TBP Balochi

نبشتانک: زمین دوستی

نبشتہ کار :نعمان اسلم

دی بلوچستان پوسٹ

زمین چونائی ءَ جُتا جُتائیں رنگ ءَ زانگ بیت، اگاں ما بِہ چاریں زمین دُگنیا ءِ ھما ٹُکر اِنت کہ جلیں بنی آدم چہ کرنانی کرن زمین ءِ باھوٹ اَنت اِے زمین ءِ سر ءَ وڑ وڑیں وھد ءُ زمانگ، دور، جنز، راج وتی دلبند ءِ سر ءَ جاہ داتگ اَنت۔ کدرت ءَ وتی رھبند ءِ بنیات ءَ یک انچیں ربیتے ءَ ساز اِتگ کہ کسّے اِے دگنیا ءِ تہ ءَ پہ ابدمانی زندگ بوت کرت نہ کنت۔ ھر چیز وتی وھد ءَ گْوازین اِیت ءُ آسر بیت چُشکہ یونان(1100-800 قبل از مسیح) ءُ روم(700-400 قبل از مسیح) ءِ دو٘دمان سکندر ءِ آزُم(356-323 قبل از مسیح) ءُ میسوپوٹامیہ(6000-1500 قبل از مسیح) زمین ءِ راجدپتر ءِ بَھر اَنت۔

کادیم ءِ زمانگ ءَ چُشیں ھدبندی نہ بوتگ بس دو٘دمان آباد بوتگ اَنت۔ ھم زُبان، دود ءُ ربیدگ ءُ ھم نیکراھی (بنیاد) ءَ وھد ءِ دیمروئی گْوں دگنیا ءَ دیمروئی کرتگ۔ جُتائیں دودمان آباد بوت اَنت، چاگرد ءِ تہ ءَ جُتائیں زبانانی گپ جنوکیں لس مھلوک آباد بوت اَنت، ھمے پیم ءَ دُگنیا بھر ءُ بانگ بوان بوت۔ کسّے پہ وشّی ءُ کسّے پہ سکّی وتی زندمان گْوازینت۔ وھدے کہ جُتائیں زبان ءُ دود ربیدگ زمین ءِ جُتائیں ھنداں آباد بوان بوت اَنت گُڑا ھما زمین ءِ پجّار ھم بدل بوان بوت۔

ھر یک راجے ءِ وتی جُتائیں لیکہ اِت اَنت ءُ ھر یکے جُتائیں پجّارے ءَ وتی سرڈگار ءِ سر ءَ نِشت ءُ وتی زندمان گْوازینت۔

زمین ءِ دوستی چہ راج ءِ راجدوستی ءِ بُنیات ءَ بندات بوت راجدوستی ءِ لیکہ چہ پرانس ءِ آشوب (1787-1799) ءَ بندات بوت جُتا جُتائیں جاھانی مردماں وتی زبان، دود ءُ ربیدگ ءُ رودپتر ءِ بنیات ءَ وت ءَ یک جُتائیں راجے ءِ دروشم ءَ دیم ءَ آؤرت بازیں ایردستیں راجاں جھد بِنا کرت ءُ راجی آجوئی اِش گپت ءُ وتی سرڈگار ءِ سر ءَ آباد بوت اَنت۔

اگاں ابرمی دروشم ءَ ماچمشانکے بہ دئیں گُڑا اِے گپ پدّر اِنت کہ کجام مردم کہ یک جاھے ءَ ودی بیت گُڑا آ مردم ھماجاہ ءَ وتی لوگ کنت ءُ آئی ءَ دوست دار اِیت۔

اِے گپ زانگی اِنت کہ کجام جاہ ءَ سرڈگار ءِ دوستی ءِ گپ بیت گُڑا ایشی ءِ مول ءُ مراد اِے نہ انت کہ آ ھما زمین ءِ ٹکّر ءَ گْوں مِھر کنگ اِنت بلکیں کسّے کہ وتی سرڈگار ءَ دوست دار اِیت گُڑا آئی ءِ را ھما جاہ ءِ مال ءُ دلوت، کوہ کوچگ سرجم ءَ دوست بنت پرچے ءَ یک انسانے ءَ را دومی جاہ دوست نہ بیت؟ پرچے کہ آئی ءَ دومی جاہ ءَ وتی زند نہ گوازینتگ، آئی ءَ را وتی جاہ ءِ کِشک، کشت ءُ کشار، آپ ءُ راھسر سرجم ءَ دوست بنت کہ آئی وتی سرجمیں زند گوازینتگ۔
زندگیں انسان ءِ مِھر گوں وتی زمین ءِ مردم آنی گون ءَ اِنت۔ زمین ءِ مِھر آ زمین ءِ کُلیں چیزاں گْوں دوست دارگ ءِ نام اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان لبریشن فرنٹ ءَ جھاؤ ءَ یک پوجی کارمندے ءِ کوش ءِ زمہ واری منّ اِتگ-

