلوچستان ءَ نندوکیں مردم زان اَنت کہ آیانی واستا ساہ کشگ ھم چنگ سکیانی دیمپان کپ اِیت – ما توار چست کنگ ءَ ایں ما ساہ زرت نہ کنگ ءَ ایں بلے گمان اِنت دگنیا ءَ مئے توار ءَ اش کنگ ءَ نہ اِنت –

آئی ءِ گوشگ ات کہ پانوان میتگ ءَ اشی پیش ھم یک انسانی ھکانی باسکے لھتے اداراں بیگواہ کنگ بوتگ کہ آ گوادر ءَ چہ دیم پہ کراچی ءَ رؤگ ءَ بوتگ کہ کوچ ءَ چہ ایرگیجگ بوتگ کہ آئی ءَ کراچی ءَ وائس فار بلوچ مسنگ پرسنز ءِ بنجل ءِ تر ءُ تاب کتگ اے دومی وئیل انت کہ وی بی ایم پی ءِ باسک ترسینگ بوگ ءَ انت –
من انسانی ھکانی ادارہ، آمیدگس ءُ ھاکماں چہ لوٹ کناں کہ زھیر نور یل کنگ بہ بیت ءُ زورانسری آوارجنی ءَ پھازگ بہ بیت – آئی انسانی ھمدردی ءَ زورانسری آوار جنگ بوتگیں کھولانی کمک کرتگ کہ ھر یک انسانے ءِ پرز انت پریشی ءَ آئی ءَ ماژگی ٹارچر کنگ،آئی ءِ سر ءَ زوراکی کنگ ءُ آئی ءِ آزاتی پچ گرگ انسانی ھکانی بگیری دارگ انت کہ آشی ءِ بگیری ءَ ھر تبک ءَ توار چست کنگ بیت انت –
من پانوان میتگے سیریں ھما کہ سیاسی ءُ چاگردی رھشونی کنگ انت ھما کہ اسپیت ریش ءُ میتگے کماش انت آھاں چہ لوٹ کناں کہ آ اے زھگانی زند ءِ گوم ءَ گوازی کنگ ءَ یل بہ کن انت – میران ءُ زھیر توپک گون نبوتگ آھاں ھچ وڑیں چشیں کارے نہ کرتگ کہ کانودانی بگیری دارگ بہ بیت ھمے ھاتر ءَ اے مئے سر ءَ پرز انت کہ ما وتی زھگانی زورانسری آوار جنی ءِ بگیری ءَ گپ بہ جنیں ءُ ھما کھول کہ وتی بیگواھیں مردمانی ھاتر ءَ کانودی راہ ءَ گرگ لوٹ انت اے آھانی ھک انت ءُ مئے پرز انت کہ ما آھانی ھروڑ ءَ کمک ءَ بہ کن ایں- بلے من ءَ بژن انت کہ پانوان ءِ چاگرد سیریں زر والاں مردمانی چیردستی ءَ وتی زمہ واریاں بے ھیال انت کہ آھانی زھگانی زند ءَ پہ ھترہ انت –
آئی ءِ گوشگ ات کہ منی گور ءَ راستیں ھال ھست انت کہ اشانی تہ ءَ یک ناموریں مردمے یک ورنایے ءِ آوار جنی ءَ تچکی ءَ ھوار انت، کہ آ چہ روکپتی بلوچستان ءَ آوار جنگ بوتگ ءُ جیونی ءَ پاکستانی پوج ءِ چیریِ ادارھانی دست ءِ داتگ اگاں اے درچ ھمے وڑ ءَ برجاہ بیت گڑا ھما جاہ ءَ ما ریاست ادارھاں الزام جن ایں گڑا اے کردانی واھندانی نام ھم دیم ءَ کاریں آھاں زاھر کنیں – آھاں آمیدگس ءَ بریں اوشتارینیں، میان استمانی آمیدگس اقوام متھدہ،ادرھانی سر ءَ نمدی نبشتہ کنیں آھاں دگہ ڈیھاں رؤگ ءِ سر ءَ بندش جنائینیں پرچاکہ نوں ما چد ءُ گیشتر اوپار کرت نہ کنیں –

بی ایس سی اسلام آباد ءِ جارکش ءَ وتی شنگ کرتگیں درشانی ءَ گُشتگ کہ پاکستان میڈیکل کمیشن ءِ نیمگ ءَ بی ایم سی میڈیکل ٹیسٹانی بے رھبندی ءِ بگیری ءَ نودربرانی پُر ایمنیں زھرشانی ءِ سر ءَ پولیس ءَ بیڑ برتگ ءُ نودربر لَٹ شاپ کتگ ءُ دزگیر کتگ اَنت اے املے ایرجنی ءَ ھمینکس بہ کن ئے کم اِنت –

جارکش ءَ گُشتگ کہ میڈیکل ءِ جنک ءُ بچکیں نودربراں میڈیکل انٹری ٹیسٹ ءِ زوریں رھبند ءُ میرٹ ءِ پامالی ءِ ھلاپ ءَ شال ءَ زھرشانی ءَ بیتگ اَنت کہ آیانی سر ءَ پولیس ءَ بیڑ برتگ ءُ لَٹ ءُ کُٹانی ھواری ءَ بازیں بازیں نودربر زدگ بیتگ اَنت ءُ دزگیر کنگ ھم بیتگ اَنت –

آئی ءَ گُشتگ کہ اے نودربر وتی ھکانی لوٹ ءَ بیتگ اَنت جمھوری رنگ ءَ زھرشانی کنگ ءَ بیتگ اَنت کہ پولیس ءَ زورانسری زوراکی بندات کرتگ ءُ نودربر چُتگ اَنت ءُ چریشی ءَ پدر بیت اِنت کہ پولیس جمھوری رنگ ءَ ھلاس کنگ ءُ زوری ءَ مارا دور برگ لوٹ ایت –

جارکش ءَ گُشتگ کہ میڈیکل ءِ نودربرانی المی لوٹ منگ بہ بنت ءُ زوت ءَ چہ زوت آیاں انساپ دیگ بہ بیت اِنت ءُ بی ایس سی اسلام آباد شال ءِ پولیس ءِ زوراکیاں ایر جنت ءُ میڈیکل نودربرانی گون ءَ ھچ رنگ ءَ اوشتوک اِنت –

زانگ بہ بیت مروچی پولیس ءَ نودربرانی سر ءَ بیڑ برتگ ءُ بازیں نودربر چُپتگ اَنت ءُ باز دزگیر کرتگ ءُ پد ءَ یلو کنگ بیتگ اَنت ءُ چریشی ءِ پژدر ءَ بلوچ پھناتاں چاگردی رسانکجاھاں ھم زھرشانی کنگ بیتگ اَنت –

بلوچ نودر گل بساک ءِ بنجاھی جارکش ءَ رسانکدراں وتی شنگ کرتگیں درشان ءِ تہ ءَ شال ءَ میڈیکل نودربرانی سر ءَ لٹ شاپ ءُ آھاں زنداناں بندیگ کنگ ءِ امل ایرجتگ ءُ گوشتگ کہ گل نودربراں گوں ھمکوپگ انت ءُ نودربرانی پلامرزی ءَ باند ءَ شال ءَ ھوار درسیں ھنکینانی نیمگ ءَ زھرشانی روانک کشگ بیت انت –