بی ایل ایف ءِ جارکش میجر گوھرام بلوچ ءَ رسانکدراں شنگ کرتگیں درشان ءِ تہ ءَ جھاؤ ءَ یک پوجی کارمندے ءِ کُشگ ءِ زمہ واری منّ اِتگ –

آئی ءَ گُشتگ کہ سَے شمبے ءِ روچ ءَ ساھت سَے ءَ آواران ءِ دمگ جھاؤ ءِ ھند جھل جھاؤ سوڑ عطا مھمد بازار ءَ ھستین پاکستانی پوج ءِ چوکی سنائپر ءِ گون ءَ نشانگ کتگ ءُ یک کارمندے کُشتگ-

آئی ءَ گُشتگ کہ زورگریں پوج ءُ آئی ءِ کمکارانی سر ءَ اُرش داں بلوچستان ءِ آجوئی ءَ برجاہ بنت-

بلوچ اسٹوڈنٹس ایکشن کمیٹی ءِ بُنجاھی جارکش ءَ وتی شنگ کتگیں درشان ءِ تہ ءَ نال ءَ وانگی ادارھانی نزوری ءُ انتزامیہ ءِ ساڑی نہ بوگ ءِ بژن درشان کتگ ءُ گْوشتگ کہ وانگیانی درگت ءَ سرکار ءِ ٹاھاں چہ باید نال ءَ وانگی ادارھانی نیمگ ءَ دیھان ندیگ ءَ بژن اِنت-

آئی ءَ گْوشتگ کہ بلوچستان اے وھد ءَ ملک ءِ نزورتریں اُستان گوشگ بیت وھدیکہ سرکار ءِ ٹاھاں چہ ابید وانگی ادارہ ساڑی نہ بوگ ءِ ھاتر ءَ ھچ وڑیں گام چست کنگ نہ بوتگ-

کرونا وبا ءِ آسر ءَ گوستگیں سال ءَ سرجمیں ڈیھ ءَ وانگی ادارہ بند کنگ بوتگ اَنت کہ اے سال ءَ سرجم ءَ پچ کتگ اَنت – سرجمیں ڈیھ ءَ وانگ ءِ آسراتی نہ بوگ ءَ ابید اے وھد ءَ گورنمنٹ گرلز ھائی اسکول نال ءِ انتزامیہ انگت کلاس ءِ گرگ ءَ گندگ نہ بنت ءُ وھدیکہ اسکول ءِ انتزامیہ ادارہ ءَ ساڑی نہ اَنت-

آئی ءَ گْوشتگ کہ اسکول انتزامیہ مدام ساڑی نہ بوگ ءِ سر ءَ نودربرانی نیمگ ءَ وتی کمک ءَ چہ وت ضلعی انتزامیہ ءَ گوں گند ءُ نند کتگ ءُ وانگ ءِ ادارہ ءِ نیاھگ ءُ انتزامیہ ساڑی نہ بوگ ءِ سر ءَ بژن درشان کتگ –

ڈسٹرکٹ ایجوکیشن آفیسر ءَ نودربرانی گپ گوش داشتگ ءُ ٹیچرانی بدل کنگ ءِ لیٹر شنگ کتگ وھدیکہ ٹیچرانی نیمگ ءَ چہ نزیکی ءِ کارمرز کتگ ءُ پیسرگیں اوھد ءِ سر ءَ ساڑی بہ بہ بہ اِت-

آئی ءَ دیمتر ءَ گْوشتگ کہ اُستانی سرکار ءِ نیمگ ءَ وانگ ءِ ادارھاں ھرچ سال ءَ مزنیں پُڑی دیگ بیت وھدیکہ اسکول ءِ انتزامیہ پُڑیاں گپت ءُھڑپ کن اَنت ءُ نودبراں آسراتی نہ دے اَنت –

اسکول ءِ انتزامیہ آسراتی نہ دیگ ءَ ابید مارچ ءَ بگر داں انّو سرجمیں وڑے ءَ ساڑی نہ اَنت وھدیکہ وانگ ءِ ادارہ ساڑی نہ اَنت ءُ وانگ ءِ ادارھانی ساڑی نہ بوگ ءِ سبب ءَ نودربرانی زندمان جنجلانی دیمپان کنگ بوتگ اَنت-

گُڈی ءُ وتی درشان ءِ تہ ءَ گْوشتگ کہ وانگ ءِ ایمرجنسی وڑیں ٹاھاں ابید اُستان ءِ وانگ ءِ ادارھانی جاور بژنیگ اَنت – نال ءِ گرلز ھائی اسکول ء انتزامہ ءِ ساڑی نہ بوگ ءُ سرکار ءِ بے وسی ءِ سوب ءَ ھزارانی کچ ءَ نودبرانی زندمان نگیگی ءِ تہ ءَ اِنت – سرکار ءُ سرجمیں ٹیچراں گوں دزبندی اِنت کہ آ سھت ماں سھت ساڑی نہ بوگ ءِ سر ءَ اسکول انتزامیہ پسّہ داتگ ءُ تُرندیں گامگیج زورگ بیت – اگاں سرکار ءِ نیمگ ءَ بے وسی ءِ یکشل برجاہ بیت ءُ اسکول آسراتی دیگ نہ بوت آں گُڑا پُرایمن ءِ زھرشانی جمھوری ءِ رنگ ءَ چہ زورگ بیت اِنت-

کیچ ءِ دمگ تمپ ءَ یک مردمے ءَ دو براتانی سر ءَ کارچ ءِ اُرش کتگ ءُ ٹپی کتگ اَنت –

سربوتگیں ھالانی رِد ءَ مروچی سُھب ءَ تحصیل تمپ ءِ دمگ دازن ءَ یک مردمے ءَ اُرش کتگ ءُ دو برات ٹپی کتگ اَنت –

دمگی مردمانی رد ءَ نبیل نامیں مردمے ءَ دو برات دلجان ءُ الی جان ءِ سر ءَ اُرش کرتگ ءُ کارچ جتگ ءُ ٹپی کتگ اَنت-

دمگی مردمانی رِد ءَ وئیل ھما وھد ءَ بوتگ کہ دلجان وانگجاہ ءَ روگ ءَ بوتگ ءُ ھمے وھد ءَ نبیل نندوک بوتگ کہ دلجان ءَ گْوشتگ تو من آں پرچا چارگ ءَ ئے گُڑا ھمے ھاتر ءَ آئی ءَ کارچ کش اِتگ ءُ دلجان ءِ دست ءَ جتگ ءُ ٹپی کتگ ءُ وھدیکہ دلجان ٹپی جاوراں گوں لوگ ءَ شتگ مستریں برات الی جان ھال داتگ آ پد ءَ ھمے اُرشکار ءِ کر ءَ اَتکگ ءُ برات پرچا جتگ گُڑا آئی ءَ کارچ پد ءَ کش اِتگ ءُ گُٹ بُر اِتگ ءُ ٹپی کتگ-

الی جان گوں نگیگیں جاوراں کیچ ءَ برگ بوتگ-

دمگی مردمانی رِد ءَ نبیل ءِ نشہ بھا کنوکیں مردمے ءُ آ مدام ھمد ءَ نشتگ ءُ نشہ بھا ئِے کتگ روچ ساری ھمے درگت ءَ لھتے مردماں گْوشتگ کہ تو مئے بازار ءِ مھلوک نشہ ءِ آماچ کتگ بلے گوشگ پد ھم نشہ بھا کنگ یل نداتگ-

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی گل وائس فر بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ چار سد ءُ سِی ءُ دو روچ سرجم بوتگ – ھمے وھد ءَ بلوچ رھشون مھیم خان بلوچ، نیشنل پاٹی ءِ رھشون عبدالغفار قمبرانی، ایڈوکیٹ خالدہ قاضی ءُ دگہ مردماں بنجل ءِ تر ءُ تاب کتگ ءُ بیگواھیں مردمانی کھولانی گوم ءَ دلپدردی درشان اتگ –

وائس فار بلوچ مسنگ پرسنز ءِ رھشون ماما قدیر بلوچ ءِ گوشگ ات کہ اگاں بیگواھیں مردمانی کھول وتی دوستیگیں مردمانی یل کنگ ءَ باور بوگ لوٹ انت گڑا دیمونی دیگ ءَ چک ءُ پد مہ بنت ءُ وتی تہ ءَ یکجاھی ءُ یکمشتی آرگ المی انت –

آئی ءِ گوشگ ات کہ وت ماں وتی میان ءَ ایردارگ ءِ پیداک کنگ ءَ بس دژمن پائدگ چست کنت –

آئی ءِ گوشگ ات کہ اے دراجیں وھد ءِ پُرایمنیں جھد، شدکشیں ھرتال بنجل ءُ راجدپتری پند اے مدامی جھدانی نشانی انت ءُ مار ءَ گیشتر مھکم بوگ ءُ وتی دوستیگیں مردمانی یل کنائینگ ءِ ھاتر ءَ جھد تیز کنگ لوٹ ایت-

ماما قدیر بلوچ ءِ گوشگ ات کہ بلوچستان ءِ تہ ءَ انچو ھون ریتکگ لٹ ءُ کٹ ءِ یک درچے پچ کنگ بوتگ کہ روچ مروچی بلوچستان ءِ کنڈ کنڈ ءَ برجاہ انت –