آئی ءِ گوشگ ات کہ پاکستان میڈیکل کمیشن ءِ نیمگ ءَ برجم داشتگیں ٹیسٹ تہ ءَ کہ کورسانی سرجمی ءَ بے دلگوش کنان ءَ نودربرانی وانگ ءِ درچ ءِ تہ ءَ اڈاند پیداک کتگ ھمود ءَ نودربراں کہ جمھوری وڈ ءُ ڈول ءَ زھرشانی راہ وتیگی کتگ، نودربرانی پُرایمنیں زھرشانی سر ءَ لٹ شاپ کنگ ءُ آھاں زنداناں بندیگ کنگ یک گیرکانودی بے رھبندی املے – نودربرانی زھرشانی ءِ درگان درگان کنگ ءُ نودربرانی سر ءَ لٹ شاپ ءُ وتی تاکت ءِ کارمرز کنان ءَ آھاں چہ آھانی کانودی ءُ جمھوری ھک ءِ پچ گرگ جھد کنگ بوتگ –

آئی ءِ گوشگ ات کہ بلوچستان کہ وانگ درگت ءَ پشت ءَ دور دیگ استان ءِ زانگ بیت ءُ ھمود ءَ ھر سال سدانی کچ ءَ نودربر میڈیکل ٹیسٹ ءِ تیاری ءَ کن انت ھمے ٹیسٹانی تہ ءَ کورس ءَ چہ ڈن مواد ھوار کنگ نودربرانی باندات ءِ سر ءَ ڈنگ ءِ مانند انت ءُ اے امل ھمنچو ایرجنگ بہ بیت کہ کم انت – بلوچ اسٹوڈنس ایکشن کمیٹی نودربرانی درسیں لوٹاں جائز منّیت ءُ گوں آھاں ھمکوپگ انت ءُ مدامی نودربرانی رھشونی ءَ ھمک وھد ساڑی انت –

جارکش ءَ گڈسر ءَ وتی درشان ءِ تہ ءَ گوشتگ کہ مروچی نودربرانی سر ءَ بوؤکیں لٹ شاپی سک باز پدردی ءُ گیرکانودی املے گل اے امل ءَ ترندی ءَ گوں ایرجنت ءُ اے امل ءِ بگیری ءَ باند ءَ شال ، اُتھل ءُ کراچی ءَ ھوار درسیں ھنکیناں زھرشانی کنگ بیت انت –

بلوچستان ءِ بنجاھی شھر شال ءَ میڈیکل نودربرانی نیمگ ءَ زھرشانی روانک کشگ بیتگ، روانک ءُ میڈیکل ءَ بندوکیں بازیں نودربراں بھر زرتگ –

میڈیکل نودربر گوستگیں بازیں روچاں پاکستان میڈیکل کمیشن (PMC) نیمگ ءَ شنگ بیتگیں جار ءَ انٹری ٹیسٹ این ایل ای ءِ ھلاپ ءَ پاکستان ءِ جتا جتائیں شھراں زھرشانی کنگ بیگ ءَ اَنت-

نودبرانی زھرشانی کنوکانی رد ءَ این ایل ای پی ایم سی ءِ نیمگ ءَ میڈیکل ءِ زھگانی واستا مزنیں استھسالے میڈیکل کالج ءَ داکلہ ءِ واستا نودربراں باز مشکلانی دیمپانی کنگ کپ اِت اِنت میڈیکل کالج ءَ داکلہ ءِ زورگ ھَ پد گیش چکاسانی جیڑھانی دیمپانی بنت-

زھرشانی کنوکاں لوگانی کار کنوکاں گریبیں نادراھانی واستا ھدمت کنگ لوٹ ایت چریشی ءَ پد پی ایم سی ءِ اے چکاس وتی جوڑ کرتگیں سسٹم چیلنجے ءَ گیش دگہ ھچ نہ اِنت –

چارشمبے ءِ روچ ءَ بلوچستان ءِ بنجاھی شھر شال ءَ نودربرانی نیمگ ءَ پی ایم سی ءِ جار ءِ ھلاپ ءَ زھرشانی روانک کش اِتگ –

شال ءَ زھرشانی کنوکیں نودربرانی سر ءَ پولیس ءِ لَٹ ءُ کُٹ، بازیں کچے ءَ نودربر دزگیر کنگ ءُ برگ بیتگ اَنت –

بلوچ اسٹوڈنٹس ایکشن کمیٹی ءَ زھرشانی کنوکانی سر ءَ پولیس ءِ لَٹ ءُ کُٹ ءُ دزگیری ایر جتگ اَنت ءُ گوشتگ کہ پُر ایمنیں میڈیکل ءِ نودربرانی سر ءَ لَٹ ءُ کُٹ باز بژنیگی اِنت –

آئی ءَ گُشتگ کہ ھمود ءَ یک نیمگے ءَ پی ایم سی ءِ نابودی ءِ سبب ءَ بازیں کچے ءَ نودربرانی آؤکیں زند ءَ زوال کنگ ءَ اِنت دومی نیمگ ءَ ھمود ءَ گپ ءِ گوشدارینگ ءَ نودربرانی سر ءَ لٹ ءُ کُٹ کنگ ءُ دزگیر کنگ گیر رھبندے –

ھمےوڑ بی ایس او ءِ چیئرمین ظریف رند ءَ شال ءَ پولیس ءِ دزگیر کنگ ءُ دزگیری ایر جتگ اَنت –

بی ایس او ءِ چیئرمین ظریف رند ءَ گشتگ کہ پولیس ءِ غنڈہ گردی رویش نودربرانی جد ءُ جھد ءَ ھلاس کت نہ کنت بلکیں زھرشانی درچ گیشتر پراھگ بیت اِنت سرجمیں ڈیھ ءَ نودربر، استاد، سیاسی ءُ چاگردی باسکاں گوں دزبندی اِنت آ شال ءَ پولیس ءُ بلوچستان ءِ سرکار ءِ ناروائیں رویش ءِ ھلاپ ءَ توار چست بہ کن اَنت ءُ گپتگیں نودربراں یلو بہ کنائین اَنت-

نبشتانک: پروشتگیں لوگ سمارَگ لوٹ ایت

نبشتہ کار: لتیپ سکی

دی بلوچستان پوسٹ

برے مردم نند ایت دل ءَ کلانٹگیں ھیال چست ءُ ایر بنت، مدام جبین ءَ ارس کلومبیں یات چو دریا ءِ چولانی داب ءَ چست ءُ ایر بنت ،اے ھیال ءُ لیکہ برے دابے ءَ تئی دیم ءَ گوستگیں یاتانی پَتر پتایگ بنت ترا تئی جبین ءِ لھڑ ھنچو بے شبینی ءِ نیمگ ءَ تیلانک دے اَنت تئی دل لوٹ ایت کہ من اے گرانبستگیں ساھتاں چہ وت ءَ دور بہ بان ءُ زند ءِ تئی ھما تیلانکیں یات مدام تو آیانی سرجمی ءَ لوٹ اِتگ، من آیاں چو سور دابے پہ شات ءُ گل سرجم بہ کن آں بلے گوْش انت بنی آدم ءِ ھیال چہ آئی زند ءِ کجام ھم کلانٹگ ءِ پیم زور زورانسری ایر مان جنی ھاوند ءِ تب ءَ نہ لوٹگ مٹ بوؤوکیں داباں ترا چہ سندگ بنت، تئی دست ھورک ءُ چم نیادی بنت بس ودار ءِ سانکلانی پینڈاں گوں ھمگرنچ بہ ئے ۔

بِرے برے تئی ھما دابیں بن بستگیں ھیال ءُ گدان دوست ھمراہ ءُ ھما مردم کہ تو آئی ءِ سر ءَ مدام پھر بند ئے برے ھما گدان کہ تو مدام پہ آئی ءِ پلگارگ ءَ وت ءَ ھم بے تاھیر ءُ جیڑگانی آماچ کن ئے بلے چہ روکیں آس ءِ کیل ءَ یا ایندگہ کھرانی آماچ بہ ئے بس ترا ھمے سمارگ دل ءَ کیت، من ایوک آں بس تھنا آں پمن دگنیا ھچ پشت نہ کپتگ بلے ھاوند ءِ چکاس اِنت کہ مردم ءِ سر ءَ برے گونگے ءَ ساھیل بنت برے چو کھرے ءِ داب ءَ ترا چک چین کن انت، برے چو بھار گاھیں جمبراں ترا توشگ سر کنت، برے تئی دست ھم ھورک بیت تو پہ ریٹائی امیتاں تلوس ئے۔