آئی ءِ گوشگ ات کہ بلوچ راج ءِ بُرزیں ھوسلہ زوراکی دیم ءَ دژمن ءَ بے سوب کن انت –

آئی ءِ گوشگ ات کہ اے دراجیں ءُ جھد ءِ تہ ءَ کھولانی سبر ءُ اوپار ھاٹیگ ءَ سوبمندی گپتگ ءُ مار ءَ وتی جھد ءِ دیم ءَ برگ ءِ ھاتر ءَ ھمے وڑ پُرایمنی ءَ بلوچستان ءِ تہ ءَ زوراکی ءِ بگیری ءَ توار چست کنگی انت –

آئی ءِ گوشگ ات کہ دمگی دلارانی کمک ءَ اے جھد ءِ دارگ ءِ پندل ھم بے سوب بنت –

پاکستانی پوج ءِ دست ءَ زورانسری آوار جنگ ءُ بیگواہ بوتگیں مردمانی کھولاں وائس فار بلوچ مسنگ پرسنز ءِ بنجل ءَ اتکگ ءُ وتی دوستیگیں مردمانی بیگواھی “پروفارم ” پُر کُتگ ءُ بیگواھیں مردمانی گل وائس فار بلوچ مسنگ پرسنز ءِ گور ءَ سر کتگ انت – گل ءِ “پروفارمہ” ھوار آھاں وتی دوستگیں مردمانی ھاتر ءَ تامری درشان ءِ ھم شنگ کُتگ ءُ لوٹ کُتگ کہ اگاں آھانی مردم کسور وار انت گڑا ملکی کانودانی رِد ءَ آمیدگس ءَ آرگ بہ بنت ءُ سزا دیگ بہ بنت –

ھشت اکتوبر دوھزار ءُ سیزدہ ءَ رئیس کوٹ کراچی ءَ زورانسری آوار جنگ بوتگیں غیاث الدین بلوچ ءِ زھگ ءِ گوشگ ات کہ منی پت ءَ ھشت سال انت کہ بیگواہ انت ھچ ھال ءُ اھوالے نیست، ما لوٹ کناں کہ درسیں بے گناھیں مردمانی ھواری ءَ منی پت یل کنگ بہ بیت – منی پت ءِ کسور چی بیتگ کہ انچوکیں سز ءَ ئِے دیگ بوگ انت – آ بس یک ٹرانسپورٹرے بوتگ آئی ءَ چی ءِ سزا دیگ بوگ انت –

آئی ءِ گوشگ ات کہ منی مات سک نادراہ انت ءُ منی پت ءِ راہ ءَ چارگ انت ما مدامی ءُ ھمک ائید ءَ وتی پت ءِ وداریگ انت – مار ءَ بلوچاں بید چہ گم ءُ سکی ءَ دگہ ھچ نہ رسیت – ما ھر سال ھر ماہ ھمک روچ ھمے ودار ءَ ایں کہ مئے پت کیت بلے آئی ءِ ھچ ھال نیست –

آئی ءِ گوشگ ات کہ کسے ءِ برات، کسے ءِ چک، کسے ءِ پت دراہ بیگواہ انت -ما ھمے لوٹ کنیں کہ مئے پت یل کنگ بہ بیت پرچا کہ منی برات بے روزگار انت مات نادراہ انت مئے زند چوں گوز ایت؟ مئے سر ءَ رھم بہ کن اِت –

آئی ءِ گوشگ ات کہ اے زالم چی بہ زانت کہ وتیگاں چہ سِدگ ءِ درد چی یے؟ ھر مات ءُ پت، زھگ ، لوگی بس ھمے ودار ءَ ایں کہ مئے دوستیگیں مردم کدی کیت – بس ھاوند ءَ چہ دوائیں کہ مئے دوستیگیں مردم زوت بیا انت مار ءَ سر بہ بنت –

نھ ستمبر دوھزار ءُ پانزدہ ءَ ناگ ءَ زورانسری آوار جنگ بوتگیں عبدالغفور ء خدابخش ءِ برات ءَ وائس فار بلوچ مسنگ پرسنز ءِ بنجل ءَ اتکگ ءُ وتی برات ءِ زورانسری آوار جنی ءِ کیس نبشتہ کنائینتگ ءُ وتی تامری درشان ءِ تہ ءَ گوشتگ کہ آئی ءِ برات ناگ رخشان ءَ چہ شپ ءِ ادار دو ءَ وتی ناکوزتکانی گِس ءَ زورانسری آوار جنگ ءُ بیگواہ کنگ بوتگ –

آئی ءِ گوشگ ات کہ منی برات دھکان کارے بوتگ آئی ءَ گوں ھچ وڑیں سیاسی یا دگہ گلاں گوں سیادی نہ بوتگ – اگاں منی برات ءَ گناھے کتگ ءُ آ سزائے ھکدار انت گڑا من چہ سرکار ءَ لوٹ کناں کہ آئی ءَ ملکی آمیدگس ءَ بیار انت ءُ آئی ءِ ھر وڑیں سزا بیت مار ءَ کبول انت –