ھمے داب ءِ بنی آدم پہ امیتانی کشارانی رودینگ ءَ چونیں زند ئِے تہ ءَ واب گند اِیت بلے اجب کہ زند ءِ تہ ءَ ھنچیں واب ھست آ بے ما نہ بنت وابانی بستار ءُ لوٹ تو مدام لوٹ ئے من آئی ءِ پلہ وتی زند ءَ ھم چکاس آں بلکیں زند ءِ دیگ ءَ ھوں چار پدیانک دیم ءَ سر گر ئے ترا آ گدان ءُ کیلگ دَلوت تئی رھشونی کنوکیں سوجکار تئی دیم ءَ بروکیں ھما گل کہ ترا تئی پجار ءَ سر کنت، ترا تئی جند ءِ مارشت ودی کنگ ءِ سکین ءَ ھم دنت ترا چو بنی آدمانی گران تبیں زوراکیاں رکین ایت ترا ھنچیں ھاٹیگ دنت کہ تو وت ءَ چہ جست ءُ جوہ ءِ رھبنداں ھیل بہ کن ئے بلے برے اے دیستگیں تلو تئی دیم ءَ کوجگ بیت برے آئی ءِ توک ءَ ھنچیں کار بنت،تو اے زند ءَ وتی نہ جیڑ اِتگ اَنت کہ من اے آیوکیں پدریچی واب دیستگ کدی گمان نہ کتگ بلے اے ترا چہ پُلگ بیت تو ھورکیں ھیال آں کوار کن ئے، زند ءِ روچانی پاسبان بہ ئے۔

مرچی منی ھم ند چو دروگیں بستار ءُ توسپ ءُ ستا چہ آیگ ءَ انت بلکیں من وتی کسہ چو رَنگ داریں گپاں لبز کمایگ لوٹ آں ،بلے زند ءِ گڈی امیت کہ چہ آئی ءَ پد من چورھیں یات دل ءَ داشت انت بے وابی کِرار دل ءَ دارگ ءِ نام زرت دیم پہ روچانی گوازینگ ءَ سر گپت آں ،اے کس ءَ چہ من ھچ سرپد بوت نہ کناں وتی مارشتاں چون دیم ءَ بیار آں، دل ءِ لھڑاں کم بہ کناں پرچی ءَ کہ من ءَ اے سمار اِتگیں لوگ کروجگی ءِ گالاں گوں ستا کنگ شات نہ بیت بلے چہ رھسریں دھر ءِ لنجیں تھاری ءَ ارجان بوتگیں دھر ءِ لگور دروشمیں سیاھگ ءَ چو چاردھی ماہ ءِ دیم ماں جمبرے ءَ اندیم کت دل ءَ بس ھمے گواز ءِ توار اِشکنگ ءَ کپت آئی ءَ چو ماتے ءَ بے اولادی ءِ زار پِرینت، من ءَ بہ سمار اِیت من بے وارس بوت آں من چہ پلیں ڈَڈراں یل بوت آں منی ھچ واک ءَ چہ نہ انت کہ من دوبر چو نوک سینگار اِتگیں بانور ءَ پد ءَ زند ءِ گڈی کِشکاں واتر بیا آں بلے ھر بچ کہ پمن جیڑ ایت من ءَ دست ءَ بہ گیت من چو شیر زالیں مات ءَ آجز آں ،ھنو ھم چے ھیال جنگ ءَ انت اگاں سَما بہ کناں۔