ھمے وڑ تاج محمد بلوچ ءَ وی بی ایم پی بنجل ءَ اتکگ ءُ وتی زھگ ءِ آوارجنی ءِ کیس نبشتہ کنائینتگ ءُ گوشتگ کہ آئی ءِ زھگ نھ ستمبر دوھزار ءُ پانزدہ ءِ شپ ءَ کلی گراڑی ناگ واشک ءَ زورانسری آوار جنگ ءُ بیگواہ کنگ بوتگ –

آئی ءِ گوشگ ات کہ آئی ءِ زھگ درسیں دمگی مردمانی دیم ءَ پاکستانی پوج ءُ ایف سی ءُ دگہ ملکی ادارھانی کارمنداں زورانسری آوار جتگ گوں وت برتگ – آئی ءِ گوشگ ات کہ آئی ءِ زھگ ءَ ھچ وڑیں گلاں گوں سیادی نہ بوتگ بس وتی گریبی ءَ گوں دلگوش بوتگ –

ھمے وڑ چار اگست دوھزار ءُ شانزدہ ءَ آواران ءِ دمگ سیاہ گزی ءَ پاکستانی پوج ءِ دست ءَ زورانسری آوار جنگ بوتگیں گزی ءِ فیض محمد ءِ زھگ ءَ وتی تامری درشان ءِ تہ ءَ گوشتگ کہ منی پت چہ گِس ءَ پاکستانی پوج ءَ زورانسری آوار جتگ ءُ گوں وت برتگ اگاں منی پت کتکار انت گڑا ملکی کانودانی رِد ءَ وتی آمیدگس ءَ آرگ بہ بیت- آئی ءَ چہ انسانی ھکانی ادارہ ءُ میان استمانی گلاں چہ لوٹ کرتگ کہ آئی پت ءِ یل کنائینگ ءَ وتی کرد ءَ پیلو بہ کن انت –

دو سال ءَ پیش یک جولائی دوھزار ءُ نوزدہ ءَ پنجگور ءَ زورانسری آوار جنگ بوتگیں مند نوکیں کہن ءِ جھمنند اسداللہ ء ناصر علی کسان سالیں زھگ ءِ گوشگ ات منی پت ءَ دو سال انت کہ بندیگ جاھاں بندیگ انت منی پت آجو کنگ بہ بیت من ءَ پہ وتی پت ءَ زھیر کنت ملکی وزیر منی سر ءَ بزگ بہ کن انت ءُ منی پت ءَ یل بکنائین انت –

زانگ بہ بیت ھمے لھتے ھپتگانی تہ ءَ بلوچستان ءَ بازیں گار ءُ بیگواھیں مردم جنگ ءُ کُشگ بیتگ اِت اَنت کہ چریشی ءَ پد بیگواھیں مردمانی کھول ترس آماچ بیت ءُ آیانی گوشگ اِنت کہ باریں مئے بیگواھیں مردمانی ھال چی اِنت –

اوگانستان ءِ بنجاھی شھر کابل ءَ زالبولانی نیمگ ءَ زھرشانی کنگ بیتگ – پد ءَ تالبان ءِ لشکر ءِ تیرگواری ءَ زھرشانی شنگ ءُ شانگ بیتگ-

اگان ءَ سر بیتگیں ھالامی رد ءَ اوگان ءِ بنجاھی شھف کابل ءَ پاکستانی سپارت ھانہ ءِ فیم ءَ زالبولاں وتی ھکانی واستا زھرشانی کرتگ – زھرشانی کنوکاں آجوئی ءِ اوگام جتگ –

زھرشانی ءَ بازیں کچے ءَ زالبول بیتگ اَنت آیانی دستاں بینرز ءُ پاکستان ءِ ھلاپ ءَ اوگام ھم جتگ –

آیاں سرکار ءَ گوں کتگ ءُ گوشتگ کہ زالبولاں ھرچ وڑیں ھک دیگ بہ بیت اِنت-

زھرشانی کنوکانی شنگ ءُ شانگ کنگ ءِ واستا سپارت ھانہ ءِ دیم ءَ ھستیں تالبان ءِ لشکر ءِ کارمندانی نیمگ ءَ برزکائی تیرگواری کنگ بیتگ-

اوگان رسانکدر طلوع ءِ رد ےَ تالبان ءَ لھتے اھوالکار زھرشانی ءِ ھال ءِ شنگ کنگ ءَ داشتگ اَنت ءُ لَٹ ءُ کُٹانی نشانگ کرتگ اَنت ءُ طلوع نیوز ءِ کیمرہ ھم پروشے بیتگ –

زانگ بہ بیت چریشی ءَ پیسر ھرات ءُ مزار شریف ءَ ھم زالبولانی نیمگ ءَ زالبولانی ھکانی ءُ سرکار ءِ تہ ءَ زالبولانی ھوار کنگ ءِ لوٹ کنگ بیتگ اَنت –

زھرشانی کنوکاں وتی زھرشانی ھما وھد ءَ کرتگ کہ تالبان ءَ اے جار جتگ کہ آیانی سرکار سازی نزیک اِنت –

نبشتانک: ہمیں اللہ نے بچایا

نبشتہ کار : شیردل بلوچ

دی بلوچستان پوسٹ

ھپت تومشان ءِ روچ ھچ بے ھال کنگ نہ بیت انت، اے روچ گوں وت باز درد ءُ اندواہ آؤرتگ ءُ بُِڈّاتگ، سیاہ ءُ تھاریں روچے زانگ بیت، راج ءِ چار تمَردیں جنگولیں سرمچنڈ یکجاہ شھید کنگ بوتگ ، اے گرانیں گماں گوں ھمے روچ ءِ پلہ بندوک ،بزان پہ راج ءَ سوگات کنگ بوتگ، اِستان ءِ دُز ءُ لگوریں پوجیگاں گوں ھندی دلاراں ھوار وتی دیم سیاہ کرتگ اَت ۔

انچش گوش اَنت شھید نہ مرِ اَنت زندگ اَنت، آوانی زند چہ شھادت رند ءَ بندات بیت، ھما کس پہ وتی راج ءِ وشیں باندات ءَ وتی سراں ندر کن اَنت، راجدپتر ءِ کاتانی تہ ءَ ابدمان ءُ نمیران بنت، چہ ھمے نمیرانیں بچّاں “شھیدمھیم جان پنام راھمین بلوچ “شھید اورنگزیب جان پنام شادین بلوچ ” شھید راشدجان پنام لونگ بلوچ ءُ شھید گلشیرجان پنام ھان جان بلوچ ءِ سیمی سالروچ مرچی سرجم بوتگ، ھپت تومشان دو ھزار ھژدہ ءَ جاہ آھو شندی ءِ پُشتی نیمگ ءَ جُڑیرہ کور ءَ گوں اِستان ءِ پوج ءَ دُچار کپتگ اَنت دیم پہ دیمی ءَ مِیڑ اش داتگ، یک نیمگے ءَ بی ایل ایپ ءِ شش تَمردیں سرمچنڈ ءُ دومی سداں پوجیگ گوں ٹوپ ءُ بمباں ھمے جنگ تاں بیست ءُ چار ساھت مان ایت چار نیمگ ءَ پوج ءِ انگیر ءَ کا اَنت۔

بَلے ! وتی تُپنگاں دَور نہ دے اَنت، وتی مَرگ ءَ را وتی راج ءِ زندمان لیک اَنت وھدیکہ من ھمے سنگتانی سیمی سالروچ ءِ درگت ءَ ند چست کرتگ نہ زاناں ایشاں چون بہ ساڑیاں ءُ کجام کارستان اِش بہ نبیساں ، انچیں کارستانی ھُدابند بوتگ اَنت، چہ آوانی شھید بوگ ءَ رند پوج ءَ جاہ آھو (جھاؤ) ءِ وتی نُبجلاں شادیانی کرتگ، چہ اے گپّ ءَ ھمے پدّر بیت ایشانی کارست پہ پوج ءُ ھندی دلاراں تُرسناک بوتگ ۔

دو ھزار شانزدہ ءِ گُڈسر ءَ شھید مھیم جان ، شھید اورنگزیب ءُ شھید گلشیرجان ، لھتیں مہمان ءِ گوازینگ ءَ روگ ءَ بنت، جاہ آھو ءِ ڈّن ءِ ھوٹل ءَ ناگت ءَ گوں پوج ءِ موٹرسائیکل سواریں کاروان ءَ ڈیک دینت، گڑا نہ تچ اَنت پدکنز بوگ ءِ دروشم ءَ جند ءِ اِش جَنگ بوگ ءِ گُمان بیت، دیم ءَ آؤکیں موٹرسائیکل سواریں دو پوجیگ جَن اَنت ءُ دیم پہ دیم دَر کاانت وتی ھمراھاں رکینگ ءَ سوبمند بنت، پوج گوں ایدگہ چار موٹرسائیکلاں میتگ ءِ تہ ءَ دَور کن اَنت ءُ وتی ساہ بچّاینگ ءَ سوبین بنت ، وتی تیروارتگیں ھمراھانی سُد ءَ نہ بوتگ اَنت، وھدیکہ وتی بنجل رس اتگ اَنت شیرینی ھیرات اِش کرتگ دگّ ءِ سر ءَ ھمّک روک ءُ آؤکیں مردم ءِ را داتگ اش، اے وڑ اش گوشتگ” آج اِن پاگل سرمچاروں سے ہمیں اللہ نے بجایا، واقعی یہ لوگ پاگل ہیں اے میتگ ءِ مردمان ءَ تاں دیر پہ پوج ءَ مزاک کرتگ اَت یکرندے ایم آئی ءِ آپیسر” ھارون ساھب ءَ شھید مھیم جان ءِ پون لمبر چہ کسے ءَ گپیتگ زنگے جتگ گوشتگ ئِے بیا تُپنگ دَور دے بزانکہ سرینڈر بہ کن ،مھیم جان ءَ اناں کرتگ ءُ گؑڑا جَنگ ءِ بیھار داتگ ئِے” مھیم جان ءِ دومی ھمراہ گوش ایت آئی پسو ترّینتگ گوشتگ ئِے من تئی دست ءَ اتکاں من ءَ وتی سر ءَ بہ جَن، اگاں تو منی دست ءَ اتک ئے او ھارون “من ترا ھلار کناں ءُ گُٹے ھون ور آں ۔