آئی ءَ مدام آجوئیں ھیال دست ءَ داشتگ ات اَنت مدام چو زیبناکیں کَلاکاں اوشتاتگ ات ،تَرا ھورکیں چات ءَ کشگ ءُ یک منزلیں راھے ءِ روگ ءِ سکین دیگ لوٹ ات ترا آبسریں کشک ءِ مساپر کنگ لوٹ اِت، آئی توک ءَ گپ ءُ ھبر وت نیستگ اَت بلے بنی آدم ءِ جبین ءَ مدام ھمے جیڑ اِت کہ من ءَ سکین چہ آئی رَسگ ءَ انت من لوٹاں کہ اے سکینانی پد ءَ من وت ءَ بہ مار آن ءُ آئی ءَ مھکم بہ کن آں بلے اے چکاسانی پد ءَ بازیں داب ءُ جھل بُٹ کوہ ڈوک کلات دشت کوچگ ژندی دمبرَگ دیم ءَ چو دژمِن ءِ پیم ءَ دیم مانتر بوت، تئی جیگ بند گپت ءُ ترا آس ءِ نیمگ ءَ شھار دات ئِے تو بھ نہ لوٹ اِت کہ من چہ وتی پسگاں دور بہ باں پرچی ءَ کہ تو ھمے پُسگ وت ھم پہ چورھی رودین َنت چکانی رودینگ یک مات ءُ پت ءِ ھیکگیں پسگ ءَ سَما پِر بیت، آئی ءَ چون رودینتگ انت بلے اے زند ءِ گرانیں ساھتانی تہ ءَ آ وت جُک اِیت چہ یک ھنچیں نوبت ءِ توک ءَ آئی ءَ بھ نہ مار اِتگ کہ منزل ءِ گڈی ساھتاں اے پیم جُک انت چو کانچ ءِ پیم ءَ پُرش انت بس نوں آئی ءَ مدام وبانی تہ ءَ ھمے چیھال جَتگ ،من پرشتگیں کانچ ءِ دروشم ءَ آں بس من ءَ بہ چِن ءُ نزار اِت اے آئی گڈی واھشت اَت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ بلوچستان ءِ دمگ کیچ ءَ ھواریں ھند مند ءَ پاکستانی پوج ءَ زورانسری یک ورنایے آوار جتگ ءُ بیگواہ کتگ –

گیشیں ھالانی رِد ءَ مند ءِ دمگ گیاب ءَ گوستگیں شپ ءِ ادار یک ءُ نیم ءَ پاکستانی پوج ءَ نظر محمد ءِ لوگ ءَ بیڑ برتگ ءُ بلوچ دوداں لگتمال کنان ءَ لوگ پٹ ءُ پول کتگ اَنت ءُ چُک ءُ جنین لٹ ءُ کُٹانی نشانگ کتگ اَنت ءُ ھمے میان ءَ پاکستانی پوج ءَ یک ورنایے زورانسری آوار جتگ ءُ بیگواہ کتگ-

آوار جنگ بوتگیں ورنا ءِ پجّار گلاب ء نظر محمد ءِ نام ءَ چہ زانگ بوتگ-

ھمے وڑ ءَ پنجگور ءَ ناشناسیں مردماں یک مردمے آوار جتگ ءُ برتگ-

ھالانی تہ ءَ گوشگ بیتگ کہ بیست ءُ نُھ اگست ءَ سلاہ بندیں مردماں پنجگور تسپ ءَ صابر ء مولا بکش آوار جتگ ءُ برتگ –

دمگی مردمانی رد ءَ سلاہ بندیں مردماں صابر آوار جتگ ءُ برتگ کہ تنی وھدی آئی ءِ بارو ءَ ھچ ھال نیست ءُ نانکہ آوار جنوکانی بارو ءَ گپ دیم ءَ اتکگ اَنت-

زانگ بہ بیت بلوچستان ءَ ھمک روچ ءَ پاکستانی پوج ءِ زوراکی ءُ زورانسری آوار جنی برجاہ ءَ اَنت ءُ ھمک روچ مردمانی بیگواھی ءِ ھال رسانکجاھان شنگ بیگ ءَ اَنت –