ھپت تومشان (ستمبر ) دو ھزار بیست ءَ سرجمیں جاہ آھو ءَ مجاں گپت ءُ راج پھازیں کنگر شھید مھیم جان شھید اورنگ جان ،شھیدراشد جان ءُ گلشیر جان ءِ شھید بوگ ءِ ھال شنگ بیت، تیوگیں راج گمیگ ءُ پرسیگ بیت ۔

من شھید مھیم جان، اورنگ جان، راشد جان ءُ گلشیرجان ءَ شھادت ءِ سیمی سالروچ ءِ درگت ءَ گوں دراھیں شھیداناں سھریں دروت ندر کناں ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان لبریشن فرنٹ ءِ جارکش میجر گوھرام بلوچ ءَ کیچ ءِ دمگ ڈنڈار ءَ پاکستانی پوج ءِ سر ءَ بیتگیں اُرش ءِ زمہ واری منّ اِتگ –

جارکش ءَ رسانکدراں شنگ کرتگیں درشان ءِ تہ ءَ گُشتگ اَت کہ دو شمبے ءِ سھب ءَ سرمچاراں کولواہ ءِ دمگ رودکا ءُ آشال ءِ میان ءَ دشمنیں پاکستانی پوج ءِ یک گاڑی یے تراکناکیں شورونی گون ءَ نشانگ کرتگ –

آئی ءَ گُشتگ کہ فوجی کاروان ءَ ھواریں یک پک اپ گاڑی یے شوروانی زد ءَ اتکگ ءُ چریشی ءَ چار کارمند مرتگ اَنت ءُ سَے زدگ بیتگ اَنت –

میجر گوھرام بلوچ ءَ گیش گشتگ اَت کہ زورگریں پوج ءِ سر ءَ اُرش زیردستیں بلوچستان ءِ آجوئی ءَ داں برجاہ مان اَنت –

نبشتانک: شھید نور خان منی نزیکیں ھمراھے اَت

نبشتہ کار: شیھک شاہ

دی بلوچستان پوسٹ

ما وھدے چہ وتی میتگ ءَ پنچمی کلاس گوازینت دیمتر ءَ پہ وانگ ءِ ھاتر ءَ ھیرآباد ءَ شُت اِیں ھیر آباد ءَ من ءَ باز جوانیں سنگتے دست کپت بلے کُلیں سنگتاں چہ یکے ءِ سنگتی جتا اَت کہ آ نور خان اَت ما یکجاہ نشت ءُ پاد آتکیں وھدے بی ایس او ءِ سرکل بوت اَنت گُڑا ما دوئیناں بھر زُرت پد ءَ ما ھر دوئیناں ھیرآباد یل کُت نور کیچ ءَ شُت وانگ ءَ من دیم پہ شال ءَ بلے ما وتی راہ گچین کُتگ اَت کہ مارا چی کنگی اِنت دیمتر ءَ –

بلے نور خان اِے راہ ءِ مساپر بیت من نزانتگ اَت ،من چہ شال ءَ درآتک آں اِے وھد دو ھزار ءُ سیزدہ اَت،ما بلوچستان ءِ کوہ وتی جاہ کُت اَنت پہ بلوچ ءُ بلوچستان ءَ وھد گوزان اَت دوھزار ءُ چاردہ اَت من شھید نور خان ءَ گوں ڈیک وارت اِے وھدی من ءَ بی این ایم ءِ سنگتانی لھتے کتاب ءُ پمپلیٹ گون اَت یک سنگتے ءَ دیگی اِت اَنت-

شھید نور خان ءَ من ءَ جُست کُت ھالاں دے اِے چی اَنت من گُشت کتاب اَنت گُڑا نور ءَ گُشت من ءَ کتاب ءُ پمپلیٹ بہ دے من گُشت سنگتانی کتاب اَنت ،بلے من ءَ دیگ ءِ موکل ھست من لھتے دات ءُ نور خان ءَ گُشت تو بی ایل ایپ ءِ سنگتاں گوں گون ئے یا بی این ایم ءَ ؟ اِے وھدی من وتی سِلاہ بندی ءِ راز چیر دات ءُ گُشت یار من بی این ایم ءِ سنگتے آں بلے تو چی کنگ ءَ ئے نور ءَ بچکند اِت ءُ گُشت من چہ شُما دور نہ آں سنگتانی واست ءَ کار ءَ آں منیگی ھرچ کارے بیت دمگ ءَ من ءَ بگُش اِت من گُشت زرور جان وھد گوزان بوت پد ءَ من نور نہ دیست دو ھزار ءُ شانزدہ ءَ من ءَ ھلیل ساچان ءَ پون کُت ما آتکگیں تئی دمگ ءَ جالبار ءَ داشتگ ءُ تئی سنگتے من ءَ گون اِنت بیا مگرب ءِ وھد اَت من ھم جیڑ اِت ساچان ءَ کے گون اِنت ھیر من دیم پہ سنگتاں شُت آں سنگت نشتگ اِتاں ساچان ءِ ھمراہ شھید جاڑ جان ءُ شھید اُستاد نور دگہ بازیں سنگت گون اِت ئِے من گوں اِیشاں دست ءُ دُروت بوتاں لھتے سنگت کر ءَ نشتگ اَت پاد آتک ءُ آتک اَنت ،یکے شھید نور خان اَت کہ اِد ءَ برمش ءِ نام ءَ سنگتاں توار کُت من کہ برمش دیست ھردو گُلائیش بوت این ءُ کند اِت ساچان ءَ گُشت ھمیش اِنت تئی سنگت ترا لوٹگ ءَ بوتگ من ءَ تئی بارو ءَ گُشتگ ئِے اِد ءَ من ءَ نزیکیں سنگتے ھست بی این ایم ءَ اِنت بلے نزانتگ ئِے تو بلوچ سِلاہ بندیں گَل بی ایل ایپ ءَ گوں ھوار ئے من کند اِت ءُ گُشت من وت گُشتگ من بی این ایم ءِ سنگتے آں بلے ھیر ھردو سِلاہ بندیں نوں ھیر بیت وانگجاہ ءِ وھدے سنگت ایں ما کہ یکجاہ بئیں دُژمن الم سُچ اِیت گُڑا ما ھمود ءَ چہ یکجاہ بوتیں داں دیریں وھدے ءَ ھمراہ بوتین ءُ کار کُت سنگتاں مارا برے جاڈُک جمہ ءِ نام بست ءُ برے دگہ نامے ما برے ماں سیاھجی ءُ برے ماں کُلبرے بنداں گردگ ءَ اِت ایں، مارا انچُش سما بوت کہ سرجمیں دمگ مئے لیبجاہ اِنت۔
ما دُژمن ھچ مان نیاؤرت انگت مان نیاران ئِے تمپ ءُ کیچ ءِ ھوار بلوچستان ءِ اِے دگہ دمگاں سر ءِ بازار اِت ایں مئے دل ءَ اِے چیز ھچ نیاتک کہ ما چُش کنگ ءَ اِیں ما جَنگ بہ ایں ما زیادھی کُت برے شپانی نیم ءَ مین روڈ دگ ءِ سر ءَ گوں پرپٹ ءَ ویل اِت ایں کہ دُژمن کیت بل مئے دُمب ءَ کپ اِیت ما وتی سنگراں رویں دُژمن ءَ جن ایں۔

نور خان یک نہ تُرسیں سنگتے اَت سکیں دلیرے اَت منی مرچی یک باسکے چہ من جُتا اِنت من ھر وھدے کہ دمگ ءَ رواں گُڑا من ءَ نور خان ءِ کمی ءَ سک مار آں بلے لھتے انچیں جاہ ھست کہ اود ءَ بازیں کسہ بندوک اَنت کہ اِے جاہ من ءَ برمش ءِ ترانگ ءَ پرین اَنت ءُ منی چمانی ارس رچ اَنت نزاناں نوں برمش ءِ وڑیں نہ تُرسین ءُ دلیریں سنگت من ءَ دست کپ اِیت یا ناں؟ بلے برمش تو اشتاپ کُت من تھنا بوتاں جان تو شھیدی ئے جام نوش اِت ءُ نمیران بوت ئے من گوں سنگتاں ھوار دیم ءَ جُنزان آں مُدام تئی نام ءَ گران ءُ دیم ءَ روان آں تو بےکساس یات کا ئے-

بس ھمینچو گُشاں تو وتی برات شیھو تھنا کُت بلے برمش من پھر بنداں کہ منی نزیکترین ءُ دوستریں سنگت پہ زمین ءَ کُربان بوت منی مھروان من ھم پہ گُلزمین ءَ شھید باں ءُ پہ ترا کایاں پد ءَ ھمود ءَ یکجاہ بہ ایں ءُ دیوان کن ایں ھما دیوان کہ دربرجاہ ءِ وھد ءَ من ءُ تو ءُ ایندگہ سنگتاں کتگ اَنت۔ کُل شھیداں سلام کن۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